Ŋwaꞌlə Pita Beꞌsə Vəbɔɔ
Taa ŋwaꞌlə Pita beꞌsə vəbɔɔ ŋwə kɔ ntɨ kɔ̀ŋ vɨɨ mədeesə faŋ vəŋ kee deesə nu Nwi jəə me. Ŋwə baa gi nu kɔ̀ŋ nshinə yibwə faŋ nyə fuu fɨ maa mədeesə bwə. Vɨɨ mbɨə faŋ vəŋ nə yè Yeso nə yisɨ nə fɨꞌtə ntɔŋ yijəə Nwi yinsəŋ. Bàw mənuŋ fwi maa ntɔŋ yijəə yɔ́. Vɨɨ mbɨə faŋ vəŋ twey laa Kristo kee ndɔ bəŋ jwi me, sɨɨ ba. Faŋ Kristo tay buu jwi nə, ŋwə kɔ̀ jɨɨ tɨ́ vɨɨ vəyaŋ maa məkwiinə fwisə vəŋ.
Məsenə vəwaytə:
Vənzi və ŋwaꞌlə 1.1-2
Nshinə vɨɨ Kristo 1.3-21
Vɨɨ mədeesə faŋ kee lùu vɨɨ mədeesə jəə me 2.1-22
Faŋ Kristo ndɔ bəŋ jwi 3.1-18
1Shɔꞌtə Pita tɨ́ vɨɨ Nwi
1Lùu mə, Saymon Pita, faŋ mə luu wuu faꞌ Yeso Kristo, baa lùu wuu ntɔŋ wi nɨzi, faŋ mə tɔ̀ŋ ŋwaꞌlə ŋwə̀ tɨ́ vɨɨ mbɨə faŋ vəŋ nùŋ fwisə vəŋ maa Nwi. Nshɨ-tɔ wia nùŋ fwi sia maa Nwi sheꞌ nɨniŋ, baa nə maa Yeso Kristo, wuu məbweysə ŋwaa-nsiŋ, faŋ ŋwə nə kìasə nu kaŋ-nsiŋ, ŋkə loomə. 2Nwi kuꞌsə viŋ, kɔ mənɔŋ-bwaŋnə tɨ́ viŋ, viŋ kɨ gə vɨsɨ vɨsɨ, faŋ viŋ zɔ nu Nwi nə nu Yeso Kristo, faŋ lùu tɨta ŋwaa-nsiŋ nə.
Nshinə njyə faŋ nyə kùꞌnə tɨ́ vɨɨ Nwi
3Nwi faŋ ŋwə kìi wutə kənshə, kèy nsiŋ nə vənu vənshə, faŋ mbə kùꞌnə maa məzɨ məbwey vəlwaŋ, nə maa məshi nə nshinə yijəə. Nwi nə kɔ̀ vənu vɔ́ tɨ́ nsiŋ buꞌ faŋ nsiŋ kɨ̀ɨ nə Yeso Kristo, faŋ ŋwə nə shòꞌ nsiŋ nə wutə ki, baa nə taa nshinə yijəə yi nə. 4Nɨniŋ, ŋwə nə kèy nsiŋ nə vənu vəkwalə mbɨə faŋ ŋwə nə kɔ̀ꞌnə maa məkɔ tɨ́ nsiŋ, faŋ lùu ŋkee sey kwalə tɨ́ nsiŋ. Buꞌ vənu vɔ́, kaꞌ viŋ nyɨŋ fɨ ghɔ vənu vəbwəvə faŋ mbə lùu taa mbi, faŋ lùu mbɨꞌtə vɨɨ məyɨ vənu vəbwəvə. Kaꞌ viŋ bee kii jwi kìi nshinə yaa njyə Nwi.
5Nɨniŋ, mə gì tɨ́ viŋ, faŋ viŋ bìŋ Yeso Kristo nə, laa viŋ kəweꞌ, shi nshinə yiŋ faŋ nyə bàw shɨ̀lə. Faŋ viŋ shi nə nshinə yijəə yɔ́ nə, viŋ kɨ toꞌ nə yitɔfə nɨzi. 6Faŋ viŋ toꞌ nə yitɔfə nə, viŋ kɨ jia yiŋwaa yiŋ, baa weꞌ maa vənu vɔ́. Faŋ viŋ nuŋsə, jìa vənu vɔ́, wèꞌ shɔ nə, viŋ baa kɨ zɔnə Nwi nɨzi. 7Faŋ viŋ zɔnə Nwi nɨniŋ nə, viŋ kɨ kaw vaŋ-nshwi viŋ maa yizii Yeso Kristo. Faŋ viŋ kaw vaŋ-nshwi viŋ nɨniŋ nə, viŋ kɨ kaw vɨɨ vənshə. 8Viŋ kɔꞌ kɨɨ laa, viŋ kɨ luu kɨ yɨsə vənu vɔ́, gə vɨsɨ vɨsɨ, buu məkɨɨ faŋ viŋ kɨ̀ɨ nə tɨta Yeso Kristo nə, kee ndɔ luu nu dayday me. Vənu vəjəəvə ndɔ fuu fɨ maa vənu vənshə faŋ viŋ yɨsə. 9Gə̀ fɨ maa vɨɨ faŋ vəŋ kee yɨ̀ vənu vɔ́ me, vəŋ yɨ yaa vɨɨ faŋ vəŋ lùu vɨɨ sɨ fɨsə, faŋ vəŋ kee ye vədɨꞌ me. Vəŋ ndenə laa Nwi nə sɔ̀ vənu vəbwəvə vəŋ faŋ vəŋ nə yɨ̀ yighee vɨsɨ.
10Nɨniŋ, vaŋ-nshwi vaŋ, viŋ kɨ tɨŋnə weꞌ maa vənu vɔ́, laa viŋ ndɔ zɨ vənu mbɨə faŋ Nwi nə tìi viŋ shɔ nə. Viŋ kɨ luu kɨ beꞌsə vənu vɔ́, kaꞌ viŋ kee ndɔ baa gu me. 11Nɨniŋ, viŋ taa kii jɨɨ yinsəŋ maa məŋii taa yifwàŋ Yeso Kristo, faŋ luu mbweysə nyaa-nsiŋ; nsiŋ vɨ vəŋ taa gòꞌsə shɔ yighee muꞌ.
Ŋiꞌ ntɨ Pita kɔ̀ŋ nshinə yijəə yɔ́
12Lùu nu ŋkɨə faŋ mə naysə tɨ́ viŋ ghee nshə, mə taa kɔꞌ kɨ lɨlumə vənu vɔ́ tɨ́ viŋ, faŋ viŋ kɔlə kɨ̀ɨ nə mbə, baa wèꞌ shɔ maa vənu və yinsəŋ vɔ́ faŋ viŋ kɨ̀ɨ nə mbə nə. 13Mə ye laa ŋkə bàw laa mə taa kɔꞌ kɨ lɨlumə vənu vɔ́ tɨ́ viŋ, gə kɔ tɨ́ yighee njyə faŋ mə ndɔ bəə fɨ mbi. 14Mə kɔꞌ kɨɨ laa, goꞌ sheꞌ fɨkɨꞌ nee, mə gwəkə bə̀ə fɨ mbi, sheꞌ faŋ tɨta Yeso Kristo nə nàysə shee. 15Mə kəə yɨ̀ nu ŋkɨə faŋ kaꞌ mə yɨ̀ maa məkɔ jɨɨ tɨ́ viŋ, tɨ́ kɨ kaꞌ viŋ kɨ lumə vənu vɔ́ ghee nshə faŋ mə taa kɔlə bəə fɨ mbi.
16Viŋ kɔꞌ kɨɨ laa vənu mbɨə faŋ yia nə fɨ̀ꞌtə tɨ́ viŋ kɔ̀ŋ wutə Yeso Kristo, baa nə laa ŋwə ndɔ bəŋ jwì fùu ntee, kee luu sheꞌ mətiitii faŋ nə bɨ̀ꞌtə wə mənsaw nə yitɔfə yi me. Nshɨ-tɔ wia nə yè feenə wi nə yisɨ. 17Yia nə luu shɔ maa yighee njyə faŋ Nwi nə də̀ məkwalə Yeso Kristo nə feenə wi. Yia nə zɔ̀ faŋ Nwi, faŋ ŋwə kìi wutə kənshə nə, nə gì laa, «Lùu ŋwiŋ ŋwaa nə faŋ mə kàw ŋwə. Ŋwə baw too mə dɨdɨꞌ.» 18Nshɨ-tɔ wia nə luu shɔ fuu baŋ Nwi, yia vɨ tɨta Yeso, zɔ̀ gɨ Nwi nə tuulə ghia faŋ nyə nə siꞌ jwì fɨ yizɔ. 19Yigisə nshiisə-ŋii sɔghɔ kɔ̀ŋ Yeso luu ŋkee yiley tɨ́ yia ndwə buꞌ nu kɔ́. Bàw viŋ kwaŋ fwi siŋ maa yigisə yɔ́ nɨzi, buꞌ laa nyə lùu yaa kiꞌ faŋ ŋwə bee taa mfiŋsə gə zìꞌ maa yighee njyə faŋ fu lee. Yighee njyə faŋ fəjwiŋ fɨ taa nshia-ndoo-mbisɨ, faŋ lùu Kristo nə, ndɔ jwi yɨ viŋ, viŋ ye vənu vənshə vəley. 20Viŋ kɔꞌ kɨɨ laa tuu yigi faŋ nshiisə-ŋii sɔghɔ nə gì, faŋ vɨ nə baa nyɔ̀ꞌ taa ŋwaꞌlə Nwi, kaꞌ vɨ kee twèlə ŋiꞌ ki sheꞌ fɨ maa yitɔfə wə mənsaw me, 21buꞌ laa tuu yigi, faŋ nshiisə-ŋii sɔghɔ nə gì nə, kee lùu mbɨꞌtə wə mənsaw me. Nə luu Zwitə Ley Nwi, faŋ ŋkə nə ŋìi taa fwisə vɨɨ, yɨ̀sə vəŋ gisə yigi faŋ nyə ndɔ̀ fɨ ghɔ Nwi.
2Yigi kɔ̀ŋ vɨɨ mədeesə faŋ vəŋ sɨɨ təba
1Luu nə, vɨɨ faŋ vəŋ nəə toꞌ, sɨ̀ɨ təba, gisə yigi laa lùu yigisə shuu Nwi, nə lùu taa ŋwaa vɨɨ Nwi nɨzi. Ŋkə ndɔ lùu taa ŋwaa viŋ sheꞌ nɨndɨŋ, vɨɨ ndɔ jwi faŋ vəŋ toꞌ deesə təba tɨ́ vɨɨ. Vəŋ taa kɨ toꞌ taa ŋwaa viŋ fɨ yiba, deesə mədeesə bwə, faŋ ŋwə taa bɨsə mbɨꞌtə vɨɨ. Vəŋ ndɔ twey tɨta Yeso, faŋ ŋwə nə bwèysə vəŋ fɨ maa vənu vəbwəvə vəŋ. Luu nə, sheꞌ fɨkɨꞌ nee, Nwi taa kwaŋ vəŋ ŋkee taa ŋɨꞌ. 2Vɨɨ vəyaŋ ndɔ beꞌsə vəŋ maa vənu vəbwəvə vəŋ faŋ vəŋ yɨsə, nɨniŋ laa vɨɨ kɨ gisə bwə kɔ̀ŋ nu Nwi yinsəŋ. 3Vɨɨ mədeesə bwə vɔ́ ndɔ kɨ kaw maa məzɨ shɨ. Vəŋ sɨɨ təba, bwèꞌsə viŋ, tɨ́ kaꞌ vəŋ sey fɨ fuŋ. Luu nə, shù fɨshi, Nwi faŋ ŋwə yaa kɨ sɔꞌ nsɔꞌsə vɨɨ nə, kwaŋ vəŋ taa nsɔꞌ. Yighee njyə faŋ Nwi ndɔ ndisə vəŋ, lùu nshənə.
4Viŋ kɔꞌ kɨɨ laa, yighee njyə faŋ ŋkee nshiisə-ŋiisə Nwi nə yɨ̀ nu bwə, Nwi nə kee mèꞌtə vəŋ me. Nwi nə kwaŋ vəŋ taa shəŋ wi faŋ ŋwə kee yaa kɨ ndɨɨnə me. Vɨ ka vəŋ nə vəsumə, vəŋ duꞌ taa shəŋ mfiŋsə, vəŋ taa goꞌ yifi gə ziꞌ tɨ́ shi nsɔꞌ Nwi. 5Gə fɨ maa vɨɨ vɨsɨ faŋ vəŋ nəə yɨ vənu vəbwəvə, Nwi nə kee mèꞌtə vəŋ me. Nwi nə yɨ̀sə laa muu fuu ndìsə vəŋ, faŋ vəŋ nəə kee zɔnə Nwi me. Nə luu sheꞌ Noa ghɔ vɨɨ vi kwatia nə, faŋ Nwi nə bwèysə vəŋ fɨ ghɔ muu mbɔ́, buꞌ laa Noa nəə naysə tɨ́ vɨɨ laa vəŋ kɨ yɨ vənu vəjəəvə. 6Gə fɨ maa məshɨ mə Sodom nə Gomora, Nwi nə kwàŋ vɨɨ mbɨə faŋ vəŋ nə luu taa məshɨ mbɔ́ nə taa nsɔꞌ. Nwi nə yɨ̀sə wisə twàŋ məshɨ mbɔ́ məmbɔɔ, mbə gu vəbu. Nɨniŋ, Nwi nə kɔ̀ shwenə tɨ́ vɨɨ vənshə faŋ vəŋ kee zɔnə ŋwə me, laa vəŋ kɔꞌ kɨɨ laa Nwi ndɔ ndisə vəŋ sheꞌ nɨndɨŋ. 7Nə luu maa yighee yɔ́, Nwi nə bwèysə Lɔt, faŋ nə luu wuu jəə. Fwi yi nəə ghaysə ŋwə dɨdɨꞌ buꞌ vənu vəbwəvə faŋ vɨɨ vɔ́ nəə yɨsə. 8Lɔt faŋ nə luu wuu ley nə, nəə shi taa ŋwaa vɨɨ faŋ vəŋ nə yɨsə vənu vəbwəvə. Ŋwə nə ye baa zɔ̀ vənu vəbwəvə vəyaŋ faŋ vɨɨ vɔ́ nəə yɨsə nə, shi shi. Vənu vəbwəvə vɔ́ za ŋwə fɨ taa fwi ŋwə ŋkee dɨdɨꞌ, buꞌ laa nshɨ-tɔ wi nə luu wuu loomə.
9Vənu vəmwavə vɔ́ də̀ tɨ́ nsiŋ laa, Nwi kɔꞌ kɨɨ nə jɨɨ faŋ kaꞌ ŋwə bwèysə vɨɨ vi fɨ ghɔ məmɔŋ nə vənu vəbwəvə, baa kɨɨ nə jɨɨ faŋ ŋwə ndɔ kwaŋ vɨɨ məyɨ vənu vəbwəvə taa ŋɨꞌ, maa shi nsɔꞌ Nwi. 10Vɨɨ mbɨə faŋ Nwi ndɔ kwaŋ taa nsɔꞌ shɔ̀ɔ ki, lùu vɨɨ mbɨə faŋ vəŋ yɨ sheꞌ vənu vəbwəvə faŋ mbɨꞌtə vəŋ də tɨ́ vəŋ, baa nə faŋ vəŋ twey maa məzɔnə Nwi. Vɨɨ vɔ́ faŋ vəŋ toꞌ deesə nu faŋ kee lùu nu yinsəŋ nə me, vəŋ koꞌsə ŋwaa vəŋ dɨdɨꞌ, kee fee maa məgi nu bwə kɔ̀ŋ vəzwitə mbɨə faŋ mbə kìi wutə yizɔ nə me. Vəŋ toꞌ ndasə vəzwitə vɔ́. 11Ŋkee nshiisə-ŋiisə Nwi, faŋ vəŋ shɔɔ vɨɨ vɔ́ nə wutə, kee bee gi nu bwə kɔ̀ŋ vəŋ vɨsɨ Nwi me.
12Vɨɨ vɔ́ gisə bwə kɔ̀ŋ vənu faŋ vəŋ kee kɨ̀ɨ nə mbə me, vəŋ yɨ vənu yaa nyaasə faŋ nsə kee kìi tɔ ley maa məbɨꞌtə nu me. Nyaasə kee kɨ̀ɨ nə nu me, kaꞌ wə jia zwi. Yinsəŋ vɨɨ vɔ́ ndɔ ndi yaa nyaasə sɔ́. 13Nwi ndɔ ndɔꞌ tɨ́ vəŋ nə ŋɨꞌ sheꞌ faŋ vəŋ nəə kɔ ŋɨꞌ tɨ́ vɨɨ nə. Vəŋ kəə sheꞌ maa məzɨ yiŋwaa vəŋ, yɨ nu kɔ́ ŋkee nə shɨshwi. Nshinə vəŋ luu ŋkee nu tɔ dɨɨ tɨ́ vɨɨ Nwi. Viŋ vɨ vəŋ dùꞌ mɔ́ꞌ zɨ nu, vəŋ kɨ gə yiba, vəŋ yɨ vənu vəbwəvə faŋ vəŋ kàw. 14Vəŋ bɨꞌtə sheꞌ vənu və vəki maa mətii vəŋ ghee nshə. Kaꞌ vəŋ kee bwà fɨ maa məyɨ vənu vəbwəvə me. Vəŋ bweꞌsə vɨɨ mbɨə faŋ vəŋ kee luu vəweꞌ maa nu Nwi me, laa vəŋ yɨ vənu vəbwəvə nɨzi. Vəŋ kəə sheꞌ sey ka nə vətɔ. Kəŋ vɨɨ vɔ́ lùu taa nsɔꞌ Nwi. 15Vəŋ mèꞌtə jɨɨ yiloomə, kɨ beꞌsə jɨɨ nshiiŋii-sɔghɔ Balaam, wee Bio, faŋ ŋwə nə kàw maa məsey ka fɨ maa nu bwə. 16Luu nə, Nwi nə shə̀ tɨ́ ŋwə maa yighee yɔ́, yɨ̀ laa jakasə gi tɨ́ ŋwə, faŋ jakasə kee yaa kɨ gisə yaa wə nə me. Jakasə ghɔ́ nə gì tɨ́ ŋwə, buu ŋwə kee baa kɨ yɨ nu vəmfaw kɔ́ me. 17Vɨɨ vɔ́ lùu yaa koꞌ-fɨ-nsi faŋ ŋwə kee kìi muu me. Vəŋ baa lùu yaa mbɔꞌ fɨ taa yizɔ faŋ fɨɨ yaa kɨ shɔɔ saynə, tɨ́ kaꞌ mbɔꞌ yɔ́ kee baa jwì nə yighuu me. Nwi nùŋsə shəŋ tɨ́ vɨɨ vɔ́, faŋ luu ŋkee shəŋ taa mfiŋsə. 18Vəŋ yaa kɨ toꞌ koꞌsə ŋwaa, gisə yigi faŋ nyə kee kìi tɔ ley me. Fwisə vəŋ ndɔ maa vətɔ faŋ yiŋwaa yivəŋ kàw. Vəŋ kaw maa məzɨ shɨ, suŋtə vɨɨ mbɨə faŋ vəŋ duꞌtə vəŋ nyɨŋkə fɨ ghɔ vɨɨ bwənə, laa vəŋ bəŋ kɨ toꞌ ghuu yitoꞌ vəŋ maa jɨɨ yibwə, faŋ vəŋ nə nyɨ̀ŋkə fɨ maa jɨɨ yibwə yɔ́ sheꞌ maa kuŋtə yighee nə. 19Vəŋ kɔꞌnə vɨɨ vɔ́ laa vəŋ ndɔ duꞌ tɔ vəŋ, luu nə, nshɨ-tɔ vəŋ faŋ vəŋ gisə yigi yɔ́ nə, lùu vəbuꞌ tɨ́ nu bwə, nu bwə kɨ bii ka vəŋ. Viŋ kɔꞌ kɨɨ laa fa tɨ̀ me fa faŋ ŋkə sɔꞌ wə, wə ghɔ́ lùu buꞌ tɨ́ fa kɔ́.
20Gə fɨ maa vɨɨ mbɨə faŋ vəŋ nə nyɨ̀ŋ vənu vəbwəvə faŋ mbə lùu mbi nə, buꞌ faŋ vəŋ nə kɨ̀ɨ nə tɨta Yeso Kristo faŋ lùu wuu məbweysə vɨɨ nə, kɨ luu laa vəŋ baa bə̀ŋ gə̀ bèꞌsə vənu vəbwəvə vɔ́, ŋìi taa vənu vəbwəvə vɔ́, mbə fi vəŋ, buu ŋkə bɨ̀ maa vəŋ shɔ̀ɔ yighee vɨsɨ faŋ vəŋ nə kee ta kɨ̀ɨ nə Yeso Kristo me. 21Ŋkə nə bàw tɨ́ vəŋ laa kɨ vəŋ fɔŋ bɨ kɨ̀ɨ nə jɨɨ faŋ lùu jɨɨ yiloomə me, fɨ ghɔ vəŋ kɨ̀ɨ nə jɨɨ yɔ́, baa bəŋ kìasə ŋwaa vəŋ, mèꞌtə ntɨsə Nwi, kee baa kɨ beꞌsə ntɨsə sɔ́ faŋ vɨ nə fɨ̀ꞌtə tɨ́ vəŋ nə me.
22Nu vɨɨ vɔ́ də̀ tɨ́ nsiŋ laa, yigisə tii yimɔ́ꞌ luu nu yinsəŋ. Nyə lùu laa, «Bu yaa kɨ tu baa bəŋ zɨ̀ sheꞌ fa kɔ́,» 2.22 Təgi tə Tii 26.11. baa nə laa, «A kɔlə sɔ̀ ŋwaa ŋkwinyaa ŋwə ley, buu ŋwə taa ye shiatə, baa kɨ bɨ̀ŋlə taa tey yi.»
3Faŋ Yeso ndɔ baa bəŋ jwì yinsəŋ
1Vɨɨmba vaŋ faŋ mə kàw, lùu vəŋwaꞌlə lwesə vəbɔɔ, faŋ mə nyɔ̀ꞌ tɨ́ viŋ. Taa vəŋwaꞌlə vɔ́ vəbɔɔ nə, mə kɨ lumə vənu tɨ́ viŋ faŋ viŋ duꞌtə viŋ kɨ̀ɨ nə mbə, tɨ́ kaꞌ viŋ yenə fɨ mbweysə, kɨ kii tɔ ley maa nu Nwi. 2Mə nyɔ̀ꞌ vənu vɔ́ laa, viŋ kɨ lumə təgi tɔ́, faŋ nshiisə-ŋii sɔghɔ nə nàysə fɨshi, baa nə laa viŋ kɨ lumə ntɨ njyə faŋ tɨta Yeso faŋ lùu wuu məbweysə ŋwaa-nsiŋ, nə nàysə tɨ́ viŋ, laa viŋ kɨ yɨ. Ŋwə nə nàysə vənu vɔ́ tɨ́ viŋ, mbə shɔɔ fɨ ghɔ vɨɨ ntɔŋ vi, vəŋ naysə tɨ́ viŋ. 3Viŋ kɔꞌ kɨɨ jəə jəə laa vɨɨ məshɨꞌ vɨɨ Nwi ndɔ fuu, kɨ shɨꞌ viŋ shɨshɨꞌ maa yighee shə. Vɨɨ vɔ́ ndɔ kɨ yɨsə sheꞌ vənu faŋ too vəŋ kàw, kɨ shɨꞌ viŋ shɨshɨꞌ, 4gì laa, «Yeso Kristo nə bee kɔ̀ꞌnə laa yi ndɔ baa bəŋ jwì lee? Ŋwə sii bə?» baa nə laa, «Vənu vənshə luu sheꞌ faŋ mbə nə dùꞌ shù fɨ faŋ mbi nə tèy, shù fɨ faŋ vətɨɨ vaŋ-nsiŋ yaa kùkə nə. Tuu nu kee yikwiinə me.» 5Vɨɨ vɔ́ faŋ vəŋ gisə nɨniŋ nə, vəŋ manə nu kəmuꞌ, laa yizɔ nə nsi yimɔ́ꞌ nə luu shɔ ŋkee fɨshi. Maa yighee yɔ́ Nwi nə gì laa nsi yɔ́ fuu fɨ maa muu. Nsi yɔ́ kɨ nii fùu fɨ maa muu. 6Nə baa luu ŋkee muu faŋ Nwi nə ndì maa məbɨsə mbi yimwa yɔ́ shɔ, yighee njyə faŋ muu nə fùu, lwàŋ shɨ nsi, zwìlə vɨɨ vənshə. 7Nwi nə baa gì laa yizɔ ghɔ nsi faŋ vɨ ye ndee, ndɔ twàŋ wisə twàŋ nyə yinshə. Yizɔ nə nsi ndɔ goꞌ kɔ̀ tɨ́ yighee njyə faŋ Nwi ndɔ kɨ sɔꞌ nsɔꞌsə vɨɨ, ndìsə vɨɨ bwənə faŋ vəŋ kee zɔnə ŋwə me.
8Vɨɨmba vaŋ faŋ mə kàw, kɨ viŋ manə nu kwalə mɔ́ꞌ me, laa vɨsɨ Nwi, shi kəmuꞌ kee lùu nɨŋkwiŋ fɨ ghɔ ŋuꞌ ŋkaŋ me, ŋuꞌ ŋkaŋ kee lùu nɨŋkwiŋ fɨ ghɔ shi kəmuꞌ me. Nwi ndi sheꞌ yaa fa kəmuꞌ. 9Vɨɨ mɔ́ꞌ bɨꞌtə laa Nwi tày dɨdɨꞌ, baa nə laa ŋwə kee ndɔ yɨ nu ŋkɨə faŋ ŋwə nə kɔ̀ꞌnə laa yi ndɔ yɨ me. Ŋkə kee lùu nɨniŋ me. Ŋiꞌ nu kɔ́ lùu laa, Nwi jìa fwi yi tɨ́ viŋ, kɔ̀ jɨɨ tɨ́ vɨɨ laa vəŋ kwiinə fwisə vəŋ. Nwi kee kàw laa vɨɨ mɔ́ꞌ lee məbwey vəlwaŋ me. Nwi kəə laa vɨɨ vənshə kwiinə fwisə vəŋ.
10Viŋ kɔꞌ kɨɨ laa, yighee ndɔ kɨ kuꞌ, faŋ tɨta Yeso ndɔ bəŋ jwì, ŋwə ndɔ gwəkə jwi yaa ndɔꞌ, faŋ ndɔꞌ yaa kɨ jwi faŋ vɨɨ kee yikɨɨ me. Maa yighee yɔ́, vɨ ndɔ zɔ gɨ yikwalə yimɔ́ꞌ laa «kwaŋ», yizɔ kee baa lùu shɔ me. Vətɔ fɨ yizɔ nə fɨ nsi yey taa wi vənshə, mè laylay. Nsi nɨzi, ghɔ vətɔ vənshə faŋ mbə lùu shɔ, me vənshə. 11Nɨniŋ, bàw viŋ shi kɨ kɨꞌ, faŋ viŋ duꞌtə viŋ kɨ̀ɨ laa vətɔ vənshə ndɔ ndi. Viŋ shi nə nshinə njyə faŋ nyə kùꞌnə tɨ́ vɨɨ Nwi, kɨ zɔnə ŋwə maa vənu vənshə. 12Viŋ tə sɨ ghiŋ maa shi ŋkɨə faŋ Nwi ndɔ jwi sɔꞌ mbi, kɨ yɨ laa kaꞌ shi kɔ́ yasə jwì. Lùu shi ŋkɨə faŋ yizɔ ndɔ kɨɨ shɔ ndì. Vətɔ vənshə fɨ yizɔ nə fɨ nsi ndɔ yey taa wi. Tuu kee fa kee ndɔ goꞌ me. 13Luu nə, Nwi kɔ̀ꞌnə nsiŋ laa Nwi ndɔ naysə yizɔ yifinə nə nsi yifi, faŋ vənu vənshə ndɔ luu vəloomə. Lùu nu ŋkɨə faŋ nsiŋ kɨꞌ laa ŋkə ndɔ gay.
Faŋ bàw viŋ lootə yiŋwaa, kɨ kɨꞌ shi ŋkɨə faŋ Yeso ndɔ bəŋ jwi
14Nɨniŋ, vɨɨmba vaŋ faŋ mə kàw, viŋ kɨ luu kɨ kɨꞌ vənu vɔ́, viŋ kəə jɨɨ kɨ yɨ vənu vəjəəvə ghee nshə, laa tuu wee-ndoꞌ kee lùu maa viŋ vɨsɨ Nwi me, tɨ́ kaꞌ viŋ Nwi duꞌ nyɔŋ. 15Viŋ lumə laa, nu ŋkɨə faŋ Yeso tày shɔ nə, lùu laa viŋ kii jɨɨ, tɨ́ kaꞌ viŋ ndɔ bwey. Weenshu ŋwaa-nsiŋ Pɔɔl, faŋ nsiŋ kàw ŋwə nə, nə nyɔ̀ꞌ tɨ́ viŋ sheꞌ nɨniŋ fɨ maa tɔ ley ki, faŋ ŋkə ndɔ̀ fɨ ghɔ Nwi. 16Taa vəŋwaꞌlə vi vənshə faŋ ŋwə nə nyɔ̀ꞌ kɔ̀ŋ vənu vɔ́ tɨ́ viŋ, ŋwə nə nyɔ̀ꞌ sheꞌ nɨniŋ. Luu nə, vənu vəmɔ́ꞌ taa vəŋwaꞌlə vɔ́ lùu vəweꞌ. Vɨɨ mbɨə faŋ vəŋ kee kìi tɔ ley me, faŋ vəŋ kee tɨ̀ŋ vəweꞌ maa nu ŋkɨə faŋ vəŋ biŋ me, vəŋ ndì yigi yɔ́ kwiinə, sheꞌ faŋ vəŋ ndì yigi fɨ taa ŋwaꞌlə Nwi, kwìinə nɨzi. Faŋ vəŋ yɨ nɨniŋ, vəŋ suŋ nsɔꞌ Nwi, nùŋ tɔ vəŋ.
17Gə fɨ maa viŋ, vaŋ-nshwi vaŋ faŋ mə kàw, viŋ duꞌtə viŋ kɨɨ nə vənu vɔ́ ndwə. Nɨniŋ, mə naysə tɨ́ viŋ laa, viŋ ndi yighee, laa vɨɨ mbɨə faŋ vəŋ kee zɔnə Nwi me, kee yɨ laa viŋ fiŋ taa ghuu yitoꞌ vəŋ me. Kɨ viŋ kɔ jɨɨ tɨ́ vəŋ laa vəŋ yɨ viŋ meꞌtə shəŋ jəə ŋkɨə faŋ viŋ tɨ̀ŋnə shɔ nə me. 18Viŋ tɨŋnə sheꞌ taa shəŋ jəə kɔ́, weꞌ shɔ, tɨ́ kɨ kaꞌ tɨta ŋwaa-nsiŋ Yeso Kristo, faŋ lùu wuu məbweysə ŋwaa-nsiŋ, tu mənɔŋ-bwaŋnə tɔ viŋ. Viŋ baa kɨɨ nə ŋwə jəə. Nsiŋ kɨ bəŋsə ŋwə, faŋ ŋwə kìi feenə wi ghee nshə.