2 Kɔrintian

Ŋwaꞌlə Kɔrintian Beꞌsə Vəbɔɔ

Ŋwaꞌlə Pɔɔl tɨ́ vɨɨ Nwi fɨ shɨ Kɔrint beꞌsə vəbɔɔ

Pɔɔl nə nyɔ̀ꞌ ŋwaꞌlə ŋwə̀ maa yighee yiweꞌnə faŋ vɨɨ Kristo vəmɔ́ꞌ fɨ shɨ Kɔrint nə tey kɨ ndasə ŋwə. Ŋwə kəə laa ghɔ vɨ vəŋ duꞌ nyɔŋ, kɨ ŋaytə buꞌ laa ŋwə zɔ̀ laa ntaysə sɔ́ me.

Məsenə vəwaytə:

Vənzi və ŋwaꞌlə 1.1-11

Pɔɔl ghɔ nshəŋtə vɨɨ Kristo fɨ shɨ Kɔrint 1.12–7.16

Vəkɔ maa məgaŋtə vɨɨ Kristo fɨ shɨ Judia 8.1–9.15

Pɔɔl lùu wuu ntɔŋ Kristo yinsəŋ 10.1–13.10

Vəndwə və ŋwaꞌlə 13.11-13

Faŋ Pɔɔl nə shɔꞌtə vɨɨ Nwi fɨ shɨ Kɔrint

¹Lùu mə, Pɔɔl, faŋ Nwi nə shòꞌ mə laa mə luu wuu faꞌ Yeso Kristo, baa nə weenshu ŋwaa-nsiŋ Timoti, faŋ yia nyɔ̀ꞌ ŋwaꞌlə ŋwə̀ tɨ́ viŋ. Yia nyɔ̀ꞌ tɨ́ viŋ, vɨɨ ley Nwi vənshə fɨ shɨ Kɔrint nə fɨ nsi Akaya yinshə. ²Nwi, Tii ŋwaa-nsiŋ, nə tɨta Yeso Kristo tu mənɔŋ-bwaŋnə nə məduꞌ-nyɔŋ tɔ viŋ.

Faŋ Pɔɔl nə bəŋsə Nwi buꞌ laa Nwi nə bwèysə ŋwə fɨ shuu yiku

³Nsiŋ kɨ bəŋsə Nwi, tɨɨ tɨta ŋwaa-nsiŋ Yeso Kristo, faŋ ŋwə yaa kɨ kee gəŋsə vɨɨ dɨdɨꞌ, baa luu Nwi məboolə vɨɨ maa vənu vənshə. ⁴Nwi boolə yia maa ŋɨꞌ yia yinshə, tɨ́ kaꞌ yia baa luu boolə vɨɨ mbɨə faŋ vəŋ lùu taa ŋɨꞌ nɨzi. Yia boolə vəŋ sheꞌ nə məboolə ŋgwə faŋ nshɨ-tɔ Nwi bòolə yia shɔ nə. ⁵Ŋɨꞌ njyə faŋ nyə nə ŋii Kristo nə, baa luu ŋìi maa nsiŋ yiyaŋ. Luu nə, Nwi boolə nsiŋ dɨdɨꞌ buꞌ Kristo. ⁶Yighee njyə faŋ Nwi kwàŋ ŋɨꞌ tɔ yia nə, ŋwə yɨ̀ nɨniŋ laa ŋwə boolə viŋ, bwèysə viŋ shɔ. Yighee njyə faŋ Nwi boolə yia, buu ŋwə bòolə viŋ nɨzi, kɔ viŋ nə wutə, tɨ́ kaꞌ viŋ jìa fwi siŋ yighee njyə faŋ kəŋ ŋɨꞌ ghɔ́, faŋ nyə ŋìi maa yia nə, ŋìi maa viŋ nɨzi. ⁷Nɨniŋ, yia kɔꞌ kɨɨ, baa nùŋ fwi sia maa Nwi dɨdɨꞌ, laa Nwi boolə viŋ nɨzi maa yighee njyə faŋ viŋ ye ŋɨꞌ.

⁸Bàw viŋ kɨɨ laa ŋɨꞌ nə ŋìi yia shɨ Asia dɨdɨꞌ. Ŋkee nu weꞌ nə ŋìi yia, ghɔ̀ꞌ yia, ghɔ̀ꞌ wutə kia; yia fee laa yia kee taa bwey, fùu fɨ fuŋ me. ⁹Yia nə gì fɨ taa fwisə yia laa yia taa kukə. Nu kɔ́ nə gày nɨniŋ laa kɨ yia baa jia fwi sia nə yiŋwaa yia me, laa yia kɨ nuŋsə vənu vənshə taa ghɔ Nwi. Kaꞌ Nwi yweysə wə ŋkee fɨ shɨ yiku. ¹⁰Ŋwə kɨ nii fùusə yia fɨ shuu yiku yɔ́. Yia tə sɨ maa ŋwə laa ŋwə kɨ fuusə yia fɨ shuu yiku. ¹¹Viŋ taa kɨ gaŋtə yia nɨzi, faŋ viŋ shɔꞌtə Nwi tɔ yia. Nɨniŋ laa vɨɨ vəyaŋ kɨ bwaŋ Nwi tɨ́ yia, buꞌ laa ŋwə bwèysə yia faŋ vɨɨ vəyaŋ bùꞌ ghɔ tɨ́ ŋwə nə.

Faŋ Pɔɔl lùu wuu yinsəŋ, kee kəə bweꞌsə vɨɨ Kɔrint me, faŋ ŋwə nə kɔlə kwìinə yitoꞌ yi

¹²Nu ŋkɨə faŋ kaꞌ yia koꞌsə ŋwaa shɔ, lùu laa tɔ kia bìŋ laa ghuu yitoꞌ kia fɨ taa mbi nə bàw, baa ley vɨsɨ Nwi. Yia nəə kee toꞌ nə yitɔfə vɨɨ fɨ taa mbi me, toꞌ sheꞌ faŋ Nwi nə də̀ tɨ́ yia, faŋ ŋwə nə kèe gəŋ sia nə. Yia nəə toꞌ nɨniŋ fɨ taa mbi nyə̀, toꞌ nɨniŋ ŋkee jəə taa ŋwaa viŋ. ¹³Yia kee nyɔ̀ꞌ luu nu day tɨ́ viŋ me. Yia nyɔ̀ꞌ sheꞌ nu ŋkɨə faŋ viŋ tìi, kɨ̀ɨ nə ŋiꞌ ki nə. Mə nùŋ fwi nyaa maa viŋ laa viŋ ndɔ kɨɨ nə ŋiꞌ nu kɔ́ mètə, ¹⁴sheꞌ faŋ viŋ duꞌtə viŋ jia way nu kia nə, laa viŋ ndɔ kɨ ŋaytə, bəŋsə Nwi buꞌ yia, yia kɨ ŋaytə, bəŋsə Nwi buꞌ viŋ, maa shi ŋkɨə faŋ tɨta Yeso ndɔ bəŋ jwi.

¹⁵Faŋ mə nùŋsə fwi nyaa maa viŋ nɨniŋ nə, mə nəə kəə jwì ye viŋ, laa viŋ baa kɨ fi nu jəə kəmɔ́ꞌ. ¹⁶Mə nəə kəə ye viŋ, buu shɔ̀ɔ fɨ yɨ viŋ, gə ziꞌ shɨ Makedonia, baa ndɔ̀ fɨ Makedonia, bə̀ŋ jwì yè viŋ, buu viŋ gaŋtə mə, gə̀ twèy mə shɨ Judia. ¹⁷Faŋ mə nəə kəə nɨniŋ nə, mə nəə bəŋ bə̀ŋ mu? Mə nə kɔ̀ꞌnə vənu vaŋ yaa vɨɨ taa mbi faŋ vəŋ biŋ ɔŋ nə bey maa yighee muꞌ mu? ¹⁸Bey, ŋkee maa yinsəŋ Nwi, yigisə yia tɨ́ viŋ kee lùu ɔŋ nə bey me. ¹⁹Nshɨ-tɔ Yeso Kristo, wee Nwi, faŋ mə nə fɨ̀ꞌtə kɔ̀ŋ ŋwə taa ŋwaa viŋ, yia Silas nə Timoti, ŋwə nɨzi kee lùu ɔŋ nə bey me. Ŋkee yinsəŋ, Nwi nə gì laa ɔŋ tɨ́ nsiŋ ŋkee maa nu kwalə buꞌ ŋwə. ²⁰Nu kwalə kɔ́ lùu laa Nwi yɨsə vənu vəjəəvə vənshə faŋ Nwi nə kɔ̀ꞌnə maa məfaynə taa ŋwaa Yeso. Luu sheꞌ buꞌ Yeso nɨzi, laa vɨɨ kɨ biŋ Nwi, bəŋsə Nwi maa vənu vəjəəvə vɔ́. Kaꞌ vɨɨ kɨ bəŋsə Nwi shɔ, buꞌ laa yia nə fɨꞌtə vənu vɔ́ tɨ́ vəŋ. ²¹Luu nə, lùu nshɨ-tɔ Nwi faŋ ŋwə yɨ laa nsiŋ faynə, gù fa kəmuꞌ, nsiŋ vɨ Kristo, weꞌ shɔ. Ŋwə baa yòꞌ nsiŋ maa faꞌ Nwi, ²²kwàŋ shwenə maa nsiŋ laa kìi yi kìi nsiŋ, kɔ̀ nsiŋ nə Zwitə ki taa fwisə nsiŋ, maa məyɨ laa nsiŋ kɔꞌ kɨɨ laa nsiŋ ndɔ zɨ məbwey vəlwaŋ fɨ ghɔ ŋwə nɨzi.

Ŋiꞌ nu ŋkɨə faŋ ŋkə yɨ̀ buu Pɔɔl kwìinə yitoꞌ yi

²³Ŋiꞌ nu ŋkɨə faŋ ŋkə nə yɨ̀ laa mə nə kee baa bəŋ jwì Kɔrint me, nə luu sheꞌ laa mə gaŋtə viŋ, laa kɨ mə kee jwi yɨ viŋ nə wutə maa məshia nsɔꞌ tɔ viŋ me. Nwi kɔꞌ kɨɨ laa nu ŋkɨə faŋ mə gì, lùu nu yinsəŋ. ²⁴Kɨ ŋkə kee lùu laa yia kɨ sɔꞌ nsɔꞌ tɔ viŋ buꞌ məbiŋ wiŋ, faŋ viŋ nùŋsə fwi siŋ maa Kristo me. Yia bee kii lùu vɨɨ məgaŋtə viŋ laa viŋ kii məŋaytə, buꞌ laa viŋ duꞌtə viŋ nuŋsə fwi siŋ maa Kristo, gòꞌsə shɔ.

¹Mə nə gì fɨ taa fwi mə laa kɨ mə taa baa jwi yɨ viŋ, məluŋ fuu fuŋ me. ²Mə kɨ luu yɨsə viŋ nə luŋ, buu taa yɨ ndə mə kɨ ŋaytə? Lùu viŋ maa məyɨsə. Nɨniŋ, sii kaꞌ viŋ yɨ kɨkə, faŋ mə yɨ̀ laa viŋ kɨ luŋ? ³Lùu nu ŋkɨə faŋ mə nə nyɔ̀ꞌ taa ŋwaꞌlə ŋwaa, ŋgwə yiba, tɨ́ kaꞌ viŋ lòotə vənu, buu mə jwi. Nɨniŋ laa yighee njyə faŋ mə jwi, kaꞌ fwi nyaa kee kìi məluŋ fɨ ghɔ vɨɨ mbɨə faŋ kaꞌ vəŋ kɔ məŋaytə shee me. Mə nùŋ fwi nyaa maa viŋ laa mə kɨ luu kìi məŋaytə, buu viŋ baa luu kìi məŋaytə vənshə. ⁴Mə nə nyɔ̀ꞌ ŋwaꞌlə ghɔ́ tɨ́ viŋ nə məlaꞌ. Fwi nyaa nəə ghaysə mə. Mə nyɔꞌ ŋkee nə mənsɨ sɨ mə. Mə nəə kee kəə yɨsə laa fwi siŋ za me, luu nə, laa viŋ kɨɨ faŋ ŋkawnə nyaa maa viŋ, lwàŋ taa fwi mə.

Faŋ Pɔɔl nə tɨ̀ vɨɨ Kɔrint laa vəŋ ndenə yibɨsə wə mɔ́ꞌ

⁵Wə mɔ́ꞌ nə yɨ viŋ kìi məluŋ. Ŋwə kee bee yɨ̀ maa mə me, ŋwə yɨ̀ maa viŋ vənshə, tɨꞌnə me way. Kaꞌ mə kee gi dɨdɨꞌ me. ⁶Nsɔꞌ njyə faŋ viŋ vəyaŋ nə kwàŋ maa wə ghɔ́ nə, kùꞌnə tɨ́ ŋwə ndwə. ⁷Nɨniŋ, ŋkə bàw laa viŋ meꞌtə ŋwə ndwə, ndenə yibɨsə yi, kɨ boolə ŋwə, laa kɨ ŋɨꞌ shɔɔ wə ghɔ́, zɨ̀ ŋwə me. ⁸Nɨniŋ, mə tɨ viŋ laa viŋ kɨ yɨ vənu vəjəəvə maa ŋwə, tɨ́ kaꞌ ŋwə kɨ̀ɨ laa viŋ kaw ŋwə. ⁹Ŋiꞌ nu ŋkɨə faŋ mə nə nyɔ̀ꞌ ŋwaꞌlə ghɔ́ tɨ́ viŋ, nə baa lùu laa mə nəə kəə kɨɨ laa viŋ lùu vɨɨ yinsəŋ, tɨ́ kaꞌ viŋ kɨ zɔnə maa vənu vənshə mu? ¹⁰Viŋ kɨ luu kɨ ndenə yibɨsə wə, buu mə taa ndenə yibɨsə yi nɨzi. Kɨ luu laa nu mɔ́ꞌ lùu shɔ, faŋ ŋkə nə bàw laa mə ndenə ŋkə, buu mə ndènə buꞌ viŋ sɨ Kristo. ¹¹Nsiŋ yɨ nɨniŋ laa kɨ Satan, tɨɨ vəzwitə vəbwəvə, kee kɨ bweꞌsə nsiŋ me. Maa nsiŋ kɔꞌ kɨɨ nə ŋkɨɨ yi.

Faŋ Pɔɔl nə bə̀ŋsə Nwi buꞌ laa Nwi yɨ̀sə vɨɨ zɔnə nu Kristo fɨ ghɔ ŋwə

¹²Yighee njyə faŋ mə nə ziꞌ Troas maa məfɨꞌtə ntɔŋ yijəə Nwi kɔ̀ŋ Yeso Kristo shɔ, Nwi nə ŋàꞌsə jɨɨ shee maa məfɨꞌtə ntɔŋ yijəə yɔ́ tɨ́ vɨɨ. ¹³Luu nə, fwi nyaa nə kee yizutə me, buꞌ faŋ mə nə kee yè weenshu ŋwaa Titɔs yifi me. Nɨniŋ, mə ndɔ fɨ yɨ vɨɨ vɔ́, shɔ̀ɔ gə̀ zìꞌ shɨ Makedonia.

¹⁴Yia bwaŋ Nwi, buꞌ laa ŋwə yɨ̀sə laa yia kɨ toꞌ fɨ yiba jɨŋ Kristo, bwìlə vɨɨ tɨ́ Nwi, nu Kristo fi vəshəŋ vənshə. Vɨɨ zɔ nu Nwi buꞌ yia, kɨɨ nə ŋwə fɨ fuŋ. ¹⁵Nɨniŋ, yia luu fa jəə tɨ́ Nwi fɨ yiba jɨŋ Yeso Kristo taa ŋwaa vɨɨ mbɨə faŋ Nwi bwèysə vəŋ, nə taa ŋwaa vɨɨ mbɨə faŋ vəŋ ndɔ ndi. Ŋkə lùu yaa vəkɔ faŋ vɨ twàŋ tɨ́ Nwi, mbə luŋsə vəjəə. ¹⁶Tɨ́ vɨɨ mɔ́ꞌ lumə kia kɔ́ luu lumə yiku, faŋ ŋkə yɨsə vəŋ kukə. Tɨ́ vɨɨ mɔ́ꞌ, lùu lumə məbwey, faŋ ŋkə kɔ məbwey vəlwaŋ tɨ́ vəŋ. Sii kùꞌnə ndə maa faꞌ Nwi ghɔ́? ¹⁷Yia kee lùu yaa vɨɨ vəyaŋ faŋ vəŋ fɨꞌtə nu Nwi maa ka me. Yia fɨꞌtə nu Nwi nə fwi yiley, gisə nu ŋkɨə faŋ ŋkə ndɔ̀ fɨ ghɔ Nwi, tɨ́ vɨɨ sɨ Nwi, fɔnə yia faynə yia vɨ Kristo.

Nu Kristo nə faꞌ vɨɨ ntɔŋ Kristo bàw shɔ̀ɔ

¹Yia gi nɨniŋ buu yia bəŋsə jəə wia mu? Viŋ bɨꞌtə laa yia bə̀ə ŋwaꞌlə faŋ ŋwə dəsə jəə wia tɨ́ viŋ mu, tɨꞌnə me laa yia kəə fi kəŋ ŋwaꞌlə ghɔ́ fɨ ghɔ viŋ, faŋ ŋwə dəsə jəə wia tɨ́ vɨɨ vəmɔ́ꞌ mu? Bey, yia kee kəə kəŋ nu ghɔ́ me, faŋ vɨɨ mɔ́ꞌ kɔlə toꞌ nə kəŋ vəŋwaꞌlə vɔ́ nə. ²Nshɨ-tɔ wiŋ lùu ŋwaꞌlə mədəsə jəə wia, faŋ vɨ nə ŋwàꞌlə taa fwisə yia, vɨɨ vənshə kɨɨ, kɨ tii. ³Ŋkə lùu kəley laa viŋ luu ŋwaꞌlə Kristo faŋ nyɔ̀ꞌ yia, buꞌ faŋ yia nə faꞌ faꞌ Nwi nə. Vɨ nə kee nyɔ̀ꞌ ŋwaꞌlə ghɔ́ nə muu mə ŋwaꞌlə me; vɨ nyɔ̀ꞌ nə Zwitə Nwi faŋ ŋkə kɔ məbwey. Vɨ nə kee nyɔ̀ꞌ fuu waytə bɨlaŋ me, vɨ nyɔ̀ꞌ fuu fənyway fə fwisə vɨɨ. ⁴Lùu nu ŋkɨə faŋ yia kìi fwi yizutə shɔ vɨsɨ Nwi buꞌ Yeso Kristo.

⁵Ŋkə kee lùu laa yia kùꞌnə, tɨ́ kaꞌ yia gì laa nu mɔ́ꞌ ndɔ̀ fɨ ghɔ yia me. Məkuꞌnə wia ndɔ fɨ ghɔ Nwi, ⁶faŋ ŋwə yɨ̀sə laa yia kuꞌnə yaa vɨɨ faꞌ maa məkee məfimə. Məkee məfimə mbɔ́ vɨ nə kee nyɔ̀ꞌ nə ghɔ taa ŋwaꞌlə me. Nə gwìa Zwitə Nwi gwìa məkee mbɔ́. Nu ŋkɨə faŋ vɨ nyɔ̀ꞌ nə ghɔ taa ŋwaꞌlə, lùu ntɨsə Nwi faŋ nsə yuu kɨ jwi nə yiku. Luu nə, Zwitə Nwi kɔ́ kɔ məbwey tɨ́ vɨɨ. ⁷Viŋ lumə nu kɔ́ŋ faꞌ ntɨsə Nwi. Yighee njyə faŋ Nwi nə kɔ̀ ŋwaꞌlə ntɨsə, faŋ vɨ nə nyɔ̀ꞌ fuu ŋoꞌ nə, tɨ́ Mose, yikəꞌ Mose nə ndwaꞌlə, tɨ́ kaꞌ vɨɨ Isirayl kee ndeynə yikəꞌ yi me, faŋ məndwaꞌlə wi ghɔ́ nə kɔlə kee lùu nu faŋ ŋkə taa tay me. Nɨniŋ, ntɨsə Nwi sɔ́ nə luu nu məley, faŋ nsə nə kɔlə jwi nə yiku tɨ́ vɨɨ nə. ⁸Faŋ ŋkə lùu nɨniŋ, buu faꞌ Zwitə Nwi taa luu kɨkə? Maa ŋkə bàw shɔ̀ɔ yiŋkii. ⁹Faŋ faꞌ ŋgwə faŋ ŋwə nə yɨ̀ vɨɨ gu nsɔꞌ Nwi nə, nə jwì nə məley nə, buu faꞌ ŋgwə faŋ ŋwə yɨ vɨɨ kiasə baa tɨ̀ŋnə jəə nə, bàw shɔ̀ɔ yiŋgwii ŋkee ghee yaŋ. ¹⁰Kɨ luu a fɨꞌnə nɨniŋ, buu nu məkee məmwamə faŋ ŋkə nə bàw dɨdɨꞌ nə, kee baa yibaw me, buꞌ nu ntɔŋ yijəə Nwi faŋ ŋkə bàw shɔ̀ɔ nə. ¹¹Faŋ nu ŋkɨə faŋ ŋkə ndɔ ndi nə, bàw dɨdɨꞌ nə, buu nu ŋkɨə faŋ ŋkə goꞌ, bàw shɔ̀ɔ yiŋkii ŋkee ghee yaŋ.

Nu vɨɨ Kristo bàw shɔ̀ɔ nu ntɨsə Mose

¹²Faŋ yia nùŋ fwi sia maa ntɔŋ yijəə yɔ́ nee nə, yia jia fwi ŋkee dɨdɨꞌ maa mətɨŋnə, fɨꞌtə nu Nwi. ¹³Yia kee yɨsə yaa Mose faŋ ŋwə nə shìtə yikəꞌ yi nə njwi, laa kɨ vɨɨ Isirayl kee ye məme faŋ məndwaꞌlə wi ghɔ́ taa kɨ mè fɨ taa yikəꞌ ŋwə me. ¹⁴Nɨniŋ, fwisə vəŋ luu səshii. Njwi yɔ́ kɨ bii sɨ vəŋ, kɔ tɔ və-ndee maa yighee njyə faŋ vɨ tii ŋwaꞌlə Nwi kɔ̀ŋ məkee məmwamə mbɔ́. Vɨ kee bàꞌsə njwi yɔ́ me, buꞌ laa Nwi bàꞌsə sheꞌ tɨ́ wə ntɨə faŋ ŋwə nùŋ fwi yi maa Kristo. ¹⁵Yighee tɨ̀ me yighee faŋ vɨ tii ŋwaꞌlə Mose, njwi yɔ́ shitə fwisə vəŋ, kɔ tɔ və-ndee. ¹⁶Luu nə, yighee njyə faŋ vɨɨ Isirayl ndɔ kwiinə fwisə vəŋ, nùŋ maa tɨta Kristo, buu njwi yɔ́ taa ndɔ, vɨ baꞌsə. ¹⁷Tɨta Kristo lùu Zwitə Nwi. Wə ntɨə faŋ Zwitə tɨta Kristo ŋìi taa fwi ŋwə, buu ŋwə dùꞌ tɔ ŋwə. ¹⁸Nɨniŋ, nsiŋ vənshə kee baa kìi njwi yɔ́ yikəꞌ nsiŋ me. Mɔꞌmbi, faŋ ŋwə bàw shɨlə nə, bee yikəꞌ nsiŋ, nsiŋ kiasə gù yuu ŋkɨꞌnə yi, bàw, gə̀ vɨsɨ vɨsɨ, buꞌ laa yɨ̀sə Zwitə Mɔꞌmbi nɨniŋ. Nɨniŋ, nsiŋ lùu yaa ŋwaꞌlə məye sɨ faŋ vɨɨ ye məbaw Nwi fɨ fuŋ.

Faŋ Pɔɔl nə fɨ̀ꞌtə nu Nwi sheꞌ nə fwi yijəə

¹Nɨniŋ, yia kee yibwa maa məfaꞌ faꞌ Nwi me. Faꞌ Nwi ghɔ́ nə kɔ̀ Nwi tɨ́ yia buꞌ gəŋsə si, faŋ ŋwə nə kèe gəŋ sia nə. ²Yia kee toꞌ nə mənay faŋ lùu nu tɔ dɨɨ me, tɨꞌnə me bweꞌsə vɨɨ me, tɨꞌnə me wasə nu Nwi me. Yia fɨꞌtə luu nu yinsəŋ Nwi ntee, tɨ́ kaꞌ ŋkə kɨ jia fwisə vɨɨ vənshə, vɨɨ vənshə biŋ yia vɨsɨ Nwi. ³Kɨ luu laa ntɔŋ yijəə Nwi, faŋ yia fɨꞌtə tɨ́ vɨɨ nə, kee yiley tɨ́ vɨɨ mɔ́ꞌ me, buu lùu tɨ́ vɨɨ mbɨə faŋ vəŋ ndɔ ndi. ⁴Tɨɨ vəzwitə vəbwəvə faŋ ŋwə sɔꞌ mbi nyə̀, kìasə fwisə vɨɨ vɔ́, laa mbɨꞌtə vəŋ kee ley me, vəŋ kee nùŋ fwisə vəŋ maa Kristo me. Ŋwə yɨ̀ nɨniŋ laa kɨ vəŋ ye məley nu Nwi me, kee kɨ zɔ ntɔŋ yijəə Nwi kɔ̀ŋ Kristo faŋ ŋwə bàw shɔ̀ɔ, baa fɨnə Nwi me. ⁵Nu ŋkɨə faŋ yia fɨꞌtə, kee bee lùu nu kia me, lùu ŋkə tɨta Yeso Kristo. Yia lùu vɨɨ faꞌ viŋ buꞌ Yeso. ⁶Nwi, faŋ ŋwə nə gì laa, «Bàw məley kɨ bee, fùu fɨ taa mfiŋsə,» ŋwə baa yɨ̀sə məley bee taa fwisə yia, maa məkɔ tɔ ley tɨ́ yia, tɨ́ kaꞌ yia kɨ̀ɨ nə yikwalə Nwi, faŋ nyə fùu ntee taa ŋwaa Kristo.

Faŋ Pɔɔl nə nùŋ fwi yi maa Nwi faŋ ŋwə nəə kɔlə ye ŋɨꞌ buꞌ nu Nwi nə

⁷Nu Nwi kwalə kɔ́ lùu yaa ŋkee fa jəə faŋ vɨ nùŋ taa vəntɨɨ və shɔꞌ. Yia lùu yaa vəntɨɨ vɔ́. Lùu nɨniŋ laa ŋkə luu kəley laa wutə kwalə ŋkɨə faŋ ŋkə faꞌ taa ŋwaa yia, lùu ŋkə Nwi; ŋkə kee ndɔ̀ fɨ ghɔ yia me. ⁸Vɨɨ gɔ yia, yindiasə yia kee mè me. Tɔ kia shii, luu nə, vənu kee tə yia ləə vəkɨŋ me. ⁹Vɨ shoꞌ ghuu ghia, Nwi kee meꞌ yia me. Vɨ mɔꞌ yia nsi, kee ndìsə yia me. ¹⁰Yia lùu shuu yiku ghee nshə, tɨ́ kaꞌ vɨɨ kɨ ye məbwey Yeso mbɨɨ ŋwaa yia nɨzi. ¹¹Faŋ yia kɔlə bwèy nə, yia luu shuu yiku buꞌ Yeso ghee nshə. Nɨniŋ laa vɨ kɨ ye məbwey Yeso maa mbasə ŋwaa wia, faŋ ŋwə kɔlə lùu fa yiku nə. ¹²Nɨniŋ, yiku faꞌ faꞌ wi taa ŋwaa yia, məbwey faꞌ faꞌ wi taa ŋwaa viŋ.

¹³Zwitə Nwi yɨsə yia nuŋ fwi sia maa nu Nwi, sheꞌ faŋ ŋkə lùu taa ŋwaꞌlə Nwi laa, «Mə nùŋ fwi nyaa maa Nwi, buu kɨ fɨꞌtə nu ki.» 4.13 Sam 116.10. Sheꞌ nɨniŋ, yia nùŋ fwi sia maa Kristo, buu kɨ fɨꞌtə nu ki. ¹⁴Yia kɔꞌ kɨɨ laa wə ntɨə faŋ ŋwə nə ywèysə tɨta Yeso fɨ shɨ yiku nə, ndɔ baa yweysə nsiŋ buꞌ ŋwə, jwì nə nsiŋ, nùŋsə vɨsɨ ŋwə. ¹⁵Vənu vɔ́ vənshə luu buꞌ viŋ, tɨ́ kaꞌ gəŋsə Nwi, faŋ Nwi kee gəŋsə vɨɨ nə, gə̀ nə vɨsɨ, kɨ yɨsə nwaa vɨɨ mbɨə faŋ vəŋ bwaŋ Nwi yaŋ, yizii Nwi kwalə shɔ.

¹⁶Nɨniŋ, kaꞌ yia kee bwa me. Yiŋwaa yia kɔlə ye ŋɨꞌ, Nwi weꞌsə fwi sia, nsə gù fa fi shi shi. ¹⁷Faŋ nsiŋ ye ŋɨꞌ ndwə nə, nsiŋ ndɔ zɨ ŋkee nu kwalə faŋ ŋkə shɔ̀ɔ ki, gòꞌsə yighee muꞌ. Nɨniŋ, nu ŋɨꞌ yɔ́ luu sheꞌ nu tɨtiꞌ faŋ nyə taa tay sheꞌ maa wee-fɨ-yighee nee. ¹⁸Ŋkə lùu nɨniŋ buꞌ faŋ nsiŋ kee tə̀ sɨ maa vətɔ mbɨə faŋ kaꞌ wə yè me; nsiŋ tə̀ sɨ luu maa vətɔ mbɨə faŋ kaꞌ wə kee ye me. Lùu nɨniŋ buꞌ laa vətɔ mbɨə faŋ vɨ ye, kee yaa kɨ shi tay me. Luu nə, vətɔ mbɨə faŋ vɨ kee yiye me, gòꞌsə yighee muꞌ.

Faŋ Nwi lòotə shəŋ tɨ́ vɨɨ vi taa yizɔ

¹Nsiŋ kɔꞌ kɨɨ laa yiŋwaa nyaa-nsiŋ lùu yuu vəbee faŋ vɨ ndɔ sɔꞌ. Yighee njyə faŋ vɨ ndɔ sɔꞌ vəbee vɔ́, nsiŋ kɨ nii fì yiŋwaa yimɔ́ꞌ fɨ ghɔ Nwi, faŋ nyə lùu yaa ŋii faŋ vɨ fianə taa yizɔ tɨ́ nsiŋ, kee fianə nə ghɔ me. Nyə taa goꞌsə yighee muꞌ. ²Maa nsiŋ sɔŋ taa vəbee vaŋ-nsiŋ vɔ́ ndwə, buꞌ laa nsiŋ kɨ̀ꞌ maa məkii ndɔꞌ ŋaa-nsiŋ ghɔ́ fɨ yizɔ, ³faŋ nsiŋ lùu vɨɨ faŋ vəŋ ndɔ fi yiŋwaa yifinə yɔ́ nə, kee bee luu nə ntɨŋ, yaa vɨɨ faŋ nsɔꞌ Nwi lùu tɔ vəŋ nə me. ⁴Yighee njyə faŋ nsiŋ kɨ bii taa yiŋwaa nyaa-nsiŋ shɨ nsi nyə̀, nsiŋ sɔŋ, baa saŋ ŋwaa, buꞌ laa nsiŋ kee kàw laa vɨ bɨ sɔ̀ꞌ vəbee vaŋ-nsiŋ vɔ́, buu nsiŋ fi məbwey me. Nu ŋkɨə faŋ ŋkə bàw tɨ́ nsiŋ lùu laa vɨ fianə ndɔꞌ finə ghɔ́ sheꞌ tɔ vəbee vaŋ-nsiŋ vɔ́. Nɨniŋ laa məbwey vəlwaŋ ndɔ melə təŋwaa taŋ-nsiŋ faŋ ntə lùu fa yiku nə. ⁵Nə lòotə nshɨ-tɔ Nwi lòotə nsiŋ maa nu kɔ́. Ŋwə duꞌtə ŋwə kɔ Zwitə Ley ki tɨ́ nsiŋ yaa shwenə ŋkɔꞌnə yi. ⁶Nɨniŋ, nsiŋ jia fwi ghee nshə, kɨ kɨɨ laa yighee njyə faŋ nsiŋ kɨ bii shi taa yiŋwaa nyaa-nsiŋ yɔ́ shɨ nsi nyə̀, nsiŋ lùu ntaŋ fɨ yɨ Mɔꞌmbi, ⁷buꞌ laa nsiŋ toꞌ ghuu yitoꞌ kaŋ-nsiŋ, biŋ Kristo, luu nə, kee ta yè ŋwə nə yisɨ me. ⁸Nɨniŋ, nsiŋ jia fwi saŋ-nsiŋ, kɨ kəə laa nsiŋ kɨ meꞌ yiŋwaa nyaa-nsiŋ yɔ́, gə shi ghɔ Tɨta ŋwaa-nsiŋ. ⁹Nɨniŋ, nsiŋ kɨ nuŋsə ŋkɨɨ nyaa-nsiŋ maa məbawsə too tɨta ŋwaa-nsiŋ, Yeso Kristo, faŋ nsiŋ kɔlə kɨ bii fu, tɨꞌnə me lùu shiŋii yɨ ŋwə. ¹⁰Viŋ kɔꞌ kɨɨ laa nsiŋ vənshə ndɔ koꞌ fuu vəŋkaw və nsɔꞌ və Kristo, tɨ́ kaꞌ wə nə wə fì fɨ ghɔ ŋwə maa nu ŋkɨə faŋ ŋwə nə yɨ̀sə shɨ nsi nyə̀, faŋ ŋkə nə luu kəjəə, tɨꞌnə me kəbwə.

Faŋ Pɔɔl nə fàꞌ nə wutə maa məyɨsə laa vɨɨ biŋ nu Nwi

¹¹Nɨniŋ, yia faꞌ nə wutə maa məyɨsə laa vɨɨ biŋ nu Nwi, buꞌ laa yia fee Nwi. Nwi kɨɨ nə fwi sia laa yia faꞌ nɨniŋ nə fwi yiley. Mə baa bɨꞌtə laa viŋ kɨ̀ɨ nɨniŋ nɨzi. ¹²Kɨ ŋkə kee lùu laa yia baa bəŋsə ŋwaa wia tɨ́ viŋ me. Yia kəə kɔ sheꞌ jɨɨ tɨ́ viŋ, tɨ́ kaꞌ viŋ ŋàytə buꞌ yia, kɨ̀ɨ maa məkɔ bəŋsə tɨ́ vɨɨ mbɨə faŋ vəŋ koꞌsə ŋwaa buꞌ məkwalə wə, kee kɨɨ koꞌsə ŋwaa buꞌ fwi yijəə me. ¹³Kɨ luu laa yia kəꞌ yuu vɨɨ ŋgienə, buu ŋkə lùu maa məfaꞌ tɨ́ Nwi. Yia kɨ luu kɨ gisə tɔ ley, buu ŋkə lùu tɨ́ viŋ.

Faŋ Nwi nə mètə nsɔꞌ nyaa-nsiŋ, nsiŋ vɨ Nwi

¹⁴Lùu nɨniŋ buꞌ laa ŋkawnə Kristo sɔꞌ yia. Yia bɨꞌtə laa, faŋ nə kù wə muꞌ tɔ vɨɨ vənshə nə, ŋkə lùu laa vɨɨ vənshə kukə. ¹⁵Kristo nə kù tɔ vɨɨ vənshə laa vɨɨ mbɨə faŋ vəŋ lùu vəbwey, kee kɨ duꞌ fɔ vəŋ me, dùꞌ kɨ kɔ yiŋwaa vəŋ tɨ́ wə ntɨə faŋ ŋwə nə kù tɔ vəŋ, baa ywey fɨ shɨ yiku nə. ¹⁶Shù fɨ ndwə yia kee baa kɨ̀ɨ nə wə fɨ maa mbɨꞌtə wə mənsaw me. Yia nə baa kɨ̀ɨ nə Kristo fɨ maa mbɨꞌtə wə mənsaw maa yighee vɨsɨ. Luu nə, yia kee baa kɨ̀ɨ nə ŋwə maa jɨɨ yɔ́ ndwə me. ¹⁷Nɨniŋ, wə kɨ luu kìi nu kəmuꞌ ghɔ Kristo, Nwi nàysə ŋwə, ŋwə gu fa fi, vənu vəmwavə vi ndì, gù vəfi. ¹⁸Nu kɔ́ kənshə nə ndɔ̀ fɨ ghɔ Nwi, faŋ ŋwə mètə nsɔꞌ nyaa-nsiŋ ghɔ vɨ Nwi yiley, buꞌ Yeso Kristo. Ŋwə baa nùŋsə yia maa faꞌ wi, laa yia kɨ fɨꞌtə tɨ́ vɨɨ faŋ Nwi mètə nsɔꞌsə vɨɨ nə. ¹⁹Nwi nə luu taa ŋwaa Kristo, mètə nsɔꞌ vɨɨ fɨ mbi ghɔ vɨ vəŋ, kee bə̀ŋsə nu bwə vəŋ tɨ́ vəŋ me. Nwi nuŋsə yia laa yia kɨ gisə nu məmetə nsɔꞌ tɨ́ vɨɨ. ²⁰Nɨniŋ, yia lùu vɨɨ ntɔŋ Kristo. Nwi tɨsə vɨɨ, shɔɔ fɨ ghɔ yia. Yia buꞌ ghɔ tɨ́ vɨɨ maa yizii Kristo, gisə laa, «Viŋ biŋ, Nwi metə nsɔꞌ viŋ vɨ vəŋ!» ²¹Nwi nə yɨ̀sə laa wə ntɨə faŋ ŋwə nə kee kɨ̀ɨ nə nu bwə me, biꞌ yibɨsə nyaa-nsiŋ, tɨ́ kaꞌ nsiŋ lùu vɨɨ loomə vɨsɨ Nwi.

Faŋ Pɔɔl nə də̀ laa ŋwə lùu wuu faꞌ Nwi yinsəŋ fɨ maa nshinə yi

¹Faŋ yia gaŋtə maa faꞌ Nwi nə, yia tɨsə viŋ laa viŋ ndɨɨnə laa gəŋsə Nwi, faŋ Nwi kèe gəŋ saŋ-nsiŋ nə, kee gù nu dayday tɨ́ viŋ me. ²Taa ŋwaꞌlə Nwi, vɨ nyɔ̀ꞌ laa,

«Mə Nwi yɨ̀ nu ŋkɨə faŋ a nə bùꞌ ghɔ tɨ́ mə nə,

maa yighee njyə faŋ nyə kùꞌnə.

Mə gaŋtə ghɔ maa shi ŋkɨə

faŋ mə kɔ məbwey tɨ́ vɨɨ.» 6.2 Aysaya 49.8. Viŋ zɔ! Yigisə Nwi yɔ́ fàynə ndwə. Lùu yighee njyə faŋ nyə kùꞌnə tɨ́ Nwi ndwə. Shi ŋkɨə faŋ Nwi kɔ məbwey tɨ́ vɨɨ nə, lùu ndee.

³Yia kee yɨ tuu nu, faŋ kaꞌ ŋkə yɨ̀sə wə gù me, laa kɨ tɔ dɨɨ fùu maa faꞌ wia me. ⁴Maa vənu vənshə faŋ yia yɨsə, kaꞌ vɨ ye laa yia lùu vɨɨ faꞌ Nwi, jia fwi sia dɨdɨꞌ maa yighee njyə faŋ yia ye ŋɨꞌ tɨ̀ me ŋɨꞌ. ⁵Yia jìa fwi sia faŋ vɨ saŋ yia, tɨꞌnə me kwàŋ yia taa ŋii mfiŋ, tɨꞌnə me bùulə shɨ buꞌ yia, tɨꞌnə me faŋ yia ye ŋɨꞌ, tɨꞌnə me shi vətuꞌ, kee bwey me, tɨꞌnə me shi nə jɨŋ. ⁶Yia toꞌ nə nshinə yijəə, kwaꞌtə nu Nwi, jia fwi sia, toꞌ fɨ taa bwaŋnə taa ŋwaa vɨɨ. Zwitə Ley Nwi shiŋnə yia. Yia kaw vɨɨ nə fwi yiley, ⁷gisə yigi yibinə, weꞌ nə wutə Nwi, nywenə maa nu ŋkɨə faŋ ŋkə lùu kəloomə ŋkee nə wutə, yuu wuu yighaw faŋ ŋwə jia vətɔ və yighaw maa kwiŋ maꞌnə nə kwiŋ ŋkwii nɨzi. ⁸Yia toꞌ nɨniŋ faŋ vɨɨ kɔ feenə tɨ́ yia, tɨꞌnə me kwaŋ tɔ dɨɨ maa yia, faŋ vɨɨ gisə vənu vəbwəvə tɔ yia, tɨꞌnə me vənu vəjəəvə. Faŋ vɨɨ kɔlə gi laa yia fɨnə vɨɨ məbweꞌsə vɨɨ, yia lùu vɨɨ yinsəŋ. ⁹Faŋ vɨ kɔlə kee kɨ̀ɨ nə yia nə me, vɨɨ kɔꞌ kɨɨ nə yia. Faŋ yia kɔlə kɨkukə, yia lùu vəbwey. Faŋ vɨ kɔlə kwàŋ nsɔꞌ tɔ yia, vɨ kee zwìlə yia me. ¹⁰Faŋ yia kɔlə kìi məluŋ, yia kɨ ŋɨŋaytə. Faŋ yia kɔlə lùu mbəəsə, yɨsə vɨɨ vəyaŋ gu mfuꞌsə maa vənu vənshə. Faŋ yia kɔlə kee kìi fa me, yia kìi vətɔ vənshə.

Faŋ Pɔɔl nə bùꞌ ghɔ tɨ́ vɨɨ Kɔrint laa vəŋ ŋaꞌsə fwisə vəŋ tɨ́ ŋwə

¹¹Yia ŋaꞌ shuu wia kɨ gisə tɨ́ viŋ, vɨɨ Kɔrint, laa ŋkawnə yia maa viŋ yàŋ taa fwisə yia. ¹²Shəŋ kiŋ kee bə̀ə fɨ taa fwisə yia me; shəŋ bəə sheꞌ fɨ taa fwisə viŋ. ¹³Viŋ zɔ! Mə gisə tɨ́ viŋ yaa vaŋ vaŋ laa, viŋ ŋaꞌsə fwi siŋ, sheꞌ faŋ yia ŋaꞌsə fwi sia nə.

Bàw nsiŋ kiasə yiŋwaa fɨ maa nu bwə tɨ̀ me nu bwə

¹⁴Kɨ viŋ ka ŋoo, viŋ vɨ vɨɨ məmanə Nwi me. Sii kaꞌ nu mbuulə dùꞌ shəŋ muꞌ ghɔ nu loomə kɨkə? Sii kaꞌ shəŋ ley faynə ghɔ shəŋ mfiŋsə kɨkə? ¹⁵Sii kaꞌ Kristo kìi ŋoo ghɔ Satan kɨkə? Kaꞌ wuu məbiŋ Yeso kìi nu kəmuꞌ ghɔ wuu mətwey Kristo kɨkə? ¹⁶Sii kaꞌ nwi dayday dùꞌ taa ŋii Nwi kɨkə? Maa nsiŋ lùu ŋii Nwi, faŋ Nwi nə gì laa,

«Mə taa kɨ shi taa ŋwaa vəŋ, toꞌ yia vəŋ.

Mə taa luu Nwi vəŋ,

vəŋ luu vɨɨ ŋiinə vaŋ.» 6.16 Levitikɔs 26.11-12.

¹⁷Nɨniŋ, Mɔꞌmbi baa gì laa,

«Viŋ fuu fɨ taa ŋwaa vɨɨ məmanə Nwi vɔ́,

gaasə viŋ vɨ vəŋ,

kee kɔ̀ŋ fa faŋ ŋkə kee lùu kəley me,

buu mə ndɨ viŋ. 6.17 Aysaya 52.11.

¹⁸Mə kɨ nii lùu tii wiŋ, viŋ luu vaŋ vaŋ.» 6.18 2 Samuel 7.14. Lùu yigisə Mɔꞌmbi faŋ ŋwə sɔꞌ mbi yinshə.

¹Vɨɨmba vaŋ, faŋ nsiŋ kìi ŋkɔꞌnə nyə̀ nee nə, bàw nsiŋ kiasə yiŋwaa fɨ maa nu bwə tɨ̀ me nu bwə, faŋ ŋkə lùu taa ŋwaa wə, tɨꞌnə me taa zwitə ki. Nsiŋ kɨ yɨ laa nshinə nyaa-nsiŋ taa mètə lèy vɨsɨ Nwi. Nsiŋ yɨ̀ nɨniŋ, fee Nwi.

Faŋ Pɔɔl nə kee bwèꞌsə tuu wə me

²Viŋ kɔ shəŋ tɨ́ yia taa fwisə viŋ! Yia nə kee ta yɨ̀sə nu bwə maa ŋkee tuu wə me, kee bɨ̀sə fwi wə me, kee bwèꞌsə tuu wə me. ³Mə kee gì nu kɔ́ laa mə bɨsə viŋ me. Maa mə duꞌtə mə gi laa viŋ lùu taa fwisə yia, tɨ́ kaꞌ nsiŋ kùkə mɔ́ꞌ, baa ywèy mɔ́ꞌ. ⁴Mə gisə vənu tɨ́ viŋ ntee, ŋkee nə fwi yijəə. Mə bəŋsə viŋ dɨdɨꞌ. Fwi nyaa zùtə dɨdɨꞌ buꞌ viŋ. Mə kìi məŋaytə yaŋ, faŋ ŋɨꞌ nyaa kɔlə yaŋ nə.

Faŋ Pɔɔl nə ŋàytə maa məzɔ laa vɨɨ Kɔrint kwìinə fwisə vəŋ

⁵Faŋ yia nə jwì Makedonia, yia nə kee kìi məshəŋ ŋwaa me; yia kii ŋɨꞌ maa vəshəŋ vənshə. Vɨɨ kɔ ŋɨꞌ tɨ́ yia. Fwi sia ghaysə yia nɨzi. ⁶Luu nə, Nwi faŋ ŋwə yaa kɨ kɔ fwi yizutə tɨ́ vɨɨ mbɨə faŋ vɨ fiitə vəŋ nsi, baa kɔ fwi yizutə tɨ́ yia nɨzi, faŋ Titɔs nə jwì yɨ yia. ⁷Nə kee lùu sheꞌ buꞌ məjwi wi me, laa fwi sia zutə; yia baa luu ŋàytə buꞌ faŋ yia zɔ̀ fɨ ghɔ ŋwə laa fwi yi nə zùtə buꞌ viŋ. Ŋwə nə nàysə tɨ́ yia kɔ̀ŋ jɨŋ njyə faŋ nyə zasə viŋ kɔ̀ŋ mə laa mə jwi, baa nə kəŋ gəŋsə nsɨə faŋ viŋ kii kɔ̀ŋ nu ŋkɨə faŋ ŋkə nə gày nə, baa nə laa viŋ kɨɨtə buꞌ mə. Nɨniŋ, mə ŋaytə maa vənu vɔ́ dɨdɨꞌ.

⁸Faŋ ŋwaꞌlə ŋwaa wì faŋ mə nə nyɔ̀ꞌ tɨ́ viŋ nə, nə kɔlə yɨ̀ laa viŋ kii məluŋ, kaꞌ fwi nyaa kee sɔ̀ꞌ mə shɔ me. Yinsəŋ, fwi nyaa nə tey kɨ sɔꞌ mə, luu nə, mə kii məŋaytə ndwə buꞌ laa mə ye laa ŋwaꞌlə ghɔ́ yɨ̀sə viŋ luŋ maa kwitə yighee nee, buu viŋ kɨ nii kwìinə fwi siŋ. ⁹Faŋ mə ŋaytə ndwə nə, mə kee ŋaytə buꞌ məluŋ wiŋ faŋ viŋ nə lùŋ nə me; mə ŋaytə buꞌ laa məluŋ ghɔ́ nə yɨ̀sə viŋ kwiinə fwi siŋ. Viŋ nəə luŋ maa jɨɨ Nwi. Nɨniŋ, yia nə kee bɨ̀sə fwi siŋ maa nu mɔ́ꞌ me. ¹⁰Wə kɨ luu kɨ luŋ maa jɨɨ Nwi, buu məluŋ wi ghɔ́ taa bweysə ŋwə, fwi yi kee sɔꞌ ŋwə faŋ ŋwə kwìinə fwi yi nə me. Kɨ luu wə nə luŋ maa jɨɨ vənu və taa mbi, buu lùu yiku yi. ¹¹Maa viŋ yè faŋ ŋkee məluŋ ghɔ́, faŋ viŋ nə lùŋ maa jɨɨ Nwi nə, nə yɨ̀sə viŋ ŋɨɨlə maa nu jəə. Viŋ bìŋ nu bwə kiŋ. Nu bwə bɨ tɨ́ viŋ, viŋ fee Nwi. Jɨŋ yia za viŋ, viŋ kɨɨtə buꞌ yia, kwàŋ nsɔꞌ maa wuu məyɨ nu bwə wì. Maa vənu vənshə viŋ yɨ̀ jəə, tɨ́ kaꞌ mə kɨ̀ɨ laa viŋ lèy fɨ maa nsɔꞌ yɔ́ yighee muꞌ. ¹²Faŋ mə nə nyɔ̀ꞌ ŋwaꞌlə ghɔ́ tɨ́ viŋ nə, mə nə kee nyɔ̀ꞌ buꞌ wə ghɔ́ faŋ ŋwə nə gù nu maa wə mɔ́ꞌ me, kee nyɔ̀ꞌ buꞌ wə yiŋgwii faŋ vɨ nə yɨ̀ nu bwə maa ŋwə nə me. Mə nə ŋwaꞌlə sheꞌ laa ŋkə fuu ntee taa ŋwaa viŋ vɨsɨ Nwi, laa viŋ weꞌ maa nu kia. Nɨniŋ, fwi sia zutə. ¹³Lùu nu ŋkɨə faŋ ŋkə nə zwìsə fwi yia. Luu nə, məŋaytə wia yaŋ dɨdɨꞌ, buꞌ faŋ yia nə yè məŋaytə Titɔs, faŋ ŋwə nə ŋàytə buꞌ laa fwi yi nə zùtə buꞌ viŋ vənshə. ¹⁴Nɨniŋ, nu ŋkɨə faŋ mə nəə bəŋsə viŋ shɔ tɨ́ ŋwə, kee gù nu tɔ dɨɨ shee me. Ŋkə fuu yinsəŋ, sheꞌ faŋ vənu vənshə faŋ mə nə gì tɨ́ viŋ lùu vənu və yinsəŋ nə. ¹⁵Nɨniŋ, ŋkawnə yi maa viŋ lùu yiweꞌ. Ŋwə lumə viŋ faŋ viŋ nə lòotə ŋwaa maa məzɔnə ŋwə, faŋ viŋ nə kɔ̀ bwaŋnə tɨ́ ŋwə nə feenə. ¹⁶Mə ŋaytə buꞌ laa kaꞌ mə nùŋ fwi nyaa maa viŋ maa vənu vənshə.

Yigi kɔ̀ŋ nu məbaytə vətɔ maa məgaŋtə vɨɨ Nwi faŋ vəŋ lùu taa ŋɨꞌ

¹Vaŋ-nshwi vaŋ, yia kəə yɨ̀ viŋ kɨɨ nə nu jəə ŋkɨə faŋ Nwi kèy nshəŋtə vɨɨ Nwi fɨ shɨ Makedonia shɔ. ²Faŋ Nwi nə kɔlə mɔ̀ŋ vəŋ maa ŋɨꞌ yiyaŋ, vəŋ ŋaytə shɔ̀ɔ ki, bàytə vətɔ vəyaŋ maa məkɔ, kɔ nə fwi yimuꞌ, faŋ vəŋ kɔlə kee kìi vətɔ me. ³Yinsəŋ, mə nə yè nə yisɨ laa vəŋ nə kɔ̀ vətɔ faŋ mbə lùu ghɔ vəŋ, kɔ shɔ̀ɔ ki nə fwi yijəə. Vɨ nə kee dɔ̀ɔ vəŋ me, ⁴vəŋ bee kii bùꞌ ghɔ tɨ́ yia laa yia biŋ laa vəŋ gaŋtə, kwàŋ vətɔ vəvəŋ nɨzi taa vətɔ mbɨə faŋ yia kəə gaŋtə vɨɨ ley Nwi fɨ shɨ Jerusalem shɔ nə. ⁵Ŋkə nə shɔ̀ɔ faŋ yia nə bɨꞌtə, vəŋ nə kɔ ŋkee yiŋwaa yivəŋ tɨ́ Nwi, baa luu kɔ̀ yiŋwaa vəŋ tɨ́ yia nɨzi, faŋ ŋkə lùu taa ŋkɨɨ Nwi.

⁶Nɨniŋ, yia buꞌ ghɔ tɨ́ Titɔs, faŋ ŋwə nə zi faꞌ ghɔ́ taa ŋwaa viŋ nə, laa ŋwə kɨ faꞌ gə nə vɨsɨ maa məgaŋtə viŋ, tɨ́ kaꞌ viŋ metə faꞌ ŋkawnə ghɔ́. ⁷Vəkeynə və Zwitə Nwi yàŋ taa ŋwaa viŋ. Viŋ nùŋ fwi siŋ maa Kristo, wèꞌ shɔ, baa luu weꞌ maa məfɨꞌtə nu Nwi. Yitɔfə baa lùu yiyaŋ taa ŋwaa viŋ, viŋ faꞌ nə wutə maa vənu vənshə, kii ŋkawnə maa yia. Nɨniŋ, bàw faꞌ ŋkawnə ŋwə̀ fuu jəə taa ŋwaa viŋ nɨzi. ⁸Mə kee gì nee maa məkɔ sɔꞌ tɨ́ viŋ me. Mə də̀ fwi njyə faŋ vɨɨ mɔ́ꞌ kìi maa məgaŋtə, tɨ́ kaꞌ mə ndɔ kɨɨ faŋ ŋkawnə yiŋ dùꞌ. ⁹Viŋ kɔꞌ kɨɨ faŋ tɨta ŋwaa-nsiŋ Yeso Kristo nə kèe gəŋ siŋ nə. Faŋ ŋwə nə kɔlə kìi vətɔ vənshə, ŋwə kiasə gù mbəə buꞌ viŋ, laa bəə ki kɔ́ yɨsə viŋ kii vətɔ vənshə. ¹⁰Nɨniŋ, mbɨꞌtə nyaa maa nu kɔ́ lùu laa, bàw viŋ metə nu ŋkɨə faŋ viŋ nə tey yizu ndwə nə, faŋ viŋ nə luu mfɔŋsə vɨɨ maa mətey nu kɔ́, baa lùu mfɔŋsə vɨɨ ŋkee maa mənuŋ fwi shɔ. ¹¹Nɨniŋ, viŋ kɨ gə nə ŋkə vɨsɨ, baa mètə, yɨsə laa faꞌ ŋgwə faŋ viŋ faꞌ, kuꞌnə maa fa ŋkɨə faŋ viŋ kìi, buꞌ laa viŋ duꞌtə viŋ nuŋ fwi siŋ shɔ nə. ¹²Fwi wə kɨ luu bàw laa ŋwə yɨ nu, buu Nwi taa ŋaytə maa vətɔ mbɨə faŋ mbə lùu ghɔ ŋwə maa məkɔ, kee bitə vətɔ mbɨə faŋ mbə bə̀ə fɨ ghɔ ŋwə me. ¹³Kɨ mə kee gì nee laa vɨɨ mɔ́ꞌ duꞌ nə mənɔŋ-bwaŋnə, viŋ duꞌ nə ŋɨꞌ me; mə gì nɨniŋ laa viŋ vɨ vəŋ duꞌ nɨndɨŋ. ¹⁴Bàw laa viŋ gaŋtə vɨɨ mbɨə faŋ lùu mbəəsə nə vətɔ mbɨə faŋ mbə yàŋ ghɔ viŋ maa yighee ndwə. Nɨniŋ laa vəŋ gaŋtə viŋ nɨzi maa bəə kiŋ, tɨ́ kaꞌ viŋ luu nɨndɨŋ viŋ vɨ vəŋ. ¹⁵Lùu faŋ ŋkə lùu taa ŋwaꞌlə Nwi laa,

«Wə ntɨə faŋ ŋwə nə kìi kəyaŋ, kee kii yuu bə me.

Wə ntɨə faŋ ŋwə nə kìi sheꞌ tɨtiꞌ, kee bəə me.» 8.15 Eksodɔs 16.18.

¹⁶Mə bwaŋ Nwi, buꞌ laa Nwi yɨ̀sə ŋkawnə yiŋ lwaŋ taa fwi Titɔs. Ŋwə kəə kɨ gaŋtə viŋ sheꞌ yaa mə. ¹⁷Mə nə tɨ ŋwə laa ŋwə jwi yɨ viŋ, ŋwə biŋ yighee muꞌ, buꞌ laa ŋwə tə̀ sɨ maa məgaŋtə viŋ dɨdɨꞌ. Nshɨ-tɔ wi nə kàw maa məjwi yɨ viŋ. ¹⁸Yia tɔ̀ŋ Titɔs, baa kɨ tɔŋ weenshu ŋwaa-nsiŋ mɔ́ꞌ ghɔ ŋwə, faŋ yizii yi gə dɨdɨꞌ taa ndɔꞌ Nwi maa məfɨꞌtə ntɔŋ yijəə Nwi. ¹⁹Yia kee tɔ̀ŋ ŋwə sheꞌ buꞌ yiŋkii nu me; vəməshəŋtə və vɨɨ Nwi nə shòꞌ ŋwə laa ŋwə kɨ toꞌ yia vɨ vəŋ ghuu kəmuꞌ maa nu vətɔ mbɨə faŋ nsiŋ shwaꞌtə maa məgaŋtə vaŋ-nshwi vaŋ-nsiŋ fɨ shɨ Jerusalem nə. Yia nə tey nu məshwaꞌtə kɔ́, tɨ́ kaꞌ nsiŋ kɨ bəŋsə Mɔꞌmbi shɔ, baa nə maa mədə njyoꞌ yijəə yia shɔ. ²⁰Yia tɔ̀ŋ ŋwə nɨniŋ, tɨ́ kaꞌ yia fə̀ŋ yishuu vɨɨ shɔ, laa kɨ wə gi nu day tɔ yia me, buꞌ vətɔ vəyaŋ mbɨə faŋ yia baytə nə me. ²¹Yia kəə yɨsə nu faŋ ŋkə bàw, kee bàw sheꞌ yikəꞌ Mɔꞌmbi me, yia kəə laa ŋkə bàw sɨ vɨɨ nɨzi. ²²Yia baa tɔ̀ŋ weenshu ŋwaa-nsiŋ mɔ́ꞌ ghɔ vəŋ, faŋ yia duꞌtə yia mɔŋ ŋwə maa vənu vəyaŋ, kɨɨ laa ŋwə wèꞌ maa faꞌ Nwi. Ŋwə weꞌ shɔ̀ɔ yighee vɨsɨ ndwə, buꞌ laa ŋwə nùŋ fwi yi maa viŋ. ²³Gə fɨ maa Titɔs, ŋwə lùu wuu yitoꞌ ŋwaa, baa gaŋtə mə nə faꞌ faŋ mə fàꞌ buꞌ viŋ nə. Gə fɨ maa vaŋ-nshwi vaŋ-nsiŋ vɔ́, tɔŋ vəməshəŋtə və vɨɨ Nwi tɔŋ vəŋ, vɨɨ bəŋsə yizii Kristo buꞌ vəŋ. ²⁴Nɨniŋ, viŋ ndɨ vəŋ jəə, də̀ ŋkawnə yiŋ faŋ viŋ kaw vɨɨ nə, yɨsə laa vəməshəŋtə və vɨɨ Nwi ye laa yia nə gì yinsəŋ faŋ yia nə bə̀ŋsə viŋ tɨ́ vəŋ.

¹Nu kee baa lùu shɔ mə baa nyɔ̀ꞌ tɨ́ viŋ kɔ̀ŋ faꞌ ŋgwə faŋ nsiŋ baytə vətɔ maa məgaŋtə vɨɨ ley Nwi fɨ shɨ Jerusalem nə me. ²Mə kɨɨ nə fwi yijəə yiŋ, baa bəŋsə viŋ shɔ tɨ́ vɨɨ Makedonia. Mə nàysə tɨ́ vəŋ laa vɨɨ Akaya nə duꞌtə vəŋ tey kɨ baytə vətɔ vəvəŋ shù fɨ maa ŋuꞌ njii. Wutə kiŋ kɔ́ suŋtə vəŋ vəyaŋ. ³Mə tɔ̀ŋ vaŋ-nshwi vaŋ-nsiŋ vɔ́ laa nu ŋkɨə faŋ yia bəŋsə viŋ shɔ nə, kee kiasə gù nu dayday maa nu kɔ́ me. Bàw viŋ baytə vətɔ viŋ nùŋsə, faŋ mə nə nàysə tɨ́ viŋ nə. ⁴Kee bàw laa yighee njyə faŋ yia vɨɨ Makedonia vəmɔ́ꞌ jwì, vəŋ ye laa viŋ kee ta bàytə mbiŋ vətɔ me, buu tɔ kia taa dɨɨ, buꞌ laa yia nə nùŋ fwi sia maa viŋ. Kaꞌ ŋkee tɔ kiŋ taa dɨɨ shɔ nɨzi. ⁵Lùu ŋiꞌ nu ŋkɨə faŋ mə nə bɨ̀ꞌtə laa ŋkə bàw laa mə tɨ vaŋ-nshwi vaŋ-nsiŋ vɔ́, laa vəŋ fi vɨsɨ, jwì yè viŋ, viŋ baytə vətɔ vɔ́ faŋ viŋ nə kɔ̀ꞌnə yighee vɨsɨ maa məndɔ gaŋtə vɨɨ ley Nwi fɨ shɨ Jerusalem shɔ nə. Mə taa kɨ jwi, tɨ́ mbə luu shɔ yaa fa jəə tɨ́ Nwi. Kɨ ŋkə kee lùu laa viŋ ndɔ luu yaa vɨɨ faŋ vəŋ kee kaw kɔ me.

⁶Viŋ lumə laa wə ntɨə faŋ ŋwə sɔ̀ say tɨtiꞌ, ndɔ shwi tɨtiꞌ; wə ntɨə faŋ ŋwə sɔ̀ yaŋ, ndɔ shwì yaŋ. ⁷Bàw wə tɨ̀ me wə kɔ faŋ fwi yi kàw, kee kɔ baa bɨꞌtə nshuꞌ yi me, buꞌ laa Nwi yaa kɨ kaw wə ntɨə faŋ ŋwə kɔ nə məŋaytə. ⁸Viŋ kɔꞌ kɨɨ laa Nwi kìi wutə maa məkey viŋ nə vətɔ vəjəəvə vənshə, mbə yaŋ sàynə, laa vətɔ vəjəəvə lwaŋ ghɔ viŋ, kùꞌnə ghee nshə, maa vənu vənshə, tɨ́ kaꞌ viŋ baa kɨ yɨsə vənu vəjəəvə vənshə, mbə yaŋ sàynə. ⁹Lùu faŋ ŋkə lùu taa ŋwaꞌlə Nwi laa,

«Wə ntɨə faŋ ŋwə saynə vətɔ vi, kɔ̀ tɨ́ mbəəsə,

nu ki lùu kəloomə, gòꞌsə yighee muꞌ.» 9.9 Sam 112.9.

¹⁰Nɨniŋ, Nwi faŋ ŋwə yaa kɨ gaa ŋgwisə vətɔ tɨ́ vɨɨ məbia, baa nə bee maa məzɨ, taa kɔ ŋgwisə vətɔ tɨ́ viŋ nɨzi, yɨsə mbə ta, tɨ́ kaꞌ viŋ kɨ kɔ, nu kiŋ lùu kəloomə. ¹¹Nwi yɨsə vətɔ vənshə lwaŋ ghɔ viŋ, tɨ́ kaꞌ viŋ kɔ̀ vətɔ ghee nshə nə fwi yimuꞌ, yia fi, gə̀ kɔ̀ tɨ́ vɨɨ, ŋkə yɨsə vəŋ kɨ bwaŋ Nwi. ¹²Viŋ kɔꞌ kɨɨ laa ŋiꞌ faꞌ ŋgwə faŋ nsiŋ faꞌ maa məgaŋtə vɨɨ nə, kee luu sheꞌ nu məkɔ vətɔ mbɨə faŋ mbə bəə fɨ ghɔ vɨɨ ley Nwi nə me. Ŋwə ndɔ yɨsə nu faŋ ŋkə shɔ̀ɔ yiŋkii, nu kɔ́ lùu laa vɨɨ vəyaŋ ndɔ kɨ bwaŋ Nwi shɔ. ¹³Faꞌ ghɔ́ ndɔ twelə nu kiŋ tɨ́ vəŋ laa viŋ kùꞌnə maa nu Nwi. Vəŋ kɨ bəŋsə Nwi, buꞌ laa viŋ bìŋ ntɔŋ yijəə Nwi kɔ̀ŋ Yeso Kristo ntee, zɔnə ŋwə, gaŋtə vəŋ nə vətɔ viŋ nə fwi yimuꞌ. Vəŋ ndɔ biŋ viŋ nɨniŋ, ghɔ vɨ vɨɨ Nwi vənshə, ¹⁴ndwaŋ Nwi tɔ viŋ. Jɨŋ yiŋ kɨ zasə vəŋ nɨzi, buꞌ gəŋsə Nwi, faŋ Nwi nə gaŋtə viŋ shɔ̀ɔ ki nə. ¹⁵Nsiŋ kɨ bwaŋ Nwi buꞌ laa ŋwə nə key nsiŋ shɔ̀ɔ ki.

Faŋ Pɔɔl nə fàꞌ faꞌ wi

¹Mə Pɔɔl kəə kee vənu tɨ́ viŋ kɔ̀ŋ nu Kristo faŋ ŋwə zutə ndɔ sàylə. Mə faŋ viŋ gisə laa mə bwasə ŋwaa ŋwaa nsi, vɨsɨ viŋ yighee njyə faŋ nsiŋ lùu mɔ́ꞌ, baa nə laa, yighee njyə faŋ mə ndɔ fɨ yɨ viŋ, buu fwi nyaa weꞌ maa viŋ. ²Nɨniŋ, mə buꞌ ghɔ tɨ́ viŋ laa viŋ yɨsə laa, yighee njyə faŋ mə ndɔ jwi yɨ viŋ, fwi nyaa kee baa shə maa viŋ me. Mə kɔꞌ kɨɨ laa kaꞌ fwi nyaa wèꞌ maa vɨɨ mbɨə faŋ vəŋ gisə laa yia yɨsə vənu maa ŋkitə mbi. ³Lùu yinsəŋ laa yia shi taa mbi, luu nə, yia kee nywenə yaa vɨɨ taa mbi me. ⁴Vətɔ və yighaw mbɨə faŋ nsiŋ tuŋ yighaw shɔ, kee lùu vətɔ və taa mbi me, lùu vətɔ və yighaw və Nwi, faŋ mbə lùu ŋkee vəweꞌ, faŋ kaꞌ vɨ bɨsə vətɔ vəweꞌvə shɔ. Yia bɨsə yigisə mənay shɔ, ⁵suꞌsə mbɨɨsə ŋii sənshə faŋ nsə fə̀ŋ nu məkɨɨ nə Nwi. Yia ndɔ jia mbɨꞌtə vɨɨ yinshə, yɨ̀sə nyə zɔnə Kristo. ⁶Yia taa kwaŋ nu tɨ̀ me nu faŋ ŋkə kee zɨzɔnə me, taa nsɔꞌ, faŋ viŋ ndɔ baa luu vɨɨ məzɔnə nə.

Faŋ Kristo lùu yiba jɨŋ Pɔɔl

⁷Viŋ ndeynə nu faŋ kaꞌ ŋkə luu kəley sɨ viŋ. Wə mɔ́ꞌ lùu shɔ faŋ ŋwə lumə ŋwaa wi laa yi lùu wuu Kristo, bàw ŋwə baa ywiitə fɨ taa fwi ŋwə laa yia lùu vɨɨ Kristo sheꞌ yaa ŋwə. ⁸Mə nəə toꞌ kəə kɨ buꞌ dɨŋ ŋwaa buꞌ wutə ŋkɨə faŋ tɨta Kristo nə kɔ̀ shee maa məyɨsə viŋ ta taa nu Nwi, buu kaꞌ tɔ kaŋ kee dɨ̀ɨ shɔ me. Ŋwə nə kee kɔ̀ wutə kɔ́ laa yia kɨ ndisə viŋ me. ⁹Mə kee kəə ŋkə fuu laa mə kəə fesə viŋ nə vəŋwaꞌlə vaŋ me, ¹⁰faŋ vɨɨ mɔ́ꞌ gì laa vəŋwaꞌlə və Pɔɔl lùu vəshəsə baa lùu vəweꞌ, luu nə, faŋ nsiŋ vɨ vəŋ lùu shəŋ kəmuꞌ, ŋwə bɨbwa, yigisə yi luu yibwaŋnə. ¹¹Bàw vɨɨ vɔ́ kɔꞌ kɨɨ laa ŋkwiinə kee taa luu shɔ, faŋ nsiŋ baa lùu mɔ́ꞌ nə me. Nu ŋkɨə faŋ yia nyɔ̀ꞌ taa vəŋwaꞌlə faŋ yia lùu shəŋ day nə, nə nu ŋkɨə faŋ yia taa yɨsə faŋ nsiŋ luu mɔ́ꞌ nə, luu sheꞌ nɨndɨŋ.

Faŋ Pɔɔl kee kəə koꞌsə ŋwaa wi buꞌ faꞌ wə dɨday me

¹²Fwi sia kee biŋ laa vɨ kɨ mɔŋ yia laa yia kùꞌnə maa vɨɨ mɔ́ꞌ faŋ vəŋ suŋtə jəə vəŋ nə me, tɨꞌnə me maa məfɨꞌnə nu kia, yia vɨ vəŋ me. Kaꞌ vɨɨ vɔ́ fɨꞌnə nu vəŋ ŋgɨɨ-vəŋ, baa wàsə nu vəŋ maa ŋkə-vəŋ nu, buꞌ laa vəŋ kee kɨ̀ɨ nə nu yinsəŋ me. ¹³Gə fɨ maa yia, yia kee bəŋsə ŋwaa wia shɔ̀ɔ ki me, yia bəŋsə sheꞌ maa mfɨꞌ shuu faꞌ, faŋ Nwi nə fɨ̀ꞌ, kɔ̀ tɨ́ yia. Ŋkə kɨ nii lùu ki wia laa yia ziꞌ yɨ viŋ nɨzi. ¹⁴Nɨniŋ, yia kee lùu vɨɨ faŋ yia suŋtə yiŋwaa yia, kee zìꞌ yɨ viŋ me; yia nə zìꞌ yɨ viŋ nə ntɔŋ yijəə Nwi kɔ̀ŋ Yeso Kristo. ¹⁵Yia kee bəŋsə ŋwaa wia maa faꞌ faŋ vɨɨ day nə sàŋ yiŋwaa vəŋ shɔ, shɔ̀ɔ ki wia me. Yia nuŋsə fwi sia laa viŋ kɨ luu kɨ gə vɨsɨ vɨsɨ nə nu Kristo, buu yia ndɔ yɨ nu kwalə mɔ́ꞌ tɨ́ viŋ, shɔ̀ɔ yighee vɨsɨ maa shəŋ faꞌ kia, ¹⁶fɨꞌtə ntɔŋ yijəə Nwi maa məshɨ məmɔ́ꞌ faŋ mbə lùu yiba viŋ, kee kɨ bəŋsə ŋwaa wia buꞌ faꞌ wə dɨday me, faŋ ŋwə nə fàꞌ maa shəŋ faꞌ ki me. ¹⁷Wə ntɨə faŋ ŋwə kəə kɨ bəŋsə fa, ŋwə bəŋsə luu Nwi. ¹⁸Wə kee kuꞌnə, buꞌ laa suŋtə nshɨ-tɔ wi suŋtə ŋwaa wi me. Wə yaa kɨ kuꞌnə sheꞌ faŋ sùŋ Mɔꞌmbi sùŋtə ŋwə.

Faŋ kaꞌ vɨɨ ntɔŋ Kristo vəkwalə kee shɔ̀ɔ Pɔɔl me

¹Ŋkə bàw laa viŋ taa meꞌtə mə, faŋ mə kɔlə gi nu vəmfaw, viŋ meꞌtə mə. ²Mə weꞌ maa nu kiŋ, buꞌ laa yɨsə Nwi laa mə weꞌ maa nu kiŋ. Viŋ lùu yaa wee-wəzwi faŋ ŋwə kee ta kɨ̀ɨ nə wəndɔŋ me, faŋ mə ŋìi məndaa wi maa məkɔ tɨ́ wə mɔ́ꞌ, wə ghɔ́ lùu Kristo. ³Nɨniŋ, mə fɨfee laa vɨ taa buulə fwi yiŋ nɨzi, viŋ kee baa kàw Kristo nə fwi yimuꞌ yiley me, sheꞌ faŋ zɔ yì nə bwèꞌsə Eva nə mənay wi. ⁴Wə mɔ́ꞌ jwi, dèesə nu kɔ̀ŋ Yeso day, kee dèesə nu Yeso ŋgwə faŋ yia nəə deesə nu ki nə me, buu viŋ biŋ ŋwə nə məŋaytə. Vɨ kɔ̀ zwitə kəday tɨ́ viŋ, faŋ kee luu zwitə ŋkɨə faŋ viŋ nə fì yighee vɨsɨ nə me, tɨꞌnə me, fɨꞌtə ntɔŋ yijəə yiday, faŋ viŋ nə kee yizɔ yighee vɨsɨ me, buu viŋ bìŋ nə məŋaytə. Ŋkə kee baw me. ⁵Mə bɨꞌtə laa vɨɨ mbɨə faŋ viŋ tii vəŋ nə vɨɨ ntɔŋ Yeso vəkwalə nə, kee shɔ̀ɔ mə nə nu kəmuꞌ me. ⁶Mə kɔlə lùu bwə maa məgi, kee bə̀ə tɔ ley maa məkɨɨ nə nu Nwi me, faŋ yia duꞌtə yia yɨsə ŋkə ley tɨ́ viŋ maa vənu vənshə maa jɨɨsə sənshə.

Faŋ Pɔɔl nə fɨ̀ꞌtə nu Nwi tɨ́ vɨɨ Kɔrint, kee biŋ laa vəŋ ndɔꞌ ŋwə shɔ me

⁷Mə nə kee bìtə fa fɨ ghɔ viŋ me, faŋ mə nəə fɨꞌtə ntɔŋ yijəə Nwi tɨ́ viŋ me. Mə nə bwàsə ŋwaa ŋwaa nsi maa məyɨsə laa viŋ luu ŋkee vɨɨ. Nə luu nu gù mu? ⁸Faŋ mə nəə faꞌ tɨ́ viŋ nə, ndɔꞌ nshəŋtə vɨɨ Nwi vəday ndɔꞌ mə. Mə nəə fi fɨ ghɔ vəŋ maa məfaꞌ tɨ́ viŋ. ⁹Yighee njyə faŋ nsiŋ nə luu mɔ́ꞌ nə, mə nəə kee kɔ ŋɨꞌ tɨ́ viŋ, faŋ mə nə bəə ka me. Nə gaŋtə vaŋ-nshwi vaŋ faŋ vəŋ nə jwì fɨ Makedonia gàŋtə mə nə vətɔ vənshə faŋ mə nə bəə mbə. Mə nə tòꞌ nɨniŋ maa vənu vənshə, laa kɨ mə kɔ ŋɨꞌ tɨ́ wə fɨ wiŋ me. Mə ndɔ baa kɨ toꞌ sheꞌ nɨniŋ taa ŋwaa viŋ. ¹⁰Mə gì ntee buꞌ yinsəŋ Kristo fɨ taa fwi mə laa, kaꞌ wə kee fə̀ŋ mə fɨ maa nu kɔ́ fɨ nsi Akaya me, fɔnə faŋ mə faꞌ tɨ́ viŋ, kee ndeynə vəndɔꞌnə me, faŋ lùu nu məŋaytə shee. ¹¹Mə sii yɨ nɨniŋ buꞌ kə? Ŋkə lùu laa mə kee kàw viŋ yimu? Bey, Nwi kɔꞌ kɨɨ laa mə kàw viŋ. ¹²Nu ŋkɨə faŋ mə yɨsə, mə ndɔ kɨ yɨsə, tɨ́ kaꞌ mə shìa jɨɨ fɨ ghɔ vɨɨ mbɨə faŋ vəŋ kəə jɨɨ, shɔɔ fuŋ, laa vəŋ kɨ bəŋsə yiŋwaa vəŋ, laa vəŋ luu sheꞌ yuu yia. ¹³Vɨɨ vɔ́ sɨɨ ba laa vəŋ lùu vɨɨ ntɔŋ Kristo. Vəŋ lùu vɨɨ faꞌ bwənə, kwìinə yiŋwaa vəŋ maa məkəꞌ yaa ŋkee vɨɨ ntɔŋ Kristo. ¹⁴Nu kɔ́ kee lùu nu shuu yɔŋ me, buꞌ laa nshɨ-tɔ Satan kwìinə ŋwaa wi laa ŋwə kəꞌ yuu nshiiŋii Nwi. ¹⁵Faŋ ŋkə lùu nɨniŋ, vɨɨ faꞌ Satan kwìinə ŋwaa vəŋ maa məfɨnə vɨɨ faꞌ nu yinsəŋ, buu kee lùu nu kwalə me, vəndwə vəvəŋ ndɔ luu sheꞌ yaa njɨɨnə vəŋ.

Nu məbuꞌ dɨŋ lùu nu vəmfaw

¹⁶Mə baa gì laa kɨ viŋ bɨꞌtə laa mə luu ŋkɔmə me. Viŋ kɔlə bɨꞌtə nɨniŋ, viŋ bìŋ mə, faŋ mə luu ŋkɔmə wə nə, tɨ́ kaꞌ mə bə̀ŋsə ŋwaa ŋwaa tɨtiꞌ. ¹⁷Nu ŋkɨə faŋ mə kəə gi ndwə, mə kee gi maa jɨɨ tɨta Yeso me, mə gì sheꞌ yaa ŋkɔmə wə, buꞌ vɨɨ mbɨə faŋ vəŋ nùŋ fwisə vəŋ maa nu məbəŋsə yiŋwaa nə. ¹⁸Nɨniŋ, faŋ vɨɨ vəyaŋ lùu shɔ faŋ vəŋ koꞌsə yiŋwaa buꞌ nu wə mənsaw nə, mə taa yɨ sheꞌ nɨniŋ, ¹⁹buꞌ laa viŋ yaa kɨ ŋaytə maa vəmfaw, faŋ viŋ kɨ̀ꞌ yaa vɨɨ tɔ ley. ²⁰Maa viŋ bìŋ faŋ wə mɔ́ꞌ ndɨ̀ viŋ yaa vəbuꞌ vi, tɨꞌnə me kùŋ viŋ, tɨꞌnə me jìa viŋ, tɨꞌnə me kɔ̀ꞌsə viŋ, tɨꞌnə me sàŋ viŋ. ²¹Nu kɔ́ lùu nu tɔ dɨɨ tɨ́ yia. Yinsəŋ, yia kee bee kùꞌnə maa məyɨ kəŋ nu ghɔ́ me.

Faŋ Pɔɔl nə yè ŋɨꞌ yiyaŋ buꞌ nu Nwi

Luu nə, nu ŋkɨə faŋ wə mɔ́ꞌ buꞌ dɨŋ wi shɔ, kaꞌ mə bùꞌ dɨŋ ŋwaa shɔ nɨzi. Maa lùu yigisə vəmfaw faŋ mə gì nɨniŋ nə. ²²Vəŋ lùu vɨɨ Hibru lee? Mə lùu wuu Hibru nɨzi. Vəŋ lùu vɨɨ Isirayl mu? Mə lùu wuu Isirayl nɨzi. Vəŋ lùu vɨɨ ŋiinə Abraham mu? Mə lùu wuu ŋiinə Abraham nɨzi. ²³Vəŋ lùu vɨɨ faꞌ Kristo mu? Mə lùu wuu faꞌ Kristo nɨzi. Mə gisə yuu wuu ŋgienə, mə lùu wuu faꞌ Kristo shɔ̀ɔ vəŋ. Mə nə sàŋ ŋwaa ŋwaa maa faꞌ shɔ̀ɔ vəŋ. Mə nə ŋìi mfiŋ shɔ̀ɔ vəŋ. Vɨ nə sàŋ mə nə vəmfa shɔ̀ɔ ki. Mə nə shɔ̀ɔ fɨ shuu yiku ghee yaŋ. ²⁴Vɨɨ Jus nə sàŋ mə vəshiŋ tee, nə gòꞌ yighee mfa yimuꞌ yimuꞌ buu lùu ghee vəmfa muu-yinshwe, muu-yinshwe. ²⁵Vɨ nə sàŋ mə nə mbay bwey maa vəshəŋ vətia, tumə mə nə ŋoꞌsə yighee muꞌ. Vəbay faŋ mə nə ŋìi shɔ, tòꞌ fɨ fuu mamuu, senə vətia, mə shi taa mamuu shi ŋkwəŋ. ²⁶Ghee yaŋ faŋ mə toꞌ yitoꞌ nyaa, mə nə kii ŋɨꞌ fɨ ghɔ muu, faŋ mbə fùu, baa nə fɨ ghɔ vəndɔꞌ, baa lùu taa ŋɨꞌ fɨ ghɔ vɨɨ Jus nə fɨ ghɔ vɨɨ tɔŋmə day. Mə nə yè ŋɨꞌ taa məshɨ, nə taa vəshəŋ və nɔŋ-nɔŋ, nə taa mamuu, nə taa ŋwaa vɨɨ mənay. ²⁷Mə nə nùꞌ ŋwaa ŋwaa maa faꞌ weꞌ, shi nə yikɨꞌ ghee yaŋ. Jɨŋ za mə, too ŋwaa yɔŋ. Mə zwisə nə jɨŋ ghee yaŋ. Gwə koo mə, mə kee kìi fa kusə me.

²⁸Vənu vəmɔ́ꞌ kɨ bii maa məbaa gì. Vɨɨ jwì ghàysə mə vəshi vənshə. Mə bɨꞌtə vənu və nshəŋtə vɨɨ Nwi taa fwi mə. ²⁹Sii bwà ndə, mə kee bwa me? Kɔ̀ ndə kɔ̀ nu məbuulə, fwi nyaa kee za me? ³⁰Kɨ ghaŋ mə nə koꞌsə ŋwaa, buu mə koꞌsə maa vənu və lɨloo. ³¹Nshɨ-tɔ Nwi, tɨɨ Yeso Kristo, kɨɨ laa mə kee sɨɨ ba me. Mə kɨ bəŋsə ŋwə ghee nshə. ³²Yighee njyə faŋ mə nə luu shɨ Damaskɔs, goməna fwàŋ Aretas nə gutə shɨ Damaskɔs maa məjia mə. ³³Luu nə, vɨ kwaŋ mə taa nyəə, shàꞌsə shɔ̀ɔsə mə fɨ maa ŋɔŋ ŋkɔꞌ, faŋ vɨ nə bɨbɔŋ kìa shɨ Damaskɔs, mə nyɨŋ fɨ ghɔ ŋwə.

Faŋ Nwi nə yɨ̀sə Pɔɔl ye vənu fɨ taa yizɔ

¹Mə taa kɨ koꞌsə ŋwaa, faŋ ŋkə kɔlə kee lùu nu tɨ́ kaꞌ wə sèy fɨ fuŋ me, mə kəə gi kɔ̀ŋ vənu faŋ Mɔꞌmbi nə yɨ̀sə mbə fuu sɨ mə. ²Mə kɨ̀ɨ nə wə mɔ́ꞌ faŋ ŋwə lùu fa kəmuꞌ ghɔ Yeso, shɔ̀ɔ ŋuꞌsə ndwə njɔsə-yishwe, faŋ Nwi nə ndi ŋwə, shàꞌsə koꞌ ŋkee taa yizɔ. Kɨ ŋkə nə gày kɨkə, mə kee yikɨɨ me. Kɨ ŋkə nə luu nshɨ-tɔ wə ghɔ́, tɨꞌnə me sheꞌ zwitə ki, buu mə kee yikɨɨ me, kɨɨ sheꞌ Nwi. ³Mə baa kii bəŋsə, mə kɔꞌ kɨɨ laa vɨ nə shaꞌsə wə ghɔ́, gə̀ nə ŋwə yizɔ, baa nə laa mə kee yikɨɨ laa ŋkə nə gày sheꞌ tɨ́ zwitə ki me, tɨꞌnə me maa ŋwaa wi nshə me. Kɨɨ sheꞌ Nwi. ⁴Nwi nə shaꞌsə wə ghɔ́, gə nə ŋwə ŋkee shɨ Nwi, ŋwə nə zɔ̀ vənu fɨ fuŋ faŋ kaꞌ vɨ kee kìasə maa yigi me, vənu tɨ́ kaꞌ ŋoo shuu wə kee ŋaꞌsə gì me. ⁵Nɨniŋ, mə taa kɨ koꞌsə ŋwaa buꞌ kəŋ wə ghɔ́, faŋ ŋwə nə yè vənu vɔ́ nə. Luu nə, mə kee taa koꞌsə ŋwaa buꞌ ŋwaa ŋwaa me, tɨ̀ lɨꞌ vənu mbɨə faŋ mbə də məbwa ŋwaa me. ⁶Mə toꞌ kɨ kəə kɨ koꞌsə ŋwaa, buu mə kee taa luu mfaw me, buꞌ laa mə taa kɨ gisə yinsəŋ. Luu nə, mə mèꞌtə, laa kɨ wə kii mbɨꞌtə yiweꞌ yimɔ́ꞌ buꞌ mə me, shɔ̀ɔ faŋ ŋwə yè faŋ mə yɨsə, zɔ̀ faŋ mə gisə. ⁷Luu nə, Nwi yɨsə laa kɨ mə koꞌsə ŋwaa me, buꞌ vənu və shuu yɔŋvə faŋ mə nə ye nə. Vɨ sɔ̀ nyaw maa mbasə ŋwaa ŋwaa, faŋ luu ŋkee nshiiŋii Satan, faŋ vɨ nə kɔ laa ŋwə saŋ mə, laa mə kee baa kɨ koꞌsə ŋwaa me. ⁸Mə nə bùꞌ ghɔ tɨ́ Nwi ghee tia laa ŋwə baꞌsə vənu vɔ́ fɨ maa mə. ⁹Luu nə, Nwi bəŋsə shee laa, bàw mə ŋaytə sheꞌ buꞌ gəŋ si, faŋ yi gàŋtə mə shɔ nə, buꞌ laa wutə ki wèꞌ taa ŋwaa wə ntɨə faŋ ŋwə bɨbwa. Nɨniŋ, mə koꞌsə ŋwaa sheꞌ maa bəə ŋay kaŋ, tɨ́ kaꞌ wutə Kristo ŋìi taa ŋwaa mə, shìinə mə. ¹⁰Lùu nu ŋkɨə faŋ mə ŋaytə shɔ, faŋ mə bəə ŋay, tɨꞌnə me faŋ vɨ sàŋ mə, nə faŋ vɨ yɨnə mə, tɨꞌnə me shoꞌ ghuu ŋaa, nə faŋ mə ye ŋɨꞌ buꞌ nu Kristo, fɔnə mə bəə ŋay, buu mə weꞌ.

Faŋ Pɔɔl nə lùmə tɨ́ vɨɨ Kɔrint laa vəŋ nə yè vəshwenə fɨ ghɔ Nwi

¹¹Mə gisə yaa mfaw, luu nə, yɨ̀ viŋ laa mə kɨ yɨ nɨniŋ. Nə luu nu kiŋ maa məbəŋsə mə, buꞌ laa vɨɨ mbɨə faŋ viŋ tii nə vɨɨ ntɔŋ Kristo vəkwalə nə, kee bee shɔ̀ɔ mə me, faŋ mə kɔlə lùu wuu dayday. ¹²Maa mə nə yɨsə vənu mbɨə faŋ mbə də̀ laa mə lùu wuu ntɔŋ Kristo taa ŋwaa viŋ nə fwi yizutə. Nwi nə tɨ̀ŋ yiba jɨŋ mə, də̀ vəshwenə nə vənu və shuu yɔŋvə. ¹³Nu mɔ́ꞌ lùu shɔ faŋ vɨ nə gaŋtə nshəŋtə vɨɨ Nwi mɔ́ꞌ, faŋ mə kee baa gàŋtə viŋ shɔ yimu? Kaꞌ luu sheꞌ nu kəmuꞌ laa, mə nə kee fì fa fɨ ghɔ viŋ me. Bàw viŋ ndenə nu yiŋkii.

Faŋ Pɔɔl kəə vɨɨ Kɔrint, kee kəə ka vəŋ me

¹⁴Viŋ zɔ! Mə duꞌtə mə lootə ŋwaa maa məjwi yè viŋ lwesə ghee tia. Mə taa kɨ jwi, mə taa kee bitə fa fɨ ghɔ viŋ me. Mə kəə luu viŋ, kee kəə ka wiŋ me. Luu sheꞌ faŋ tɨɨ vaŋmbwaa yaa kɨ baytə ka maa məzəsə vaŋ vi. Kee yaa kɨ baytə vaŋmbwaa baytə ka maa məzəsə tɨɨ vəŋ me. ¹⁵Nɨniŋ, mə taa ŋaytə maa məbɨsə fa ŋkɨə faŋ mə kìi kənshə, nə nshɨ-tɔ ŋwaa nɨzi, maa məgaŋtə viŋ, tɨ́ kaꞌ viŋ kìi məbwey vəlwaŋ. Nə yɨ̀ laa mə kàw viŋ ŋkee dɨdɨꞌ, buu viŋ kee kàw mə yimu? ¹⁶Nɨniŋ, viŋ biŋ laa mə nəə kee kɔ ŋɨꞌ tɨ́ viŋ me, luu nə, wə mɔ́ꞌ taa gi laa mə nəə kɔꞌsə viŋ nə nu mənay. ¹⁷Mə nə ta kùŋ viŋ maa ntɔŋsə nsɨə faŋ mə nəə tɔŋ tɨ́ viŋ nə mu? ¹⁸Faŋ mə nə bùꞌ ghɔ tɨ́ Titɔs, ŋwə jwi yɨ viŋ, ghɔ weenshu ŋwaa wuu Kristo mɔ́ꞌ, Titɔs nə kùŋ viŋ mu? Maa yia ŋwə faꞌ sheꞌ maa gɨ yimuꞌ, baa yɨsə vənu sheꞌ maa jɨɨ yimuꞌ.

Faŋ Pɔɔl nəə fee laa vənu vəbwəvə kɨ bii taa ŋwaa vɨɨ Kɔrint

¹⁹Shù fɨ ntaŋ kaꞌ viŋ kɨ bɨꞌtə laa mbii vənu faŋ yia gisə nə, yia kəə fi tɔ kia fɨ ghɔ viŋ. Bey, yia gisə sheꞌ faŋ Kristo kəə laa yia gi vɨsɨ Nwi. Vaŋ-nshwi vaŋ faŋ mə kàw, viŋ kɔꞌ kɨɨ laa vənu vənshə faŋ yia gisə, yia gisə sheꞌ maa məgaŋtə viŋ, laa viŋ kɨ ta maa nu Nwi. ²⁰Mə fee laa yighee njyə faŋ mə taa ziꞌ yɨ viŋ, yè viŋ faŋ viŋ kee yɨsə vənu maa jɨɨ njyə faŋ mə kəə laa viŋ kɨ yɨsə nə me. Nɨniŋ, viŋ nɨzi taa kɨ ye mə faŋ mə yɨsə vənu faŋ viŋ kee kàw me. Lùu nɨniŋ buꞌ laa mə fɨfee laa mə taa jwi, ye viŋ taa ntaysə nə məsəsə vɨɨ, tɨꞌnə me nə fwi yishəsə nə vəŋwiŋ, tɨꞌnə me laa viŋ sɨɨ təba tɔ viŋ, viŋ viŋ, ndɔ buꞌ məlɔꞌ, tɨꞌnə me koꞌsə ŋwaa, nə nshəŋtə yiŋ yibuulə. ²¹Kɨ mə ndɔ kɨ jwi, Nwi yɨsə tɔ kaŋ dɨɨ taa ŋwaa viŋ, mə kɨ luŋ buꞌ vɨɨ vəyaŋ fɨ taa ŋwaa viŋ, faŋ vəŋ nəə yɨsə vənu vəbwəvə yighee vɨsɨ, kee ta kwìinə fwisə vəŋ buꞌ nu bwə vəŋ, faŋ vəŋ nəə tii vəki, tɨꞌnə me toꞌ ghɔ vəki vəsakə, tɨꞌnə me zɨ shɨ, faŋ vəŋ nəə yɨsə nə me.

Faŋ Pɔɔl nəə kəə gə ye vɨɨ Kɔrint, mètə nsɔꞌsə vəŋ sənshə

¹Mə taa jwi ye viŋ ndwə, lwesə ghee tia, nsiŋ shoꞌmə vənu vənshə faŋ vɨɨ nə gù shɔ nə. Vɨ taa tii vɨɨ məye nə sɨ vəbɔɔ, tɨꞌnə me vətia, buu shia nsɔꞌsə sənshə, nsə me. ²Maa yighee njyə faŋ nsiŋ nə luu mɔ́ꞌ maa ghuu yitoꞌ kaŋ lwesə ghee bɔɔ, mə yaa duꞌtə mə gi tɨ́ vɨɨ mbɨə faŋ vəŋ nəə yɨsə vənu vəbwəvə yighee vɨsɨ nə, nə tɨ́ vɨɨ vənshə, laa mə ndɔ baa bəŋ jwi, kee baa kɨ gay buꞌ nu bwə wə mɔ́ꞌ me. Mə baa bəŋsə gì ndwə, faŋ mə kɨ bii ntaŋ nə, laa ŋkə ndɔ luu nɨniŋ. ³Viŋ kəə laa mə də tɨ́ viŋ laa gisə Kristo gisə fɨ shuu mə tɨ́ viŋ. Nɨniŋ, Kristo kee bee yɨsə nu faŋ ŋkə bwa tɨ́ viŋ me, ŋwə yɨ nu faŋ ŋkə weꞌ taa ŋwaa viŋ. ⁴Vɨ nə kɨ bey ŋwə fuu fəŋkɔꞌ fə ŋkɨꞌsə, tɨ́ ŋwə bwa. Luu nə, ŋwə baa bwey buꞌ wutə Nwi. Luu sheꞌ faŋ yia toꞌ nɨniŋ nɨzi: yia bəə ŋay fɨ yiba ŋwə, luu nə, yia ndɔ bwey taa ŋwaa viŋ, yia ŋwə, wèꞌ tɨ́ viŋ buꞌ wutə Nwi kɔ́. ⁵Nɨniŋ, bàw viŋ kwaꞌtə nu kiŋ laa fwi yiŋ lùu ghɔ Kristo mu? Viŋ fɨꞌnə nu kiŋ maa nshɨ-tɔ wiŋ. Maa viŋ kɨɨ nə yiŋwaa laa Yeso lùu taa fwisə viŋ? Ŋwə nii toꞌ kee lùu shɔ me, buu nu kiŋ kee yikuꞌnə me. ⁶Mə bɨꞌtə laa viŋ taa kɨɨ laa yia kee bee gù nu me. ⁷Yia buꞌ ghɔ tɨ́ Nwi laa kɨ viŋ yɨ tuu nu bwə me. Kɨ mə kee gì nɨniŋ, tɨ́ kaꞌ yia ndɔ fuu yaa vɨɨ faꞌ jəə tɨ́ Nwi me. Mə kəə sheꞌ laa viŋ yɨ nu ŋkɨə faŋ ŋkə lùu kəloomə, faŋ ŋkə kɔlə ghɨɨ yaa yia gù nu. ⁸Kɨ kaꞌ yia kee yɨ̀ nu faŋ ŋkə fə̀ŋ nu yinsəŋ me. Kaꞌ yia yɨsə sheꞌ nu yinsəŋ. ⁹Yia ŋaytə faŋ yia bəə ŋay, viŋ weꞌ nə. Lùu nu ŋkɨə faŋ yia shɔꞌtə Nwi shɔ, laa Nwi bɔŋsə viŋ. ¹⁰Mə nyɔ̀ꞌ nee faŋ mə kee lùu yɨ viŋ me, tɨ́ kaꞌ mə taa kɨ jwi yɨ viŋ, kee baa kìi nu maa mədə wutə kaŋ tɨ́ viŋ me. Wutə ŋkɨə faŋ Mɔꞌmbi kɔ̀ shee nə, lùu wutə maa məfianə, kee lùu wutə maa məsɔꞌ me.

Shɔꞌtə fɨ ghɔ Pɔɔl tɨ́ vɨɨ Nwi fɨ shɨ Kɔrint

¹¹Maa məndwə, vaŋ-nshwi vaŋ, viŋ bwey jəə. Viŋ biŋ laa vɨ bɔŋsə viŋ, bwàsə fwi yiŋ. Viŋ bɨꞌtə nu kiŋ kəmuꞌ, dùꞌ nə mənɔŋ-bwaŋnə viŋ viŋ. Nwi faŋ lùu Nwi məkaw vɨɨ, baa lùu Nwi mənɔŋ-bwaŋnə nɨzi, dùꞌ viŋ vɨ vəŋ. ¹²Viŋ kɨ shɔꞌtə viŋ, viŋ viŋ, nə ŋkawnə, faŋ ŋkə bàw tɨ́ Nwi. Vɨɨ ley Nwi vənshə shɔꞌtə viŋ. ¹³Mənɔŋ-bwaŋnə fɨ ghɔ tɨta Yeso Kristo, nə ŋkawnə Nwi, nə Zwitə Ley Nwi kɨ shi taa ŋwaa viŋ vənshə.