Mfɔŋ Ŋwaꞌlə Tesalonika
Mfɔŋ ŋwaꞌlə Pɔɔl tɨ́ vɨɨ Nwi fɨ ntɨꞌ Tesalonika
Tesalonika nə luu ntɨꞌ vɨsɨ fɨ shɨ Makedonia. Faŋ Pɔɔl nə fɔŋ gə̀ fɨꞌtə nu Kristo yifi, vɨɨ Tesalonika vəyaŋ biŋ ŋwə, luu nə, vɨɨ Jus kee kàw me, kɨ shoꞌ ghuu ghi. Ŋwə shɔɔ gə Berea nə Kɔrint. Vəliŋ vi betə Tesalonika vəshi vəmɔ́ꞌ buu gə faynə ghɔ vɨ Pɔɔl shɨ Kɔrint. Pɔɔl kɨ nii nyɔ̀ꞌ ŋwaꞌlə ŋwə̀ tɨ́ vɨɨ Kristo fɨ ntɨꞌ Tesalonika. Ŋwə bwaŋ Nwi maa məbiŋ vəŋ, kɔ̀ bəŋsə buꞌ vənu vəmɔ́ꞌ faŋ vəŋ nə bìtə kɔ̀ŋ məywey fɨ shɨ yiku, baa nə faŋ Kristo ndɔ bəŋ jwi mbi.
Məsenə vəwaytə:
Vənzi vəŋwaꞌlə 1.1
Məbwaŋ nə məbəŋsə 1.2–3.13
Nshinə vɨɨ Kristo 4.1-12
Faŋ Kristo ndɔ bəŋ jwi 4.13–5.11
Yigi yimɔ́ꞌ kɔ̀ŋ nshinə vɨɨ Kristo 5.12-22
Vəndwə və ŋwaꞌlə 5.23-28
1Faŋ Pɔɔl nə shɔ̀ꞌtə Nwi tɔ vɨɨ Tesalonika
1Lùu mə, Pɔɔl, nə Silvanɔs, baa nə Timoti, faŋ yia nyɔ̀ꞌ ŋwaꞌlə ŋwə̀ tɨ́ nshəŋtə vɨɨ Nwi fɨ ntɨꞌ Tesalonika maa yizii tɨta Nwi, baa nə tɨta Yeso Kristo. Nwi kɔ viŋ nə mənɔŋ-bwaŋnə, baa nə məduꞌ-nyɔŋ! 2Yia bwaŋ Nwi ghee nshə tɔ viŋ vənshə, baa lumə viŋ taa məshɔꞌtə wia. 3Yia kɨ lumə vəfaꞌ vəjəəvə viŋ faŋ viŋ faꞌ buꞌ məbiŋ wiŋ maa Nwi, baa nə vənu vəjəəvə viŋ faŋ viŋ yɨsə fɨ taa ŋkawnə, baa lumə faŋ viŋ jìa fwi, kɨ̀ꞌ tɨta ŋwaa-nsiŋ Yeso Kristo maa yizii Nwi, faŋ lùu Tii ŋwaa-nsiŋ nə. 4Vaŋ-nshwi via faŋ Nwi kàw, yia kɔꞌ kɨɨ laa Nwi shòꞌ viŋ, 5fɔnə ntɔŋ yijəə Nwi faŋ yia nə fɨ̀ꞌtə tɨ́ viŋ nə, kee jwì taa ŋwaa viŋ sheꞌ fɨ maa yigisə shuu me. Ŋkə nə jwì ŋkee nə wutə Nwi, baa nə Zwitə Ley Nwi. Yia nə də̀ tɨ́ viŋ faŋ ntɔŋ yijəə yɔ́ luu ŋkee nu yinsəŋ. Viŋ kɔꞌ kɨɨ faŋ yia nə tòꞌ taa ŋwaa viŋ maa mədə jɨɨ tɨ́ viŋ. 6Viŋ nə zwètə nshinə yia baa nə nshinə tɨta Yeso, buꞌ faŋ viŋ nə zɔ̀ nu Nwi, bìŋ nə məŋaytə, faŋ vɨ nə kɔlə kɔ ŋɨꞌ tɨ́ viŋ ŋkee yiyaŋ. Nə yɨsə Zwitə Ley Nwi laa viŋ nə bìŋ nə məŋaytə nə.
7Nɨniŋ, viŋ gu vɨɨ tɨ́ kaꞌ vɨɨ məbiŋ Nwi fɨ shɨ Makedonia baa nə fɨ shɨ Akaya vənshə bèꞌsə ghuu yitoꞌ kiŋ, 8fɔnə nu Nwi nə fùu fɨ ghɔ viŋ, saynə taa məshɨ mə Makedonia nə Akaya, baa kii shɔ̀ɔ fɨ fuŋ, vɨ kɨɨ nə məbiŋ wiŋ, faŋ viŋ nùŋ fwi maa Nwi nə, maa vəshəŋ vənshə. Nɨniŋ, yia kee baa kìi nu gì me, 9buꞌ laa nshɨ-tɔ vɨɨ vɔ́ gisə nu kia, faŋ yia nə jwì yɨ viŋ nə, tɨ́ vɨɨ, baa gi faŋ viŋ nə kwìinə fwi siŋ, nùŋ maa Nwi, mèꞌ vənwi vədayday, faꞌ tɨ́ Nwi faŋ lùu Nwi yinsəŋ, faŋ kii sheꞌ ŋwə kìi məbwey, 10baa nə laa viŋ kɨꞌ Yeso, wee Nwi, faŋ Nwi nə ywèysə ŋwə fɨ shɨ yiku nə, faŋ ŋwə ndɔ siꞌ fɨ yizɔ, jwì bwèysə nsiŋ fɨ taa nsɔꞌ Nwi faŋ nyə ndɔ ŋii maa vɨɨ nə.
2Faŋ Pɔɔl nə lùmə tɨ́ vɨɨ Tesalonika faŋ ŋwə nə bɨ tey kɨ fɨꞌtə nu Nwi tɨ́ vəŋ
1Vaŋ-nshwi via, viŋ kɔꞌ kɨɨ laa nu ŋkɨə faŋ yia nə jwì yɨ viŋ nə, kee ndì day me. 2Viŋ baa luu kɨɨ faŋ yia nə bɨ yè ŋɨꞌ ntɨꞌ Filipi, vɨɨ kɔ ŋɨꞌ tɨ́ yia dɨdɨꞌ. Luu nə, yia jia fwi buꞌ Nwi wia, jwi fɨ̀ꞌtə ntɔŋ yijəə Nwi tɨ́ viŋ, faŋ vɨ nə kɔlə nywènə yia nə. 3Yia nə kee tɨsə viŋ nə nu faŋ ŋkə kee yikuꞌnə me, kee gì tɨ́ viŋ nə fwi yibwə me, kee mɔ̀ŋ maa məbweꞌsə viŋ me. 4Yia bee kii gisə nu ŋkɨə faŋ Nwi kəə, buꞌ laa ŋwə nə mɔ̀ŋ yia laa yia kùꞌnə mu, buu kɔ̀ nu kɔ́ taa ghɔ yia, faŋ lùu ntɔŋ yijəə Nwi. Yia fɨꞌtə ntɔŋ yɔ́ nɨniŋ, kee kəə kɨ bawsə too vɨɨ me, luu sheꞌ maa məbawsə too Nwi faŋ ŋwə kɔꞌ kɨɨ nə fwi sia. 5Viŋ kɔꞌ kɨɨ laa yia nə kee ta gì yigisə bəŋ tɨ́ viŋ tuu yighee muꞌ me, tɨꞌnə me gì yigi yimɔ́ꞌ maa məshitə viŋ shɔ, maa məkəə ka fɨ yiba me. Nwi kɔꞌ kɨɨ nɨniŋ nɨzi. 6Yia nə kee kəə laa viŋ, tɨꞌnə me vɨɨ mɔ́ꞌ, kɨ bəŋsə yia me, 7faŋ yia nə kɔlə kìi wutə buꞌ laa yia lùu vɨɨ ntɔŋ Kristo. Yia nəə bwasə yiŋwaa yia nsi, kɨꞌ viŋ faŋ nsiŋ nə luu mɔ́ꞌ nə, sheꞌ yaa nshu weembwa yaa kɨ kɨꞌ ŋwiŋ wi nə. 8Buꞌ ŋkawnə yia maa viŋ, yia nə kee kaw sheꞌ laa yia fɨꞌtə ntɔŋ yijəə Nwi tɨ́ viŋ me. Yia nə bee kii kɔ̀ yiŋwaa yia tɨ́ viŋ, buꞌ faŋ yia kaw viŋ dɨdɨꞌ. 9Vaŋ-nshwi via, maa viŋ lùmə faŋ yia nə fàꞌ nə wutə, fàꞌ vətuꞌ nə shɨshwi, laa kɨ tuu wə fɨ wiŋ kee kɨ ye ŋɨꞌ maa məzəsə yia me, faŋ yia nə fɨ̀ꞌtə ntɔŋ yijəə Nwi tɨ́ viŋ nə. 10Nshɨ-tɔ wiŋ, nə Nwi, nə ye nə yisɨ faŋ nshinə yia nə luu yiley, baa lùu yiloomə taa ŋwaa viŋ, yia kee gu tuu nu maa viŋ, faŋ viŋ nùŋ fwi siŋ maa Nwi nə me. 11Viŋ kɔꞌ kɨɨ laa yia nəə yɨ nu maa wə nə muꞌ nə muꞌ fɨ wiŋ sheꞌ faŋ tɨɨ wee yaa kɨ yɨsə maa ŋwiŋ wi. 12Yia nəə bwasə fwi siŋ, kwàŋ wutə maa viŋ, kɨ tɨsə viŋ maa məshi nshinə njyə faŋ nyə kùꞌnə tɨ́ Nwi, faŋ ŋwə tìi viŋ taa nu yifwàŋ ki, faŋ ŋkə bàw yaa ŋwə.
Faŋ Pɔɔl nə bwàŋ Nwi tɔ vɨɨ Tesalonika
13Nɨniŋ, yia bwaŋ Nwi buꞌ viŋ ghee nshə. Yighee njyə faŋ yia nə jwì nə yigisə Nwi tɨ́ viŋ nə, viŋ zɔ, nùŋ fwi siŋ shɔ, kee ndì yigisə yɔ́ yaa yigisə wə mənsaw me, ndì lùu yaa yigisə Nwi, faŋ nyə lùu nɨniŋ yinsəŋ. Nə luu nɨniŋ buꞌ laa Nwi nə faꞌ taa ŋwaa viŋ, faŋ viŋ nə nùŋ fwi siŋ maa ŋwə nə. 14Vaŋ-nshwi via, viŋ ndi ghuu yitoꞌ vɨɨ Nwi fɨ shɨ Judia, faŋ vəŋ lùu vɨɨ Nwi fiiba Yeso Kristo, buꞌ faŋ viŋ ye ŋɨꞌ fɨ ghɔ vɨɨ shɨ viŋ, sheꞌ faŋ vɨɨ Jus vɔ́ ye ŋɨꞌ fɨ ghɔ vɨɨ shɨ vəŋ nə. 15Vɨɨ Jus nə kee kɔ ŋɨꞌ sheꞌ tɨ́ vɨɨ Nwi fiiba Yeso me, vəŋ nə bee kii zwì nshɨ-tɔ tɨta Yeso, baa zwilə nshiisə-ŋii sɔghɔ nɨzi, baa luu shoꞌ ghuu ghia. Vəŋ kee bàw tɨ́ Nwi me; vəŋ lùu vɨɨ mbeenə vɨɨ vənshə. 16Vəŋ baa fəŋ yia laa kɨ yia kɨ gisə tɨ́ vɨɨ tətɔŋ fu, tɨ́ kaꞌ Nwi bweysə vəŋ me. Nɨniŋ, vəŋ lwèsə mfɨꞌ nu bwə vəŋ yighee muꞌ. Luu nə, nsɔꞌ Nwi duꞌtə nyə jia vəŋ maa məndisə vəŋ.
Faŋ jɨŋ vɨɨ Tesalonika za və Pɔɔl
17Vaŋ-nshwi via, faŋ nsiŋ nə gàasə maa wee-fɨ-kuŋtə yighee nee nə, jɨŋ yiŋ za yia dɨdɨꞌ, faŋ vɨ kɔlə gàasə sheꞌ məyenə yiŋwaa nyaa-nsiŋ, kee gàasə fwi saŋ-nsiŋ me. Nɨniŋ, yia kəə ŋkee dɨdɨꞌ maa məye yikəꞌ yiŋ ghee nshə, 18kəə jwi ye viŋ ghee ghee. Nshɨ-tɔ ŋwaa, Pɔɔl, yaa kəə jwi yɨ viŋ yighee muꞌ, tɨꞌnə me ghee bɔɔ, luu nə, tɨɨ vəzwitə vəbwəvə fəŋ yia. 19Nu ŋkɨə tɨ́ kaꞌ yia ŋaytə shɔ vɨsɨ tɨta ŋwaa-nsiŋ Yeso maa yighee njyə faŋ ŋwə ndɔ bəŋ jwi nə, taa luu kə? Nu ŋkɨə tɨ́ kaꞌ vɨ ndɔ bəŋsə yia shɔ, yia nùŋ fwi sia shɔ, lùu kə? Maa luu sheꞌ viŋ. 20Yia ndɔ ŋaytə maa yighee yɔ́ luu buꞌ viŋ. Nwi yɨsə yia kwalə buꞌ viŋ.
3Faŋ vɨɨ Nwi fɨ ntɨꞌ Tesalonika goꞌ ghɔ vɨ Kristo, kɨ kaw yiŋwaa yivəŋ, vəŋ vəŋ
1Nɨniŋ, faŋ nə kɨ kaꞌ yia kee baa dùꞌ maa məbaa zɔ̀ ŋkɔŋ yiŋ nə me, yia nə bìŋ nə fwi yijəə maa mətɔŋ Timoti tɨ́ viŋ, baa luu dùꞌ shɨ Atens nɨnɔŋ. 2Nɨniŋ, yia nə tɔ̀ŋ Timoti, faŋ lùu weenshu ŋwaa-nsiŋ, baa lùu wuu faꞌ Nwi faŋ yia vɨ vəŋ fɨꞌtə ntɔŋ yijəə Nwi kɔ̀ŋ Yeso Kristo nə. Yia nə tɔ̀ŋ ŋwə nɨniŋ laa ŋwə jwi wèꞌsə fwi siŋ, gàŋtə viŋ maa mənuŋ fwi siŋ maa Yeso Kristo, twèꞌ shɔ, 3laa kɨ tuu wə fɨ wiŋ bəŋ yiba buꞌ ŋɨꞌ njyə faŋ nyə ŋìi maa viŋ ndwə nə me, faŋ vɨ jiatə viŋ, yɨ nə viŋ nə. Viŋ baa luu kɨɨ laa lùu nu kaŋ-nsiŋ maa məye ŋɨꞌ nɨniŋ. 4Maa viŋ lumə laa yia nə nàysə tɨ́ viŋ fɨ ntaŋ, faŋ nsiŋ nə luu mɔ́ꞌ nə, laa lùu nu kaŋ-nsiŋ maa məye ŋɨꞌ fɨ ghɔ vɨɨ. Maa ŋkə gay sheꞌ nɨniŋ, viŋ baa luu kɨ̀ɨ nɨniŋ. 5Lùu nu ŋkɨə faŋ ŋkə nə yɨ̀sə laa kɨ kaꞌ mə kee baa jìa fwi nyaa me, tɔ̀ŋ Timoti maa məkɨɨ nə məbiŋ wiŋ, faŋ viŋ nùŋ fwi maa Kristo nə, buꞌ tɨɨ vəzwitə vəbwəvə mɔŋ viŋ, bwèꞌsə viŋ, viŋ ndi jɨɨ, buu vəfaꞌ via taa ŋwaa viŋ kɨ nii yindi. 6Lùu ndwə, Timoti bə̀ŋ jwì fɨ yɨ viŋ, jwì yɨ yia, nàysə ntɔŋ yijəə tɨ́ yia, laa viŋ gòꞌsə viŋ vɨ Kristo, kawnə viŋ viŋ, ndɔ lumə yia jəə ghee nshə, baa nə laa jɨŋ məye yia zasə viŋ nɨzi, sheꞌ faŋ jɨŋ yiŋ zasə yia nɨzi. 7Nɨniŋ, fwi sia zutə buꞌ viŋ, vaŋ-nshwi via, faŋ yia kɔlə ye ŋɨꞌ yiyaŋ, vɨɨ yɨnə yia nə. Fwi sia zutə buꞌ faŋ viŋ gòꞌsə maa nu Kristo nə. 8Yia baa luu bwey ndwə, buꞌ laa viŋ tɨŋ weꞌ maa nu tɨta Kristo. 9Sii kaꞌ yia kɔ̀ kə tɨ́ Nwi, bwàŋ ŋwə buꞌ laa viŋ nùŋ fwi siŋ maa Kristo nə, fɔnə yia kìi məŋaytə yaŋ vɨsɨ Nwi buꞌ viŋ. 10Yia shɔꞌtə Nwi ŋkee dɨdɨꞌ vətuꞌ nə shɨshwi, laa ŋwə biŋ yia jwi yè viŋ nə sɨ, gaŋtə viŋ maa nu ŋkɨə faŋ viŋ bəə fɨ taa məbiŋ wiŋ, tɨ́ kaꞌ viŋ tɨ̀ŋnə weꞌ maa nu Nwi.
11Bàw nshɨ-tɔ Nwi, tii ŋwaa-nsiŋ, ghɔ tɨta ŋwaa-nsiŋ Yeso Kristo ŋaꞌsə jɨɨ tɨ́ yia maa məjwi yɨ viŋ. 12Bàw tɨta Kristo yɨsə ŋkawnə yiŋ yaŋ, viŋ kɨ kawnə yiŋwaa yiŋ, baa luu kaw vɨɨ vənshə, gə vɨsɨ vɨsɨ, ŋkə lwaŋ taa fwisə viŋ bə̀, sheꞌ faŋ yia kàw viŋ nə. 13Tɨta ŋwaa-nsiŋ Yeso kɨ yɨsə nɨniŋ, kwàŋ wutə taa fwisə viŋ, laa yighee njyə faŋ ŋwə ndɔ bəŋ jwi ghɔ vɨ vɨɨ vi vənshə, faŋ vəŋ lùu vɨɨ ley vɨsɨ Nwi nə, viŋ baw shɨlə yikəꞌ Nwi, tɨta ŋwaa-nsiŋ.
4Faŋ bàw viŋ kɨ toꞌ ghuu yitoꞌ kiŋ faŋ ŋkə kùꞌnə tɨ́ Nwi
1Vaŋ-nshwi vaŋ, yia fàynə vənu vɔ́ laa viŋ kɨ toꞌ ghuu yitoꞌ kiŋ, ŋkə kuꞌnə tɨ́ Nwi. Maa viŋ nə duꞌtə viŋ zɔ fɨ ghɔ yia, faŋ ŋkə kùꞌnə maa mətoꞌ vɨsɨ Nwi; viŋ baa luu tòꞌ nɨniŋ. Nɨniŋ, yia buꞌ ghɔ tɨ́ viŋ, tɨsə viŋ maa yizii tɨta Yeso, laa viŋ kɨ toꞌ nɨniŋ, gə̀ vɨsɨ vɨsɨ. 2Viŋ kɔꞌ kɨɨ nə ntɨsə sɔ́, faŋ yia nə kɔ̀ tɨ́ viŋ maa yizii tɨta Yeso nə. 3Nu ŋkɨə faŋ Nwi kəə lùu laa viŋ baw, ndɔ̀ fɨ̀nə ŋwə, nyɨ̀ŋ fɨ maa nu vəki sakə. 4Bàw wə tɨ̀ me wə kɨ shiinə ŋwaa wi, shi sheꞌ ghɔ zu wi, tɨ́ kaꞌ viŋ lùu vɨɨ ley vɨsɨ Nwi, gə̀ nə vɨsɨ, vɨ kɨ bəŋsə viŋ shɔ vɨsɨ Nwi. 5Kɨ viŋ kɨ tii vəki sheꞌ faŋ mbasə ŋwaa wiŋ kàw me, yaa vɨɨ məmanə Nwi yaa kɨ yɨsə nə. 6Baa nə laa kɨ wə yɨ nu bwə maa weenshu wi me, kee kɨ fuŋsə ŋwə maa nu me, buꞌ laa tɨta Nwi bəŋsə vənu vəbwəvə vɔ́ vənshə tɨ́ vɨɨ, kwaŋ nsɔꞌ tɔ vəŋ, sheꞌ faŋ yia nə duꞌtə yia naysə tɨ́ viŋ, baa tɨsə viŋ shɔ nə. 7Nwi nə kee tìi nsiŋ laa nsiŋ kɨ yɨsə vənu vəbwəvə me. Ŋwə nə tìi nsiŋ laa nsiŋ baw shɨlə, gə̀ nə vɨsɨ. 8Nɨniŋ, wə ntɨə faŋ ŋwə shìa nu kɔ́, kee shìa luu wə me, ŋwə shìa luu Nwi, ŋkee ŋwə faŋ ŋwə kwaŋ Zwitə ki, faŋ ŋkə bàw shɨlə nə, taa fwisə viŋ.
9Gə fɨ maa nu məkaw yiŋwaa yiŋ, ŋkə kee lùu nu faŋ mə taa baa nyɔꞌ tɨ́ viŋ me, buꞌ laa nshɨ-tɔ Nwi deesə viŋ maa məkaw yiŋwaa yiŋ, viŋ viŋ. 10Viŋ baa luu yɨ̀ nɨniŋ maa vaŋ-nshwi vaŋ-nsiŋ vənshə fɨ shɨ Makedonia. Vaŋ-nshwi via, yia tɨsə viŋ sheꞌ laa viŋ kɔꞌ kɨ gɨgə nə vɨsɨ taa ŋkawnə yiŋ yɔ́. 11Viŋ kɨ tə sɨ maa məduꞌ bwaŋnə, baa nə laa wə tɨ̀ me wə kɨ ndeynə nu ki, faꞌ faꞌ nə ghɔ ghi maa məkii fazɨ, sheꞌ faŋ yia nə duꞌtə yia tɨsə viŋ shɔ nə. 12Viŋ yɨ nɨniŋ laa ghuu yitoꞌ kiŋ baw tɨ́ vɨɨ mbɨə faŋ vəŋ kee lùu vɨɨ Nwi me, baa nə laa viŋ kee kɨ bəə fa laa vəŋ kɨ gaŋtə viŋ shɔ me.
Faŋ Pɔɔl nə zwisə fwisə vɨɨ Kristo buꞌ vaŋ-nshwi vəŋ faŋ vəŋ nə kukə̀
13Vaŋ-nshwi via, yia kee kaw laa viŋ duꞌ nshi buꞌ nu vaŋ-nshwi vaŋ-nsiŋ mbɨə faŋ vəŋ kukə̀ me. Yia kəə twelə tɨ́ viŋ laa kɨ viŋ luŋ yaa vɨɨ mɔ́ꞌ faŋ vəŋ kee kɨ̀ꞌ məbwey vəlwaŋ me. 14Kɨ luu nsiŋ biŋ laa Yeso nə ku, baa ywèy fɨ shɨ yiku, buu nsiŋ kɔꞌ kɨɨ laa Nwi ndɔ yɨsə laa vɨɨ mbɨə faŋ vəŋ nə kukə̀ nə, ndɔ gə ziꞌ shəŋ ŋkɨə faŋ Yeso lùu shɔ nɨzi. 15Nu ŋkɨə faŋ yia naysə tɨ́ viŋ ndwə, nə twèlə nshɨ-tɔ tɨta Yeso tɨ́ yia. Viŋ zɔ! Nu kaŋ-nsiŋ, faŋ nsiŋ dùꞌ yinyay ndwə, baa duꞌ yinyay gə kɔ tɨ́ shi ŋkɨə faŋ tɨta Yeso ndɔ bəŋ jwi, kee shɔ̀ɔ nu vɨɨ mbɨə faŋ vəŋ nə kukə̀ nə me. 16Nshɨ-tɔ tɨta Yeso ndɔ gi nəŋay, nshiiŋii taa mbuꞌ Nwi luꞌ, yisaw Nwi gi maa yighee njyə faŋ tɨta Yeso ndɔ siꞌ fɨ taa yizɔ. Vɨɨ mbɨə faŋ vəŋ nə kukə maa yizii Kristo nə, kɨ nii ywèy fɨ shɨ yiku ŋkəə, 17buu Nwi ndi nsiŋ, faŋ nsiŋ lùu vɨɨ faŋ nsiŋ ndɔ duꞌ yinyay maa shi kɔ́, ndì nsiŋ nə mbɔꞌ, nsiŋ vɨ vəŋ koꞌ yizɔ mɔ́ꞌ, fàynə nsiŋ vɨ tɨta Yeso, dùꞌ nɨniŋ nsiŋ vɨ tɨta Yeso ghee nshə. 18Nɨniŋ, viŋ zwisə fwi siŋ nə təgi tɔ́, viŋ viŋ.
5Faŋ kaꞌ wə kee kɨ̀ɨ nə shi ŋkɨə faŋ Yeso Kristo ndɔ baa jwi shɔ me
1Vaŋ-nshwi via, gə fɨ maa yighee njyə faŋ vənu vɔ́ ndɔ gay nə, kee bàw mə nyɔꞌ tɨ́ viŋ me. 2Nshɨ-tɔ wiŋ kɔꞌ kɨɨ ŋkee jəə laa, shi məjwi tɨta Kristo ndɔ luu yaa ndɔꞌ, faŋ ŋwə yaa kɨ jwi nɨntəŋ vətuꞌ, faŋ wə kee yikɨɨ me. 3Vɨɨ ndɔ kɨ gisə laa, mbi dùꞌ nə mənɔŋ-bwaŋnə, nu kee baa lùu shɔ tɨ́ kaꞌ ŋkə ghɔ̀ꞌ vɨɨ me. Sheꞌ yighee yɔ́ faŋ vəŋ gisə nɨniŋ nə, nsɔꞌ Nwi gwəkə ŋìi maa vəŋ, sheꞌ yaa nu wəzwi gɔsə faŋ yighee yi gwəkə kùꞌ maa məbi. Sheꞌ nɨniŋ, jɨɨ maa mənyɨŋ kee baa lùu shɔ maa yighee yɔ́ me. 4Gə fɨ maa viŋ, vaŋ-nshwi via, viŋ kee lùu taa mfiŋsə me; shi kɔ́ kee ndɔ gwəkə jɨjwi tɨ́ viŋ yaa ndɔꞌ me. 5Viŋ vənshə lùu vɨɨ taa məley, baa lùu vɨɨ shi kɔ́. Nsiŋ kee lùu vɨɨ fu vətuꞌ me, kee lùu vɨɨ mfiŋsə me. 6Nɨniŋ, kɨ nsiŋ kɨ bwey yaa vɨɨ vɔ́ me; nsiŋ kɨ shi nə yikɨꞌ, bwasə ŋwaa. 7Vɨɨ mbɨə faŋ vəŋ bɨbwey, bwey luu vətuꞌ. Vɨɨ mbɨə faŋ vəŋ nu məluꞌ, mbə shɔɔ sɨ vəŋ, mbə shɔɔ sheꞌ vətuꞌ. 8Gə fɨ maa nsiŋ, faŋ nsiŋ lùu vaŋ shi kɔ́ nə, bàw nsiŋ jia fwi saŋ-nsiŋ, mɔ̀ꞌ məbiŋ nə ŋkawnə yaa njwi yighaw faŋ nyə shiinə nsiŋ fɨ ghɔ nu bwə. Nsiŋ kɨ kɨꞌ məbwey vəlwaŋ. Məkɨꞌ məbwey ghɔ́ lùu yaa yisɔꞌ vəsogeꞌ tɨ́ nsiŋ, shìtə nsiŋ fɨ ghɔ zwitə bwə. 9Viŋ yɨ nɨniŋ buꞌ laa Nwi nə kee nùŋ nsiŋ laa nsɔꞌ yi ndɔ jia nsiŋ me. Ŋwə nə tìi nsiŋ laa nsiŋ ndɔ zɨ məbwey vəlwaŋ fɨ yiba tɨta ŋwaa-nsiŋ Yeso Kristo, 10faŋ ŋwə nə kù tɔ nsiŋ nə. Nɨniŋ, nsiŋ duꞌ nə yikɨꞌ, tɨꞌnə me bɨbwey, nsiŋ duꞌ yinyay nsiŋ vɨ vəŋ. 11Nɨniŋ, viŋ weꞌsə wə nə wə, gaŋtə wə nə wə maa mənuŋ fwi maa Nwi, kɨ yɨsə nɨniŋ, sheꞌ faŋ viŋ yɨsə nə.
Nu ŋkɨə faŋ ŋkə bàw tɨ́ vɨɨ Kristo maa məyɨsə
12Vaŋ-nshwi via, yia buꞌ ghɔ tɨ́ viŋ laa viŋ kɨɨ nə nu vɨɨ mbɨə faŋ vəŋ sàŋ yiŋwaa yivəŋ maa vəfaꞌ buꞌ viŋ. Vəŋ duꞌ tɔ viŋ maa yizii tɨta Yeso, tɨsə viŋ. 13Bàw viŋ biŋ vəŋ, kɔ̀ feenə tɨ́ vəŋ dɨdɨꞌ, kàw vəŋ buꞌ nu faꞌ vəŋ kɔ́. Viŋ duꞌ nyɔŋ viŋ viŋ. 14Vaŋ-nshwi via, yia tɨsə viŋ laa viŋ kɨ bɔŋsə vɨɨ faŋ vəŋ toꞌ fɨ maa jɨɨ yigɨŋkə, baa bàwsə fwisə vɨɨ mbɨə faŋ fwisə vəŋ lɔ̀ꞌ. Viŋ kɨ gaŋtə vɨɨ mbɨə faŋ vəŋ kee lùu vəweꞌ maa nu Nwi me. Viŋ kee gəŋsə vɨɨ vənshə. 15Viŋ kɨ ye laa kɨ wə bəŋsə bwə nə bwə me. Viŋ bee kii kɨ yɨ̀sə jəə maa viŋ, viŋ viŋ, baa luu yɨ̀sə jəə maa vɨɨ vənshə.
16Viŋ kɨ ŋaytə ghee nshə, 17shɔꞌtə Nwi ghee nshə, 18bwaŋ ŋwə maa vənu vənshə, buꞌ laa nu ŋkɨə faŋ Nwi kəə, lùu laa viŋ kɨ yɨsə nɨniŋ maa yizii Yeso Kristo. 19Kɨ viŋ fəŋ Zwitə Ley Nwi me, 20kee mànə nu ŋkɨə faŋ Nwi kwàŋ shuu vɨɨ, vəŋ gisə me. 21Viŋ kɨ kwaꞌtə vənu vənshə, jìa ŋkɨə faŋ ŋkə kùꞌnə. 22Viŋ kɨ shiinə yiŋwaa yiŋ fɨ ghɔ ntɔ nu bwə tɨ̀ me ntɔ nu bwə.
Faŋ bàw nshɨ-tɔ Nwi gaŋtə viŋ maa məduꞌ ley vɨsɨ Nwi
23Nshɨ-tɔ Nwi faŋ ŋwə lùu Nwi mənɔŋ-bwaŋnə nə, yɨsə viŋ baw shɨlə maa vənu viŋ vənshə! Bàw ŋwə jia zwitə kiŋ nə fwi siŋ nə ŋwaa wiŋ, laa viŋ baw mètə, tuu wee-ndoꞌ kee lùu maa viŋ me, maa shi ŋkɨə faŋ tɨta ŋwaa-nsiŋ Yeso Kristo ndɔ bəŋ jwi. 24Nwi, faŋ ŋwə tìi viŋ nə, lùu wuu yinsəŋ. Ŋwə ndɔ baa yɨ nu kɔ́.
Vəndwə və ŋwaꞌlə
25Vaŋ-nshwi via, viŋ kɨ shɔꞌtə Nwi tɔ yia. 26Viŋ shɔꞌtə vaŋ-nshwi vaŋ-nsiŋ vənshə, nyɔ̀ŋ fəə vəŋ maa yizii Nwi.
27Mə lɨ̀ꞌtə Mɔꞌmbi tɔ viŋ laa viŋ tii ŋwaꞌlə ŋwə̀ tɨ́ vaŋ-nshwi vaŋ-nsiŋ vənshə. 28Tɨta ŋwaa-nsiŋ Yeso Kristo tu mənɔŋ-bwaŋnə tɔ viŋ, kèe gəŋ siŋ!