1 Pita

Mfɔŋ Ŋwaꞌlə Pita

Mfɔŋ ŋwaꞌlə Pita lùu tɨ́ vɨɨ Kristo faŋ vəŋ nə sàykə taa məshɨ mə Asia. Pita nə kəə weꞌsə vɨɨ Kristo faŋ vəŋ nəə ye ŋɨꞌ buꞌ məbiŋ vəŋ. Ŋwə lumə ntɔŋ yijəə tɨ́ vəŋ kɔ̀ŋ Yeso Kristo. Ŋɨꞌ lùu shɔ maa məmɔŋ məbiŋ vəŋ. Bàw vəŋ nuŋ fwi vəŋ maa Kristo, kee bwa me, tə̀ sɨ laa Kristo ndɔ bəŋ jwi, bweysə vəŋ.

Məsenə vəwaytə:

Vənzi və ŋwaꞌlə 1.1-2

Nwi kɔ nsiŋ nə məbwey vəlwaŋ 1.3-12

Nshinə yijəə vɨɨ Kristo 1.13–2.10

Nshinə yijəə maa yighee ŋɨꞌ 2.11–4.19

Vəfaꞌ və vɨɨ Kristo 5.1-11

Vəndwə və ŋwaꞌlə 5.12-14

Shɔꞌtə Pita tɨ́ vɨɨ Nwi

¹Lùu mə Pita, wuu ntɔŋ Yeso Kristo, faŋ mə tɔŋ ŋwaꞌlə ŋwə̀ tɨ́ viŋ, vɨɨ Nwi faŋ viŋ sàykə taa məshɨ mə Pɔntɔs nə Galatia nə Kapadosia nə Asia nə Bitinia. ²Tɨta Nwi nə kɨ̀ɨ nə viŋ fɨshi, shòꞌ viŋ laa Zwitə ki yɨsə viŋ luu vɨɨ vi, kɨ zɔnə ŋwə, baa nə laa Yeso Kristo tùtə mənshi mi tɔ viŋ, tɨ́ kaꞌ viŋ ley vɨsɨ Nwi. Nwi kuꞌsə mənɔŋ-bwaŋnə tɔ viŋ, baa nə məduꞌ-nyɔŋ!

Faŋ Nwi kɔ nsiŋ nə məbwey vəlwaŋ

³Nsiŋ kɨ bəŋsə Nwi, tɨɨ Yeso Kristo, faŋ luu mbweysə nyaa-nsiŋ. Nwi nə kèe gəŋ saŋ-nsiŋ dɨdɨꞌ, faŋ ŋwə nə kɔ̀ məbwey fi tɨ́ nsiŋ, buꞌ faŋ ŋwə nə ywèysə Yeso fɨ shɨ yiku. Nɨniŋ, kaꞌ nsiŋ kɨ̀ꞌ məbwey vəlwaŋ nə məŋaytə. ⁴Ŋwə bì nsiŋ nə nshinə yifi, laa nsiŋ kɨꞌ vətɔ mbɨə faŋ nsiŋ ndɔ zɨ yinsəŋ. Vətɔ vɔ́ kaꞌ mbə kee ndɔ shuu me, kee bɨ me, kee mè me. Nwi nùŋsə vətɔ vɔ́ yizɔ tɨ́ viŋ, ⁵faŋ Nwi shiinə viŋ nə wutə ki laa viŋ ndɔ zɨ̀ məbwey vəlwaŋ ghɔ́, faŋ viŋ nùŋ fwi siŋ maa ŋwə. Nwi nùŋ məbwey vəlwaŋ ghɔ́ laa ŋwə ndɔ fuu ntee maa yighee shə. ⁶Nɨniŋ, viŋ kɨ ŋaytə buꞌ vənu vɔ́, ŋkee ndwə faŋ yighee mɔ́ꞌ viŋ lɨluŋ, buꞌ məmɔŋ faŋ viŋ yè jɨɨsə jɨɨsə. Məmɔŋ ghɔ́ luu sheꞌ maa kuŋtə yighee. ⁷Ŋiꞌ nu ŋkɨə faŋ ŋkə yɨsə laa viŋ kɨ ye ŋɨꞌ nə məmɔŋ lùu laa, vɨ yè məbiŋ wiŋ laa viŋ kà fwi, bìŋ Nwi yinsəŋ. Ŋkə luu sheꞌ yaa nu bwey bay faŋ vɨ tii nə goolə, faŋ vɨ yaa kɨ mɔŋ ŋkə nə wisə maa məye laa ŋkə yibaw mu. Məbiŋ wiŋ shɔ̀ɔ bwey bay kɔ́ faŋ ŋkə kee ndɔ goꞌsə me. Viŋ kìi məmɔŋ ndwə, tɨ́ kaꞌ vɨ kɨ bəŋsə Nwi dɨdɨꞌ buꞌ məbiŋ wiŋ yighee njyə faŋ Yeso Kristo ndɔ jwi fuu ntee. ⁸Viŋ nə kee ta yè Yeso me, luu nə, kɨ kaw ŋwə, kee yè ŋwə me, kɨ nuŋ fwi siŋ maa ŋwə. Viŋ bəŋsə ŋwə, kɨꞌ ŋwə nə məŋaytə, ŋaytə shɔɔ ki, faŋ kaꞌ wə kee fɨ̀ꞌtə nə shuu wi me. ⁹Kaꞌ viŋ kɨꞌ ŋwə nə məŋaytə, buꞌ laa Nwi bwèysə viŋ, kɔ̀ məbwey vəlwaŋ tɨ́ viŋ. Lùu nu ŋkɨə faŋ ŋkə fùu fɨ maa məbiŋ wiŋ.

¹⁰Viŋ kɔꞌ kɨɨ laa nshiisə-ŋii sɔghɔ fɨ ywaŋ vɨsɨ nəə bɨbɨꞌtə kɔ̀ŋ məbwey vəlwaŋ ghɔ́, kɨ kəə jɨɨ yi, faŋ vəŋ nəə fɨꞌtə ŋiꞌ ki tɨ́ vɨɨ. Vəŋ nə fɨꞌtə kɔ̀ŋ məbwey ghɔ́ faŋ Nwi kɔ̀ tɨ́ viŋ ndwə.

¹¹Zwitə ley Kristo faŋ ŋkə nə luu taa fwisə vəŋ, nə tey kɨ fɨꞌtə nu ŋɨꞌ, faŋ Kristo ndɔ ye, nə feenə wi faŋ Nwi ndɔ kɔ yighee yiba. Vəŋ nəə kəə laa nu kɔ́ ndɔ gay yighee kə, baa nə laa ŋkə ndɔ jwi kɨkə? ¹²Vəŋ nəə kəə nɨniŋ, Nwi twelə tɨ́ vəŋ laa nu kɔ́ nə kee lùu tɨ́ vəŋ me, faꞌ vəŋ nə luu buꞌ viŋ, faŋ vəŋ nə fɨ̀ꞌtə vənu vɔ́ nə. Vənu vɔ́ nə luu sheꞌ vənu mbɨə faŋ viŋ zɔ fɨ ghɔ vɨɨ məfɨꞌtə ntɔŋ yijəə Nwi ndwə. Nwi nə tɔ̀ŋ Zwitə Ley fɨ yizɔ, ŋkə ŋii taa fwisə vəŋ, buu vəŋ jwi kɨ fɨꞌtə ntɔŋ yijəə yɔ́ tɨ́ viŋ ndwə. Luu ŋkee ntɔŋ yijəə faŋ ŋkee nshiisə-ŋiisə Nwi kəə taa ghaa ye vənu vɔ́ nɨzi.

Nshinə faŋ nyə kuꞌnə tɨ́ vɨɨ Nwi

¹³Nɨniŋ, viŋ lootə yiŋwaa yiŋ, tɔ kiŋ ley nɨzi, viŋ nuŋsə fwi siŋ sheꞌ maa məbwey ghɔ́ faŋ Nwi ndɔ kɔ tɨ́ viŋ buꞌ gəŋsə si, yighee njyə faŋ ŋwə ndɔ baa tɔŋ Yeso Kristo ntee. ¹⁴Faŋ viŋ lùu vaŋ Nwi, zɔnə ŋwə nə, kɨ viŋ baa kɨ yɨsə vənu vəbwəvə mbɨə faŋ viŋ nəə yɨsə yighee vɨsɨ, faŋ viŋ nə kee ta kɨ̀ɨ nə nu Nwi me. ¹⁵Viŋ luu vəley maa ghuu yitoꞌ kiŋ kənshə yaa Nwi faŋ ŋwə nə tìi viŋ nə, faŋ ŋwə ley bàw gə̀ fùu. ¹⁶Viŋ yɨ nɨniŋ, buꞌ laa vɨ nə nyɔ̀ꞌ taa ŋwaꞌlə Nwi laa, Nwi gì laa, «Viŋ baw ley gə̀ fùu, buꞌ laa nshɨ-tɔ ŋwaa bàw gə̀ fùu nɨzi.» 1.16 Levitikɔs 11.44.¹⁷Viŋ tii Nwi nə Tii wiŋ, faŋ ŋwə shoꞌtə vənu və vɨɨ faŋ vəŋ yɨsə tɔ tɔ, kee nə fəntɔ-fə-yisɨ me. Nɨniŋ, bàw laa viŋ kɨ toꞌ ghuu yitoꞌ kiŋ maa yighee faŋ viŋ lùu vəndɔ mbi nə feenə. ¹⁸Viŋ kɔꞌ kɨɨ laa Yeso nə shùꞌ viŋ fɨ maa ghuu yitoꞌ ŋkɔmə ŋkɨə faŋ vətɨɨ viŋ nəə toꞌ nə, mwə̀sə viŋ shɔ, kee shùꞌ nə vətɔ vədayday yaa ka me. ¹⁹Ŋwə nə shùꞌ fwi siŋ sheꞌ nə mənshi mi, faŋ lùu fa bwey. Kristo nə lùu yaa bi-njɨɨ, faŋ vɨ yaa kɨ sɨɨ, kɔ Nwi shɔ, tɨ́ kaꞌ Nwi ndènə yibɨsə vɨɨ. Nɨniŋ, ŋwə nə kù tɔ nsiŋ faŋ tuu wee-ndoꞌ, tɨꞌnə me wee-shəŋ fəŋ, nə kee lùu maa ŋwə me. ²⁰Nwi nə nùŋsə ŋwə maa nu kɔ́, shù faŋ ŋwə nə kee ta zì maa məbɔŋ mbi me. Luu nə, ŋwə fuu ntee vɨsɨ vɨɨ sheꞌ maa yighee vəshə. Nu kɔ́ bàw tɨ́ viŋ, ²¹buꞌ laa viŋ kwàŋ fwi siŋ maa Nwi buꞌ ŋwə, faŋ Nwi nə ywèysə ŋwə fɨ shɨ yiku, kòꞌsə ŋwə fuu ŋkaw yifwàŋ. Nɨniŋ, kaꞌ viŋ nùŋ fwi siŋ maa Nwi, kɨ kɨꞌ məbwey vəlwaŋ fɨ ghɔ ŋwə. ²²Nɨniŋ, viŋ kaw nə yiŋwaa yiŋ, viŋ viŋ, kee bwa me! Viŋ kaw nə yiŋwaa yiŋ nə fwi yimuꞌ, buꞌ laa viŋ bìŋ maa məyɨ vənu vəjəəvə, tɨ́ kaꞌ fwi siŋ lèy. Viŋ kɨ kaw vaŋ-nshwi viŋ, kee seesə me! ²³Nɨniŋ, viŋ kii ŋkawnə nyə̀ ndwə, buꞌ laa Nwi yɨ̀sə laa viŋ kii nshinə yifi. Nwi nə kɔ̀ nshinə yifi yɔ́ tɨ́ viŋ taa yigisə yi, faŋ nyə kìi məbwey vəlwaŋ. Yigi yi yɔ́ kee kìi vəndwə me. Nɨniŋ, viŋ lùu vaŋ tɨta Nwi, faŋ ŋwə kee ndɔ ku me. Viŋ kee baa lùu vaŋ vɨɨ me. ²⁴Ŋkə lùu yuu vɨ nə nyɔ̀ꞌ taa ŋwaꞌlə Nwi laa,

«Fa fənshi tɨ̀ me fa fənshi lùu yaa gay.

Vətɔ vəjəəvə və vɨɨ lùu yaa baybay gay nə məbaw wi,

faŋ ŋwə kee yaa kɨ shi tay me, kɨ nii yiku.

²⁵Luu nə, yigisə Nwi gòꞌsə yighee muꞌ.» 1.25 Aysaya 40.6-8. Yigisə Nwi yɔ́ lùu ntɔŋ yijəə yɔ́ faŋ vɨ nə fɨ̀ꞌtə tɨ́ viŋ nə.

¹Nɨniŋ, viŋ meꞌtə nu fwi yibwə, nə nu məbweꞌsə vɨɨ, nə nu məboꞌ ŋwaa, nə nu fəsə, nə ghaŋ bwənə. ²Viŋ lùu yaa vaŋ faŋ vɨ bɨ kɨ bɨbi vəŋ, faŋ vənshwi vəŋ yaa bɨ bɨbi vəŋ, vəŋ kɨ kəə yiməŋ ghee nshə. Bàw jɨŋ nu Nwi kɨ zasə viŋ sheꞌ yuu yiməŋ zasə vaŋ nə, buu viŋ taa kɨ ta taa nu Nwi, tɨ́ kɨ kaꞌ Nwi ndɔ bweysə viŋ. ³Maa viŋ ta kɨɨ fɨ taa fwisə viŋ faŋ tɨta Nwi saylə gaŋtə viŋ.

Faŋ viŋ lùu ŋiꞌ ŋii vɨɨ Nwi

⁴Nɨniŋ, viŋ goꞌsə viŋ vɨ Yeso, fɔnə ŋwə lùu ŋoꞌ yibwey. Vɨɨ nə mèꞌ ŋoꞌ yɔ́, luu nə, Nwi ndi ŋoꞌ yɔ́ laa lùu ŋoꞌ yijəə, shɔ̀ɔ ŋoꞌsə sənshə. ⁵Nɨniŋ, bàw viŋ gu ŋoꞌsə bweysə nɨzi, tɨ́ kaꞌ Nwi ndì viŋ, bɔ̀ŋ viŋ yaa ŋoꞌsə, viŋ gù ŋii Zwitə Nwi, baa gù vɨɨ məfeꞌ Nwi nɨzi, faŋ vəŋ ley vɨsɨ Nwi. Nɨniŋ, kaꞌ viŋ kɔ Nwi maa Zwitə Ley Nwi, faŋ Nwi kaw nə, buꞌ Yeso Kristo. ⁶Maa vɨ nə nyɔ̀ꞌ taa ŋwaꞌlə Nwi laa, Nwi gì laa,

«Viŋ zɔ! Mə nùŋsə ŋoꞌ yimɔ́ꞌ shɨ Zayon,

faŋ mə nə shoꞌ laa lùu nyaa, ŋkee ŋoꞌ mfay ŋii yijəə.

Wə ntɨə faŋ ŋwə nùŋ fwi yi maa ŋoꞌ yɔ́,

kaꞌ tɔ ki kee ndɔ dɨɨ me.» 2.6 Aysaya 28.16.

⁷Nyə gù fa bwey tɨ́ viŋ vɨɨ məbiŋ, faŋ viŋ nùŋ fwi siŋ shɔ nə. Luu nə, vɨɨ mɔ́ꞌ twèy nu Nwi. Maa ŋkə lùu taa ŋwaꞌlə Nwi laa,

«Ŋkee ŋoꞌ njyə faŋ vɨɨ məbɔŋ ŋii twey

laa kee lùu ŋoꞌ məbɔŋ ŋii me,

kìasə gù ŋoꞌ mfay ŋii.» 2.7 Sam 118.22.

⁸Nɨniŋ, nyə baa gù ŋoꞌ faŋ vɨɨ mətwey nu Nwi tumə ghuu shɔ, yighɔsə faŋ nyə taa yɨsə laa vɨɨ kɨ gukə shɔ. Vəŋ tumə ghuu vəŋ shɔ, buꞌ laa vəŋ twèy nu Nwi. Lùu nu ŋkɨə faŋ Nwi nə nùŋ tɨ́ vəŋ. ⁹Gə̀ fɨ maa viŋ, viŋ lùu way vɨɨ faŋ Nwi nə shòꞌ, lùu vɨɨ vəkɔ vi, ŋgwisə yiley. Viŋ lùu vɨɨ Nwi faŋ Nwi nə shòꞌ laa lùu vɨɨ yifwàŋ vi, baa nə laa viŋ sàynə vənu və shuu yɔŋvə Nwi. Ŋwə nə tìi viŋ fɨ taa mfiŋsə, laa viŋ ŋii taa ŋgwii məley. ¹⁰Nə luu yighee vɨsɨ, viŋ kee lùu ŋiꞌ ŋii kəmuꞌ me. Luu nə, ndwə viŋ lùu ŋiꞌ ŋii vɨɨ Nwi. Yighee vɨsɨ, Nwi nəə kee ta kee gəŋ siŋ me, lùu ndwə Nwi kee gəŋ siŋ dɨdɨꞌ.

Faŋ bàw vɨɨ Nwi kɨ zɔnə vɨɨ kwalə

¹¹Vaŋ-nshwi vaŋ, viŋ lùu yaa vəndɔ taa mbi nyə̀. Nɨniŋ, mə tɨsə viŋ laa viŋ kɨ baŋnə vətɔ və shɨ nsi mbɨə faŋ fwi siŋ kaw, buꞌ laa vətɔ vɔ́ toꞌ maa məndisə məbwey wiŋ nshə. ¹²Viŋ toꞌ ghuu yitoꞌ kiŋ jəə taa ŋwaa vɨɨ mbɨə faŋ vəŋ kee kɨ̀ɨ nə Nwi me, kɨ gi laa viŋ lùu vɨɨ bwənə, tɨ́ kaꞌ vəŋ ye, ndɔ kɨɨ nə jəə wiŋ, faŋ vəŋ ye vənu vəjəəvə mbɨə faŋ viŋ yɨsə. Nɨniŋ laa vəŋ ndɔ bəŋsə Nwi shɔ maa shi yiba, faŋ Nwi ndɔ jwi ye vəŋ.

¹³Bàw viŋ zɔnə vɨɨ mbɨə faŋ vəŋ sɔꞌ mbi buꞌ tɨta Yeso, baa kɨ zɔnə fwàŋ Kaysa faŋ ŋwə shɔ̀ɔ vəfwàŋ vənshə, ¹⁴baa nə vəgoməna faŋ ŋwə shòꞌ maa məsɔꞌ məshɨ, buꞌ laa vɨ nə tɔŋ vəŋ laa vəŋ kwaŋ vəyɨ-kəbwə taa nsɔꞌ, kɨ bəŋsə vɨɨ faŋ vəŋ yɨ jəə. ¹⁵Nwi kəə laa viŋ kɨ yɨ sheꞌ vənu vəjəəvə, laa mbə shə shuu vəmfaw faŋ vəŋ kee kɨ̀ɨ nə nu me. ¹⁶Viŋ luu vɨɨ faŋ viŋ dùꞌ tɔ viŋ taa mbi. Nɨniŋ, kɨ viŋ gi laa məduꞌ faŋ viŋ dùꞌ tɔ viŋ nə, kɔ̀ jɨɨ, tɨ́ kaꞌ viŋ yɨsə nu bwə me. Viŋ bee kii kɨ yɨsə vənu faŋ mbə kùꞌnə tɨ́ vɨɨ Nwi. ¹⁷Viŋ bəŋsə vɨɨ vənshə yuu ŋkə kùꞌnə, kaw vaŋ-nshwi viŋ, baa fèe Nwi, baa bə̀ŋsə fwàŋ.

Faŋ bàw vɨɨ faꞌ kɨ zɔnə vətɨɨ vəvəŋ

¹⁸Gə fɨ maa viŋ, vɨɨ faꞌ taa ŋii, bàw viŋ suꞌsə yiŋwaa yiŋ nsi, jìa ghuu vətɨɨ və faꞌ viŋ, kɨ zɔnə vəŋ ghee nshə. Viŋ zɔnə vəŋ faŋ vəŋ kìi too jəənə, baa zɔnə vɨɨ mbɨə faŋ vəŋ shɨshəsə nɨzi. ¹⁹Viŋ kɔꞌ kɨɨ laa Nwi tu mənɔŋ-bwaŋnə tɔ wə ntɨə faŋ ŋwə jìa fwi yi, lumə Nwi, maa ŋɨꞌ faŋ vɨɨ kwaŋ maa ŋwə, faŋ ŋwə kee yɨ̀ nu bwə me. ²⁰Kɨ luu laa viŋ jia fwi yiŋ maa ŋɨꞌ faŋ vɨ sàŋ viŋ buꞌ nu bwə faŋ viŋ nə yɨ̀sə, buu nu kɔ́ kee lùu nu jəə me. Luu nə, vɨ kɨ luu kwaŋ viŋ taa ŋɨꞌ faŋ viŋ yɨsə sheꞌ vənu vəjəəvə, viŋ kɨ jia fwi siŋ maa yighee yɔ́, bìŋ nə fwi yijəə, buu Nwi kaw viŋ. ²¹Nwi tìi viŋ laa viŋ biŋ ŋɨꞌ nɨniŋ, buꞌ laa nshɨ-tɔ Kristo nə bìŋ ŋɨꞌ buꞌ viŋ, meꞌtə shwenə tɨ́ viŋ, laa viŋ beꞌsə ghuu ghi. ²²Ŋwə nə kee yɨ tuu nu bwə nə ŋwaa ŋgwinə me, wə kee ta zɔ̀ yigisə təba fɨ shuu ŋwə me. ²³Vɨɨ nə ndàsə ŋwə, ŋwə kee bə̀ŋsə ndisə sɔ́ maa vəŋ me. Vɨ kwaŋ ŋwə taa ŋɨꞌ, ŋwə ye ŋɨꞌ, kee fèsə wə me, nùŋ ŋkitə yi sheꞌ taa ghɔ Nwi, faŋ ŋwə sɔꞌ nsɔꞌsə vɨɨ səloomə. ²⁴Kristo nə shàꞌ vənu vəbwəvə vaŋ-nsiŋ maa ŋwə, kù fuu fəŋkɔꞌ fə ŋkɨꞌsə. Nɨniŋ laa nsiŋ gaasə nsiŋ vɨ vənu vəbwəvə, kɨ yɨsə luu vənu vəjəəvə yuu vɨ nə nyɔ̀ꞌ taa ŋwaꞌlə Nwi laa, «Buꞌ vədɨꞌ vi, vənu vəbwəvə vaŋ-nsiŋ mè.» 2.24 Aysaya 53.5.²⁵Viŋ yaa luu yaa bisə-njɨɨ faŋ nsə ndì jɨɨ. Lùu ndwə, viŋ bə̀ŋ jwì kɨ beꞌsə wə ntɨə faŋ ŋwə shii viŋ, gaŋtə viŋ.

Nshinə vəki ghɔ vəndəə vəvəŋ

¹Gə fɨ maa viŋ vəki, bàw viŋ zɔnə vəndəə viŋ, bwàsə yiŋwaa yiŋ, tɨ́ kaꞌ vəndɔŋ vəmɔ́ꞌ faŋ vəŋ kee bìŋ nu Nwi me, kwìinə fwisə vəŋ, faŋ vəŋ yè nshinə yijəə yiŋ, faŋ viŋ kee bee tɨ vəŋ nə shuu me. ²Kaꞌ vəŋ kwìinə fwisə vəŋ buꞌ faŋ vəŋ yè nshinə yiŋ faŋ nyə lùu yiley, baa ye laa viŋ fee Nwi. ³Kɨ viŋ baa kɨ duꞌ ywiitə sheꞌ nu məlasə yiŋwaa, nə məlɔꞌnə, nə məshuŋ vətɔ vəshwaŋ ndɔŋnə, nə məba tɔ, nə məshuŋ njwisə kwalə me. ⁴Viŋ bee kɨ lɔꞌnə fɨ taa fwisə viŋ. Viŋ jia fwi siŋ, bwasə yiŋwaa yiŋ, buꞌ laa kəŋ vəlɔꞌ yimbii kee yaa kɨ bɨsə me, mbə kìi vəkeynə fɨ ghɔ Nwi, yaa fa faŋ ŋkə bàw shɔ̀ɔ ki. ⁵Viŋ kɔꞌ kɨɨ laa vəki və ywaŋ-vɨsɨ nəə yɨ nɨniŋ nɨzi, faŋ vəŋ nə tə̀ sɨ vəŋ sheꞌ maa Nwi. Vəlɔꞌ vəvəŋ nə luu laa vəŋ zɔnə vəndəə vəvəŋ. ⁶Viŋ lumə Sara, zu Abraham, faŋ ŋwə nə yɨ sheꞌ nɨniŋ. Ŋwə nə zɔ̀nə Abraham, tii ŋwə nə «tɨɨ ŋii wi». Nɨniŋ, viŋ kɨ luu dùꞌ kɨ yɨsə vənu vəjəəvə, kee fee nu faŋ vɨ fesə viŋ shɔ me, buu viŋ lùu yaa vaŋ Sara.

⁷Gə fɨ maa viŋ, vəndɔŋ, viŋ duꞌ jəə viŋ vɨ vəki viŋ. Viŋ kɨ tɔfə buꞌ laa viŋ kɔꞌ kɨɨ laa wutə vəki kee kùꞌ ghɔ ŋkiŋ me. Viŋ kɨ zɔnə vəŋ nɨzi, buꞌ laa Nwi kɔ̀ məbwey vəlwaŋ tɨ́ viŋ vɨ vəŋ vənshə dayday. Viŋ kɨ yɨ nɨniŋ, tɨ́ kaꞌ nu kəmuꞌ kee ghɔ̀ꞌ viŋ faŋ viŋ shɔꞌtə Nwi me.

Faŋ bàw nsiŋ kɨ kawnə yiŋwaa nyaa-nsiŋ

⁸Maa məndwə nu kɔ́, mə gì tɨ́ viŋ vənshə, viŋ kii mbɨꞌtə yiŋ yimuꞌ, nə ŋkitə yimuꞌ, kìi fwi yijəə. Viŋ kɨ kaw nə yiŋwaa yiŋ yaa vaŋ-nshwi, kee gəŋsə vɨɨ, baa lùu vəzutə. ⁹Kɨ luu wə yɨsə nu bwə maa viŋ, kɨ viŋ bəŋsə nə nu bwə me! Kɨ viŋ bəŋsə ndi maa ndi me! Viŋ kɨ tu sheꞌ mənɔŋ-bwaŋnə tɔ vɨɨ, buꞌ laa Nwi tii viŋ, laa viŋ kɨ yɨsə nɨniŋ, ndɔ zɨ məbwey vəlwaŋ nɨzi. ¹⁰Maa vɨ nə nyɔ̀ꞌ taa ŋwaꞌlə Nwi laa,

«Wə ntɨə faŋ ŋwə kəə zɨ mənɔŋ-bwaŋnə

nə məŋaytə shɨ nsi,

bàw ŋwə kee baa kɨ gisə yigi yibwənə me,

kee gì yigi təba me.

¹¹Bàw ŋwə meꞌtə nu bwə,

bee kɨ kii yɨsə vənu vəjəəvə,

kəə mənɔŋ-bwaŋnə taa ŋwaa vɨɨ,

¹²fɔnə sɨ tɨta Nwi ndeynə sheꞌ vɨɨ

mbɨə faŋ vənu vəvəŋ lùu vəloomə vənshə.

Nwi tàŋ tuulə ghi, kɨ zɔ shɔꞌtə vəŋ.

Nɨniŋ, Nwi kaŋ yikəꞌ yi tɨ́ vɨɨ

mbɨə faŋ vəŋ yɨsə vənu vəbwəvə.» 3.12 Sam 34.13-17.

Faŋ ŋkə bàw laa nsiŋ kɨ fee vɨɨ faŋ vəŋ kee kɨ̀ɨ nə Nwi me

¹³Sii kaꞌ yɨ̀ ndə yɨ̀ nu bwə maa viŋ, faŋ viŋ yɨsə vənu vəjəəvə? ¹⁴Nɨniŋ, viŋ kɨ luu kɨ ye ŋɨꞌ, buꞌ faŋ viŋ yɨsə vənu vəjəəvə, buu mənɔŋ-bwaŋnə lùu tɨ́ viŋ. Nɨniŋ, kɨ viŋ baa fee nu faŋ vɨɨ fèsə viŋ nə ŋkə me; kɨ viŋ baa kɨ gwəkə me! ¹⁵Viŋ kɨ bəŋsə sheꞌ tɨta Kristo fɨ taa fwisə viŋ, nùŋ ŋwə laa lùu tɨɨ ŋii wiŋ. Viŋ jia fwi siŋ ghee nshə maa məbəŋsə nu faŋ vɨɨ bitə tɨ́ viŋ kɔ̀ŋ nu məkɨꞌ məbwey vəlwaŋ, faŋ viŋ nùŋ fwi siŋ shɔ nə. ¹⁶Nɨniŋ, viŋ kɨ bəŋsə fɨ taa bwaŋnə nə feenə, jìa fwi siŋ buꞌ nsə kɨ sɔꞌ viŋ maa nu. Viŋ yɨ nɨniŋ laa tɔ vɨɨ vɔ́ dɨɨ, faŋ vəŋ gisə bwə kɔ̀ŋ viŋ, faŋ viŋ bèꞌsə Kristo, yɨsə vənu vəjəəvə nə. ¹⁷Wə kɨ luu ye ŋɨꞌ faŋ ŋwə yɨ jəə, faŋ luu ŋkitə Nwi, ŋkə bàw fɨ ghɔ ŋwə kɨ ye ŋɨꞌ buꞌ nu bwə mɔ́ꞌ faŋ ŋwə nə yɨ̀sə.

Mfɨꞌ nu muu mə Kristo

¹⁸Kristo nə kù yighee muꞌ buꞌ vənu vəbwəvə faŋ vɨɨ yɨ̀sə. Ŋkee wə ntɨə faŋ vənu vi lùu vəloomə, kù tɔ vɨɨ faŋ vənu vəvəŋ kee lùu vəloomə me, laa ŋwə kiasə nsiŋ, kɔ̀ tɨ́ Nwi. Vɨ nə zwì mbasə ŋwaa wi, luu nə, zwitə ki bwey. ¹⁹Nɨniŋ, ŋwə gə fɨ̀ꞌtə nu Nwi tɨ́ vəzwitə vəŋku və vɨɨ shɨ yiku faŋ shɨ kɔ́ lùu yaa ŋii mfiŋ nə. ²⁰Vəzwitə yimbii lùu mbɨə faŋ mbə nə twèy nu Nwi yighee vɨsɨ ghɔ Noa. Nwi nə jìa fwi yi yighee yɔ́, faŋ Noa nə fìanə bay kwalə ki, faŋ mbusə vɨɨ, sɨ vɨɨ yifɔŋ, nə ŋìi taa bay kɔ́, bwèy fɨ ghɔ muu nə. ²¹Nu muu kɔ́ luu mfɨꞌ nu muu mə Kristo, faŋ mbə bweysə viŋ ndwə. Mbə kee lùu maa məsɔ yifɨŋ fɨ maa viŋ me, lùu nu maa məbuꞌ ghɔ tɨ́ Nwi, laa ŋwə yɨsə fwi siŋ ley. Kaꞌ ŋkə bwèysə viŋ buꞌ laa Yeso Kristo nə ywèy fɨ shɨ yiku, ²²koꞌ gə̀ yizɔ, dùꞌ maa kwiŋ Nwi maꞌnə, kìi wutə kənshə, kɨ sɔꞌ ŋkee nshiisə-ŋiisə Nwi, nə vəzwitə məsɔꞌ mbi, nə vəzwitə vənshə faŋ mbə kìi wutə.

Faŋ bàw nsiŋ kɨ toꞌ ghuu yitoꞌ ŋkɨə faŋ Nwi kàw

¹Faŋ Kristo nə bìŋ ŋɨꞌ nə ŋwaa wi nə, bàw viŋ ndi njyoꞌ yijəə yi yɔ́, tɨ́ kaꞌ viŋ biŋ ŋɨꞌ nɨzi, buꞌ laa wə ntɨə faŋ ŋwə bìŋ ŋɨꞌ mbɨɨ ŋwaa ŋwə, mèꞌ vənu vəbwəvə, ²kee baa kɨ jɔŋ fɨ yiba jɨŋ vətɔ mbɨə faŋ vɨɨ kaw maa yighee nyə̀ me. Kɨ sɔꞌ ŋkitə Nwi sɔꞌ wə ghɔ́. ³Maa viŋ yaa kɨ yɨsə vənu vəbwəvə tay, sheꞌ yaa vɨɨ tətɔŋ fu faŋ vəŋ kee kɨɨ nə Nwi me, yɨsə nə. Viŋ nə kàw maa mətoꞌ zɨ shɨ, toꞌ səsə vətɔ, nu məluꞌ, mbə shɔɔ sɨ viŋ. Viŋ nə toꞌ tia yiŋwaa yiŋ, toꞌ fɨ maa vəshəŋ faŋ vɨ nu məluꞌ məyaŋ, biŋ vənwi vədayday, faŋ Nwi nə lɨ̀ꞌtə nu vəŋ nə. Ŋkə kuꞌ nɨniŋ. ⁴Jwì fɨ maa ndwə, viŋ kee baa lùu taa nwaa vɨɨ vɔ́ me, viŋ kee baa yɨsə kəŋ vənu vəbwəvə vɔ́ me. Nɨniŋ, nu kɔ́ ghɔꞌ vəŋ, vəŋ kɨ nii ndasə viŋ. ⁵Luu nə, vəŋ ndɔ ghaa kɔ bəŋsə yigi tɨ́ Kristo faŋ ŋwə lòotə ŋwaa maa məjwi sɔ̀ꞌ vənu və vɨɨ bweynə, nə vənu və vəŋku vənsisə. ⁶Vɨ nə fɨ̀ꞌtə ntɔŋ yijəə Nwi yɔ́ tɨ́ vəŋku vənsisə nɨzi, laa vəŋgɔlə vəvəŋ ndɔ ŋii nsɔꞌ, luu nə, kaꞌ vəzwitə vəvəŋ ndɔ bwey sheꞌ faŋ Nwi bwèy nə.

Ŋkə bàw laa a kàw weenshu wə nə fwi yə yinshə

⁷Ndwəsə vənu vənshə lùu nshənə. Nɨniŋ, viŋ kɨ yɨsə vənu vənshə nə yitɔfə, tɔ kiŋ ley nɨzi, tɨ́ kɨ kaꞌ viŋ kɨ shɔꞌtə Nwi. ⁸Nu ŋkɨə faŋ ŋkə shɔ̀ɔ vənu vənshə lùu laa, viŋ kɨ kawnə yiŋwaa yiŋ, kee bwa me, buꞌ laa ŋkawnə yaa kɨ bɔŋ vənu vəbwəvə vəyaŋ. ⁹Viŋ kɨ ŋiisə vaŋ-nshwi viŋ taa ndɔꞌ viŋ, zəsə vəŋ, kee lùlə me. ¹⁰Viŋ kɨ gaŋtə yiŋwaa yiŋ, viŋ viŋ, nə tɔ ley ŋkɨə faŋ Nwi kèy viŋ shɔ tɔ tɔ. Wə tɨ̀ me wə faŋ Nwi kèy ŋwə nə kəŋ yitɔfə mɔ́ꞌ, kaꞌ ŋwə baa luu gàŋtə vɨɨ mɔ́ꞌ. ¹¹Wə kɨ luu kɨ gisə yigi, bàw ŋwə kɨ gisə sheꞌ yigisə Nwi. Kɨ luu, wə nə faꞌ faꞌ Nwi, gaŋtə vɨɨ, bàw ŋwə kɨ faꞌ nə wutə ŋkɨə faŋ Nwi kɔ̀ tɨ́ ŋwə. Viŋ kɨ yɨ nɨniŋ laa, viŋ kɨ bəŋsə Nwi maa vənu vənshə fɨ yiba Yeso Kristo, faŋ ŋwə kwàlə, ndɔ weꞌ, gòꞌsə yighee muꞌ. Ŋkə lùu nɨniŋ.

Faŋ bàw nsiŋ biŋ ŋɨꞌ buꞌ Kristo nə məŋaytə

¹²Vaŋ-nshwi vaŋ, kɨ shuu wiŋ yɔŋ maa məmɔŋ ŋgwə faŋ ŋwə lùu yaa wisə kwalə faŋ ŋwə twaŋ viŋ shɔ nə me. Kɨ viŋ baa bɨꞌtə laa lùu nu fi me. ¹³Viŋ kɨ ŋaytə laa ŋɨꞌ njyə faŋ nyə nə ŋii Kristo nə, baa luu ŋìi viŋ, tɨ́ kaꞌ viŋ ndɔ ŋaytə, kɨ zwa nyaysə, bəŋsə ŋwə maa yighee njyə faŋ ŋwə ndɔ fuu ntee nə wutə Nwi. ¹⁴Kɨ luu laa vɨ ndasə viŋ buꞌ faŋ viŋ lùu vɨɨ Kristo, buu mənɔŋ-bwaŋnə luu ŋgwiŋ, buꞌ laa Zwitə Nwi faŋ ŋkə bàw shɨlə, lùu taa ŋwaa viŋ. ¹⁵Ŋkə kee bàw laa wə fɨ viŋ ye ŋɨꞌ buꞌ laa ŋwə zwì wə me, tɨꞌnə me shàw fa me, tɨꞌnə me yɨ̀sə nu bwə mɔ́ꞌ, tɨꞌnə me kwàŋ kwiŋ wi taa nu wə. ¹⁶Luu nə, wə kɨ luu ye ŋɨꞌ buꞌ laa ŋwə lùu wuu Kristo, kɨ tɔ ki dɨɨ me. Bàw ŋwə bəŋsə Nwi, buꞌ faŋ vɨ ndì ŋwə laa lùu wuu Kristo. ¹⁷Yighee kùꞌ laa Nwi sɔꞌ mbi, zì fɨ maa vɨɨ Nwi. Nyə tèy fɨ maa nsiŋ nee nə, buu nyə ndɔ ndwə kɨkə nə vɨɨ mbɨə faŋ vəŋ kee zɔnə ntɔŋ Nwi yijəə me?

¹⁸«Wə ntɨə faŋ ŋwə twèy nu Nwi,

kɨ yɨsə vənu vəbwəvə nə, ndɔ kɨsə dùꞌ fə,

faŋ wə ntɨə faŋ nu ki lùu kəloomə,

ndɔ fuu fɨ taa nsɔꞌ sheꞌ nə wutə nə?» 4.18 Təgi tə Tii 11.31.¹⁹Nɨniŋ, bàw laa vɨɨ mbɨə faŋ vəŋ ye ŋɨꞌ, faŋ Nwi gì nə, nuŋ fwisə vəŋ maa Mboo vəŋ yijəə, kɨ yɨsə sheꞌ vənu vəjəəvə.

Ntɨ tɨ́ vɨɨ taa nə za bwa fɨ taa nshəŋtə vɨɨ Nwi

¹Gə fɨ maa vɨɨ taa fɨ taa nshəŋtə vɨɨ Nwi, mə baa kɔ yigisə ntɨ tɨ́ viŋ, yuu nshɨ-tɔ ŋwaa luu wuu taa nɨzi. Mə nə yè ŋɨꞌ njyə faŋ nyə nə ŋii Kristo nə, nə yisɨ. Mə ndɔ baa luu taa ŋwaa vɨɨ mbɨə faŋ vəŋ ndɔ zɨ nu yifwàŋ Nwi, ŋkɨə faŋ ŋkə ndɔ fuu ntee fɨkɨꞌ nə. ²Viŋ luu nshii nwaa bisə Nwi nsɨə faŋ nsə lùu ghɔ viŋ nə. Kɨ viŋ kɨ yɨsə nɨniŋ yaa vɨ dɔɔ viŋ dɨdɔɔ me! Viŋ yɨsə nə njyoꞌ yijəə yiŋ, faŋ nyə kùꞌnə tɨ́ Nwi. Kɨ viŋ kɨ yɨsə laa vɨ ndɔꞌ viŋ nə ka me. Viŋ yɨsə sheꞌ nə fwi yijəə. Wə faŋ ŋwə yɨsə maa ka, tɔ ki dɨɨ. ³Kɨ viŋ kɨ sɔꞌ vɨɨ mbɨə faŋ vɨ nùŋ taa ghɔ viŋ nə məshəsə me. Bàw viŋ luu shwenə tɨ́ nwaa bisə ghɔ́. ⁴Nɨniŋ laa Yeso, tɨɨ nshiisə bisə sɔ́, ndɔ kɔ viŋ nə vəkeynə faŋ mbə gòꞌsə yighee muꞌ, maa yighee njyə faŋ ŋwə ndɔ fuu ntee sɨ vɨɨ. ⁵Gə fɨ maa za bwa, bàw viŋ kɨ zɔnə za taa fɨ taa nshəŋtə vɨɨ Nwi.

Ntɨsə tɨ́ vɨɨ Nwi

Gə fɨ maa vɨɨ vənshə, bàw viŋ shuŋ kɔtə kəmuꞌ, bwàsə fwi siŋ nsi, viŋ viŋ, faŋ vɨ nə nyɔ̀ꞌ taa ŋwaꞌlə Nwi laa, «Nwi kee kàw vɨɨ mbɨə faŋ vəŋ koꞌsə ŋwaa me, kèe gəŋsə vɨɨ mbɨə faŋ vəŋ sùꞌsə yiŋwaa vəŋ nsi.» 5.5 Təgi tə Tii 3.34.⁶Nɨniŋ, viŋ bwasə yiŋwaa yiŋ nsi, faŋ ghɔ Nwi kəweꞌkə fiitə viŋ nsi, tɨ́ kɨ kaꞌ ŋwə ndɔ baa shaꞌsə viŋ yizɔ maa yighee njyə faŋ ŋwə kàw. ⁷Viŋ meꞌtə vənu vənshə faŋ mbə ghaysə viŋ taa ghɔ Nwi, buꞌ laa shiinə ŋwə shiinə viŋ. ⁸Viŋ duꞌ nə tɔ ley, kɨ shi nə yikɨꞌ nɨzi, buꞌ laa tɨɨ vəzwitə vəbwəvə toꞌ fɨ taa mbi, toꞌ bwə yaa bikəə, kəə wə kwə. ⁹Viŋ tɨŋ weꞌ maa mənywenə ŋwə. Məbiŋ wiŋ weꞌ! Viŋ kɔꞌ kɨɨ laa vaŋ-nshwi viŋ faŋ vəŋ bìŋ Nwi fɨ taa mbi yinshə, kɨ ye ŋɨꞌ sheꞌ nɨndɨŋ. ¹⁰Nshɨ-tɔ Nwi ndɔ naysə viŋ fɨ maa ŋɨꞌ faŋ viŋ yè maa wee-fɨ-kuŋtə yighee, bɔ̀ŋsə viŋ, kwàŋ wutə maa viŋ, viŋ duꞌ, kee baa nə̀ꞌnə me. Ŋwə lùu wuu məgaŋtə wiŋ nə vənu vənshə, faŋ ŋwə shòꞌ viŋ buꞌ Kristo, viŋ ndɔ baw shɨlə yaa ŋwə, gòꞌsə yighee muꞌ. ¹¹Wutə Nwi goꞌsə yighee muꞌ, kee ndɔ kwiinə me. Ŋkə lùu nɨniŋ.

Faŋ Pita nə tù mənɔŋ-bwaŋnə, baa kɔ̀ shɔꞌtə wi

¹²Mə nyɔꞌ vaŋ-vənu və̀ tɨ́ viŋ, yia Silvanɔs, faŋ mə kɨ̀ɨ nə ŋwə yaa wuu yinsəŋ, baa lùu wuu məbiŋ Nwi. Mə tɨsə viŋ shɔ, baa gìsə tɨ́ viŋ ntee laa luu ŋkee nu Nwi yinsəŋ nə, faŋ Nwi gaŋtə viŋ shɔ, viŋ weꞌ shɔ. ¹³Nshəŋtə vɨɨ Nwi fɨ shɨ Babilɔn faŋ Nwi nə shòꞌ viŋ vɨ vəŋ nə, baa nə Mark, weembwa faꞌ ŋwaa, shɔꞌtə viŋ nɨzi. ¹⁴Viŋ kɨ shɔꞌtə yiŋwaa yiŋ taa ŋkawnə viŋ viŋ! Mənɔŋ-bwaŋnə tɨ́ viŋ vənshə, faŋ viŋ vɨ Kristo lùu nə fa kəmuꞌ nə!