1 Jɔn

Mfɔŋ Ŋwaꞌlə Jɔn

Taa mfɔŋ ŋwaꞌlə Jɔn, ŋwə lumə tɨ́ vɨɨ Kristo maa mətoꞌ fɨ yiba jɨŋ Yeso, baa kɔ wutə tɨ́ vɨɨ Kristo faŋ vəŋ bɨbɨꞌtə nu Nwi. Ŋwə naysə faŋ Nwi nə Kristo duꞌ, nə faŋ Kristo nə jwì mbi gù wə, kù tɔ nsiŋ. Ŋwə baa nàysə wə faŋ lùu wuu Kristo, tɨꞌnə me faŋ kee lùu wuu Kristo me.

Məsenə vəwaytə:

Vənzi və ŋwaꞌlə 1.1-4

Jɨɨ məley nə jɨɨ mfiŋsə 1.5–2.29

Vaŋ Nwi nə vaŋ zwitə bwə 3.1-24

Nu yinsəŋ nə nu ba 4.1-6

Nu ŋkawnə wə nə wə 4.7-21

Wuu mənuŋ fwi maa Kristo ghɔꞌ mbi 5.1-21

Nu məbwey vəlwaŋ

¹Ŋwaꞌlə ŋwə̀ luu buꞌ wə ntɨə faŋ ŋwə yaa luu shɔ vɨsɨ. Yia nə zɔ̀ faŋ ŋwə gisə, yè ŋwə nə sɨ ghia, baa kɔ̀ŋ ŋwə nə ghɔ ghia. Vɨ tii ŋwə laa, «Yigi Nwi faŋ nyə kɔ məbwey vəlwaŋ tɨ́ vɨɨ.» ²Məbwey ghɔ́ fuu ntee, yia ye. Yia fɨꞌtə nu məbwey kɔ́, baa nàysə tɨ́ viŋ kɔ̀ŋ məbwey ghɔ́ faŋ ŋwə gòꞌsə yighee muꞌ. Məbwey ghɔ́ nə luu ghɔ tɨta Nwi. Nwi yɨsə yia ye. ³Nu ŋkɨə faŋ yia yè baa zɔ, yia baa luu fɨꞌtə tɨ́ viŋ, tɨ́ kɨ kaꞌ nsiŋ faynə luu fa kəmuꞌ, nsiŋ vɨ tɨta Nwi baa nə ŋwiŋ wi Yeso Kristo. ⁴Yia ŋwaꞌlə nu kə̀, tɨ́ kɨ kaꞌ fwi saŋ-nsiŋ lwaŋ nə məŋaytə.

Faŋ ŋkə bàw laa kɨ viŋ baa kɨ yɨ vənu vəbwəvə me

⁵Lùu ntɔŋ njyə faŋ yia nə zɔ̀ fɨ ghɔ Yeso Kristo, faŋ yia baa luu naysə tɨ́ viŋ, laa Nwi lèy yaa shɨshwi; tuu kee wee-shəŋ fəŋ kee lùu taa fwi ŋwə me. ⁶Nsiŋ kɨ luu gi laa nsiŋ lùu fa kəmuꞌ, nsiŋ vɨ Nwi, luu nə, kɨ toꞌ fɨ taa mfiŋsə, buu nsiŋ sɨɨ ba, kee yɨ nu ŋkɨə faŋ ŋkə luu kəloomə me. ⁷Kɨ luu laa nsiŋ toꞌ yitoꞌ nyaa-nsiŋ fɨ taa shɨshwi ley, faŋ nshɨ-tɔ Nwi lùu taa shɨshwi ley nə, buu nsiŋ lùu fa kəmuꞌ, nsiŋ nsiŋ. Mənshi mə ŋwiŋ wi Yeso Kristo sɔ̀ yibɨsə nyaa-nsiŋ fɨ maa nsiŋ yinshə, faŋ ŋwə nə kù tɔ nsiŋ nə. ⁸Nsiŋ kɨ luu kɨ gisə laa, nu bwə kee lùu taa fwisə nsiŋ me, buu nsiŋ bwèꞌsə yiŋwaa nyaa-nsiŋ, buu nu yinsəŋ kee lùu taa ŋwaa nsiŋ me. ⁹Nsiŋ kɨ luu bìŋ nu bwə kaŋ-nsiŋ, buu Nwi taa kɨ ndenə nu bwə kaŋ-nsiŋ, baa sɔ̀ vənu vəbwəvə fɨ maa nsiŋ, buꞌ laa Nwi lùu wuu yinsəŋ, yɨsə sheꞌ vənu vəloomə. ¹⁰Nsiŋ kɨ luu kɨ gisə laa nsiŋ kee yɨ̀ nu bwə me, buu nsiŋ tii Nwi nə wuu ba, nu ki kee lùu taa fwisə nsiŋ me.

¹Vaŋ vaŋ, mə nyɔꞌ vənu və̀ tɨ́ viŋ laa kɨ viŋ baa kɨ yɨ vənu vəbwəvə me. Kɨ luu laa wə gu, yɨ nu bwə, buu Yeso Kristo, wuu ley shɔ, faŋ ŋwə tɨŋ vɨsɨ Nwi, ndwaŋ Nwi tɨ́ nsiŋ. ²Luu sheꞌ buꞌ Yeso, faŋ ŋwə nə kù tɔ nsiŋ nə, laa Nwi kɨ nii mèꞌ nu bwə kaŋ-nsiŋ. Ŋwə kee mèꞌ sheꞌ nu bwə kaŋ-nsiŋ me, ŋwə mèꞌ nu bwə vɨɨ vənshə.

Faŋ nsiŋ kaw Nwi, nùŋsə ntɨsə si, kàwnə yiŋwaa nyaa-nsiŋ

³Nu ŋkɨə tɨ́ kɨ kaꞌ nsiŋ kɨɨ laa nsiŋ kɨ̀ɨ nə Nwi yinsəŋ, lùu laa, nsiŋ kɨ luu nuŋsə ntɨsə Nwi, buu nsiŋ kɨ̀ɨ nə Nwi yinsəŋ. ⁴Wə ntɨə faŋ ŋwə gì laa, yi kɨɨ nə Nwi, kee kɨ nuŋsə ntɨ si me, buu lùu wuu ba, nu yinsəŋ kee lùu taa ŋwaa ŋwə me. ⁵Wə ntɨə faŋ ŋwə biŋ nu Nwi, buu ŋwə kaw Nwi nə fwi yi yinshə; ŋkawnə yi maa Nwi lùu yiloomə. Nu ŋkɨə faŋ kaꞌ nsiŋ kɨɨ laa nsiŋ shi ghɔ Nwi, lùu laa, ⁶Wə ntɨə faŋ ŋwə toꞌ ghuu yitoꞌ ki sheꞌ faŋ Yeso Kristo nəə toꞌ, buu kaꞌ wə ghɔ́ gì laa yi shi ghɔ Nwi.

⁷Vɨɨmba vaŋ, mə kee nyɔ̀ꞌ luu ntɨ yifi tɨ́ viŋ me, mə nyɔ̀ꞌ luu sheꞌ ntɨ yimwa faŋ vɨ yaa tɨ viŋ shɔ yighee vɨsɨ, faŋ viŋ nə bɨ zɔ̀ ntɨ Nwi. Ntɨ yimwa yɔ́ lùu nu ŋkɨə faŋ viŋ nə zɔ̀. ⁸Luu nə, mə nyɔ̀ꞌ ntɨ yɔ́ tɨ́ viŋ yuu ntɨ yifi, faŋ lùu yinsəŋ buꞌ laa, luu njyə faŋ Yeso nə kìi maa nshinə yi, nə viŋ maa nshinə yiŋ nɨzi. Nɨniŋ, mfiŋsə shɨshɔɔ, shɨshwi ley tey kɨ bee. ⁹Wə ntɨə faŋ ŋwə gì laa yi lùu taa shɨshwi ley, baa bee weenshu wi, buu ŋwə kɨ bii taa mfiŋsə. ¹⁰Wə ntɨə faŋ ŋwə kaw weenshu wi, gòꞌsə taa shɨshwi ley, jɨɨ kee lùu shɔ, tɨ́ kɨ kaꞌ ŋwə tùŋ ghuu ki maa ŋoꞌ, gù nsi me. ¹¹Gə fɨ maa wə ntɨə faŋ ŋwə bee weenshu wi, ŋwə lùu taa mfiŋsə, toꞌ yitoꞌ yi sheꞌ taa mfiŋsə, kee kɨɨ nə shəŋ ŋkɨə faŋ ŋwə gə shɔ me, buꞌ laa mfiŋsə mɔ̀ꞌ sɨ fɨsə maa sɨ ghi.

¹²Mə ŋwaꞌlə tɨ́ viŋ, vaŋ vaŋ, laa Nwi mèꞌ yibɨsə yiŋ buꞌ Yeso Kristo. ¹³Gə fɨ maa vətɨta, mə ŋwaꞌlə tɨ́ viŋ vətɨta buꞌ laa viŋ kɨɨ nə Nwi, faŋ ŋwə nə luu shɔ, shù fɨ maa vənzi və mbi. Gə fɨ maa zawə, mə ŋwaꞌlə tɨ́ viŋ nɨzi, buꞌ laa viŋ ghɔ̀ꞌ tɨɨ vəzwitə vəbwəvə.

¹⁴Vaŋ vaŋ, mə ŋwaꞌlə vənu və̀ tɨ́ viŋ, buꞌ laa viŋ kɨɨ nə tɨta Nwi. Gə fɨ maa vətɨta, mə ŋwaꞌlə tɨ́ viŋ, vətɨta, buꞌ laa viŋ kɨ̀ɨ nə Nwi, faŋ ŋwə nə luu shɔ, shù fɨ maa vənzi və mbi. Gə fɨ maa zawə, mə ŋwaꞌlə tɨ́ viŋ, buꞌ laa viŋ lùu vəweꞌ maa nu Nwi, kɨ nuŋsə ŋkə taa fwisə viŋ, ghɔ̀ꞌ tɨɨ vəzwitə vəbwəvə.

¹⁵Kɨ viŋ baa kɨ kaw mbi nə vətɔ və taa mbi me! Wə kɨ luu kɨ kaw mbi, buu kɨ kaꞌ ŋwə kee kàw Nwi fɨ taa fwi ŋwə me, ¹⁶buꞌ laa vətɔ vɔ́ vənshə, faŋ lùu vənu faŋ ŋwaa wə kàw, nə vənu və ka, nə nu faŋ sɨ kàw, nə məghaysə ŋwaa, kee ndɔ fɨ ghɔ Nwi me; mbə ndɔ sheꞌ fɨ shɨ nsi. ¹⁷Mbi nə vətɔ mbɨə faŋ mbə lùu taa mbi, faŋ vɨɨ kaw, shɨshɔɔ. Luu nə, wə ntɨə faŋ ŋwə yɨ̀ nu ŋkɨə faŋ Nwi kəə, ndɔ goꞌsə yighee muꞌ.

Nu vɨɨ mbeenə Kristo

¹⁸Vaŋ vaŋ, yighee shə kùꞌ. Maa viŋ nə zɔ̀ laa wuu mbeenə Kristo ndɔ jwi. Nɨniŋ, vɨɨ mbeenə Kristo duꞌtə vəŋ fuu vəyaŋ ndwə. Nɨniŋ, nsiŋ kɔꞌ kɨɨ laa lùu yighee shə. ¹⁹Vɨɨ mbeenə Kristo vɔ́ nə fùu fɨ taa ŋwaa nsiŋ. Luu nə, vəŋ nə kee bee lùu vɨɨ vaŋ-nsiŋ me. Vəŋ nəə toꞌ luu vɨɨ vaŋ-nsiŋ, buu vəŋ nə gòꞌ nsiŋ vɨ vəŋ. Luu nə, vəŋ fuu nɨniŋ laa nsiŋ kɨɨ ntee laa vəŋ vənshə kee lùu vɨɨ vaŋ-nsiŋ me. ²⁰Gə fɨ maa viŋ, Yeso Kristo faŋ ŋwə bàw shɨ̀lə nə, tù Zwitə Ley Nwi maa viŋ. Nɨniŋ, viŋ vənshə kɔꞌ kɨɨ nə vənu və yinsəŋ. ²¹Mə kee nyɔꞌ nu kɔ́ tɨ́ viŋ buꞌ faŋ viŋ kee kɨɨ nə nu ŋkɨə faŋ ŋkə kùꞌnə me. Mə nyɔꞌ buꞌ laa viŋ kɨɨ nə nu kɔ́, baa nə laa viŋ kɔꞌ kɨɨ laa, tuu kee nu ba kəmuꞌ kee fùu fɨ taa nu ŋkɨə faŋ lùu nu yinsəŋ me. ²²Wuu ba sii lùu ndə? Maa lùu wə ntɨə faŋ ŋwə twey laa Yeso kee lùu wuu məbweysə vɨɨ, faŋ ŋwə ndɔ fɨ ghɔ Nwi me. Kəŋ wə ghɔ́ faŋ ŋwə gì nɨniŋ nə, luu ŋkee wuu mbeenə Kristo faŋ ŋwə twey tɨta Nwi ghɔ ŋwiŋ wi. ²³Wə tɨ̀ me wə faŋ ŋwə kee bìŋ Wee Nwi me, buu ghɔ Nwi kee lùu fɔ nu me. Wə ntɨə faŋ ŋwə bìŋ Wee Nwi ntee, buu ghɔ tɨta Nwi lùu fa kəmuꞌ. ²⁴Bàw laa nu ŋkɨə faŋ viŋ yaa zɔ yighee vɨsɨ, ŋkə goꞌsə taa fwisə viŋ, buu viŋ gòꞌsə nə nu kəmuꞌ viŋ vɨ Wee Nwi nə nshɨ-tɔ Nwi nɨzi. ²⁵Nu ŋkɨə faŋ nshɨ-tɔ Yeso nə kɔ̀ꞌnə maa məndɔ kɔ tɨ́ viŋ, lùu məbwey vəlwaŋ.

²⁶Mə ŋwaꞌlə nu kɔ́ tɨ́ viŋ buꞌ vɨɨ mbɨə faŋ vəŋ kəə bweꞌsə viŋ nə. ²⁷Gə fɨ maa viŋ, viŋ kɔꞌ kɨɨ laa Zwitə Ley Nwi faŋ Yeso nə tù maa viŋ, gòꞌsə taa fwisə viŋ, nu kee baa ghɔ̀ꞌ viŋ, tɨ́ kɨ kaꞌ wə baa kɨ deesə viŋ nə nu Nwi me, buꞌ laa Zwitə Ley Nwi kɔ́ dèesə vənu vənshə tɨ́ viŋ. Nu ŋkɨə faŋ Zwitə Ley Nwi kɔ́ dèesə tɨ́ viŋ nə, luu ŋkee nu yinsəŋ, kee lùu ba me. Nɨniŋ, bàw viŋ vɨ Yeso goꞌ nə fa kəmuꞌ.

²⁸Vaŋ vaŋ, bàw viŋ kii fa kəmuꞌ viŋ vɨ Yeso! Nɨniŋ laa shi ŋkɨə faŋ ŋwə ndɔ bəŋ jwì fùu ntee, nsiŋ kɨꞌ vənu nə məŋaytə. Kɨ tɔ kaŋ-nsiŋ dɨɨ faŋ ŋwə ndɔ jwi fùu ntee me! ²⁹Viŋ kɨ luu kɨ kɨɨ laa vənu və Nwi lùu vəloomə, buu viŋ kɔꞌ kɨɨ nɨzi laa wə ntɨə faŋ ŋwə yɨ vənu vəloomə, lùu wə faŋ nə bì Nwi bì wə ghɔ́.

Vənu və vɨɨ Nwi nə vənu və vɨɨ Satan

¹Viŋ zɔ! Nwi kàw nsiŋ dɨdɨꞌ. Kaꞌ nsiŋ kɔꞌ kɨɨ laa tɨta Nwi kàw nsiŋ, buꞌ laa ŋwə tii nsiŋ nə vaŋ Nwi. Yinsəŋ nsiŋ lùu vaŋ vi. Nɨniŋ, vɨɨ fɨ mbi kee kɨ̀ɨ nə nsiŋ me, buꞌ laa vəŋ kee kɨ̀ɨ nə Nwi me. ²Vɨɨmba vaŋ, nsiŋ luu vaŋ Nwi ndwə. Luu nə, fa ŋkɨə faŋ nsiŋ ndɔ luu nə, ŋkə kee ta fùu ntee yikəꞌ vɨɨ me. Nsiŋ kɨɨ sheꞌ laa, yighee njyə faŋ ŋkə ndɔ fuu ntee sɨ vɨɨ, nsiŋ kɨ nii lùu yuu ŋwə, buꞌ faŋ nsiŋ ndɔ ye ŋwə faŋ ŋwə lùu.

³Wə ntɨə faŋ ŋwə jìa fwi yi, kɨ kɨꞌ nu kɔ́ fɨ ghɔ Nwi, yɨsə laa fwi yi ley sheꞌ faŋ njii lèy. ⁴Wə ntɨə faŋ ŋwə yɨ nu bwə, twey ntɨsə Nwi, buꞌ laa nu bwə kee kaw ntɨsə Nwi me. Nu bwə lùu nu mətwey ntɨsə Nwi. ⁵Viŋ kɔꞌ kɨɨ laa, Yeso Kristo yaa fùu ntee laa ŋwə sɔ vənu vəbwəvə fɨ maa vɨɨ, faŋ tuu nu bwə nə kee lùu maa ŋwə me. ⁶Wə ntɨə faŋ ŋwə lùu fa kəmuꞌ ghɔ Yeso Kristo, kee yaa kɨ yɨ nu bwə me. Wə ntɨə faŋ ŋwə yɨsə nu bwə, kee biŋ ŋwə me, kee bee kɨ̀ɨ nə ŋwə me.

⁷Vaŋ vaŋ, kɨ viŋ biŋ laa wə bweꞌsə viŋ me. Wə ntɨə faŋ ŋwə yɨ nu loomə, buu vənu vi lòomə yaa mbə Yeso. ⁸Wə ntɨə faŋ ŋwə yɨsə vənu vəbwəvə, ndɔ̀ fɨ ghɔ Satan, tɨɨ vəzwitə vəbwəvə, buꞌ laa Satan yɨsə vənu vəbwəvə shù fɨ maa vənzi. Ŋiꞌ nu ŋkɨə faŋ Wee Nwi nə fùu, lùu laa yi fuu ndìsə vənu vəbwəvə mbɨə faŋ mbə ndɔ̀ fɨ ghɔ Satan. ⁹Wə ntɨə faŋ nə bì Nwi bì ŋwə, kee yɨ̀sə vənu vəbwəvə me, buꞌ laa ŋkɨꞌnə Nwi lùu maa ŋwə. Ŋwə kee kɨɨ maa məyɨ nu bwə me, buꞌ laa bì Nwi bì ŋwə. ¹⁰Nu ŋkɨə faŋ vɨ yaa kɨ kɨɨ nə vaŋ Nwi nə vaŋ Satan fuŋ, lùu laa, wə tɨ̀ me wə faŋ ŋwə kee yɨ nu loomə me, nə wə ntɨə faŋ ŋwə kee kàw weenshu wi me, kee ndɔ̀ fɨ ghɔ Nwi me.

Faŋ ŋkə bàw laa nsiŋ kaw nə yiŋwaa nyaa-nsiŋ

¹¹Ntɔŋ njyə faŋ viŋ nə zɔ̀ shu fɨ maa vənzi lùu laa, nsiŋ kɨ kawnə yiŋwaa nyaa-nsiŋ. ¹²Kɨ nsiŋ luu yaa Kayin faŋ ŋwə nə ndɔ̀ fɨ ghɔ tɨɨ vəzwitə vəbwəvə, zwi weenshu wi me. Ŋwə nə zwì weenshu wi buꞌ kə? Maa ŋwə nə zwì weenshu wi, buꞌ laa vənu vi nə luu vəbwə, vənu və weenshu wi luu vəloomə.

¹³Nɨniŋ, vaŋ-nshwi vaŋ, kɨ yishuu yiŋ yɔŋ buꞌ faŋ mbi bee viŋ me. ¹⁴Nsiŋ kɔꞌ kɨɨ laa, nsiŋ fuu fɨ shuu yiku, ŋìi taa məbwey vəlwaŋ. Nsiŋ kɨɨ buꞌ faŋ nsiŋ kaw vaŋ-nshwi vaŋ-nsiŋ. Wə ntɨə faŋ ŋwə kee kaw weenshu wi me, gòꞌ shuu yiku. ¹⁵Wə ntɨə faŋ ŋwə bee weenshu wi, lùu wuu məzwi wə. Viŋ kɔꞌ kɨɨ laa məbwey vəlwaŋ kee yaa kɨ goꞌsə taa fwi wuu məzwi wə me. ¹⁶Nu ŋkɨə faŋ kaꞌ nsiŋ kɨ̀ɨ nə nu məkaw wə fɨ fuŋ, lùu faŋ Yeso nə bìŋ yiku, kù tɔ nsiŋ nə. Ŋkaŋ-nsiŋ nu kɨ nii lùu laa, nsiŋ baa luu bìŋ yiku tɔ vaŋ-nshwi vaŋ-nsiŋ.

¹⁷Wə ntɨə faŋ ŋwə kìi vətɔ, yè weenshu wi faŋ ŋwə kee yikii me, kee kɨ kee gəŋ si me, buu kɨ kaꞌ ŋwə jìa nu ŋkawnə Nwi kɨkə? ¹⁸Nɨniŋ, vaŋ vaŋ, kɨ nsiŋ baa kɨ kaw vaŋ-nshwi vaŋ-nsiŋ sheꞌ fɨ shuu nə yigi me! Bàw nsiŋ kɨ kaw vəŋ maa vənu mbɨə faŋ nsiŋ yɨsə, nə fwi yiley.

Faŋ kɨ kaꞌ fwi saŋ-nsiŋ kee kɨ lɔꞌ vɨsɨ Nwi me

¹⁹Kaꞌ nsiŋ kɔꞌ kɨɨ laa, nsiŋ lùu vɨɨ məbiŋ nu yinsəŋ. Kaꞌ fwi saŋ-nsiŋ kee kɨ lɔꞌ vɨsɨ Nwi me. ²⁰Ŋkə lùu nɨniŋ buꞌ laa Nwi kwàlə shɔ̀ɔ fwi saŋ-nsiŋ, kɨ̀ɨ nə vənu vənshə, kèe gəŋ saŋ-nsiŋ, yighee njyə faŋ fwi saŋ-nsiŋ sɔꞌ nsiŋ maa nu mɔ́ꞌ.

²¹Vɨɨmba vaŋ, fwi saŋ-nsiŋ kɨ luu kee kɨ sɔꞌ nsiŋ me, buu kɨ kaꞌ nsiŋ jìa fwi saŋ-nsiŋ vɨsɨ Nwi, ²²fì vətɔ mbɨə faŋ nsiŋ ndwaŋ fɨ ghɔ Nwi, buꞌ faŋ nsiŋ nùŋsə ntɨsə si, yɨsə nu ŋkɨə faŋ Nwi kàw. ²³Ntɨ njyə faŋ Nwi nə kɔ̀ tɨ́ nsiŋ, lùu laa nsiŋ nuŋsə fwi saŋ-nsiŋ maa ŋwiŋ wi Yeso Kristo, kàwnə yiŋwaa nyaa-nsiŋ, sheꞌ faŋ ŋwə nə tɨ̀ nsiŋ nə. ²⁴Wə ntɨə faŋ ŋwə jia ntɨsə Nwi nùŋsə, buu ghɔ Nwi gòꞌ fa kəmuꞌ. Nwi nɨzi baa luu gòꞌ taa fwi ŋwə. Nu ŋkɨə faŋ kaꞌ nsiŋ kɨ̀ɨ fɨ fuŋ laa Nwi gòꞌ taa fwisə nsiŋ, luu buꞌ Zwitə Ley Nwi faŋ Nwi nə kɔ̀ tɨ́ nsiŋ nə.

Nu ŋkɨə faŋ kaꞌ nsiŋ kɨ̀ɨ nə vɨɨ mbɨə faŋ vəŋ fɨꞌtə nu Nwi yinsəŋ

¹Vɨɨmba vaŋ, kɨ viŋ baa kɨ biŋ vənu vənshə faŋ vɨɨ fɨꞌtə tɨ́ viŋ laa fɨ̀ꞌtə Zwitə Ley Nwi tɨ́ vəŋ me. Viŋ mɔŋ vəŋ, ywiitə laa zwitə ŋkɨə faŋ ŋkə lùu ghɔ vəŋ, nə ndɔ̀ fɨ ghɔ Nwi mu? Viŋ mɔŋ vəŋ buꞌ laa vɨɨ məsɨɨ təba maa nu Nwi fùu taa mbi vəyaŋ. ²Nu ŋkɨə faŋ kaꞌ viŋ kɨ̀ɨ nə Zwitə Ley Nwi fɨ fuŋ, lùu laa, wə ntɨə faŋ ŋwə bìŋ ntee laa Yeso lùu Kristo, wuu məbweysə ŋwaa-nsiŋ, faŋ ŋwə nə jwì mbi yaa wə, buu Zwitə Ley wə ghɔ́ ndɔ̀ fɨ ghɔ Nwi. ³Wə ntɨə faŋ ŋwə kee bìŋ Yeso nɨniŋ me, buu zwitə ki kee ndɔ̀ fɨ ghɔ Nwi me, buu zwitə yiŋkii ndɔ̀ fɨ ghɔ wuu mbeenə Kristo, faŋ viŋ nə zɔ laa ŋkə ndɔ jwi nə. Ŋkə duꞌtə ŋkə jwì, baa lùu taa mbi ndwə.

⁴Gə fɨ maa viŋ, vaŋ vaŋ, viŋ luu vɨɨ Nwi. Nɨniŋ, viŋ ghɔ̀ꞌ vɨɨ təba vɔ́, buꞌ faŋ Nwi lùu taa fwisə viŋ. Ŋwə kwàlə shɔ̀ɔ tɨɨ vəzwitə vəbwəvə faŋ ŋwə lùu taa fwisə vɨɨ təba vɔ́ fɨ mbi nə. ⁵Vɨɨ təba vɔ́ ndɔ luu sheꞌ fɨ taa mbi. Nu ŋkɨə faŋ vəŋ fɨꞌtə nə, ndɔ̀ sheꞌ fɨ taa mbi. Mbi kɨ nii zɔ̀ yigisə vəŋ. ⁶Gə fɨ maa nsiŋ, nsiŋ lùu fɨ ghɔ Nwi. Wə ntɨə faŋ ŋwə kɨ̀ɨ nə Nwi, zɔ yigisə nyaa-nsiŋ. Wə ntɨə faŋ ŋwə kee ndɔ̀ fɨ ghɔ Nwi me, kee zɔ yigisə nyaa-nsiŋ me. Lùu nu ŋkɨə faŋ kɨ kaꞌ nsiŋ kɨ̀ɨ nə nu Zwitə Ley yinsəŋ, nə nu zwitə məbweꞌsə vɨɨ.

Nsiŋ kɨ kaw nə yiŋwaa nyaa-nsiŋ faŋ Nwi kaw vɨɨ nə

⁷Vɨɨmba vaŋ, nsiŋ kɨ kawnə yiŋwaa nyaa-nsiŋ, nsiŋ nsiŋ, buꞌ laa ŋkawnə ndɔ fɨ ghɔ Nwi. Wə tɨ̀ me wə faŋ ŋwə kaw Nwi nə vɨɨ, buu bì Nwi bì wə ghɔ́. Ŋwə baa kɨ̀ɨ nə Nwi nɨzi. ⁸Wə ntɨə faŋ ŋwə kee kàw weenshu wi me, kee kɨ̀ɨ nə Nwi me, buꞌ laa Nwi lùu wuu ŋkawnə. ⁹Ŋwə nə tɔ̀ŋ yigɨꞌ ŋwiŋ wi mbi laa nsiŋ kii məbwey vəlwaŋ buꞌ ŋwə. Lùu nu ŋkɨə faŋ ŋkawnə Nwi, faŋ Nwi kàw vɨɨ nə, nə fùu yikəꞌ vɨɨ. ¹⁰Nɨniŋ ghɔ́, ŋiꞌ nu ŋkɨə faŋ nsiŋ vɨ Nwi kawnə, kee lùu laa zì nsiŋ kɨ kaw Nwi me, lùu laa, nə tèy Nwi kɨ kaw nsiŋ, tɔ̀ŋ ŋwiŋ wi laa ŋwə jwi, sɔ̀ yibɨsə nyaa-nsiŋ.

¹¹Vɨɨmba vaŋ, faŋ Nwi nə kàw nsiŋ tɨ́ nee nə, ŋkaŋ-nsiŋ kɨ nii lùu laa nsiŋ kɨ kaw nə yiŋwaa nyaa-nsiŋ nɨzi. ¹²Viŋ kɔꞌ kɨɨ laa, tuu wə nə kee ta yè Nwi nə yisɨ me. Luu nə, nsiŋ kɨ luu kɨ kaw nə yiŋwaa nyaa-nsiŋ, buu Nwi taa gòꞌ taa fwisə nsiŋ, ŋkawnə yi lwaŋ taa fwisə nsiŋ. Nsiŋ kɨ nii kàw ŋwə nə vɨɨ nə fwi nyaa-nsiŋ yinshə. ¹³Nu ŋkɨə faŋ kaꞌ nsiŋ kɨ̀ɨ fɨ fuŋ laa nsiŋ lùu fa kəmuꞌ nsiŋ vɨ Nwi, baa nə laa nshɨ-tɔ Nwi gòꞌsə taa fwisə nsiŋ nɨzi, lùu faŋ ŋwə kɔ̀ Zwitə Ley ki tɨ́ nsiŋ.

¹⁴Viŋ kɔꞌ kɨɨ laa yia nə yè nə sɨ, baa fɨꞌtə tɨ́ vɨɨ, faŋ tɨta Nwi nə tɔ̀ŋ ŋwiŋ wi laa ŋwə lùu wuu məbweysə ŋwaa-nsiŋ. ¹⁵Wə ntɨə faŋ ŋwə biŋ ntee laa, Yeso lùu Wee Nwi, buu Nwi taa fwi ŋwə. Ŋwə baa luu gòꞌ fa kəmuꞌ ghɔ Nwi. ¹⁶Faŋ yia nə yè nɨniŋ nə, yia kɨ nii yikɨɨ faŋ Nwi kaw nsiŋ nə. Yia baa biŋ, nùŋ fwi sia shɔ. Nwi lùu wuu məkaw vɨɨ. Wə ntɨə faŋ ŋwə kaw Nwi nə vɨɨ nɨzi, buu ŋwə gòꞌsə ghɔ Nwi. Nwi baa lùu goꞌsə taa fwi ŋwə nɨzi. ¹⁷Kɨ luu nu kaŋ-nsiŋ fɨ shɨ nsi luu sheꞌ faŋ ŋkə Yeso nə lùu, buu kɨ kaꞌ nsiŋ kàw Nwi nə fwi nyaa-nsiŋ yinshə, buu kɨ kaꞌ nsiŋ ndɔ jia fwi saŋ-nsiŋ maa shi məshia nsɔꞌ. ¹⁸Kɨ luu ŋkawnə Nwi lwaŋ taa fwi wə, buu kɨ kaꞌ ŋwə kee fèe nu me, buꞌ laa ŋkawnə Nwi jɔŋ məfee fɨ taa fwi ŋwə. Maa wuu məfee yaa kɨ fèe luu nsɔꞌ. Wə kɨ luu fee nu, buu ŋkawnə Nwi kee lwàŋ taa fwi ŋwə me.

¹⁹Gə fɨ maa nsiŋ, maa Nwi nə kàw nsiŋ ŋkəə, buu nsiŋ kaw ŋwə nɨzi. ²⁰Wə kɨ luu kɨ bee weenshu wi, gisə laa yi kaw Nwi, buu ŋwə lùu wuu ba. Wə kɨ luu kee kɨ kaw weenshu wi faŋ ŋwə ye ŋwə nə me, buu kaꞌ ŋwə kàw Nwi kɨkə faŋ ŋwə kee yè Nwi nə me. ²¹Maa ntɨ njyə faŋ Yeso nə tɨ nsiŋ shɔ nə, lùu laa, wə ntɨə faŋ ŋwə kaw Nwi, kɨ kaw weenshu wi nɨzi.

Faŋ wə faŋ ŋwə bìŋ Yeso Kristo yaa kɨ ghɔꞌ mbi

¹Wə ntɨə faŋ ŋwə biŋ laa Yeso lùu wuu məbweysə vɨɨ, faŋ ŋwə ndɔ̀ fɨ ghɔ Nwi, buu bì Nwi bì wə ghɔ́. Maa wə ntɨə faŋ ŋwə kaw tɨɨ vaŋ, kaw vaŋ vi nɨzi. ²Nɨniŋ, nu ŋkɨə faŋ kaꞌ nsiŋ kɨ̀ɨ laa nsiŋ kaw vaŋ Nwi, lùu faŋ nsiŋ kaw nshɨ-tɔ Nwi, nùŋsə ntɨ si faŋ ŋwə nə kɔ̀ tɨ́ nsiŋ nə. ³Nu ŋkɨə faŋ nsiŋ kaw Nwi shɔ, lùu faŋ nsiŋ nuŋsə ntɨsə si. Ntɨsə Nwi kee lùu səweꞌ tɨ́ nsiŋ me, ⁴buꞌ laa wə ntɨə faŋ bì Nwi bì ŋwə, yaa kɨ ghɔꞌ vənu vəbwəvə fɨ taa mbi. Nsiŋ ghɔ̀ꞌ vənu vəbwəvə fɨ taa mbi, buꞌ faŋ nsiŋ nùŋ fwi saŋ-nsiŋ maa Yeso Kristo. ⁵Nɨniŋ, wə ntɨə faŋ ŋwə ghɔ̀ꞌ vənu vəbwəvə fɨ taa mbi lùu ndə? Nə kee lùu wə ntɨə faŋ ŋwə biŋ laa Yeso lùu Wee Nwi yimu?

Faŋ Nwi twèlə nu Yeso Kristo

⁶Yeso Kristo lùu wə ntɨə faŋ ŋwə nə jwì, shɔ̀ɔ fɨ shuu muu, fì muu mə Nwi, shɔ̀ɔ fɨ shuu yiku, tù mənshi mi. Ŋwə nə kee shɔ̀ɔ fɨ shuu muu day me; ŋwə nə shɔ̀ɔ fɨ shuu muu, fì muu mə Nwi, shɔ̀ɔ fɨ shuu yiku nɨzi, tù mənshi mi. Lùu Zwitə Ley Nwi faŋ ŋwə yaa kɨ twelə ŋiꞌ nu kɔ́ tɨ́ nsiŋ, buꞌ laa Zwitə Ley Nwi lùu nu faŋ lùu nu yinsəŋ. ⁷Nɨniŋ nə, vənu mbɨə faŋ mbə twelə tɨ́ nsiŋ laa Yeso luu Wee Nwi, luu vənu vətia: ⁸Lùu Zwitə Ley Nwi, nə nu muu, nə nu mənshi. Mbə vətia lùu fa kəmuꞌ, fɔnə mbə nàysə nu kəmuꞌ. ⁹Maa nsiŋ yaa kɨ biŋ nu faŋ gì vɨɨ laa vəŋ kɨ̀ɨ. Nɨniŋ, nu ŋkɨə faŋ gì Nwi, ŋkə lùu kəweꞌ shɔ̀ɔ nu vɨɨ. Nə twèlə nshɨ-tɔ Nwi twèlə nu məbiŋ kɔ́ buꞌ ŋwiŋ wi.

¹⁰Nɨniŋ, wə ntɨə faŋ ŋwə nùŋ fwi yi maa Wee Nwi, buu nu məbiŋ kɔ́, faŋ Nwi twèlə tɨ́ ŋwə nə, gòꞌsə taa fwi ŋwə. Wə ntɨə faŋ ŋwə kee bìŋ yigisə Nwi me, buu wə ghɔ́ tii Nwi nə wuu ba, buꞌ faŋ ŋwə kee bìŋ nu ŋkɨə faŋ Nwi twelə buꞌ ŋwiŋ wi me. ¹¹Nu ŋkɨə faŋ Nwi twelə tɨ́ nsiŋ lùu laa ŋwə kɔ̀ məbwey faŋ ŋwə gòꞌsə yighee muꞌ tɨ́ nsiŋ. Məbwey ghɔ́ lùu ghɔ ŋwiŋ wi Yeso. ¹²Wə ntɨə faŋ ghɔ Wee Nwi lùu fa kəmuꞌ, buu məbwey ghɔ́ lùu taa fwi ŋwə nɨzi. Wə ntɨə faŋ ghɔ Wee Nwi kee lùu fa kəmuꞌ me, buu məbwey ghɔ́ kee lùu taa fwi ŋwə me. ¹³Mə nyɔꞌ nu kɔ́ tɨ́ viŋ, faŋ viŋ nùŋ fwi siŋ maa Wee Nwi, laa viŋ kɔꞌ kɨɨ laa məbwey vəlwaŋ ghɔ viŋ.

Məshɔꞌtə Nwi

¹⁴Nu ŋkɨə faŋ kaꞌ nsiŋ jìa fwi shɔ vɨsɨ Nwi, lùu laa, Nwi yaa kɨ zɔ nu ŋkɨə faŋ nsiŋ buꞌ ghɔ, ndwaŋ fɨ ghɔ ŋwə, faŋ lùu nu faŋ fwi Nwi kàw. ¹⁵Nɨniŋ, nsiŋ kɨ luu kɨ kɨɨ laa Nwi zɔ nu ŋkɨə faŋ nsiŋ ndwaŋ fɨ ghɔ ŋwə, buu kaꞌ nsiŋ kɨ̀ɨ nɨzi laa Nwi yɨ nu ŋkɨə faŋ nsiŋ ndwaŋ fɨ ghɔ ŋwə.

¹⁶Nɨniŋ, wə kɨ luu yè weenshu wi wuu Nwi, faŋ ŋwə yɨ nu bwə faŋ kɨ kaꞌ nu kɔ́ kee zwì fwi yi me, ŋwə ndwaŋ Nwi tɔ ŋwə, laa Nwi ndɔ kɔ məbwey vəlwaŋ tɨ́ ŋwə. Ŋkə yaa kɨ luu nɨniŋ tɨ́ vɨɨ mbɨə faŋ vəŋ yɨ nu bwə faŋ kaꞌ ŋkə kee zwì fwi vəŋ me. Viŋ kɔꞌ kɨɨ laa nu bwə mɔ́ꞌ lùu shɔ faŋ ŋkə yaa kɨ zwi fwi wə; kɨ mə kee gì laa wə ndwaŋ Nwi maa kəŋ nu bwə yiŋkii me. ¹⁷Vənu vəbwəvə vənshə faŋ wə yɨ, lùu nu bwə vɨsɨ Nwi. Luu nə, nu bwə shɔ faŋ ŋkə kee yaa kɨ zwi fwi wə me.

Nu məkɨɨ nə Nwi yinsəŋ

¹⁸Mə baa lesə tɨ́ viŋ laa, nsiŋ kɔꞌ kɨɨ laa, wə ntɨə faŋ bì Nwi bì ŋwə, kee yaa kɨ yɨ nu bwə me, buꞌ faŋ Wee Nwi shiinə ŋwə. Nɨniŋ, kaꞌ tɨɨ vəzwitə vəbwəvə kee kɔ̀ŋ wə ghɔ́ me. ¹⁹Nsiŋ kɔꞌ kɨɨ laa nsiŋ lùu vɨɨ Nwi. Gə fɨ maa vɨɨ mbi, mbi yinshə lùu ghɔ tɨɨ vəzwitə vəbwəvə. ²⁰Nsiŋ kɔꞌ kɨɨ laa Wee Nwi nə jwì ŋaꞌsə sɨ ŋaa-nsiŋ, tɨ́ kɨ kaꞌ nsiŋ kɨɨ nə Nwi faŋ lùu Nwi yinsəŋ. Nsiŋ lùu fa kəmuꞌ nsiŋ vɨ Nwi yinsəŋ, buꞌ faŋ nsiŋ lùu fa kəmuꞌ nsiŋ vɨ ŋwiŋ wi Yeso Kristo. Yeso lùu Nwi yinsəŋ, məbwey vəlwaŋ ghɔ ŋwə. ²¹Nɨniŋ, vaŋ vaŋ, viŋ kɨ shiinə yiŋwaa yiŋ fɨ ghɔ vənwi vədayday!