1 Kɔrintian

Mfɔŋ Ŋwaꞌlə Kɔrintian

Mfɔŋ ŋwaꞌlə Pɔɔl tɨ́ vɨɨ Nwi fɨ shɨ Kɔrint

Pɔɔl nə nyɔ̀ꞌ mfɔŋ ŋwaꞌlə wi tɨ́ vɨɨ Kristo fɨ shɨ Kɔrint buꞌ laa vənu vəbwəvə vəmɔ́ꞌ nə ŋìi taa nshəŋtə vəŋ. Kɔrint nə luu shɨ kwalə nsi Akaya faŋ vɨɨ Rom nəə sɔꞌ vəŋ nɨzi. Nə luu shəŋ məbeꞌlə yiwiŋ yikwalə faŋ vənu vəbwəvə nə yàŋ taa shɨ kɔ́. Ŋgaasə nə vənu vəbwəvə vəmɔ́ꞌ nə tey kɨ ŋii taa ŋwaa vɨɨ Kristo nɨzi. Pɔɔl tɨ vəŋ buꞌ vənu vɔ́, baa deesə kɔ̀ŋ vəkɔ və Zwitə Ley Nwi nə nu ŋkawnə wə nə wə.

Məsenə vəwaytə:

Vənzi və ŋwaꞌlə 1.1-9

Yigi kɔ̀ŋ ŋgaasə taa ŋwaa vɨɨ Kristo 1.10–4.21

Nshinə yiley vɨɨ Kristo 5.1–7.40

Vɨɨ Kristo nə vɨɨ faŋ vəŋ kee kɨ̀ɨ nə Nwi me 8.1–11.1

Yigi kɔ̀ŋ nshəŋtə vɨɨ Kristo 11.2–14.40

Məywey Yeso nə məywey vɨɨ Kristo 15.1-58

Vəkɔ maa məgaŋtə vɨɨ Kristo fɨ shɨ Judia 16.1-4

Vəndwə və ŋwaꞌlə 16.5-24

Faŋ Pɔɔl nə shɔ̀ꞌtə vɨɨ Nwi fɨ shɨ Kɔrint

¹Lùu mə, Pɔɔl, wuu ntɔŋ Yeso Kristo, faŋ mə nyɔ̀ꞌ ŋwaꞌlə ŋwə̀ tɨ́ viŋ, ghɔ Sɔsteniis, weenshu ŋwaa-nsiŋ. Nə kàw Nwi maa məshoꞌ mə laa mə gu wuu ntɔŋ Yeso Kristo. ²Yia Sɔsteniis nyɔꞌ ŋwaꞌlə ŋwə̀ tɨ́ nwaa vɨɨ Nwi fɨ shɨ Kɔrint. Viŋ lùu vɨɨ ley Nwi buꞌ faŋ viŋ fàynə viŋ vɨ Yeso Kristo. Nə shòꞌ Nwi shòꞌ viŋ laa viŋ luu vɨɨ vi, ghɔ vɨ vɨɨ vənshə, faŋ vəŋ bəŋsə Tii ŋwaa-nsiŋ Yeso Kristo maa vəshəŋ vənshə. Yeso Kristo lùu Tɨɨ vəŋ, baa lùu Tii ŋwaa-nsiŋ nɨzi. ³Nwi, Tii ŋwaa-nsiŋ, ghɔ tɨta Yeso Kristo, tu mənɔŋ-bwaŋnə tɔ viŋ, kɔ̀ viŋ nə məduꞌ-nyɔŋ.

Faŋ Pɔɔl nə bwàŋ Nwi buꞌ mənɔŋ-bwaŋnə faŋ Nwi nə tù tɔ vɨɨ

⁴Mə kɨ bwaŋ Nwi ghee nshə buꞌ viŋ, buꞌ laa Nwi tù mənɔŋ-bwaŋnə tɔ viŋ, viŋ vɨ Yeso Kristo faynə gù fa kəmuꞌ. ⁵Nwi nə tu mənɔŋ-bwaŋnə tɔ viŋ maa jɨɨsə səyaŋ, yɨ̀sə viŋ weꞌ maa nu Kristo. Viŋ kɨɨ gì yigi yijəənə, baa kɨ̀ɨ nə nu Nwi ŋkee jəə. ⁶Lùu nɨniŋ buꞌ laa Nwi nə kwàŋ nu Kristo taa fwisə viŋ, yɨ̀sə viŋ weꞌ shɔ. ⁷Nɨniŋ, viŋ kee bəə tuu nu fɨ maa vənu vənshə faŋ Zwitə Ley Nwi yaa kɨ kɔ tɨ́ vɨɨ nə me. Viŋ baa luu kɨꞌ Tɨta ŋwaa-nsiŋ Yeso Kristo faŋ ŋwə ndɔ baa fuu, də̀ ŋwaa wi tɨ́ nsiŋ nə. ⁸Nshɨ-tɔ Yeso Kristo ndɔ yɨ viŋ weꞌ maa nu ki, gə̀ zìꞌ tɨ́ yighee vəndwə, tɨ́ kaꞌ tuu wee-ndoꞌ kee ndɔ luu maa viŋ maa shi ŋkɨə faŋ tɨta Yeso Kristo ndɔ bəŋ jwi taa mbi me. ⁹Nwi lùu wuu yinsəŋ. Nə shòꞌ nshɨ-tɔ Nwi shòꞌ viŋ laa viŋ jwi fàynə gù fa kəmuꞌ, viŋ vɨ ŋwiŋ wi Yeso Kristo, faŋ lùu Tɨta ŋwaa-nsiŋ nə.

Kɨ viŋ gaasə yiŋwaa me

¹⁰Vaŋ-nshwi vaŋ, mə tɨsə viŋ maa yizii Tɨta ŋwaa-nsiŋ Yeso Kristo, laa nu kiŋ luu kəmuꞌ, yigisə yiŋ luu yimuꞌ. Kɨ viŋ kɨ gaasə yiŋwaa vəway vəway me. Bàw mbɨꞌtə yiŋ luu yimuꞌ. Viŋ nuŋ fwi siŋ maa nu kəmuꞌ. ¹¹Vaŋ-nshwi vaŋ, mə gì nɨniŋ, buꞌ laa vɨɨ ŋiinə Kloe nàysə shee laa vɨɨ mɔ́ꞌ fɨ taa ŋwaa viŋ tay ntaysə. ¹²Viŋ gàasə yiŋwaa yiŋ, vɨɨ mɔ́ꞌ gi laa vəŋ beꞌsə Pɔɔl, vɨɨ mɔ́ꞌ laa vəŋ lùu vɨɨ Apɔlɔs, vəmɔ́ꞌ laa vəŋ beꞌsə Pita, vəmɔ́ꞌ laa vəŋ beꞌsə sheꞌ Kristo. ¹³Kristo nə luu vəway vəway mu? Kɨ nə kee lùu mə Pɔɔl, faŋ vɨ nə bèy fuu fəŋkɔꞌ fə ŋkɨꞌsə buꞌ viŋ me. Viŋ nə kee fì muu mə Nwi maa yizii Pɔɔl me. ¹⁴Mə bwaŋ Nwi laa, fɨ taa ŋwaa viŋ, wə muꞌ kee fi muu fɨ ghɔ mə me, tɨ̀ lɨꞌ sheꞌ Krispɔs nə Gayɔs me. ¹⁵Nɨniŋ, wə kee lùu shɔ, faŋ kaꞌ ŋwə gì laa yi nə fì muu maa yizii Pɔɔl me. ¹⁶Mə baa lumə laa Stefanas ghɔ vɨ vɨɨ ŋii vi baa fì muu mə Nwi fɨ ghɔ mə. Mə kee baa lùmə vɨɨ day, tɨ̀ lɨꞌ mbɨə me. ¹⁷Kristo nə kee tɔ̀ŋ mə laa mə kɨ toꞌ kɔ muu mə Nwi tɨ́ vɨɨ me. Ŋwə nə tɔ̀ŋ mə laa mə kɨ toꞌ fɨꞌtə ntɔŋ yijəə Nwi tɨ́ vɨɨ. Mə nəə kee toꞌ gisə yigi yisɨꞌsə nə yigisə tɔ ley maa məyɨ laa vɨɨ biŋ ntɔŋ yɔ́ me. Mə nəə kəə laa vɨɨ kɔꞌ kɨɨ nə ŋiꞌ yiku Yeso faŋ ŋwə nə kù tɔ nsiŋ fuu fəŋkɔꞌ fə ŋkɨꞌsə nə. Kɨ ŋkə gu nu dayday tɨ́ vəŋ me.

Nu Kristo kwalə shɔ̀ɔ yitɔfə vɨɨ vənshə

¹⁸Vɨɨ mbɨə faŋ vəŋ toꞌ fɨ maa jɨɨ yiku, ndɨ yigi yɔ́ kɔ̀ŋ yiku Yeso fuu fəŋkɔꞌ fə ŋkɨꞌsə yaa yigisə vəmfaw. Gə̀ fɨ maa nsiŋ, faŋ Nwi bwèysə nsiŋ nə, nsiŋ kɔꞌ kɨɨ laa wutə Nwi lùu shɔ. ¹⁹Luu sheꞌ faŋ vɨ nyɔ̀ꞌ taa ŋwaꞌlə Nwi laa Nwi gì laa,

«Mə taa bɨsə yitɔfə vɨɨ mbɨə faŋ vəŋ kìi yitɔfə,

baa twèy yitɔfə vɨɨ mbɨə faŋ vəŋ kɨɨ nə ŋwaꞌlə.» 1.19 Aysaya 29.14.

²⁰Faŋ ŋkə lùu nɨniŋ nə, vɨɨ tɔ-ley vɔ́ sii kɨ̀ɨ nə kə? Vɨɨ mədeesə ntɨsə sii kɨ̀ɨ nə kə? Vɨɨ məsɔnə yigi kɔ̀ŋ nu Nwi, faŋ vəŋ ndɔ̀ fɨ taa mbi nyə̀, sii kɨ̀ɨ nə kə? Nwi duꞌtə Nwi də tɨ́ nsiŋ laa yitɔfə yɔ́ fɨ taa mbi nyə̀ lùu nu vəmfaw. ²¹Maa yighee njyə faŋ Nwi nə də̀ yitɔfə yi tɨ́ vɨɨ fɨ taa mbi nyə̀, vəŋ nə kee bee kɨ̀ɨ nə Nwi fɨ taa tɔ-ley vəŋ me. Nɨniŋ, fwi Nwi nə bàw maa məbweysə vɨɨ mbɨə faŋ vəŋ nùŋ fwisə vəŋ maa Yeso Kristo buꞌ faŋ vəŋ zɔ̀ nu Nwi kɔ́, faŋ ŋkə lùu yaa yigisə vəmfaw nə. ²²Lùu nɨniŋ buꞌ laa vɨɨ Jus kəə sheꞌ laa vɨ də vəshwenə və vənu və shuu yɔŋvə fɨ ghɔ Nwi tɨ́ vəŋ. Gə̀ fɨ maa vɨɨ Griik, vəŋ kəə zɔ sheꞌ yigisə tɔ-ley. ²³Luu nə, yia fɨꞌtə sheꞌ nu Kristo laa vɨ nə bèy ŋwə fuu fəŋkɔꞌ fə ŋkɨꞌsə buꞌ nsiŋ. Nu kɔ́ yɨ̀sə fwisə vɨɨ Jus bɨ. Vɨɨ tɔmə day gi laa lùu nu vəmfaw. ²⁴Luu nə, vɨɨ mbɨə faŋ Nwi shòꞌ laa lùu mbii vɨɨ, faŋ lùu vɨɨ Jus, tɨꞌnə me vɨɨ tɔmə day, vəŋ kɔꞌ kɨɨ laa nu Kristo kɔ́ də ŋkee wutə Nwi nə yitɔfə Nwi tɨ́ nsiŋ. ²⁵Vɨɨ zɔ nu kɔ́, gì laa lùu nu vəmfaw faŋ Nwi yɨ̀sə. Luu nə, nu vəmfaw Nwi kɔ́ shɔ̀ɔ yitɔfə vɨɨ fɨ mbi. Faꞌ Nwi faŋ vɨɨ ndì yaa nu dayday, wèꞌ shɔ̀ɔ wutə vɨɨ vənshə.

²⁶Vaŋ-nshwi vaŋ, viŋ lumə faŋ Nwi nə shòꞌ viŋ laa viŋ lùu mbii vɨɨ nə, ŋwə nə shòꞌ kəŋ vɨɨ mbɨə? Maa vɨɨ mbɨə faŋ vəŋ kìi yitɔfə fɨ taa mbi nyə̀, kee lùu vəyaŋ taa ŋwaa viŋ me. Vɨɨ kwalə nə vəshɨꞌ kee lùu vəyaŋ taa ŋwaa viŋ me. ²⁷Nwi nə shòꞌ luu vɨɨ faŋ vɨ tii vəŋ nə vəmfaw taa mbi nyə̀, tɨ́ kaꞌ tɔ dɨɨ ndɔ luu tɨ́ vɨɨ mbɨə faŋ vəŋ gì laa vəŋ lùu vɨɨ tɔ-ley. Nwi baa shòꞌ vɨɨ mbɨə faŋ vəŋ kee kìi wutə me, tɨ́ kaꞌ tɔ dɨɨ lùu tɨ́ vɨɨ mbɨə faŋ vəŋ gì laa vəŋ kìi wutə. ²⁸Ŋwə shòꞌ vɨɨ mbɨə faŋ vəŋ kee lùu nu taa mbi nyə̀ me, nə mbɨə faŋ vɨɨ yaa kɨ shiasə vəŋ. Nwi ndɨ̀ ŋkee vətɔ vədayday, yɨ̀ laa mbə shɔɔ vətɔ mbɨə faŋ vɨɨ taa mbi nùŋ fwi shɔ, kɨ gisə laa lùu ŋkee vətɔ nə. ²⁹Nwi yɨ̀ nɨniŋ, tɨ́ kaꞌ tuu wə kee lùu shɔ, buꞌ dɨŋ wi vɨsɨ Nwi me. ³⁰Luu buꞌ Nwi, faŋ viŋ gù fa kəmuꞌ viŋ vɨ Yeso Kristo. Nə yɨsə Nwi laa nu Kristo gu nu tɔ-ley tɨ́ nsiŋ. Luu sheꞌ buꞌ Yeso faŋ Nwi ndɨ̀ nsiŋ yaa vɨɨ faŋ vənu vəvəŋ lùu vəloomə. Yɨsə ŋwə buu nsiŋ lùu vɨɨ ley Nwi. Ŋwə bweysə nsiŋ fɨ ghɔ vənu vəbwəvə. ³¹Lùu nu ŋkɨə faŋ vɨ nyɔ̀ꞌ taa ŋwaꞌlə Nwi laa, «Wə kɨ luu kɨ kəə buꞌ dɨŋ wi, ŋwə bùꞌ dɨŋ wi buꞌ nu tɨta Nwi.» 1.31 Jeremaya 9.23.

Yiku Yeso fuu fəŋkɔꞌ fə ŋkɨꞌsə luu ŋkee ŋiꞌ nu Nwi

¹Vaŋ-nshwi vaŋ, viŋ lumə faŋ mə nə fɔŋ jwì yɨ viŋ, mə nə kee ndɨ̀ yitɔfə fɨ taa mbi nyə̀ me, tɨꞌnə me jwì nə shuu sɨꞌsə maa məfɨꞌtə nu Nwi tɨ́ viŋ me. ²Mə nə tə laa bàw viŋ kɨɨ sheꞌ ŋiꞌ nu Yeso Kristo laa vɨ nə bèy ŋwə fuu fəŋkɔꞌ fə ŋkɨꞌsə, ŋwə ku tɔ nsiŋ. ³Mə nə kee jwì taa ŋwaa viŋ yaa wuu kwalə me. Mə nə jwì yaa mbəə ŋay, tɨ̀ŋ taa ŋwaa viŋ nə məfee, baa nə məlaꞌ. ⁴Faŋ mə nə fɨ̀ꞌtə nu Nwi tɨ́ viŋ nə, mə nə kee ndɨ̀ yitɔfə wə mənsaw maa məsuŋ viŋ me. Nə gaŋtə sheꞌ Zwitə Nwi nə wutə ki gaŋtə mə maa mədə tɨ́ viŋ laa lùu nu yinsəŋ faŋ mə fɨꞌtə nə. ⁵Nɨniŋ laa kɨ viŋ nuŋ fwi siŋ maa nu Nwi buꞌ yitɔfə wə mənsaw me. Luu sheꞌ buꞌ wutə Nwi laa viŋ biŋ ŋwə.

Yitɔfə Nwi kee lùu yaa yitɔfə wə mənsaw me

⁶Luu nə, yitɔfə yimɔ́ꞌ lùu shɔ faŋ yia fɨꞌtə nu Nwi tɨ́ vɨɨ mbɨə faŋ nu Nwi lwàŋ taa fwisə vəŋ. Kəŋ tɔ-ley kɔ́ kee ndɔ̀ fɨ taa mbi nyə̀ me, tɨꞌnə me fɨ ghɔ vəwutə faŋ mbə sɔꞌ mbi nyə̀ me. ⁷Nu tɔ-ley ŋkɨə faŋ yia gisə nə, luu ŋkee nu tɔ-ley Nwi, faŋ wə mənsaw nə kee ta yiye me. Ŋkee fɨshi, faŋ Nwi nə kee ta zì kɨ bɔŋ mbi me, Nwi nə duꞌtə Nwi tə nu tɔ-ley kɔ́, tɨ́ kaꞌ nsiŋ vɨ vəŋ ndɔ luu mɔ́ꞌ taa yikwalə yi. ⁸Vəwutə vənshə faŋ mbə sɔꞌ mbi nyə̀, kee kɨ̀ɨ nə kəŋ tɔ-ley kɔ́ me. Mbə nəə toꞌ kɨɨ, buu vəŋ nə kee bèy tɨta Yeso Kristo, faŋ lùu Tɨɨ vəwutə, fuu fəŋkɔꞌ fə ŋkɨꞌsə me. ⁹Lùu nu yinsəŋ faŋ vɨ nə nyɔ̀ꞌ taa ŋwaꞌlə Nwi laa,

«Nwi lootə ŋkee nu kwalə

tɨ́ vɨɨ mbɨə faŋ vəŋ kaw ŋwə.

Lùu nu faŋ tuu wə nə kee ta yiye me,

baa lùu nu faŋ tuu wə nə kee ta yizɔ me,

baa lùu nu faŋ tuu wə nə kee ta yibɨꞌtə me.» 2.9 Aysaya 64.4; 65.17.

¹⁰Nwi də̀ nu kɔ́ tɨ́ nsiŋ fɨ taa Zwitə Nwi. Zwitə Nwi ye vənu vənshə vəley, ŋkee vənu vəkwalə faŋ mbə lùu shɔ taa ŋkɨɨ Nwi. ¹¹Wə kee lùu shɔ maa məkɨɨ nə mbɨꞌtə wə mɔ́ꞌ me. Kɨɨ sheꞌ zwitə wə kɨɨ nə mbɨꞌtə wə ghɔ́. Sheꞌ nɨniŋ, kaꞌ wə kee kɨ̀ɨ nə mbɨꞌtə Nwi me. Kɨɨ sheꞌ Zwitə Nwi kɨ̀ɨ nə mbɨꞌtə Nwi. ¹²Zwitə ŋkɨə faŋ Nwi kwaŋ taa fwisə nsiŋ, lùu ŋkə Nwi, ŋkə kee ndɔ̀ fɨ taa mbi nyə̀ me. Lùu Zwitə Nwi kɔ́ faŋ ŋkə yɨsə laa nsiŋ kɨɨ nə vəkɔ mbɨə faŋ Nwi kɔ̀ tɨ́ nsiŋ. ¹³Faŋ yia naysə tɨ́ vɨɨ kɔ̀ŋ vəkɔ vɔ́, yia kee ndɨ̀ yigi faŋ nyə ndɔ̀ fɨ maa tɔ-ley wə mənsaw me; də̀ Zwitə Nwi də̀ vənu vɔ́ tɨ́ yia. Yia twelə vənu mbɨə faŋ mbə ndɔ̀ fɨ ghɔ Zwitə Nwi tɨ́ vɨɨ faŋ vəŋ kìi Zwitə Nwi taa fwisə vəŋ. ¹⁴Wə ntɨə faŋ ŋwə kee kìi Zwitə Nwi taa fwi ŋwə me, kaꞌ ŋwə kee bìŋ vənu mbɨə faŋ mbə ndɔ fɨ ghɔ Zwitə Nwi me. Kəŋ wə ghɔ́ kaꞌ ŋwə kee kɨ̀ɨ nə vənu vɔ́ me. Ŋkə lùu tɨ́ ŋwə yaa vənu və vəmfaw, buꞌ laa luu sheꞌ Zwitə Nwi faŋ ŋkə yaa kɨ yɨsə wə kɨ̀ɨ nə kəŋ vənu ghɔ́. ¹⁵Wə ntɨə faŋ ŋwə kìi Zwitə Nwi taa fwi ŋwə, kɔꞌ kɨɨ nə ŋiꞌ vənu vənshə. Vɨɨ mɔ́ꞌ fɨ taa mbi kee kɨ̀ɨ nə ŋiꞌ nu ŋkɨə faŋ wə ghɔ́ yɨ̀ me. ¹⁶Ŋkə lùu sheꞌ faŋ vɨ nə nyɔ̀ꞌ taa ŋwaꞌlə Nwi laa,

«Sii kaꞌ kɨ̀ɨ ndə nə mbɨꞌtə tɨta Nwi?

Wə kee lùu shɔ faŋ kaꞌ ŋwə tɨ̀ Nwi me.» 2.16 Aysaya 40.13. Luu nə, gə fɨ maa nsiŋ, faŋ nsiŋ kìi Zwitə Nwi nə, nsiŋ kìi mbɨꞌtə Kristo.

Kɨ fəsə nə ntaysə lùu taa ŋwaa viŋ me. Vɨɨ faꞌ Nwi luu sheꞌ nɨndɨŋ

¹Vaŋ-nshwi vaŋ, faŋ mə nə fɔŋ jwi yɨ viŋ nə, nə kaꞌ mə kee gì tɨ́ viŋ yaa mə gisə tɨ́ vɨɨ faŋ vəŋ kìi Zwitə Nwi taa fwisə vəŋ me. Mə nəə bee kii gisə tɨ́ viŋ yaa vɨɨ taa mbi nyə̀, buꞌ laa viŋ nəə kɨ bii yuu vaŋmbwaa taa nu Kristo. ²Ŋkə nə fɔŋ lùu yaa mə ndɨ̀ lùu məməŋ, zə viŋ shɔ, kee kɨ ndɨ ŋkee fazɨ me, buꞌ laa viŋ nə kee taa yikuꞌnə maa ŋkee fazɨ me. Yinsəŋ, jwi kɔ tɔ və-ndee, viŋ kee ta yikuꞌnə me, ³buꞌ laa viŋ kɨ bii shi nshinə yiŋ yaa vɨɨ fɨ taa mbi. Viŋ kɨ bii nə fəsə baa nə ntaysə taa ŋwaa viŋ. Ŋkə də̀ laa mbɨꞌtə yiŋ kɨ bii yaa njyə vɨɨ fɨ taa mbi, viŋ toꞌ yaa vɨɨ fɨ taa mbi. ⁴Lùu nɨniŋ buꞌ faŋ vɨɨ mɔ́ꞌ gisə laa vəŋ beꞌsə Pɔɔl, vɨɨ mɔ́ꞌ laa vəŋ beꞌsə Apɔlɔs. Maa ŋkə də̀ laa viŋ yɨsə vənu sheꞌ yuu vɨɨ fɨ taa mbi. ⁵Apɔlɔs sii lùu ndə? Pɔɔl lùu ndə? Maa yia luu sheꞌ vɨɨ faꞌ Nwi, faŋ Nwi nə tɔŋ laa yia gaŋtə viŋ, viŋ nuŋ fwi siŋ maa Yeso Kristo. Yia faꞌ sheꞌ faꞌ ŋgwə faŋ Nwi kɔ̀ tɨ́ yia tɔ tɔ. ⁶Yia lùu yaa vɨɨ faꞌ taa biisə. Mə bia vətɔ, Apɔlɔs tutə muu shɔ. Luu nə, luu sheꞌ Nwi faŋ ŋwə yɨsə laa vətɔ vɔ́ fuu kɨ ta. ⁷Ŋkə lùu laa, wuu məbia vətɔ kee lùu nu me, wuu mətutə muu kee lùu nu me. Nu kwalə luu sheꞌ Nwi faŋ ŋwə yɨsə vətɔ vɔ́ ta. ⁸Wə ntɨə faŋ ŋwə bɨbia, nə wə ntɨə faŋ ŋwə tutə muu shɔ nə, luu sheꞌ nɨndɨŋ. Wə kee shɔ̀ɔ liŋ wi me. Nwi taa kɔ vəkeynə tɨ́ wə tɨ̀ me wə faŋ wə ghɔ́ nə faꞌ nə. ⁹Yia vəbɔɔ fàynə ghɔ ghia maa məfaꞌ faꞌ Nwi. Gə fɨ maa viŋ, viŋ lùu faŋ yindɨɨ Nwi yɔ́, baa lùu yaa ŋii faŋ Nwi fìa nə.

Bàw vɨɨ faꞌ Nwi kɨ faꞌ sheꞌ jəə jəə

¹⁰Yighee vɨsɨ, faŋ mə nə fɔŋ jwì yɨ viŋ nə, Nwi nə kɔ̀ tɔ ley shee, tɨ́ kaꞌ mə bɔ̀ŋ shɨ ŋii Nwi kɔ́ yaa wuu məfianə ndɔꞌ jəə. Wə dɨday kɨ nii tey kɨ bɔŋ vəlɨtə və ŋii vɔ́. Bàw wə tɨ̀ me wə faŋ ŋwə bɔ̀ŋ ŋii yɔ́, ndɨ yighee, kɨ bɔŋ maa jɨɨ yijəə. ¹¹Shɨ ŋii kɔ́ luu sheꞌ Yeso Kristo. Nwi nə nùŋsə ŋwə laa ŋwə luu yuu shɨ ŋii tɨ́ nsiŋ, tɨ́ kaꞌ nsiŋ tɨ̀ŋnə shɔ. Shəŋ day kee baa lùu shɔ, tɨ́ kaꞌ nsiŋ tɨ̀ŋnə shɔ me. Shɨ ŋii kəmɔ́ꞌ kee baa lùu shɔ me. ¹²Vɨɨ mɔ́ꞌ ndɨ̀ goolə jəə, vɨɨ mɔ́ꞌ ndɨ tiəŋ, vɨɨ mɔ́ꞌ ndɨ̀ ŋoꞌsə faŋ nsə luu ŋkee səjəə, bɔ̀ŋ ŋii shɔ fuu shɨ ŋii kɔ́. Luu nə, vɨɨ mɔ́ꞌ ndɨ məntɨ nə wiŋsə nə nɨntɔŋ, bɔ̀ŋ ŋii shɔ fuu shɨ ŋii kɔ́. ¹³Shi mɔ́ꞌ vɨ ndɔ ye faꞌ wə tɨ̀ me wə ntee, laa ŋwə lùu kɨkə. Ndɔ lùu maa shi kɔ́, Nwi ndɔ ndi luu wisə maa məmɔŋ vəfaꞌ və vɨɨ shɔ, tɨ́ kaꞌ wə yè faꞌ ghɔ́ ley ley, faŋ wə tɨ̀ me wə fàꞌ nə, laa ŋwə lùu jəə mu, mu ŋwə kee lùu jəə me. ¹⁴Kɨ luu ŋii njyə faŋ wə nə fìanə fuu shɨ ŋii kɔ́ nə, weꞌ fuu shɨ ŋii kɔ́, tɨ́ kaꞌ wi kee bɨsə nyə me, wə ghɔ́ faŋ ŋwə fìanə ŋii yɔ́ nə, taa kii vəkeynə vi. ¹⁵Kɨ luu faꞌ wə mɔ́ꞌ kɨɨ taa wi ghɔ́ bɨ, buu wə ghɔ́ kee kìi vəkeynə me. Nshɨ-tɔ wə ghɔ́ ndɔ ye məbwey fɨ ghɔ Nwi, luu nə, sheꞌ nə ghɔ dayday yaa wə faŋ ŋwə nyɨ̀ŋ fɨ ghɔ wisə. ¹⁶Viŋ kee yikɨɨ laa viŋ lùu ŋii Nwi faŋ Zwitə Nwi shì taa tey yi yimu? ¹⁷Kɨ luu wə bɨsə ŋii Nwi yɔ́, buu ŋkee nshɨ-tɔ Nwi taa bɨsə wə ghɔ́. Viŋ kɔꞌ kɨɨ laa ŋii Nwi yɔ́ luu ŋkee fa ley faŋ kii Nwi. Viŋ lùu ŋii Nwi yɔ́ faŋ lùu fa ley.

Kɨ wə koꞌsə ŋwaa wi me

¹⁸Kɨ wə kɨ bweꞌsə ŋwaa wi me. Wə kɨ luu lùu taa ŋwaa viŋ, faŋ ŋwə bɨꞌtə laa yi kìi yitɔfə taa mbi nyə̀, bàw ŋwə kiasə gù wə faŋ ŋwə kee kɨ̀ɨ nə nu me, buu kaꞌ ŋwə ndɔ kìi yitɔfə njyə faŋ lùu yitɔfə yinsəŋ. ¹⁹Mə gì nɨniŋ buꞌ laa vənu faŋ mbi ndɨ̀ yaa vənu və tɔ-ley, lùu vənu və vəmfaw vɨsɨ Nwi. Lùu nu yinsəŋ faŋ vɨ nyɔ̀ꞌ taa ŋwaꞌlə Nwi laa, «Nwi kɔꞌsə vɨɨ tɔ-ley maa nu tɔ-ley vəŋ.» 3.19 Job 5.13.²⁰Yigisə Nwi yimɔ́ꞌ lùu laa, «Nwi kɔꞌ kɨɨ laa mbɨꞌtə vɨɨ tɔ-ley luu sheꞌ nu dayday.» 3.20 Sam 94.11.²¹Lùu ŋiꞌ nu ŋkɨə faŋ mə naysə tɨ́ viŋ laa kɨ wə kɨ koꞌsə ŋwaa wi buꞌ nu wə mənsaw me, yuu kɨ gisə laa yi beꞌsə kɨkee, tɨꞌnə me kɨkee. Viŋ kɔꞌ kɨɨ laa vənu vənshə lùu tɨ́ viŋ. ²²Kɨ lùu Pɔɔl, kɔ lùu Apɔlɔs, kɔ lùu Pita, vəŋ lùu vɨɨ viŋ. Mbi yinshə nə məbwey nə yiku lùu tɨ́ viŋ. Vənu və ndwə, nə vənu faŋ mbə luu vɨsɨ, mbə vənshə lùu tɨ́ viŋ. ²³Gə fɨ maa viŋ, viŋ lùu vɨɨ Kristo. Kìi Nwi kìi Kristo.

Nwi ndeynə vənu və vɨɨ faꞌ vi

¹Nu ŋkɨə faŋ ŋkə bàw laa vɨɨ kɨ bitə kɔ̀ŋ yia, lùu laa yia lùu vɨɨ faꞌ Kristo, baa lùu vɨɨ məndeynə nu Nwi, ŋkɨə faŋ ŋkə nə ndènə fɨ yikəꞌ vɨɨ nə. ²Nɨniŋ, nu ŋkɨə faŋ Nwi kəə laa vɨɨ məndeynə vətɔ vi kɨ yɨsə, lùu laa vəŋ kɨ yɨsə nə fwi yijəə. ³Kɨ luu viŋ tii nsɔꞌ tɔ mə, tɨꞌnə me vɨɨ fɨ taa mbi nùŋ nu tɔ mə, ŋkə kee lùu nu shee me. Ŋkee nshɨ-tɔ ŋwaa kee kɨɨ shoꞌmə vənu vaŋ yuu shia nsɔꞌ shɔ me. ⁴Yinsəŋ, mə kee kɨ̀ɨ nə nu faŋ mə gù me. Luu nə, kee ndɔ shia mə shia nsɔꞌ tɔ nyaa yuu lee nsɔꞌ me. Sɔꞌ sheꞌ Nwi sɔꞌ mə faŋ mə kìi nsɔꞌ. ⁵Nɨniŋ, ŋkə kee kùꞌnə laa viŋ kɨ shia nsɔꞌsə tɔ vɨɨ me, faŋ yighee məshia nsɔꞌsə kee ta yikuꞌnə me. Maa shi ŋkɨə faŋ tɨta Yeso ndɔ jwi, ŋwə ndɔ də vənu ntee faŋ mbə nə lùu taa mfiŋsə, nə mbɨꞌtə wə faŋ wə kìi taa fwi ŋwə. Lùu shi kɔ́ faŋ Nwi ndɔ bəŋsə wə faŋ məbəŋsə wə ghɔ́ kùꞌnə.

Kɨ viŋ kɨ koꞌsə yiŋwaa me

⁶Vaŋ-nshwi vaŋ, nu ŋkɨə faŋ mə nii gìsə nə, mə gìsə kɔ̀ŋ nshɨ-tɔ ŋwaa nə Apɔlɔs maa məgaŋtə viŋ, tɨ́ kaꞌ viŋ kɨ̀ɨ nə ŋiꞌ yigi njyə faŋ nyə gì laa, «Bàw wə kɨ toꞌ sheꞌ maa nu ŋkɨə faŋ ŋkə lùu taa ŋwaꞌlə Nwi. Kɨ wə kɨ dee ki me.» Ŋkə kee kùꞌnə laa viŋ kɨ koꞌsə yiŋwaa buꞌ wə me, ndɔ baa suꞌsə wə mɔ́ꞌ nsi. ⁷Sii nàysə ndə laa a shɔ̀ɔ vɨɨ mɔ́ꞌ? A kìi fa ghɔ ghɔ faŋ ŋkə kee ndɔ̀ fɨ ghɔ Nwi yimu? Faŋ kɔ̀ Nwi kɔ̀ vətɔ vənshə tɨ́ ghɔ nə, sii yɨ̀ kə a koꞌsə ŋwaa maa vətɔ vɔ́, yaa wə faŋ ŋwə nə fàꞌ nu nə ŋkiinə wutə. ⁸Viŋ duꞌtə viŋ zɨ zwə mu? Viŋ duꞌtə viŋ luu vɨɨ faŋ vəŋ kìi vətɔ vəyaŋ mu? Viŋ duꞌtə viŋ gu vɨɨ məsɔꞌ mbi taa yifwàŋ Nwi, tɨ́ nshɨ-tɔ wia kee ta ziꞌ shɔ yimu? Ŋkə nə bàw laa viŋ luu vɨɨ məsɔꞌ mbi, yuu nsiŋ lùu mɔ́ꞌ. ⁹Luu nə, mə bɨꞌtə laa Nwi nùŋsə yia, vɨɨ ntɔŋ vi, ŋkee nsi. Yia lùu yaa vɨɨ faŋ vɨ sɔꞌ nsɔꞌ vəŋ, shia laa vɨ zwilə vəŋ. Yia luu sheꞌ yaa vɨɨ taa vəghày faŋ mbi yinshə ŋkwəŋ nə nshiisə-ŋiisə Nwi nə wə mənsaw ye yia nə. ¹⁰Yia lùu yaa vəmfaw buꞌ faŋ yia fɨꞌtə nu Kristo. Gə fɨ maa viŋ, viŋ lùu yaa vɨɨ tɔ-ley buꞌ Kristo. Yia kee kìi wutə me. Luu nə, viŋ kìi wutə. Viŋ lùu vɨɨ faŋ vɨ fee viŋ. Luu nə, yia lùu vɨɨ faŋ vɨ gisə mbi yibwə tɔ yia. ¹¹Jwi kɔ tɔ və-ndee, jɨŋ zasə yia, twey muu ywey yia, yia shuŋ vəkɔɔ və njwisə. Vɨɨ kɔ ŋɨꞌ tɨ́ yia. Yia kee kìi shəŋ shi me. ¹²Yia faꞌ ŋkee nəŋay nə ghɔ ghia, tɨ́ kaꞌ yia kìi fa maa məzɨ. Vɨɨ ndasə yia. Luu nə, yia kɨ tu mənɔŋ-bwaŋnə tɔ vəŋ. Vɨɨ kɔ ŋɨꞌ tɨ́ yia, yia jia fwi sia. ¹³Vɨɨ gisə vənu vəbwəvə tɔ yia, yia kɔ bəŋsə tɨ́ vəŋ sheꞌ nə yigisə yijəənə. Yia gù vətɔ faŋ mbi mèꞌ. Jwi kɔ tɔ və-ndee, vɨɨ ndɨ̀ yia yaa vətɔ və yikuu vəbu.

Faŋ Pɔɔl nə tɔ̀ŋ Timoti laa ŋwə gə tɨ̀ vɨɨ Nwi fɨ shɨ Kɔrint

¹⁴Mə kee nyɔ̀ꞌ vənu və̀ tɨ́ viŋ laa tɔ kiŋ dɨɨ me. Mə kəə tɨ viŋ, buꞌ laa viŋ lùu vaŋ vaŋ faŋ mə kàw. ¹⁵Vɨɨ kɔlə luu ŋkee vəyaŋ faŋ vəŋ shiinə viŋ kɔ̀ŋ nu Kristo, vətɨɨ viŋ kee lùu vəyaŋ me. Wə lùu shɔ sheꞌ muꞌ faŋ ŋwə nə bì viŋ, viŋ gu vɨɨ Kristo nə. Lùu mə faŋ mə nə fɔŋ jwì nàysə nu Yeso Kristo tɨ́ viŋ, tɨ́ kaꞌ viŋ vɨ Yeso Kristo fàynə gù fa kəmuꞌ nə. ¹⁶Nɨniŋ, mə buꞌ ghɔ tɨ́ viŋ laa viŋ beꞌsə ghuu yitoꞌ kaŋ. ¹⁷Lùu ŋiꞌ nu ŋkɨə faŋ mə tɔ̀ŋ Timoti yɨ viŋ, ŋwə taa baa lumə tɨ́ viŋ, faŋ nshinə nyaa dùꞌ taa jɨɨ Yeso Kristo, nə vənu mbɨə faŋ mə deesə tɨ́ vɨɨ Nwi maa vəshəŋ vənshə. Timoti lùu ŋwiŋ ŋwaa taa nu Nwi, faŋ mə kàw ŋwə. Yia ŋwə lùu fa kəmuꞌ yia vɨ Yeso Kristo. Ŋwə faꞌ faꞌ Yeso Kristo nə fwi yimuꞌ. ¹⁸Vɨɨ mɔ́ꞌ fɨ taa ŋwaa viŋ koꞌsə yiŋwaa vəŋ, bɨꞌtə laa mə ndɔ kee baa bəŋ jwì yɨ viŋ me. ¹⁹Kɨ ghaŋ Nwi biŋ, buu fɨkɨꞌ nee, mə jwi yɨ viŋ, tɨ́ kaꞌ mə ndɔ kɨɨ nə wutə ŋkɨə faŋ vɨɨ məkoꞌsə ŋwaa vɔ́ kìi, kee baa kɨɨ sheꞌ yigisə vəŋ me. ²⁰Viŋ kɔꞌ kɨɨ laa nu yifwàŋ Nwi yaa kɨ jwi nə wutə Nwi, ŋkə kee yaa kɨ jwi sheꞌ nə yigi me. ²¹Viŋ sii kəə kə? Yighee njyə faŋ mə ndɔ jwi, mə taa jwi nə mfa maa məsaŋ viŋ mu, mu viŋ taa kwiinə nshinə yiŋ, yuu mə taa kɨ jwi, mə jwi fɨ taa bwaŋnə, də̀ ŋkawnə nyaa, faŋ mə kaw viŋ shɔ nə mu?

Kɨ viŋ biŋ nu bwə taa ŋwaa vɨɨ Nwi me

¹Mə zɔ laa vɨɨ mɔ́ꞌ taa ŋwaa viŋ yɨsə ŋkee vənu vəbwəvə. Jɨɨ njyə faŋ vəŋ yɨsə vənu vəbwəvə shɔ nə, nyə bɨ shɔ̀ɔ ki. Ŋkee vɨɨ faŋ vəŋ kee kɨ̀ɨ nə Nwi me, kee yɨ kəŋ nu ghɔ́ me. Mə zɔ laa wə mɔ́ꞌ fɨ taa ŋwaa viŋ ndi zu tii wi. ²Sii kaꞌ viŋ koꞌsə yiŋwaa kɨkə, faŋ vɨɨ fɨ taa ŋwaa viŋ yɨsə kəŋ vənu vɔ́? Bàw viŋ gwia buꞌ vənu vəbwəvə viŋ. Bàw viŋ jɔŋ kəŋ wə ghɔ́, faŋ ŋwə yɨsə kəŋ nu ghɔ́, fɨ taa ŋwaa viŋ. ³Faŋ nsiŋ kee kɔlə lùu mɔ́ꞌ shəŋ muꞌ nə me, fwi nyaa lùu yɨ viŋ. Maa yizii tɨta Yeso Kristo mə duꞌtə mə shia, tə kɔ̀ŋ nu faŋ wə ghɔ́ yɨsə nə, lùu yaa mə lùu yɨ viŋ. ⁴Nu ŋkɨə tɨ́ kaꞌ viŋ yɨ̀, lùu laa viŋ shəŋtə shəŋ muꞌ maa yizii Yeso Kristo. Zwitə kaŋ taa lùu taa ŋwaa viŋ nɨzi. Viŋ ndɨ wutə fɨ ghɔ tɨta Yeso, ⁵mèꞌtə wə ghɔ́ tɨ́ tɨɨ vəzwitə vəbwəvə laa ŋwə ndisə ŋwaa wə ghɔ́. Nɨniŋ, kaꞌ zwitə ki ndɔ bwey maa shi ŋkɨə faŋ tɨta Yeso ndɔ bəŋ jwi, kɨ sɔꞌ mbi nə.

⁶Ŋkə kee bàw laa viŋ kɨ koꞌsə yiŋwaa yiŋ, faŋ viŋ koꞌsə nə me. Maa viŋ kɨɨ laa vɨ yaa kɨ naysə bee, vɨ kwaŋ sheꞌ wee-dɨꞌ fənsɨŋ taa tey yi nee, fənsɨŋ fɔ́ yɨsə bee kɔ́ kənshə mwa sheꞌ fɨkɨꞌ nee. ⁷Nɨniŋ ghɔ́, viŋ fuusə nu bwə fɨ taa ŋwaa viŋ. Viŋ kee fuusə me, buu ŋkə taa saynə taa ŋwaa viŋ, sheꞌ yuu fənsɨŋ sàynə taa bee nə. Viŋ fuusə nu bwə kɔ́, yuu dùꞌ vəley. Maa yinsəŋ, viŋ duꞌtə viŋ luu vəley, buꞌ laa Yeso nə kù tɔ nsiŋ, sɔ̀ yibɨsə nyaa-nsiŋ. Ŋwə lùu tɨ́ nsiŋ yaa bi-njɨɨ njyə faŋ vɨ yaa kɨ kɔ Nwi shɔ maa ndey shi Pasa. ⁸Nɨniŋ, nsiŋ kɨ duꞌ nə məŋaytə, kee kɨ kii nu maa məyɨ nə nu bwə me. Kɨ nu bwə saynə taa ŋwaa nsiŋ me. Bàw nsiŋ bee kɨ kii yɨ jəə, beꞌsə jəə Nwi nə fwi yimuꞌ. Nsiŋ kɨ toꞌ yitoꞌ nyaa-nsiŋ maa jɨɨ Nwi yinsəŋ.

⁹Mə nə duꞌtə mə nyɔ̀ꞌ, nàysə tɨ́ viŋ taa ŋwaꞌlə laa kɨ viŋ kɨ duꞌ viŋ vɨ vɨɨ faŋ vəŋ yɨ vənu vəbwəvə me. ¹⁰Mə nəə kee gisə kɔ̀ŋ vɨɨ faŋ kee lùu vɨɨ Nwi me. Vɨɨ mbɨə faŋ vəŋ kee lùu vɨɨ Nwi me, faŋ vəŋ yɨsə vənu vəbwəvə nə, lùu taa mbi, nsiŋ vɨ vəŋ. Vəŋ tii vəki, səsə vətɔ, shaw vətɔ, baa fèꞌ vənwi vədayday. Nɨniŋ, faŋ vəŋ lùu taa mbi nyə̀ nə, jɨɨ kee lùu shɔ viŋ gaasə yiŋwaa fɨ ghɔ vəŋ me, maa tɨ̀ lɨꞌ laa viŋ fùusə yiŋwaa yiŋ fɨ taa ŋwaa wə mənsaw me. ¹¹Nu ŋkɨə faŋ mə kəə gì, lùu laa kɨ viŋ kɨ duꞌ shəŋ muꞌ viŋ vɨ wə faŋ ŋwə gì laa yi lùu wuu Nwi, luu nə, yɨsə vənu vəbwəvə me. Weenshu ŋwaa-nsiŋ mɔ́ꞌ lùu shɔ faŋ ŋwə tii vəki, tɨꞌnə me səsə vətɔ, tɨꞌnə me feꞌ vənwi vədayday, tɨꞌnə me ndasə vɨɨ, tɨꞌnə me nu məluꞌ ghenə, tɨꞌnə me shɨshaw, kɨ viŋ kɨ shi viŋ vɨ kəŋ vɨɨ vɔ́ shəŋ muꞌ me. Kɨ viŋ kɨ zɨnə viŋ vɨ kəŋ vɨɨ vɔ́ faŋ vəŋ yɨsə kəŋ vənu vɔ́ me. ¹²Mə kee shia nsɔꞌ tɔ vɨɨ mbɨə faŋ vəŋ kee lùu vɨɨ Nwi me. Luu nə, bàw viŋ kɨ sɔꞌ vɨɨ mbɨə faŋ lùu vɨɨ Nwi, faŋ vəŋ yɨ̀ kəŋ vənu vɔ́ nə. ¹³Kaꞌ sɔꞌ sheꞌ Nwi sɔ̀ꞌ vɨɨ mbɨə faŋ vəŋ kee lùu vɨɨ Nwi me. Luu nə, gə fɨ maa nu bwə kɔ́ taa ŋwaa viŋ nə, viŋ kɨ yɨsə sheꞌ faŋ vɨ nyɔ̀ꞌ taa ŋwaꞌlə Nwi laa, «Viŋ jɔŋ wuu bwə ghɔ́ fɨ taa ŋwaa viŋ!» 5.13 Diteronimi 13.6.

Faŋ ŋkə kee bàw laa vɨɨ Nwi ndi vaŋ-nshwi vəŋ, gə nə vəŋ taa ŋii nsɔꞌsə me

¹Nu mɔ́ꞌ baa lùu shɔ taa ŋwaa viŋ. Sii yɨ kə, wə fɨ taa ŋwaa viŋ, faŋ ŋwə kìi ntay ghɔ liŋ wi, ŋwə ndɨ nsɔꞌ yɔ́, gə̀ nə nyə taa ŋii nsɔꞌsə, laa vɨɨ məmanə Nwi shia nsɔꞌ yɔ́? Sii yɨ̀ kə ŋwə kee jwì nə nyə vɨsɨ vɨɨ ley Nwi me? ²Viŋ kee yikɨɨ laa ndɔ sɔꞌ vɨɨ Nwi sɔꞌ nsɔꞌsə vɨɨ fɨ taa mbi maa yighee yifwàŋ Nwi yimu? Faŋ ŋkə lùu nɨniŋ, faŋ shi mɔ́ꞌ ndɔ kɨ jwi, viŋ sɔꞌ nsɔꞌsə vɨɨ fɨ taa mbi nə, sii yɨ̀ kə laa kaꞌ viŋ kee sɔ̀ꞌ vaŋ-nsɔꞌsə fɨ taa ŋwaa viŋ ndwə me? ³Viŋ kee kɨɨ laa nsiŋ ndɔ sɔꞌ ŋkee nsɔꞌsə nshiisə-ŋiisə Nwi yimu? Faŋ ŋkə lùu laa nsiŋ ndɔ sɔꞌ nsɔꞌsə nshiisə-ŋiisə Nwi nə, sii yɨ̀ kə laa kaꞌ viŋ kee sɔ̀ꞌ vaŋ-nsɔꞌsə fɨ taa mbi nyə̀, shìa me? ⁴Nɨniŋ, yighee njyə faŋ nu gày taa ŋwaa viŋ, kɨ viŋ ndɨ, gə̀ nə ŋkə taa ŋii nsɔꞌsə me, tɨ́ kaꞌ vɨɨ faŋ kee lùu vɨɨ Nwi me, sɔꞌ nsɔꞌsə sɔ́, shìa me. ⁵Maa tɔ kiŋ dɨdɨɨ? Ŋkə lùu laa tuu wə kee lùu shɔ taa ŋwaa viŋ, faŋ ŋwə kìi tɔ ley, tɨ́ kaꞌ ŋwə sɔ̀ꞌ nsɔꞌ shia taa ŋwaa vɨɨ faŋ lùu vɨɨ Nwi yimu? ⁶Ŋkə kee kùꞌnə laa wuu Nwi ndɨ weenshu wi wuu Nwi, ghɔ ŋwə gə nə nsɔꞌ vəŋ taa ŋii nsɔꞌsə, faŋ sɔꞌ vɨɨ faŋ kee lùu vɨɨ Nwi me, nə vɨɨ faŋ vəŋ kee bìŋ nu Nwi me.

Kɨ viŋ biŋ ntaysə fuu taa ŋwaa viŋ me

⁷Yinsəŋ, viŋ duꞌtə viŋ gu, buꞌ faŋ ntaysə fuu taa ŋwaa viŋ. Wə kɔlə yɨ̀ nu bwə maa ghɔ, tɨꞌnə me shàw fa fɨ ghɔ ghɔ, bàw a meꞌtə ŋwə, gày. Ŋkə nə bàw a ye ŋɨꞌ fɨ ghɔ weenshu wə, fɨ ghɔ a ndɨ ŋwə, gə̀ nə ŋwə taa ŋii nsɔꞌsə. ⁸Luu nə, viŋ kee kàw meꞌtə me. Viŋ bee kii yɨsə vənu vəbwəvə tɨ́ vaŋ-nshwi viŋ, shàw fa ŋkee fɨ ghɔ vaŋ-nshwi vɨɨ Nwi. ⁹Viŋ kɔꞌ kɨɨ laa vəyɨ-kəbwə kee ndɔ ŋii taa nu yifwàŋ Nwi me. Kɨ viŋ kɨ bweꞌsə yiŋwaa yiŋ me! Vɨɨ faŋ vəŋ yɨsə vənu vəbwəvə, tɨꞌnə me shi nə vəki, nə vɨɨ faŋ vəŋ feꞌ vənwi, nə vɨɨ faŋ vəŋ meꞌtə vəki vəvəŋ, tìi vəki vəmɔ́ꞌ, nə vəndɔŋ faŋ vəŋ shi nə vəliŋ vəvəŋ vəndɔŋ, ¹⁰nə vɨɨ faŋ vəŋ shɨshaw, nə vɨɨ vəŋwiŋ, nə vɨɨ faŋ vəŋ nu məluꞌ, mbə shɔɔ sɨ vəŋ, nə vɨɨ faŋ vəŋ toꞌ ndasə vɨɨ, nə vɨɨ faŋ vəŋ si vətɔ və vɨɨ, kəŋ vɨɨ vɔ́ vənshə, faŋ vəŋ yɨsə vənu vəbwəvə vɔ́ nə, kee ndɔ ŋii taa nu yifwàŋ Nwi me. ¹¹Nə luu yighee vɨsɨ, vɨɨ mɔ́ꞌ fɨ taa ŋwaa viŋ nə yɨ̀sə kəŋ vənu vɔ́. Luu nə, Yeso Kristo sɔ viŋ fɨ maa vənu vəbwəvə viŋ vɔ́, ŋwə fuusə viŋ, tə laa viŋ luu mbii vɨɨ. Nwi ndɨ̀ viŋ yaa vɨɨ faŋ vənu vəvəŋ lùu vəloomə, buꞌ laa viŋ jwì yɨ ŋwə maa yizii tɨta Yeso Kristo. Yɨ Zwitə Ley Nwi laa viŋ luu vɨɨ ley Nwi ndwə.

Nu mətii vəki kee kùꞌnə tɨ́ vɨɨ Nwi me

¹²Gə fɨ maa yigi njyə faŋ vɨ gì laa, «Kaꞌ mə kɨ yɨsə vənu vənshə.» Lùu nɨniŋ, luu nə, kee gaŋtə vənu vənshə gaŋtə mə laa mə kɨ gə vɨsɨ vɨsɨ me. Kaꞌ wə kɨ yɨsə vənu vənshə, luu nə, kee bàw laa nu yɨsə ŋwə gu buꞌ tɨ́ nu kɔ́ me. ¹³Wə mɔ́ꞌ taa gi laa, «Nwi nə nàysə fazɨ tɨ́ kaꞌ ŋkə ŋìi taa njyoꞌ, baa nàysə njyoꞌ wə laa fazɨ kɨ ŋii shɔ.» Ŋkə lùu nɨniŋ. Luu nə, shi mɔ́ꞌ Nwi ndɔ ndisə njyoꞌ wə ghɔ fazɨ. Gə fɨ maa nu məshi nə vəki, Nwi nə kee bɔ̀ŋ ŋwaa wə laa ŋwə ndɨ ŋwaa wi ghɔ́, kɨ yɨsə vənu vəbwəvə shɔ me. Nwi nə bɔ̀ŋ ŋwaa wə laa ŋwə ndɨ ŋwaa wi ghɔ́, kɨ toꞌ nə ŋwə, faꞌ vənu və Nwi nə ŋwaa wi ghɔ́. Kɔ̀ Nwi kɔ̀ fa ŋkɨə faŋ ŋwaa wi ghɔ́ kəə. ¹⁴Sheꞌ faŋ Nwi nə ywèysə Yeso Kristo fɨ shɨ yiku nə, ŋwə ndɔ baa ndi wutə ki kɔ́, yɨ̀sə nsiŋ ywey fɨ shɨ yiku nɨzi. ¹⁵Maa viŋ yikɨɨ laa yiŋwaa yiŋ lùu fɨ maa way ŋwaa Yeso Kristo. Kaꞌ wə kee ndɨ̀ way ŋwaa Kristo ghɔ́, gə̀ fàynə ghɔ wəzwi sakə, ŋwaa wi kɨ nii gù way ŋwaa wəzwi sakə me. Kaꞌ wə kee yɨ̀ kəŋ nu ghɔ́ me. ¹⁶Kɨ luu wə faynə ghɔ wəzwi sakə, buu ŋkə də̀ laa, ghɔ sakə ghɔ́ lùu fa kəmuꞌ, ŋkə luu sheꞌ faŋ vɨ nyɔ̀ꞌ taa ŋwaꞌlə Nwi laa, «Wəndɔŋ nə wəzwi kìasə gù fa kəmuꞌ.» 6.16 Jenesis 2.24.¹⁷Luu nə, wə faŋ ŋwə faynə yiŋwaa ghɔ tɨta Yeso Kristo, wə ghɔ́ kìi zwitə kəmuꞌ ghɔ Yeso. ¹⁸Nɨniŋ, viŋ meꞌtə vənu vəbwəvə vɔ́. Kɨ viŋ faynə nə vəki sakə me. Wə kɨ luu yɨ nu bwə mɔ́ꞌ, ŋkə kee kɔ̀ŋ ŋwaa wi me. Luu nə, wə shi ghɔ vəki, buu lùu nu bwə faŋ ŋkə kɔ̀ŋ ŋkee ŋwaa wi. ¹⁹Maa viŋ kɨ̀ɨ laa Zwitə Nwi shi taa ŋwaa viŋ, faŋ lùu ŋii Nwi. Kwàŋ Nwi kwàŋ Zwitə kɔ́ taa fwisə viŋ. Nɨniŋ, kee kìi viŋ kìi yiŋwaa yiŋ me, kìi Nwi kìi yiŋwaa yiŋ. ²⁰Viŋ kɔꞌ kɨɨ laa Yeso Kristo nə ywàŋ viŋ ŋkee nə mənshi mi, faŋ ŋwə nə kù tɔ nsiŋ nə. Nɨniŋ, viŋ kɨ ndɨ yiŋwaa yiŋ maa məbəŋsə Nwi!

Ntɨsə kɔ̀ŋ nu məndaa

¹Mə kəə kɔ bəŋsə vənu mbɨə faŋ viŋ nə nyɔ̀ꞌ, bìtə tɨ́ mə. Wə kɨ luu dùꞌ, kee kɔ̀ŋ wəzwi me, ŋkə bàw tɨ́ ŋwə mu? ²Bàw laa wə kii zu wi, wəzwi kii ndəə wi maa məmeꞌtə vənu vəbwəvə. Ŋkə kee lùu nɨniŋ me, wəndɔŋ kee kìi zu wi me, buu kaꞌ ŋkə lùu ŋkee kəweꞌ tɨ́ ŋwə, ŋwə dùꞌ kɨ ŋii məmɔŋ nu bwə, tii vəki. Sheꞌ nɨniŋ, bàw wəzwi ndaa ndəə wi, tɨ́ kaꞌ vəŋ kee baa yɨ̀ nu bwə me. ³Wəndɔŋ yɨ̀ nu ŋkɨə faŋ ŋkə kùꞌnə tɨ́ kaꞌ ŋwə yɨ̀sə maa zu wi; wəzwi yɨ̀sə nu ŋkɨə faŋ ŋkə kùꞌnə tɨ́ kaꞌ wəzwi kɨ yɨ maa ndəə wi. ⁴Wəzwi kee sɔꞌ ŋwaa wi me; sɔꞌ wəndɔŋ sɔꞌ ŋwaa wəzwi. Wəndɔŋ kee sɔꞌ ŋwaa wi me; sɔꞌ wəzwi sɔꞌ ŋwaa wəndɔŋ. ⁵Nɨniŋ ghɔ́, kɨ wəndɔŋ ghɔ wəzwi twey nu liŋ wi me, maa tɨ̀ lɨꞌ laa vəŋ vənshə biŋ laa vəŋ taa gaasə yiŋwaa maa wee-fɨ-yighee maa məshɔꞌtə Nwi me. Yighee yɔ́ taa shɔɔ, bàw vəŋ baa faynə, tɨ́ kaꞌ zwitə bwə Satan kee kìi wutə, ŋii taa ŋwaa vəŋ nə məmɔŋ, kɨ yɨ laa vəŋ gu, buꞌ laa vəŋ kee kɨɨ sɔꞌ yiŋwaa yivəŋ me. ⁶Ntɨ nyə̀ kɔ̀ŋ məndaa faŋ mə kɔ̀ tɨ́ viŋ feenə nə, kɨ mə kee kɨ dɔɔ laa viŋ ndaa me. Mə gisə sheꞌ laa wə kɨ luu ndaa, ŋkə kee lùu nu bwə me. ⁷Ŋkə lùu shee yaa ŋkə taa baw laa wə tɨ̀ me wə twey məndaa faŋ mə twey nə. Luu nə, Nwi kɔ̀ vəkeynə tɨ́ vɨɨ nɨŋkwiŋ nɨŋkwiŋ. Nwi kɔ̀ wutə tɨ́ vɨɨ mɔ́ꞌ laa vəŋ kɨ faꞌ maa jɨɨ yimɔ́ꞌ, kɔ̀ tɨ́ vɨɨ mɔ́ꞌ laa vəŋ kɨ faꞌ maa jɨɨ yimɔ́ꞌ.

⁸Nu ŋkɨə faŋ mə taa gi tɨ́ vɨɨ mbɨə faŋ vəŋ kee yindaa me, nə tɨ́ vəki ŋkusə, lùu laa, bàw laa vəŋ duꞌ nɨnɔŋ, faŋ mə dùꞌ nə. ⁹Kɨ luu wə kee kɨɨ jiatə ŋwaa wi me, bàw ŋwə ndaa. Bàw laa wə ndaa, fɨ ghɔ ŋwə duꞌ nɨnɔŋ, kɨ kɨɨ fɨ taa fwi ŋwə yaa wisə, buꞌ faŋ ŋwə kee kɨɨ jiatə ŋwaa wi me.

¹⁰Gə fɨ maa vɨɨ faŋ vəŋ ndàa, mə naysə tɨ́ viŋ laa kɨ wəzwi meꞌtə ndəə wi me. Lùu nu faŋ kee gisə sheꞌ mə gisə nɨniŋ tɨ́ viŋ me, ŋkə ndɔ̀ fɨ ghɔ tɨta Yeso Kristo. ¹¹Gə fɨ maa wəzwi faŋ ŋwə duꞌtə ŋwə gaasə fɨ ghɔ ndəə wi, bàw ŋwə duꞌ nɨnɔŋ. Ŋkə kee lùu tɨniŋ me, buu ŋwə bìŋ laa yi taa baa bəŋ gə̀ maa mfɔŋ ndəə wi. Kɨ ŋwə ndaa wəndɔŋ day me. Mə baa naysə tɨ́ viŋ laa kɨ wəndɔŋ tɨꞌ zu wi me, tɨꞌnə me fùusə ŋwə fɨ taa ŋii məndaa me.

¹²Gə fɨ maa wəndɔŋ faŋ ŋwə beꞌsə Kristo, kìi wəzwi faŋ kee lùu wuu Nwi me, kɨ luu wəzwi ghɔ́ biŋ laa ghɔ ŋwə taa kɨ duꞌ mɔ́ꞌ, kɨ wəndɔŋ ghɔ́ tɨꞌ ŋwə me. Lùu ntɨ faŋ kɔ̀ mə tɨ́ viŋ. Kee lùu ntɨ faŋ nə kɔ̀ tɨta Yeso tɨ́ nsiŋ me. ¹³Sheꞌ nɨniŋ, wəzwi faŋ lùu wuu Nwi, kìi ndəə wi faŋ kee lùu wuu Nwi me, kɨ luu wəndɔŋ ghɔ́ gì laa ghɔ wəzwi ghɔ́ taa kɨ duꞌ, kɨ wəzwi ghɔ́ twey me. ¹⁴Mə gì nɨniŋ buꞌ laa Nwi bìŋ wəndɔŋ ghɔ́, faŋ kee lùu wuu Nwi me, kèe gəŋ si buꞌ zu wi faŋ ŋwə bìŋ nu Nwi nə. Nwi baa bìŋ wəzwi ghɔ́ faŋ kee lùu wuu Nwi me, kèe gəŋ si buꞌ ndəə wi faŋ ŋwə bìŋ nu Nwi nə. Nəə toꞌ kee lùu nɨniŋ me, buu vaŋ vəŋ kee ndɔ luu vɨɨ ley tɨ́ Nwi me. Luu nə, mə gì tɨ́ viŋ yinsəŋ laa Nwi kèe gəŋsə vaŋ vəŋ nɨzi. ¹⁵Kɨ luu wə ntɨə faŋ kee lùu wuu Nwi taa ŋwaa vəŋ me, gi laa yi taa gaasə məndaa wi, kaꞌ vəŋ gàasə. Faŋ ŋkə lùu nɨniŋ, kɨ vɨ dɔɔ laa wə ntɨə faŋ lùu wuu Nwi, duꞌ ghɔ ndəə wi, tɨꞌnə me ghɔ zu wi me, buꞌ vəŋ taa duꞌ sheꞌ nə ntaysə. Maa Nwi shòꞌ nsiŋ yaa vɨɨ vi laa nsiŋ kɨ duꞌ bwaŋnə. ¹⁶Viŋ, vəki faŋ viŋ lùu vɨɨ Nwi, viŋ sii kɨɨ kɨkə laa kaꞌ viŋ yɨ̀sə vəndəə viŋ ndɔ kwiinə, bìŋ nu Nwi, kìi məbwey vəlwaŋ buꞌ viŋ? Viŋ, vəndɔŋ faŋ viŋ lùu vɨɨ Nwi, sii kaꞌ viŋ kɨɨ kɨkə laa vəki viŋ ndɔ kwiinə, bìŋ nu Nwi, kìi məbwey vəlwaŋ buꞌ viŋ?

Bàw wə goꞌsə maa məduꞌ ŋgwə faŋ ŋwə nə luu shɔ maa yighee njyə faŋ Nwi nə tìi ŋwə

¹⁷Nu mɔ́ꞌ lùu laa, bàw wə tɨ̀ me wə toꞌ sheꞌ maa jɨɨ njyə faŋ Nwi kɔ̀ tɨ́ ŋwə laa ŋwə toꞌ fuŋ nə. Bàw ŋwə goꞌsə maa məduꞌ ŋgwə faŋ ŋwə nə luu shɔ maa yighee njyə faŋ Nwi nə tìi ŋwə laa ŋwə jwi lùu wuu wi nə. Lùu nu ŋkɨə faŋ mə deesə vɨɨ Nwi maa vəshəŋ vənshə. ¹⁸Wə lùu shɔ faŋ vɨ yaa duꞌtə vɨ sɨɨtə ŋwə maa yighee njyə faŋ Nwi nə tìi ŋwə, ŋkə kee bàw ŋwə ndɨə yifɨɨ shəŋ məsɨɨtə yɔ́ me. Kɨ luu wə luu shɔ faŋ vɨ nə kee ta sɨ̀ɨtə ŋwə maa yighee njyə faŋ Nwi nə tìi ŋwə me, kɨ ŋwə yɨsə laa vɨ sɨɨtə ŋwə me. ¹⁹Faŋ vɨ sɨɨtə wə, tɨꞌnə me kee sɨ̀ɨtə me, nsɔꞌ kee lùu shɔ me. Nu ŋkɨə faŋ luu ŋkee nu, lùu laa wə kɨ nuŋsə ntɨsə Nwi. ²⁰Bàw wə tɨ̀ me wə tɨŋnə maa shəŋ ŋkɨə faŋ ŋwə nə luu shɔ maa yighee njyə faŋ Nwi nə tìi ŋwə laa ŋwə jwi beꞌsə Kristo nə. ²¹Wə ntɨə faŋ ŋwə nə luu buꞌ maa yighee njyə faŋ Nwi nə tìi ŋwə, kɨ ŋwə shəŋ maa nu yiŋkii me. Kɨ luu ŋwə kii jɨɨ maa məfuu fɨ taa faꞌ vəbuꞌ ghɔ́, bàw ŋwə fuu. ²²Mə gì nɨniŋ laa, kɨ ŋkə za viŋ faŋ viŋ kɔlə lùu vəbuꞌ nə me. Viŋ kɔꞌ kɨɨ laa buꞌ, faŋ Nwi shòꞌ laa ŋwə beꞌsə Yeso, kee baa lùu buꞌ vɨsɨ Nwi me, buꞌ laa ŋwə fàynə lùu fa kəmuꞌ ghɔ Yeso Kristo. Gə fɨ maa wə faŋ ŋwə nə kee lùu buꞌ me, Nwi shòꞌ ŋwə maa məbeꞌsə Yeso, buu wə ghɔ́ lùu buꞌ Kristo. ²³Viŋ lumə laa Kristo nə ywàŋ viŋ nə mənshi mi, viŋ gu vɨɨ vi. Faŋ viŋ lùu vəbuꞌ və Kristo nə, kɨ viŋ gu vəbuꞌ və vɨɨ me. ²⁴Lùu nu ŋkɨə faŋ mə gì tɨ́ viŋ, vaŋ-nshwi vaŋ, laa wə tɨ̀ me wə kɨ toꞌ fɨ maa jɨɨ Nwi, goꞌsə maa məduꞌ ŋgwə faŋ Nwi nə tìi ŋwə, ŋwə luu shɔ nə.

Ntɨsə kɔ̀ŋ nu məndaa

²⁵Gə fɨ maa nu vɨɨ mbɨə faŋ vəŋ kee ta yindaa me, Nwi kee ta kɔ̀ yigi shee kɔ̀ŋ nu kɔ́ me. Luu nə, mə kəə naysə mbɨꞌtə nyaa tɨ́ viŋ. Bàw viŋ zɔ yigisə nyaa, buꞌ laa tɨta Yeso Kristo nə kèe gəŋ saŋ tɨ́ kaꞌ mə lùu wuu yinsəŋ. ²⁶Mə bɨꞌtə laa, ŋkə bàw laa wə gòꞌsə nɨnɔŋ, faŋ ŋwə lùu nɨnɔŋ. Mə gì nɨniŋ buꞌ laa ŋɨꞌ lùu yiyaŋ maa yighee ndwə. ²⁷Wə faŋ ŋwə kìi zu wi, kɨ ŋwə tɨꞌ zu wi ghɔ́ me. Wə faŋ ŋwə kee kìi wəzwi me, kɨ ŋwə kəə laa yi taa ndaa wəzwi me. ²⁸Luu nə, kɨ luu laa wə gi laa yi taa ndaa wəzwi, buu ŋwə kee yɨ̀ nu bwə me. Kɨ luu wee-wəzwi ndaa wəndɔŋ, buu ŋwə kee yɨ̀ nu bwə me. Luu nə, viŋ kɨ lumə laa vɨɨ mbɨə faŋ vəŋ ndaa nə, taa ye ŋɨꞌ taa ŋwaa vəŋ. Lùu nu ŋkɨə faŋ mə gì laa bàw wə duꞌ, kee ndaa me, tɨ́ kaꞌ kəŋ ŋɨꞌ ghɔ́ kee ŋìi ŋwə me.

²⁹Vaŋ-nshwi vaŋ, viŋ zɔ nu ŋkɨə faŋ mə naysə tɨ́ viŋ! Yighee njyə faŋ Nwi kɔ̀ tɨ́ nsiŋ lùu yituŋsə. Lùu vəshi vəshə ndwə. Nɨniŋ, bàw vɨɨ mbɨə faŋ vəŋ ndàa vəki, kee shoꞌ fwi vəŋ, nùŋ maa vəki vɔ́ me, kɨ shi yaa vɨɨ faŋ vəŋ kee ndàa vəki me. ³⁰Bàw vɨɨ mbɨə faŋ vəŋ gɨgwia, kɨ duꞌ yaa vɨɨ faŋ vəŋ kee gɨgwia me. Vɨɨ mbɨə faŋ vəŋ ŋaytə, kɨ duꞌ yaa vɨɨ faŋ vəŋ kee ŋɨŋaytə me. Bàw vɨɨ mbɨə faŋ vəŋ ywàŋ vətɔ, kɨ toꞌ yaa vɨɨ faŋ vəŋ kee kìi vətɔ me. ³¹Bàw vɨɨ mbɨə faŋ vəŋ kìi nu maa məyɨ nə vətɔ və taa mbi və̀, kɨ yɨsə yuu vɨɨ faŋ vəŋ kee kìi nu shɔ me, buꞌ laa mbi nyə̀ kee baa tay buu mè me. ³²Mə kəə laa, kɨ vənu baa kɨ ghaysə viŋ me. Vɨɨ faŋ vəŋ kee yindaa me, lumə sheꞌ vənu və Nwi, kəə jɨɨsə maa məyɨsə too Kristo baw. ³³Luu nə, wəndɔŋ faŋ ŋwə ndàa wəzwi, ŋwə lumə sheꞌ vətɔ və shɨ nsi, kəə sheꞌ maa məbawsə too zu wi. ³⁴Nɨniŋ, fwi yi gaasə vəway vəbɔɔ. Sheꞌ nɨniŋ, vəki ŋkusə nə vaŋ-vəki, faŋ vəŋ kee kìi vəndɔŋ me, bɨꞌtə sheꞌ vənu və Nwi, tɨ́ kaꞌ vəŋ kɔ̀ fwisə vəŋ nə yiŋwaa vəŋ tɨ́ Nwi. Luu nə, vəki faŋ vəŋ ndàa vəndɔŋ, vəŋ bɨꞌtə sheꞌ vənu və taa mbi, kəə sheꞌ jɨɨsə maa məyɨsə laa vəndəə vəvəŋ duꞌ nə fwisə jəəsə. ³⁵Mə naysə vənu və̀ maa məgaŋtə viŋ. Mə kee kəə fə̀ŋ jɨɨ yiŋ me. Mə kəə sheꞌ laa viŋ kɨ yɨsə vənu vəjəəvə faŋ mbə kùꞌnə, baa nə laa viŋ kii jɨɨ tɨ́ kaꞌ viŋ kɨ nuŋ fwi siŋ sheꞌ maa Yeso Kristo, wèꞌ shɔ.

³⁶Gə fɨ maa wə faŋ ŋwə kìi wee-wəzwi, tɨꞌnə me wə faŋ ŋwə kəə ndaa wee-wəzwi, kɨ luu ŋwə bɨꞌtə laa, ŋkə kee yikuꞌnə laa yi meꞌtə wee-wəzwi ghɔ́, yighee məbi wee yi shɔɔ me, buu ŋkə bàw laa ŋwə yɨ nɨniŋ, sheꞌ faŋ ŋwə kàw. Kaꞌ vəŋ ndaa. Ŋkə kee lùu nu bwə me. ³⁷Luu nə, wə kɨ luu kɔ̀ꞌnə fɨ taa ŋkɨɨ ŋwə laa kee bàw laa wee-wəzwi ghɔ́ ndaa me, kɨ luu laa ŋwə kɨ̀ɨ fɨ taa fwi ŋwə laa lùu nu jəə nɨniŋ, buu ŋkə bàw faŋ ŋwə gày wee-wəzwi ghɔ́. Luu nu jəə nɨniŋ, faŋ wə ghɔ́ lùu tɨɨ tɔ wi, wə mɔ́ꞌ kee kìi nu shɔ me. ³⁸Nɨniŋ, wə ntɨə faŋ ŋwə biŋ məndaa wee-wəzwi ghɔ́, yɨ nu jəə. Wə ntɨə faŋ ŋwə kee yibiŋ me, yɨ jəə shɔ̀ɔ yiŋkii. ³⁹Wəzwi faŋ ŋwə ndàa wəndɔŋ, fàynə ghɔ wəndɔŋ ghɔ́ faŋ vəŋ lùu vəbwey. Kɨ ghaŋ wəndɔŋ ghɔ́ ku, wəzwi ghɔ́ kii jɨɨ tɨ́ kaꞌ ŋwə ndàa wəndɔŋ day, faŋ ŋkə bàw too ŋwə. Luu nə, kɨ ŋwə ndaa wəndɔŋ faŋ kee lùu wuu Nwi me. ⁴⁰Faŋ ŋkə kɔlə lùu laa lee, ŋwə kìi jɨɨ maa məndaa wəndɔŋ day, faŋ ndəə wi ku nə, ŋkə bàw laa ŋwə dùꞌ nɨnɔŋ, buu ŋwə taa kii məŋaytə yaŋ. Faŋ mə gì nɨniŋ nə, mə baa bɨꞌtə laa yia Zwitə Nwi lùu mɔ́ꞌ.

Faŋ ŋkawnə wə kwàlə shɔ̀ɔ yitɔfə yi, baa nə yigi kɔ̀ŋ fazɨ faŋ vɨ kɔ̀ tɨ́ vənwi vədayday

¹Mə kəə baa gi kɔ̀ŋ fazɨ faŋ vɨ kɔ̀ tɨ́ vənwi vədayday. Viŋ gì laa nsiŋ vənshə kìi tɔ ley. Lùu yinsəŋ laa nsiŋ kìi tɔ ley. Luu nə, kəŋ tɔ ley kɔ́ yɨsə wə koꞌsə ŋwaa wi. Nu ŋkɨə faŋ ŋkə gaŋtə vɨɨ dɨdɨꞌ, lùu laa wə kɨ kaw weenshu wi. ²Kɨ luu wə ndɨ ŋwaa wi yaa wə faŋ ŋwə kɨ̀ɨ nə nu, buu ŋkə də̀ laa ŋwə kee ta kìi tɔ ley maa məkɨɨ nə nu me. ³Ŋkee nu kwalə lùu laa wə kaw Nwi. Wə faŋ ŋwə kàw Nwi, lùu ŋwə faŋ Nwi kɨɨ nə ŋwə yaa ŋwiŋ wi.

⁴Gə fɨ maa fazɨ ŋkɨə faŋ vɨ kɔ tɨ́ vənwi vədayday nə, viŋ kɨɨ laa vənwi vədayday kee lùu fa faŋ ŋkə lùu kəbwey me. Viŋ baa gisə laa Nwi luu sheꞌ muꞌ. ⁵Vətɔ lùu vəyaŋ yizɔ nə nsi faŋ vɨɨ ndì laa lùu vənwi tɨ́ vəŋ, nə vətɔ faŋ vɨɨ biŋ laa mbə sɔ̀ꞌ vəŋ. Vətɔ vɔ́ kɔlə lùu vəyaŋ nə, ⁶nsiŋ kɔꞌ kɨɨ laa Nwi luu sheꞌ muꞌ. Lùu ŋwə lùu Tii ŋwaa-nsiŋ. Bɔ̀ŋ ŋwə bɔ̀ŋ vətɔ vənshə. Ŋwə baa bɔ̀ŋ nsiŋ, laa nsiŋ kɨ kɔ feenə tɨ́ ŋwə. Wə ntɨə faŋ ŋwə kìi nsiŋ, luu sheꞌ muꞌ, lùu Yeso Kristo. Nwi nə shɔ̀ɔ fɨ yiba jɨŋ ŋwə, buu bɔŋ vətɔ vənshə. Məbwey ŋwaa-nsiŋ ndɔ̀ fɨ ghɔ ŋwə. ⁷Faŋ nsiŋ kɔlə kɨɨ laa vətɔ vɔ́ vənshə lùu nu dayday, vɨɨ Nwi vəmɔ́ꞌ kee yikɨɨ me. Vɨɨ mɔ́ꞌ lùu shɔ faŋ vəŋ nə fɔŋ bìŋ vənwi vədayday vɔ́. Nɨniŋ, yighee njyə faŋ vəŋ zɨ fa, tɨꞌnə me kwə kəŋ mbasə ghɔ́, ŋkə lùu tɨ́ vəŋ yaa mbasə faŋ vɨ feꞌ tɨ́ vənwi vɔ́. Ŋkə kɨ nii lùu tɨ́ vəŋ yuu vəŋ yɨ nu bwə. ⁸Nsiŋ kɔꞌ kɨɨ laa, faŋ nsiŋ zɨ kəŋ fazɨ ghɔ́, tɨꞌnə me kee zɨ me, kaꞌ fazɨ kɔ́ kee gàŋtə nsiŋ me, kee yɨ̀sə laa nsiŋ luu vɨɨ jəənə vɨsɨ Nwi me. Nsiŋ kee kɔlə zɨ me, kee lùu nsɔꞌ me. Nsiŋ zɨ, ŋkə kee bee gàŋtə nsiŋ me. ⁹Nu kwalə lùu laa, kɨ viŋ yɨ nu faŋ ŋkə yɨsə laa wə mɔ́ꞌ gu nu me. A kɔlə kɨ̀ɨ fɨ taa yitɔfə yə laa kaꞌ a zɨ kəŋ fazɨ kɔ́, kaa yɨsə laa vɨɨ faŋ fwisə vəŋ kee ta lùu səweꞌ me, gu maa nu kɔ́ me. ¹⁰Kɨ luu wə faŋ ŋwə kee kìi kəŋ yitɔfə yɔ́ me, ye ghɔ, faŋ a kìi yitɔfə yɔ́ nə, faŋ a dùꞌ maa shəŋ məfeꞌ vənwi vədayday, kɨ zɨ fazɨ faŋ vɨ feꞌ tɨ́ vənwi vɔ́ nə, kaꞌ ŋkə yɨ̀sə laa ŋwə baa luu jwì, zɨ̀ fɨ maa fazɨ kɔ́. ¹¹Wə ghɔ́ kɨ zɨ fazɨ kɔ́, faŋ ŋkə ghɨɨ tɨ́ ŋwə yaa lùu nu bwə, buu ŋwə gù buꞌ ghɔ. Yitɔfə yə yɔ́ yɨ̀sə laa ŋwə ndi jɨɨ. Sii yɨ̀ kə buu a yɨsə nu faŋ ŋkə yɨ laa weenshu wə ndi jɨɨ, faŋ Yeso Kristo nə kù tɔ ŋwə nɨzi nə. ¹²Kɨ ghaŋ viŋ yɨ nɨniŋ, buu viŋ yɨ̀ nu bwə tɨ́ vaŋ-nshwi viŋ, faŋ viŋ yɨ̀sə laa vəŋ yɨ̀ nu faŋ ŋkə kee lùu kəloomə sɨ vəŋ me. Viŋ yɨ̀ nɨniŋ, buu viŋ yɨ̀ nu bwə tɨ́ Yeso Kristo nɨzi. ¹³Nɨniŋ, mə naysə tɨ́ viŋ laa, mə kɨ luu kɨ ye laa fazɨ ŋkɨə faŋ mə zɨ ŋkə, laa ŋkə lùu nu bwə tɨ́ weenshu ŋwaa, buu mə taa meꞌtə fazɨ kɔ́ yighee muꞌ, kee baa kɨ zɨ me, tɨ́ kaꞌ mə kee yɨ laa weenshu ŋwaa gu nu me.

Faŋ ŋkə kɔlə kùꞌnə laa vɨ kɨ kɔ fa tɨ́ vɨɨ məfɨꞌtə nu Nwi, nshɨ-tɔ Pɔɔl kee bɨbitə fa me

¹Faŋ mə kɔlə gì nɨniŋ nə, mə kee lùu buꞌ tɨ́ nu me. Mə luu ŋkee wuu ntɔŋ Yeso Kristo. Maa mə nə yè Yeso Kristo faŋ lùu Tii ŋwaa-nsiŋ nə yisɨ. Nshɨ-tɔ wiŋ luu shwenə faꞌ ghɔ́ faŋ mə faꞌ tɨ́ tɨta Yeso Kristo nə. ²Kɨ ghaŋ laa mə kee lùu wuu ntɔŋ Kristo tɨ́ vɨɨ mɔ́ꞌ me, mə nə luu wuu ntɔŋ Kristo tɨ́ viŋ ŋkee maa yinsəŋ. Nshɨ-tɔ wiŋ faŋ viŋ lùu vɨɨ Kristo buꞌ mə nə, lùu shwenə laa mə lùu wuu ntɔŋ wi maa yinsəŋ. ³Lùu nu ŋkɨə faŋ mə bə̀ŋsə tɨ́ vɨɨ mbɨə faŋ vəŋ kəə shìa nsɔꞌ tɔ mə. ⁴Maa ŋkə kùꞌnə tɨ́ kaꞌ vɨ kɔ̀ fazɨ nə məluꞌ maa faꞌ wia faŋ yia faꞌ nə. ⁵Ŋkə nə kee yikuꞌnə laa yia ndaa vəki, kɨ toꞌ yia vɨ vəŋ mɔ́ꞌ yimu? Maa ŋkə nə kùꞌnə tɨ́ yia sheꞌ yuu ŋkə kùꞌnə tɨ́ Pita ghɔ vɨɨ ntɔŋ Yeso vəmɔ́ꞌ, baa nə vaŋ-nshwi Yeso, faŋ vəŋ yɨsə nɨniŋ. ⁶Luu sheꞌ yia Barnabas faŋ kaꞌ yia kee fì fazɨ fɨ ghɔ vɨɨ yimu? Luu sheꞌ yia maa məfaꞌ nə ghɔ ghia buu taa kii fazɨ zɨ mu? ⁷Maa vəsogeꞌ faŋ vəŋ tùŋ yighaw, vəŋ kee yaa kɨ ndɨ luu ka vəŋ, ywaŋ fazɨ shɔ me. Vɨɨ mbɨə faŋ vəŋ ndɨɨ məndɨɨ, kee zɨ fɨ taa biisə vəŋ yimu? Maa vɨɨ mbɨə faŋ vəŋ shii nyaasə, yaa kɨ nu məməŋ faŋ mbə ndɔ̀ fɨ maa nyaasə sɔ́. ⁸Faŋ mə naysə vənu və̀, mə kee naysə sheꞌ nu faŋ ŋkə ndɔ̀ fɨ taa yigisə vɨɨ me. Nə nyɔ̀ꞌ Mose taa ŋwaꞌlə Nwi sheꞌ nɨniŋ. ⁹Ŋwə nə ŋwàꞌlə laa, «Kɨ wə ka shuu nyaa yighee njyə faŋ nyaa yɔ́ faꞌ tɨ́ ŋwə me.» 9.9 Diteronimi 25.4. Nwi nə gi yigi yɔ́ sheꞌ buꞌ nyaasə mu? ¹⁰Bey, Nwi nə gì yigi yɔ́ buꞌ nsiŋ. Maa vɨ baa nyɔ̀ꞌ buꞌ nsiŋ laa, «Wə faŋ ŋwə jìa soo, fàꞌ taa biisə, baa nə wuu məshwi, yaa kɨ faꞌ, tə sɨ laa vɨ taa kɔ vəŋ fɨ maa vətɔ mbɨə faŋ mbə fuu fɨ taa biisə yɔ́.» ¹¹Yia nə fɨ̀ꞌtə nu Nwi tɨ́ viŋ, sheꞌ yuu wə faŋ ŋwə mɔ̀ꞌ ŋɨꞌsə taa biisə ŋwə. Ŋkə kee yikuꞌnə laa viŋ, faŋ viŋ kìi sey fɨ maa faꞌ wia nə, laa viŋ kɔ fɨ maa vətɔ mbɨə faŋ viŋ kìi tɨ́ yia yimu? ¹²Viŋ biŋ laa vɨɨ mɔ́ꞌ faŋ vəŋ deesə nu Nwi tɨ́ viŋ, fi vətɔ fɨ ghɔ viŋ. Faŋ ŋkə lùu nɨniŋ nə, buu yia luu ŋkee vɨɨ mbɨə faŋ kaꞌ viŋ kɔ̀ vətɔ vɔ́ nə. Luu nə, faŋ ŋkə kɔlə lùu nɨniŋ, yia kee ndwàŋ viŋ laa viŋ gaŋtə yia me. Yia duꞌtə yia biŋ ŋɨꞌ tɨ̀ me ŋɨꞌ, laa kɨ yia fəŋ jɨɨ fɨ ghɔ ntɔŋ yijəə Nwi kɔ̀ŋ Yeso Kristo me.

¹³Maa viŋ kɨɨ laa vɨɨ mbɨə faŋ vəŋ faꞌ taa ŋii Nwi yikwalə, yaa kɨ kii fazɨ fɨ maa vətɔ mbɨə faŋ mbə fuu fɨ taa ŋii Nwi yɔ́, faŋ kɔ̀ vɨɨ nə. Vɨɨ mbɨə faŋ vəŋ faꞌ shəŋ faŋ vɨ feꞌ Nwi shɔ, vəŋ yaa kɨ kii fɨ maa mbasə ghɔ́ nɨzi, faŋ vɨ ndɨ̀, fèꞌ ndey Nwi shɔ nə. ¹⁴Ŋkə luu sheꞌ nɨndɨŋ nə vɨɨ mbɨə faŋ vəŋ fɨꞌtə nu Nwi. Tɨta Yeso nə shìa laa vɨ kɨ kɔ vətɔ mbɨə faŋ mbə kùꞌnə tɨ́ vəŋ, tɨ́ kaꞌ vəŋ kɨ zɨ, kii məbwey buꞌ faꞌ vəŋ. ¹⁵Faŋ mə kɔlə kìi wutə maa məbitə vətɔ nə, mə nə kee ta bìtə tɨ́ wə me. Faŋ mə nyɔ̀ꞌ nu kɔ́ tɨ́ viŋ nə, kɨ mə kee kəə laa viŋ kɨ kɔ vətɔ shee me. Ŋkə nə bàw shee maa məku fɨ ghɔ mə kɨ ndwaŋ vətɔ. Viŋ kɨ meꞌtə mə shɔ, tɨ́ kaꞌ mə kìi məbəŋsə ŋwaa ghɔ́. ¹⁶Faŋ mə kɔlə fɨꞌtə yigisə Nwi tɨ́ vɨɨ nə, mə kee kìi nu tɨ́ kaꞌ mə kɨ buꞌ dɨŋ ŋwaa shɔ me. Nə kɔ Nwi kɔ̀ faꞌ ghɔ́ shee. Kaꞌ mə kee mèꞌtə me. Kɨ luu laa mə nə kee fɨꞌtə nu Nwi tɨ́ vɨɨ me, buu ŋkə taa luu ŋkee kəbwə shee. ¹⁷Nii toꞌ lùu ŋkɨɨ nyaa maa məfɨꞌtə nu Nwi tɨ́ vɨɨ, buu kaꞌ ŋkə kùꞌ laa mə bitə fa yaa vəkeynə fɨ ghɔ vɨɨ. Luu nə, kee lùu ŋkitə nyaa me, ŋkə ndɔ̀ fɨ ghɔ Nwi, Nwi nə kɔ̀ faꞌ ŋwə̀ taa ghɔ mə, laa mə kɨ faꞌ tɨ́ ŋwə. ¹⁸Mə sii yè sey fə ndwə? Sey ŋwaa lùu laa mə kɨ fɨꞌtə nu Nwi tɨ́ vɨɨ dayday, laa mə kee kɨ bitə fa ŋkɨə faŋ ŋkə kùꞌnə shee fɨ ghɔ vɨɨ me.

¹⁹Mə lùu wə faŋ mə toꞌ fɨ tɔ mə, wə kee sɔꞌ mə me. Luu nə, faŋ ŋkə kɔlə lùu nɨniŋ, mə gù buꞌ tɨ́ vɨɨ vənshə, tɨ́ kaꞌ mə yɨ̀sə laa vɨɨ vəyaŋ jwi bèꞌsə Yeso Kristo. ²⁰Yighee njyə faŋ mə lùu yia vɨɨ Jus, mə beꞌsə nshinə vɨɨ Jus, tɨ́ kaꞌ mə ndi vəŋ, vəŋ beꞌsə Yeso Kristo. Faŋ ntɨsə nsɨə faŋ Nwi nə kɔ̀ tɨ́ Mose kee kɔlə kà mə me, yighee njyə faŋ mə lùu yia vɨ vɨɨ faŋ ntɨsə sɔ́ kà vəŋ, mə dùꞌ taa ŋwaa vəŋ sheꞌ yaa wə faŋ ntɨsə sɔ́ kà mə nɨzi, tɨ́ kaꞌ mə ndi vəŋ, vəŋ beꞌsə Kristo. ²¹Yighee njyə faŋ mə lùu yia vɨ vɨɨ faŋ kee lùu vɨɨ Jus me, faŋ ntɨsə sɔ́ kee kà vəŋ me, mə beꞌsə nshinə vəŋ, tɨ́ kaꞌ mə ndɨ vəŋ, vəŋ beꞌsə Yeso Kristo. Ŋkə kee də̀ laa mə kee zɔ̀nə Nwi me, lùu ntɨsə Yeso Kristo faŋ mə zɔnə. ²²Yighee njyə faŋ mə lùu yia vɨ vɨɨ faŋ fwisə vəŋ kee ta wèꞌ maa nu Nwi me, mə lùu yaa vəŋ, tɨ́ kaꞌ mə yɨsə vəŋ beꞌsə Kristo. Wə kɔlə lùu kɨkə, mə lùu yaa ŋwə, tɨ́ kaꞌ mə tòꞌ fɨ maa jɨɨsə sənshə maa məjwi nə vɨɨ, tɨ́ kaꞌ vəŋ kìi məbwey vəlwaŋ fɨ ghɔ Nwi. ²³Mə yɨsə vənu vənshə buꞌ nu Nwi, tɨ́ kaꞌ mə ndɔ kii fɨ maa jəə ŋgwə faŋ ŋwə jwi fiiba nu Nwi.

Viŋ kɨ toꞌ maa jɨɨ Nwi yaa vɨɨ faŋ vəŋ sɨ̀ɨnə ghuu

²⁴Yighee njyə faŋ vɨɨ yaa kɨ sɨɨnə ghuu, vɨɨ vəyaŋ nyɨ̀ŋ, luu nə, taa kii sheꞌ wə muꞌ kìi vəkeynə. Nu mətoꞌ yaa wuu Nwi luu sheꞌ yuu məsɨɨnə ghuu ghɔ́. Nɨniŋ, viŋ nyɨŋ nəŋay, baa nyɨŋ jəə, laa viŋ ndɔ kii vəkeynə vɔ́. ²⁵Wə tɨ̀ me wə faŋ ŋwə gì laa yi taa sɨɨnə ghuu, lootə ŋwaa wi ŋkee jəə, mèꞌtə vənu vəyaŋ, tɨ́ kaꞌ ŋwaa wi weꞌ. Ŋwə yɨ̀sə nɨniŋ laa ŋwə kìi vəkeynə. Vəkeynə mbɨə faŋ ŋwə kəə mbə nə, lùu fa faŋ kaꞌ ŋkə bɨ. Luu nə, vəkeynə mbɨə faŋ nsiŋ tə̀ sɨ shɔ laa nsiŋ taa kii nə, lùu məbwey vəlwaŋ faŋ kaꞌ ŋwə kee ndɔ bɨ me. ²⁶Gə fɨ maa mə, mə nyɨŋ gə neꞌtə laa mə ndɔ nyɨŋ, gə̀ zìꞌ maa vəndwə. Mə kee lùu yuu wə faŋ ŋwə nywenə ghɔ fɨɨ me. ²⁷Mə saŋ ŋwaa ŋwaa, tɨ́ kaꞌ mə sɔ̀ꞌ ŋwaa ŋwaa maa vənu vənshə, laa mə faŋ mə fɨꞌtə nu Nwi tɨ́ vɨɨ nə, kee gu jɨɨ me.

Vənu mbɨə faŋ mbə nə gày taa ŋwaa vɨɨ Isirayl, lùu vəshwenə tɨ́ nsiŋ

¹Vaŋ-nshwi vaŋ, mə kəə laa ŋkə lùu kəley tɨ́ viŋ laa vənu mbɨə faŋ mbə nə gày maa vətɨɨ via, vɨɨ Isirayl, faŋ vəŋ nəə toꞌ bèꞌsə Mose taa tɔɔ waꞌsə. Mbɔꞌ yimɔ́ꞌ nə shìinə vəŋ vənshə, dəsə jɨɨ tɨ́ vəŋ. Nə luu nshɨ-tɔ Nwi taa mbɔꞌ yɔ́. Vəŋ vənshə nə tɔ̀ŋ mamuu fɨ nsi, ²faŋ vəŋ nəə shɔɔ fɨ ŋiꞌ mbɔꞌ yɔ́. Faŋ vəŋ nə shɔ̀ɔ fɨ taa mamuu nə, ŋkə lùu laa vəŋ vənshə nə fì muu nɨniŋ, fàynə gù fa kəmuꞌ ghɔ vɨ Mose. ³Vəŋ vənshə nə zɨ̀ fazɨ ŋkɨə faŋ ŋkə nə ndɔ̀ fɨ ghɔ Nwi. ⁴Vəŋ vənshə nə nù muu mbɨə faŋ Nwi nə kɔ̀ tɨ́ vəŋ. Muu mbɨə faŋ vəŋ nə nu nə, nə fùu fɨ taa kweꞌ njyə faŋ ghɔ vɨ kweꞌ ghɔ́ nəə toꞌ mɔ́ꞌ nə. Kweꞌ ghɔ́ nə luu Yeso Kristo.

⁵Faŋ Nwi nə kɔlə tù mənɔŋ-bwaŋnə tɔ vəŋ yaŋ nə, vəŋ vəyaŋ nə yɨ̀sə vənu faŋ mbə nə kee bàw tɨ́ Nwi me. Nɨniŋ, too Nwi nə kee bàw maa vɨɨ vəyaŋ fɨ taa ŋwaa vəŋ me. Ŋwə yɨsə vəŋ kukə taa tɔɔ waꞌsə. ⁶Vənu və ywaŋ-vɨsɨ vɔ́, lùu vəshwenə tɨ́ nsiŋ laa, kɨ nsiŋ kɨ kwaŋ fwi maa vənu vəbwəvə me, faŋ vətɨɨ via nəə yɨsə ywaŋ-vɨsɨ nə. ⁷Ŋkee fɨshi vəŋ nəə bəŋsə vənwi vədayday, faŋ vɨ nyɔ̀ꞌ taa ŋwaꞌlə Nwi laa,

«Vɨɨ vɔ́ nə dùꞌ nsi, zɨ̀ fazɨ, nù muu fɨ ghɔ Nwi,

kɨ nii baa ndɔ̀ ghày vəghay, bə̀ŋ vəbəŋ.» 10.7 Eksodɔs 32.6. Kɨ viŋ kɨ yɨsə nɨniŋ me. Kɨ viŋ bəŋsə vənwi vədayday faŋ vəŋ nəə bəŋsə nə me. ⁸Nə luu maa yighee yɔ́, vəŋ nəə yɨsə vənu vəbwəvə, shi ghɔ vəki. Nwi kɨ nii yɨ̀sə vɨɨ kukə wə ŋkaŋsə njɔsə-tia muu-mbɔɔ maa shi kəmuꞌ. Nɨniŋ, kɨ nsiŋ baa kɨ yɨsə vənu vəbwəvə me, faŋ vəŋ nəə yɨsə nə me. ⁹Nə luu maa yighee yɔ́, vɨɨ vəmɔ́ꞌ nəə mɔŋ Nwi maa məye nu ŋkɨə faŋ Nwi taa yɨsə. Buꞌ nɨniŋ, Nwi yɨsə zɔsə ndɔmə vəŋ, vəŋ kukə. Gə fɨ maa nsiŋ, kɨ nsiŋ mɔŋ Nwi me. ¹⁰Yighee vɨsɨ vəŋ nəə lulə tɨ́ Nwi, buu Nwi tɔŋ wuu məzwilə vɨɨ laa ŋwə jwi zwìlə vəŋ. Nɨniŋ, kɨ nsiŋ kɨ lulə faŋ vəŋ nəə lulə nə me. ¹¹Vənu mbɨə faŋ mbə nə gày maa vɨɨ vɔ́ yighee vɨsɨ nə, lùu shwenə tɨ́ vɨɨ laa vəŋ kɨ tɔfə. Vɨ nə nyɔ̀ꞌ taa ŋwaꞌlə maa məyɨ laa nsiŋ kɨ̀ɨ fɨ ntaŋ, faŋ nsiŋ shì maa yighee nyə̀ faŋ vəndwə və mbi lùu nshənə. ¹²Nɨniŋ, wə faŋ ŋwə bɨꞌtə laa yi tɨ̀ŋ jəə, bàw ŋwə kɨ kɨɨ, baa tɔfə laa, kɨ məmɔŋ taa kɨ jwi, ŋwə gu me. ¹³Viŋ kee ta kɨɨ nə wutə məmɔŋ me. Tuu məmɔŋ kee ta jwì maa viŋ, faŋ ŋwə nə kee lùu nu wə mənsaw me. Luu nə, Nwi lùu wuu yinsəŋ. Kaꞌ Nwi kee biŋ laa məmɔŋ ŋii maa viŋ me, faŋ kaꞌ viŋ kee taa ghɔꞌ nu kɔ́ me. Faŋ məmɔŋ ŋii viŋ, buu ŋwə taa kɔ wutə tɨ́ viŋ laa viŋ tɨŋnə weꞌ, tɨ́ kɨ kaꞌ viŋ ghɔ̀ꞌ məmɔŋ ghɔ́.

Kɨ viŋ kii nu maa məyɨsə nə vənwi vədayday me

¹⁴Vɨɨmba vaŋ faŋ mə kàw, lùu nu ŋkɨə faŋ mə naysə tɨ́ viŋ, laa kɨ viŋ kii nu maa məyɨ nə vənwi vədayday me. ¹⁵Viŋ lùu vɨɨ yitɔfə, bàw viŋ ywiitə maa nshɨ-tɔ wiŋ laa nu ŋkɨə faŋ mə gisə feenə, lùu yinsəŋ mu. ¹⁶Maa yighee njyə faŋ nsiŋ yaa kɨ zɨ fazɨ Mbɔŋ, nsiŋ yaa kɨ bwaŋ Nwi maa ndaw məluꞌ. Faŋ nsiŋ nu məluꞌ mbɔ́, nsiŋ vɨ Yeso Kristo faynə gù fa kəmuꞌ taa mənshi ŋwə. Faŋ nsiŋ bɨ̀ꞌ bee zɨ, nsiŋ faynə nsiŋ vɨ ŋwaa Kristo. ¹⁷Faŋ nsiŋ zɨ̀ bee kɔ́ nə, bee kɔ́ faŋ nsiŋ zɨ, luu sheꞌ ghɨsə bee muꞌ. Ŋkə də̀ laa nsiŋ, faŋ nsiŋ kɔlə lùu vəyaŋ nə, nsiŋ lùu sheꞌ fa kəmuꞌ, buꞌ faŋ nsiŋ vənshə zɨ sheꞌ fɨ maa ghɨsə bee muꞌ. ¹⁸Viŋ bɨꞌtə nu kɔ̀ŋ nshinə vɨɨ Jus. Taa ŋwaa vəŋ, vɨɨ mbɨə faŋ vəŋ kɔ Nwi, yaa kɨ kwə fɨ maa mbasə ndey faŋ vɨ fèꞌ Nwi shɔ nə. Faŋ vəŋ kwə̀ mbasə ghɔ́ nə, vəŋ fàynə ghɔ vɨ Nwi, faŋ lùu wə ntɨə faŋ vɨ feꞌ nə. ¹⁹Ŋkə də̀ laa kə? Ŋkə lùu laa vənwi vədayday lùu fa mu? Mbasə ŋgwə faŋ vɨ fèꞌ vənwi vɔ́ shɔ nə, lùu fa faŋ ŋkə kìi wutə mu? ²⁰Bey, ŋkə kee lùu nɨniŋ me. Nu ŋkɨə faŋ mə kəə gi, lùu laa, vɨɨ mbɨə faŋ vəŋ kee kɨ̀ɨ nə Nwi me, feꞌ ndey, buu vəŋ kɔ məfeꞌ ghɔ́ lùu tɨ́ vəzwitə vəbwəvə, vəŋ kee feꞌ lùu Nwi me. Nɨniŋ, mə kee kàw laa viŋ kɨ faynə viŋ vəzwitə vəbwəvə me. ²¹Jɨɨ kee lùu shɔ, tɨ́ kaꞌ viŋ nu məluꞌ taa ndaw Yeso Kristo, baa kìasə nu məluꞌ fɨ taa ndaw zwitə bwə me. Sheꞌ nɨniŋ, jɨɨ kee lùu shɔ, tɨ́ kaꞌ viŋ zɨ̀ fazɨ taa ŋii Nwi, baa kìasə zɨ̀ fazɨ taa ŋii zwitə bwə me. ²²Nsiŋ kɨ ndi yighee buꞌ nsiŋ yɨ̀ nu faŋ njyoꞌ tɨta Yeso taa lia maa nsiŋ. Viŋ nə bɨꞌtə laa nsiŋ kìi wutə shɔ̀ɔ ŋwə mu?

Ntɨsə kɔ̀ŋ məzɨ fazɨ

²³Viŋ gisə laa, nu kee lùu shɔ faŋ ŋkə fə̀ŋ viŋ me. Lùu yinsəŋ nɨniŋ. Luu nə, lùu yinsəŋ nɨzi laa vənu vəmɔ́ꞌ shɔ faŋ mbə kee ndɔ gaŋtə vɨɨ me. Lùu yinsəŋ laa nu kee fəŋ viŋ me, luu nə, vənu vəmɔ́ꞌ shɔ faŋ mbə ndɔ yɨsə laa kɨ viŋ weꞌ maa vənu və Nwi me. ²⁴Bàw wə kɨ faꞌ maa jɨɨ njyə faŋ nyə taa gaŋtə vɨɨ mɔ́ꞌ. Kɨ ŋwə kɨ yɨsə vənu faŋ mbə taa gaŋtə sheꞌ ŋwə me. ²⁵Viŋ kɨ ywaŋ mbasə fɨ taa yiwiŋ, kee bitə laa ŋwə sii ndɔ fɨ fə me? Kɨ kəŋ vətɔ ghɔ́ kɨ kɔ ghaysə taa fwisə viŋ me. ²⁶Mə gì nɨniŋ buꞌ laa vɨ nyɔ̀ꞌ taa ŋwaꞌlə Nwi laa, «Kìi Nwi kìi mbi yinshə ŋkwəŋ, nə vətɔ vənshə faŋ mbə lùu taa mbi yɔ́ kìi Nwi vənshə.» 10.26 Sam 24.1.²⁷Kɨ ghaŋ wə faŋ kee lùu wuu Nwi me, tii viŋ laa viŋ yi zɨ, viŋ biŋ, zɨ̀ fazɨ ŋkɨə faŋ ŋwə kɔ̀ tɨ́ viŋ. Kɨ fwi ghaysə viŋ me, laa lùu nu jəə mu, tɨꞌnə me nu bwə mu. ²⁸Kɨ luu viŋ luu yifi, wə mɔ́ꞌ jwi, gì tɨ́ viŋ laa, fazɨ ŋkɨə faŋ vɨ kɔ̀ tɨ́ viŋ laa viŋ zɨ, vɨ kɔ̀ tɨ́ vənwi maa ndey, kɨ viŋ baa zɨ fazɨ kɔ́ me. Nɨniŋ laa kɨ viŋ yɨsə nu faŋ wə mɔ́ꞌ taa bɨꞌtə laa lùu nu bwə me, buꞌ ŋkə taa kɔ ghaysə taa fwi wə ghɔ́. ²⁹Luu buꞌ mbɨꞌtə wə ghɔ́ faŋ viŋ mèꞌtə fazɨ kɔ́, kee luu buꞌ mbɨꞌtə yiŋ me. Faŋ ŋkə lùu nɨniŋ nə, kaꞌ wə mɔ́ꞌ gì laa, «Sii yɨ̀ kə laa mbɨꞌtə wə dɨday sɔꞌ mə?» ³⁰baa nə laa, «Mə kɨ luu bwaŋ Nwi maa fazɨ ŋkɨə faŋ mə zɨ̀, sii kaꞌ wə mɔ́ꞌ kɨ sɔꞌ mə shɔ kɨkə?» ³¹Mə bəŋsə tɨ́ kəŋ wə ghɔ́ laa, bàw viŋ kɨ bəŋsə sheꞌ Nwi maa vənu vənshə faŋ viŋ yɨsə. Yighee njyə faŋ viŋ zɨ fazɨ, tɨꞌnə me nu fa, tɨꞌnə me yɨ nu mɔ́ꞌ, viŋ kɨ yɨsə maa jɨɨ njyə faŋ nyə taa kɔ feenə tɨ́ Nwi. ³²Kɨ kɨɨ buꞌ viŋ yɨ nu faŋ ŋkə taa yɨ laa fwi wə shə. Kɨ luu wə ghɔ́ lùu wuu Jus, tɨꞌnə me wuu tɔmə day, tɨꞌnə me wuu Nwi, kɨ viŋ yɨsə fwi yi shə me. ³³Nshɨ-tɔ ŋwaa kəə laa mə kɨ bawsə fwisə vɨɨ vənshə maa vənu vənshə faŋ mə yɨsə. Mə kee bɨꞌtə sheꞌ nu faŋ ŋkə taa gaŋtə mə nɨnɔŋ me; mə bɨꞌtə nu faŋ ŋkə taa gaŋtə vɨɨ vəyaŋ, tɨ́ kaꞌ mə ndɨ vəŋ, jwì nə vəŋ tɨ́ Nwi, tɨ́ vɨ kɔ Nwi bwèysə vəŋ.

¹Bàw viŋ kɨ faꞌ sheꞌ faŋ mə faꞌ, buꞌ faŋ mə baa luu fàꞌ sheꞌ yaa Kristo.

Nshinə njyə faŋ nyə kùꞌnə taa nshəŋtə vɨɨ Nwi

²Mə bəŋsə viŋ dɨdɨꞌ, buꞌ laa viŋ lumə yigisə nyaa yinshə, baa bèꞌsə vənu mbɨə faŋ mə nə dèesə viŋ shɔ nə. ³Luu nə, nu mɔ́ꞌ lùu shɔ faŋ mə kəə tɨ viŋ, laa Kristo lùu tɔ tɨ́ vəndɔŋ vənshə, wəndɔŋ luu tɔ tɨ́ wəzwi; Nwi lùu tɔ tɨ́ Kristo. ⁴Wəndɔŋ faŋ ŋwə shɔꞌtə Nwi, baa nə faŋ ŋwə gi yigi faŋ nyə ndɔ̀ fɨ ghɔ Nwi, kɨ ŋwə shitə tɔ ki me, buꞌ ŋwə kee kɨ kɔ feenə tɨ́ Kristo faŋ lùu tɔ ki nə me. ⁵Gə fɨ maa wəzwi, ŋkə bàw laa wəzwi ka tɔ ki faŋ ŋwə fɨꞌtə nu Nwi, tɨꞌnə me shɔꞌtə Nwi. Ŋkə kee lùu nɨniŋ me, buu ŋkə lùu laa ŋwə kee zɔnə ndəə wi faŋ lùu tɔ ki nə me. Wəzwi faŋ ŋwə kee kaw ka tɔ ki me, luu sheꞌ yaa wəzwi faŋ ŋwə kɔ̀ŋ tɔ ki, tòꞌ yaa wəndɔŋ. ⁶Kɨ luu wəzwi gi laa yi kee taa ka tɔ ki me, bàw ŋwə swey tɔ ki. Nsiŋ kɔꞌ kɨɨ laa lùu nu tɔ dɨɨ tɨ́ wəzwi maa məswey tɔ ki, tɨꞌnə me maa məshetə ŋkə tuŋsə. Nɨniŋ, bàw ŋwə ka tɔ ki nə njwi məka tɔ, shìtə. ⁷Nu ŋkɨə faŋ ŋkə kee bàw tɨ́ wəndɔŋ maa məshitə tɔ ki me, lùu laa, Nwi nə bɔ̀ŋ wəndɔŋ maa ŋkɨꞌnə Nwi. Nɨniŋ, ŋwə fɨnə Nwi, kìi wutə fɨ ghɔ Nwi. Gə fɨ maa wəzwi, ŋwə kìi yifasə ndəə wi. ⁸Viŋ kɔꞌ kɨɨ laa, lùu ŋwaa wəndɔŋ faŋ Nwi nə ndɨ̀, bɔ̀ŋ wəzwi shɔ. Nwi nə kee ndɨ̀ fɨ maa ŋwaa wəzwi, buu bɔŋ wəndɔŋ shɔ me. ⁹Nwi nə bɔ̀ŋ wəzwi buꞌ wəndɔŋ; Nwi nə kee bɔ̀ŋ wəndɔŋ buꞌ wəzwi me. ¹⁰Nɨniŋ, ŋkə bàw laa wəzwi kɨ shitə tɔ ki maa mədə tɨ́ nshiisə-ŋiisə Nwi laa ŋwə lùu ŋiꞌ wəndɔŋ.

¹¹Luu nə, taa ŋwaa vɨɨ Nwi, faŋ nsiŋ fàynə ghɔ vɨ Yeso Kristo, wəndɔŋ kee lùu shɔ nɨnɔŋ wi me, wəzwi kee lùu shɔ nɨnɔŋ wi me. Vəŋ lùu sheꞌ yaa fa kəmuꞌ. ¹²Ŋkee fɨshi Nwi nə ndɨ̀ ghutə wəndɔŋ, bɔ̀ŋ wəzwi shɔ. Luu nə, bì wəzwi bì wəndɔŋ. Ŋkə lùu laa wəzwi ndɔ̀ fɨ ghɔ wəndɔŋ, wəndɔŋ ndɔ fɨ ghɔ wəzwi. Luu nə, nsiŋ kɨ lumə laa vətɔ vənshə ndɔ fɨ ghɔ Nwi. ¹³Bàw viŋ shia nu kɔ́ maa nshɨ-tɔ wiŋ. Ŋkə bàw laa wəzwi ndɔ shɔꞌtə Nwi, faŋ ŋwə kee fɔŋ shìtə tɔ ki yimu? ¹⁴Maa vɨɨ biŋ laa Nwi nə bɔ̀ŋ vətɔ, wəndɔŋ kɨ luu kìi nyuŋsə sədə, buu lùu nu tɔ dɨɨ. ¹⁵Luu nə, gə fɨ maa kwiŋ vəki, nyuŋsə dəsə lùu nu vəlɔꞌ baa lùu nu kwalə tɨ́ wəzwi, buꞌ laa Nwi kɔ̀ nyuŋsə dəsə tɨ́ ŋwə, nsə luu tɨ́ ŋwə yaa njwi məka tɔ. ¹⁶Wə lùu shɔ faŋ ŋwə kee bìŋ vənu və̀ me, bàw ŋwə kɨɨ laa, nshinə yia nə nshinə vɨɨ Nwi fɨ vəshəŋ vəshəŋ lùu laa wəzwi kɨ shitə tɔ ki.

Ntɨsə kɔ̀ŋ fazɨ Mbɔŋ

(Matiu 26.26-29; Mark 14.22-25; Lukas 22.15-20)

¹⁷Nu mɔ́ꞌ baa lùu shɔ faŋ mə taa tɨ viŋ nə ŋkə. Lùu nu faŋ kaꞌ mə kee bə̀ŋsə viŋ shɔ me. Yighee njyə faŋ viŋ yaa kɨ faynə shəŋ muꞌ maa məshɔꞌtə Nwi, ŋkə yaa kɨ jwi nə nu bwə, shɔ̀ɔ nu jəə. ¹⁸Mfɔŋ ŋɨꞌ lùu laa, mə zɔ̀ laa taa məshəŋtə wiŋ faŋ viŋ faynə maa nu Nwi, viŋ kee lùu nə fa kəmuꞌ me. Viŋ gaasə vəway vəway. Way wì lùu shee yaa lùu yigisə yinsəŋ faŋ mə zɔ̀ kɔ̀ŋ viŋ nə. ¹⁹Ŋkə bàw faŋ ŋgaasə fuu taa ŋwaa viŋ, tɨ́ kaꞌ vɨ taa ye vɨɨ mbɨə faŋ vəŋ nùŋ fwi maa Yeso Kristo maa yinsəŋ. ²⁰Mə baa zɔ laa yighee njyə faŋ viŋ yaa kɨ baytə shəŋ muꞌ maa məzɨ fazɨ, kee lùu fazɨ Nwi faŋ viŋ zɨ me. ²¹Mə gì nɨniŋ buꞌ laa, faŋ viŋ zɨ nə, wə mɔ́ꞌ gə vɨsɨ, zɨ̀ ŋkii fazɨ. Buꞌ nɨniŋ jɨŋ kɨ zasə wə muꞌ, tɨ́ wə mɔ́ꞌ nu, mbə shɔɔ sɨ ŋwə. ²²Kəŋ nshinə yɔ́ kee yikuꞌnə me. Ndɔꞌ ghiŋ shɔ faŋ kaꞌ viŋ zɨ baa nu. Sii yɨ̀ kə buu viŋ kɨ shiasə ŋii Nwi, baa mɔꞌ tɔ dɨɨ tɔ vɨɨ mbɨə faŋ vəŋ kee kìi fa me? Sii kaꞌ mə gì kə tɨ́ viŋ? Nə kaꞌ mə bəŋsə viŋ mu, faŋ viŋ kìi kəŋ nshinə yɔ́ nee nə mu? Bey, kaꞌ mə kee bəŋsə viŋ me tuu tɨtiꞌ.

²³Gə fɨ maa nu fazɨ Mbɔŋ, mə nə kɨ̀ɨ nə ŋkə fɨ ghɔ tɨta Yeso Kristo. Mə baa luu ndɨ̀, kɨ dəsə tɨ́ viŋ. Ŋkə lùu laa, Nə luu vətuꞌ maa shi ŋkɨə faŋ vɨ nə fìŋ tɨta Yeso nə, ŋwə nə ndɨ̀ bee, ²⁴bwàŋ Nwi, bɨꞌ, gì laa, «Lùu ŋwaa ŋwaa nə, faŋ mə kɔ̀ tɨ́ viŋ. Viŋ kɨ yɨsə nee maa məlumə mə!» ²⁵Faŋ vəŋ nə zɨ, tɨta Yeso baa ndɨ̀ ndaw məluꞌ, gì laa, «Ndaw nyə̀ lùu shwenə məkee məfimə faŋ Nwi gwìa tɨ́ vɨɨ buꞌ mənshi maa. Viŋ taa kɨ yɨsə nɨniŋ ghee nshə faŋ viŋ nu məluꞌ mbɔ́ nə. Nɨniŋ maa məlumə mə.» ²⁶Yighee tɨ̀ me yighee faŋ viŋ zɨ bee kɔ́, baa nu məluꞌ mbɔ́, buu viŋ fɨꞌtə tɨ́ vɨɨ laa tɨta Yeso nə kù tɔ nsiŋ. Viŋ yɨ nɨniŋ, kɔ̀ tɨ́ yighee njyə faŋ tɨta Yeso ndɔ bəŋ jwi.

²⁷Buꞌ nɨniŋ, wə kɨ luu zɨ fazɨ Mbɔŋ, ndɔ baa nù məluꞌ faŋ lùu məluꞌ mə tɨta Kristo, yɨsə maa jɨɨ faŋ nyə kee yikuꞌnə me, ŋkə də̀ laa ŋwə shiasə ŋwaa tɨta Kristo nə mənshi mi. ²⁸Nɨniŋ, wə tɨ̀ me wə faŋ ŋwə gì laa yi taa zɨ fazɨ Mbɔŋ, ndɔ nù məluꞌ mə tɨta Kristo, bàw ŋwə bɨ fɔŋ ndèynə ŋwaa wi, buu zɨ fazɨ kɔ́. ²⁹Viŋ kɔꞌ kɨɨ laa wə ntɨə faŋ ŋwə zɨ̀ fazɨ Mbɔŋ, nù fɨ taa ndaw Kristo nə fwi yibwə, buu ŋwə tii nsɔꞌ Nwi tɔ ŋwə, buꞌ laa ŋwə kee kɨ̀ɨ nə ŋiꞌ yiku tɨta Kristo me. ³⁰Lùu ŋiꞌ nu ŋkɨə faŋ ŋkə yɨ̀ laa vɨɨ lùu vəyaŋ taa ŋwaa viŋ faŋ vəŋ zɨzasə, tɨꞌnə me kee kìi wutə me, tɨꞌnə me kukə. ³¹Nsiŋ kɨ luu ndeynə yiŋwaa nyaa-nsiŋ faŋ nsiŋ dùꞌ, buu zɨ fazɨ kɔ́, buu nsiŋ kee baa gù nsɔꞌ Nwi me. ³²Nu ŋkɨə faŋ Nwi yuu kɨ kwaŋ nsiŋ taa nsɔꞌ, lùu laa Nwi kəə də̀ tɨ́ nsiŋ laa nsiŋ gù vənu, tɨ́ kaꞌ nsiŋ kwìinə fwi saŋ-nsiŋ, kee ndɔ baa ŋìi taa nsɔꞌ Nwi maa shi ŋkɨə faŋ Nwi ndɔ kɨ sɔꞌ mbi yinshə, ndìsə vɨɨ bwənə vənshə me.

³³Nɨniŋ, vaŋ-nshwi vaŋ, mə naysə tɨ́ viŋ laa, yighee njyə faŋ viŋ taa faynə shəŋ muꞌ maa məzɨ fazɨ, viŋ duꞌ, kɨ̀ꞌ vəliŋ viŋ, buu tey kɨ zɨ. ³⁴Jɨŋ kɨ luu kɨ zasə wə mɔ́ꞌ, bàw ŋwə bɨ zɨ̀ fazɨ taa ŋii ŋwə ŋkəə, buu jwì, tɨ́ kaꞌ məshəŋtə wiŋ kee lùu maa jɨɨ njyə faŋ kaꞌ Nwi kwàŋ viŋ taa nsɔꞌ me. Gə fɨ maa vənu vəmɔ́ꞌ, mə taa tɨ viŋ shɔ faŋ mə taa jwi yɨ viŋ.

Vəfaꞌ və Zwitə Nwi taa ŋwaa vɨɨ Nwi

¹Nu mɔ́ꞌ lùu shɔ faŋ mə kee kàw laa viŋ duꞌ nshi buꞌ ŋkə maa kɨɨ me. Mə kəə twelə vənu tɨ́ viŋ kɔ̀ŋ vəwutə mbɨə faŋ Zwitə Nwi yaa kɨ kɔ tɨ́ vɨɨ nə. ²Viŋ lumə laa yighee vɨsɨ, faŋ viŋ nə kee ta lùu vɨɨ Kristo me, vəzwitə vəbwəvə nəə suŋtə viŋ laa viŋ kɨ beꞌsə vənwi vədayday faŋ kaꞌ mbə kee bee gì me. ³Nɨniŋ, bàw ŋkə ley tɨ́ viŋ laa, kɨ luu sɔ̀ꞌ Zwitə Nwi sɔ̀ꞌ wə, buu kaꞌ wə ghɔ́ kee ndà Yeso me. Gə fɨ maa wə faŋ ŋwə gì laa Yeso lùu tɨta wi, kaꞌ ŋwə kee gì nɨniŋ me, tɨ̀ lɨꞌ laa Zwitə Ley Nwi yiba jɨŋ ŋwə me.

⁴Vənu mbɨə faŋ Zwitə Nwi kɔ wutə tɨ́ vɨɨ laa vəŋ kɨ yɨsə, lùu nɨŋkwiŋ nɨŋkwiŋ. Luu nə, Zwitə Nwi kɔ́ luu sheꞌ kəmuꞌ. ⁵Vəfaꞌ faŋ vɨɨ faꞌ tɨ́ Yeso lùu nɨŋkwiŋ nɨŋkwiŋ nɨzi. Luu nə, tɨɨ faꞌ vəŋ luu sheꞌ muꞌ, lùu tɨta Yeso. ⁶Jɨɨsə faŋ vɨɨ fàꞌ vəfaꞌ maa wutə Nwi lùu nɨŋkwiŋ nɨŋkwiŋ. Luu nə, Nwi faŋ ŋwə kɔ̀ wutə kɔ́ tɨ́ vɨɨ vənshə laa vəŋ kɨ faꞌ vəfaꞌ vɔ́ vənshə nə, luu sheꞌ Nwi ghɔ́ muꞌ. ⁷Zwitə Nwi yaa kɨ dəsə nu tɨ́ wə tɨ̀ me wə, sheꞌ laa wə ghɔ́ taa kɨ gaŋtə vɨɨ Nwi vənshə nə nu kɔ́. ⁸Wə mɔ́ꞌ kìi yigisə tɔ-ley faŋ kɔ̀ Zwitə Nwi tɨ́ ŋwə. Wə mɔ́ꞌ kɨɨ gi kɔ̀ŋ nu Nwi ŋkee jəə, faŋ də̀ sheꞌ Zwitə Nwi kɔ́ də̀ nu kɔ́ tɨ́ ŋwə nɨzi. ⁹Wə mɔ́ꞌ baa lùu shɔ faŋ Zwitə Nwi kɔ̀ wutə tɨ́ ŋwə, tɨ́ kaꞌ ŋwə nùŋ fwi yi maa Yeso Kristo, wèꞌ shɔ. Wə mɔ́ꞌ kii ŋkee wutə fɨ ghɔ Zwitə Nwi kɔ́ maa məshuꞌ vəza fɨ maa vɨɨ. ¹⁰Wə mɔ́ꞌ baa lùu shɔ faŋ Nwi kɔ̀ wutə tɨ́ ŋwə maa məyɨsə vənu və shuu yɔŋvə. Wə mɔ́ꞌ kii wutə maa məfɨꞌtə yigisə Nwi faŋ Nwi də̀ tɨ́ ŋwə. Wə mɔ́ꞌ kii wutə maa məkɨɨ nə vəzwitə və vɨɨ, laa mbə ndɔ̀ fɨ ghɔ Nwi mu. Wə mɔ́ꞌ baa lùu shɔ faŋ ŋwə kìi wutə maa məgi təghaŋ faŋ nshɨ-tɔ wə ghɔ́ kee bee ta zɔ̀ ghaŋ ghɔ́ me. Wə mɔ́ꞌ shɔ faŋ Nwi kɔ̀ wutə tɨ́ ŋwə, tɨ́ kaꞌ ŋwə kɨ twelə ŋiꞌ təgi təghaŋ tɔ́ tɨ́ vɨɨ. ¹¹Vənu vɔ́ vənshə ndɔ sheꞌ fɨ ghɔ Zwitə Nwi kɔ́ kəmuꞌ, faŋ ŋkə kɔ wutə tɨ́ vɨɨ maa məyɨsə vənu vɔ́. Ŋwə kɔ wutə tɨ́ wə tɨ̀ me wə nɨŋkwiŋ nɨŋkwiŋ, faŋ ŋkə bàw too Zwitə Nwi kɔ́.

¹²Nsiŋ kɔꞌ kɨɨ laa ŋwaa wə kìi vəlaŋ vəlaŋ. Luu nə, ŋwaa ghɔ́ luu sheꞌ muꞌ. Vəlaŋ vɔ́ vənshə faŋ mbə lùu nɨŋkwiŋ nɨŋkwiŋ nə, fàynə shəŋ muꞌ, lùu ŋwaa muꞌ. Luu sheꞌ nɨniŋ taa ŋwaa vɨɨ Kristo. Nwi nə kɔ̀ Zwitə ki kəmuꞌ tɨ́ nsiŋ vənshə, faŋ nsiŋ nə fì muu mə Nwi. Nɨniŋ, nsiŋ gù fa kəmuꞌ, lùu yaa ŋwaa wə muꞌ. ¹³Faŋ nsiŋ kɔlə lùu nɨŋkwiŋ nɨŋkwiŋ nə, faŋ vɨɨ mɔ́ꞌ lùu vɨɨ Jus, vəmɔ́ꞌ lùu vɨɨ Griik, vɨɨ mɔ́ꞌ baa lùu vəbuꞌ, vɨɨ mɔ́ꞌ kee lùu vəbuꞌ me, nsiŋ vənshə nə fì Zwitə Nwi kɔ́ kəmuꞌ. ¹⁴Taa ŋwaa wə, vəlaŋ shɔ vəyaŋ nɨŋkwiŋ nɨŋkwiŋ, kee luu sheꞌ fa kəmuꞌ faŋ ŋkə lùu maa ŋwaa ghɔ́ me. ¹⁵Kɨ ghaŋ laa ghuu wə gì laa, «Mə kee lùu kwiŋ me; buꞌ nɨniŋ mə kee lùu laŋ fɨ maa ŋwaa wə me,» kaꞌ ŋkə kee yɨ̀sə laa ŋkə kee baa lùu laŋnə ŋwaa wə me. ¹⁶Kɨ luu tuulə wə gì laa yi kee lùu laŋnə ŋwaa me, buꞌ laa yi kee lùu yisɨ me, kaꞌ ŋkə kee yɨsə laa ŋkə kee baa lùu laŋnə ŋwaa wə me. ¹⁷Ŋkə nii toꞌ luu laa, luu sheꞌ yisɨ faŋ nyə yɨsə buu ŋwaa wə lùu shɔ, buu kaꞌ wə ghɔ́ kɨ zɔ vənu kɨkə? Kɨ luu laa sheꞌ tuulə faŋ ŋkə yɨsə buu ŋwaa wə luu shɔ, buu kaꞌ wə ghɔ́ luŋsə fa kɨkə? ¹⁸Yinsəŋ, Nwi nə kee bɔ̀ŋ yiŋwaa nyaa-nsiŋ sheꞌ ŋkwəŋ me. Nwi nə ndɨ̀ vəlaŋ faŋ mbə lùu nɨŋkwiŋ nɨŋkwiŋ, bɔ̀ŋ ŋwaa wə shɔ, nùŋsə laŋ tɨ̀ me laŋ maa shəŋ ki, sheꞌ faŋ Nwi nə kàw. ¹⁹Laŋnə ŋwaa wə nəə toꞌ luu sheꞌ kəmuꞌ, buu ŋwaa wə kee lùu shɔ me. ²⁰Luu nə, vəlaŋ və ŋwaa vaŋ-nsiŋ lùu nɨŋkwiŋ nɨŋkwiŋ; ŋwaa ghɔ́ luu sheꞌ muꞌ. ²¹Buꞌ nɨniŋ, kaꞌ yisɨ wə kee gì tɨ́ ghɔ ki laa, «Mə kee kìi nu maa məyɨ nə ghɔ me.» Kaꞌ tɔ wə kee gì tɨ́ ghuu ki laa yi kee kəə ŋkə me. ²²Kaꞌ way ŋwaa kəmɔ́ꞌ kee gì tɨ́ kəmɔ́ꞌ nɨniŋ me, buꞌ laa ŋkee vəlaŋ və ŋwaa mbɨə faŋ mbə kee kìi wutə me, lùu mbə faŋ ŋwaa wə kəə mbə ghee nshə, buu wə kɨ shi, kìi məbwey. ²³Vəlaŋ və ŋwaa mbɨə faŋ vɨ bɨꞌtə laa mbə kee kìi nu me, bee kii lùu mbə faŋ vɨ kɔ̀ feenə tɨ́ mbə. Vəlaŋ mbɨə faŋ nsiŋ ye mbə laa mbə kee lùu vəjəə me, lùu mbə faŋ nsiŋ la ŋkee jəə. ²⁴Vəlaŋ və ŋwaa mbɨə faŋ mbə lùu vəjəə, tɨ́ kaꞌ vɨɨ kɨ ye, duꞌ sheꞌ nɨniŋ, vɨ kee là mbə me. Nshɨ-tɔ Nwi faŋ ŋwə bɔ̀ŋ ŋwaa wə, nùŋsə vəlaŋ və ŋwaa mbɨə faŋ mbə kee lùu nu me, maa shəŋ kəmɔ́ꞌ faŋ vɨ kɔ̀ feenə tɨ́ mbə. ²⁵Nwi nə yɨ̀ nɨniŋ laa ŋgaasə kee lùu maa ŋwaa me, vəlaŋ və ŋwaa bee kɨ kii gaŋtə yiŋwaa vəŋ, vəŋ vəŋ. ²⁶Kɨ luu laŋnə ŋwaa wə kəmuꞌ ye ŋɨꞌ, buu vəlaŋ və ŋwaa vənshə taa ye ŋɨꞌ nɨzi. Kɨ luu laŋ kəmuꞌ kii feenə, buu vəlaŋ vənshə taa kɨ ŋaytə nə laŋnə ŋwaa yiŋkii.

²⁷Gə fɨ maa viŋ, viŋ faynə shəŋ muꞌ maa mənaysə ŋwaa Kristo faŋ ŋwə lùu muꞌ. Wə tɨ̀ me wə fɨ taa ŋwaa viŋ lùu fɨ maa laŋnə ŋwaa Kristo kɔ́. ²⁸Fɨ taa ŋwaa vɨɨ Nwi, Nwi shòꞌ vɨɨ mɔ́ꞌ vɨsɨ laa vəŋ lùu vɨɨ ntɔŋsə Yeso Kristo, shoꞌ vɨɨ mɔ́ꞌ laa vəŋ kɨ naysə yigi faŋ Nwi kɔ̀ tɨ́ vəŋ, baa shòꞌ vɨɨ mɔ́ꞌ laa vəŋ kɨ deesə nu ki. Ŋwə baa shoꞌ vɨɨ mɔ́ꞌ laa vəŋ kɨ yɨsə vənu və shuu yɔŋvə, baa nə vɨɨ mɔ́ꞌ laa vəŋ kɨ shuꞌ vəza fɨ maa vɨɨ vəza, nə vɨɨ mɔ́ꞌ faŋ vəŋ gaŋtə vɨɨ, nə gwisə, nə vɨɨ faŋ vəŋ gisə təghaŋ nɨŋkwiŋ nɨŋkwiŋ. ²⁹Kaꞌ vɨɨ vənshə kee lùu vɨɨ ntɔŋ Kristo me. Kaꞌ vɨɨ vənshə kee lùu nshiisə-ŋii sɔghɔ me. Kaꞌ vɨɨ vənshə kee lùu vɨɨ mədeesə me. Nwi kee kɔ wutə tɨ́ vɨɨ vənshə maa məyɨ vənu və shuu yɔŋvə me. ³⁰Kee kìi vɨɨ vənshə kìi wutə maa məshuꞌ vəza fɨ maa vɨɨ vəza me. Kee lùu vɨɨ vənshə faŋ vəŋ gisə təghaŋ faŋ vəŋ kee ta yizwetə me. Kee lùu vɨɨ vənshə faŋ vəŋ kɨɨ twelə ŋiꞌ təgi təghaŋ tɔ́ me.

³¹Gə fɨ maa viŋ, viŋ tə sɨ laa Zwitə Nwi kɔ wutə tɨ́ viŋ laa viŋ kɨ yɨsə vənu vəkwalə fɨ maa vənu vɔ́ nə. Luu nə, mə kəə naysə nu mɔ́ꞌ tɨ́ viŋ faŋ ŋkə shɔ̀ɔ vənu vɔ́ vənshə.

Ŋkawnə kwàlə shɔ̀ɔ vənu vənshə

¹Mə nii kɔlə kìi wutə faŋ ŋkə yɨsə laa mə kɨ gisə təghaŋ faŋ vɨɨ gisə, nə ntɨə faŋ nshiisə-ŋiisə Nwi gisə, luu nə, kee kii ŋkawnə maa vɨɨ me, buu yigisə nyaa lùu yaa fəŋgəŋ faŋ vɨ buꞌ, mfə gisə, wə kee zɨzɔ me, baa lùu yuu mbɨŋlə faŋ nyə gisə tɨnsee tɨnsee. ²Mə kɔlə kìi wutə faŋ kaꞌ mə kɨ twelə yigisə shuu Nwi, tɨꞌnə me kɨɨ nə vənu vənshə faŋ mbə ndènə fɨ ghɔ vɨɨ, tɨꞌnə me kɨɨ nə nu Nwi laylay, tɨꞌnə me nùŋ fwi nyaa maa Nwi ŋkee dɨdɨꞌ, tɨ́ kaꞌ mə yɨ̀sə laa ŋkee baŋsə kwalə muꞌnə, mə nəə toꞌ kɨ̀ɨ nə vənu vɔ́ vənshə, luu nə, kee kìi ŋkawnə maa vɨɨ me, buu lùu nu dayday. ³Faŋ mə kɔlə ndɨ̀ vətɔ vaŋ vənshə, kɔ̀ tɨ́ mbəəsə, baa biŋ laa vɨ twaŋ ŋwaa ŋwaa taa wi, luu nə, kee kii ŋkawnə maa vɨɨ me, buu kaꞌ vənu vɔ́ vənshə kee gàŋtə mə nə nu me.

⁴Ŋkawnə yaa kɨ yɨsə wə kɨ jia fwi yi, baa kii njyoꞌ yijəə; ŋwə kee ghɨꞌ vɨɨ me, kee gisə yigi shuu yaŋnə me, kee koꞌsə ŋwaa me. ⁵Wə faŋ ŋwə kaw vɨɨ, kee yaa kɨ yɨ nu maa jɨɨ faŋ nyə kee yikuꞌnə me, kee ndeynə sheꞌ ŋwaa wi me; fwi yi kee yaa kɨ shə me; ŋwə kee yaa kɨ lumə nu bwə faŋ wə yɨ maa ŋwə me. ⁶Wə faŋ ŋwə kaw vɨɨ, kee yuu kɨ ŋaytə yighee njyə faŋ vɨɨ yɨsə nu bwə me; ŋwə yaa kɨ ŋaytə faŋ vɨɨ yɨsə nu yinsəŋ. ⁷Wə faŋ ŋwə kaw vɨɨ, kee yuu kɨ gisə kɔ̀ŋ bwə faŋ vɨɨ yɨsə me; ŋwə bee kii nuŋsə vənu vənshə sheꞌ ghɔ Nwi, bɨꞌtə laa Nwi taa yɨsə vənu vənshə fuu vəjəə. Fwi yi kee bwà maa nu tɨ̀ me nu me.

⁸Ŋkawnə kee yaa kɨ me me. Yighee jɨjwi faŋ vɨɨ kee taa baa twelə yigisə shuu Nwi me. Yighee jɨjwi faŋ vɨɨ taa kee baa kɨ gisə təghaŋ nɨŋkwiŋ nɨŋkwiŋ me. Yitɔfə vɨɨ taa mè nɨzi. ⁹Vənu vɔ́ ndɔ mè, buꞌ laa yitɔfə nyaa-nsiŋ kee yikuꞌ maa yitɔfə Nwi me. Yigisə shuu Nwi faŋ nsiŋ gisə nə, kee lùu yibɔŋsə me. ¹⁰Yighee njyə faŋ Nwi ndɔ yɨsə vənu vənshə fuu ntee sɨ vɨɨ, buu vənu vɔ́ faŋ mbə kee yikuꞌnə nə me, ndɔ mè. ¹¹Faŋ mə nəə kɨ bii wee, mə nəə gisə ghaŋ vaŋmbwaa, mbɨꞌtə nyaa nə luu mbɨꞌtə vaŋmbwaa; mə nəə ye vənu yaa wee yaa kɨ ye. Luu nə, faŋ mə nə gù wə, mə meꞌ vənu və vaŋmbwaa vɔ́ vənshə. ¹²Vənu faŋ nsiŋ ye ndwə, nsiŋ kee ye vəley me. Nsiŋ ye sheꞌ yaa vɨ ye taa ŋwaꞌlə məye sɨ, faŋ ŋwə kee lùu ley me. Ndɔ luu shi mɔ́ꞌ, nsiŋ ye Nwi nə sɨ nə sɨ. Ndwə yitɔfə nyaa-nsiŋ kee ta yikuꞌnə me. Ndɔ luu shi kɔ́, vənu vənshə luu vəley tɨ́ nsiŋ, sheꞌ faŋ Nwi kɨ̀ɨ nə nsiŋ maa vənu vənshə. ¹³Vənu lùu shɔ vətia faŋ kaꞌ mbə kee ndɔ mè me. Nu kəmuꞌ lùu laa nsiŋ kɨ nuŋ fwi saŋ-nsiŋ maa Nwi. Nu mɔ́ꞌ lùu məbwey vəlwaŋ faŋ nsiŋ kɨꞌ fɨ ghɔ Nwi nə. Nu lwesə vətia luu ŋkawnə. Fɨ maa vənu və̀ vətia nə, nu ŋkawnə kwàlə shɔ̀ɔ vənu vɔ́ vənshə.

Yigi kɔ̀ŋ vəkɔ mbɨə faŋ Zwitə Nwi kɔ̀ tɨ́ vɨɨ nə

¹Nɨniŋ, bàw viŋ kɨ kəə jɨɨsə laa ŋkawnə luu taa ŋwaa viŋ. Luu nə, viŋ buꞌ ghɔ tɨ́ Nwi nɨzi, laa ŋwə kɔ vəkɔ və Zwitə Nwi tɨ́ viŋ. Nu ŋkɨə faŋ ŋkə lùu kəkwalə taa ŋwaa vəkɔ vɔ́, lùu laa Zwitə Nwi kɔ wutə tɨ́ viŋ maa məfɨꞌtə yigisə shuu Nwi. ²Wə faŋ Zwitə Ley Nwi kɔ̀ wutə tɨ́ ŋwə maa məgi təghaŋ nɨŋkwiŋ nɨŋkwiŋ, ŋwə gisə lùu tɨ́ Nwi, kee lùu tɨ́ vɨɨ me, buꞌ laa kaꞌ vɨɨ kee zɔ̀ ghaŋ wi me. Ŋwə gisə vənu faŋ mbə ndènə fɨ ghɔ vɨɨ. ³Luu nə, wə faŋ ŋwə fɨꞌtə yigisə shuu Nwi, ŋwə gisə yigi yɔ́ tɨ́ vɨɨ, yigi yi yɔ́ ndɔ gaŋtə vɨɨ, kwàŋ wutə taa ŋwaa vɨɨ, yɨsə vəŋ weꞌ maa nu Nwi. ⁴Nɨniŋ, wə faŋ ŋwə gisə təghaŋ nɨŋkwiŋ nɨŋkwiŋ, gaŋtə luu nshɨ-tɔ wi. Luu nə, wə faŋ ŋwə fɨꞌtə yigisə shuu Nwi, gaŋtə luu nshəŋtə vɨɨ Nwi. ⁵Mə kəə laa viŋ vənshə kɨ gisə təghaŋ nɨŋkwiŋ nɨŋkwiŋ. Luu nə, mə baa kəə ŋkee dɨdɨꞌ laa viŋ kɨ fɨꞌtə yigisə shuu Nwi, buꞌ laa nu məfɨꞌtə yigisə shuu Nwi kwàlə shɔ̀ɔ nu məgisə təghaŋ nɨŋkwiŋ nɨŋkwiŋ. Kaꞌ nu məgisə təghaŋ nɨŋkwiŋ nɨŋkwiŋ kɨ gaŋtə nshəŋtə vɨɨ Nwi sheꞌ faŋ vɨ baa kìasə yigi yi yɔ́ maa ghaŋ shɨ nɨzi. ⁶Vaŋ-nshwi vaŋ, maa yighee njyə faŋ mə taa jwi yɨ viŋ, kɨ ghaŋ laa mə gisə sheꞌ maa təghaŋ nɨŋkwiŋ nɨŋkwiŋ, buu mə taa gaŋtə viŋ kɨkə? Kaꞌ mə gaŋtə viŋ sheꞌ faŋ mə deesə nu Nwi tɨ́ viŋ ŋkee kəley, naysə nu ŋkɨə faŋ Nwi də̀ shee tɨ́ viŋ, baa fɨ̀ꞌtə nu tɔ-ley tɨ́ viŋ faŋ Nwi kɔ̀ shee.

⁷Maa shwenə, viŋ ye vətɔ faŋ vɨ yaa kɨ buꞌ maa nyaysə, yaa ndaw nə ndəə-ntɨ, kɨ luu nyay yɔ́ kee fùu yijəə me, buu kaꞌ wə kɨ̀ɨ nə ŋiꞌ nyay yɔ́ kɨkə? ⁸Jwi maa yisaw nɨzi, faŋ vɨ yaa kɨ taw maa məbaytə vɨɨ maa yighaw, yisaw yɔ́ kɨ luu kee gì jəə me, kaꞌ vɨɨ kee zɔ me, tuu wə kee taa lootə ŋwaa maa yighaw me. ⁹Luu sheꞌ nɨniŋ taa ŋwaa viŋ faŋ viŋ gisə vənu maa ghaŋ faŋ ŋwə kee lùu ley me, buu kaꞌ wə kee zɔ̀ nu ŋkɨə faŋ viŋ gisə me, ŋkə lùu yaa viŋ gisə tɨ́ fɨɨ. ¹⁰Təghaŋ taa mbi təyaŋ, nɨŋkwiŋ nɨŋkwiŋ. Luu nə, təghaŋ tɔ́ tənshə kìi ŋiꞌ ki. ¹¹Faŋ ŋkə kɔlə lùu nɨniŋ, kɨ luu laa mə kee zɔ̀ ghaŋ mɔ́ꞌ me, buu wə ghɔ́ taa ndɨ mə yaa wə tɔŋ, ŋwə taa baa lùu yaa wə tɔŋ shee nɨzi. ¹²Nɨniŋ, faŋ viŋ tə̀ sɨ maa vəkɔ mbɨə faŋ Zwitə Nwi kɔ tɨ́ vɨɨ nə, bàw viŋ kɨ tə sɨ maa məkii vəkɔ vɔ́ vəyaŋ. Luu nə, viŋ kɨ kəə vəkɔ mbɨə faŋ mbə taa gaŋtə nshəŋtə vɨɨ Nwi, nyə tɨŋnə weꞌ. ¹³Nɨniŋ, bàw wə faŋ ŋwə gisə təghaŋ nɨŋkwiŋ nɨŋkwiŋ, kɨ buꞌ ghɔ tɨ́ Nwi laa Zwitə Nwi kɔ wutə tɨ́ ŋwə, tɨ́ kaꞌ ŋwə twèlə ghaŋ ghɔ́ jəə nɨzi. ¹⁴Mə gì nee buꞌ laa wə kɨ luu shɔꞌtə Nwi maa təghaŋ nɨŋkwiŋ nɨŋkwiŋ, faŋ Zwitə Nwi kɔ̀ tɨ́ ŋwə, buu fwi yi shɔꞌtə Nwi, luu nə, mbɨꞌtə wə ghɔ́ kee lùu shɔ me; ŋwə kee kɨ̀ɨ nə nu ŋkɨə faŋ ŋwə gisə me.

¹⁵Ŋkə də̀ laa kə? Ŋkə lùu laa, mə kəə ndɨ̀ təghaŋ tɔ́ faŋ Zwitə Nwi kɔ̀ shee nə, shɔ̀ꞌtə Nwi shɔ. Luu nə, mə taa kɨ shɔꞌtə Nwi nə ghaŋ ley faŋ ŋwə ndɔ̀ fɨ taa mbɨꞌtə nyaa nɨzi. Mə kəə zwà nyay maa wutə Zwitə Ley Nwi. Luu nə, mə taa ndɨ ŋkitə nyaa, zwà nyay shɔ nɨzi. ¹⁶Kɨ luu laa a bwaŋ Nwi fɨ taa Zwitə Nwi maa təghaŋ nɨŋkwiŋ nɨŋkwiŋ, buu kaꞌ wə ntɨə faŋ ŋwə kee kɨ̀ɨ nə nu kɔ́ me, bìŋ laa «Amen», faŋ lùu laa «ŋkə lùu nɨniŋ», kɨkə? Kaꞌ ŋwə kee biŋ, faŋ ŋwə kee zɔ̀ nu ŋkɨə faŋ a gisə nə me. ¹⁷Shɔꞌtə ghɔ́ kɔlə bàw kɨkə, ŋwə kee gaŋtə wə ghɔ́ nə nu me. ¹⁸Mə bwaŋ Nwi laa Zwitə ki kɔ̀ wutə shee laa mə kɨ gisə təghaŋ nɨŋkwiŋ nɨŋkwiŋ shɔ̀ɔ viŋ vənshə. ¹⁹Faŋ ŋkə kɔlə lùu nɨniŋ, taa nshəŋtə vɨɨ Nwi, ŋkə bàw laa mə gi vənu sheꞌ tee maa ghaŋ faŋ vɨɨ taa zɔ, shɔ̀ɔ fɨ mə gi vənu ŋkaŋsə yighuŋ maa ghaŋ faŋ vɨɨ kee taa zɔ me. Mə kəə gi vənu sheꞌ maa ghaŋ ley, tɨ́ kaꞌ mə kɨ tɨsə vɨɨ shɔ.

²⁰Vaŋ-nshwi vaŋ, kɨ viŋ kɨ bɨꞌtə vənu yuu vaŋmbwaa me. Nu ŋkɨə faŋ kaꞌ viŋ lùu yaa vaŋmbwaa, faŋ vəŋ kee ta weꞌ maa nu me, lùu maa məyɨsə vənu vəbwəvə. Bàw viŋ kee weꞌ maa kəŋ nu ghɔ́ me. Luu nə, bàw viŋ lùu yaa vɨɨ taa maa məbɨꞌtə vənu. ²¹Taa ŋwaꞌlə Nwi, vɨ nyɔ̀ꞌ laa,

«Nwi gì laa yi taa tɔŋ vɨɨ

faŋ vəŋ taa kɨ gisə təghaŋ nɨŋkwiŋ nɨŋkwiŋ,

vəŋ jwi kɨ fɨꞌtə nu Nwi tɨ́ vɨɨ və̀.

Luu nə, faŋ Nwi kɔlə yɨ̀ nɨniŋ nə,

vɨɨ vɔ́ kee bee zɔ̀ nu ŋkɨə

faŋ Nwi nə naysə tɨ́ vəŋ me.» 14.21 Aysaya 28.11-12.

²²Ŋkə də̀ tɨ́ nsiŋ laa nu məgisə təghaŋ nɨŋkwiŋ nɨŋkwiŋ maa wutə Zwitə Nwi, lùu shwenə faŋ Nwi kɔ̀ tɨ́ vɨɨ mbɨə faŋ vəŋ kee biŋ nu Nwi me. Shwenə kɔ́ kee lùu tɨ́ vɨɨ faŋ vəŋ duꞌtə vəŋ biŋ nu Nwi me. Gə fɨ maa wutə maa məfɨꞌtə yigisə shuu Nwi, lùu shwenə tɨ́ vɨɨ məbiŋ nu Nwi, kee lùu shwenə tɨ́ vɨɨ mbɨə faŋ vəŋ kee bìŋ nu Nwi me. ²³Faŋ viŋ, vɨɨ Nwi, shəŋtə shəŋ muꞌ, wə tɨ̀ me wə tey kɨ gisə təghaŋ nɨŋkwiŋ nɨŋkwiŋ faŋ kɔ̀ Zwitə Nwi tɨ́ ŋwə, wə mɔ́ꞌ kɨ nii jwì, faŋ ŋwə kee ta kɨ̀ɨ nə nu Nwi me, tɨꞌnə me bìŋ nu Kristo me, wə ghɔ́ kɨ jwì, ŋìi shəŋ ŋkɨə faŋ viŋ bàytə shɔ, kɨ gisə təghaŋ nɨŋkwiŋ nɨŋkwiŋ nə, buu wə ghɔ́ taa kɨ bɨꞌtə laa viŋ ghɨghenə. ²⁴Luu nə, viŋ vənshə kɨ luu kɨ fɨꞌtə yigisə shuu Nwi, wə mɔ́ꞌ kɨ nii jwì faŋ ŋwə kee ta kɨ̀ɨ nə nu Nwi me, tɨꞌnə me bìŋ nu Kristo me, wə ghɔ́ kɨ jwì, ŋìi shɔ, zɔ̀ yigisə yiŋ yɔ́, buu ŋkə taa də tɨ́ wə ghɔ́ laa nshinə yi kee yikuꞌnə vɨsɨ Nwi me. Ŋwə ye laa yi luu yɨ-kəbwə. ²⁵Təgi tɔ́ taa yɨsə vənu mbɨə faŋ ŋwə bɨꞌtə fɨ taa fwi ŋwə, fuu ntee. Ŋwə kɨ nii tùŋ vətɔ vəyəə vi nsi vɨsɨ Nwi, kɔ̀ feenə tɨ́ Nwi, baa tèytə laa, «Yinsəŋ, viŋ vɨ Nwi lùu mɔ́ꞌ.»

Kɨ vɨ kɨ buulə taa nshəŋtə vɨɨ Nwi me

²⁶Vaŋ-nshwi vaŋ, faŋ ŋkə lùu nɨniŋ nə, viŋ zɔ nu ŋkɨə faŋ mə tɨsə viŋ shɔ. Yighee njyə faŋ viŋ fàynə shəŋ muꞌ maa məbəŋsə Nwi, bàw wə tɨ̀ me wə jwi nə wee-nu maa məgaŋtə nshəŋtə yiŋ yɔ́. Wə muꞌ taa kɔ nyay, wə mɔ́ꞌ deesə nu tɨ́ vɨɨ, wə mɔ́ꞌ naysə nu faŋ Nwi də̀ tɨ́ ŋwə, wə mɔ́ꞌ gi nu maa təghaŋ nɨŋkwiŋ nɨŋkwiŋ faŋ kɔ̀ Zwitə Nwi tɨ́ ŋwə, wə mɔ́ꞌ baa luu kìasə ghaŋ ghɔ́ tɨ́ kaꞌ vɨɨ vənshə zɔ̀ nu kɔ́. Bàw vɨɨ yɨsə vənu vɔ́ vənshə maa jɨɨ faŋ nyə taa gaŋtə vɨɨ maa məgə nə vɨsɨ taa nu Nwi. ²⁷Kɨ luu vɨɨ luu shɔ faŋ vəŋ gisə maa təghaŋ nɨŋkwiŋ nɨŋkwiŋ faŋ kɔ̀ Zwitə Nwi tɨ́ vəŋ nə, kɨ luu vəŋ luu vəyaŋ, kɨ vəŋ shɔɔ vəbɔɔ me, tɨꞌnə me vətia me. Bàw vəŋ kɨ gisə sheꞌ wə nə muꞌ nə muꞌ. Wə mɔ́ꞌ baa kiasə yigi yɔ́, tɨ́ kaꞌ wə tɨ̀ me wə zɔ̀ nu ŋkɨə faŋ vɨ gisə nə. ²⁸Kɨ luu laa wə kee lùu shɔ faŋ kaꞌ ŋwə kìasə təghaŋ tɔ́ me, bàw laa vɨɨ mbɨə faŋ vəŋ kìi wutə maa məgi təghaŋ tɔ́ nə, duꞌ ŋkwəŋ taa ŋii nshəŋtə yɔ́, kɨ gisə sheꞌ fɨ taa fwisə vəŋ ghɔ vɨ Nwi. ²⁹Gə fɨ maa vɨɨ mbɨə faŋ vəŋ fɨꞌtə yigisə shuu Nwi, bàw vɨɨ vəbɔɔ gi yigi yɔ́, tɨꞌnə me vɨɨ vətia. Bàw vɨɨ vənshə kɨ nii ywìitə vənu mbɨə faŋ vɨɨ vɔ́ gisə nə, laa lùu yigisə Nwi yinsəŋ mu. ³⁰Kɨ luu Nwi də nu fi tɨ́ wə mɔ́ꞌ faŋ ŋwə dùꞌ taa nshəŋtə yɔ́, faŋ wə mɔ́ꞌ tɨŋ kɨ gisə, bàw wə ghɔ́ faŋ ŋwə tɨŋ kɨ gisə nə, shia, kɔ̀ jɨɨ tɨ́ wə ntɨə faŋ Nwi də̀ nu tɨ́ ŋwə nə. ³¹Bàw wə tɨ̀ me wə fɨꞌtə yigisə Nwi wə nə muꞌ nə muꞌ, tɨ́ kaꞌ vɨɨ vənshə zwètə nu Nwi, kìi fwi yiweꞌ, kɨ gə vɨsɨ. ³²Vɨɨ mbɨə faŋ vəŋ kìi wutə maa məfɨꞌtə yigisə shuu Nwi, kìi wutə maa məgi laa Zwitə Nwi kɔ́ kɨꞌ. ³³Lùu nɨniŋ buꞌ laa nu məbuulə vənu kee bàw tɨ́ Nwi me. Ŋkə bàw tɨ́ Nwi faŋ nsiŋ toꞌ nə məduꞌ-nyɔŋ fɨ taa nshəŋtə vɨɨ Nwi yinshə. ³⁴Bàw vəki duꞌ ŋkwəŋ taa ŋii məshəŋtə vɨɨ Nwi. Ŋkə kee bàw laa vəŋ kɨ gisə me. Bàw vəŋ suꞌsə yiŋwaa vəŋ nsi, faŋ vɨ nyɔ̀ꞌ taa ŋwaꞌlə Nwi. ³⁵Kɨ luu nu luu shɔ faŋ vəŋ kəə kɨɨ, bàw vəŋ kɨꞌ, taa gə shiŋii, buu bitə tɨ́ vəndəə vəvəŋ. Luu nu tɔ dɨɨ tɨ́ wəzwi maa məgi taa nshəŋtə vɨɨ Nwi. ³⁶Viŋ nə bɨꞌtə laa nu Nwi nə zì fɨ ghɔ viŋ mu, tɨꞌnə me laa lùu viŋ nɨnɔŋ, faŋ viŋ nə zɔ̀ yigi yɔ́ mu?

³⁷Kɨ luu wə luu shɔ faŋ ŋwə bɨꞌtə laa yi lùu nshiiŋii-sɔghɔ, tɨꞌnə me laa yi kìi Zwitə Nwi taa fwi ŋwə, buu ŋwə kɔꞌ kɨɨ laa nu ŋkɨə faŋ mə nyɔ̀ꞌ tɨ́ viŋ feenə, luu ŋkee sɔꞌ faŋ ŋwə ndɔ̀ fɨ ghɔ tɨta Nwi. ³⁸Kɨ luu wə lùu shɔ faŋ ŋwə kee yibiŋ me, buu vɨ kee bìŋ wə ghɔ́ me. ³⁹Nɨniŋ, vaŋ-nshwi vaŋ, viŋ tə sɨ, tɨ́ kaꞌ viŋ kìi wutə maa məgi yigi faŋ nyə ndɔ̀ fɨ ghɔ Nwi. Viŋ yɨ nɨniŋ, kee kɨ twey laa vɨɨ kɨ gisə təghaŋ nɨŋkwiŋ nɨŋkwiŋ faŋ kɔ̀ Zwitə Nwi tɨ́ vəŋ me. ⁴⁰Viŋ kɨ yɨsə vənu vənshə maa jɨɨ yiloomə, baa lùu vəjəə.

Yigi kɔ̀ŋ ŋiꞌ nu Kristo

¹Vaŋ-nshwi vaŋ, bàw mə baa lùmə ŋiꞌ nu Kristo tɨ́ viŋ, faŋ mə nə fɔŋ fɨ̀ꞌtə tɨ́ viŋ. Viŋ nə bìŋ yigisə Nwi yɔ́, wèꞌ shɔ. ²Luu sheꞌ buꞌ yigi yɔ́ faŋ Nwi bwèysə viŋ, faŋ viŋ nùŋsə yigi yɔ́ sheꞌ faŋ mə nə nàysə tɨ́ viŋ nə. Toꞌ kee lùu nɨniŋ me, buu viŋ nùŋ fwi siŋ maa Kristo sheꞌ dayday. ³Nu ŋkɨə faŋ mə nə fɔŋ fɨ̀ꞌtə tɨ́ viŋ, luu sheꞌ nu ŋkɨə faŋ mə nə zɔ̀ nɨniŋ nɨzi. Ntɔŋ yɔ́ lùu laa Yeso nə ku buꞌ yibɨsə nyaa-nsiŋ, sheꞌ faŋ vɨ nə nyɔ̀ꞌ taa ŋwaꞌlə Nwi laa ŋkə ndɔ gay nɨniŋ. ⁴Ŋwə nə ku, vɨ təə ŋwə. Kɨ luu vəshi vətia, Nwi yweysə ŋwə fɨ shɨ yiku, sheꞌ faŋ vɨ nə nyɔ̀ꞌ taa ŋwaꞌlə Nwi laa ŋkə ndɔ luu nɨniŋ. ⁵Faŋ ŋwə nə ywèy fɨ shɨ yiku nə, ŋwə nə bɨ fùu yikəꞌ Pita, kɨ nii baa fùu yikəꞌ vɨɨ məzwetə nu Yeso njɔsə-bɔɔ, vəŋ ye ŋwə nə sɨ. ⁶Yiŋkii kɨ shɔɔ, ŋwə fuu yikəꞌ vaŋ-nshwi vaŋ-nsiŋ vəmɔ́ꞌ faŋ vəŋ nə bàytə shəŋ muꞌ vəyaŋ, shɔ̀ɔ yiwa tee. Vəŋ vənshə nə yè ŋwə nə sɨ. Vɨɨ vəyaŋ kɨ bii fɨ taa ŋwaa vɨɨ vɔ́ faŋ vəŋ nə yè ŋwə nə. Nə kukə sheꞌ vaŋ-mbusə vɨɨ fɨ taa ŋwaa vəŋ. ⁷Baa lùu maa yighee mɔ́ꞌ, Yeso fuu yikəꞌ Jeyms, baa kɨ nii fùu yikəꞌ vɨɨ ntɔŋ vi vənshə. ⁸Kɨ luu fɨ yiba, ŋwə fuu yikəꞌ mə nɨzi, faŋ mə lùu yaa wee faŋ vɨ bì faŋ yighee yi kee yikuꞌnə me. ⁹Fɨ taa ŋwaa vɨɨ ntɔŋ Yeso, mə luu ŋkee nshətə yiba. Mə kee kùꞌnə tɨ́ kaꞌ vɨ tìi mə laa mə lùu wuu ntɔŋ Yeso me, buꞌ laa mə nəə toꞌ zwilə vɨɨ Kristo yighee vɨsɨ. ¹⁰Luu nə, ŋwə kee gəŋ saŋ, tù mənɔŋ-bwaŋnə tɔ mə, yɨ laa mə gu wə ntɨə faŋ mə lùu ndwə. Mənɔŋ-bwaŋnə wi nə gəŋ si, faŋ Nwi nə kɔ̀ shee nə, kee ndì dayday me. Ŋkə yɨsə laa mə ndɨ wutə kaŋ kənshə, fàꞌ tɨ́ Nwi shɔ̀ɔ vəŋ vənshə. Nə kee lùu wutə kaŋ faŋ mə ndɨ̀, kɨ faꞌ ŋgɨɨ-mə me. Nə luu sheꞌ gəŋsə Nwi nə wutə ki faŋ ŋkə lùu ghɔ mə. ¹¹Faŋ mə fɨꞌtə yigisə Nwi tɨ́ viŋ, tɨꞌnə me wə dɨday fɨꞌtə tɨ́ viŋ, ŋkwiinə kee lùu shɔ me. Yia vənshə fɨꞌtə sheꞌ nu Kristo tɨ́ viŋ maa jɨɨ yimuꞌ. Viŋ nə nùŋ fwi siŋ sheꞌ maa nu Kristo kɔ́.

Yigi kɔ̀ŋ məywey fɨ shɨ yiku

¹²Yigisə Nwi yɔ́ faŋ yia fɨꞌtə tɨ́ vɨɨ nə, lùu laa, Nwi nə ywèysə Kristo fɨ shɨ yiku. Faŋ ŋkə lùu nɨniŋ, faŋ Nwi nə ywèysə Kristo fɨ shɨ yiku nə, sii kaꞌ vɨɨ mɔ́ꞌ fɨ taa ŋwaa viŋ gi laa məywey fɨ shɨ yiku kee lùu shɔ me kɨkə? ¹³Ŋkə nə toꞌ lùu laa kaꞌ vɨɨ kee ywèy fɨ shɨ yiku me, buu ŋkə də̀ laa Kristo nɨzi nə kee ywèy fɨ shɨ yiku me. ¹⁴Ŋkə nə maa luu laa Yeso nə ywèy fɨ shɨ yiku me, buu ŋkə də̀ laa yigisə Nwi faŋ yia fɨꞌtə tɨ́ viŋ, lùu nu dayday. Məbiŋ wiŋ nɨzi, faŋ viŋ nùŋ fwi siŋ maa Kristo nə, lùu nu dayday nɨzi. ¹⁵Nwi nəə toꞌ maa yweysə Kristo me, buu ŋkə nə də̀ nɨzi laa yia lùu vɨɨ məsɨɨ təba kɔ̀ŋ nu Nwi, buꞌ faŋ yia naysə tɨ́ vɨɨ laa Nwi nə ywèysə Yeso fɨ shɨ yiku nə, faŋ məywey fɨ shɨ yiku kee lùu shɔ nə me. ¹⁶Nii toꞌ lùu yinsəŋ laa Nwi kee ndɔ yɨ laa vɨɨ ywey me, buu ŋkee nshɨ-tɔ Kristo kee ywey fɨ shɨ yiku me. ¹⁷Ŋkə nə maa toꞌ lùu laa Nwi nə yɨ laa Kristo ywey fɨ shɨ yiku me, buu ŋkə də̀ laa məbiŋ wiŋ lùu nu dayday, vənu vəbwəvə viŋ baa gòꞌsə maa viŋ. ¹⁸Ŋkə kɨ nii baa də̀ laa vɨɨ mbɨə faŋ vəŋ nə nùŋ fwisə vəŋ maa Kristo, faŋ vəŋ nə kùkə nə, vəŋ kùkə nə nu bwə maa vəŋ, ndì. ¹⁹Nii toꞌ lùu laa vɨ tə sɨ maa Yeso Kristo sheꞌ buꞌ məbwey taa mbi nyə̀ ndwə, buu ŋkə taa bɨ tɨ́ nsiŋ shɔ̀ɔ vɨɨ vənshə.

²⁰Luu nə, ŋkə luu ŋkee nu yinsəŋ laa Nwi nə ywèysə Kristo fɨ shɨ yiku. Ŋwə nə luu mfɔŋ wə maa məywey fɨ shɨ yiku. ²¹Ŋkee maa vənzi və mbi, yiku nə ŋìi shɨ nsi buꞌ wə muꞌ. Sheꞌ nɨniŋ, məywey fɨ shɨ yiku luu shɔ buꞌ wə muꞌ. ²²Vɨɨ kukə buꞌ laa vəŋ lùu mənshi mə Adam, faŋ nə luu mfɔŋ wə nə. Sheꞌ nɨniŋ, Nwi ndɔ kɔ məbwey fi tɨ́ vɨɨ, faŋ vəŋ lùu fa kəmuꞌ ghɔ vɨ Yeso Kristo. ²³Vənu vənshə kɨ gay maa yighee yi. Nə bɨ fɔŋ ywèy Kristo fɨ shɨ yiku. Ndɔ lùu maa yighee njyə faŋ ŋwə ndɔ baa bəŋ jwì shɨ nsi, vɨɨ vi vənshə ndɔ ywey nɨzi, bèꞌsə ŋwə. ²⁴Faŋ yiŋkii mè, vəndwə və mbi kɨ nii yikuꞌnə. Maa yighee yɔ́ Yeso Kristo ndɔ ghɔꞌ vənu vənshə faŋ mbə sɔ̀ꞌ mbi nyə̀, nə vətɔ vənshə faŋ mbə kìi wutə taa mbi. Ŋwə ndɔ ndisə wutə vəŋ, ndɔ̀ fì yifwàŋ yinshə, kɔ̀ tɨ́ Nwi. ²⁵Maa yighee yɔ́, ndɔ sɔꞌ Kristo sɔꞌ mbi yaa fwàŋ, gə ziꞌ tɨ́ yighee njyə faŋ Nwi ndɔ ghɔꞌ vɨɨ mbeenə Kristo vənshə, kɔ vəŋ ghɔ ŋwə, yuu vɨ nyɔ̀ꞌ taa ŋwaꞌlə Nwi. 15.25 Sam 110.1.²⁶Maa məndwə, ŋwə ndɔ kɨ ghɔꞌ yiku nɨzi, faŋ luu ŋkee wuu mbeenə Kristo. Ŋwə ndɔ ndisə yiku nɨzi. ²⁷Ŋkə ndɔ luu sheꞌ faŋ vɨ nə nyɔ̀ꞌ taa ŋwaꞌlə Nwi laa, «Nwi nùŋsə vənu vənshə taa ghɔ ŋwə.» 15.27 Sam 8.7. Faŋ vɨ nə nyɔ̀ꞌ laa, vənu vənshə ndɔ luu taa ghɔ ŋwə nə, maa ŋkə lùu kəley laa nshɨ-tɔ Nwi faŋ ŋwə nùŋsə vənu vənshə taa ghɔ Kristo, kee bee lùu taa ghɔ ŋwə me. ²⁸Faŋ Nwi taa yɨsə laa vənu vənshə ndɔ luu taa ghɔ Kristo nə, buu nshɨ-tɔ Kristo, faŋ lùu wee Nwi nə, taa kɨ bwasə ŋwaa wi vɨsɨ Nwi. Nɨniŋ laa Nwi sɔꞌ vətɔ vənshə, vətɔ vənshə baa fàynə ghɔ Nwi.

²⁹Vɨɨ mɔ́ꞌ shɔ faŋ vəŋ fì muu mə Nwi buꞌ vɨɨ mɔ́ꞌ faŋ vəŋ duꞌtə vəŋ kukə. Kɨ ghaŋ laa vɨɨ faŋ vəŋ kukə, ndɔ kee ywey me, sii yɨ̀ kə buu vɨɨ kɨ fi muu maa yizii vɨɨ faŋ vəŋ kukə? ³⁰Gə fɨ maa yia, yia sii toꞌ fɨ taa ghɔ yiku ghee nshə tɨ́ kə, faŋ vɨɨ kee ndɔ ywey fɨ shɨ yiku me. ³¹Vaŋ-nshwi vaŋ, mə naysə tɨ́ viŋ laa mə luu shuu yiku vəshi vənshə. Luu ŋkee nu yinsəŋ, sheꞌ faŋ ŋkə baa lùu yinsəŋ laa mə koꞌsə ŋwaa buꞌ viŋ, buꞌ laa viŋ lùu vɨɨ Yeso Kristo, faŋ lùu tɨta ŋwaa-nsiŋ faŋ ŋwə sɔꞌ nsiŋ nə. ³²Yighee njyə faŋ mə nə luu shɨ Efesɔs, mə nə luu taa ŋɨꞌ, ŋkə nə luu yuu mə nywenə yia nyaasə shəsə fɨ taa gay. Ŋkə nəə toꞌ maa lùu laa vɨ yweysə vɨɨ fɨ shɨ yiku me, buu sey ŋgwə faŋ mə kìi, faŋ mə yɨ̀sə kəŋ vənu ghɔ́ nə, sii lùu kə? Ŋkə toꞌ kee lùu laa vɨɨ ndɔ ywey fɨ shɨ yiku me, buu ŋkə bàw laa mə gi tɨ́ viŋ laa «Nsiŋ kɨ zɨ, ndɔ nu məluꞌ, zə̀ yiŋwaa nyaa-nsiŋ, buꞌ laa mbisɨ nsiŋ taa kukə.» 15.32 Aysaya 22.13.³³Luu nə, kɨ viŋ kɨ bweꞌsə yiŋwaa yiŋ me! Wə kɨ luu kɨ toꞌ fɨ taa ŋwaa vɨɨ bwənə, buu ŋwə taa kɨ yɨsə vənu vəbwəvə yaa vəŋ nɨzi. ³⁴Kɨ viŋ baa kɨ yɨsə vənu vəmfaw me. Viŋ bee kii meꞌtə məyɨ vənu vəbwəvə, yuu ŋkə kuꞌnə tɨ́ nsiŋ. Mə ye laa vɨɨ mɔ́ꞌ fɨ taa ŋwaa viŋ kee kɨ̀ɨ nə Nwi tuu tɨtiꞌ me. Mə gì tɨ́ nee, lùu nu tɔ dɨɨ tɨ́ viŋ.

Ŋkɨꞌnə ŋwaa maa yighee məywey fɨ shɨ yiku

³⁵Wə mɔ́ꞌ taa kɨ bitə laa, vɨɨ faŋ vəŋ nə kukə, ndɔ ywey fɨ shɨ yiku kɨkə? Yiŋwaa vəŋ ndɔ luu kɨkə? ³⁶Wə ntɨə faŋ ŋwə bìtə kəŋ nu ghɔ́ nə, luu mfaw. Maa viŋ kɨɨ laa yisay faŋ wə ndɨ̀, gə̀ sɔ̀ taa biisə, nyə bɨ fɔŋ ku buu tɔŋ. ³⁷Yisay yɔ́ faŋ wə sɔ nsi nə, luu sheꞌ mbuu yisay, kee lùu yisay nə tɨɨlə shɔ, faŋ vɨ sɔ nə me. Maa luu sheꞌ yisɨ mbuu yisay, tɨꞌnə me yisɨ fa day, faŋ vɨ bia nə. ³⁸Nwi taa kɔ ŋwaa tɨ́ fa tɨ̀ me fa faŋ vɨ bia nə, maa ŋkɨꞌnə yi, sheꞌ faŋ Nwi kàw.

³⁹Vətɔ faŋ mbə kìi məbwey shɨ nsi lùu nɨŋkwiŋ nɨŋkwiŋ. Ŋwaa wə luu muꞌ, ŋwaa nyaasə lùu maa jɨɨ yimɔ́ꞌ, ŋwaa mənwə baa kɨ luu nɨŋkwiŋ nɨzi, ŋwaa susə baa kɨ luu nɨŋkwiŋ. ⁴⁰Vətɔ faŋ mbə lùu yizɔ, kìi yiŋwaa vəŋ. Vətɔ faŋ mbə lùu feenə shɨ nsi, kìi yiŋwaa vəŋ nɨŋkwiŋ. Məbaw vətɔ faŋ mbə lùu yizɔ kìi jɨɨ vəŋ yimuꞌ. Məbaw vətɔ faŋ mbə lùu shɨ nsi luu nə jɨɨ yimɔ́ꞌ. ⁴¹Məbaw shɨshwi lùu nə jɨɨ yi, məbaw ŋuu luu nə jɨɨ yi, məbaw məjwiŋ baa lùu maa jɨɨ yiday. Fəjwiŋ tɨ̀ me fəjwiŋ kɨ kìi məbaw wi nɨŋkwiŋ. ⁴²Luu sheꞌ nɨniŋ nə ŋwaa wə faŋ ŋwə ndɔ kɨ ywey fɨ ghɔ yiku nə. Vɨ yaa təə wə, ŋwə shuu. Luu nə, yighee njyə faŋ Nwi yweysə wə ghɔ́ fɨ shɨ yiku, ŋwə fi ŋwaa wi mɔ́ꞌ faŋ ŋwə kee baa shɨshuu me. ⁴³Ŋwaa wə fɨ shɨ nsi kee yikuꞌnə me, kee kìi wutə me. Luu nə, ŋwə ndɔ ku, Nwi yweysə ŋwə, kɔ̀ ŋwaa day tɨ́ ŋwə, faŋ ŋwə lùu ŋkee jəə, baa kìi wutə. ⁴⁴Yighee njyə faŋ vɨ təə wə, lùu fa shɨ nsi kə̀ faŋ vɨ təə nə. Luu nə, yighee njyə faŋ wə ghɔ́ ndɔ ywey, ŋwə ywey nə ŋwaa day, faŋ lùu ŋwaa Zwitə Nwi. Kɨ luu ŋwaa wə luu shɔ, faŋ ŋwə lùu shɨ nsi nyə̀, buu ŋwaa wi mɔ́ꞌ baa lùu shɔ nɨzi, faŋ lùu ŋwaa Zwitə Nwi. ⁴⁵Lùu faŋ vɨ nə nyɔ̀ꞌ taa ŋwaꞌlə Nwi laa, Nwi nə bɔ̀ŋ Adam, faŋ nə lùu mfɔŋ wə faŋ ŋwə kìi məbwey. 15.45 Jenesis 2.7. Adam mɔ́ꞌ baa lùu shɔ faŋ ŋwə nə jwì fɨ yiba. Luu Kristo faŋ ŋwə lùu wuu Zwitə Nwi, faŋ ŋwə kɔ məbwey tɨ́ vɨɨ. ⁴⁶Kee lùu wuu Zwitə Nwi ghɔ́ faŋ ŋwə nə jwì vɨsɨ nə me. Lùu wuu ŋwaa taa mbi nyə̀ faŋ ŋwə nə jwì vɨsɨ, buu wuu Zwitə Nwi ghɔ́ jwi. ⁴⁷Mfɔŋ wə nə ndɔ̀ fɨ shɨ nsi, Nwi nə bɔ̀ŋ ŋwə nə shɔꞌ. Wə ŋgwii-wə faŋ ŋwə nə bèꞌsə nə, nə ndɔ luu fɨ yizɔ. ⁴⁸Vɨɨ mbɨə faŋ vəŋ shi taa mbi nyə̀, lùu yaa wə ntɨə faŋ Nwi nə bɔ̀ŋ ŋwə nə shɔꞌ nə. Luu nə, vɨɨ mbɨə faŋ vəŋ shi yizɔ, lùu yaa wə ntɨə faŋ ŋwə nə ndɔ̀ fɨ yizɔ nə. ⁴⁹Ndwə nsiŋ lùu yaa wə ntɨə faŋ Nwi nə bɔ̀ŋ nə shɔꞌ nə. Shi mɔ́ꞌ nsiŋ ndɔ luu yaa wə ŋgwii-wə faŋ ŋwə nə jwì fɨ yizɔ nə.

⁵⁰Vaŋ-nshwi vaŋ, mə naysə tɨ́ viŋ laa, kaꞌ ŋwaa wə fɨ shɨ nsi kee ndɔ zɨ yifwàŋ Nwi me. Fa faŋ kaꞌ ŋkə shuu, kee ndɔ goꞌ maa shuu me. ⁵¹Viŋ zɔ! Mə taa naysə nu faŋ ŋkə nə ndènə fɨ ghɔ vɨɨ. Nsiŋ kee ndɔ kukə vənshə me. Luu nə, nsiŋ vənshə ndɔ kwiinə. ⁵²Nu kɔ́ ndɔ gay sheꞌ yighee muꞌ, faŋ vɨ ndɔ taw yisaw maa yighee vəndwə və mbi. Maa yighee yɔ́, faŋ yisaw yɔ́ ndɔ gi nə, vɨɨ mbɨə faŋ vəŋ nə kukə nə, ywey. Vəŋ jwi kii yiŋwaa faŋ kaꞌ nyə kee baa bɨ me. Gə fɨ maa nsiŋ, nsiŋ ndɔ kwiinə yiŋwaa maa yighee yɔ́ nɨzi. ⁵³Kaꞌ nsiŋ kee ndɔ baa kii yiŋwaa nyaa-nsiŋ njyə faŋ nyə ndɔ shuu bɨ nə me. Ŋwə taa kwiinə, gu fa faŋ ŋkə kee ndɔ baa bɨ me. Ŋwaa ghɔ́ faŋ ŋwə ku nə, ndɔ kwiinə, gù fa faŋ ŋkə kee ndɔ baa ku me. ⁵⁴Maa yighee yɔ́ faŋ yiŋwaa nyaa-nsiŋ kwiinə, gù fa faŋ kaꞌ ŋkə kee baa bɨ me, buu ŋkə ndɔ faynə nə nu ŋkɨə faŋ vɨ nə nyɔ̀ꞌ taa ŋwaꞌlə Nwi fɨshi laa,

«Vɨ bɨꞌ wutə yiku.

Nwi ghɔꞌ yiku, nyə mè. 15.54 Aysaya 25.8.

⁵⁵Aŋ yiku, wutə kə bə?

Aŋ yiku, wutə mətə wə kə baa bə?» 15.55 Hosia 13.14.

⁵⁶Nə luu buꞌ vənu vəbwəvə faŋ yiku kìi wutə maa məndisə vɨɨ. Vɨɨ kɨɨ nə wutə nu bwə buꞌ ntɨsə Nwi faŋ Nwi nə kɔ̀ tɨ́ vɨɨ nə. ⁵⁷Bàw laa nsiŋ bwaŋ Nwi, buꞌ laa Nwi kɔ̀ wutə tɨ́ nsiŋ, tɨ́ kaꞌ nsiŋ ghɔ̀ꞌ nu bwə, baa ghɔꞌ yiku, fiiba jɨŋ tɨta Yeso Kristo. ⁵⁸Nɨniŋ, vaŋ-nshwi vaŋ faŋ mə kàw, viŋ kɨ tɨŋnə weꞌ. Viŋ goꞌ fa kəmuꞌ viŋ vɨ Kristo. Viŋ kɨ faꞌ faꞌ Nwi nə fwi yinshə, buꞌ laa viŋ kɔꞌ kɨɨ laa faꞌ ŋgwə faŋ viŋ faꞌ tɨ́ tɨta Yeso, kee ndɔ ndi day me.

Ntɨ kɔ̀ŋ ka faŋ vɨɨ Nwi fɨ shɨ Kɔrint bàytə maa məgaŋtə vɨɨ Nwi shɔ fɨ shɨ Jerusalem

¹Gə fɨ maa ka ŋgwə faŋ vɨ baytə maa məgaŋtə vɨɨ Nwi shɔ fɨ shɨ Jerusalem, bàw viŋ kɨ yɨ sheꞌ maa jɨɨ njyə faŋ mə nə tɨ̀ vəməshəŋtə və vɨɨ Nwi fɨ shɨ Galatia shɔ nə. ²Bàw laa yiwiŋ tɨ̀ me yiwiŋ, maa mfɔŋ shi fɨ taa yiwiŋ, bàw wə tɨ̀ me wə nuŋsə fa ŋkɨə faŋ ŋkə lùu kəjəə tɨ́ ŋwə. Kee bàw laa viŋ ndɔ tey kɨ baytə ka sheꞌ maa yighee njyə faŋ mə ndɔ luu yɨ viŋ nə me. ³Yighee njyə faŋ mə ndɔ jwi yɨ viŋ, viŋ taa shoꞌ vɨɨ, vəŋ ndɨ vətɔ mbɨə faŋ viŋ baytə̀ nə, gə̀ nə mbə Jerusalem. Faŋ vəŋ taa kii gə, mə nyɔꞌ vəŋwaꞌlə, kɔ̀ tɨ́ vəŋ, vəŋ gə nə vəŋwaꞌlə vɔ́, baa nə vətɔ mbɨə faŋ viŋ baytə̀ nə. ⁴Kɨ luu viŋ bɨꞌtə laa yia vɨ vəŋ gə Jerusalem mɔ́ꞌ, buu kee luu nsɔꞌ me.

Faŋ Pɔɔl nə kɔ̀ꞌnə maa məgə yè vɨɨ Nwi fɨ shɨ Kɔrint

⁵Mə bɨꞌtə laa mə taa toꞌ fɨ kwiŋ Makedonia, kee bɨ̀sə yighee shɔ me, ndɔ̀ fɨ fuŋ, jwì yɨ viŋ, ndèynə viŋ. ⁶Nɨniŋ, mə ndɔ kii yighee, tɨ́ kaꞌ nsiŋ shì mɔ́ꞌ tày. Yighee mɔ́ꞌ mə ndɔ tay yɨ viŋ maa yighee gwə yinshə, tɨ́ kaꞌ viŋ taa gaŋtə mə yighee njyə faŋ mə ndɔ meꞌtə viŋ, gə vəshəŋ vədayvə. ⁷Mə kee kəə laa mə ndɔ yasə meꞌtə viŋ me. Mbɨꞌtə nyaa lùu laa nsiŋ taa shi yaa təwiŋ təmɔ́ꞌ faŋ tɨta Yeso bìŋ. ⁸Mə taa goꞌ feenə shɨ Efesɔs, zìꞌ maa shi Pentekos, ⁹buꞌ laa Nwi ŋàꞌsə jɨɨ shee feenə, tɨ́ kaꞌ mə fàꞌ faꞌ Nwi ŋkee jəə. Ŋwə baa fùu jəə, faŋ vɨɨ kɔlə lùu shɔ, faŋ vəŋ kəə bɨsə faꞌ ŋwaa ghɔ́ nə.

Sɔꞌkə kɔ̀ŋ Timoti nə Apɔlɔs

¹⁰Timoti taa kɨ jwi yɨ viŋ, kɨ viŋ shiasə ŋwə me. Viŋ jia ŋwə jəə, tɨ́ kaꞌ fwi yi bàw, ŋwə kee fee maa məfaꞌ faꞌ Nwi me, buꞌ laa ŋwə nɨzi faꞌ tɨ́ tɨta Yeso Kristo sheꞌ faŋ mə faꞌ nə. ¹¹Kɨ tuu wə muꞌ shiasə ŋwə me. Yighee njyə faŋ ŋwə ndɔ baa kɨ gə, viŋ gaŋtə ŋwə, twey ŋwə jɨɨ jəə jəə, tɨ́ kaꞌ ŋwə jwi yɨ mə. Yia vɨ vɨɨ Nwi fɨ feenə kɨꞌ ŋwə. ¹²Gə fɨ maa weenshu ŋwaa-nsiŋ Apɔlɔs, mə nəə buꞌ ghɔ tɨ́ ŋwə ghee yaŋ, laa ŋwə beꞌsə vaŋ-nshwi vəmɔ́ꞌ, jwì yɨ viŋ, ndèynə viŋ. Luu nə, ŋkə nə kee lùu taa ŋkɨɨ Nwi laa ŋwə jwi maa yighee nyə̀ me. Ŋwə taa kii yighee, buu jwi yɨ viŋ.

Vaŋ-ntɨsə tɨ́ vɨɨ Nwi fɨ shɨ Kɔrint

¹³Viŋ kɨ kɨɨ buꞌ viŋ gu nu me! Viŋ nuŋ fwi siŋ maa Yeso Kristo, wèꞌ shɔ. Viŋ kii fwisə weꞌsə, tɨ̀ŋnə weꞌ. ¹⁴Maa vənu vənshə faŋ viŋ yɨsə, viŋ kii ŋkawnə taa ŋwaa viŋ.

¹⁵Vaŋ-nshwi vaŋ, gə̀ fɨ maa Stefanas, viŋ kɔꞌ kɨɨ laa ŋwə nə luu mfɔŋ wə fɨ nsi Akaya faŋ ŋwə nə bìŋ nu Nwi. Ŋwə baa luu tweꞌ ghɔ vɨ vɨɨ vi laa vəŋ taa faꞌ maa məgaŋtə vɨɨ Nwi. ¹⁶Mə bùꞌ ghɔ tɨ́ viŋ laa viŋ kɨ kɔ feenə tɨ́ vɨɨ yaa vəŋ. Viŋ baa kɔ feenə tɨ́ vɨɨ vənshə faŋ ghɔ vɨ vəŋ faꞌ faꞌ Nwi mɔ́ꞌ. ¹⁷Mə ŋàytə ŋkee dɨdɨꞌ buꞌ laa Stefanas nə Fɔrtunatɔs nə Akaykɔs jwì yɨ mə feenə. Faŋ mə nə ye vəŋ nə, ŋkə ghɨɨ yaa mə yè viŋ nɨzi. ¹⁸Vəŋ yɨ fwi nyaa zutə, baa yɨsə fwi siŋ zutə nɨzi. Bàw vɨ kɨ kɔ feenə tɨ́ kəŋ vɨɨ vɔ́.

Shɔꞌtə fɨ ghɔ Pɔɔl tɨ́ vɨɨ Nwi fɨ shɨ Kɔrint

¹⁹Vəməshəŋtə və vɨɨ Nwi vənshə fɨ kwiŋ Asia shɔꞌtə viŋ. Akwila nə Prisila nə nshəŋtə vɨɨ Nwi faŋ vəŋ fàynə taa ŋii vəŋ, shɔꞌtə viŋ ŋkee jəə, fɔnə viŋ vɨ vəŋ lùu fa kəmuꞌ taa ŋwaa tɨta Yeso. ²⁰Vɨɨ Nwi fɨ feenə vənshə shɔꞌtə viŋ nɨzi. Viŋ kɨ shɔꞌtə yiŋwaa yiŋ, ndɔ baynə yiŋwaa yiŋ maa yizii Nwi.

²¹Shɔꞌtə ŋwə̀ fɨ feenə nyɔ̀ꞌ mə Pɔɔl nə ghɔ kaŋ. ²²Kɨ luu wə kee kaw tɨta Yeso me, ndwaŋ tɔ ŋwə. «Maranata! Tɨta Yeso jwi!» ²³Tɨta Yeso Kristo tu mənɔŋ-bwaŋnə tɔ viŋ. ²⁴Mə nùŋsə viŋ vənshə taa fwi mə, buꞌ laa nsiŋ vənshə lùu fa kəmuꞌ, nsiŋ vɨ Yeso Kristo.