TITE

TITE

¹ Ne Paul, Ala ka jɔn ni Yesu Krisita ka ciden, ne cira ka Ala ka ɲɛnatɔmɔlenw lase dannaya ma, ani tiɲɛ dɔnniya min bɛ kɛɲɛ ni Ala ɲɛsiran ye, ² walisa ɲɛnamaya banbali jigi ka kɛ u kɔnɔ. Ala min tɛ nkalon tigɛ, o ye ɲɛnamaya banbali layidu ta sani diɲɛ ka da. ³ A ye a ka kuma jira waati bɛnnen na, ka o waajuli kalifa ne ma ka kɛɲɛ ni an Kisibaa Ala ka ci fɔlen ye. ⁴ Ne bɛ nin sɛbɛn ci i ma, Tite, e min ye ne den tigitigi ye an ka jɛ dannaya sira la. An Fa Ala ni an Kisibaa Krisita Yesu ka nɛɛma ni dususuma di i ma. ⁵ Ne ye i to Krete walisa ko minnu ɲɛnabɔbali tora, i ka olu ɲɛnabɔ koɲuman. I ka egilisi cɛkɔrɔba dɔw sigi duguw bɛɛ kelen-kelen kɔnɔ, i ko ne y’a fɔ i ye cogo min na. ⁶ Cɛkɔrɔba ka kɛ jalakibali ye, muso kelen tigi. A denw ka kɛ dannabaaw ye, a kana sɔrɔ ko u tɔgɔ jugu bɛ fɔ u ka kakalaya ni kan bilali kosɔn. ⁷ Egilisi ɲɛminɛbaa ye Ala ka sokunnasigibaa ye, o de kosɔn wajibi don a ka kɛ jalakibali ye, a kana kɛ yɛrɛsagokɛla ye, a kana dimin joona, a kana kɛ dɔlɔtɔ ye, wala mɔgɔ farinma, wala tɔnɔ jugu ɲinina. ⁸ A ka kɛ dunan lajiginbaa ye, ko ɲuman kanubaa. A ka kɛ hakiliman ye, tilennen, Ala ɲɛsiranbaa, yɛrɛminɛbaa. ⁹ A nɔrɔlen ka to kalan sɛbɛ la i ko a kalanna cogo min na, walisa a ka se ka mɔgɔw laadi ka kɛɲɛ ni tiɲɛ kuma kalan ye, ka sɔsɔlikɛlaw da la kumaw ban. ¹⁰ Ayiwa, mɔgɔ murutilen caman bɛ yen minnu bɛ mɔgɔw lafili ni u ka kuma kunntanw ye. U caman ye Yahutuw ye minnu tuubira. ¹¹ U daw ka kan ka tugu, sabu u bɛ du dɔw mɔgɔw bɛɛ lafili, ka mɔgɔw kalan kuma fɔbaliw la wari kosɔn. ¹² Kreteka dɔ, u ka kira kelen y’a fɔ ko: «Kretekaw ye nkalontigɛlaw ye tuma bɛɛ, wara juguw, salabaatɔ nugumaw.» ¹³ O kuma ye tiɲɛ de ye. O de y’a to i ka u kɔrɔfɔ kosɛbɛ, walisa u ka sabati dannaya la, ¹⁴ u kana tugu Yahutuw ka nsiirinw ni mɔgɔw ka ci fɔlenw la, o mɔgɔ minnu ye tiɲɛ sira bila. ¹⁵ Fɛn bɛɛ jɛlen don mɔgɔ senumaw fɛ, nka foyi jɛlen tɛ mɔgɔ nɔgɔlen dannabaliw ɲɛ na, olu hakili ni u dusukunw nɔgɔlen don. ¹⁶ U b’a fɔ ko u bɛ Ala dɔn, nka u bɛ u dalacɛ a la u ka kɛwalew fɛ. U haramulen murutilen don, u tɛ se ka kɛwale ɲuman si kɛ.

¹ E kɔni, i ka mɔgɔw kalan ka kɛɲɛ ni kalan sɛbɛ ye. ² I k’a fɔ ko cɛkɔrɔbaw ka kɛ yɛrɛminɛbaaw, mɔgɔ sɛbɛw, hakilimanw ye. U ka kɛ sabatilenw ye dannaya ni kanuya ani muɲuli la. ³ I k’a fɔ ko musokɔrɔbaw fana taama cogo ka bɛn senuya ma. U kana kɛ mɔgɔ tɔgɔ tiɲɛnbaaw ye, wala dɔlɔtɔw. U ka kɛ laadili ɲuman dibaaw ye, ⁴ walisa u ka muso misɛnw kalan ko u ka u cɛw ni u denw kanu, ⁵ ko u ka kɛ muso hakilimanw jɛlenw ye, ko u ka kɛ so kɔnɔ baarakɛlaw ye, ka kɛ hinɛmaw ye, ka kolo u yɛrɛw cɛw ye, walisa Ala ka kuma tɔgɔ kana tiɲɛ. ⁶ Kamalenw fana laadi ko u ka kɛ hakilimanw ye. ⁷ I yɛrɛ fana ka kɛ ɲɛjirabaa ye kɛwale ɲumanw bɛɛ la. I ka mɔgɔw kalan ni jɛlenya ni sɛbɛ ye. ⁸ I ka kuma kɛnɛw fɔ minnu tɛ se ka sɔsɔ, walisa i sɔsɔbaa ka maloya, katuguni a tɛ se ka ko jugu si sɔrɔ k’a fɔ an ma. ⁹ Baaradenw laadi ko u ka u kuntigiw kan minɛ ka u diyaɲekow kɛ ko bɛɛ la, ni sɔsɔli tɛ. ¹⁰ Ko u kana u kuntigiw ka fɛn si ta, nka u ka kɛ dannamɔgɔw ye fɛn bɛɛ la, walisa u ka an Kisibaa Ala ka kalan bonya ko bɛɛ la. ¹¹ Ala ka nɛɛma y’i jira mɔgɔw bɛɛ kisili kosɔn. ¹² O nɛɛma bɛ an kalan ko an ka ban Ala ɲɛsiranbaliya ni nin diɲɛ nege juguw ma, ka taama nin waati la ni hakili sigilen ni tilennenya ni Ala ɲɛsiran ye, ¹³ ka an ka Alaba, an Kisibaa Yesu Krisita nɔɔrɔ jirali makɔnɔ, o min ye an jigi dubama ye. ¹⁴ Yesu Krisita ye a yɛrɛ di an kosɔn, walisa a ka an kunmabɔ ko juguw bɛɛ ma, ka mɔgɔ dɔw saniya ka u kɛ a yɛrɛ kelenpe taw ye, u jijalen kɛwale ɲumanw bɛɛ kɛli la. ¹⁵ I ka mɔgɔw kalan ten ka u laadi, ka u kɔrɔfɔ ni kuntigiya fanga bɛɛ ye. Mɔgɔ si kana i dɔgɔya.

¹ I ka u hakili jigin a la ko u ka kolo gɔfɛrɛnaman ni kuntigiw ye, ko u ka olu kan minɛ, ani u labɛnnen ka sɔrɔ kɛwale ɲumanw bɛɛ kɛli kama. ² U kana kuma jugu fɔ mɔgɔ si ma. U kana kɛ kɛlɛtigɛlaw ye, nka u ka sabali ka dusu majiginlen jira mɔgɔw bɛɛ la, ³ katuguni an fana tun ye hakilintanw ye ka kɔrɔ, ani kan bilabaaw, ni mɔgɔ lafililenw. An tun ye nege sifa bɛɛ ni ɲɛnajɛ sifa bɛɛ ka jɔnw ye. An tun bɛ taama juguya ni keleya la. An tun ka kan ni koniya ye, an tun bɛ ɲɔgɔn koniya fana. ⁴ Nka an Kisibaa Ala ka ɲumaya ni a ka kanuya minnu bɛ mɔgɔw ta fan fɛ, olu y’u jira tuma min na, a ye an kisi. ⁵ An yɛrɛw ye kɛwale ɲuman minnu kɛ, olu nɔ tɛ dɛ, a yɛrɛ ka makari nɔ don, o kɛra bange ko kura koli ani Ni Senu ka kurayali fɛ. ⁶ A ye o Ni Senu jigin an kan ka caya an Kisibaa Yesu Krisita barika la, ⁷ walisa jo dilen kɔ an ma a ka nɛɛma barika la, an ka ɲɛnamaya banbali sɔrɔ, an jigi bɛ o min kan. ⁸ O kuma jɛlen don, ne b’a fɛ i ka o fɔ k’a gɛlɛya, walisa minnu dara Ala la, olu ka u jija kɛwale ɲumanw la. O kow ka ɲi, mɔgɔw bɛ nafa sɔrɔ u la. ⁹ I yɛrɛ kɔlɔsi ɲininkali kunntanw ni buruju kow ni kɛlɛw ani sariya ko sɔsɔli la, katuguni olu ye ko fufafu nafantanw ye. ¹⁰ Min bɛ farali kɛ egilisi la, i ka o lasɔmi siɲɛ kelen, siɲɛ fila, o kɔ, i ka mabɔ o tigi la. ¹¹ I b’a dɔn ko o mɔgɔ sifa filila ka sira bila, a bɛ to jurumu kɛli la k’a yɛrɛ jalaki. ¹² Ne mana Artɛmas wala Tisike ci i ma, i k’i jija ka na ne yɔrɔ Nikopolis, k’a masɔrɔ ne y’a latigɛ ko ne bɛ fonɛnɛ kɛ yen. ¹³ I jija ka karamɔgɔ Zɛnasi ni Apolosi dɛmɛ u ka dugutaa ko la, walisa foyi kana dɛsɛ u la. ¹⁴ An ka mɔgɔw fana ka dege kɛwale ɲuman kɛli la, walisa u ka se ka dɔw mago ɲɛ, u kana kɛ mɔgɔw ye, nafa tɛ minnu na. ¹⁵ Minnu bɛ ne fɛ yan, olu bɛɛ bɛ i fo. Minnu bɛ an kanu dannaya sira la, i ka olu fo. Ala ka nɛɛma ka kɛ aw bɛɛ fɛ.