JIRALI

JIRALI

¹ Nin ye Yesu Krisita ka jirali ye, Ala ye min di a ma, walisa ko minnu ka kan ka kɛ sɔɔni, a ka olu jira a ka jɔnw la. Ala ye a ka mɛlɛkɛ ci a ka jɔnkɛ Yuhana ma ka o kow jira ale la. ² Yuhana ye ko minnu ye Ala ka kuma ni Yesu Krisita seereya ko la, a ye olu bɛɛ seereya kɛ. ³ Minnu bɛ nin kitabu kiraya kumaw kalan, ani minnu bɛ u lamɛn ka o ko sɛbɛnnenw mara, olu ye dubadenw ye! Katuguni u waati surunyara. ⁴ Egilisi woloɛula minnu bɛ Asi jamana la, ne Yuhana bɛ nin sɛbɛn ci olu ma. Min bɛ, ni a tun bɛ, ni a bɛ na, ani Ni woloɛula minnu bɛ o ka masasigilan ɲɛ kɔrɔ, ⁵ ani Yesu Krisita, Seere Tilennen, suw la kununlen fɔlɔ, dugukolo kan masakɛw ka Masakɛ, olu ka nɛɛma ni dususuma di aw ma. Min ye an kanu ka an tila an ka jurumuw la ni a yɛrɛ joli ye, ⁶ ka an kɛ masaya ni sarakalasebaaw ye a Fa Ala ye, nɔɔrɔ ni sebaaya ye o de ta ye badaa-badaa! Amiina. ⁷ A filɛ, a bɛ na sankabaw kan! Mɔgɔw bɛɛ n’a ye. Minnu y’a sɔgɔ, olu fana n’a ye. Dugukolo kan siyaw bɛɛ na kasi a kosɔn. Naamu! Amiina! ⁸ «Ne ye Alifa ni Omega ye.» Matigi Ala ko ten, o min bɛ, ni a tun bɛ, ni a bɛ na, Sebaayabɛɛtigi. ⁹ Ne Yuhana min ye aw balima ni aw jɛɲɔgɔn ye Yesu ka tɔɔrɔ ni a ka masaya ni a ka muɲuli la, ne tun bɛ Patmos gun kan Ala ka kuma fɔli ni Yesu ka seereya kosɔn. ¹⁰ Ne kɛra Ni la Matigi ka don na. Ne ye kumakanba mɛn ne kɔfɛ, i n’a fɔ burukan. ¹¹ A ko: «I ɲɛ bɛ min na, i ka o sɛbɛn kitabu la k’a ci nin egilisi woloɛula ma, Efese ani Smirne ni Pɛrgamɛ ni Tiyatire ni Sarde ni Filadɛlfi ani Laodise.» ¹² Kan min tun bɛ kuma ne fɛ, ne ye ne yɛlɛma ka o fɔbaa filɛ. Ne ye ne yɛlɛma minkɛ, ne ye sanu fitinɛ woloɛula ye. ¹³ Ne ye fɛn dɔ ye fitinɛ woloɛula cɛmancɛ la, o bɔlen bɛ mɔgɔ fɛ. Dulɔki jamanjan bɛ a kan na, sanu cɛsirilan sirilen bɛ a disi la. ¹⁴ A kunsigi jɛra i ko sagasi jɛman, i ko neje. A ɲɛw bɛ i ko tasuma mana. ¹⁵ A senw bɛ i ko nsiranɛgɛ mɔlen yɛrɛntɔ fan na. A kumakan bɛ i ko ji caman suruntu kan. ¹⁶ Dolo woloɛula bɛ a kininbolo la. Npan fan fila da duman bɔlen bɛ a da la. A ɲɛda bɛ i ko tile, tilegan waati la. ¹⁷ Ne y’a ye minkɛ, ne binna a sen kɔrɔ i n’a fɔ su. A ye a kininbolo da ne kan, a ko: «I kana siran. Ne ye fɔlɔ ni laban ye. ¹⁸ Ne ɲɛnama don, ne tun sara, a filɛ, ne ɲɛnama bɛ to badaa-badaa. Saya ni Hadɛsi konnɛgɛw bɛ ne bolo. ¹⁹ I ye fɛn minnu ye, ani fɛn minnu bɛ yen, ani fɛn minnu bɛna kɛ ninnu kɔ, i ka olu sɛbɛn. ²⁰ I ye dolo woloɛula minnu ye ne kininbolo la, ani sanu fitinɛ woloɛula, olu gundo filɛ nin ye: O dolo woloɛula ye egilisi woloɛula ka mɛlɛkɛw ye, o fitinɛ woloɛula ye egilisi woloɛula de ye.

¹ «Egilisi min bɛ Efese, i ka sɛbɛn ci o ka mɛlɛkɛ ma ko: «Dolo woloɛula bɛ min kininbolo la, ni o bɛ taama sanu fitinɛ woloɛula cɛmancɛ la, o ko: ² Ne ye i ka ko kɛtaw dɔn, ani i ka baaraba ni i ka muɲuli. Ne y’a dɔn ko i tɛ se ka mɔgɔ juguw ka kow muɲu. Minnu b’a fɔ ko u ye cidenw ye, k’a sɔrɔ u tɛ o ye, i ye olu kɔrɔbɔ ka u sɔrɔ nkalontigɛlaw ye. ³ I bɛ muɲuli kɛ, i ye tɔɔrɔ muɲu ne kosɔn, i ma sɛgɛn. ⁴ Nka ne bɛ i jalaki, katuguni i ye i ka kanuya fɔlɔ bila. ⁵ I binna ka bɔ yɔrɔ min na, i hakili jigin o la ka nimisa i ka jurumuw la ka i ka kɛwale fɔlɔw kɛ. Ni i ma nimisa, ne bɛ na i yɔrɔ ka i ka fitinɛ ta ka bɔ a yɔrɔ la. ⁶ O bɛɛ n’a ta nin de bɛ i fɛ yen, Nikolayitew ka kɛwalew man di i ye fewu, u man di ne fana ye. ⁷ «Ni Senu bɛ min fɔ egilisiw ye, tulo bɛ min fɛ, o ka o lamɛn! «Min mana se sɔrɔ, ɲɛnamaya jiri min bɛ Ala ka alijɛnɛ la, ne na o den dɔ di o ma, a k’a dun. ⁸ «Egilisi min bɛ Smirne, i ka sɛbɛn ci o ka mɛlɛkɛ ma ko: «Min ye fɔlɔ ni laban ye, ni a tun sara ka ɲɛnamaya ko kura, o ko: ⁹ Ne bɛ i ka tɔɔrɔ ni i ka kɔli dɔn, nka i ye fɛntigi de ye! Minnu b’a fɔ ko u ye Yahutuw ye, k’a sɔrɔ u tɛ o ye, nka u ye Sitanɛ batoso jama ye, ne bɛ olu bɛɛ ka Ala tɔgɔ tiɲɛni dɔn. ¹⁰ Tɔɔrɔ min na i sɔrɔ, i kana siran o ɲɛ. A filɛ, Sitanɛ na aw dɔw bila kaso la ka aw kɔrɔbɔ. Aw na tɔɔrɔ tile tan kɔnɔ. I ka kɛ dannamɔgɔ ye fo ka se saya ma. Ni i ye o kɛ, ne na ɲɛnamaya masafugula di i ma. ¹¹ «Ni Senu bɛ min fɔ egilisiw ye, tulo bɛ min fɛ, o ka o lamɛn! «Min mana se sɔrɔ, saya filanan tɛna se o ma. ¹² «Egilisi min bɛ Pɛrgamɛ, i ka sɛbɛn ci o ka mɛlɛkɛ ma ko: «Npan fan fila da duman bɛ min bolo, o ko: ¹³ Ne bɛ i sigi yɔrɔ dɔn. O ye Sitanɛ ka masasigilan de ye. Ne ka seere tilennen Antipas fagara aw cɛma Sitanɛ sigi yɔrɔ la tuma min na, o tuma la i nɔrɔla ne la, i ma i dalacɛ ne dannaya la. ¹⁴ Nka ne bɛ i jalaki ko dɔw la. Mɔgɔ dɔw bɛ i fɛ yen, olu sɔnna Balam ka kalan ma. O de ye Balak kalan ko a ka sentalon fɛn da Israɛl bɔnsɔn ɲɛ, walisa u ka bolisɔn sogo dun, ka jatɔya kɛ. ¹⁵ Dɔw fana bɛ aw fɛ yen, olu sɔnna Nikolayitew ka kalan ma. ¹⁶ O de kosɔn i ka nimisa i ka jurumuw la. N’o tɛ, ne bɛ teliya ka na i yɔrɔ ka olu kɛlɛ ni ne da la npan ye. ¹⁷ «Ni Senu bɛ min fɔ egilisiw ye, tulo bɛ min fɛ, o ka o lamɛn! «Min mana se sɔrɔ, ne na manɛ dogolen dɔ di o ma, ka kabakurun jɛman di a ma fana. Tɔgɔ kura sɛbɛnnen bɛ a kan, mɔgɔ si tɛ o dɔn fɔ a sɔrɔbaa. ¹⁸ «Egilisi min bɛ Tiyatire, i ka sɛbɛn ci o ka mɛlɛkɛ ma ko: «Ala Denkɛ, o min ɲɛw bɛ i ko tasuma mana, ni a senw bɛ i ko nsiranɛgɛ yɛrɛntɔ, o ko: ¹⁹ Ne bɛ i ka ko kɛtaw dɔn, ani i ka kanuya ni i ka dannaya ni i ka baara ni i ka muɲuli ani i ka ko kɛtaw laban, olu ka ca fɔlɔ taw ye. ²⁰ Nka ne bɛ i jalaki, katuguni i bɛ o muso Jɛzabɛl to i fɛ yen, o min b’a fɔ ko a yɛrɛ ye kira ye, a bɛ ne ka baaradenw kalan ka u lafili, fo u bɛ kakalaya kɛ ka bolisɔn sogo dun. ²¹ Ne ye waati di a ma walisa a ka nimisa, nka a ma sɔn ka nimisa a ka kakalaya la. ²² O de kosɔn ne na a bila bana dalan kan. Minnu ye jatɔya kɛ a fɛ, ne na olu fana coron tɔɔrɔba la, ni u ma nimisa u ka kɛwalew la. ²³ Ne na a denw fana faga. Egilisiw bɛɛ n’a dɔn ko ne de ye mɔgɔw bɛɛ ka miiriliw ni u kɔnɔna kow bɛɛ sɛgɛsɛgɛbaa ye. Ne na aw bɛɛ kelen-kelen sara ka kɛɲɛ ni aw ka kɛwalew ye. ²⁴ «Nka aw Tiyatireka tɔw kɔni, aw minnu ma sɔn o kalan ma, minnu ma Sitanɛ ka ko dunbaw dɔn, mɔgɔ dɔw b’a wele ten, ne b’a fɔ aw ye ko ne tɛna doni wɛrɛ da aw kun. ²⁵ Nka min bɛ aw bolo, aw ka o minɛ kosɛbɛ sani ne ka na. ²⁶ Min mana se sɔrɔ ka ne ka kɛwalew mara fo a laban, ne na fanga di o ma siyaw kun na. ²⁷ A na u mara ni nɛgɛ bere ye i ko bɔgɔ dagaw bɛ ɲɔɲɔ cogo min na, i ko ne fana ye fanga sɔrɔ ne Fa fɛ cogo min na. ²⁸ Ne na kɛnɛbɔda dolo fana di a ma. ²⁹ «Ni Senu bɛ min fɔ egilisiw ye, tulo bɛ min fɛ, o ka o lamɛn!

¹ «Egilisi min bɛ Sarde, i ka sɛbɛn ci o ka mɛlɛkɛ ma ko: «Ala Ni woloɛula ani dolo woloɛula bɛ min bolo, o ko: Ne bɛ i ka kɛwalew dɔn. Mɔgɔw b’a fɔ ko i ɲɛnama don, k’a sɔrɔ i salen don. ² I ka kɔlɔsili kɛ, a tɔ min bɛ ɲini ka sa, i ka o sabati, katuguni ne ma i ka ko kɛtaw dafalen sɔrɔ ne ka Ala ɲɛ kɔrɔ. ³ I ye kalan min sɔrɔ, ani i y’a mɛn cogo min na, i ka i hakili jigin o la ka o mara ka nimisa i ka jurumuw la. Ni i ma kɔlɔsili kɛ, ne bɛna bala i la i ko nson. Ne bɛ na waati min na, i tɛna o dɔn. ⁴ O bɛɛ n’a ta mɔgɔ dɔw bɛ i fɛ yen Sarde minnu ma u ka finiw nɔgɔ. Fini jɛmanw na don u kan na, u na taama ne fɛ, sabu u ka kan n’a ye. ⁵ Min mana se sɔrɔ, fini jɛmanw na don o kan na. Ne tɛna a tɔgɔ jɔsi ka bɔ ɲɛnamaya kitabu la. Ne n’a fɔ ne Fa ni a ka mɛlɛkɛw ɲɛ kɔrɔ ko o tigi ye ne ta ye. ⁶ «Ni Senu bɛ min fɔ egilisiw ye, tulo bɛ min fɛ, o ka o lamɛn! ⁷ «Egilisi min bɛ Filadɛlfi, i ka sɛbɛn ci o ka mɛlɛkɛ ma ko: «Senuma, Sɛbɛma, Dawuda ka konnɛgɛ bɛ min bolo, o min bɛ da yɛlɛ, ni mɔgɔ si tɛ se ka a tugu, ni a bɛ da tugu, mɔgɔ si tɛ se ka a yɛlɛ, o ko: ⁸ Ne bɛ i ka ko kɛtaw dɔn. A filɛ, ne ye da yɛlɛlen bila i ɲɛ, mɔgɔ si tɛ se k’a tugu. I barika ka dɔgɔ, o bɛɛ n’a ta i ye ne ka kuma mara, i ma i dalacɛ ne tɔgɔ la. ⁹ Sitanɛ batoso jama minnu ko u ye Yahutuw ye, k’a sɔrɔ u tɛ o ye, u bɛ nkalon tigɛ, ne n’a to olu ka na u biri i sen kɔrɔ, k’a dɔn ko ne ye i kanu. ¹⁰ I ye ne ka muɲuli kuma mara. O de kosɔn tɔɔrɔ waati min bɛna se diɲɛ bɛɛ ma ka dugukolo kan mɔgɔw bɛɛ kɔrɔbɔ, ne fana na i mara o waati la. ¹¹ Ne bɛ na sɔɔni. Min bɛ i bolo, o minɛ kosɛbɛ, walisa mɔgɔ si kana i ka masafugula bɔsi i la. ¹² Min mana se sɔrɔ, ne na o kɛ samasen ye ne ka Ala batosoba kɔnɔ, a tɛna bɔ yen tun abada. Ne na ne ka Ala tɔgɔ sɛbɛn a kan ani ne ka Ala ka dugu Jerusalɛm kura tɔgɔ, o bɛ jigin ka bɔ sankolo la ne ka Ala yɔrɔ. Ne na ne tɔgɔ kura fana sɛbɛn a kan. ¹³ «Ni Senu bɛ min fɔ egilisiw ye, tulo bɛ min fɛ, o ka o lamɛn! ¹⁴ «Egilisi min bɛ Laodise, i ka sɛbɛn ci o ka mɛlɛkɛ ma ko: «Amiina, Seere Tilennen Sɛbɛma, Ala ka dafɛn bɛɛ jubɔbaa, o ko: ¹⁵ Ne bɛ i ka ko kɛtaw dɔn. I man suma, i man kala. Ni i tun ka suma wala ni i tun ka kala, o tun na diya ne ye. ¹⁶ Nka i bɛ i ko ji wɔlɔkɔlen, i man suma, i man kala, o de kosɔn ne bɛna i fɔɔnɔ ka bɔ ne da la. ¹⁷ I b’a fɔ ko i ye faama ye, ko i fɛntigiyara kosɛbɛ, ko i mago tɛ foyi la, k’a sɔrɔ i m’a dɔn ko i ye sɛgɛnbaatɔ ni ɲɛnibaatɔ ni kɔlibaatɔ ni fiyentɔ ani farilankolon ye. ¹⁸ O de y’a to ne bɛ i laadi ko i ka sanu yɛrɛwolo san ne fɛ, walisa i ka kɛ fɛntigi ye, ka fini jɛmanw san walisa ka fini don i kan na, walisa i farilankolonya kana ye ka i maloya. I ka ɲɛdimi fura san ka o mun i ɲɛw la, walisa i ka yeli kɛ. ¹⁹ Ne bɛ minnu kanu, ne bɛ olu kɔrɔfɔ ka u kolo. Ayiwa i ka i dusu bɛɛ don nimisali la. ²⁰ Ne jɔlen filɛ da la ka da kɔnkɔn. Ni mɔgɔ dɔ ye ne kan mɛn ka da yɛlɛ ne ye, ne na don o yɔrɔ ka dumuni kɛ o fɛ, a na dumuni kɛ ne fɛ. ²¹ Min mana se sɔrɔ, ne na o lasigi ne fɛ ne ka masasigilan kan, i ko ne fana ye se sɔrɔ ka sigi ne Fa fɛ a ka masasigilan kan cogo min na. ²² «Ni Senu bɛ min fɔ egilisiw ye, tulo bɛ min fɛ, o ka o lamɛn!»

¹ O kow kɔ, ne ye yeli kɛ, a filɛ, da yɛlɛlen bɛ sankolo la. Ne tun ye kan fɔlɔ min mɛn i ko burukan ni a kumana ne fɛ, o ko: «Yɛlɛn yan, ko minnu ka kan ka kɛ ninnu kɔ, ne na olu jira i la.» ² O yɔrɔnin kelen ne kɛra Ni la. A filɛ, masasigilan tun bɛ sankolo la. Dɔ sigilen bɛ a kan. ³ Min sigilen bɛ, n’i y’o filɛ, i n’a fɔ jaspe ni sardwanɛ kabakurunw don. Ala ka muru ye o masasigilan lamini, n’i y’a filɛ, i n’a fɔ emerode kabakurun don. ⁴ Masasigilan mugan ni naani ye o masasigilan lamini. Cɛkɔrɔba mugan ni naani sigilen bɛ o masasigilanw kan, fini jɛmanw bɛ u kan na. Sanu masafugula bɛ u kun na. ⁵ San yɛgɛyɛgɛ ni kumakanw ni sanpɛrɛn bɛ bɔ o masasigilan na. Tamɔɲɔn manalen woloɛula bɛ masasigilan ɲɛfɛ. Olu ye Ala Ni woloɛula de ye. ⁶ Masasigilan ɲɛfɛla bɛ i ko wɛrɛ baji, i n’a fɔ krisital. Fɛn ɲɛnama naani bɛ u cɛmancɛ la ka masasigilan lamini. U ɲɛfɛla ni u kɔfɛla bɛɛ falen bɛ ɲɛkisɛw la. ⁷ O fɛn ɲɛnama fɔlɔ bɛ i ko waraba, a filanan bɛ i ko misiden, a sabanan ɲɛda bɛ i ko mɔgɔ ta, a naaninan bɛ i ko bɔn pantɔ. ⁸ Kamanfura wɔɔrɔ bɛ o fɛn ɲɛnama naani bɛɛ kelen-kelen na, u kɔnɔ la ni u kɛrɛw bɛɛ falen bɛ ɲɛkisɛw la. U tɛ kuma dabila su fara tile kan ko: «Senuma, senuma, senuma, Matigi Ala, Sebaayabɛɛtigi, min tun bɛ, ni a bɛ, ani a bɛ na.» ⁹ Ni fɛn ɲɛnama naani bɛ dɔnkili da ka masasigilan kan sigibaa bonya k’a tanu ka barika da a ye tuma o tuma, o min ɲɛnama bɛ to badaa-badaa, ¹⁰ o tuma la o cɛkɔrɔba mugan ni naani bɛ u bin duguma o masasigilan kan sigibaa ɲɛ kɔrɔ k’a bato, o min ɲɛnama bɛ to badaa-badaa. U bɛ u ka masafugulaw bila masasigilan kɔrɔ k’a fɔ ko: ¹¹ «An Matigi ni an ka Ala, i ka kan ni nɔɔrɔ ni bonya ani sebaaya ye, katuguni e de ye fɛn bɛɛ dabaa ye, u bɛ, ani u dara ka kɛɲɛ ni i sago ye.»

¹ Ne ye kitabu melekelen ye masasigilan kan sigibaa kininbolo la. A kɔnɔ ni a kɔkanna bɛɛ sɛbɛnnen bɛ. Taamashyɛn woloɛula kɛra k’a datugu. ² Ne ye mɛlɛkɛ barikama ye, a bɛ welewele da ni kanba ye ko: «Jɔni ka kan ni o taamashyɛn woloɛula wulili ye ka o kitabu dayɛlɛ?» ³ Mɔgɔ si ma sɔrɔ sankolo la wala dugukolo kan wala dugukolo jukɔrɔ min bɛ se ka o kitabu dayɛlɛ k’a kɔnɔ filɛ. ⁴ Ne tun bɛ kasi kosɛbɛ, katuguni mɔgɔ si ma sɔrɔ min ka kan ni kitabu dayɛlɛli ye k’a kɔnɔ filɛ. ⁵ O cɛkɔrɔbaw la kelen y’a fɔ ne ye ko: «I kana kasi. A filɛ, waraba min bɔra Juda siya la, Dawuda Bɔnsɔn, o ye se sɔrɔ ka o taamashyɛn woloɛula wuli ka o kitabu dayɛlɛ.» ⁶ Ne ye Sagaden jɔlen ye, o masasigilan ni o fɛn ɲɛnama naani ni o cɛkɔrɔba mugan ni naani cɛmancɛ la, i n’a fɔ a tun fagara. Biɲɛkolo woloɛula ni ɲɛkisɛ woloɛula b’a la, olu ye Ala Ni woloɛula ye, u cilen bɛ ka taa dugukolo yɔrɔ bɛɛ la. ⁷ Sagaden y’i madon ka o kitabu minɛ ka bɔ masasigilan kan sigibaa kininbolo la. ⁸ A ye kitabu minɛ minkɛ, o fɛn ɲɛnama naani ni o cɛkɔrɔba mugan ni naani y’u bin duguma Sagaden ɲɛ kɔrɔ. Nkɔni bɛ u bɛɛ kelen-kelen bolo, ani sanu jifilenw, olu falen bɛ wusulan suma duman na, o ye Ala ka mɔgɔ senumaw ka Ala deliliw ye. ⁹ U bɛ dɔnkili kura da ko: «E de ka kan ni o kitabu minɛli ye ka a taamashyɛnw wuli, katuguni i fagara, i ye mɔgɔ dɔw kunmabɔ Ala ye ni i joli ye, ka bɔ bɔnsɔnw bɛɛ ni kanw bɛɛ ni mɔgɔw bɛɛ ani siyaw bɛɛ la. ¹⁰ I ye u kɛ masaya ye, ani sarakalasebaaw an ka Ala ye. U na sigi masaya la dugukolo kan.» ¹¹ Ne ye yeli kɛ, ne ye mɛlɛkɛ caman kan mɛn, u bɛ masasigilan ni fɛn ɲɛnamaw ni cɛkɔrɔbaw lamini. U dama ye mɛlɛkɛ waa tan sigiyɔrɔma waa tan ye, ani mɛlɛkɛ waa kelen sigiyɔrɔma waa caman caman. ¹² U b’a fɔ ni kanba ye ko: «Sagaden min fagara, o ka kan ni sebaaya ni fɛntigiya ni hakilitigiya ni fanga ni bonya ni nɔɔrɔ ani tanuli ye.» ¹³ Sankolola fɛnw bɛɛ ni dugukolo kan fɛnw ni dugukolo jukɔrɔ fɛnw ani kɔgɔji kan fɛnw ni a kɔnɔ fɛnw bɛɛ, ne ye olu kan mɛn, u bɛ dɔnkili da ko: «Bonya ni tanuli ni nɔɔrɔ ani sebaaya ka kɛ masasigilan kan sigibaa ni Sagaden ta ye badaa-badaa.» ¹⁴ O fɛn ɲɛnama naani ko: «Amiina!» O cɛkɔrɔbaw y’u bin duguma ka batoli kɛ.

¹ Sagaden ye o taamashyɛn woloɛula la kelen wuli tuma min na, ne y’o ye. Ne ye o fɛn ɲɛnama naani la kelen kan mɛn i ko sanpɛrɛnkan, a ko: «Na!» ² Ne ye filɛli kɛ, so dɔ bɔra, dafe jɛ don. Min yɛlɛnnen bɛ a kan, kala n’a biɲɛ b’o bolo. Masafugula dira a ma, a setigima bɔra, a na se sɔrɔ. ³ A ye o taamashyɛn filanan wuli tuma min na, ne ye fɛn ɲɛnama filanan kan mɛn, a ko: «Na!» ⁴ So wɛrɛ bɔra, so bilen don. Min yɛlɛnnen bɛ a kan, se dira o ma ka hɛrɛ ban dugukolo kan, walisa mɔgɔw ka ɲɔgɔn faga. Npan jan dira a ma. ⁵ A ye taamashyɛn sabanan wuli tuma min na, ne ye fɛn ɲɛnama sabanan kan mɛn, a ko: «Na!» Ne y’a ye, a filɛ, so fin bɔra. Min yɛlɛnnen bɛ a kan, sumanikɛ ja bɛ o bolo. ⁶ Ne ye kan dɔ mɛn ka bɔ o fɛn ɲɛnama naani cɛmancɛ la i ko kumakan ko: «Kilo kelen alikama bɛ kɛ tile kelen baara sara ye. Kilo saba ɲɔ bɛ kɛ tile kelen baara sara ye. I kana tulu ni diwɛn tiɲɛ.» ⁷ A ye taamashyɛn naaninan wuli tuma min na, ne ye fɛn ɲɛnama naaninan kan mɛn, a ko: «Na!» ⁸ Ne y’a ye, so dɔ bɔra, dafe mɔɲɔn don. Min yɛlɛnnen bɛ a kan, o tɔgɔ ko Saya. Hadɛsi tugura a nɔfɛ. Se dira u ma dugukolo tila naaninan kan, walisa u ka mɔgɔw faga ni npan ani kɔngɔba ni fiɲɛbana ani dugukolo kan wara juguw ye. ⁹ A ye taamashyɛn duurunan wuli tuma min na, mɔgɔ minnu fagara Ala ka kuma ni u ka seereya kosɔn, ne ye olu niw ye saraka bɔlan jukɔrɔ. ¹⁰ U pɛrɛnna ni kanba ye ko: «Matigi, Senuma, Sɛbɛma, i bɛna kiri tigɛ ka an joli hakɛ bɔ dugukolo kan mɔgɔw la tuma jumɛn sa?» ¹¹ Dulɔki jan jɛman dira u bɛɛ kelen-kelen ma. A fɔra u ye ko u ka u lafiya waati dɔɔnin fɔlɔ, fo u baarakɛɲɔgɔnw ni u balimaw dama ka dafa, olu minnu ka kan ka faga i ko u yɛrɛw fagara cogo min na. ¹² A ye taamashyɛn wɔɔrɔnan wuli tuma min na, ne y’a ye, dugukolo yɛrɛyɛrɛba kɛra. Tile finna i ko cafu fini fin. Kalo yɔrɔ bɛɛ bilenna i ko joli. ¹³ Sankolola dolow binna duguma i n’a fɔ fiɲɛba ye torosun lamaga ka a den gerenw burun. ¹⁴ Sankolo bɔra a yɔrɔ la i n’a fɔ sɛbɛnfura bɛ meleke cogo min na. Kuluw bɛɛ ni gunw bɛɛ cɛra ka bɔ u ka yɔrɔw la. ¹⁵ Dugukolo kan masakɛw ni mɔgɔbaw ni kɛlɛ kuntigiw ni nafolobatigiw ni fangatigiw ani hɔrɔnw bɛɛ ni jɔnw bɛɛ, u bɛɛ y’u dogo kuluwow kɔnɔ ani kulu kan faraw cɛma. ¹⁶ U y’a fɔ kuluw ni faraw ye ko: «A’ ye bin an kan k’an dogo masasigilan kan sigibaa ɲɛda ɲɛ ani Sagaden ka diminya ɲɛ, ¹⁷ katuguni u ka diminya donba sera. Jɔni bɛ se ka jɔ?»

¹ O kow kɔ, ne ye mɛlɛkɛ naani jɔlen ye dugukolo seleke naani la. U ye diɲɛ fan naani fiɲɛw minɛ walisa fiɲɛ si kana ci dugukolo kan wala kɔgɔji wala jiri si kan. ² Ne ye mɛlɛkɛ dɔ wɛrɛ wulitɔ ye ka bɔ kɔrɔn yanfan fɛ. Ala ɲɛnama ka taamashyɛn b’a bolo. Dugukolo ni kɔgɔji tiɲɛni kow dira o mɛlɛkɛ naani minnu ma, o mɛlɛkɛ pɛrɛnna ni kanba ye k’a fɔ olu ye ko: ³ «Aw kana foyi kɛ dugukolo wala kɔgɔji wala jiriw la sani an ka taamashyɛn kɛ an ka Ala ka jɔnw tenw na.» ⁴ Taamashyɛn kɛra minnu tenw na, ne ye olu dama mɛn, olu ye mɔgɔ waa kɛmɛ ni binaani ni waa naani ye ka bɔ Israɛl bɔnsɔnw bɛɛ la. ⁵ Juda bɔnsɔn na, taamashyɛn kɛra mɔgɔ waa tan ni fila la, Rubɛn bɔnsɔn na, mɔgɔ waa tan ni fila, Gad bɔnsɔn na, mɔgɔ waa tan ni fila, ⁶ Asɛr bɔnsɔn na, mɔgɔ waa tan ni fila, Nefitali bɔnsɔn na, mɔgɔ waa tan ni fila, Manase bɔnsɔn na, mɔgɔ waa tan ni fila, ⁷ Simeɔn bɔnsɔn na, mɔgɔ waa tan ni fila, Levi bɔnsɔn na, mɔgɔ waa tan ni fila, Isakar bɔnsɔn na, mɔgɔ waa tan ni fila, ⁸ Zabulɔn bɔnsɔn na, mɔgɔ waa tan ni fila, Yusufu bɔnsɔn na, mɔgɔ waa tan ni fila, Benjamɛn bɔnsɔn na, mɔgɔ waa tan ni fila. Taamashyɛn kɛra olu bɛɛ la. ⁹ O kow kɔ, ne ye yeli kɛ, jamaba filɛ, mɔgɔ si tɛ se ka u dan. U bɔra siyaw bɛɛ ni bɔnsɔnw bɛɛ ni mɔgɔ sifaw bɛɛ ni kanw bɛɛ la. U jɔlen bɛ masasigilan ni Sagaden ɲɛ kɔrɔ. Dulɔki jan jɛmanw bɛ u kan na, ntamaro bolow bɛ u bolo. ¹⁰ U bɛ pɛrɛn ni kanba ye ko: «Kisili ye an ka masasigilan kan sigibaa Ala ani Sagaden ta ye.» ¹¹ O mɛlɛkɛw bɛɛ jɔlen bɛ ka masasigilan ni cɛkɔrɔbaw ani fɛn ɲɛnama naani lamini. U y’u bin u ɲɛdaw kan masasigilan ɲɛ kɔrɔ ka Ala bato. ¹² U ko: «Amiina! Tanuli ni nɔɔrɔ ni hakilitigiya ni barika dali ni bonya ni sebaaya ani fanga ye an ka Ala ta ye badaa-badaa. Amiina!» ¹³ Ayiwa o cɛkɔrɔbaw la kelen ye ne ɲininka ko: «Nin dulɔkijɛtigiw ye jɔnw ye? U bɔra min?» ¹⁴ Ne y’a jaabi ko: «Matigi, e de bɛ o dɔn.» A y’a fɔ ne ye ko: «Minnu bɔtɔ don o tɔɔrɔba la, ni u ye u ka dulɔkiw ko ka u jɛ Sagaden joli la, olu don. ¹⁵ O de kosɔn u bɛ Ala ka masasigilan ɲɛ kɔrɔ ka baara kɛ a ye a batosoba kɔnɔ su fara tile kan. Masasigilan kan sigibaa na a ka finiso biri u kun na. ¹⁶ Kɔngɔ ni minnɔgɔ tɛna u minɛ tun abada. Tile fana tɛna digi u la tun, wala funteni, ¹⁷ katuguni Sagaden min bɛ masasigilan cɛmancɛ la, o na kɛ u gɛnna ye ka taa ni u ye ɲɛnamaya ji boyi yɔrɔw la. Ala na ɲɛji bɛɛ cɛ ka bɔ u ɲɛw la.»

¹ Sagaden ye taamashyɛn woloɛulanan wuli tuma min na, mankan si ma bɔ sankolo la lɛrɛ tila ɲɔgɔn kɔnɔ. ² Mɛlɛkɛ woloɛula minnu bɛ jɔ Ala ɲɛ kɔrɔ, ne ye olu ye. Buru fyɛta woloɛula dira u ma. ³ Mɛlɛkɛ dɔ wɛrɛ nana i jɔ saraka bɔlan ɲɛfɛ. Sanu wusulan daga b’a bolo. Wusulan suma duman caman dira a ma, walisa a ka o ni Ala ka mɔgɔ senumaw bɛɛ ka Ala deliliw lase ɲɔgɔn fɛ sanu saraka bɔlan kan, o min bɛ masasigilan ɲɛfɛ. ⁴ O wusulan suma duman sisi ani Ala ka mɔgɔ senumaw ka deliliw yɛlɛnna ɲɔgɔn fɛ Ala ɲɛ kɔrɔ ka bɔ mɛlɛkɛ bolo. ⁵ O mɛlɛkɛ ye o wusulan daga ta k’a fa ni takamiw ye ka bɔ saraka bɔlan kan ka a kerun dugukolo kan. Sanpɛrɛn ni kumakanw ni san yɛgɛyɛgɛ ani dugukolo yɛrɛyɛrɛ kɛra. ⁶ Buru woloɛula bɛ mɛlɛkɛ woloɛula minnu bolo, olu ye u labɛn buru fyɛli kama. ⁷ Mɛlɛkɛ fɔlɔ ye buru fyɛ. Sanbɛlɛ ni tasuma ani joli kolonsolen kerunna dugukolo kan. Dugukolo tila sabanan jenina, jiriw tila sabanan fana jenina ani bin kɛnɛ bɛɛ jenina. ⁸ Mɛlɛkɛ filanan ye buru fyɛ. A kɛra i n’a fɔ kulu belebeleba tasumama kerunna kɔgɔji la. Kɔgɔji tila sabanan kɛra joli ye. ⁹ Kɔgɔji kɔnɔ fɛn ɲɛnamaw tila sabanan sara. Kɔgɔji kan kurunw tila sabanan tiɲɛnna. ¹⁰ Mɛlɛkɛ sabanan ye buru fyɛ. Dolo kunbaba binna ka bɔ sankolo la, a bɛ i ko tamɔɲɔn manamanatɔ. A binna bajiw tila sabanan ni ji boyiw kan. ¹¹ O dolo tɔgɔ ko Tale. Jiw tila sabanan kɛra tale ji ye. Mɔgɔ caman sara o jiw fɛ, katuguni u kunayara. ¹² Mɛlɛkɛ naaninan ye buru fyɛ. Tile tila sabanan gosira, ani kalo tila sabanan ni dolow tila sabanan, fo u yeelen tila sabanan kɛra dibi ye. Tile tila sabanan ni su tila sabanan, yeelen ma bɔ. ¹³ Ne ye yeli kɛ, ne ye bɔn pantɔ kan mɛn san fɛ fiɲɛ la. A y’a fɔ ni kanba ye ko: «Mɛlɛkɛ tɔ saba minnu bɛna buru fyɛ, bɔnɛ, bɔnɛ, bɔnɛ bɛ dugukolo kan mɔgɔw ye olu ka buru fyɛli kosɔn.»

¹ Mɛlɛkɛ duurunan ye buru fyɛ. Ne ye dolo bilen ye duguma ka bɔ sankolo la. Dingɛ dunba dan dɔnbali konnɛgɛ dira a ma. ² A ye o dingɛ dunba dayɛlɛ. Sisi bɔra o dingɛ dunba kɔnɔ i ko gan tugu tasumaba sisi. Tile ni fiɲɛ bɛɛ dibina o dingɛ dunba sisi fɛ. ³ Ntɔnw bɔra o sisi la ka jɛnsɛn dugukolo kan. Fanga dira u ma i n’a fɔ dugukolo kan bunteniw fanga. ⁴ A fɔra u ye ko u kana foyi kɛ bin na, wala fɛn kɛnɛ wala jiri si la, fɔ Ala ka taamashyɛn tɛ mɔgɔ minnu tenw na. ⁵ A ma daga u ye ka mɔgɔw faga, nka se dira u ma ka mɔgɔw tɔɔrɔ kalo duuru. U cin da tɔɔrɔ bɛ i ko bunteni cin da tɔɔrɔ. ⁶ O donw la mɔgɔw na saya ɲini, u tɛna a sɔrɔ. U na kɛ saya fɛ, saya na boli u ɲɛ. ⁷ O ntɔnw cogo kɛra i ko sow labɛnnen kɛlɛ kama. A bɛ i ko sanu masafugulaw bɛ u kunw na. U ɲɛdaw bɛ i ko mɔgɔ ɲɛda. ⁸ U kunsigi bɛ i ko muso kunsigi. U ɲinw bɛ i ko waraba ɲinw. ⁹ U disila fɛnw bɔlen bɛ nɛgɛ bɛnnanw fɛ. Ntɔnw kamanfuraw mankan bɔlen bɛ so wotorotigi caman bolitɔ mankan fɛ ka taa kɛlɛ la. ¹⁰ Kuw bɛ u la i ko bunteni ku ani ku nunkunw. U bɛ mɔgɔw tɔɔrɔ min kɛ kalo duuru kɔnɔ, o fanga bɛ u kuw de la. ¹¹ Masakɛ bɛ u kun na, o dingɛ dunba dan dɔnbali mɛlɛkɛ don. Hɛburukan na a tɔgɔ ko Abadɔn. Grɛkikan na a tɔgɔ ko Apolyon (o kɔrɔ ko halakilikɛla). ¹² Bɔnɛ fɔlɔ tɛmɛnna. A filɛ, bɔnɛ fila wɛrɛ bɛ na o kɔ. ¹³ Mɛlɛkɛ wɔɔrɔnan ye buru fyɛ. Sanu saraka bɔlan min bɛ Ala ɲɛ kɔrɔ, ne ye kumakan mɛn ka bɔ o seleke naani biɲɛkolo naani la. ¹⁴ Buru fyɛta bɛ mɛlɛkɛ wɔɔrɔnan min bolo, a y’a fɔ o ye ko: «Mɛlɛkɛ naani minnu sirilen bɛ Ufrate ba da la, i ka olu foni.» ¹⁵ O mɛlɛkɛ naani minnu labɛnnen tun bɛ nin san ni nin kalo ni nin don ani nin lɛrɛ kama, olu fonina walisa u ka mɔgɔw tila sabanan faga. ¹⁶ Kɛlɛbolo sotigiw dama tun ye miliyɔn kɛmɛ fila ye, o dama fɔra ne ye. ¹⁷ Ne ye min ye ne ka yeli fɛn na, o filɛ, sow ni u kan yɛlɛnbaaw. Nɛgɛbɛnnan minnu tun bɛ u fɛ, olu ɲɛw bilenna i ko tasuma, u ɲɛw bulama don i ko safir kabakurun, u ɲɛw bɛ i ko kiribi. Sow kunkolow bɔlen bɛ waraba kunkolo fɛ, tasuma ni sisi ni kiribi bɔra u daw la. ¹⁸ Tasuma ni sisi ani kiribi minnu bɔra o sow daw la, mɔgɔw tila sabanan fagara o tɔɔrɔ saba fɛ. ¹⁹ Olu fanga bɛ u daw ni u kuw la. U kuw bɛ i ko saw, kunkolo bɛ u kuw la, u bɛ mɔgɔw tɔɔrɔ ni olu ye. ²⁰ Mɔgɔ tɔ minnu ma faga o tɔɔrɔw fɛ, olu ma nimisa u bolow ka kɛwalew la. Jinɛw ni boli minnu dilara ni sanu ye wala warijɛ wala nsiranɛgɛ wala kabakurun wala jiri, u ma olu batoli dabila, olu minnu tɛ se ka yeli kɛ wala ka mɛnni kɛ wala ka taama. ²¹ U ma nimisa u ka mɔgɔ fagaliw wala u ka subaaya kow wala u ka kakalayaw wala u ka sonyaliw la.

¹ Ne ye mɛlɛkɛ barikama dɔ wɛrɛ jigintɔ ye ka bɔ sankolo la. Sankaba melekelen b’a la. Ala ka muru bɛ a kun na. A ɲɛda bɛ i ko tile. A senw bɛ i ko samasen tasumamaw. ² Kitabu fitinin dayɛlɛlen tun bɛ a bolo. A ye a kinin sen da kɔgɔji kan ka a numan sen da dugukolo kan. ³ A pɛrɛnna ni kanba ye, i n’a fɔ waraba konbokan. A pɛrɛnna tuma min na, sankulukan woloɛula bɔra. ⁴ Sankulukan woloɛula bɔra tuma min na, ne tun bɛna o sɛbɛn, nka ne ye kumakan mɛn ka bɔ sankolo la ko: «Sankulukan woloɛula ye ko minnu fɔ, i ka olu dogolen to, i kana u sɛbɛn.» ⁵ Ne ye mɛlɛkɛ min jɔlen ye kɔgɔji ni dugukolo kan, o ye a kininbolo kɔrɔta san fɛ ka i kali. ⁶ Min ɲɛnama bɛ to badaa-badaa, ni a ye sankolo ni a kɔnɔ fɛnw ni dugukolo ni a kan fɛnw ani kɔgɔji ni a kɔnɔ fɛnw bɛɛ da, a y’i kali o la ko: «Waati tɛna makɔnɔ tun. ⁷ Nka o mɛlɛkɛ woloɛulanan bɛna buru fyɛ don minnu na, o donw la Ala ka gundo na dafa, i ko a y’a fɔ a ka jɔn kiraw ye cogo min na.» ⁸ Ne tun ye kan min mɛn ka bɔ sankolo la, o kumana ne fɛ tun ko: «Taa, kitabu fitinin dayɛlɛlen minɛ ka bɔ mɛlɛkɛ bolo, o min jɔlen bɛ kɔgɔji ni dugukolo kan.» ⁹ Ne ye ne madon o mɛlɛkɛ la k’a fɔ a ye ko a ka o kitabu fitinin di ne ma. A y’a fɔ ne ye ko: «A minɛ k’a dun. A na i kɔnɔ kunaya, nka a na timiya i da la i ko di.» ¹⁰ Ne ye o kitabu fitinin minɛ mɛlɛkɛ bolo k’a dun. A timiyara ne da la i ko di, nka ne y’a dun tuma min na, a ye ne kɔnɔ kunaya. ¹¹ A fɔra ne ye tun ko: «Wajibi don i ka kiraya kɛ ko kura mɔgɔ sifa caman ni siya ni kan ani masakɛ caman ko la.»

¹ Sumanikɛ bɔkala dira ne ma, o bɔlen bɛ bere fɛ. A fɔra ne ye ko: «Wuli ka Alabatosoba suma, ani saraka bɔlan ni minnu bɛ batoli kɛ yen. ² Nka i ka Alabatosoba dukɛnɛ to yen, i kana o suma, katuguni o dira siya tɔw ma. U na dugu senuma kɛ u taamataama yɔrɔ ye kalo binaani ni fila kɔnɔ. ³ Ne na se di ne ka seere fila ma ka kiraya kɛ tile waa kelen ni kɛmɛ fila ni tile biwɔɔrɔ kɔnɔ ka cafu fini to u kan na.» ⁴ Olu ye olivesun fila ni fitinɛ fila ye, olu minnu jɔlen bɛ dugukolo Matigi ɲɛ kɔrɔ. ⁵ Ni mɔgɔ dɔ b’a fɛ ka ko jugu kɛ u la, tasuma bɛ bɔ u da la ka u juguw jeni. Ɔwɔ, ni mɔgɔ dɔ b’a fɛ ka ko jugu kɛ u la, wajibi don o tigi ka faga ten. ⁶ Se bɛ u fɛ ka sankolo datugu walisa sanji kana na u ka kiraya donw na. Se bɛ u fɛ fana ka ji yɛlɛma ka kɛ joli ye. Waati o waati ka di u ye ka dugukolo gosi ni tɔɔrɔ sifa bɛɛ ye, o se fana bɛ u fɛ. ⁷ U mana u ka seereya dafa tuma min na, wara jugu min bɛ yɛlɛn ka bɔ o dingɛ dunba dan dɔnbali kɔnɔ, o na u kɛlɛ ka se sɔrɔ u kan ka u faga. ⁸ U suw na to o duguba fɛrɛkɛnɛ la. Kuma kɔrɔma la, o dugu tɔgɔ ko Sodɔmɛ ni Misira. U Matigi gengenna jiri kan dugu min na, o don. ⁹ Mɔgɔ dɔw na u suw filɛ tile saba ni tila kɔnɔ, ka bɔ mɔgɔ sifaw bɛɛ ni bɔnsɔnw bɛɛ ni kanw bɛɛ ani siyaw bɛɛ la. U tɛna sɔn mɔgɔw ka u suw don. ¹⁰ Dugukolo kan mɔgɔw na ɲagali u kosɔn ka u ɲɛnajɛ, ka nilifɛnw ci ɲɔgɔn ma, katuguni o kira fila tun ye dugukolo kan mɔgɔw tɔɔrɔ kosɛbɛ haali. ¹¹ O tile saba ni tila tɛmɛnnen kɔ, Ala ye ni don u la, u y’u jɔ u sen na. Minnu tun bɛ u filɛ, siranba ye olu sɔrɔ. ¹² O seere fila ye kumakanba mɛn ka bɔ sankolo la ko: «A’ ye yɛlɛn yan.» U yɛlɛnna sankolo la sankaba kɔnɔ u juguw ɲɛ na. ¹³ O yɔrɔnin kelen dugukolo yɛrɛyɛrɛba kɛra. Dugu tila tannan binna, mɔgɔ waa woloɛula fagara o dugukolo yɛrɛyɛrɛli fɛ. Mɔgɔ tɔw ja tigɛra kosɛbɛ, u ye sankolola Ala bonya. ¹⁴ Bɔnɛ fila tɛmɛnna, a filɛ, bɔnɛ sabanan bɛ na sɔɔni. ¹⁵ Mɛlɛkɛ woloɛulanan ye buru fyɛ. Kumakanbaw bɔra sankolo la ko: «Kabini sisan diɲɛ masaya kɛra an Matigi ni a ka Krisita ta ye. A na sigi masaya la badaa-badaa.» ¹⁶ O cɛkɔrɔba mugan ni naani minnu sigilen bɛ u ka masasigilanw kan Ala ɲɛ kɔrɔ, olu y’u bin u ɲɛda kan ka Ala bato, ¹⁷ u ko: «Matigi Ala, Sebaayabɛɛtigi, e min bɛ, ni i tun bɛ, an bɛ barika da i ye, katuguni i ye i ka sebaayaba ta ka don i ka masaya la. ¹⁸ Siyaw tun diminna, nka i ka diminya sera. Suw kiri tigɛ tuma ani i ka jɔn kiraw sara tuma sera, ani i ka mɔgɔ senumaw ni i tɔgɔ ɲɛsiranbaaw, mɔgɔ dɔgɔmanninw ni mɔgɔbaw sara tuma sera. Dugukolo tiɲɛnbaaw halaki tuma fana sera.» ¹⁹ Alabatosoba min bɛ sankolo la, o da yɛlɛla. Ala ka layidu wagande yera a batosoba kɔnɔ. San yɛgɛyɛgɛ ani kumakanw ni sanpɛrɛnw kɛra. Dugukolo yɛrɛyɛrɛ ani sanbɛlɛ kunbaba fana kɛra.

¹ O kɔ, taamashyɛnba yera sankolo la. Muso dɔ filɛ, tile melekelen bɛ o la, kalo bɛ a sen kɔrɔ. Dolo tan ni fila masafugulama bɛ a kun na. ² A kɔnɔma don. A bɛ kulo tin dimin ni a tɔɔrɔ kosɔn. ³ O kɔ, taamashyɛn wɛrɛ yera sankolo la. Dragon kunbaba bilenman filɛ. Kunkolo woloɛula ani biɲɛkolo tan b’a la. Masafugula tun bɛ o kunkolow bɛɛ kelen-kelen na. ⁴ A ku ye sankolola dolow tila sabanan sama ka u fili duguma. O muso min bɛ ɲini ka jigin, dragon y’i jɔ o ɲɛ kɔrɔ, walisa muso mana jigin, a ka o den dun. ⁵ Muso jiginna denkɛ la. O na siyaw bɛɛ mara ni nɛgɛ bere ye. O den tufara ka taa Ala ni a ka masasigilan kɛrɛ fɛ. ⁶ O muso bolila ka taa kungokolon kɔnɔ. Ala tun ye yɔrɔ min labɛn a ye, a taara yen, walisa a ka balo yen tile waa kelen ni kɛmɛ fila ni tile biwɔɔrɔ kɔnɔ. ⁷ O tuma la kɛlɛ kɛra sankolo la. Misɛl ni a ka mɛlɛkɛw ye o dragon kɛlɛ. Dragon fana ni a ka mɛlɛkɛw ye kɛlɛ kɛ, ⁸ nka u ma se sɔrɔ. U ma yɔrɔ sɔrɔ sankolo la tun. ⁹ O dragon kunbaba, sa kɔrɔ, min tɔgɔ ko sendonbaa ni Sitanɛ, o min bɛ dugukolo kan mɔgɔw bɛɛ lafili, o ni a ka mɛlɛkɛw kerunna dugukolo kan ɲɔgɔn fɛ. ¹⁰ O kɔ, ne ye kumakanba mɛn ka bɔ sankolo la ko: «An ka Ala ka kisili ni a ka sebaaya ni a ka masaya sera sisan, ani a ka Krisita ka kuntigiya, katuguni an balimaw sendonbaa kerunna dugukolo kan, o min tun bɛ Ala ɲɛ kɔrɔ ka u sendon su fara tile kan. ¹¹ An balimaw ye se sɔrɔ a kan Sagaden joli barika la ani u ka seereya kuma barika la. U jɛna u ni kɔ fo ka se saya ma. ¹² O de kosɔn, sankolow ani u kɔnɔ fɛnw, aw ka ɲagali. Bɔnɛ bɛ dugukolo ni kɔgɔji ye, k’a masɔrɔ Sitanɛ jiginna ka taa aw yɔrɔ. A diminnenba don, katuguni a y’a dɔn ko a ka waati tɔ man jan tun.» ¹³ Dragon y’a ye ko a kerunna dugukolo kan tuma min na, muso min jiginna denkɛ la, a tugura o nɔfɛ k’a tɔɔrɔ. ¹⁴ Nka bɔnba kamanfura fila dira muso ma, walisa a k’i pan ka taa kungokolon kɔnɔ a ka yɔrɔ la. A na balo yen san saba ni kalo wɔɔrɔ kɔnɔ a mabɔlen o sa ɲɛ kɔrɔ. ¹⁵ Sa ye ji bɔ a da la muso nɔfɛ i ko baji, walisa o ji woyo ka o muso tunun. ¹⁶ Nka dugukolo ye muso dɛmɛ. Dragon ye ji min bɔ a da la, dugukolo y’i da yɛlɛ ka o ji min. ¹⁷ Dragon diminna muso kɔrɔ kosɛbɛ. Muso bɔnsɔn minnu bɛ Ala ka ci fɔlenw ani Yesu ka seereya mara, a taara olu kɛlɛ. ¹⁸ A y’i jɔ kɔgɔji da la cɛncɛn kan.

¹ O kɔ, ne ye wara jugu dɔ wulitɔ ye ka bɔ kɔgɔji la. Biɲɛkolo tan ni kunkolo woloɛula b’a la. Masafugula tan bɛ a biɲɛkolow la. Ala tɔgɔ tiɲɛni tɔgɔw sɛbɛnna a kunkolow kan. ² Ne ye wara min ye, o bɔra waraninkalan fɛ. A senw bɛ i ko ursi wara senw. A da bɛ i ko waraba da. Dragon ye a ka sebaaya ni a ka masasigilan ni fangaba di a ma. ³ Ne ye a kunkolow la kelen ye, i n’a fɔ a joginna fo ka se saya ma. O joginda min tun bɛna a faga, o kɛnɛyara. Dugukolo kan mɔgɔw bɛɛ kabakoyara ka tugu o wara nɔfɛ. ⁴ U ye dragon bato, katuguni a ye fanga di o wara ma. U ye wara fana bato, u ko: «O wara ɲɔgɔn bɛ min? Jɔni bɛ se ka a kɛlɛ?» ⁵ Da dira o wara ma ka kuncɛbaya kumaw fɔ ani Ala tɔgɔ tiɲɛni kow. Fanga dira a ma ka kow kɛ kalo binaani ni fila kɔnɔ. ⁶ A y’a da yɛlɛ ka Ala mafiɲɛya ka Ala tɔgɔ ni a batoso tɔgɔ tiɲɛ ani minnu sigilen bɛ sankolo la, ka olu fana tɔgɔw tiɲɛ. ⁷ Fanga dira a ma ka Ala ka mɔgɔ senumaw kɛlɛ ka se sɔrɔ olu kan. Fanga dira a ma fana bɔnsɔnw bɛɛ ni mɔgɔ sifaw bɛɛ ani siyaw bɛɛ kan. ⁸ Dugukolo kan mɔgɔw bɛɛ n’a bato, fɔ minnu tɔgɔw tun sɛbɛnna Sagaden fagalen ka ɲɛnamaya kitabu kɔnɔ kabini diɲɛ da tuma. ⁹ Tulo bɛ min fɛ, o ka lamɛnni kɛ! ¹⁰ Ni mɔgɔ dɔ bɛ mɔgɔw minɛ jɔnya la, o tigi yɛrɛ na taa jɔnya la. Min bɛ mɔgɔ faga ni npan ye, wajibi don o fana ka faga ni npan ye. Ala ka mɔgɔ senumaw ka muɲuli ni u ka dannaya bɛ yan dɛ. ¹¹ O kɔ, ne ye wara jugu wɛrɛ wulitɔ ye ka bɔ dugukolo la. Biɲɛkolo fila b’a la, i ko sagaden. A bɛ kuma i ko dragon. ¹² A bɛ baara kɛ ni wara fɔlɔ fanga ye o ɲɛ kɔrɔ. O wara fɔlɔ min joginda tun bɛna a faga, ni a kɛnɛyara, a bɛ dugukolo ni a kan mɔgɔw wajibiya ka o bato. ¹³ Wara filanan bɛ taamashyɛnbaw kɛ fo ka tasuma jigin ka bɔ sankolo la ka na dugukolo kan mɔgɔw bɛɛ ɲɛ na. ¹⁴ Fanga dira a ma ka kabako minnu kɛ wara fɔlɔ ɲɛ kɔrɔ, a ye dugukolo kan mɔgɔw lafili ni olu ye. Wara min joginna npan fɛ, n’a kɛnɛyara, a y’a fɔ dugukolo kan mɔgɔw ye ko u ka o ja dila. ¹⁵ Wara filanan ye fanga sɔrɔ ka ni don wara fɔlɔ ja la walisa o ka kuma, ani mɔgɔ minnu ma sɔn ka o ja bato, a ka olu bɛɛ faga. ¹⁶ A bɛ mɔgɔw bɛɛ wajibiya ko taamashyɛn ka kɛ u kininbolo wala u ten na, mɔgɔ dɔgɔmanninw ni mɔgɔbaw, faamaw ni faantanw, hɔrɔnw ani jɔnw. ¹⁷ Ko mɔgɔ si tɛna se ka sanni kɛ wala ka feereli kɛ ni o taamashyɛn t’a la, o wara tɔgɔ wala a tɔgɔ nimɔrɔ kɔni. ¹⁸ Hakilitigiya bɛ yan dɛ. Hakili bɛ min fɛ, o ka o wara tɔgɔ nimɔrɔ jate, katuguni o ye mɔgɔ nimɔrɔ ye. O nimɔrɔ ye kɛmɛ wɔɔrɔ ni biwɔɔrɔ ani wɔɔrɔ ye.

¹ O kɔ, ne ye filɛli kɛ ka Sagaden jɔlen ye Sion kulu kan. Mɔgɔ waa kɛmɛ ni binaani ni waa naani bɛ a fɛ. Sagaden tɔgɔ ni a Fa tɔgɔ sɛbɛnnen tun bɛ o mɔgɔw tenw na. ² Ne ye kumakan mɛn ka bɔ sankolo la. A bɛ i ko jiba suruntukan ani sankulukanba. A kan bɛ i ko nkɔni fɔlaw ka nkɔnifɔkan. ³ U bɛ tanuli dɔnkili kura da masasigilan ɲɛ kɔrɔ ani fɛn ɲɛnamaw ani cɛkɔrɔbaw ɲɛ kɔrɔ. Mɔgɔ si ma se ka o dɔnkili dege fɔ o mɔgɔ waa kɛmɛ ni binaani ni waa naani, minnu kunmabɔra ka bɔ dugukolo kan. ⁴ Olu ma nɔgɔ musow fɛ, k’a masɔrɔ u ye cɛ muso dɔnbaliw ye. Sagaden bɛ taa yɔrɔ o yɔrɔ, olu bɛ tugu a nɔfɛ. U kunmabɔra ka bɔ mɔgɔw cɛma. U ye Ala ni Sagaden ka fɛn fɔlɔw de ye. ⁵ U ma nkalon tigɛ abada, jalakibaliw don. ⁶ O kɔ, ne ye mɛlɛkɛ wɛrɛ pantɔ ye san fɛ fiɲɛ la. Kibaru Duman banbali bɛ a fɛ k’a fɔ dugukolo kan mɔgɔw ye, siyaw bɛɛ ni bɔnsɔnw bɛɛ ni kanw bɛɛ ani mɔgɔ sifaw bɛɛ. ⁷ A y’a fɔ ni kanba ye ko: «A’ ye siran Ala ɲɛ k’a bonya, k’a masɔrɔ a na kiri tigɛ mɔgɔw kan waati min na, o sera. A’ ye sankolo ni dugukolo ni kɔgɔji ani ji boyiw Dabaa bato.» ⁸ Mɛlɛkɛ filanan tugura fɔlɔ ta kɔ, a ko: «Babilonɛ duguba! A cira, a cira! Ale y’a to siyaw ka a ka kakalaya jugu diwɛn dɔ min.» ⁹ Mɛlɛkɛ sabanan tugura u nɔfɛ k’a fɔ ni kanba ye ko: «Min bɛ wara ni a ja bato, ni a ka taamashyɛn bɛ kɛ o ten wala a bolo la, ¹⁰ o fana na Ala ka diminya diwɛn min, a ye min kolonsobali yɛlɛma a ka diminya jifilen kɔnɔ. O tigi na tɔɔrɔ tasuma ni kiribi la mɛlɛkɛ senumaw ani Sagaden ɲɛ kɔrɔ. ¹¹ U tɔɔrɔ tasuma sisi na yɛlɛn san fɛ badaa-badaa. U tɛna lafiya su fara tile kan, olu minnu ye wara ni a ja bato, ani wara tɔgɔ taamashyɛn bɛ minnu na.» ¹² Ala ka mɔgɔ senumaw ka muɲuli bɛ yan dɛ, olu minnu bɛ Ala ka ci fɔlenw mara ani u ka dannaya Yesu la. ¹³ Ne ye kumakan mɛn ka bɔ sankolo la ko: «Nin sɛbɛn: Mɔgɔ minnu bɛ sa Matigi la kabini sisan, olu ye dubadenw ye.» Ni Senu ko: «Ɔwɔ, walisa u ka lafiya u ka baarabaw la, katuguni u ka kɛwalew tugulen bɛ u nɔfɛ.» ¹⁴ Ne ye filɛli kɛ ko kura ka sankaba jɛman ye. Dɔ sigilen bɛ a kan, o bɔlen bɛ mɔgɔ fɛ. Sanu masafugula bɛ a kun na, wɔlɔsɔ da duman b’a bolo. ¹⁵ Mɛlɛkɛ wɛrɛ nana ka bɔ Alabatosoba kɔnɔ, k’a fɔ sankaba kan sigibaa ye ni kanba ye ko: «I ka i ka wɔlɔsɔ kɛ ka dugukolo suman kan, k’a masɔrɔ suman kan waati sera, dugukolo suman mɔna ka ban.» ¹⁶ Min sigilen tun bɛ sankaba kan, o ye a ka wɔlɔsɔ kerun dugukolo kan, dugukolo suman tigɛra. ¹⁷ Mɛlɛkɛ dɔ wɛrɛ bɔra Alabatosoba kɔnɔ sankolo la. Wɔlɔsɔ da duman bɛ o fana bolo. ¹⁸ Mɛlɛkɛ wɛrɛ bɔra saraka bɔlan na, fanga tun b’o fɛ tasuma kan. Wɔlɔsɔ da duman bɛ min bolo, a y’a fɔ o ye ni kanba ye ko: «I ka i ka wɔlɔsɔ da duman kɛ ka dugukolo kan rezɛnsun tusuuw tigɛ, k’a masɔrɔ u denw mɔna ka ban.» ¹⁹ Mɛlɛkɛ ye a ka wɔlɔsɔ kerun dugukolo kan ka dugukolo rezɛnsun mɔ tigɛ ka u fili Ala ka diminya rezɛn jibɔ yɔrɔba kɔnɔ. ²⁰ U ye rezɛndenw foroki rezɛn jibɔ yɔrɔ la dugu kɔfɛ. Joli bɔra rezɛn jibɔ yɔrɔ la ka woyo ka taa se kilomɛtɛrɛ kɛmɛ saba ɲɔgɔn ma. A dunya tun bɛ bɔ duguma ka se so karafe nɛgɛ ma.

¹ O kɔ, ne ye taamashyɛn wɛrɛ ye sankolo la, o ka bon, dakabana ko don. Laban tɔɔrɔ koba woloɛula bɛ mɛlɛkɛ woloɛula minnu bolo, olu bɛ Ala ka diminya ko dafa. ² O kɔ, ne ye bajiba ye, i n’a fɔ wɛrɛ ni tasuma kolonsolen. Minnu ye se sɔrɔ wara ni a ja ani a tɔgɔ nimɔrɔ kan, ne ye olu fana jɔlen ye wɛrɛ baji kan. Ala ka nkɔniw bɛ u bolo. ³ U bɛ Ala ka baaraden Musa ka tanuli dɔnkili da ani Sagaden ka dɔnkili ko: «Matigi Ala, Sebaayabɛɛtigi, i ka ko kɛtaw ka bon, kabakow don! Siyaw bɛɛ ka Masakɛ, i ka siraw tilennen don. U ye tiɲɛ ye. ⁴ Matigi, jɔni tɛna siran i ɲɛ ka i tɔgɔ bonya? K’a masɔrɔ i kelenpe ka senu. Siyaw bɛɛ bɛ na ka i bato, katuguni i ka kɛwale tilennenw jirala.» ⁵ O kɔ, ne ye filɛli kɛ ka Ala ka seereya finiso senuma da yɛlɛlen ye sankolo la. ⁶ Tɔɔrɔ koba woloɛula bɛ mɛlɛkɛ woloɛula minnu bolo, olu bɔra Alabatosoba kɔnɔ. Lenfu fini saniyalen manamanatɔ bɛ u kan na. Sanu cɛsirilan bɛ u disi la. ⁷ Fɛn ɲɛnama naani la kelen ye sanu jifilen woloɛula di mɛlɛkɛ woloɛula ma, Ala min ɲɛnama bɛ to badaa-badaa, u falen bɛ ni o ka diminya ye. ⁸ Alabatosoba fara Ala ni a ka sebaaya nɔɔrɔ sisi la. Mɔgɔ si ma se ka don Alabatosoba kɔnɔ, sani o tɔɔrɔ koba woloɛula ka kɛ ka dafa, olu minnu tun bɛ o mɛlɛkɛ woloɛula bolo.

¹ O kɔ, ne ye kumakanba mɛn ka bɔ Alabatosoba kɔnɔ k’a fɔ mɛlɛkɛ woloɛula ye ko: «Ala ka diminya bɛ jifilen woloɛula minnu kɔnɔ, a’ ye taa olu yɛlɛma dugukolo kan.» ² Mɛlɛkɛ fɔlɔ taara ka a ka jifilen kɔnɔ fɛn yɛlɛma dugukolo kan. Wara jugu ka taamashyɛn bɛ mɔgɔ minnu na, ani a ja batobaaw, joli juguw kɛra olu la ka u tɔɔrɔ kosɛbɛ. ³ Mɛlɛkɛ filanan ye a ka jifilen kɔnɔ fɛn yɛlɛma kɔgɔji kan, kɔgɔji kɛra joli ye, i ko mɔgɔ su joli. Kɔgɔji kɔnɔ fɛn ɲɛnamaw bɛɛ sara. ⁴ Mɛlɛkɛ sabanan ye a ka jifilen kɔnɔ fɛn yɛlɛma bajiw ni ji boyiw kan, olu kɛra joli ye. ⁵ Ne ye jiw kun na mɛlɛkɛ kan mɛn ko: «E min ka senu, ni i bɛ, ni i tun bɛ, i tilennen don, k’a masɔrɔ i ye o kiri kow kɛ ten. ⁶ Mɔgɔw ye Ala ka mɔgɔ senumaw ni kiraw faga ka u joli bɔn. I ye joli di u ma k’a min, u ka kan n’o ye.» ⁷ Ne ye saraka bɔlan kan mɛn ko: «Ɔwɔ, Matigi Ala, Sebaayabɛɛtigi, i ka kiri kow ye tiɲɛ ye, u tilennen don!» ⁸ Mɛlɛkɛ naaninan ye a ka jifilen kɔnɔ fɛn yɛlɛma tile kan. Fanga dira tile ma ka mɔgɔw jeni ni a tasuma ye. ⁹ Funteni dama tɛmɛnnen ye mɔgɔw jeni. U ye Ala tɔgɔ tiɲɛ, o tɔɔrɔ kobaw bɛ o min bolo, nka u ma sɔn ka nimisa u ka jurumuw la ka Ala bonya. ¹⁰ Mɛlɛkɛ duurunan ye a ka jifilen kɔnɔ fɛn yɛlɛma o wara jugu ka masasigilan kan. Dibi donna a ka masaya yɔrɔ bɛɛ la, mɔgɔw ye u nɛnkunw ɲimi dimin kosɔn. ¹¹ U ye sankolotigi Ala tɔgɔ tiɲɛ u ka diminw ni u joliw kosɔn, nka u ma nimisa u ka kɛwalew la. ¹² Mɛlɛkɛ wɔɔrɔnan ye a ka jifilen kɔnɔ fɛn yɛlɛma Ufrate bajiba kan. O baji jara walisa ka sira labɛn masakɛw ɲɛ, olu minnu bɛ na ka bɔ kɔrɔn fɛ. ¹³ Ne ye ni jugu saba ye, kelen bɔra dragon da la, kelen bɔra wara da la, kelen bɔra kira nkalontigɛla da la, u bɔlen bɛ ntoriw fɛ. ¹⁴ Olu ye jinɛw niw ye, u bɛ kabakow kɛ. U bɛ taa dugukolo kan masakɛw bɛɛ sɛgɛrɛ, walisa u ka u lajɛ Ala Sebaayabɛɛtigi ka donba kɛlɛ kama. ¹⁵ «A filɛ, ne bɛ na i ko nson! Min bɛ to a ɲɛ na ka a ka finiw mara walisa a farilankolon kana taama, mɔgɔw kana a maloya ye, o ye dubaden ye.» ¹⁶ O jinɛw ye masakɛw lajɛ yɔrɔ min na, o tɔgɔ ko Harmagedɔn hɛburukan na. ¹⁷ Mɛlɛkɛ woloɛulanan ye a ka jifilen kɔnɔ fɛn yɛlɛma fiɲɛ la. Kumakan bɔra masasigilan na Alabatosoba kɔnɔ, o ko: «A kɛra ka ban.» ¹⁸ San yɛgɛyɛgɛ ni kumakanw ni sanpɛrɛnkanw ani dugukolo yɛrɛyɛrɛba kɛra. O bɔɲɔgɔnko dugukolo yɛrɛyɛrɛba tun ma kɛ kabini mɔgɔw kɛra dugukolo kan. ¹⁹ O duguba tiɲɛnna ka kɛ tila saba ye. Siyaw ka duguw binna. Ala hakili jiginna Babilonɛba la ka a ka diminyaba diwɛn jifilen di a ma, a k’a min. ²⁰ Gunw bolila ka taa, kuluw ma ye tun. ²¹ Sanbɛlɛ kunbabaw binna mɔgɔw kan ka bɔ sankolo la, u bɛɛ kelen-kelen bɛ kilo binaani ɲɔgɔn bɔ. Mɔgɔw ye Ala tɔgɔ tiɲɛ o sanbɛlɛ tɔɔrɔ kosɔn, katuguni o tɔɔrɔ ka bon fo ka dama tɛmɛn.

¹ Jifilen woloɛula bɛ mɛlɛkɛ woloɛula minnu bolo, olu la kelen nana k’a fɔ ne ye ko: «Na, jatɔmusoba min sigilen bɛ jibaw kan, ne na o ka kiri ko jira i la. ² Dugukolo kan masakɛw ye jatɔya kɛ a fɛ. Dugukolo kan mɔgɔw ɲɛnaminilen don a ka jatɔya diwɛn fɛ.» ³ O mɛlɛkɛ taara ni ne ye Ni la kungokolon yɔrɔ dɔ la. Ne ye muso dɔ sigilen ye wara bilenman kan, tɔgɔ tiɲɛni kumaw sɛbɛnnen bɛ o wara yɔrɔ bɛɛ kan, kunkolo woloɛula ni biɲɛkolo tan b’a la. ⁴ Lomaasa fini ni fini bilenman b’a kan na, a masirilen don ni sanu ni kabakurun sɔngɔ gɛlɛnw ani kɔnɔnkisɛ sɔngɔ gɛlɛnw ye. Sanu jifilen b’a bolo, o falen bɛ ni ko haramulenw ni a ka jatɔya nɔgɔlenya ye. ⁵ Gundo tɔgɔ sɛbɛnnen bɛ o muso ten na ko: «Babilonɛba, jatɔmusow ni dugukolo ka ko haramulenw woloba.» ⁶ Ne ye o muso ɲɛnaminilen ye ni Ala ka mɔgɔ senumaw joli ani Yesu seerew joli ye. Ne y’a ye tuma min na, ne kabakoyara. ⁷ Mɛlɛkɛ y’a fɔ ne ye ko: «Mun na i kabakoyara? O muso ani a sigilen bɛ wara bilenman min kan, ni kunkolo woloɛula ni biɲɛkolo tan bɛ o la, ne na olu gundo fɔ i ye. ⁸ I ye wara min ye, o tun bɛ, nka a tɛ tun. A bɛna yɛlɛn ka bɔ dingɛ dunba dan dɔnbali kɔnɔ ka taa halaki yɔrɔ la. Dugukolo kan mɔgɔ minnu tɔgɔw ma sɛbɛn ɲɛnamaya kitabu la kabini diɲɛ da tuma, olu na o wara ye ka kabakoya, katuguni a tun bɛ, nka a tɛ tun, a bɛna ye ko kura. ⁹ «Hakili bɛ sɔrɔ faamuli min na, o filɛ nin ye. O kunkolo woloɛula ye kulu woloɛula ye, o muso sigilen bɛ minnu kan. ¹⁰ Olu ye masakɛ woloɛula fana ye, u duuru binna, kelen bɛ yen, a tɔ kelen ma na fɔlɔ. O mana na, wajibi don a ka waati dɔɔnin dɔrɔn kɛ. ¹¹ O wara min tun bɛ, ni a tɛ tun, o ye masakɛ seginnan ye. Ale ye o woloɛula la kelen ye, a bɛ taa halaki yɔrɔ la. ¹² «I ye biɲɛkolo tan minnu ye, olu ye masakɛ tan ye, u ma masaya sɔrɔ fɔlɔ, nka u ni wara na masaya fanga sɔrɔ ɲɔgɔn fɛ ka waati kelen kɛ. ¹³ U miiriliw kɛra kelen ye, u bɛ u ka sebaaya ni u fanga di wara ma. ¹⁴ U na Sagaden kɛlɛ, Sagaden na se sɔrɔ u kan, k’a masɔrɔ a ye matigiw ka Matigi ye ani masakɛw ka Masakɛ. A ka welelen ɲɛnatɔmɔlen minnu bɛ a fɛ, ni u kɛra dannamɔgɔw ye, olu fana na se sɔrɔ.» ¹⁵ Mɛlɛkɛ y’a fɔ ne ye ko: «I ye jatɔmuso sigilen ye ji minnu kan, olu ye mɔgɔ sifaw ni jamakulubaw ni siyaw ni kanw ye. ¹⁶ I ye biɲɛkolo tan minnu ye, olu ni o wara na jatɔmuso koniya ka fɛn bɛɛ bɔsi a la ka a farilankolon bila. U na a farisogo dun ka a jeni tasuma la ka a ban pewu pewu. ¹⁷ Ala ye a yɛrɛ sago kɛ u kɔnɔ fo u jɛra ka u ka masaya fanga di wara ma, sani Ala ka ko fɔlen bɛɛ ka kɛ ka dafa. ¹⁸ «I ye muso min ye, o ye duguba ye, min bɛ sigi dugukolo kan masakɛw bɛɛ kun na.»

¹ O kow kɔ, ne ye mɛlɛkɛ wɛrɛ jigintɔ ye ka bɔ sankolo la. Sebaayaba b’a fɛ, a nɔɔrɔ ye yeelen bɔ dugukolo yɔrɔ bɛɛ la. ² A pɛrɛnna ni kanba ye ko: «Babilonɛba, a cira, a cira! A kɛra jinɛw sigi yɔrɔ ni jinɛ nɔgɔlenw bɛɛ dogo yɔrɔ ani kɔnɔ nɔgɔlen mangow bɛɛ dogo yɔrɔ ye. ³ K’a masɔrɔ siyaw bɛɛ ye a ka kakalaya dama tɛmɛnnenw diwɛn min. Dugukolo kan masakɛw ye jatɔya kɛ a fɛ, dugukolo kan jagokɛlaw fɛntigiyara a ka fɛn saramaw caya kosɔn.» ⁴ Ne ye kumakan wɛrɛ mɛn ka bɔ sankolo la ko: «Ne ka mɔgɔw, a’ ye bɔ Babilonɛ, walisa aw kana kɛ a jɛɲɔgɔnw ye a ka jurumu kow la, ka niyɔrɔ sɔrɔ a ka tɔɔrɔbaw la. ⁵ Katuguni a ka jurumuw cayara fo ka se sankolo ma. Ala hakili tora a ka ko juguw la. ⁶ A’ ye a sara ka kɛɲɛ ni a yɛrɛ ka sara cogo ye. A’ ye a ka tɔɔrɔ kɛ fila ye ka kɛɲɛ ni a ka kɛwalew ye. A ye jifilen kɔnɔ fɛn min kolonso, aw ka o ɲɔgɔn fila kolonso a ye. ⁷ A ye a yɛrɛ bonya ka fɛn ɲuman caman caman min sɔrɔ, aw ka o dama bɔɲɔgɔnko tɔɔrɔ ni kasi ko lase a ma. K’a masɔrɔ a y’a fɔ a yɛrɛ kɔnɔ ko: `Ne masamusoma sigilen bɛ yan. Ne tɛ muso cɛ salen ye, su kasi ko tɛna ne sɔrɔ fewu.’ ⁸ O de kosɔn a ka tɔɔrɔ ko na bin a kan don kelen na, saya ni su kasi ani kɔngɔba. Tasuma na a jeni ka a ban, katuguni Matigi Ala min bɛ kiri tigɛ a kan, o ye sebaayabatigi de ye.» ⁹ Dugukolo kan masakɛ minnu ni a jɛra a ka kakalaya ni a ka saramaya kow la, olu mana a jeni sisi ye tuma min na, u na kasi ka kulo a kosɔn. ¹⁰ Olu na u jɔ yɔrɔ jan a ka tɔɔrɔ kow ɲɛsiran kosɔn, k’a fɔ ko: «Bɔnɛ! Bɔnɛ! Duguba Babilonɛ, dugu barikama! I ka kiri ko binna i kan lɛrɛ kelen na!» ¹¹ Dugukolo kan jagokɛlaw fana bɛ kasi ka kulo ɲɛnasisi fɛ a kosɔn, k’a masɔrɔ mɔgɔ si tɛ u ka jago fɛnw san tun, o jago fɛnw filɛ ninnu ye: ¹² Sanu, warijɛ, kabakurun sɔngɔ gɛlɛnw, kɔnɔnkisɛ sɔngɔ gɛlɛnw, lenfu fini ɲuman, lomaasa fini, suwa fini, suma diyalan jiri sifa bɛɛ, fɛn minnu dilara ni sama ɲinw ye, fɛn minnu dilara ni jiri sɔngɔ gɛlɛnw ye, nsiranɛgɛ, nɛgɛfin, kabakurun min tɔgɔ ko marburu, ¹³ namugu suma duman min tɔgɔ ko kanɛl, latikɔlɔnw, mirɛ suma duman, wusulan suma duman, diwɛn, tulu, farinimugu ɲuman, ɲɔ, misiw ni sagaw, sow, wotorow, jɔnw ani mɔgɔw niw. ¹⁴ U n’a fɔ ko: «I tun ye fɛn minnu ɲini, olu bɔra i bolo. Fɛn saramaw ni fɛn minnu cɛ ka ɲi, olu bɛɛ tununna i ma. I tɛna u sɔrɔ tun.» ¹⁵ O fɛnw jagokɛla minnu fɛntigiyara o duguba fɛ, olu na u jɔ yɔrɔ jan o ka tɔɔrɔba ɲɛsiran kosɔn, ka kasi ka kulo ɲɛnasisi fɛ. ¹⁶ U n’a fɔ ko: «Bɔnɛ! Bɔnɛ! O duguba min tun ye lenfu fini ni lomaasa fini don a kan na, ka a yɛrɛ masiri ni sanu ni kabakurun sɔngɔ gɛlɛnw ni kɔnɔnkisɛ sɔngɔ gɛlɛnw ye! O nafoloba tiɲɛnna lɛrɛ kelen na.» ¹⁷ Kɔgɔji kan kurun kuntigiw bɛɛ ani minnu bɛ ji kan taama kɛ, ni kurun kɔnɔ baarakɛlaw ani minnu bɛ u balo sɔrɔ kɔgɔji kan, olu y’u jɔ yɔrɔ jan. ¹⁸ U ye o dugu jeni sisi ye ka kulo k’a fɔ ko: «Dugu jumɛn bɛ nin duguba bɔ?» ¹⁹ U ye buguri seri u kun na, ka kasi ka kulo ɲɛnasisi fɛ ko: «Bɔnɛ! Bɔnɛ bɛ o duguba ye! Kɔgɔji kan kuruntigiw bɛɛ fɛntigiyara a ka nafolo fɛ. O kɛra yɔrɔ lankolon ye lɛrɛ kelen dama kɔnɔ!» ²⁰ Sankolo, i ka ɲagali o ko la. Ala ka mɔgɔ senumaw ni cidenw ni kiraw, aw fana ka ɲagali, k’a masɔrɔ Ala ye kiri tigɛ a kan ka aw hakɛ bɔ a la. ²¹ O tuma la mɛlɛkɛ barikama ye kabakurun ta i ko wugu belebeleba, ka a kerun kɔgɔji la, k’a fɔ ko: «O duguba Babilonɛ na kerun ni fanga ye ten. A tɛna ye tun. ²² Nkɔnifɔkan ni folifɔkan ni filefyɛkan ni burufyɛkan si tɛna mɛn i kɔnɔ tun. Walekɛla sifa si tɛna sɔrɔ i kɔnɔ tun. Wugukan si tɛna mɛn i kɔnɔ tun. ²³ Lanpa yeelen tɛna bɔ i kɔnɔ tun. Kɔɲɔcɛkan ni kɔɲɔmusokan tɛna mɛn i kɔnɔ tun. K’a masɔrɔ i ka jagokɛlaw tun ye dugukolo kan faamaw de ye. I ka subaaya ko tun ye siyaw bɛɛ lafili. ²⁴ Kiraw ni Ala ka mɔgɔ senumaw ani mɔgɔ minnu bɛɛ fagara dugukolo kan, olu bɛɛ joli yera nin dugu kɔnɔ.»

¹ O kɔ, ne ye mankanba mɛn ka bɔ sankolo la i ko jamaba mankan, ko: «Aleluya! Kisili ni nɔɔrɔ ani sebaaya ye an ka Ala ta ye, ² katuguni a ka kiri kow ye tiɲɛ ye, u tilennen don, sabu o jatɔmusoba min tun bɛ diɲɛ toli ni a ka jatɔya kow ye, a ye kiri tigɛ o kan, ka a ka jɔnw fagali hakɛ bɔ o la.» ³ U y’a fɔ ko kura ko: «Aleluya! A jeni sisi bɛ yɛlɛn badaa-badaa.» ⁴ O cɛkɔrɔba mugan ni naani ani o fɛn ɲɛnama naani ye u bin duguma ka masasigilan kan sigibaa Ala bato ko: «Amiina. Aleluya!» ⁵ Kumakan bɔra masasigilan na ko: «Ala ka jɔnw bɛɛ, aw minnu bɛ siran a ɲɛ, mɔgɔ dɔgɔmanninw ni mɔgɔbaw, aw ka an ka Ala tanu!» ⁶ Ne ye kanba mɛn i ko jamaba mankan ni jiba suruntukan ani sankulukanba ko: «Aleluya! K’a masɔrɔ Matigi an ka Ala, Sebaayabɛɛtigi donna a ka masaya la. ⁷ An ka nisɔndiya ka ɲagali ka Ala bonya, k’a masɔrɔ Sagaden ka kɔɲɔ sera, a muso y’i masiri. ⁸ Cogo dira a ma ka lenfu fini jɛman ɲuman manamanatɔ don a kan na.» O lenfu fini ɲuman ye Ala ka mɔgɔ senumaw ka kɛwale tilennenw ye. ⁹ Mɛlɛkɛ y’a fɔ ne ye ko: «I ka nin sɛbɛn: Minnu welela Sagaden ka kɔɲɔ dumuniba la, olu ye dubadenw ye.» A ko fana: «O kumaw ye Ala ka kuma sɛbɛw de ye.» ¹⁰ Ne ye n’bin a sen kɔrɔ, ne tun b’a fɛ k’a bato, nka a ko ne kana o kɛ, ne ni ne balima minnu bɛ Yesu ka seereya kumaw mara, ko ale ye anw bɔɲɔgɔnko jɔn de ye, ko ne ka Ala bato. Yesu seereya ye kiraya ni de ye. ¹¹ Ne ye sankolo dayɛlɛlen ye. So dɔ filɛ, dafe jɛ don. Min yɛlɛnnen bɛ a kan, o tɔgɔ ko Kantigi, Sɛbɛma. A bɛ kiri tigɛ ka kɛlɛ kɛ ni tilennenya ye. ¹² A ɲɛw bɛ i ko tasuma manaw. Masafugula caman bɛ a kun na. Tɔgɔ dɔ sɛbɛnnen b’a la, mɔgɔ si tɛ o dɔn a kelen kɔ. ¹³ Fini b’a kan na, o sulen bɛ joli la. O tigi tɔgɔ ko «Ala ka Kuma». ¹⁴ Sankolola kɛlɛbolow tugura a nɔfɛ, olu yɛlɛnnen bɛ dafe jɛw kan, lenfu fini jɛman saniyalen tun bɛ u kan na. ¹⁵ Npan da duman bɔlen bɛ a da la, a na siyaw gosi n’o ye, ka u mara ni nɛgɛ bere ye. A na forokili kɛ Ala Sebaayabɛɛtigi dusu bɔlen ka diminya rezɛn jibɔ yɔrɔ la. ¹⁶ Tɔgɔ dɔ sɛbɛnnen bɛ a ka fini ni a woro kan ko «masakɛw ka Masakɛ ani matigiw ka Matigi.» ¹⁷ O kɔ, ne ye mɛlɛkɛ jɔlen ye tile kɔnɔ. A pɛrɛnna ni kanba ye k’a fɔ san fɛ kɔnɔ pantaw bɛɛ ye ko: «A’ ye na aw lajɛ Ala ka dumuniba kama, ¹⁸ ka masakɛw sogo dun, ani jalasabatigiw ni kɛlɛ masaw sogo ni sow ni so kan yɛlɛnbaaw sogow ani mɔgɔw bɛɛ sogo, hɔrɔnw ni jɔnw, mɔgɔbaw ni mɔgɔ dɔgɔmanninw.» ¹⁹ O kɔ, ne ye o wara ni dugukolo kan masakɛw ni u ka kɛlɛbolow lajɛlen ye, ko u bɛ o so kan yɛlɛnbaa ni a ka kɛlɛbolo kɛlɛ. ²⁰ O wara minɛna ani kira nkalontigɛla min ye kabakow kɛ a ɲɛ kɔrɔ. O wara ka taamashyɛn tun bɛ mɔgɔ minnu na, ni u ye a ja bato, o kabakow ye olu lafili. Wara ni kira nkalontigɛla fila bɛɛ ɲɛnama filila dingɛ belebeleba tasumama kiribima kɔnɔ. ²¹ Npan min bɔra so kan yɛlɛnbaa da la, o ye u tɔw faga. Kɔnɔw bɛɛ fara u sogow la.

¹ O kɔ, ne ye mɛlɛkɛ dɔ jigintɔ ye ka bɔ sankolo la. Dingɛ dunba dan dɔnbali konnɛgɛ ani jɔlɔkɔba b’a bolo. ² A ye dragon minɛ, o sa kɔrɔ, o de ye sendonbaa ye, Sitanɛ don. A y’a siri ³ k’a kerun o dingɛ dunba kɔnɔ k’a da sɔgɔ ka taamashyɛn nɔrɔ a la ka san waa kelen kɛ, walisa dragon kana na siyaw lafili tun sani o san waa kelen ka dafa. O kɔ, wajibi don a ka foni ka waati dɔɔnin kɛ. ⁴ Ne ye masasigilan dɔw ye, ani u kan sigibaaw, fanga dira olu ma ka kiri tigɛ. Minnu kunkolow tigɛra Yesu seereya ani Ala ka kuma kosɔn, ne ye olu niw fana ye, ani minnu ma wara ni a ja bato, ni a ka taamashyɛn ma kɛ u tenw wala u bolow la. Olu suw kununna ka sigi Krisita fɛ masaya la ka san waa kelen kɛ. ⁵ Su tɔw ma kunun sani o san waa kelen ka dafa. O ye suw kununli fɔlɔ de ye. ⁶ Minnu ye niyɔrɔ sɔrɔ suw kununli fɔlɔ la, olu ye dubadenw ye, u ka senu. Saya filanan tɛna se sɔrɔ u kan, nka u na kɛ Ala ni Krisita ka sarakalasebaaw ye. U na sigi a fɛ masaya la ka san waa kelen kɛ. ⁷ San waa kelen dafalen kɔ, Sitanɛ na bila ka bɔ a ka kaso la. ⁸ Siya minnu bɛ diɲɛ fan naani la, Gog ni Magog, a na taa olu lafili walisa a ka u lajɛ kɛlɛ kama. U na caya i ko kɔgɔji da la cɛncɛn. ⁹ U nana ka bɔ dugukolo yɔrɔ bɛɛ la ka Ala ka mɔgɔ senumaw ka daga ni dugu kanulen lamini, nka tasuma jiginna ka bɔ sankolo la ka u jeni. ¹⁰ Sitanɛ min tun bɛ u lafili, o kerunna dingɛ belebeleba tasumama kiribima kɔnɔ, wara ni kira nkalontigɛla bɛ yɔrɔ min na. U na tɔɔrɔ yen su fara tile kan, badaa-badaa. ¹¹ O kɔ, ne ye masasigilan belebeleba jɛman ye, ani min sigilen bɛ a kan. Dugukolo ni sankolo bolila ka bɔ o ɲɛ kɔrɔ, u ma ye tun. ¹² Ne ye suw bɛɛ ye, kunbabaw ni dɔgɔmanninw, u jɔlen bɛ masasigilan ɲɛ kɔrɔ. Kitabuw dayɛlɛla, kitabu wɛrɛ dayɛlɛla, o ye ɲɛnamaya kitabu ye. Kiri tigɛra suw kan ka kɛɲɛ ni u ka kɛwalew ye, olu minnu sɛbɛnna o kitabuw kɔnɔ. ¹³ Su minnu bɛ kɔgɔji kɔnɔ, o ye olu labɔ. Saya ni Hadɛsi fana ye u taw labɔ. Kiri tigɛra suw bɛɛ kelen-kelen kan ka kɛɲɛ ni u ka kɛwalew ye. ¹⁴ Saya ni Hadɛsi kerunna dingɛ belebeleba tasumama kɔnɔ. O dingɛ tasumama ye saya filanan ye. ¹⁵ Mɔgɔ o mɔgɔ tɔgɔ sɛbɛnnen ma sɔrɔ ɲɛnamaya kitabu la, o kerunna dingɛ belebeleba tasumama kɔnɔ.

¹ O kɔ, ne ye sankolo kura ni dugukolo kura ye, k’a masɔrɔ sankolo fɔlɔ ni dugukolo fɔlɔ tɛmɛnna. Kɔgɔji fana tɛ yen tun. ² Ne ye dugu senuma Jerusalɛm kura fana jigintɔ ye ka bɔ sankolo la Ala yɔrɔ. A labɛnnen bɛ i ko kɔɲɔmuso min masirilen bɛ a cɛ ye. ³ Ne ye kumakanba mɛn ka bɔ masasigilan na, ko: «Ala sigiso filɛ mɔgɔw cɛma! Ale na sigi u fɛ, u na kɛ a ka mɔgɔw ye, Ala yɛrɛ na kɛ u fɛ yen ka kɛ u ka Ala ye. ⁴ A na ɲɛji bɛɛ cɛ ka bɔ u ɲɛ la. Saya tɛna kɛ tun, su kasi fana tɛna kɛ tun, wala kasikan wala dimin, k’a masɔrɔ fɛn fɔlɔw tɛmɛnna.» ⁵ Min sigilen bɛ masasigilan kan, o ko: «A filɛ! Ne bɛ fɛn bɛɛ kɛ kura ye.» O kɔ, a y’a fɔ ko: «I ka sɛbɛnni kɛ, katuguni nin kumaw ye kuma jɛlenw ye, kuma sɛbɛw don.» ⁶ A y’a fɔ ne ye fana ko: «A kɛra ka ban. Ne ye Alifa ni Omega ye, daminɛ ni laban. Minnɔgɔ bɛ min na, ne na ɲɛnamaya ji boyi ji dɔ di o ma gansan. ⁷ Min mana se sɔrɔ, o na kɛ nin kow ciyɛntala ye. Ne na kɛ o ka Ala ye, a na kɛ ne den ye. ⁸ Nka siranbaatɔw ni dannabaliw ni haramulenw ni mɔgɔ fagalaw ni jatɔw ni subaaw ni bolibatobaaw ani nkalontigɛlaw bɛɛ, olu niyɔrɔ na kɛ o dingɛ belebeleba tasumama kiribima kɔnɔ. O ye saya filanan de ye.» ⁹ Jifilen woloɛula minnu falen bɛ laban tɔɔrɔba woloɛula la, olu tun bɛ mɛlɛkɛ woloɛula bolo. O mɛlɛkɛw la kelen nana k’a fɔ ne ye ko: «Na yan! Ne na kɔɲɔmuso jira i la, Sagaden muso.» ¹⁰ A taara ni ne ye Ni la ka yɛlɛn kuluba jamanjan dɔ kan. A ye o dugu senuma Jerusalɛm jira ne la, a jigintɔ don ka bɔ sankolo la Ala yɔrɔ. ¹¹ Ala nɔɔrɔ b’a la, a bɛ manamana i ko kabakurun sɔngɔ gɛlɛn, i ko jaspe kabakurun, a bɔlen bɛ krisital fɛ. ¹² Kogoba jamanjan kɛra ka o dugu lamini. Da tan ni fila b’a la, mɛlɛkɛ tan ni fila jɔlen bɛ o daw la. Tɔgɔw sɛbɛnnen bɛ o daw kan, olu ye Israɛl bɔnsɔn siya tan ni fila tɔgɔw de ye. ¹³ Da saba bɛ kɔrɔn yanfan fɛ, da saba bɛ saheli yanfan fɛ, da saba bɛ worodugu yanfan fɛ, da saba bɛ tilebin yanfan fɛ. ¹⁴ Jusigilan tan ni fila bɛ dugu kogo jukɔrɔ. Sagaden ka ciden tan ni fila tɔgɔw sɛbɛnnen bɛ o kabakurunw kan. ¹⁵ Mɛlɛkɛ min kumana ne fɛ, sanu sumanikɛ bere tun bɛ o bolo ka dugu ni a daw ani a kogo suma. ¹⁶ Dugu fan naani bɛɛ ka kan, a janya ni a fɛrɛ bɛɛ ye kelen ye. Mɛlɛkɛ ye dugu suma ni o bere ye. A janya kɛra kilomɛtɛrɛ waa fila ni kɛmɛ naani ɲɔgɔn ye. A janya ni a fɛrɛ ni a jɔ kundama bɛɛ ka kan. ¹⁷ A ye kogo fana suma, o jɔ kundama kɛra mɛtɛrɛ biwoloɛula ni fila ye ka kɛɲɛ ni mɔgɔ ka sumani fɛn ye, o kɔrɔ, mɛlɛkɛ ta. ¹⁸ A kogo jɔra ni jaspe kabakurun ye. Dugu ye sanu yɛrɛwolo ye, i ko wɛrɛ jɛman. ¹⁹ Dugu kogo ju masirilen bɛ ni kabakurun sɔngɔ gɛlɛn sifa bɛɛ ye. A bɛɛ jukɔrɔ kabakurun ye jaspe kabakurun ye, a filanan safir, a sabanan agate, a naaninan emerode, ²⁰ a duurunan onikis, a wɔɔrɔnan sardwanɛ, a woloɛulanan krisolite, a seginnan beril, a kɔnɔntɔnnan topaz, a tannan krisoprase, a tan ni kelennan yasɛnte, a tan ni filanan amɛtisite. ²¹ Dugu da la kon tan ni fila ye kɔnɔnkisɛ sɔngɔ gɛlɛn tan ni fila ye, kon bɛɛ kelen-kelen ye kɔnɔnkisɛ kelen ye. Dugu fɛrɛkɛnɛ ye sanu yɛrɛwolo ye i ko wɛrɛ sɛbɛ. ²² Ne ma Alabatosoba ye o dugu kɔnɔ, katuguni Matigi Ala Sebaayabɛɛtigi ani Sagaden ye o dugu ka Alabatosoba ye. ²³ O dugu mago tɛ tile wala kalo la ka yeelen bɔ a ye, k’a masɔrɔ Ala nɔɔrɔ ye a ka yeelen ye. Sagaden ye a ka lanpa ye. ²⁴ Siyaw na taama a ka yeelen na. Dugukolo kan masakɛw na don a kɔnɔ ni u nɔɔrɔ ye. ²⁵ O dugu dondaw tɛna tugu tile fɛ, su tɛna ko yen. ²⁶ U bɛna don a kɔnɔ ni siyaw nɔɔrɔ ni u ka bonya ye. ²⁷ Fɛn nɔgɔlen si tɛna don yen, wala ko haramulen kɛbaa wala nkalontigɛla, fɔ minnu tɔgɔw sɛbɛnnen bɛ Sagaden ka ɲɛnamaya kitabu la.

¹ Mɛlɛkɛ ye ɲɛnamaya baji jira ne la, a bɛ yɛrɛn i ko krisital. A bɔtɔ don Ala ni Sagaden ka masasigilan na, ² ka woyo dugu fɛrɛkɛnɛ cɛmancɛ la. Ɲɛnamaya jiri bɛ o ba fan fila la. A den bɛ kari siɲɛ tan ni fila san kɔnɔ. Kalo o kalo a bɛ den. O jiri furaw bɛ siyaw kɛnɛya. ³ Danga tɛna kɛ tun fewu. Ala ni Sagaden ka masasigilan na kɛ o dugu kɔnɔ. A ka jɔnw na a bato. ⁴ U na a ɲɛda ye, a tɔgɔ na kɛ u tenw na. ⁵ Su tɛna ko tun. U mago tɛna kɛ lanpa la tun, wala tile, katuguni Matigi Ala yɛrɛ na kɛnɛ bɔ u ye. U na kɛ masaw ye badaa-badaa. ⁶ O kɔ, a y’a fɔ ne ye ko: «Nin kumaw ye kuma jɛlenw ye, kuma sɛbɛw don. Ko minnu bɛna kɛ sɔɔni, kiraw niw ka Matigi Ala, o ye a ka mɛlɛkɛ ci ka na o kow jira a ka jɔnw la.» ⁷ «A filɛ, ne bɛ na sɔɔni. Min bɛ nin kitabu kiraya kumaw mara, o ye dubaden ye.» ⁸ Ne Yuhana ye o kow mɛn ka u ye. Ne ye u mɛn ka u ye minkɛ, mɛlɛkɛ min ye o kow jira ne la, ne ye n’bin o sen kɔrɔ, ne tun b’a fɛ k’a bato. ⁹ A y’a fɔ ko ne kana o kɛ, ko a ye ne jɔnɲɔgɔn ye, ani minnu bɛ nin kitabu kumaw mara, ko ne ka Ala bato. ¹⁰ O kɔ, a y’a fɔ ne ye ko: «I kana nin kitabu kiraya kuma datugu, katuguni a waati surunyara. ¹¹ Min ye tilenbali ye, o ka to a ka tilenbaliya la. Min nɔgɔlen don, o ka to a ka nɔgɔlenya la. Min tilennen don, o ka to a ka tilennenya la. Min ka senu, o ka to a ka senumaya la.» ¹² «A filɛ, ne bɛ na sɔɔni. Ne ka sara fɛnw bɛ ne bolo, walisa ne ka mɔgɔw bɛɛ kelen-kelen sara ka kɛɲɛ ni u ka kɛwalew ye. ¹³ Ne ye Alifa ni Omega ye, fɔlɔ ni kosa, daminɛ ni laban.» ¹⁴ Minnu bɛ u ka finiw ko walisa u ka se ka ɲɛnamaya jiriden dɔ sɔrɔ, ka don o dugu daw fɛ, olu ye dubadenw de ye. ¹⁵ Nka wuluw bɛ kɛnɛma, ani subaaw ni jatɔw ni mɔgɔ fagalaw ni bolibatobaaw ani nkalon ka di minnu bɛɛ ye ani minnu bɛɛ bɛ nkalon tigɛ. ¹⁶ «Ne Yesu ye ne ka mɛlɛkɛ ci ka taa o kow seereya kɛ aw ye egilisiw kɔnɔ. Ne ye Dawuda dili ni a bɔnsɔn ye, ani kɛnɛbɔda dolo manamanatɔ.» ¹⁷ Ni Senu ni kɔɲɔmuso b’a fɔ ko: «Na!» Min b’a mɛn, o k’a fɔ fana ko: «Na!» Minnɔgɔ bɛ min na, o ka na. Min b’a fɛ, o ka ɲɛnamaya ji min gansan. ¹⁸ Minnu bɛ nin kitabu kiraya kumaw mɛn, ne bɛ nin kuma fɔ olu bɛɛ ye ko: «Ni mɔgɔ min ye dɔ fara o kumaw kan, tɔɔrɔ ko minnu sɛbɛnnen bɛ nin kitabu la, Ala na olu fara o tigi ta kan. ¹⁹ Ni mɔgɔ min ye dɔ bɔ nin kitabu kiraya kumaw la, Ala na o tigi niyɔrɔ bɔ ɲɛnamaya jiri ni dugu senuma la, olu minnu ko sɛbɛnnen bɛ nin kitabu la.» ²⁰ Min bɛ nin kow seereya kɛ, o ko: «Ɔwɔ, ne bɛ na sɔɔni.» Amiina, i ka na, Matigi Yesu. ²¹ Matigi Yesu ka nɛɛma ka kɛ aw bɛɛ fɛ. Amiina.