FILIPEKAW

FILIPEKAW

¹ Ne Paul ani Timote, Krisita Yesu ka jɔnw, an bɛ nin sɛbɛn ci Ala ka mɔgɔ senumaw ma Filipe, minnu bɛ Krisita Yesu la, ani egilisi ɲɛminɛbaaw ni a baarakɛlaw. ² An Fa Ala ni Matigi Yesu Krisita ka nɛɛma ni dususuma di aw ma. ³ Ni ne bɛ miiri aw ko la tuma o tuma, ne bɛ barika da ne ka Ala ye. ⁴ Ne nisɔndiyalen bɛ delili kɛ aw ye ne ka deliliw bɛɛ la, ⁵ katuguni aw kɛra ne jɛɲɔgɔnw ye Kibaru Duman fɔli la, kabini don fɔlɔ fo sisan. ⁶ Ne y’a dɔn k’a jɛya ko Ala min ye baara ɲuman daminɛ aw kɔnɔ, o na to a kan k’a dafa fo Krisita Yesu ka don na. ⁷ A bɛnnen bɛ ko ne ka miiri aw bɛɛ ko la ten, katuguni aw ko ka di ne ye kosɛbɛ. Ka ne to kaso la, wala ka ne to Kibaru Duman lafasali ni a sabatili la, aw kɛra ne jɛɲɔgɔnw ye Ala ka nɛɛma la. ⁸ Ala ye ne seere ye ko aw nege bɛ ne la kosɛbɛ ka kɛɲɛ ni Krisita Yesu ka kanuya ye. ⁹ Ne bɛ Ala deli ko aw ka kanuya ka bonya ka ta’a fɛ dɔnniya sɛbɛ ni hakilitigiya bɛɛ la, ¹⁰ walisa aw ka se ka ko ɲumanw faranfasi. O cogo la aw na kɛ mɔgɔ jɛlen jalakibaliw ye fo Krisita ka don na, ¹¹ aw falen tilennenya nɔ la Yesu Krisita barika la. O bɛ kɛ Ala tanuli ko ye ka nɔɔrɔ da a tɔgɔ kan. ¹² Ne b’a fɛ aw ka nin dɔn, balimaw, ko ko minnu kɛra ne la, olu kɛra Kibaru Duman ɲɛfɛ taali sababu ye, u ma a bali. ¹³ Ayiwa, kube mɔgɔw bɛɛ ani mɔgɔ tɔw bɛɛ b’a dɔn ko ne bɛ kaso la Krisita kosɔn. ¹⁴ Balima caman jigi dara Matigi kan ne ka kasola bilali kosɔn, u ja gɛlɛyara kosɛbɛ ka Ala ka kuma fɔ ni siran tɛ. ¹⁵ Tiɲɛ la, dɔw bɛ waajuli kɛ Krisita ko la ni keleya ni sɔsɔli ye, nka dɔw b’a kɛ ni diyaɲe ye. ¹⁶ Olu b’a kɛ kanuya kosɔn, u y’a dɔn ko Ala ye Kibaru Duman lafasali baara kalifa ne ma. ¹⁷ Nka dɔw bɛ Krisita ko fɔ ni sɔsɔli ye, olu t’a kɛ ni sɛbɛ ye. U bɛ miiri ko u bɛ dɔ fara ne ka tɔɔrɔ kan ka ne to kaso la. ¹⁸ Baasi tɛ! Cogo o cogo, n’a kɛra sɛbɛ la, wala n’a ma kɛ sɛbɛ la, Krisita ko bɛ fɔ. Ne ɲagalila o la. Ne bɛ to ka ɲagali, ¹⁹ k’a masɔrɔ ne b’a dɔn ko o kow bɛɛ na kɛ ne kisili sababu ye aw ka deliliw ni Yesu Krisita Ni Senu ka dɛmɛni barika la. ²⁰ Ne kɔrɔtɔlen bɛ ɲɛnafilɛli la, ne jigi b’a kan ko ne tɛna maloya fewu, nka ne na ja gɛlɛyaba sɔrɔ sisan ani tuma bɛɛ, ɲɛnamaya la wo, saya la wo, ka Krisita ka bonyaba jira ne ko la. ²¹ Katuguni ne fɛ, ka ne ɲɛnama to, o ye Krisita ye, ka sa, o ye tɔnɔ ye. ²² Nka ka ne ɲɛnama to, ni o bɛ ne ka baara ɲɛ, ne ka kan ka min ɲɛnatɔmɔ, ne tɛ se ka o fɔ. ²³ Ne hakili ɲaaminen bɛ ko fila la. Ne b’a fɛ ka taa to Krisita fɛ yen, o de ka fisa kosɛbɛ, ²⁴ nka wajibi don ne ka to farisogo la aw kosɔn. ²⁵ Ne y’a dɔn k’a jɛya ko ne na to yan, ka sigi aw bɛɛ fɛ, walisa aw ka taa ɲɛ ani aw ka ɲagali dannaya la. ²⁶ Aw na yɛrɛbonya sababu kura sɔrɔ ne ko la Krisita Yesu la ne seginni kosɔn aw cɛma. ²⁷ Aw taama cogo ka bɛn ni Krisita ka Kibaru Duman ye ka tɛmɛn fɛn bɛɛ kan, walisa ni ne taara ka aw ye wo, ni ne ma taa wo, ne ka aw kibaru mɛn ko aw sinsinnen bɛ miirili kelen na, ani aw bɛ ɲɔgɔn dɛmɛ kɛlɛ la Kibaru Duman dannaya kosɔn ni dusu kelen ye. ²⁸ Aw kana a to aw juguw ka aw lasiran foyi la. O na kɛ olu halakili taamashyɛn ye, nka a na kɛ aw kisili taamashyɛn ye, o de bɛ bɔ Ala la. ²⁹ Ala ye nin nɛɛma kɛ aw ye ko aw ka da Krisita la, o dɔrɔn tɛ, aw ka tɔɔrɔ ale kosɔn fana. ³⁰ Aw y’a ye ko ne tun bɛ kɛlɛ min na, ni aw b’a dɔn ko ne b’a la halibi, aw fana bɛ o bɔɲɔgɔnko kɛlɛ la.

¹ Ni dusu saaloli bɛ Krisita la, ni dususuma bɛ kanuya la, ni jɛɲɔgɔnya bɛ Ni Senu la, ni hinɛ ani makari bɛ yen, ² a’ ye aw miiriliw kɛ kelen ye ka ne ka ɲagali dafa. Kanuya kelen ka kɛ aw la, aw kɔnɔ ka kɛ kelen ye, aw miirili ka kɛ kelen ye. ³ Aw kana foyi kɛ ni farali dusu ye, wala yɛrɛjiranciya, nka aw bɛɛ ka aw yɛrɛw majigin, k’a jate ko aw mɔgɔɲɔgɔnw ka fisa ni aw yɛrɛw ye. ⁴ Aw si kana miiri aw yɛrɛw ka kow la dɔrɔn, nka aw bɛɛ kelen-kelen ka miiri aw mɔgɔɲɔgɔnw ko fana la. ⁵ Nin miirili min tun bɛ Krisita Yesu la, o yɛrɛ ka kɛ aw la: ⁶ Ale tun bɛ Ala cogo la, a yɛrɛ ni Ala ka kan, a ma o jate bɔsili fɛn ye, ⁷ nka a ye o mabɔ a yɛrɛ la ka jɔn cogo ta, ka kɛ Hadamaden bɔɲɔgɔnko ye. A sɔrɔlen mɔgɔ bisigi la, ⁸ a ye a yɛrɛ majigin ka kɛ kan minɛbaa ye, fo ka se saya ma, gengenjiri la saya yɛrɛ. ⁹ O de kosɔn Ala y’a kɔrɔta kosɛbɛ. Tɔgɔ min ka bon tɔgɔw bɛɛ ye, Ala y’o di a ma, ¹⁰ walisa sankolola fɛnw ni dugukolo kan fɛnw ni dugukolo jukɔrɔ fɛnw bɛɛ ka ɲɔngiri Yesu tɔgɔ la, ¹¹ ani nɛnkunw bɛɛ ka jɔ a la ko Yesu Krisita ye Matigi ye. O na nɔɔrɔ da Fa Ala kan. ¹² O cogo la ne ka kanulenw, aw ye kan minɛli kɛ tuma bɛɛ ka ne to aw cɛma, nka sisan aw ka kɛ kan minɛbaaw ye ka tɛmɛn o kan, hali k’a sɔrɔ ne tɛ yen, a’ ye aw kisili ko baara kɛ ni siran ni yɛrɛyɛrɛ ye, ¹³ katuguni min bɛ baara kɛ aw kɔnɔ, ka se di aw ma ka sɔn a yɛrɛ diyaɲekow ma ka u kɛ, o ye Ala de ye. ¹⁴ A’ ye fɛn bɛɛ kɛ ni dajukɔrɔ kuma ni sɔsɔli tɛ, ¹⁵ walisa aw ka kɛ jalakibali jɛlenw ye, Ala den jalakibaliw, mɔgɔ tulo gɛlɛnw cɛma, k’a sɔrɔ aw bɛ yeelen bɔ u cɛma i ko lanpa bɛ yeelen bɔ diɲɛ la cogo min na. ¹⁶ Aw ka taa u yɔrɔ ni ɲɛnamaya kuma ye. O na kɛ ne yɛrɛbonya sababu ye Krisita ka don na, k’a jira ko ne ma boli fu, ne ma baara kɛ fu. ¹⁷ Hali ni ne joli bɔnna, o kɔrɔ, ni ne ni bɔra, ka fara aw ka dannaya saraka ni a baara kan Ala ɲɛ kɔrɔ, ne bɛ ɲagali o la, ka ɲagali aw bɛɛ fɛ. ¹⁸ O cogo la aw fana ka ɲagali o la, ka ɲagali ne fɛ. ¹⁹ Ne jigi b’a kan Matigi Yesu la, ko sɔɔni ne na Timote ci aw ma, walisa ne mana aw kibaru dɔn tuma min na, ne ja ka gɛlɛya. ²⁰ Ale kelen ye ne jɛɲɔgɔn ye miirili ni aw hami ko la sɛbɛ la. ²¹ U tɔw bɛɛ bɛ hami u yɛrɛw ka kow la, u tɛ hami Krisita Yesu ka kow la. ²² Nka aw b’a dɔn ko Timote ye a ka dannamɔgɔya jira, ko a ye baara kɛ ne fɛ Kibaru Duman baara ko la, i ko denkɛ bɛ baara kɛ a fa fɛ cogo min na. ²³ O de kosɔn ne mana ne ka koɲɛ dɔn, ne jigi b’a kan k’a ci o yɔrɔnin bɛɛ. ²⁴ Ne dara a la Matigi la ko sɔɔni ne yɛrɛ bɛ taa bɔ aw ye. ²⁵ Ne tun bɛ miiri ko ne ka kan ka Epafrodite kɔsegin aw ma, o ye ne balimakɛ ni ne baarakɛɲɔgɔn ani ne kɛlɛkɛɲɔgɔn ye. Aw tun y’a ci ka na ni ne magoɲɛ fɛnw ye. ²⁶ Aw bɛɛ yeli nege tun b’a la kosɛbɛ. A digira a la kosɛbɛ katuguni aw y’a mɛn ko a banana. ²⁷ Tiɲɛ don, a tun man kɛnɛ, a tun bɛ ɲini ka sa yɛrɛ, nka Ala hinɛna a la, ale dama tɛ, a hinɛna ne fana la, walisa ɲɛnasisi wɛrɛ kana fara ne ka ɲɛnasisi kan. ²⁸ O de kosɔn ne ye ne teliya k’a ci, walisa aw mana a ye, aw ka ɲagali ka bonya, ne ka ɲɛnasisi na dɔgɔya. ²⁹ Ayiwa, aw k’a minɛ koɲuman Matigi la ni ɲagali sifa bɛɛ ye, ka o bɔɲɔgɔnko mɔgɔw bonya, ³⁰ katuguni a tun bɛ ɲini ka sa Krisita ka baara kosɔn. Aw tun tɛ se ka baara min kɛ ne ye, ale faratira a yɛrɛ ni la ka na o kɛ.

¹ Ayiwa sisan, ne balimaw, a’ ye ɲagali Matigi la. Ka o kow sɛbɛn k’a ci aw ma, o man gɛlɛn ne ma, a bɛ se ka aw banba. ² A’ ye aw yɛrɛw kɔlɔsi wuluw la, ka aw kɔlɔsi kojugukɛlaw la, ka aw kɔlɔsi bolokoli fu la, ³ k’a masɔrɔ anw ye bolokolen sɛbɛw ye, an minnu bɛ Ala bato a Ni Senu barika la, ka an yɛrɛw bonya Krisita Yesu la, nka an tɛ an jigi da farisogo kan. ⁴ O bɛɛ n’a ta jigi da yɔrɔ bɛ ne fɛ farisogo kow la. Ni mɔgɔ dɔ bɛ miiri ko jigi da yɔrɔ b’a fɛ farisogo kow la, a bɛ ne fɛ ka tɛmɛn o kan. ⁵ Ne bolokora ne bange tile seginnan la. Ne ye Israɛl siya dɔ ye, Benjamɛn bɔnsɔn don. Ne ye Hɛburu yɛrɛ ye. ⁶ Sariya ta fan fɛ, ne ye Farisiɛn de ye. Dusu kalaya ta fan fɛ, ne tun bɛ egilisi tɔɔrɔ. Tilennenya min bɛ sɔrɔ sariya la, ne jalakibali tun don o ta fan fɛ. ⁷ Nka ne tun bɛ tɔnɔ sɔrɔ ko minnu na, ne bɛ olu jate bɔnɛ ye Krisita kosɔn. ⁸ Tiɲɛ la, ne bɛ fɛn bɛɛ jate bɔnɛ ye nin nafaba kosɔn, Yesu Krisita ne Matigi dɔnniya kɔni. Ale kosɔn ne bɔnɛna fɛn bɛɛ la ka u bɛɛ jate ɲamanɲaman ye, walisa ne ka Krisita sɔrɔ, ⁹ ani ne ka sɔrɔ ale la. Ne yɛrɛ ka tilennenya min bɛ sɔrɔ sariya la, o nɔ tɛ, fɔ tilennenya min bɛ sɔrɔ dannaya fɛ Krisita la. O tilennenya bɛ bɔ Ala la, a dannaya barika la. ¹⁰ Ne bɛ min ɲini, o filɛ nin ye, ka Krisita ni a kununli sebaaya dɔn, ka ne niyɔrɔ ta a tɔɔrɔ kow la ka kɛ a bɔɲɔgɔnko ye a saya la, ¹¹ walisa cogo o cogo ne fana ka se ka kunun ka bɔ suw cɛma. ¹² A tɛ ko ne y’a sɔrɔ ka ban, wala ko ne dafalen bɛ. Nka ne bɛ boli a nɔfɛ, walisa ne ka ne jija ka o sɔrɔ, k’a sɔrɔ Krisita Yesu ye ne minɛ o kama ka ban. ¹³ Balimaw, ne t’a jate ko ne yɛrɛ y’a sɔrɔ ka ban, nka ne bɛ nin fɛn kelen de kɛ. Ne bɛ ne hakili bɔ ne kɔfɛ fɛnw la, ka ne yɛrɛ mɔɔnɔbɔ ne ɲɛfɛ fɛnw nɔfɛ. ¹⁴ Ne bɛ boli ka se o boli dan ma, walisa ne ka o sesɔrɔ jala sɔrɔ, o ye Ala ka sankolola weleli ye Krisita Yesu la. ¹⁵ An minnu dafara ni la, an bɛɛ ka miiri ten. Ni miirili wɛrɛ bɛ aw dɔw la, Ala na o fana jira aw la. ¹⁶ Cogo o cogo, an sera dan min ma, an ka taama ka kɛɲɛ n’o ye. ¹⁷ Balimaw, aw bɛɛ ka kɛ ne ladegebaaw ye. An ye cogo jira aw la. Minnu bɛ taama ka kɛɲɛ n’o cogo ye, a’ ye olu filɛ. ¹⁸ Ne y’a fɔ aw ye ko caman, ne kasitɔ bɛ segin a kan sisan, ko mɔgɔ caman cogo b’a jira ko u ye Krisita gengenjiri juguw ye. ¹⁹ U laban ye halakili de ye. U kɔnɔbara ye u ka batofɛn ye. U bɛ u yɛrɛw bonya u maloya kow la. U bɛ miiri nin diɲɛ kow dɔrɔn de la. ²⁰ An kɔni, an faso bɛ sankolo la. An bɛ Kisibaa Matigi Yesu Krisita makɔnɔ ka bɔ yen. ²¹ A na an ka majiginlenya farikolo yɛlɛma ka a kɛ a yɛrɛ farikolo nɔɔrɔma bɔɲɔgɔnko ye, ka kɛɲɛ ni a ka sebaaya baarakɛ cogo ye, a bɛ se ka fɛn bɛɛ kolo a yɛrɛ ye o sebaaya min fɛ.

¹ O de y’a to ne balima kanulenw, aw sinsinnen ka to Matigi la. Aw yeli nege bɛ ne la kosɛbɛ. Kanulenw, aw ye ne nisɔndiya sababu ni ne ka kunnajala ye. ² Ne bɛ Evodi deli ka Sɛntisɛ fana deli ko u kɔnɔ ka kɛ kelen ye Matigi la. ³ E fana, ne baarakɛɲɔgɔn kantigi, ne b’i deli ko i ka o musow dɛmɛ. Olu tun ye ne dɛmɛbaaw ye Kibaru Duman fɔli la, u ni Kleman ani ne baarakɛɲɔgɔn tɔw fana. U bɛɛ tɔgɔw sɛbɛnnen bɛ ɲɛnamaya kitabu la. ⁴ A’ ye ɲagali Matigi la tuma bɛɛ. Ne bɛ segin a kan tun, a’ ye ɲagali. ⁵ Aw ka dusu sumalenya ka dɔn mɔgɔw bɛɛ fɛ. Matigi bɛ an kɛrɛ fɛ. ⁶ Aw hakili kana ɲaami foyi la, nka fɛn o fɛn ko bɛ aw la, aw ka o ɲini Ala fɛ ni deliliw ni delilibaw ni barika dali ye. ⁷ N’o kɛra, Ala ka hɛrɛ min bɛ tɛmɛn mɔgɔw ka miiriliw bɛɛ kan, o na aw dusukunw ni aw ka miiriliw mara Krisita Yesu la. ⁸ O bɛɛ kɔ, balimaw, ko minnu ye tiɲɛ ye, ko minnu bɛ bɛn bonyali ma, ko minnu tilennen bɛ, ko minnu jɛlen don, ko minnu ka di, ko minnu tɔgɔ ɲumanw bɔra, ko minnu ka ɲi, ko minnu ka kan ni tanuli ye, aw ka miiri o kow bɛɛ la. ⁹ Aw ye ko minnu kalan ka u sɔrɔ, ka u mɛn ka u ye ne fɛ, a’ ye olu kɛ. N’o kɛra, hɛrɛtigi Ala na kɛ aw fɛ. ¹⁰ Ne ɲagalila Matigi la kosɛbɛ k’a ye sisan ko aw bɛ aw janto ne la ko kura. O bɛɛ n’a ta, aw tun bɛ aw janto ne la, nka aw ma cogo sɔrɔ a la. ¹¹ O fɔ kun tɛ ne fɛ ne ka faantanya ye, katuguni ne kɛra cogo o cogo, ne degena o la ka wasa. ¹² Ni faantanya bɛ ne la, ne bɛ o cogo dɔn. Ni ne fɛntigiyara, ne bɛ o fana cogo dɔn. Fɛn o fɛn na, cogo o cogo, ka fa wo, ka to kɔngɔ la wo, ka fɛntigiya wo, ka koli wo, ne degena o bɛɛ la. ¹³ Ne bɛ se ka fɛn bɛɛ kɛ Krisita barika la, ale de bɛ ne barika bonya. ¹⁴ O bɛɛ n’a ta, aw ye ko ɲuman kɛ ka ne dɛmɛ ne ka tɔɔrɔw la. ¹⁵ Aw Filipekaw yɛrɛw b’a dɔn ko ne bɔra Masedwanɛ jamana la tuma min na, Kibaru Duman fɔli daminɛ tuma la, egilisi min kɛra ne jɛɲɔgɔn ye nili ni sɔrɔli la, o ye aw dɔrɔn de ye. ¹⁶ Hali ka ne to Tesalonike, aw ye ne magoɲɛ fɛn dɔ ci ne ma siɲɛ fila. ¹⁷ A tɛ ko ne bɛ nilifɛn dɔ ɲini, nka ne bɛ aw ka dannayaden de ɲini, o ka caya ka jate aw ye. ¹⁸ Ne ye ne mago fɛn bɛɛ sɔrɔ, o ka ca ka tɛmɛn ne mago kan. Ne fara, sabu aw ye fɛn min ci ne ma Epafrodite bolo, ne ye o bɛɛ sɔrɔ. O kɛra saraka suma duman minɛlen ye Ala fɛ, a ka di a ye. ¹⁹ Ne ka Ala na aw mago bɛɛ ɲɛ ka kɛɲɛ ni a yɛrɛ ka fɛntigiya ye nɔɔrɔ la Krisita Yesu la. ²⁰ An Fa Ala ka tanu badaa-badaa. Amiina. ²¹ A’ ye Ala ka mɔgɔ senumaw bɛɛ kelen-kelen fo Krisita Yesu la. Balima minnu bɛ ne fɛ yan, olu bɛɛ bɛ aw fo. ²² Ala ka mɔgɔ senumaw bɛɛ bɛ aw fo, janko minnu bɛ Romɛ masakɛ ka so. ²³ Matigi Yesu Krisita ka nɛɛma ka kɛ aw bɛɛ fɛ.