FILEMON

FILEMON

¹ Ne Paul, Krisita Yesu ka kasolamɔgɔ ani balimakɛ Timote, an bɛ nin sɛbɛn ci an ka kanulen ni an baarakɛɲɔgɔn Filemon ma, ² ani balimamuso Afiya ni an dɛmɛbaa kɛlɛ la Arsipe ani egilisi min bɛ lajɛ i ka so. ³ An Fa Ala ni Matigi Yesu Krisita ka nɛɛma ni dususuma di aw ma. ⁴ Ne bɛ barika da ne ka Ala ye tuma bɛɛ, ka Ala deli i ye ne ka deliliw bɛɛ la, ⁵ k’a masɔrɔ i bɛ Ala ka mɔgɔ senumaw kanu cogo min na, ani i dara Matigi Yesu la cogo min na, ne ye olu kibaru mɛn. ⁶ Ne bɛ Ala deli ko jɛɲɔgɔnya min bɛ an ni i cɛ dannaya la, o ka taa ɲɛ ka den, walisa fɛn ɲuman o fɛn ɲuman ye an ta ye Krisita la, i ka olu dɔn ka dafa. ⁷ Ne balimakɛ, ne ye ɲagaliba ni dusu saaloliba sɔrɔ i ka kanuya kosɔn, katuguni i ye Ala ka mɔgɔ senumaw dusuw saalo. ⁸ O de kosɔn, hali k’a sɔrɔ Krisita ye se di ne ma min b’a to ne bɛ se ka i bila ko bɛnnen kɛli la, ⁹ o bɛɛ n’a ta ne b’a fɛ ka fɛn dɔ deli i fɛ an cɛ kanuya kosɔn. Ne Paul bɛ i deli, ne min ye cɛkɔrɔba ye, o dɔrɔn tɛ, ne ye Krisita Yesu ka kasolamɔgɔ ye sisan. ¹⁰ Ne bɛ i deli ne denkɛ Onɛsimɛ ta fan fɛ, ne ye o min bange ka ne to kaso la. ¹¹ A ma mago si ɲɛ i ye waati tɛmɛnnen na, nka sisan a bɛ e mago ɲɛ ani ne fana. ¹² Ne b’a kɔsegin i ma sisan, ale min bɛ i ko ne farikolo yɔrɔ dɔ. ¹³ Ne tun b’a fɛ a ka to ne fɛ ka ne to kaso la yan Kibaru Duman kosɔn, walisa a ka baara kɛ ne ye e nɔ na. ¹⁴ Nka ne tun t’a fɛ ka foyi kɛ a ko la ni e ma sɔn min ma, walisa i bɛ ko ɲuman min kɛ ne ye, o kana kɛ diyagoya ye, nka o ka kɛ ni diyaɲe ye. ¹⁵ A dɔrɔ nin de y’a to a farala i la ka waati dɔɔnin kɛ, walisa a ka kɛ i ta ye tuma bɛɛ. ¹⁶ A tɛna kɛ jɔn ye tun, nka a ka fisa ni jɔn ye. Balima kanulen don Krisita la. A ko ka di ne ye haali, nka a ko ka kan ka diya i ye ka tɛmɛn ne kan, mɔgɔya la ani Matigi la. ¹⁷ O de kosɔn ni i bɛ ne jate i jɛɲɔgɔn ye, i ka ale ladon i ko i bɛ ne ladon cogo min na. ¹⁸ Ni a ye i tɔɲɔ fɛn dɔ la, wala ni i ka juru b’a la, i ka o jate ne kun. ¹⁹ Ne Paul bɛ nin sɛbɛn ni ne yɛrɛ bolo ye, ko ne na o sara. O bɛɛ n’a ta, ne t’a fɛ k’a fɔ i ye ko ne ka juru min bɛ i la, ko o ye i yɛrɛkun ye. ²⁰ Ɔwɔ, ne balimakɛ, ne b’i deli, i ka ne dɛmɛ nin ko la Matigi kosɔn. I ka ne dusu suma Krisita la. ²¹ Ne y’a dɔn k’a jɛya ko ne bɛ min ɲini i fɛ, ko i na o kɛ. O de kosɔn nɛ ye nin sɛbɛn k’a ci i ma. Ne y’a dɔn ko i n’a kɛ ka tɛmɛn ne ka fɔlen kan yɛrɛ. ²² I ka so dɔ labɛn ne ye fana, k’a masɔrɔ ne jigi b’a kan ko ne na kɔsegin aw fɛ yen aw ka Ala deliliw barika la. ²³ Epafras bɛ i fo, o ye ne kasola bilaɲɔgɔn ye Krisita Yesu la. ²⁴ Ne baarakɛɲɔgɔnw Marka ni Arisitarke ni Demas ani Luka fana bɛ i fo. ²⁵ An Matigi Yesu Krisita ka nɛɛma ka kɛ aw fɛ.