EFESEKAW
11 Ne Paul, Krisita Yesu ka ciden Ala sago barika la, ne bɛ nin sɛbɛn ci Ala ka mɔgɔ senumaw ma Efese, olu minnu ye Krisita Yesu dannabaaw ye. 2 An Fa Ala ni Matigi Yesu Krisita ka nɛɛma ni dususuma di aw ma. 3 An Matigi Yesu Krisita Fa Ala ka tanu. A ye Ni Senu ka dubaw bɛɛ da an kan sankolo yɔrɔw la Krisita la. 4 Ala ye an ɲɛnatɔmɔ Krisita la sani diɲɛ ka da, walisa an ka kɛ senumaw ni jalakibaliw ye ale ɲɛ kɔrɔ. 5 Ala ka kanuya kosɔn a kɔnna k’a latigɛ ko an ka kɛ a denw ye Yesu Krisita barika la ka kɛɲɛ ni a sago diyaɲe ye, 6 walisa a ye a ka nɛɛma min ni an na a ka Kanulen na, o nɔɔrɔ ka tanu. 7 An ye kunmabɔli sɔrɔ ale de la a joli bɔnnen barika la, hakɛw yafa kɔni, ka kɛɲɛ ni Ala ka nɛɛma dama dɔnbali ye. 8 A ye o nɛɛma caya an ye haali, ni hakilitigiya ni dɔnniya sifa bɛɛ ye. 9 A ye a sago gundo jira an na ka kɛɲɛ ni a yɛrɛ diyaɲe ye. A y’a latigɛ Krisita la, 10 ko ni waatiw dafara tuma min na, a na sankolola fɛnw ni dugukolo kan fɛnw bɛɛ lajɛ ka kɛ kelen ye Krisita la, 11 An kɛra ciyɛntalaw ye Krisita la fana, k’a masɔrɔ min bɛ fɛn bɛɛ kɛ ka kɛɲɛ ni a yɛrɛ sago ka ko latigɛli ye, o kɔnna ka an ko latigɛ ka kɛɲɛ ni a sago ye, 12 walisa an minnu kɔnna ka an jigi da Krisita kan, an ka kɛ a nɔɔrɔ tanuli sababu ye. 13 Aw fana, kabini aw ye tiɲɛ kuma mɛn, aw kisili Kibaru Duman kɔni, aw jigi dara ale kan. Aw dalen kɔ ale la, taamashyɛn dara aw kan. O ye layidu Ni Senu ye. 14 Ni Senu ye an ka ciyɛn fɔlɔ fɛn ye, k’a jira ko an na don o ciyɛn na, ni Ala ye a taw bɛɛ kunmabɔ tuma min na, walisa a nɔɔrɔ ka tanu o la. 15 O de y’a to, dannaya min bɛ aw fɛ Matigi Yesu la, ani aw ye Ala ka mɔgɔ senumaw bɛɛ kanu cogo min na, kabini ne ye o kibaru mɛn, 16 ne tɛ barika dali dabila Ala ye aw kosɔn. Ne bɛ aw tɔgɔ fɔ ne ka deliliw la fana, 17 ko an Matigi Yesu Krisita ka Ala, nɔɔrɔ Fa, o ka Ni Senu di aw ma, ka aw kɛ hakilitigiw ye ka Ala dɔnniya jira aw la, walisa aw ka ale dɔn. 18 Ne bɛ a deli ko aw dusukun ɲɛw ka yɛlɛ, walisa Ala ye aw wele jigi min na, aw ka o dɔn, ani a bɛna ciyɛn min di aw ma a ka mɔgɔ senumaw cɛma, aw ka o nɔɔrɔ fana dɔn, 19 ka a ka sebaaya dama dɔnbali fana dɔn an dannabaaw ta fan fɛ. O sebaaya bɛ kɛɲɛ ni a ka fangaba baarakɛ cogo ye. 20 A ye o fanga jira Krisita kununli fɛ ka bɔ suw cɛma ka a sigi a yɛrɛ kinin fɛ sankolo yɔrɔw la. 21 A y’a sigi kuntigiya ni sebaaya ni fanga ni masayaw bɛɛ kun na kosɛbɛ, ani tɔgɔw bɛɛ kun na, nin diɲɛ la tɔgɔw dama tɛ, hali diɲɛ nata la tɔgɔw fana. 22 Ala ye fɛn bɛɛ kolo Krisita ye k’a di ka kɛ egilisi kuntigi ye ko bɛɛ la. 23 Egilisi ye a farikolo ye. Ale min bɛ fɛn bɛɛ fa, egilisi ye o dafalenya ye.
21 Aw kɔni salen tun bɛ aw ka hakɛw ni aw ka jurumuw la. 2 Aw tun bɛ taama olu la fɔlɔ ka nin diɲɛ cogo ta ka kɛɲɛ ni fiɲɛ fanga kuntigi cogo ye, o ni min bɛ baara kɛ kan bilali denw kɔnɔ sisan. 3 Anw bɛɛ ani olu fana tun ye jɛɲɔgɔnw ye ka tugu an farisogo negew la, ka farisogo ni miirili sagow kɛ. An tun ye diminyadenw ye fana i ko tɔw, an bangera ten. 4 Nka Ala ka makari ka bon kosɛbɛ! A ye an kanu kanuyaba min na, 5 o de kosɔn, k’an salen to an ka hakɛw la, a ye an ni Krisita ɲɛnamaya ɲɔgɔn fɛ. Aw kisilen bɛ nɛɛma de barika la. 6 A ye an lakunun ɲɔgɔn fɛ fana ka an sigi ɲɔgɔn fɛ sankolo yɔrɔw la Krisita Yesu la. 7 A ye o kɛ walisa a ka a ka nɛɛma dama dɔnbali jira a ka ɲumaya fɛ an ta fan fɛ Krisita Yesu la waati nataw bɛɛ la. 8 Aw kisilen bɛ nɛɛma de barika la dannaya fɛ, o ma bɔ aw yɛrɛw la dɛ, Ala ka nilifɛn don. 9 O tɛ kɛwalew nɔ ye, walisa mɔgɔ si kana a yɛrɛ bonya. 10 Ala ka baara nɔ ye an de ye. A ye an da Krisita Yesu la kɛwale ɲumanw kama, a kɔnna ka olu labɛn walisa an ka taama u la. 11 Aw minnu ye siyaw ye farisogo ta fan fɛ, ni aw welela bolokobaliw bolokolenw fɛ, o bolokoli min kɛra u farisogo la mɔgɔ bolo fɛ, a’ ye aw hakili to aw fɔlɔ cogo la, 12 ko o tuma la Krisita tun tɛ aw fɛ, aw tun tɛ Israɛl siya dɔw ye, aw tun ye dunanw ye Ala ka ko fɔlenw layiduw ta fan fɛ, jigi si tun tɛ aw fɛ. Ala tun tɛ aw fɛ diɲɛ la. 13 Nka sisan, k’a sɔrɔ aw bɛ Krisita Yesu la, aw minnu yɔrɔ tun ka jan, aw surunyalen bɛ Krisita joli barika la. 14 Ale yɛrɛ ye an ka hɛrɛ ye. Farali kogo min tun bɛ Yahutuw ni siya tɔw cɛ, o kɔrɔ, juguya min tun bɛ u cɛ, a ye o ci ka u fila kɛ kelen ye. 15 A ye sariya ni a ci fɔlenw ni a kow wuli ni a yɛrɛ saya ye, walisa a ka u fila kɛ mɔgɔ kura kelen ye a yɛrɛ la ka hɛrɛ don u cɛ, 16 ka u fila kɛ farikolo kelen ye ka u ni Ala cɛ bɛn a saya fɛ gengenjiri kan, ka o juguya ban a gengenjiri fɛ. 17 A nana ka welewele da ko: «Aw minnu yɔrɔ tun ka jan ani aw minnu yɔrɔ tun ka surun, juguya banna.» 18 K’a masɔrɔ an fila bɛɛ bɛ se ka don an Fa fɛ Ni kelen na Yesu yɛrɛ barika la. 19 Ayiwa, o de kosɔn aw tɛ dunanw ni jamana wɛrɛ mɔgɔw ye tun, nka aw ni Ala ka mɔgɔ senumaw ye jamana kelen denw ye, aw ye Ala so mɔgɔw ye. 20 Aw jɔlɛn bɛ ju min kan, o ye cidenw ni kiraw ye. Krisita Yesu yɛrɛ ye o selekela kabakurun ye. 21 So bɛɛ bɛ ɲɔgɔn minɛ ale la ka jɔ ka kɛ Alabatosoba senuma ye Matigi la. 22 Aw fana bɛ jɔ ɲɔgɔn fɛ ale la ka kɛ Ala sigi yɔrɔ ye Ni Senu barika la.
31 O de kosɔn ne Paul, Krisita Yesu ka kasolamɔgɔ aw siya wɛrɛw kosɔn, 2 baara min kalifara ne ma Ala ka nɛɛma ko la aw kosɔn, aw ma o mɛn wa? 3 Ala ye a ka gundo dɔnniya jira ne la, i ko ne y’a sɛbɛn sisan ni kuma dama dɔw ye. 4 Aw mana o kalan, aw na se ka a ye o la ko ne bɛ Krisita ka gundo faamu. 5 O gundo tun ma dɔn waati tɛmɛnnen mɔgɔw fɛ, nka Ala y’a jira sisan a ka ciden senumaw ni a ka kiraw la Ni Senu fɛ. 6 O gundo filɛ nin ye, ko Kibaru Duman barika la, siya wɛrɛw ni Yahutuw ye ciyɛntaɲɔgɔnw ni farikolo kelen ye, ani jɛɲɔgɔnw Ala ka layidu la, a ye o min ta Krisita Yesu la. 7 Ne kɛra o Kibaru Duman baarakɛla ye ka kɛɲɛ ni Ala ka nɛɛma nili ye min dira ne ma a ka sebaaya baarakɛ cogo fɛ. 8 Ne min ka dɔgɔ ka tɛmɛn Ala ka mɔgɔ senuma tɔw bɛɛ kan, nin nɛɛma dira ne ma ka Krisita ka nafolotigiya dama dɔnbali Kibaru Duman fɔ siya wɛrɛw ye. 9 O gundo min dogolen tun bɛ fɛn bɛɛ Dabaa Ala fɛ kabini fɔlɔfɔlɔ, a ko ne ka o baarakɛ cogo bɔ kɛnɛ kan, 10 walisa Ala ka hakilitigiya cogo caman ka jira sisan kuntigiyaw ni sebaayaw la sankolo yɔrɔw la egilisi fɛ. 11 A ye o kɛ ka kɛɲɛ ni a ka badaa ko latigɛlen ye, a ye o min kɛ Krisita Yesu an Matigi la. 12 Yesu de la an jigi sigilen bɛ se ka gɛrɛ Ala la ni ja gɛlɛya ye Yesu dannaya barika la. 13 O de kosɔn, ne bɛ aw deli ko tɔɔrɔ minnu bɛ se ne ma aw kosɔn, olu kana aw jigi tigɛ, k’a masɔrɔ olu ye aw nɔɔrɔ de ye. 14 O de kosɔn, ne bɛ ne ɲɔngiri Fa Ala ɲɛ kɔrɔ, 15 o min tɔgɔ dara denbayaw bɛɛ kan, sankolola taw ni dugukolo kan taw. 16 Ne b’a deli ko aw kɔnɔna mɔgɔ barika ka bonya ni sebaaya ye Ni Senu fɛ ka kɛɲɛ ni a nɔɔrɔ dama dɔnbali ye, 17 ko Krisita ka sigi aw dusuw la dannaya barika la, walisa aw dili donnen ni aw bamalen kanuya la, 18 aw ni Ala ka mɔgɔ senumaw bɛɛ ka se ka o fɛrɛ ni a janya ni a jɔ janya ni a dunya dɔn ɲɔgɔn fɛ. 19 Aw ka Krisita ka kanuya fana dɔn, o min ka bon ka tɛmɛn dɔnniya dama bɛɛ kan, walisa aw ka fa Ala ka dafali bɛɛ la. 20 Ayiwa min bɛ se ka fɛn bɛɛ kɛ ka tɛmɛn an ka delili ni an ka miirili bɛɛ kan kosɛbɛ, ka kɛɲɛ ni a ka sebaaya baarakɛ cogo ye an kɔnɔ, 21 nɔɔrɔ ka da o de kan egilisi la ani Krisita Yesu la tuma bɛɛ, badaa-badaa. Amiina.
41 O de y’a to ne min ye kasolamɔgɔ ye Matigi la, ne bɛ aw deli ko aw welela weleli min na, aw taama cogo ka bɛn o ma, 2 ni yɛrɛmajiginlenya ni sabali ani muɲuli bɛɛ ye. Aw ka ɲɔgɔn ka kow muɲu ni kanuya ye. 3 A’ ye aw jija ka Ni Senu ka kelenya mara hɛrɛ sirilan na. 4 Farikolo kelen bɛ yen, ani Ni Senu kelen, i ko Ala ye aw wele jigi kelen kama cogo min na. 5 Matigi kelen bɛ yen, ani dannaya kelen, ni batiseli kelen. 6 Ala kelen bɛ yen, an bɛɛ Fa don, a bɛ bɛɛ kun na, bɛɛ cɛma, bɛɛ kɔnɔ. 7 Nɛɛma dira an bɛɛ kelen-kelen ma ka kɛɲɛ ni Krisita ka nili sumani dama ye. 8 O de y’a to a fɔra ko: «A yɛlɛnna san fɛ minkɛ, a taara ni mɔgɔ minɛlen caman ye. A ye nilifɛnw di mɔgɔw ma.» 9 K’a fɔ ko a yɛlɛnna san fɛ, o ye mun ye ni nin tɛ, ko a tun jiginna ka don dugukolo jukɔrɔ yɔrɔw la? 10 Min jiginna ani min yɛlɛnna sankolo yɔrɔw bɛɛ san fɛ, walisa a ka fɛn bɛɛ fa, o ye kelen de ye. 11 Ale ye mɔgɔ dɔw di, dɔw ka kɛ cidenw ye, dɔw ka kɛ kiraw ye, dɔw ka kɛ Kibaru Duman fɔbaaw ye, dɔw ka kɛ saga gɛnnaw ni karamɔgɔw ye, 12 walisa Ala ka mɔgɔ senumaw ka labɛn Ala ka kuma baara kama, ka to ka dɔ fara Krisita farikolo kan, 13 fo an bɛɛ ka kɛ kelen ye dannaya ni Ala Denkɛ dɔnniya la, ka kɛ mɔgɔ mɔlenw ye, fo ka se Krisita ka dafalenya jɔ kun dama ma, 14 walisa an kana to denmisɛnya la tun. An kana yigiyigi ka ɲɔni ka taa yan fɛ ani yen fɛ kalan sifa bɛɛ fiɲɛ fɛ mɔgɔw ka nanbara ni u ka mɔgɔ lafilili keguya cogo dulenw la. 15 Nka an ka tiɲɛ fɔ ni kanuya ye, ka mɔ fɛn bɛɛ la Krisita la, o ye farikolo kun ye. 16 Farikolo bɛɛ labɛnnen bɛ ale de la, a yɔrɔw bɛɛ bɛ ɲɔgɔn minɛ kolotugu yɔrɔw barika la ka kɛɲɛ ni u bɛɛ kelen-kelen ka baarakɛ cogo ye. O cogo la a bɛ jiidi ka dɔ fara a yɛrɛ barika kan kanuya la. 17 Ayiwa ne bɛ min fɔ aw ye Matigi la k’a jɛya, o filɛ nin ye, ko aw kana taama tun i ko Ala dɔnbaliw bɛ taama u ka miirili fufafuw la cogo min na. 18 U hakili dibilen bɛ. U ye dunanw ye Ala ka ɲɛnamaya ta fan fɛ u ka ko dɔnbaliya kosɔn, o min ye u dusukun gɛlɛya. 19 U dusukun tɛ se ka bɔ fɛn si seere ma tun. U ye u yɛrɛw di kakalaya ma ka ko nɔgɔlen sifa bɛɛ kɛ ka girin u kan. 20 Nka aw kɔni ma Krisita ko kalan ten dɛ, 21 ni a y’a sɔrɔ ko aw y’a mɛn ka kalan a la ka kɛɲɛ ni tiɲɛ ye min bɛ Yesu la, 22 ko aw ka aw jogo kɔrɔ bila, o min bɛ a yɛrɛ toli ka kɛɲɛ ni lafilili negew ye. 23 Aw ka kuraya aw ni ani aw hakili la, 24 ka jogo kura don aw la, o min dara Ala bisigi la, tiɲɛ ka tilennenya ni a ka senumaya la. 25 O de kosɔn, aw ka nkalon dabila, aw bɛɛ kelen-kelen ka tiɲɛ fɔ ɲɔgɔn ye, katuguni an ye ɲɔgɔn farikolo yɔrɔw de ye. 26 Ni aw diminna, aw kana jurumu kɛ. Tile kana bin ka aw diminnen to. 27 Aw kana yɔrɔ si di Sitanɛ ma. 28 Min tun bɛ sonyali kɛ, o kana sonyali kɛ tun, nka a ka jija ka baara bɛnnen kɛ ni a yɛrɛ bolow ye, walisa min mago bɛ fɛn na, a ka se ka fɛn dɔ di o ma. 29 Kuma jugu si kana bɔ aw da la, fɔ kuma bɛnnen min bɛ se ka dɔ fara mɔgɔ wɛrɛw barika kan, ka nɛɛma di a lamɛnbaaw ma. 30 Aw kana Ala Ni Senu dusu kasi, o min kɛra Ala ka taamashyɛn dalen ye aw kan kunmabɔli don ɲɛ. 31 Aw ka kunaya ni dusu bɔ ni diminya ni wɔyɔ ni nenili ani kɔnɔna juguya sifa bɛɛ dabila. 32 Nka aw ka ko ɲuman kɛ ɲɔgɔn ye, ka hinɛ ka yafa ɲɔgɔn ma, i ko Ala yafara aw ma Krisita la cogo min na.
51 O de y’a to aw ka kɛ Ala ladegebaaw ye i ko den kanulenw, 2 ka taama kanuya la, i ko Krisita fana ye an kanu ka a yɛrɛ di an kosɔn ka kɛ sɔnni fɛn ni saraka ye Ala ye, suma diyalan ɲuman. 3 Jatɔya ni nɔgɔlenya sifa bɛɛ ani wasabaliya, olu tɔgɔ yɛrɛ kana fɔ aw cɛma, o tɛ bɛn Ala ka mɔgɔ senumaw ma. 4 Malobaliya kuma ni kuma kunntan ani tulon kumaw fana bɛnnen tɛ dɛ, fɔ barika dali. 5 Aw ka nin dɔn k’a jɛya ko jatɔ ni mɔgɔ nɔgɔlen ni wasabali, o kɔrɔ, bolisɔnna, olu si niyɔrɔ tɛ Krisita ni Ala ka masaya la fewu. 6 Aw kana to mɔgɔw ka aw lafili ni kuma fu ye, k’a masɔrɔ o kow de b’a to Ala ka diminya bɛ se kan bilali denw ma. 7 O de kosɔn aw kana don u ka jɛ la. 8 Aw tun ye dibi ye ka kɔrɔ, nka sisan, aw ye kɛnɛ ye Matigi la. A’ ye taama i ko kɛnɛdenw. 9 Kɛnɛ nɔ ye ɲumaya ni tilennenya ani tiɲɛ bɛɛ ye. 10 A’ ye Matigi diyaɲekow faranfasi. 11 Aw ni dibi la kɛwale nafantanw kana jɛ, nka aw ka u kɔrɔfɔ yɛrɛ. 12 O mɔgɔw bɛ ko minnu kɛ dogo la, olu fɔli yɛrɛ ye maloya ko ye. 13 Ko minnu bɛɛ kɔrɔfɔra, olu jirala kɛnɛ fɛ, katuguni minnu jirala kɛnɛ kan, olu bɛɛ ye kɛnɛ de ye. 14 O de kosɔn a fɔra ko: «Kunun, sunɔgɔbaatɔ, ka wuli ka bɔ suw cɛma, Krisita na kɛnɛ bɔ i ye.» 15 A’ ye aw kɔlɔsi ka aw taama cogo dɔn. Aw kana taama i ko hakilintanw, nka i ko hakilitigiw, 16 ka waati kunmabɔ; k’a masɔrɔ nin donw ka jugu. 17 O de kosɔn aw kana kɛ hakilintanw ye, nka aw ka Matigi sago dɔn. 18 Aw kana aw ɲɛnamini ni diwɛn ye, kakalaya bɛ o la dɛ, nka aw ka fa Ni Senu la. 19 Aw ka kuma ɲɔgɔn fɛ ni Zaburuw ni tanuli dɔnkiliw ani Ala sira dɔnkiliw ye. Aw ka dɔnkili da ka Matigi tanu ni aw dusukunw bɛɛ ye. 20 Aw ka barika da Fa Ala ye tuma bɛɛ fɛn bɛɛ kosɔn, an Matigi Yesu Krisita tɔgɔ la. 21 Aw ka kolo ɲɔgɔn ye Krisita ɲɛsiran na. 22 Musow, a’ ye kolo aw yɛrɛw cɛw ye, i ko aw bɛ kolo Matigi ye cogo min na, 23 k’a masɔrɔ cɛ ye muso kuntigi ye, i ko Krisita ye egilisi kuntigi ye cogo min na. Ale yɛrɛ ye farikolo Kisibaa ye. 24 Egilisi kololen bɛ Krisita ye cogo min na, o cogo la musow ka kolo u yɛrɛw cɛw ye fɛn bɛɛ la. 25 Cɛw, a’ ye aw musow kanu, i ko Krisita ye egilisi kanu ka a yɛrɛ di a kosɔn cogo min na, 26 walisa a k’a saniya ji la koli fɛ ni Ala ka kuma ye, ka a kɛ a yɛrɛ ta ye, 27 walisa ka egilisi jɔ a yɛrɛ ɲɛ kɔrɔ, a nɔɔrɔma, nɔgɔ yɔrɔ wala fɔsɔnfɔsɔn yɔrɔ wala o bɔɲɔgɔnko fɛn si t’a la, nka a ka kɛ senuma ni jalakibali ye. 28 O cogo la cɛw fana ka kan ka u musow kanu i ko u yɛrɛw farikolow. Min bɛ a muso kanu, o bɛ a yɛrɛkun kanu. 29 Mɔgɔ si ma a yɛrɛ farisogo koniya abada, nka a b’a balo k’i janto a la, i ko Krisita fana b’a kɛ egilisi ye cogo min na, 30 sabu an ye a farikolo yɔrɔw de ye. 31 «O de kosɔn, cɛ na a fa ni a ba bila ka nɔrɔ a muso la, u fila na kɛ farisogo kelen ye.» 32 O gundo ka bon dɛ, nka ne bɛ kuma Krisita ni egilisi de ko la. 33 O bɛɛ n’a ta, aw bɛɛ kelen-kelen ka aw musow kanu i ko aw yɛrɛ kunw. Muso fana ka a cɛ bonya.
61 Denmisɛnw, a’ye aw bangebaaw kan minɛ Matigi la, katuguni o bɛnnen bɛ. 2 Layidu tara ci fɔlen minnu fɛ, o ye u la fɔlɔ de ye, «I ka i fa ni i ba bonya.» ‹197 3 «walisa i ka to hɛrɛ la ani i ka si jan sɔrɔ dugukolo kan.» 4 Faw fana, aw kana aw denw dusu tiɲɛ nka aw ka u lamɔ ni Matigi ka kololi ni a ka laadili ye. 5 Baaradenw, aw kuntigi minnu bɛ dugukolo kan, aw ka olu kan minɛ ni siran ni yɛrɛyɛrɛ ni dusu kelen ye, i n’a fɔ aw bɛ Krisita kan minɛ. 6 Aw kana baara kɛ u ɲɛ na dama, i n’a fɔ aw b’a fɛ ka aw ko diya mɔgɔw ye, nka aw ka baara kɛ i ko Krisita ka jɔnw, ka Ala sago kɛ ni aw dusukun bɛɛ ye. 7 Aw ka baara kɛ ni diyaɲe ye, i n’a fɔ aw bɛ baara kɛ Matigi ye, aw t’a kɛ mɔgɔw ye. 8 Aw k’a dɔn ko mɔgɔw bɛɛ, jɔnw wo, hɔrɔnw wo, u bɛɛ kelen-kelen na u ka ko ɲuman kɛlenw sara sɔrɔ Matigi fɛ. 9 Kuntigiw, aw fana ka o bɔɲɔgɔnko kɛ aw ka baaradenw ye, aw kana kangari da u ye. Aw k’a dɔn ko u Kuntigi ni aw Kuntigi bɛ sankolo la, o tɛ mɔgɔ bɔ mɔgɔ la. 10 O bɛɛ kɔ, a’ ye aw barika bonya Matigi ni a ka sebaaya fangama la. 11 A’ ye Ala ka kɛlɛkɛ minɛnw bɛɛ don aw la, walisa aw ka se ka jɔ ka Sitanɛ ka nanbaraw kunbɛn. 12 Katuguni an ni minnu bɛ kɛlɛ kɛ, o tɛ Hadamadenw ye, nka o ye kuntigibaw ni fangatigiw ni nin diɲɛ dibima kunna sigibaaw ye, ani sankolo yɔrɔw la jinɛw. 13 O de kosɔn a’ ye Ala ka kɛlɛkɛ minɛnw bɛɛ ta, walisa aw ka se ka kɛlɛ kɛ don jugu la, ani aw selen kɔ u bɛɛ la, aw jɔlen ka se ka to. 14 A’ ye aw jɔ, aw cɛsirilen ni tiɲɛ ye, ka tilennenya nɛgɛdulɔki dɔn aw kan na. 15 Hɛrɛ Kibaru Duman bɛ labɛnni min di, o ka kɛ aw ka sabara ye. 16 Ka fara o bɛɛ kan, aw ka dannaya nɛgɛbɛnnan ta. Aw na se ka Sitanɛ ka biɲɛ tasumamaw bɛɛ faga n’o ye. 17 Aw ka kisili nɛgɛfugula ta ani Ni Senu ka npan, o ye Ala ka kuma de ye. 18 Aw ka Ala deli tuma bɛɛ Ni Senu barika la ni deliliw ni deliliba sifa bɛɛ ye. A’ ye to aw ɲɛ na ka aw jija o la. A’ ye Ala deli a ka mɔgɔ senumaw bɛɛ ye, 19 k’a deli ne fana ye, walisa ni ne bɛ kuma tuma min na, Ala ka kuma cogo di ne ma ka Kibaru Duman gundo fɔ k’a jɛya ni ja gɛlɛya ye. 20 O Kibaru Duman kosɔn ne ye lasigiden ye kaso la. A’ ye Ala deli ko ne ka kuma ni ja gɛlɛya ye, i ko ne ka kan k’a kɛcogo min na. 21 Nka balimakɛ kanulen, Matigi ka baarakɛla dannamɔgɔ Tisike na ne kibaru bɛɛ fɔ aw ye ani ne ka koɲɛw. 22 Ne y’a ci ka taa aw yɔrɔ o de kosɔn, walisa aw ka an ka kow dɔn, ani a ka aw dusuw saalo. 23 An Fa Ala ni an Matigi Yesu Krisita ka dususuma ni kanuya ani dannaya di balimaw bɛɛ ma. 24 Minnu bɛ an Matigi Yesu Krisita kanu ni kanuya banbali ye, nɛɛma ka kɛ olu bɛɛ fɛ.