KOLOSEKAW

KOLOSEKAW

¹ Ne Paul, Krisita Yesu ka ciden Ala sago barika la, ani an balimakɛ Timote, ² an bɛ nin sɛbɛn ci Ala ka mɔgɔ senumaw ma Kolose, aw minnu ye balima dannabaaw ye Krisita la. An Fa Ala ka nɛɛma ni dususuma di aw ma. ³ An bɛ barika da an Matigi Yesu Krisita Fa Ala ye tuma bɛɛ an ka deliliw la aw ye, ⁴ k’a masɔrɔ aw ka dannaya Krisita Yesu la, ani aw bɛ Ala ka mɔgɔ senumaw kanu cogo min na, an ye o kibaru mɛn. ⁵ Jigi min maralen bɛ aw ye sankolo la, Kibaru Duman tiɲɛ kuma sera aw ma ka kɔrɔ ka aw ladɔnniya o la. Aw ka dannaya ni aw ka kanuya ju sigira o jigi kan. ⁶ O Kibaru Duman sera aw ma, i ko a sera diɲɛ bɛɛ ma ka den ka jiidi. A bɛ o kɛ aw cɛma fana kabini aw ye Ala ka nɛɛma ko mɛn k’a dɔn tiɲɛ la. ⁷ An baarakɛɲɔgɔn kanulen Epafras ye aw kalan o ko la. Ale ye Krisita ka baarakɛla dannamɔgɔ ye aw kosɔn. ⁸ Ni Senu ye kanuya min di aw ma, a ye o fɔ an ye. ⁹ O de kosɔn, kabini an ye aw kibaru mɛn, an ma Ala delili dabila aw ye. An bɛ Ala deli ko a ka aw fa a sago dɔnniya la, ka Ni Senu ka dɔnniya ni hakilitigiya di aw ma, ¹⁰ walisa aw taama cogo ni Matigi cogo ka bɛn, ani aw ka a diyaɲeko kɛ tuma bɛɛ. Aw ka kɛwale ɲuman sifa bɛɛ kɛ, ka taa ɲɛ Ala dɔnniya la. ¹¹ A fanga nɔɔrɔma ka aw barika bonya, walisa aw sabatilen ka to muɲuli la. ¹² A’ ye barika da Fa Ala ye ni ɲagali ye, ale min ye se di aw ma ka aw niyɔrɔ sɔrɔ a ka mɔgɔ senumaw ka ciyɛn na kɛnɛyeelen na. ¹³ A ye an tila ka bɔ dibi fanga la ka an ladon a Denkɛ kanulen ka masaya la. ¹⁴ An ye kunmabɔli sɔrɔ ale de la, jurumuw yafa kɔni. ¹⁵ Krisita ye Ala yebali ja ye. Dafɛn bɛɛ la fɔlɔ bangelen don, ¹⁶ k’a masɔrɔ ale de la fɛn bɛɛ dara, sankolola fɛnw ani dugukolo kan fɛnw, fɛn yetaw ni fɛn yebaliw, masayaw ni matigiyaw ni kuntigiyaw ani fangaw. U bɛɛ dara a fɛ ani a ye. ¹⁷ A bɛ fɛn bɛɛ ɲɛ, fɛn bɛɛ bɛ ɲɔgɔn minɛ ale la. ¹⁸ A ye farikolo kun ye, egilisi kuntigi kɔni. Ale ye daminɛ ye. Fɔlɔ bangelen don ka bɔ suw cɛma, walisa a ka ɲɛfɛla ta ko bɛɛ la. ¹⁹ Katuguni a diyara Fa Ala ye ko a ka dafalenya bɛɛ ka sigi ale kɔnɔ. ²⁰ A ye hɛrɛ don a yɛrɛ ni fɛn bɛɛ cɛ a Denkɛ joli barika la gengenjiri kan, ka fɛn bɛɛ ni a yɛrɛ cɛ bɛn ale la, dugukolo kan fɛnw ni sankolola fɛnw. ²¹ Aw fana tun ye dunanw ni juguw ye fɔlɔ aw ka miiriliw ni aw ka kɛwale juguw kosɔn, ²² nka sisan a ye aw ni ale cɛ bɛn a Denkɛ mɔgɔya farikoloma la saya fɛ, walisa a ka aw senumaw jalakibaliw kɔrɔfɔbaliw jɔ a ɲɛ kɔrɔ. ²³ O bɛɛ n’a ta, aw bamalen sabatilen ka to dannaya la. Aw kana to aw ka jɛngɛ ka mabɔ Kibaru Duman jigi la, aw ye o min mɛn. O Kibaru Duman fɔra sankolo jukɔrɔ dafɛn bɛɛ ye. Ne Paul kɛra o baarakɛla ye. ²⁴ Sisan ne bɛ ɲagali ne ka tɔɔrɔ kow la aw kosɔn. Min dɛsɛra Krisita ka tɔɔrɔ la, ne bɛ o dafa ne yɛrɛ farisogo la, ale farikolo kosɔn, o ye egilisi de ye. ²⁵ Ne kɛra egilisi baarakɛla ye ka kɛɲɛ ni o baara ye, Ala ye min kalifa ne ma aw kosɔn, walisa ne ka Ala ka kuma fɔ k’a foori, ²⁶ o kɔrɔ, o gundo min dogolen tun bɛ mɔgɔw bɛɛ la kabini fɔlɔfɔlɔ, nka a jirala a ka mɔgɔ senumaw la sisan. ²⁷ O gundo nɔɔrɔ belebeleba ye min ye siyaw cɛma, a diyara Ala ye ka o jira o mɔgɔ senumaw la, ko Krisita bɛ aw kɔnɔ, nɔɔrɔ jigi don. ²⁸ An bɛ ale ko fɔ ka mɔgɔw bɛɛ laadi ka u bɛɛ kalan ni hakilitigiya bɛɛ ye, walisa an ka mɔgɔw bɛɛ kelen-kelen jira Ala la, u dafalen Krisita la. ²⁹ O de kosɔn ne bɛ baara kɛ ka kɛlɛ kɛ ka kɛɲɛ ni Krisita ka baarakɛ cogo ye, o min bɛ baara kɛ ne kɔnɔ ni sebaayaba ye.

¹ Ne bɛ kɛlɛba min kɛ aw kosɔn, ani Laodisekaw ni minnu bɛɛ ma ne yɛrɛ ɲɛda ye fɔlɔ, ne b’a fɛ aw ka o dɔn, ² walisa u dusuw ka saalo, u ka kɛ kelen ye kanuya la, fo ka faamuli jɛyalen dafalen caman caman sɔrɔ, walisa u ka Ala ka gundo dɔn, o ye Krisita de ye. ³ Hakilitigiya ni dɔnniya ka nafaba bɛɛ dogolen bɛ ale de kɔnɔ. ⁴ Ne bɛ o fɔ walisa mɔgɔ si kana aw lafili ni kuma nugulenw ye. ⁵ Hali ni ne tɛ aw fɛ yen farisogo la, ne ni bɛ aw fɛ yen. Ne bɛ ɲagali k’a ye ko aw bɛ fɛn bɛɛ kɛcogo bɛnnen na, ani aw ka dannaya sinsinnen bɛ Krisita la. ⁶ Aw sɔnna Matigi Yesu Krisita ma cogo min na, aw ka taama ale la ten. ⁷ Aw ka kɛ Yesu la i ko jiri dili donnen, ka jiidi ale la, ka sabati dannaya la ka kɛɲɛ ni aw ka kalan sɔrɔlen ye. Aw ka barika dali ka caya. ⁸ A’ye aw yɛrɛw kɔlɔsi, walisa mɔgɔ si kana aw minɛ ni mɔgɔw ka hakilitigiya kalan ni lafilili kuma fu ye, ka kɛɲɛ ni mɔgɔw ka laadaw ni nin diɲɛ kow ye, olu tɛ kɛɲɛ ni Krisita ta ye. ⁹ Alaya ka dafalenya farisogoma sigilen bɛ ale la. ¹⁰ Ale bɛ kuntigiya ni fanga bɛɛ kun na, aw kɔni dafalen bɛ ale de la. ¹¹ Aw bolokora ale la fana. O bolokoli ma kɛ mɔgɔw bolo fɛ, nka o ye farisogo kow bilali ye Krisita ka bolokoli fɛ. ¹² Aw suw ni Krisita su donna ɲɔgɔn fɛ batiseli la, aw ni ale kununna ɲɔgɔn fɛ batiseli la fana, katuguni aw dara Ala ka sebaaya la, o min y’a lakunun ka bɔ suw cɛma. ¹³ Aw salen tun bɛ aw ka hakɛw ni aw farisogo bolokobaliya la tuma min na, Ala ye aw ni Krisita ɲɛnamaya ɲɔgɔn fɛ, k’a sɔrɔ a ye an ka hakɛw bɛɛ yafa an ma. ¹⁴ Sɛbɛn min tun bɛ an kama an ka sariya tiɲɛni kosɔn, ni a tun bɛ an kɛlɛ, Ala ye o bɔ yen, k’a gengen jiri la. ¹⁵ Ala ye fɛn bɛɛ bɔsi kuntigiw ni fangatigiw la ka u kɛ mafilɛli fɛnw ye fɛn bɛɛ ɲɛ na, k’a masɔrɔ a ye se sɔrɔ u kan Krisita gengenjiri barika la. ¹⁶ O cogo la mɔgɔ si kana aw jalaki dumuni ko la, wala minni ko la, wala seli don wala kalo kura ani lafiɲɛ donw ko la. ¹⁷ O kow bɛɛ ye fɛn nataw ja ye, nka o fɛn yɛrɛ bɛ sɔrɔ Krisita la. ¹⁸ Aw kana to mɔgɔ si ka aw bali ka aw ka sesɔrɔ jala sɔrɔ ni a ka yɛrɛmajiginlenya filankafoma ye wala a ka mɛlɛkɛw batoli. O mɔgɔ sifa bɛ a jigi da a ka yeli fɛnw kan ka a yɛrɛ bonya fu a ka Hadamadenya miiriliw la. ¹⁹ A tɛ nɔrɔ farikolo kuntigi Krisita la. Farikolo bɛɛ bɛ balo ka ɲɔgɔn minɛ kolotugu yɔrɔw ni fasaw fɛ ale de la. A bɛ bonya ni Ala ka bonyali ye. ²⁰ Ni aw ni Krisita sara ɲɔgɔn fɛ nin diɲɛ kow ta fan fɛ, mun na aw bɛ sɔn nin ci fɔlenw ma, i n’a fɔ aw ye nin diɲɛ taw ye? ²¹ Ko: «I kana nin minɛ. I kana nin nɛnɛ. I kana maga nin na.» ²² O fɛnw bɛɛ bɛ ban i mago ɲɛli la. Olu ye Hadamadenw ka ci fɔlenw ni u ka kalan ye. ²³ O ci fɔlenw ye hakilitigiya ye mɔgɔw ɲɛ na, u ka batoli cogo kosɔn min bɛ bɔ mɔgɔ la, ani u ka yɛrɛmajiginlenya ni u yɛrɛ farikolo tɔɔrɔ kow, nka nafa tɛ u si la. U ka di farisogo ye dɔrɔn.

¹ Ayiwa, ni aw ni Krisita kununna ɲɔgɔn fɛ, aw ka to ka sanfɛ fɛnw ɲini, Krisita sigilen bɛ Ala kinin fɛ yen. ² A’ ye miiri sanfɛ fɛnw na, aw kana miiri dugukolo kan fɛnw na. ³ Aw sara, aw ka ɲɛnamaya ni Krisita dogolen bɛ ɲɔgɔn fɛ Ala fɛ. ⁴ Krisita ye aw ka ɲɛnamaya ye. Ni a y’i jira tuma min na, aw ni ale na jira ɲɔgɔn fɛ nɔɔrɔ la. ⁵ Ayiwa, a’ ye aw dugukolo kan jogow faga, o kɔrɔ, kakalaya ni nɔgɔlenya ni ko jugu nege ni nege sifa bɛɛ ani wasabaliya, o ye boli batoli ye. ⁶ O kow de b’a to Ala ka diminya bɛ na kanbilalidenw kan. ⁷ Aw fana tun bɛ o kow kɛ fɔlɔfɔlɔ, ni aw tun bɛ taama u la tuma min na. ⁸ Nka sisan aw ka o kow bɛɛ dabila, diminya ni dusu bɔ ani kɔnɔna juguya. Nenili wala malobaliya kuma si kana bɔ aw da la. ⁹ Aw kana nkalon tigɛ ɲɔgɔn ye, k’a masɔrɔ aw ye aw jogo kɔrɔ ni o ka kɛwalew bɔ aw la, ¹⁰ ka jogo kura don aw la, o ye mɔgɔ kura ye min bɛ to ka kuraya dɔnniya sɛbɛ la ka kɛɲɛ ni a Dabaa ja ye. ¹¹ O cogo la Grɛki ni Yahutu tɛ yen, bolokolen ni bolokobali fana tɛ yen, mɔgɔ kalanbali ni kungo kɔnɔ mɔgɔ tɛ yen, jɔn ni hɔrɔn tɛ yen, nka Krisita ye fɛn bɛɛ ye yen, a bɛ bɛɛ kɔnɔ. ¹² Aw ye Ala ka ɲɛnatɔmɔlenw ye, senumaw, kanulenw. O de y’a to aw ka hinɛ ni ɲumaya ni yɛrɛmajiginlenya ni sabali ani muɲuli don aw la. ¹³ A’ ye ɲɔgɔn ka kow muɲu. Ni a bɛ mɔgɔ dɔ kɔnɔ ko dɔ y’a hakɛ ta, aw ka yafa ɲɔgɔn ma. Matigi yafara aw ma cogo min na, aw fana ka yafa ɲɔgɔn ma ten dɛ. ¹⁴ Ka fara o bɛɛ kan, a’ ye kanuya don aw la, o ye dafalenya sirilan ye. ¹⁵ Krisita ka dususuma ka kɛ kuntigi ye aw dusukunw na. Ala ye aw wele o kama farikolo kelen na. Aw ka kɛ ɲuman dɔnbaaw ye. ¹⁶ Krisita ka kuma ka sigi aw kɔnɔ ka caya. Aw ka ɲɔgɔn kalan ka ɲɔgɔn laadi ni hakilitigiya bɛɛ ni Zaburuw ni tanuli dɔnkiliw ani Ala sira dɔnkiliw ye. Aw ka dɔnkili da Ala ye ni aw dusukunw bɛɛ ye ni barika dali ye. ¹⁷ Aw bɛ fɛn o fɛn kɛ, kuma wo, kɛwalew wo, a’ ye o bɛɛ kɛ Matigi Yesu tɔgɔ la, ka barika da Fa Ala ye ale de barika la. ¹⁸ Musow, a’ ye kolo aw cɛw ye, i ko a bɛnnen bɛ Matigi la cogo min na. ¹⁹ Cɛw, a’ ye aw musow kanu, aw kana juguya u ma. ²⁰ Denw, a’ ye aw bangebaaw kan minɛ ko bɛɛ la, katuguni o ka di Matigi ye. ²¹ Faw, aw kana digi aw denw la, walisa u dusu kana tiɲɛ. ²² Baaradenw, aw kuntigi minnu bɛ dugukolo kan, aw ka olu kan minɛ ko bɛɛ la. Aw kana baara kɛ u ɲɛ na dɔrɔn, i n’a fɔ aw b’a fɛ ka aw ko diya mɔgɔw ye, nka aw ka baara kɛ ni dusu jɛlen ye Matigi ɲɛsiran na. ²³ Aw bɛ fɛn o fɛn kɛ, a’ ye o kɛ ni aw dusukunw bɛɛ ye, i n’a fɔ aw b’a kɛ Matigi ye, aw t’a kɛ mɔgɔw ye, ²⁴ k’a dɔn ko aw na ciyɛn ta Matigi fɛ aw ka baraji ye. Aw bɛ baara kɛ Matigi Krisita ye. ²⁵ Nka min bɛ tilenbaliya kow kɛ, o na sara a ka tilenbaliya kow la, katuguni Ala tɛ mɔgɔ bɔ mɔgɔ la.

¹ Kuntigiw, a’ ye aw ka baaradenw minɛ koɲuman ni tilennenya ye, k’a dɔn ko Kuntigi bɛ aw fana kun na sankolo la. ² A’ ye to Ala delili la ka to aw ɲɛ na o la ni barika dali ye. ³ Aw ka Ala deli an fana ye, walisa a ka cogo di an ma ka a ka kuma fɔ, ka Krisita ka gundo fɔ. O gundo kosɔn ne bɛ kaso la sisan. ⁴ A’ ye Ala deli ko ne ka o kuma fɔ k’a jɛya, i ko ne ka kan k’a kɛcogo min na. ⁵ Minnu tɛ dannabaaw ye, aw ka taama ni hakilitigiya ye olu ta fan fɛ. Aw ka waati kunmabɔ. ⁶ Aw ka kuma ka kɛ ni nɛɛma ye tuma bɛɛ, kɔgɔ ka kɛ a la, walisa aw ka se ka mɔgɔw bɛɛ jaabi cogo ɲuman dɔn. ⁷ An balimakɛ kanulen Tisike, Matigi ka baaraden dannamɔgɔ, ne baarakɛɲɔgɔn Matigi la, o na ne kibaru bɛɛ fɔ aw ye. ⁸ Ne bɛ a ci aw ma nin de kosɔn, walisa aw ka an ka ko bɛɛ dɔn, ani a ka aw dusuw saalo. ⁹ Ne bɛ balima kanulen tilennen Onɛsimɛ ci a fɛ. Aw ka mɔgɔ dɔ don. U na yan kow bɛɛ fɔ aw ye. ¹⁰ Ne kasola bilaɲɔgɔn Arisitarke bɛ aw fo. Barnabasi balima denkɛ Marka fana bɛ aw fo. Aw ye ciw sɔrɔ ale ko la ka ban. N’a sera aw fɛ yen, aw k’a minɛ koɲuman. ¹¹ Jesu min bɛ wele Jusitus, o fana bɛ aw fo. Yahutu minnu kɛra dannabaaw ye, o mɔgɔ saba dama kɛra ne baarakɛɲɔgɔnw ye ka bɔ olu la Ala ka masaya baara la. Olu ye ne dusu saalo kosɛbɛ. ¹² Krisita Yesu ka jɔn Epafras, min ye aw ka mɔgɔ dɔ ye, o bɛ aw fo. A bɛ jija Ala delili la aw ye. A tɛ o dabila, walisa aw dafalen, jigi sigilen ka to Ala sago bɛɛ la. ¹³ Ne ye a seere ye ko aw hami b’a la kosɛbɛ, aw ni Laodise dannabaaw ani Hierapolis dannabaaw fana. ¹⁴ Dɔgɔtɔrɔ kanulen Luka ani Demas bɛ aw fo. ¹⁵ Aw ka Laodise balimaw fo, ani Nɛnfas ni egilisi min bɛ a ka so. ¹⁶ Aw mana nin sɛbɛn kalan, aw k’a to Laodise egilisi ka a kalan. Sɛbɛn min bɛ na ka bɔ Laodise, aw fana ka o kalan. ¹⁷ Aw k’a fɔ Arsipe ye ko Matigi ka baara min kalifara a ma, a k’i janto o la ka a kɛ k’a dafa. ¹⁸ Ne Paul bɛ nin foli kuma sɛbɛn ni ne yɛrɛ bolo ye. Aw hakili kana bɔ a la ko ne bɛ kaso la. Ala ka nɛɛma ka kɛ aw fɛ.