3 YUHANA

¹ Ne, egilisi cɛkɔrɔba bɛ nin sɛbɛn ci ne ka kanulen Gayus ma, ne bɛ i kanu tiɲɛ la. ² Kanulen, ne b’a fɛ i ka jija fɛn bɛɛ la ani i kɛnɛma ka to ka kɛɲɛ ni i dusu ka jiidili ye. ³ Ne ɲagalila kosɛbɛ, k’a masɔrɔ balima dɔw sera ne fɛ ka seereya kɛ ko i bɛ tiɲɛ sira kan, ani i bɛ taama tiɲɛ la. ⁴ Foyi tɛ ne nisɔndiya ka tɛmɛn nin kan, k’a mɛn ko ne denw bɛ taama tiɲɛ sira kan. ⁵ Kanulen, i bɛ fɛn o fɛn kɛ balimaw ye, hali balima dunanw, i bɛ o sɛbɛ kɛ. ⁶ Olu ye i ka kanuya seereya kɛ egilisi ɲɛ kɔrɔ. Ne b’i deli i ka u dɛmɛ u ka taama ko la ni dɛmɛni ye min bɛ bɛn Ala sago ma. ⁷ K’a masɔrɔ u bɛ taama la Matigi tɔgɔ kosɔn, u ma sɔn ka dɛmɛni minɛ Ala dɔnbaliw fɛ. ⁸ An kɔni ka kan ka o ɲɔgɔn mɔgɔw minɛ koɲuman, walisa an ka kɛ u jɛɲɔgɔnw ye o tiɲɛ baara la. ⁹ Ne ye sɛbɛn fitinin dɔ ci egilisi ma, nka Diotrɛfɛ tun b’a fɛ ka kɛ u ɲɛ mɔgɔ ye, ale tɛ an minɛ koɲuman fewu. ¹⁰ O de kosɔn ni ne taa ko bɔra aw fɛ yen, a bɛ kɛwale minnu kɛ, ka kuma cɛ jugu nkalonma caman minnu fɔ an ko la, ne na ne hakili to olu la. O si m’a wasa, nka a yɛrɛ tɛ sɔn ka balimaw ladon. Minnu b’a fɛ ka u ladon, a bɛ olu fana bali, ka u gɛn ka bɔ egilisi la. ¹¹ Kanulen, i kana juguya dege, nka i ka ɲumaya dege. Min bɛ ko ɲuman kɛ, o bɔra Ala la. Min bɛ ko jugu kɛ, o ma Ala ye. ¹² Mɔgɔ bɛɛ bɛ Dɛmɛtrius tɔgɔ ɲuman fɔ. Tiɲɛ yɛrɛ bɛ a tɔgɔ ɲuman fɔ. An fana bɛ a tɔgɔ ɲuman fɔ, i y’a dɔn ko an ka seereya ye tiɲɛ de ye. ¹³ Fɛn caman tun bɛ ne fɛ k’a fɔ i ye, nka ne t’a fɛ ka u sɛbɛn ni lankiri ni sɛbɛnni kala ye. ¹⁴ Ne b’a fɛ ka i ye sɔɔni, an na kuma da ni da. ¹⁵ Dususuma ka kɛ i ye. I teriw bɛ i fo. I ka an teriw bɛɛ kelen-kelen fo u tɔgɔ la.