2 TIMOTE

¹ Ne Paul, Krisita Yesu ka ciden Ala sago barika la, ka kɛɲɛ ni ɲɛnamaya layidu ye, o min bɛ Krisita Yesu la, ² ne bɛ nin sɛbɛn ci i ma, ne denkɛ kanulen Timote. An Fa Ala ni an Matigi Krisita Yesu ka nɛɛma ni makari ani dususuma di i ma. ³ Ne bɛ barika da Ala ye, ne bɛ baara kɛ o min ye ni dusukun jɛlen ye, i ko ne bɛnbaw y’a kɛcogo min na. Ne tɛ i tɔgɔ fɔli fana dabila ne ka Ala delili la su fara tile kan. ⁴ Ne hakili bɛ i ɲɛji la, ne b’a fɛ kosɛbɛ ka i ye ko kura, walisa ne ka ɲagali kosɛbɛ. ⁵ Ne hakili bɛ i ka dannaya sɛbɛ la. O dannaya tun bɛ i mɔmuso Lois la fɔlɔ, ka kɛ i ba Unise la. Ne jɛyalen bɛ a la ko a bɛ i yɛrɛ fana la. ⁶ O de y’a to ne bɛ i hakili jigin a la ko i ye Ala ka nilifɛn min sɔrɔ ne ka bolo dali fɛ i kan, i ka o tasuma dadon. ⁷ K’a masɔrɔ Ala ma siran dusu di an ma, fɔ sebaaya ni kanuya ani dɔnniya dusu. ⁸ I kana maloya ka seereya kɛ an Matigi ko la. I kana maloya ne fana ko la, ne min ye ale ka kasolamɔgɔ ye. Nka i ka i niyɔrɔ ta tɔɔrɔ kow la Kibaru Duman kosɔn ka kɛɲɛ ni Ala ka sebaaya ye. ⁹ Ale de ye an kisi ka an wele ka kɛ senumaw ye. O ma kɛ an ka kɛwalew kosɔn, fɔ a yɛrɛ ka ko latigɛlen kosɔn, ani a ka nɛɛma, o min dira an ma Krisita Yesu la sani diɲɛ ka da. ¹⁰ An Kisibaa Krisita Yesu ye o nɛɛma jira sisan, katuguni ale de ye saya barika ban, ka ɲɛnamaya ni tolibaliya jira kɛnɛ kan Kibaru Duman fɛ. ¹¹ O Kibaru Duman kosɔn, ne sigira ka kɛ waajulikɛla ni ciden ani karamɔgɔ ye. ¹² O de y’a to ne bɛ tɔɔrɔ sɔrɔ o kow la, nka ne tɛ maloya o la, sabu ne dara min na, ne bɛ o dɔn. Ne ye min kalifa ale ma, ne dara a la ko se bɛ a ye ka o mara fo laban don na. ¹³ Ne ye kuma kɛnɛ minnu fɔ i ye, i ka o bɔɲɔgɔnko kumaw mara dannaya ni kanuya la, olu minnu bɛ Krisita Yesu la. ¹⁴ Fɛn ɲuman min kalifara i ma, i ka o mara Ni Senu barika la, o min sigilen bɛ an kɔnɔ. ¹⁵ I y’a dɔn ko Asi mɔgɔw bɛɛ ye ne bila, u dɔw ye Fijɛlɛ ni Hɛrmojɛnɛ ye. ¹⁶ Matigi ka makari Onɛsifɔrɛ ka so mɔgɔw la, sabu a ye ne dusu suma ko caman. A ma maloya ne ka kasola bilali ko la, ¹⁷ nka a sera Romɛ tuma min na, a ye ne yɔrɔ ɲini kosɛbɛ fo ka ne ye. ¹⁸ Matigi k’a to a ka makari sɔrɔ Matigi fɛ laban don na. A ye ne mago ɲɛ fɛn caman minnu na k’an to Efese, i bɛ olu dɔn ka tɛmɛn mɔgɔw bɛɛ kan.

¹ O de kosɔn, e ne denkɛ, nɛɛma min bɛ Krisita Yesu la, i ka i ja gɛlɛya o la. ² I ye ko minnu mɛn ne da la seere caman ɲɛ na, i ka olu kalifa dannamɔgɔ dɔw ma, olu minnu bɛ se ka mɔgɔ wɛrɛw kalan fana. ³ I ka i niyɔrɔ ta tɔɔrɔ kow la, i ko Krisita Yesu ka sɔrɔdasi ɲuman. ⁴ Mɔgɔ min bɛ taa sɔrɔdasiya la, o tɛ hami diɲɛ kow la, ni a b’a fɛ a ko ka diya a kuntigi ye. ⁵ Min bɛ don ɲɔgɔndan boli la, o tɛ kunnajala sɔrɔ fɔ ni a y’a kɛ a cogo la. ⁶ Sɛnɛkɛla min bɛ baaraba kɛ, o fɔlɔ ka kan ka a niyɔrɔ sɔrɔ suman na. ⁷ Ne bɛ min fɔ, i ka miiri o la, katuguni Matigi na hakili di i ma ka o bɛɛ faamu. ⁸ I ka i hakili to Yesu Krisita la. Dawuda bɔnsɔn don. A kununna ka bɔ suw cɛma ka kɛɲɛ ni ne ka Kibaru Duman fɔlen ye. ⁹ O Kibaru Duman fɔli kosɔn, ne bɛ tɔɔrɔ la fo ne sirilen bɛ ni nɛgɛ jɔlɔkɔ ye i ko kojugukɛla. Nka Ala ka kuma sirilen tɛ. ¹⁰ O de y’a to ne bɛ fɛn bɛɛ muɲu Ala ka ɲɛnatɔmɔlenw kosɔn, walisa kisili min bɛ Krisita Yesu la, u fana ka o sɔrɔ ani nɔɔrɔ banbali. ¹¹ Nin kuma jɛlen don ko: «Ni an ni Krisita sara ɲɔgɔn fɛ, an ni ale na ɲɛnamaya ɲɔgɔn fɛ fana. ¹² Ni an bɛ muɲuli kɛ fo a laban, an na sigi masaya la a fɛ. Ni an bɛ an dalacɛ a la, ale fana na i dalacɛ an na. ¹³ Ni an tɛ kɛ kantigiw ye, ale bɛ to kantigiya la, a tɛ se k’i dalacɛ a yɛrɛ la.» ¹⁴ I ka mɔgɔw hakili jigin o kow la k’a fɔ u ye k’a gɛlɛya Ala ɲɛ na ko u kana sɔsɔli kɛ kumaw la. O tɛ foyi ɲɛ fɔ ka u mɛnbaaw lafili. ¹⁵ I ka i jija ka i yɛrɛ jira Ala la i ko baarakɛla min ye tɔgɔ ɲuman sɔrɔ, ni maloya sababu t’o la. A bɛ tiɲɛ kuma faranfasi cogo sɛbɛ la. ¹⁶ I yɛrɛ tanga diɲɛ la kuma gansanw fɔli ma, sabu o fɔbaaw bɛ taa ɲɛ Ala ɲɛsiranbaliya la. ¹⁷ U ka kumaw bɛ ɲimini kɛ i n’a fɔ sogo su. O mɔgɔ dɔw ye Himɛnɛ ni Filɛtɛ ye. ¹⁸ Olu jɛngɛna ka mabɔ tiɲɛ la k’a fɔ ko suw kununli kɛra ka ban, u ye mɔgɔ dɔw ka dannaya tiɲɛ. ¹⁹ O bɛɛ n’a ta Ala ye jusigilan min sigi, o bamalen tora. Nin kumaw sɛbɛnna a kan ko: «Matigi bɛ a yɛrɛ taw dɔn,» ani ko: «Mɔgɔ o mɔgɔ bɛ Matigi tɔgɔ fɔ, o ka i mabɔ tilenbaliya kow la.» ²⁰ Soba kɔnɔ minɛnw dan tɛ sanu ni warijɛ ye mɛnɛ, jiri minɛnw ni bɔgɔ minɛnw fana bɛ yen. Dɔw bɛ kɛ bonyali kama, dɔ wɛrɛw bɛ kɛ baara jugu kama. ²¹ Ni mɔgɔ dɔ bɛ a yɛrɛ saniya o kow ma, o na kɛ baara ɲuman kɛ minɛn ye, a bilara Ala ye ka saniya, a na kɛ magoɲɛ minɛn ye a matigi ye, a labɛnnen bɛ baara ɲuman bɛɛ kama. ²² I ka boli kamalenya negew ɲɛ. Minnu bɛ Matigi deli ni dusukun jɛlen ye, i ni olu ka tilennenya ni dannaya ni kanuya ani hɛrɛ ɲini. ²³ Nka i ka ban hakilintanya sɔsɔli fuuw ma, i y’a dɔn ko olu bɛ kɛlɛ lawuli. ²⁴ Matigi ka baaraden man kan ka kɛ kɛlɛtigɛla ye. A ka kɛ dusu sumalen ye mɔgɔw bɛɛ ye, ka mɔgɔw kalan cogo dɔn, ka muɲuli kɛ. ²⁵ A sabalilen ka sɔsɔlikɛlaw kalan, yala ni Ala tɛna nimisali dusu di u ma, walisa u ka se ka tiɲɛ dɔn, ²⁶ ka hakili sɔrɔ ka bɔ Sitanɛ ka jan na. Ale tun ye u minɛ ka u bila a sago kɛli la.

¹ I k’a dɔn ko laban donw na, waati gɛlɛnw na kɛ. ² Mɔgɔw na kɛ u yɛrɛw fɛ, nafolo negetɔw, tɔgɔ ɲininaw, kuncɛbaaw, Ala tɔgɔ tiɲɛnbaaw, bangebaa kan bilabaaw, fitiriwalew, Ala ɲɛsiranbaliw, ³ mɔgɔ gɛlɛnw, hinɛntanw, tɔgɔ tiɲɛnbaaw, yɛrɛminɛbaliw, farinmaw, u tɛ ko ɲuman fɛ, ⁴ janfanciw, yɛrɛsagokɛlaw, u falen bɛ kuncɛbaya la, ɲɛnajɛ kow ka di u ye ka tɛmɛn Ala ko kan, ⁵ Ala sira kɔkanna kow taamabaaw, nka u banna a ka sebaaya ma. I ka i jɛngɛ ka mabɔ o ɲɔgɔn mɔgɔw la. ⁶ U dɔw bɛ don sow kɔnɔ ka muso hakilintan dɔw nɛgɛn. O musow kɔni doninen bɛ ni jurumuw ye, u tugulen bɛ nege sifa caman nɔfɛ. ⁷ U bɛ kalan tuma bɛɛ, nka u tɛ se ka tiɲɛ faranfasi ka a dɔn. ⁸ Janɛs ni Janbrɛs ye Musa sɔsɔ cogo min na, o mɔgɔw bɛ tiɲɛ sɔsɔ ten dɛ. O mɔgɔw hakili dulen don, ban kɛra u la dannaya ta fan fɛ. ⁹ Nka u tɛna taa ɲɛ, katuguni u ka hakilintanya na jira kɛnɛ kan mɔgɔw bɛɛ ɲɛ na, i ko Janɛs ni Janbrɛs ta jirala cogo min na. ¹⁰ E koni, i tugura ne la ne ka kalan ni ne taama cogo ni ne ka ko latigɛlenw ni ne ka dannaya ni ne ka muɲuli ni ne ka kanuya ni ne ka jijali ¹¹ ani ne ka tɔɔrɔ kow bɛɛ la. Tɔɔrɔ ni sɛgɛn minnu kɛra ne la Antiose ni Ikonɛ ani Lisitre, i ye olu dɔn. Ne ye tɔɔrɔbaw muɲu, nka Matigi ye ne tila ka bɔ u bɛɛ la. ¹² Ayiwa, minnu b’a fɛ ka taama Ala ɲɛsiran na Krisita Yesu la, tugu na kɛ olu bɛɛ la ten ka u tɔɔrɔ. ¹³ Nka mɔgɔ juguw ni filankafow na juguya ka taa ɲɛ. U na dɔw lafili, u yɛrɛw lafililen don. ¹⁴ E kɔni, i kalanna ko minnu na ka u dɔn tiɲɛ ye, i nɔrɔlen ka to olu la. I ye i kalanbaaw dɔn o kow la. ¹⁵ I ye Kitabu senumaw dɔn kabini i denmisɛnma. Olu de bɛ se ka hakilitigiya di i ma, walisa i ka kisi dannaya fɛ, o min bɛ Krisita Yesu la. ¹⁶ Kitabu kuma bɛɛ kɛra a sɛbɛnnikɛlaw kɔnɔ Ala dafiɲɛ fɛ. Nafa b’a la kalanni ni kɔrɔfɔli ni latilenni kama, ani kololi, tilennenya ko la, ¹⁷ walisa Ala ka mɔgɔ ka dafa, a selen kɛwale ɲumanw bɛɛ la.

¹ Ne b’a fɔ i ye k’a gɛlɛya Ala ni Krisita Yesu ɲɛ na, o min bɛna kiri tigɛ mɔgɔ ɲɛnamaw ni suw kan, ani Krisita nali ni a ka masaya kosɔn, ² ko i ka Ala ka kuma fɔ ka i jija a la tuma bɛnnen ni tuma bɛnbali la. I ka u ka koɲɛw jira u la ni kɔrɔfɔli ye, ka u laadi ka u kalan ni muɲuli bɛɛ ye. ³ Sabu waati dɔ bɛ na, mɔgɔw tɛna sɔn kalan sɛbɛ ma tun, nka ka kɛɲɛ ni u yɛrɛw negew ye, u na karamɔgɔ caman ɲini u yɛrɛw ye, minnu na u tulow diyaɲekow fɔ. ⁴ U na u tulow mabɔ tiɲɛ la, ka tugu nsiirinw nɔfɛ. ⁵ E kɔni, i ka kɛ mɔgɔ sɛbɛ ye ko bɛɛ la, ka tɔɔrɔ muɲu, ka Kibaru Duman waajuli kɛ, ka i ka baara bɛɛ kɛ ka dafa. ⁶ Ne kɔni, ne kɛra i ko saraka bɔnta, ne taa tuma sera. ⁷ Ne ye kɛlɛ ɲuman kɛ, ne ye ɲɔgɔndan boli kɛ ka a ban, ne ye dannaya mara. ⁸ Kabini sisan, tilennenya masafugula maralen bɛ ne ye. Matigi, kiritigɛla tilennen na o di ne ma o don na. Ne kelen tɛ, minnu bɛɛ bɛ a jirali kanu, a na di olu bɛɛ fana ma. ⁹ I jija ka na ne fɛ yan joona. ¹⁰ Demas farala ne la, k’a masɔrɔ nin diɲɛ kow diyara a ye. A taara Tesalonike. Krɛsan taara Galasi jamana la, Tite taara Dalmasi. ¹¹ Luka kelenpe bɛ ne fɛ yan. I natɔ ka na ni Marka ye i fɛ, k’a masɔrɔ a bɛ se ka ne dɛmɛ ne ka baara la. ¹² Ne ye Tisike ci ka taa Efese. ¹³ Ne ye dulɔkiba min to Karpus bolo Troas, ni i bɛ na tuma min na, i ka na n’o ye, ani kitabuw. Ne bɛ kitabu wolomaw fɛ ka tɛmɛn tɔw kan. ¹⁴ Dɛɲɛfaga numu Alɛkisandre ye ko jugu caman kɛ ne la. Matigi na a sara ka kɛɲɛ ni a ka ko kɛlenw ye. ¹⁵ I fana ka i yɛrɛ kɔlɔsi a la, katuguni a ye an ka kumaw sɔsɔ kosɛbɛ. ¹⁶ Ne ye ne yɛrɛ lafasa fɔlɔfɔlɔ tuma min na, mɔgɔ si ma ne dɛmɛ o la. U bɛɛ ye ne bila. Ala kana o jate u kun. ¹⁷ Nka Matigi ye ne dɛmɛ ka ne barika bonya walisa ne ka waajuli kɛ k’a dafa, ani Ala dɔnbaliw bɛɛ k’a mɛn. Ne tilara ka bɔ waraba da la. ¹⁸ Matigi na ne tila ko juguw bɛɛ la ka ne kisi, ka ne ladon a ka sankolo masaya la. Nɔɔrɔ ka da ale kan badaa-badaa. Amiina. ¹⁹ I ka Prisiye ni Akilas fo, ani Onɛsifɔrɛ ka so mɔgɔw. ²⁰ Erasite tora Kɔrɛnte. Ne ye Trofimɛ to Mile, sabu a tun man kɛnɛ. ²¹ I jija ka na sani fonɛnɛ ka se. Ubulus bɛ i fo, ani Pudans ni Linus ni Klodiya ani balima tɔw bɛɛ. ²² Matigi ka to i fɛ. Ala ka nɛɛma ka kɛ aw fɛ.