12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 TESALONIKEKAW

1

1 Ne Paul ni Silvɛn ani Timote bɛ nin sɛbɛn ci Tesalonike egilisi ma, aw minnu bɛ an Fa Ala ni Matigi Yesu Krisita la. 2 An Fa Ala ni Matigi Yesu Krisita ka nɛɛma ni dususuma di aw ma. 3 Balimaw, an ka kan ka barika da Ala ye aw kosɔn tuma bɛɛ. O bɛnnen bɛ, katuguni aw ka dannaya bɛ bonya ani aw bɛɛ ka ɲɔgɔn kanuya fana bɛ caya ka ta’a fɛ. 4 An bɛ aw tɔgɔ ɲuman fɔ Ala ka egilisiw cɛma, katuguni hali k’a sɔrɔ tugu kɛra aw nɔfɛ ka aw tɔɔrɔ cogo bɛɛ la, aw ye o muɲu ka dannaya kɛ. 5 O b’a jira ko Ala ka kiri ko tilennen don. A na jate ko aw ka kan ni Ala ka masaya ye, aw bɛ tɔɔrɔ o min kosɔn. 6 A bɛnnen bɛ ni Ala ka tilennenya ye ka aw tɔɔrɔbaaw tɔɔrɔ, 7 ka lafiya di aw ma an fɛ, aw minnu tɔɔrɔlen bɛ. O na kɛ ni Matigi Yesu y’i jira ka bɔ sankolo la ni a ka sebaaya mɛlɛkɛw 8 ani tasuma manaba ye tuma min na, ka hakɛ bɔ Ala dɔnbaliw ni an Matigi Yesu Kibaru Duman kan minɛbaliw la. 9 Olu ka tɔɔrɔ na kɛ halakili banbali ye. U na gɛn ka bɔ Matigi ni a ka sebaaya nɔɔrɔ kɔrɔ a na tuma la. 10 O don na, Matigi bɛ na ka bonya a ka mɔgɔ senumaw ko la ka kɛ kabako ye dannabaaw bɛɛ ɲɛ na. Aw ye olu dɔw ye, k’a masɔrɔ aw dara an ka seereya la. 11 O de kosɔn an bɛ delili kɛ aw ye tuma bɛɛ ko an ka Ala k’a jate ko aw ka kan ni a ka weleli ye. An bɛ a deli ko a ka a sago ɲuman bɛɛ ni aw ka dannaya ka baara bɛɛ dafa ni a ka sebaaya ye, 12 walisa an Matigi Yesu tɔgɔ ka bonya aw ko la, aw fana ka bonya ale ko la ka kɛɲɛ ni an ka Ala ni Matigi Yesu Krisita ka nɛɛma barika ye.

2

1 Balimaw, an Matigi Yesu Krisita nali ko ta fan fɛ ani an lajɛli ko la ale fɛ fana, an bɛ aw deli 2 ko aw kana yɛrɛyɛrɛ joona ka aw hakili wuli kiraya kuma wala waajuli kuma fɛ ko Matigi ka don sera ka ban, wala sɛbɛn, hali ni a fɔra ko ne ye o ci. 3 Aw kana sɔn mɔgɔ si ka aw lafili cogo si la, katuguni o don tɛna se ni murutili ma kɛ Ala sira ma fɔlɔ, ani ni o mɔgɔ jugu ma i jira fɔlɔ, o halakiden kɔni. 4 Fɛn o fɛn bɛ wele Ala, fɛn o fɛn bɛ bato, a na o kɛlɛ ka a yɛrɛ bonya o kun na, fo ka i sigi Alabatosoba kɔnɔ ka a yɛrɛ jira ko ale de ye Ala ye. 5 Aw hakili t’a la ko, ka ne to aw fɛ yen, ne ye o fɔ aw ye wa? 6 Min b’a bali sisan, walisa a kana i jira sani a waati ka se, aw bɛ o dɔn. 7 O tilenbaliya gundo bɛ baara kɛ halibi, nka min b’a bali sisan, o na a bali fo o ka ta ka bɔ yen. 8 O tuma la o mɔgɔ jugu na i jira, nka Matigi Yesu na o jeni ni a yɛrɛ dafiɲɛ ye ka a halaki ni a jirali manamana ye. 9 O mɔgɔ jugu bɛ na ka kɛɲɛ ni Sitanɛ ka baarakɛ cogo ye ni kabako sifa bɛɛ kɛli ye ani taamashyɛn ni koba nkalonmaw, 10 ani tilenbaliya ka lafilili bɛɛ ye fana, mɔgɔ halakitɔw kosɔn, katuguni u ma sɔn tiɲɛ ma k’a kanu, o min tun bɛna u kisi. 11 O de kosɔn Ala bɛ lafililiba barikama ci u ma fo u ka da nkalon na, 12 walisa minnu ma da tiɲɛ la, nka tilenbaliya ko diyara u ye, kiri ka tigɛ olu bɛɛ kan. 13 Balimaw, Matigi ka kanulenw, an ka kan ka barika da Ala ye tuma bɛɛ aw kosɔn, k’a masɔrɔ Ala ye aw ɲɛnatɔmɔ kisili kama kabini fɔlɔfɔlɔ, Ni Senu ka saniyali barika la ani aw ka dannaya tiɲɛ la. 14 Ala ye aw wele o kisili kama an ka Kibaru Duman fɛ, walisa aw ka an Matigi Yesu Krisita nɔɔrɔ sɔrɔ. 15 Ayiwa balimaw, aw sinsinnen ka to. Aw ye laadili minnu sɔrɔ an ka kuma wala an ka sɛbɛn barika la, a’ ye olu minɛ kosɛbɛ. 16 An Matigi Yesu Krisita yɛrɛ ani an Fa Ala min ye an kanu ka dusu saaloli banbali ni jigi ɲuman di an ma a ka nɛɛma barika la, 17 o ka aw dusu saalo ka aw barika bonya kɛwale ɲumanw bɛɛ ni kuma ɲumanw bɛɛ la.

3

1 O bɛɛ kɔ balimaw, a’ ye Ala deli an ye, walisa Matigi ka kuma ka jɛnsɛn ka ta’a fɛ ka bonya, i ko a bɛ kɛ aw cɛma cogo min na, 2 ani walisa an ka tila mɔgɔ jugu tilenbaliw la, k’a masɔrɔ mɔgɔw bɛɛ tɛ dannaya kɛ. 3 Nka Matigi ye kantigi ye, ale na aw sabati ka aw tanga Sitanɛ ma. 4 An ye aw bila ko min na, an jɛyalen bɛ a la Matigi la ko aw bɛ o kɛ, ko aw na to ka o kɛ fana. 5 Matigi ka aw dusukun sin Ala ka kanuya ni Krisita ka muɲuli ma. 6 Balimaw, an bɛ nin fɔ aw ye k’a gɛlɛya Matigi Yesu Krisita tɔgɔ la ko balima minnu bɛ taama pirikiparaka la, ni u tɛ taama ka kɛɲɛ ni an ka laadili ye, aw ka aw mabɔ olu la. 7 Aw ka kan ka an ladege cogo min na, aw yɛrɛw y’o dɔn, katuguni an ma taama pirikiparaka la aw cɛma. 8 An ma dumuni kɛ mɔgɔ si ka so gansan, nka an tun bɛ baara kɛ ka an sɛgɛn su fara tile kan, walisa an kana kɛ aw si ka doni ye. 9 O kun tɛ ko o jo tɛ an fɛ, nka an tun b’a fɛ ka cogo jira aw la walisa aw ka an ladege. 10 K’an to aw fɛ yen, an ye nin fɔ aw ye k’a gɛlɛya ko: «Ni dɔ tɛ sɔn ka baara kɛ, o fana kana dumuni kɛ fewu.» 11 An y’a mɛn ko dɔw bɛ aw cɛma minnu bɛ taama pirikiparaka la. U tɛ baara kɛ fewu, u bɛ u da don kow bɛɛ la. 12 Minnu bɛ o cogo la kɔni, an b’a fɔ olu ye k’a gɛlɛya u ma Matigi Yesu Krisita tɔgɔ kosɔn, ko u ka baara kɛ koɲuman ka u yɛrɛw balo. 13 Aw kɔni balimaw, aw kana sɛgɛn ko ɲuman kɛli la. 14 An bɛ kalan min di aw ma nin sɛbɛn na, ni mɔgɔ dɔ ma sɔn o ma, aw ka o kɔlɔsi, aw ni o tigi kana jɛ foyi la, walisa a ka maloya. 15 O bɛɛ n’a ta aw kana a jate aw jugu ye, nka aw k’a laadi i ko balima dɔ. 16 Hɛrɛtigi Ala yɛrɛ ka hɛrɛ kɛ aw ye tuma bɛɛ cogo bɛɛ la. Matigi ka to aw bɛɛ fɛ. 17 Ne Paul yɛrɛ bolo ye aw foli kumaw sɛbɛn. Ne b’a sɛbɛn ten, o de ye taamashyɛn ye ne ka sɛbɛnw bɛɛ la. 18 An Matigi Yesu Krisita ka nɛɛma ka kɛ aw bɛɛ fɛ.