2 PIƐRƐ

¹ Ne Simɔn Pierɛ, Yesu Krista ka jɔn ni a ka ciden bɛ nin sɛbɛn ci an dannabaaɲɔgɔnw ma, olu minnu ye niyɔrɔ sɔrɔ dannaya sɛbɛ la an fɛ, an ka Ala, an Kisibaa Yesu Krista ka tilennenya barika la. ² Nɛɛma ni dususuma ka di aw ma ka caya Ala ni an Matigi Yesu dɔnniya barika la. ³ Fɛn minnu b’a to an bɛ ɲɛnamaya ka taama Ala ɲɛsiranya la, a ye o bɛɛ di an ma a ka sebaaya Alama barika la, ka kɛɲɛ ni an welebaa dɔnniya ye, o min ye an wele a yɛrɛ nɔɔrɔ ni a ka ɲumaya sɔrɔli kama. ⁴ A nɔɔrɔ ni a ka ɲumaya barika la, a ye layidubaw ta an ye minnu ka fisa fɛn bɛɛ ye. A ye o kɛ walisa aw ka kisi diɲɛ la nege juguw ka tolilenya ma, ka niyɔrɔ sɔrɔ Alamaya la o layiduw barika la. ⁵ O de kosɔn a’ ye aw jija kosɛbɛ ka ɲumaya fara aw ka dannaya kan, ka dɔnniya fara ɲumaya kan, ⁶ ka yɛrɛminɛli fara dɔnniya kan, ka muɲuli fara yɛrɛminɛli kan, ka Ala ɲɛsiran fara muɲuli kan, ⁷ ka balima kanuya fara Ala ɲɛsiran kan, ka kanuya fara balima kanuya kan. ⁸ Ni o fɛnw bɛ aw la ka caya, olu n’a to aw kana kɛ salabaatɔw ye wala nafantanw an Matigi Yesu Krisita dɔnniya la. ⁹ Nka o fɛnw tɛ min kɔnɔ, o tigi tɛ yɔrɔ jan fɛn ye, a fiyennen don. A ɲinɛna a ka jurumu kɔrɔw saniyali kɔ. ¹⁰ O de kosɔn balimaw, a’ ye aw jija ka aw weleli ni aw ɲɛnatɔmɔli ko sabati ka ta’a fɛ. Ni aw bɛ to ka o kɛ, aw sen tɛna talon fewu. ¹¹ O cogo la an Matigi ni an Kisibaa Yesu Krisita ka badaa masaya donni labilalen don aw ye. ¹² O de y’a to ne na to ka aw hakili jigin o kow la tuma bɛɛ, hali k’a sɔrɔ aw bɛ u dɔn ka kɔrɔ. Tiɲɛ kuma min sera aw ma, aw sinsinnen bɛ o la fana. ¹³ Nka ne bɛ miiri ko ka ne ɲɛnama to, a ka ɲi ne ka aw jija ni ne ka hakili jigin kumaw ye ko aw ka to aw ɲɛ na. ¹⁴ K’a masɔrɔ ne y’a dɔn ko ne bɛna bɔ nin farikolo bugu kɔnɔ sɔɔni, i ko an Matigi Yesu Krisita y’a jira ne la cogo min na. ¹⁵ O de kosɔn ne na cogo bɛɛ kɛ walisa ne taalen kɔ, aw ka se ka aw hakili to o kow la tuma bɛɛ. ¹⁶ An ye an Matigi Yesu Krisita ka sebaaya ni a nali ko fɔ aw ye tuma min na, an ma tugu nsiirinw na minnu bɔra mɔgɔw hakili la ka kɛɲɛ ni u ka keguya cogo ye, nka an y’a bonyaba ye an yɛrɛw ɲɛw la. ¹⁷ A ye bonyaba ni nɔɔrɔ sɔrɔ Fa Ala fɛ tuma min na, o tuma la kan bɔra nɔɔrɔ ni bonyabatigi yɔrɔ la k’a fɔ a ye ko: «Nin ye ne Denkɛ kanulen ye, a ko ka di ne ye haali.» ¹⁸ An yɛrɛw ye o kan mɛn ka bɔ sankolo la k’an to a fɛ kulu senuma kan. ¹⁹ O kow bɛɛ y’a jira an na k’a jɛya ko kiraw ka kuma ye tiɲɛ de ye. Ni aw bɛ aw janto o la, o na kɛ ko ɲuman ye, k’a masɔrɔ o kuma bɛ i ko lanpa min bɛ yeelen bɔ dibi la, sani dugu ka jɛ, fo kɛnɛbɔda dolo ka manamana aw dusuw la. ²⁰ Aw ka a dɔn fɔlɔ ko mɔgɔ si tɛ se ka Kitabu kiraya kumaw kɔrɔ dɔn a yɛrɛma, ²¹ katuguni kiraya kuma si ma na mɔgɔ sago la abada, nka Ala ye a ka kuma min di mɔgɔw ma, u kumana ka o fɔ Ni Senu de barika la.

¹ Kira nkalontigɛlaw tun bɛ mɔgɔw cɛma ka kɔrɔ cogo min na, karamɔgɔ nkalontigɛlaw na kɛ aw fana cɛma ten. U na farali kow don aw cɛma dogo la minnu bɛ mɔgɔw bila halakili la. Matigi min ye u kunmabɔ, u na u dalacɛ o la ka halaki bin u yɛrɛw kan joona. ² Mɔgɔ caman na tugu u ka kakalaya ko dama tɛmɛnnenw na, fo tiɲɛ sira tɔgɔ na tiɲɛ olu kosɔn. ³ U na aw kɛ jago kun ye ni u ka lafilili kumaw ye wasabaliya kosɔn, nka u jalakili bɛ sen na kabini tuma jan, u halakili tɛ sunɔgɔ. ⁴ Mɛlɛkɛ minnu ye jurumu kɛ, Ala ma hinɛ olu la, nka a ye u fili jahanama dingɛ dunba dibimaw kɔnɔ, ka u sirilen mara yen kiri don kama. ⁵ A ma hinɛ diɲɛ kɔrɔ fana la, ni a ye ji belebeleba lana o diɲɛ mɔgɔw Ala ɲɛsiranbaliw kan tuma min na, nka a ye mɔgɔ segin kisi, Nuhun ni a so mɔgɔw, ale tun bɛ tilennenya ko waajuli kɛ. ⁶ A ye Sodɔmɛ ni Gomɔrɛ duguw jeni ka u halaki ka kɛ bugurijɛ ye, ka u kɛ ɲɛjirali ye Ala ɲɛsiranbali nataw la. ⁷ Nka a ye Lɔti tilennen kisi, o min tun tɔɔrɔla kosɛbɛ o kojugukɛlaw ka kakalaya kosɔn, ⁸ k’a sɔrɔ o cɛ tilennen sigilen tun bɛ u cɛma. A tun bɛ u ka tilenbaliya ko minnu ye ka u mɛn, olu tun b’a dusukun tilennen tɔɔrɔ don o don. ⁹ O bɛɛ b’a jira ko Matigi bɛ se ka Ala ɲɛsiranbaaw tila kɔrɔbɔli la, ka kojugukɛlaw mara kiri don ɲɛ tɔɔrɔ kama, ¹⁰ janko minnu bɛ tugu u farisogo nɔfɛ ka kɛɲɛ ni u ka nɔgɔlenya negew ye, ka kuntigiya lagosi. O karamɔgɔ nkalontigɛlaw faratilen bɛ, yɛrɛsagokɛlaw don. U tɛ siran ka sankolo fangatigiw neni. ¹¹ Hali mɛlɛkɛw, olu minnu barika ni u fanga ka bon ni o mɔgɔw ta ye, olu tɛ o fangatigiw jalaki ka u tɔgɔ tiɲɛ Matigi ɲɛ kɔrɔ. ¹² Nka o karamɔgɔw bɔlen bɛ bagan hakilintanw fɛ, olu minnu bange kun ye u minɛli ye ka u faga. O mɔgɔw tɛ ko minnu dɔn, u bɛ olu lagosi. O de kosɔn u na halaki u yɛrɛw ka tolilenya fɛ. ¹³ U ye tilenbaliya ko minnu kɛ ka mɔgɔw tɔɔrɔ, u na sara o bɔɲɔgɔnko tɔɔrɔw de la. Tile fɛ kakalaya ka di u ye. Ka u to dumuni la aw fɛ, u bɛ u yɛrɛw ɲɛnajɛ u ka filili kow la, ka aw ka dumuni kow nɔgɔ ni u ka malobaliya kow ye. ¹⁴ U ɲɛw falen bɛ jatɔya la. U tɛ wasa ko jugu kɛli la. U bɛ mɔgɔ dusu sigibaliw nɛgɛn. U dusukunw tɛ miiri foyi la ni wari ko tɛ. U dangalen bɛ. ¹⁵ U ye sira tilennen bila. U filila ka tugu Bosɔr denkɛ Balam ka sira la, a diyara o min ye ka tilenbaliya ko kɛ sara kosɔn, ¹⁶ nka a kɔrɔfɔra a ka kan bilali kosɔn, fo falimuso dantan kumana ni mɔgɔkan ye ka o kira ka hakilintanya lajɔ. ¹⁷ O mɔgɔw ye ji boyi jalenw ye, ani sankaba ɲɔninenw fiɲɛba fɛ. Dibi fin maralen bɛ u ɲɛ. ¹⁸ U bɛ u yɛrɛbonya kuma fufafuw de fɔ. Minnu tilara ka bɔ filili sira taamabaaw bolo ni a ma mɛn fɔlɔ, u bɛ olu nɛgɛn ni farisogo negew ni kakalaya kow ye. ¹⁹ U b’a fɔ ko u bɛ olu hɔrɔnya, k’a sɔrɔ u yɛrɛw ye tolilenya kow ka jɔnw ye, katuguni fɛn o fɛn mana se sɔrɔ mɔgɔ kan, a ye o de ka jɔn ye. ²⁰ Tiɲɛ la, mɔgɔ minnu tilara ka bɔ diɲɛ ka ko nɔgɔlenw bolo an Matigi ni an Kisibaa Yesu Krisita dɔnniya barika la, ni o kow ye u minɛ tun ka se sɔrɔ u kan, o tigiw laban cogo ka jugu ni u fɔlɔ ta ye. ²¹ Ci senuma min fɔra u ye, o dɔnnen kɔ u fɛ, ni u jɛngɛna ka o bila, tiɲɛ sira dɔnbaliya tun ka fisa u ma ni o ye. ²² Ntalen min dara ko: «Wulu seginna a fɔɔnɔ kan,» ani «Lɛmuso kolen seginna a kolonkolon bɔrɔgɔ la,» o kɛra tiɲɛ ye u ko la.

¹ Ne balima kanulenw, nin ye ne ka sɛbɛn filanan ye ka ci aw ma. Ne bɛ aw hakili jigin ko dɔw la o sɛbɛn fila bɛɛ kɔnɔ, walisa aw ka miirili sɛbɛ kɛ. ² Kuma minnu fɔra ka kɔrɔ kira senumaw fɛ, ani an Matigi ni an Kisibaa ka ci min fɔra aw ye a ka cidenw fɛ, aw ka aw hakili to olu la. ³ Aw k’a dɔn fɔlɔ ko: Nparabɔlaw bɛ na laban donw na ni u ka npara bɔliw ye. U na taama ka kɛɲɛ ni u yɛrɛw nege juguw ye. ⁴ U n’a fɔ ko: «A nali layidu bɛ min? Kabini an bɛnbaw sara, fɛn bɛɛ bɛ a cogo la i ko a tun bɛ cogo min na kabini diɲɛ da tuma.» ⁵ U t’a fɛ k’a to u kɔnɔ ko sankolow ni dugukolo minnu tun bɛ yen ka kɔrɔ, ko olu dara Ala ka kuma barika la, ko o dugukolo bɔra ji la ka dila ni ji ye, ⁶ ko o diɲɛ kɔrɔ halakira ji fɛ, tufane ji kɔni. ⁷ Nka sankolo ni dugukolo sisanlama maralen bɛ halakili kama ni tasuma ye Ala ka o kuma kelen barika la. Kiri na tigɛ Ala ɲɛsiranbaliw kan ka u halaki don min na, u maralen bɛ o don kama. ⁸ Nka aw kana ɲinɛ nin ko kelen kɔ, ne balima kanulenw, ko: Tile kelen bɛ Matigi ɲɛ na i ko san waa kelen. San waa kelen fana bɛ a ɲɛ na i ko tile kelen. ⁹ Matigi ye layidu min ta, a tɛna mɛn ni a ma o dafa, i ko dɔw bɛ miiri cogo min na, nka a bɛ muɲuli kɛ aw kosɔn. A t’a fɛ mɔgɔ si ka halaki, a b’a fɛ bɛɛ ka nimisa u ka jurumuw la. ¹⁰ O bɛɛ n’a ta, Matigi ka don bɛ na i ko nson. O don na, sankolow na tɛmɛn ka ban ni mankanba ye. Tasumaba na u kɔnɔ fɛnw minɛ ka u yeele. Dugukolo fana ni a kan fɛnw bɛɛ na jeni ka u ban. ¹¹ Ni o fɛnw bɛɛ na yeele ten, aw ka kan ka kɛ mun sifa mɔgɔ ye taama senuma ni Ala ɲɛsiran na? ¹² Aw ka Ala ka don ɲɛnafilɛ kosɛbɛ, ka aw se ko bɛɛ kɛ walisa a ka na joona. O don na, tasuma na sankolo minɛ ka a jeni, ka a kɔnɔ fɛnw fana yeele. ¹³ Nka an bɛ sankolo kura ni dugukolo kura makɔnɔ ka kɛɲɛ ni Ala ka layidu ye, tilennenya na sigi olu kɔnɔ. ¹⁴ O de kosɔn, ne balima kanulenw, ka aw to o kow makɔnɔli la, a’ ye aw jija walisa aw jɛlen jalakibaliw ka sɔrɔ ale ɲɛ kɔrɔ hɛrɛ la. ¹⁵ A’ ye aw hakili to a la ko an Matigi ka muɲuli ye aw kisili ye, i ko an balimakɛ kanulen Paul y’a fɔ aw ye a ka sɛbɛn la cogo min na, ka kɛɲɛ ni hakilitigiya dilen ye a ma Ala fɛ. ¹⁶ A bɛ o ko fɔ a ka sɛbɛnw bɛɛ kɔnɔ yɔrɔ minnu na, a b’a fɔ o cogo kelen na. A ka sɛbɛn kɔnɔ kuma dɔw faamuli ka gɛlɛn, fo mɔgɔ ko dɔnbali dusu sigibaliw bɛ u kɔrɔ tɔnɔmi, i ko u b’a kɛ Kitabu kuma tɔw la cogo min na, ka u yɛrɛw halaki. ¹⁷ Aw kɔni, balima kanulenw, aw lasɔmilen don. O de kosɔn, a’ ye aw yɛrɛw kɔlɔsi, mɔgɔ juguw ka fililiw kana aw sama fo ka aw senw bɔ u yɔrɔ ɲuman la. ¹⁸ Nka a’ ye to ka taa ɲɛ an Matigi ni an Kisibaa Yesu Krisita ka nɛɛma ni a dɔnniya la. Nɔɔrɔ ka da ale kan sisan ni badaa-badaa. Amiina.