2 YUHANA

¹ Ne, egilisi cɛkɔrɔba bɛ nin sɛbɛn ci muso ɲɛnatɔmɔlen ni a denw ma. Ne bɛ aw kanu tiɲɛ la, ne kelen tɛ dɛ, nka tiɲɛ dɔnbaaw bɛɛ fana. ² Tiɲɛ min tolen bɛ an na ka kɛ an fɛ badaa-badaa, ne bɛ aw kanu o tiɲɛ kosɔn. ³ Nɛɛma ni hinɛ ani dususuma na kɛ an fɛ ka bɔ Fa Ala ni a Denkɛ Yesu Krisita la tiɲɛ ni kanuya la. ⁴ Ne ɲagalila kosɛbɛ k’a ye ko i den dɔw bɛ taama tiɲɛ sira kan, i ko an ye ci fɔlen sɔrɔ an Fa fɛ cogo min na. ⁵ Ayiwa sisan, muso, ne b’i deli ko an ka to ka ɲɔgɔn kanu. Ne bɛ min sɛbɛn, o tɛ ci fɔlen kura ye, nka an ye min sɔrɔ kabini fɔlɔfɔlɔ, o de don. ⁶ Kanuya ye nin de ye, ko aw ka taama ka kɛɲɛ ni a ka ci fɔlenw ye. Aw ye ci min mɛn kabini fɔlɔfɔlɔ, walisa aw ka taama a la, o don. ⁷ Lafilibaa caman bɔra, u bɛ diɲɛ la. U tɛ sɔn k’a fɔ ko Yesu Krisita farisogoma nana. Min bɛ ten, o ye lafilibaa ye, Krisita kɛlɛbaa don. ⁸ A’ ye aw yɛrɛw kɔlɔsi dɛ, walisa aw ye baara min kɛ, aw kana bɔnɛ o la, nka aw ka baraji dafalen sɔrɔ. ⁹ Mɔgɔ o mɔgɔ bɛ taa ɲɛ k’a sɔrɔ u tɛ to Krisita ka kalan kan, Ala tɛ o tigi fɛ. Min bɛ to o kalan kan, Fa Ala ni a Denkɛ bɛ o fɛ. ¹⁰ Ni mɔgɔ dɔ nana aw ka so, k’a sɔrɔ a ma na ni nin kalan ye, aw kana o ladon aw fɛ, aw kana a fo fana. ¹¹ K’a masɔrɔ min b’a fo, o kɛra a jɛɲɔgɔn ye a ka kɛwale juguw la. ¹² Fɛn caman bɛ ne fɛ ka u fɔ aw ye, nka ne t’a fɛ ka olu kɛ ni sɛbɛnfura ni lankiri ye. Ne b’a fɛ ka taa ka kuma aw fɛ da ni da, walisa an ka ɲagali ka dafa. ¹³ I balimamuso, Ala ka ɲɛnatɔmɔlen kɔni, o denw bɛ i fo.