2 KƆRƐNTEKAW
11 Ne Paul, Krisita Yesu ka ciden Ala sago barika la ani an balimakɛ Timote bɛ nin sɛbɛn ci Ala ka egilisi ma Kɔrɛnte, ani Ala ka mɔgɔ senuma minnu bɛɛ bɛ Akayi jamana yɔrɔ bɛɛ la. 2 An Fa Ala ni Matigi Yesu Krisita ka nɛɛma ni dususuma di aw ma. 3 An Matigi Yesu Krisita Fa Ala ka tanu, o min ye makari Fa ni dusu saaloli bɛɛ tigi Ala ye. 4 Ale de bɛ an dusuw saalo an ka tɔɔrɔw bɛɛ la, walisa minnu bɛ tɔɔrɔ sifa o sifa la, an yɛrɛw ye dusu saaloli min sɔrɔ Ala fɛ, an ka se ka olu dusuw saalo ni o ye. 5 An bɛ Krisita ka tɔɔrɔ bɔɲɔgɔnko caman sɔrɔ cogo min na, o cogo la fana an bɛ dusu saaloliba sɔrɔ Krisita fɛ. 6 Ni an tɔɔrɔla, o bɛ kɛ aw dusu saaloli ni aw kisili kama. Ni an dusu saalola, o bɛ kɛ aw dusu saaloli kama, walisa an bɛ tɔɔrɔ minnu sɔrɔ, aw ka se ka barika sɔrɔ ka o bɔɲɔgɔnko tɔɔrɔw muɲu. 7 An jigi sigilen don aw ta fan fɛ, k’a masɔrɔ an b’a dɔn ko aw bɛ niyɔrɔ sɔrɔ an ka tɔɔrɔw la cogo min na, aw niyɔrɔ na kɛ dusu saaloli fana la ten. 8 Ayiwa balimaw, an ye tɔɔrɔ minnu sɔrɔ k’an to Asi jamana la, an t’a fɛ aw ka to olu dɔnbaliw ye. O tɔɔrɔw doni girinyara an ma kosɛbɛ fo ka tɛmɛn an barika dan kan, fo an jigi tun tigɛra ko an tɛna balo tun. 9 An tun bɛ miiri ko an saya ko latigɛra, walisa an kana an jigi da an yɛrɛw kan, fɔ Ala kan, o min bɛ suw lakunun. 10 Ale de ye an tila o sayaba la, a na an tila, ɔwɔ, an jigi b’a kan ko a na an tila ko kura fana. 11 Aw fana bɛ an dɛmɛ ni aw ka Ala deliliw ye an ye, walisa Ala ye nilifɛn min di an ma mɔgɔ caman ka deliliw kosɔn, o k’a to mɔgɔ caman ka barika da Ala ye an kosɔn. 12 An bɛ se ka an yɛrɛw bonya ko min na, o filɛ nin ye ko: An dusukun ye an seere ye ko an ye taama cogo min kɛ diɲɛ la, janko aw ɲɛ na, o kɛra ni jɛlenya ni sɛbɛya ye ka bɔ Ala la. O ma kɛ ni mɔgɔ ka hakilitigiya ye, nka o kɛra Ala ka nɛɛma barika la. 13 An fana tɛ foyi sɛbɛn ka ci aw ma fɔ aw bɛ se ka min kalan k’a faamu. Ne jigi b’a kan fana ko aw na nin faamu ka dafa, 14 i ko aw b’a faamu dɔɔnin sisan ko Matigi Yesu ka don na, anw na kɛ aw yɛrɛbonya sababu ye, i ko aw na kɛ an yɛrɛbonya sababu ye cogo min na. 15 Ne jigi tun b’a kan kosɛbɛ, o de y’a to ne tun y’a latigɛ fɔlɔ la ka taa aw yɔrɔ walisa aw ka duba fila sɔrɔ. 16 O kɔrɔ, ne tun y’a latigɛ ko ne taatɔ Masedwanɛ jamana la, ne na tɛmɛn aw fɛ. O kɔ, ne kɔsegintɔ na se aw fɛ yen, walisa ni ne bɛ taa Jude jamana la tuma min na, aw ka taa ne bilasira. 17 Ne ye nin ko latigɛ tuma min na, yala ne hakili sigilen tun tɛ wa? Ne bɛ ko minnu latigɛ, yala ne bɛ o kɛ ka kɛɲɛ ni nin diɲɛ mɔgɔw cogo ye wa? fo ne b’a fɔ ɔwɔ, ɔwɔ, ni ayi, ayi, yɔrɔnin kelen na wa? 18 Nka Ala ye kantigi ye cogo min na, an ye kuma min fɔ aw ye, o tun tɛ ɔwɔ ni ayi ye yɔrɔnin kelen na. 19 K’a masɔrɔ Ala Denkɛ Yesu Krisita min ko fɔra aw ye ne ni Silvɛn ni Timote fɛ, o tun tɛ ɔwɔ ni ayi ye, nka ale ta ye ɔwɔ ye tuma bɛɛ. 20 Ala ka layiduw bɛɛ ye ɔwɔ ye Krisita la. O de kosɔn an bɛ amiina fɔ ale barika la fana ka Ala tanu. 21 Min bɛ anw ni aw sabati ɲɔgɔn fɛ Krisita la ka an bila an dan na a yɛrɛ ye, o ye Ala ye. 22 Ale yɛrɛ ye a ka taamashyɛn da an kan fana ka Ni Senu di an ma ka sigi an dusukunw na ka kɛ fɔlɔ fɛn ye hɛrɛ nata ko la. 23 Ne bɛna min fɔ, Ala ka kɛ ne seere ye ne ni kama ni ne ma tiɲɛ fɔ. O filɛ nin ye ko aw hinɛ de y’a to ne ye ne ka Kɔrɛnte taali dabila. 24 O tɛ ko an ye aw kuntigiw ye dannaya ta fan fɛ, k’a masɔrɔ aw ka dannaya sabatilen don, nka an bɛ baara kɛ aw fɛ aw ka ɲagali kama.
21 O de kosɔn ne y’a latigɛ ne yɛrɛ kɔnɔ ko ne ɲɛnasisilen tɛna segin ka taa aw yɔrɔ. 2 K’a masɔrɔ ni ne bɛ aw ɲɛnasisi, jɔn na kɛ ne nisɔndiyabaa ye, fɔ ne ye aw minnu ɲɛnasisi? 3 Ne ye o sɛbɛn ci, katuguni ne tun bɛ siran ko ne mana se aw fɛ yen, ne ka kan ka nisɔndiya minnu kosɔn, ne kana ɲɛnasisi olu kosɔn. Ne jigi bɛ aw bɛɛ kan ko ne nisɔndiya ko ye aw fana ta ye. 4 Ne dusu kasilenba ni ne hakili ɲaaminen ni ne ɲɛji caman bɔtɔ ye o lɛtɛrɛ sɛbɛn. Ne ma o kɛ ka aw ɲɛnasisi, nka ne ye o kɛ walisa ne bɛ aw kanu kosɛbɛ cogo min na, aw ka o dɔn. 5 Ni mɔgɔ dɔ ye ɲɛnasisi ko kɛ, o ma ne ɲɛnasisi. A ye aw bɛɛ ɲɛnasisi dɔɔnin. Ne bɛ o fɔ walisa ne kana gɛlɛya ka dama tɛmɛn. 6 Aw caman ye jalaki min bin o cɛ kan, o b’a bɔ. 7 Sisan kɔni, aw ka kan ka yafa a ma k’a dusu saalo, walisa a jigi kana tigɛ ɲɛnasisi dama tɛmɛnnen fɛ. 8 O de y’a to ne bɛ aw deli ko aw k’a jira a la ko aw b’a kanu. 9 Ne ka sɛbɛn ci kun dɔ fana tun ye nin ye, ka aw kɔrɔbɔ k’a filɛ yala ni aw bɛ ne kan minɛ ko bɛɛ la. 10 Ni aw bɛ ko dɔ yafa mɔgɔ dɔ ma, ne fana bɛ o yafa a ma. Ni ne ye ko dɔ yafa dɔ ma, ne ye o yafa aw de kosɔn Krisita ɲɛ kɔrɔ, 11 walisa Sitanɛ kana se sɔrɔ an kan, k’a masɔrɔ an bɛ a ka ko kɛtaw kala ma. 12 Ne sera Troas Krisita Kibaru Duman fɔli kama tuma min na, ne y’a sɔrɔ ko Matigi ye da yɛlɛ ne ɲɛ yen. 13 Hali o, ne dusukun ma lafiya si sɔrɔ, katuguni ne ma an balimakɛ Tite sɔrɔ yen. O de y’a to ne ye ne sara u la ka bɔ yen ka taa Masedwanɛ jamana la. 14 Barika Ala ye, ale bɛ an kɛ se sɔrɔbaaw ye tuma bɛɛ Krisita la, ka an kɛ Krisita dɔnniya jirabaaw ye yɔrɔ bɛɛ, i ko tulu suma duman suma bɛ se yɔrɔ bɛɛ la cogo min na. 15 Katuguni an kɛra Krisita suma duman ye Ala ye kisilenw ni halakibaatɔw ko la. 16 Mɔgɔ dɔw ko la, an ye saya suma ye saya kama. Dɔ wɛrɛw ko la, an ye ɲɛnamaya suma ye ɲɛnamaya kama. Jɔni bɛ se ka o kow kɛ ka dafa? 17 Mɔgɔ caman bɛ Ala ka kuma kɛ jago fɛn ye. An kɔni tɛ olu dɔw ye, nka an cilen don Ala fɛ, o de kosɔn an bɛ kuma ni jɛlenya ye Krisita la Ala ɲɛ kɔrɔ.
31 An b’a daminɛ ko kura ka an yɛrɛw tɔgɔ ɲuman fɔ wa? Yala an mago b’a la ka sɛbɛn dɔw di aw ma minnu bɛ an tɔgɔ ɲuman fɔ i ko dɔw b’a kɛcogo min na wa, wala ka o ɲɔgɔn sɛbɛn sɔrɔ ka bɔ aw fɛ yen? 2 Aw yɛrɛw ye an tɔgɔ ɲuman fɔ sɛbɛn ye min sɛbɛnnen bɛ an dusukunw la. Mɔgɔw bɛɛ bɛ o kɔnɔna ko dɔn k’a kalan. 3 Ɔwɔ, a jɛlen don ko aw ye Krisita ka lɛtɛrɛ sɛbɛnnen ye an bolo fɛ. O ma sɛbɛn ni lankiri ye, fɔ Ala ɲɛnama Ni. O ma sɛbɛn kabakurun walahaw kan, fɔ mɔgɔw dusukun walahaw kan. 4 An jigi sigilen bɛ o ko la Krisita barika la Ala ɲɛ kɔrɔ. 5 O tɛ ko an bɛ miiri ko an bɛ se ka o baara kɛ an yɛrɛw barika la, nka an ka se bɛ bɔ Ala de la. 6 Ale de ye se di an ma fana ka kɛ layidu kura baarakɛlaw ye. Sariya sɛbɛnnen ta tɛ, fɔ Ni Senu ta, k’a masɔrɔ saya bɛ bɔ sariya sɛbɛnnen na, nka Ni Senu bɛ ɲɛnamaya di. 7 Sariya min ɲɛgɛnna kabakurunw kan ni sɛbɛndenw ye, saya bɔra o la. O bɛɛ n’a ta Ala nɔɔrɔ y’i jira o waati la. Musa ɲɛda tun manamanana fo Israɛl mɔgɔw ma se ka u ɲɛw jɔ a la, nka o nɔɔrɔ tun ye nɔɔrɔ banta ye. Ni sariya ka baara jirala ni Ala nɔɔrɔ ye, hali k’a sɔrɔ saya bɔra o la, 8 Ni Senu ka baara tɛna i jira ni Ala nɔɔrɔ ye ka tɛmɛn o kan wa? 9 Baara min bɛ jalakili kɛ, ni nɔɔrɔ tun bɛ o la, baara min bɛ tilennenya di, o nɔɔrɔ na bonya ka tɛmɛn dɔ ta kan kosɛbɛ. 10 Ka kɛɲɛ n’o ye, o nɔɔrɔ tɛmɛnnen tɛ foyi ye, sabu nɔɔrɔ dɔ wɛrɛ nana min ka bon ni o ye kosɛbɛ. 11 Ni nɔɔrɔ tun bɛ fɛn banta la, fɛn banbali nɔɔrɔ na bonya o ta ye kosɛbɛ. 12 O jigi ɲuman bɛ an fɛ, o de y’a to an bɛ kuma ni ja gɛlɛya ye ka a jɛya. 13 An t’a kɛ i ko Musa. Ale ye fini biri a ɲɛda la, walisa Israɛl mɔgɔw kana a nɔɔrɔ banta laban ye, 14 nka u hakiliw gerenna. Halibi, ni u bɛ Layidu Kɔrɔ Kitabuw kalan tuma min na, o fini birilen bɛ u hakili la, a ma bɔ yen, katuguni a bɛ bɔ Krisita de barika la. 15 Halibi, ni u bɛ Musa ka Kitabuw kalan tuma o tuma, o fini birilen bɛ u hakili la. 16 Nka «Ni mɔgɔ dɔ bɛ yɛlɛma Matigi fan fɛ, o fini birilen bɛ bɔ yen.» 17 Ayiwa, Matigi min ko bɛ fɔ yan, o ye Ni Senu de ye. Matigi Ni bɛ yɔrɔ min na, hɔrɔnya fana bɛ yen. 18 Fini birilen tɛ an ɲɛda la, o de y’a to an bɛɛ bɛ Matigi nɔɔrɔ lajɛ ka o nɔɔrɔ jira i ko mɔgɔ bɛ fɛn lajɛ dubalen na cogo min na. An bɛ yɛlɛma o fɛ ka kɛ Matigi bɔɲɔgɔnko ye. An bɛ bɔ nɔɔrɔ dɔ la ka se nɔɔrɔ dɔ wɛrɛ ma, o bɛ kɛ Matigi Ni barika la.
41 Ala makarila an na ka an bila nin baara la, o de kosɔn an tɛ sɛgɛn. 2 Maloya ko minnu bɛ kɛ dogo la, an banna olu bɛɛ ma. An tɛ taama ni keguya ye. An tɛ Ala ka kuma yɛlɛma, nka an bɛ tiɲɛ fɔ k’a jɛya, walisa mɔgɔw bɛɛ kelen-kelen dusukun ka an tɔgɔ ɲuman fɔ Ala ɲɛ kɔrɔ. 3 O bɛɛ n’a ta, ni an ka Kibaru Duman dogolen bɛ, a dogolen bɛ halakibaatɔw de la. 4 Olu tɛ dannaya kɛ katuguni nin diɲɛ batofɛn ye u hakiliw fiyen, walisa Krisita min ye Ala ja ye, ale nɔɔrɔ Kibaru Duman kɛnɛ kana yeelen bɔ u ye. 5 An tɛ an yɛrɛw ko waajuli kɛ. An bɛ Krisita Yesu ko waajuli kɛ ko ale ye Matigi de ye, ko an ye aw ka baaradenw ye Yesu kosɔn. 6 Ala, o min y’a fɔ ko kɛnɛ ka bɔ dibi la, ale de ye kɛnɛ bɔ an dusukunw na, walisa Ala nɔɔrɔ min bɛ ye Krisita ɲɛda la, o dɔnniya ka di an ma ka kɛnɛ bɔ an ye. 7 An minnu ye bɔgɔ minɛnw ye, o nafoloba bɛ sɔrɔ an kɔnɔ, walisa mɔgɔw k’a ye ko o sebaaya dama dɔnbali bɛ bɔ Ala la, ko o tɛ bɔ an na. 8 An bɛ tɔɔrɔ cogo bɛɛ la, nka an ma dɛsɛ. An hakili ɲaaminen don, nka an jigi ma tigɛ. 9 Tugu kɛra an nɔfɛ ka an tɔɔrɔ, nka Ala ma an bila. An gosira ka bin duguma, nka an ma sa. 10 An bɛ Yesu saya ko jira an farikolo la tuma bɛɛ, walisa a ka ɲɛnamaya ka i jira an farikolo la fana. 11 An ka diɲɛ latigɛ la, an bɛ saya da la tuma bɛɛ Yesu kosɔn, walisa Yesu ka ɲɛnamaya fana ka i jira an farikolo sata la. 12 O cogo la, saya bɛ baara la an kɔnɔ, nka ɲɛnamaya bɛ baara la aw kɔnɔ. 13 Kitabu b’a fɔ ko: «Ne ye dannaya kɛ, o de y’a to ne kumana.» An fana ye dannaya kɛ ni o dannaya dusu kelen ye, o de kosɔn an bɛ kuma. 14 An y’a dɔn ko min ye Matigi Yesu lakunun ka bɔ suw cɛma, o na an fana lakunun Yesu fɛ ka an ni aw ladon a yɛrɛ ɲɛ kɔrɔ ɲɔgɔn fɛ. 15 O kow bɛɛ kɛra aw kosɔn, walisa Ala ka nɛɛma bɛ bonya mɔgɔ caman na ka ta’a fɛ cogo min na, o k’a to mɔgɔ caman ka barika da Ala ye ka nɔɔrɔ da a kan. 16 O de y’a to an tɛ sɛgɛn. Hali k’a sɔrɔ an farikolo bɛ tiɲɛ, an ni bɛ kuraya don o don. 17 An ka waatinin tɔɔrɔ fiɲɛma bɛ nɔɔrɔba dama dɔnbali labɛn an ye, a banbali don. 18 K’a masɔrɔ an ɲɛw jɔlen tɛ fɛn yetaw la, u jɔlen bɛ fɛn yebaliw de la. Fɛn yetaw bɛ waati dɔɔnin dɔrɔn de kɛ, nka fɛn yebaliw ye badaa fɛnw de ye.
51 An sigilen bɛ bugu min kɔnɔ dugukolo kan, an farikolo kɔni, ni o binna, Ala ye so di an ma sankolo la, mɔgɔ bolo ma min jɔ. Sigi yɔrɔ banbali don. 2 K’an to nin bugu kɔnɔ yan, an bɛ ɛunan, k’a masɔrɔ an b’a fɛ kosɛbɛ ka don o sankoloso kɔnɔ, i ko mɔgɔ bɛ fini don a kan na cogo min na. 3 Ni an ye o don an na, an fari lankolon tɛna sɔrɔ. 4 Ɔwɔ, k’an to nin bugu kɔnɔ, an bɛ ɛunan, an doninen don. A tɛ ko an b’a fɛ ka an farikolo dugukoloma bɔ an na, nka an b’a fɛ ka sankolo la ta don an na, walisa ɲɛnamaya ka fɛn sata ban. 5 Min ye an dila o ko yɛrɛ kama, o ye Ala de ye. Ale ye Ni Senu di an ma ka kɛ hɛrɛ nata fɛn fɔlɔ ye. 6 O de kosɔn an ja gɛlɛyalen don tuma bɛɛ. An b’a dɔn ko k’an to nin farikolo la, an yɔrɔ ka jan Matigi la. 7 An bɛ taama dannaya barika la, yeli barika tɛ. 8 An ja gɛlɛyalen don. An b’a fɛ ka bɔ nin farikolo la ka taa sigi Matigi fɛ, o de ka fisa. 9 Nka fɛn bɛɛ ɲɛ, ni an tora nin farikolo la wo, ni an bɔra a la wo, an b’a fɛ an ko ka diya Matigi ye. 10 Katuguni wajibi don an bɛɛ ka jɔ Krisita ɲɛ kɔrɔ a ka kiri tigɛ yɔrɔ la, walisa mɔgɔw bɛɛ kelen-kelen ye min kɛ k’a to farikolo la, ko ɲuman wo, ko jugu wo, a ka o sara sɔrɔ. 11 Siranba min ka kan ka kɛ Matigi ɲɛ, an bɛ o dɔn, o de kosɔn an bɛ mɔgɔw lasɔmi ka u deli. Ala bɛ an cogo dɔn kosɛbɛ. Ne jigi b’a kan ko aw fana bɛ an cogo dɔn aw dusukunw na. 12 An tɛ an yɛrɛw tɔgɔ ɲuman fɔ aw ye ko kura, nka an bɛ cogo di aw ma ka aw yɛrɛw bonya an ko la, walisa minnu tɛ u yɛrɛw bonya dusukun kow la, fɔ kɔkanna kow la, aw ka se ka olu jaabi. 13 Ni a y’a sɔrɔ an hakili wulila, o kɛra Ala de kosɔn. Nka ni an hakili sigilen don, o kɛra aw de kosɔn. 14 K’a masɔrɔ Krisita ka kanuya bɛ an jija. An y’a dɔn ko ni mɔgɔ kelen sara bɛɛ nɔ na, mɔgɔw bɛɛ fana sara. 15 Ale sara bɛɛ nɔ na, walisa minnu ɲɛnama don, olu kana ɲɛnamaya u yɛrɛw ye tun, nka min sara u nɔ na ka kunun, u ka ɲɛnamaya o de ye. 16 O de kosɔn, an tɛ mɔgɔ si jate ka kɛɲɛ ni mɔgɔya cogo ye tun. Hali ni an tun bɛ Krisita jate ka kɛɲɛ ni a ka mɔgɔya cogo ye, an t’a jate o cogo la sisan tun. 17 O de y’a to ni mɔgɔ dɔ bɛ Krisita la, a kɛra dafɛn kura ye. Fɛn kɔrɔw tɛmɛnna. A filɛ, fɛn bɛɛ kɛra kura ye. 18 O bɛɛ bɔra Ala de la. Ale de ye an ni a yɛrɛ cɛ bɛn Krisita barika la. A ye o cɛ labɛnni baara di an ma ale ni mɔgɔw cɛ. 19 Katuguni Ala tun bɛ baara kɛ Krisita la ka mɔgɔw ni a yɛrɛ cɛ bɛn. A ma u ka hakɛw jate u kun. A ye o cɛ labɛnni waajuli baara kalifa an ma. 20 O de kosɔn an ye Krisita ka lasigidenw ye ka kuma a nɔ na. A bɛ i ko Ala bɛ waajuli kɛ an da la. An bɛ aw deli Krisita tɔgɔ la ko aw ka sɔn aw ni Ala cɛ ka bɛn. 21 Krisita min tun ye jurumu dɔnbali ye, Ala ye o kɛ jurumu ye an kosɔn, walisa an ka kɛ Ala ka tilennenya ye ale la.
61 O de kosɔn, an minnu ye Ala baarakɛɲɔgɔnw ye, an bɛ aw deli ko aw ye Ala ka nɛɛma min sɔrɔ, aw kana sɔn o ka kɛ fu ye, 2 katuguni Ala ko: «Ne ye i ka delili lamɛn ne diyaɲe waati la. Ne ye i dɛmɛ kisili don na.» A filɛ, Ala diyaɲe waati ye sisan de ye. A filɛ, bi ye kisili don de ye. 3 An tɛ kunnatiɲɛni sababu di mɔgɔ si ma ko si la, walisa an ka baara kana jalaki. 4 Nka an b’an yɛrɛw jira ko an ye Ala ka baarakɛla ɲumanw ye fɛn bɛɛ la. An b’a jira ni muɲuliba ye tɔɔrɔ kow ni bɔnɛba ni sɛgɛn kow la. 5 An bɛ bugɔ, an bɛ bila kaso la, balawu bɛ wuli an kama. An bɛ baara gɛlɛnw kɛ, an bɛ tɔɔrɔ sunɔgɔbaliya ni kɔngɔ fɛ. 6 An b’an yɛrɛw jira Ala ka baarakɛlaw ye ni jɛlenya ye, ani dɔnniya ni sabali ni ɲumaya ye Ni Senu barika la, ni kanuya sɛbɛ ye. 7 An bɛ o jira ni tiɲɛ kuma ye, ani Ala ka sebaaya. An bɛ tilennenya kɛ an ka kɛlɛkɛ minɛnw ye an kininbolo ni an numanbolo la. 8 An bɛ bonya, an bɛ dɔgɔya fana. An tɔgɔ jugu bɛ fɔ, an tɔgɔ ɲuman bɛ fɔ fana. An bɛ jate mɔgɔ lafilibaaw ye, k’a sɔrɔ an ye tiɲɛtigiw de ye, 9 i ko an dɔnnen tɛ, k’a sɔrɔ an dɔnnen bɛ kosɛbɛ, i ko mɔgɔ satɔw, k’a sɔrɔ an ɲɛnama filɛ, i ko gosilenw, nka an ma faga, 10 i ko ɲɛnasisilenw, o bɛɛ n’a ta an bɛ ɲagali tuma bɛɛ, i ko faantanw, k’a sɔrɔ an bɛ mɔgɔ caman fɛntigiya, i ko bolo lankolonw, k’a sɔrɔ fɛn bɛɛ ye an ta ye. 11 Anw balima Kɔrɛntekaw, an bɛ tiɲɛ de fɔ aw ye. An dusu dayɛlɛlen don aw ta fan fɛ. 12 An ma aw degun, nka aw yɛrɛw ka kanuya ka dɔgɔ. 13 Ayiwa sisan, ne bɛ kuma aw fɛ i ko ne denw, aw ka an naamu laminɛ ka aw ka kanuya bonya an ta fan fɛ. 14 Aw kana don dannabaliw fɛ u ka tɔnnajiri bɛnbaliw kɔrɔ. Jɛ jumɛn bɛ tilennenya ni juguya cɛ? Kɛnɛ ni dibi fana bɛ se ka jɛ cogo di? 15 Bɛn jumɛn bɛ Krisita ni Sitanɛ cɛ? Jɛɲɔgɔnya jumɛn bɛ dannabaa ni dannabali cɛ? 16 Bɛn cogo jumɛn bɛ Alabatosoba ni boliw cɛ? Anw ye Ala ɲɛnama batosoba de ye, i ko Ala y’a fɔ cogo min na ko: «Ne na sigi u cɛma ka taama u fɛ. Ne na kɛ u ka Ala ye, u na kɛ ne ka mɔgɔw ye.» 17 O de kosɔn Matigi ko: «A’ ye bɔ u cɛma ka fara u la. Aw kana maga fɛn saniyabali si la. Ni aw ye o kɛ, ne na sɔn aw ma. 18 Ne na kɛ aw fa ye, aw na kɛ ne denkɛw ni ne denmusow ye. Matigi Sebaayabɛɛtigi ye o fɔ.»
71 O layiduw tara an ye, balima kanulenw. O de y’a to an ka an saniya farisogo nɔgɔlenya ani dusukun nɔgɔlenya bɛɛ ma, ka saniyali dafa ni Ala ɲɛsiran ye. 2 A’ ye sɔn an ma! An ma mɔgɔ si tɔɲɔ. An ma mɔgɔ si tiɲɛ. An ma an yɛrɛw fɛntigiya ni mɔgɔ si ka fɛn ye. 3 Ne tɛ o fɔ ka aw jalaki, k’a masɔrɔ ne y’a fɔ ka ban ko aw kanuya bɛ an na fo an ni aw bɛ ɲɛnamaya ɲɔgɔn fɛ ka sa ɲɔgɔn fɛ. 4 Ne dalen bɛ aw la kosɛbɛ. Ne bɛ aw tɔgɔ ɲuman fɔ kosɛbɛ. Ne dusu saalola fo ka ne wasa. K’an to an ka tɔɔrɔw bɛɛ la, ne ka ɲagali ka bon haali. 5 Tiɲɛ la, kabini an sera Masedwanɛ jamana la, an ma lafiya si sɔrɔ, nka an tɔɔrɔla an fan bɛɛ la. Kɛnɛma, kɛlɛ kow tun bɛ yen. An yɛrɛw dusukunw na, an tun bɛ siran. 6 Nka Ala, o min bɛ mɔgɔ degunnenw dusuw saalo, o ye an dusu saalo Tite nali fɛ. 7 Ayiwa a nali ko dama tɛ, nka aw ye Tite dusu saalo cogo min na, o fana ye an dusu saalo. A y’a fɔ an ye ko ne ɲɛnafin bɛ aw la, ko aw ɲɛnasisira ani aw timinandiyalen bɛ ne ko la. O ye dɔ fara ne ka ɲagali kan. 8 Hali ni ne ka sɛbɛn ye aw ɲɛnasisi, ne tɛ nimisa o la, hali k’a sɔrɔ ne tun nimisara o la fɔlɔ, k’a masɔrɔ ne y’a ye ko o sɛbɛn ye aw ɲɛnasisi waati dɔɔnin dɔrɔn de kɔnɔ. 9 Nka sisan ne bɛ ɲagali. Ne tɛ ɲagali aw ɲɛnasisili kosɔn, nka ne bɛ ɲagali k’a masɔrɔ o ɲɛnasisili y’a to aw kɔseginna ka aw cogo yɛlɛma. Aw kɔni ka ɲɛnasisili bɛnna Ala sago ma, fo an ma juguman si lase aw ma. 10 K’a masɔrɔ ɲɛnasisi min bɛ bɛn Ala sago ma, o de b’a to mɔgɔ bɛ kɔsegin k’a cogo yɛlɛma ka kisili sɔrɔ, a tɛ nimisa o la, nka diɲɛ ka ɲɛnasisi bɛ na ni saya ye. 11 Aw ka ɲɛnasisi min bɛnna Ala sago ma, o nana ni min ye, o filɛ: Aw ye aw sɛbɛ don o ko la. Aw ye jo ɲini kosɛbɛ. Aw diminna kosɛbɛ. Aw siranna kosɛbɛ. Aw tun b’a fɛ kosɛbɛ ka ne ye. Aw dusu bɛɛ tun bɛ o ko la. Aw ye jalakili kɛ o ko la kosɛbɛ. Aw y’a jira cogo bɛɛ la ko aw jɛlen don o ko la. 12 O de kosɔn ne ye o sɛbɛn ci aw ma. A ma ci o kojugukɛla kosɔn. O ko jugu kɛra min na, a ma ci o fana kosɔn. Nka a cira walisa an hami min bɛ aw kɔnɔ, o ka jira aw la Ala ɲɛ kɔrɔ. 13 O de y’a to an dusu saalola. Ka fara an dusu saaloli kan, an ɲagalila kosɛbɛ Tite ka ɲagali kosɔn, katuguni aw y’a nisɔndiya. 14 Ne tun ye aw tɔgɔ ɲuman fɔ a ye fɛn dɔ la, ne ma maloya o la tun. An ye fɛn bɛɛ fɔ aw ye tiɲɛ la cogo min na, o cogo la an tun ye aw tɔgɔ ɲuman min fɔ Tite ye, o fana sɔrɔla tiɲɛ ye. 15 A ka kanuya bonyara aw ta fan fɛ k’a masɔrɔ a hakili bɛ to aw bɛɛ ka kan minɛli la, ani aw y’a ladon koɲuman ni siran ni yɛrɛyɛrɛli ye cogo min na. 16 Ne bɛ ɲagali, katuguni ne bɛ se ka ne jigi da aw kan ko bɛɛ la.
81 Balimaw, Ala ka nɛɛma min dira mɔgɔw ma Masedwanɛ jamana egilisiw la, an bɛ o ko fɔ aw ye. 2 Ka yen dannabaaw to kɔrɔbɔliba la u ka tɔɔrɔw bolo, u ka ɲagaliba de y’a to u ye nili kɛ kosɛbɛ ni tɛgɛ labilali ye, hali k’a sɔrɔ u ka faantanya tun ka jugu. 3 Ne ye u seere ye ko u ye nili kɛ ka kɛɲɛ ni u se ko ye ni ɛaniya ɲuman ye, fo ka tɛmɛn u se ko kan yɛrɛ. 4 Dɛmɛni min bɛ ci Ala ka mɔgɔ senumaw ma, u y’an deli kosɛbɛ ko an ka sɔn u ka niyɔrɔ ta o la. 5 An jigi tun b’a kan ko u bɛna min kɛ, u tɛmɛnna o kan. Fɔlɔ, u ye u yɛrɛw di Matigi ma. O kɔ, u ye fɛn di an ma ka kɛɲɛ ni Ala sago ye. 6 O de kosɔn an fana ye Tite deli ko a ye baara ɲuman min daminɛ nili ko la aw fɛ yen, a ka taa aw yɔrɔ ka o dafa. 7 Aw kɛra fɛntigiw ye fɛn bɛɛ la, o kɔrɔ, dannaya la, kuma la, dɔnniya la, ani timinandiya sifa bɛɛ, ani an kanuya min bɛ aw la. An b’a fɛ aw ka kɛ fɛntigiw ye nin nili ko fana la. 8 Ne bɛ min fɔ aw ye, o tɛ ci fɔlen ye, nka ne bɛ mɔgɔ wɛrɛw ka jijali ko fɔ walisa ka aw ka kanuya kɔrɔbɔ k’a filɛ yala ni kanuya sɛbɛ don. 9 K’a masɔrɔ aw bɛ an Matigi Yesu Krisita ka nɛɛma dɔn, ko ale tun ye fɛntigi ye, nka a y’a yɛrɛ kɛ faantan ye aw kosɔn, walisa aw ka fɛntigiya a ka faantanya fɛ. 10 Ne bɛ ne ka miirili jira nin ko la ko aw ye min daminɛ kabini salon, a bɛnnen bɛ aw ka to o kan ka a dafa. Aw fɔlɔ ye o kɛli daminɛ, o dɔrɔn tɛ, aw fɔlɔ ye o ɛaniya jira fana. 11 O de kosɔn sisan, a’ ye taa ɲɛ o kɛli la k’a dafa, walisa aw ye o ko latigɛ ni ɛaniya min ye, aw ka o kɛ k’a dafa ni o ɛaniya kelen ye, ka kɛɲɛ ni aw se ko ye. 12 K’a masɔrɔ ni nili ɛaniya bɛ mɔgɔ la, Ala bɛ sɔn a ma ka kɛɲɛ ni a bolo ta ye, nka fɛn min t’a bolo, o sen t’a la. 13 O kɔrɔ tɛ ko mɔgɔ wɛrɛw dɛmɛni ka aw yɛrɛw mago sa, nka walisa bɛɛ ka kɛɲɛ. 14 Sisan kɔni, aw fɛntigiyara. O de kosɔn aw bɛ se ka faantanw dɛmɛ. Ayiwa ni a y’a sɔrɔ faantanya sera aw ma, k’a sɔrɔ olu fɛntigiyara, olu na se ka aw dɛmɛ. O cogo la bɛɛ na kɛɲɛ, 15 i ko a sɛbɛnnen bɛ Kitabu la cogo min na ko: «Min ye caman cɛ, o ta tɔ ma to. Min ye dɔɔnin cɛ, o ta ma dɛsɛ.» 16 Barika Ala ye k’a masɔrɔ a y’a bila Tite dusu la ka timinandiya aw ko la, i ko an b’a kɛcogo min na. 17 An ye min ɲini a fɛ, a sɔnna o ma. A taara ɲɛ ni timinandiya ye, fo a yɛrɛ y’a latigɛ ka taa aw yɔrɔ. 18 Egilisiw bɛɛ bɛ balimakɛ min tanu a ka baara ɲuman kosɔn Kibaru Duman waajuli la, an bɛ o ci ka taa Tite fɛ. 19 O dɔrɔn tɛ, an bɛ taama min kɛ o nili ko la, egilisiw ye ale ɲɛnatɔmɔ ka taa an fɛ o la. An bɛ o taama kɛ walisa ka nɔɔrɔ da Matigi kan ani ka ɛaniya ɲuman jira mɔgɔ wɛrɛw dɛmɛni ko la. 20 An bɛ o niliba ko ɲɛnabɔ ten, an bɛ cogo bɛɛ kɛ walisa mɔgɔ kana an jalaki yɔrɔ sɔrɔ o la. 21 An b’a fɛ ka ko ɲuman kɛ Matigi ɲɛ kɔrɔ, o dama tɛ, an b’a fɛ ka o kɛ mɔgɔw fana ɲɛ na. 22 An bɛ an balimakɛ ci ka taa u fɛ. An y’a kɔrɔbɔ ko caman k’a sɔrɔ ko a jijalen don tuma bɛɛ. Nka a jijalen don sisan ka tɛmɛn fɔlɔ kan a ka dannaya kosɔn aw la. 23 Tite kɔni ta fan fɛ, ale ye ne taamaɲɔgɔn ni ne baarakɛɲɔgɔn ye aw kosɔn. Balima tɔw ye egilisi ka cidenw ye, u ye Krisita nɔɔrɔ ye. 24 O de kosɔn aw k’a jira u la ko aw bɛ u kanu sɛbɛ la, walisa egilisiw ka o ye, k’a dɔn ko jo bɛ an fɛ ka aw tɔgɔ ɲuman fɔ.
91 Tiɲɛ la, wajibi tɛ ko ne ka sɛbɛn ci aw ma Ala ka mɔgɔ senumaw dɛmɛni ko la, 2 k’a masɔrɔ ne bɛ aw sago dɔn ka ban. Ne ye aw tɔgɔ ɲuman fɔ Masedwanɛ jamana mɔgɔw ye ko: «Akayi jamana balimaw labɛnnen bɛ ka dɛmɛni di kabini salon.» Aw ka timinandiyali ye balima caman jija. 3 O bɛɛ n’a ta, ne bɛ an balimakɛw ci aw ma, walisa an ye aw tɔgɔ ɲuman min fɔ o ko la, o kana sɔrɔ fu ye. Ne b’a fɛ aw labɛnnen ka sɔrɔ, i ko ne tun y’a fɔ cogo min na. 4 N’o tɛ, ni Masedwanɛ mɔgɔ dɔw taara ne fɛ aw yɔrɔ k’a sɔrɔ aw ma labɛn, an na maloya katuguni an dalen tun bɛ aw la. O fana na kɛ aw maloya ko ye! 5 O de kosɔn, ne y’a miiri ko ne ka kan ka o balimakɛw deli ko u ka taa ne ɲɛ aw yɔrɔ, walisa aw ye nilifɛn min ko fɔ, u ka o ɲɛnabɔ sani ne ka se yen. O n’a jira ko a kɛra ni diyaɲe ye, ko o ma kɛ ni diyagoya ye. 6 Aw k’a dɔn ko min bɛ suman dɔɔnin dan, o na suman dɔɔnin tigɛ. Min bɛ suman caman dan, o na suman caman tigɛ fana. 7 Mɔgɔw bɛɛ kelen-kelen ye min latigɛ u yɛrɛw kɔnɔ, u ka nili kɛ ka kɛɲɛ n’o ye. O kɛli kana gɛlɛya u ma, a kana kɛ ni diyagoya ye, k’a masɔrɔ min bɛ nili kɛ ni diyaɲe ye, o tigi de ko ka di Ala ye. 8 Se bɛ Ala ye ka duba sifa bɛɛ kɛ aw ye k’a caya, walisa aw magoɲɛ fɛnw ka sɔrɔ aw bolo tuma bɛɛ, ko bɛɛ la, ka caya, walisa aw ka jiidi kɛwale ɲumanw bɛɛ la, 9 i ko a sɛbɛnnen bɛ Kitabu la ko: «A y’a tɛgɛ labila ka nili kɛ faantanw la, a ka ɲumaya tɛna ban abada.» 10 Ala, o min bɛ danni si di dannikɛla ma, ka dumunifɛn fana di a ma, o na danni si caman di aw ma ka o bonya walisa aw ka den caman kɛ ni aw ka ɲumaya ye. 11 A na aw jiidi ko bɛɛ la, walisa aw ka aw tɛgɛw labila tuma bɛɛ, fo mɔgɔ caman ka barika da Ala ye an ka baara fɛ. 12 K’a masɔrɔ aw bɛ dɛmɛni min di, o tɛ dan Ala ka mɔgɔ senumaw mago ɲɛli dama ma, nka o n’a to mɔgɔ caman ka barika da Ala ye ka ta’a fɛ. 13 U mana o dɛmɛni sɔrɔ, u na Ala tanu k’a masɔrɔ aw ka kɛwalew kɛɲɛna ni aw ka dannaya fɔlen ye Krisita Kibaru Duman la, ani k’a masɔrɔ aw ye aw tɛgɛ labila u yɛrɛw ani mɔgɔw bɛɛ ye. 14 Ala ye nɛɛmaba min kɛ aw ye, o n’a to u ka Ala deli aw ye ka aw kanu kosɛbɛ. 15 Barika Ala ye a ka nili fɛnba kosɔn min ɲɔgɔn tɛ!
101 Ne Paul bɛ aw deli, ne min majiginlen don ka ne to aw fɛ, nka ne ja gɛlɛyalen don aw ta fan fɛ ni ne tɛ yen tuma min na. Ne bɛ aw deli Krisita ka dusu sumalenya ni a ka sabali kosɔn ko 2 aw kana ne wajibiya ka fariya ni ne sera aw yɔrɔ tuma min na, k’a masɔrɔ minnu bɛ miiri ko an bɛ taama Hadamadenw cogo la, ne y’a dɔn ko ne ja gɛlɛyalen na fariya olu ma. 3 Tiɲɛ don, an farisogoma bɛ taama, nka an tɛ kɛlɛ kɛ farisogo cogo la. 4 An ka kɛlɛkɛ minɛnw tɛ nin diɲɛ taw ye, nka minɛn barikamaw don Ala fɛ, ka kɛlɛ kunbɛn kogow ci. 5 Bisigiw ani fɛn o fɛn bɛ wuli Ala dɔnniya kama k’a kɛlɛ, an bɛ olu dabiri. An bɛ miiriliw bɛɛ kolo, u ka Krisita kan minɛ. 6 An labɛnnen bɛ, ni aw ka kan minɛli dafara tuma min na, ka kan minɛbaliya kow bɛɛ hakɛ bɔ. 7 Aw bɛ fɛnw kɔkanna de filɛ. Ayiwa, ni mɔgɔ dɔ dara a la ko ale ye Krisita ta ye, o ka miiri a la k’a dɔn ko ale ye Krisita ta ye cogo min na, an fana ye Krisita ta ye ten. 8 K’a masɔrɔ Matigi ye fanga min di an ma, o ma di aw tiɲɛni kosɔn, nka o dira aw nafa sɔrɔli kama. Hali ni ne bɛ ne yɛrɛ bonya o fanga kosɔn ka dama tɛmɛn dɔɔnin, ne tɛna maloya. 9 Ne t’a fɛ k’a jira ne ka sɛbɛnw fɛ ko ne bɛ aw lasiran. 10 Dɔw kɔni b’a fɔ ko ne ka sɛbɛnw kɔnɔ kuma ka gɛlɛn, ko u barika ka bon, ko nka ne yɛrɛ ye barikantan ye, ko ne ka kuma tɛ foyi ɲɛ. 11 O tigiw k’a dɔn ko an ka kuma bɛ cogo min na an ka sɛbɛnw kɔnɔ k’a sɔrɔ an tɛ yen, an fana na kɛ ten kɛwalew la ni an sera aw fɛ yen tuma min na. 12 Minnu bɛ u yɛrɛw tɔgɔ ɲuman fɔ, an tɛ an ja gɛlɛya ka an yɛrɛw jate olu dɔw bɔɲɔgɔnko ye, wala ka an yɛrɛw suma ni olu ye. U bɛ u yɛrɛw suma ɲɔgɔn ma ka u yɛrɛw kɛɲɛ ɲɔgɔn ma. O de kosɔn u ye hakilintanw ye. 13 An kɔni tɛna an yɛrɛw bonya ka dama tɛmɛn, nka Ala ye dan min sigi an ye, ni aw fana bɛ o kɔnɔ, an na an yɛrɛw bonya ka kɛɲɛ n’o ye. 14 Ni an tun ma taa aw fɛ yen, an tun na tɛmɛn an dan kan, nka an tɛ tɛmɛn o kan, katuguni an sera aw yɔrɔ ni Krisita Kibaru Duman ye. 15 O cogo la, dan min sigira an ye, an tɛ tɛmɛn o kan. Mɔgɔ wɛrɛw ye baara min kɛ, an tɛ an yɛrɛw bonya o la, nka an jigi b’a kan ko ni dɔ farala aw ka dannaya kan, an ka baara yɔrɔ na bonya aw cɛma kosɛbɛ, 16 walisa an ka se ka Kibaru Duman fɔ aw kɔfɛ jamanaw la. Baara min kɛra mɔgɔ wɛrɛw ka baara yɔrɔw la ka ban, an tɛna an yɛrɛw bonya o la. 17 O bɛɛ n’a ta, «min b’a yɛrɛ bonya, o k’a yɛrɛ bonya Matigi ko la.» 18 Katuguni min b’a yɛrɛ tɔgɔ ɲuman fɔ, o tɛ tɔgɔ sɛbɛ sɔrɔ, fɔ Matigi bɛ min tɔgɔ ɲuman fɔ.
111 A! Ni aw tun bɛ sɔn ka ne ka hakilintanya muɲu dɔɔnin, o tun na diya ne ye. Ayiwa, a’ ye ne muɲu! 2 Aw keleya bɛ ne la i ko a bɛ Ala la cogo min na, k’a masɔrɔ ne ye aw maminɛcɛ kelen ye, o ye Krisita de ye, walisa ka aw di a ma i ko npogotigi sɛbɛ. 3 Nka ne bɛ siran ko aw hakili kana na yɛlɛma, fɔ aw ka aw dusukun kelenya bila Krisita ta fan fɛ, i ko sa ye Hawa nɛgɛn n’a ka keguya ye cogo min na. 4 K’a masɔrɔ ni mɔgɔ dɔ nana ka Yesu dɔ wɛrɛ ko fɔ aw ye, ni an ka fɔlen kɔrɔ tɛ, aw bɛ sɔn o ma. Ni aw ye ni dɔ wɛrɛ sɔrɔ min ni aw ka sɔrɔlen tɛ kelen ye, wala ka Kibaru Duman wɛrɛ sɔrɔ, aw tun ma min sɔrɔ, aw bɛ sɔn olu fana ma. 5 Ne b’a jate ko ne man dɔgɔ ni o ciden fisamaw ye foyi la. 6 Hali ni ne ye ko dɔnbali ye kuma la, ne tɛ ko dɔnbali ye dɔnniya la. An ye o jira aw la fɛn bɛɛ la ani cogo bɛɛ la. 7 Ne ye Ala ka Kibaru Duman fɔ aw ye gansan tuma min na, ne ye ne yɛrɛ majigin walisa ka aw kɔrɔta. Yala o kɛra jurumu ye ne fɛ wa? 8 Ne ye sara minɛ egilisi wɛrɛw la, i n’a fɔ ne ye u ka nafolo bɔsi u la walisa ka aw dɛmɛ. 9 Ka ne to aw fɛ yen, ne mago tun bɛ fɛn dɔw la, nka ne ma ne doni da mɔgɔ si kan. Balima minnu nana ka bɔ Masedwanɛ jamana la, olu ye ne magoɲɛ fɛnw di ne ma. Ne ye ne yɛrɛ kɔlɔsi walisa ne kana kɛ aw si ka doni ye foyi la. Ne na ne yɛrɛ kɔlɔsi o la halibi. 10 Krisita ka tiɲɛ min bɛ ne fɛ, o kosɔn ne b’a fɔ ko mɔgɔ si tɛ se ka ne bali o yɛrɛ bonyali la Akayi jamana yɔrɔ si la. 11 Mun na ne bɛ o fɔ? Ne bɛ o fɔ katuguni ne tɛ aw kanu wa? Ala y’a dɔn ko ne bɛ aw kanu dɛ! 12 Nka ne bɛ min kɛ, ne na to o kan, walisa minnu bɛ sababu ɲini ka u yɛrɛw bonya ko u ye an bɔɲɔgɔnkow ye, an ka u bali ka o sɔrɔ. 13 O mɔgɔw ye ciden nkalontigɛlaw ye, ani baarakɛla lafilibaaw. U bɛ u yɛrɛw cogo yɛlɛma ka kɛ Krisita ka cidenw ye. 14 O tɛ kabako ye, katuguni Sitanɛ bɛ a yɛrɛ cogo yɛlɛma ka kɛ kɛnɛ mɛlɛkɛ ye. 15 O de kosɔn, ni Sitanɛ ka baarakɛlaw ye u cogo yɛlɛma ka kɛ tilennenya baarakɛlaw ye, o fana tɛ kabako ye. U laban na kɛɲɛ ni u ka kɛwalew ye. 16 Ne bɛ segin a kan tun ko mɔgɔ si kana ne jate hakilintan ye. Nka ni aw bɛ ne jate ten, a’ye ne minɛ i ko hakilintan, walisa ne fana ka ne yɛrɛ bonya dɔɔnin. 17 Ne bɛna min fɔ sisan, ne tɛ o fɔ Matigi cogo la, nka ne jo don ka ne yɛrɛ bonya. O de la ne na kuma i ko hakilintan. 18 Mɔgɔ caman bɛ u yɛrɛw bonya nin diɲɛ kow la, ne fana na ne yɛrɛ bonya. 19 Aw bɛ sɔn ka hakilintanw ka kow muɲu, katuguni aw yɛrɛw ye hakilitigiw ye! 20 Ni mɔgɔw bɛ aw kɛ jɔnw ye, walima ka aw bolofɛnw minɛ aw la, wala ka aw tɔɲɔ, wala ka waso aw la, wala ka u tɛgɛ ci aw ɲɛ kan, aw bɛ o muɲu. 21 Ne bɛ min fɔ, ne bɛ maloya o la, ko: An ye barikantanya de jira! O bɛɛ n’a ta, ni mɔgɔ dɔ b’a ja gɛlɛya k’a yɛrɛ bonya ko dɔ la, ne fana bɛ ne ja gɛlɛya ka o kɛ. Halibi, ne bɛ kuma i ko hakilintan. 22 Olu ye Hɛburuw ye wa? Ne fana y’o ye. Olu ye Israɛl siya dɔw ye wa? Ne fana ye o dɔ ye. Olu ye Ibrahima bɔnsɔn dɔw ye wa? Ne fana ye o dɔ ye. 23 Olu ye Krisita ka baarakɛlaw ye wa? Ne y’o ye ka tɛmɛn olu kan. Ne bɛ kuma i ko hakilintan. Ne ye baara kɛ ka tɛmɛn olu kan. Ne bilara kaso la ko caman ka tɛmɛn olu kan. Ne bugɔra kosɛbɛ ka tɛmɛn olu kan. Ne tun bɛ saya da la siɲɛ caman. 24 Yahutuw ye gɛɲɛ ɲɛ bisaba ni kɔnɔntɔn kɛ ne la siɲɛ duuru. 25 Ne bugɔra ni berew ye Romɛkaw fɛ siɲɛ saba. Ne bonna ni kabakurunw ye siɲɛ kelen, walisa ne ka faga. Ji kan kurun tiɲɛna ni ne ye siɲɛ saba. Ne ye tile kelen ni su kelen kɛ kɔgɔji la. 26 Ne ye dugutaa caman kɛ. Ne tun bɛ farati la bajiw kan. Ne tun bɛ farati la binkannikɛlaw cɛma. Ne tun bɛ farati la ne yɛrɛ siya cɛma ani siya wɛrɛw cɛma. Ne tun bɛ farati la dugu kɔnɔ, ani kungokolon kɔnɔ. Ne tun bɛ farati la kɔgɔji kan. Ne tun bɛ farati la balima nkalontigɛlaw cɛma. 27 Ne tun bɛ baara gɛlɛn ni sɛgɛn la. Ne sira ɲɛ na ko caman. Kɔngɔ ni minnɔgɔ ye ne minɛ. Ne tora kɔngɔ bolo ko caman. Ne tɔɔrɔla nɛnɛ ni fɛɛrɛ fɛ. 28 Ka fara o kɛnɛkan kow bɛɛ kan, egilisiw bɛɛ hami bɛ ne la don o don. 29 Ni mɔgɔ dɔ barika ka dɔgɔ, ne barika bɛ dɔgɔya o fɛ fana. Ni mɔgɔ dɔ kunnatiɲɛna, o bɛ digi ne la fana. 30 Ni ne ka kan ka ne yɛrɛ bonya, ne na ne yɛrɛ bonya ne ka barikantanya kow de la. 31 Matigi Yesu Fa Ala ka tanu badaa-badaa! Ale y’a dɔn ko ne tɛ nkalon tigɛ. 32 Ka ne to Damasi, masakɛ Arɛtasi ka gɔfɛrɛnɛrɛ ye dugu dondaw kɔlɔsi walisa a ka ne minɛ, 33 nka ne lajiginna saba kɔnɔ ni jurukisɛw ye finɛtiri fɛ dugu lamini kogo kɔfɛ. Ne kisira ka bɔ a bolo ten.
121 Yɛrɛbonyali ye wajibi ye, nka nafa t’a la. O bɛɛ n’a ta ne ye jiralifɛn minnu ye ka dɔnniya min sɔrɔ ka bɔ Matigi fɛ, ne da bɛna se olu ma sisan. 2 Ne bɛ Krisita dannabaa dɔ dɔn, o tufara ka taa sankolo sabanan la, a san tan ni naani filɛ nin ye. Ni a yɛrɛ taara yen, wala ni a ye jiralifɛn dɔ ye, ne ma o dɔn, Ala de bɛ o dɔn. 3 Ɔwɔ, ne y’a dɔn ko o mɔgɔ tufara ka taa alijɛnɛ la. Halibi ne m’a dɔn yala ni a yɛrɛ taara yen, wala ni a ye jiralifɛn dɔ ye, Ala de bɛ o dɔn. 4 A ye kumaw mɛn, mɔgɔ tɛ se ka segin u kan. A ma daga mɔgɔ ye ka u fɔ fana. 5 Ne na ne yɛrɛ bonya o ɲɔgɔn mɔgɔ ko la, nka ne tɛna ne yɛrɛ bonya ne ko la, fɔ ka ne ka barikantanya kow fɔ. 6 Hali ni ne b’a fɛ ka ne yɛrɛ bonya, ne tɛna kɛ hakilintan ye, sabu ne na tiɲɛ fɔ. Nka ne na ne yɛrɛ bonyali ko to yen, walisa mɔgɔ bɛ ne ye cogo min na, ka min mɛn ne ko la, a kana ne jate ka tɛmɛn o kan. 7 O bɛɛ n’a ta, walisa ne kana na kuncɛbaya kɛ o jiralifɛnw kosɔn, ɛɔni dɔ donna ne farikolo la, o kɛra Sitanɛ ka ciden ye ka ne tɔɔrɔ walisa ne kana na kuncɛbaya kɛ. 8 Ne ye Matigi deli o ko la siɲɛ saba ko a ka o mabɔ ne la. 9 Nka a ye ne jaabi ko a ka nɛɛma na ne bɔ, k’a masɔrɔ a ka sebaaya bɛ jira k’a jɛya barikantanya de la. Ayiwa ne bɛ sɔn kosɛbɛ ka ne yɛrɛ bonya ne ka barikantanya kow la ka tɛmɛn fɛnw bɛɛ kan, walisa Krisita ka sebaaya ka to ne kan. 10 O de kosɔn barikantanya kow ni neniliw ni mago fɛnntanya ni tɔɔrɔ ani sɛgɛn Krisita kosɔn, olu bɛɛ ka di ne ye, k’a masɔrɔ ne ye barikantan ye tuma min na, o b’a sɔrɔ ne ye barikama de ye. 11 Ne tun bɛ kuma i ko hakilintan, nka aw ye ne wajibiya o la, k’a sɔrɔ ne tɔgɔ ɲuman fɔbaaw tun ka kan ka kɛ aw de ye. Hali ni ne tɛ foyi ye, ne man dɔgɔ ni o ciden fisamaw ye cogo si la. 12 Tiɲɛ la, kɛwale minnu b’a jira ko ne ye ciden ye, olu jirala aw la ni muɲuli bɛɛ ye. Olu kɛra taamashyɛnw ni kabakow ni kɛwale barikamaw ye. 13 Egilisi wɛrɛw dun fisayara ni aw ye mun ko la, fɔ nin ko kelen, ko ne ma sɔn aw ka ne doni ta? Aw ka o ko yafa ne ma. 14 A filɛ, ne labɛnnen don sisan ka ne taa ko sabanan kɛ aw yɔrɔ. Ne tɛna kɛ aw ka doni ye nin sen in na fana, katuguni ne tɛ aw bolofɛnw ɲini, fɔ aw yɛrɛw. Denw man kan ka nafolo lajɛ u bangebaaw ye, bangebaaw de ka kan ka nafolo lajɛ u denw ye. 15 A ka di ne ye ka ne bolofɛnw bɛɛ di aw kosɔn ani ne yɛrɛ fana. Ni ne bɛ aw kanu ka ta’a fɛ, ne kanuya bɛ dogoya aw la wa? 16 Aw n’a fɔ ko ne ma kɛ aw si ka doni ye, sɔsɔli tɛ o la, nka aw dɔw n’a fɔ ko ne tun ka kegun, ko ne ye aw minɛ ni keguya ye. 17 Ne ye minnu ci ka taa aw fɛ yen, yala ne ye tɔnɔ sɔrɔ aw la olu dɔ fɛ wa? 18 Ne ye Tite deli ko a ka taa aw yɔrɔ. Ne ye an balimakɛ bila ka taa a fɛ. Yala Tite ye tɔnɔ sɔrɔ aw la wa? Ne ni ale ka kɛtaw ma kɛ ni miirili kelen ye wa? An taama cogo ma kɛ kelen ye wa? 19 Kabini tuma jan aw bɛ miiri ko an bɛ jo di an yɛrɛw ma aw ɲɛ kɔrɔ, nka o tɛ. An bɛ kuma Ala ɲɛ kɔrɔ Krisita la. Balima kanulenw, an bɛ o bɛɛ fɔ aw ka nafa sɔrɔli kama. 20 Ne bɛ siran ko, ni ne sera aw fɛ yen, ne t’a fɛ ka aw sɔrɔ cogo min na, ko ne na aw sɔrɔ ten, ani aw fana t’a fɛ ka ne sɔrɔ cogo min na, ko aw na ne sɔrɔ ten. Ne bɛ siran ko ne n’a sɔrɔ ko kɛlɛ bɛ aw cɛma, ani keleya ni dusu bɔ ni bila ɲɔgɔn na kow, ani tɔgɔ tiɲɛni ni dajukɔrɔ kumaw, ni kuncɛbaya ani wɔyɔ kow. 21 Ne bɛ siran ko ne selen aw fɛ yen, Ala kana na ne majigin aw ɲɛ kɔrɔ, ko mɔgɔ caman minnu ye jurumu kɛ ka ban, ni u ma nimisa u ka nɔgɔlenya ni u ka kakalaya ani u ka ko jugu dama tɛmɛnnenw na, ne kana na kasi olu kosɔn.
131 Nin na kɛ ne taa ko sabanan ye aw fɛ yen. «Ko bɛɛ na ɲɛnabɔ ka kɛɲɛ ni seere fila wala seere saba dala kuma ye.» 2 Minnu ye jurumu kɛ ka ban ani mɔgɔ tɔw bɛɛ, ne bɛ olu lasɔmi hali k’a sɔrɔ ne tɛ yen, i ko ne tun y’a fɔ olu ye ne taa ko filanan la cogo min na, ko: Ne bɛ kɔsegin tuma min na, ne tɛna mɔgɔ si malasa. 3 O tuma la aw bɛ taamashyɛn min ɲini ko Krisita bɛ kuma ne da la, aw na o ye. Krisita barika man dɔgɔ aw ta fan fɛ, nka a bɛ a ka sebaaya jira aw cɛma. 4 Tiɲɛ don, a gengenna jiri la a ka barikantanya la, nka a ɲɛnama don sisan Ala ka sebaaya barika la. An fana ye barikantanw ye ale la, nka an na ɲɛnamaya ale fɛ aw ta fan fɛ, Ala ka sebaaya barika la. 5 A’ ye aw yɛrɛw sɛgɛsɛgɛ ka aw yɛrɛw kɔrɔbɔ k’a filɛ yala ni aw bɛ dannaya sira kan. Aw m’a dɔn aw yɛrɛw ta fan fɛ ko Yesu Krisita bɛ aw kɔnɔ wa? fɔ ni a y’a sɔrɔ ko ban kɛra aw la. 6 Nka an jigi b’a kan ko aw n’a dɔn ko ban ma kɛ an na. 7 O bɛɛ n’a ta, an bɛ Ala deli ko aw kana ko jugu kɛ. O kun tɛ ko an tɔgɔ ɲuman ka fɔ, nka walisa aw ka ko ɲuman kɛ, hali ni an kɛra i ko ban kɛra an na. 8 K’a masɔrɔ se si tɛ an ye ka tiɲɛ kɛlɛ, fɔ ka tiɲɛ dɛmɛ. 9 Ni an kɛra barikantanw ye k’a sɔrɔ aw barika ka bon tuma min na, an bɛ ɲagali o la. An bɛ min deli Ala fɛ fana, o filɛ nin ye, ko aw ka dafa. 10 O de kosɔn ne bɛ nin sɛbɛn ci k’a sɔrɔ ne tɛ aw fɛ yen, walisa ne mana se yen tuma min na, ne kana ko ɲɛnabɔ ni gɛlɛya ye, ka kɛɲɛ ni Matigi ka fanga dilen ye ne ma. O fanga di kun ye aw nafa sɔrɔli ye, o ma di tiɲɛni kama. 11 Ayiwa sisan, balimaw, ka aw ni hɛrɛ bɛn. Aw ka dafa, ka ɲɔgɔn jija, ka miirili kelen kɛ, ka to hɛrɛ la ɲɔgɔn fɛ. N’o kɛra, kanuyatigi ni hɛrɛtigi Ala na to aw fɛ. 12 A’ ye ɲɔgɔn fo ni da susuli senuma ye. Ala ka mɔgɔ senumaw bɛɛ bɛ aw fo. 13 Matigi Yesu Krisita ka nɛɛma ni Ala ka kanuya ani Ni Senu ka jɛɲɔgɔnya ka kɛ aw bɛɛ fɛ.