1 TESALONIKEKAW

1 TESALONIKEKAW

¹ Ne Paul ni Silvɛn ani Timote bɛ nin sɛbɛn ci Tesalonike egilisi ma, aw minnu bɛ Fa Ala ni Matigi Yesu Krisita la. Ala ka nɛɛma ni dususuma di aw ma. ² An bɛ barika da Ala ye aw bɛɛ kosɔn tuma bɛɛ, ka aw ko fɔ an ka deliliw la. ³ Aw ka dannaya y’i jira ni kɛwalew ye, ka aw ka kanuya jira ni baaraba ye, ani aw jigi sigilen bɛ an Matigi Yesu Krisita kan cogo min na, an bɛ miiri o bɛɛ la an Fa Ala ɲɛ kɔrɔ tuma bɛɛ. ⁴ An y’a dɔn, balima kanulenw Ala fɛ, ko Ala ye aw ɲɛnatɔmɔ ka kɛ a yɛrɛ taw ye, ⁵ katuguni an ka Kibaru Duman ma se aw ma ni kuma dɔrɔn ye, nka a sera aw ma ni sebaaya fana ye Ni Senu barika la, an tun bɛ o dɔn k’a jɛya. An tun bɛ taama aw cɛma aw nafa kosɔn cogo min na, aw yɛrɛw bɛ o dɔn. ⁶ Aw kɛra an ladegebaaw ye ani Matigi ladegebaaw fana, k’a masɔrɔ aw sɔnna Ala ka kuma ma tuma min na, aw tɔɔrɔla o kosɔn kojugu. Hali o, aw nisɔndiyara kosɛbɛ Ni Senu barika la. ⁷ Aw kɛra ɲɛjirabaaw ye Masedwanɛ ni Akayi jamanaw dannabaaw bɛɛ la. ⁸ Matigi ka kuma fɔra aw fɛ k’a jɛya, Masedwanɛ ni Akayi dama tɛ, nka aw ka dannaya Ala la, o kibaru fɔra yɔrɔ bɛɛ la. O de y’a to an yɛrɛw man kan ka foyi fɔ o ko la. ⁹ Aw ye an minɛ cogo min na, u yɛrɛw bɛ o lakali ko aw sɔnna Ala ma ka fara boliw la ka baara kɛ Ala sɛbɛ ɲɛnama ye, ¹⁰ ka a Denkɛ Yesu makɔnɔ ka bɔ sankolo la, Ala ye o lakunun ka bɔ suw cɛma, o ye an tila Ala ka diminya nata la.

¹ Aw yɛrɛw y’a dɔn, balimaw, ko an ye taali min kɛ aw fɛ yen, o ma kɛ fu. ² Aw y’a dɔn ko an tɔɔrɔla ka lagosi Filipe, nka o kɔ, Ala ye an ja gɛlɛya ka a ka Kibaru Duman fɔ aw ye, hali k’a sɔrɔ mɔgɔw tun b’a fɛ ka an bali. ³ Filili tun tɛ an ka waajuli kuma la, nɔgɔlenya ni nanbara fana tun t’a la, ⁴ nka Ala y’a jate ko a bɛnnen bɛ ka Kibaru Duman kalifa an ma, o de kosɔn an bɛ kuma. An tɛ kuma ka an ko diya mɔgɔw ye, fɔ Ala, o de bɛ an dusukunw sɛgɛsɛgɛ. ⁵ Aw y’a dɔn ko an ma kuma nugulen fɔ tuma si. Wasabaliya dogolen tun tɛ an na fana, Ala ye o seere ye. ⁶ An ma bonyali ɲini mɔgɔ si fɛ, aw fɛ wala mɔgɔ wɛrɛw fɛ. O bɛɛ n’a ta, an minnu ye Krisita ka cidenw ye, an tun bɛ se ka o bonya ɲini aw fɛ. ⁷ Nka an sabalilen tun don aw cɛma, i ko denbatigi bɛ a yɛrɛ denw mara cogo min na. ⁸ O dama tɛ, an tun bɛ aw kanu kosɛbɛ, o de kosɔn an labɛnnen tun don ka Ala ka Kibaru Duman di aw ma, hali an niw yɛrɛ, katuguni aw ko diyara an ye kosɛbɛ. ⁹ Balimaw, aw hakili bɛ an ka baara ni an sɛgɛn cogo la, ko an ye baara kɛ su fara tile kan, walisa an kana kɛ aw si ka doni ye k’an to Ala ka Kibaru Duman fɔli la aw ye. ¹⁰ Aw ni Ala ye an seerew ye ko an taama cogo jɛlen, tilennen, jalakibali tun don aw dannabaaw ta fan fɛ. ¹¹ Aw y’a dɔn fana ko an kɛra aw bɛɛ kelen-kelen fɛ i ko fa bɛ a denw fɛ cogo min na. ¹² An ye aw waaju ka aw dusuw saalo. An ye aw jija ko aw ka taama cogo bɛnnen na Ala ɲɛ kɔrɔ, o min bɛ aw wele ka don a ka masaya ni a ka nɔɔrɔ la. ¹³ O de y’a to an bɛ barika da Ala ye tuma bɛɛ nin kosɔn, ko an ye Ala ka kuma fɔ aw ye tuma min na, aw y’a lamɛn, k’a minɛ i ko Ala ka kuma. Aw ma a jate mɔgɔ ka kuma ye. Tiɲɛ la Ala ka kuma yɛrɛ don. A bɛ baara kɛ aw dannabaaw kɔnɔ. ¹⁴ Balimaw, Ala ka egilisi minnu bɛ Krisita Yesu la Jude jamana la, aw kɛra olu ladegebaaw ye, katuguni Yahutuw ye yen dannabaaw tɔɔrɔ cogo min na, aw yɛrɛw siya ye aw tɔɔrɔ o cogo de la. ¹⁵ O Yahutuw ye Matigi Yesu faga, ka kiraw faga, ka tugu an fana nɔfɛ ka an tɔɔrɔ. U ko man di Ala ye, u ye mɔgɔw bɛɛ juguw ye. ¹⁶ U bɛ an bali ka Ala ka kisili kuma fɔ siya wɛrɛw ye. U bɛ to ka dɔ fara u ka jurumu dama kan tuma bɛɛ, nka Ala ka diminya dafalen binna u kan. ¹⁷ Balimaw, an kɔni farala aw la waati dɔɔnin ɲɛda la, nka an ma fara aw la dusukun na. Aw yeli nege tun bɛ an na, fo an ye an se ko bɛɛ kɛ ko an bɛ taa aw yɔrɔ. ¹⁸ An tun b’a fɛ ka kɔsegin aw fɛ yen, ne Paul yɛrɛ ye a lajɛ siɲɛ kelen dama tɛ, nka Sitanɛ ye an bali o la. ¹⁹ Jɔni ye an jigi ni an nisɔndiya sababu ani an ka kunnajala ye? O tɛ aw ye an Matigi Yesu ɲɛ kɔrɔ a na tuma la wa? ²⁰ Ɔwɔ, aw de ye an ka kunnajala ni an nisɔndiya sababu ye.

¹ An ma se ka sigi ka o makɔnɔ tun, o de y’a to an y’a latigɛ ko an ka to an dan na Atɛnɛ ² ka Timote ci ka taa aw fɛ yen. An balimakɛ ani Ala ka baarakɛla ni an baarakɛɲɔgɔn don Krisita Kibaru Duman fɔli la. An y’a ci walisa a ka aw sabati ka aw ja gɛlɛya aw ka dannaya la, ³ walisa aw si kana yɛrɛyɛrɛ sisan tɔɔrɔw kosɔn. Aw yɛrɛw y’a dɔn ko a latigɛra ko an na o tɔɔrɔ sɔrɔ. ⁴ Ka an to aw fɛ yen, an tun bɛ to k’a fɔ aw ye ko an na tɔɔrɔ sɔrɔ. A fana kɛra ten, aw y’o dɔn. ⁵ O de y’a to ne kɔrɔtɔlen tun don fo ne ye ci bila ka taa ka aw ka dannaya cogo dɔn. Ne tun bɛ siran ko a kana na sɔrɔ ko Sitanɛ ye aw nɛgɛn, ani ko an ka baara kɛra fu. ⁶ Sisan kɔni, Timote kɔseginna ka bɔ aw yɔrɔ ka kibaru ɲuman fɔ an ye aw ka dannaya ni aw ka kanuya ko la. A y’a fɔ an ye ko aw ka miiriliw b’a jira ko an ko ka di aw ye ani ko aw b’a fɛ kosɛbɛ ka an ye, i ko an fana b’a fɛ ka aw ye cogo min na. ⁷ O cogo la balimaw, k’an to an ka sɛgɛn ni an ka tɔɔrɔ kow bɛɛ la, an dusu saalola aw ko la aw ka dannaya kosɔn. ⁸ Sisan, k’a sɔrɔ aw banbalen tora an Matigi la, sɛbɛ la an bɛ ɲɛnamaya. ⁹ An bɛ se ka barika bɛnnen da Ala ye aw ko la cogo di, an ka ɲagaliba kosɔn aw ko la an ka Ala ɲɛ kɔrɔ? ¹⁰ An bɛ to ka Ala deli ni misɛnya ye su fara tile kan, ko an ka aw ye ko kura ɲɛda ni ɲɛda, ani min dɛsɛra aw ka dannaya la, an ka o dafa. ¹¹ An Fa Ala yɛrɛ ani an Matigi Yesu ka an ka taama ko ɲɛnabɔ ka taa aw fɛ yen. ¹² Matigi ka aw ka kanuya barika bonya ka ta’a fɛ aw ni ɲɔgɔn cɛ ani aw ni mɔgɔw bɛɛ cɛ, i ko an fana bɛ aw kanu cogo min na, ¹³ walisa a ka aw dusukunw sabati ka u kɛ jalakibali saniyalenw ye an Fa Ala ɲɛ kɔrɔ an Matigi Yesu na tuma la ni a ka mɔgɔ senumaw bɛɛ ye.

¹ Ayiwa balimaw, aw ka kan ka taama cogo min na ka aw ko diya Ala ye, an ye aw kalan o la. Tiɲɛ don, aw bɛ taama ten. Nka an bɛ aw deli ka aw laadi Matigi Yesu tɔgɔ la ko aw ka jiidi o la ka taa ɲɛ. ² An ye ci minnu fɔ aw ye Matigi Yesu barika la, aw bɛ olu dɔn. ³ Ala sago ye aw saniyali de ye, ko aw kana jatɔya kɛ. ⁴ Aw bɛɛ kelen-kelen ka se ka a farikolo minɛ senuya ni bonyali la. ⁵ Aw kana aw yɛrɛw bila kakalaya nege ko la i ko siyaw b’a kɛcogo min na, olu kɔni tɛ Ala dɔn. ⁶ Mɔgɔ si kana a balima tɔɲɔ nin ko si la, katuguni Matigi de ye o kow hakɛ bɔbaa ye, i ko an kɔnna k’a fɔ aw ye k’a jɛya cogo min na. ⁷ Ala ma an wele nɔgɔlenya kama, fɔ saniyali. ⁸ O de kosɔn min banna nin kalan ma, o tɛ ban mɔgɔ la, a bɛ ban Ala de la, o min ye a Ni Senu di aw ma. ⁹ Mɔgɔ man kan ka sɛbɛn ci aw ma balima kanuya ko la, katuguni aw yɛrɛw kalanna Ala fɛ ko aw ka ɲɔgɔn kanu. ¹⁰ Tiɲɛ don, aw bɛ taama ten balimaw bɛɛ ta fan fɛ Masedwanɛ jamana yɔrɔ bɛɛ la. Nka an bɛ aw deli balimaw, ko aw ka jiidi o la ka taa ɲɛ. ¹¹ Aw ka aw jija ka to hɛrɛ la ɲɔgɔn fɛ ka aw yɛrɛw ka kow ɲɛnabɔ, ka baara kɛ ni aw yɛrɛw bolow ye, i ko an tun y’a gɛlɛya aw ma cogo min na. ¹² O cogo la aw taama cogo na bɛn dannabaliw ɲɛ na, aw tɛna kɛ mɔgɔ si ka doni ye. ¹³ Ayiwa, balimaw, minnu sunɔgɔra, an t’a fɛ aw ka kɛ ko dɔnbaliw ye olu ta fan fɛ, walisa aw kana ɲɛnasisi i ko jigi tɛ minnu fɛ. ¹⁴ Ni an bɛ da a la ko Yesu sara ka kunun, o cogo la fana an bɛ da a la ko minnu sara ka u to Yesu la, Ala na olu lana a fɛ. ¹⁵ Ayiwa an bɛ nin fɔ aw ye ka kɛɲɛ ni Matigi ka kuma ye, ko an minnu ɲɛnama tora fo Matigi na tuma la, an tɛna kɔn o mɔgɔ salenw ɲɛ fewu, ¹⁶ k’a masɔrɔ Matigi yɛrɛ na jigin ka bɔ sankolo la ni pɛrɛnkanba ni mɛlɛkɛw kuntigi kanba ani Ala ka burukan ye. Minnu sara Krisita la, olu fɔlɔ na kunun. ¹⁷ O kɔ, an minnu ɲɛnama tora, an ni olu na tufa ka taa ɲɔgɔn fɛ sankabaw la Matigi kunbɛn yɔrɔ la fiɲɛ la. O cogo la an na to Matigi fɛ badaa-badaa! ¹⁸ Aw ka ɲɔgɔn dusu saalo ni o kuma ye.

¹ Balimaw, aw mago t’a la mɔgɔ ka sɛbɛn ci aw ma o tumaw ni o waatiw ko la, ² k’a masɔrɔ aw yɛrɛw y’a dɔn ka jɛya ko Matigi ka don bɛ na i ko nson bɛ na su fɛ cogo min na. ³ Mɔgɔw mana a fɔ ko: «Hɛrɛ, tɔɔrɔ tɛ,» o tuma la halakili na cun u kan teliya la, i ko tin bɛ muso kɔnɔma minɛ cogo min na, u tɛna kisi o ma fewu. ⁴ Nka balimaw, aw tɛ dibi la fɔ o don ka na bala aw la i ko nson. ⁵ Aw bɛɛ kɔni ye kɛnɛdenw ye, tiledenw. An tɛ su ni dibi taw ye. ⁶ O de kosɔn an kana sunɔgɔ i ko dɔw b’a kɛcogo min na, nka an ka to an ɲɛ na, an hakili kana ɲɛnamini i ko dɔlɔtɔw. ⁷ Minnu bɛ sunɔgɔ, olu bɛ sunɔgɔ su fɛ. Minnu bɛ u hakili ɲɛnamini dɔlɔ la, olu bɛ o kɛ su fɛ. ⁸ An kɔni ye tile taw ye, an hakili kana ɲɛnamini. An ka dannaya ni kanuya kɛ an ka nɛgɛdulɔki ye. Kisili jigi ka kɛ an ka nɛgɛfugula ye. ⁹ Ala ma a latigɛ ko an ka diminya sɔrɔ, fɔ kisili, an Matigi Yesu Krisita barika la. ¹⁰ O de sara an kosɔn, walisa ni an ɲɛnama don, wala ni an salen don, an ni ale ka ɲɛnamaya ɲɔgɔn fɛ. ¹¹ O de kosɔn aw ka ɲɔgɔn jija ka dɔ fara ɲɔgɔn barika kan, i ko aw b’a kɛcogo min na ka ban. ¹² Balimaw, minnu bɛ baara kɛ aw cɛma ka kɛ aw kun na Matigi la ka aw laadi, an bɛ aw deli ko aw ka olu jate. ¹³ A’ ye u bonya kosɛbɛ ka u kanu u ka baara kosɔn. Hɛrɛ ka kɛ aw ni ɲɔgɔn cɛ. ¹⁴ Minnu bɛ pirikiparaka kow kɛ, an bɛ aw deli balimaw, ko aw ka olu laadi. Minnu jigi tigɛra, a’ ye olu ja gɛlɛya, ka barikantanw dɛmɛ, ka muɲuli kɛ mɔgɔw bɛɛ ta fan fɛ. ¹⁵ A’ ye aw yɛrɛw kɔlɔsi, mɔgɔ si kana ko jugu sara ni ko jugu ye, nka aw ka tugu ko ɲuman kɛli la aw ni ɲɔgɔn cɛ, ani aw ni mɔgɔw bɛɛ cɛ tuma bɛɛ. ¹⁶ A’ ye ɲagali tuma bɛɛ. ¹⁷ Aw kana Ala delili dabila. ¹⁸ Aw ka barika da Ala ye ko bɛɛ la, katuguni o ye Ala sago ye aw ko la Krisita Yesu la. ¹⁹ Aw kana Ni Senu dufa. ²⁰ Aw kana kiraya mafiɲɛya. ²¹ A’ ye ko bɛɛ sɛgɛsɛgɛ. Min ka ɲi, aw ka o minɛ kosɛbɛ. ²² A’ ye aw yɛrɛw kɔlɔsi ko jugu sifa bɛɛ kɛli ma. ²³ Hɛrɛtigi Ala yɛrɛ ka aw yɔrɔ bɛɛ saniya ka kɛ a yɛrɛ ta ye. Aw ni, ani aw dusu ni aw farikolo, u bɛɛ lajɛlen jalakibali ka mara fo an Matigi Yesu Krisita na tuma la. ²⁴ Aw welebaa ye kantigi ye, ale de na o kɛ fana. ²⁵ Balimaw, a’ ye Ala deli an ye. ²⁶ A’ ye ɲɔgɔn fo ni da susuli senuma ye. ²⁷ Ne bɛ aw deli kosɛbɛ Matigi kosɔn, ko nin sɛbɛn ka kalan balimaw bɛɛ ɲɛ na. ²⁸ An Matigi Yesu Krisita ka nɛɛma ka kɛ aw fɛ.