Titus

Aam ro Paulus Ykom tna Tiim Mamo mo kʼTitus

Titus

Paulus ymah meen kʼTitus

¹Aam refo mbam kʼjõ Paulus, sryan ro Allah tna raabis ro Yesus Kristus. Allah ybis jõ tamo tkyas watum rAit ro ati kʼraa ro Ait ysok. Tkyas watum kʼana afo re bosmot rana matak. Feto kbe ana mhar mno bo ro bi Ait ksoh. ²Ana weto minaut mawe meen ana mhau hame wajin. Allah ja ykyas bo sioh fee. Tiwya tinyi Ait ysi yawe kbe raa wAit meen mhau hame. Yawe bo reto tiwya tinyi, wore wo yfen tabam refo fefares. ³Bi Ait tait Raa Sotak ranu. Tna oon ro Ait ysok to, Allah yerif Bokyas rAit reto kʼraa: Ait yehau Bokyas Moof reto kʼjõ tna ybis jõ tamo tkyas. ⁴Titus; jõ tkom aam refo tiim kʼnyõ. Bosmot wanu mbewok mnan anya; feto nyõ nfi ku ajõ. Jõ skabuk Bja Allah re Ait ysya Yesus Kristus, Raa Sotak ranu, matmof nyõ tna mno re nyõ nhau nhaf tnok ye.

Titus ysok raa ro mamo majelis

⁵Jõ sikba nyõ nhau akus mam sato ro Kreta mkah nisoh bo ro jemaat. Tiwya jõ tbis nyõ nsok raa ro mamo majelis mam remo wana sor. ⁶Nsok raa ro mfi fefo: Raa ro wase mber safo. Raa ro moo fnya sau aran sai. Tna ku wana to, smot Kristus tna mno-na bo fee. Tna ku wana ja mari bo ro ana mawe. ⁷Ait ro yamo majelis jemaat to, kbe yisoh jemaat ro Allah. Feto to, nsok raa ro wase mber safo. Au oh mi nsok raa ro ja mbibi ana mesait fee, kmo yoyo fee, nksoh mata anggur fee, mafa msya raa yoyo fee, tna sioh raa mkah bo saso pitis fee. ⁸Feto to nsok raa ro ja yno bo mfi fefo: Ait ksoh yitrah amah rait kʼraa. Ait ksoh yno bo moof. Ait ynaut ait kaket re yno bo ro kbik-kbak fee. Ait ja yno bo ro Allah ksoh. Ait yhau yno bo wAit sai. Tna ait yatak ybo ait yesait re yno bo moof yoyo sai. ⁹Saso tna nsok raa ro ybo watum ro Tuhan tna yerif kʼanu kaket. Afo re ait ykyas watum reto kʼraa ro jemaat. Afo re ait betoo mkah maja rau ro ati. Tna kbe yisoh mhaf rana msya bosmot rana kaket matak. Ait yhar watum ro Tuhan kaket to, kbe ait yatak yawe wa raa ro beswan-swan watum ro ati reto tna yerif iso ro moof kʼana.

¹⁰Raa ro agama Yahudi mawat to, ja mana mase tna mikyak bokyas ranu. Ana mkyas mawe, “Allah ybis yawe raa wAit beta kro bo mafa ro agama Yahudi.” Nri ana ma. Ana weto mkyas bokyas ro mafer marak. Bokyas reto besruf raa. ¹¹Nkyas kʼana nawe ana shait sai. Ana mkyas bosruf. Raa Kristen msya fnya, kukek wana baro mari bokyas rana oh. Tibyo kro bokyas wana ro mkair weto. Raa ro agama Yahudi weto mkyas bokyas feto saso pitis sai. ¹²Tiwya nabi sait ybam sato ro Kreta ykyas ana yawe:

“Raa ro Kreta to ja sioh-sah raa. Ana mno-na bo mfi fane rbyoh. Ana srak bo tna hawe boh ye.”

¹³Bokyas reto bo ati. Ait ykyas sioh fee. Feto to bhah raa jemaat nawe, “Nri bokyas mkair reto ma. Soh anu kro bo mafa ro agama Yahudi to, reto misoh bosmot ranu fee.” ¹⁴Nawe wa kʼraa Kristen weto afo re ana mari bo mna raa ro Yahudi ja mkyas to, fee. Nawe wa kʼana re kbe ana mari raa weto fee. Raa ro agama Yahudi weto, ana mikyak bokyas ro Yesus. Ana mikyak bokyas ro ati meto. ¹⁵Anu raa ro smot Yesus to, Allah ymat anu yawe anu nfi raa ro mhaf moof oh. Bo ro mbau kʼanu to aro u fee. Menohe raa taro to, smot Yesus fee. Tna mhaf mato wana mkair fares. Ana to ja mawe bo ro mbau to mawat. Ana mhau bo weto menohe mkai mafer aro fee ye. Ana mhaf mkair tna bonaut wana mkair ye. ¹⁶Ana weto mamo wan-wan mawe ana mhar Allah kaket. Menohe soh anu bmat bo ro ana mno to, anu bhar bwe ana wase bi Ait. Allah knait bo ro ana mno weto. Ana hawe mari bo ro bi Ait yawe. Ana matak mno bo ro moof aro fee.

Bo ro Allah ksoh raa wAit mno

¹Titus; nkyas bokyas ro Allah, maja rau kaket. ²Nkyas kʼraa sme ro mabi nawe, “Nbo anu nesait kaket re nno bo ro moof yoyo sai. Nno bo moof afo re raa beta heyut anu. Nnaut anu re nno-na bo ma. Nbo watum ro Tuhan, maja rau kaket. Natmof raa. Tna nros ntak smot bi Ait mam wore wo arin mkair.” ³Feto ye, nkyas kʼfnya ro mabi nawe, “Nhau to, nno bo ro Allah wAit sai. Ntoo raa ma. Nksoh nta anggur to ma. Nkyas bo kʼraa to, betoo bo ro moof.” ⁴Nkyas feto kʼfnya ro mabi. Tna kbe ana mkyas bo moof kʼfnya ro tna mawe, “Natmof naa msya ku mkek wanu. ⁵Nnaut anu re nno-na bo ma. Nhau to nto mboh. Nisoh amah wanu moof. Nno bo moof kʼraa. Tna nasu heyut naa.” Soh fnya mno bo ro moof weto beta to, kbe raa mmat. Kbe ana mhar mawe anu ro kro Bokyas ro Allah, ja bno bo ro moof sai. Tna kbe ana mkyas-kas anu fee.

⁶Feto ye sobu ku sme ro tna nawe, “Nhau to, nno bo ro kbik-kbak ma.” ⁷Titus; rau ro ati to, nyõ nesait nno bo ro moof beta. Afo re raa mmat bo ro nyõ nno moof to, mawe mno mfi nyõ nno feto ye. Nkyas watum ro Tuhan to, maja rau kaket. ⁸Nkyas bo ro moof. Nkyas feto tna kbe raa ro knait anu to, mmat he anu bno bo ro mkair-kar aro fee. Tibyo ana weto hrenaut.

⁹Nkyas kʼsrian boh sor nawe, “Nri bombra beta ro bobot wanu mbis mawe. Ne nkyas si ma. Tna kbe bobot wanu ksoh anu, sryan ro Kristen. ¹⁰Niswak bo ma. Nhau nhaf wanu ntrot sai. Tna kbe bobot wanu mhar mawe anu ja nno bo ro moof sai. Soh anu nno feto to, kbe raa ro mmat anu ksoh mhar watum ro Allah ye. Ksoh mhar Raa Sotak ranu ye.”

¹¹Tiwya Allah yatmof anu tibyo ybis Yesus yama. Yno feto afo re raa beta mhar boatmof rAit. Re kbe ana mkai riof rAit ro mase. ¹²Ait yerif iso ro moof kʼanu afo re anu bno bo ro bi Ait ksoh. Anu saso bo ro tabam refo to, mnan oh. Anu bnaut boatmof rAit reto bwe beak bo ro mkair weto to. Tna boatmof rAit mno anu bnaut anu re bno-na bo fee. Anu fo ja wase bber safo ye. Anu bhau mam tabam refo fo bno bo ro Allah ksoh. Boatmof ro Allah reto mno anu fri mafer mawat oh meto. ¹³Meen anu bhau hame. Anu bkah simaut mase sne wore wono. Ati reto kbe anu bmat bo yase ro Allah rAit. Kbe bmat Raa Sotak ranu Yesus Kristus yama. ¹⁴Tiwya Yesus yoo yabo rAit yee raa mame mfi bofes. Yno afo re yoo riof yee kʼanu ro ja bno iro. Ait yno anu bhaf wanu moof. Tibyo anu bmo raa mana rAit. Anu fo raa ro ksoh bno bo ro moof. ¹⁵Titus; nkyas bo refo beta kʼjemaat. Nbo ana susu afo re ana mari mno bo refo. Nkyas bo moof kʼana afo re ana smot Tuhan kaket. Tna nawe wa kʼana ro hawe mari mno. Nyõ nase nno feto. Nno afo re kbe raa aro miwana nyõ fee.

Paulus ykyas bo ro tis

¹Titus; nbis raa jemaat reto nawe, “Nri pemerintah msya raa mase ro mbo anu mam tabam refo. Nno bo ro ana mawe. Nhau siwyan re nsen nno bombra ro moof. ²Mbat-bat raa ma. Ngko-ngkat anya ma. Niranya nsya raa mkah nhaf ro sneh sai.” ³Tiwya anu bhar Yesus fefares to, anu wase bo ye: Anu bri bo ro raa mawe fee. Tii raa besruf anu ye. Anu srau wanu oot-oot bo ro tabam refo aro rau-rau. Tna bo weto mkyar anu. Tii weto to anu saim-sam bo ro mkair mai kʼraa. Tna baam bo raa. Raa knait anu. Tna anu knait anya ye. ⁴Anu bhaf wanu mkair feto, mamo snok mam ayõ ro Allah yerif boatmof rAit kʼanu. Ait yatmof anu. Tna Ait yamo Raa Sotak ranu. ⁵Bi Ait yoo riof yee kʼanu. Anu tiwya bno bo moof kʼAit wia fee. Bi Ait ksoh rAit sai oh mi Ait yatmof anu. Ait yyon iro wanu mkah Har rAit. Tna Har rAit mno anu brok boof. Anu bfi ku rAit ro Har rAit msair mkah bhaf ro moof. Anu bfi ku mees ro fnya mabe tna. ⁶Allah yno bo mninon kʼanu. Ait ybis Yesus Kristus, Raa Sotak ranu yama. Yesus Kristus sotak anu, tibyo Allah yoo Har rAit yse kʼanu. ⁷Anu raa ro bno bo mkair menohe Ait yatmof anu yawe anu bfi ku wAit ro wase mber safo. Yno feto afo re anu bmo ku wAit. Afo re anu binaut bwe kbe ysan roon ro hame kʼanu. ⁸Bokyas riwai reto to, bo ati. Nkyas bokyas reto kʼraa jemaat. Nkyas kaket afo re raa ro smot Allah kbe tomer mno bo ro moof to kaket. Awya sai ro mari bokyas refo tna mbo mno to, kbe fri mafer moof. ⁹Raa taro hre santri bo ro mafer marak, mfi bokyas mair ro raa mabe ana (silsilah). Tna raa taro hre mkyas agama Yahudi msya Watum ro Musa ykom. Bokyas rana reto mno raa saso-sasa tna mno raa mmak. Nri bokyas rana reto ma. Bokyas reto mafer marak-arak sai. ¹⁰Soh raa jemaat aro yisti bo re raa brir-brar mam jemaat to, bhah ait. Bhah ait muhrin sau snok ro mun ewok to. Tna soh ait yari bo ro nyõ nkyas fee, nawe wa raa ro Kristen me miranya msya ait ma. ¹¹Ait retait yno iro meto, yamo tit yno-na bo sai. Yhar iro ro yno to misti re kbe ait ykai bo, menohe ait beroh yno fares.

¹²Nhau mam sato ro Kreta tno wea. Kbe jõ tbis Artemas soh mfe to Tikhikus yama yo kʼnyõ. Ait snok to, nyõ safto nama no kʼjõ mam remo ro Nikopolis. Kbe tamoʼt remo reto thau mamo snok wore wo hwyõm. ¹³Zenas, ro yhar hukum retait, ysya Apolos to, mbewok masen sikba ⌞Kreta⌟ ye. Nisoh ana kaket mkah iso ro ana mbewok mamo to, re kbe ana mbewok bo marak mam iso ma. ¹⁴Jõ ksoh tawe raa wanu mur-mur mno bo moof. Feto kbe ana mmat raa anya tna moo bo mee kʼraa ro bo marak. Ana mno feto, kbe mamos rana mafer moof.

Paulus ymah meen

¹⁵Raa beta ro mhau msya jõ mam befo mmah meen kʼnyõ. Amu nmah meen kʼraa Kristen ro matmof anu. Tna jõ skabuk Tuhan afo re Ait yatmof anu beta.