Roma

Aam ro Paulus Ykom tna Tiim Mamoʼt Jemaat ro

Roma

Paulus ymah meen kʼraa ro smot Yesus mam kota ro Roma

¹Aam refo mbam kʼjõ, Paulus. Jõ tamo sryan ro Kristus Yesus. Tiwya Allah ytu jõ yawe tamo raabis rAit. Ysok jõ yse hayah yawe kbe tno bo wAit. Au oh mi tamo tkyas Bokyas Moof ro Allah. ²Bokyas ro Moof reto, tiwya Allah ysi yawe kbe ykyas kʼraa ro tabam refo. Tinyi ybis nabi wAit mama mkom Bokyas ro Moof reto mam watum rAit wia. Mkom bokyas reto mam wore wo Yesus yarak fares. ³Bokyas ro Moof reto mkyas Yesus, Ku ro Allah yare. Ait fi Allah yare oh tna haberek yamo raa tu ye. Yusuf, ro tiwya ytos Yesus mam wore yhau mam tabam refo to, ait retait ybam kube ro raja Daud.1:3 Nmat Matius 1:1-16. Raa mkom Yesus hohos wAit mamyot raa. Mkom mamo snok Yusuf. Yusuf ait yabe Yesus to fee. Feto oh mi raa mkom mawe ait yfain Maria ro mabe Yesus. Feto to raa mawe Yesus tait ybam kube ro raja Daud ye. ⁴Yhau yamo snok Ait yabi. Tna raa mame yajat. Tna Allah yno Ait yrok yasen mamyot matak Har ro Allah. Allah yno Yesus yrok yasen afo re raa beta mhar mawe Yesus Kristus tait raa tu sai fee. Yno feto yerif yawe Tuhan ranu retait yfi Allah ye. Yamo Ku ro Allah yare metait. ⁵Tna mkah bo ro Yesus yno oh mi Allah yatmof jõ. Yatmof jõ re tamo raabis (rasul) ro Allah tna tkyas yasom rAit kʼraa makin ro mhau mne, ana ro agama Yahudi fee. Jõ tasen tamo to kʼana ro mne weto tna ttu ana re kbe ana mama smot Kristus. Re kbe ana smot, tibyo mari bo ro Ait yawe, mbo mno kaket. Tis rau to, kbe raa mmat bo ro ana weto mno tna raa weto mama bibi Yesus ye. ⁶Anu ro Roma ye nsya raa roto taro ro mhau mne ye to, Allah ytu anu yawe nmo raa ro kro Yesus Kristus. ⁷Taja, tme, tao, tano na ro nhau mam kota ro Roma; jõ tkom aam refo tiim mamoʼt kʼanu ro Allah ytu nmo raa wAit oh. Allah yhafri anu beta. Jõ skabuk kʼanu Bja Allah, re Ait ysya Tuhan Yesus Kristus kbe matmof anu tna mno re anu nhau nhaf tnok sai.

Paulus yawe yamoʼt Roma

⁸Anu ro jemaat Roma smot Yesus matak oh. Tna raa ro tabam arin aso beta mari oh, tna mkyas bosmot ranu refo. Tibyo mam tinyi rau fo, jõ tayoh asik mase kʼbi Allah mam Yesus Kristus yasom: ⁹Jõ mur-mur tno bo ro Allah yawe tna tkyas Bokyas Moof ro Ku rAit, Yesus. Tna Ait yhar yawe ati ro jõ skabuk to jõ skabuk anu yoyo ye. ¹⁰Jõ skabuk re kbe jõ tama to kʼanu. Tiwya ooh-oh jõ tawe tama to kʼanu. Tna soh Ait ksoh to, kbe jõ tama tmat anu. ¹¹Jõ ksoh toni tawe tama to kʼanu. Tawe tama re kbe tinyan bouum ro mbam Har ro Tuhan (karunia). Tna kbe bouum reto mno re anu nros ntak smot Allah kaket. ¹²Au oh mi jõ tama to kʼanu to, kbe bosmot ajõ mno bosmot wanu mo matak. Tna kbe bosmot wanu mno bosmot ajõ mo matak ye. ¹³Tiwya ooh-oh jõ tawe tama to kʼanu. Menohe bo mburut wa jõ. Jõ tawe tama tkai make aro mam Roma beto. Anu to, nbam raa mana ro Yahudi fee. Tiwya jõ tamoʼt remo roto tkyas bo kʼraa ro wase agama Yahudi ye. Tna tkai make aro mam wore weto. Tna mfo refo jõ tawe tama to kʼanu feto ye. ¹⁴Allah ybis jõ tamo tkyas Bokyas Moof refo kʼraa mana roto makin. Yawe tamo tkyas kʼana ro mkyas bo mkah mai ro Yunani ye tna ro mkyas bo mkah mai roto ye, kʼana ro mhar bo ye tna ro wase bo to ye. ¹⁵Reto oh mi jõ ksoh tama tkyas Bokyas Moof ro Yesus refo kʼanu ro nhau mam Roma ye.

Injil matak moo riof ro mase mee kʼraa

¹⁶Allah yno re Bokyas Moof ro Yesus reto to, matak moo riof ro mase mee kʼraa. Thar mafer rau reto tibyo jõ ksoh tamo tkyas Bokyas reto. Jõ twaa fee. Awya ro yari Bokyas reto tibyo smot Yesus to, kbe ykai riof: Tinyi rau to, raa mbam raa mana ro Yahudi, tna msya raa mbam raa mana roto makin ye. ¹⁷Tna Bokyas Moof reto to, mafer moof. Bokyas ro Moof reto mbetoo iso ro raa mkai riof. Mkyas mawe, kbe raa smot Yesus wia tibyo Allah ymat mees rAit yawe ana mfi raa ro mhaf moof ati. Iso ro bosmot reto sau aran. Au oh mi Bokom ro Allah mkyas mawe,

“Raa ro smot Allah oh mi raa ro Ait yawe ana mfi raa ro mhaf moof ati. Feto kbe ana mhau mroon.”

Habakuk 2:4

Raa aro fee mesait mrok mhaf moof ati

¹⁸Tna mafer Bokyas ro Moof reto sau naut ye: Bokyas reto mkyas mawe Allah kmo raa ye. Allah yhau mam sawro rAit tna ymat raa ro mno iro to, tibyo kmo ana beta. Raa mno iro mai kʼAit tna mai kʼraa anya ye tibyo Ait kmo ana weto. Bo ro ana mno mkair reto mberkait bo ati ro mbam kʼAllah. Tibyo Ait yoo safo mana ymit kʼana weto. ¹⁹Allah yerif bo rAit ro ati to kʼana oh. Ana beta mhar bo ro ati mbam kʼAllah reto oh. ²⁰Ti tinyi rau tabam refo Allah yfen. Tna mamo snok mam mfo refo to, raa mmat bombra ro Allah yfen. Raa mahni Allah yabo rAit to menohe raa mmat bo ro bi Ait yfen. Tna bo ro Ait yfen weto merif Ait yase rAit tna merif Ait yatak rAit ro mroon ye. Raa mmat tibyo ana srau mnaut mhar mawe Ait tait Raa ro yatak toni tna yase toni ye. Meen ati ro Allah ymit safo kʼraa ro hawe bo smot Ait to, kbe yawe kʼana yawe, “Sioh anu ai to ma. Tiwya anu nmat bombra ro Jõ tno beta oh, reto mnan oh re anu nrok nhar Jõ ye.” ²¹Raa weto to, srau mhar Allah oh. Menohe ana hawe bo mbaut Ait. Tna hawe bo mayoh asik mase kʼAit ye. Tibyo ana mnaut-nat bo ro mafer marak. Tna srau wana to mrok mabuf. ²²Ana mawe ana mhar bo menohe ana mrok manyiya. ²³Ana hawe bo smot Allah ro yroon, tna yoof toni retait. Menohe ana ksoh mfen patung aro ro mafos fee; bo ro masu mnaif mnan raa, taro mnan ruu, mnan kak, aban bo to. Ana mfen tna smot patung wana weto.

²⁴Raa weto mhar bo ro ati mbam kʼAllah baro oh. Menohe ana hawe bo smot bi Ait. Feto to Ait yatam ana fee. Ait sayõ rof bo ro ana mno to tibyo ana mno bo bawya ro ana mesait ksoh sai. Ana mhaf mamur tibyo ksoh mno bo ro mkair toni. Ana srau oot-oot maus-as bo sai. Ana to sikowah metsu wana oh meto. ²⁵Bo ati ro mbam kʼAllah to, ana mhar mam mhaf mato wana. Menohe bo ro ati weto ana mbeak makus. Mbeak makus tna ana mawe mari bo sioh. Ana sioh ana ai oh meto. Allah oh mi yfen tabam refo beta. Rau ro moof raa bibi Allah yesait aran sai tna mno bo ro bi Ait yawe mamo snok mam hame wajin. Amin: Mabo oh! He mfe, raa weto to miwana Allah. Tna smot bo knik-knak ro Ait yfen sai. ²⁶Ana mno feto tibyo Allah yatam ana fee. Ait sayõ rof ana sai. Tna ana weto taro mawat srau oot-oot mno bo ro mkair toni, mno bo ro mti hrenaut: Fnya wana taro hawe bo msya raa sme wana: Fnya mjin su mjah fnya anya. ²⁷Tna raa sme taro hawe bo mjah fnya wana. Raa sme srau oot-oot anya tibyo mjin su mjah raa sme anya wana ai. Ana mno bo ro mkair feto oh mi Allah yno bo ska kʼana riryõn. Tna kair matu mai kʼana metsu wana. ²⁸Ana mmat sas bo ro Allah yno. Mmat bo ro ati reto. Mhar oh menohe hawe bo mfot bo reto tna mse mam kʼana mhaf wana fee. Mawe mafer aro fee. Allah ymat he ana miwana Ait. Feto to Ait yatam ana fee. Ait sayõ rof ana. Tna ana mhau mhaf mamur. Mhaf mato wana to mkair tibyo ana mno bo ro mti safo. ²⁹Ana to mno iro mai kʼAllah yoyo. Tna ana mno safo aro rau-rau mai kʼraa anya ye. Ana masu mase sai mkah bo ro raa. Ana ja mno bo ro mkair-kar, maam bo raa anya, mame raa anya, mmak msya raa anya, sioh-sah anya, mhaf mato wana saim safo ro mkair yoyo, ntoo anya. ³⁰Ana mawe kair anya, ana knait Allah, miwana raa anya, tna tawyõ ana ai. Ana to safuk mawe ana uu kar yoyo ye. Tna ana ksoh bo msair safo rouu yoyo. Tna hawe bo mari bo kʼraa mabi wana. ³¹Ana makit marak. Ana to srau ewok, ksoh raa roto fee, matmof raa anya to fee ye. ³²Ana mhar mawe Allah yawe awya ro wyahte Watum rAit feto kbe raa mame ait to yajat. Menohe ana mesait beroh mno bo ro mkair weto. Tna ana msya mafoh na ro miwana Allah mfi feto ye to, ana mbibi anya ye.

Allah yoo safo mana ymit kʼraa to, yno mnan si

^1-3Tna anu bhar bwe iro ro raa mno feto to, kbe Allah ymit kʼana tu oh. Menohe anu bsait fyi? Mfi bo anu bmat raa roto tibyo mam bhaf mato wanu bwe safo btek kʼana. Menohe anu bsait ja haberek bno bo mkair mnan anya mfi ana feto ye. Anu bsait oh mi bwe safo btek mai kʼanu oh meto! Anu bhar bwe kbe Allah ymit safo weto kʼanu mnan si tu oh! Kbe raa aro yban anu fee saut! Kbe anu bsam bmo fari re Allah yahni iro wanu fee ye! ⁴Mfo refo Ait yoo safo ymit kʼraa to fefares. Allah tait Raa ro kanyin sai. Ait tait Raa ro yhaf ase. Allah ksoh yawe raa mashana. Feto to Ait bitsre rere baro feto tna re kbe raa mashana. Nno be anu aro niwana boatmof rAit reto to ma. Beroh nno bo ro mkair ma, re kbe meen Allah yno bo ro mase mai kʼanu. ⁵Anu to, nna mase tna hawe bo nashana. Anu to beroh nno iro. Feto to anu nno Ait kmo renti. Tna kbe meen Ait yno bo ro mase mai kʼanu. Nnaut oh: Meen, ati sau to, kbe Ait yoo srah ymit kʼraa beta. Wore Allah yoo safo ymit kʼraa ro mno safo to, yno bo ro mnan si oh meto. Tna kbe raa beta mmat mawe Ait yno bo mnan si yum. ⁶Allah kbe ska bo kʼraa sait-sait mamyot si bo ro ait retait yno: ⁷Raa ro beroh mno bo ro moof to, mno re Allah yhaf mnan. Ana weto to raa ro ja saso roon ro hame. Mam wono to ana weto ksoh re Allah yoo ana yse hre abyõ mam yuk ro moof, tna kbe raa mmat ana ye. Ana ro saso bo weto oh mi meen Allah yno afo re fri roon ro hame. ⁸Menohe kbe Allah kmo raa ro ja mno bo ro moof mkah ana mesait ai sai. Kbe Allah kmo raa ro ja mmat raa anya fee. Kbe Ait kmo raa ro hawe bo mari bo ati ro mbam kʼAit, tna raa ro ja mber safo. Tibyo meen ana weto mkai bo ro mkair. ⁹Meen kair mai kʼraa beta ro ja mno bo mkair: Raa mbam raa mana ro Yahudi wia tinyi tna msya raa mbam raa mana roto ye. Kbe ana mbewok ye srau wana hri. ¹⁰Menohe meen Allah yno bo ro moof kʼraa ro ja mno bo ro moof. Meen Allah yoo ana weto yse hre abyõ mam yuk ro moof tna mam wono to, kbe raa mmat ana ye. Tna ana weto meen mhau mhaf tnok ye: Raa ro Yahudi wia tinyi tna raa mbam raa mana roto makin to ye. ¹¹Allah ymat raa beta to, yawe mnan anya sai. Ysok raa sait fee.

¹²Tna raa mbam raa mana ro Yahudi to, ana mhar Watum ro Allah yoo yee kʼMusa. Tna soh ana mno bo mnan si Watum reto to fee, kbe yoo safo mana ymit kʼana. Tna raa ro mbam raa mana roto makin to, ja wase Watum ro Musa. Menohe soh ana mno iro miwer Watum reto to, meen ana safe mkak ye. ¹³Allah tait yhaf mnan kʼawya? Ait hawe raa ro mhar Watum ro Musa sai menohe mbo mno beta fee. Ait yhaf mnan raa ro mari Watum reto tna mbo mno beta. Allah ymat sas ana weto tna meen yawe ana oh mi raa ro mhaf moof ati. ¹⁴Raa ro mbam raa mana roto makin weto, ana wase Watum ro Musa reto. Menohe ana baro mno bo moof mfi bo ana kro Watum reto. Watum maja rau reto ana mhar mam mhaf mato wana ai sai. ¹⁵Bo moof ro ana weto mno to, merif mawe Allah yno re mhaf mato wana to, mti bonaut kʼana. Mti bonaut kʼana re mhar Watum reto maja rau. Ana mesait mnaut bana re mhar mno bo ro moof mamyot Watum reto. Tna soh ana mno bo ro mkair to mhaf wana bhah ana ye. ¹⁶Meen, ati ro Allah yoo safo mana ymit kʼraa sait-sait to, kbe ymat sas raa mhaf mato wana. Ymat sas tibyo yhar bo beta ro tiwya ana mno wai. Tna yhar soh raa kro Bokyas Moof ro Yesus to, tna mno mnan si, fe mfe a. Tna fo Kristus Yesus yoo safo mana ymit kʼraa. Bokyas Moof reto oh mi ja jõ tkyas kʼraa.

Raa ro Yahudi miwer Watum ro Musa

¹⁷Anu taro nwe, “Jõ fi raa ro Yahudi. Tna amu nnaut nwe Watum ro Musa reto to, matak re mno amu nhaf moof ati tibyo nkai riof ro mase.” Tna anu weto to safuk nwe anu niranya nsya Allah oh. ¹⁸Tna anu nwe anu nhar bo bawya ro Ait yhaf mnan. Tna anu nhar Watum ro Musa tibyo anu nhar bo ro moof msya nhar bo ro mkair. ¹⁹Anu to, nwe anu nsu maah re mbefatu raa. Mbefatu raa tna nerif iso ro Allah kʼraa ro masu mti fares. Anu nwe anu to, nbo kek nmo nram raa ro mhau mam wore mamur fares. ²⁰Anu nwe Watum ro Musa mno re anu nhar bo ro ati. Tna anu nwe anu nhar Watum ro Allah beta mnan si oh to. Nwe nhar oh tibyo nerif bo kʼraa ro wase bo ye tna nmo guru ro ja watum bo kʼraa ro mfi ku kinyah fares ye. ²¹Soh anu nwe nhar bo weto beta oh to, fyi re anu nbo tna nno bo weto fee! Rau ro moof to, anu nesait nri bo ro ja anu watum kʼraa. Anu nkyas nwe, “Nsyõf bo ma!” Fyi, anu nesait ja nsyõf bo fe mfe a? ²²Anu to, nkyas nwe, “Nwyah ma!” Fyi, anu nesait nwyah ye fe mfe a? Anu nkyas nwe, “Amu knait berhala bo to.” Fyi re anu nmoʼt yuk ro raa msan bo kʼberhala weto, tna nsyõf bosan ro raa mse kʼberhala weto! ²³Anu safuk nwe anu nhar Watum ro Allah yoo yee kʼMusa oh. Menohe anu nno bo miwer Watum rAit reto. Anu nno bo bawya meto ee? Soh anu niwer Watum rAit to, anu niwana Allah oh meto. ²⁴Feto oh mi Bokom ro Allah mkyas mawe,

“Anu, raa ro Yahudi, oh mi nisti re raa ro mbam raa mana roto makin mamus Allah ranu to.”

Yesaya 52:5

²⁵Anu raa ro Yahudi to, ja nkom tohmi (sunat). Anu nkom anya feto, afo re kbe raa mhar mawe anu to, raa ro Allah wAit. Soh anu weto nri tna kro Watum ro Musa weto beta mnan si to, kbe bo mafa ro nkom tohmi reto mafer moof ye. Soh anu nkro Watum ro Musa weto beta to fee, anu weto nnan anya nsya raa mana roto sai, ro raa mkom fee. Anu nkom to, mafer marak. ²⁶Feto ye: Ana ro raa mkom tohmi fee; mfi bo ana weto mari Watum ro Musa mbo mno kaket to, kbe Allah ymat ana mfi raa wAit ye, mnan anya msya raa ro raa mkom oh. ²⁷Raa ro mbam raa mana roto makin to, ja mkom fee. Menohe soh ana ja mno bo mamyot Watum rAit to, Allah yhaf mnan ana ye. Menohe anu ro raa mkom oh tna nhar Bokom ro Allah ye to; soh anu niwer Watum rAit reto to, meen Allah yoo safo ymit kʼanu. Ymit safo kʼanu tna kbe raa ro mne mros mmat mawe, “Ae, amu ksoh ye.” ²⁸Anu ro Yahudi nwat to nwe kro bo mafa ro hohos na wanu. Tibyo anu raa mkom tohmi oh. Anu raa mkom feto oh mi misti anu weto nnaut nwe anu nesait ku ro Allah wAit to, ku ro ati to. He mfe. ²⁹Mfi bo anu raa mkom, tna mfi bo anu kro bo mafa raa ro Yahudi to, bo ati meto fee. Watum ro Musa to, matak misoh raa mhaf wana moof to fee. Soh Har ro Tuhan misoh anu nhaf wia to, kbe anu nmo raa ro Allah wAit ro ati to. Kbe raa ro tabam refo bibi anu u fee. Menohe kbe Allah bibi anu.

Raa mana ro Yahudi mkai mafer

¹Amu fo raa mana ro Yahudi. Amu raa mana ro Yahudi bkai mafer bawya? Amu fo raa mkom oh to, mafer rau to miyo? ²Mafer rau to mawat: Bokyas ro Allah to, tii Ait yehau oh kʼamu hohos na wamu. ^3,4Bo ro Allah yawe tna yno to, mhau bau yum. Menohe raa Yahudi baro hawe smot Allah. Ana miwana bo ro bi Ait yawe. Bo ro ana mawe tna mno to, kbe mburut wa Bokyas ro Allah makus fee saut. Ebokmi raa ro tabam refo beta sioh raa anya. Menohe Allah tait sioh raa fee. Bokom ro Allah mawe,

“Meen raa masu maah tna mrok mhar mawe ana mno bo mkair. Tibyo ana manwaruk mawe, ‘Allah yoo safo mana ymit kʼanu to, yno bo mnan si oh meto.’ Tna raa taro kbe maun Allah mawe yno safo. He mfe, kbe safo btek Ait aro fee.”

Mazmur 51:6

⁵Raa taro ye hafrah jõ mawe, “Amu nnaut nwe, ‘Allah yoo safo ymit kʼanu raa ro bno iro to, Ait yno bo moof mnan si oh meto. Menohe fyi meto? Soh anu raa ro ssafo fee re btek mam iro beta, fyi re Allah ymit safo mana weto kʼanu? Allah yber safo oh meto! Rau ro moof to, meen Ait sayõ rof bo ro raa mno sai, tna yoo safo mana ymit kʼanu to ma!’” Ana weto mkyas bo mamyot raa ro tabam sai, bonaut rana reto to mabuf. ⁶Bokyas mkair toni meto! Ana ro jõ tkyas weu to, mkyas bo ro sre. Allah tait Raa ro yhaf moof ati. Soh mfe to, fyi re meen Ait yoo safo mana ymit kʼraa ro tabam refo beta? ⁷Ana weto hafrah jõ u mawe, “Karik raa mmat he amu fo raa ro sioh raa. Menohe ana mmat Allah to, mawe Ait Raa ro ja sioh fee. Ait yno bo ro mnan si yum. Mmat bo weto tibyo ana bibi Allah, mawe bo ro Ait yno to moof miwer. Tis rau to sioh ramu to mafer moof. Feto to kbe Allah ymat iro wamu yoo safo mana ymit kʼamu fyi meto?” ⁸Raa taro to sioh mawe, “Paulus yawe fefo: ‘Nma, bno iro re kbe ro moof to, frok mbam iro reto!’” Raa ro mkyas bo feto, ana beta to raa ro masoh mase. Maami Allah yoo safo ymit kʼana weto.

Raa ro Yahudi ye msya raa ro mne ye beta mber safo oh

⁹Feto to fyi? Allah ynaut yawe amu raa ro Yahudi to, raa ro ati niwrek raa mana roto, fe mfe a? Mfe saut! Riwai jõ tkom tawe raa beta mno iro oh: Raa mbam raa mana ro Yahudi ye tna msya raa ro mbam raa mana roto makin ye. Tibyo kbe Allah yawe safo btek kʼana beta.3:9 Roma 2:5-11.¹⁰Feto ye, Bokom ro Allah mawe fefo:

“Raa ro tabam refo sait bo yhaf moof ati fee. ¹¹Tna raa ro tabam refo to bohar wana beta mabuf. Bonaut rana msya bokyas wana to mafer marak. Tna sait saso Allah fee ye. ¹²Raa beta haberek kbor kʼAllah. Ana beta to mafer marak sai. Tna sait bo yno bo ro moof fee.”

Mazmur 14:1-3; 53:2-4

¹³“Mbam srau wana to, raa mkyas bo ro mnis, mfi hai ro mhai tna raa sama fefares to, kbe mnis ye. Tna hrea wana mkyas bo to sioh. Tna masoh anif wana mkyas tna saraf-saraf raa. Mfi abboh ro ja saraf raa majat.”

Mazmur 5:9; 140:4

¹⁴“Tna ana mhaf knait raa yoyo tibyo masoh wana to mhau mamus raa yoyo ye.”

Mazmur 10:7

¹⁵“Tna maa wana to, mhoh mamo mame-ama raa sai. ¹⁶Woyõ-woya ana mamo to ana sikaut-kat bo raa ye, tna sikowah raa ye. ¹⁷Ana to wase bo miranya ye.”

Yesaya 59:7,8

¹⁸“Tna ana to wase bo waa Allah ye.”

Mazmur 36:2

¹⁹Nnaut oh: Bokom weto to, tiwya Musa ykom mam Watum rait. Tna bokom beta ro mhau mam Watum ro Musa to bo ro Allah ykyas kʼraa ro Yahudi. Allah yoo Watum reto yee afo re kbe raa mhar bo ro moof tna mno, tna bo ro mkair to mno ma. Feto tibyo ati ro Ait yoo safo ymit kʼraa to, kbe raa beta mhar mawe bo ro moof to miyo. Tna kbe raa sait bo fee yasen ywaar yawe, “Jõ twase bo reto!” Kbe raa sait saak ait to fee ye. Bo ro bi Ait yawe to, meen raa ro tabam refo beta to, mari tna manwaruk. ²⁰Allah yawe raa beta ro mhau mam tabam refo to, sait yhaf moof ati fee. Raa baro siko mbo Watum ro Musa mno mnan si. Menohe Watum reto to, matak mno re raa mamo mhaf moof ati to fee. Allah ymat ana weto yawe ana weto to raa ro ja mber safo ye. Watum reto to, mafer rau oh mi mno re raa mhar mawe ana raa ro ja mno iro.

Allah yno fyi re Ait kmo anu u fee?

²¹Mfo refo Allah yerif iso roto sau kʼanu re kbe Ait kmo anu u fee yawe anu bfi raa ro mhaf moof ati. Watum ro Musa to matak re misoh raa mhaf moof ati fee. Menohe Watum reto msya bokyas ro Allah ybis nabi wAit mkom to, tiwya mkyas iso ro tna refo matim oh. ²²Iso ro tna reto oh mi: Raa smot Yesus Kristus tibyo msam wai kʼAit (iman) to. Allah yawe awya ro smot Yesus feto to, kbe Allah ymat mees ro Yesus tibyo yawe ana mfi raa ro mhaf moof ati oh. Raa ro Yahudi ye tna msya raa ro agama Yahudi fee ye mamo iso reto saah. Beta mnan anya sai. ²³Raa beta to mno iro. Menohe Allah tait Raa ro yase. Ait yno bo ro moof toni. Bo moof beta ro anu raa bno to moof mnan Ait fee. Mabut fares sai. ²⁴Tna Allah ksoh rAit sai yatmof anu. Yatmof anu tna Kristus Yesus yfes anu. Tibyo Allah ymat mees ro Yesus tibyo yawe anu bfi raa ro bhaf moof ati. Bhaf mkair aro u fee. ²⁵Raa ro tabam refo mno iro. Tna ja Allah yawe safo btek mai kʼraa awya ro yno iro oh. Tibyo meen Ait sikowah ana. Menohe anu taro to, meen Allah sikowah anu wefo fee. Fyi? Ait ysan Yesus tna raa sikowah Ait, mame Ait riryõn. Ait shauk anu oh meto. Raa beta mmat raa mame Ait to. Yesus yake anu raa ro bno iro weto mkah mees rAit oh meto. Tibyo Allah yhaf mnan raa ro smot Yesus. Anu smot Yesus tna nhar bo ro Ait yno reto bo mabo. Tna raa ro tiwya mno iro, ati ro Yesus raa mame fefares to, Allah sikowah ana wia fee. Ait kanyin sai bait fares. Soh Yesus shauk yuk wana to fee, kbe raa mawe kair Allah mawe, “Fyi re Nyõ natmof raa ro mno iro ee? Nyõ nkro Watum aNyõ fee meto. Bo mkair oh meto!” He mfe, Allah yse Yesus shauk yuk wana oh. Yno feto yerif yawe Allah tait Raa ro yno bo mnan si oh. ²⁶Tna mfo refo ye; Allah ymat raa ro smot Yesus mawe bo ro Ait yno to, mabo oh. Allah yawe ana weto mfi bo raa ro mhaf moof ati. Allah ysan Yesus afo re raa mmat tna mhar mawe Allah fi Raa ro yno bo moof mnan si.

²⁷Feto to kbe anu raa safuk bo bawya? Mfi bo anu bri Watum ro Musa tna ja bbo bno to, kbe Allah ymat anu yawe anu to raa ro bhaf moof ati fe mfe a? Mfe: Anu beta bno iro oh. Menohe anu smot (percaya) Yesus bwe bo ro yno weto to mabo oh. Anu smot Yesus feto sai afo re kbe Allah ymat mees rAit tibyo yawe anu bfi raa ro mhaf moof ati. ²⁸Anu bhar bwe, mkah bosmot (iman) reto oh mi Allah ymat anu yawe anu bfi raa ro mhaf moof ati. Anu bri Watum ro Musa bbo bno to, kbe mno anu bhaf moof ati to fee. ²⁹Anu raa ro Yahudi nnaut nwe Allah yawe anu nesait aran nma no kʼAit a? Mfe, Ait ksoh yawe raa mana roto makin mama mo kʼAit ye fea! ³⁰Anu bhar bwe Allah sait aran metait. Tibyo ysaim iso sau aran re kbe raa mama mo kʼAit: Raa Yahudi ro smot Kristus Yesus, mhaf mse bo ro Ait yno to, kbe Allah yawe ana beta to mfi raa ro mhaf moof ati meto. Tna msya raa ro mbam raa mana roto makin ye; ana beta ro smot Kristus Yesus tna mhaf mse bo Ait yno to, kbe Allah yawe ana to mfi raa ro mhaf moof ati meto ye.

³¹Feto to fyi? Bosmot mirare Watum ro Musa a? Mfe. Anu smot Kristus Yesus to anu bros tis Watum ro tiwya Allah yoo yee kʼMusa maja rau oh meto.

Tiwya Abraham yamo yo kʼAllah mam iso ro bosmot reto ye

¹Nnaut bi Abraham. Ait tait anu hohos ranu, raa ro Yahudi. Tiwya ait yhau mam tabam refo tna ykai bo bawya? ²Allah ymat Abraham yawe ait tait yfi raa ro yhaf moof ati. Bombra ro Abraham yno oh mi mno re ait yrok yhaf moof ati fe mfe a? Mfe. Soh mabo to, kbe ait safuk re kbe raa bibi ait saah. He mfe; ait ytai yno bo aro re kbe Allah bibi ait to fee. ³Bokom ro Allah mawe fefo:

“Bo ro Allah ykyas kʼAbraham reto to, ait yari tna smot (percaya). Smot yawe bo ro Allah yawe reto to meen mabo. Au oh mi Allah yawe Abraham tait raa ro yhaf moof ati.”

Kejadian 15:6

⁴Soh raa sait ykah bo raa to, kbe raa moo boren maren ait to. Tna boren reto to, raa mawe ’bouum’ fee. Boren rait sai meto. ⁵Tna raa mawe ’bouum’ soh raa moo bo mee sai kʼait; mee kʼait ebokmi ykah bo rana aro fee. Feto ye Allah ksoh yuumto haf ro moof kʼraa ro smot (percaya) Ait. Yawe ymat raa mfi ana mhaf moof ati oh to, au oh mi bouum ro Ait yuumto kʼraa to. Ait ja yuumto bouum refo kʼraa ro mhaf mkair. ⁶Tiwya raja Daud yhar bo reto ye. Yhar yawe, ksoh rAit sai, Allah ysan haf ro moof kʼraa baro. Ana mno bo aro wia fee re kbe Allah yno feto. Yoo sai. Kbe ana weto simaut. Raja Daud yhar bo reto tibyo ykom fefo:

⁷“Raa taro to, ana miwer Watum ro Musa menohe Allah skur re ana masom iro weto u fee. Tna iro ro ana mno to, Allah yyon beta. Allah yno bo moof kʼana weto oh. ⁸Safo mana wana to, Allah ymit kʼana fee. Allah yno bo moof kʼana weto oh.”

Mazmur 32:1-2

⁹Raa ro Allah ymat yawe raa weto raa ro mhaf moof ati to, kbe ana simaut. Ana weto to awya? Raa Yahudi ro tiwya raa mkom tohmi (sunat) oh mesait, tna msya raa ro mbam raa mana roto makin ye fe mfe a? Ja anu bwe Allah ymat bosmot (iman) ro Abraham tibyo Allah yawe ait yfi raa ro mhaf moof ati. ¹⁰Nnaut tija Allah yawe Abraham raa ro yhaf moof ati? Raa sunat ait matim wia oh fe mfe a? Mfe. Ti ro Allah yawe Abraham raa ro yhaf moof ati to, Abraham tait raa sunat fefares. ¹¹Allah ymat bosmot (iman) ro Abraham tna yawe ait yfi raa ro mhaf moof ati. Yawe feto tna ti baro firwas raa sunat ait. Raa sunat ait afo re kbe raa mhar mawe ait yhaf moof ati. Feto ye mkah raa ro raa sunat fee: Awya sai ro smot (percaya) Allah to, Allah ymat ait yawe ait tait yfi raa ro mhaf moof ati. Ait yhaf moof ati ynan fi Abraham tiwya yrok raa ro yhaf moof ati. Tibyo raa mawe ait yfi ku ro Abraham. ¹²Feto ye, raa ro Yahudi, ana ro raa sunat oh: Soh ana smot Allah mnan anya mfi Abraham tiwya smot Allah to, ana mamo ku ro Abraham wAit ye.

¹³Tiwya Allah yawe yuumto tabam refo beta kʼAbraham ysya kube wait. Fyi re Ait ysok Abraham? Tiwya Abraham kro Watum ro Allah mnan si tibyo Allah ysok ait, fe mfe a? Mfe, bosmot (iman) ro Abraham oh mi Allah yawe ait yfi raa ro mhaf moof ati. Tibyo Allah ysok ait. ¹⁴Feto ye, soh Allah ysok raa ro kro Watum ro Musa sai, tna ysan bosan kʼana mhaf mse to, kbe bosmot ranu mafer marak sai. Tna bo ro tiwya Allah yawe kʼAbraham reto to, mafer marak ye! He mfe, mafer rau mhau kʼanu fares. ¹⁵Woyõ-woya raa mhar Watum ro Musa to, kbe raa miwer watum reto. Tna soh raa miwer Watum reto kbe Allah kmo ana. Tibyo yno bo mbtek mai kʼana. (Tna wore Watum reto raa wase to, kbe raa miwer Watum reto fee ye!)

¹⁶Feto to Allah yawe raa mrok mhaf moof ati mkah bo mamo mam iso ro bosmot (iman). Ait ksoh rAit sai yuumto haf ro moof kʼanu feto. Iso reto Ait yuumto bo kʼraa ro Yahudi mesait kar fee. Yuumto bo kʼawya-awa sai ro smot Allah ynan fi tiwya Abraham smot Allah feto. Kbe yuumto bouum reto tu oh. Tna Abraham tait anu bja ranu beta. ¹⁷Mam bokom ro Allah, Ait yawe kʼAbraham yawe,

“Jõ tno re raa mana mawat aro u kbe mawe, ‘Abraham tait bja ranu.’”

Kejadian 17:5

Tna bo ro Allah yawe reto Abraham ynaut mamo-me fee. Ait yhar yawe Allah tait Raa ro yno raa ro mhai to, mrok masen. Tna Allah yhar bombra beta ro marak fares, tibyo ykyas raa ro ysair fefares ye. ^18,19Abraham tait yabi oh ati ro Allah yawe kʼait to yawe,

“Meen nyõ kube wonyõ to msis-sas. Kbe ana rembes mamo raa mana mawat aro u.”

Kejadian 15:5

Bo ro Allah yawe reto to, Abraham ynaut maut-mroh fee. Yhar yawe bo ro Allah yawe yno to, kbe mabo tu oh. Abraham umur 100 tahun bo feto oh. Menohe bosmot (iman) rait mroh fee. Ait yhar yawe yetsu rait saf-safo u fee. Tna yfain Sara to, mhaf ku rau to msyit oh. Menohe yinaut sai yawe kbe ana mabe ku. ²⁰Bo ro Allah yawe to, Abraham ynaut maut-mroh fee. Bosmot rait mo matak renti. Bo reto mabo fefares Abraham ybaut bo yase ro Allah rAit. ²¹Ait yhar yawe Allah yatak yno bo ro Ait yawe reto mabo. ²²Bokom ro Allah mawe, “Abraham yari bo ro Allah yawe, yfot yse kʼait. Au oh meto Allah yawe Abraham tait raa ro yhaf moof ati.” ²³Bokom reto mawe Abraham yfi raa ro yhaf moof ati. Bokom reto mkah Abraham yesait kar fee. ²⁴Bokom reto mkah anu ye. Soh anu smot Allah, ro yno Tuhan ranu Yesus yrok yasen to, kbe Allah yawe anu fo bfi raa ro mhaf moof ati ye. ²⁵Anu bno iro. Menohe Allah sikowah anu fee. Ait ysan Yesus yawe Ait raa sikowah tna mame riryõn. Yno feto yake anu ro bno iro mkah yetsu rAit. Tna Allah yno Yesus yrok yasen re kbe yerif yawe bo ro Yesus yno to, mnan si oh. Yno re kbe Allah ymat anu yawe anu to, bfi raa ro mhaf moof ati to.

Allah yawe anu bhaf moof ati to. Mafer rau to bawya?

¹Feto to Tuhan ranu Yesus Kristus yno re Allah ymat bosmot ranu tibyo yawe anu bfi raa ro mhaf moof ati. Mafer rau sau to anu brok biranya bsya Allah oh meto. ²Mafer sau naut to, anu smot bo ro Yesus yno tibyo Ait tubat anu. Tubat yse anu hre mam wore wo moof. Tna wore weto to, ja Allah yatmof anu yoyo. Tna mafer sau naut to, mfo refo ja anu simaut mase binaut bwe meen bmat bo yase ro Allah rAit tna bkai bo yase rAit reto baro kʼanu ye. ³Reto sai fee: Mam wore anu bkai bo ro samyoh matu mai kʼanu to anu simaut mase ye. Anu bhar bwe kbe mafer rau to moof. Anu bhar bwe bo mama matu mai kʼanu weto to mno re anu bmo raa ro btak, raa ro kanyin sai. ⁴Anu bito bsom bo ro matu mai kʼanu to, mno re anu raa ro bhaf ntrot renti. Anu bhau bhaf ntrot to, mno re anu raa ro binaut bwe meen bhaf bse bo yase ro Allah siwyan kʼanu. ⁵Allah yawe Ait yhafri anu toni. Ait yhafri anu tibyo ysan Har rAit to mjin kʼanu bhaf mato wanu. Tna Har reto mno re anu bhar bwe Allah yhafri anu. Tibyo binaut bwe bo ro Allah yawe siwyan kʼanu reto to, kbe mabo tu oh. Kbe anu hrenaut fee. ⁶Tna tiwya Allah ysok oon ro Kristus yama. Oon reto to, Allah ymat yawe anu raa ja hawe bo bri bo ro Ait yawe. Tna ymat yawe anu raa ro saf-safo fee ye. Feto tna Kristus yama ysan Ait kʼraa mame yajat re yno riof kʼanu. ⁷⌞Bo ro Kristus yno reto yuan fee. Awya ro ksoh yiryõ ait? Tnaut tawe raa ro tabam refo sait bo kbe yawe ait yesait raa mame riryõn fee.⌟ Mfi bo raa sait yno safo aro fee, tna raa mawe mame yajat to: Awya ro yawe, “Nme ait retait ma! Nma nme jõ riryõn re riof kʼait!” Ja raa aro mawe bo feto fee. Tna mfi bo ait ro yhaf moof sait tait, tna raa mawe mame ait ro yhaf moof retait yajat to: Kbe fyi? Karik sait roto yawe yasen shauk. ⁸Menohe Kristus yno bo reto. Ymat anu wore wo ja bno iro. Tna yama tna ysan Ait raa mame yajat. Reto oh mi anu bhar bwe Allah yhafri anu. ⁹Kristus yawe raa mame Ait yajat rof. Ysan Ait yesait mkah bawya? Afo re mfo refo Allah ymat anu yawe mees ro Yesus rAit reto mno anu bfi raa ro mhaf moof ati. Feto to meen ati ro Allah kmo tna ymit safo kʼraa ro tabam refo to, kbe Ait kmo anu fee. Boatmof rAit msai meto! Kbe anu bkai riof. Allah ymat bo ro tiwya Yesus yno kʼanu to. Ymat tibyo kbe Ait ymit safo aro kʼanu fee! ¹⁰Wore wo anu bhoh byoh kʼAllah fares to, Ait ybis Ku rAit yama tna raa mame yajat. Ait yajat re kbe mees rAit misoh iranya ranu bsya Allah. Tnaut tawe Ait yhafri anu toni sai. Tna Yesus yrok yasen tna yhau yaam fares. Feto to thar tawe anu bhau biranya bsya Ait. Meen anu brok bsen ye to. Kbe bkai riof ro mase. ¹¹Anu bkai riof ro mase ye tna anu safuk bo ro Allah yno kʼanu ye. Bwe, “Yesus KristusTuhan ranu yisoh iranya ranu bsya Allah. Yisoh tibyo mfo refo anu biranya bsya Allah to.”

Bo moof ro Yesus yno miwrek iro ro Adam yno

¹²Mfo refo anu biranya bsya Allah. Menohe tiwya tinyi to iro ntwok mamaʼt tabam refo. Twok mam ati ro Adam yno iro ro tinyi. Tibyo iro msair bo raa mhai ye. Tna bo raa mhai to, mamo mbet raa beta. Tibyo raa beta mno iro ye. Tibyo raa beta mhai ye. Tna Adam oh mi yisti. ¹³Allah yoo Watum rAit yee kʼMusa fefares to, raa ro tabam refo wase bo miwer Watum reto. Menohe ana ja mno iro soo oh. ¹⁴Maban mam wore Adam yhau mamo snok mam wore Musa yhau to, raa beta mno iro tibyo mhai. (Ebokmi iro ro ana mno to hayah, tna iro ro Adam yno to hayah ye. Adam yiwer watum sau ro tiwya Allah yawe kʼait. Ana roto to wase Watum ro Allah fares. Bo ro ana miwer to, marak fares. Ana mno iro sai.) Adam ro yatim ysya Yesus ro kro mam tis to, mbewok mnan anya baro. ¹⁵Menohe mafer mbam bo ro ana mbewok mno to, hayah toni. Adam tait yno iro tibyo yisti kair kʼraa mawat. Tna Kristus tait yno bo merif mafer ro moof kʼraa mawat. Tiwya raa sait yiwer bo ro Allah ybis. Tibyo yisti raa beta mhai. Tna Raa roto sait yuumto boatmof ro Allah kʼraa mawat. Ait oh mi Yesus Kristus. Bo moof ro Ait yno to mase toni miwrek safo ro Adam yber. ¹⁶Bo ro Adam yno to, misti kair. Reto to mnan anya msya boatmof ro Allah yuumto kʼanu to fee. Adam tait yno iro sau tibyo Allah ytu srah tna ymit safo mana rait reto kʼraa mawat. Mfo refo raa miwer watum ro Allah to mawat. Menohe anu ro smot Yesus to, Allah ymat anu yawe anu bfi raa ro mhaf moof ati. Feto oh mi boatmof ro Yesus yuumto kʼanu reto to, misti bo ro moof kʼanu raa mawat. ¹⁷Raa sait yno iro. Tibyo kbe raa beta mhai. Menohe bouum ro Allah to, mase miwer. Ait yuumto boatmof rAit kʼanu. Yno mkah bo ro Raa sait yno. Ait retait oh mi Yesus Kristus. Ait yno re anu fo, bfi raa ro mhaf moof ati. Tibyo kbe anu bhau broon tna biranya bsya Ait. Tna kbe anu bmo raa ro ati hre su bsya Ait mam yuk rAit ro mase tno.

¹⁸Tiwya Adam yiwer bo ro Allah yawe sau. Bo reto oh misti re Allah ymit safo kʼraa beta. Tna Kristus yno bo ro moof sau tibyo Allah ymat raa beta yawe ana to, mfi raa ro mhaf moof ati. Mafer rau to, kbe raa mhau mroon. ¹⁹Tiwya raa sait hawe bo yari watum ro Allah yawe. Tibyo ait yisti re raa mawat masen mno iro. Feto ye Raa sait yari bo Allah yawe. Tibyo raa mawat kbe mrok mamo raa ro mhaf moof ati.

²⁰Tna Allah yoo Watum ro Musa yee kʼraa afo re ana miwer bo ro Allah yawe. Raa miwer Watum ro Musa reto mawat. Menohe wore wo raa miwer watum ro Allah mawat to, Allah yuumto boatmof rAit kʼana to mawat miwer. ²¹Allah yuumto boatmof rAit msis kʼanu oh. Tinyi rau to, iro make raa matak. Feto tibyo raa beta kbe mhai. Feto ye mfo refo boatmof ro Allah ybo anu matak. Tuhan ranu Yesus Kristus yama yno re anu bhaf moof ati tna kbe meen bhau broon.

Anu bjat tna brok bsen bsya Yesus oh

¹Feto to fyi? Kbe anu bno iro renti re kbe boatmof ro Allah reto mninon kʼanu u fe mfe a? ^2,3Mfe saut! Anu to raa ro tiwya smot Kristus oh tibyo anu raa baptis oh. Nnaut oh: Raa baptis anu to, fret bo mawe anu bsya Kristus su to, raa tiwya mame bjat oh. Tiwya tak mkair sau mbo anu misti re anu raa ja bno iro to. Menohe ati ro anu bhai su bsya Kristus to, tak mkair reto mitsre anu tna mbo anu u fee. Reto oh mi anu hawe bo bno iro renti u fee. ⁴Raa baptis anu to, fret bo mawe anu bjat, tna anu raa sama bsya Kristus. Raa mame yajat tna Yaja mkah yase rAit, yno re Kristus yrok yasen. Feto ye mkah yase rAit reto yno re anu bmos wanu to mrok maam. Reto oh mi tak mkair reto mbo anu renti u fee. Tibyo anu kro iso ro tna to.

⁵Soh anu bsya Ait tiwya bjat oh to, kbe anu brok bsen bsya Ait tu oh. ⁶Tiwya tak ro mkair reto mbo anu re anu ja bno iro. Menohe anu bhar bwe, anu bsya Yesus to raa mame afo re tak reto mbo anu u fee. Tibyo anu bmo sryan ro bri tak reto u fee ye. ⁷Tna awya ro yajat ysya Kristus to, Allah yawe ait retait yrok yhaf moof ati oh. Tibyo tak mkair reto mbo ait u fee. Tna misti ait yno iro u fee. ⁸Soh tiwya anu bhai bsya Kristus to anu bhar bwe meen anu brok bsen bsya Ait fea! ⁹Anu bhar bwe Kristus yrok yasen to. Tibyo meen ye yhai u fee. Yesus sbi hri wa hai matak rau reto. Ait yase yiwer. Kbe hai mbo Ait u fee. ¹⁰Ait yajat mun sau aran sai. Yajat to sbi hri wa tak mkair ro ja misti raa mno iro reto. Tna mafer bo ro Kristus yno reto to, meen mhau matak yum oh. Tna Ait yrok yasen to, yhau mkah yno bo ro Allah wAit. ¹¹Feto to nnaut nwe anu bhai bsya Kristus Yesus oh. Tibyo tak ro mkair reto mbo anu u fee. Menohe anu bnaut anu bwe anu baam bsya Allah su oh mefo. Anu bhau mkah bno bo ro Allah wAit.

¹²Feto to anu bhau raa sai mam tabam refo baro fares to, anu beroh bri tak ro mkair reto u ma. Nno wa be nmo sryan ro tak reto tibyo bo ro ja raa msrau oot-oot mno to, kbe anu kro nno ye. ¹³Tna anu netsu wanu to, mfi bo sbe ye. Kaket anu nsoh wanu, ntem wanu, nhaf wanu to! Noo anu nsan kʼtak ro mkair reto nmo sbe rau to ma. Kbe tak reto misti re anu nno bo ro mkair-kar. Menohe anu nfi raa ro mhai oh. Tna Allah yno re anu nmos ranu mrok naam u. Feto nsan netsu wanu beta kʼAllah ybo mkah nmo sbe rAit. Feto to kbe Ait ybo anu nno bo ro moof ati to. ¹⁴Watum ro Musa mbo anu u fee. Mfo refo to, boatmof ro Allah mhau mkyar anu. Tibyo kbe anu nmo sryan ro tak mkair reto u fee.

Anu nmo sryan ro awya rait?

¹⁵Watum ro Musa mbo anu u fee. Tna Allah ymat mees ro Kristus tibyo yatmof anu yoyo. Feto to, mfo refo anu bno iro mbau a? Mfe saut! ¹⁶Anu bhar bwe, soh anu bitsre anu bsan kʼraa roto mbis to, ja anu bmo sryan rait oh meto. Anu fo nmo sryan ro awya rait? Soh nwe nri tak ro misti iro to, kbe anu nhai. Menohe soh nwe nri bo ro Allah yawe to, kbe yawe anu nfi raa ro mhaf moof ati. Nksoh ranu to ryo? ¹⁷Tiwya anu nmo sryan ro tak mkair reto, tibyo nhau nno iro yoyo. Menohe Allah tubat anu. Tna raa wAit merif watum ro ati kʼanu. Tna mfo refo anu nri watum rAit reto tna nbo matak oh. Feto to jõ tayoh asik mase kʼAllah. ¹⁸Allah yno re tak ro mkair reto mbo anu u fee. Mfo refo anu nmo sryan ro Allah rAit. Tibyo anu nno bo ro moof ati. ¹⁹Riwai tkyas raa ro mamo sryan. Anu raa sai. Feto to tkyas bofret reto afo re anu nhar bo ro jõ watum kʼanu to kaket. Nnaut nafos wanu: Awya ro ybo? Tiwya anu ntem, nkit, nsoh wanu bo to mno bo masmamo tna anu niwer watum ro Allah. Reto oh mi anu ksoh nmo sryan ro tak mkair reto. Tna mfo refo jõ tawe kʼanu tawe, “Nno bo ro moof ati mkah anu ntem, nkit, nsoh wanu bo to. Anu nmo sryan ro Allah wAit oh meto. Tna mafer rau to, anu nhau nno ro bo ro Allah wAit yoyo sai.”

²⁰Wore wo tak ro mkair reto mbo anu fares to, Allah ybo anu re nno bo moof ati to fee. ²¹Ati ro anu nnaut bo ro tiwya anu nno weto to, anu saban. Bo ro anu nno wore weto to, mafer rau to bo bawya? Bo weto misti re raa mhai tibyo. ²²Menohe Allah skur anu re tak ro mkair reto mbo anu u fee. Tna mfo refo anu nmo sryan ro Allah wAit oh. Mafer rau to, anu nhau nno ro bo ro Allah wAit yoyo sai. Tibyo meen tis rau to anu nhau hame wajin ye. ²³Soh raa mno iro to, Allah yawe boren ro yaren ana weto to: Ana mhai tibyo. Menohe Allah yatmof anu: Ait yuumto roon ro hame kʼraa ro smot Kristus Yesus, Tuhan ranu.

Watum ro Musa to, moof fe mkair a?

¹Taja, tme, tao, tano na; anu beta nhar watum ro tabam refo fo fea! Tna wore raa mhau maam fares to mako hawe sai ana mari watum ro tabam refo. ²Nnaut fai sau msya maa: Watum reto mawe mako hawe sai au mhau msya ait yesait sai mamo snok ati ro ait yhai. Menohe ati ro maa yhai to, watum reto mbo fai au u fee. ³Mfi bo fai au mamo msya raa roto mam wore maa yhau fares; au mwyahte maa oh meto. Menohe soh maa retait yhai wia oh to, tna au mawe msya raa rouu to au miwer watum fee oh meto. Reto to au mwyahte maa meto fee. Watum reto mawe wa bo ro au mno reto fee. ⁴Mfi feto ye, jõ fret bo tkyas anu bsya Watum ro Musa. Tiwya Watum ro Musa mbo anu matak. Menohe ati ro anu bhai bsya Kristus oh to, anu bros hayah bbam Watum ro Musa. Feto afo re anu bmo bsya Raa roto sait. Raa roto retait oh mi Kristus. Ait yrok yasen. Tna anu bmo bsya Ait afo re kbe anu bno bo ro Allah yhaf mnan to. ⁵Tiwya, anu fo raa ro hawe bo bri Allah, bwe bhau bno bo ro besait ksoh sai to. Bhaf ranu ksoh mawe bno iro. Bo bawya ro Watum ro Musa mawe wa to, bo weto oh mi anu beroh bno. Feto to Watum ro Musa mno re anu nksoh bno iro renti. Iro to misti hai. ⁶Tiwya Watum ro Musa mbo anu matak. Tna anu betsu wanu ro mno iro to mhai. Tibyo Watum reto mbo anu u fee. Anu mbros oh. Mfo refo anu bmo sryan kʼbobot ro tna. Anu bmo sryan ro bri Har ro Tuhan tna bno bo ro Har reto mbis. Bri Bokom ro Musa bbo bno u fee.

⁷Anu bnaut bwe Watum ro Musa reto mkair fe mfe a? Mfe. Raa ro kro Watum reto mno iro meto fee. Mafer to Watum reto to, Watum reto mbo kek tna mram thaf mato ajõ tna re jõ thar iro ro jõ tno. Watum reto mkyas mawe, “Naam bo raa ma!” Feto oh mi thar tawe tno bo reto ma. Iro meto. ⁸Watum reto mawe, “Naam bo raa ma!” Menohe tak mkair ro ja misti raa mno iro reto to, mno re jõ taam bo raa aro rau-rau. Misti jõ tno iro oh meto. Feto to, Watum ro Musa siwyan iso re tak ro mkair reto misti anu bno iro meto. Soh iso reto siwyan fee, tak mkair reto misti anu bno iro fee ye. ⁹Tiwya jõ twase Watum reto fares to, thau tna twase bo tawe jõ fi raa ro tno iro. Menohe jõ tari Watum reto tibyo tasu maah. Tibyo thar tawe jõ fi raa ro tiwer Watum reto. Jõ fret bo tawe, “Ti reto to, iro mrok maam. ¹⁰Iro mrok maam menohe jõ thai.” Tiwya tnaut tawe, “Watum ro Musa reto mno re jõ tkai roon ro hame.” He mfe, Watum ro Musa to misti jõ thai oh. ¹¹Tak mkair reto moo Watum ro Musa tna miwro jõ. Miwro jõ mawe soh tari Watum ro Musa reto, kbe mno riof kʼjõ. He mfe. Watum reto moo safo mana mmit kʼjõ tna misti re kbe jõ thai. Tibyo jõ fret bo tawe, “Iro msya Watum reto mame jõ tajat.” ¹²Feto to Watum reto mesait to moof. Watum reto mbam kʼAllah mama. Tna bombra ro Allah yawe to, watum weto beta bo ro ntrot bau yum tna bo ro moof bau oh.

Watum ro Musa msya iro

¹³Fyi, bo ro moof reto misti jõ thai a? Mfe saut! Tak mkair ro misti iro oh mi mno jõ thai to. Tak mkair reto moo Watum ro Musa tna mame jõ to. Jõ hawe tari watum ro Allah tibyo jõ beroh tari tak mkair reto tibyo tno iro renti. Feto oh mi anu bhar bwe tak mkair reto to, mkair-kar toni! ¹⁴Watum reto to moof bau. Watum reto to mbam Har ro Tuhan. Menohe jõ fi raa sai tibyo amah mato ajõ to mti sai. Tna tak ro mkair reto moo jõ mbu tamo sryan rau. Tibyo tari tak reto tna tno iro. ¹⁵Fyi re tno bo ro jõ tno fo? Jõ ksoh tawe tno bo ro moof menohe jõ tno fee. Tibyo tno bo ro mkair. Tna bo ro mkair reto to, jõ hawe bo tno ye. ¹⁶Soh jõ tno bo ro mkair, bo ro jõ hawe tno to, jõ sraujin. Reto to merif mawe jõ thar mam thaf ajo tawe Watum ro Musa reto moof. Jõ besboh bo ro Watum reto mkyas to fee. ¹⁷Feto to jõ tesait oh mi tno iro fee. Tak ro mkair reto mjin mam jõ thaf. Tibyo tno iro. ¹⁸Jõ thar tawe jõ fi raa sai. Tna bo ro moof mjin mam thaf ajõ aro fee. Jõ ksoh tno bo ro moof. He mfe, tno bo ro moof to fee. ¹⁹Bo moof ro jõ ksoh tno oh mi jõ tno fee. Menohe bo ro mkair ro jõ hawe tno oh mi jõ tno renti. ²⁰Soh jõ tno bo ro mkair, bo ro jõ hawe tno to, jõ tesait oh mi tno iro reto fee. Tak ro mkair reto mjin mam jõ thaf. Au oh mi tno iro meto.

²¹Jõ tkai bo maja sau oh mefo. Jõ thaf ajõ ksoh mawe tno bo ro moof. Menohe tno bo ro mkair fares. ²²Mam thaf mato jõ hasu watum ro Allah toni tawe ksoh tbo tno. ²³Menohe tetsu ajõ ja mawe mno bo ro mkair fares. Feto to tak ro mkair reto tna thaf ajõ to, mbewok sarok anya. Tna tak ro mkair reto to, make jõ matak toni. ²⁴Tibyo jõ kmo jõ ai tna sraujin toni. Bo ro mbtek mai kʼjõ tasom to, samyoh toni fo! Kbe awya yama tna skur tak mkair ro make jõ reto re kbe riof kʼjõ? ²⁵Yesus KristusTuhan ranu oh mi Raa ro meen skur jõ. Tibyo jõ tayoh asik mase kʼAllah. ²⁶Feto to mam thaf mato ajõ to, tamo sryan rAit. Tawe ksoh tari watum ro Allah tbo tno. Ebokmi wore tetsu ajõ refo mhau fares to, kbe tak mkair reto mbo jõ tetsu fares ye.

Har to Tuhan mhau msya anu

¹Feto to mfo refo anu bhai su bsya Kristus Yesus oh. Tibyo Allah kbe yno safo mana ymit kʼanu aro fee. ²Tiwya tak ro mkair reto make anu misti anu ja bno iro. Tibyo meen bhai. Menohe mfo refo anu bhai su bsya Kristus Yesus oh. Tibyo Har ro Tuhan mno re tak ro mkair reto make anu matak u fee. Har ro Tuhan mno re anu bmo mam iso ro moof. Meen anu bhai fee, bhau hame wajin. ³Anu raa sai. Feto to bhaf wanu beta tiwya mkair. Tna Watum ro Musa matak mno anu boof fee. Matak misoh iranya ranu bsya Allah fee ye. Feto to Allah yesait yisoh yiranya ysya anu. Ybis Ku rAit haberek yamo raa sai yfi raa makin ro ja mno iro. Tna yroh yama tabam refo. Yama yake iro wanu, raa ro bno iro. Yake mkah yetsu rAit. Allah yno safo mana wanu ymit kʼYesus oh meto. ⁴Tna Yesus yroh afo re Ait kro Watum ro Musa mnan si ye. Yno feto afo re bombra ro Watum reto msi kʼanu bno to, Ait yno beta oh kʼanu. Mfo refo anu raa ro ja bri bo Har ro Tuhan mbis bno. Tna anu bri tak ro mkair reto u fee. Tna anu bhau bno bo ro tabam sai u fee ye. ⁵Raa ro tabam refo to, ja ana makit wana mnaut bo ro tabam refo sai. Menohe raa ro Har ro Tuhan mbo to, ja ana makit wana mnaut bo ro Har reto ksoh. ⁶Tna raa ro makit wana to, ja mnaut bo ro tabam refo sai to, ana weto meen mhai tna mkai kair. Menohe raa ro makit wana to, ja Har ro Tuhan mbo matak to, kbe ana mhaf tnok tna meen mhau hame wajin ye. ⁷Tna ana ro ja mnaut bo tabam refo to ana mhoh byoh kʼAllah. Tna ana weto mtai kro Watum rAit fee tibyo ana hawe bo mari Watum rAit ye. ⁸Feto oh mi raa ro tabam refo to mtai mno Allah yhaf mnan fee.

⁹Menohe soh Har ro Tuhan mhau msya anu to, Har rAit mbo anu ye. Anu fo raa ro tabam sai fee. Soh Har ro Kristus mhau msya raa to fee, ana weto to raa ro Kristus wAit fee ye. ¹⁰Iro misti re raa beta metsu wana to, kbe mhai. Menohe soh Har ro Kristus mhau mam anu nhaf mato to, kbe netsu sai aran mhai. Allah ymat mees ro Kristus tibyo yawe anu to nfi raa ro mhaf moof ati. Tibyo Har rAit meen mno anu naam mamo snok hame wajin. ¹¹Allah yno re Yesus yrok yasen. Tna soh Har rAit mhau msya anu to, kbe bi Ait yno anu netsu wanu ro mhai to, mrok masen ye. Allah ro yno re Kristus yrok yasen to, kbe yno re anu nrok nsen ye. Yno feto mkah Har rAit ro mhau msya anu to.

¹²Tao na wojõ: Riwai tkyas tawe, “Tiwya tak ro mkair reto mbo anu misti re anu nno bo ro tabam sai. Menohe mfo refo anu nmo sryan ro tak reto u fee.” ¹³Awya ro ja yno bo ro tabam sai to meen yhai tibyo. Menohe soh anu bitsre bo knik-knak ro mkair-kar to, beak fari mkah tak Har ro Tuhan to, kbe meen anu nhau hame wajin. ¹⁴Awya sai ro yari bo ro Har rAit mkyas tna ybo yno to ait oh mi ku ro Allah rAit. ¹⁵Allah yayõ anu ytos. Tibyo anu btu Ait bwe, “Abba, Bja!” Mfo refo anu ksoh bmo bo kʼAllah mfi ku sait ja ksoh yamo yo kʼyaja. Har rAit mno re anu to waa bo nmo no kʼAit to fee. Tiwya anu bmo sryan ro tak mkair reto mbo. Tibyo anu waa bo meen bhai tibyo. Menohe mfo refo anu waa u fee. ¹⁶Anu bhaf wanu mhar mawe anu fo ku ro Allah wAit oh. Tna Har rAit mkyas mnan anya ye mawe kʼanu mawe anu ku ro Allah wAit tu oh. ¹⁷Soh anu bmo ku ro Allah wAit to, kbe anu bhaf bse bo yase rAit ye. Bo yase reto kbe Ait ysan Kristus tna ysan kʼanu ye. Tna bo ro samyoh mai kʼanu ye mnan anya msya bo ro samyoh ro tiwya mai Kristus to ye. Anu bsom bo ro samyoh feto tibyo kbe anu bkai bo yase rAit reto ye.

Anu beroh binaut bombra ro meen Allah siwyan kʼanu

¹⁸Tna jõ tnaut tawe bo samyoh ro matu mai kʼanu weto to bo maku sai. Menohe bo yase ro Allah rAit to, ro kbe anu fri to, bo msai toni.

¹⁹Bombra beta ro Allah yfen mam tabam refo to, mhau sraujin mawe tija fooh Allah yasbrah ku wAit yoo bo yase rAit yse kʼana baro. ^20-21Tiwya tinyi to, Allah sikowah-kawah bombra ro Ait yfen beta. Kak msya, safom, ora, syoh bo to, Ait yno bo mbtek mai bo weto beta. Tibyo bo weto taro kbe mhai, taro to kbe rabo, tna taro to kbe mnis-nas feto ye.8:20-21 Kejadian 3:17-19 mkyas ati ro Allah sikowah bombra ro tabam refo. Tna mfi bo bombra beta weto mkyas bo to, kbe ana mawe kʼanu mawe ana hawe bo ro Allah yno btek sikowah-kawah ana reto. Menohe Allah yno oh mamyot ksoh rAit sai. Tna mfo refo to, bombra weto beta ste minaut mawe meen Allah yitsre bo weto mbam bo ro btek mai reto ye. Tibyo bo weto mbros tna msya ku ro Allah wAit su to, kbe mkai bo yase ro Allah ye. ²²Anu bhar bwe bombra beta ro Allah yfen to ste wea. Bo weto mwof ti ro ana mbros mbam bo ro make ana. Tiwya tinyi mamo snok mfo refo to, bombra weto to, sraujin tna mkai bo fares. Reto mfi fnya ja mari kborham wia tna mawe fooh re mabe ku to! ²³Bo weto mesait aran sai mawe fooh to fee. Anu beta bwe fooh re Allah yoo bo weto ysan kʼanu ye. Allah yoo Har rAit yse kʼanu oh. Yse kʼanu matim wia afo re anu bhar bo yase ro Allah kebet wia matim. Tibyo anu ste ati ro Ait yoo bo yase rAit ro msis yuur beta. Feto tibyo anu bwia mam anu bhaf mato tna srau kero bwe fooh re anu, ku ro Allah yayõ to, bmo bhau bsya Ait tna kbe bkai betsu wanu ro moof. ²⁴Mbam ati ro tiwya anu smot Kristus tibyo bkai riof rAit oh to, mamo snok mfo refo to anu ste binaut bwe meen anu bkai bombra ro Ait siwyan kʼanu. (Mfi raa mkai bo ro ana nksoh oh to, kbe ana beroh minaut bo reto aro u fee.) ²⁵Menohe anu bkai bo weto fefares. Feto to mfo refo anu beroh bsom bo ro samyoh tna ste binaut bombra ro meen Allah siwyan kʼanu meto.

²⁶Wore arin mkair tibyo bmos wanu ssafo fee to, rau ro moof anu binaut bo ro meen Allah siwyan kʼanu meto. Wore weto to, anu wase skabuk bkyas bo bawya kʼAllah. Menohe Har rAit mhar bonaut wanu oh. Tibyo Har mesait skabuk anu kʼAllah kaket miwrek ja anu raa btai skabuk to. ²⁷Allah ja ymat sas anu bhaf, srau mato wanu to. Tna yhar bo ro Har rAit soh-soh mawe to ye. Feto to anu, raa ro Allah wAit to, Har rAit ja skabuk anu mamyot bo ro Allah yhaf ksoh yno kʼanu ye. ²⁸Anu bhar bwe: Awya ro yhafri Allah tna Allah ysok ait yamo raa wAit oh to, Allah ysaim bo bawya ro kbe mama mo kʼraa retait ye. Bo ro moof ye tna bo ro matu mai kʼait ye. Allah ysaim bo weto kaket re kbe makit rau to moof kʼraa retait. ²⁹Tabam refo Allah ysair fefares to, Ait ysok raa ro kbe yatmof. Ysok ana feto yawe ana weto oh mi meen mamo mnan fi Ku rAit, Yesus. Allah yawe Ku bum rAit yatim wia. Tna raa rouu mawat mamo ku ro Allah wAit ye. Meen mamo mrof mhau msya Ait mnan fi raa mana sau su. ³⁰Tna raa ro Allah ysok weto oh mi Ait ytu mama mo kʼAit. Tna ana weto oh mi Ait ymat mees ro Yesus yawe ana mfi raa ro mhaf moof ati. Tna ana weto oh mi meen mkai bo yase rAit ro mninon.

Allah yno bo ro moof kʼanu mninon

³¹Allah yno bo ro moof kʼanu mninon. Feto to anu bhar bwe Allah yros tis yban anu meto. Feto to kbe awya yatak yiwer anu? ³²Allah yhaf mabe Ku rAit to fee. Ysan Ait yroh yama yajat mkah yfes anu beta. Feto to anu bhar bwe Ait yatmof anu. Kbe anu bhau to bo mabut fee. Tibyo meen ysan bonaut rouu beta kʼanu ye tu oh. ³³Tna Allah oh mi ymat mees ro Yesus yawe anu bfi raa ro mhaf moof ati. Feto to awya ro yaun boun kʼanu raa ro Allah ysok oh to? Kbe ait retait yatak fee. ³⁴Anu oh mi bno iro. Menohe Kristus Yesus yesait raa mame yajat. Ait yoo yetsu rait yake iro wanu beta. Tna fo Ait yrok yasen ye. Yrok yasen tna yaut yamo hre ysya Allah mam sawro rAit. Hre ysya Allah mam hroh ro tem ati; hroh ro mase reto. Yesus yhau mam tno yban anu. Feto to awya ro ymit safo kʼanu to, yatak fee. ³⁵Bo bawya kbe mno wa hafri ro Kristus kʼanu to? Kbe Ait yhafri anu yum! Kbe bo mama mai kʼanu taro, menohe Kristus yhafri anu to fares. Mfi bo make anu oo, bo mno yoot anu oo, haisre mama mai kʼanu oo, ratan ro byum marak oo, safo mama mai kʼanu oo, raa mame anya bo to, kbe Kristus tait yhafri anu fares. ³⁶Tiwya raa skabuk Allah mam Bokom rAit mawe fefo:

“Amu kro Nyõ oh mi raa taro kmo amu yoyo, mawe mame amu njat. Amu fo nnan anya sai nnan domba ro ja raa ktan.”

Mazmur 44:23

³⁷Bo bawya ro mai kʼanu to bnaut yyi ma. Bhar bwe Kristus yhafri anu fares. Tna Kristus yatak rAit mno re tis rau to anu bros btak abyõ. ³⁸Reto oh mi jõ thar tawe bo aro matak re mno Allah yitsre anu to fee. Mfi bo anu bhai oo, bhau baam bo to, kbe Ait yitsre anu fee. Malaikat oo, kabes bo to matak fee. Bombra ro mama mai kʼanu mkah ayõ ro ifo tna ayõ ro meen mama wono beta to, kbe mno re Ait yitsre anu fee. Bo ro matak toni mam tabam refo aro kbe mno anu to, Ait yitsre anu fee ye. ³⁹Bo ro mhau mam uu matak re mno Ait yitsre anu fee. Bo ro mhau mam tite to, matak fee ye. Bo ro Allah yfen beta to aro matak miwer Ait fee ye. Allah yhafri anu yum. Kristus Yesus fi Tuhan ranu. Anu bmat bo ro Kristus yno tibyo bhar bwe Allah yhafri anu toni syok.

Allah ysok raa mana ro Israel

¹Taja, tme, tao, tano na; bo ro jõ, Paulus, tkyas kʼanu fo jõ sioh fee. Kristus ysya Har ro Allah to mhar mawe jõ tkyas bo refo mkah thaf ro moof. Bo tkyas to mabo yum. ^2-3Jõ tnaut raa ro Israel,9:2-3 Tiwya Allah ytu Yakub yawe yasom rait Israel ye. Feto to kube rait to, raa mtu mawe raa ro Yahudi ye tna msya raa ro Israel ye. raa mana wojõ to, jõ sraujin toni yoyo. Jõ tawe soh Allah ksoh mi yno ayoh mroh kʼjõ rof re jõ tkai kair tna ana weto mkai riof to jõ ksoh. He mfe. ⁴Tiwya Allah ysok ana, raa mana ro Israel to, yse hayah tna yno bo moof kʼana ye. Ait yayõ ana re ana mamo ku wAit. Ait yerif bo yase rAit kʼana. Ait ysi bo kʼana. Ait yoo Watum ro Musa yee kʼana. Ait yerif iso re ana skabuk Ait mam Samu rAit ro mbau. Tna Ait yawe kbe yno bo ro moof kʼana ye. ⁵Raa ro Israel, hohos wana to, raa ro masom.9:5 Bi Abraham, Ishak, msya,Yakub. Tna Mesias tait raa ro Israel ye. Yme msya bi ro tiwya ytos Ait to, wore wo Kristus yamaʼt tabam refo: Ana weto to raa ro Israel ye. Kristus tait Allah ro ybo bombra beta. Tna kbe raa mbaut bi Ait mamo snok mam meen hame wajin. Amin: Mabo oh!

⁶Feto to tiwya Allah yawe yno bo ro moof kʼraa ro Israel. Yatem roro re yno fe mfe a? Yatem roro fee! Menohe raa mana ro Israel beta mamo raa ro Allah wAit ro wotur fee. Allah ysok raa to, ymat raa mana sai aran fee. Ana ro Ait ysok oh mi mamo raa wAit to.9:6 Roma 2:28,29; Galatia 6:16.⁷Nmat kube ro Abraham yabe: Ana beta to Allah ytu yawe ‘Abraham yare na ro wotur fee’. Allah yawe kʼAbraham yawe,

“Kbe jõ tmat kube wonyõ ro Ishak yabe, ana mesait aran oh mi ttu ku woJõ.”

Kejadian 21:12

⁸Au oh mi ku ro Abraham wAit beta mamo ku ro Allah fee. Tiwya Allah ysi bo kʼAbraham yawe meen ait yabe ku sait. Ku ro tii ysi retait tait oh mi ku ro krek waan ro yaja. Yao ro yabi fee. Feto ye mfo wefo to raa ro tii Allah ysi weto oh mi Ait ytu yawe ku wAit. ⁹Tiwya Allah ysi bo kʼAbraham yawe,

“Tahun rouu Jõ thah te tama to kʼnyõ. Kbe tama tmat ku mees sait. Ku ait ro nyõ nsya Sara nbe oh.”

Kejadian 18:10

¹⁰Nmat kukek ro Ishak yabe ye: Ishak tait anu hohos ranu ye. Ait yoo Ribka tna au mhaf. Tna mabe ku mabo ewok mam ayõ sau reto ye. ^11,12Fai au mabe ku weto fefares tna Allah yawe kʼau yawe,

“Ku ro nabe ytek yatim to, kbe yamo sryan ro yari bo kʼait ro ytek tis yrof.”

Kejadian 25:23

Ku mabo ewok reto au mabe fefares. Ana mno bo ro moof aro fefares tna bo ro mkair aro fefares ye. Menohe Allah ysok ku sait. Ysok Yakub to ku retait ja yno bo moof fe mfe a? Mfe. Allah ysok Yakub fyi? Ysok Yakub mamyot si bonaut rAit sai. Allah yhar bo rAit oh. ¹³Reto oh mi Allah ykyas mam bokom rAit yawe,

“Jõ tatmof Yakub tna Jõ knait Esau.”

Maleakhi 1:2-3

^14,15Feto ye, tiwya Allah yawe kʼMusa yawe,

“Jõ tsok raa taro tawe tatmof ana. Soh tawe tsok raa weto tno bo ro moof kʼana to, kbe tno sai.”

Keluaran 33:19

Feto to anu bkyas bwe Allah yno bo ro mkair fe mfe a? Allah yno bo ro mkair fee saut! ¹⁶Allah ksoh ysok raa ro kbe mamo ku wAit to, ysok ana mamyot bo ro ana mno to fee. Ana hamer mamo raa wAit oh mi Ait ysok ana fee ye. Allah ysok tna yatmof raa mamyot Ait ksoh rAit sai. ¹⁷Bokom ro Allah mawe,

“Tiwya Allah yawe kʼraja ro Mesir yawe, ‘Jõ tno re nyõ namo aban mana nbo raa ro Mesir beta. Tna Jõ tisti bo msai mbtek mai kʼnyõ. Jõ tno feto oh mi kbe raa beta mmat tna mhar tatak aJõ. Mhar mawe Jõ fi raa ro tase tbo raja ye tna tbo raa beta ye. Tibyo kbe raa mamo mkyas Jõ tasom aJõ kʼraa ro tabam refo beta.’”

Keluaran 9:16

¹⁸Feto to anu bhar bwe Allah ysok raa taro yawe Ait yatmof ana. Tna taro ysok to, yno re ana mimara mtuk mnan fi raja ro Mesir retait.

¹⁹Menohe anu sait santri bo ysya jõ yawe feto rauk, yawe: “Aha! Soh Allah ksoh rAit sai yno raa taro mimara mtuk to, tibyo mako hawe sai bo ro Allah yawe to mabo tu. Tis rau Ait ymit safo mana kʼraa weto yno fyi?” ²⁰Nkyas bo feto to ma! Anu raa tuu ro tabam refo sai. Anu to raa ro Allah yfen. Bofen ro ait sait yfen to ja masen hafrah bo si kʼait ro yfen bo reto to fee. Nno be bo ro yfen reto mhafrah mawe, “Nyõ nfen jõ mfi fefo fyi?” ²¹Nnaut raa ro ja mabah koh tna mfen mangkuk bo (tukang periuk). Mfi bo raa sait yamo yabah koh baro. Yoo tna yihabah yse mam kbair ewok. Tna kbair ro sau to, yoo yfen bo ro moof. Tna kbair ro ewok to, ait yoo yfen bo ro mkair-kar sai. Yfen bo mamyot bawya ro ait ksoh sai mam yhaf mato rait. ²²Feto ye Allah oh mi yfen anu raa. Ait yfen raa taro to, yawe Ait kmo ana. Yhar yawe meen yno bo ro msai mbtek mai kʼana yum. Ait yase yno bo kʼraa mamyot Ait ksoh rAit sai. Menohe Ait yhau kanyin toni wia sai. ²³Ait kanyin wia afo re kbe raa taro mmat bo yase rAit. Mmat bo yase rAit ro miwer toni. Raa beta to, mkbair ewok. Ait ysok mkbair sau to yawe yatmof ana. Yatmof ana tibyo mkai riof ro mase. Mkbair ro mkai riof reto to, mhar mawe mkbair jaro mkai bo ro mkair-kar. Tibyo mkbair ro mkai riof mrok mhar mawe bo yase ro Allah to mase toni syok. ²⁴Tna anu oh mi mkbair ro Allah yatmof reto. Ait ytu anu bbam raa mana ro Yahudi taro ye tna anu bbam raa mana roto taro ye. Yawe anu beta kbe bmat bo yase rAit. ²⁵Tiwya Allah ykyas bo reto mam bokom ro nabi Hosea yawe,

“Raa ro tiwya raa woJõ to fee, meen jõ ttu ana re kbe ana mama mo kʼJõ tna mamo raa woJõ ye. Tna raa ro tiwya jõ thafri fee, meen jõ thafri ana ye.”

Hosea 2:22

²⁶“Tiwya Allah yawe kʼraa ro mhau mam rabin sau to yawe, ‘Anu to raa mana woJõ to fee!’ Menohe meen kbe Ait yawe kʼraa weto yawe, ‘Jõ fi Allah ro yaam. Tawe kʼanu tawe, “Mfo wefo anu nmo raa mana woJõ.”’”

Hosea 1:10

²⁷Tna nabi Yesaya ykyas raa ro Israel yawe,

“Ku be ro bi Israel to, msis bia mfi snyik makan ro ftau mboh mam sawan maam. Menohe ana kebet aran sai kbe mkai riof. ²⁸Kbe Allah ymit safo kʼraa ro tabam refo. Yno bo mbtek mai kʼana mnan si. Yno bo mbtek mai kʼana abut sai. Tibyo kube ro bi Israel kebet aran sai kbe mkai riof.”

Yesaya 10:22-23

²⁹Nabi Yesaya yawe tinyi yawe kbe Allah yatmof raa ro Israel baro, yawe,

“Allah tait yase ybo bombra beta. Oos Ait maami yno raa wanu baro bhau, maami anu beta safe mkak bnan fi raa ro Sodom msya Gomora bo oh.”

Yesaya 1:9

Allah yawe raa ro Israel mhaf moof ati to fee

³⁰Feto to, anu bhar bwe fefo, “Raa ro wase agama Yahudi to, tiwya ana saso iso re mamo mhaf moof to fee. Ana saso fee, menohe ana smot Kristus tna mkai mhaf ro moof mam iso reto: Allah ymat mees ro Yesus tibyo yawe ana mfi raa ro mhaf moof ati meto. ³¹Tna raa ro Israel tomer kro Watum ro Musa re kbe Allah ymat ana yawe ana raa ro mhaf moof. Menohe mfe. Ana mkai fee. Allah ymat ana yawe ana mhaf moof to fee ye.” ³²Fyi re ana weto mamo mhaf moof to fee? Ana mamo iso ro sre: Ja ana mnaut mawe ana kro Watum ro Musa kaket tibyo mkai riof. He mfe. Iso ro raa smot Kristus to, ana hawe bo kro. Raa fret bo mawe fraa sau burut wa iso ro ana mamo. Tibyo ana wasim tna mbtek mawe.9:32 Yesus Kristus tait ynan fi fraa reto. Raa ro agama Yahudi (au oh mi raa ro Israel) mkyas mawe Yesus fi Kristus ro Allah ysok mkah bo yoo riof ro mase yee kʼraa to fee. Sion mkyas tabam ro Allah rAit. Raa taro mkyas tabam ro Israel to mtu masom Sion ye.³³Tna bo reto to, mabo oh mnan si tiwya Bokom ro Allah mkyas matim wia:

“Jõ too fraa sau tse mam Sion. Fraa reto mburut iso wa. Tna raa ro Yahudi wasim fraa reto tibyo mbtek mawe. Menohe raa ro smot ‘Fraa’ reto to, meen manwaruk fee.”

Yesaya 28:16

¹Taja, tme, tao, tano na; jõ tnaut raa ro Israel to, srau hri. Tna jõ skabuk soh-soh Allah tawe yoo riof yee kʼana ye. ²Jõ thar tawe ana safo triar mno bo ro ana mnaut mawe Allah ksoh. Menohe ana wase bo ro Allah ksoh. ³Allah yno iso re kbe Ait yawe raa mamo mhaf moof. Menohe raa wase iso rAit reto. Tna ana siko mamo mhaf moof mkah mamo mam iso rana mesait, iso roto. Tibyo ana hawe bo mamo mam iso ro Allah yerif kʼana re mamo mhaf moof.

Raa ro mhaf moof ati

⁴Ana ro Israel weto siko kro Watum ro Musa mawe kbe ana mesait misoh mhaf wana. Menohe anu fo smot Kristus. Reto oh mi Allah ymat mees ro Yesus tibyo yawe anu fo, bfi raa ro mhaf moof ati oh. Tibyo awya sai ro smot Kristus sai to, kro Watum ro Musa u fee. ⁵Tiwya Musa ykom yawe,

“Awya ro ksoh yhaf moof mkah bo kro Watum ro Musa to, yako hawe sai kbe yari tna kro Watum ro Musa reto beta, ybo yno mnan si.”

Imamat 18:5

⁶Menohe mfo refo anu smot Kristus tibyo Allah ymat anu yawe anu fo raa ro bhaf moof mnan si oh meto. Kbe anu bno bawya naut u? Anu fo raa tu ro tabam refo sai. Mfi bo tiwya watum ro Allah mawe, anu sait ytai yamoʼt sawro ro Allah tna saso Kristus fee. Tna ybis Ait yroh yamaʼt tabam refo fee ye. Raa sait aro ytai yno feto fee. ⁷Tna anu sait ytai yroh yamoʼt sawro ro hai mam ti no tna saso Kristus re tubat Ait to fee ye. Raa sait aro ytai yno feto fee.10:7 Ulangan 30:12-14.⁸Bokom ro Allah mawe, “Bokyas ro Allah reto mhau nkene sai. Tna bokyas reto anu nkyas ye tna anu nhar mam nhaf mato wanu ye.” Tna bokyas reto amu nbo nkyas ye nwe kbe raa smot Yesus. ⁹Au oh mi awya sai ro hrenaut fee, menohe ykyas abyõ kʼraa yawe, “Yesus tait yamo Tuhan ro ybo jõ.” Tna soh ait yhar mam yhaf mato yawe, Yesus yajat tna Allah yno Ait yrok yasen; kbe meen ait retait ykai riof. ¹⁰Jõ tkyas u tawe soh raa sait ksoh yawe Allah ymat ait yfi raa ro mhaf moof to, kbe ait yno bo bawya? Soh ait smot Yesus mam yhaf mato rait to, kbe Allah yawe ait yfi raa ro mhaf moof. Tna soh ykyas abyõ yawe, “Yesus yamo Tuhan ro ybo jõ.” ykyas mam wore raa mros mmat to, kbe meen ait ykai riof. ¹¹Bokom ro Allah mkyas reto ye mawe,

“Awya sai ro smot Ait to, meen yanwaruk fee.”

Yesaya 28:16

¹²Allah ymat raa to, raa ro Yahudi ye msya raa mana roto makin ye. Ymat ana yawe ana mnan anya beta sai. Raa sait hayah fee. Raa mkbair ewok weto ye mamo mo kʼAllah mam iso sau reto. Tna Yesus yamo Tuhan ybo ana mkbair ewok weto ye. Ro mayoh kʼAit to, kbe bi Ait yno bo moof msis soh kʼana beta. ¹³Bokom ro Allah mawe,

“Awya sai ro yamo yo kʼTuhan Allah tna ytu yawe ‘Tuhan noo riof nee kʼjõ ye!’ to, kbe meen ait ykai riof.”

Yoel 2:32

¹⁴Menohe raa ro smot Ait fefares to, kbe mayoh bo kʼAit fyi? Tna soh ana wase Ait yasom fefares to, fyi re kbe ana smot Ait? Tna soh raa mamo mkyas Yesus yasom kʼana fefares to, fyi re kbe ana mhar Ait yasom? ¹⁵Tna soh Allah ybis sryan aro mamo fefares to, fyi re sryan mamo mkyas Yesus yasom kʼana? Bokom ro Allah mawe,

“Raa ro makah Bokyas Moof mama mkyas to mno bo moof toni.”

Yesaya 52:7

Raa mana ro Israel hawe smot Kristus

¹⁶Menohe tiwya Allah ybis raa mamo mo kʼraa ro Israel. Tna raa weto mkyas Bokyas ro Moof kʼana oh. Raa mamo mkyas oh menohe raa ro Israel msis hawe bo smot. Tiwya Nabi Yesaya ykyas bo refo yawe, “Tuhan; awya oh mi yari tibyo ybo yno bo ro amu nkyas to?”10:16 Yesaya 53:1.¹⁷Feto to anu bhar bwe, “Ja raa mari Bokyas ro Moof (Injil) reto to wia matim. Mari Bokyas Moof ro Kristus reto tna fo ana mhaf mse Bokyas reto tibyo smot Kristus.” ¹⁸Raa ro Israel weto to mari Bokyas reto oh fe mfe a? Mari oh! Bokom ro Allah mawe,

“Bokyas rana reto to, raa mkyas mamo snok mam tabam refo beta oh. Mamo snok mam arin aso beta oh.”

Mazmur 19:4

¹⁹Fyi, raa ro Israel srau mnaut bo ro ana mari reto to, kaket fe mfe a? Mhar oh. Allah yawe kʼMusa yawe,

“Kbe Jõ tno bo moof kʼraa roto taro. Raa weto tiwya Jõ tsok fee. Tibyo anu, raa woJõ to, kbe nmat tibyo nrok kmo. Kbe jõ tatmof raa mana ro wase Jõ. Feto oh mi tno anu fo nrok kmo.”

Ulangan 32:21

²⁰Feto ye, Allah ybis Yesaya ykom bo ro mai kʼraa ro Israel sau. Tibyo Yesaya waa fee. Tna ykom bo ro Allah ykyas raa ro mne weto yawe,

“Raa ro Yahudi fee ja ana saso Jõ fee. Menohe ana mkai Jõ oh. Ana mayoh bo kʼJõ fee. Menohe Jõ terif Jõ kʼana tibyo ana mhar Jõ.”

Yesaya 65:1

²¹Menohe ykyas raa ro Israel yawe,

“Jõ ttu ana mama mo kʼJõ. Tiwya ttu ooh oh. Menohe ana hawe. Ana to mana mase. Ana raa ro mari bo meto fee.”

Yesaya 65:2

Raa ro Israel kebet baro smot Kristus

¹Feto to fyi? Tiwya Allah yawe suku Israel11:1 Suku reto to, raa mtu masom ewok: ’Israel’ soh mfe ’Yahudi’. Ewok ye mnan anya sai. to raa wAit. Karik Allah yikyak ana fe mfe a? Mfe saut. Nnaut oh: Jõ fi raa ro suku Israel ye. Bi Abraham tait hohos ajõ. Tna jõ tbam ku mbair ro bi Benyamin. ²Allah yikyak raa wAit ro tiwya Ait ysok to fee! Nnaut bokom Allah ro mkyas nabi Elia to. Mkyas mawe nabi Elia ati ro ait skabuk. Tiwya ait skabuk yaun raa ro Israel yawe, ³“Tuhan; raa ro Israel to mame nabi woNyõ oh. Ana mirarin wohat woNyõ oh. Wohat ro raa sgi mkah moo bo mko muum kʼNyõ. Jõ tesait aran thau smot Nyõ fares. Tna mfo refo ana saim mawe mame jõ ye fo.”11:3 1 Raja 19:10.⁴Tna Allah yawe si yawe, “Nyõ nesait kar fee. Jõ tehau raa ro Israel to, mabo 7000 to, smot Jõ fares ye. Tna kabes sau ro masom Baal to, ana mabo 7000 weto smot fee.”11:4 1 Raja 19:18.⁵Mfo refo to mnan feto ye. Raa ro Israel msis hawe bo smot Allah. Menohe ana, raa ro Israel kebet baro to, Allah ysok tibyo yatmof ana fares. ⁶Ait yatmof ana weto fares. Tibyo ysok ana re ysan riof kʼana. Riof reto Ait ysan kʼraa mamyot bo ro moof ja ana mno to fee. Ait yatmof ana sai meto. Soh Ait ymat bo moof ro ja ana mno to, kbe bwe riof to boren ro Ait yaren raa. He mfe.

⁷Feto to fyi? Raa ro Israel msis mkai bo ro ana saso reto to fee. Kebet aran mkai riof sai: Ana ro Allah ysok sai aran mkai riof reto. Tna raa ro Israel msis weto to, Allah yno re ana mrok mana mase tibyo hawe bo mari Watum rAit. ⁸Bokom ro Allah mkyas bo reto ye. Mawe,

“Allah yno re ana mhaf mti. Tibyo ana masu mmat bo fee. Tna ana mimara wana mari bo ro Allah yawe to fee. Tna raa ro Israel mhau feto mamo snok mfo refo ye.”

Ulangan 29:4; Yesaya 29:10

⁹Tna Raja Daud yawe,

“Allah, ska bo kʼana weto: Mam wore raa weto makyõ bokyõ to, nabah kayah tna saro ana re kbe ana mbtek mam kayah reto. Tna sna ana mam wore ana simaut mase. ¹⁰Nno re ana masu mti rof re kbe mhar bo toni ma. Nno re ana masom bo fanes tibyo.”

Mazmur 69:23-24

Meen raa ro Yahudi mashana ye

¹¹Feto to fyi? Raa mana ro Yahudi, Israel to, ana hawe bo smot Yesus. Tibyo Allah beak ana makus. Reto mfi bo ana wasim fraa, tibyo mbtek mawe. Anu nnaut fyi? Allah ymat iro ro ana mno tibyo beak ana mhau makus tibyo fe mfe a? Mfe saut. Ait yawe yno feto afo re riof ro Ait siwyan kʼraa ro Yahudi to, raa ro mbam raa mana roto makin mkai riryõn. Ana weto masen mamo mo kʼAllah. Tibyo meen raa mana ro Yahudi mmat tibyo mhaf sarok tna mashana ye. Raa mana ro Yahudi mashana tibyo meen mesait saso riof ro Allah rAit ye. ¹²Raa mana ro Israel miwer bo ro Allah yawe kʼana. Menohe mafer rau to, raa mana roto fri. Raa mana roto weto mkai riof. Tna soh raa mana ro Israel kbe misoh iranya rana msya Allah to, moof ati. Kbe mafer rau to, moof miwer.

¹³Anu to, nbam raa mana roto. Tna jõ fi, raa ro Allah ybis tama to kʼraa mbam raa mana roto makin. Tamo to kʼraa mana ro Yahudi fee. Tna bo ro jõ tasom refo fo, jõ tbo akah-akah sai. Tna re tkyas bo baro kʼanu mefo: ¹⁴Raa mana ro Yahudi to raa mana ajõ. Menohe jõ tama to kʼanu ro nbam raa mana roto wefo. Jõ tinaut tawe kbe raa ro Yahudi weto mmat he anu nkai riof. Tna ana mesait mnaut mamos wana. Tna kbe ana maam bo riof ro moof reto. Feto kbe ana taro nksoh saso riof ro Allah reto ye. ¹⁵Allah yikyak raa mana ro Israel. Bo ro yno reto misti re ytu raa mbam raa mana roto makin mama mo kʼAit. Tna yisoh iranya wana msya Ait ye. Bo ro Allah yno reto samyoh kʼraa mana ro Israel. Menohe misti mafer ro moof kʼraa mana roto makin. Tna soh raa mana ro Israel kbe haberek mawe Allah yisoh iranya wana msya Ait ye to, fyi? Moof toni! Yoo raa mana ro Israel me mamo raa wAit u. Tna meen, ati ro oon sboh to, kbe Allah tubat raa wAit ro mhai beta mrok masen. ¹⁶Raa mana ro Israel ja mno roti to, ana moo baro msan kʼAllah wia.11:16 Paulus fret bo yawe raa ro agama Yahudi. Tiwya tinyi hohos wana to, Allah ysok yse hayah yawe Abraham, Ishak bo to raa wAit. Feto ye, meen raa ro Yahudi msis yse hayah mfi raa ro Allah wAit ye. Bilangan 15:17-21 Mawe roti bi Allah rAit. Soh ana mse roti baro hayah mkah Allah to, Ait yawe yno re roti ro mhau fares to, ja ana mait oh mi roti ro moof ye. Tna “Mfi bo ara mair to moof, kbe ara ngkre rau to, moof ye.”11:16 Bofret reto mkyas raa mana ro Israel mawe, mfi bo Abraham, Ishak msya hohos rana ro masom tiwya mamo raa ro Allah wAit to, kbe meen raa ro Israel mamo raa ro Allah wAit u ye.

¹⁷Jõ fret bo tawe raa ro Israel beta to mfi ara zaitun ro moof sau. Tna bi Abraham ysya kube wait ro tiwya tinyi smot Allah to mfi bo mtis ro ara reto. Tna ngkre to, mfi bo raa. Menohe mfo refo kube ro Abraham mawat renti (au oh mi raa mana ro Israel) to, hawe bo smot Kristus. Tibyo Allah yoo ana beak fari mfi bo raa beska ara ngkre tna mbeak ye. Tna raa mana roto makin to mfi bo ara zaitun roto sau. Tna ara reto to mkair, mesait mo mam safom sai. Tiwya anu ro nbam raa mana roto to nfi bo ngkre sau mam ara ro mkair reto. Tna anu baro smot Kristus. Tibyo yoo anu tna yake nrat nsya raa wAit ro mbam raa mana ro Israel ye. Raa mana ro Israel weto to, ku wAit ro wotur. Tibyo anu nsya ana nhaf nse bo yase ro Allah siwyan mkah raa mana ro Israel. Anu beta bhaf bse bo yase weto su. ¹⁸Menohe bibi anu abyõ kʼraa ro Israel to ma. Nnaut oh: Anu fo nfi ara zaitun ngkre wau sai. Tna ja ngkre wau weto to mros kar fee. Anu oh mi swior ara zaitun mtis rau to fee. Mtis matam anu oh mi anu nhau naam. ¹⁹Feto to anu ro nbam raa mana roto to, kbe anu nwe, “Ngkre raa mana ro Israel weto, Allah beska beak makus. Allah beak ana weto afo re yoo amu raa mana roto yse shauk yuk ana raa mana ro Israel mhau to riryõn.” ²⁰Bo ro anu nkyas reto to, mabo oh. Menohe nnaut oh: Raa ro Israel weto to ana hawe bo smot Kristus. Tibyo Allah beska ana beak. Tna anu fo smot Kristus. Tibyo Ait yoo anu yse nrat nsya mtis reto. Feto to anu safuk anu nwe anu raa ro noof to ma. Rau ro moof to, anu kaket anu tna waa bi Ait. ²¹Nnaut oh: Raa ro Israel weto to kube bi Abraham ro wotur. Menohe Allah yatmof ana fee. Ana smot Kristus fee tibyo Ait beska ana beak. Yno mnan fi raa msot ara ngkre ro mkair. Feto to, kaket anu! Soh anu hawe bo smot Ait to, kbe Ait yatmof anu fee ye. Kbe Ait beska anu mbeak ye. ²²Feto to anu bmat bwe: Allah tait Raa ro yatmof raa taro ye. Tna Raa ro kmo raa taro ye. Tiwya raa ro mbam raa mana ro Israel taro hawe bo smot Kristus. Tibyo Allah kmo ana. Menohe Ait yatmof anu raa ro nbam raa mana roto weto. Feto to, niwana boatmof rAit ma! Beroh smot Ait renti. Soh mfe to kbe Ait ysot anu beak nkus ye. ²³Feto ye mfi bo raa mana ro Israel haberek tna mama smot Ait to, kbe Ait yoo ana ymit mrat mam mara rau u. Allah tait yatak yno bo reto mabo ye. ²⁴Anu fo nfi ara ngkre ro mbam ara zaitun roto taro sai. Tna ara reto mkair, mesait mo mam safom sai. Menohe Allah yno bo ro msai: Ait yoo anu ymit mam ara zaitun rAit reto. Ait ksoh yno bo reto sai. Feto ye kbe Ait ksoh toni yoo ara kre ro tiwya wotur weto ye ymit u mam ara mara rau reto to tu!

Raa ro Israel kbe mkai riof

²⁵Taja tme tao, tano na; Allah ymat raa mana ro Israel hayah tna ymat raa mana roto makin hayah ye. Jõ tkyas bo refo kʼanu afo re anu nhar kaket. Re kbe anu tawyõ anu ai to ma. Bokyas refo fo, tiwya Allah ymyõt kʼraa. Bo ro Allah ymyõt kʼraa reto oh mi raa mana ro Israel to, mfo refo ana msis to, mhaf matak. Tna raa mana roto to, Allah ytu ana mawat kbe mama. Ytu ana mabo mnan si mama wia tna kbe Allah ytu raa mbam raa mana ro Israel mama mrof naut. ²⁶Reto oh mi raa ro Israel beta to, kbe mamo mo kʼAit tna kbe meen mkai riof rAit. Bokom ro Allah mkyas bo reto mawe,

“Meen Raa Sotak sait ro yoo riof yee kʼraa yama. Yama ybam Sion, sawro rAit, yama. Yama yo kʼanu, kube ro Yakub wait. Tna yno re anu niwana Ait u fee.”

Yesaya 59:20

²⁷“Mam ti weto to Jõ tno bo moof ro tiwya tawe tno kʼana. Au oh mi Jõ skur iro wana beta.”

Yeremia 31:33-34

²⁸Raa ro Israel ja miwana Bokyas Moof ro Yesus. Tibyo mamo byoh kʼAllah. Allah yno feto afo re anu ro nbam raa mana roto kbe nkai mafer ro mase. Menohe tiwya Allah ysi bo kʼAbraham, Ishak, ysya Yakub to. Ana mamo hohos kʼraa ro Israel. Tibyo Allah ysok ana ro Israel tna Ait yhafri ana fares. ²⁹Allah ja ysok raa ro kbe yoo riof yee. Tna riof ro tiwya yawe ysan kʼraa to, Ait yhaf mabe fee. Yno mabo yum oh. ³⁰Tiwya anu ro nbam raa mana roto to, beswan-swan bo ro Allah yawe. Menohe mfo wefo fo, raa ro Israel beswan-swan bo ro Ait yawe. Tibyo Ait yatmof anu. ³¹Mfo refo ana beswan-swan Ait. Tibyo Ait yatmof anu oh. Feto ye kbe meen Ait yatmof ana ye. Kbe Ait yatmof ana mnan anya Ait yatmof anu ye. ³²Allah yfot ybu raa beta su yawe, “Raa ro tabam refo beta beswan-swan Jõ: Raa mana ro Israel ye msya raa mana roto ye.” Yawe feto re kbe meen, ati ro Ait yerif boatmof rAit kʼana to, kbe ana safuk ana fee. Kbe ana beta mhar mawe boatmof rAit sai aran yno riof kʼana.

³³Allah tait raa ro yoof toni! Iso ro Ait yatmof anu to bo msai! Kta ranu oh meto.

“Bo ro Ait yhar to mase. Ait Raa ro srau miyõ toni ye. Tna bo ro Ait saim yno to, raa aro bo hre mmat sas fee. Awya oh mi yhar iso ro Ait yno bo weto to?”

Yesaya 55:8

^34-36Allah yesait oh mi yfen bombra weto beta to. Tna yatak rAit oh mi bombra weto beta mhau fares. Ait ksoh rAit sai yfen bombra weto beta afo re raa mmat tibyo bibi Ait yase rait. Tibyo

“Awya oh mi yhar Tuhan yakit rAit? Awya oh mi watum bo kʼAit to?”

Yesaya 40:13

“Awya ro ja yoo bo yee kʼTuhan tna ye yawe bi Ait yoo bo sroh to?”

Ayub 41:11

Nma, anu bmat sas bo yase rAit tibyo bbaut Ait mamo snok mam meen hame wajin! Amin: Mabo oh!

Allah ksoh re anu bsan bo bawya kʼAit?

¹Taja, tme, tao, tano na; Allah yatmof anu toni. Feto oh mi anu ro nkit maan to, nno bo bawya? Allah yatmof anu feto tibyo jõ sobu anu tawe noo nhaf, srau wanu bo beta nsan kʼAllah ybo. Anu raa wAit to, nhau nno bo wAit sai. Noo nhaf, srau wanu nsan kʼAit fefo fo tna nhau nno bo wAit to, kbe Ait yhaf mnan anu. Tna anu nbaut Allah oh meto ye. ²Ja raa ro tabam refo tko anu kro iso rana su. Nri ana ma! Kaket anu yoyo re kro iso ro tabam refo ma. Menohe nsan nkit msya bonaut wanu to beta kʼAllah yoyo. Nsan kʼAit to, kbe yno bonaut wanu weto to, haberek mrok moof renti. Tibyo kbe nhar bo nno bo mnan si Ait yhaf, srau mato rAit to: Au oh mi anu nhar bo bawya ro Ait yawe moof to. Kbe anu nhar bo bawya ro Ait yhaf ksoh. Kbe anu nhar bo bawya ro moof toni syok.

³Allah tubat jõ tamo raabis rAit. Tibyo ybis jõ yawe tamo tkyas watum rAit fo kʼanu beta. Tawe anu to yok-yok anu toni to ma. Anu smot Kristus tibyo Allah yuumto bouum (karunia) kʼanu oh. Bouum weto Allah ynit kaket saim kʼanu raa sait-sait tna kʼfnya sau-sau feto. Bo ro anu nhar nno kaket to, bouum ro mbam kʼAllah mama. Feto to yok-yok anu toni to ma. ⁴Bouum weto mnan fi raa yetsu rait. Raa yetsu rait to sau aran sai. Menohe yatem oo, yaa oo, yana bo to mrat mam yetsu rait reto. Tna yetsu haber rau to aro hayah-hayah. Tna haber makin weto to, ja mno bo rau hayah-hayah ye. ⁵Feto to anu ye. Anu ro kro Kristus to bsis bia. Menohe anu beta bsya anya bhau su. Mnan fi anu fo betsu sau aran tna anu haber anya. Anu bnah su tna bnaut raa anya ye. ⁶Anu aro sait-sait fri bo ro mbam kʼAllah. Ait yuumto bouum kʼanu sait-sait hayah-hayah ye. Allah yoo tak yee kʼraa taro re ana mari mai ro mbam kʼTuhan tna mkyas bokyas rAit reto kʼraa mfi raa ro nabi. Anu weto to nkyas kaket! Nkyas mamyot si bosmot ranu reto. ⁷Tna anu taro to, Allah yoo tak yee re anu ja nno bo aro rau-rau re nbet raa. Anu weto nsen nbet raa oh! Tna anu taro to, Allah yoo tak yee re anu nmo guru. Anu weto nsen nerif bo kʼraa oh! ⁸Tna anu taro to, soh raa aro sraujin to, ja anu nkyas bo moof afo re ana sorni sraujin wana. Anu weto: Nsen nno feto renti! Tna anu taro to, Allah yno re anu nse bo mawat. Anu weto to natmof raa ro mse bo mabut. Natmof ana mkah nhaf ro mbyõ oh! Tna bi Ait yoo tak yee kʼanu taro re anu nmo aban mana. Anu weto kaket anu re mur-mur nno bo reto oh! Tna anu taro nhar bo nmat raa ro masom bo ro samyoh. Kbe anu weto to natmof ana weto tna nros tis ana mkah simaut mase.

Tomer afo re nhafri raa anya kaket

⁹Nhafri raa anya to kaket. Nno mkah wan-wan to ma. Tna nsok bo ro nwe moof to kaket. Bo ro mkair-kar to, beak fari. Bo ro moof to, nbo nno. ¹⁰Nhafri anya mnan fi ja raa hafri mao mano na wana. Tna nmat anya to kaket ye. Nmat anya mnan fi ana fo raa ro ati miwer nyõ. ¹¹Hawe boh to ma! Nno bo ro Tuhan rAit to nno mur-mur mkah nhaf myoh. ¹²Tna ninaut nwe bombra ro Allah yawe kʼanu to meen mabo. Bo weto oh mi anu simaut mase. Mam wore bo ro samyoh mai kʼanu to, kanyin nsom sai oh. Tna beroh nros skabuk yoyo ye. ¹³Soh anu nmat raa ro Allah wAit tna bo ro ana mse aro mabut to, noo bo nee kʼana. Tna nitrah amah wanu kʼraa ye. ¹⁴Wore raa mno bo mai kʼanu to, skabuk Allah re yno bo moof aro kʼana. Nwe kbe ayoh mroh mai ana to ma. ¹⁵Wore raa simaut mase to, simaut su nsya ana ye. Tna mam wore raa sraujin tna mawia to, hre nwia su nsya ana ye. ¹⁶Nhau nhaf sau su nsya anya. Nnaut nwe anu raa ro nse niwrek raa taro to ma. Niranya nsya raa kinyah. Nnaut nwe anu nhar bo niwer raa taro to ma. ¹⁷Tna soh raa aro mno bo mkair mai kʼanu to, nno bo ska si to ma. Nhau nno bo ro raa beta mnaut mawe moof. ¹⁸Tna nmak nsya raa roto to ma. Saso niranya nsya raa beta. Menohe soh raa aro kmo fares tna hawe me miranya msya anu su to, mhau oh. Kbe anu nisoh iranya reto fyi? ¹⁹Tafoh na wojõ; raa ro mno bo mai kʼanu to, anu nesait ska bo to ma. Mhau kbe Allah kmo ana tna yoo safo mana ymit kʼana weto. Bokom ro Allah mawe:

“Jõ oh mi ska bo tna tno bo ro samyoh mai to. Bo woJõ kbe tno.”

Ulangan 32:35

²⁰Anu nesait ska bo to ma. Menohe nno bo ro moof kʼraa ro mhoh byoh kʼanu. Bokom ro Allah mawe:

“Raa ro mamo byoh kʼanu to, soh ana mhai sre to, noo boit nee kʼana mait. Tna soh mhai sbit to, noo aya nee kʼana mata. Soh anu nno feto to, kbe ana hrenaut.”12:20 Tiwya raa ro Yahudi fret bo mawe raa moo kaan mse raa retait mti.

Amos 25:21-22

²¹Nno ma be bo ro raa mno mkair to, miwro anu re kbe anu nno safo ye. Rau ro moof to, beroh nno bo ro moof. Feto kbe tis rau to safo mroh mam mte. Tna bo ro moof to, mros abyõ matak.

Nri bo ro Pemerintah mawe

¹Tna pemerintah ro mase to, anu to sait-sait nri bo pemerintah ro mbo anu to mawe. Pemerintah weto beta to mesait mbrah ai fee. Allah oh mi yoo yatak yee kʼpemerintah weto tibyo ana mros. Pemerintah ro mfo refo to ye, Allah oh mi yesait tubat sawyah to. ²Feto to awya ro beswan bo maja ro pemerintah to, ait beswan bo maja ro Allah oh meto. Tna awya ro yari bo ro pemerintah mawe to fee, kbe Allah yoo safo mana ymit kʼait retait. ³Awya ro yno bo moof to ait waa fee. Yhar yawe pemerintah kbe mmit safo mana kʼait aro fee. Menohe ait ro ja yno bo mkair saah ait waa. Kbe pemerintah mmit safo mana kʼait tu oh. Soh anu hawe bo waa pemerintah to, nno bo ro moof tibyo pemerintah kbe bibi anu.

⁴Raa ro pemerintah to sryan ro Allah ybis to afo re ana mno bo moof kʼanu. Menohe mfi bo anu nno safo to, pemerintah to mi anu waa to. Pemerintah mros matak re kbe mmit safo kʼraa ro mno safo. Tna Allah oh mi Raa ro yoo tak reto yee kʼpemerintah.⁵Feto to nri bo ro pemerintah mawe. Nri afo re pemerintah mmit safo kʼanu fee. Tna nri ye afo re anu nhaf ranu bhah anu fee.

⁶Reto oh mi anu bero namabyoh nee pemerintah. Raa ro pemerintah to sryan ro Allah ybis mkah armato ro pemerintah.⁷Bo bawya ro pemerintah msi mawe anu ktan to noo nee oh: Namabyoh ye tna cukai ye. Tna raa ro mamo aban mana mbo anu to, nri bo ro ana mawe tna nbo nno kaket. Tna raa ro manes to, nmat ana beta kaket ye.

Watum ro Allah maja rau oh mi raa matmof anya

⁸Anu aro bo nno bo fyah kʼawya-kawa bo ye ma. Menohe bo sau noo nee kʼraa yoyo: Au oh mi noo nhaf anyõ nee kʼraa yoyo. Awya ro yatmof raa anya, ait tait raa ro yno Watum ro Musa maja rau mnan si oh meto. Feto to tawe kʼanu tawe beroh natmof raa anya yoyo. ⁹Watum ro Allah mawe,

“Nwyah ma. Nme raa ma. Nsyõf bo raa ma. Naam bo raa ma.”

Keluaran 20:13-17

Tna Watum taro sor to, maja wau weto mberur beta mnan anya. Au oh mi:

“Natmof raa anya kaket mnan fi anu ja natmof netsu wanu mesait ai.”

Imamat 19:18

¹⁰Raa ro matmof raa anya to mno bo ro mkair mai kʼraa anya to fee meto. Feto to awya ro ja yatmof raa anya, ait yno Watum ro Allah maja wau mnan si oh meto. ¹¹Tii tinyi, ati ro anu nashana smot Yesus to, tii oon sboh rau mama fefares. Menohe mfo refo anu bhar bwe ti ro anu bkai riof to mama ngkene baro oh. Feto to hawe boh to ma! Nrok nsen tna nbo bo riwai tawe kʼanu to, nno weto beta kaket.

¹²Mti ngkine mwo mamo oh tna reen fo mama. Bo ro mkair raa mno to, ja ana mno mam wore wo mamur fares. Feto to nma, nitsre bo mkair ro anu nno to beak makus. Tna nno bo ro Allah ksoh. Bno feto kbe anu bno wa bo ro mkair mnan fi raa ro sbe ja myum ratan ro besi. Myum ratan ro besi feto, tibyo raa mama mame ana majat fee. ¹³Nma, bno bo mfi ja raa ro mhau mam wore wo maah. Nkyõ bokyõ mnin-nin to ma. Nbisir to ma. Nus-as bo ma. Nsrau oot-oot fnya raa oo ku ano bo to tna nno ana to ma. Nhau ntoh anya to ma. Tna naam bo ro raa to ma. ¹⁴Rau ro moof to, anu nhau srau sau, nhaf sau su nsya Kristus Yesus Tuhan ranu. Tna kaket anu be kbe nri bo ro nasmamo weto to tibyo nno.

Bo ro mbau

¹Raa taro smot Kristus, menohe bosmot wana matak fefares. Ana weto mawe bo aro mbau kʼana fares. Nitrah nhaf wanu tna niranya nsya ana. Nhau hafrah bo ro ana mnaut weto to ma. ²Raa taro to, sohmaam bo knik-knak sai mkah mhaf ro moof. Tna taro to, bosmot wana matak fefares. Ana mbau bo mabo kak aro rau-rau. Ja ana mabat bobat mkah boit sai. ³Allah ymat tna yiranya ysya ana mbewok ye. Feto to anu aro nno nnan fi bi Ait ye fea! Anu ro ja sohmaam bo knik-knak to, niwana ana ro mabat bobat sai to ma! Tna ro nbat bobat sai to, nmat ana ro sohmaam bo knik-knak beta weto to, nwe ana mno iro meto to ma! ⁴Allah oh mi Raa ro ybo ana. Anu fee! Ana weto mros matak soh mfe mbtek to, bo ro Tuhan rAit sai! Tna Ait fi yatak yno re ana mros matak tna smot Ait kaket.

⁵Tna raa taro mnaut mawe ayõ aro to, mbau tibyo raa mamo mkah bo fee tna ayõ aro to mbau fee. Tna raa taro mnaut mawe ayõ ro mbau to aro u fee. Rau ro ati to, anu nno bo ro nhaf mato wonyõ mesait mbis. ⁶Ro mnaut mam mhaf mato mawe, “Ayõ sau to hayah, ayõ reto to mbau.” Bo ro ana mno reto, ana mno mkah bo mbaut Tuhan. Tna taro mnaut mawe, “Allah yoo kak yee re jõ tabo. Tibyo tayoh asik mase kʼbi Ait.” Bo reto ait yno mkah bo mbaut Tuhan ye. Tna raa taro to ja mabo kak fee. Mno feto mkah bo mbaut Tuhan ye. Ana weto mawe, “Allah yoo bobat wefo yee kʼanu nbat. Tibyo amu nyoh asik mase kʼbi Ait ye.” ⁷Wore wo anu sait-sait bhau mam tabam refo fo, Tuhan oh mi ybo anu ybis. Tna wore anu sait-sait bhai to Tuhan oh mi ybo anu ybis. Anu bhau bno bo ro anu besait ksoh to fee. ⁸Anu bhau baam to, tomer bno bo ro Tuhan yhaf mnan. Tna mamo snok mam ati ro anu bhai to, anu ksoh bno bo ro Tuhan yhaf mnan yum ye. Wore anu bhau fares tna wore anu bhai to, Tuhan oh mi Raa ro ybo anu. ⁹Reto oh mi Kristus yhai tna yrok yasen to: Yno feto re Ait yamo Tuhan tna anu beta bmo sryan wAit ro bri bo Ait ybis kʼanu. Feto mam ati ro anu raa bhau fares ye tna mam ati ro anu bhai ye. ¹⁰Feto to mfi bo ro riwai tkyas raa taro mnaut mawe bo sau to mbau. Tna anu nmat tibyo anu hafrah ana. Anu hafrah sryan ro Kristus wAit weto to, nno fyi meto ee! Mkah bawya anu nmat raa anya ro kro Kristus to, nwe bo ro ana mno reto to iro meto! Allah yesait oh mi meen ytu srah ranu aro sait-sait. ¹¹Bokom ro Allah mkyas bo ro meen mabo mawe,

“Tuhan ro yaam tait yawe yum oh yawe, ‘Kbe meen raa sait-sait yamo yjit yimna tna heyut ymat Jõ. Tna raa sait-sait kbe yhar tna yawe, “Mabo oh, Nyõ fi Allah.”’”

Yesaya 45:23

¹²Allah yawe feto to, anu bhar bwe meen anu fo sait-sait bras abyõ kʼAllah bwe, “Ae, tiwya jõ tno bo wefo beta.”

Nisti re raa roto mno iro to ma

¹³Feto to anu nuun-an anya nkyas bo ro mbau aro u to ma. Nuun-an bo weto ma be kbe anu ro kro Kristus to nwe kair anya nwe, “Bo ro nno reto to iro meto!” Nno be anu nno wa iranya raa msya Allah meto.

¹⁴Jõ fi raa ro thaf, srau sau su tsya Tuhan Yesus. Tna thar tawe bo sohmaam aro to mbau kʼanu fee. Menohe soh anu sait ynaut mam yhaf mato rait yawe, “Boit refo fo mbau kʼjõ.” Nhar nwe boit reto mhau mbau kʼait fares meto. ¹⁵Mfi bo anu ja sohmaam bo sau, menohe bo sohmaam reto to, ja mbau kʼraa taro ro kro Kristus. Soh anu beroh sohmaam bo reto mam wore wo raa weto mmat to, anu nno bo mkair mai kʼana oh meto. Nno feto to, anu natmof raa weto kaket fee. Kristus yajat afo re yyon iro wana weto ye. Nno be anu nisti tna ana me mbtek mam iro. ¹⁶Bo ro anu nwe moof weto to, Allah yawe anu nno saah. Menohe ro moof to, anu nno ma re kbe raa ro ja mbau bo reto to, kbe mkyas-kas anu fee. ¹⁷Anu bhau mam raa mana ro Allah yamo Raja ybo to, ro ati oh mefo: Anu to bhau bhaf sau su bsya Har rAit. Tibyo bhau bhaf ranu moof, bhau bhaf wanu to tnok, tna simaut mam anu bhaf mato wanu ye. Bo bawya ro sohmaam msya bo ro bta to bo ro ati fee. ¹⁸Raa ro ja mhau mhaf wana mnan feto to, mno bo ro Kristus rAit oh meto. Kbe Allah yhaf mnan ana ye tna kbe raa mhaf mnan ana ye.

¹⁹Feto to, nma: Anu bno re raa ro kro Kristus to miranya kaket. Tna bno re anu tubat bosmot wanu beta ye. ²⁰Bo sohmaam beta to Allah yawe moof. Yawe anu sohmaam saah. Menohe raa taro mhar bo reto mam mhaf mato wana to fefares. Soh ana mmat bo ro anu niit to karik kbe ana mbtek mam iro. Allah yno re ana mama smot Ait oh. Nno be tis rau to, bo ro anu sohmaam to misti re bosmot rana reto sasyõ. ²¹Anu taro ja nbo kak tna nta anggur maya. Soh nno bo weto nisti re raa anya ro kro Kristus taro mbtek mawe to, beroh nno bo weto ma. Bo bawya ro mno re raa mbtek mawe to, beroh nno ma. ²²Nkyas bo weto tna sohmaam bo weto mam wore wo raa weto mahni sai. Nno bo weto mam wore Allah yasu ymat tna raa mahni. Niwana bo ro Ait yawe kʼanu ma. Niwerek bo ro anu nhaf nwe moof to ma. Tna kbe Allah yno bo moof kʼanu. ²³Tna awya ro ynaut maut-mroh mam yhaf mato to, menohe beroh sohmaam bo reto to, ait yno mkair meto. Soh anu nno bo ro miwana bosmot ranu to, Allah yawe anu nno iro oh meto.

Nmat anya re niranya kaket

¹Feto to fyi? Anu to smot Kristus matak re bwe boit bo to ro mbau to aro u fee. Menohe anu bmat anu besait sai to ma. Anu tam-tam raa wanu ro bosmot rana sne fares ye. ²Rau ro moof to, anu sait-sait bno bo ro raa anya mhaf mnan. Au oh mi anu bno bo moof kʼraa anya ro ja tubat bosmot rana mrok matak ye. ³Tiwya Kristus yno feto ye. Ait yno bo afo re kbe Yaja yhaf mnan. Ait saso bo ro Ait yesait yhaf ksoh to fee. Bokom sau mkyas bo ro tiwya Mesias yawe kʼyaja Allah yawe,

“Allah, tiwya raa mamus Nyõ tna Jõ tros tkai riryõn.”

Mazmur 69:10

⁴Anu sorni ma. Bo bawya sor ro tiwya raa mkom mam Bokom ro Allah to, Ait ybis ana mkom afo re anu bmat tna bhar bo weto ye. Tibyo bo ro anu bmat mam Bokom ro Allah to, ja tubat bosmot ranu re anu binaut bhar bwe meen anu bkai riof ro mroon tu. Tna bo sau naut: Bo ro anu bmat mam Bokom ro Allah to merif mawe kbe anu bito bsom bo ro matu mai kʼanu to. Bo weto mno re anu binaut roon ranu ye. Binaut bwe meen anu bkai riof ro mroon reto. ⁵Allah Ait oh mi ja yoo yatak yee kʼanu re anu bito bsom bo ro matu mai kʼanu to. Tna Ait oh mi ja tubat bosmot ranu ye. Jõ skabuk tayoh Tuhan afo re kbe anu beta nhau nhaf sau su. Nno reto mnan fi bo ja Kristus Yesus yhau yhaf sau su ysya anu to. ⁶Nhau nhaf sau su tibyo kbe anu nbaut Allah mkah nhaf sau su ye. Allah fi Yesus Kristus, Tuhan ranu Yaja.

⁷Feto to jõ tawe kʼanu ro nhau mam Roma to, tawe beta nitrah nhaf wanu kʼanya re niranya kaket. Tiwya Kristus ymat anu beta. Soh raa mmat he anu nmat raa anya mnan fi Ait yno feto, kbe ana mbibi Allah. ⁸Nnaut oh, Kristus yama yo kʼamu, raa mana ro Yahudi to, re kbe Kristus yno bo moof kʼamu yfi bo sryan sait ja yno bo raa. Yno feto afo re kbe raa mhar mawe bo ro Allah yawe to, ybo yno tu oh. Au oh mi: Tiwya Allah yawe kʼAbraham ysya kube wait to yawe kbe Ait ybis Mesias yama yo kʼamu. ⁹Tna Mesias retait yama re kbe yatmof raa ro mbam raa mana roto ye. Yama tibyo ana ro mbam raa mana roto to, kbe mbaut Allah ye. Bokom ro Allah far-far refo mkyas bo ro raja Daud yawe kʼAllah yawe,

“Jõ tji howes tna bibi Nyõ nasom aNyõ mam wore wo raa mana roto makin mmat.”

2 Samuel 22:50

¹⁰Tna mam far-far roto bi sait yawe kʼana ro mbam raa mana roto to, yawe,

“Nsen simaut! Anu ro nbam raa mana roto to, simaut su nsya raa wAit ro mbam raa mana ro Yahudi ye!”

Ulangan 32:43

¹¹Tna far-far roto sau naut ye mkyas mawe,

“Jõ tawe kʼanu ro nbam raa mana roto weto beta to, tawe, ‘Bibi Tuhan ramu ye!’ Jõ ksoh raa beta bibi Ait!”

Mazmur 117:1

¹²Tna mam far-far roto sau naut Yesaya ykom yawe,

“Bi Isai, kube rait sait meen yama. Yasen yamo Raja tna ybo raa ro mbam raa mana roto makin beta. Raa weto to, kbe mhar tna minaut mawe meen Mesias retait yoo riof yee kʼana.”

Yesaya 11:10

¹³Allah ja yno re anu bhar tna binaut bwe bo beta ro Ait yawe to, kbe mabo tu oh. Tna jõ skabuk anu re kbe nhau nwai kʼbi Ait kaket. Nwai kʼbi Ait feto tibyo Ait yno anu nhau nhaf tnok yoyo, tna simaut mam anu nhaf mato wanu yoyo ye. Tna skabuk re Har rAit mno anu ninaut renti nwe bo ro bi Ait yawe to, kbe mabo. Kbe yno mkah tak ro Har rAit.

Bo ro Tuhan ybis Paulus ykah

¹⁴Taja, tme, tao, tano na; Jõ thar tawe anu to, raa ro ja nno bo moof tna ja nhar bo mnan si ye. Tna anu nhar bo watum kʼanya ye. ^15,16Menohe Allah yatmof jõ yoo bouum yee kʼjõ. Bouum reto yee afo re Kristus Yesus ybis jõ tamo raabis rAit tamo to kʼanu. Anu to nbam raa mana ro Israel fee. Anu to, nbam raa mana roto makin. Tama to kʼanu to, tama tkyas Bokyas Moof (Injil) ro Allah. Tama tfi imam ro ja ykyas bokyas ro mbam kʼAllah. Anu nri tna Har rAit moo anu msan kʼAllah re nno bo wAit. Au oh mi jõ too anu tsan anu kʼAllah. Tsan anu kʼAit mnan mfi raa msan bosan roto taro kʼAit. Tna Allah yhaf mnan yoo anu. Allah yoo bouum reto yee kʼjõ to, tibyo jõ tkom watum refo kʼanu, tkyas abyõ kʼanu sai. Kmo ma. Tkom bo wefo tee afo re anu nnaut bo wefo u, sorni ma. ¹⁷Feto to jõ bibi Kristus ati ro jõ tno bo ro Allah ybis jõ tno. ¹⁸Jõ tamo tkyas Kristus yasom kʼraa ro mbam raa mana roto makin. Yesus yno re bo ro jõ tkyas tna bo ro jõ tno weto to, mafer moof. Tibyo ana weto mari bo ro Allah yawe oh. Kbe jõ tyok-yok bo ro mfi fefo ro mama mbam kʼAit sai. Jõ wa tyok-yok bo roto fee. ¹⁹Har rAit moo tak mee kʼjõ re tno bo ro hnah tna bo ro msai aro sor. Jõ tkyas Bokyas Moof ro Yesus mnan si oh mbam kota ro Yerusalem mamo snok mam provinsi ro Ilirikum. ²⁰Ati ro tkyas Bokyas Moof ro Kristus refo to, jõ tomer tamo tkyas mam wore wo raa mari mbo Bokyas refo fefares. Tkyas bofret sau: Mfi bo raa ro ja sgi amah. Soh ait roto sait yatim yati sankaf to, jõ hawe tama sgi amah reto riryõn. ²¹Menohe jõ ksoh tno bo mnan fi nabi Yesaya tiwya ykom,

“Raa ro wase bokyas rAit to, meen kbe raa mama mkyas Mesias yasom kʼana weto re ana mari tna mhar ye.”

Yesaya 52:15

Paulus yawe yamoʼt Roma

²²Au oh mi jõ thau mam oo refo fares. Allah ybis jõ tkyas Kristus yasom kʼraa mam befo wia. Tawe tama tmat anu ro nhau mam Roma, menohe tama fefares. ²³Tkah bo mam oo wefo mkak oh. Mfo refo jõ rero tama to kʼanu. Tii tahun mawat oh jõ tawe tama tmat anu. ²⁴Bonaut ajõ to tamoʼt Spanyol. Tna jõ tinaut tawe kbe tmat anu mam Roma iti. Jõ tama thau tsya anu ti baro afo re anu bkai anya mam beto. Tna jõ ksoh anu noo bo ro jõ tnaut to baro nee kʼjõ re tasen tamo renti. ²⁵Menohe mfo refo to tamoʼt Yerusalem wia. Takah bo tamo tee kʼraa ro Allah wAit mam kota reto wia. ²⁶Jemaat makin ro mhau mam Provinsi Makedonia msya Provinsi Akhaya to, taa ana mawe ana ksoh mberur moo pitis mee. Ana moo pitis reto mee re kbe jõ takah tamo tee kʼraa kinyah ro Allah wAit mam Yerusalem. ²⁷Ana mawe mno bo refo. Mawe rau ro moof to, ana moo bo aro mee kʼraa mbam raa mana ro Yahudi weto. Tiwya ana ro mbam raa mana roto weto to, smot Bokyas Moof ro Yesus tibyo mkai mafer ro moof ye. Bokyas Moof ro Yesus frok mbam raa mana ro Yahudi wia. Tibyo raa ro mbam raa mana roto mam befo mbibi ana ro Yahudi mawe asik mase. Feto tna ana ro mbam raa mana roto to, mawe ana mbo pitis baro tiim sroh si kʼana ro Yahudi weto. ²⁸Jõ tesait tawe takah pitis reto tamo tna tee kʼana ro kinyah mam Yerusalem weto. Jo kaket re ana mkai bouum ro moof reto wia. Ana mkai mkak, tna fo kbe tamoʼt Spanyol. Tna tama iti tmat anu mam Roma beto ye. ²⁹Jõ thar tawe tamo to kʼanu to, kbe Kristus yno bo ro moof toni kʼanu beta.

³⁰Taja, tme, tao tano na; Anu beta fo raa ro kro Tuhan Yesus Kristus. Tna Har ro Allah mno re anu beta batmof anya kaket. Feto to jõ soh-soh anu tawe ntomer nros tis kʼjõ: Skabuk jõ nsan kʼAllah yatem rAit. ³¹Mfo refo to arin ro mkair mam Provinsi Yudea. Raa ro hawe smot Kristus to saim jõ mawe mame. Feto skabuk re Allah ywas jõ. Tna skabuk re pitis ro jõ too tee kʼana ro Allah wAit mam kota Yerusalem to, kbe ana fri pitis weto mkah mhaf ro moof. ³²Skabuk feto afo re kbe jõ tama to kʼanu, soh Allah ybis. Tibyo kbe jõ tama tirer anu tna kbe simaut tsya anu ye su. ³³Allah oh mi yno re anu bhau bhaf tnok. Tna jõ skabuk re kbe Ait yatam anu ye. Amin: Mabo oh.

Paulus ymah meen kʼyafoh wait

¹Tna jõ tkyas fai Febe baro kʼanu afo re ati ro au mama to, kbe anu ntam-tam au. Au to raa wanu sau ye. Tna au mamo diaken mam jemaat rau ye. Jemaat reto mhau mam kota ro Kengkrea. Kbe au mamo mmat anu mam Roma. ²Nmat au kaket mnan fi bo anu ja nmat raa ro Allah wAit makin to. Tiwya au mmat jõ kaket feto ye tna au mmat raa mawat sor ye. Tna wore au mhau msya anu to noo bo ro au mnaut aro to, nee kʼau ye.

³Nmah meen kʼPriska msya maa Akwila. Ana mbewok to, Kristus Yesus ybis mkah bo rAit su msya jõ ye. ⁴Tiwya, ana mbewok mno wa raa ro mhoh byoh kʼjõ to, mame jõ fee. Mno feto kene wo raa mame ana majat he mfe. Ana mbewok mno bo feto tibyo tayoh asik mase kʼana. Jõ tesait sai fee; raa ro mbam raa mana roto makin ye. Jemaat wana beta mayoh asik mase kʼana mbewok ye. ⁵Nmah meen kʼana msya jemaat ro ja siret skabuk su mam amah rana mbewok ye.

Tna nmah meen kʼEpenetus. Ait fi raa ro jõ thafri. Ait fi raa ro tinyi mamo kro Kristus mam rabin ro Asia.

⁶Tna nmah meen kʼfai Maria ye. Fai au to mur-mur mno bo moof kʼanu yoyo.

⁷Tna nmah meen kʼAndronikus ysya Yunias. Ana mbewok to tiwya kro agama ro Yahudi ye. Ana mbewok tiwya mamo kro Kristus matim wia, tna fo jõ. Ana smot Kristus mi raa mbu ana mam bui mato msya jõ ye. Ana mbewok weto to, raabis ro Tuhan ye. Raa mawe ana to raabis wAit ro moof.

⁸Nmah meen kʼAmpliatus ye. Ait tait raa ro kro Tuhan. Tna jõ thafri ait. ⁹Nmah meen kʼUrbanus ye. Ait tait Kristus ybis ykah bo rAit ysya jõ ye. Tna nmah meen kʼStakhis. Ait tait raa ro jõ ksoh ye. ¹⁰Nmah meen kʼApeles ye. Bosmot rait to matak. Tiwya ait smot Kristus tibyo raa sikowah ait. Menohe bosmot rait matak fares. Tna nmah meen kʼjemaat ro ja skabuk mam amah ro Aristobulus. ¹¹Tna nmah meen kʼHerodion. Ait tait tiwya raa ro Yahudi ye. Tna nmah meen kʼNarkisus ysya raa wait beta ro kro Tuhan ye. ¹²Nmah meen kʼfai Trifena msya fai Trifosa. Ana mbewok mur-mur mkah bo ro Tuhan. Tna nmah meen kʼfai Persis. Au to mur-mur mkah bo ro Tuhan yoyo ye. Tna jõ ksoh au ye. ¹³Nmah meen kʼRufus ysya yme. Ait tait raa ro Tuhan ysok. Tna fai au to mnan fi jõ tme ye. ¹⁴Nmah meen kʼAsinkritus, Flegon, Hermes, Patrobas, Hermas msya raa ro kro Kristus taro sor tna skabuk su msya ana. ¹⁵Nmah meen kʼFilologus ysya Yulia, kʼNereus ysya yano, tna kʼOlimpas ye. Tna nmah meen kʼraa ro Allah wAit mam beto ye beta. ¹⁶Anu nmah meen kʼanya ye tna hana anya. Jemaat ro kro Kristus beta sor mmah meen kʼanu ye.

Nnaut bo wefo kaket, sorni ma

¹⁷Taja, tme, tao, tano na; jõ sobu anu tawe, kaket anu. Kbe raa mama mkyas bokyas roto taro kʼanu. Anu nhar bokyas moof ro Kristus oh to. Mfi bo raa mkyas bo ro mamyot bokyas ro Kristus reto to fee, niranya nsya ana weto ma. Nmat sas wa ana weto. Bokyas rana reto mno wa re raa smot Allah matak fee, tna mno re raa mbrir-brar mam jemaat.¹⁸Raa ro mfi feto to, mkah bo ro Tuhan Kristus ybis to fee. Ana mno bo ro mhaf wana ksoh sai. Ana weto mhar bo mkyas kaket, re raa ksoh mari bokyas rana. Menohe ana mkyas bo sioh. Raa mhaf reo mari bo ro ana mawe tna mnaut mawe bo mabo, he mfe. Ana ja miwro raa feto. ¹⁹Raa beta mhar mawe anu nri Bokyas Moof ro Yesus oh tna nbo nno. Jõ tari bo ro anu nno feto tibyo jõ simaut mase ye. Jõ ksoh tawe anu nhau nsu maah re nhar bo ro moof tna nbo nno. Tna ksoh tawe anu wase bo nno bo mkair-kar ye. ²⁰Allah oh mi yno re anu bhau bhaf tnok. Kbe Ait yno fooh re Ait yber kabes yabi tait (Iblis) hasyoh mam anu naa ti te. Tna jõ skabuk Tuhan ranu Yesus Kristus re yatmof anu.

²¹Timotius ja ykah bo su ysya jõ. Ait ymah meen kʼanu beta. Tna Lukius, Yason ysya Sosipater mmah meen kʼanu ye. Ana mabo tuuf tiwya raa ro agama Yahudi mfi jõ ye. Menohe mfo refo amu nmo raa ro kro Kristus. ²²Jõ ro tkom aam refo tasom Tertius. Jõ fi raa ro kro Tuhan, tna tmah meen kʼanu ye. ²³Gayus ymah meen kʼanu ye. Raa jemaat mam befo to ja siret skabuk su mam amah rait. Tna jõ, Paulus, mfo refo tjin tsya ait ye. Bi Erastus yamo bendahara kota refo. Ait ymah meen kʼanu. Kwartus tait raa ro kro Kristus sait, ymah meen ye. ²⁴[Jõ skabuk Tuhan ranu Yesus Kristus re yatmof anu beta. Amin: Mabo oh!]

Bibi Allah!

²⁵Tna bibi Allah! Bi Ait oh mi yatak yno anu nros smot Yesus matak. Yno mkah Bokyas Moof ro jõ tkyas Kristus Yesus oh meto. Bokyas reto to, tiwya Allah ymyõt bose bau. Yasbrah fee. ²⁶Menohe Allah saim yawe mfo refo Ait yasbrah oh. Tibyo amu nhar tna mbetoo bo ro tiwya Ait ybis nabi wAit mama mkom. Allah ro yhau yawyos ybis jõ tamo tkyas Bokyas refo kʼraa mana beta. Allah saim jõ tamo tkyas feto afo re kbe ana mhar tna smot Ait. Ana smot tibyo mari bo ro Ait yawe, mbo mno kaket. ²⁷Jõ skabuk re kbe anu bmat Yesus Kristus tibyo anu bbaut bo yase ro Allah rAit mfo refo mamo snok mam hame wajin! Allah yesait aran yhar bo toni. Amin: Mabo oh!