Bo ro Yesus Yerif kʼYohanes Ymat
Wahyu
1Aam refo mkyas bawya?
1Aam refo mkyas bombra ro kbe mama fooh. Allah ykyas bo wefo kʼYesus Kristus. Tna Yesus Kristus yasbrah bo wefo kʼraa ro Allah wAit matim wia re ana mhar bo ro Allah kbe yno. Tna Yesus ybis malaikat sau mroh mamo mkyas bombra ro kbe mama fooh wefo fo kʼjõ. Jõ fi Yohanes, sryan rAit sait ye. 2Bo ro jõ tmat to, jõ tkom beta mnan si. Au oh mi bo ro Allah ysya Yesus Kristus mkyas merif kʼjõ. 3Mabu rau kinene mama oh. Kbe Tuhan yno bo ro moof mama kʼait ro ymat bokom refo. Tna yno bo ro moof mama kʼait ro yari bokom refo, tibyo ybo yno ye.
Yohanes ymah meen
4Jõ tmah meen kʼanu ro nhau mam jemaat trion krema mam rabin ro Asia. Tna jõ skabuk Allah afo re bi Ait ysya Yesus Kristus ysya har mabo krema kbe matmof anu tna mno re anu nhau nhaf tnok ye. Har weto ja mhau mam ati ro bi Ait yasu mam wore Ait hre abyõ mam tahta rAit. Allah tait yaban tiwya tinyi yhau yum, tna mfo refo yhau fares ye, tna meen yhau yaam mamo snok mam hame wajin ye. 5Yesus Kristus ja mur-mur ykyas bo ro ati kʼanu. Ait Raa ro tinyi yrok yasen. Tna Ait tait ro yase toni ybo raja na ro mhau mam tabam refo beta.
Yesus yatmof anu. Ait yajat tna mees ro frok mbam yetsu rAit to, yyon iro wanu. 6Tna Ait yno re anu bmo raa mana ro Allah yamo Raja ybo. Tna anu to, bmo imam ye. Yesus tait Yaja Allah. Nma anu hawyõn Yesus tna bkyas bwe, “Bi Ait yatak ybo bombra beta yoyo mamo snok mam hame wajin.” Amin: Mabo oh!
7Nmat, Ait ykah barmabyõ mboh sro-sro Ait to yama. Kbe raa beta heyut mmat bi Ait yama; raa ro tiwya mame Ait yajat kbe mmat Ait ye. Kbe raa beta mmat Ait yama feto to mawia. Amin: Mabo oh!
8Tuhan Allah yawe, “Jõ fi Raa ro tinyi tibyo Jõ tasom ‘Alfa’. Tna Jõ fi Raa ro ttis ye tibyo Jõ tasom ‘Omega’ ye. Maban tiwya tinyi thau yum, tna Jõ mfo refo thau fares ye, tna meen thau taam mamo snok mam hame wajin ye. Jõ fi Raa ro tase tbo bombra beta.”
Bo ro Yohanes smi ymat mam sato ro Patmos
9Jõ, Yohanes smot Yesus mnan fi anu, raa ro jemaat trion krema to ye. Anu smot Yesus tibyo ja raa mno bo ro mkair mai kʼanu. Anu smot Yesus tibyo anu bito bsom bo reto ye. Anu smot Yesus tibyo anu bmo raa mana ro Allah yamo Raja ybo. Tiwya jõ tkyas watum ro Allah tna tkyas Yesus yasom tibyo raa mfot jõ mbeak mam sato ro Patmos refo. 10Tiwya, mam ayõ ro ja anu skabuk Tuhan to, Har rAit mama mbo jõ matak. Tibyo jõ smi tmat bo. Tna tari mai sau ro mkyas fari mnan fi raa mfi saa mam jõ kbor tis. Mai reto mawe: 11“Bombra ro nyõ nmat to, nkom. Bokom reto to, tiim mamo jemaat trion krema. Tiim kʼana ro mhau mam kota ro Efesus, ro Smirna, ro Pergamus, ro Tiatira, ro Sardis, ro Filadelfia msya ro Laodikia ye.”
12Tna jõ haberek tmat tis, tmat awya metait ro ykyas bo kʼjõ. Tna jõ tmat bo ro mnan fi sawe ro emas trion mara krema. 13Tna jõ tmat Raa sait ro yasu ynaif ynan fi ’Ait ro Yroh Yama Yfi Raa Sai’ yros mam sawe weto masuf susai. Ait oh mi Yesus metait. Ait yyum ratan ro miyõ toni mamo snok mam yaa te. Tna yyan hawee ro emas ybin ntkah. 14Yana mawyan rAit mboh toni. Tna yasu mait mnan fi tafoh. 15Yaa rAit mnan fi tembaga ro kren, ro raa mko mam tafoh. Tna ymai to msun mnan fi aya ro mase sau miyi msun. 16Yatem ati ybo sken trion krema. Tna pedang sau ro maan ti ewok mhau mam yasoh rAit. Yasu ynaif mkek warah toni mnan fi ayõ ro moo mafit baas.
17Jõ tmat Ait to, ttek taka tabum tfi bo thai mam ati ro yasu rAit. He Ait yoo yatem ati ybo jõ tna yawe, “Waa ma. Jõ fi Raa ro tinyi tna Raa ro ttis ye. 18Jõ fi thau tawyos: Tiwya Jõ thai oh menohe trok tasen. Meen thau troon mamo snok mam hame wajin. Tna Jõ tatak tbo raa beta mamos rana. Tna thar ayõ raa aro rait sait-sait kbe meen yhai. Tna tatak tbo sawro ro hai ye.
19Bo ro nyõ nmat wefo fo, nkom oh. Bo weto to taro frok mfo refo ye tna taro to meen mama ye. 20Sawe emas trion mara krema ro riwai nyõ nmat weto to fret bo mawe jemaat trion krema. Tna sken trion krema riwai tbo mam tatem ati weto to malaikat ro mbo jemaat weto.”
2Yesus watum raa jemaat ro Efesus
1Yesus yawe kʼYohanes yawe: “Nkom aam nee kʼmalaikat ro mbo jemaat Efesus to nawe, ‘Watum refo mbam kʼJõ ro tbo sken trion krema mam tatem ati, ro tamo susai mam sawe emas trion mara krema weto. Tawe fefo: 2Jõ tmat anu, raa ro nhau mam kota ro Efesus; tna thar bombra ja anu nno ro moof sor. Tibyo jõ bibi anu. Thar tawe anu ja siko tna mur-mur nkah bo. Tna raa ro mber safo to, anu nmat sayõ fee ye. Tna raa ro mama mo kʼanu mawe ana raabis (rasul) aJõ to, anu ja ntu sanet ana wia re anu nhar bo ro ana mama mkyas to mabo fe mfe a. Soh ana weto raa ro sioh sai, anu ja nri bo ro ana mawe fee. 3Jõ tasom aJõ oh mi raa mno bo ro mkair-kar mai kʼanu tna sikowah anu. Kair reto to, ja anu bito nsom tna nri hrowyõ fee ye. Anu nno bo weto beta moof. Tibyo Jõ bibi anu.’
4Tiwya tinyi anu nhafri Jõ. Menohe mfo refo anu nhafri Jõ kaket fee. Nno feto to Jõ bhah anu. 5Bawya re anu sorni Jõ! Nashana oh! Nisoh nhaf wanu re kbe anu ne nhafri Jõ mnan fi tii tinyi u. Nno bo ro tiwya tinyi anu nno wia. Soh anu nashana fee; kbe Jõ tama to kʼanu tna titbat sawe mara ro mhau kʼanu.
6Menohe anu nno bo baro ro moof fares: Anu ja knait raa ro kro Nikolaus.2:6 Bi Nikolaus tait raa ro ja ykyas watum ro Tuhan to ykyas sre. Ait ysya raa mkbair ro mros tis ait tiwya watum raa mawe, “Soh anu smot patung tna bombra aro sor to, kbe Allah kmo fee. Tna soh anu nwyah to, kbe Allah kmo fee ye.” Bo ro ana mno to, Jõ knait ye. 7Anu ro nri bokyas refo fo; nri bo ro Har aJõ mawe kʼjemaat wefo, tna nbo nno kaket! Awya ro bito yros yatak tna re smot Jõ mamo snok mam tis rau to, meen Jõ taren ait: Kbe too kake sau ro mno re raa mhau mawyõs to, tee kʼait yait. Ara ro make kake reto to, moo mam armato ro Allah rAit. Watum ro Jõ tkyas kʼraa ro jemaat Efesus maum oh mefo.”
Yesus watum raa jemaat ro Smirna
8Tna Yesus yawe kʼYohanes yawe: “Nkom aam nee kʼmalaikat ro mbo jemaat Smirna to nawe, ‘Watum refo mbam kʼJõ; Raa ro tinyi, tna Raa ro tis. Tiwya Jõ thai oh menohe trok tasen. Tawe fefo: 9Jõ tmat anu ro nhau mam kota ro Smirna; tna thar tawe anu smot Jõ. Tna bosmot ranu reto oh mi raa ja mno bo ro samyoh mbtek mai kʼanu. Tna thar tawe ja anu nse bo aro fee ye. (He mfe, bosmot ranu to mnan fi bo satoh mawat tibyo anu to bobot!) Jõ tmat tna thar tawe raa ro Yahudi ja mamus anu ye. Ana weto mawe ana raa ro Yahudi; raa woJõ. He mfe, ana weto to raa mana ro ja mban kabes yabi (Iblis).’
10Waa ma: Kair ro kbe anu tru to, mhau kait fee, mhau ti trion nsaa sai. Wore weto kabes yabi (Iblis) yno tibyo raa mfot anu taro makah mamo mbu mam bui. Tna anu taro kbe fri kair aro rau-rau ye. Jõ tawe kʼanu tawe: Bito smot Jõ sai mamo snok mam wore anu nhai. Susu ma. Tna kbe Jõ too watau (mahkota) tee kʼanu sait-sait. Watau weto fret bo mawe mamos mai ro kbe tsan kʼanu. 11Anu ro nri bokyas refo fo; nri bo ro Har aJõ mawe kʼjemaat wefo, nbo nno kaket! Awya ro bito yros yatak re smot Jõ mamo snok mam tis rau to, meen, ati ro raa mhai mun ro ewok to, kbe ait retait, yhai fee. Watum ro Jõ tkyas kʼraa ro jemaat Smirna to maum oh mefo.”
Yesus watum raa jemaat ro Pergamus
12Tna Yesus yawe kʼYohanes yawe: “Nkom aam nee kʼmalaikat ro mbo jemaat Pergamus to, nawe, ‘Watum refo mbam kʼJõ ro tbo pedang ro maan ti ewok. 13Jõ thar tawe anu, raa ro nhau mam kota ro Pergamus, ja nhau mam wore wo raa mawat mari tna kro kabes yabi (Iblis). Menohe anu fo ja smot tasom aJõ matak fares. Tiwya Antipas ykyas Jõ tasom aJõ tibyo raa mame ait yajat. Ait raa ro srau ewok fee. Tii mam wore wo arin mkair feto to, Jõ tmat he anu nros ntak tna anu nwaar Jõ fee. Feto to, Jõ bibi anu.’
14Menohe anu baro to ja nri watum ro mkair tna nbo nno. Watum reto to mnan fi tiwya bi Bileam2:14 Tiwya tinyi bi sait yasom Bileam yiwro raa ro Israel afo re ana mbtek mam iro. Feto to Yesus ykyas guru ro mama miwro raa wAit re mno iro weto to mnan Bileam. Bokom Bilangan 22:5,7Bilangan 25:1-3,Bilangan 31:16 tna msya Ulangan 23:4 mkyas bi Bileam. ykyas kʼraa sait yasom Balak. (Tiwya Bileam yawe kʼBalak yawe, ‘Namo niwro raa ro Israel afo re ana mno iro.’ Ait sioh yawe soh ana sohmaam bo ro raa msan kʼberhala oh to, kbe Allah kmo fee. Tna ait sioh yawe soh ana mno wyahte to, kbe Allah kmo fee ye.) 15Feto ye anu baro nri watum ro mkair ja Nikolaus ykyas tna nbo nno. Tibyo Jõ bhah anu. 16Nashana oh! Awya ro yashana to fee, baro feto Jõ tama tno kair mbtek mai kʼait. Kbe Jõ tafa tsya ait retait tame mkah pedang ro mhau mam tasoh aJõ. 17Anu ro nri bokyas refo fo; nri bo ro Har aJõ mawe kʼjemaat wefo tna nbo nno kaket! Awya sai ro yari watum refo ybo yno kaket to, kbe jõ too boit-manna ro ja Jõ tmyõt to, tee kʼait yait. Tna too fraa ro mboh sau tee kʼait yse. Awya ro bito yros yatak smot Jõ mamo snok mam tis rau to, meen Jõ tafan ait yasom ro tna sau u. Ait yasom ro tna reto to, kbe Jõ tkom abyõ mam fraa ro mboh reto. Tna ait yasom rait ro tna reto to, raa sait bo yhar fee. Raa ro yse fraa reto yesait aran oh mi yhar to. Watum ro Jõ tkyas kʼraa ro jemaat Pergamus to maum oh mefo.”
Yesus watum raa jemaat ro Tiatira
18Tna Yesus yawe kʼYohanes yawe: “Nkom aam nee kʼmalaikat ro mbo jemaat Tiatira to nawe: ‘Watum refo mbam Ku ro Allah yare retait. Ait yasu mait mnan fi tafoh. Tna Ait yaa rAit mait mnan fi tembaga ro kren. Tna Ait yawe kʼanu yawe: 19Jõ tmat anu, raa ro nhau mam kota ro Tiatira; tna thar bombra ro ja anu nno sor. Tibyo Jõ bibi anu. Thar tawe anu nhafri Jõ, tna smot Jõ matak ye. Anu to ja mur-mur nno bo ro Jõ ksoh ye. Tna wore bo ro samyoh mbtek mai kʼanu to anu bito nsom. Jõ thar tawe anu mur-mur nno bo ro moof wefo beta miwer bo ro anu nno wia. Feto to Jõ bibi anu.’
20Menohe Jõ bhah anu ye. Guru sau ja mkyas bo ro sre mam jemaat ranu, menohe anu nsu sayõ rof sai. Fai au mawe au to nabi ro Allah ybis mama mkyas bo wAit. He mfe. Au mbesruf raa woJõ re ana mamo tiit. Au mnan fi Izebel.2:20 Tiwya raja ro ybo Israel sait yoo fai sau ro masom Izebel. Tna au miwro raa ro Allah wAit re ana mbaut berhala. (Nmat 1 Raja 16:31; 2 Raja 9:22,30.) Tna mam bokom ro uu Yesus ykyas Izebel to, Ait fret bo yawe fai sau ro mamo guru mam jemaat ro Tiatira tna miwro raa weto. Tibyo ana mari au tna mno iro. Au sioh mawe kʼraa jemaat mawe soh ana wyahte to, kbe Allah kmo ana fee. Tna au sioh mawe soh ana sohmaam bo ro raa msan kʼberhala oh to, kbe Allah kmo fee ye. Au mkyas bo ro sre menohe anu nsu sayõ rof sai. Tibyo Jõ bhah anu. 21Tiwya ooh-oh Jõ tawe kʼau tawe ‘Nashana oh!’ Menohe au hawe bo bitsre wyahte rau reto. 22Feto kbe Jõ tubat au mbeak mam aam ro au mjin, tna tno re au kiyam. Tna raa ro mwyahte msya au to, soh ana bitsre bo mkair ro ana mno to fee, tna soh ana mashana fee, kbe Jõ tno bo ro mkair toni mai kʼana beta ye. 23Kukek wau to, kbe Jõ tame majat. Kbe jemaat beta mhar mawe Jõ fi Raa ro thar raa mhaf mato msya srau wana beta. Thar bo beta ro ana mnaut. Tna kbe ana mhar mawe meen Jõ tno bo ska kʼanu sait-sait riryõn mamyot bo ro anu aro rait sait-sait yno. 24Menohe Jõ bibi anu taro. Anu raa ro Tiatira taro, ja hawe nri watum rau ro sre reto. Tna bo maja ro kabes yabi (Iblis) yasbrah kʼraa to, anu wase ye. Tibyo Jõ bibi anu. Rau ro ati to, anu bito nros ntak smot Jõ mamo snok mam tis rau. Jõ tbis bobis aro renti kʼanu nno u fee. 25Tawe nros ntak sai; nhau nri watum aJõ nno renti mamo snok mam ayõ ro Jõ tama.
26Awya ro bito yros yatak smot Jõ tna mur-mur yari bo ro Jõ tawe kʼAit mamo snok mam tis rau to, meen Jõ tno re ait yasen ybo raa mana ro mbam arin aro.
27‘Kbe ait yamo raa ro yase ybo raa kinyah wait matak toni mkah armuk ro besi2:27 Watum ro Allah mkyas ’armuk ro besi’ to fret bo mawe raja ro ybo raa kinyah wait matak toni. tna ana mhau mte kʼAit. Kbe ait tubat ana yabyõ mam tabam re ana sari mnan fi bo raa tubat kusia nihabah re habah.’2:27 Mazmur 2:8-9.
Kbe tsan tatak aJõ kʼait ro yros yatak retait. Tno feto re ait yasen ybo raa mana aro-aro. Tak reto to mnan anya mfi tak ro Jõ Taja tiwya ysan kʼJõ. 28Tna kbe Jõ too sken ro mor-mor ati tobrat to tee kʼait ye. 29Anu ro nri bokyas refo fo; nri bo ro Har aJõ mawe kʼjemaat wefo, nbo nno kaket! Watum ro Jõ tkyas kʼraa ro jemaat Tiatira to maum oh mefo.”
3Yesus watum raa jemaat ro Sardis
1Tna Yesus yawe kʼYohanes yawe: “Nkom aam nee kʼmalaikat ro mbo jemaat Sardis to nawe: ‘Watum refo mbam kʼJõ ro tbo Har ro Tuhan mabo trion krema. Tna Jõ tbo sken trion krema weto ye. Jõ thar bombra beta ro anu nno. Raa mmat anu weto to, ana mnaut mawe anu naam fares. Menohe anu nhai oh. 2Anu, raa ro nhau mam kota ro Sardis ja smot Tuhan matak fee. Nsen oh! Bosmot ranu kene wo mhai oh. Nsen tna nisoh bosmot ranu kaket matak! Bo ro anu ja nno to, Allah ymat tna yawe moof mnan si fefares. 3Nnaut Watum ro Tuhan oh! Tinyi rau to, anu nri bo ro Ait yawe tna nbo nno kaket. Nri Watum rAit ne nbo nno kaket u! Soh anu nsen fee tna nashana fee; kbe jõ tama tfi raa ro msyõf bo. Meen jõ tama mam ayõ ro anu siwyan fefares.’
4Menohe anu ro nhau mam Sardis to, anu baro ja nno bo ro mkair fee. Anu fo nnan fi raa ro kmot ratan wana kaket re moof tu. Tibyo Jõ bibi anu weto. Anu weto to nhaf moof mnan si. Tibyo meen anu nyum ratan ro mboh tna nsya Jõ bmo su. Anu ja nno-na bo fee. Raa ro mno-na bo to, ana mnan fi raa ro ja kaket ratan wana fee. 5Awya ro bito yros yatak re smot Jõ mamo snok mam tis rau to, kbe meen ait yyum ratan ro mboh mnan fi ana weto ye. Yasom rait to raa mkom mam aam sau. Aam reto masom rau: ‘Raa ro Meen Mhau Hame Wajin’. Yasom rait kbe mhau mam aam reto tibyo. Kbe Jõ sikarus yasom rait fee. Tna kbe Jõ tawe kʼTaja ysya malaikat wAit tawe, ‘Raa refi fi raa aJõ sait.’ 6Anu ro nri bokyas refo fo; nri bo ro Har aJõ mawe kʼjemaat wefo, nbo nno kaket! Watum ro Jõ tkyas kʼraa ro jemaat Sardis maum oh mefo.”
Yesus watum raa jemaat ro Filadelfia
7Tna Yesus yawe kʼYohanes yawe: “Nkom aam nee kʼmalaikat ro mbo jemaat Filadelfia to nawe: ‘Watum refo mbam kʼJõ. Allah yesait ybis Jõ tno bo wAit. Jõ fi ja tkyas bo ro mabo tu. Jõ tbo kunci ro raja Daud rait.3:7 Raja Daud tait hohos Tuhan Yesus. Raa ro Yahudi, ati ro ana mari raa mkyas raja Daud ybo kunci sau to, ana mnaut mawe Mesias rana (Yesus) ro yatak yoo riof yee kʼraa re kbe ana twok mam sawro ro Allah. Tna Jõ tbis raa tawe ana oh mi mama twok mam sawro ro Allah fe mfe a. Mato ro Jõ titrah to, raa sait bo ytai yut fee. Tna mato ro Jõ tuut to, raa sait bo ytai yitrah fee ye. 8Jõ thar bombra beta ro anu, raa ro Filadelfia to ja nno. Jõ titrah mato sau oh re anu nma ntruk. Tna raa sait bo ytai yut mato reto fee. Jõ thar tawe anu raa ro Kristen to ntak baro sai. Menohe anu ja nri bo ro jõ tawe tna nbo nno fares. Tna anu nwaar Jõ tasom aJõ fee. Feto to Jõ bibi anu. 9Tna thar tawe raa ro agama Yahudi aro mhau mam kota ranu reto ye. Menohe ana taro mkyas bo sioh mawe, “Amu fo raa ro Yahudi ye.” He mfe. Ana ja mros tis mban kabes yabi (Iblis). Kbe meen Jõ tsan ana weto kʼanu nbo. Tna tbis ana mama mo kʼanu. Ana maka manwaruk tna mawe, “Anu oh mi raa ro Tuhan yhafri. Amu fee.” 10Anu ja nri watum aJõ tna beroh smot Jõ. Feto to meen ati ro arin mkair mai kʼraa ro tabam refo beta to, kbe Jõ tban anu. Wore weto Jõ sanet raa tna kbe Jõ tatem aJõ burut anu wa. 11Jõ tama fooh oh mefo. Bosmot ranu to nbo nno kaket re kbe anu fri watau (mahkota) ro Jõ siwyan taren kʼanu to. Bitsre bosmot ranu ma, re kbe raa roto sait bo ytak boren ranu reto fee!’
12Awya ro yros matak re smot Jõ mamo snok mam tis rau to, kbe meen Jõ tno re ait yros tu mam samu ro Allah mnan fi arnu ro mros matak mam amah. Tna meen ait aro frok ybam beto fee ye. Tna kota Yerusalem ro tna, wore Allah ja yhau to, kbe mbam uu mroh mama. Tna kbe Jõ tkom bo mam anu netsu ranu. Tkom Allah yasom rAit tna msya kota rAit masom. Tna Jõ tkom Jõ tasom aJõ ro tna mam anu netsu ranu ye. Tkom mam anu netsu wanu mnan fi aat re kbe raa mhau mawe anu fo raa woJõ. 13Anu ro nri bokyas refo fo; nri bo ro Har aJõ mawe kʼjemaat wefo, tna nbo nno kaket! Watum ro Jõ tkyas kʼraa ro jemaat Filadelfia maum oh mefo.”
Yesus watum raa jemaat ro Laodikia
14Tna Yesus yawe kʼYohanes yawe: “Nkom aam nee kʼmalaikat ro mbo jemaat Laodikia to nawe, ‘Watum refo mbam kʼJõ. Jõ tasom aJõ raa mtu mawe “Amin” Jõ mur-mur tkyas bo ro ati kʼanu. Jõ fi tase tbo bombra ro Allah yfen beta. 15Jõ tmat anu, raa ro nhau mam kota ro Laodikia; tna thar bombra beta ro anu nno. Tmat anu to, Jõ thaf mnan fee. Bo ro mbe to Jõ ksoh. Tna bo ro ngkanam to Jõ ksoh ye. 16Menohe anu fo ja nbe fee tna ngkanam fee ye. Feto to anu nno Jõ thaf mnan fee, kbe Jõ tooh anu frok nbam tasoh aJõ mnan fi boit ro tait tari mkair. 17Ja anu nkyas nwe, “Amu fo bobot. Amu fri bo satoh mawat nkah ntak ramu nesait sai. Ja amu nhau to, bo aro mabut fee.” He mfe; anu wase kta ro Tuhan rAit. Feto to anu to nmof toni, nhau bo marak, nsu mti, tna sroraa ye. 18Jõ watum anu tawe: “Noo emas ro moof mbam kʼJõ. Emas aJõ to, raa mko oh re moof; bo ro mrat mam emas reto marak. Soh anu noo emas aJõ ro moof toni to, kbe anu to bobot. Tna noo ratan mboh kʼJõ ye. Nyum afo re mburut anu netsu wanu ro sroraa, re kbe anu saban ma. Tna noo obat kʼJõ ye tna ngkaru nsu wanu afo re nmat bo.” 19Raa ro Jõ tatmof to, Jõ tastako tna tasyah ana mhaf wana ye. Tna bo samyoh mbtek mai kʼana afo re ana waa Jõ tna mashana.’
20Nri kaket: Jõ tros masa mne tna ttu kʼraa. Awya ro yari Jõ tmai tna yitrah mato kʼJõ to, kbe Jõ twok mam amah rait tna tsya ait mbewok niit boit su tna thau tsya ait su ye.
21Awya ro yros yatak mamo snok mam tis rau to, mnan fi tiwya Jõ tros tatak to, ait tait yoof ynan si. Tibyo kbe yasen tna ybo raa makin taro. Tibyo kbe Jõ tse ait hre ysya Jõ su abyõ mam ambar (tahta) aJõ. Tiwya tros tatak tibyo mfo refo jõ hre tsya Taja su abyõ mam ambar rAit. 22Anu ro nri bokyas refo fo; nri bo ro Har aJõ mawe kʼjemaat wefo, tna nbo nno kaket! Watum ro Jõ tkyas kʼraa ro jemaat Laodikia maum oh mefo.”
4Raa msya kak mbaut Allah
1Tna fo jõ tmat mato sau maah mam sawro ro Allah. Tna jõ tari mai ro riwai tari wia oh. Mai reto mnan fi saa ro buk-buk mkyas bo kʼjõ mawe, “Nama naut no kʼJõ mam befo re kbe terif bo ro meen mama!” 2Mam weto si oh to, Har rAit mbo jõ matak. Tibyo jõ smi tmat bo. Tna mam sawro ro Allah reto to, tmat Raa sait hre abyõ mam ambar (tahta) sau. 3Bi Ait retait yasu, ynaif rAit moof toni mnan fi fraa sau ro safom masom yaspis msya fraa sau ro masom sardis. Tna naar sau mur mtan mam ambar (tahta) reto to, ngkren-ngkran mnan fi fraa sau ro safom masom zamrud.4Mam wore wo ambar ro bi Ait reto, raa manes mabo trion 24 hre mana mur abyõ mam ambar (tahta) rait-rait. Ana weto to myum ratan ro mboh tna sbyõ watau (mahkota) ro emas.5Tna rir mrir frok mbam ambar ro bi Ait rAit, tna barmabyõ mji msai ye. Tna kek trion krema mait mawyah mam ati ro Ait yasu, ro hre abyõ mam ambar rAit. Kek weto to Har ro Allah wAit mabo trion krema. 6Tna wore ambar (tahta) reto to, aya sawan ro mnan fi kaca mhau mte. Tna kak (makhluk) ro Allah wAit mana jiit mhau mur bi Ait ro hre abyõ mam ambar rAit reto. Kak weto to masu mauf wana to mawat; ati ro masu msya ati ro kbor ye. 7Kak ro Allah wAit weto to sau masu rau mnan fi singa. Ro ewok to masu rau mnan fi lembu ro maku. Ro tuuf to masu rau mnan fi raa. Ro jiit to masu rau mnan fi ruu hofyoh. 8Kak mana jiit weto to maim sau rau-rau to trion ntamam. Metsu kak weto to masu mauf mawat; mam maim wana ati ti uu ye tna mam ati ti te ye. Mti baas kak mabo jiit ro Allah wAit weto mbaut Tuhan yasom rAit yoyo mawe,
“Tuhan Allah tait yros kar. Ro moof mnan Ait aro u fee saut. Ait yesait yatak ybo bombra beta. Allah tait yaban tiwya tinyi yhau yum, tna mfo refo yhau fares, tna meen yhau tu mamo snok mam hame wajin ye.”
9Kak ro Allah wAit mana jiit weto hawyõn bi Ait tna bibi Ait, tna mayoh asik mase kʼAit ro hre abyõ mam ambar (tahta) reto. Bi Ait yhau yroon mamo snok mam hame wajin. Tna wore kak weto mbaut bi Ait si to 10raa manes mabo trion 24 weto ntmi mimna mam bi Ait yasu ro hre abyõ mam ambar (tahta) reto. Ana ntmi mimna tna mbaut Ait ro meen yhau yaam mamo snok hame wajin. Tna fo ana moo watau (mahkota) ro emas wana mbyat mam ati ro Ait yasu, tna ana mawe,
11“Nyõ fi Tuhan ramu. Nyõ fi Allah ro amu smot. Nyõ nesait nhaf moof mnan si, tna re raa hawyõn Nyõ. Nyõ Raa ro nase. Tna amu bibi Nyõ. Nyõ oh mi nfen bombra wofo beta. Tna ksoh anyõ sai oh mi Nyõ nfen bombra wofo beta. Nyõ nesait aran nbo anu beta bfos ranu.”
5Yohanes ymat aam msya Domba Maku
1Tna jõ tmat bi Ait ro hre mam ambar (tahta) abyõ tait ybo aam ro mbewakom sau mam yatem ati rAit. Aam refo raa mkom mne rau ye tna mato rau ye. Tna raa mbewakom aam reto muut tna mse ri trion krema mrat wa. 2Tna jõ tmat malaikat sau ro safo toni mtu mkah mai ro mase mawe, “Awya ro yhaf mato moof toni afo re behah ri ro msit aam ro muut fo?” 3Menohe raa aro fee yhaf moof toni re kbe betrat aam reto: Raa ro mhau mam tabam refo ye, raa ro mhau mam tabam ro ti te ye tna raa ro mhau mam sawro ro Allah ye, sait bo yhaf moof toni fee. Feto tna re raa behah ri weto ymat aam reto mato rau fee ye. 4Raa sait bo yhaf moof toni fee, afo re betrat aam reto ymat mato rau bo fee. Tibyo jõ tawia tsut-sut. 5Tna raa manes weto sait yawe kʼjõ yawe, “Nawia ma: Yesus yatak tna yoof mnan si. Kbe Ait betrat aam ro raa mse ri trion krema mrat wa reto. Ait yasom rAit: ’Singa ro mbam raa mbair ro Yehuda’5:5 Raa ro Yahudi mari raa mkyas ’Singa ro mbam raa mbair ro Yehuda’ tna ’Raja Daud hohos sait’ tibyo ana mhar kaket mawe raa mkyas Mesias rana. Ait tait raja Daud hohos sait. Tiwya Ait yafa ysya raa ro byoh to, yros yatak. Tna byoh weto mhau mte.”
6Tna jõ tmat Domba Maku5:6 Tiwya raa ro Yahudi mamo mbaut Allah to, ana makah domba maku mana sau msam kʼbi Ait wia. Ana mhar mawe ana raa sai, ja mno iro. Tna Allah ybis ana moo domba mana sau mame majat tna msam kʼAit afo re mees domba reto myon iro wana. Raa ro Yahudi mhar mawe domba maku reto to, raa fret bo mawe Mesias rana: Au oh mi raa mame Yesus yajat afo re mees rAit myon iro wanu beta. sau mros susai mam masuf yuk ro ambar-tahta reto. Kak (makhluk) ro Allah wAit mana jiit weto msya raa manes mabo trion 24 weto mros mana mur mam Domba Maku reto. Tmat he Domba Maku reto to, mabet ro tiwya misti hai, he masen mros. Domba Maku reto to, tanduk rau to trion krema tna masu mauf rau to trion krema ye. Tanduk msya masu mauf wau weto fret bo to mawe Har ro Allah trion krema. Har weto to Allah ybis mamoʼt tabam arin aso wofo beta. 7Domba Maku reto masen mamo moo aam ro raa mse ri mrat wa reto mbam kʼbi Ait ro hre mam ambar (tahta) abyõ to, yatem ati rAit. 8Mamo moo aam reto tna kak ro Allah wAit mana jiit weto msya raa manes mabo trion 24 weto beta ntmi mimna hartu Domba Maku reto. Aro sait-sait ybo kerombi (kecapi) sau msya hawereh ro emas sau. Tna wasi ro sawer snok mbam hawereh mato maun frok. Wasi reto to, boskabuk raa ro Allah wAit skabuk mamo maut mo kʼTuhan.9Tna kak ro Allah wAit mana jiit weto msya raa manes trion 24 weto mbaut bobaut ro tna sau. Ana mbaut Domba Maku reto mawe:
“Nyõ oh mi nhaf moof nnan si re noo aam tiwya raa mse ri mrat wa reto to tna betrat. Feto to amu nbaut Nyõ. Raa mbam raa mana aro rau beta to, Nyõ nsan kʼAllah oh. Ana weto to mmai rana aro rau ha-hayah ye. Ana mama mbam rabin rana aro sor ye. Tiwya Nyõ raa mame najat. Tna mkah mees aNyõ nyõ ntho raa weto beta nee kʼAllah. 10Nyõ nsok ana weto nse hayah mkah mamo imam ro ja mno bo ro Allah ranu. Tna kbe ana mamo raja mbo raa ro tabam reto ye.”
11Tna fo jõ tmat malaikat msis-sas toni tna tari mai wana ye. Malaikat weto mros mur mtan mam ambar (tahta) reto msya kak ro Allah wAit mana jiit weto tna msya raa manes weto. (Malaikat weto to mabo trion 10.000, 100.000 bo feto.) 12Tna malaikat weto beta mbaut bobaut mkah mai ro mase toni mawe kʼDomba Maku reto mawe,
“Tiwya raa mame Nyõ najat. Nyõ fi nhaf moof mnan si. Feto to raa moo kta mee kʼNyõ. Nyõ fi natak toni. Nyõ nhar bo. Tna amu hartu Nyõ, tna hawyõn Nyõ, tna bibi Nyõ ye!”
13Tna jõ tari bobaut. Bombra ro mhau mam sawro mam uu ye, mam tabam reto ye, mam tabam ti te ye, tna mam aya sawan to, weto beta mbaut bobaut kʼBi Ait ro hre abyõ mam ambar (tahta) rAit ysya Domba Maku reto. Ana mawe,
“Anu mbewok ntak toni. Amu bibi anu mbewok tna hawyõn anu mbewok, tna hartu anu mbewok ye mamo snok hame wajin.”
14Tna kak ro Allah wAit mana jiit weto mawe, “Amin: Mabo oh.” Tna raa manes mabo trion 24 reto ntmi mimna heyut ana mbewok.
6Yohanes ymat Domba Maku behah ri ro msit aam reto
1Jõ tmat Domba Maku reto behah ri krema ro msit aam reto sau. Masen behah ro tinyi to, tna kak ro Allah wAit sau mtu mawe, “Nama oh!” Mmai rau to mase mnan fi barmabyõ ro mji. 2Tna jõ tmat kuda sau ro mawyan mboh mros mam weto. Raa sait hre abyõ mam kuda reto to, hre ybo taur sau. Tna raa mama moo watau (mahkota) sau mee kʼait sbyõ. Ait tait safo yawe yamo yame raa ro byoh.
3Tna fo Domba Maku reto behah ri ro ewok. Tna kak Allah wAit ro ewok reto mtu mawe, “Nama oh!” 4Tna tmat kuda roto sau frok u mama mros. Kuda refo fo mawyan mkek mfi kaan kek. Tna raa moo pedang sau mee kʼraa sait ro hre abyõ mam kuda reto. Raa mbis ait yroh yamo tabam reto tna yno re raa miranya moof u fee. Raa mbis ait yno tibyo raa ro tabam reto mame anya.
5Tna fo Domba Maku reto behah ri ro tuuf. Tna kak Allah wAit ro tuuf reto mtu mawe, “Nama oh!” Tibyo tmat kuda ro mawyan safe sau frok mama mros. Tna raa sait ro hre abyõ mam kuda to, ait tait yatem ybo timbangan sau. 6Tna jõ tari bo sau mnan fi raa mmai frok susai mam wore kak ro Allah wAit mana jiit weto hre. Tna mai reto mawe kʼait ro hre abyõ mam kuda reto mawe, “Boit to raa masim mabyoh maut renti: Pitis-dinar6:6 Pitis mauf tiwya raa ro Yunani mbo. Mfi bo raa mkah bo raa ayõ sau muuf to boren ro raa maren ait to dinar sau. sau to, raa moo gandum kbair sau sai. Tna boit jelai to raa moo kbair trion tuuf sai mkah pitis (dinar) sau.” Menohe mai reto mbis mawe, “Minyak msya anggur maya to, kmot kaket ye!”
7Tna fo Domba Maku reto behah ri ro jiit. Tna kak Allah wAit ro jiit reto mtu mawe, “Nama oh!” 8Tna jõ tmat kuda ro mawyan fiyaf kair-kar sau to mros. Raa ro hre abyõ mam kuda reto, ait yasom rait ’Haiyama’. Tna raa roto yrof ait ttis. Ait retait yasom ’Sawro Hai’. Ana mbewok to, raa mbis mamo tabam reto. Tna raa msan raa ro tabam reto baro (seperempat) kʼana mbewok matem mbo. Raa mawe raa ro tabam reto baro kbe ana mbewok mame majat mkah pedang. Tna baro to, kbe ana mbewok mno re ana mhai sre tibyo mhai. Tna baro to, kbe ana mbewok mno re kiyam ro samyoh mai ana re mhai. Tna baro to, kbe ana mbewok mno re kak ro safo mamo mafit ana tna majat.
9Tna fo Domba Maku reto behah ri ro maat. Tna tmat bo sau ro mnan fi wohat (mezbah) sau wore raa msam bo kʼAllah. Wohat reto ati ti te to, jõ tmat raa mawat ro tiwya mhai to, mafos wana. Raa wefo fo tiwya mkyas Watum ro Allah tna mbo mno tibyo raa mame ana majat. 10Ana weto mkah mai ro mase mawe, “Tuhan; Nyõ fi Raa ro nase. Nyõ fi Allah yesait ybis nno bo wAit. Tna ja nkyas bo ro mabo tu ye. Meen tija Nyõ nse srah tna nno bo ska kʼraa ro tiwya mame amu njat mam tabam reto?” 11Tna fo raa moo ratan ro mboh mee kʼana weto sait-sait kait tna myum. Tna raa mawe kʼana mawe, “Hre baro wea re anu nfoh wanu ro ja mkyas watum ro Tuhan mam tabam reto fares to, kbe raa mame ana majat ye. Tna fo Jõ tno bo ska kʼana ro tiwya mame anu njat mam ttis rau.”
12Tna fo tmat Domba Maku reto behah ri ro ntamam. Tna iin ro msai toni sau frok mama. Tna ayõ haberek mamo safe mnan fi haan. Tna snyi haberek mamo mkek mnan fi mees. 13Tna sken ro ayoh nkryot mbtek mai mam tabam. Sken weto mbtek mnan fi ara make ro hba mrur-rur mbam mara rau mam ati ro foos homun mase mfi to. 14Tna ayoh mrok marak mnan fi aam ro raa bewakom. Tna atu beta msya sato beta mirenti mbam yuk ro mros wia to, mamo mros mam yuk roto. 15Tibyo raa msam mamo mmyõt ana mam ako mato ro ati ti te, tna mam isra ro atu ye: Raja makin msya ku wana ye, raa manes, msya raa sbe ro mase sor, raa bobot beta ye, msya sryan wana tna msya raa roto sor ye. 16Ana waa re mawe kʼfraa weto msya atu weto mawe, “Nma mbtek oh! Nyinkait amu njat! Nma nmyõt amu wa re bi Ait ro hre abyõ mam ambar (tahta) rAit yahni amu. Tna nwas amu wa afo re Domba Maku, kmo rau mbtek mai kʼamu ye fee!” 17Ayõ sboh oh. Awya oh mi ytai yros bito yasom kmo rAna to?
7Yohanes ymat malaikat mame aat kʼraa mabo trion 144,000
1Tna fo jõ tmat malaikat mabo trion jiit to mros; sau mros ti mare, sau to mros ti wayir, sau mros ti habeh, tna sau mros ati to brat. Malaikat weto mros mno wa foos tibyo foos aro mfi mam tabam reto fee. Mfi mam tabam mne ye fee, tna mfi mam aya sawan ye fee, msya ara bo fee ye. 2Malaikat mabo jiit weto matak mno yoot bombra ro tabam mne msya aya sawan to ye. Tna tmat he malaikat roto sau mbam ati tobrat frok mama. Allah ro yaam tait yoo bo sau yee kʼmalaikat reto yawe, “Namo name aat kʼraa!” Malaikat reto mbis malaikat mabo jiit weto mkah mai ro mase mawe, 3“Nmo simoyot tabam mne msya aya sawan, msya ara bo wia ma. Nhau wia, amu nme aat kʼraa baro makit wana wia. Kbe raa mmat aat kʼana makit wana to, mhar mawe raa weto to sryan ro Allah wAit.” 4Tna raa mawe kʼjõ mawe, “Raa mabo trion 144.000 mame aat ro Allah kʼana makit wana oh. Ana weto to kube ro Israel, mbam raa mana aro rait sosor. Ana weto to:
5Raa mabo trion 12.000 to mbam raa mana ro Yehuda.
Raa mabo trion 12.000 to mbam raa mana ro Ruben.
Raa mabo trion 12.000 to mbam raa mana ro Gad.
6Raa mabo trion 12.000 to mbam raa mana ro Asyer.
Raa mabo trion 12.000 to mbam raa mana ro Naftali.
Raa mabo trion 12.000 to mbam raa mana ro Manasye.
7Raa mabo trion 12.000 to mbam raa mana ro Simeon.
Raa mabo trion 12.000 to mbam raa mana ro Lewi.
Raa mabo trion 12.000 to mbam raa mana ro Isakhar.
8Raa mabo trion 12.000 to mbam raa mana ro Zebulon.
Raa mabo trion 12.000 to mbam raa mana ro Yusuf.
Raa mabo trion 12.000 to mbam raa mana ro Benyamin.”
9Tna tmat raa mana msis bia mros mam wo sau. Raa msis miwer re raa aro ntuu mkai fee. Ana weto to mbam raa mana aro rau-rau beta. Ana mmai rana to aro rau ha-hayah ye. Tna ana weto mama mbam rabin rana aro sor-sor ye. Ana weto beta mros ati ro bi Ait yasu, ro hre abyõ mam ambar (tahta) rAit tna mam ati ro Domba Maku masu ye. Ana beta myum ratan ro mboh tna mbo ita palem mata ye. 10Ana masen mkyas mkah mai ro mase toni mawe,
“Riof ro amu nkai fo, mbam kʼAllah ramu ro hre abyõ mam ambar tna msya mbam Domba Maku reto ye.”
11Tna malaikat weto beta mros mana mur mam ambar reto msya raa ro mase mabo trion 24 weto tna msya kak (makhluk) ro Allah wAit mana jiit weto. Tna malaikat weto mjit mimna mbaut Allah 12mawe,
“Mabo oh: Nyõ fi Allah ramu ro yatak toni tna yhar bo. Amu bibi Nyõ tna hartu Nyõ! Tna amu nyoh asik mase kʼNyõ tna amu hawyõn Nyõ ye mamo snok hame wajin. Amin: Mabo oh.”
13Tna raa manes weto sait ytu kʼjõ yawe, “Raa mawat ro myum ratan ro mboh weto to, awya sor metait? Ana mama mbam hayo?” 14Tna jõ tawe si kʼait tawe, “Taja, nyõ nhar to.” Tna ait yawe, “Raa wefo fo, tiwya mkai wer ro mkair toni tna mfo ana tru riof. Ratan wana ro mkair to, ana myon mboh mkah mees ro Domba Maku rau to.” 15Mnan feto oh mi: “Mfo refo raa ro myum ratan ro mboh wefo mros mam ati ro bi Ait yasu, ro hre abyõ mam ambar (tahta) rAit. Baas, mti ana mhau mam samu rAit tna mno bo rAit. Bi Ait ro hre abyõ mam ambar (tahta) reto to, kbe sbyah ana wa. 16Tibyo kbe ana mhar mhai sre msya mhai sbit bo u fee. Tna ayõ bo kbe mafit ana u fee ye.7:16 Yesaya 49:10,17.17Domba Maku ro hre mam yuk ro ambar (tahta) reto kbe mros mana matim tna kmot ana mam iso. Mamo makah ana mira mamo mata aya ro moof. Aya reto mno re raa mhai fee. Tna kbe Allah karu ana yukan.”7:17 Mazmur 23:1-2; Yesaya 25:8; 49:10; Yehezkiel 34:23.
8Domba Maku betrat aam ro krema
1Tna Domba Maku behah ri ro msit aam reto muut ro krema reto. Tibyo bombra beta mam sawro ro Tuhan mrok mnem setengah jam.2Tna fo jõ tmat malaikat mabo krema mros mam ti Allah yasu. Tna raa moo saa mee kʼana mbo. 3Tna jõ tmat malaikat roto sau mama mros mam wohat (mezbah).8:3 Tiwya raa sgi wohat mkah moo bo aro mko msan kʼTuhan. Mno feto to merif mawe ana hartu bi Ait. Au mbo hawereh emas ro raa mfau bo mawat ro sawer (dupa). Kbe malaikat reto msan bo ro sawer weto tna msya raa ro Allah wAit skabuk wana beta to, maun maut mamo mo kʼbi Ait. Msan bo sawer msya skabuk weto abyõ mam wohat emas ro mhau mam ati ro bi Ait yasu, ro hre abyõ mam ambar (tahta) rAit. 4Malaikat reto mbo hawereh. Tna wasi rau ro ja sawer moof msya skabuk raa ro Allah wAit to, maun maut mbam hawereh reto mamo mo kʼAllah. 5Tna fo malaikat reto moo kaan baro ro mait mam wohat to, mfau mam hawereh mato. Tna fo moo mbeak mamo tabam reto. Mno tibyo ayoh mji, barmabyõ rurur, rir mrir, tna iin frok ye.
Malaikat mfi saa
6Tna malaikat mabo krema ro mbo saa weto to, mros siwyan mfi saa weto. 7Malaikat ro tinyi mfi saa rau. Tibyo oom ro mnan fi es makan mais mbtek mai mam tabam. Oom ro mfi es makan ye, msya tafoh srioh mees mroh mai mam tabam reto ye. Tibyo tafoh mait tabam reto majoh jaro (sepertiga) msya ara baro. Tna mait bosafom ro safom to, beta mkak.
8Tna malaikat ro ewok mfi saa rau tna tmat he bo mnan fi atu ro tafoh mait warah sau. Raa moo atu reto mbeak mamo mbtek mam aya sawan. Tibyo aya sawan majoh jaro (sepertiga) haberek mrok mfi mees. 9Tna bombra ro mhau mam aya sawan baro to mhai-ha mkak (sepertiga). Tna kapal ro mamo mam aya sawan baro (sepertiga) surun ye.
10Tna malaikat ro tuuf mfi saa rau. Tna tmat he sken maboh sau ro mait mnan fi sawe. Sken reto mbam ayoh mbtek mai mam aya ro mase baro (sepertiga) msya aya masu beta ye. 11Sken reto masom rau to Apsintus. Sken reto mbtek mai aya baro, tibyo aya weto haberek mrok mtah. Raa msis mata aya ro mtah reto tibyo raa weto mhai.
12Tna malaikat ro jiit mfi saa rau. Tna ayõ ro ja moo mafit to, majoh baro (sepertiga) mhai. Tna snyi majoh jaro (sepertiga) msya sken baro (sepertiga) mhai ye. Tibyo ayõ ro ja moo mafit baas to aro moo mafit u fee. Tna mti to, snyi mboh kait fee mnan mfi ja snyi mboh soo to fee ye. Tna sken taro mawyah u fee ye.
13Tna jõ tmat ruu rajawali sau fru abyõ mam ayoh war-war. Tna ruu reto mmai fari mawe, “Malaikat mabo tuuf ro mhau fares to, kbe ana mfi saa wana tna kair ro mase mbtek mai kʼraa ro tabam reto!”
9Malaikat mfi saa ro maat
1Tna malaikat ro maat to, mfi saa rau. Tna jõ tmat sken sau mbam ayoh mbtek mama mai mam tabam. Tna raa moo kunci sau mee kʼsken reto. Kunci reto to, kunci ro mkah raa mitrah masa ro muut wa sawro ro kabes ja mhau. 2Ait ro yfi sken retait yitrah masa reto maah. Tna wasi frok maun maut mbam hroh reto. Wasi mawat toni mnan fi kaah raa mkah. Wasi mawat frok burut wa ayõ tibyo arin mamur. 3Tna bo mfi mo kawier msis frok mbam wasi reto, fru mamo tabam reto. Mo kawier weto mafit raa tna ana mari mham toni mnan fi tait bai mafit bo feto. 4Raa mbis mo kawier weto mawe, “Nmo nbat bombra ro moo mam tabam reto to ma; nbat bosafom msya ara ma. Nmo nfit raa sai. Menohe nfit raa ro ja mame aat ro Allah kʼana makit wana to ma!” 5Snyi marak maat bo feto mo kawier weto mafit raa. Tna raa weto mari mham toni mfi bo taitbai mafit. Mari mham toni menohe Allah yawe wa kʼmo kawier weto yawe, “Nfit raa weto majat ma!” 6Mam weto to, mo kawier mafit raa tibyo ana mham toni. Mham toni tibyo ana tomer mawe mno re ana majat afo sorni mham. Menohe ana majat fee. Ana mawe, “Aro fooh re bhai!” Menohe mfe. 7Mo kawier weto to mnan fi kuda ro raa siwyan mamo mafa. Mo kawier sbyõ watau (mahkota) ro emas. Tna masu mnaif mnan fi raa. 8Mana mawyan to miyõ mnan fi fnya mana mawyan. Tna mbait to maan mnan fi singa mbait. 9Mo kawier weto burut matmato wana mkah bo ro mnan fi besi. Mo kawier weto fru to, maim wana msun toni mnan fi asya mawat ro raa maut mamo mafa anya ye. 10Mamo snok snyi marak maat muuf bo feto mo kawier weto sikowah raa. Mo kawier weto takoh raa mkah sawyah wana to mnan fi taitbai sawyah. 11Mo kawier ro mase sau mbo mo kawier taro beta. Mo kawier refo fo, malaikat ro safo sau, ro ja mbo kabes taro sor mam sawro rana. Malaikat reto raa mtu mkah mai ro Ibrani to mawe masom Abadon. Tna mkah mai ro Yunani to, malaikat reto raa mawe masom Apolion.
12Mfo refo kair ro tinyi mkak. Tna fo kair mase trion ewok naut kbe mama riryõn.
Saa ro ntamam
13Tna malaikat ro ntamam mfi saa rau. Tna jõ tari mai sau frok mbam wohat ro Allah. Tna wohat reto tuut rau trion jiit. Wohat reto to, raa mfen mbam emas tna mhau mam ati ro Allah yasu rAit. 14Tna mai reto mbis malaikat ro riwai reto mawe, “Namo bitsre malaikat mabo jiit ro tiwya Allah yfot yake mhau akus mam aya mabi ro Efrat to!” 15Tibyo malaikat ro ntamam reto mamo tna bitsre malaikat mabo jiit weto. Malaikat jiit weto mhau siwyan mkah mamo mame raa baro (sepertiga) ro mhau mam tabam reto. Tiwya ooh-oh, mbam tahun ro wia rno mamo snok mam ayõ ro mfo refo. Malaikat weto mhau sne oon ro kbe ana mamo mame raa. Tna mfo refo malaikat weto Allah ybis mamo mame raa majat. 16Malaikat mabo jiit weto to mbo raa sbe wana mawat toni. Tna tari he raa mawe ana mabo trion 200.000.000. Raa sbe weto beta hre abyõ mam kuda wana. 17Jõ smi tmat raa sbe ro hre abyõ mam kuda wana weto beta to mafir matmato wana mkah bo ro matak. Bo ro ana mafir wa matmato wana to ro fiyaf msya ro mkek mnan fi kaan kek, tna msya ro safe mnan fi aya mos ro safe toni. Tna kuda weto mana wau to mnan fi singa mana. Tna tafoh, wasi msya belerang9:17 Fraa sau ro fiyaf. Soh raa mko fraa reto to, sawer rau mnis toni. frok mbam kuda weto masoh wana. 18Tafoh, wasi msya belerang weto to mno raa baro majat. Raa ro majat to mabo trion sepertiga mbam raa ro mhau mam tabam reto. 19Kuda weto to masoh wana msya sawyah wana matak mai raa majat mnan fi aban abboh ro ja mafit raa majat to.
20Raa ro mhau fares mmat bo weto, menohe ana mashana fee. Ana bitsre bo ro mkair-kar ja ana mno to fee: Ana mhau mbaut kabes sai fares, tna ana mhau mbaut berhala ro raa mfen mbam emas, msya perak, msya tembaga, msya fraa, msya ara bo fares sai. Berhala wefo fo mmat bo fee tna mari bo fee, tna mamo bo fee ye. 21Tna raa weto mashana safo ro ana mber weto fee sai: Ana weto mame raa majat sai fares, mari bo ro kabes mkyas kʼana fares, tna ana mwyah fares, tna msyõf bo fares ye.
10Yohanes yabat aam ro maku sau
1Tna jõ tmat malaikat roto sau ro matak. Malaikat reto mbam sawro ro Allah mroh mama. Tna barmabyõ sro-sro au. Tna naar sau maya muur abyõ mam malaikat mana rau. Tna masu mnaif rau to, mawyah mnan fi ayõ, tna maa rau mnan fi bo tafoh mara ewok. 2Tna mam matem rau mbo aam maku ro bewakom sau. Aam reto betrat oh. Malaikat reto mros tna maa rau ro matem ati mber mam aya sawan. Tna maa rau ro ti tem taa to mber mam tabam mne ye. 3Tna au mkyas mkah mai ro mase mnan fi singa ro masen mho. Malaikat reto mkyas si fo barmabyõ trion krema mji si tna mkyas bo. 4Jõ tari barmabyõ weto mji si fo jõ tawe tkom bokyas ro jõ tari reto. He mfe; mai sau mbam sawro ro Allah mawe kʼjõ mawe, “Bo ro barmabyõ krema weto mkyas to, nmyõt rere, nkom ma!”
5Tna jõ tmat malaikat ro riwai mros maa sau mber mam aya sawan tna maa sau to mber mam tabam mne. Malaikat reto tubat matem ati rau 6tna mawe, “Allah yhau yroon mamo snok mam hame wajin. Tna bi Ait yfen ayoh msya bombra beta ro mhau abyõ mam ayoh reto. Yfen tabam refo msya bombra ro mhau mam tabam refo beta ye. Tna yfen aya sawan msya bombra ro mhau mam aya sawan reto beta ye. Jõ tama tkyas bo mam Ait yasom rAit, tawe: ‘Oon ro mama to, Allah yyum u fee ye, kbe Ait ye yirenti fee ye! 7Bo ro Ait saim yawe meen mama to, ja raa wase. Menohe tiwya Allah ykyas bo reto kʼnabi wAit ro ybis mamo mno bo wAit. Malaikat ro krema reto kene wo mfi saa rau. Tna bo ro Allah saim reto kbe mabo mnan si tu oh.’”
8Tna mai mbam sawro ro Allah riwai jõ tari reto to, mkyas kʼjõ u mawe, “Namo no kʼmalaikat ro mros maa sau mber mam aya sawan tna maa sau mber mam tabam mne reto. Malaikat reto mbo aam sau mam matem rau. Mbo betrat oh. Nasen namo noo aam ro malaikat reto nbo.”
9Tna fo jõ tamo to kʼmalaikat reto tayoh kʼau tawe, “Noo aam ro maku reto nee kʼjõ.” Malaikat reto moo mee kʼjõ tna mawe, “Noo aam refo nabat. Nabat mam nasoh to, nari maya msu mnan fi kum. Niya mroh mamoʼt srau to, kbe nari mrok mtah.” 10Tna jõ too aam maku reto tabat. Tabat to tari maya msu mfi kum. Menohe tiya mroh mamoʼt srau mato to tari he mtah. 11Tna raa mbis jõ mawe, “Namo nkyas watum ro Tuhan u. Nkyas bo ro kbe mama. Bi Ait yasbrah bo wefo kʼnyõ matim wia tna ybis nyõ yawe namo nkyas bo refo kʼraa ro mhau mam rabin mawat taro sor ye. Namo nkyas kʼraa mana taro mawat, nkyas kʼraa ro mkyas mai ro mawat aro rau ha-hayah ye, tna msya raja na mawat ye.”
11Yohanes ymat nabi mabo ewok
1Tna raa moo bo mnan fi tbyor mara sau to, mee kʼjõ tna mbis mawe, “Namo nnit Samu ro Allah reto msya wohat (mezbah) rau mkah tbyor mara reto. Tna ntuu raa ro skabuk mam Samu ro Allah reto to mabo jya. 2Menohe bohra ro mne rau to, nnit ma. Bohra reto to, mhau kʼraa ro mbam raa mana roto makin. Kbe raa weto mamoʼt kota ro Yerusalem. Tiwya Allah ysan kota rAit reto to kʼanu, raa mana wAit sai. Menohe raa roto kbe twok mhau mam beto mamo snok snyi marak trion 42 muuf. Ana mno re kota ranu mkair, tibyo anu smot Allah mam kota ranu reto u fee.” 3Tna bi Ait yawe, “Kbe Jõ tbis nabi mabo ewok mamo mkyas bombra ro kbe mama. Ana mbewok weto ja mkyas Jõ tasom aJõ. Tna tbis ana mbewok myum ratan ro mkair-kar11:3 Soh raa ro Yahudi sraujin to, ana ja myum ratan ro mkair-kar tna moo boh mse abyõ mam mana wana. Mno feto re raa mhar mawe raa mhai tna ana sraujin. Soh ana mamo mkyas bo re kbe raa mnaut iro ro ana mno tibyo sraujin tna mawe mashana to, ja ana myum ratan ro mkair-kar feto ye. tna mamo mkyas bokyas aJõ kʼraa mamo snok ti trion 1260 muuf.”
4Nabi mabo ewok reto to, raa fret bo mawe ana mnan fi ara zaitun mara ewok ro moo mam wore wo Tuhan yasu. Tna mawe ana mnan si sawe ro emas trion mara ewok ro mhau mam ati ro Tuhan yasu rAit ye. (Tuhan tait yatak ybo tabam refo beta.) 5Tna soh raa ro byoh mno bo ro mkair mai kʼana mbewok reto to, kbe ana mbewok mame raa weto majat. Mame majat mkah tafoh ro kbe frok mbam kʼana masoh tna mait raa weto majat. 6Wore wo nabi mabo ewok weto mkyas bokyas ro Allah to, ana mbewok matak mbo ayoh msya tabam refo. Matak mbo ayoh wa re oom mais fee. Tna ana matak mno aya haberek mamo mees. Ana matak mno kair ro mase aro rau-rau mai mam tabam refo ye. Ana mbewok mno bo weto ati ro ana nksoh rana sai.
7Nabi mabo ewok reto mkyas bokyas ro Allah mkak oh. Tna fo kak sau mbam sawro ro kabes mhau to, kbe frok mama mafa msya ana mbewok. Kak ro ja mban kabes reto to matak. Tna kbe mame ana mbewok majat. 8Majat tna ajat wana makus mbris mam iso mabi mam kota ro Yerusalem. (Mam kota mase reto to, tiwya raa mame Tuhan ro ana mbewok ja smot to, mame Ait yajat mam ara warok.) Tna raa fret bo mawe kota reto to, masom Sodom msya Mesir. 9Tna raa mbam raa mana aro rau-rau beta mama mmat. Ana weto mmai rana aro rau ha-hayah ye, tna mama mbam rabin wana aro sor-sor ye. Ana kbe mama mmat ajat mbewok reto. Raa mawe ajat nabi mabo ewok reto to, raa sama ma. Tna mawe ajat mbewok reto mhau wia re raa mama mmat. Feto to ti trion tuuf hariyah to raa sama ajat weto fefares. 10Nabi mabo ewok reto tiwya ana mno bo ro samyoh aro rau mai kʼraa tna ana fo mbewok majat. Tibyo kbe raa simaut fayir tna moo bo moof mee kʼanya ye.
11Ti tuuf hariyah reto ska tna Allah yoo yafos yee kʼnabi mabo ewok refo tna ana mbewok mrok maam u. Raa mmat ana mbewok masen maam u to, ana mrok waa toni. 12Tna nabi mabo ewok reto to, mari mai ro mase sau mbam sawro ro Allah mtu kʼana mawe, “Anu mbewok: Nuut nma no kʼJõ mam wefo!” Tibyo ana mbewok misbat maut mamo abyõ. Tna barmabyõ ro mboh sro-sro ana mbewok, tna masyõ ana mamoʼt sawro ro Allah. Tna raa ro byoh masu heyut mmat ana mbewok misbat maut mamo.
13Ana mbewok misbat maut si to, iin ro msai frok mama msin tabam refo. Tibyo kota reto majoh jaro (sepersepuluh) to rarin. Tna raa mabo trion 7000 majat ye. Tna raa ro mhau fares mrok waa toni tna mkyas Allah ro yhau mam sawro rAit mawe, “Ae, Tuhan Allah tait yase toni!”
14Kair ro ewok mama mai kʼraa oh meto, tna kair ro tuuf to kine mama oh.
Saa ro krema
15Tna malaikat ro krema mfi saa rau ye. Tna jõ tari he mai mawat ro mase mam sawro ro Allah mawe:
“Raa ro mamo raja oh mi ja mbo tabam reto to. Menohe mfo refo to, Tuhan ranu yesait oh mi yase yamo Raja ybo tabam reto ysya Kristus ro Ait ysok ye. Kbe Ait yase yamo Raja ybo tabam reto mamo snok mam hame wajin.”
16Tna raa manes mabo trion 24 hre mam ambar (tahta) wana mam ati ro Allah yasu. Ana weto maka mbaut bi Ait 17mawe:
“Tuhan; amu nyoh asik mase kʼNyõ. Nyõ fi nase nbo bombra beta. Nyõ fi nhau yum bonyõ tinyi oh tna mfo refo nhau naam fares ye. Nyõ natak aNyõ nase niwer toni. Tna Nyõ nasen namo Raja nbo tabam reto oh. Tibyo amu nyoh asik mase kʼNyõ. 18Tiwya raa ro smot Allah fee; ana kmo Nyõ. Tna mfo refo ayõ sboh oh. Nyõ kmo ana riryõn. Mfo refo Nyõ nros susai tna noo srah nse mai kʼraa ro tiwya mhai oh. Tna mfo refo Nyõ noo boren naren kʼsrian woNyõ ye: Nabi woNyõ ro tiwya Nyõ nbis mamo mkyas bo woNyõ, tna msya raa woNyõ makin ye, tna msya raa ro ja hartu Nyõ to ye. Ana weto to raa ro mase tna raa ro kinyah ye. Tna ayõ sboh oh re Nyõ noo safo mana nmit kʼraa ro tiwya mno bo ro mkair.”
19Tna Samu Allah ro mhau mam sawro rAit to, mato rau nkro. Tibyo raa mmat Peti perjanjian11:19 Kotak refo tiwya Allah ybis Musa yfen mkah ara. Peti perjanjian reto raa mse mam samu ro Allah, yuk ro mbau toni. Peti perjanjian refo fret bo mawe: 1. Allah yatam raa wAit. 2. Bo ro bi Ait yawe to, meen Ait yno tu oh. reto. Tna ayoh mji, rir mrir mnin-nan, barmabyõ rurur tna iin frok sin, tna oom ro mnan fi es makan mais ye.
12Yohanes ymat fai sau msya kabes aban
1Tna jõ heyut tmat bo ro msai sau mam ayoh abyõ uu: Tmat fai sau mros abyõ mam snyi. Fai au myan ayõ mamo ratan rau. Tna mana rau sbyõ sken trion 12 mnan fi watau (mahkota).2Au mhaf tna kene mam wore mabe oh. Tibyo mari he au kborham tna msiah. 3Tna jõ heyut tmat bo msai sau roto mam ayoh: Tmat kabes aban sau, tna masom rau to naga. Kabes aban to maboh toni tna marak rau to mkek. Kabes aban reto to, mana rau to trion krema tna tanduk rau to trion nsaa. Tna abyõ mam mana wau to sbyõ watau (mahkota) trion krema ye. 4Tna kabes aban reto tubat sawyah rau to, tufrok sken ro mhau mam ayoh to jaro (sepertiga). Tna mbeak sken weto mbtek mai mam tabam. Kabes aban reto mhau mros ste kene msya fai au ro kborham reto. Mros mawe fai au mabe ku retait btek to, kabes aban refo miya fooh. 5Tna fai reto mabe ku sme sait. (Ku retait kbe yase ybo armuk ro besi tna ybo raa ro tabam arin aso wofo beta to matak.) Fai au mabe ku retait tna raa mama tubor mtak ku retait afo re kabes aban reto miya ku retait ma. Raa moo ku retait makah msam mamo mo kʼAllah ro hre abyõ mam ambar (tahta) rAit. 6Tna fai au reto masen msam mamoʼt yuk ro mimon sau; yuk ro Allah siwyan wea. Tna raa kmot au, misoh au mam teto ti trion 1260 muuf. 7Tna mam sawro ro Allah to malaikat sait ro yasom Mikhael yafa ysya kabes aban reto: Mikhael ysya malaikat wait ro moof to, mafa msya kabes aban reto tna msya malaikat wau ro mkair weto. 8Menohe kabes aban msya malaikat wau to matak fee. Tibyo kabes aban msya malaikat wau to, raa mikyak frok mbam sawro ro Allah. 9Kabes aban reto to, masom Iblis soh mfe to Kabes Yabi. Kak refo tiwya tinyi haberek mamo aban ro soo ye. Kabes Yabi ja sioh raa ro tabam refo beta. Ait ysya malaikat wait to, raa mikyak frok mbam sawro ro Allah tna frok mamoʼt tabam.
10Tna jõ tari mai ro mase sau mbam sawro ro Allah mawe, “Mfo refo Allah ranu yros yatak abyõ tna kabes yabi (Iblis) yhau mte. Feto tna riof kʼanu. Raa beta mhar mawe Allah yase yamo Raja tna ybo raa beta matak. Tna raa mhar mawe Allah ysok Kristus yamo yase ybo raa. Tiwya kabes yabi ja yaun anu ro smot Kristus to, rabu-reha. Yaun anu yawe kʼAllah yawe, ‘Raa woNyõ, mno bo mkair!’ Tna raa mbeak kabes yabi frok btek ybam sawro ro Allah yamo tabam. 11Kabes yabi yaun raa ro Allah wAit yawe ana mno iro. Menohe ana mros matak smot bi Ait mhar mawe mees ro Domba Maku reto myon iro wana oh, tna re ana mrok mhaf moof. Tibyo Kabes yabi yhau mte. Raa ro Allah wAit weto to, wore wo raa mawe mame ana majat to, raa wAit weto mwaar Yesus yasom fee. Ana mros matak mawe ana smot Yesus fares tna msan metsu rana re raa mame ana majat. Ana mno feto tibyo Kabes yabi retait yhau mte kʼana. 12Kabes yabi raa mikyak frok ybam sawro ro Allah, feto kbe anu ro nhau mam sawro rAit fares to; simaut mase oh! Menohe anu raa nsya bombra ro mhau mam tabam reto msya aya sawan bo to; kbe nmof toni: Kabes yabi yroh yamo yo kʼanu oh. Ait yhar yawe ti rau ro Allah yoo safo mana ymit kʼait to, kinene oh. Tibyo ait kmo tna safo toni.”
13Kabes aban mnaut mawe raa mbeak au mamo tabam, tibyo au kmo toni. Tna kabes aban masen saka fai au ro mabe ku sme retait. 14Menohe raa moo ruu ro mase sau maim wau to, mee kʼfai au. Moo mee kʼfai au mtan fai au kbek rau re kbe au fru mamoʼt yuk ro mimon. Yuk reto to, Allah siwyan kʼfai au wea. Au mhau bau mam teto tna raa kmot au, misoh au tahun trion tuuf hariyah re kbe kabes aban reto mkai au fee. 15Tna fo kabes aban reto frus aya mawat toni frok mbam masoh rau. Tna aya reto miyõ mamoʼt yuk ro fai au mhau tna mabo kait fai au reto. Kabes aban reto mawe aya mayõ fai au reto soso mamo. 16Menohe tabam to masoh maa tibyo aya ro kabes aban reto frus to, beta twok mamo tabam mato. Tibyo fai au mkai riof. 17Tna kabes aban reto mrok kmo fai au toni. Tibyo mamo sikowah ku wau ro mabe roto taro. Ku wau weto to: Raa ro ja mari Watum ro Allah mbo mno tna ana bito mros matak smot Yesus ysya watum rAit. 18Tna kabes aban reto mamo mros mam aya sawan maam.
13Yohanes ymat kak sau frok mbam aya sawan
1Tna jõ tmat kak ro ja mban kabes sau frok mbam aya sawan masuf. Kak reto metsu sau, mana rau to trion krema tna tanduk rau to trion nsaa. Tna watau (mahkota) mana mur abyõ mam tanduk rau sau-sau. Tna mam mana sau-sau wau to, raa mkom masom kair ro mamus Allah. 2Kak ro jõ tmat reto metsu rau mnan fi pus ro maboh sau masom macan tutul. Tna maa kbis rau to miyõ tna maan mnan fi kak sau ro masom beruang maa. Tna mbait rau to maan mnan fi singa mbait. Tna kabes aban reto msan matak rau kak ro ja mban kabes reto. Mbis kak reto hre mam ambar (tahta) rau tna mbo raa mkah matak rau. 3Kak reto mana wau trion krema. Tna hbis maboh mhau mayir mam mana rau sau. (Tiwya raa maru kak reto tibyo kene wo majat, he mfe. Tibyo hbis maboh reto mhau mayir sai fares.) Raa beta mmat kak ro ja mban kabes reto tna ana mrok ktak tibyo mari bo ro kak reto mawe. 4Kabes aban reto moo matak mee kak ro ja mban kabes reto. Tibyo raa mbaut kabes aban reto tna mbaut kak ro ja mban kabes reto ye. Raa mbaut kak reto mawe, “Raa arin aso matak mnan anya mfi kak refo fee! Tna raa aro mtai mafa msya kak refo fee ye!”
5Kak ro ja mban kabes reto safuk mawe au u kar, tna au mamus Allah. Allah yasu sayõ rof kak reto. Tibyo kak reto mros matak mbo raa ro mhau mam tabam refo, mamo snok snyi trion 42. 6Kak reto mamus Allah yasom rAit tna mkyas kair Samu ro Allah ye, tna mkyas kair bombra beta ro mhau mam sawro rAit ye. 7Tna kak ro ja mban kabes reto mafa msya raa ro Allah wAit. Raa moo matak mee tibyo kak reto mros matak tna raa ro Allah wAit matak fee. Allah yasu sayõ rof kak reto. Tna kak reto mros matak mbo raa mbam raa mana aro rau-rau beta: Ana mmai rana to aro rau ha-hayah ye. Raa weto mama mbam rabin rana aro sor-sor ye. 8Yohanes ymat he raa mawat toni kbe mbaut kak ro ja mban kabes reto. Ana weto to raa mkom masom wana mam aam ro Domba Maku rau to fee. Raa mabo baro sai hawe mbaut kak reto. Ana weto to masom wana raa mkom mam aam Domba Maku rau. Aam reto mkyas raa masom ro kbe mhau hame wajin. Allah yfen tabam refo fefares to, bi Ait ynaut Domba Maku refo. Ynaut yawe, “Kbe raa mame Domba majat re kbe mees rau myon iro raa; tibyo ana mkai riof.”
9Anu ro nri bokyas refo fo; nbo nno kaket!
10“Allah ysok raa taro. Tna yawe meen raa mfot raa weto tna makah ana mamoʼt tabam rana. Allah yhar bo rAit. Feto to raa weto kbe raa mfot tna makah mamo tabam rana tu oh. Tna awya ro Allah yawe meen raa mame ait mkah pedang to, kbe bo reto mabo tu oh ye.”
Yeremia 15:2, 43:11
Meen arin ro mkair mama. Tna wore oon sboh to, kbe raa beta mkai bo. Anu raa ro Allah wAit to, kbe nkai bo ye. Jõ tawe kʼanu tawe bito smot bi Ait kaket! Susu ma!
Kak ro frok mbam tabam te
11Tna jõ tmat kak roto sau frok mbam tabam te mato maut. Kak reto tanduk rau to trion ewok mnan fi domba maku. Kak reto mkyas bo to, mmai rau mnan fi naga mmai. 12Kak ro ewok reto mros tis mban kak tinyi ro ja mros tis kabes reto. Kak ro tinyi reto msan matak rau kak ro ewok. Mno re raa msya bombra ro tabam refo mbaut kak ro tinyi reto. 13Kak ro ewok fo mno bo ro msai toni. Kak reto matak mbero tafoh mbam ayoh mroh mama mai mam tabam refo. Tna raa masu mmat kak reto mno bo ro msai. 14Kak tinyi ro ja mban kabes reto moo tak rau mee kak ro ewok reto afo re ro ewok reto mno bo ro msai. Tibyo raa mari bo ro kak ro ewok reto mkyas. Tna kak reto besruf raa; mbis ana mfen patung sau ro masu mnan fi kak tinyi reto tna mse kʼana mbaut. (Kak ro tinyi reto to, tiwya raa maru mkah pedang tibyo mana mabet maboh menohe majat fee.) 15Tna raa moo tak mee kak ro ewok reto re au mno patung reto maam. Tibyo patung reto mrok maam tna mmai ye. Raa taro hawe mbaut patung reto. Tibyo patung reto mbis raa wau mawe, “Nmo nme ana weto majat!”
16Tna patung reto mbis raa beta moo tanda mnan fi aat tna mame kʼana matem ati, soh mfe makit wana: Raa mabi msya kukek ye, ro mase msya ro kinyah, tna ro bobot msya ro sryan ye. Ana mako hawe sai, raa mikoh raa beta mame aat reto. 17Menohe raa taro hawe. Tibyo kak ro ewok reto mno wa re ana weto moo boit fee, tna masim boit kʼraa fee ye. Kak reto mbis mawe raa ro mame aat reto mesait aran moo boit tna masim boit. Aat ro raa mame reto to, kak masom rau soh mfe to angka rau reto.
18Awya sai ro ja yhar bo to, kbe yhar bofret ro angka reto: Kak reto angka rau to 666. Tna aat reto merif raa sait yasom rait ye.
14Yohanes ymat Domba Maku msya raa wAu
1Tna jõ tmat Domba Maku sau mros abyõ mam faut ro Sion. Au mros msya raa mabo trion 144.000 su. Makit wana to raa mkom Domba Maku masom rau msya Allah yasom rAit ye. 2Tna jõ tari mai sau mbam ayoh msun mnan fi aya mase sau ro miyi msun. Tna mnan fi ayoh ro mji ye. Mai reto mnan fi raa mai kerombi (kecapi) wana. 3Raa mabo trion 144.000 weto mros mam wore ambar (tahta) ro Allah hre. Raa wefo mros mam ati kak ro Allah wAit mana jiit weto masu wana tna msya raa manes mabo trion 24 weto ye. Raa mabo trion 144.000 weto mbaut bobaut ro tna sau. Raa roto sait bo yhar bobaut reto fee ye. Ana mesait aran mhar bobaut rana reto. Ana mabo trion 144.000 tiwya Yesus yfes.14:3 Raa wefo fo tiwya mhau mam tabam refo tna mno iro. Menohe Allah sikowah ana fee; Yesus yawe Ait raa mame riryõn. Feto to Ait yake raa ro mno iro weto mkah yetsu rAit. Tibyo ana mbaut bobaut kʼbi Ait. 4Tiwya wore wo ana weto mhau mam tabam reto fares to, ja ana kaket ana mamo maus bo msya fnya fee. Ana mhau mato wana mboh sai. Tna ana mhai. Tna ana mamo mhau msya Domba Maku. Tna woyõ-woya Domba reto mamo to, ana weto kro mam tis mamo ye. Yesus yoo raa ro tabam refo to, tna raa mabo trion 144.000 wefo fo mkbair ro tinyi raa msan kʼAllah msya Domba Maku. 5Ana weto ja mhar bo sioh raa fee, tna wase mber safo ye.
6Tna jõ tmat malaikat roto sau fru abyõ mam ayoh war-war. Malaikat reto to fru mama mkyas Bokyas Moof ro mroon (Injil). Mkyas Bokyas Moof reto kʼraa mbam raa mana aro rau-rau beta: Ana mmai wana aro rau ha-hayah ye. Tna ana mama mbam rabin rana aro sor-sor ye. 7Tna malaikat reto mkyas mkah mai ro mase mawe, “Oon sboh oh! Mfo refo Allah yoo safo mana ymit kʼraa. Feto to tawe anu waa tna hawyõn Ait oh! Nbaut bi Ait ro tiwya yfen ayoh msya tabam, aya sawan msya aya mato beta!”
8Tna malaikat roto sau mama. Malaikat ro ewok refo mawe, “Kota Babel rarin oh! Raa ro mhau mam kota ro mase reto to ja mno bo ro mkair. Ana mnan fi fnya ro mwyah.14:8 Bokom ro Allah mkyas ’raa mwyah’ to fret bo mawe raa mamo mbaut bombra roto sor, mhau mbaut Allah rana yesait aran sai fee. Tiwya fnya weto mno re raa ro mhau mam rabin aro sor beta sorni ana tibyo msya au mwyah ye. Bo ro au mno reto to mnan fi anggur ro mno re raa bisir sorni ana to ye, tibyo ana mno bo ro mkair-kar.”
9Tna malaikat ro tuuf mama mtan naut. Mawe mkah mai ro mase mawe, “Masi ma raa mbaut kak msya patung reto fee! Masi ma anu sayõ rof sai tna re raa mame aat ro kak reto kʼanu ntem wanu soh mfe nkit wanu to fee! 10Kbe Allah kmo awya ro yno feto. Kbe Ait kmo toni. Raa fret bo mawe kmo ro Allah rAit safo toni mnan fi anggur maya ro safo toni. Raa ro mbaut kak soh mfe patung reto kbe Allah yoo ana yko mam tafoh msya belerang ro mait. Kbe malaikat wAit sor to msya Domba Maku reto mros horit bo ana mait. 11Raa weto sikotok mam tafoh. Tna wasi mbam tafoh reto to, kbe maun mwiok mamo snok mam hame wajin. Raa ro mbaut kak msya patung reto tna awya sai ro sayõ rof raa mame aat ro kak reto kʼait yetsu rait to, kbe yari mham yoyo, tna mham reto swior-was fee ye.”
12Menohe jõ tawe kʼanu raa ro Allah wAit tawe: Bito nros ntak re smot Yesus matak mamo snok mam tis rau. Nri bo ro Allah ybis kʼanu tna nbo nno kaket. Nhau smot Yesus mam wore wo arin mkair tna oon sboh to!
13Tna jõ tari mai sau mbam sawro ro Allah mawe kʼjõ mawe, “Nkom bo ro Jõ tkyas fo: Kbe Tuhan yno bo moof kʼraa ro mhau smot Ait mamo snok mam ati ro meen ana mhai. Raa wAit ro mhai wore arin mkair to, meen mkai riof mam sawro ro Allah rAit.” Tna Har rAit mawe, “Esre, kbe meen ana mkah bo tna mimyoh snok to u fee. Kbe ana hrowyõ u fee. Bo moof ro tiwya ana mno to, Allah ynaut fares. Feto to kbe ana fri mafer rau reto: Kbe bi Ait yaren ana tu oh.”
14Tna jõ tmat barmabyõ ro mboh sau tna raa sait hre abyõ mam barmabyõ reto. Raa retait ynan fi ’Ait ro Yroh Yama Yfi Raa Sai’. Tna Ait sbyõ watau (mahkota) ro emas sau. Tna ybo sogi sau ro maan toni. 15Tna tmat malaikat roto sau frok mbam Samu ro Allah. Malaikat refo mawe kʼAit ro hre abyõ mam barmabyõ ro mboh reto, mkah mai ro mase mawe, “Nbo sogi anyõ reto namo tabam tna nsot bo ro manes weto. Ayõ sboh oh; bo ro tabam weto make manes oh. Feto to namo nsot!” 16Tibyo Ait ro hre mam barmabyõ mboh retait yayõ sogi rAit tna yroh yamo ysot bo ro tabam weto.14:16 Raa mawat mnaut mawe far-far refo fret bo mawe wore Yesus yama yoo raa wAit, yakah yamoʼt sawro rAit.
17Tna malaikat roto sau frok mbam Samu ro Allah. Malaikat refo mbo sogi ro maan sau. 18Tna malaikat sau naut frok. Malaikat refo ja mhau mko tafoh abyõ mam wohat ro Allah. Malaikat refo mbam wohat reto to, mama mawe kʼmalaikat ro mbo sogi maan reto. Tna au mawe mkah mai ro mase mawe, “Noo sogi anyõ ro maan reto nroh namo tabam reto tna nsot anggur make. Anggur make weto to manes oh. Feto to, namo nsot.” 19Tna malaikat reto mayõ sogi rau tna mamo msot anggur make weto mbam mara ro make weto sor. Msot tna mamo mbeak mam bak sau mato. Bak refo fo wore wo Allah sikowah raa. 20Bak reto mhau mam kota reto mne rau. Raa ro malaikat mbeak mam bak mato reto to, raa mber. Mber re mees wana snok-snak. Tna mees miyi frok mbam bak reto, miyi mnan fi aya. Mees reto miyi snok mamo. Miyi mamo to raa mnit miyõ rau: 300 kilometer. Tna mees reto tee rau to meter ewok bo feto.
15Yohanes ymat raa ro mkai riof mbaut bobaut kʼAllah
1Tna jõ tmat bo ro msai mam sawro ro Tuhan: Bo ro kbe sikowah tabam reto to, trion krema mhau fares. Tna fo kbe Allah kmo rAit maum oh weto. Jõ tmat malaikat mabo krema tna ana mbo hawereh sau-sau. Kair ro mase trion krema mhau mam hawereh wana weto aro sau-sau. Allah siwyan tufrok kair ro ttis wefo; kbe kair trion krema naut sikowah raa ro tabam refo. Tna kmo rAit maum oh weto. 2Tna tmat aya sawan ro ntwar toni mnan fi kaca. Aya sawan reto to srioh tafoh mait. Tna tmat raa mawat mros mam aya sawan reto maam jaro. Ana weto to tiwya mhau mam tabam. Mhau mam tabam reto ana beswan kak ro mban kabes msya patung reto. Ana hawe bo mari tna mbaut bo ewok reto fee ye. Tna tiwya ana hawe bo raa mame aat kʼana metsu rana ye. Aat reto mkom angka ro merif masom kak reto. Ana hawe mno bo weto tibyo Allah yoo kerombi (kecapi) yee kʼana mbo. 3Tna ana mbaut bobaut sau ro tiwya Musa ybaut. Tna msya bobaut ro Domba Maku. (Tiwya Musa yamo sryan ro Allah to; yari bo ro bi Ait yawe.) Ana mbaut mawe:
“Nyõ fi Tuhan Allah ro nase. Nyõ namo Raja tna nbo bombra beta yum. Nyõ nno bo ro moof msya bo ro msai toni ye. Ati ro Nyõ ntu srah raa to, Nyõ nhar awya ro yno iro, tna nmit safo kʼait. Nyõ nsok raa sait bo fee ye. Nhaf, srau aNyõ to moof ati sai. 4Awya oh mi waa Nyõ to fee? Awya oh mi ybaut Nyõ nasom aNyõ to fee? Nyõ nesait aran noof toni yum. Raa ro tabam refo beta mmat mawe Nyõ nno bo ro moof mnan si. Tibyo ana beta kbe mama mbaut Nyõ.”
5Tna fo jõ tmat Samu ro Allah mam sawro rAit. Tna sbyah reto mato rau to kro. 6Tna malaikat mabo krema frok mbam Samu ro bi rAit reto to mama. Malaikat weto mbo kair trion krema ro kbe sikowah raa. Ratan wana to, raa mtin mbam hawee lenan15:6 Hawee reto to moof tna mabyoh maut. Raa msyoh lenan mkah bosafom rami. Mam aam ro Wahyu far-far aro rau-rau to, raa mkyas raa ro myum ratan ro lenan reto to, fret bo mawe raa ro mato mboh. ro moof toni tna kren-kran ye. Ana mbin ntkah wana mkah hawee ro emas.7Tna kak ro Allah wAit mana trion jiit weto, sau moo hawereh emas trion krema. Moo tna mee kʼmalaikat mabo krema weto. Kmo ro Allah rAit mhau mam hawereh wana sau-sau. Allah kbe yhau yroon mamo snok hame wajin. 8Tna wasi betru Samu rAit. Wasi reto mbam bo yase ro bi Ait rAit msya yatak rAit ye. Tna raa sait bo yamo twok mam Samu mato reto wia fee. Kbe malaikat krema weto mtu kair ro mase trion krema mamo mbtek mam tabam reto. Bo ro sikowah tabam reto, kbe malaikat weto mno mkak wia tna fo raa twok mam Samu mato reto u.
16Yohanes ymat kair ro mase trion krema
1Tna jõ tari mai ro mase sau frok mbam Samu ro Allah reto mawe kʼmalaikat mabo krema weto mawe, “Kmo ro Allah mhau mam hawereh trion krema ro anu mbo mam ntem. Nasen nmo ntu kmo rAit reto mbtek mamoʼt tabam oh!”
2Malaikat ro tinyi moo hawereh mkah bo ro kbe sikowah tabam reto, tna mamo mtu bo reto mam tabam. Tibyo kaus ro msai toni snok kʼraa beta ro mbaut patung reto msya raa ro mame aat kak reto. Kaus weto snok kʼana beta metsu wana sor tna ana weto mari mham toni.
3Malaikat ro ewok moo hawereh rau mkah bo ro sikowah tabam to, tna mtu bo reto mamo mbtek mam aya sawan. Tibyo aya sawan beta haberek mnan mees mfi mees ro ajat. Mees reto mno bombra ro mhau mam aya sawan to beta mhai.
4Malaikat ro tuuf moo hawereh rau mkah bo ro sikowah tabam to, tna mtu bo reto mamo mbtek mam aya ro mase msya aya mato beta. Tibyo aya haberek mnan fi mees. 5Tna tari malaikat sau ro ja matak mbo aya beta to, mawe kʼAllah mawe:
“Ati ro Nyõ ntu srah raa to, Nyõ nhar awya ro yno iro, tna nmit safo kʼait. Nyõ nsok raa sait bo fee ye. Nyõ nesait aran noof toni yum. Nyõ fi naban tiwya tinyi nhau yum tna mfo refo nhau yum fares ye. 6Tiwya raa weto mame raa woNyõ msya nabi woNyõ to majat. Tibyo mees rana snok. Mfo refo Nyõ ska bo kʼana riryõn; nno re ana mata mees ska si bo ro ana mno weto.”
7Tna fo jõ tari mai sau frok mbam wohat ro Allah reto mawe kʼbi Ait mawe:
“Esre, Tuhan Allah; Nyõ to nase tna nbo bombra beta. Nyõ to nno bo ro moof ati. Ati ro Nyõ nse srah kʼraa to, nyõ nhar awya ro yno iro to, nse hayah, tna nhar awya ro yno bo ro moof to, nse hayah ye.”
8Malaikat ro jiit moo hawereh rau to mtu kmo ro Allah mamo mbtek mam ayõ. Tibyo ayõ mrok mbe toni tna mait raa mkah tafoh rau. 9Allah yno re ayõ smoh raa. Tibyo ana mrok kmo tna mamus Allah. Bi ait oh mi yatak tna ybis kair ro mase weto mama mai ana. Menohe ana hawe bo mashana. Tna ana hawe bo bibi bo yase rAit ye.
10Malaikat ro maat moo hawereh rau mkah kmo ro Allah to, tna mtu bo reto mamo mbtek mam ambar (tahta) kak ro ja mban kabes reto. Tibyo rabin ro ja kak reto mamo raja mbo to, mrok mamur. Tna raa ro mhau mam rabin rau reto to, mari mham toni, tibyo ana mafit hrea wana. 11Ana weto mham toni tna kaus snok mam metsu wana beta. Tibyo ana mamus Allah ro yhau abyõ mam sawro rAit. Menohe ana mashana fefares. Ana mno bo ro mkair fares.
12Malaikat ro ntamam moo hawereh rau mkah kmo ro Allah to tna mtu bo reto mam aya mase sau ro masom Efrat. Tibyo aya reto mrok msa ngkaat. Tna raa mamo iso mam aya ngasasia rau reto. Tna raja makin ro mbam ati ro tobrat msya raa sbe wana to, masen mamo kro iso reto. 13Tna tmat kabes mabo tuuf ro mnan fi aah bo feto. Kabes weto to, sau frok mbam kabes aban masoh rau. Tna sau frok mbam kak ro ja mban kabes reto to, masoh rau ye. Tna sau frok mbam ait ro ja sioh raa to, yasoh rait ye. Ait ro tis tait, ja sioh yawe ait tait nabi ro Allah ybis yama ykyas bo wAit. He mfe, ait yama besruf raa sai. 14Kabes mabo tuuf wefo ja mno bo msai. Kabes weto frok mamo mo kʼraja ro ja mbo raa ro tabam refo beta. Mamo tna mawe ana beta berur mam wo sau tna siwyan mamo mafa. Ana mhar mawe Allah tait yase ybo bombra beta. Tna ana mhar mawe kbe Ait yama yafa ysya ana. Tna raja weto to mhau wea siwyan ayõ reto.
15Tna Yesus yawe, “Nri oh! Meen Jõ tama tubor tfi raa ro ja msyõf bo. Feto to nhau siwyan. Raa taro mjin sai. Ana siwyan fefares tibyo meen mrok. Kbe ana hrenaut mfi raa ro mamo sroraa. Awya ro yhau siwyan yoyo to, kbe simaut. Kbe ait hrenaut fee. Kbe ait sroraa fee.”
16Tna fo kabes trion tuuf weto mbis raja weto mamo hre siret mam wo sau. Yuk reto mai ro Ibrani to mawe masom Harmagedon.
17Malaikat ro krema moo hawereh rau mkah kmo ro Allah to, tna mtu bo reto mamo mbtek mam ayoh war-war. Tna jõ tari mai sau ro mase mbam ambar (tahta) ro mhau mam samu ro Allah mato to mawe, “Bombra beta tno mkak oh!” 18Tna rir mrir mnin-nan, tna ayoh mji, barmabyõ rurur, iin ro msai toni frok mama. Iin ro msai miwer mnan fi feto to, frok mam tabam refo aro fee. Iin ro msai toni reto. 19Tibyo kota Babel mrok ftah trion tuuf. Raa ro mhau mam kota ro mase reto to, ja mno bo ro mkair yoyo. Tibyo Allah kmo. Allah kmo tibyo ybis malaikat riwai reto moo hawereh rau to mamo mtu kmo ro Allah rAit mbtek mai raa ro Babel weto. Tna iin reto frok mno raa ro wase Allah roto sor ye, mno kota wana sasyoh ye. 20Tna sato beta msya atu beta marak. 21Tna oom ro mnan fi es makan mais. Es makan weto to maboh. Fanes wau to 50 kilogram sau-sau bo feto. Es makan weto mroh mbtek mame raa. Raa mkai bo mkair ro mase feto tibyo ana mamus Allah.
17Yohanes ymat fai sau ro ja mwyah
1Tna malaikat mabo trion krema ro mbo hawereh mkah Allah kmo wAit weto to, sau mawe kʼjõ mawe, “Nama, kbe Allah yno bo mai kʼwyah mabi ro hre abyõ mam aya mawat. Au mwyah toni tibyo Allah kmo. Nama nmat. 2Tiwya fai au reto mno re raa sorni ana, tibyo mwyah msya fai au. Bo ro au mno reto to mnan fi anggur maya ro mno raa re mbisir sorni ana, tibyo ana mno bo mkair-kar. Tna au mno raja makin msya raa ro mhau mam rabin aro sor beta sorni ana, tibyo mwyah msya fai au ye.”
3Tna Har ro Tuhan mbo jõ matak. Tibyo jõ smi tmat bo. Tmat bo malaikat reto makah jõ mamoʼt yuk sau ro mimon. Tna tmat fai au ro mwyah reto hre abyõ mam kak ro ja mban kabes reto. Kak reto to, mawyan rau to mkek. Tna raa mame aat mawat mam kak reto metsu rau. Aat weto to mkom bokom ro mamus Allah. Kak reto mana wau trion krema tna tanduk wau trion nsaa. 4Tna fai reto to, myum ratan rau ro mkin msya mkek. Tna au fayir metsu rau mkah emas mawat, msya mutiara mawat, msya fraa ro mabyoh maut tna kren-kran aro rau mawat ye. Tna matem mbo hawereh ro emas sau. Hawereh reto raa moo bombra beta ro mkair, msya bombra ro mwyah weto mfau matot. 5Mam makit rau to, raa mkom som baro ro ja raa mti bomyõt fares kʼraa. Raa mkom: ‘Kota Babel ro Mase’ tna ‘fai au refo fo, ku wau ja mwyah.’ tna ‘Bombra ro mkair mam tabam refo to, beta frok mbam fai au refo.’ 6Fai au knait raa ro Allah wAit. Tibyo raa wAit ro ja mkyas Yesus yasom to, au mbis raa mamo mame ana majat. Ana raa mame majat tna fai au mata mees wana. Tibyo bisir tna simaut mase, tna safuk. Jõ tmat fai au reto tna trok ktak. 7Tibyo malaikat reto mtu kʼjõ mawe, “Fyi re nyõ nrok ktak to? Kak ro mana wau trion krema msya tanduk wau trion nsaa reto to, kbe jõ betoo kʼnyõ. Tna jõ betoo fai au ro hre abyõ mam kak kabes reto kʼnyõ ye re nyõ nhar:
8‘Kak ro ja mban kabes ro riwai nyõ nmat reto to, tiwya mhau mam tabam refo. Mfo wefo marak oh. Tna kak reto meen frok mbam sawro ro kabes ja mhau to, tna me mama mber tabam refo u. Mhau, tna majat. Kbe raa makin mmat kak reto tna ana taro mrok ktak. Raa ro mmat kak reto mrok ktak oh mi masom wana aro raa mkom mam aam ro Tuhan rAit fee. Aam refo masom rau to: “Raa ro Kbe Mhau Hame Wajin.” (Tiwya tinyi Allah yfen tabam refo to, aam reto raa mkom oh. Aam refo mkyas raa masom ro meen mhau hame wajin.) 9Raa ro mhar bo to, kbe mhar bofret reto mawe fefo: Kak reto mana wau trion krema weto to fret bo mawe atu trion krema ro fai au reto ja hre abyõ. 10Kak mana wau trion krema weto to fret bo mawe raja mabo trion krema ye. Raja mabo krema weto to, mabo maat mbtek oh. Tna mfo refo sait hre ybo raa fares. Tna sait frok yama fefares. Kbe raja refi yama menohe ait yase ybo raa waor sai. 11Kak ro tiwya mhau tna mfo wefo marak reto fret bo mawe raja ro krentuuf oh meto. Kak refo fo raja mnan fi raja mabo krema roto riwai weto ye. Tna kbe majat. 12Tanduk trion nsaa weto to fret bo mawe raja mabo nsaa roto. Raja mabo nsaa wefo mamo mase mbo raa fefares. Ana weto mase mbo raa kait fee. Kbe ana msya kak reto mamo raja mbo raa ayõ sau sai. 13Raja weto to bonaut wana msya srau wana sau su. Ana beta mawe msan matak wana kak ro ja mban kabes reto. Ana mawe kak reto mbo raa wana ro ja ana mesait mbis. 14Meen kak ro ja mban kabes reto msya raja mabo nsaa weto mamo mafa msya Domba Maku. Tna raa taro kro ati ro Domba Maku reto mafa ye. Raa weto tii Allah ysok tna mmen re ana mamo raa wAit. Ana weto mur-mur smot Ait; mhaf magin fee. Ait ro ynan fi Domba Maku reto to, Tuan ro yase. Ait yatak ybo tuan mbra taro sor. Ait tait Raja ro yatak ybo raja taro sor. Feto to ana mamo su mafa msya raa byoh to, tna kbe ana mros matak. Tna mno raa byoh weto mbtek tu oh!’”
15Tna malaikat reto mbetoo bofret reto renti mawe, “Riwai nyõ nmat fai au ro ja mwyah to, hre mam wore aya mawat to. Aya weto fret bo mawe raa mbam kʼraa mana aro rau-rau. Ana mmai rana aro rau ha-hayah ye. Tna mama mbam rabin rana aro sor ye. 16Tna riwai nyõ nmat kak ro ja mban kabes reto tna tanduk wau trion nsaa. Kak reto msya tanduk wau (raja mabo nsaa weto) to, kbe knait fai au ro mwyah reto. Ana kbe mtak bombra ro au mse msya ratan wau ro myum beta. Tibyo au sroraa. Tna kbe raja weto mfot fai au, tna mabo kwiyan rau. Tna moo fai au mko mait mam tafoh. 17Allah yno re raja weto msan tak wana kak ro ja mban kabes reto afo re kak reto mase mbo raa wana. Kbe Allah sayõ rof kak reto masen mbo raa mamo snok ayõ ro bi Ait yawe sai. Tna bo ro raja weto msya kak mno to, ana mno mamyot bo ro bi Ait saim ykyas wia. 18Tna riwai nyõ nmat fai sau ro ja mwyah, ro hre abyõ mam kak ro ja mban kabes reto. Fai reto fret bo mawe kota mabi sau. Kota mabi reto matak mbo raja ro tabam reto beta ye.”
18Yohanes ymat kota ro Babel rarin
1Tna fo jõ tmat malaikat roto sau mroh mbam sawro ro Allah mama. Malaikat reto to matak toni. Au mroh tna bo mase rau mawyah toni tibyo mram tabam refo. 2Mroh tna mkyas mkah mai ro mase mawe, “Kota Babel rarin oh! Kota ro mase reto rarin oh! Mfo wefo kabes mawat msya ruu mbra ro mkair-kar18:2 Ruu weto tiwya Musa yawe raa ro Yahudi mabo ma. ja raa knait to, mamo mhau mam tore tno. 3Raa ro mhau mam kota ro Babel to, mnan fi fai au ro ja mwyah.18:3 Bokom ro Allah mkyas ’raa mwyah’ to fret bo mawe raa mamo mbaut bombra roto sor, ana mhau mbaut Allah rana yesait aran sai fee. Tiwya fai au reto mno re raa sorni ana tibyo mwyah msya fai au. Au tko raja makin msya raa ro mhau mam rabin aro sor beta mno iro ye. Bo ro au mno reto to mnan fi anggur maya ro mno re raa mbisir sorni ana to. Tibyo ana mno bo mkair-kar. Tiwya raa ro ja hre masim bo to, mamoʼt kota reto re moo bo ro moof aro kʼana. Moo bo msis bia tna masim. Tibyo ana weto mamo bobot.”18:3 Yesaya 23:17; Yeremia 51:7.
4Tna jõ tari mai roto sau mbam sawro ro Allah mawe, “Raa mana wojõ; snok mbam kota reto fooh! Snok mbam kota reto afo re anu nhau su nsya raa weto fee tna kbe nno iro nsya raa weto fee ye! Kair ro mase kbe mama mai kʼana. Snok fooh afo re kair reto mai kʼanu ye fee! 5Raa weto mno iro mawat. Iro ro ana mno weto to mfaut maut mnan fi atu sau ro faut miyõ toni kene mam ayoh. Tna Allah ynaut safo ro ana mber.”18:5 Yesaya 48:20; Yeremia 50:8; 51:6.
6Tna Allah yawe kʼmalaikat wAit yawe,
“Mfo refo tbis anu nmo nno bo mai kʼraa ro Babel. Nmo ska bo ro mkair tii ana mno wia. Bo ro anu nno to mnan fi boren wana ro Jõ taren. Nmo nno boska mai kʼana muhrin ewok u. Raa fret bo mawe kmo aJõ to safo toni mnan fi anggur maya ro safo toni. Feto kbe Jõ safo sikowah raa ro Babel.18:6 Mazmur 137:8; Yeremia 50:29.7Tiwya ana weto mno bo mkair toni: Ana masmamo tibyo mamo bobot toni tna mbibi ana mesait ai sai. Ana mawe: ‘Anu fo bnan fi fnya manes. Anu fo bnan fi semit fee! Anu fo bhar sraujin fee ye!’ Raa ro Babel bibi ana mesait ai sai tna mse bombra wana msis toni. Feto tibyo Jõ bitsre kair ro mase toni mbtek mai kʼana riryõn. Tna tbis anu nmo sikowah ana re mawyan surut ana.
8Jõ fi Tuhan Allah ro tse safo mana tmit kʼraa. Jõ fi Raa ro tase. Feto oh mi mam ti sau aran sai kbe kair ro mase mbtek mai kʼraa ro Babel: Kbe ana kiyam samyoh toni, tna raa mawat mhai. Kbe raa weto sraujin toni. Tna hai sre kbe mai kʼana ye. Tna kota ro ana mhau reto to, kbe raa mkah mait.”18:8 Yesaya 47:7-9.
9Raja makin tiwya ksoh bombra msis-sas ro ana mkai mam Babel tna ana mno bo ro mkair msya raa ro Babel ye. Tna ati ro raa mkah kota ro Babel to, kbe raja weto mros mmat wasi maun tna mawia sraujin toni. 10Kbe ana mros fari mmat bo samyoh ro mai kota reto to, mrok waa toni mawe,
“Ayoh! Bo mkair! Kota ro masom rno mait mkak! Tiwya kota reto matak toni. Tna mam ayõ sau reto sai bo ro samyoh matu mai tibyo kota ro Babel rarin!”
11Tna raa ro ja hre masim bo to, mmat he kota ro Babel rarin oh. Tibyo ana mawia sraujin. Mawia mawe kbe raa ro Babel aro moo bo ro ana masim u fee. 12Tiwya raa masim emas,perak, msya fraa ro kren-kran mabyoh maut aro rau, msya mutiara, hawe aro rau; ro lenan, ro mkin, ro sutera, msya boyan ro mkek toni tna msya bombra ro raa mfen mbam ara ro sawer sau, bombra ro raa mfen mbam gading18:12 Kak sau ro maboh toni masom gajah to, wai rau. ye, bombra ro raa mfen mbam ara ro mabyoh maut mnan fi aku ye, tembaga ye, besi ye msya fraa ro moof toni sau masom pualam. Tiwya ana masim bo weto tna raa ro Babel moo. 13Tna ana masim ara kayu manis marak rau msya rempah-rempah roto ro mno re bo sohmaam sawer. Tna ana masim ri ro masom kemenyan ro raa mko to, wasi rau sawer mnan fi ara aku ro raa mko, msya mur,anggur maya, minyak,gandum msya tepung rau. Tna ana masim sapi,domba,kuda msya asya ro kuda mkuk, tna raa masim ku awe ye. 14Tna raa mawe:
“Anu nwe nsim bombra mam Babel tna fri mafer moof to, he mfe; bo weto msaef beta oh. Tna bosatoh msya bosnyam ro tiwya anu nasmamo to, weto beta marak ye. Kbe anu nkai u fee.”
15Raa ro tiwya moo bombra mam kota ro Babel tna me masim kʼraa to, mamo bobot. Raa ksoh bombra weto tna moo mkah pitis mabyoh ro maut. Tibyo raa ro masim bo weto to mamo bobot. Ana mros fari mmat kair ro mai kota reto, tna mrok waa tetet. 16Ana ro ja masim bo to mawia mawe:
“Ayoh! Feto oh a? Bo mkair! Kota ro mase no mait mkak oh! Tiwya raa ro kota reto myum ratan ro moof toni: Hawee ro lenan, ro mkin, msya boyan ro mkek toni. Tiwya ana weto fayir metsu wana mkah bofayir ro emas, fraa ro mabyoh maut tna kren-kran, msya mutiara ye. 17Mam ayõ sau sai bosatoh ro ana mse to mait mkak!”18:17 Yesaya 23:14; Yehezkiel 27:26-30.
Tna raa mase ro mbo kapal beta msya raa ro mkah bo mam kapal sor, msya raa ro maut kapal beta ye, msya raa ro ja makam bo maru mam aya sawan bo, kbe ana beta mros fari mmat. 18Kbe ana mmat wasi mbam kota ro Babel maun mwiok maut to ana mawe, “Kota mabi ro hayo mnan fi kota reu u?” 19Raa ro mmat to sraujin toni tibyo moo bohasyaf mse abyõ mam mana wana tna mawia mawe:
“Ayoh! Feto oh a? Bo mkair! Kota ro mase no mait mkak oh! Tiwya kapal wanu masyõ bosatoh mamoʼt kota ro Babel masim no. Anu bsim bo kʼraa ro Babel to mamo bobot beta. Tna mam ayõ sau sai bo ro samyoh matu mai tibyo bo satoh weto beta saef marak!”18:19 Yehezkiel 27:30-34.
20Tna mai reto mawe kʼraa ro Allah wAit mawe, “Anu ro nhau mam sawro ro Allah to, nsya raa ro Allah wAit tna msya raabis (rasul) wAit, msya nabi wAit ye to: Simaut mase oh! Tiwya raa ro Babel mno bo ro mkair mai kʼanu. Feto tibyo Allah yoo safo mana ymit kʼana riryõn.”
21Tna malaikat ro matak sau tubat fraa ro maboh sau, mnan fi fraa kilangan18:21 Kilangan to fraa ro maboh sau. Ja raa mmuk gandum soh mfe beras msya bo taro sor mkah fraa refo. Mmuk bo feto mno tepung. tna tubat fraa reto mai mamoʼt aya sawan mawe:
“Feto ye kota Babel ro mase reto to, kbe Allah tubat mbeak yai mamo te mnan fi fraa refo ye. Tibyo habah, kbe raa sait bo ykai kota reto u fee ye. 22Tna mam kota reto to, raa ro mai kerombi (kecapi) aro u fee ye. Tna raa aro mji howes u fee ye. Kbe raa aro mfi oor u fee, tna raa aro mfi saa u fee ye. Kbe raa aro mkah bo wana u fee. Kbe raa aro mfen bo u fee. Tna raa aro mmuk boit mkah fraa kilangan u fee ye. 23Tna lampu aro mawyah mam kota reto u fee ye. Tna raa aro simaut makyõ bokyõ mam kota reto u fee ye. Tiwya raa ro mase masim bo mam kota reto. Tna raa ro mhau mam kota reto besruf raa ro mbam rabin taro beta. Raa mawat mmat bo ro mkair-kar tiwya raa ro Babel mno to. Raa taro mmat tibyo ana mawe mno feto ye. 24Raa ro Babel misti tibyo raa mame raa majat to: Nabi na msya raa ro Allah wAit taro to ye. Tna raa taro tiwya raa mame majat to, raa ro Babel masom isti reto ye.”
19Kota ro Babel rarin tibyo raa ro Allah wAit mbaut bobaut
1Tna jõ tari raa mmai msun mam sawro ro Allah mawe:
“Haleluya, anu bbaut Tuhan! Riof ro anu bkai refo fo mbam kʼAllah ranu. Rau ro moof to, raa mbaut Ait. Ait tait Raa ro yase. 2Bi Ait ja yno bo ro moof ati. Tna ati ro Ait yros susai to, Ait yhar awya ro yno iro, tna ymit safo kʼait. Kota Babel reto to mnan fi fai sau ro mwyah toni tna misti tibyo raa makin mbtek mam iro. Feto to Allah riwai yoo safo mana ymit fai au reto. Tiwya fai au mame raa ro Allah wAit majat to, tna bi Ait yno bo ro samyoh mbtek mai kʼau ska si bo ro au mno.”
3Tna ana riwai weto me mawe u mawe, “Haleluya, anu bbaut Tuhan! Fai ro mwyah reto to, Allah yko mam tafoh. Tna wasi mbam tafoh reto to, kbe maun mwiok maut mamo snok mam hame wajin.”
4Tna raa manes mabo trion 24 weto msya kak ro Allah wAit mana jiit weto maka mbaut Allah ro hre abyõ mam ambar (tahta) rAit reto. Mawe, “Amin: Mabo oh! Haleluya, anu bbaut Tuhan!”
5Tna mai sau mbam ambar (tahta) ro Allah rAit mawe, “Anu sryan ro Allah: Nma nbaut Allah ranu! Anu beta ro ja hartu bi Ait; ro nbi nsya ro kinyah ye; nma nbaut bi Ait oh!”
6Tna jõ tari raa msis-sas mmai mnin. Ana mmai msun mnan fi aya ro miyi msun, tna mnan fi ayoh ro rurur mase toni. Ana mawe, “Haleluya, anu bbaut Tuhan! Tuhan Allah ranu tait yase. Ait yamo Raja ro yatak ybo bombra beta oh! 7Nma, anu simaut mase tna bbaut bi Ait! Ait ro yfi Domba Maku retait, siwyan yama oh! Ait yama yawe yoo fnya. Tna fnya ro Ait yawe yoo to siwyan oh. Au fayir au oh. 8Raa moo ratan lenan ro mboh tna moof toni mee kʼau myum.” (Raa ro Allah wAit ja mhar mno iro fee. Ratan lenan ro moof reto fret bo mawe bo ro moof ana mno wore ana tiwya mhau mam tabam reto.)
9Tna malaikat reto mawe kʼjõ mawe: “Nkom bo ro jõ tawe refo: ‘Meen Domba Maku mmen fnya tna makyõ bokyõ rAu. Tna Tuhan yoo taah yee kʼraa taro yawe ana mamoʼt bokyõ reto. Ana ro mamo to, kbe simaut mase.’” Tna fo malaikat reto mawe, “Jõ tkyas bokyas ro ati, bokyas ro mbam Allah oh mefo.” 10Jõ tari feto to taka tabum te mam ati ro malaikat masu rau, tawe tbaut malaikat reto. Menohe malaikat reto mawe, “Nno feto ma! Nbaut Allah yesait aran sai. Jõ fi sryan rAit sai mnan fi nyõ nsya nafoh wonyõ. Nafoh wonyõ ja mari watum ro Allah mbo mno. Tna ana mros matak mkyas Yesus yasom kʼraa taro to ye. Raa mkyas Yesus yasom kʼraa taro to, ana mkyas mkah Har ro Tuhan matak rAu mnan fi nabi ro tiwya mkyas soo ro Allah.”
11Tna jõ tmat sawro ro Allah mato nkro. Tna tmat kuda ro mboh sau. Ait ro yaut hre mam kuda reto abyõ tait, yasom rAit ‘Ait Ro Srau Ewok Fee’, tna ‘Ait Ro Ykyas Sioh Fee’. Ati ro Ait yros susai to, Ait yhar awya ro yno iro, tna ymit safo kʼait. Ait ysok raa sait bo fee ye. Tna ati ro Ait yamo yafa ysya raa byoh ro hawe Allah to, Ait ja ysok raa sait fee ye. 12Ait yasu rAit mawyah mnan fi tafoh. Tna Ait sbyõ watau (mahkota) mawat. Tna raa mkom yasom sau mam yetsu rAit mnan fi raa mame aat. Som reto raa sait bo yhar fee. Ait yesait aran yhar yasom rAit reto. 13Tna ratan ro Ait yyum to, raa mamruk mkah mees. Tna yasom rAit to ’Bokyas ro Allah.’ 14Ait yamo yafa tna raa sbe mbam sawro ro Allah kro Ait mamoʼt tabam. Raa sbe weto maut kuda ro mboh sor ye. Tna ana myum ratan ro raa mtin mkah hawee lenan ro moof tna ro mboh toni. 15Tna pedang sau ro maan toni mhau mam Ait yasoh. Kbe yafa ysya raa byoh mbam raa mana ro tabam reto beta mkah pedang rAit reto. Kbe ana mbtek tibyo Ait ybo armuk rAit ro besi tna ybo ana matak. Allah ro yase tna ybo bombra beta tait, Ait kmo raa byoh weto. Ja raa moo anggur make mawat tna mbeak mam bak mato sau. Tna raa mber anggur make weto re maya wau frok. Tna mnan fi feto to, kbe Allah yoo byoh weto yamo mbeak mam wore bi Ait kbe sikowah raa. Tna raa ro hre mam kuda reto abyõ tait, kbe Ait yamo yber raa weto sari. 16Mam ratan ro Ait yyum reto tna mam yafamu mair to, raa mkom Ait yasom ewok fefo: ‘Tuhan ro Yatak Ybo Raa ro Mase Mbra Sor’ tna ‘Raja ro Yatak Ybo Raja taro Sor’.
17Tna jõ tmat malaikat sau mros abyõ mam ayõ. Tna mkah mai ro fari to malaikat refo mtu ruu beta ro fru mam ayoh to mawe, “Nma, anu beta siret su siwyan anu. Kbe anu nmo sohmaam korat ro Allah siwyan kʼanu. 18Kbe anu nbo raa msis-sas kwiyan wana: Raja na, msya raa mase ro ja mbo raa sbe ye, msya raa mase taro sor ye, raa ro ja maut kuda msya kwiyan kuda wana ye. Kbe anu nbo bobot msya sryan wana ye, tna nbo raa mabi msya raa kinyah kwiyan wana ye.”
19Tna tmat kak ro ja mban kabes reto. (Kak ro metsu sau, mana rau to trion krema tna tanduk rau trion nsaa reto.) Au msya raja na ro tabam reto tna msya raa sbe wana, wefo beta siret su mawe mafa msya bi Ait ro yaut kuda tait ysya raa sbe wAit weto. 20Tna bi Ait ro yaut kuda tait ysya raa sbe wAit mfot kak ro ja mban kabes reto. Tna ana mfot nabi retait ro ja sioh raa ye (ro tiwya yno bo ro msai aro afo re raa mari kak reto. Yno bo ro msai weto besruf raa afo re ana sayõ rof raa mame aat sau kʼana metsu wana. Tiwya kak reto mbis raa mame aat rau. Tna raa weto mbaut patung ro masu mnan fi kak reto ye.) Bi Ait ro yaut kuda tait ysya raa sbe wAit mfot nabi ro ja sioh raa, tna mfot kak reto ye. Mbewok maam fares to, raa makah ana mamo mbeak mam tafoh ro mait mwarah mkah belerang. Tafoh reto mait mbrer mnan fi sawan. 21Tna raa sbe ro mban tis nabi palsu tait ysya kak reto, ana mbewok weto to, bi Ait ro yaut kuda retait yame majat mkah pedang ro mhau mam yasoh rAit. Tibyo ruu beta fru mama tna mabo ajat weto kwiyan wana tibyo mhaf matu.
20Yohanes ymat he malaikat sau mfot tna make kabes aban reto
1Tna jõ tmat malaikat sau mbam sawro ro Allah mroh mama. Tna malaikat reto mbo kunci sau msya rantai sau ro mase. Kunci reto mkah raa mitrah sawro ro kabes mhau. 2,3Malaikat reto mfot kabes aban reto. (Kak reto tiwya tinyi haberek mamo aban ro soo. Aban reto masom Iblis soh mfe to Kabes Yabi.) Malaikat reto mfot kabes aban reto tna make. Tna malaikat tubat kabes aban mbeak mamoʼt sawro ro kabes mhau. Tna muut masa wa mkah kunci reto. Kabes aban mhau mam beto mamo snok mam tahun trion 1000. Malaikat mno feto afo re kabes aban reto kbe sioh raa u fee mamo snok tahun trion 1000. Tahun trion 1000 weto mkak tna kabes aban kbe raa bitsre waor sai.
4Tna tmat raa baro hre abyõ mam ambar (tahta). Raa weto matak mtu srah mari. Tna tmat raa mawat mamos wana ye. Raa wefo fo raa ro tiwya mkyas Watum ro Allah tna mkyas mawe ana smot Yesus. Tibyo raa msot ana mana wana re majat. Tiwya raa wefo mhau mam tabam refo fares to, ana mbaut kak msya patung reto fee. Tna raa mame aat ro kak reto kʼana matem soh mfe makit wana to fee ye. Tna tmat raa weto mrok masen. Tna ana mamo mase tna msya Kristus ana mbo raa mamo snok tahun trion 1000. 5Raa wefo tiwya mbaut kak msya patung reto fee. Tibyo raa mame ana majat. Raa weto oh mi raa mkbair ro meen mrok masen wia tinyi. Tna raa roto ro tiwya mhai oh to, ana weto mrok masen fefares. Mhau tahun trion 1000 mkak tna raa roto taro beta ro tiwya mhai to, kbe mrok masen ye. 6Raa ro mrok masen wia tinyi weto to, Allah yoo ana yse kait kʼAit. Kbe ana simaut mase. Ati ro raa mhai mun trion ro ewok to, kbe ana wefo mhai u fee. Kbe ana wefo mamo imam ro Allah msya Kristus ye. Tna kbe msya Ait mamo raja mbo raa mamo snok tahun trion 1000.
7Tahun trion 1000 weto mkak tna kabes yabi raa bitsre ybam yuk ro tiwya raa mfot ait make mbu. 8Tna fo ait yamo sioh raa ro mhau mam tabam refo. Ait sioh raa ro mhau mam ati ti mare, ati ti wayir, ati ti habeh, msya ati to brat ye. Tna kabes yabi yamo sioh raa ro mhau mam rabin ro Gog msya rabin ro Magog ye. Kabes yabi yamo ybis raa weto beta mberur su mwo sau tna siwyan ana bo mamo mafa. Ana ro siret to msis bia mnan fi snyik ro mhau mam aya sawan maam to. 9Tibyo raa mama mbam rabin wana sor-sor hayah to mamoʼt kota ro masom ‘Kota ro Allah Ksoh’. Raa ro Allah wAit mhau mam kota reto. Tna raa byoh mamo burut ana weto. Menohe tafoh mbam ayoh mroh mait byoh weto mkak. 10Kabes yabi ja sioh raa ro mama mbam rabin wana sor-sor. Ait raa tubat mbeak yamo mait mam tafoh ro mait mwarah mkah belerang. Tafoh reto mait mbrer mnan fi aya sawan. Tiwya kak ro ja mban kabes, ro mana rau trion krema reto msya nabi ro ja sioh raa tait to, raa moo ana mbewok mbeak mam tafoh reto oh. Kbe tafoh mait sikowah ana yoyo mamo snok mam hame wajin.
11Tna jõ tmat bi Ait sait hre abyõ mam ambar (tahta) mabi ro mboh sau. Tna ayoh msya tabam refo to mrok mansyaf sai. Bo weto mtai mhau mam ati ro Ait yasu fee. 12Tna jõ tmat raa ro tiwya mhai oh; ro mabi msya kinyah ye. Ana masen mros mam ati ro bi Ait yasu ro hre abyõ mam ambar (tahta) rAit reto. Tna raa betrat aam ro mhau mam beto sor. Aam weto sau fo masom rau ‘Raa ro Kbe Mhau Hame Wajin’. Tna aam roto sau mkyas bo ro raa sait-sait tiwya yno. Allah ymat aam weto tna ytu safo yse kʼraa ro mros weto mamyot si bo ro ana weto aro sait-sait tiwya yno. 13Tna raa ro tiwya mhai msya ro majat weto to, hai msya ajat weto beta mrok masen mros: Taro mrok masen mbam aya sawan ye, taro to mrok masen mbam kayah mato ro tiwya raa sama ana ye, tna taro mrok masen mbam sawro ro hai snok. Tna raa wefo beta mamo mros mam ati ro Allah yasu. Tna Allah yse srah kʼana mamyot si bo ro ana tiwya mno sor. 14Bo ro misti tibyo raa mhai to, tna msya sawro ro hai to, raa makah mamo mbeak mam tafoh ro mait warah mkah belerang. Tafoh reto mait mbrer mnan fi aya sawan. Reto to hai ro mun ewok. 15Tna awya ro yasom rait raa mkom mam aam ‘Raa ro Kbe Mhau Hame Wajin’ reto to fee, kbe ait retait raa mbeak mam tafoh reto. Aam reto mkyas raa masom wana ro kbe mhau mroon.
21Yohanes ymat ayoh ro tna msya tabam ro tna
1Tna jõ tmat ayoh ro tna msya tabam ro tna. Ayoh msya tabam msya aya sawan ro Allah yfen wia to, marak. 2Tna jõ tmat kota Yerusalem ro tna. Kota reto to kota ro Allah rAit. Tna jõ tmat kota reto mroh mbam sawro ro Allah rAit mama. Allah siwyan kota reto to moof toni; mnan fi fnya fain ro ja fayir ana moof wer re mamo maryõt mere rau retait. 3Tna jõ tari mai ro mase sau mbam ambar (tahta)Tuhan rAit mawe, “Mfo refo Allah yroh yama yhau su ysya raa. Raa weto kbe mamo raa mana wAit tna bi Ait tait Allah ro ana smot. Kbe bi Ait yesait yhau yatam ana. 4Kbe Ait yno re ana aro sraujin u fee. Ait kbe karu ana yukan wana. Wore weto to, raa wAit aro mhai u fee. Tna raa wAit aro mhar bo sraujin u fee. Ana aro mhar bo mawia u fee. Tna ana aro mhar bo kiyam u fee ye. Bombra weto to bose oh, marak beta.”
5Tna Ait ro hre mam ambar rAit reto abyõ to yawe, “Jõ tfen bombra beta tna u. Jõ tawe kʼnyõ tawe nkom bo ro Jõ tkyas wefo beta. Bo ro Jõ tkyas fo bo ati. Bo mabo tu. Tibyo nkom beta afo re kbe raa mmat.”
6Tna Ait yawe kʼjõ yawe, “Bo beta to Jõ tno mkak oh! Jõ fi Raa ro tinyi tibyo Jõ tasom aJõ ‘Alfa’. Tna Jõ fi Raa ro ttis ye tibyo Jõ tasom aJõ ‘Omega’ ye. Awya ro yhai sbit to, kbe Jõ too aya ro moof baro tee kʼait yata. Yoo mkah pitis bo aro fee ye. Yoo sai. Aya reto mno re raa mhau hame wajin. 7Awya sai ro tiwya yros yatak re smot Jõ snok ttis rau to, mfo refo ait fri bo weto beta. Jõ fi Allah ro ait smot. Tna ait yamo ku aJõ ye. 8Menohe raa aro smot Jõ fee: Tibyo kbe ana mhai mun ewok u. Raa weto to, raa ro ja waa tibyo smot Jõ fee. Ana taro hawe bo smot Jõ. Ana taro to mno bo ro mimara. Ana taro mame raa majat. Ana taro ja mwyah. Ana taro ja mari bo ro kabes mawe, tna mno mafot ro kabes weto. Ana taro to mbaut Jõ fee, ana mbaut bombra roto. Ana weto msya raa beta ro sioh-nat raa ye to, meen raa tubat ana beta mbeak mam tafoh ro mait mbrer mnan fi aya sawan. Reto to, hai ro mun ewok.”
9Tna malaikat mabo krema ro riwai mbo kair mase ro ttis mam hawereh wana to, sau mama mo kʼjõ mawe, “Nama nmat fnya fain ro Allah ymen mama msya Domba Maku.” 10Tna Har ro Tuhan mbo jõ matak. Tibyo tmat malaikat riwai reto makah jõ mamo tne mam atu mana sau ro miyõ toni. Amu nros tno tna au merif kota sau kʼjõ. Kota reto to kota ro Allah rAit. Jõ tmat kota reto mroh mbam sawro ro Allah rAit mama. 11Allah yhau mam kota reto. Tna bo yase rAit mait mawyah tna kren toni skah kota reto mnan fi fraa sau ro safom tna mabyoh maut masom yaspis. Tna mnan fi kaca ro ntwar toni ye. 12Tna tembok ro mana mur kota reto to, miyõ tna mase ye. Tembok reto masa rau trion 12. Tna malaikat sau mros kmot masa weto sau-sau. Tna raa mkom masom sau abyõ uu masa weto sau-sau. Som ro raa mkom weto to raa mana ro Israel trion 12 to masom wana. 13Masa trion 12 weto to, trion tuuf sayõ mam ati to brat. Tna trion tuuf sayõ mam ati ti mare, tna trion tuuf sayõ mam ati ti wayir, tna tuuf sayõ mam ati ti habeh. 14Tembok ro mana mur kota reto to, raa sgi abyõ mam fraa trion 12 ro mhau mam te. Tna raabis (rasul) ro Domba Maku mabo trion 12 weto to raa mkom ana masom wana mam fraa weto sau-sau.
15Tna malaikat ro mkyas bo msya jõ reto to, mbo armuk emas mara sau mkah bo mnit kota reto. 16Kota reto tuut wau trion jiit. Malaikat reto mnit kota reto mase rau, mabuf rau msya miyõ rau to mnan anya sai: 12.000 stadia21:16 Stadia sau to miyõ rau mnan anya msya kilometer sau hariyah bo feto. sau-sau. 17Tna malaikat reto mnit tembok reto ye. Tembok reto tebal rau to 144 hasta.21:17 Raa mnit bo to, 144 hasta msya 65 meter to mnan anya.(Malaikat reto ntuu mnit bo weto mnan si ja raa ntuu mnit bo ye.) 18Tembok reto raa mfen mkah fraa ro safom masom yaspis. Tna kota reto to, raa sgi mkah emas ro moof. Emas reto to ntwar toni mnan fi kaca.19Tna fraa ro mhau mam te weto raa fayir mkah fraa ro mabyoh maut tna kren-kran aro rau-rau: Ro tinyi to raa fayir mkah fraa ro safom masom yaspis. Ro ewok to raa fayir mkah fraa ro safe mnan fi uun safe, masom nilam. Ro tuuf to fraa ro masom mirah. Ro jiit to fraa ro safom masom zamrud.20Ro maat to fraa ro masom unam. Ro ntamam to fraa ro masom sardis. Ro krema to fraa ro masom ratnacempaka. Ro ngkrentuuf to fraa ro masom beril. Ro ngkrenjiit to fraa ro masom krisolit. Ro nsaa to fraa ro masom krisopras. Ro 11 to fraa ro masom lazuardi. Ro 12 to fraa ro mkin masom kecubung.21Tna masa trion 12 weto to raa mse wa mutiara ro maboh sau mam mato weto sau-sau. Tna kota reto raa mse emas ro moof abyõ mam iso rau. Emas reto to twaar toni mnan fi kaca.
22Samu wore wo raa mamo mbaut Allah to, aro fee. Tuhan Allah ysya Domba Maku reto, mbewok mesait mhau mam kota reto. Feto to raa mbaut ana mam woyõ-woya sai. Tuhan Allah tait yase ybo bombra beta. 23Ait yase rAit mfi kek ro mawyah mam kota reto. Tna Domba Maku kren toni skah kota reto tibyo snyi msya ayõ ro mafit aro fee ye. 24Bo yase wana mbewok ro mfi kek to, kbe mram kota reto. Tna raa mbam rabin aro rau kbe mhau mno bo wana mam beto. Tna raja na ro tabam refo kbe makah kta wana mama mse mam kota reto ye. 25Raa ro mhau mam kota reto to wase mti. Feto to tembok ro mana mur kota reto to, masa rau mhau maah yoyo, raa muut fee ye. 26Raa mbam rabin aro rau-rau kbe makah bosatoh wana msya bombra ro moof toni mamo mse mam kota reto ye. 27Bombra ro mkair aro to, raa moo makah mamo mse fee saut. Tna raa ro mno bo mkair msya raa ro sioh to, kbe mamo twok mam kota reto fee ye. Ro kbe twok mam kota reto to, raa ro kbe mhau hame wajin. Ana weto mesait sai. Raa weto masom wana raa mkom mam aam sau oh. Aam refo masom “Raa ro Kbe Mhau Hame Wajin.” Aam refo fo aam ro Domba Maku rau.
22Yohanes ymat aya sau ro mno re raa mhau hame wajin
1Tna malaikat reto merif aya sau kʼjõ. Aya refo miyi frok mbam ambar (tahta) ro Allah ysya Domba Maku hre. Aya refo ro ntwar toni mnan fi kaca tna mno re raa mhau hame wajin. 2Aya reto miyi mamo susai mam iso kota Yerusalem ro tna reto to masuf. Tna aya refo maam rau ti ewok to ara mo mros. Ara weto to make kake ro mno re raa mhau hame wajin. Snyi sau-sau to make: Tahun sau to make mun trion 12. Tna ara wefo mata wau to misoh raa ro kiyam tibyo kiyam wana marak. 3Tna bo ro misti kair aro mhau mam kota reto fee. Allah ysya Domba Maku mbewok ja mhau mam kota reto ye. Ana hre abyõ mam ambar (tahta) wana tna mbo raa wAna. Tna sryan ro wAit ro ja mno bo rAit to, meen mhau mam beto tna mbaut Ait ye. 4Kbe ana mmat bi Ait yasu. Tna yasom rAit raa mkom kʼana makit sor. 5Kbe Tuhan Allah yesait yram kota reto yoyo. Tibyo raa ro mhau mam kota reto to wase mti. Ana wase bo lampu aro msya ayõ ro mafit ana fee. Tna kbe ana beta mamo raja mbo raa mamo snok hame wajin.
Tuhan Yesus yama
6Tna malaikat reto mawe kʼjõ mawe: “Bokyas refo fo bo ati. Bo mabo tu. Kbe raa mari tna mse kʼana. Tuhan Allah yesait ybis Har rAit mroh mbo nabi wAit re ana mkyas bo. Tna ybis malaikat rAit mama merif bo wefo kʼsrian wAit re ana mhar bo ro kbe mama fooh.”
7Tna Yesus yawe, “Nri oh! Kene wo Jõ tama oh! Awya ro yari watum ro aam refo tna ybo yno to, kbe simaut mase.”
8Jõ Yohanes oh mi tari tna tmat bo wefo beta ro kbe mama mam muktis rau. Jõ tari tna tmat bo wefo mkak. Tna jõ taka tabum te mam ati ro malaikat masu rau tawe tbaut malaikat reto ro merif bombra wefo kʼjõ tmat. 9Menohe malaikat reto bhah jõ wa mawe, “Nno feto ma! Nbaut Allah yesait sai. Jõ fi sryan rAit sai tnan fi nyõ. Nyõ nsya nabi roto sor, tna nsya raa beta ro mari watum aam refo tna mbo mno ye to, anu beta bmo sryan ro ja mno bo ro Tuhan rAit.” 10Tna malaikat reto mawe, “Nmyõt watum aam refo to ma! Oon rau kene oh! 11Awya sai ro ja yber safo to, nhau rof; kbe ait yhau yber safo bait tu. Tna awya sai ro ja yno bo ro mkair to, nhau rof; kbe ait yno bo ro mkair bait tu! Tna awya sai ro ja yno bo ro moof to, kbe yhau yno bait tu. Tna awya ro ja yno bo ro Allah wAit to, kbe yhau yno bo ro Allah wAit tu!”
12Tna Yesus yawe, “Nri kaket: Jõ tama fooh oh mefo! Jõ takah boren raa tama taren raa. Kbe taren raa sait-sait mamyot si bo ro raa retait tiwya yno-yno. 13Jõ fi Raa ro tinyi, tibyo Jõ tasom aJõ to ‘Alfa’. Tna Jõ fi Raa ro ttis ye, tibyo Jõ tasom aJõ to ‘Omega’ ye.”
14Yesus yawe, “Raa ro myon ratan wana ro mkair re mrok mboh to, kbe simaut mase. Ana weto kbe mait kake ro mno re raa mhau hame wajin to. Tna kbe ana mamo twok mam kota Yerusalem ye. 15Menohe raa ro ja mno bo ro mkair-kar to, kbe mhau sai mne. Ana weto to taro mari bo ro kabes mawe tna mhar mafot ro kabes weto. Tna ana taro to raa ro mwyah. Tna ana taro to raa ro mame raa majat. Tna ana taro to mbaut berhala tna ana taro to ksoh sioh-nat raa ye. 16Jõ fi Yesus. Tna Jõ tbis malaikat aJõ reto mama mo kʼnyõ mkyas bo wefo beta. Tna tsi bo kʼnyõ tawe nkyas bo wefo kʼraa jemaat weto sor. Jõ tasom aJõ to ‘Kmoh Tbam Daud, Hohos aJõ’, tna ‘Sken Mor-mor Ti Tobrat’ ye.”
17Tna Har ro Tuhan msya fai22:17 Watum ro Allah mkyas fnya ro Yesus ymen to, fret bo mawe raa ro Allah wAit. ro Yesus ymen to, mbewok mawe kʼYesus mawe: “Nama oh!” Tna awya ro yari watum refo to yawe: “Esre, nama oh!” Awya ro yhai sbit to yama sai. Tna awya sai ro ksoh yama yoo aya ro moof baro yata to, yama ye. Kbe yoo mkah pitis aro fee. Yoo sai. Aya refo mno re raa mhau hame wajin.
18Ro mari watum aam refo to, jõ tawe kʼanu tawe: “Kaket anu! Awya ro tkyõt aam refo maja rau baro renti to, kbe Allah kmo ait: Kbe yoo kair ro mase riwai raa mkyas mam aam refo weto beta to, bitsre mbtek mai kʼait. 19Tna awya sai ro yiruru watum ro aam refo maja rau baro makus to, kbe Allah yiruru boren ro yaren raa retait ye: Kbe bi Ait yawe ait retait yamo truk mam kota ro Allah rAit reto to fee ye. Tna yawe ait retait kbe yait kake ro mno re raa mhau hame wajin to fee ye. Boren raa weto to riwai raa mkyas mam aam refo.”
20Yesus oh mi yawe bokyas mam aam refo beta to mabo tu. Tna yawe, “Esre, Jõ tama fooh mefo!” Tna Yohanes yawe, “Amin: Mabo oh! Tuhan Yesus; nama fooh!”
21Jõ skabuk afo re Tuhan Yesus ysan boatmof rAit kʼanu raa ro Allah wAit. Amin: Mabo oh.