Matius
1Yesus Kristus hohos na
1Yesus Kristus hohos na to mfi fefo: Yesus Kristus tait ybam raa mana ro Daud, tna Daud ybam raa mana ro Abraham. 2Masmair rau to Abraham yabe Ishak, tna Ishak yabe Yakub, tna Yakub yabe Yehuda ysya yao na. 3Tna Yehuda yasen yabe Peres ysya Zerah mbam fai Tamar. Tna Peres yabe Hezron. 4Tna Hezron yasen yabe Ram, tna Ram yabe Aminadab, tna Aminadab yabe Nahason, tna Nahason yabe Salmon. 5Tna Salmon yabe Boas ybam fai Rahab, tna Boas yabe Obed ybam fai Rut. Tna Obed yabe Isai. 6Tna Isai yabe raja Daud, tna Daud yoo Uria yfain tna yabe Salomo. 7Tna Salomo yabe Rehabeam, tna Rehabeam yabe Abia, tna Abia yabe Asa. 8Tna Asa yabe Yosafat, tna Yosafat yabe Yoram, tna Yoram yabe Uzia. 9Tna Uzia yabe Yotam, tna Yotam yabe Ahas, tna Ahas yabe Hizkia. 10Tna Hizkia yabe Manasye, tna Manasye yabe Amon, tna Amon yabe Yosia. 11Tna wore wo raa mfot raa ro Yahudi makah mamoʼt Babel to, Yosia yabe Yekhonya ysya yao na. 12Raa ro Yahudi mamoʼt oo ro Babel to, Yekhonya yabe Sealtiel, tna Sealtiel yabe Zerubabel. 13Tna Zerubabel yabe Abihud, tna Abihud yabe Elyakim, tna Elyakim yabe Azor. 14Tna Azor yabe Zadok, tna Zadok yabe Akhim, tna Akhim yabe Eliud. 15Tna Eliud yabe Eleazar, tna Eleazar yabe Matan, tna Matan yabe Yakub. 16Tna Yakub yabe Yusuf ro yoo fai Maria, tna au mabe Yesus ro raa mtu Kristus tait.
17Maban Abraham raa mabe mamo snok Daud raa mabe to, biin beta trion 14 firwas wa. Tna maban Daud raa mabe mamo snok raa ro Yahudi raa mfot tna makah mamoʼt oo ro Babel to, biin trion 14 firwas ye. Tna maban tahun reto snok mam Kristus raa fnya mabe to biin 14 firwas wa ye.
Maria mabe Yesus
18Masmair rau ro Yesus Kristus fai Maria mabe to fefo: Maria msya Yusuf mbewok mkir anya sai fares, menohe Maria mrok mhaf. Maria mhaf reto to, mbam Har ro Tuhan. Maria msya Yusuf mbewok mjin su fefares. 19Tna Yusuf ynaut bait mam srau mato yawe yitsre Maria makus. Yusuf fi ait raa ro ja yno bo ro moof, tna ait ynaut yawe yno Maria masom mkair ma. 20Yusuf ynaut bo reto kri-kri to, tna ait yjin smi. Ait smi ymat malaikatTuhan sau mbrah nenat kʼait tna mawe, “Yusuf, ku ro Daud yare: Waa ma. Noo Maria mamo nfain. Ku ro yhau kʼau mhaf retait tait ybam Har ro Tuhan meto. 21Meen Maria mabe Ku ro sme sait. Nafan Ku retait yasom Yesus. Ait oh mi meen yoo riof ro mase yee kʼraa wAit. Tna re Allah yyon iro wana to.” 22Tuhan yno bo weto beta mamo mnan si bo ro tiwya ykyas kʼanu raa wia. Tiwya ybis nabi rAit sait yama ykyas bo weto matim. Ait yawe,
23“Ku sau ro ja mjin msya raa su fefares to, kbe mhaf tna mabe Ku sme sait. Tna kbe raa mtu Ku retait yasom Imanuel.”
Yesaya 7:14
Imanuel mam mai ranu to ’Allah yatam anu’. 24Yusuf yrok yasen. Tna yno bo ro malaikatTuhan riwai mawe kʼait: Ait yoo Maria mamo yfain. 25Menohe Yusuf yjin su ysya au fee mamo snok mam ati ro au mabe Ku sme retait. Tna Yusuf yafan Ku retait ytu yasom Yesus.
2Raa ro majus mama mbam ti timur
1Yesus fnya mabe mam remo ro Betlehem. Mam ti weto to Herodes yamo raja mam provinsi ro Yudea reto. Tna raa majus mama. Ana weto raa ro ja mhar bo. Ana mbam ati ro ayõ maut mama snok mam kota ro Yerusalem. 2Ana mtu sas mawe, “Fnya mabe Ku sait ro meen yamo Raja raa mana ro Yahudi. Ait yhau mam woyõ? Amu nmat sken rAit snok mam ati ro ayõ maut. Tna amu nwe nma nbaut Ait fo.” 3Raa ro Yerusalem mari feto tna mrok ktak sai. Tna fo raja Herodes yari feto tna yrok ktak ye. 4Ait ytu raa manes ro Yahudi mama siret beta: Ait ytu imam manes wana msya guru agama wana beta mama mo kʼait. Ana beta mama. Tna Herodes ytu sas kʼana yawe, “Mesias2:4 Som reto to “Ait ro Allah ysok tna yawe yamo Raja.” Mai ro Ibrani mawe Mesias, tna mai ro Yunani raa mawe Kristus., ro Allah ysok re kbe yoo riof ro mase yee kʼraa tait, kbe fnya mabe mam wore woyõ?” 5Tna ana mawe, “Bokom ro Allah mkyas mawe kbe fnya mabe Ait mam remo ro Betlehem, provinsi ro Yudea. Reto mamyot bokom ro nabi ranu sait tiwya ykom:
6‘Remo ro Betlehem mam provinsi ro Yehuda to remo ro maku sau. Remo roto taro to maku ye. Menohe remo ro Betlehem to remo ro ati: Kbe mamo remo ro masom. Meen Raa sait fnya mabe mam Betlehem. Tna Ait yamo aban mana ro yase ybo raa ro Allah wAit. Meen Ait kmot raa ro Israel.’”
Mikha 5:1
7Raa manes weto siret mkak. Tna fo Herodes yamo wai ytu raa majus weto mama mo kʼait. Tna ait ytu sas kʼana yawe, “Tija oh mi anu nmat sken reto frok to?” 8Tna fo Herodes ybis ana yawe, “Nsen nmoʼt Betlehem. Nmo ntu sas bo ro Ku retait kaket. Tna soh nkai Ait to, hah ne nma nwe kʼjõ iti afo re jõ tamo tna tbaut Ait ye.” 9Ana mari bo ro raja Herodes yawe kʼana tna masen mamo. Ana mamo tna mmat sken ro tiwya ana mmat mam ati ro ayõ maut. Sken reto mamo matim, tna ana kro mamo tis. Sken reto mamo mamo snok mam uu abyõ wore ro akut retait yhau. 10Ati ro ana mmat sken reto to, ana simaut mase. 11Ana mamoʼt amah reto tna twok mam mato. Ana mmat ku retait ysya yme Maria, tna ana maka mbaut Ait. Tna ana trah surah wiak wana beta tna moo bofan wana mafan Ku retait. Bo ro ana mafan to emas,kemenyan msya mur.12Tna Allah yinyam bo kʼana mkah bosmi yawe, “Hah ne nmo no kʼraja Herodes ma!” Tna ana mari feto tibyo hah me mamo iso roto mamo bana.
Yusuf ysya Maria msam mamoʼt negri ro Mesir
13Raa ro majus weto hah me mamo oh. Tna Yusuf yjin smi. Ait smi ymat malaikat ro Tuhan sau mawe, “Nasen fooh! Tubat Ku retait nsam nsya yme nmoʼt negri ro Mesir. Raja Herodes srau kair yawe yama saso ku retait yame. Namoʼt Mesir tna ste wea. Nhau mam beto mamo snok mam wore wo Jõ tbis anu nhah ne nma.” 14Tibyo mti reto to, Yusuf yasen fooh, teta ku retait tna ysya yme msam mamoʼt Mesir. 15Ana mamoʼt Mesir to, mhau mam beto mamo snok mam ti ro Herodes yhai. Ana mhar mawe Herodes yhai, tna ana hah me mamoʼt tabam rana. Ana mbam Mesir hah mama mnan si bo ro tiwya Tuhan ybis nabi rAit sait ykyas wia yawe,
“Jõ ttu Ku aJõ yama ybam Mesir.”
Hosea 11:1
Herodes ybis raa mame ku mkek
16Ati ro Herodes yhar he raa majus weto sioh ait to, ait kmo toni. Tna ait ybis raa wait mamo mame ku mkek ro sme. Ybis ana mame ku sme ro mhau mam Betlehem msya remo ro mhau kait mam beto sor to, majat beta. Ait ynaut yawe tiwya raa majus mama saso ku mkek sait ro umur tahun ewok mamo ti te fares. Feto Herodes ybis raa mame ku sme weto beta. 17Bo reto mnan si bo ro tiwya Allah ybis nabi Yeremia ykyas wia yawe,
18“Ku mkek mam rabin ro Rama to marak beta. Tibyo fnya ro mhau mam beto sraujin tna mawia. Rahel mawia ku mkek wau. Tna au hawe raa mama mkyas bokyas moof msya au afo re kbe au sorni sraujin rau reto.”
Yeremia 31:15
Yusuf ysya Maria mhah me mbam Mesir
19Yusuf ysya Maria mhau mam negri Mesir fares tna raja Herodes yhai. Ti sau Yusuf yjin smi ymat malaikat ro Tuhan sau mama mawe kʼait mawe, 20“Nasen oh! Tubat Ku retait tna ysya yme hah ne nmoʼt negri ro Israel. Tiwya Herodes yawe yame Ku retait. Menohe Herodes yhai oh.” 21Yusuf yrok yasen tubat Ku retait tna ysya yme hah me mamoʼt Israel. 22Tna Yusuf yari he Arkhelaus yamo raja mam provinsi ro Yudea shauk yuk ro yaja Herodes. Feto tibyo Yusuf waa yamoʼt Yudea fee. Menohe Tuhan yerif bo kʼait mkah bosmi, tna ybis ait yamoʼt provinsi ro Galilea. 23Ait yamo yhau mam remo ro Nasaret. Yhau mam Nasaret to, mnan si bo ro tiwya Allah ybis nabi wAit mama mkyas wia mawe,
“Ait tait, kbe raa mtu mawe, ‘Ait raa ro Nasaret’ to.”
3Yohanes yawe kʼraa yawe, “Nashana oh!”
1Yohanes ro ja baptis raa tait yamo ykyas bo ro Allah. Yamo yhau mam tabam ro riamo sau mam provinsi ro Yudea. Ait ykyas yawe, 2“Nashana fooh! Allah siwyan yamo Raja ytu raa wAit mama ybo fo.” 3Yohanes oh mi tiwya nabi Yesaya ykyas wia yawe,
“Meen raa sait kbe yama ykyas bo woJõ mam yuk ro riamo sau. Ykyas yawe, ‘Mbetrot iso mkah Tuhan yama! Nisoh iso kʼAit!’”
Yesaya 40:3
4Yohanes yyum ratan ro ja raa sne mbam unta mawyan. Tna ykyar hotom ro mbam kak marak ye. Ja ait yabo mo msya yata kum maya ro mbam safom sai. 5Tna raa mbam kota ro Yerusalem, raa mbam remo makin mam provinsi ro Yudea reto ye, msya raa makin ro mhau mam aya maam ro Yordan to, ana weto sor mama mo kʼYohanes. 6Ana mama mo kʼAit tna mras iro wana. Tibyo Yohanes baptis ana mam aya ro Yordan reto.
7Raa ro Farisi msya raa ro Saduki mawat mama mo kʼYohanes ye. Ana mawe ait baptis ana ye. Menohe ait yastako ana yawe, “Anu to, raa ro nmo wan-wan nfi aban kume!3:7 Yohanes ykyas aban sau ro safo wer tna ja mamo wan-wan ye. Aban refo mhau ntri-ri sai, mnah-nah fee. Tna raa mnaut mawe ara sai, soh mfe aban ro mhai oh. Raa mamo kene tna aban refo mafit. Tna Yohanes yhar yawe raa baro mashana mbam iro wana fee, menohe ana mama mo kʼait tna mawe ait baptis ana. Awya ykyas bo kʼanu yawe Allah kmo tna meen yno bo ro mkair mbtek mai kʼanu? Awya ykyas feto tna re anu nhar nwe nsam nma saso riof kʼanu? 8Nashana! Nno bo moof. Tna kbe raa mhar mawe anu nashana oh. 9,10Soh anu nno feto to, anu nfi kake mara ro mros make mawat tna moof. Allah yatem ybo baam oh. Ait siwyan yfat ara. Kake mara ro make rau mkair to, kbe Ait yfat tna yoo beak mam tafoh makus mait. Anu ja nnaut nwe, ‘Amu fo kube ro Abraham wait renti. Feto to kbe Allah yno riof kʼamu fea!’ Menohe mfe; nnaut feto ma! Allah yatak haberek fraa wefo mamo kube renti ro Abraham wait ye! 11Jõ baptis anu mkah aya sai. ⌞Reto mawe anu nashana oh.⌟ Jõ tama wia tatim. Tna Ait ro yase yiwer jõ sait kbe yama yrof jõ. Jõ fi raa ro taku sai. Kbe tbo sandal ro yse yaa rAit to fee. Jõ toof mnan si fee. Ait yama to, meen baptis anu mkah Har ro Tuhan. Tna Ait baptis anu mkah tafoh ye.” 12Tna Yohanes yawe, “Ati ro raa sait ygi gandum rait to, ja ait yoo gandum makan rau yse hayah tna yoo marak rau to yse hayah ye. Tna gandum makan reto ybu mam gudang sau. Tna marak rau to, kbe yko mam tafoh. Tafoh reto raa mtai mikabuk fee. Mesias tait siwyan re kbe yno bo mfi feto kʼraa ye.”
Yohanes baptis Yesus
13Yohanes yhau mam aya Yordan fares to, Yesus ybam provinsi ro Galilea yama. Yesus yama yawe Yohanes baptis Ait ye. 14Menohe Yohanes yawe kʼYesus yawe, “Jõ hawe baptis Nyõ. Nyõ raa ro nase. Jõ fi raa kinyah sai. Maami Nyõ baptis jõ menohe Nyõ nawe jõ te baptis Nyõ fyi?” 15Menohe Yesus yawe, “Nnaut bo myum-yam ma. Nama sai baptis Jõ. Anu bno bo wefo mamo mnan si bo ro Allah ksoh beta oh meto.” Yohanes yari feto, tibyo baptis Yesus. 16Yohanes baptis Yesus, tna Yesus frok ybam aya yaut. Frok si fo, ayoh twat. Tna Yesus ymat Har ro Tuhan haberek mnan fi ruu merpati sau. Ruu reto fru mama mroh abyõ kʼAit. 17Tna raa mari mai sau mbam ayoh mawe, “Ait tait akut aJõ ro Jõ thafri. Ait tait, Jõ thaf mnan!”
4Kabes yabi sanet Yesus
1Tna Har ro Tuhan yakah Yesus yamoʼt yuk ro riamo sau. Yamo re kbe kabes yabi (Iblis) yama sanet Ait. 2Tna Yesus yhau bo yait ti trion 40 msya ayõ trion 40 ye. Tibyo yhai sre. 3Tna kabes yabi ro ja sanet raa to yama sanet Ait yawe, “Soh Nyõ Ku ro Allah yare meto mi, sik nno fraa wefo haberek mamo roti re Nyõ nait.” 4Menohe Yesus yisboh kʼAit yawe, “Bokom ro Allah mawe,
‘Raa taro mhau to, mnaut boit ro mait sai yoyo. Menohe ro moof to, raa mhau mnaut Watum ro Allah yoyo tna mbo mno.’”
Ulangan 8:3
5Tna fo kabes yabi yakah Yesus yamoʼt kota Yerusalem. (Ja raa mawe kota reto to, kota ro Allah rAit.) Ana mamoʼt Samu ro Allah tna kabes yabe yse Yesus yros abyõ mam timanaf rau, ro miyõ toni. 6Tna yawe kʼYesus yawe, “Soh Nyõ fi Ku ro Allah yare meto mi, sik nitsre Nyõ mbtek namo nai mam tabam mte. Bokom ro Allah mawe,
‘Kbe Allah ybis malaikat wAit swiõ wea huwya mfot Nyõ abyõ sai. Ana kbe mfot Nyõ abyõ sai mkah matem wana re naa mai mam fraa fee.’”
Mazmur 91:11-12
7Menohe Yesus yawe, “Bokom ro Allah mawe ye mawe,
‘Tuhan Allah ro ja anu smot to, sanet Ait ma.’
Ulangan 6:16
Feto ye Jõ hawe kro bo ro nyõ nawe weto be kbe Jõ sanet Allah.”
8Tna fo kabes yabi yakah Yesus yaut atu mana ro miyõ wer. Tna yerif bangsa ro arin aso beta fo kʼAit. Tna yerif bo mase ro bangsa weto kʼAit ymat ye. 9Tna yawe, “Soh Nyõ naka mte nbaut jõ to, kbe too bo wefo beta tsan kʼNyõ.” 10Menohe Yesus yisboh kabes yabi yawe, “Bo ro nyõ nawe reto to, Jõ hawe bo tno ye. Nasen namo! Bokom ro Allah mawe yum mawe:
‘Nbaut Tuhan Allah yesait aran, tna bo ro Ait yesait aran yawe to, nbo nno.’”
Ulangan 6:13
11Tna kabes yabi yasen sikba Yesus akus yamo. Tna fo malaikat baro mama matam Ait.
Yesus yamoʼt provinsi ro Galilea
12Yohanes, raa mfot mamo mbu mam bui oh. Yesus yari feto, tibyo hah yamoʼt provinsi ro Galilea. 13Ait sikba remo ro Nasaret tna yamo yhau mam remo ro Kapernaum. Kapernaum mhau mam aya maam ro Galilea. Tiwya tinyi rabin reto tabam ro Zebulon ysya Naftali rana. 14Yesus yhau mam rabin reto to, afo re yno mnan si bokyas ro tiwya Allah ybis nabi Yesaya yama ykyas wia yawe,
15“Tabam ro Zebulon ysya Naftali rana to, kene mam aya maam. Rabin reto to, mamo snok mam aya ro Yordan majoh to, ja raa mtu mawe rabin ro Galilea ye. Ana ro mhau mam rabin reto to, raa mana ro Yahudi fee. 16Tiwya ana wase Allah. Ana mfi raa ro mhau mam amur yoyo sai. Tna ana mmat kek ro mase. Tna kek reto merif iso kʼraa ro mhau mam wore mamur to, re kbe ana masu mmat bo ye.”
Yesaya 8:23–9:1
17Tna mam wore wo Yesus yamo yhau mam Kapernaum to, Ait yasen wosa yawe, “Nma fooh! Nashana! Allah siwyan yamo Raja tna re ybo anu. Ait ytu raa wAit mama fooh.”
Yesus ytu kuber wAit ro tinyi mama kro Ait
18Ati sau fo, Yesus yamo mam maru ro Galilea maam. Yamo tna ymat raa mabo ewok mse jala rana mam maru mfot syoh. Ana mbewok ja makam maru. Sait yasom Simon-Petrus tna ysya yao Andreas. 19Tna Yesus ytu kʼana mbewok yawe, “Nma kro Jõ. Kbe Jõ tbis anu nmo nfot raa.” 20Ana mbewok mari feto, tibyo masen fooh sikba jala wana makus. Tna mbewok kro Ait mamo. 21Ana mamo tna mmat Yakobus ysya yao Yohanes. Ana bewok weto to ku ro bi Zebedeus wait. Ana mbewok msya maja rana hre mam wiak tna misoh jala wana. Tna Yesus ytu ana mbewok mama kro Ait. 22Ana mari si to, mbewok masen sikba maja rana ysya wiak rana akus tna kro Yesus mamo ye.
Yesus watum raa tna yisoh raa ro kiyam moof ye
23Tna Yesus yamo yur mam provinsi ro Galilea beta. Yamo ykyas bo mam samu watum makin ro Yahudi. Ait wosa Bokyas ro Moof kʼana. Bokyas moof reto to, mkyas wore wo Allah yamo Raja ybo raa mana rAit. Tna Yesus yisoh raa ro kiyam moof beta ye. Tna ana ro ssafo fee; Ait yisoh tibyo ana metsu matak ye. 24Bo ro Ait yno weto to, hahah mamo mur mtan mam provinsi ro Siria beta. Tibyo raa makah raa ro mafa bo ro knik-knak sor mama mo kʼAit. Ana weto taro to kabes mbo, tna taro to kiyam ro ruu mber, taro to maa msya matem mhai ye. Ana ro kiyam wofo fo Ait yisoh tibyo mrok moof beta. 25Ait yno bo weto tibyo raa mawat kro Ait. Raa weto sor to, taro mbam provinsi ro Galilea, taro mbam rabin ro Dekapolis, taro mbam kota ro Yerusalem, taro mbam provinsi ro Yudea, tna taro ye mbam aya ro Yordan maam jaro ye.
5Yesus watum raa mam faut
Raa ro kbe mhau simaut mase
1Yesus ymat raa mawat. Feto tibyo Ait yaut yamoʼt faut mana sau. Ait hre tna kuber wAit (murid-murid) mama mo kʼAit. 2Tna Yesus huwya watum ana yawe, 3“Raa taro mhar mawe ana raa ro soso sai tna ana msam wai kʼAllah. Ana kbe mhau simaut mase. Ana oh mi raa mana ro Ait yamo Raja ybo. 4Raa taro mnaut iro ro ana mno, tibyo sraujin toni. Kbe Allah yisoh ana mhaf tibyo mhau simaut mase. 5Raa taro to mhaf sneh. Ana oh mi kbe mhau simaut mase. Kbe Allah ysan tabam refo kʼana. 6Raa taro mhai sre msya mhai sbit mno bo ro Ait ksoh. Ana kbe mhau simaut mase ye. Kbe Ait yno ana mhaf mnan. 7Raa taro ja matmof raa anya. Ana kbe mhau simaut mase ye. Kbe Allah yatmof ana. 8Raa taro to mato mboh tna srau sau mno bo ro Ait ksoh yoyo. Ana kbe mhau simaut mase ye. Ana weto oh mi meen mmat Ait mam rabin rAit. 9Raa taro ja makah iranya mama. Ana kbe mhau simaut mase ye. Kbe Allah ytu ana yawe ku wAit. 10Raa taro ja mbo Watum rAit mno; tibyo raa roto sikowah ana. Ana kbe mhau simaut mase ye. Ana weto raa ro kbe Allah yamo Raja ybo to. Tna kbe mhau msya Ait mam sawro rAit ye. 11Anu taro smot Jõ. Feto oh mi kbe raa mamus anu, tna mawe kair anu tna mno bo ro mkair btek mai kʼanu bo to. Kbe anu weto nhau simaut mase ye. 12Nnaut nabi na ro tiwya Allah ybis mkyas bo wAit to, nnaut nwe tiwya raa sikowah ana feto ye. Feto to, simaut mase sai. Meen Allah yoo boren ro mase mam sawro rAit tna yaren anu weto ye.”
Haa msya kek
13Tna Yesus fret bo yawe, “Anu nfi haa kʼraa ro tabam refo beta. Haa to, ja mafah moof. Menohe mfi bo haa reto mafah fee; kbe raa mno fyi re kbe haberek mafah u? Mafer rau aro u fee. Haa reto raa moo mbeak mam iso. Tibyo raa ro mamo-me sor to, mber kait-kat sai.
14Anu nfi kek ro mram raa ro tabam refo beta. Kota ro mhau abyõ mam faut mana to, ja raa mne mmat kek reto. Kbe raa beta mmat tu oh! 15Feto ye, ja raa mbet tafoh (pelita) afo re ntara raa ro twok mam amah mato. Raa moo tafoh mse mte tna moo ember burut wa fee. Tafoh reto to, ja raa hero abyõ afo re kbe kek ntara tna raa ro mama twok mam amah mato reto mmat bo. 16Nno bo ro moof kʼraa. Nno feto afo re raa mmat bo moof ro anu nno tibyo ana mbaut Bja ranu ro yhau mam sawro rAit.”
Yesus ykyas bo ro Musa ykom
17Tna Yesus yawe, “Tiwya Allah ybis Musa ysya nabi wAit mama mkom watum rAit. Tna Jõ tama re tbo tno bo ro Watum reto mbis. Tawe tno beta mnan si. Nnaut nwe Jõ tama re kbe beak Watum reto makus to ma. 18Nri kaket: Mam wore wo ayoh msya tabam refo makyon rau sboh fefares to, Watum ro Musa reto kbe mabo beta tu oh. Watum reto to, maja rau sau ro maku to, kbe susre fee. 19Feto to, niwana Watum reto maja ro maku sau to ma. Nkyas kʼraa roto to, nbis ana miwana Watum reto msya anu to ma. Awya ro yiwana Watum ro Musa feto kbe mamo raa ro mase mam wore wo Allah yamo Raja ybo raa mana rAit to fee. Meen ait retait tait yaku kosion sai. Nbo Watum reto nno kaket. Tna nkyas kʼraa re ana mno kaket ye. Awya ro ybo Watum ro Musa matak feto, meen yase mam wore Allah yamo Raja ybo raa mana rAit. 20Nri oh! Nnaut oh: Guru agama ro Yahudi msya raa ro Farisi to, ana mno bo ro Allah ksoh kaket fee. Soh anu nno bo mamyot bo ana ja mno to, meen anu nmo raa ro Allah yamo Raja ybo to fee. Soh anu nwe nmo raa ro Allah yamo Raja ybo to, nno bo ro Ait ksoh kaket.
21Nri oh: Tiwya hohos na wanu mkyas Watum ro Musa kʼanu mawe:
‘Nme ajat ma.’
Keluaran 20:13
Awya ro yame ajat to, kbe raa mfot tna makah mamo mbu mam bui.22Menohe Jõ tawe kʼanu tawe: Awya ro kmo raa roto to, kbe Allah ytu safo reto yari tu oh. Feto ye awya ro yawe kair raa roto yawe, ‘Namboi!’ to, kbe raa manes ro ja mtu srah ro Yahudi to, mtu srah reto mari ye. Tna awya ro yamus raa taro yawe, ‘Nyõ wase bo!’ to, kbe Allah yfot Ait beak yamo yait mam tafoh ro rabin kair ye.
23Feto to, soh anu nbo bosan sau tna nmoʼt wohat (mezbah) nwe nsan bo reto kʼAllah to, nnaut wia. Nmo tna anu nnaut bo ro tii anu nno mkair mai kʼraa roto to, 24noo bosan reto nse bris agus wia. Tna fo nmo nisoh niranya nsya raa retait wia. Tna ne hah ne nmo noo bosan ranu riwai reto nsan kʼAllah.
25Mfi bo anu sait nsya raa sait kmo anya. Tna anu mbewok kbe nmoʼt amah ro raa mtu srah. Rau ro moof to, anu mbewok nisoh niranya fooh, tna nfot ntem anya mam iso maka. Soh mfe to, kbe sait yamo ysan sait kʼraa manes re mkyas safo reto. Tna fo raa manes mbis anu nmo no kʼait ro ytu srah yari. Tna fo bi ait ysan anu renti kʼait ro ja ybu raa mam bui mato. 26Nri kaket: Kbe anu sait raa mbu mam bui mato mamo snok mam ayõ ro ait hrat bo raa ska wia. Tna fo ait frok ybam bui mato reto.
27Anu nhar watum ro tiwya Musa ykyas kʼanu hohos na. Ait yawe:
‘Nwyah ma.’
Keluaran 20:14
28Menohe Jõ tawe kʼanu tawe: Awya sai ro ymat sas fnya re srau oot-oot to, ait retait ywyah ysya au reto mam yhaf mato oh meto. 29Soh anu nsu makan ati ro tem ati misti re anu nno iro to, bo mkair. Ro moof to, tufrok nsu makan reto beak makus to. Soh anu nhau nkah nsu makan jaro mesait aran sai to, moof baro ye. Menohe soh anu nhau nkah nsu ro misti re anu nno iro to, kbe tis rau to anu fri kair sai. Kbe Allah tubat anu nkah netsu wanu, beak mam rabin ro arin kair reto (neraka).30Tna soh anu ntem ati misti re anu nno iro to, mkair meto. Ro moof to, sbi ntem reto beak war makus. Soh anu nhau nkah ntem jaro mesait aran sai to, moof baro ye. Menohe soh anu nhau nkah ntem ro misti re nno iro to, kbe Allah ybis anu netsu beta nmoʼt rabin ro arin kair reto.
31Anu nhar watum ro tiwya Musa ykyas kʼanu hohos na. Ait yawe:
‘Awya ro yako yfain makus to, yako hawe sai ait ykom aam sau yee kʼau mbo. Ykom yawe ait yako yfain.’
Ulangan 24:1-4
32Menohe Jõ tawe kʼanu tawe: ‘Soh fai sau mwyahte fee; yako hawe sai raa yako fai au makus to ma. Soh ait bitsre au makus to, ait retait mi yisti re au mwyahte ye. Tna raa ro yoo fai reto riryõn to, ait ywyahte ye.’
33Anu nhar watum ro tiwya Musa ykyas kʼanu hohos na. Ait yawe:
‘Soh anu sait ytom Allah yasom afo re raa mhar mawe bo ro ait ykyas to, ait ykyas yaja bait oh, ykyas sioh fee; tna soh ait sumpah bo ytom Allah yasom feto; yako hawe sai kbe ait yno bo reto tu oh.’
Imamat 19:12
34Menohe Jõ tawe kʼanu tawe: Soh anu sumpah bo to, ntom Allah yasom ma! Allah hre abyõ mam sawro rAit tna ybo raa wAit. Feto to masi mawe anu sumpah bo ntom sawro rAit ye. Allah hre ybo raa wAit mbam tno. 35Feto ye sumpah bo ntom tabam refo masom to ma: Allah tait ybo tabam refo ye. Tna sumpah bo ntom kota ro Yerusalem masom to ma: Yerusalem to kota Raja ro Yase ybo ye meto. 36Tna sumpah bo ntom nna to ma: Mfi bo anu nna mboh to, anu aro ntai ntak nno nna mawyan sau haberek mamo safe fee. Tna anu ntai nno ro safe sau haberek mamo mboh bo fee ye. 37Ati ro anu nkyas bo to, nwe ‘Ae’ sai. Tna nwe ‘Mfe’ sai. Soh anu nkyas bo niwer to, reto mbam kabes yabi (Iblis) oh meto.
38Anu nhar watum ro tiwya Musa ykyas kʼanu hohos na. Ait yawe:
‘Nsu ska nsu, tna nbait ska nbait ye.’
Keluaran 21:24
39Menohe Jõ tawe kʼanu tawe: Raa ro mawe mno bo mkair mai kʼanu to, nno wa ma. Soh raa miban natni ranu jaro to, haberek noo natni ro ati jaro nee kʼana miban ye. 40Mfi raa sait yawe bomhaam wait mhau kʼnyõ. Soh ait yawe ytak ratan anyõ sau to, nee sai. Tna noo ratan anyõ roto taro ye niryõ nee kʼait. 41Tna soh raa yama tna ybis anu nsom bo wait nmo iso kilo mara sau to, nno sai. Tna fo ne nsom soro nmo kilo mara sau naut. 42Tna soh raa mayoh bo kʼanu to, noo nee sai. Feto ye soh raa mayoh bo kʼanu tna mawe kbe me misroh to, nee sai. Nbe ma.
43Anu nhar watum ro tiwya Musa ykyas kʼanu hohos na. Ait yawe:
‘Nksoh raa ro mno bo moof kʼanu. Tna knait raa ro mamo byoh kʼanu to.’
Imamat 19:18
44Menohe Jõ tawe kʼanu tawe: Natmof raa ro mamo byoh kʼanu. Skabuk raa ro sikowah anu ye. 45Nno feto afo re kbe anu nno bo mfi anu Nja ranu ro yhau mam sawro rAit to. Allah yno ayõ moo maut to, yno mkah raa ro ja mno bo mkair ye tna raa ro ja mno bo moof ye. Tna Allah yno oom mais to, yno mkah raa ro mno bo ro Ait ksoh ye tna mkah raa ro mno bo ro Ait knait ye. 46Soh anu natmof raa ro ja matmof anu sai aran to, kbe Allah ymat tibyo yoo boren yaren anu aro fee. Raa ro ja moo namabyoh (pajak) to, ana ja matmof raa ro matmof ana feto ye. 47Tna soh anu nmah meen kʼraa wanu mesait aran to, raa beta ja mno feto ye. Nno feto to, nyõ nno bo ro moof miwer ana oh meto fee. Ja raa ro wase Allah to, ana ja mno bo ro anu nno weto ye oh. 48Feto to, nno bo ro moof mnan si, mfi anu Nja ranu ro yhau mam sawro rAit ja yno to.”
6Maja ro natmof raa
1Tna Yesus yawe, “Nno bo skabuk ranu mam wore wo raa mamo-me ma. Nno bo weto afo re raa mmat anu to ma. Soh anu nno bo moof afo re raa mmat anu sai, anu Nja ranu ro yhau mam sawro rAit to, kbe yoo bo aro yaren anu fee. 2Feto to, soh anu nsan bo kʼraa ro suawe to, tawyõ anu kʼraa afo re ana mmat nyõ to ma. Raa ro sioh ana sai ja mno feto. Ana ja mno feto mam samu watum tna mam iso mabi afo re raa mmat ana tna bibi ana. Jõ tawe kʼanu tawe, ana weto mkai boren wana beta oh. 3Menohe anu fo, ati ro anu noo bo nee kʼraa to, nee shait banu sai afo re raa roto mhar to ma. 4Natmof raa nfi feto afo re raa roto mhar bo ye ma. Nno feto tna anu Nja ranu ro yhau mam sawro rAit yesait aran yhar. Ait yesait aran yhar bo ro nyõ nno wai reto tna kbe Ait yisroh riryõn kʼanu.
Maja ro skabuk
5Anu skabuk to, skabuk kaket. Raa ro ja sioh ana sai to, ja skabuk ye. Ana ja ksoh skabuk mam samu watum wanu. Tna ana skabuk mam iso mabi mbra ye. Ana mno feto afo re kbe raa mmat ana, tna bibi ana. Ana weto mkai boren wana oh. Meen Allah yoo boren rouu yaren ana aro fee. Anu to, skabuk mfi feto ma. 6Soh anu nwe skabuk to, twok nmoʼt amah mato, tna nuut mato wa. Tna skabuk Nja ranu ro ja yhau wai. Tna kbe anu Nja ranu ymat bo anu skabuk wai feto, kbe yari anu ye.
7Soh anu skabuk to, skabuk ntru nmo ne nfi raa ro wase Allah sai to ma. Bo skabuk rana to miyõ wer. Ana skabuk miyõ wer feto tna mnaut mawe reto oh mi kbe Allah yari. 8Nno bo nnan fi ana mno feto ma. Anu nyoh bo fefares to, Nja ranu yhar bo ro anu nyoh weto oh. 9Feto skabuk fefo:
Nyõ fi amu Nja ramu ro nhau mam sawro aNyõ. Nno re kbe raa mari tibyo bibi Nyõ nasom aNyõ. 10Nasen namo Raja tna nama nbo raa woNyõ. Bo ro Nyõ ksoh to, ja raa mbo mno mam sawro aNyõ oh. Nno re raa ro mhau mam tabam refo mbo mno bo ro Nyõ ksoh mfi feto ye. 11Ifo to, amu nyoh boit mbam kʼNyõ natem aNyõ re boit wamu to mabut fee. 12Nyon iro wamu sor. Nyon iro wamu mnan fi amu nesait ne nhaf moof nsya raa anya ro mno bo ro mkair mai kʼamu ye. 13Tna nakah amu namo mam wore wo bosanet aro besruf amu to ma. Nama nitsnok amu frok nbam wore wo mkair-kar. [Nyõ Allah ro nase. Nyõ natak nbo ayoh msya tabam refo. Kbe raa bibi Nyõ maban mfo refo mamo snok mam hame wajin ye. Amin: Mabo oh.]
14Soh raa mno iro mai kʼanu to, nhau nhaf kair ma. Sorni bo mkair ro ana mno mai kʼanu weto sai. Ne nhaf moof u, tna kbe anu Nja ranu ro yhau mam sawro rAit tait, yatmof anu tna yyon iro wanu ye. 15Menohe soh anu nhaf kair tna knait raa ro mno iro mai kʼanu to, kbe Nja yyon iro wanu fee ye.”
Maja ro mhau bo mait
16“Ti aro raa mhau bo mait afo re ana skabuk kaket. Soh anu nhau bo niit feto to, nno nsu wanu mkair nfi raa ro ja sioh ana sai mno to ma. Ana mno masu mkair afo re raa mhar mawe ana mhau bo mait. Jõ tawe kʼanu tawe ana mkai boren wana beta oh. Kbe Allah yoo bo aro yaren ana fee. 17Menohe soh anu nhau bo niit afo re skabuk to, nyon nsu wanu, tna shat nna6:17 bo mafa raa ro Yahudi ja mno soo oh to: Soh ana sraujin to, ana moo boh ro tafoh mse mam mana wana abyõ. Tna ana myon masu wana fee. Tna ati ro ana simaut mase to, ana myon masu wana moof tna moo minyak mse mam mana msya masu wana ye. wanu ye. 18Afo re raa aro wase bo anu nno nhau bo niit. Soh anu nno feto kbe anu Nja ranu ro yhau wai tait yesait aran yhar bo ro anu nno wai reto tna kbe Ait yoo boren yaren anu ye.”
Yesus yerif iso ro raa mame kta
19Tna Yesus yawe, “Nme kta mam tabam refo ma, kbe bo mabat, hesik mait, tna raa mama mitrah amah msyõf kta wanu weto, makah mamo ye. 20Menohe nme kta wanu mam sawro ro Allah rAit wea. Mam sawro reto kbe bo mabat fee, hesik mait fee, tna raa ro mama msyõf bo to marak ye. 21Soh anu nme kta wanu mam tabam refo fo, kbe nhaf wanu mnaut kta weto sai. Menohe soh anu nme kta wanu mam sawro ro Allah to, kbe anu nhaf nnaut sawro rAit yoyo ye. 22Anu nsu wanu to, mfi lampu ro ntara anu oh meto. Soh nsu moof to, mno netsu wanu mram. Tibyo nsu maah ye. Soh anu nri watum tna nbo nno to, anu nmo mam kek reto yoyo oh meto. 23Menohe soh anu nri tna nbo nno fee; kbe anu nfi raa ro masu mti. Kbe anu nhau mam mamur sai. Tna soh anu nmo mam wore wo mamur to, feto kbe mamur reto to, mrok mamur htoh toni.” 24Tna Yesus yawe, “Ja sryan sait yno bo ro bobot sait aran sai. Ait yno bo ro bobot mabo ewok brio-brio to fee. Kbe ait knait bi ait sait tna ksoh bi ait sait. Kbe ait yari bo ro bobot sait yawe, tna yiwana bo ro bobot sait yawe. Feto to tawe kʼanu tawe: Nno bo ro Allah wAit sai aran. Saso kta ro tabam refo ye ma. Anu raa ntai nkro iso ewok weto su fee.”
Nnaut bo mamo-me ma
25Tna Yesus yawe, “Feto to, Jõ tawe kʼanu tawe: Nnaut yyi bo ro tabam refo toni to ma. Nnaut nfos wanu to, nnaut nwe nfos wanu to bo ro ati. Tna nnaut yyi boit ro kbe anu niit to ma. Nnaut netsu wanu to, nwe bo ro ati to ma. Tna nnaut yyi ratan ro kbe anu nyum to ma. 26Sik nmat ruu ro mfru mam ayoh to. Ruu to ja wase bo mkah. Tna wase bo siwyan boit ye. Tna wase sgi gudang ro moo boit mse ye. Menohe anu Nja ranu ro yhau mam sawro rAit tait, Ait siwyan boit kʼana mait. Tna anu raa fo, Ait ymat anu kaket miwer ruu to. 27Awya ro ytai yirenti yamos rait kebet naut? Anu nkin wefo fo, soh anu naut yyi bo ro tabam refo yoyo to, reto mafer marak. Allah oh mi Raa ro ybo anu nmos wanu. Allah yesait aran ytai yirenti raa mamos wana. 28Tna bawya mno re anu nnaut yyi ratan ro nyum to. Sik nmat sas bosafom ro moo mam smok. Tafuf wau weto mesait moo sai. Tafuf weto mur-mur saso boit fee. Bosafom ja msui mfen ratan ro myum to fee. Menohe Allah yno bo weto moof toni. 29Tiwya raja Salomo yyum ratan ro moof wer. Menohe Allah yno tafuf weto moof toni miwer. Raja Salomo, ratan rait moof mfi bosafom tafuf wau to fee. 30Allah yno re bosafom ro moo mam smok ifo moo boti waor sai. Menrabu to, raa mama mkah mkak. Mhau boti waor sai, menohe Allah fayir bosafom reto. Ait yno tafuf rau moof toni. Tawe, Allah ymat anu tna ksoh anu toni miwer bosafom reto. Feto to nnaut yyi ratan ro anu nyum to ma. Anu ja smot Allah matak fee! 31Nnaut yyi bombra weto ma! Ja raa mawe: Bo ro anu niit msya aya ro nta bo to au miyo? Tna msya ratan bo ro anu nyum bo to au miyo? Nnaut yyi feto ma. 32Raa ro wase Allah mam tabam refo to, ana weto msui saso bo weto beta. Menohe anu fo, Nja ranu ro yhau mam sawro rAit yhar yoo boit yee kʼanu. Tna yhar bo yoo ratan yee kʼraa wAit ye. Yhar bombra weto beta. 33Feto to, ntomer re nmo raa ro Allah yamo Raja ybo. Ntomer nno bo ro Ait ksoh. Saso bi Ait wia matim feto, tibyo kbe Allah yoo bo weto beta ysan kʼanu. 34Feto to, nnaut yyi bo ro menrabu btek mai kʼanu to ma. Bo ro menrabu to, Allah yhar oh. Bo ro samyoh mam ti sau to maum oh mam ti reto.”
7Nmat sas raa roto ma.
1“Nmat sas raa roto ma. Nnaut nwe raa roto mno bo ro mkair ma. Nhau nnaut feto ma be kbe Allah haberek ymat sas anu si, yawe anu weto nno bo mkair ye meto. 2Bo maja ro anu nbo nwe raa roto mno bo mkair to, kbe Allah haberek bo maja reto yawe anu to nno bo mkair ye. Tna bo maja ro anu nbo nnit bo ro raa roto mno to, kbe Allah haberek ybo bo maja reto ynit bo ro anu nno to ye. 3Soh raa wanu sait yno bo ro mkair kebet baro sai to, reto mnan fi knuf ro maku mhau kʼait yasu. Anu nmat sas ait. Menohe knuf ro maboh mhau kʼanu nsu. Feto to anu nahni bo ro mkair-kar mase ja anu nesait nno. 4Fyi re anu nwe kʼait nwe, ‘Nama, jõ tmen knuf ro maku kʼnyo nasu mato to.’ Ja anu nesait nmat knuf ro mhau kʼanu nsu mato wanu fee! 5Sioh anu to ma! Nisoh anu wia. Tna kbe nsu maah re kbe nmen knuf kʼait yasu mato to.”
Watum ro Allah to, nkyas kʼraa ro hawe mari to ma
6“Bo ro moof toni to, noo beak mtah mait to ma; be kbe haberek mafit anu. Noo haban mutiara ro mabyoh maut toni to, beak fane mait to ma; kbe fane mau maut mber kait-kat makus.”
Nyoh bo kʼAllah
7Tna Yesus yawe, “Nyoh bo tna kbe Allah yoo bo yee. Saso bo tna kbe anu ntru bo reto. Nii mato tna kbe mato reto Allah yitrah. 8Awya sai ro yayoh bo kʼAllah to, kbe Allah yoo yee. Awya sai ro saso bo to, kbe tru tu oh. Tna ro yai mato to, kbe Allah yitrah mato reto ye oh. 9Mfi bo ku wanu sait yhai sre yawia boit yait to, kbe yaja yasen yoo fraa yee ku rait yait fee. 10Mfi bo ku sait yawia yabo syoh to, kbe yaja yoo aban yee fee. 11Anu raa to nimara mboh. Menohe anu nksoh noo bo ro moof nee ku wanu. Tna Nja ranu ro yhau mam sawro rAit to, ksoh yoo bo ro moof toni yee kʼanu ye. Soh raa mayoh bo kʼAit to, kbe Ait ksoh yoo bo reto yee kʼana ye fea!”
Iso ro ati to mtit
12“Bo bawya sai ro anu ksoh nwe raa mno kʼanu to, nno mfi feto kʼana ye. Watum ro tiwya Musa ysya nabi na mkom to, mabo rau oh meto.
13Mato sau ro mtit mhau. Ntomer ntwok mam mato ro mtit reto. Ntwok mam mato ro meya ma. Nmo mam iso mabi ma. Iso ro mabi reto to, iso ro rabin kair. Tna raa msis-sas kro iso reto. 14Menohe iso ro mamos mae to mtit. Tna mato rau to maku toni ye. Raa ro bito kro iso tna ntwok mam mato reto to kebet baro sai.”
Raa ro mawe ana moof to, ana ja mno bo ro moof fe mfe a?
15“Kaket anu: Kbe raa mama sioh mawe, ‘Amu fo, Allah ybis nmo nabi wAit. Amu ja nkyas bo wAit.’ He mfe. Ana weto, wan-wan mno bo moof mfi domba. Menohe ana ja safo mfi mtah serigala ye meto. 16Nmat sas bo ro ana weto ja mno. Tna kbe anu nmat he ana mno bo ro mkair-kar. Feto kbe anu nhar nwe raa weto mbam kʼAllah fee. Raa taro mfi ara ro moof. Tna raa taro to, mfi abumun sai. Ja raa mryoh anggur make mbam abumun mara fee. Tna ja raa mryoh kake ro moof mbam hyoh muuf bo fee ye. 17Ara ro mara moof to, kbe make rau to moof yum. Tna kake mara ro moo kaket fee, kbe make rau to mkair ye. 18Ara ro mara moof to, ja make rau to mkair fee. Feto ye ara ro mara mkair to, kbe make rau to moof fee ye. 19Tna kake mara ro mse make moof kaket fee, kbe raa mfat mkah war to. 20Feto ye mkah ana ro sioh mawe ana nabi ro Allah. Ana mawe Allah ybis ana makah watum rAit mama mkyas. He mfe, soh anu nmat sas bo mafer ro ana mno to, kbe anu nhar nwe ana mbam Allah mama fe mfe a.
21Raa ja mkyas bo kʼJõ tna mtom Jõ tasom mawe Jõ fi Tuhan7:21 Mam mai ro Yunani, ’tuan’ msya ’tuhan’ mnan anya sai. Menohe mai ro Indonesia; soh raa mkyas Allah ysya Yesus to, ana mkom ’Tuhan’. Tna soh mkyas raa sai, ana mkom ’tuan’. Ewok ye raa masom fee: ’Tuhan’ to gelar ro ja raa mtu ati ro ana mkyas kʼraa mase ro mbo ana. Tiwya tinyi fnya sor mkyas bo kʼmaa na, mawe ’Tuhan’. Tna sryan ykyas kʼbobot ro ybo ait to, yawe ’Tuhan’ ye. Nmat Lukas 6:46; 1 Petrus 3:6; 2 Korintus 4:5. rana. Menohe ana weto taro mamo raa woJõ fee. Ana kbe mamo raa ro Allah ybo yfi Raja fee. Jõ Taja yhau mam sawro rAit. Tna raa ro ja mno bo ro Ait ksoh sai oh mi kbe mamo raa wAit to. 22Meen mam ati ro Allah ysok raa ro mamo raa mana rAit to, kbe raa msis-sas mama mtu kʼJõ mawe, ‘Tuhan; tiwya amu oh mi nkah natak aNyõ nkah soo ro Allah nmo nkyas kʼraa sor. Tna amu nkah natak aNyõ ye nikyak kabes sor. Tna amu nno bo ro msai mawat taro sor mkah Nyõ natak aNyõ ye.’ 23Menohe ati reto to, Jõ titbat tawe kʼana abyõ tawe, ‘Jõ wase anu saut! Anu raa ro ja nno bo kbik-kbak sai meto. Nmo fari tno!’”
Raa ro yhar bo msya raa ro wase bo
24Tna Yesus yawe, “Raa taro mari bo ro Jõ tkyas refo tna kbe mbo mno kaket. Ana weto mfi raa sait ro ja yhar bo sgi amah rait abyõ mam fraa to. 25Ait sgi abyõ mam fraa to, tibyo amah rait matu fee. Oom mais mos, syar miyi mama, tna oof ye frok mama mfi to, menohe amah rait reto mros matak; matu fee. 26Raa taro mari bo ro Jõ tkyas refo tna mbo mno fee. Ana weto mfi raa sait ro ja wase bo. Ait retait sgi amah rait abyõ mam snyik mana. 27Oom mais mos, syar miyi mama, tna oof ye frok mama mfi amah reto to, tibyo amah reto matu mai tabam.”
Raa ro mari bo ro Yesus ykyas mrok ktak
28,29Yesus ykyas watum reto matak toni. Menohe guruagama ro Yahudi to, ja bokyas wana matak kaket fee. Yesus watum bo mkak. Tibyo raa ro mari bokyas rAit reto mrok ktak beta.
8Yesus yisoh ait ro kiyam kusta sait
1Yesus yroh ybam faut mana si fo, tibyo raa makin mjor mama kro Ait. 2Mam weto ye ait ro yafa kusta sait yama. Yama tna yjit yimna soh-soh kʼAit yawe, “Bobot, soh Nyõ ksoh meto mi, nisoh jõ re kusta refo marak.” 3Tna Yesus yatem ybo ait tna yawe, “Jõ ksoh, tawe nyõ mbros oh!” Ayõ reto si fo, kusta reto mrok marak. 4Tna Yesus yawe wa kʼait yawe, “Namo to, nkyas bo refo kʼraa ma. Namo nerif narak anyõ kʼimam ro Yahudi sait re ait ymat sas nyõ. Nyõ noof u tibyo noo bo nee kʼimam. Tna kbe ait ysan bo reto kʼAllah mamyot Watum ro Musa ykom yawe. Nno bo weto re kbe raa mhar mawe nyõ netsu moof u.”
Yesus yisoh sryan raa sbe ro Roma sait
5Tna Yesus yamo snok mam remo ro Kapernaum. Tna raa sbe ro yase sait yama yo kʼAit. Raa sbe retait yamo aban mana ro ja ybo raa sbe ro Roma majin sau. Ait soh-soh Yesus yawe, 6“Bobot; sryan ajõ kiyam msai yhau mam amah. Tna kiyam reto mno tibyo ait yaa msya yatem yhai. Tibyo yakus yjin sai mam aam meu.” 7Yesus yari feto tna yawe, “Jõ kbe tama tisoh ait re yoof.” 8Menohe aban mana ro sbe retait yawe, “Bobot, jõ fi raa ro ati fee tna Nyõ fi raa ro nase toni. Feto to tawe namo twok mam amah ajõ to ma. Naban nawe sai mam wefo tna kbe sryan ajõ retait kiyam rait marak. 9Jõ thar tawe raa kinyah ja mari bo kʼraa mase ro mbo ana. Jõ tesait ja tari bo kʼraa ro mase woJõ ye. Tna raa sbe ro kinyah ja mari bo ro jõ tawe ye. Soh jõ tbis bo kʼraa sbe sait to, kbe ait yari tna yasen yamo tu oh. Tna soh jõ ttu raa sbe taro sait tawe yama to, kbe ait yasen yama ye. Tna soh jõ tbis bo kʼsryan ajõ tawe, ‘Nno bo reto.’ Kbe ait yari ybo yno tu oh! Tna Nyõ to nase toni niwrek jõ ye. Soh Nyõ nawe kiyam marak to, kiyam reto mari tibyo marak tu oh.” 10Yesus yari bokyas rait reto tna yrok ktak. Raa mawat kro Ait mamo to, tna Ait yawe kʼana yawe, “Ja raa ro mhau mam tabam ro Israel fo, bosmot wana matak fee. Menohe Ait refi bosmot rait matak toni!” 11Tna Jõ tawe kʼanu tawe, meen raa srim msis-sas mama mbam arin aso beta. Mama hre su msya Abraham, Ishak, ysya Yakub ye. Hre sohmaam bo su mam wore wo Allah yamo Raja ybo raa wAit to. 12Tiwya tinyi Allah ymen raa ro Yahudi mawat mamo raa mana ro Ait ybo reto. He mfe, ana hawe bo mama. Meen Allah yikyak ana mhau bana mne mam wore wo mamur htoh toni. Mam wore reto to, kbe ana sraujin ana toni. Tibyo ana kbe mawia tna kakyah toni ye. 13Tna Yesus yawe kʼbi yabi ro sbe retait yawe, “Hah ne namo oh, kbe sryan anyõ yoof mnan si bosmot anyõ ye oh.” Weto si oh to, sryan retait yrok yoof.
Yesus yisoh raa ro kiyam mawat
14Tna Yesus yamo twok mam samu ro Petrus. Twok tna ymat Petrus snyim ro ano mjin sai. Au metsu mbe. 15Yesus yamo ybo fai au matem. Tibyo kiyam reto mrok marak. Tna fai au masen saruk boit mee kʼana mait. 16Tna mam wore arin knu-knu fo, raa mawat mama mo kʼYesus. Mama to, makah raa ro kabes mbo mawat ye. Tna Yesus yikyak kabes weto mkah ymai sau sai fo, tibyo kabes weto frok mamo. Tna raa ro kiyam weto beta to, kiyam wana marak ye. 17Yesus yisoh raa feto to, afo re yno mnan si bo ro tiwya Allah ybis nabi Yesaya yama ykyas wia. Yesaya ykyas yawe,
“Anu ro ssafo fee, Ait yisoh re boof. Tna anu ro kiyam bo to, Ait yisoh re boof ye.”
Yesaya 53:4
Raa ro mawe kro Yesus
18Tna Yesus ymat he raa msis-sas mama mros mur mtan kʼAit. Tibyo Ait ybis kuber wAit maut wiak msya Ait afo re ana frit mamoʼt maru reto ati tino. 19Tna guru agama ro Yahudi sait yama yo kʼAit. Yama tna ytu yawe, “Bi Guru; woyõ-woya sai Nyõ namo to, jõ ksoh kro Nyõ bmo ye.” 20Tna Yesus yawe kʼait retait yawe, “Mtah serigala to, ja mabum mam wafyoh rau. Tna ruu to, ja mabum mam tafat wana ye. Menohe Jõ fi ’Ait ro Yroh Yama Yfi Raa Sai’. Tna samu ro Jõ tjin aro fee. ⌞Soh nyõ nawe kro Jõ to, kbe wore nyõ njin aro fee ye.⌟” 21Tna kuber wAit sait yawe kʼAit yawe, “Tuhan; nbis jõ tamo wia sama hai ro taja tna fo tama kro Nyõ.” 22Menohe Yesus yawe si yawe, “Namo ma. Ana ro wase Allah to, kbe mesait sama hai wana rof. Menohe nyõ to, kro Jõ bmo.”
Yesus bhah foos tibyo mrok mnem
23Yesus yaut wiak sau, tna kuber wAit kro maut ye. 24Ana mamo mamo tna foos ro msai frok tubor mama mai wiak rana. Tna figyõm mase mai maut mam wiak mato ye tna mabo kait ana beta. Menohe Yesus yjin tu bait mam wiak mato. 25Tibyo kuber wAit mti Ait mawe, “Tuhan; natmof anu be kbe anu bsu fo.” 26Yesus yrok yasen tna yastako ana yawe, “Bosmot wanu matak fee! Anu waa bo bawya mefo?” Feto tibyo Ait yifau foos msya figyõm weto. Tibyo maru reto mrok mnem. 27Yesus yno feto tibyo ana weto mrok ktak sai, tna mawe kʼanya mawe, “Bi Ait refi yatak yifau foos msya figyõm wefo mari. Bi Ait refi fi raa fe bawya mefi?”
Yesus yisoh raa mabo ewok ro kabes mbo
28Yesus ysya kuber wAit frit maru reto snok mam rabin ro Gadara. Mam weto to, raa mabo ewok ro kabes mbo fo mama mo kʼYesus. Ana mbewok mama mbam isra mato ro ja raa mse hai to, mama. Mbewok reto ja safo toni. Tibyo raa sait bo ter-ter yamo kait mam iso ro ana mhau reto fee ye. 29Mbewok mama tna kakyah mawe kʼYesus mawe, “Ku ro Allah yare fi; Nyõ nama nno bawya kʼamu fo? Nyõ nama sikowah amu a? Makyon ro Nyõ sikowah amu to, mama fefares!” 30Kene msya yuk reto ye fane mawat mau bana. 31Tna kabes weto soh-soh kʼYesus mawe, “Soh Nyõ nbis amu nawe frok nmo meto mi, nbis amu nmo twok mam fane wore wono!” 32Tna Yesus ybis yawe, “Nmo oh!” Tna kabes weto mari tna frok mamo twok mam fane weto. Tna fane weto mrok mker tna mhoh tbat mam rakak reto btek mam maru. Tna fane weto msu tibyo mhai beta mkak. 33Raa ro kmot fane weto mmat bo ro Yesus yno. Feto tibyo ana masen fooh mhoh mamo mkyas kʼraa mam remo rana. Tna mkyas ana mbewok ro kabes mbo to ye. 34Raa ro mhau mam remo reto mari bo weto, tibyo ana beta mama mo kʼYesus. Mama tna misobu Ait mawe Ait yasen yamo fooh sikba rabin rana.
9Yesus yisoh ait ro yaa msya yatem mhai sait
1Yesus yno bo weto mkak tna fo ye yaut wiak frit yamoʼt remo rAit. 2Mam weto to, ait ro yaa mhai sait yjin mam sesa sai. Yjin mam sesa tna raa nkatar ait makah mama mo kʼYesus. Yesus ymat ana tna yhar yawe ana smot Ait matak. Tibyo Yesus yawe kʼait ro yaa mhai retait yawe, “Tao, sraujin ma! Iro wonyõ to, Jõ tyon oh.” 3Guru agama Yahudi baro hre mam weto ye. Ana mari bo ro Yesus yawe feto tna mnaut mawe, “Bo ro Ait yawe to berasi Allah! Ja Allah yesait aran ytai yyon iro.” 4Menohe Yesus yhar bo ro ana mnaut mam srau mato wana. Tna yawe kʼana yawe, “Fyi re anu nnaut bo ro mkair weto mam srau mato wanu? 5Soh Jõ tawe kʼait refi tawe ‘Iro wonyõ to, Jõ tyon oh.’ Bo ro msai fee: Kbe raa mahni bo reto mabo fe mfe a. Menohe tawe, ‘Nasen namo oh!’ Tawe feto afo re kbe raa mmat bo reto mabo. Mmat tna mhar mawe Jõ ttai tno bo ewok ye to. Ewok ye mnan-nan kʼJõ. 6Jõ fi ’Ait ro Yroh Yama Yfi Raa Sai’. Tna bo ro Jõ tno fo, Jõ tno re kbe anu nhar nwe Jõ tatak tyon iro raa mam tabam refo.” Tna Yesus yawe kʼAit ro yaa mhai retait yawe, “Nasen, tubat sese anyõ, tna nasom namo bonyõ!” 7Tibyo ait yasen yros kaket tna yamo bait amah rait. 8Raa makin ro mmat bo ro Yesus yno reto to, mrok miskawowo. Tibyo ana mbaut Allah ro yoo yatak rAit yee kʼraa to.
Matius ro yoo namabyoh
9Yesus sikba yuk reto yamo. Yamo to, ymat raa ro ja yoo namabyoh (pajak) yee kʼpemerintah ro Roma sait. Yasom Matius. Bi ait hre mam kantor ro namabyoh rait. Tna Yesus ytu kʼait yawe, “Nama kro Jõ bmo!” Matius yari feto, tibyo ait yasen kro Yesus mamo.
10Ti sau Yesus ysya kuber wAit mait boit mam amah ro bi Matius. Tna raa ro ja moo namabyoh msya raa ro ja mno iro bo mawat mama mait boit su msya ana ye. 11Raa ro Farisi mmat ana mait bo su feto, tibyo mtu bo kuber ro Yesus wAit. Ana mtu mawe, “Fyi re Guru ranu yait boit su ysya raa ro moo namabyoh tna msya raa ro ja mno iro weto?” 12Yesus yari bo ro ana mawe feto, tna yawe kʼana yawe, “Raa ro metsu moof ja mamo saso dokter fee. Ja raa ro kiyam oh mi mamo saso dokter to. 13Nsen nmo nmat sas bo ro Allah yawe mam bokom rAit yawe,
‘Anu noo bo wanu taro nsan kʼJõ to, reto moof. Menohe jõ ksoh tawe anu natmof raa anya; reto moof toni.’
Hosea 6:6
Jõ tama ttu raa ro mhaf moof to fee. Tama fo ttu raa ro mno iro.”
Maja ro mhau bo mait
14Kuber ro Yohanes mama mo kʼYesus tna mtu kʼAit mawe, “Fyi re amu nsya raa ro Farisi ja nhau bo niit. Menohe kuber woNyõ mhau bo mait to fee?” 15Yesus ykyas bofret kʼana yawe, “Ati ro raa sait ymen fnya to, ja raa mno bo bawya? Ana mhau bo ro mait fe mfe a? Mfe! Ana makyõ bokyõ fea! Ana makyõ bokyõ wia. Tna fo raa moo ait makah mamo. Tna kbe mafoh wana sraujin tibyo mhau bo ro mait. Kuber woJõ mfi feto ye. Jõ thau tsya ana fares fo, ana sraujin fee. Menohe ati ro Jõ sikba ana to, kbe ana sraujin tibyo mhau bo ro mait ye.” 16Tna Yesus ykyas bofret ewok naut kʼana yawe, “Mfi bo ratan matah ro hri-hra sau. Ja fnya maru ratan reto mkah hawee ftah mabuf ro tna to fee. Soh au mtin feto to, kbe tis mkair. Kbe hawee ftah mabuf reto mno tibyo ratan reto mrok mhah renti. Feto ye iso bose raa mabi ro Yahudi ja mamo to hayah. Tna iso tna ro Jõ terif refo fo hayah ye. Tna iso ewok reto srioh anya ye fee. 17Feto ye, Ja raa mror anggur maya ro tna mam baah marak ro matah fee. Kbe anggur maya reto mno baah marak reto matu mbua. Tna kbe anggur maya reto maus miyi mroh mamo mkak. Anggur maya ro tna to, ja raa moo mror mam baah marak ro tna sai. Tna re anggur maya reto msya baah reto bewok kbe mhau moof to.”
Fai sau ro mafa mees
18Yesus ykyas bo fares tna bi yabi sait yama yo kʼYesus. Ait yaka hartu Yesus, tna yawe, “Ku ajõ ro ano sau tna sai mhai oh. Nama noo natem niir ku au afo re au mrok masen.” 19Yesus yari feto, tibyo yasen ysya kuber wAit kro bi ait retait mamo. 20,21Ana mamo kri-kri fo, fai sau mama. Fai au mafa mees ro fnya yoyo tahun trion 12 oh. Fai au mnaut bau mam srau mato mawe, “Soh jõ trof tiir ratan rAit baro sai to, kbe kiyam ajõ refo marak.” Feto tibyo au nto miir ratan ro Yesus rAit makit. 22Yesus haberek ymat fai au. Tna yawe kʼau yawe, “Ku aJõ, sraujin ma; nyõ smot Jõ tibyo kiyam anyõ reto marak.” Feto si fo, kiyam rau marak.
23Tna Yesus yamo snok mam amah ro bi yabi retait. Ait ymat raa ro mfi oor msya raa msis-sas ro mawia tna mmai wer mam beto. 24Tna Ait yawe kʼana yawe, “Frok nmo oh. Ku au reto mhai fee. Au mjin sai meto.” Menohe raa weto masah Ait sai. 25Raa weto frok tna Yesus twok yamoʼt amah hawar ro ku au refo mriyor. Ait ybo ku au matem, tibyo ku au masen mros. 26Bo ro Yesus yno reto raa mkyas hahah mamo snok mam rabin reto beta.
Yesus yisoh raa mabo ewok ro masu mboh
27Yesus yasen yamo renti naut. Tna raa ro masu mboh mabo ewok kro Ait mam tis. Ana mtu mawe, “Yesus; Ku ro Daud9:27 Bokom ro Allah mawe Mesias ro meen yama tait, ybam kube ro raja Daud. Raa ro agama Yahudi beta mhar bokom reto. Feto to ana mtu Mesias yasom ’Ku ro Daud’ ye., natmof amu!” 28Yesus yamo twok mam amah sau tna ana mbewok ro masu mboh reto mama mo kʼAit. Tna Ait yawe kʼana yawe, “Anu mbewok nnaut nwe Jõ tatak tno anu nsu maah fe mfe a?” Tna ana mawe kʼAit mawe, “Ae, bi Yabi, amu smot Nyõ. Amu nhar nwe Nyõ fi Raa ro natak.” 29Tna Yesus yiir ana mbewok masu, tna yawe, “Anu nsu maah mamo mamyot si bosmot ranu oh.” 30Tibyo ana mbewok reto mrok masu maah. Tna Yesus yawe wa kʼana yawe, “Nmo nkyas bo ro Jõ tno kʼanu reto kʼraa roto ma!” 31Menohe ana mbewok frok mamo mkyas Ait yasom faram mam rabin reto beta ye.
Yesus yisoh raa ro ymai marak sait
32Ana mbewok ro masu mboh reto frok mamo. Tna raa makah ait ro kabes mbo sait mama mo kʼYesus. Kabes mbo ait retait tibyo ymai marak sai. 33Yesus yikyak kabes reto. Tibyo ait retait yrok ymai. Raa makin ro mmat bo ro Yesus yno reto mrok ktak tna mawe kʼanya mawe, “Anu ja bmat bo ro mnan fefo aro mam Israel fee.” 34Menohe raa ro Farisi baro mawe, “Kabes yabi (Iblis) oh mi yoo yatak rait yee kʼYesus re Ait yatak yikyak kabes sor to.”
Yesus ymat raa makin tna yatmof ana
35Tna Yesus yamo yur mam kota makin msya remo makin beta ye. Ait yamo iti to, Ait watum raa ro Yahudi mam samu watum wana ro mhau mam beto sor. Tna Ait wosa Bokyas ro Moof (Injil) kʼana ye. Bokyas moof reto to, mkyas raa mana ro Allah yamo Raja ybo. Tna Yesus yisoh raa ro kiyam tibyo kiyam rana marak beta ye. Tna ana ro ssafo fee beta to, Ait yisoh tibyo ana matak ye. 36Tna Yesus ymat raa makin weto yawe bo msuweni-wana mfi domba ro mhau akus. Raa ro kmot ana aro fee. Tibyo Ait yatmof ana. 37Tna Yesus yawe kuber wAit yawe, “Raa makin weto mfi bo armato ro manes oh. Menohe raa ro matu bo to, mabo kebet baro sai; mnan fee. 38Feto to, nyoh kʼAllah ro armato rAit afo re Ait ybis raa mama matu bo mam armato reto.”
10Kuber ro Yesus wAit mabo 12
1Ati sau to, Yesus ytu kuber wAit mabo 12 weto mama mo kʼAit. Tna Ait yoo yatak rAit yee kʼana re kbe ana mikyak kabes sor, tna misoh raa ro kiyam tna mafa bo sor, re kbe mrok moof ye, tna misoh raa ro ssafo fee to, mrok matak beta ye. 2Raabis (rasul) mabo 12 reto masom wana sor to mefo: Ait ro tinyi tait yasom Simon-Petrus, ysya yao Andreas. Tna Yakobus ysya yao Yohanes. Ana mbewok to ku ro bi Zebedeus yare. 3Tna Filipus, Bartolomeus, Tomas, tna Matius ro ja yoo namabyoh (pajak), Yakobus ro Alfeus yare ysya Tadeus. 4Tna Simon raa ro Zelot10:4 Simon refi ja berur su ysya mkbair sau ro hawe bo pemerintah Roma mbo ana, raa ro Yahudi. Tna ana masen hafrah. Au oh mi ana mtu ait yasom Zelot soh mfe Patriot.. Tna Yudas ro besruf Yesus.
Yesus yerif bo ro kbe kuber wAit mamo mno
5Yesus ybis kuber wAit mabo 12 reto yawe, “Nmo no kʼraa mana ro Israel10:5 Som Israel, Ibrani, Yahudi, msya Yehuda to, masom trion jiit weto mkyas raa mana sau; ja mnan anya sai. Raa ro Ibrani to masom raa mana wana. Hohos wana sait yasom Israel. Feto kbe ti aro-aro raa mkyas raa mana reto mawe ’raa ro Israel’. (Ait retait yasom Yakub ye.) Ana mkyas mai sau, masom mai ro Ibrani ye. Ti aro to raa mkyas mawe raa ro ’Yahudi’. Som reto mkyas raa mana weto ye, tna mkyas agama wana ye. sai. Nmoʼt kota raa ro Samaria ma. Nmo nkyas kʼraa mana roto ma. 6Nmo no kʼraa ro Israel mesait aran sai. Ana to, raa ro mamo tit mfi domba ro mamo tit tna raa ro kmot ana marak. 7Nkyas kʼana nwe, ‘Allah siwyan yamo Raja. Ait ytu raa wAit mama tna Ait ybo ana.’ 8Tna nisoh kiyam rana. Nno re raa ro mhai mrok masen ye. Nisoh raa ro mafa kusta afo re ana moof ye. Tna nikyak kabes frok mbam raa ro kabes mbo to ye. Jõ too tatak aJõ tee sai kʼanu. Nayoh nwe raa moo bo mee si kʼanu ma. Nmo nno bo weto mkah nhaf ro ase sai. 9-10Nmo to, nfau pitis msya ratan mam yu wanu ma. Tna nse sandal bo to ma ye. Tna nbo armuk trion ewok ma. Nnaut: Raa ro mkah kahren raa to, kbe raa moo boren maren ana tu oh. 11Nmo snok mam kota msya remo. Tna saso raa ro yhaf moof sait, re ait yse anu njin mam amah rait. Tna nhau nsya ait mamo snok mam wore anu nsen sikba remo reto. 12Anu nmo twok mam amah raa to, nmah meen kʼana wia. 13Tna soh raa ro amah reto mhaf moof tna re huwya moo anu mse mam amah rana to, skabuk raa weto nwe Allah yno bo moof kʼana. Soh ana mikyak anu to, skabuk feto ma. 14Soh anu twok mam remo taro tna raa mitrah amah wana kʼanu fee; tna soh raa hawe mari bokyas ro anu nkyas to, ati ro anu sikba amah reto msya remo reto nmo to, bes-bas bohasyaf ro mhau mam naa to akus sai. 15Jõ tawe kʼanu tawe, ‘Meen ati ro tabam refo haberek to, kbe Allah ymat raa ro tiwya mhau mam kota ro Sodom msya Gomora tna yno bo ro maku sai mbtek mai kʼana. Menohe raa ro remo taro tii mikyak anu. Ana hawe bo mari bokyas aJõ. Tibyo bo ro meen mbtek mai kʼana weto to, kbe samyoh toni.’”
Bo mkair ro meen mai kʼraa
16Tna Yesus yawe, “Nri oh. Anu fo raa ro nhaf sneh. Tna Jõ tbis anu nmo mam remo aro sor. Tna kbe anu nkai raa ro mkair-kar. Anu nfi domba ro mamo mam wore wo mtah serigala10:16 Domba to, ja mesait misoh ana ai fee. Soh raa mkyar domba fee, kbe kak mafit majat. Serigala to kak mfi mtah ro mase tna nsafo toni, ja mafit domba. ja mhau. Nmo to, kaket anu nfi aban. Tna nhau nhaf moof yoyo ye, mfi ruu merpati. 17Siwyan anu be kbe raa mno anu. Kbe raa wanu ro agama Yahudi mfot anu makah mamo msan kʼraa manes wana. Tna kbe ana sikowah anu mam samu watum wana ye. 18Anu fo kuber woJõ. Au oh mi kbe raa mfot anu makah mamo msan kʼgubernur taro msya raja na taro sor ye. Bo mkair weto meen mai kʼanu. Menohe mafer rau ro tis to moof. Jõ bitsre bo reto mai kʼanu afo re kbe anu nkyas Jõ tasom kʼraa ro mase weto ye, msya raa wana makin ro wase Allah ye. 19Meen raa mfot anu, makah mamo msan kʼraa weto. Tna kbe raa manes mtu srah wanu. Menohe wa ma. Nnaut yyi bo ro kbe anu nkyas to ma. Kbe Allah besi bokyas moof kʼanu. Kbe Ait besi bokyas rAit tna anu ne nawe si bokyas reto kʼana. 20Anu nesait kar oh mi nkyas bo mam weto fee. Kbe Har ro Nja Allah oh mi besi bo ro anu nkyas to.”
21Tna Yesus yawe, “Anu to, meen raa msan anu kʼraa mame. Tna raa msan mao na kʼraa mame. Tna bi sait kbe ysan kukek wait ye. Kukek na kbe masen mafa msya maja wana ye. Tna msan maja wana kʼraa mame ye. 22Anu ro kro Jõ fo, kbe raa beta knait anu. Menohe awya ro bito kro Jõ snok mam tis rau to, kbe ait retait ykai riof ro mase. 23Ati ro raa sikowah anu mam remo sau to, nsam nmoʼt remo roto taro. Jõ tawe kʼanu tawe, ‘Jõ fi “Ait ro Yroh Yama Yfi Raa Sai”.’ Kbe anu nmo nur ntan mam kota makin ro Israel. Nmo mkak fefares to, kbe Jõ tama. 24Kuber sait ja yase yiwer guru rait fee. Tna sryan sait ja yase yiwer bobot rait fee ye. 25Soh kuber sait yawe yasen ynan guru rait to, mnan oh. Feto ye soh sryan sait yawe yasen ynan bobot rait to, mnan ye oh. Jõ tfi raa yabi ro yno bo moof sait. Tna Jõ tase tbo raa ro mhau mam amah aJõ. Menohe raa baro sioh mawe Jõ tasom Beelzebul.10:25 Kabes ro yabi tait ja raa mtu yasom Beelzebul ye, tna mtu yasom Iblis ye. Raa sioh mawe Jõ tfi kabes yabi (Iblis). Anu nfi ku woJõ. Feto kbe meen raa sioh mawe anu nfi kabes yabi ye.
26Waa raa weto ma. Soh raa mno bo ro mkair aro, ja ana mmyõt bo reto. Ana mmyõt bo reto afo re raa mmat fee tna mhar fee. Menohe bo weto beta meen raa masbrer tu oh. Kbe raa mmat tna mhar. Bo ro raa mmyõt to, meen raa masbrah kʼraa tu oh. 27Tna bokyas ro Jõ tkyas kʼanu kar to, nmo nkyas abyõ afo re raa beta mari ye. 28Soh raa mama mame anu to, waa ma. Raa matak mame anu netsu wanu sai. Ana matak re kbe mame anu nmos wanu fee. Menohe waa Allah. Ait Raa ro yatak yame raa metsu wana ye msya raa mamos wana ye mam tafoh ro mait mam rabin kair to.
29Ruu mbas to, mabyoh rau mroh sai. Ruu mbas mana ewok to, raa moo mkah pitis mauf sau aran sai. Menohe Allah ja kmot ana kaket. Ait bitsre sau btek ni-nan bo fee ye. 30,31Anu nbyoh ranu to, maut toni miwer ruu mbas mabyoh rau. Feto to waa ma. Nna mawyan wanu to, Ait ntuu beta mnan oh. Ait ymat anu kaket. Feto to waa ana ro mawe mame anu to ma.
32Hrenaut Jõ ma. Jõ fi ’Ait ro Yroh Yama Yfi Raa Sai’. Awya ro ykyas abyõ kʼraa roto yawe, ‘Jõ smot Yesus’ to, kbe meen Jõ tkyas ait abyõ kʼTaja ye. Tawe, ‘Ait retait raa aJõ oh metait.’ 33Menohe awya ro ywaar Jõ kʼraa roto yawe, ‘Jõ smot Yesus fee’, Meen Jõ twaar ait ye. Tkyas kʼTaja tawe, ‘Raa retait tait raa aJõ metait fee.’”
Yesus yisti raa miranya fee
34“Nnaut nwe Jõ tamaʼt tabam refo re tisoh iranya raa msya raa anya to fee. Jõ tama tibyo raa taro mawe ana mban Jõ. Tna raa taro mamo byoh kʼJõ. Tisti raa mafa meto. 35Jõ tama fo,
‘betwat ku sait ybam yaja. Tna kbe ku sau ntwat mbam mme. Tna fai sau ntwat mbam snyim ro ano. 36Ana ro mhau su mam amah ranu taro to, kbe masen mamo byoh kʼanu.’
Mikha 7:6
37Tna awya ro yawyan marak yaja to, tna yawyan marak yme to, menohe ait yawyan marak Jõ toni fee; ait retait yatak yamo raa aJõ metait fee. Feto ye soh awya ro yawyan marak ku ro sme rait msya ku ro ano rait bo toni miwrek Jõ to; ait retait yatak yamo raa aJõ metait fee ye. 38Awya ro yawe kro Jõ to, menohe hawe bo yasom bo fanes ro mama mai kʼait to fee ye; ait retait yatak yamo raa aJõ metait fee. Soh ait yasom ara warok rait reto ye tna ait kro Jõ ye; ait retait yamo raa aJõ. 39Raa taro mawe misoh metsu rana ai mam tabam refo. Ana saso riof rana mam tabam refo sai ai menohe ana mnaut mamos rana fee. Meen ana weto mhau hame wajin fee. Menohe raa taro mawe mhau saso riof rana ai mam tabam refo fee. Ana mawe mno bo woJõ. Ana saso Jõ tasom aJõ mam tabam refo. Ana weto oh mi kbe mkai riof kʼana. Ana kbe meen raa mame majat oto, menohe meen mkai riof ro hame wajin.
40Feto ye, awya ro yitrah yhaf rait kʼanu to, ait retait yitrah yhaf kʼJõ oh meto. Tna awya ro yitrah yhaf rait kʼJõ to, ait retait yitrah yhaf kʼAit ro ybis Jõ tama ye oh meto. 41Awya ro huwya yiranya ysya nabi ro Allah wAit sait to, kbe boren rait mase, mfi boren ro nabi ye. Tna awya ro huwya yiranya ysya raa ro ja yno bo moof to, kbe boren rait mase ye mfi boren raa ro ja mno bo moof weto ye. 42Tna awya ro ymat raa woJõ tibyo yatmof ana to, kbe Allah yoo boren yaren ait tu oh. Nnaut oh; Allah ymat bo bawya ro anu nno sai: Mfi bo raa kinyah aJõ sait yhai sbit to, awya ro ywyan aya yee kʼait yata to, kbe Allah yaren ait ye.”
111Yesus ykyas bo kuber wAit mabo 12 weto mkak oh. Tna Ait yasen sikba yuk reto yamoʼt remo makin ro kene mam weto ye. Yamo ykyas Watum ro Allah tna wosa Bokyas Moof kʼraa makin ro mhau mam beto sor ye.
Yohanes Pembaptis ytu bo kʼYesus
2Yohanes ro ja baptis raa tait yhau mam bui fares. Ait yari bo ro Kristus yno feto, tibyo Yohanes ybis kuber wait mamo mo kʼKristus tna mtu bo kʼAit mawe, 3“Nyõ fi Mesias ro tiwya Allah ysi yawe kbe yama oh mefi, fe mfe a? Soh mfe, kbe amu ste raa roto sait hayah a?” 4Menohe Yesus yawe, “Hah ne nmo no kʼYohanes tna nkyas bo ro anu nmat tna nri kʼait. Nwe: 5‘Raa ro masu mboh to, mfo refo ana mmat bo. Raa ro maa mhai to, mfo refo ana masen mamo. Raa ro mafa kusta to, mfo refo ana mrok moof. Raa ro mimara mtuk to, mfo refo ana mari bo. Raa ro mhai to, ana mrok masen. Tna raa ro masu awe to, mari Bokyas Moof ro mbam kʼAllah.’ 6Raa taro mmat bo ro Jõ tno tna beroh smot Jõ. Ana mwaar Jõ fee. Kbe ana weto simaut mase.”
7Kuber ro Yohanes wait hah mamo. Tna Yesus yasen ykyas Yohanes kʼraa msis-sas weto. Ykyas yawe, “Tiwya anu nmoʼt yuk ro riamo nwe nmat Yohanes. Nmo to, anu nnaut nwe nmat bawya meto? Anu nmo nmat nkrum ro foos mfi matu wewe mamo-me a? ⌞Mfe, Yohanes retait raa ro yros yatak. Ait raa ro sneh sai fee.⌟ 8Tiwya anu nmo nmat ait mkah bawya? Anu nmo nmat bobot sait ro yyum ratan ro fyan-fyan fe mfe a? Mfe ye, bobot ro yyum ratan ro moof to, ja yhau bait mam amah ro moof mfi raja na ja mhau. 9Tawe kʼanu u tawe; anu nmo saso bawya mam tabam ro riamo reto to? Anu nmo saso nabi ro Allah ybis yama fe mfe a? Ae! Yohanes tait nabi ro Allah ybis yama. Ait yase yiwer nabi na roto ye. 10Yohanes retait oh mi tiwya Allah ykyas mam Bokom rAit sau. Bokom reto mawe,
‘Meen Jõ tbis raa sait yama ykyas bo woJõ yatim wia tna Nyõ nrof. Kbe ait siwyan iso kʼNyõ.’
Maleakhi 3:1
11Nnaut oh: Raa ro tabam refo aro mase miwrek Yohanes Pembaptis fee. Menohe raa mana ro Allah yamo Raja ybo to, ana ro kinyah to, ana beta mase miwer Yohanes. 12Maban ti tinyi rau wore wo Yohanes yama baptis raa, mamo snok mam mfo refo fo, raa byoh srau kair kʼraa mana ro Allah ybo. Raa byoh mawe masen mfot raa mana ro Allah rAit. He mfe, raa mana rAit mo mase renti. 13Tiwya Watum ro Musa msya nabi sor ro Allah ybis mama oh mi mkyas bo ro Allah mawe kʼraa. Ana oh mi mkyas bo rAit mama snok mam mfo refo. Tna Yohanes yama. 14Jõ tawe kʼanu tawe, ‘Yohanes tait Elia11:14 Maleakhi 4:5mkyas mawe meen Allah ybis nabi sait yasom Elia yama. Yawe nabi Elia yatim wia tna Tuhan yama. Feto to raa ro agama Yahudi beta nwof nabi retait yama. Ana mhar mawe Elia yama wia yatim tna Mesias yama. Nmat Lukas 1:17 ye. oh metait.’ Anu nri fe mfe a? Jõ sioh fee. 15Anu ro nri bokyas refo fo; nnaut kaket!”
16Tna Yesus yawe, “Raa ro mhau mfo refo to, mfi awya? Jõ fret bo tawe anu fo nfi kukek: Anu nnan kukek ro hre mam pasar. Ana baro mawe kʼanya mawe, 17‘Riwai anu bsom-sam mnan fi anu bkyõ bokyõ: Amu nfi oor, tna nji howes ye, afo re kbe anu nsyoh bosyoh. Menohe anu nsyoh fee! Tna fo anu sioh bsom bfi raa ro mhai, menohe anu taro hawe bo nwia hai reto! Nsom nno fyi!’ 18Yohanes yama to, ait yhau bo yait msya bo yata ye. Tibyo raa mawe, ‘Kabes mbo ait’. 19Tna jõ tama. Jõ fi, ’Ait ro Yroh Yama Yfi Raa Sai’. Jõ tama tna tno bo tfi Yohanes fee. Jõ tama to, ja thau bo tait fee. Tna tata anggur maya ye. Menohe anu nwe kair Jõ nwe, ‘Ait retait yait boit yasmamo! Ait retait raa ro ja yata anggur maya bisir yoyo! Tna yafoh wAit to, raa ro ja mno iro msya raa ro ja mno bo ro mkair sor: Raa ro moo namabyoh (pajak) mee kʼpemerintah bo ye!’ Menohe Jõ tawe kʼanu tawe, ‘Nnaut bo moof ro Yohanes ysya Jõ nno to, tna kbe anu nhar nwe Allah oh mi ybis amu bewok nma to.’”
Yesus kmo raa ro mashana fee
20Yesus yno bo ro msai mawat mam remo ro Khorazim msya remo ro Betsaida. Raa ro mhau mam remo weto mmat bo ro Ait yno. Menohe ana mashana fee. Feto to Ait kmo. 21Ait yastako ana yawe, “Anu raa ro Khorazim nsya raa ro Betsaida: Meen ayoh mroh kʼanu! Tiwya Jõ tno bo ro msai mam remo wanu weto, menohe anu nashana fee. Soh tiwya Jõ tno bo ro msai weto mam remo ro Tirus msya Sidon, maami raa ro mhau mam beto mashana iro wana bose oh. Soh ana mmat bo ro Jõ tno weto to, ana sraujin tibyo myum ratan ro mkair tna mse boh ro tafoh mam mana wana abyõ. 22Jõ tawe kʼanu tawe, ati ro Tuhan yoo safo mana ymit kʼraa to, kbe Ait ymat raa ro mhau mam remo weto tna yawe yno bo maku sai mbtek mai kʼana. Menohe anu niwana Ait tibyo bo ro kbe meen mbtek mai kʼanu to samyoh toni! 23Tna anu ro nhau mam remo ro Kapernaum nnaut nwe meen anu beta nmoʼt sawro ro Allah rAit. He mfe, kbe meen anu nmoʼt sawro ro kabes! Tiwya Jõ tno bo ro msai mam kota ranu ro Kapernaum. Mfi bo tno bo ro msai weto mam kota ro Sodom, maami raa weto mmat tna mashana fea! Tna kota reto mhau fares ye. 24Menohe Jõ tawe kʼanu tawe; ati ro Allah yoo safo mana ymit kʼraa to, bo ro meen mai kʼraa ro Sodom to, mnan-an baro ye. Menohe bo ro meen btek mai kʼanu to samyoh toni.”
Nma no kʼYesus
25Tna Yesus skabuk yawe, “Taja, Nyõ fi Tuhan ro nase. Nyõ to, nbo sawro aNyõ msya tabam refo ye. Tna Nyõ nmyõt bo aro re raa wase maja wau weto. Bo weto to, raa ro ja mhar bo to, ro mkom bo to, ana srau fee. Ana mfot fee. Menohe bo weto to, nyõ nerif kʼraa kinyah re ana mfot tna mhar. Feto to, tayoh asik mase kʼNyõ. 26Taja; Nyõ nhar bo Nyõ oh. Tna ja nno bo ro Nyõ nhaf mnan sai.”
27Tna Yesus yawe kʼraa wAit weto yawe, “Bombra beta to, Taja ysan kʼJõ tatem tbo oh. Raa wase Jõ. Taja yesait aran yhar Jõ. Tna raa wase Taja ye. Menohe Jõ tesait thar Ait. Tna raa ro Jõ tsok to, tkyas Ait kʼana weto re kbe ana mhar bi Ait ye.
28Anu taro nsom bo fanes tna hrowyõ nhai. Nma kro Jõ tna Jõ smyoh bo ro samyoh ro anu nsom weto sor. 29Nmat sas bo ro Jõ tno tna nbo nno ye. Jõ fi Raa ro thaf moof tna thaf sneh ye. Feto to, kbe nmos wanu mhau tnok ye. 30Bo ro Jõ tbis kʼanu nno to mnan-nan sai. Tna bo ro Jõ tse kʼanu nsom to samyoh fee ye.”
12Yesus ykyas ayõ ro raa ntmoh
1Ayõ ro Sabat12:1 Raa ro agama Yahudi ja skabuk Allah mam ayõ ro Sabtu. to, ja raa ro agama Yahudi ntmoh. Tna ayõ ro Sabat sau to, Yesus ysya kuber wAit mamo mfrit iti mam armato ro gandum sau. Kuber wAit mhai sre, tibyo mryoh gandum make baro mait. 2Menohe raa ro Farisi mmat feto, tibyo mawe kʼYesus mawe, “Yesus! Nmat kuber woNyõ mno bo toto sai meto a? Ana mryoh gandum make mam ayõ ro raa wanu ntmoh to. Ana mno fyi meto? Mno bo reto to, ana miwer Watum ro agama ranu oh meto!” 3Tna Yesus yawe, “Anu nsorni Bokom ro Allah fe mfe a? Bokom reto mkyas bo ro tiwya raja Daud yno. Tiwya ait ysya raa wait mhai awyah. 4Tna ait twok mam Samu ro Allah mato. Tna yoo roti ro raa msan kʼAllah. Roti reto mbau. Menohe ait yoo yait. Roti reto ja imam na mesait aran mait. Menohe ait yoo tna yee kʼraa wait mait ye. 5Ja anu nmat Watum ro Musa fefares a? Watum reto mawe ye mawe, ‘Nno bo mam ayõ ro raa ntmoh to ma.’ Menohe imam ro Allah to, ana beroh mno bo mam Samu ro Allah, menohe Allah ymat bo ro ana mno reto to, tna yawe bo reto mkair fee ye. 6Anu nhar nwe Samu ro Allah to moof tna yase ye. Menohe anu wase Ait sait ro yama yhau ysya anu. Ait retait yase toni yiwrek Samu ro Allah. 7Bokom ro Allah mawe,
‘Noo bo wanu taro nsan kʼJõ to, reto moof. Menohe jõ ksoh tawe anu natmof raa anya; reto to moof toni.’
Hosea 6:6
Allah ymat kuber woJõ to yawe bo ro ana mno reto mkair fee. Soh anu nhar Bokom reto kaket to, maami anu nkyas bo mkair mai kuber woJõ fee ye. 8Jõ fi ‘Ait ro Yroh Yama Yfi Raa Sai.’12:8 Tiwya nabi Daniel ykyas Mesias yawe ’Ait ro Yroh Yama Yfi Raa Sai’ to. (Nmat Daniel 7:13) Tna raa ro agama Yahudi weto beta mhar bokom reto. Tibyo soh ana mari he Yesus ykyas Ait yesait feto kbe ana mrok. Jõ tatak tbo ayõ ro raa ntmoh ye. Feto to, nwe kuber woJõ wefo mno bo ro mkair to ma.”
Yesus yisoh raa mam ayõ ro raa ntmoh (hari Sabat)
9Tna Yesus sikba wore weto tna yasen yamoʼt samu watum rana. 10Tna raa sait ro yatem jaro mhai huwya mam beto ye. Ana ro Farisi baro mmat sas Yesus tna saso bo mkair ro Ait yno. Tibyo ana mtu bo kʼAit mawe, “Soh raa misoh raa kiyam moof mam ayõ ro raa ntmoh to, ana miwer Watum ro Musa ykom oh meto, fe mfe a?” 11Menohe Yesus yawe si yawe, “Mfi bo anu nkin wefo sait ymat domba rait sau btek kayah. Mbtek kayah mam ayõ ro raa ntmoh to, kbe raa retait sna ykuk maut fee mfe a? 12Raa to ati, tna domba to bo ro ati fee sai. Feto to, soh raa mno bo ro moof kʼraa roto mam ayõ ro raa ntmoh to, ait yiwer Watum ro agama ranu fee.” 13Tna Yesus yawe kʼait ro yatem mhai retait yawe, “Betrot natem anyõ!” Raa retait betrot yatem rait. Tna yatem mrok moof mfi yatem jaro to ye. 14Raa ro Farisi mmat feto tibyo masen frok mamo. Mamo saim bo mawe saso iso re kbe mame Yesus yajat. 15Menohe Yesus yhar raa ro Farisi mhaf wana, tibyo Ait yirenti yamoʼt rabin roto sau.
Yesus tait Raabis ro Allah ysok
Raa msis-sas kro Ait tna Ait yisoh ana ro kiyam. Tibyo kiyam wana marak beta ye. 16Tna fo Ait yawe wa kʼana yawe ana masbrah Ait kʼraa roto ma. 17Ait yno bo weto to, afo re yno mnan si bokyas ro tiwya Allah ybis nabi Yesaya ykyas tinyi wia yawe:
18“Raabis aJõ oh mefi. Jõ thafri Ait. Ait tait Jõ thaf mnan. Kbe too Har aJõ tse kʼAit. Tna bo ro Jõ ksoh to, kbe Ait wosa kʼraa makin ro wase Jõ fares ye. 19Kbe Ait ymak ysya raa fee. Kbe Ait safuk tawyõ Ait bo fee ye. 20Kbe Ait yhaf sneh kʼraa ro ssafo fee. Ana mfi krum ro foos mfi matu wewe. Kbe Ait yno feto mamo snok mam ati ro Ait yno bo ro Jõ ksoh mkak beta. 21Mkah Ait yasom rAit to, raa ro bangsa sor kbe mhau mhaf minaut kʼAit mawe meen Ait yoo riof yee kʼana.”
Yesaya 42:1-4
Yesus ysya kabes Beelzebul
22Tna raa makah ait ro kabes mbo sait mama mo kʼYesus. Ait retait ymai marak tna yasu mboh ye. Tna Yesus yisoh ait yoof. Tibyo yrok ymai ye tna yasu maah ymat bo ye. 23Tibyo raa makin ro mros sor mam weto to, mrok ktak sai tna mawe, “Yesus fi Ku ro Daud fe mfe a? Ait ro tiwya Allah ysi rene mefi fe mfe a?” 24Menohe raa ro Farisi mari feto. Tna ana mawe kʼanya mawe, “Aha! Yesus yatak yikyak kabes sor mkah tak ro kabes Beelzebul12:24 Kabes ro yabi tait ja raa mtu yasom Beelzebul ye tna mtu yasom Iblis ye. rait. Kabes Beelzebul retait ja yase ybo kabes taro sor.” 25Menohe Yesus yhar bo ro ana mnaut reto tna yawe, “Soh raja ro rabin sait ybo raa wait, menohe ana mafa anya ai to, kbe rabin mros matak fee. Tna raa ro mhau su mam remo sau to, soh ana mafa anya ai to, kbe ana mros matak fee ye. Tna raa ro mhau mam amah sau su to, soh ana mafa anya ai to, kbe ana mros matak fee ye. 26Tna soh kabes yabi yikyak kabes wait taro to, kbe rabin ro kabes yabi yamo raja ybo to, kbe mros matak fee ye. 27Anu sioh nwe, kabes Beelzebul (Iblis) yoo yatak rait yee kʼJõ oh mi Jõ tatak tikyak kabes weto sor. Menohe raa wonyõ taro ja mikyak kabes ye. Awya oh mi yoo yatak rait yee kʼana to? Anu nwe kair raa wanu meto ye! Kbe ana kmo anu mawe, ‘Mfe, Har ro Tuhan moo matak rAu mee kʼanu mefo!’ Feto to, bo ro anu nwe kʼJõ reto to, mkair sai meto. 28Har ro Tuhan oh mi moo matak rAu mee kʼJõ. Tibyo Jõ tatak tikyak kabes frok to. Allah ybis Jõ tama tbo raa mana rAit to. Feto to, Ait ro yase ybo raa wait yhau ysya anu oh.”
29“Jõ fret bo reto u tawe, Kabes yabi yfi raa ro yatak sait. Ja raa ter-ter twok mam amah rait fee tibyo ytak bo wait fee ye. Menohe soh raa make ait yaa yatem wia saah. Tna fo raa retait ytak bo ro mhau mam amah mato reto.
30Awya ro yhaf sau ysya Jõ fee; ait retait yamo byoh tna yno bo ro mkair mai kʼJõ. Awya ro ysya Jõ yno bo woJõ su fee; ait retait sbi hri bo ro Jõ tno ye oh meto. 31Feto Jõ tawe kʼanu tawe, soh raa mno iro bawya sai to, kbe Allah yyon iro wana weto. Soh raa mamus Allah to, kbe Allah yyon iro wana weto ye. Menohe soh raa mamus Har ro Allah to, kbe Allah yyon iro wana fee yum. 32Jõ fi ’Ait ro Yroh Yama Yfi Raa Sai’. Soh raa sait yawe kair Jõ to, kbe Allah yyon iro rait reto. Menohe soh raa sait yawe kair Har ro Tuhan to, kbe Allah yyon iro rait reto fee yum. Kbe Allah yyon iro reto mam makyon refo fee, tna mam makyon ro meen mama fee ye.”
33Tna Yesus ykyas kʼraa ro Farisi weto u yawe, “Kake mara ro moof to, kbe make rau to moof ye. Tna kake mara ro mkair to, kbe make rau to mkair ye. Ja make oh mi raa mhar mara rau to. 34Anu fo raa ro ja mno bo mkair mfi aban ro mafit raa majat! Anu nhaf mato wanu to mkair. Feto fyi re kbe anu nkyas bo ro moof to? Ja raa mkyas bo mamyot si mhaf wana. 35Raa ro yhaf moof to, ja bo ro moof mbam yhaf mato rait frok. Tibyo bo ro yno to moof. Tna bo ro ykyas to moof ye. Tna awya ro yhaf mkair to, ja bo ro mkair mbam yhaf mato rait frok ye. Ait yhaf mato mkair sai. Tibyo ja yno bo ro mkair tna ykyas bo ro mkair ye. 36Tna Jõ tawe kʼanu tawe: Ati ro Allah ytu srah to, kbe raa sait sait yros betoo bo ro tiwya ait ykyas-kas to beta. 37Ati reto to, anu ro tiwya nkyas bo ro mkair-kar to, kbe safo makan reto btek mai kʼanu. Feto ye anu ro tiwya nkyas bo ro moof to, kbe safo makan reto btek mai kʼanu fee.”
Raa ro Farisi mawe Yesus yno bo ro msai
38Ati reto raa ro Farisi baro msya guru agama Yahudi baro mawe kʼYesus mawe, “Amu ksoh Nyõ nno bo ro msai sau re amu nmat.” 39Tna Yesus yawe kʼana yawe, “Anu raa mana ro mfo nhau mam tabam refo fo, anu ja nber safo tna kro Allah kaket fee wofo! Anu nwe Jõ tno bo ro msai aro re kbe anu nhar nwe Jõ tbam kʼAllah tama fe mfe a. Menohe Jõ kbe tno bo ro msai sau aran sai re anu nmat tna nhar: Kbe anu nmat bo msai ro mnan fi tiwya Allah yno mkah nabi Yunus sai. 40Tiwya Yunus yhau mam syoh ro mase sau mhaf rau ti trion tuuf. Feto ye mkah Jõ. Jõ fi ’Ait ro Yroh Yama Yfi Raa Sai’. Meen Jõ thau mam yuk ro hai ja mhau to ti trion tuuf ye. 41Ati ro meen Allah ytu srah to, raa ro tiwya tinyi mhau mam kota ro Niniwe to, kbe mrok masen ye msya anu raa mana ro mfo nhau mam tabam refo. Tna kbe ana weto mkyas bo mai kʼanu. Tiwya raa ro Niniwe mari bo ro Yunus ykyas reto. Tna ana mashana. Ait ro yhau mam befo fo, yase toni yiwrek Yunus ye. Menohe anu sor nashana fee! 42Tiwya fnya manes (ratu) sau mhau mam rabin ro ati ti wayir sau.12:42 1 Raja 10:1-10 mkyas mawe fai au mama mbam oo ro masom Syeba. Tna au mbam rabin ro fari reto masen mamo mo kʼraja Salomo mawe mari bokyas rait. Raja retait tait raa ro yhar bo toni. Mfo refo, Raa sait ro yase yiwer Salomo retait yhau ysya anu. Menohe anu hawe bo nri bokyas rAit. Feto to meen fai au reto kbe masen mmit safo kʼanu raa ro nhau mfo wefo.”
Kabes hah ye u
43Tna Yesus yawe, “Ati ro raa mikyak kabes sau frok mbam raa sait mamo to, kabes reto mamo ninya. Mamo ninya mam wore wo aya aro fee. Mawe sne hoh menohe kabes reto fri yuk ro moof aro fee. 44Tibyo kabes reto mnaut mawe, ‘Jõ tawe thah te tamoʼt yuk ajõ ro wia rof, ro tiwya jõ sikba akus.’ Tna kabes hah me snok mam yuk reto u. Tna mmat he ‘amah’ reto raa misoh moof, tna raa aro satoh mama mhau mam beto wea fee. 45Feto tna kabes reto mawe hah mamo mhau. Tna mmen mafoh na mabo trion krema mama mhau msya au ye. Kabes trion krema weto to ja mno bo ro mkair-kar toni miwer kabes ro tinyi reto. Tna ana mama twok raa retait beta ye. Tna kbe ana mno ait retait ykair toni yiwrek kair ro ait ykai tinyi wia ye. Anu raa ro mfo nhau mam tabam refo tna nno safo to, kbe anu nfi feto ye.”
Yesus yme msya yao na mama mo kʼAit
46Yesus ykyas bo kʼraa makin taro kri-kri fo, yme msya yao na mama mros mne. Ana mawe mkyas bo msya Ait. 47Tna raa sait yama yawe kʼYesus yawe, “Nme msya nao na mros ste Nyõ mne meu. Ana mawe mkyas bo msya Nyõ.” 48Menohe Yesus yawe si kʼait retait yawe, “Jõ tme to awya? Jõ tao na to awya?” 49Tna Yesus yerif kuber wAit yawe, “Ana oh mi Jõ tme msya tao na mefo. 50Taja yhau mam sawro rAit. Tna awya ro ja yno bo ro Taja ksoh to, Jõ ttu tawe tao, tano, msya tme oh meto.”
13Bofret bi sait furere benih mam armato rait
1Tna fo Yesus sikba amah reto tna yamoʼt maru maam. 2Raa msis-sas mama hre mur mtan kʼAit. Ait ymat feto, tibyo yasen yamo yaut hre mam wiak mato. Tna raa msis-sas weto ana mros sai mam aya maam. 3Tna Yesus ykyas bo mawat kʼana mkah bofret yawe, “Raa sait yno armato rait sau. Tna ait yamo furere bobat manaf (benih). 4Ait furere bo to, bo manaf taro mbtek mam iso. Tibyo bo manaf weto to, ruu mama mame mkak. 5Tna taro to, mbtek abyõ mam tabam ro fraa mhau wa mte. Tna mtis mame tabam kaket fee. Tibyo bobat weto moo fooh sai. 6Menohe wore wo ayõ mo maut mafit to, bobat weto hroyoh. Mtis mo mame tabam kaket fee, tibyo samer. 7Tna taro naut mbtek ye mam wore hyoh mana. Tna hyoh mana weto mo betru kait. 8Tna taro mbtek mam tabam ro mamos. Tna mo maut. Tibyo make sarer toni: Bo manaf sau-sau to, make rau trion 30. Taro to, make rau trion 60 ye. Tna taro to, make rau trion 100 ye.” 9Tna Yesus yawe, “Anu ro nri bokyas refo fo; nnaut kaket!”
10Tibyo kuber wAit mama mtu bo kʼAit mawe, “Nyõ nkyas bo mkah bofret kʼana nno fyi?” 11Tna Yesus yawe si kʼana yawe, “Raa mana ro Allah yamo Raja ybo to, maja wau baro to, raa wase fares. Raa ro ja hawe mari Jõ to, ja Jõ tkyas mkah bofret sai kʼana. Menohe Allah ksoh re anu nsrau nfot maja wau weto. 12Awya ro yawe yari tna ybo yno bo ro Allah yawe to, kbe Allah yoo bohar taro naut yiryõ kʼait ye. Kbe Allah yno re ait retait yasu maah. Tibyo kbe ait yhar bo ro Allah mawat. Menohe awya ro yari tna hawe yse mam yhaf kaket to, kbe Allah yno re bohar rait to mabuf sai. 13,14Ana ro hawe mari Jõ to, ja Jõ tkyas bofret kʼana sai. Ana to raa ro Allah tiwya ybis nabi Yesaya ykyas tna ykom matim yawe,
‘Raa kbe mmat sas bo refo. Ana mmat sas menohe wase bo reto fares. Ana kbe mari bo refo. Ana mari, menohe srau fee ye. Ana mari yoyo, he mfe. Ana mmat sas bo yoyo, he mfe ye. 15Ana mhaf matak. Tna mimara mtuk sai. Ana masu mboh tibyo mmat bo fee. Ana hawe bo mashana hah me mama mo kʼJõ afo re tisoh ana tno ana masu mmat bo, re kbe mimara mari bo, tna re ana moo Watum aJõ mse mam mhaf wana.’”
Yesaya 6:9-10
16Tna Yesus yawe kuber wAit yawe, “Tuhan yno re anu nsu maah nmat bo. Tna Ait yno nimara wanu moof nri bo kaket ye. Feto to kbe anu nhau simaut mase. 17Jõ tawe kʼanu tawe: Tiwya nabi na mama mkyas bo ro Allah. Ana weto msya raa ro ja mno bo ro Allah ksoh to, ana mawat ksoh mawe mhar bo refo. Ana ksoh toni mawe kbe mmat bo ro anu nmat wefo ye, he mfe. Tna ana mhaf miyoh mari bo ro anu nri wefo ye, he mfe ye.
18Nri; Jõ betoo bofret raa ro furere bo manaf (benih) mam armato rait to, tkyas mabo rau mefo: 19‘Bo manaf’ reto to bokyas ro mkyas wore wo Allah yamo Raja tna ybo raa wAit. Tna ‘bokyas’ reto ro btek mam iso to, mabo rau mefo. Bokyas reto raa taro mari, he mfe. Ana weto mfot bokyas reto kaket fee. Mari menohe kabes yabi (Iblis) yama tna safto bokyas mbam kʼana mhaf wana. 20Tna tkyas bo manaf ro mbtek abyõ mam tabam ro fraa mhau wa mte: ‘Bo manaf’ weto to, mkyas raa ro mari Bokyas ro Allah si fo, simaut mase. 21Menohe Bokyas reto ana moo mse mhau mam mhaf mato wana waor sai. Ana mbo matak fee. Raa roto mmat bosmot wana tna sikowah ana. Feto tibyo ana mbtek mawe, tna smot Tuhan u fee. Ana weto taro to, bo ro samyoh mama mai kʼana to, tibyo ana mbtek mawe, tna smot Tuhan u fee ye. 22‘Bo manaf’ ro mbtek mam wore hyoh mana to, mkyas raa ro mari Bokyas ro Allah ye. Menohe ana mhau to, mnaut yyi. Tna ana mnaut bosatoh ro moof mam tabam refo sai. Tna ana nksoh mhau moof bana mam tabam refo sai. Bo weto moo ana mhaf re ana mnaut Bokyas ro Allah fee. Tibyo bosmot wana matak fee. Ana tufrok make aro fee ye. 23Tna tkyas bo manaf ro mbtek mam tabam ro mamos. Ana weto mari Bokyas ro Allah reto, tna mse kʼana mhaf. Tna tis rau to, kbe make mawat: Taro make rau trion 100. Tna taro make rau trion 60. Tna taro make rau trion 30.”
Bofret ro bosafom moo srioh gandum
24Tna Yesus ykyas bofret sau naut u yawe, “Allah yamo Raja ybo raa mana rAit to. Ait yfi bi sait yamo furere benihgandum ro moof mam armato rait. 25Tna ti sau raa mjin beta fares to, ait ro yamo byoh sait yama. Ait yama furere bibit bosafom srioh benihgandum ro riwai bi ait ro armato rait furere wia. Ait ro byoh retait furere bibit bosafom tna ysam yamo bait yarak. 26Gandum reto mo tna mse saker. Tna sryan bi yabi retait, baro mamo mmat armato rait reto. Ana mmat he gandum reto bosafom mo srioh ye. 27Tna ana mama mawe kʼait mawe, ‘Bi yabi; tiwya nyõ furere benihgandum ro moof mesait aran no? Menohe bosafom mo ye! Bosafom ro mo srioh ye reu mbam hayo meu?’ 28Bi ait yawe, ‘Byoh sait yama yno meto!’ Tna sryan wait mtu kʼait mawe, ‘Fyi, amu nmo nfit bosafom weu beak fe mfe a?’ 29Menohe bi ait yawe wa yawe, ‘Mfe, nmo nfit ma! Kbe anu nfit sre mkah gandum taro u srot kro ye. 30Betau bosafom reto mhau moo srioh gandum su. Tna ati ro gandum manes tna raa saraf to, kbe jõ tawe kʼraa ro saraf to tawe, “Nakrao bosafom kehamit nse mam wo sau ngkaat wia afo kbe raa mkah. Tna fo nsok gandum nse hayah. Tna nwia gandum nmo nbu mam amah ro jõ siwyan mkah bo tbu bo mafer sor to.”’”
Bo manaf (benih) ro maku
31Tna Yesus ykyas bofret kʼana u yawe, “Kbe Allah yamo Raja tna ybo raa mana rait. Reto mnan fi bo manaf (benih) ro maku sau. Bi sait yoo bo manaf reto yamo furere mam armato rait. 32Bo manaf reto, maku koweh syok. Bo manaf roto taro to, makan rau to mase baro ye. Menohe bo manaf ro maku reto mo tna mrok mase miwrek bosafom roto taro sor. Tna mo maut mfi ara bo feto ye. Tibyo ruu mama tafat abyõ mam ara reto kre ye.”
33Tna Yesus ykyas bofret roto sau kʼana naut yawe, “Raa mana ro Allah yamo Raja ybo to, mnan ragi. Tna fai sau moo ragi kebet baro, sryoh msya tepung mawat. Feto kbe adonan reto mrok mtar mase beta.”
34Yesus ykyas bo weto beta kʼraa msis-sas weto mkah bofret sai. Ja ykyas bo roto kʼana fee. 35Ait yno feto afo re yno bo mnan si bo ro tiwya Allah ybis nabi sait yama ykyas tinyi wia yawe,
“Kbe Jõ tkyas bo mkah bofret. Bo refo ja raa wase. Tii oh oh, mam wore wo Allah yfen tabam refo, mamo snok mam mfo refo to, ja raa wase. Menohe Jõ tama tasbrer bo weto.”
Mazmur 78:2
Yesus betoo bofret ro gandum
36Yesus sikba raa msis-sas weto tna yamo twok mam amah. Tna kuber wAit mama mtu bo kʼAit mawe, “Sik betoo bofret ro gandum riwai Nyõ nkyas kʼamu.” 37Tna Ait yawe si kʼana yawe, “Raa ro furere benih gandum ro moof tait ’Ait ro Yroh Yama Yfi Raa Sai’. Jõ fi Ait oh mefi. 38Tna armato reto mkyas tabam refo. Tna benihgandum weto, mkyas mawe raa mana ro Allah rait, mam wore wo Ait yamo Raja ybo ana. Tna bibit ro bosafom weto mkyas mawe raa ro kabes yabi (Iblis) ybo mamo raa wAit. 39Tna ait ro furere bibit ro bosafom tait mkyas mawe kabes yabi (Iblis). Tna ati ro raa saraf to, mkyas mawe tabam refo makyon sboh rau. Tna ana ro saraf to, mkyas mawe malaikat.40,41Tna bosafom ro raa khamit mkah mait tafoh to, mkyas mawe raa ro kro kabes yabi. Meen ati ro tabam refo sboh rau to, ’Ait ro Yroh Yama Yfi Raa Sai’ kbe ybis malaikat wAit mama. Jõ oh mi Ait ro ybis malaikat weto mama mefi. Ana mama tna moo raa ro mno bo mkair-kar msya raa ro misti re raa roto mno iro ye to. Malaikat weto kbe tufrok raa ro mkair weto mbam raa mana rAit. Moo ana weto mse hayah. 42Kbe malaikat mawah ana weto beta beak mamo mait mam tafoh ro mait warah toni. Tna mam beto to, meen ana mkai bo ro mkair-kar tibyo mawia kanasyah ye. 43Tna raa ro mno bo ro Allah ksoh to, Ait yamo ana Maja rana. Kbe ana mhau mam raa mana ro Ait yamo Raja ybo. Kbe Allah fayir ana moof kaket. Fayir ana mfi bo ja Ait fayir ayõ ro moo maut rabu to. Anu ro nri bokyas reto to; nnaut kaket!”
Bo ro mabyoh maut toni
44“Raa baro tomer mamo raa mana ro Allah yamo Raja ybo to. Bo moof ati meto. Reto mfi kta ro mabyoh maut. Tiwya raa mabah saa kta reto mam armato sau te. Kta reto mhau makus mmyõt bau sai. Tna raa sait ykah armato reto tna ykai kta reto. Menohe ait ye yabah saa mam kya u. Tibyo simaut mase yamo tna yasim bo manhai wait beta. Ait yoo mabyoh rau to, tna yate tabam reto. Tibyo yoo kta ro mabyoh maut reto kʼait.
45Raa mamo raa mana ro Allah yamo Raja ybo to, bo moof ati. Reto mfi raa ro ja yasim bo yoyo sait. Ait yamo saso haban mutiara ro moof baro. 46Tna ait ykai haban mutiara ro mabyoh maut toni sau. Tibyo ait hah ye yamo yasim bo manhai wait beta ska. Tna ait yoo mabyoh rau tna fo hah ye yama yoo haban mutiara reto.”
Bofret jala
47“Tkyas oon ro Allah meen yamo Raja ybo raa mana rAit mabu rau. Mabu rau to, mfi jala sau ro maboh. Raa beak jala mam maru tna mfot syoh aro rau-rau. 48Syoh mami jala reto matot tna raa tubat jala makah maut mamoʼt mne. Tna hre skur syoh weto tna mse aro hayah-hayah. Ro ja raa mabo to, ana msok mse mam keranjang. Tna ro ja raa mabo fee, ana beak mam aya makus. 49Meen makyon ro tabam refo sboh rau to, malaikat kbe mno feto ye. Meen malaikat msok raa ro ja mno bo ro Allah ksoh to, mse hayah. Feto ye raa ro ja mno bo mkair-kar to, malaikat msok tna mse hayah ye. 50Tna fo malaikat mawah ana weto beak mam tafoh ro mait warah toni. Ana weto kbe mkai bo ro mkair-kar tibyo mawia kanasyah mam beto.”
51Yesus betoo maja rau kuber wAit mkak tna ytu kʼana yawe, “Anu srau nnaut tna nhar bo ro Jõ tkyas weto oh fe mfefares a?” Tna ana mawe, “Ae, amu nhar oh.” 52Tna Yesus yawe, “Bokyas ro mkyas raa mana ro Allah yamo Raja ybo to, soh guru agama mfot to, ana weto mfi bobot ro ja srak mse kta ro tna msya ro bose ye.”
Raa remo ro Yesus rAit hawe bo smot Ait
53Yesus ykyas bofret weto mkak tna Ait yasen sikba yuk reto. 54Ait hah ye yamoʼt remo rAit. Tna Ait watum bo mam samu watum rana. Raa ro mari bo ro Ait ykyas weto mrok ktak mawe, “Ait tait raa sei sai yfi anu ye mefo. Awya ro oh mi ykyas watum weu kʼAit u ee? Tna awya yoo yatak rait yee re Ait yno bo ro msai weto? 55Ait yaja tait raa ro ja yfen ara a? Tna yme fai Maria, tna yao na sor: Yakobus, Yusuf, Simon, tna msya Yudas fe mfe a? 56Tna Ait yano na beta mhau mam remo ranu refo ye. Ait fri bo yase reu mbam kʼawya yatak meu?” 57Ana hawe mari bo ro Ait ykyas. Tna Yesus yawe, “Nabi ro Allah ybis yama to, ja raa mari ait mam woyõ-woya yamo sai. Menohe mam remo rait yesait to, ja raa hawe mari ait. Tna raa ro amah rait to, hawe bo mari ye.” 58Ana smot Ait fee. Feto tibyo Ait yno bo ro msai mawat mam remo rAit fee.
14Herodes yame Yohanes yajat
1Ati reto to, raja Herodes ro ybo provinsi ro Galilea tait, yari bo msai ro Yesus yno. 2Tibyo Herodes yawe kʼraa wait yawe, “Yesus fi Yohanes Pembaptis ro tiwya yhai tna yrok yasen oh! Reto oh mi Yesus yatak yno bo ro msai weto to.” 3-4Tiwya raja Herodes ytak fnya ro yao Filipus rait. Fai au masom Herodias. Yohanes yari feto, tibyo yastako raja Herodes yawe yber safo oh meto. Tibyo raja Herodes kmo Yohanes tna ybis raa wait mamo mfot Yohanes make. Mfot ait tna makah mamo mbu mam bui mato. 5Tna raja Herodes yawe yame Yohanes yajat, menohe raa makin mhar mawe Yohanes tait nabi ro Allah ybis yama. Tibyo Herodes waa yame Yohanes yajat. 6Tna ati reto to, raja Herodes yakyõ hwiat rait ro tiwya yme mabe ait. Ana makyõ bokyõ reto to, ku ano ro fai Herodias rau masen smar. Ymat feto tibyo ksoh. 7Tibyo ait yasen yawe, “Ayoh, bo bawya sai ro nyõ nayoh to, kbe jõ too tee kʼnyõ tu oh.” 8Tibyo fai Herodias, masen misbyõ ku rau tna ku rau mawe, “Jõ tayoh raa mamo mame Yohanes Pembaptis yajat. Sbi yana tna masyõ ait yana abyõ mam baki sau, moo mama mee kʼjõ.” 9Raja Herodes yari feto, tibyo ynaut yyi. Menohe riwai ait ysi bo kawi oh. Yafoh na mari wia oh no, tibyo ait ye yabe u fee. Tna ait yno bo ro ku au mawe sai. 10Ait ybis raa sbe sait yamo mam bui tna ktan Yohanes yana. 11Tna raa sbe retait yoo Yohanes yana yse abyõ mam baki, yasyõ yakah yama yee ku au reto. Tna ku au reto makah mamo mee kʼmme mmat ye. 12Tna kuber ro Yohanes wait mama moo ajat ro Yohanes makah mamo sama. Tna ana mamo mkyas bo reto kʼYesus.
Yesus yoo boit yee kʼraa sme mabo 5000 mait
13Yesus yari feto, tibyo Ait yaut wiak yamoʼt oo ro mimon. Menohe raa makin msis-sas mari bo Ait yamo feto. Tibyo ana mbam remo wana sor to, mamo iso mne twat maryõt Ait ye. 14Yesus yamo snok mam maru maam jaro, tna Ait ymat he raa msis-sas mros wea. Tibyo Ait yatmof ana tna yisoh ana ro kiyam sor afo re kiyam wana marak.
15Hreha reto kuber wAit mama mo kʼAit mawe, “Yuk refo fo riamo. Mti oh. Nbis raa wefo masen mamo rof re kbe ana saso boit ro mait aro. Kbe ana mamo saso mam remo ro mhau kene mam wefo sor.” 16Menohe Yesus yawe si kʼana yawe, “Ana mhau sai, mamo ma. Anu nesait noo boit aro nee kʼana mait.” 17Tna ana mawe, “Amu nse roti trion maat msya syoh mana ewok aran sai fo.” 18Tna Yesus yawe, “Nkah bo weto nma nee kʼJõ.” 19Tna Yesus ybis raa msis-sas weto hre mte beta. Tna Yesus yoo roti trion maat msya syoh mana ewok reto ybo. Tna heyut mam ayoh yayoh asik mase kʼAllah. Tna Ait haber roti weto tna yee kuber wAit yawe ana saim kʼraa ro hre weto. 20Raa weto moo mait tna mhaf matu beta. Menohe roti mabuf taro to msis mhau fares. Kuber ro Yesus wAit soo roti weto tna mfau mam keranjang trion 12 matot. 21Ana ro mait boit mam ayõ reto to, raa sme mabo trion 5000. Raa ntuu fnya msya kukek ro mait to ye fee.
Yesus yata yamo abyõ mam aya mata
22Ana mno bo weto mkak si fo, Yesus ybis kuber wAit maut wiak matim wea maru maam ati jaro. Ait yawe yesait yhau tna ybis raa msis-sas weto mamo bana. 23Ait ybis ana mamo, tna mti knu-knu fo, Ait yesait aran yaut faut mana sau yamo skabuk. 24Wiak ro kuber wAit maut fo, mamo susai mam aya masuf oh. Tna foos mfi mam ati ro ana miin mamo fo mama. Tibyo figyõm mai wiak rana. 25Tna mam wore ayõ ro tuuf bo feto, Yesus yata abyõ mam aya mata yama yo kʼana. 26Kuber wAit mmat feto, tibyo mrok waa. Tna ana mwohrarar mawe, “Bo mnat anu!” 27Menohe Yesus yawe kʼana yawe, “Knar oh, waa ma! Jõ mefi!” 28Tna Petrus yawe kʼAit yawe, “Soh Nyõ Yesus metait mi, nbis jõ tata abyõ mam aya mata tama to kʼNyõ ye.” 29Tna Yesus yawe kʼait yawe, “Ae, nama oh.” Tibyo Petrus yroh ybam wiak, tna yata abyõ mam aya mata yamo yo kʼYesus. 30Petrus yata mam aya mata abyõ yamo, menohe yari foos mfi tna yrok waa. Ait waa yawe yno sruf mam aya oh. Tna ytu kʼYesus yawe, “Tuhan; natmof jõ, fe kbe jõ tsu fo.” 31Tibyo Yesus ybo Petrus yatem yayõ. Tna fo yastako Petrus yawe, “Nyõ smot Jõ kaket fee! Smot Jõ kaket!” 32Ana mbewok maut mam wiak rana si fo, foos mrok mnem. 33Tna kuber wAit ro mhau mam wiak mato sor maka smot Ait tna mawe, “Nyõ Ku ro Allah yare tu oh!”
Yesus yisoh raa ro kiyam mam Genesaret
34Ana mamo snok mam aya maam jaro to, mroh mam rabin ro Genesaret. 35Tna raa ro mhau mam rabin reto mmat he Yesus yama feto. Tibyo ana frok mamo mabah kʼraa makin beta. Tibyo raa makah raa ro kiyam sor to, mama mo kʼAit ye. 36Tna ana soh-soh Ait mawe, “Amu niir ratan aNyõ makit sai mbau a?” Tna ana ro miir ratan rAit makit to, kiyam wana marak beta.
15bo mafa raa ro Yahudi
1Tna raa ro Farisi msya guru agama Yahudi baro mbam Yerusalem mama mo kʼYesus. Tna ana mtu kʼAit mawe, 2“Kuber woNyõ mno bo mkair berhasyoh bo mafa ro ja hohos wanu tii mno to, mkah bawya! Soh kuber woNyõ mait boit to, ana myon matem wia fee!” 3Menohe Yesus yawe si kʼana yawe, “Anu nesait nno bo mkair toni: Anu ja nno bo mafa ro hohos wanu, menohe anu niwana watum ro Allah oh meto. Nno fyi meto! 4Tiwya Allah yawe mam bokom rAit yawe,
‘Nmat nja msya nme na to kaket. Tna awya ro yawe kair yaja, yme bo to, kbe ait raa mame yajat tu oh.’
Ulangan 5:16
5,6Menohe anu nno bo mkair: Anu nbis raa nwe matmof maja msya mme na to ma. Anu nwe, ‘Pitis ro anu nwe noo nee kʼana to, noo nee kʼAllah shauk ana oh.’ Feto to anu kro bo mafa ro hohos na wanu kaket tibyo berhasyoh Watum ro Allah oh meto. 7Anu fo raa ro sioh anu sai! Tiwya Allah ybis nabi Yesaya ykyas anu ykom yawe anu nmo wan-wan sai. Mabo oh! Bokom reto mawe,
8‘Raa mana refo mbaut Jõ mkah masoh mabyõ sai. Menohe ana mhaf wana to hayah sai. 9Ana maka smot Jõ mati sai. Tna watum ro ana mbo reto to watum ro mbam raa sai meto, mbam kʼJõ fee.’”
Yesaya 29:13
10Yesus ytu raa msis-sas mama, tna ykyas bo kʼana yawe, “Nri bo ro Jõ tkyas kʼanu tna srau nnaut kaket: 11Raa ro Farisi ja mmat sas bo ro raa mait. Menohe boit ro ana mait reto mamoʼt mhaf mato wana sai. Boit aro mno wa iranya raa msya Allah to fee. Menohe Allah ymat sas bokyas mkair ro frok mbam raa mhaf mato. Bokyas weto oh mi mno wa iranya raa msya Allah to.”
12Tna fo kuber wAit mama kʼAit mawe, “Bi yabi, bo ro Nyõ nkyas to, raa ro Farisi mari tna ana kmo meu.” 13Menohe Yesus yawe si kʼana yawe, “Jõ Taja yhau mam sawro rAit. Tna ja yso bo ro moof mam armato rAit sai. Mfi bo Ait ykah bo mam armato rAit to, kbe Ait yatu bosafom ro mkair to beak. Yatu mkah mtis ye. ⌞Tna raa ro Farisi mnan fi bosafom ro mkair reto.⌟ 14Nri bo raa ro Farisi mkyas to ma. Ana to mfi guru ro ja masu mboh. Mfi bo guru ro yasu mboh sait, yawe yerif iso kʼait ro yasu mboh roto sait. Kbe ana mbewok mamo sre tna btek mam kayah mato.”
15Tna Petrus ytu si kʼYesus yawe, “Sik ne betoo bo ro Nyõ nkyas mkah fret reto kʼamu wia.” 16Tna Yesus yawe kʼana yawe, “Anu wase bofret reto maja rau fares a? 17Bo ro raa mait mam masoh to, kbe mroh beta mamoʼt mhaf. Tna kbe haberek mamo syõ. Tna raa mamo msyõ mam sutet makus agus. 18Menohe soh raa mhaf mkair to, kbe bokyas mkair frok mbam raa masoh. Tna bokyas reto oh mi mno raa weto mkair. 19Raa ro mhaf mato mkair to, ja mnaut-nat bo ro mkair-kar, mame ajat, wyahte raa, mjah bo kbik-kbak, tna msyõf bo. Ana sioh raa anya, tna mamus raa anya ye. Bo weto beta to, frok mbam kʼraa mhaf mato ro mkair oh meto. 20Bo weto oh mi mno wa iranya raa msya Allah to. Menohe soh raa myon matem kaket fee tna mait bo to, Allah yawe bo reto to bo ati fee. Allah yawe raa ro mno bo feto to raa ro mkair to fee.”
Bosmot fai au ro Kanaan
21Tna Yesus sikba yuk reto yamoʼt rabin ro Tirus msya Sidon. 22Tna fai au ro Kanaan sau mbam rabin reto mama mo kʼYesus. Fai au mtu kʼAit mawe, “Yesus; Ku ro Daud yare, natmof jõ. Ku ano ajõ kabes mbo tibyo ku au mafa kiyam ro msai toni.” 23Menohe Yesus shait bait sai. Tna kuber wAit mawe kʼAit mawe, “Fai au mmai wer sai. Nbis fai au reto frok mamo.” 24Tna Yesus yawe kʼfai au yawe, “Soh raa ro kmot domba marak to, kbe domba mamo tit. Raa ro Israel15:24 Som Israel, Ibrani, Yahudi, msya Yehuda to, masom trion jiit weto mkyas raa mana sau; ja mnan anya sai. Raa ro Ibrani to masom raa mana wana. Hohos wana sait yasom Israel. Feto kbe ti aro-aro raa mkyas raa mana reto mawe ’raa ro Israel’. (Ait retait yasom Yakub ye.) Ana mkyas mai sau; masom Ibrani ye. Ti aro to raa mkyas mawe raa ro ’Yahudi’. Som reto mkyas raa mana weto ye, tna mkyas agama wana ye. mfi domba ro mamo tit. Jõ Taja ybis Jõ tama to kʼraa ro Israel mesait aran sai. Tna nyõ fo, fnya ro Israel fee.” 25Menohe fai au reto mama kene kʼAit tna maka smot Ait. Tna soh-soh mawe, “Tuhan natmof jõ.” 26Menohe Yesus yisboh si kʼfai au yawe, “Ja raa moo boit mee kukek wana mait mhaf matu. Raa moo boit ro kukek mait reto to, beak mtah mait fee!” 27Tibyo fai au mawe, “Tuhan; feto saah oh. Menohe makyõ-aka ro btek mbam ambar ro tuan mait to, ja mtah mait ye oh.” 28Feto tibyo Yesus yawe kʼfai au yawe, “Bosmot anyõ matak toni. Bo ro nyõ nayoh to, mabo mamyot bo ro nyõ nhaf ksoh oh.” Mam weto si fo, ku ro ano rau mrok moof.
Yesus yisoh raa mawat ro kiyam
29Yesus sikba yuk reto, tna yamoʼt maru maam ro Galilea. Tna Ait yaut yamoʼt faut sau tna susu hre. 30Tna raa msis-sas mama mo kʼAit. Ana makah raa ro maa maka, raa ro maa ssafo fee, raa ro masu mboh, raa ro mmai marak tna msya raa ro mafa bo roto taro sor to, mawat mama ye. Tna Yesus yisoh ana tibyo mrok moof beta. 31Ana ro mmai marak to mrok mmai. Ana ro maa maka to maa wana mrok ntrot. Ana ro maa ssafo fee, maa wana mrok matak tibyo mber mamo ye. Tna ana ro masu mboh to, masu mrok maah tna mmat bo ye. Raa msis-sas mmat bo ro Yesus yno feto, tibyo mrok ktak sai, tna mbaut Allah ro Israel ye.
Yesus yoo boit yee kʼraa sme mabo 4000 mait
32Tna Yesus ytu kuber wAit mama tna yawe, “Jõ tatmof raa msis-sas wefo. Ana mama mhau msya Jõ ti trion tuuf oh. Tna mfo wefo boit wana mkak ye oh. Soh Jõ tbis ana mkah hai sre hah me mamo to, kbe ana mhai awyah sne fefa mam iso maka.” 33Tibyo kuber ro Yesus wAit mawe, “Fyi re anu bkai boit mnan mam yuk ro mimon refo? Raa ro mawe mait bo fo msis.” 34Tna Yesus ytu kʼana yawe, “Anu nse roti jya meto?” Tna ana mawe, “Amu nse roti trion krema msya syoh kinyah baro sai mefo.” 35Tna Ait ybis raa msis-sas weto hre mte beta. 36Tna fo Yesus yoo roti krema reto msya syoh kinyah weto to, ybo tna yayoh asik mawat kʼAllah. Tna fo Ait haber roti weto ftah aro rau yee kuber wAit mbo saim kʼraa msis-sas weto beta. 37Raa msis-sas weto mait tna mhaf matu beta. Tna roti msya syoh ro mhau fares to, kuber ro Yesus wAit soo mawah mfau mam keranjang trion krema matot. 38Raa sme ro mait bo to mabo 4000. Tna raa ntuu fnya msya kukek ro mait boit weto ye fee. 39Yesus ybis raa msis-sas reto masen mamo bana, tna ait yaut wiak sau yamoʼt rabin ro Magadan.
16Raa ro Farisi msya raa ro Saduki mayoh mawe Yesus yno bo ro msai
1Tna raa ro Farisi msya raa ro Saduki baro mama mo kʼYesus. Tna ana sanet Ait: Ana mayoh mawe Ait yno bo msai aro re kbe ana mmat. Mmat tibyo ana mhar mawe Ait ybam kʼAllah yama fe mfe a. 2Menohe Yesus yisboh si kʼana yawe, “Soh anu nmat ayõ twok hreha tna nmat iri majit to, anu nhar nwe, ‘Kbe menrabu arin moof.’ 3Tna rabu momo to, soh anu nmat ayoh ngknu tna mkek ye to, anu nhar nwe, ‘Rere arin mkair.’ Anu ja nmat sas ayoh to, tna nhar nwe kbe oom mais. Tna nhar nwe kbe hwyõm. Anu nmat sas bombra ro Jõ tno sor ye. Menohe anu srau nnaut fee. 4Anu raa mana ro mfo nhau mam tabam refo fo, anu ja nber safo tna kro Allah kaket fee! Anu nwe Jõ tno bo ro msai aro re kbe anu nhar nwe Jõ tbam kʼAllah tama fe mfe a. Menohe Jõ kbe tno bo msai sau aran sai re anu nmat tna nhar: Meen anu nmat bo msai sau ro mnan fi tiwya Allah yno mkah nabi Yunus sai.” Yesus ykyas bo weto mkak si fo, yasen sikba ana yamo.
Ragi raa ro Farisi msya Saduki
5Yesus ysya kuber wAit mamo snok mam maru maam jaro. Kuber wAit sorni roti ro kbe ana mait to akus. 6Tna Yesus yawe wa kuber wAit yawe, “Kaket anu mkah ragi raa ro Farisi msya Saduki.”7Kuber wAit mari feto, tibyo mkyas kʼanya mawe, “Anu sorni roti ro kbe biit, au oh mi Yesus ykyas feto to.” 8Menohe Yesus yhar bo ro ana mkyas kʼanya feto. Tibyo Ait yastako ana yawe, “Anu smot Jõ kaket fee! Roti wanu marak to, nnaut nkyas nno fyi? 9Anu wase Jõ tatak aJõ fares a? Anu sorni bo ro anu nmat oh fe mfe a? Tiwya anu nmat roti maat ro Jõ too saim kʼraa mabo trion 5000 mait to fe mfe a? Tna anu soo ro ntari mhau to, nfau keranjang ja meto? 10Tna taa anu nmat bo Jõ too roti krema tee kʼraa mabo 4000 mait to, tna ro ntari mhau to, anu soo nfau keranjang ja ye meto? 11Riwai Jõ tawe, ‘Kaket anu mkah ragi raa ro Farisi msya Saduki.’ Reto to Jõ tawe bofret sai meto. Roti ro raa mait oh mi Jõ tawe meto fee.” 12Yesus yawe bo feto, tibyo ana mfot mawe Ait yawe wa ana afo re ana kaket ana mkah ragi ro roti meto fee. Menohe Ait yawe wa ana yawe kaket ana mkah bo watum raa ro Farisi msya Saduki.
Petrus yawe Yesus tait Mesias
13Ana mamo snok mam rabin ro kene mam kota ro Kaisarea Filipi. Tna Ait ytu bo kuber wAit yawe, “Raa mkyas mawe ’Ait ro Yroh Yama Yfi Raa Sai’ tait, awya?” 14Kuber wAit mawe, “Ana taro mawe kʼamu mawe, Nyõ fi Yohanes ro ja baptis raa. Tna taro mawe, Nyõ fi nabi Elia. Tna taro mawe, Nyõ fi nabi Yeremia soh mfe to, nabi ro Allah ybis roto sait.” 15Tna Yesus ytu kʼana yawe, “Bonaut ranu nesait nwe to Jõ fi awya?” 16Simon Petrus yasen yawe, “Allah ro yaam tait, Nyõ fi Ku ro Ait yare. Nyõ fi Mesias16:16 Som reto to “Ait ro Allah ysok tna yawe yamo Raja.” Mai ro Ibrani mawe Mesias, tna mai ro Yunani raa mawe Kristus.!” 17Tna Yesus yawe, “Simon, ku ro Yunus yare: Raa oh mi besi kʼnyõ re nkyas meto fee. Taja oh mi besi kʼnyõ re nkyas feto. Kbe nyõ nhau simaut mase. 18Nyõ nfi fraa nes ro mros yum. Bosmot anyõ matak to. Kbe Jõ sgi raa mana woJõ abyõ kʼnyõ. Feto kbe nyõ nkyas watum aJõ kʼana. Tna kbe ana smot Jõ tibyo mamo raa mana woJõ ye. Kbe ana matak toni tibyo Kabes Yabi ytai yno ana btek bo fee ye. 19Kbe Jõ tbis nyõ nitrah mato re kbe raa mama truk mamo raa mana ro Allah yamo Raja ybo ye. Tna kbe bo ro Allah yawe mkair to, kbe nyõ nawe bo weto mkair mam tabam refo ye. Tna kbe bo ro Allah yawe moof to, kbe nyõ nawe bo weto moof mam tabam refo ye.” 20Tna Yesus yawe wa kuber wAit yawe, “Nkyas kʼraa nwe Jõ fi Mesias to ma.”
Yesus ykyas bo samyoh ro meen btek mai kʼAit
21Tna maban ati reto ⌞mamo snok mam mabo rau⌟ to, Yesus ykyas bo kuber wAit yawe, “Tako hawe sai, kbe Jõ tamoʼt Yerusalem. Tna mam beto to, kbe Jõ tkai bo ro samyoh mawat btek mai kʼJõ. Bo ro samyoh weto to, mbam kʼraa manes ro agama Yahudi: Raa mabi wana msya imam manes wana, tna msya guru agama wana ye. Jõ kbe raa mame tajat. Tna ti ro tuuf to, Taja yno Jõ trok tasen.” 22Petrus yari bo ro Yesus ykyas feto, tibyo ykuk Yesus yamo kait kʼait yajoh jaro. Tna Petrus yastako Yesus yawe, “Tuhan; kbe Allah yatmof Nyõ tu oh. Bo samyoh reto kbe btek mai kʼNyõ fee saut.” 23Menohe Yesus haberek bhah Petrus yawe, “Petrus, namo fari tno. Nyõ nkyas bo ro kabes yabi (Iblis) ykyas meto! Nyõ nno wa Jõ to ma. Bo ro nyõ nkyas reto to, bonaut ro mbam kʼAllah fee. Bonaut reto to, mbam kʼraa sai meto.”
24Tna Yesus yawe kuber wAit yawe, “Awya sai ro ksoh kro Jõ to, yako hawe sai kbe yno mfi fefo: Kbe yno bo rait u ma. Tna kbe ait yasom ara warok rait ye: Au oh mi yako hawe sai ait beroh yasom bo mase ro kbe mama mai kʼait. Tna beroh kro iso ro Jõ terif kʼait. 25Raa taro mawe misoh metsu rana ai mam tabam refo. Ana saso riof rana mam tabam refo sai ai, menohe mnaut mamos rana fee. Meen ana weto mhau hame wajin fee. Menohe raa taro ja saso riof rana ai mam tabam refo fee. Ana mawe mno bo woJõ. Ana saso Jõ tasom aJõ mam tabam refo. Ana weto oh mi kbe mkai riof. Ana kbe meen raa mame majat oto, menohe meen ana mkai riof ro hame wajin. 26Mfi bo raa sait ykai kta mam tabam refo to beta, menohe ykai riof ro mase fee. Meen mafer rau to bawya? Ait ynaut yawe riof ro mase to, ja raa kwiyat mkah kta wana weto a? 27Jõ fi ’Ait ro Yroh Yama Yfi Raa Sai’. Meen Jõ tama u to, Jõ takah bo yase ro Taja ye. Tna malaikat wAit sor tayun Jõ mama ye. Tna kbe Jõ too boren raa sait-sait tna taren ana. Taren raa to, tno mamyot bo ro ana mno beta. Oon reto to kene oh. 28Nri oh! Meen ‘Ait Ro Yroh Yama Yfi Raa Sai’ ye yama u. Yama u to, kbe yamo Raja ybo raa wAit. Ati ro Ait yama u to, anu wore siret mam wefo fo, meen anu baro nhau fares nmat Ait yama to. Ati reto to, nhai beta marak fefares.”
17Yesus yetsu haberek
1Ti trion ntamam firwas tna Yesus yakah Petrus, Yakobus ysya Yohanes ro Yakobus yao to, yamo. Ana maut mamoʼt atu ro miyõ sau. Ana mesait mamo kar mam yuk reto. 2Tibyo Yesus yetsu haberek mam wore ana mros weto. Yasu ynaif to, mrok mawyah mfi ayõ. Tna ratan ro yyum to, mamo mboh fyok ye. 3Tna ana mmat raa mabo ewok frok tubor mros msya Yesus. Ana mbewok weto to Musa ysya Elia. 4Tna Petrus yawe kʼYesus yawe, “Guru; amu ye nhau mam yuk refo to moof toni. Soh Nyõ ksoh meto mi, kbe jõ ttor sbyah trion tuuf mam yuk refo: Sau kʼNyõ, sau kʼMusa, tna sau kʼElia ye.” 5Petrus ykyas bo kri-kri fares fo, byõ ro mboh fyok mama mroh sro-sro ana kait. Tna ana mari Raa sait ymai mam byõ mato yawe, “Ait refi Ku aJõ ro Jõ tksoh. Ait tait Jõ thaf mnan. Nri bo kʼAit!” 6Kuber wAit mabo tuuf reto mari feto tibyo ana mrok waa toni tna maka mabum mam tabam. 7Menohe Yesus yama yatem yiir ana, tna yawe, “Waa ma. Nsen nros oh.” 8Ana mari tna misbat mana mmat menohe Yesus yesait aran sai. Musa ysya Elia marak.
9Ana mroh mbam atu reto to, Yesus ysi bo kʼana. Ysi yawe, “Bo ro riwai anu nmat to, nkyas kʼraa roto to ma. Nhau sai mamo snok mam wore wo Jõ trok tasen wia. Jõ fi ’Ait ro Yroh Yama Yfi Raa Sai’.” 10Tna ana mtu bo kʼAit mawe, “Fyi re guru agama wanu ro Yahudi mawe, ‘Meen Elia yama wia tna fo Mesias yama yrof to?’” 11Yesus yawe, “Ae, Elia meen yama yisoh bombra sor wia. 12Jõ tawe kʼanu tawe, Elia tiwya yama oh. Menohe raa mhar ait fee. Tna raa sikowah ait mamyot ksoh rana sai. Tna meen ana mno bo mkair feto mai kʼJõ ye. Jõ fi ’Ait ro Yroh Yama Yfi Raa Sai’.” 13Tibyo kuber wAit srau mawe, “Ait ykyas Elia to, Ait ykyas Yohanes ro ja baptis raa oh meto.”
Yesus yisoh ku ro kiyam ruu mber sait
14Wore wo Yesus ysya kuber wAit mabo tuuf hah me mama to, ana mkai raa msis-sas ro siret wea mam yuk reto. Tna bi sait yama yo kʼYesus, tna yjit yimna mam tabam tna soh-soh Ait yawe, 15“Tuhan; natmof ku ajõ! Ait tait, kiyam ro ruu mber reu msai toni. Ti aro to, kiyam reto mno ait ytek ybe mam tafoh. Tna ti taro to, btek mam aya ye. 16Jõ takah ait tamo tee kuber woNyõ. Menohe ana matak misoh ait yoof fee.” 17Yesus yawe, “Anu wefo mfe saut! Anu wefo raa ro wyahte Allah, tna smot Jõ fee! Kbe thau tsya anu kait fares a? Jõ thaf sneh tsya anu kait ye fee oh!” Tna Yesus yawe kʼbi retait yawe, “Nbo ku retait nakah nama!” 18Ana makah ku retait mama tna Yesus yikyak kabes ro mbo ku refi frok mamo. Tna mam weto si fo, ku retait yrok yoof.
19Yesus yno bo weto mkak tna kuber wAit mama mo kʼAit yesait. Tna ana mtu kʼYesus mawe, “Bo bawya mno re amu ntak nikyak kabes reto frok fee?” 20Menohe Yesus yawe, “Bosmot wanu matak fee. Soh bosmot wanu maku sai, mnan fi makan (biji) ro maku sai to, kbe anu nwe kʼatu rno nwe susu mamoʼt tno. Nwe feto tna kbe atu reto susu mamo tu oh. Tna soh bosmot wanu mase mfi feto to, kbe anu ntak nno bo bawya sai ye. [ 21Menohe kiyam ro kabes mnan feto to, ja raa mikyak sai fee. Raa skabuk tna mhau bo mait wia, re kbe mikyak kabes reto frok.”]
Yesus ykyas bo mkair ro kbe mai kʼAit
22Ati sau to, Yesus ysya kuber wAit mhau su mam provinsi ro Galilea. Tna Yesus yawe kʼana yawe, “Jõ fi ’Ait ro Yroh Yama Yfi Raa Sai’. Tna kbe raa mfot Jõ tna msan kʼraa roto mbo. 23Tna ana mame Jõ tajat. Tna ti ro tuuf to, kbe Taja yno Jõ trok tasen.” Ait ykyas bo weto, tibyo kuber wAit sraujin toni.
Yesus yoo pajak Samu ro Allah yee
24Yesus ysya kuber wAit mamo snok mam remo ro Kapernaum. Tna raa ro ja moo namabyoh (pajak) mkah misoh Samu ro Allah mama mo kʼPetrus. Ana mtu kʼait mawe, “Bi Guru ranu ja yoo pitis ro namabyoh Samu ro Allah yee, fee mfe a?” 25Tna Petrus yawe, “Ae, bi Ait yoo yee.” Tna Petrus yamoʼt amah. Ait twok mam amah si fo, Yesus huwya yawe kʼait wia yawe, “Simon; raa ro mase mam tabam refo ja yoo pitis ro namabyoh. Nyõ nnaut fyi? Ja ana moo pitis reto mbam kʼawya? Mbam raa kinyah ro rabin rana tna msya raa ro srim ye fe mfe a?” 26Tna Petrus yawe, “Ana moo pitis raa ro srim.” Tna Yesus yawe, “Feto to, raa kinyah ro ana mbo to, moo pitis ro namabyoh mee fee. Feto to, anu ro Allah ybo fo, anu boo namabyoh ro samu rAit to bee fyi? 27Menohe Jõ hawe bo ana kmo anu. Feto to, nasen namoʼt aya tna tawer syoh. Tna syoh ro nyõ nayo tinyi to, kbe nyõ nkai pitis mauf mam syoh reto masoh. Tna noo pitis weto namo nee mkah namabyoh wanu mbewok.”
18Awya ro yase mam raa mana ro Allah yamo Raja ybo
1Ati reto kuber ro Yesus wAit mama mo kʼAit tna mtu kʼAit mawe, “Awya ro oh mi yase mam raa mana ro Allah yamo Raja ybo to?” 2Tibyo Yesus ytu ku maku sau mama mros susai tna yawe, 3“Haberek nmo nfi ku maku refo. Soh mfe to, kbe anu nmo raa ro Allah ybo mam raa mana rAit to fee ye. 4Awya ro yhaf sneh tna bonaut rait haberek yfi ku maku refo to, ait kbe yase mam raa mana ro Allah yamo Raja ybo ye. 5Jõ ksoh anu nitrah nhaf wanu kʼraa ro mhaf sneh. Awya ro yitrah yhaf rait ku refo, ro yno feto mam Jõ tasom aJõ to, ait yno bo moof oh meto. Au oh mi; awya ro mmat raa ro mhaf sneh to, yno feto to mnan anya mfi ait yno bo ro moof reto kʼJõ ye oh meto.”
Raa ro misti re raa roto mno iro
6,7“Mam tabam refo fo, bo aro rau tko re raa mno iro. Bo weto mhau bau oh. Tibyo meen Allah yno bo ro samyoh btek mai tabam refo to. Menohe raa ro yisti re ku maku ro smot Jõ sau mno iro to, soh ait ysu mam aya yhai to, moof miwer bo ro meen Allah yno mai kʼait retait! Mfi bo raa moo fraa ro mase sau tna make mam yamyum rait tna mbeak ait mam aya sawan, tibyo ysu to, bo reto to moof miwer bo samyoh toni ro meen ait ykai. Tuhan kmo toni raa ro misti re raa roto mno iro to.
8Tna soh anu ntem soh mfe naa jaro misti re anu nno iro to, sbi ntem msya naa reto noo beak makus. Anu nhau nsya Allah nkah ntem msya naa jaro sai to, reto bo ro moof. Menohe soh anu nhau nkah ntem ewok soh mfe naa ewok ro misti re nno iro to, bo ro mkair. Meen Allah yoo anu beak niit mam tafoh ro roon reto. 9Feto ye soh anu nsu jaro misti re anu nno iro to, tufrok nsu makan reto beak makus. Anu nhau nsya Allah nkah nsu jaro mesait aran sai to, reto bo moof. Menohe soh anu nhau nkah nsu ewok ro misti re nno iro to, bo ro mkair. Meen Allah yoo anu beak niit mam tafoh ro rabin kair reto.
10Feto ye, niwana ku kinyah wefi sait ma. Malaikat ro ja mhau msya Allah sor to, ja kmot ana ye. [ 11Ait ro Yroh Yama Yfi Raa sai yama mkah bo yoo riof yee kʼraa ro mamo tit.]”
Bofret domba ro marak
12“Anu nnaut fyi? Mfi bo raa sait ysia domba wait mana trion 100. Tna domba weto mana sau marak. Kbe bi ait retait yno bawya? Kbe ait yasen yamo saso domba ro marak reto fe mfe a? Kbe ait sikba domba mana trion 99 reto agus mam faut mana. Tna ait yamo saso domba ro marak reto fea! 13Soh ait ykai domba ro marak reto to, kbe ait simaut mase. Menohe domba mana 99 ro mhau mam faut mana to, ait simaut mase fee. 14Anu Nja ranu ro yhau mam sawro rAit to, Ait hawe bo raa kinyah wAit sait yarak feto ye.”
Soh raa wanu sait yno iro to, iso ro nisoh oh mefo
15Yesus yawe kuber wAit yawe, “Soh raa wanu sait yno iro to, namo no kʼait tna betoo iro reto kʼait. Nkyas mam wore anu mbewok aran sai. Nkyas mam wore raa makin mmat ma. Tna soh ait yari bo ro nyõ nkyas reto to, ait retait ye yiranya u oh meto. 16Menohe soh ait yari bo ro nyõ nkyas fee; namo nmen raa mabo sait atau ewok bo feto msya nyõ nmo no kʼait. Tna hre nkyas bo reto su. Watum ro Tuhan mawe,
‘Nko hawe sai raa mabo ewok, soh mfe tuuf mama tna hre su: Raa mabo ewok, soh mfe tuuf ro mesait mmat bo reto to, ntu ana mama. Tna ana weto kbe hre mkyas bo ro ana mmat. Soh ana beta mmat bo mnan anya, mawe raa retait yno bo ro mkair reto, feto tna fo raa moo srah mmit kʼraa retait.’
Ulangan 19:15
17Tna soh ait hawe yari bo ro anu nwe to, nmo nkyas bo reto nsya jemaat. Nkyas bo reto nsya raa ro ja msya anu skabuk su. Tna soh ait hawe yari bo ro anu beta nkyas to, niranya nsya ait ma. Nmat ait yfi raa ro wase Allah. Nmat ait yfi raa ro ja mno bo mkair-kar mnan fi ana ro ja moo namabyoh (pajak). 18Jõ tawe kʼanu tawe: Bo ro Allah yawe mkair to, nwe mkair mam tabam refo ye. Tna bo ro Allah yawe moof to, nwe moof mam tabam refo ye. 19Tna Jõ tawe kʼanu ye tawe: Soh anu ro smot Jõ nbo ewok ntu srah bawya sai su, tna anu nrok srau sau nwe srah reto mabo tna nkyas kʼTaja ro yhau mam sawro rAit to, kbe Ait yawe srah reto mabo ye. 20Wore raa woJõ mabo ewok atau tuuf siret su re mtu srah mari to, kbe Jõ siret tsya ana mam weto ye.”
Nhaf mkair ma
21Tna Petrus yama yo kʼYesus tna ytu bo kʼAit yawe, “Tuhan; soh raa wanu sait yno bo ro mkair mai kʼjõ mun aro rau-rau to, kbe jõ te tfot yatem u muhrin jya bo feto? Muhrin krema fe mfe a?” 22Menohe Yesus yawe, “Mfe; muhrin krema sai fee, muhrin trion 490 bo feto.
23Allah yamo Raja ybo raa mana rAit to, mnan fi raja sait. Raja retait yawe ykyas pitis ro tiwya sryan wait mhe kʼait. 24Raja retait ykyas bomhaam ysya sryan wait kri-kri to, raa wait makah sryan ro bomhaam wait sait naut mama. Sryan retait tiwya yhe pitis ro bofyah mase toni. 25Menohe ait ytai yisroh bofyah wefo fee. Tibyo raja retait ybis raa mfot sryan retait ysya yfain, kukek wait, tna moo kta wait beta mamo masim afo re moo mabyoh rau to misroh bofyah wait. 26Menohe sryan retait yabum soh-soh raja retait yawe, ‘Bi yabi, natmof jõ! Nhau rere baro wia tna kbe tisroh pitis wonyõ beta.’ 27Raja retait yari feto, tibyo yatmof sryan retait tna yawe bofyah weto makus rof. Tna raja retait bitsre sryan retait yamo bait ye.
28Menohe sryan retait frok yamo tna ykai sryan roto sait ro tiwya yhe pitis bofyah kebet baro kʼait. Tna sryan ro riwai raja bitsre retait, yfot sryan roto refi bekon tna yastako yawe, ‘Nisroh pitis ro tiwya nyõ nhe kʼjõ to, fooh!’ 29Menohe sryan roto refi yabum soh-soh ait yawe, ‘Nhau rere baro wia tna kbe jõ tisroh tu oh!’ 30Menohe sryan retait hawe bo yari bo ro sryan roto refi yawe. Tibyo yfot sryan refi yamo ybu mam bui mamo snok mam wore meen ait yisroh bofyah wait wia tna fo frok.
31Sryan roto taro mmat feto, mnaut mawe mkair toni. Tibyo ana mamo mkyas bo ro sryan retait yno reto kʼraja rana. 32Raja retait yari feto to, yrok kmo. Tibyo ait ytu sryan retait yama tna yawe, ‘Nyõ nno bo mkair toni! Taa nyõ soh-soh jõ, tibyo jõ tawe nyõ nisroh bofyah wojõ fee, makus sai rof. 33Rau ro moof to, nyõ natmof raa retait mfi bo tii jõ tatmof nyõ!’ 34Tna raja retait kmo sryan retait, tibyo ybis raa wait mfot ait makah mamo mbu mam bui. Yhau mam beto tna raa sikowah ait mamo snok mam wore meen ait yisroh bomhaam wait beta wia tna fo frok.”
35Feto tna Yesus yawe, “Soh raa mno bo mkair mai kʼanu to, kmo ait ma. Nhaf mkair ma. Ne nhaf moof u. Soh anu nno feto fee, meen Taja ro yhau mam sawro rAit to, kbe yno bo ro mkair mai kʼanu sait-sait mfi raja retait yno to ye.”
19Raa ro moo fnya menohe mako makus
1Yesus ykyas bo weto mkak. Tna Ait sikba provinsi ro Galilea. Tna yasen yamoʼt provinsi ro Yudea. Yamoʼt aya ro Yordan maam jaro. 2Raa msis-sas mama kro Ait. Tna Ait yisoh raa wana ro kiyam ye. 3Tna raa ro Farisi baro mama mo kʼAit. Tna mtu bo sanet Ait mawe, “Mfi bo fnya sau mno bo ro mkair aro fee; menohe au maa yako au makus sai. Soh ait yno feto to, ait yiwrek Watum ro Musa ykom oh meto fe mfe a?” 4Menohe Yesus yawe, “Anu wase Bokom ro Allah. Bokom rAit reto mkyas mawe:
‘Maban tiwya tinyi to, Allah yfen raa sme tna yfen fnya ye. 5Feto to, ku ro sme kbe sikba yaja ysya yme na tna yamo ysya yfain rait mhau su. Kbe ana mbewok mjin su, bonaut rana sau, mhaf rana sau, tna bewok mno bo wana su ye.’
Kejadian 2:24
6Feto ana to, raa mabo ewok u fee. Ana haberek mfi raa sait aran sai. Tna raa sme msya fnya ro Allah yse mrat su to, raa sait bo ye betwat ma.” 7Menohe raa ro Farisi me mtu kʼAit mawe, “Musa ybis yawe, soh raa sait yako yfain rait makus to, ait ykom aam ro mako au makus. Ykom tna yee kʼau wia, tna ait yako au. Bokyas aNyõ hayah tna Watum ro Musa to hayah ye. Nyõ nawe fyi meto?” 8Menohe Yesus yawe, “Allah hawe raa sait yako yfain rait. Menohe anu ja hawe nri Watum ro Allah. Tibyo Musa ykom watum reto. 9Nri bo refo wia: Awya ro yfain wyahte ait fee, menohe ait yako au makus sai, tna yoo fnya ro mabyõ to, ait retait ywyahte oh meto.” 10Tna kuber ro Yesus wAit mawe, “Soh feto to, ro moof to raa moo fnya ma.” 11Menohe Yesus yawe, “Bo ro anu nwe reto, Raa beta srau fee. Allah ykyas feto kʼraa taro re ana mse bokyas reto mam ana mhaf wana. 12Raa sme taro moo fnya fee. Ana taro to, tiwya fnya mabe to, metsu rana mkair. Ana kbe mjin msya fnya matak fee. Tna taro to, raa roto taro misti ana tibyo moo fnya fee. Tna taro to, mesait mawe mhau bana sai. Allah yamo Raja ybo ana oh. Tibyo ana mawe mhau bana sai afo re mrero mari bo ro Allah ybis ana. Mari tna kbe masen mamo mno sai. Awya ro yatak yari watum refo to yari oh.”
Yesus ksoh ku mkek
13Tna raa baro makah kukek wana mama mo kʼYesus. Ana mama re kbe Ait yse yatem abyõ kukek wana tna skabuk ana. Kuber ro Yesus wAit mmat feto, tna ana mastako raa weto. 14Menohe Yesus ymat feto, tibyo bhah kuber wAit. Bhah ana yawe, “Nitsre ku kinyah weto mama mo kʼJõ. Nwe wa ana to ma! Raa ro mama mo kʼJõ mfi kukek wefo fo, mhaf wana to, Allah ksoh. Ana oh mi mamo raa mana ro Allah yamo Raja ybo to.” 15Tna Yesus yse yatem abyõ kukek wana weto tna yasen yamo renti naut.
Raa ro mnaut kta yoyo to, meen mkai mamos mae fee
16Ati sau to, bi sait yama yo kʼYesus tna ytu yawe, “Guru; kbe jõ tno bawya ro moof re kbe meen Allah yno jõ thau hame wajin?” 17Tna Yesus yawe kʼait yawe, “Fyi re nyõ ntu bo bawya ro moof kʼJõ to? Ja Raa sait aran yoof. Soh nyõ nawe nhau hame wajin to, nari watum ntraa ro tiwya Allah ybis Musa ykom to, nbo nno.” 18Menohe bi retait ytu bo kʼAit yawe, “Watum ryo meto?” Tna Yesus yawe,
“‘Nme ajat ma! Nwyah ma! Nsyõf bo to ma! Siroyõ ma! 19Nmat nja msya nme na to kaket! Tna nhafri raa ro mhau kene msya anu to ye. Nhafri ana mnan fi anu nhafri netsu wanu nesait ai to.’”
Ulangan 5:16-20; Imamat 19:18
20Tna bi ait refi yawe, “Bo weto ja jõ tno beta oh. Bawya sai ro mhau fares?” 21Tna Yesus yawe, “Soh nyõ nawe nno bo ro moof toni to, nno bo sau naut. Namo nasim kta wonyõ beta. Tna nsaim pitis weto kʼraa ro bo marak. Soh nno bo reto to, nyõ name kta mam sawro ro Allah oh meto. Tna fo nama nkro Jõ.” 22Bobot retait yari bo ro Yesus yawe feto, tibyo hah ye yamo to sraujin toni.
23Tna Yesus yawe kuber wAit yawe, “Raa ro bobot masen mamo raa ro Allah yamo Raja ybo to, min toni. 24Kak unta maboh sau kbe mamo twok mam sii hren soo to, mnan-nan baro ye. Menohe raa ro bobot yamo raa ro Allah yamo Raja ybo to bo ro min toni.” 25Kuber wAit mari feto, tibyo mrok ktak mawe, “Soh feto to, raa awya meen ykai riof?” 26Yesus yasu ymat ana tna yawe, “Anu raa to, nesait ntai nno riof kʼanu fee. Menohe Allah yno riof kʼanu saah. Ait ytai yno bo bawya sai.”
Allah yoo boren yee kʼraa ro kro Yesus
27Tna Petrus yawe, “Amu wefo nsen sikba bombra wanu beta afo re nma kro Nyõ oh. Tna kbe amu nkai bo bawya?” 28Tna Yesus yawe, “Nri oh! Jõ fi ’Ait ro Yroh Yama Yfi Raa Sai’. Meen tabam refo kbe haberek mamo bo ro tna. Ati reto to, kbe Jõ hre mam ambar (tahta) ro mase toni. Kbe Jõ hre abyõ tbo raa woJõ. Tna mam weto ye to, anu nbo 12 fo, kbe hre mam ambar ro mase trion 12 ye. Kbe anu ntu srah kʼraa mana 12 ro Israel to, nri ye. 29Tna Jõ tisti re raa taro sikba amah wana afo re kro Jõ. Taro to sikba mao na, mano na, maja msya mme na, kukek wana afo re kbe ana kro Jõ. Taro sikba armato wana bo to makus ye. Kbe ana beta mkai bo weto u muhrin trion 100. Tna meen ana mkai roon ro hame ye. 30Menohe raa mawat ro mfo refo masom wana matim wia to, meen masom haberek mee mamo tis. Tna ana ro mfo refo masom mhau tis to, meen masom haberek matim wia.”
20Bi yabi yaren raa ro misoh armato ro anggur rait
1“Allah yamo Raja ybo raa mana rAit to, mfi bi yabi sait frok rabu momo yamo saso raa baro. Yawe raa mama misoh armato ro anggur rait. Ana mkah bo rait tna ait yoo boren yaren ana. 2Ait ykai raa baro tna ykyas boren mabyoh jya kbe ait yaren ana. Ana mkyas bo su. Tna ait yawe kbe ana mno bo wait mamo snok hreha tna ait yaren pitis dinar mauf sau kʼana. Tna ybis ana mamo mkah bo mam armato rait. 3Tna baas ayõ moo maa matak bo feto to, bi ait retait frok yamo tna fri raa mabo baro mhau baas sai mam pasar.4Tibyo ait yawe kʼana yawe, ‘Nmo nisoh armato ro anggur ajõ. Tna kbe jõ too boren mnan si taren anu.’ Ana mari feto, masen mamo misoh ye. 5Tna mam wore baas ayõ mros susai bo feto, ait frok yamo u. Ait fri raa baro mhau baas sai. Tna ykyas bo ysya ana, yawe mnan anya sai. Tna mam wore hreha ayõ hawer bo feto, ait frok yamo yno bo feto naut u ye. 6Tna mam wore ayõ frut bo feto ye, ait frok yamo fri raa roto taro naut. Tna ytu kʼana yawe, ‘Riwai anu nhau baas sai nno fyi?’ 7Menohe ana mawe kʼait mawe, ‘Raa aro mbis amu nkah bo rait fee.’ Tibyo bi ait yawe, ‘Feto to, nmo nkah bo mam armato anggur ajõ.’ 8Kene mam wore arin mti bo feto, tna bi yabi ro armato rait ybis aban mana ro ybo raa ro misoh armato rait yawe, ‘Namo ntu raa ro mkah bo mam armato ajõ to. Nawe ana mama re nyõ naren ana sait-sait. Naren raa ro mama mtis wia. Tna naren raa ro mama hreha. Tna naren ana ro matim rabu.’ 9Ana ro mkah bo weto mama tna ait yaren ana ro mama mrof wore ayõ mfrut fo wia. Ait yaren ana sait-sait mkah pitis dinar mauf sau. 10Raa ro matim rabu mkah bo to, mmat feto tna mnaut mawe kbe ana raa maren boren mase miwrek ana ro mama mam tis to. Menohe mfe. Aban mana retait yaren ana mkah pitis dinar mauf sau aran sai ye. 11Ana moo boren wana tna ntbur mawe, ‘Bi ro armato anggur retait yaren bo kaket fee sai a? 12Amu ro ntim rabu nkah bo wia ayõ mafit nhai to. Menohe boren ro ait yaren amu mnan anya sai mfi boren ro ait yaren kʼana ro mama mam tis! Yno fyi meto? Ana weto mkah bo ayõ sau aran sai!’ 13Menohe bi yabi retait yawe kʼana wetait sait yawe, ‘Tao; kmo ma. Jõ tno bo ro mkair aro mai kʼnyõ fee. Riwai anu bkyas bo su bwe anu nkah bo ti ro miyõ sau to, kbe jõ taren anu pitis dinar mauf sau no? 14Noo boren wonyõ tna namo oh. Jõ ksoh taren ana ro mama mam tis ye mnan anya mfi boren ro jõ taren kʼnyõ to ye. 15Nyõ nawe jõ tno bo manhai wojõ mkah jõ ksoh ajõ sai to ma fe mfe a? Soh jõ thaf ase tna tatmof raa anya to, kbe nyõ nhaf mkair a?’” 16Tna Yesus yawe, “Feto ye, raa ro masom makus mtis to, meen masom haberek matim mana wia. Tna ana ro masom matim mana wia to, meen haberek masom mamo mtis mrof.”
Yesus ykyas yawe kbe Ait yajat
17Yesus yawe yamoʼt Yerusalem. Tna Ait ytu kuber wAit mesait aran mama. Tna Ait ykyas bo kʼana yawe, 18“Jõ fi ‘Ait ro Yroh Yama Yfi Raa Sai.’ Anu bmoʼt Yerusalem mefo. Mam beto to, kbe raa moo Jõ msan kʼimam manes msya guru agama ro Yahudi. Tna kbe ana mtu srah mari tibyo mawe safo makan btek mai kʼJõ. Tna mawe raa mame Jõ tajat. 19Tibyo ana ro agama Yahudi to, kbe moo Jõ msan kʼraa ro wase Allah. Kbe ana mamus Jõ, moo too mmok-mak Jõ, tna kbe ana mame Jõ tajat mam ara warok. Tna ti ro tuuf to, kbe Taja yno Jõ trok tasen.”
Boyoh ro Yakobus ysya Yohanes mme mayoh
20Bi Zebedeus yfain msya ku wau mabo ewok mama mo kʼYesus. Tna fai au mjit mimna ntmi mam tabam, tna soh-soh Ait. 21Yesus ytu kʼfai au yawe, “Bo ro nyõ nayoh kʼJõ to bawya?” Tna fai au mawe, “Meen Nyõ namo Raja nbo raa mana aNyõ. Jõ tayoh kʼNyõ tawe, noo ku wojõ mabo ewok, nse mbewok hre msya Nyõ re ana mamo mase msya Nyõ ye. Nbis sait hre kʼNyõ mam ati ro natem ati. Tna nbis sait hre mam ati ro natem ta.” 22Menohe Yesus yawe kʼana yawe, “Anu wase bo ro anu nyoh: Fyi, kbe anu ntai nsom kair ro kbe mama mai kʼJõ fe mfe a?” Tna ana mawe, “Amu ntak ye.” 23Tna Yesus yawe, “Bo ro mai kʼJõ to, saah meen anu nsom ye oh. Menohe awya ro hre mam ati ro tatem ati msya temta to, Jõ oh mi tsok to fee. Raa ro hre mam yuk reto to, meen Taja yesait ysok bo rAit oh.” 24Kuber wAit mabo nsaa taro mari bo reto, tibyo ana mrok kmo ana mbewok ro mao kʼanya reto. 25Feto tibyo Ait ytu ana mama tna yawe kʼana yawe, “Raa ro wase Allah mam tabam refo to, anu nhar nwe raa ro mamo aban mana wana to, ja mberasi raa kinyah ro ana mbo. Tna raa mase ro mhre abyõ mam uu to, mberasi ana ro mamo aban mana weto ye. 26Menohe anu to, nno bo feto ma. Awya sai ro yawe yase kʼanu wefo to, ait yamo raabis ranu tna ait yno bo wanu ye tu oh. 27Tna awya ro yawe yatim yamo aban mana kʼanu to, ait yamo sryan tna yno bo wanu wia. 28Ynan fi Jõ fo. Jõ fi ’Ait ro Yroh Yama Yfi Raa Sai’. Jõ tama fo, tawe tbis raa mno bo woJõ fee. Menohe Jõ tama fo re tno bo kʼraa. Tna tama re too tetsu ajõ tfes raa mawat. Tibyo kbe ana mkai riof ro mase”
Yesus yisoh raa mabo ewok ro masu mboh
29Yesus ysya kuber wAit frok mbam Yerikho fo, raa msis-sas kro Ait. 30Tna raa ro masu mboh mabo ewok hre wea mam iso maam weto. Ana mari mawe Yesus yamo frit iti feto, tibyo ana masen mtu kʼAit mawe, “Tuhan; Ku ro Daud20:30 Bokom ro Allah mawe Mesias ro meen yama tait, ybam kube ro raja Daud. Raa ro agama Yahudi beta mhar bokom reto. Feto to ana mtu Mesias yasom ‘Ku ro Daud’ ye., natmof amu!” 31Raa msis-sas sor weto kmo bhah ana mbewok mawe, “Shait!” Menohe ana mbewok reto beroh mtu fari renti mawe, “Ku ro Daud, natmof amu!” 32Tna Yesus yari feto, tibyo susu yros. Yros tna ytu bo kʼana mbewok yawe, “Anu ksoh nwe Jõ tno bawya kʼanu?” 33Ana mawe si kʼAit mawe, “Tuhan; amu nksoh nmat bo ye!” 34Yesus yatmof ana tna yiir ana mbewok masu. Tibyo ana masu maah. Tna ana kro Ait mamo ye.
21Yesus twok mam Yerusalem
1Yesus ysya kuber wAit mamo mam iso ro Yerusalem fares. Tna ana snok remo ro Betfage mam Faut ro Zaitun. Tna Ait ybis kuber wAit mabo ewok matim wia. Ait yawe, 2“Ntim wia, nmoʼt remo reto. Tna twok nmo to, kbe anu nkai keledai ro ano sau msya maku rau, raa mii mros wea mam weto. Nmo skur mana ewok ye nkuk nma nee kʼJõ. 3Soh raa mtu bo kʼanu mawe, ‘Anu skur keledai weto mkah bawya?’ Nwe kʼana nwe, ‘Tuhan ybis yawe amu nma skur fo.’ Tibyo kbe raa retait bitsre anu skur nkah nma.”
4Bo reto mabo mnan si bo ro tiwya Allah ybis nabi sait yama ykyas wia yawe,
5“Nwe kʼraa ro Yerusalem mam faut ro Sion nwe, ‘Nmat Raja ranu yama yo kʼanu. Ait yhaf sneh tna Ait yaut keledai ro tna sau ye.’”
Zakharia 9:9
6Tna kuber wAit mabo ewok reto mamo mno bo mfi bo Yesus ysi kʼana feto. 7Ana skur keledai reto mkah maku rau ye mkuk makah mama. Tna raa mrus jubah wana ro myum ntom mam keledai kbor abyõ tna Yesus yaut hre abyõ. 8Raa mawat mmat he Yesus yama. Tibyo ana mrus jubah wana ro myum tna tom tar-tar anya mam iso. Tna raa taro msot ara mawyan tom mam iso iti ye. 9Raa msis-sas ro matim msya raa ro kro mamo mtis sor to simaut mawe,
“Hosana! Nyõ nase toni! Nyõ fi Ku ro Daud yare. Tuhan ybis Nyõ nama to. Anu ro nhau mam sawro ro Allah to; nbaut Ait ye.”
Mazmur 118:26
10Yesus twok mam Yerusalem tna raa ro mhau mam kota reto mrok mnin-nin. Ana mtu kʼanya mawe, “Bi awya meit ee?” 11Raa mawe, “Yasom rAit Yesus. Ait nabi ro Allah ybis sait. Ait ybam remo ro Nasaret, provinsi ro Galilea.”
Yesus twok mam Samu ro Allah
12Yesus twok mam Samu ro Allah. Ait ymat raa masim bo msya raa ro moo bo mam samu ro Allah mato reto. Ymat feto tna kmo yikyak-yak ana frok mamo. Raa taro hre masim pitis (penukar uang): Masim pitis Samu ro Allah kʼraa ro sriem. Tna raa mhre masim ruu merpati bo ye. Tna Yesus haberek-barak ambar wana ro masim bo weto. 13Tna Ait yawe kʼana yawe, “Bokom ro Allah mawe,
‘Amah aJõ to amah ro mkah bo raa skabuk. Menohe anu nma nno amah reto haberek mfi amah ro raa ro msyõf bo ja mhau sai!’”
Yesaya 56:7; Yeremia 7:11
14Tna fo raa ro masu mti msya raa ro maa maka taro sor mama mo kʼYesus mam Samu ro Allah reto. Tna Ait yisoh ana tibyo mrok moof. 15Imam manes ro agama Yahudi msya guru agama wana mros mmat bo reto ye. Ana mmat bo msai ro Ait yno ye tna mari bo kukek mbaut Ait ye mawe, “Hosana kʼNyõ, Ku ro bi Daud yare. Nyõ fi nase toni!” Raa manes ro Yahudi mmat feto, tibyo ana srau kair. 16Ana mawe kʼYesus mawe, “Nyõ nari bo ro ana mawe to, fe mfe a?” Ait yawe, “Ae, Jõ tari to. Ja anu nmat Bokom ro Allah far-far refo fefares a?
‘Kbe Nyõ nno tibyo ku mkek msya ku mees ro mait sis mbaut Nyõ ye.’”
Mazmur 8:3
17Yesus ykyas bo weto mkak tna frok sikba kota reto yamoʼt remo ro Betania tna yjin mam beto ye.
Yesus ybis yawe ara mara sau mrok samer
18Rabu ti ana hah me mamoʼt kota. Ana mamo mam iso maka iti to, Yesus yhai sre. 19Tna Ait ymat ara mara sau mros mam iso maam. Ait yamo ymat sas he make aro fee, mata rioh sai. Tibyo Yesus kmo yawe kake reto yawe, “Nyõ meen ne nake u bo fee yum!” Tibyo kake reto mrok samer. 20Kuber wAit mmat bo ro Ait yno feto, tibyo ana mrok ktak toni mawe, “Fyi sai oh mi kake reu mrok samer fooh sai u?” 21Tna Yesus yawe kʼana yawe, “Soh bosmot wanu matak tna anu nnaut maut-mroh fee; kbe anu nno bawya sai mfi Jõ tno feto ye. Tna mfi bo anu nwe kʼatu rno nwe, ‘Atu rno; natu namo nsya mam aya sawan!’ Soh anu tane fee; kbe bo reto mabo tu oh. 22Tna bo bawya sai ro anu skabuk nyoh mkah bosmot ro matak to, kbe anu nkai tu oh.”
Yesus yatak rAit mbam kʼawya
23Yesus hah ye yamo twok mam Samu ro Allah. Ait watum bo mam beto to, imam manes msya raa mabi ro Yahudi mama. Ana mama tna mtu bo kʼAit mawe, “Awya oh mi ybis Nyõ, re Nyõ nama nno bo wefo fo? Tna awya oh mi yoo yatak rait yee kʼNyõ fo?” 24,25Yesus yawe, “Feto Jõ ttu si bo sau kʼanu ye, tawe: ‘Yohanes Pembaptis tait, ait retait raabis ro Allah fe mfe a?’ Nkyas si kʼJõ wia. Tna fo kbe Jõ tkyas awya ro yoo yatak yee kʼJõ afo re Jõ tno bombra weto sor fo.” Raa manes weto mkyas kʼanya mawe, “Soh bwe Allah oh mi ybis ait to, kbe Yesus yawe, ‘Feto tna fyi re anu ntu sioh bo ro Yohanes yawe?’ 26Raa wefo mnaut mawe Yohanes tait nabi ro Allah ybis yama. Feto soh anu bwe raa sai ybis ait to, kbe raa kmo anu.” 27Feto to ana mawe kʼYesus mawe, “Amu wase ye.” Tna Yesus yawe, “Feto Jõ ye te tkyas tatak aJõ ro tno bombra wefo kʼanu fee ye.”
Bofret ro ku sme mabo ewok
28Yesus yawe, “Bonaut ranu to nwe fyi? Bi sait yabe ku sme wait mabo ewok. Bi retait yamo yo ku rait ro yabi tna ybis yawe, ‘Ku ajõ; namo nkah bo mam armato anggur ranu.’ 29Tna ku retait yawe, ‘Jõ hawe.’ Menohe tis rau ait ynaut myum-yam tibyo yasen yamo ykah bo mam armato reto. 30Tna fo bi ait yamo ybis ku sme rait ro tis feto ye. Ku retait yawe, ‘Ae, kbe jõ tamo tisoh.’ Menohe ait yamo fee. Ait yhau sai. 31Feto sik anu nwe: Ku sme mabo ewok reto to, awya ro oh mi yno bo ro yaja ybis to?” Ana mawe, “Ait ro yabi.” Tna Yesus yawe, “Feto ye, anu meen nkus mtis agus. Tna raa ro ja moo namabyoh (pajak) msya fnya ro mwyah bo to, meen ana matim wia mamo raa ro Allah yamo Raja ybo. 32Yohanes yama yerif iso ro moof kʼanu menohe anu smot ait fee. Raa ro ja moo namabyoh to, msya fnya ro mwyah bo to, ana smot Tuhan oh tna haberek mno bo ro moof ye. Anu ye nmat iso ro moof reto menohe anu nashana tna smot Ait fee.”
Bofret raa ro mkah bo mam armato ro anggur sau
33Yesus yawe kʼana yawe, “Nri bofret sau refo naut: ‘Bobot sait yyum anggur mara mawat mam tabam rait. Tna ait yame tok yur ytan. Tna ait yabah kayah sau mkah kbe raa moo anggur make mse maut mberkait tna moo maya rau to. Tna ait sgi harit sau mkah kbe raa mjin kmot armato reto ye. Ait yno bo weto mkak tna fo ybis raa baro yawe ana mkah tna kmot armato anggur rait reto wea, kwiyat kʼana. Ait yawe kbe ana moo make rau to, saim taro hayah kʼait. Tna bobot retait yasen yamoʼt oo roto. 34Ait yhau mam oo reto kait. Tna soo ro anggur mara wait weto make manes to, bobot retait ybis sryan wait hah mamoʼt tabam rait, mamo mo kʼraa ro kmot armato reto. Bobot retait ybis sryan wait yawe, “Nkyas kʼana ro kmot armato ajõ nwe ana mryoh anggur make aro moo mee kʼanu. Tna noo anggur make weto nkah nma nee kʼjõ.” 35Tna sryan weto masen mamo. Ana mamo snok mam tabam ro bobot rait reto. Menohe raa ro kmot armato reto to huwya mfot sryan weto. Ana mmuk-mak sait, tna mame sait yajat ye, tna moo fraa mai sait naut ye. 36Feto tna bobot retait ybis sryan wait roto taro mawat mamo. Menohe raa huwya sikowah ana mfi sryan ro ait ybis matim wia to ye. 37Mamo snok mam tis rau to, bobot retait ybis ku rait yesait ykah yabo yamo. Ait ynaut yawe, “Kbe ana waa ait tibyo mno bo moof kʼait to.” Tna ku ait yasen yamo. 38Menohe raa ro kmot armato anggur reto mmat he ku ait yama. Tna ana mkyas kʼanya mawe, “Ait ro meen shauk armato refo yama mefi! Ait refi yhau ma! Nma, anu bme ait yajat to, afo re meen armato refo mhau kʼanu!” 39Tibyo ana mfot ait mkuk makah mamoʼt armato mne rau tna mame ait yajat.’”
40Tna Yesus ytu yawe, “Ati ro Bobot ro armato rait retait hah yama to, kbe yno bo bawya kʼana ro kmot armato reto?” 41Ana mawe, “Ait kbe yame raa ro mno bo mkair-kar weto. Tna ysan armato anggur reto kʼraa roto taro. Tna ati ro soo ro anggur make mama to, kbe raa weto mryoh to, tna moo taro mee kʼait.” 42Tna Yesus yawe, “Ja anu nmat Bokom ro Allah to fe mfe fares a? Bokom reto mawe,
‘Raa saso fraa mawe sgi samu sau. Ana mmat fraa sau mawe mkair. Fraa reto to, ana hawe. Tibyo moo mbeak makus. Menohe ana wase bo fraa reto oh mi fraa ro ati. Tuhan oh mi yno bo reto mabo. Tna anu bnaut bwe bo reto moof toni.’
Mazmur 118:22-23
43Tna feto Jõ tawe kʼanu nbi ro Yahudi fo tawe, kbe anu ne kmot raa mana ro Allah rAit u fee. Kbe Ait yoo raa wAit ysan kʼraa roto kmot afo re kbe ana mno bo ro moof ye.
[ 44Awya ro btek yai abyõ mam fraa reto to, kbe sasyoh-sasah. Tna awya ro fraa reto btek mai to, kbe sari ye.]”
45Tna imam manes ro Yahudi msya raa ro Farisi mari bofret ro Yesus ykyas weto. Mari to, ana mhar mawe Ait ykyas bo weto mai kʼana. 46Tibyo ana saim bo mawe mfot Ait. Menohe raa makin ro mhau mam weto mnaut mawe Yesus tait nabi ro Allah ybis yama sait. Tibyo raa manes ro Yahudi weto waa bo mfot Ait mam wore raa makin mmat. Ana mnaut mawe kbe raa weto kmo ana.
22Bofret bokyõ ro raa moo fnya
1Tna Yesus fret bo u kʼana yawe, 2“Allah yamo Raja ybo raa mana rAit. Reto mfi bawya? Raja sait yakyõ bokyõ ro ku sme rait ymen fnya tna to. 3Raja retait ybis sryan wait mbo taah mamo mmen raa mama makyõ bokyõ rait. Menohe raa weto hawe. Ana mama fee. 4Feto tna raja retait ybis sryan wait roto taro yawe, ‘Nmo nwe kʼana nwe, “Bo sohmaam ro bokyõ refo jõ siwyan wea oh. Jõ ktan sapi maboh wojõ ro moof sor. Tna msya bo sohmaam roto taro to, jõ siwyan bo ye oh. Ku sme ajõ yoo fnya, feto nma anu bkyõ bokyõ tna sohmaam bo su.”’ 5Menohe raa ro ait yoo taah yee sor to, ana mama fee ye. Sait yamoʼt armato rait. Tna ana taro msui mno bo wana sai. 6Tna ana taro mfot sryan ro raja wait weto, sikowah tna mame ana majat ye. 7Raja refi yari sryan wait bo raa mame feto, tibyo ait yrok kmo toni. Tna ait ybis raa ro sbe wait mamo mame raa ro taa mame sryan wait. Tna mbis ana mkah kota rana mait ye. 8Ana mno bo weto mkak oh, tna raja retait ytu sryan wait mama. Tna yawe, ‘Bo sohmaam ro bokyõ reto amu siwyan oh, menohe raa ro taa jõ too taah tee to, mama fee. Ana weto mkair tibyo kbe ana sohmaam bo su msya jõ fee ye. 9Feto to, nsen frok nmoʼt iso krewe makin-akan sor. Tna awya sai ro anu nkai to, nmen ana beta mama sohmaam bo ro bokyõ refo.’ 10Tibyo sryan weto mamo tna mmen raa makin-akan ro ana fri mam iso sor to mama beta. Raa ro ana mmen mama to, taro raa ro moof tna taro raa ro mkair ye. Raa msis-sas weto mama tna sohmaam bo su. 11Tna raja retait yama ymat sas raa ro hre sohmaam bo su mam bokyõ reto. Ait ymat he raa sait yyum ratan rait ro mkair. Ait yyum ratan ro bokyõ fee. 12Raja ymat feto tna ytu bo kʼait retait yawe, ‘Nyõ namaʼt bokyõ ajõ menohe nyum ratan ro bokyõ to fee! Nno fyi meto?’ Ait retait yari feto menohe shait bait sai. 13Tna fo raja ybis sryan wait yawe, ‘Nmo nfot ait retait nke yaa msya yatem tna nkah beak fari mne mam wore wo mamur hto toni to. Meen raa mkai bo ro mkair-kar tibyo mawia kanasyah bo ye mam beto.’”
14Tna Yesus yawe, “Allah Ait ytu raa msis-sas mama. Menohe Ait ysok raa mabo kebet baro sai mamo raa wAit.”
Raa ro Farisi mtu bo kʼYesus re sanet Ait
15Raa ro Farisi frok mbam yuk reto tna mamo siret su. Tna saim bo mawe kbe ana mtu bo kʼYesus tna sanet Ait feto. 16Tibyo ana mbis kuber wana msya raa ro raja Herodes wait baro mamo mtu bo kʼYesus. Ana masen mamo mtu mawe, “Bi Guru; amu nhar nwe Nyõ ja sioh fee. Tna Nyõ waa raa ro manes fee ye. Nyõ beroh nkyas bokyas ro Allah kʼawya sai. Tna iso ro Allah to, ja Nyõ nerif abyõ kʼraa to, nmyõt bo fee ye. 17Feto to amu ntu bo kʼNyõ nwe: Allah ksoh yawe anu mbero namabyoh (pajak)kʼKaisar fe mfe a?” 18Menohe Yesus yhar yawe ana mhaf mkair. Tna yawe, “Anu nmo wan-wan tibyo sioh ntu bo sne mate kʼJõ to, nno fyi meto? 19Noo pitis mauf ro ja raa moo mee mkah namabyoh reto. Nee kʼJõ tmat wia.” Tna ana moo pitis dinar mauf sau mama mee kʼAit ymat. 20Tna Ait yawe, “Nmat gambar refo: Raa mkom awya yasom rait mefo?” 21Ana mawe, “Kaisar msya bokom rait meto.” Tna Yesus yawe, “Soh feto, bo bawya ro Kaisar rait to, noo nee Kaisar. Tna bo bawya ro Allah rait to, noo nee kʼAllah ye.” 22Ana mari bo ro Ait yawe feto, tibyo mrok ktak sai, tna masen sikba Ait mamo ye.
Raa ro mhai meen mrok masen fe mfe a?
23Rere to, raa ro Saduki baro mama mo kʼYesus. (Raa ro Saduki to raa ro agama Yahudi ye, menohe ana ja mnaut mawe raa ro mhai to, meen me mrok masen fee.) Ana mtu kʼAit mawe, 24“Bi Guru; tiwya Musa ykom yawe, ‘Soh raa sait yhai tna ait sano. Semit reto kbe yao kro mkah yabe ku aro mkah shauk biin ait ro yhai retait.’ 25Tna amu ntu bo kʼNyõ nwe: Mfi bo raa sme mabo ngkrema mao kʼanya mhau. Tna ro bum ymen fai sau, he ait sano tna yhai kba. Tibyo yao sait yama kro semit rana. 26Ait kro menohe yabe ku aro fee ye. Feto ye yao ro tuuf yama kro semit rana naut menohe yabe ku aro fee ye. Feto ye mnan anya sai mamo snok ro ngkrema beta. 27Ana ro mao na kʼanya mhai beta mkak. Tna fai au mhai mrof ye.” 28Tna raa ro Saduki weto mamo ti te mtu Yesus mawe, “Meen ati ro hai mrok masen to, awya yfain fai reto? Tiwya ana mabo ngkrema ye mfain fai au reto ye fe mfe a?”
29Menohe Yesus yawe, “Bonaut ranu mkair meto. Anu wase Bokom ro Allah msya Ait yatak rAit ye. 30Meen ati ro raa mrok masen to, raa moo fnya u fee tna fnya msya raa u fee ye. Malaikat sor ja moo fnya fee. Meen raa mhau sai mfi malaikat mam sawro ro Allah. 31-32Nnaut nwe Allah ykyas raa ro mhai tna meen mrok masen to yawe,
‘Jõ fi Allah ro Abraham, Ishak msya Yakub ja smot.’
Keluaran 3:6
Anu bhar bwe hohos wanu weto ro mhai ooh oh. Menohe Allah yawe feto tibyo anu bhar bwe ana mhai tibyo fee. Allah yawe ana mhau mam sawro rAit smot Ait fares to.” 33Raa msis-sas weto mari feto, tibyo ana mrok ktak bokyas ro Ait ykyas reto sai.
Watum ro ati toni
34Raa ro Farisi mari he Yesus ykyas bo kʼraa ro Saduki tna yno re ana mmai u fee. Feto to ana ro Farisi mamo mtu bo kʼYesus ye. 35Ana sait yamo guru agama Yahudi. Ait yawe sanet ytu bo kʼYesus yawe, 36“Guru; watum ryo oh mi mase toni mam Watum ro Musa to?” 37Yesus yawe,
“Nhafri Tuhan Allah ranu mkah nhaf, srau wanu beta, tna mkah bohar ranu beta ye.
Ulangan 6:5
38Watum ro tinyi msya watum ro mase ye oh meto. 39Tna watum ro ewok mnan reto ye:
‘Nhafri raa ro mhau kene msya anu to ye. Nhafri ana mnan fi anu nhafri netsu wanu nesait ai to.’
Imamat 19:18
40Watum ro tiwya Musa ysya nabi na mkom to, masmair rau to mbam watum ewok refo ye.”
Mesias tait, awya oh metait?
41Raa ro Farisi mkyas bo su wea, tna Yesus yama ytu kʼana yawe, 42“Anu nnaut Mesias22:42 Som reto to, “Ait ro Allah ysok tna yawe yamo Raja.” Mai ro Ibrani mawe Mesias, tna mai ro Yunani raa mawe Kristus. tait nwe fyi? Ait tait Ku ro bi awya yare?” Menohe ana mawe, “Mesias tait Kube ro Daud.” 43Yesus yawe, “Tiwya Har ro Tuhan misbyõ bi Daud ybis ait ykyas Mesias to, menohe ytu Ait yawe, ‘Tuan ajõ’. Tiwya Daud yawe,
44‘Tuhan yawe kʼTuan ajõ yawe, “Nama, hre nsya Jõ mam ati ro tatem ati; hroh ro mase reto. Hre wea. Tna raa ro byoh, raa ro srau kair kʼNyõ to, meen tno ana mbtek mam mte. Kbe Nyõ naa nber ana weto. Tna Nyõ nros natak abyõ, nbo ana.”’”
Mazmur 110:1
45Yesus yawe u yawe, “Tiwya Daud ytu Mesias‘Tuan rait’ to, fyi re anu nkyas nwe Mesias tait Kube ro Daud?” 46Feto tibyo raa sait bo yatak ykyas bo si kʼAit fee. Tna raa aro ter-ter mtu bo kʼYesus u fee.
23Yesus kmo raa manes ro agama Yahudi
1Yesus ykyas kʼraa makin msya kuber wAit sor yawe, 2“Guru agama Yahudi msya raa ro Farisi to, ana shauk hroh ro Musa. 3Feto to nri oh; Jõ ksoh anu nri watum rana. Tna nno bo bawya sai ro ana mbis kʼanu to. Menohe nno nfi ana ma: Ja ana mno bo ro ana mesait mkyas weto fee! 4Ana mbis anu nno bo ro samyoh. Watum rana mfi bo samyoh ro ana make tubat tna mse kʼraa roto masom. Menohe ana mesait mbet raa weto msya ana masom su fee. 5Raa ro Farisi, ana mkom Watum ro Allah baro mam ratan ro ana myum. Tna ratan ro ana myum to, betau mafyan miyõ kro mamo snok mte ye. Bo ro ana mno weto beta to, ana mawe mno afo re raa mmat tna bibi ana ye. 6Soh ana mamoʼt bokyõ to, ja ana msok ambar ro moof tna hre. Tna soh mamoʼt samu watum to, ana ksoh hre mam ambar raa ro mase ja hre. 7Ana ksoh bo raa hartu ana, mmah meen kʼana mam pasar tna mtu ana mawe, ‘Bi Guru’ to. 8Nno feto ma. Guru ranu sait aran sai. Tna anu beta to nnan anya sai. Feto to, nwe raa mtu anu ‘guru rana’ to ma. 9Tna Bja ranu tait sait aran. Ait yhau mam sawro rAit. Feto to, nwe raa ro yhau mam tabam ‘anu bja ranu’ to ma. 10Mesias yesait aran oh mi yamo aban mana ranu to. Feto to, nwe anu aro nmo aban mana bo to ma. 11Awya ro yase ybo anu to, kbe ait yamo raabis ranu tna yno bo wanu wia. 12Tna awya ro yawe, ‘Jõ fi raa ro tase.’ kbe Allah yno ait haberek yamo raabis ranu tna yno bo wanu ye. Tna awya ro kbor sneh yamo raabis ranu to, kbe Allah yno ait haberek yamo raa ro yase ye.
13Anu guru agama Yahudi nsya raa ro Farisi: Anu fo raa ro ja sioh-sah sai! Anu nmo raa ro Allah yamo Raja ybo to, fee. Tna soh raa roto mawe tomer mamo raa wAit to, anu ja nno wa. Feto to, meen kair mama mai kʼanu tu oh.
[ 14Anu guru agama nsya raa ro Farisi: Anu fo raa ro ja sioh-sah anu sai! Anu skabuk miyõ wer afo re raa mmat anu. Ana mmat feto tna mnaut mawe anu raa ro ja nno bo moof sai. Semit mnaut mawe anu raa ro ja nno bo ro moof ye menohe anu haberek sifuut ana, tna soyak amah wana no kʼanu. Feto to, meen bo ro mkair toni mama mai kʼanu tu oh.]
15Anu guru agama nsya raa ro Farisi: Anu fo raa ro sioh-sah anu sai! Anu safo triar nmo fari; anu frit sawan ye tna nmo iso mne ro miyõ mbra sor ye. Anu nmo to, nwe nno raa sait beak bosmot rait tna haberek kro bosmot ranu. Soh ait haberek tna kro agama ranu to, yamo kuber ranu to, kbe anu nber ait kaket fee. Anu nkyas watum ro mkair tibyo ait yamo yfi anu. Kbe ait raa ro sioh ait sai ye. Tis rau ykair-kar. Meen Allah yoo ait yse mam tafoh ro arin kair reto ye. Anu ja nber ait, nerif iso ro sre kʼait. Feto to meen bo ro mkair btek mai kʼanu tu oh.
16Anu fo raa ro nerif iso kʼraa roto menohe anu nesait nsu mboh! Anu nesait wase iso nmo. Anu nwe, ‘Soh raa sumpah mtom Samu ro Allah to, kbe bo sumpah reto matak fee.’ Menohe anu nwe, ‘Soh raa sumpah mtom emas ro mhau mam Samu ro Allah to, kbe bo sumpah reto matak ye.’ Anu nkyas feto tibyo meen bo ro mkair btek mai kʼanu tu oh. 17Anu fo raa ro wase bo tna nsu mboh! Bo ro moof to, au myo? Emas reto to, bo ro ati meto fee. Samu ro Allah oh mi mno re emas reto moof toni mnan si bo ro Allah rAit to. 18Tna anu nwe, ‘Awya ro sumpah ytom wohat (mezbah) ro raa msan bo kʼAllah to, bo sumpah reto matak fee. Menohe soh raa sumpah ytom kak ro raa msan abyõ mam wohat reto to, kbe kak reto make bo sumpah reto matak ye.’ 19Anu fo raa ro nsu mboh! Bo ro moof to, au miyo? Kak mesait reto bo ro ati meto fee. Menohe soh raa moo kak reto mse abyõ mam wohat tna msan kʼAllah to, wohat oh mi mno re kak reto moof mnan si re Allah ksoh to. 20Feto to, awya ro sumpah ytom wohat reto to, ait sumpah mkah bombra ro raa msan kʼAllah mam wohat abyõ ye oh meto. 21Tna awya ro sumpah ytom Samu ro Allah to, ait sumpah ytom samu reto, tna msya Allah ro yhau mam samu mato reto ye. 22Tna awya ro sumpah ytom sawro ro Allah to, ait sumpah ytom Allah ro hre abyõ tna yhau mam sawro reto ye oh.”
Raa Farisi ja miwana bo ro ati, tna mbo bo ro maku mno sai
23“Anu guru agama Yahudi nsya raa ro Farisi to: Anu fo raa ro ja sioh-sah anu sai! Anu nwe ja anu nbo Watum ro Musa kaket. Tna re ja bombra bawya sai anu noo baro nsan kʼAllah. Feto tna bo saryoh kinyah ro ja anu nyum mam armato wanu mkah bo nfiat bo ro anu sohmaam to, anu noo baro nsan kʼAllah ye: Mfi selasih,adasmanis, msya jintan bo to, ja anu noo baro nsan kʼAllah ye (persepuluhan). Bo ro maku reto anu nno. Menohe ja anu niwana bo ro ati: Anu nno bo moof kʼraa fee. Anu natmof raa fee. Tna anu smot Allah kaket fee ye. Bo ro ati weto to, anu nbo nno fee! Feto to, meen kair mama mai kʼanu tu oh. 24Anu fo nnaut nwe anu nhar iso ro Allah kaket re nerif kʼraa roto ye. He mfe. Anu fo raa ro nsu mboh! Soh anu nmat bubaa mam hawereh mato to, anu noo beak. Menohe unta maboh ro mhau mam hawereh mato to, anu nta niya u mamoʼt nhaf mato!
25Anu guru agama nsya raa ro Farisi: Anu fo raa ro ja sioh-sah anu sai! Hawereh msya piring to, anu nyon mne rau moof kaket. Menohe mato rau to, mkair fares. Anu nesait nfi feto ye. Anu to noof mne sai. Menohe nhaf mato wanu to, mkair: Ja anu nasmamo tna ntak bo raa ye. Feto to, meen kair mama mai kʼanu tu oh. 26Anu raa Farisi to, raa ro nsu mboh! Nyon hawereh marak msya piring ro anu nsyõ boit to, nyon mato moof wia. Nno feto afo re kbe mne to, moof ye.
27,28Anu guru agama nsya raa ro Farisi: Anu fo raa ro sioh-sah anu sai! Ja raa moo hai sama mam isra mato. Tna mawah cat mate isra mne rau. Mno feto tna kbe raa mmat moof toni. Menohe mato rau to, mkair: raa mtai msya afan bo mrek-rek yiis ye. Anu nesait nfi isra weto. Anu ja nno bo re kbe raa mmat tna mawe anu raa ro moof. Menohe anu nhaf mato ranu to, mkair. Feto to, meen kair mama mai kʼanu tu oh.
29Anu guru agama nsya raa ro Farisi: Anu raa ro ja sioh-sah anu sai! Meen bo ro mkair btek mai kʼanu! ⌞Tiwya Allah ybis nabi na mama. Tna hohos ranu mame nabi weto majat.⌟ Mfo refo anu ja nisoh isra ro tiwya tinyi raa sama nabi weto. Tna raa ro tiwya mno bo ro Allah ksoh to, kubur wana to, ja anu fayir moof ye. Anu nno feto to, nnaut nwe anu nno bo moof miwrek hohos wanu. 30Anu sioh anu nwe, ‘Mfi bo tiwya tinyi amu nhau ye mam wore amu hohos na mhau weto to, maami amu aro nno bo nfi ana fee. Amu nme nabi weto fee.’ 31Menohe anu nesait nwe bo ranu ai oh nwe anu fo nbam raa mana ro tiwya mame nabi na sor to. 32Feto ye, kbe anu nme raabis ro Allah wAit mnan fi anu hohos na wanu tiwya tinyi mno wia to. 33Anu fo raa ro ja nno safo yoyo! Anu nfi abboh ro ja mafit raa majat to! Fyi re anu nwe nsam nmo sikba bo mkair-kar ro meen btek mai kʼanu mam rabin ro arin kair to? 34Nri kaket: Kbe Jõ tbis nabi na woJõ, msya raa ro ja mhar bo kaket, msya guru taro ye mama mo kʼanu. Ana taro to, meen anu nme majat. Tna ana taro to, kbe anu nme majat mam ara warok ye. Tna taro to, kbe anu sikowah ana ye. Tna kbe anu nbo too nmok-mak ana mam samu watum wanu to. Meen anu nikyak raa woJõ taro nbam kota ranu tna anu saka ana msam mamo snok mam kota roto taro ye. 35Tiwya raa ro ja mno bo ro Allah ksoh to, hohos na wanu nfot ana mame. Ana oh mi maban Habel mamo snok bi Zakharia (ro bi Berekhya yare tait. Anu hohos na mame Zakharia yajat susai mam Samu ro Allah jaro tna mam wohat (mezbah) jaro si masuf.) Safo weto beta to meen anu nsom isti tu oh. 36Nri kaket; safo weto meen anu beta nsom tu oh.”
Yesus srau kero raa ro Yerusalem
37“Raa ro Yerusalem23:37 Bokom far-far trion ewok refo Yesus yawe ’Yerusalem’. Raa ro mhar Bokom ro Allah to, taro mnaut mawe Yesus ykyas raa manes ro agama Yahudi, ro ja mhau mam Yerusalem. Raa taro mnaut mawe Ait ykyas raa ro Yahudi beta. mame nabi ro Allah sor majat. Tna raa ro Allah ybis mamo mkyas bokyas rAit to, ja raa ro Yerusalem mame ana majat ye. Ana moo fraa mai raa weto tibyo majat. Muhrin aro rau-rau Jõ srau kero ana. Tawe tatmof ana tna takrao ana tse mam wo sau re kmot ana. Mfi kook mabi ro makrao maku tna maut mabum kait to ye. Menohe anu hawe ye. Feto to Jõ sraujin raa ro Yerusalem, bo ro meen mama mai kʼana: 38Allah kbe meen yatam ana ro mhau mam Yerusalem u fee. Ait sikba ana agus. 39Kbe Jõ sikba tabam refo tna anu nmat Jõ u fee. Anu nmat Jõ fee mamo snok mam ati ro tabam refo haberek. Tna ati reto meen anu nanwaruk nwe,
‘Ait yase toni! Tuhan ybis Ait yama tu oh.’”
Mazmur 118:26
24Yesus ykyas makyon sboh rau
Samu ro Allah to, meen mrok sgik
1Yesus sikba Samu ro Allah yamo. Tna kuber wAit mama mo kʼAit tna merif koot ro Samu ro Allah mros to kʼAit. 2Tna Yesus haberek yawe, “Nmat samu weto beta. Meen raa mitrah samu weto. Tna kbe tembok msya fraa sau bo mhau matak ntar-tar anya u fee. Kbe fraa weto sgik mbtek mai tabam beta.”
Bo kair ro meen btek mai kʼraa
3Yesus yaut yamo hre mam Faut ro Zaitun. Tna kuber wAit mama mkyas bo msya Ait yesait kar. Ana mtu bo kʼAit mawe, “Tija re bo ro Nyõ nkyas weto mabo to? Kbe amu nmat bo bawya re nhar nwe oon mabu ro Nyõ nama to? Tna amu nmat bo bawya re nhar nwe tabam refo kene sboh rau ye to?” 4Yesus yawe, “Kaket anu! Nno be raa mama sioh besruf anu. 5Jõ fi Mesias sait aran. Menohe meen raa mawat mama tna sruf bo mawe ana Mesias ybam kʼAllah. Kbe raa mawat mari feto tna smot raa weto. 6Kbe anu nri he raa rabin taro meanya tna mafa mnin-nin. Bo weto kbe mabo tu oh. Menohe waa ma: Bo weto kbe frok matim wia. Bo weto frok mama tna tabam refo ayõ rau ro haberek tetara fee. 7Tna raa ro bangsa sau kbe masen mame anya msya raa ro bangsa roto taro. Tna raa ro raja sait ybo kbe masen mame anya msya raa ro raja roto taro mbo ye. Tna kbe hai awyah btek mai kʼraa, tna kbe iin frok mam wore aro rau-rau ye. 8Menohe bo ro samyoh weto beta to makit rau sai fares meto. Wore wo anu nmat bo weto to, kbe anu nhar nwe oon reto mabo oh. Reto mfi fnya ro mhaf ja kborham wia, tna kbe mabe ku to. 9Anu nkro Jõ to, tibyo kbe raa mfot anu msan kʼraa sikowah tna mame anu njat ye. Tna raa bangsa ro tabam refo beta kbe knait anu. 10Ati reto to, raa mawat ro tiwya smot Jõ wia to, kbe haberek. Tna kbe ana hren ksuk kʼanya ye tna knait anya ye. 11Tna kbe raa mawat mama sioh raa mawe, ana to nabi ro Allah ybis mama mkyas bo wAit. He mfe. Bo ro ana mkyas to, kbe raa mawat mari tna kro ye. 12Bo mkair-kar ro mfo wefo raa mno sor to, mrok msai renti. Tibyo raa mawat kbe miranya kaket u fee. 13Tna awya ro bito smot Jõ matak mamo snok mam oon sboh rau to, meen ait ykai riof ro mase. 14Tna bokyas moof ro mkyas raa mana ro Allah yamo Raja ybo to, kbe raa mkyas. Mkyas kʼraa ro bangsa makin mam arin aso refo beta mari. Mari wia tna fo oon rau sboh oh meto.”
Bo mkair-kar ro meen btek mai kʼraa
15Tna Yesus yawe, “Nmat bokom refo tna kbe anu nfot bo ro Jõ tawe kʼanu: Tiwya Allah ybis nabi Daniel ykyas yawe,
‘Meen bo sau ro mkair toni mama sikowah yuk ro mbau to.’
Daniel 9:27, 11:31, 12:11
Jõ tawe kʼanu tawe, ati ro anu nmat bo reto mabo to, anu nhar nwe kene mam wore wo tabam refo haberek. Ati ro anu nmat bo reto to, 16anu ro nhau mam provinsi ro Yudea to; nsen nsam nmo nuut atu mana. 17Anu ro hre abyõ mam samu wanu kri-kri to; kbe nroh satoh bo wanu mbam amah mato nbo frok to ma! Bo weto makus rof. 18Anu ro nkah bo mam armato to; hah ne nmo noo ratan wanu ma. Nsam fooh nmo sai. 19Wore weto to, fnya ro mhaf tna msya fnya ro mee sis ku mees wana fares to, ana mmof toni. Ana kbe matak msam fooh fee. 20Skabuk nyoh Tuhan afo re meen ati ro anu nsam to, nsam mam snyi ro ja oom maah mais to ma. Tna re meen anu nsam mam ayõ ro raa ntmoh (hari Sabat) bo to ma ye. 21Meen wore weto to, arin mkair toni. Maban tiwya tinyi Allah sair tabam refo mamo snok mam mfo refo fo, raa mkai bo ro mfi feto aro fee. Tna bo ro mkair-kar mfi feto to, aro meen me btek mai kʼraa u fee. 22Oon ro samyoh reto to, oos mawe Allah yatmof raa sok wAit. Feto to yawe yisusu oon reto mabuf baro. Soh mfe to, raa sait bo meen ye yhau fee. Soh mfe to, raa beta mhai. 23,24Meen, ati reto to, raa ro mawe besruf anu to, kbe frok mama. Taro mawe ana to Mesias, he mfe. Tna taro mawe ana to nabi ro Allah ybis mama mkyas bo wAit. He mfe ye. Wore weto to ana sair bo ro hnah. Tna mno bo ro msai mawat ye. Ana mawe besruf raa beta. Ana tomer besruf raa sok ro Allah wAit ye he mfe. Feto to, soh raa sait yawe kʼanu yawe, ‘Nmat, Mesias yama mam ati rno mno!’ Soh yawe feto to, nri ait ma! Tna soh sait yawe kʼanu yawe, ‘Nmat, Mesias yama mam ati rau mau.’ Nri bo ro yawe to ma! 25Nnaut bo ro tawe kʼanu fo. Jõ tkyas bo refo kʼanu wia wore wo bo weto frok mama fefares to. 26Soh raa mawe kʼanu mawe, ‘Nmat, Mesias yama oh mam tabam ro riamo yama oh!’ Soh raa mawe feto to, nri ana ma. Nmo teto ma. Tna soh raa mawe, ‘Mesias yama yhau mam amah rno hawar jaro oh!’ Soh raa mawe feto to, nri ana ma ye. 27Ati ro ’Ait ro Yroh Yama Yfi Raa Sai’ yama to, kbe raa beta mmat tna mhar mawe Ait yama. Soh rir mrir mbukak abyõ mam ayoh to, ja raa mmat rir reto maban ati ro ayõ maut mamo snok mam ati ro ayõ twok to. Jõ te tama u to, kbe raa beta mmat tna mhar Jõ feto ye. 28Tna wore bo ro mhai mhau akus to, hofyoh yiis mhar ye oh. Tna ana mawat mama fru-fra mamo-me mam yuk reto ye.”
Ait ro Yroh Yama Yfi Raa Sai meen yama
29“Oon ro samyoh reto mkak wia, tna ayõ mrok mti mamur ye, tna snyi mrok mawyah fee ye, tna sken ro mhau abyõ mam ayoh to btek-tak ye, tna bombra ro mhau abyõ mam ayoh to mrok mnah-nah mamo mai jaro-jaro ye. 30Mam ayõ reto to, raa mmat ayoh.24:30 Daniel 7:13. Ana mmat bo tna mhar mawe, ’Ait ro Yroh Yama Yfi Raa Sai’ yama mefo. Raa bangsa beta mam tabam refo to, mmat bo reto. Mmat tibyo mrok mawyan surut ana mkak. Jõ fi ’Ait ro Yroh Yama Yfi Raa Sai’. Meen ati reto to, raa mmat Jõ tbam ayoh mboh abyõ troh tama. Tama to, raa mmat tatak aJõ msya tase aJõ ro msai ye. 31Tna saa buk-buk mawia. Feto tna Ait ybis malaikat wAit mama msok raa sok wAit moo mbam arin aso wofo beta.
32Bofret ro kake mara reto to, nnaut maja rau kaket: Soh nkre ro mo safom tna sne-sne moof to, feto to anu nhar nwe kene wore snyi ro hwyõm oh meto. 33Feto ye, soh anu nmat bo weto beta mama to, anu nhar nwe oon ro Jõ tama u to, kene oh meto. 34Nnaut: Ati ro bo wefo beta mama to, tawe biin reto to, kbe raa taro mhau fares. 35Ayoh msya tabam refo kbe saef marak. Menohe bokyas aJõ kbe meen mhau mawyõs mamo snok mam hame wajin.
36Ayõ ro Jõ tama u to, raa sait bo yhar fee. Malaikat ana wase ye. Jõ, Ku ro Allah yare fi twase ye. Taja yesait aran yhar bo rAit.”
Hre byõ-abyõ; bi Ait yama
37Tna Yesus yawe, “’Ait ro Yroh Yama Yfi Raa Sai’ meen hah ye yama. Ait hah ye yama to, kbe raa mhau mno bo wana mnan wore wo tiwya Nuh yhau: 38Tiwya mam wore aya mabo betru tabam refo fefares to, ja raa mnaut mamos wana fee. Raa mait bo sai. Tna raa msya fnya moo anya sai. Raa mno bo weto mamo snok mam ati ro Nuh twok mam wiak aken rait to. 39Ati reto raa mhau ninya sai. Tna aya mabo frok mama betru ana msu beta. Meen ati ro ’Ait ro Yroh Yama Yfi Raa Sai’ yama to, arin to, mfi feto ye. 40Ati reto to, raa mabo ewok mkah bo mam armato rana. Kbe malaikat woJõ mroh tubat sait tna sait yhau agus. 41Tna fnya mabo ewok hre mmuk gandum make to ye. Kbe malaikat woJõ mroh tubat sau tna sau mhau agus ye. 42Anu ye wase oon ro Tuhan ranu yama. Feto to, hre byõ-abyõ sai.
43Nnaut bofret refo kaket wia: Bi sait yhar yawe, ‘Mti fo, kbe raa ro ja ysyõf bo yama yitrah amah ajõ tna ysyõf bo wojõ.’ Soh ait yhar ayõ raa ro ysyõf bo retait ysaim to, kbe ait yjin fee. Yhau wan afo re raa ysyõf bo wait fee. 44’Ait ro Yroh Yama Yfi Raa Sai’ kbe meen yama u. Kbe hah yama u mam ayõ ro anu wase tna kbe nwof Ait fee. Feto to nhau siwyan Ait yoyo.”
Sryan ro yno bo kaket ysya sryan ro yno bo kaket fee
45,46Yesus yawe, “Bobot sait ysok sryan wait sait yamo aban mana ybo sryan wait roto taro. Tna ybis sryan retait yoo boit saim kʼsrian anya wait roto taro ye. Tna bobot retait yasen yamoʼt oo roto. Soh sryan retait mur-mur yno bo ro Bobot ybis to, ait tait sryan ro yhar bo. Tna ati ro bobot retait yhah ye yama to, soh ait ymat aban mana retait ja yno bo rait ro ybis kaket to, feto moof. 47Nri kaket: Kbe bobot ysok sryan ro yari bo ro ait yawe retait yse kmot bombra wait beta. 48Menohe mfi bo sryan ro yamo aban mana retait tait yhaf rait mkair. Tna ynaut yawe, ‘Bobot ajõ yarak, kbe yhah yama fooh fee.’ 49Feto tna ait yno bo ro mkair: Ait yai sryan ro kinyah taro. Tna yasmamo yait boit, yata aya ysya raa ro ja bisir-basar sai. 50Kbe bobot rait snok yama. Yama mam ayõ ro sryan ro yamo aban mana retait siwyan fee. Bobot rait snok yama tna ymat bo mkair ro sryan retait yno. 51Tibyo bobot retait kmo. Kbe ait simoyot-mayat sryan retait. Tna ybis ait yamo yhau mam yuk ro kair. Tibyo yamo yhau mam weto su ysya raa ro ja sioh ana ai to. Mam weto to, kbe raa mawia tna kanasyah ye.”
25Ku ano ro mhar bo msya ku ano ro wase bo
1⌞Yesus ksoh re raa siwyan ana mamo raa mana ro Allah yamo Raja ybo to.⌟ Tna Ait yawe kʼana yawe, “Oon ro Allah yamo Raja ybo raa mana rAit to, ⌞raa taro siwyan fee, kbe ntwok fee.⌟ Reto mfi ku ano mabo nsaa mbo pelita wana mamo mawe mtar ku sme ro siwyan yoo fnya ro tna. 2Ana ro ano mabo nsaa reto to, mabo maat mhar bo, tna mabo maat wase bo. 3Ana ro wase bo to, mbo pelita wana marak sai, minyak aro fee. 4Tna ana ro mhar bo to, mbo pelita wana, tna mbo minyak wana mkah kusia ye. 5Tna ku sme ro ana ste retait yama fee kait sai. Tibyo ana mjin maka, tna mjin tu ye. 6Tna mam wore arin masuf raa sait ytu yawe, ‘Ait ro yoo fnya retait yama oh! Nsen ntar-tar ait!’ 7Tna ku ano wefo mrok masen misoh pelita wana. 8Ku ano ro wase bo, ana mayoh kʼana ro mhar bo mawe, ‘Pelita wanu minyak marak, tna kene wore mhai! Noo minyak wanu baro nee kʼamu.’ 9Menohe ku ano ro mhar bo mawe, ‘Minyak wamu mnan amu oh. Fyi re amu noo baro nee kʼanu? Nmo no kʼraa ro masim minyak tna noo aro kʼanu!’ 10Ku ano ro wase bo weto masen mamo saso minyak. Ana marak tna ku sme ro yoo fnya retait yama. Tna ana ro siwyan wea kro ait mamo twok mam amah ro raa makyõ bokyõ. Tna raa muut mato matak wa. 11Tna ku ano mabo maat ro wase bo weto mama tna mtu mawe, ‘Bobot (Tuan), nitrah mato kʼamu.’ 12Menohe ait yawe, ‘Jõ wase anu ye.’” 13Yesus ykyas bofret reto maum oh meto tna yawe, “Anu ye wase ayõ ro Tuhan ranu yama. Feto to, hre byõ-abyõ wea kaket.”
Bofret bi yabi ro somya bo ysya sryan wait
14Tna Yesus yawe, “Allah yamo Raja ybo raa mana rAit to. Reto mfi bobot sait ro yawe yamoʼt rabin ro fari-fara sau. Tna ait ytu sryan wait mama tna ait ysan kta wait taro kʼana somya ha-hayah ye. 15Ait saim kta weto kʼana mamyot ana matak rana ro kbe ntho. Sryan sait to ait fyah pitis talenta trion maat. Tna ait sait naut fyah pitis talenta ewok ye. Tna sryan sait naut fyah pitis talenta sau sai. Bobot retait saim bo weto kʼana agus tna fo yasen yamo. 16Sryan ro bofyah pitis maat retait yakah wait yamo somya renti, tna raa ntho. Tibyo maru amot maat naut miryõ. 17Tna sryan ro bofyah pitis ewok yakah wait yamo somya renti tna raa ntho. Tibyo maru amot ewok naut miryõ ye. 18Menohe ait ro bofyah pitis sau sai fi yakah wait yamo yabah tabam saa. 19Ti mase firwas oh, tna bobot ro ysan kta wait hah ye yama. Tna ait ytu sryan ro bofyah wait weto to mama. Tna yawe kʼana yawe, ‘Tho bo wojõ oh!’ 20Tibyo sryan ro ait fyah pitis wait maat reto yama tho pitis wait tna yaru amot maat naut yiryõ. Tna yawe, ‘Bobot, tiwya nyõ noo pitis wonyõ trion maat fyah jõ. Tna jõ te tho tibyo taru amot maat naut tiryõ. Tna pitis wonyõ fo nsaa beta oh mefo.’ 21Tna bobot yawe, ‘Nyõ nno bo ro moof to. Tiwya jõ too bo kebet sai tsan kʼnyõ. Menohe nyõ nisoh nbo nno kaket tibyo mrok mafer mawat ye. Nyõ mur-mur nno bo wojõ. Feto kbe jõ te tsan bo mase taro renti naut kʼnyõ nbo nno ye. Nama nhau nsya jõ. Bo yase wojõ anu bhaf bse su. Kbe anu simaut mase su.’ 22Tna fo sryan ro bobot fyah pitis wait trion ewok retait yama. Ait tho pitis bobot rait tna yaru amot ewok naut yiryõ. Tna sryan retait yawe, ‘Bobot, tiwya nyõ noo pitis wonyõ trion ewok fyah jõ. Tna jõ te tho tibyo taru amot ewok naut tiryõ. Tna pitis wonyõ trion jiit beta oh mefo.’ 23Tna bobot retait yawe, ‘Nyõ nno bo ro moof meto. Nyõ mur-mur nno bo wojõ. Feto kbe jõ te tsan bo mase taro renti naut kʼnyõ nbo nno ye. Nama nhau nsya jõ. Bo yase wojõ anu bhaf bse su. Kbe anu simaut mase su.’ 24Tna fo sryan ro tiwya bobot yoo pitis sau aran sai fyah tait yama. Tna ait yawe, ‘Bobot; Jõ thar tawe nyõ tait raa ro ja naya ma toni. Nyõ raa ro ja nryoh kake mam armato ro nyõ nyum fee. Tna nyõ soo bomafer mbam armato ro nyõ furere manaf to fee ye. Tiwya nyõ noo pitis wonyõ fyah kʼamu nawe amu nmo somya renti re makit mase kʼnyõ. 25Menohe jõ waa. Tibyo too pitis ro nyõ noo nee sau reto tamo tabah tabam saa sai. Pitis wonyõ oh mefo.’ 26Menohe bobot retait yawe, ‘Nyõ nno bo mkair. Nyõ haweboh ye. Nyõ nhar nawe jõ raa ro tryoh kake mam armato ro jõ tyum fee. Tna jõ soo bomafer mbam armato ro jõ furere manaf to fee ye. 27Feto to, rau ro moof to, tiwya nyõ nakah pitis wojõ namo nse mam bank sai. Afo re kbe jõ tama tna too mabo msya mabyoh rau ye fea!’ 28Tna bobot yawe kʼraa wait yawe, ‘Tiwya ait ybo pitis weto yamo somya fee. Feto to, noo pitis weto namo niryõ kʼait ro ybo pitis trion nsaa tait. 29Awya ro yisoh bo wait kaket moof, kbe raa moo bo taro naut miryõ kʼait ye. Menohe awya ro hawe yisoh bo rait kaket to, kbe raa mrof moo bo rait ro yse weto. 30Nfot sryan ro yno bo mkair retait nwah beak fari yamoʼt wore wo mamur htoh toni. Mam yuk reto to, meen raa mkai bo ro mkair-kar tna mawia, kanasyah ye.’”
Meen Yesus ysok raa wAit yse mkbair sau hayah
31“Jõ fi ’Ait ro Yroh Yama Yfi Raa Sai’. Meen Jõ tama to, tama tkah tase aJõ. Tna malaikat woJõ beta kro Jõ ntayun mama ye. Tna Jõ kbe tamo Raja hre abyõ mam yuk ro msai tbo raa beta ye. 32Tna malaikat weto kbe makrao raa ro bangsa beta makah mama mo kʼJõ. Tna Jõ kbe tsok ana betwat tse mam mkbair ewok hayah-hayah mfi raa ro ja msia hewan to. Ana ja msok domba mse mkbair sau hayah tna kambing mse mkbair sau hayah. 33Domba to, Jõ tsok tse hayah mam ati ro tatem ati. Tna kambing to, tse hayah mam ati ro tem ta ye.
34Tna fo Jõ tamo Raja tna tawe kʼana ro mhau mam tatem ati aJõ to, tawe, ‘Taja yno bo moof kʼanu. Nma nkai sawro ro Jõ tamo Raja tbo. Tiwya tinyi Tuhan sair tabam refo to, Ait ysok anu yawe meen nkai sawro rAit reto ye. 35Anu nno bo ro moof tibyo nkai sawro rAit to. Tiwya Jõ thai sre to, anu noo boit nee kʼJõ tait. Tna Jõ thai sbit to, anu nwyan aya nee kʼJõ tata. Tna Jõ tsu srim ye mam remo ranu to, anu noo Jõ nse tjin mam amah ye. 36Tna ratan ro Jõ tyum marak to, anu noo ratan nee kʼJõ tyum ye. Tna Jõ kiyam to, anu nma kmot Jõ ye. Tna raa mbu Jõ mam bui to, anu nma nmat Jõ ye.’
37Tna raa ro ja mno bo ro Allah ksoh weto meen mawe kʼAit mawe, ‘Tuhan; tiwya Nyõ nhai sre mam woyõ re amu noo boit nee kʼNyõ nait to? Tna mam woyõ oh mi amu nmat Nyõ nhai sbit re nwyan aya nee kʼNyõ nata to? 38Tiwya amu nmat Nyõ nsu srim mam woyõ re amu noo Nyõ nse mam amah to? Tiwya amu nmat Nyõ ratan marak mam woyõ re amu noo ratan nee kʼNyõ nyum to? 39Tiwya Nyõ kiyam mam woyõ re amu nma nmat Nyõ to? Tiwya Nyõ raa mfot mbu mam bui woyõ re amu nma nmat Nyõ to?’ 40Jõ fi Raja retait. Meen Jõ tawe kʼana tawe, ‘Nri kaket: Bo bawya sai ro anu nno kʼraa kinyah wanu to, ro suawe sor to, bo weto anu nno kʼJõ oh meto.’ 41Tna Jõ tawe kʼana ro mhau mam tatem ta to tawe, ‘Nsen frok nbam wefo nmo oh! Kbe bo ro msai btek mai kʼanu. Anu kbe nmo niit mam tafoh roon ro Allah siwyan mkah bo ykah kabes yabi (Iblis) ysya malaikat wait sor. 42Tiwya anu nno bo ro mkair, tibyo anu nmo niit mam tafoh reto. Tiwya Jõ thai sre to, menohe anu noo boit aro nee kʼJõ tait fee. Tna tiwya Jõ thai sbit to, menohe anu nwyan aya aro nee kʼJõ tata fee ye. 43Tna Jõ tsu srim to, anu noo Jõ nse mam amah wanu fee ye. Ratan ro Jõ tyum marak to, anu noo ratan aro nee kʼJõ tyum fee ye. Tna Jõ kiyam to, anu nma nmat Jõ fee ye. Tna raa mfot Jõ mbu mam bui to, anu nma nmat Jõ fee ye.’
44Menohe ana mawe si kʼJõ mawe, ‘Tuhan; tiwya Nyõ nhai sre, nhai sbit, nsu srim, ratan ro Nyõ nyum marak, Nyõ kiyam, tna Nyõ nhau mam bui mam woyõ re amu nmat Nyõ fee tna natmof Nyõ fee ye to?’ 45Tna Ait yawe kʼana yawe, ‘Nri kaket: Soh anu nmat raa woJõ to, tna anu nnaut nwe ana raa ati fee; tibyo anu natmof ana bo fee ye to: Jõ tawe kʼanu tawe, “Bo bawya sai ro anu hawe nno kʼraa woJõ weto sait, bo weto anu hawe nno kʼJõ ye oh meto. Feto to anu natmof Jõ fee oh meto.” 46Tna raa ro matmof raa anya fee; kbe raa mawah ana beak mam wore wo arin kair. Meen tafoh mait sikowah ana mamo snok mam hame wajin. Tna raa ro mno bo ro Allah ksoh to, meen mkai mamos mae ye.’”
26Raa saim mawe mfot Yesus mame
1Yesus ykyas bo weto kuber wAit mkak tna yawe, 2“Nnaut nwe, ti ewok naut tna raa makyõ korat ro Paskah. Raa makyõ korat reto to, tna kbe raa mfot Jõ msan kʼraa. Tna raa weto kbe mame Jõ tajat mam ara warok. Jõ fi ’Ait ro Yroh Yama Yfi Raa Sai’.”
3Ati reto imam manes msya raa mabi ro agama Yahudi to, ana siret su mam samu maboh (istana) ro Kayafas. Kayafas tait imam Yahudi ro yase. 4Ana saim mawe mamo mfot Yesus wai mamo mame mam wore raa mahni. 5Menohe ana mawe kʼanya mawe, “Bo reto anu bno mam ati ro korat Paskah refo ma, be kbe bo reto mno raa makin mafa.”
Fai sau mtu minyak wangi kʼYesus yana
6Ati sau to, Yesus hre yait boit mam amah ro Simon mam remo ro Betania. Bi Simon tait, tiwya yafa kusta.7Yesus hre yait bo kri-kri fo, tna fai sau twok mama. Mama mbo minyak wangi kusia sau. Minyak wangi to mabyoh maut toni. Mama mtu abyõ mam Yesus yana. 8Kuber wAit mmat feto, tibyo mrok kmo mawe, “Au mno bawya meto ee? Fyi re minyak reto sikowah sai a? 9Rau ro moof to, raa masim tna moo mabyoh rau. Tna mabyoh ro mase reto kbe raa msan kʼraa kinyah ro mse bo fee. 10Menohe Yesus yhar bonaut rana oh tna yawe, ‘Nno wa au to ma. Fai au mno bo ro moof kʼJõ. 11Raa kinyah to, ja mhau su msya anu yoyo. Menohe Jõ fo, kbe thau tsya anu yoyo fee. 12Fai au mtu minyakwangi kʼjõ tetsu refo fo, siwyan hai aJõ wia oh meto. Kebet baro naut kbe raa mame Jõ tajat tna sama hai aJõ to. 13Nri kaket wia: Bokyas Moof ro mbam Allah refo, meen raa wosa mamo snok mam arin aso beta. Woyõ-woya raa mkyas to, bo moof ro fai au refo mno fo, kbe raa mnaut mkyas ye.’”
Yudas hren ksuk Yesus
14Tna Yudas Iskariot yasen yamo yo kʼimam manes ro Yahudi. Yudas tait, kuber ro Yesus wAit mabo 12 weto sait ye. 15Yamo yo kʼana yawe, “Kbe anu noo bawya nee kʼjõ afo re jõ tsan Yesus kʼanu to?” Ana moo pitis mauf trion 30 maren Yudas wia. 16Tna Yudas ywof ati ro moof re kbe besruf Yesus.
Yesus ysya kuber wAit sohmaam bo mam korat ro Paskah
17Ti ro tinyi mam korat ’Roti ro Ragi Marak’ to, kuber wAit mama mtu kʼYesus mawe, “Nyõ nksoh nawe amu siwyan bo sohmaam mam woyõ?” 18Yesus yawe, “Nmoʼt kota no kʼraa sait ro Jõ tawe kʼanu tna nwe, ‘Bi Guru yawe ayõ ro raa mame Ait to kene oh. Ait yawe kbe yakyõ bokyõ ro Paskah su ysya kuber wAit mam samu anyõ.’” 19Feto tibyo kuber wAit masen mamo mno bo ro Yesus yawe reto. Tna ana siwyan bo sohmaam mkah makyõ bokyõ ro Paskah reto.
20Mti reto Yesus yamoʼt amah reto tna hre sohmaam bo su ysya kuber wAit mabo 12 weto. 21Ana hre sohmaam bo tna Yesus yawe, “Anu nkin wefo sait kbe hren ksuk Jõ.” 22Ana mari feto, tibyo mrok sraujin toni. Tna ana wefo sait-sait saak ana mawe, “Guru; jõ fee!” 23Yesus yawe, “Raa ro beru roti mam hawereh sau su ysya Jõ to, ait ro kbe hren ksuk kʼJõ oh metait. 24Jõ fi ’Ait ro Yroh Yama Yfi Raa Sai’. Kbe raa mame Jõ tajat tu oh. Mame Jõ to, mnan si mkah Watum ro Allah tiwya mawe wia yum oh. Menohe ait ro hren ksuk Jõ tait, meen safo maboh mai kʼait ye tu oh. Ro moof to, tiwya yme mabe ait fee sai.” 25Tna Yudas ro kbe hren ksuk Yesus yawe, “Bi guru, jõ oh mi Nyõ nawe meto a?” Yesus yawe, “Eno, au oh nyõ nawe meto.”
26Ana sohmaam bo nkri-kri fo, Yesus yoo roti sau. Yoo tna skabuk yayoh asik mase kʼAllah. Tna Ait haber roti reto yee kʼana beta mait. Tna yawe, “Nmat roti refo. Tetsu aJõ oh mefo. Noo niit oh.” 27Tna Ait yoo hawereh sau. Yoo tna skabuk yayoh asik mase kʼAllah. Tna yee kʼana beta mata. Tna yawe, “Noo nta anggur maya refo. 28Anggur maya refo to, mees aJõ ro kbe miyi mkah riof kʼanu. Kbe raa mame Jõ tna Allah ysair bosi ro tna kʼanu oh meto. Tibyo Allah yyon iro ro raa mno to. 29Jõ tawe kʼanu tawe, Jõ kbe tata anggur maya mam tabam refo u fee. Thau meen snok mam wore wo anu bhau su mam wore Allah yamo Raja ybo raa wAit. Wore weto kbe anu bta anggur maya ro tna su.”
Yesus yawe wia yawe kbe Petrus ywaar Ait
30Ana mji howes mkak, tna masen mamoʼt Faut ro Zaitun.
31Tna Yesus yawe kuber wAit yawe, “Mti refo fo anu beta kbe nmat kair mai kʼJõ tibyo nsen nsam sikba Jõ nmo. Watum ro Allah mkyas feto mawe:
‘Jõ kbe tame raa ro kmot domba sait, tibyo domba wAit weto masen msam brir-brar mamo ye.’
Zakharia 13:7
32Menohe kbe Taja yti Jõ trok tasen. Tna kbe Jõ tatim ste anu wea mam provinsi ro Galilea.” 33Petrus yawe, “Soh kair mai kʼNyõ to, ana taro saah to, kbe masen msam sikba Nyõ to. Menohe Jõ kbe tasen tsam sikba Nyõ bo fee yum!” 34Tna Yesus yawe, “Petrus, nari: Mti refo to, kook mara fefares to, kbe nyõ nwaar Jõ wia muhrin tuuf oh, nawe nyõ wase Jõ.” 35Tna Petrus yawe, “Fyi feya sai, Jõ kbe twaar Nyõ fee! Raa mawe mame jõ tsya Nyõ bjat su to mi bewok bjat rof!” Tna kuber wAit taro mawe feto beta ye.
Yesus skabuk mam Getsemani
36Yesus ysya kuber wAit masen mamoʼt yuk sau ro masom Getsemani. Tna Yesus yawe kʼana yawe, “Hre ste Jõ wea wefo tna Jõ tamo skabuk wia.” 37Tna Ait yawe Petrus ysya ku ro Zebedeus yare mabo ewok kro Ait mamo ye. Mam weto to Yesus yhaf yyi tna ynaut srau mtit mjah toni. 38Ait yawe, “Thaf fo nroon msai mfi bo tawe tno thai sai oh. Hre nwan nsya Jõ wefo.” 39Yesus serar yamo baro naut, tna yabum skabuk yawe, “Taja; tubat bo fanes ro btek mai kʼJõ refo fo, beak fari. Jõ tawe sai. Nno bo ro Jõ ksoh to ma. Nno bo mamyot Nyõ ksoh aNyõ sai.” 40Yesus skabuk mkak tna hah ye yama yo kʼana mabo tuuf weto. Tna ymat he ana beta mjin tu sai. Tna Ait yawe kʼPetrus yawe, “Anu bito hre nwan nsya Jõ ayõ sau sai fee! 41Hre nwan tna skabuk re kbe bo ro tabam refo tko anu nno iro to ma. Anu nwe nno bo ro moof. Menohe anu netsu wanu matak mno to fee.” 42Tna Yesus hah ye yamo skabuk naut u yawe, “Taja, soh Nyõ nawe bo ro samyoh refo Jõ tasom meto mi, Jõ tasom oh mamo mamyot si bo ro Nyõ ksoh sai.” 43Ait skabuk mkak tna hah ye yama yo kʼana mabo tuuf reto u. Tna ymat he ana mjin maka toni, tibyo mjin tu bana sai. 44Ait yawe bitsre ana mjin rof, tna hah ye yamo skabuk u. Bo skabuk ro muhrin tuuf reto mnan anya sai mfi bo riwai Ait skabuk wia to. 45Yesus skabuk mkak tna hah ye yama yo kuber wAit. Tna yawe, “Anu njin fares a? Nsen oh! Jõ fi ’Ait ro Yroh Yama Yfi Raa Sai’. Ayõ ro raa yama besruf Jõ to, kene oh. Kbe ait besruf Jõ tna yoo Jõ ysan kʼraa ro ja mno iro mfot. 46Nsen nma bmo oh! Ait ro besruf Jõ tait yama oh mefi!”
Yesus raa mfot
47Wore Yesus yros ykyas bo reto, Yudas frok yama. Yudas tait, ait ybam kuber wAit mabo 12. Ait yama yatim tna raa sbe mawat nkro ye. Ana masom pedang wana msya hbat wana sor. Ana raa sbe weto to, raa mabi ro agama Yahudi mbis. Raa mabi weto to, imam manes wana, msya raa mabi wana ye. 48(Ait ro besruf Yesus riwai yawe yerif Yesus kʼana yawe, “Kbe Jõ tamo hana raa sait to. Ait oh metait. Nfot Ait.”) 49Tna mkah tetara Yudas yamo yo kʼYesus tna yawe, “Bi Guru; meen oh kʼNyõ!” Tna ait hana Yesus. 50Yesus sesaban yawe, “Tafoh aJõ, reto oh mi nyõ nnaut nama fo a?” Feto tibyo raa majin reto sokraria mamo mbo Yesus tna mfot. 51Kuber wAit sait ymat feto tibyo yayõ pedang rait. Yayõ pedang rait tna ysot sryan ro imam yase rait sait yimara. Tibyo ktos btek mai mam tabam. 52Menohe Yesus yastako kuber rAit retait yawe, “Nsuf pedang anyõ oh! Awya ro yame raa mkah pedang yajat to, kbe raa mame ait mkah pedang ye. 53Nyõ nhar bo fe mfe a? Malaikat ro Taja wAit to msis toni syok. Jõ tatak tayoh kʼTaja ybis ana mama mame anya msya raa weto ye. 54Menohe Jõ hawe bo tayoh Taja ye. Bo ro Ait yawe mam Watum rAit to, kbe mabo tu oh.” 55Tna Yesus yawe kʼana ro mama mfot Ait yawe, “Anu nbo pedang msya hbat nma nfot Jõ mfi bo Jõ raa ro syõf bo sai a? Ja rabu ti wawa Jõ hre betoo Watum ro Allah kʼanu mam Samu rAit to. Menohe anu nfot Jõ mam beto fee. 56Menohe bo wefo beta mabo, afo re mamo mnan si bokom ro tiwya Allah ybis nabi wAit mkom matim wia to.” Tna kuber ro Yesus wAit masen msam brir-brar beta sikba Ait akus.
Raa manes ro Yahudi mtu srah ro Yesus mari
57Raa mfot Yesus tna makah mamoʼt samu ro Kayafas. Kayafas tait imamagama Yahudi ro yase. Tna mam samu mato to, guru agama wana msya raa mabi wana hre siret wea. 58Tna Petrus ybo rof-rof ana mtis. Yamo snok mam bohra ro imam yase. Tna ait fuu ye truk hre su ysya raa sbe ro ja kmot samu reto ye. Ait yawe hre ymat rof bo ro raa mno mai kʼYesus mamo snok sboh rau to. 59Tna mam samu mato to, imam manes msya raa manes ro ja mtu safo raa ro Yahudi to, hre mkyas bo. Ana makin beta to, mawe mkyas bo mbesus mai kʼYesus afo re kbe ana mfot Ait mame. 60Ana makin weto aro yasen yros sioh ykyas bo besus Yesus. Menohe bokyas ro ana mkyas to aro ykyas hayah-hayah sai. Tibyo ana mabo ewok masen mros tna mawe, 61“Amu nri Yesus yawe, ‘Jõ fi tatak tihabah Samu ro Allah rAit tna Jõ tatak te sgi u mam ti trion tuuf sai.’” 62Tna imam ro yase retait yasen yros. Ait yawe kʼYesus yawe, “Boun ro raa mawe maun Nyõ weto to, Nyõ nasen betoo fe mfe a?” 63Menohe Yesus shait bait sai. Tibyo imam ro yase yawe, “Feto sik sumpah ntom Allah ro yaam tait yasom, nawe Nyõ fi Mesias Ku ro Allah yare fe mfe a?” 64Yesus yawe kʼait yawe, “Au oh nawe meto. Nri oh: Jõ fi ’Ait ro Yroh Yama Yfi Raa Sai’. Meen anu nmat Jõ hre tsya Allah ro yase. Kbe Jõ hre mam ati ro yatem ati; mam hroh ro mase reto. Tna kbe anu nmat Jõ troh tama abyõ mam ayoh mboh tama ye.”26:64 Yesus yawe, Ait oh mi Mesias ro tiwya Daniel ykyas mam Daniel 7:13. Tiwya Daniel ykyas Mesias yawe ’Ait ro Yroh Yama Yfi Raa Sai’ to.65Imam ro yase yari feto, tibyo kmo ybo ratan rait yesait yhah-hah. Tna yawe, “Yesus yamus Allah meto! Yawe Ait Ku ro Allah yare. Bo mbau! Tna anu besait bri oh. Kbe anu saso raa roto mama maun Ait mkah bawya! Mfo refo anu besait bmit safo reto kʼAit! 66Bonaut wanu to fyi?” Tna ana mawe, “Safo makan btek mai kʼAit oh. Raa mame yajat tu oh!” 67Tibyo ana masen ntfeh oot kʼYesus, mmuk Ait, tna raa taro masen mai Ait ye. 68Tna mtu kʼait mawe, “Mesias fi! Soh Nyõ to, Raa ro yhar bo meto mi, nawe kʼamu nawe, raa woyõ sor oh mi yai Nyõ meto?”
Petrus ywaar Yesus
69Petrus hre mne mam bohra reto. Tna sryan ro ano sau mama tna mtu bo kʼPetrus mawe, “Nyõ ja nsya Yesus ro ybam provinsi ro Galilea fe mfe a?” 70Menohe Petrus ywaar kʼraa makin weto yawe, “Jõ wase, jõ thar bo ro fai au mtu reto fee.” 71Tna Petrus yasen yirenti yamoʼt masa ro bohra reto, tna sryan ro ano roto sau mmat ait tna mawe kʼraa ro mhau ye mam weto mawe, “Bi ait retait taa ysya Yesus ro ybam Nazaret ye.” 72Menohe Petrus ywaar matak naut u. Tna yto bo yawe, “Jõ wase Ait ye.” 73Feto tibyo raa makin taro mama mawe kʼait mawe, “Nwaar ma! Nyõ fi nsya ana nbam Galilea ye! Amu nhar nyõ nmai sai.” 74Petrus yari feto tibyo ywaar yawe matak tna yto bo yawe, “Ayoh, jõ thar bi Ait retait fee!” Weto si fo kook mara. 75Tna Petrus ynaut bo ro riwai Yesus yawe kʼait yawe, “Kbe nyõ nwaar Jõ muhrin tuuf wia tna kook mara.” Tna ait frok yamoʼt mne yawia sut-sut.
27Yesus raa msan kʼPilatus
1Rabu momo to, imam manes sor msya raa mabi ro Yahudi mawe safo btek mai kʼYesus. Tna mawe Yesus, kbe raa mame yum oh. 2Ana make Yesus yatem, tna makah mamo msan Ait kʼPilatus ro yamo gubernur tait.
Yudas yajat
3Yudas hren ksuk Yesus. Tna yari he safo mana raa mmit kʼYesus. Tna kbe raa mame Ait yajat. Yudas yari feto tna ait sraujin msai. Tibyo yoo pitis mauf 30 reto yamo yisya kʼimam manes msya raa mabi ro Yahudi. 4Tna yawe, “Jõ fi tno iro kawi oh. Jõ besruf Yesus ro wase safo aro fee, tsan tibyo Ait raa mame.” Menohe ana mawe, “Bo reto bo ramu fee. Nyõ nesait nasom bo anyõ oh.” 5Tibyo Yudas yawah pitis mauf weto yai mamoʼt Samu ro Allah mato tna yamo yi kro ait yajat. 6Tna imam manes sor fo masen soo pitis mauf wefo. Tna mawe, “Pitis ro misti re raa mame ajat wefo to, Allah ybau. Feto to, noo pitis wefo betruk mam surah wiak Samu ro Allah to ma.” 7Ana saim su tna moo pitis weto mate tabam. (Tabam reto ja raa mabah koh mfen kusia msya bo ro raa saruk bo sohmaam (tukang periuk).) Ana mate tabam reto mkah bo meen sama hai raa ro srim. 8Feto oh mi maban ati reto mamo snok mam mfo refo fo, tabam reto raa mtu masom mawe ’Tabam Mees Ajat’. 9Bo ro raa mno weto mamo mnan si bo ro tiwya nabi Yeremia ykyas wia yawe,
“Meen raa mana ro Israel ntho Ait mkah pitis mabyoh 30 sai. Tna fo raa manes weto moo pitis weto 10mate tabam. Tabam reto ja raa mabah koh mfen bo ro saruk bo sohmaam. Ana mno bo weto mnan si bosi ro tiwya Tuhan ysi kʼjõ.”
Zakharia 11:12-13
Pilatus ytu srah ro Yesus yari
11Ana msan Yesus tna yros sayõ gubernur ro ybo provinsi reto. Tna gubernur ytu kʼAit yawe, “Nyõ fi Raja ro Yahudi fe mfe a?” Tna Yesus yawe, “Au oh nyõ nawe meto.” 12Tna imam manes msya raa mabi ro Yahudi maun Yesus, menohe Ait yawe bo aro si kʼana fee. 13Tibyo Pilatus yawe kʼYesus yawe, “Nyõ nari boun rana ro maun Nyõ to fe mfe a?” 14Menohe Yesus shait bait sai, tibyo gubernur yrok ktak sai.
15Ti reto raa ro Yahudi makyõ korat ro Paskah.Tahun aro rau-rau wore wo ana makyõ korat reto to, ja ana baro mamo mo kʼPilatus mayoh kʼait mawe ait tufrok raa ro ana mawe sait ybam bui.16(Ati reto to, raa sait ro yasom Yesus-Barabas yhau mam bui. Raa beta mhar mawe ait raa ro ja yno safo.) 17Raa makin sor mama siret su oh. Feto tna gubernur Pilatus ytu kʼana yawe, “Anu ksoh nwe jõ tufrok Yesus-Barabas soh mfe kbe tufrok Yesus ro raa mtu mawe Kristus a?” 18(Pilatus yhar yawe raa manes ro Yahudi sor mhaf kair Yesus. Reto oh mi ana msan Yesus kʼait to. Yhar oh mi yawe feto.) 19Pilatus hre kri-kri mam ambar tna ytu srah reto yari. Tna yfain ntim soo mama mawe kʼait mawe, “Raa retait wase yber safo. Nsya srioh nkyas safo rAit ma. Ti sai jõ smi tmat tawe kbe bo ro mkair btek mai kʼanu fo.”
20Menohe imam manes msya raa mabi ro Yahudi bo msu bokyas kʼraa makin weto afo re ana mayoh Pilatus mawe ait tufrok Barabas tna mame Yesus yajat to. 21Gubernur Pilatus ytu bo kʼana yawe, “Ana mbewok refo fo, anu ksoh nwe jõ tufrok awya?” Tibyo ana mawe, “Tufrok Barabas!” 22Pilatus ye ytu kʼana yawe, “Soh feto to, kbe jõ tno bo bawya mai kʼYesus ro raa mtu mawe Kristus tait?” Menohe ana beta mawe, “Name Ait yajat mam ara warok!” 23Menohe Pilatus ytu kʼana u yawe, “Fyi, Ait yber safo bawya?” Menohe ana bito mkah mmai ro mase mawe, “Name Ait yajat yum!” 24Pilatus ymat he bo ro ait yawe weto nsoso sai. Kbe raa mrok mnin-nin mawe mno mafa. Ymat feto tibyo ait yasen yoo aya yyon yatem. Yyon yatem mam wore raa masu makin mmat tna yawe, “Jõ fi tsya anu nsom safo ajat ro anu nber refo fee.” 25Tna raa makin weto beta mawe, “Mbau a, safo ajat refo meen amu nsya kukek wamu nsom oh.” 26Tna fo ait yitsre Barabas yamo yo kʼana, tna ysan Yesus kʼraa ro sbe wait yawe ana moo too mmok-mak Ait, tna mame Ait yajat mam ara warok.
Raa ro sbe nsie Yesus
27Tibyo raa sbe ro Pilatus wait makah Yesus twok mamoʼt samu ro bi gubernur. Tna ana mtu raa sbe majin rana beta mama mros mur mtan kʼait. 28Ana mrus ratan ro Ait yyum, tna moo ratan roto ro mkek sau mse kʼait yyum riryõn. 29Ana moo abumun baro mhas mnan watau sau mfi watau ro ja bobot na sbyõ to mse kʼAit sbyõ ye. Tna ana moo tbyor sau mee ybo mam yatem ati ye, tna ana sioh mbaut Yesus: Ana mjit mimna ntmi tabam tna sret Ait masah mawe, “Meen oh kʼNyõ, raja ro Yahudi fi!” 30Ana tfeh oot kʼAit, tna mtak tbyor ro Ait ybo to, mai abyõ mam yana. 31Ana sret Ait masah tna me mrus ratan ro mkek riwai ana mse kʼAit yyum. Tna me moo ratan rAit mse yyum u. Tna ana makah Ait frok mamo mawe mame Ait yajat mam ara warok.
Yesus raa mame
32Raa makah Yesus mamo mam iso ro frok kota ro Yerusalem. Ana mbam kota frok mamo to, tna ana fri raa srim sait yama. Ait ybam kota ro Kirene. Yasom Simon. Ait yawe yiwrek menohe raa sbe mfot ait, mkuk ait mawe yasom ara warok ro Yesus. 33Ana mamo snok mam faut sau ro masom ’Yuk ro Hamana’. Mkah mai rana to, raa mawe ’Golgota’. 34Tna ana moo anggur maya srioh mkah obat empedu mee kʼYesus yata.27:34 Obat empedu to, mtah mfi kak kson. Ana ja mee kʼraa mata afo re kbe raa mse abyõ mam ara warok to, mari mham toni fee. Ait sanet baro menohe Ait hawe bo yata ye. 35Raa sbe mse Yesus mam ara warok. Tna ana moo undi tane re kbe mhar awya ro yoo ratan ro Yesus rAit. Tna saim kʼanya. 36Tna ana hre mam weto kmot Ait ye. 37Mam ara warok Yesus yana abyõ to, raa hero bokom sau. Bokom reto mawe bo ro Yesus yno re raa mame Ait to mefo: “Yesus fi, raja raa ro Yahudi.”
38Ati reto raa mame raa ro ja msyõf bo mabo ewok mam ara warok ye. Ait sait raa mse mam ati ro Yesus yatem ati, tna sait mam ati ro yatem ta ye. 39Raa ro mamo frit iti sor mam weto to, mmat Yesus raa mame mam ara warok. Tna ana mana mnah sai mamus Ait ye mawe, 40“Ti taa, Nyõ nawe nyõ natak nihabah Samu ro Allah tna sgi u mam ti ro tuuf sai no! Soh Nyõ Ku ro Allah meto mi, Nroh nbam ara warok reto oh afo re riof kʼNyõ.” 41Tna raa manes ro agama Yahudi mros mmat ye: Imam manes, guru agama msya raa mabi wana ye. Tna ana sret Ait feto ye masah mawe, 42“Raa roto saah Ait yno riof kʼana oh. Menohe Ait yesait yatak yno riof kʼAit ai fee! Soh Ait Raja ro Israel tu oh, meto mi sik yroh ybam ara warok reto tna fo kbe amu nmat tna smot Ait ye.” 43Tna ana mawe,
“Ait ja smot Allah tna yawe Ait tait Ku ro Allah yare. Feto to nma, anu bros ti bmat sai, kbe Allah yatmof skur Ait fee mfe a?”
Mazmur 22:9
44Raa ro ja msyõf bo weto to, ro raa mame mam ara warok su msya Ait ye mam weto to, ana mawe kair Ait feto ye.
Yesus yajat
45Maban baas ayõ ro 12 to, oo reto beta mrok mamur mamo snok hreha ayõ ro tuuf to. 46Ayõ ro tuuf bo feto, Yesus ytu mkah ymai ro mase yawe,
“Eli,Eli; lamasabakhtani?”
Mazmur 22:2
reto to yawe, “Allah aJõ, Allah aJõ; Nyõ sikba Jõ toni sai a?” 47Ana makin ro mros weto sor to, baro mawe kʼanya mawe, “Ait ytu Elia oh meto!” 48Tna ana sait yamo fooh yoo bo ro aya msuf sau tna beru mam anggur maya ro mano. Ait beru, tna yayõ tmi mam tbyor makit sau tna ytu maut kʼYesus yata. 49Menohe raa makin taro mawe, “Aha, nno feto ma, bhau bmat sai kbe Elia yama yno riof kʼAit fe mfe a?” 50Yesus kakyah mkah ymai ro mase, tna yitsre yafos rAit tna yhai.
51Tna tirai ro raa hero mam Samu ro Allah mato to, Allah yhah ftah ewok maban mam uu mamo snok mte. Tna iin frok sin tibyo fraa smut habah-habah ye. 52Tna isra ro tiwya raa sama hai to mrok masoh maa. Tna raa makin sor ro tiwya smot Allah tna mhai wia to, taro me mrok masen ye. 53(Ti ro tuuf to Yesus yrok yasen wia, tna fo ana frok mbam isra wana ye. Tna mamoʼt kota Yerusalem, kota ro Allah rAit to. Tna raa makin mmat ana.) 54Bi yabi ro sbe ysya raa sbe wait ro kmot Yesus to mmat iin msya bo yase ro riwai frok mama to, ana mrok waa mawe, “Ae, bo mabo oh! Ait retait, Ku ro Allah yare tu oh.” 55Fnya taro mawat mros fari mmat bo weto beta ye. Ana weto to fnya ro kro Ait mbam provinsi ro Galilea. Ana weto ja kro Ait yno bo wAit ye. 56Fnya makin weto to ana mabo tuuf oh mi, sau masom Maria Magdalena, tna ro ewok masom Maria ro Yakobus ysya Yusuf mme, tna ro tuuf to ku ro Zebedeus wait mme.
Ajat ro Yesus raa mse mam isra
57Ayõ ro hreha tna bobot sait ybam remo ro Arimatea yama. Ait yasom Yusuf. Ait ja kro Yesus bait soo ye oh. 58Ait yamo yo kʼPilatus tna yayoh yawe Pilatus ybis ait yesait yoo ajat ro Yesus tna sama. 59Pilatus ybis. Tibyo Yusuf yoo ajat reto, tna sro mkah hawee mabuf ro mfyan-fyan moof sau. 60Yusuf tait, tiwya yabah isra ro tna sau mam fraa mana sau mkah bo meen raa moo hai mse. Feto tna ait tubat ajat ro Yesus yamo yse mam isra reto. Ait yoo ajat reto yse, tna fo bririk fraa maboh sau burut wa isra reto mato tna yamo. 61Maria Magdalena msya Maria roto sau to, ana hre kene mam mato ro isra reto ye.
Raa kmot isra ro hai
62Ti ro jumaat raa agama Yahudi siwyan bo mkah ayõ ro ana tmoh to. Tna rabu ti fo, imam manes ro agama Yahudi msya raa ro Farisi mamo mo kʼPilatus mawe, 63“Bi yabi, Yesus retait raa ro ja siroyõ. Amu nnaut nwe tiwya wore Ait yhau fares to, yawe Ait yhai tna ti ro tuuf to, kbe Ait ye yrok yasen. 64Feto to, nbis raa mamo kmot isra reto matak wa mamo snok mam ti ro tuuf to. Soh mfe to, kuber wAit kbe tbat mamo msyõf ajat rAit masom mamo. Msyõf ajat rAit tna sioh mawe kʼraa makin mawe Ait yhai menohe yrok yasen oh. Soh ana mno bo reto to, kbe arin mrok mkair renti.” 65Pilatus yawe, “Ae; noo raa sbe wefo nkah nmo oh! Jõ tbis ana kmot isra reto masa to kaket wa.” 66Tna ana masen mamoʼt isra reto. Tna ana mse meterai ro Roma mam isra reto masa wa ye. Tna raa sbe weto hre kmot isra reto masa wa.
28Yesus yrok yasen
1Ayõ ro raa ntmoh (hari Sabat)28:1 Raa ro agama Yahudi ja skabuk Allah mam ayõ ro Sabtu. mkak. Tna minggu rabu momo Maria Magdalena msya Maria roto sau, mamo mmat isra ro raa moo ajat ro Yesus mse fo. 2Malaikat ro Tuhan sau mbam ayoh mroh mama tna bririk fraa ro raa burut wa isra mato reto. Tibyo iin ro msai frok mama sin. Malaikat reto maut hre mam fraa reto abyõ. 3Malaikat reto metsu rau mfi rir tna ratan ro myum to mboh fyok ye. 4Tna raa sbe ro kmot isra reto to, waa tibyo tetet mhai. Tna smut mfi raa ro mhai. 5Tna malaikat reto mawe kʼfnya weto mawe, “Waa ma. Jõ thar anu nma saso Yesus ro taa raa mame yajat mam ara warok. 6Ait yhau mam wefo fee. Riwai Allah yno Ait yrok yasen oh, mfi tiwya Yesus yawe wia to. Nma nmat yuk ro taa raa moo Ait mse bris to yarak meu. 7Hah ne nmo fooh nwe kuber wAit nwe, ‘Yesus yrok yasen oh. Ait yatim wea oh mam provinsi ro Galilea. Nmoʼt Galilea tna kbe anu nmat Ait mam beto.’” 8Ana frok mbam isra reto mkah waa. Tna ana simaut mase ye mamo. Ana mhoh fooh mamo mawe mabah bo reto kuber wAit ye. 9Menohe Yesus yrok brah nenat kʼfnya weto tna yawe, “Meen oh kʼanu.” Tibyo ana mamo kait mo kʼYesus tna maka mabum mbo Ait yaa tna mbaut Ait. 10Tna Yesus yawe, “Waa ma! Nmo oh tna nwe kʼraa woJõ makin nwe, ana maryõt oh mam Galilea tna kbe ana mmat Jõ ye oh mam beto.”
Raa manes ro Yahudi mawe Yesus yrok yasen fee
11Wore wo fnya weto mamo kri-kri fo, raa ro kmot isra ro ajat reto baro hah mamoʼt kota. Mamoʼt kota tna mamo mo kʼimam manes sor. Tna mabah bombra ro riwai ana mmat reto beta. 12Imam manes hre siret msya raa mabi ro Yahudi. Tna ana saim iso ro kbe mberkait bokyas reto. Ana saim bo su. Tna mawe moo pitis baro mee kʼraa ro sbe weto. 13Raa manes mawe kʼana mawe, “Nwe kʼraa nwe tisai anu njin tu tna kuber ro Yesus mama msyõf ajat rAit makah msam mamo. 14Tna soh Gubernur yari bo reto, kbe amu nkyas bo nsya ait, afo re ait yno bo aro mai kʼanu fee.” 15Raa sbe moo pitis reto. Tna ana mkyas bo mamyot riwai raa manes weto msi kʼana to. Bokyas reto raa mkyas hahah kʼraa ro Yahudi mamo snok mam mfo refo fo.
Yesus ysi bo kuber wAit
16Kuber ro Yesus wAit mabo 11 masen mamoʼt provinsi ro Galilea. Ana maut mamoʼt faut ro Yesus ykyas kʼana wia. 17Ati ro ana mmat Ait, ana maka mbaut Ait. Menohe ana baro mhaf mko-ako smot Ait kaket fee ye. 18Yesus yama kait yo kʼana tna yawe, “Allah ysan bombra ro ayoh msya ro tabam refo beta kʼJõ tbo. 19Feto to, nsen nmoʼt bangsa mam tabam arin aso refo beta. Nmo to, nno ana haberek mamo raa mana woJõ ye. Tna baptis ana mkah Taja yasom, mkah Ku rAit yasom, tna mkah Har rAit masom ye. 20Tna nkyas kʼraa nwe, ‘Nri bo ro Yesus yawe to. Tna nbo nno ye.’ Nnaut nwe Jõ tatam anu yoyo mamo snok mam oon sboh rau.”