Yohanes
1Yesus tait Bokyas ro Allah
1Tiwya tinyi tabam refo mkah bombra beta marak fares. Menohe Ait sait ro raa mtu ’Bokyas ro Allah’ yhau soo bait wia oh. Ait yhau su ysya Allah, tna Ait fi Allah. 2Tiwya tinyi Ait yhau su ysya Allah. 3Ait tait raa mtu ’Bokyas ro Allah’. Ait tait yfen bombra beta ro mhau mam tabam refo to. Bo sau mbam iso roto aro fee. 4Ait yafos rAit mhau sai yum. Ait yhau yroon yawyos. Ait fi ybo raa mafos wana msya bombra beta. Yafos ro mhau kʼAit to mnan fi kek. Tna yafos rAit reto mno raa mmat Kek reto. Mno masu maah. 5Tiwya Kek reto mama tna mait mram amur. Tna amur reto to, matak mikabuk Kek reto fee. Mno tna Kek reto mhai fee. 6Tna Allah ybis raa sait yama. Raa retait yasom Yohanes. 7Ait yama mkah bo ykyas ’Kek’ reto. Ait ykyas bo ro yesait ymat. Tna ait yama ykyas bo ro ymat reto afo re raa mhar mawe mabo oh. Afo re raa beta smot ’Ait ro ynan fi Kek.’ 8Yohanes fi Kek reto fee. Yohanes raa ro yama mkah bo ykyas Kek reto sai. 9Kek ro ati refo mamaʼt tabam refo. Mama mram raa sait-sait.
10Raa ro Ynan fi Kek retait, tiwya yfen tabam refo. Tna yama yhau mam tabam refo ye. Menohe raa ro tabam refo wase Ait. 11Yesus yfen tabam refo. Tibyo bombra beta to bo wAit. Raa wAit ro tii yfen to, Yesus yama yo kʼana. Menohe raa wAit weto to, ana mawat hawe bo mmat Ait. 12Menohe raa baro mmat Ait. Ana mmat tna smot Ait to. Yesus ykyas ana yawe, “Ana weto oh mi mamo ku ro Allah wAit.” 13Raa mamo ku ro Allah wAit to hayah. Tna iso ro fnya mabe ku to hayah ye. Mnan anya fee. Ku ro fnya mabe to, ana mbam raa sei sai. Menohe ku ro Allah yabe to mbam raa mana sau fee. Ja raa ksoh rana mabe kube aro. Tibyo ana mabe ku. Menohe ku ro Allah yabe to hayah. Ku weto to mbam raa ksoh wana to fee. Raa sme ja ksoh yawe yjin ysya fnya. Yno tna au mhaf tna au mabe ku. Menohe raa mamo ku ro Allah wAit to mnan feto fee.
14Bokyas ro Allah reto haberek mamo raa. Raa retait yama yhau mam tabam refo su ysya anu.1:14 Yesus yabo rAit reto mnan fi yuk ro Allah ja yhau. Keluaran 25:8, 40:34 Tna amu nmat bo yase rAit oh. Ait tait Ku bum ro Allah yare. Ku rAit sait tomu. Tibyo Allah ysan bo yase rAit beta Ku retait. Ait yhar bo ro ati miwer. Tna Ait tait Raa ro yatmof raa miwer.1:14 Keluaran 33:19; 34:5-7.15Yohanes ykyas Yesus yasom kʼraa. Ykyas bo ro yesait ymat feto to, ait yhar yawe mabo oh. Mkah ymai fari Yohanes yawe, “Ait ro tiwya tkyas kʼanu to Ait oh mefi. Jõ tama tkyas Ait wia matim. Tna Ait yama. Menohe Ait fi yase yiwrek jõ. Tiwya fnya mabe jõ fefares to, Ait yhau tuu oh.” 16Ait yatmof raa miwer tibyo yno bo moof kʼanu beta. Tna anu fri bo mafer mninon. 17Watum ranu ro agama Yahudi to1:17 Hukum Taurat, tiwya Allah ykyas kʼMusa. Tna Musa yoo yee kʼanu. Menohe mfo refo Allah ybis Yesus yama yo kʼanu. Ybis yama afo re yerif boatmof rAit. Tna ybis Ait yama afo re kbe raa mhar Allah yhaf, srau rAit.
18Raa aro ymat Allah fefares. Menohe Ku bum rAit yno re anu bhar Allah. Ait tait yesait aran Ku ro Allah yare. Tna Ait hre kut-kut ysya Yaja
Yohanes Pembaptis
19Yohanes ykyas Yesus yasom. Ykyas bo ro yesait ymat feto to, yhar yawe mabo oh. Tna ti sau mam Yerusalem to, raa manes ro agama Yahudi mbis raa wana baro masen mamo mo kʼYohanes. Raa ro ana mbis to: Imam wana msya raa mana ro Lewi baro. Mbis ana mamo mtu bo kʼait mawe, “Nyõ fi awya?” 20Raa weto mama mo kʼYohanes. Tna mtu bo kʼait. Tna Yohanes yasen yawe abyõ si kʼana yawe, “Jõ fi Mesias1:20 Som reto to, “Ait ro Allah ysok tna yawe yamo Raja.” Mai ro Ibrani mawe Mesias, tna mai ro Yunani raa mawe Kristus. ro ja anu nwof to fee.” 21Tna ana mawe, “Feto to nyõ fi awya? Amu nwof nabi Elia1:21 Maleakhi 4:5mkyas mawe meen Allah ybis nabi sait yasom Elia yama. Yawe nabi Elia yatim wia tna Tuhan yama. Feto to raa ro agama Yahudi beta mwof nabi retait yama. Ana mhar mawe Elia yama wia yatim tna Mesias yama. Nmat Lukas 1:17 ye. hah yama u. Nyõ fi bi Elia fe mfe a?” Ait yawe “Mfe.” Tna ana mawe, “Allah yawe meen Ait ybis nabi roto sait yama ye. Nyõ fi nabi retait, fe mfe a?” Ait yawe, “Mfe.” 22Ana mtu mawe, “Feto to nyõ fi awya? Kbe amu hah ne nmo nkyas kʼraa ro mbis amu nma to, tna kbe amu nkyas nwe bawya?” 23Tiwya Allah ybis nabi Yesaya yama ykom bokom sau. Bokom reto mkyas raa sait ro meen yama. Tna Yohanes yawe, “Jõ fi ait ro tiwya nabi Yesaya ykyas yawe,
‘Kbe raa sait yamoʼt tabam ro riamo sau tna ykyas bo ro Allah matim wia. Ykyas yawe, “Mbetrot iso mkah Tuhan yama!”’”
Yesaya 40:3
24Ana ro raa mbis weto to taro raa ro Farisi.25Tna ana mawe kʼYohanes mawe, “Nyõ fi Mesias fee, nabi Elia fee, tna nabi roto sait reto fee ye. Awya ybis re nyõ baptis raa fo?” 26Ait yawe, “Jõ fi raa ro baptis anu mkah aya sai. Menohe raa roto sait yros su ysya anu wefo ye. Tna anu wase Ait fares. 27Jõ tama tkyas Ait wia matim. Tna fo Ait yama. Ait retait yase toni yiwer Jõ. Tna jõ toof mkah bo skur sandal rAit to fee.1:27 Mam wore weto to ja sryan skur hri marak ro bobot rait, tna yyon yaa. Menohe Yohanes yhar yawe Mesias retait yase toni, ynan fi bobot rait tna ait yesait ynan fi raa ro yaku.”
28Bo weto to, Yohanes ykyas mam Betania. Remo reto mhau mam Aya Yordan majoh ti brat, ti ayõ maut. Ait baptis raa mam beto.
Yesus tait yfi Domba maku
29Rabu ti fo, Yohanes ymat he Yesus yama. Tna Yohanes yawe kʼraa ro hre mari ait yawe, “Nmat, Ait ro yama fi. Ait ynan fi domba maku1:29 Tahun aro rau-rau to, raa ro agama Yahudi ja moo domba maku msan kʼAllah. Mno afo re Allah yyon iro wana. ro Allah ybis yama. Ait tait Raa ro yama yyon iro wanu beta. 30Ait oh mi riwai tkyas kʼanu tawe, ‘Jõ tama tkyas Ait wia matim. Tna fo Ait yama. Menohe Ait refi yase yiwer jõ. Tiwya fnya mabe jõ fefares to, Ait yhau bait wia oh.’ 31Jõ tama baptis raa mkah aya afo re raa ro Israel mhar Ait. Tinyi rau to, jõ wase Ait ye.
32,33Ati ro Allah ybis jõ baptis raa mkah aya to, jõ wase Ait fares. Menohe Allah yerif Ait kʼjõ yawe, ‘Soh nyõ nmat Har aJõ mroh mhau abyõ kʼRaa sait to, Ait oh metait kbe baptis raa mkah Har aJõ.’ Tna mabo oh. Tkyas bo ro jõ tmat kʼanu tawe: Tmat Har ro Tuhan haberek mnan fi ruu merpati sau. Tna fru mbam uu mama mroh abyõ kʼAit. 34Bo refo tasu tmat tna tkyas tawe Ait tait Ku ro Allah yare.”
Kuber Yesus wAit ro tinyi
35Tna rabu ti fo Yohanes ysya kuber (murid-murid) wait mabo ewok mros mam weto. 36Tna Yohanes ymat he Yesus frit yamo tna yawe, “Nmat, Domba maku ro Allah yama oh metait.” 37Kuber ro Yohanes mabo ewok reto mari bokyas reto tibyo sikba ait tna kro Yesus. 38Yesus siur, ymat ana mbewok reto kro Ait mamo mam tis tna ytu kʼana yawe, “Anu mbewok saso bawya meto?” Tna ana mtu bo kʼAit mawe, “Guru; nyõ njin mam woyõ?” 39Yesus yawe, “Nma nmat.” Tibyo ana mbewok msya Ait mamoʼt amah ro Ait yhau. Ayõ ro jiit hreha bo feto. Tna ana hre mkyas bo su mamo snok mam ayõ hawer. 40Kuber mabo ewok ro masen kro Yesus reto to, sait yasom Andreas. (Ait tait Simon-Petrus yao.) 41Tna Andreas yamo fooh saso yao Simon tna yawe, “Amu tru Mesias oh!” (Reto oh mi Kristus.)42Tna ymen yao yakah yamo yo kʼYesus. Yesus yasu yrom Simon tna yawe kʼait yawe, “Nyõ fi ku ro Yunus yare. Kbe raa mtu nasom ‘Kefas’.” (Reto oh mi Petrus.)1:42 Yasom Kefas to mai ro Aram. Yasom Petrus to mai ro Yunani. Mai sai ranu to, raa mawe ’fraa manes ro ja mros matak’.
43Tna rabu ti fo Yesus yawe yamoʼt provinsi ro Galilea. Ait yamo saso Filipus tna yawe, “Nama kro Jõ.” 44Filipus tait raa ro Betsaida. Betsaida to remo ro Andreas ysya yao Petrus rana. 45Tna Filipus yamo saso Natanael tna yawe kʼait yawe, “Amu nkai Ait ro tiwya Musa ykyas mam Watum ro Allah. Ait ro tiwya nabi na mkyas ye! Yasom Yesus. Ait retait tait Yusuf yare ybam remo ro Nazaret!” 46Menohe Natanael yawe, “Hemba! Feto to bo ro moof aro mbam Nazaret oto?” 47Tna Filipus yawe, “Nama bmo tna kbe nyõ nesait nmat!” Ati ro Yesus ymat Natanael yama to yawe, “Ait retait raa Israel ro yhaf moof. Bosruf aro mhau kʼait fee. Ait ja yno bo mnan si raa Israel ro yoof.” 48Natanael ytu bo kʼYesus yawe, “Fyi re Nyõ nhar jõ to?” Tna Yesus yawe, “Riwai Filipus ytu nyõ fefares to, Jõ tmat nyõ oh hre mam ara mair tno.” 49Natanael yawe, “Bi Guru: Nyõ fi Ku ro Allah yare, Nyõ fi Raja ro nbo raa ro Israel.” 50Yesus yawe kʼait yawe, “Riwai tawe tmat nyõ hre mam ara mair oh mi nyõ smot Jõ to? Bo sair reto maku sai. Jõ kbe terif bo ati ro mase aro hair kʼnyõ. 51Kbe nmat ayoh mato nkro tna nmat malaikat na maut mroh abyõ kʼJõ. Jõ fi ’Ait ro Yroh Yama Yfi Raa Sai’.”
2Yesus yno bo msai ro tinyi
1Mam ti ro tuuf to, raa makyõ bokyõ mam remo ro Kana. Raa sait yoo fai sau. (Kana to mhau mam provinsi ro Galilea.) Yesus yme mamoʼt bokyõ reto ye. 2Tna raa moo taah mee kʼYesus ysya kuber wAit ye. Tna ana mamoʼt bokyõ reto beta. 3Raa makyõ bokyõ reto tna anggur maya mkak. Tibyo Yesus yme mamo mo kʼAit mawe, “Yesus; anggur maya fo mkak oh.” 4Menohe Yesus ye yawe kʼau yawe, “Nyõ nama nawe bo reto kʼJõ fyi? Jõ tno bo ro mno raa mhar Jõ to fefares. Oon reto sboh fefares. Jõ thar bo woJõ.” 5Menohe yme masen mamo mkyas bo kʼsryan na. (Sryan baro mhau tna siwyan bo ro bokyõ reto.) Yesus yme mawe, “Bo bawya ro Ait ybis kʼanu nno to, nno oh.” 6Yesus ymat baah marak (tempayan) ro mase trion ntamam mhau. (Baah weto to ja raa mse aya mkah bo raa myon matem wana mnan fi raa ro agama rana ja mno soo oh. Baah weto to ja raa mror aya 100 liter bo feto mam sau-sau.) 7Tna Yesus yawe kʼsrian weto yawe, “Nmo nwyan aya nkah nma. Tna nror mam baah weto matot beta.” Sryan weto mari tna mamo mwyan aya mama tna mror matot. 8Tna Yesus yawe kʼsryan weto yawe, “Tna nwyan aya reto kebet baro nror mam hawereh sau. Tna nbo nmo nee kʼbi ait ro yisoh bo sohmaam to, yata sanet yari wia.” Tibyo ana moo aya baro mamo mee kʼbi ait yata. 9(Riwai Yesus yno aya mboh mam baah weto haberek mamo anggur maya.) Ana makah mamo mee tna bi retait yata baro sanet. (Ait wase anggur maya ro msu refo mbam mam woyõ. Sryan weto mesait mhar.) Bi retait sanet yari he aya reto msu. Anggur maya reto to, mafah rau to moof ati. Tna bi ait ytu kʼait ro ymen fnya retait yama. 10Tna yawe kʼait yawe, “Ja raa moo anggur maya ro msu mee kʼraa mata matim wia. Raa mata ro moof reto tibyo bisir. Tna kbe tis rau to, raa masyõ anggur maya ro mkair to mee kʼraa mata. Menohe riwai nyõ nabe anggur maya ro moof refo mamo snok mam wore mfo refo tna nyõ nasyõ nee kʼraa mata!”
11Yesus yno bo msai reto yerif yase rAit oh mefo. Bo msai ro tinyi reto Yesus sair mam Kana ro mhau mam provinsi ro Galilea. Tna kuber wAit smot Ait mawe Ait yase toni.
Yesus yamoʼt remo ro Kapernaum
12Tna fo Yesus ysya yme, yao na, msya kuber wAit mroh mamo sia mamoʼt remo ro Kapernaum. Tna mhau mam beto ti baro bo feto.
Yesus yisoh Samu ro Allah
13Korat ro Paskah makyon rau to kine oh. Tna Yesus yaut yamoʼt Yerusalem. 14Ait yamo twok mam Samu ro Allah tna ymat he raa masim sapi,domba, msya ruu merpati bo.2:14 Raa masim bo weto re kbe raa moo ktan tna msan kʼAllah. Tna ymat he raa taro hre mam ambar wana tna tukar pitis ye. Raa ro srim moo pitis wana mee kʼraa weto. Tna raa weto mee pitis mauf ro Yahudi kʼana si ye. 15Yesus ymat raa mno bo weto tibyo yoo too sau yfen mnan cambuk bo feto. Tna ybo ymok-mak sapi msya domba ro raa masim weto frok msam mbam Samu ro Allah mato. Tna Ait haberek-barak ambar ro raa hre mkah bo moo pitis mee si kʼraa. Tibyo pitis wana somya-meya. 16Tna Ait yawe kʼana ro masim ruu merpati weto to yawe, “Anu nno bawya meto ee? Tubat ruu wanu wefo fo nkah nmo to! Samu ro Taja refo fo samu ro raa masim-asam bo to fee!” 17Kuber wAit mmat bo ro yno to, mnaut mawe Bokom ro Allah, far-far sau mkyas mawe:
“Tmat Samu aNyõ to thaf myoh!”
Mazmur 69:10
18Tna raa ro Yahudi mastako Yesus mawe, “Nyõ nno bo feto mkah bawya! Awya ro ybis ee! Nyõ awya re nno bo feto to? Mfi bo Nyõ nawe Allah ybis Nyõ nama to, sik nno bo msai sau tna amu nmat. Nno bo ro merif Allah yatak rAit tna fo kbe amu smot Nyõ.” 19Tna Yesus yawe kʼana yawe, “Soh anu nihabah samu refo to, kbe Jõ sgi te u to mkah ti tuuf sai.” 20Tna ana mawe kʼAit mawe, “Amah refo tii raa sgi sgi tahun trion 46 wia tna mkak. Fyi re nyõ nawe sgi mkak mkah ti tuuf sai a?” 21Menohe ati ro Yesus yawe ’samu’ reto to, Ait fret bo yawe Ait yetsu rAit yesait meen yajat tna mam ti ro tuuf to, ait yrok yasen. ⌞Reto to bo msai ro kbe yno re kbe raa mmat tna smot Ait.⌟ 22(Meen Yesus yrok yasen tna fo kuber wAit mnaut bokyas ro tiwya Ait ykyas reto, tna ana srau wana mrok mbrah. Tibyo ana mhar yum oh mawe Bokom ro Allah msya bokyas ro Yesus reto sioh fee; bo mabo oh.)
23Mam wore raa makyõ Korat ro Paskah to, Yesus yhau mam Yerusalem. Tna Ait yno bo msai mawat. Tibyo raa msis-sas smot Ait. 24Menohe Yesus yhar raa mhaf wana to. Yhar yawe kbe ana mros smot Ait tu fee. Tibyo Ait smot (percaya) ana toni fee. 25Yesus yhar bo ro raa mnaut mam srau mato wana to. Yhar oh. Feto to ytu bo ro raa mnaut mam srau mato wana fee.
3Nikodemus yamo wai yamo ykyas bo ysya Yesus
1Raa ro Farisi sait yasom Nikodemus. Ait tait raa manes ro Yahudi. 2Mti oh tna ait yama yo kʼYesus tna yawe, “Guru; raa aro mno bosair mnan mfi Nyõ feto fee, soh Allah yatam ait fee. Tibyo amu nhar nwe Nyõ Allah ybis.” 3Tna Yesus ykyas bofret yawe, “Soh raa sait yawe yamo raa mana ro Allah yamo Raja ybo to, kbe ait yhah ye yamo yfi ku mees u. ⌞Au oh mi ku ro fnya mabe fee, menohe ku ro Allah yesait yabe mkah Har rAit.⌟ Soh raa retait yamo ku ro Allah yabe fee, kbe yamo raa mana ro Allah yamo Raja ybo to fee ye.” 4Nikodemus wase bofret ro Yesus ykyas reto tna yawe, “Fyi re raa ro mabi oh hah me tna fnya mabe u mun ro ewok?” 5Yesus yawe, “Soh raa sait yawe yamo raa mana ro Allah yamo Raja ybo to fyi? Tawe fnya me mabe ait u fee. Tawe Allah oh mi yabe Ait. Yako hawe sai kbe ait yawe Allah yabe mkah aya ye tna mkah Har rAit ye. Bokyas ro ati oh mefo. 6Ati ro fnya mabe ku to, mabe ku mees. Ku mees retait yetsu rait to metsu ro tna. Menohe riwai tawe, ‘Soh raa mawe mamo raa mana ro Allah wAit to, kbe yhah ye yamo yfi ku mees u.’ Bo fret reto to, tkyas tawe: Ati ro Allah yabe ku mkah Har rAit to, raa retait yhaf, srau rait haberek. Har ro Tuhan mno yhaf srau rait haberek mamo mnan Yaja Allah yhaf msya srau rAit. Feto tibyo yamos rait to yamos ro tna. 7Allah ‘yabe raa mun ro ewok u’ mkah Har rAit saah. Tibyo raa mhaf, srau wana haberek, mrok moof to. Nyõ ktak bo ro tkyas reto ma! 8Foos mfi to mamo tiyo-teya sai. Tna anu wase foos reto mbam woyõ. Anu bmat foos fee. Anu bri au hmu sai. Tna Har ro Tuhan mno raa mhaf, srau wana haberek to, anu bmat fee ye.” 9Nikodemus yawe si kʼYesus yawe, “Bo reto mno fyi?” 10Yesus yawe, “Nyõ namo guru tna raa ro Israel ja mari nyõ ye: Fyi re nyõ wase! 11Nnaut: Amu nkyas bawya ro amu nhar. Tna amu nkyas bawya ro amu nmat oh. Menohe anu, raa manes ro Israel, ja hawe bo nri bokyas ramu. 12Riwai tkyas bo ro ja mabo mam tabam refo sai. Menohe anu srau fee. Anu nnaut bo weto mamo-me fares. Soh Jõ tkyas bo ro ja mabo mam sawro ro Allah to, kbe anu nfot fee ye. Feto to, tkyas bo maja ro Allah kʼanu fefares. 13Raa aro mamoʼt sawro rAit fefares. Menohe Jõ fi ’Ait ro Yroh Yama Yfi Raa Sai’. Jõ tbam sawro reto frok tama oh.”
14Tna Yesus ykyas kʼNikodemus yawe, “Tiwya Musa yhau mam tabam ro riamo. Tna yoo tembaga yfen aban. Yfen tna yoo ara sau yse aban ro yfen mam ara reto makit uu abyõ. Tna yati mros.3:14 Bilangan 21:9 Bokom far-far wefo mkyas ati ro Allah ybis aban mama mafit raa mana ro Israel. Tibyo ana mawat mhai. Tna Allah ybis Musa yfen aban refo yse abyõ mam uu re kbe raa mmat tibyo riof kʼana. Nnaut aban reto. Tna nnaut bo ro kbe raa mno mai kʼJõ: Meen ’Ait ro Yroh Yama Yfi Raa Sai’ tait, kbe raa mfot. Tna kbe ana moo Jõ mse mam ara abyõ uu mnan anya mfi feto ye. 15Ait kbe raa teta abyõ afo re raa beta ro smot (percaya) Ait to, kbe ana mhau hame wajin. 16Allah yatmof raa ro tabam refo toni. Tibyo yasen ysan Ku rAit sait tomu yamaʼt tabam refo. Yno afo re awya sai ro smot tna msam wai kʼAit kbe mhau hame wajin. Kbe yhai fee. 17Allah ybis Ku rAit yroh yama re yoo safo mana ymit kʼraa ro tabam refo fee. Menohe Ku rAit yama afo re yno riof kʼraa. 18Awya ro smot tna msam wai kʼAit to, kbe bi Ait yoo safo mana ymit fee. Menohe awya ro smot Ait to fee, kbe safo mana mhau kʼait oh. Raa taro smot Ku ro Allah rAit sait tomu fee. Smot Ait fee tibyo ana mesait masom safo mana wana weto. 19Au oh meto: Kek reto mama tabam refo oh. Menohe raa hasu amur toni bana. Ana nksoh mno safo. Ana hawe kek reto. Feto tibyo Allah yoo safo ymit kʼraa weto. 20Awya ro yno safo to ait knait kek. Ait hawe bo yama kene mam kek. Ait waa re kbe kek reto ntara bo ro ait yno mkair tna raa mmat. 21Menohe awya ro kro iso ro ati reto to, ksoh yamaʼt wore wo kek. Yama re kbe raa mmat he bo ro ait yno weto mnan si bo ro Allah yawe, yno mkah tak ro Allah rAit.”
Yohanes ykyas Yesus
22Yesus ykyas bo weto mkak. Tna fo ysya kuber wAit masen mamoʼt yuk roto mam provinsi ro Yudea. Mhau mam beto tna Ait baptis raa. 23Tna Yohanes ja baptis raa ye. Ati reto to, Yohanes yhau mam Ainon kene mam Salim. Mam beto to aya mawat. Tna raa mawat mama mo kʼait mawe ait baptis ana. 24(Ti reto Yohanes raa mfot mbu mam bui mato fefares.) 25Tna kuber ro Yohanes wait mkyas bo msya raa ro Yahudi sait. Ana santri bo mkyas bo mafa raa ro agama Yahudi ja mno soo oh. Ana mkyas iso ro raa misoh ana moof afo re Allah ymat ana. 26Kuber ro Yohanes weto mamo mo kʼait tna mawe, “Guru; Raa ro taa ysya nyõ mam aya ro Yordan tino tait, Ait ro nyõ nerif kʼamu to, Ait baptis raa ye. Tna raa msis-sas mamo mo kʼAit.” 27Tna Yohanes yawe, “Allah ybis raa mno bo rAit. Tna Ait oh mi Raa ro yoo tak yee tibyo raa weto mtai mno bo rAit. Soh Allah ybis fee, kbe raa mno bo feto fee ye. 28Taa anu nesait nri bo ro tkyas tawe kʼanu tawe, ‘Jõ fi Mesias fee. Jõ fi raa ro Allah ybis tama tatim wia.’”
Raa sikba Yohanes tna mamo mo kʼYesus, menohe Yohanes ksoh
29Tna Yohanes fret bo yawe, “Mesias yama to yama yfi raa sait ro ymen fnya. Tna jõ tnan fi yafoh rait. Yafoh rait yhau siwyan bo re kbe raa makyõ bokyõ. Yafoh retait yhau siwyan bo mam remo ro fnya reto. Ait ro yoo fnya reto yama tna yafoh yari ait ymai to, yafoh retait ksoh toni. Ynaut yawe, ‘Fnya refo fo fnya ajõ fee; au sikba jõ mamo msya Ait retait, moof toni.’ Mesias yama tna raa msis-sas mamo mo kʼAit to, jõ simaut toni. Mfi bo raa moo fnya to, ja raa makyõ bokyõ. Jõ tnan fi ait sait ro ymen fnya yafoh rait. Yafoh retait siwyan bo beta. Tna huwya re kbe ait ro yoo fnya yama. Yari he ait yama tna simaut toni. Feto to jõ simaut mase tari he Yesus yama. 30Mfo refo Ait yamo Raa ro ati. Tna yamo yase renti yiwer jõ. Jõ fi raa ro ati fee. Tna te taku renti ye. 31Ait ro ybam sawro ro Allah yroh yama tait yase ybo raa beta. Menohe ait ro yama ybam tabam refo to, raa ro sei sai. Ykyas bo ro tabam refo sai. Ait ro yama ybam sawro ro Allah tait yase yiwrek raa beta. 32Ait ro yroh yama retait yama ykyas bombra ro Ait ymat msya bo ro yari mam sawro ro Allah. Menohe raa aro mari bo ro Ait ykyas to fee. 33Ana ro mari bokyas ro Ait ykyas to mhar mawe, ‘Allah tait ja ykyas bo ro mabo.’ 34Allah yoo Har rAit mnan si yee kʼMesias. Tna ybis Ait yama. Tibyo Ait tait ykyas bokyas ro mbam kʼAllah. 35Yaja yhafri Ku rAit. Tna ysan bombra beta kʼAit ye. Yawe yamo Raja ybo bombra beta. 36Awya ro smot Ku rAit kbe yhau hame wajin. Menohe awya ro hawe bo yari Ku rAit to, ro yiwana bokyas rAit to, kbe ait fri kmo ro mbam kʼAllah mamo snok hame wajin.”
4Yesus ykyas bo ysya fai ro Samaria sau
1-3Yesus yber raa mawat tna baptis raa mawat miwer Yohanes. Yohanes baptis raa mabo kbet sai. (Yesus yesait baptis raa fee, kuber wAit oh mi ja baptis raa.) Raa ro Farisi mari he Yesus yber raa mawat. Feto tibyo Ait sikba provinsi ro Yudea hah yamoʼt provinsi ro Galilea.4:1-3 Yohanes 3:24-26; 5:18; 7:1.
4Yesus yamoʼt Galilea to Ait yamo frit iti rabin raa ro Samaria. 5Tna snok mam remo ro Samaria sau ro masom Sikhar. Sikhar mhau kene msya tabam ro tiwya Yakub ysan ku rait Yusuf. 6-8Mam weto aya mato sau ro tiwya Yakub yabah. Snok mam aya mato reto tna kuber ro Yesus mamo twok mam remo saso boit ro mait. Yesus yhai rowyõ iso ro yamo. Tibyo yhau bait mam aya mato reto hre sne hoh. Ayõ ro 12 baas bo feto. Yesus hre kri-kri fo, fai ro Samaria sau mama mwyan aya. Tna Yesus huwya yayoh aya kʼau yawe, “Noo aya baro nee kʼJõ tata.” 9Menohe au mawe kʼAit mawe, “Nyõ fi Raa ro Yahudi. Tna jõ fo fnya ro Samaria. Fyi re Nyõ nayoh aya tee kʼNyõ nata?” (Ja raa ro Yahudi msya raa ro Samaria miranya fee.) 10Yesus yawe, “Soh nyõ nhar bouum ro Allah yawe yuumto kʼraa to, tna soh nhar awya oh mi yayoh aya kʼnyõ metait, kbe nyõ oh mi nayoh bo kʼJõ. Tibyo kbe Jõ too aya tee kʼnyõ nata to. Aya reto to mnan fi aya masu ro miyi yoyo.” 11Fai au reto mawe, “Bo ro Nyõ nbo re nwyan aya to marak. Tna aya mato refo miyõ mrit toni. Fyi re Nyõ ntru aya ro mnan fi aya masu ro miyi yoyo reto? 12Hohos ramu sait yasom Yakub. Tiwya yabah aya mato refo tna ysan kʼamu. Ait yesait ywyan aya mbam aya mato refo yata ye. Tna ku wait msya sapi wait ro ysia beta moo aya refo mata ye. Fyi, nawe Nyõ nase niwrek Yakub a?” 13Yesus yawe, “Ja raa ro mata aya refo kbe mhai sbit u. 14Menohe aya ro Jõ too tee kʼraa to hayah.4:14 Yohanes 3:5; 7:38,39. Awya ro yata aya ro Jõ too tee kʼait to, kbe yhai sbit u fee mamo snok mam hame wajin. Aya ro Jõ too tee kʼait yata reto to, haberek mamo aya masu mam kʼait yhaf mato frok. Tna aya ro Jõ too tee to, awya ro yata to, kbe yhau hame wajin.” 15Fai reto mayoh kʼAit mawe, “Noo aya reto baro nee kʼjõ tata. Tna kbe thai sbit u fee. Tna meen thah tama twyan aya refo u fee ye.” 16Yesus ybis kʼau yawe, “Namo ntu naa, tna hah nmaʼt wefo.” 17Tna au mawe, “Jõ tsya raa aro fee.” Yesus yawe, “Bo ro nyõ nawe reto mabo oh. 18Raa mabo trion maat ro nyõ nsya. Tna mfo refo ro ysya nyõ yhau mam amah tait nyõ naa metait fee. Bokyas anyõ reto mabo to!” 19Au mawe, “Jõ tnaut tawe Nyõ fi Nabi ro Allah ybis nama fo. 20Amu hohos wamu ro Samaria ja bibi Allah to, mamoʼt atu rno. Menohe raa wanu ro Yahudi to, mawe raa bibi Allah mam Yerusalem sai.” 21Ait yawe, “Nari bo ro Jõ tawe fo: Ayõ ro meen mama to, anu kbe nhar Taja aJõ. Mam wore weto to, anu nbaut Ait mam atu rno u fee tna mam Yerusalem u fee ye. 22Anu raa ro Samaria nbaut Ait ro anu wase. Menohe amu raa ro Yahudi nbaut Ait ro amu nhar. Riof ro mase mama mbam raa ro Yahudi. 23-24Menohe ayõ ro kbe mama to Har ro Tuhan kbe mkyas betoo bi Ait kʼraa re mhar bo mbaut Ait mkah mhaf ro ati. Feto kbe raa mhar bo mbaut Allah, tna mbaut Ait mam woyõ-woya sai. Allah ksoh bo raa mbaut Ait mfi feto. Tawe kʼanu tawe ayõ rau mama oh. Allah tait yfi raa fee: Yetsu marak. Allah tait har. Tibyo awya ro yawe ybaut Ait to, yako hawe sai kbe ybaut Ait mkah yamos rait ye tna tomer yhar yhaf rAit kaket ye.” 25Tna au mawe, “Jõ thar tawe, Mesias (ro raa mtu mawe Kristus to) kbe yama. Yama, tna kbe betoo bombra refo beta kʼamu.” 26Tna Yesus yawe, “Jõ fi Ait oh.”
27Ti reto kuber ro Yesus wAit hah me. Tna mmat he Yesus hre ykyas bo ysya fai sau. Tibyo mrok ktak. Ana mawe mtu bo bawya ro ana mbewok mkyas. Tna mawe mtu fyi re Ait ykyas bo ysya fai reto. He mfe, ana shait sai. 28Fai au sikba bo ro mwyan aya akus mam yuk reto, tna mhoh mamoʼt remo mawe kʼraa mawe, 29“Nma nmat raa ro riwai jõ tkai mam aya mato reto! Ait ykyas bo kʼjõ tna yhar bombra ro tiwya jõ tno beta. Ait retait Kristus fe awya?” 30Ana mari bo ro au mkyas kʼana tna masen frok mbam remo reto mamo mmat Yesus.
31Wore au marak to, kuber ro Yesus mawe kʼAit mawe, “Guru; noo boit baro nait!” 32Menohe Ait yawe, “Mfe, Jõ tse boit ro anu nhar fee. Boit reto to, tait oh.” 33Tibyo ana mkyas kʼanya mawe, “Raa aro mayõ boit mama mee kʼAit yait oh a?” 34Yesus yawe, “Jo tari bo kʼAit ro ybis Jõ tama. Tna boit aJõ oh mefo: Tno bo ro yawe reto beta mkak.” 35Tna Yesus yawe, “Ja raa mawe ‘Snyi jiit naut tna ora ro armato manes. Tna fo raa saraf.’ Menohe Jõ tawe kʼanu tawe bo ro armato Taja rAit make manes oh. Nesait nmat oh! 36Raa taro furere bo manaf (benih) mam armato ro Allah rAit wia oh. Mfo refo bo reto make manes. Tna anu fo raa ro mryoh bo ro armato rAit.4:36 Raa ro ’furere bo manaf’ mno raa mhaf mato siwyan re kbe ana smot (percaya) Yesus. Tna raa ro mryoh to mmen raa weto re smot Yesus tna msam wai kʼAit. Anu nryoh bo ro armato reto tibyo meen raa mhau hame wajin. Raa ro tiwya furere bo manaf tna ysya raa ro yryoh bo ro armato reto to, Allah yoo boren yaren ana mbewok ye. Tna mbewok ye simaut mase. 37Ja raa mkyas mawe, ‘Raa sait furere bo manaf tna raa roto sait yama yryoh mafer rau.’ Mabo oh. 38Jõ tbis anu nmo nryoh bo mam armato ro tii anu nkah fee. Raa roto mkah oh mimyoh mbtek, tna anu nmo nkai mafer rau reto sai.”
39Raa ro Samaria msis mari bo riwai fai reto mawe: “Ait yhar bombra ro tiwya jõ tno beta.” Tibyo ana smot Yesus mawe Ait fi Kristus.40Tna ana mawe mabe Yesus mawe yhau ysya ana. Tna Ait yhau mam remo rana reto ti ewok. 41Ana ro Samaria mari bo ro Yesus ykyas tibyo raa msis u mama smot Ait mawe bo ro Ait ykyas to mabo oh. 42Tna mawe kʼfai au mawe, “Riwai bo ro nyõ nkyas sai oh mi amu smot Ait. Mfo refo amu nesait nri bokyas ro Ait ykyas. Tna amu nhar nwe Ait oh mi Raa ro yama yoo riof ro mase yee kʼraa ro tabam refo.”
Yesus hah ye yamoʼt Galilea
43⌞Ybam provinsi ro Yudea Yesus hah yamoʼt provinsi ro Galilea fares fo. Yamo iso ro Sikhar.⌟ Yhau mam Sikhar ti ewok reto mkak tna fo yamo renti yamoʼt Galilea. 44Tiwya raa ro rabin rAit hawe mari Ait. Feto to Yesus yawe, “Nabi ro Allah ybis yama ykyas bo wAit to, ja raa ro rabin rait yesait to, hawe mari ait.” 45Raa ro Galilea tiwya mamoʼt Yerusalem makyõ korat ro Paskah. Tna mam beto ana mmat bo Yesus yno bo ro msai. Tibyo ati ro Yesus hah yamo snok mam Galilea to, raa rabin reto ksoh mmat Ait.
46Tna Ait hah yamoʼt remo ro Kana u mam Galilea. Taa Ait yno aya mboh haberek mamo anggur maya mam remo reto. Yhau mam Kana kri-kri fo, pegawai istana sait ku rait kiyam samyoh mam remo ro Kapernaum. 47Bi retait yari he Yesus ybam Yudea hah yamaʼt Galilea. Yari feto, tibyo ait yamo yo kʼYesus tna soh-soh kʼAit yawe, “Bobot, nama nisoh ku ajõ ro kiyam msai tna kerit yhai!” 48Yesus yawe kʼpegawai retait yawe, “Soh anu nmat Jõ sair bo ro hnah fee, tna nmat Jõ tno bo ro msai fee ye, anu aro kbe smot Jõ fee.” 49Tna pegawai retait soh-soh u yawe, “Bobot, nama fooh be kbe ku ajõ kene wo yhai oh!” 50Yesus yawe, “Namo oh. Ku anyõ retait kiyam marak.” Pegawai retait smot bo ro Yesus yawe reto. Yhar yawe Ait yatak yisoh ku rait. Tna re ait yamo. 51Ait yamo fares mam iso maka fo sryan wait mama mkai ait mawe, “Ku anyõ to kiyam marak oh!” 52Tna pegawai retait ytu bo kʼana yawe, “Kiyam marak to riwai ayõ jya bo feto?” Tna ana mawe, “Iis mam ayõ ro sau baas bo feto kiyam marak.” 53Tna ait yrok srau mbrah yawe, “Ae, iis ayõ reto oh mi Yesus yawe, ‘Ku anyõ yoof oh.’” Tibyo pegawai retait ysya fnya, kukek, raa wait beta smot Yesus. 54Yesus ybam provinsi ro Yudea yamoʼt Galilea tna yno bo msai ro ewok refo mam beto.
5Yesus yisoh raa sait mam aya mbair ro Betesda
1Ti baro firwas tna raa ro agama Yahudi makyõ korat rana sau naut. Tna Yesus yaut yamoʼt Yerusalem u. 2Kota ro Yerusalem to aya mbair sau mhau mam makit rau. Mhau kene mam Mato ro Domba. Mam mai ro Ibrani to, aya mbair reto masom Betesda. Tiwya raa mkait yuk trion maat ro mhau mur aya reto, mkah bo raa hre baas iti. 3Raa mawat ro mafa kiyam ja mjin mam yuk weto to: Raa ro kiyam, msya raa ro masu mboh msya ro maa maka msya ro matem maa bo mhai to ja mjin mam yuk reto. [Raa weto beta hre mwof aya mata mnah-nah. 4Malaikat sau mroh tna mno aya reto mnah-nah. Tna awya ro yroh wia yatim mam aya reto to, raa retait kiyam mrok marak.] 5Mam yuk reto raa sait ro yafa bo tahun trion 38 bo feto yhau. 6Tna Yesus yama tna ymat ait yjin mam beto. Yhar yawe ait tait kiyam ooh oh. Tibyo ytu kʼait yawe, “Nyõ ksoh bo noof fe mfe a?” 7Menohe ait yawe si kʼYesus yawe, “Tuhan; mam ati ro malaikat mno aya masu refo mata mnah-nah fo tesait ttai troh fee. Raa ro tubat jõ mse troh mam aya to marak. Tawe tamo troh menohe raa roto taro mroh wia oh.” 8Yesus yawe kʼait yawe, “Beah aam anyõ tna nasen namo oh.” 9Ayõ reto si fo raa retait yoof. Tna ait yasen beah aam rait ybo tna yamo.
Yesus yisoh raa retait mam ayõ ro raa agama Yahudi ja ntmoh (hari Sabat)5:9 Raa ro agama Yahudi ja skabuk Allah mam hari Sabtu.. 10Ait ro kiyam marak retait yamo to, tna fri raa manes ro Yahudi baro. Ana mmat he bi ait ybo aam rait yamo to. Ait yiwer Watum ro agama ranu oh meto. Tibyo ana mastako ait mawe, “Ayõ ro raa wanu ntmoh refo: Nasom aam anyõ namo to nno fyi?” 11Ait retait ye yawe, “Bi Ait ro riwai yno re jõ kiyam marak retait oh mi ybis jõ yawe tubat aam ajõ tna tamo fo.” 12“Awya oh mi ybis nyõ tubat aam anyõ namo fi?” 13“Twase ye. Ait yarak mam raa makin wefo.” 14Ti baro firwas tna Yesus fri ait retait mam Samu ro Allah mato. Tna yawe kʼait yawe, “Nyõ kiyam marak mefo to, ne nno iro u to ma. Soh nawe nno bo ro mkair-kar u to, kbe kiyam ro samyoh toni mama mai kʼnyõ u.” 15Tna raa retait frok yamo ykyas kʼraa manes ro Yahudi yawe, “Yesus, Ait oh mi yno re jõ kiyam marak fo.” 16Ana ro Yahudi hawe bo Ait yisoh raa mam ayõ ro raa ntmoh. Tibyo ana tomer mfot Yesus. 17Menohe Yesus yawe kʼana yawe, “Taja tait ykah bo rAit yoyo mamo snok mam ayõ refo. Feto to Jõ tkah bo ye.” 18Riwai Yesus yisoh raa mrok moof mam ayõ ro raa ntmoh ye, tna fo Ait yawe Allah tait Yaja rAit ye. (Feto Ait yawe ynan anya ysya Allah.) Tibyo raa ro Yahudi mhaf kek renti tna mawe saso fyi re mfot Yesus tna mame. 19Yesus ykyas Ait yesait kʼraa manes ro Yahudi yawe, “Nnaut: Bo bawya-bawa ro Ait retait ymat Yaja yno to, Ait yno ye. Tibyo Ait yesait yno bo aro kar fee. Ymat sas bo ro Yaja ybo yno. Tna Ait kro yno bo weto sai ye. 20Allah yhafri Ku rAit. Tna yerif kʼAit bombra ro Ait yno beta. Tibyo Ait ytai yno bo ro Yaja yno ye. Kbe yerif bo ro msai toni miwrek weto ye. Tna anu nmat to nrok ktak. 21Taja yatak yno raa ro mhai mrok masen, tna yno raa maam ye. Feto ye Ku retait yatak ye yno raa maam ye. Yno kʼawya ro Ait ksoh sai. 22Taja yesait ytu srah ro raa sait bo yari fee. Yawe Ku rAit ytu srah raa beta. 23Taja yno feto afo re kbe raa beta mmat Ku rAit, tna waa Ku rAit ye mfi bo ana mmat Ait, tna waa Ait ye. Awya ro ymat tna waa Ku rAit to fee, ait waa Taja ro ybis Ku rAit yama to fee ye.
24Nnaut: Awya ro yari bokyas aJõ, tna smot Ait ro ybis Jõ tama to, meen yhau hame wajin. Ait retait meen Allah yno safo mana ymit kʼait fee. Ait yisnak hai yamoʼt roon ro hame. 25Raa ro mhai oh kbe mari Ku ro Allah ymai. Tna raa ro mari kaket to, kbe maam. Makyon reto mama oh mefo. 26Taja Ait yafos rAit mhau tu mroon mawyõs. Raa aro mabe Ait fee. Yhau sai. Tna yno re Ku rAit, Ait yafos rAit mhau tu mroon mawyõs ye. 27Jõ fi ’Ait ro Yroh Yama Yfi Raa Sai’. Tibyo Allah yoo tak yee kʼJõ yawe Jõ fi tros susai ttu srah raa ro tabam refo. Bokyas ro ati oh mefo. 28Nri bo ro Jõ tawe to ktak ma. Ayõ rau meen mama to tna raa beta ro mhai oh kbe mari Ait ymai. 29Ana weto raa sama oh, menohe kbe ana beta mrok masen: Ana ro tiwya mno bo ro moof to, mrok masen tna kbe mhau hame wajin. Ana ro tiwya mno bo ro mkair to, kbe mrok masen ye. Tna Jõ ttu srah ro ana mno. Tna too safo mana tmit kʼana weto ye. 30Jõ tesait ai ttu srah rana fee. Tesait tno bo sau kar fee. Jõ ttu srah tari to mnan bawya ro Allah ybis kʼJõ. Tna ja tno mnan si bo ro Ait yawe. Tno bo aro mkah ksoh aJõ tesait fee. Tno bo to tawe tno Taja yhaf mnan. 31Mfi bo Jõ tesait aran tkyas tawe Jõ fi Ku ro Allah yare, kbe raa aro mari fee. Tna smot fee ye. 32Menohe raa roto sait yhar Jõ tna ykyas Jõ ye. Tna thar tawe bokyas rAit reto to mabo tu oh.” 33Tna Yesus ykyas kʼana ro Yahudi u yawe, “Anu nbis raa mamo mo kʼYohanes tna mtu bo kʼait oh. Ait ymat bo ro tno tna ykyas Jõ kʼanu. Ykyas bo mabo. 34Ja tari bokyas mbam raa sai to fee. Menohe Jõ tkyas Yohanes bokyas rait afo re kbe anu nri ait tna nkai riof. 35Tiwya Yohanes yama ynan kek ro mait. Yama tna ti baro to kek reto mram anu fo ye. Au oh mi ti reto to, anu nsu maah tna nksoh nri bokyas rait ye. 36Tawe Jõ fi Ku ro Allah yare to. Tna bombra ro Jõ tno merif mawe Taja oh mi ybis Jõ tama fo. Tama tno bo ro Ait ybis to tno fo. Yohanes ykyas yawe Jõ fi Ku ro Allah yare ye. Bokyas rait reto merif Jõ tasom aJõ kebet sai. Menohe bombra ro tno merif bo reto kaket re raa mhar mawe Allah oh mi Raa ro ybis Jõ tama. 37-38Taja ro ybis Jõ tama fo, yesait ykyas yawe Jõ fi Ku rAit. Menohe anu smot Jõ fee. Tibyo anu nri ymai fee. Tna anu nmat yasu rAit fee ye. Tna bokyas rAit anu nse mam nhaf mato wanu fee ye. 39Anu ksoh nwe meen anu nhau hame wajin. Feto to anu ja hre nmat Bokom ro Allah. Nwe anu nmat tna nhar Bokom reto kaket. He mfe. Bokom ro Allah oh mi mkyas Jõ. 40Menohe anu hawe bo nma no kʼJõ afo re meen nhau hame wajin.”
41Tna Yesus yawe kʼraa manes ro Yahudi yawe, “Jõ saso tasom aJõ fee. Reto bo ro ati fee. 42Jõ thar anu. Thar tawe anu nhafri Allah mam nhaf mato wanu to fee. 43Allah yesait ybis Jõ tama tkyas yasom rAit kʼanu. Tibyo Jõ tama. Menohe anu nitrah nhaf wanu kʼJõ fee. Anu nri bo ro Jõ tkyas fee. Raa taro kbe mama mo kʼanu tna mkyas bonaut rana mesait sai. Fyi re anu nri ana? Ana mkyas masom rana mesait. Fyi re anu nitrah nhaf wanu kʼraa weto? 44Anu ksoh raa mmat anu tna bibi anu. Menohe anu sorni nwe Allah ymat anu to, bo ro ati. Tibyo anu ja nwe nno bo re kbe Ait bibi anu to fee. Nno fyi meto? Allah yesait aran Raa ro yase. Au oh mi anu hawe smot Jõ fea! 45Meen Jõ tamo to kʼTaja. Tamo tna taun boun kʼanu to fee. Bi Musa oh mi yaun baun kʼanu oh. Bo ro Musa ykom mesait maun boun kʼanu. Anu ninaut nwe, ‘Amu nri Musa msya Watum rait reto. Feto kbe amu nkai riof.’ He mfe. 46Watum ro Musa mkyas Jõ. Soh anu nfot Watum rait kaket to, maami anu kbe smot Jõ ye. 47Menohe anu nmat Watum ro Musa to, nbo nno kaket fee. Feto kbe anu niwana bo ro Jõ tkyas ye.”
6Yesus yoo boit yee kʼraa mabo 5000 mait
1-4Ti baro firwas, tna Yesus hah yamoʼt provinsi ro Galilea. Tna snyi reto to, kene wo raa ro Yahudi makyõ korat ro Paskah. Tna Yesus yroh yamoʼt maru ro Galilea. Tna frit yamoʼt ati tino. (Maru reto raa mtu masom maru ro Tiberias ye.) Raa mhar mawe Yesus yatak yno bo msai yisoh raa ro kiyam sor. Tibyo raa mawat mjor mama kro Ait. Tna fo Yesus yaut yamoʼt atu sau. Tna hre su ysya kuber wAit. 5Yesus ymat he raa msis-sas maut mamaʼt atu reto mo kʼAit. Ait yawe kʼFilipus yawe, “Raa mawat mam befo fo, kbe anu boo roti mam woyõ bee kʼana mait fo?” 6(Yesus yawe ytu feto sanet bosmot ro Filipus. Yesus yesait yhar bo bawya ro kbe Ait yno oh.) 7Filipus yawe, “Pitis mabut mkah anu boo roti bee kʼana beta mait. Mfi bo pitis dinar trion 200 bo feto, kbe ana makin mait roti kebet-kebet sai to. Pitis mabut sai.” 8Kuber ro Yesus rAit roto sait yasom Andreas. Andreas tait Simon-Petrus yao. Tna Andreas yawe, 9“Ku yaku sait yros mam befo. Tna ait yse roti trion maat msya syoh mana ewok. Menohe bo wait weto mabut ye. Raa msis-sas fo.” 10Yesus yawe, “Nbis raa weto hre mte.” Mam yuk reto bosafom moof. Tna raa weto beta hre mte. Raa sme wore weto beta to raa mabo trion 5000 bo feto. 11Tna Yesus yoo roti weto, tna skabuk yayoh asik mase kʼAllah. Tna ybo saim kʼraa ro hre mam weto. Ana moo nksoh rana sai. Tna yoo syoh weto to, yno saim mnan anya ye. 12Raa beta sohmaam mhaf matu. Tna Yesus yawe kuber wAit yawe, “Noo keranjang nmo soo roti msya syoh mabuf ro mhau to nfau mam keranjang. Mbeak ma.” 13Riwai roti mabuf maat aran sai. Tna raa mait mhaf matu. Tna kuber wAit soo roti mabuf ro mhau fares to, mfau mam keranjang. Mfau keranjang trion 12 matot. 14Raa mmat bo msai reto tibyo mawe kʼanya mawe, “Mamo snok ayõ mfo refo anu bwof nabi ro Allah ybis sait yama. Amu nnaut nwe Ait refi fi nabi retait yroh yama tabam refo!” 15Ana baro mnaut mawe mabe Yesus yhau ysya ana. Ana saim kʼanya mawe mikoh Ait yamo Raja rana. Yesus yhar yawe ana mnaut bo reto tna hawe. Tibyo Ait sesa Ait tna yesait yaut yamoʼt atu sau.
Yesus yamo abyõ mam aya mata
16Mti knu-knu fo, kuber ro Yesus mroh mamoʼt maru. 17Arin mti oh to, tna Yesus yama yo kʼana fefares. Ana maut mam wiak rana mawe miin frit matim mamoʼt remo ro Kapernaum. 18Ana miin mamo, mamo tna foos mase mama, figyõm mase mama mai ye. 19Ana miin mamo kilo mara maat bo feto oh. Tna ana mmat he Yesus yama. Yama abyõ mam aya mata yo kʼana. Mmat tna ana waa. 20Menohe Ait yawe kʼana yawe, “Waa ma, Jõ mefi.” 21Ana mari mai rAit tibyo ana beta simaut. Tna mawe, “Nama naut oh!” Yaut hre tna mam weto si oh to, ana mmat he wiak rana snok mam joh ro Kapernaum oh.
Raa mawat saso Yesus
22,23Raa mawat mhau akus fares mam maru maam ati tino. ⌞Mam wore wo Yesus yoo roti yayoh asik mase kʼAllah tna yee kʼraa mait to.⌟ Tna rabu ti fo, ana mnaut mawe, “Iis wiak sau aran mros mam joh. Tna mam wiak reto kuber ro Yesus mesait aran maut mamo. Yesus fee. Feto to Ait yaut wiak ryo?” Mhau tna wiak roto baro mbam remo ro masom Tiberias mama msyoha mam joh reto ye. 24Raa ro mhau mam weto fares mmat he Yesus ysya kuber wAit marak. Feto tibyo ana maut wiak weto mamoʼt Kapernaum mawe saso Ait mam beto.
Yesus fi roti ro mno raa mhau hame wajin
25Raa weto mkai Yesus mam maru tino. Tna mtu bo kʼAit mawe, “Guru; tija oh Nyõ snok wefo fo?” 26Yesus yawe, “Anu saso Jõ fyi? Anu nmat bo msai ro Jõ tno menohe bohar wanu to mabuf fares. Anu niit roti tna nhaf matu. Reto oh mi anu saso Jõ. 27Tomer nkah bo re nkai roti ro niit sai to ma. Roti to bo ro tabam refo sai. Rau ro moof to, anu nnaut nmos wanu. Jõ fi ’Ait ro Yroh Yama Yfi Raa Sai’. Saso boit ro mbam kʼJõ oh. Boit ro Jõ too tee kbe mnis fee, kbe mkak fee. Boit reto to mno raa mhau hame wajin. Taja ykyas Jõ yawe, ‘Ait fi, Jõ thaf mnan.’” 28Tna ana mtu kʼAit mawe, “Bo bawya sai ro kbe amu nno re Allah ksoh amu to?” 29Tna Yesus yawe kʼana yawe, “Bo ro Allah ksoh anu nno to fefo: Smot tna nsam wai kʼAit ro Allah ybis yama to.”
30Ana mawe, “Mfi bo Nyõ raa ro Allah ybis, tna nawe Nyõ nase niwer Musa to, sik nno bo msai sau naut u. Afo re amu nmat wia tna smot Nyõ. Kbe nno bo bawya? 31Tiwya tinyi hohos wanu mhau mam yuk ro riamo. Tna Allah ysair boit manna ro ana mait. Bokom ro Allah mkyas mawe: ‘Boit mfi roti mroh mbam uu mbtek. Tna Musa yoo yee kʼana mait.’”6:31 Keluaran 16:4.
32Menohe Yesus yawe, “Musa fee. Nnaut: Taja oh mi tii yno roti mbtek mroh mbam uu to. Tna mfo refo yoo roti ro ati yee kʼanu niit. 33Ait ro yroh yama ybam Allah tna yno raa ro tabam refo maam to, Ait retait tait roti ro ati ro mbam kʼAllah oh metait.” 34Ana mayoh mawe, “Tuhan;roti reto, noo nee kʼamu niit yoyo oh.” 35Yesus yawe, “Jõ refi fi roti reto. Tno raa mhau hame wajin. Awya ro yama yo kʼJõ tait yhai sre u fee. Tna awya ro smot Jõ to, kbe yhai sbit fee ye. 36Riwai tawe, ‘Anu nmat Jõ menohe anu smot Jõ fefares.’ Mabo oh. 37Menohe Taja ykyas raa roto taro yawe, ‘Ana ro Jõ tsan kʼNyõ to, ana weto kbe mamo raa woNyõ.’ Ana weto beta kbe mama mo kʼJõ. Tna awya ro yama yo kʼJõ to, kbe Jõ tikyak ait fee. 38Jõ tbam Allah troh tama tno bo ro Jõ tesait ksoh to fee. Menohe tama tno bo ro Taja yawe. 39Allah oh mi ybis Jõ tama to. Tna Ait ybis yawe Jõ kmot ana afo re ana beta beroh smot Jõ. Ana beta ro ysan kʼJõ to Ait ksoh yawe kbe sait yarak o yakus bo to fee. Tna meen tno re ana beta mrok masen mam ti ro tabam refo haberek u. 40Allah ksoh yawe awya sai ro ymat Ku rAit tna smot Ait to, meen yhau hame wajin. Tna meen Jõ tno ana beta mrok masen mam ti ro tabam refo haberek.”
41Riwai Yesus yawe, “Jõ refi fi roti ro mbam kʼAllah.” Tibyo raa ro Yahudi knot-knot Ait. 42Mawe, “Menohe Ait tait Ku ro Yusuf yare sai! Anu bhar Ait yaja yme oh! Fyi re Ait yawe Ait yroh ybam Allah?” 43Tna Yesus yawe, “Knot-knot ma.
44Taja ybis Jõ troh tama tabam refo. Tna Ait oh mi ykuk raa taro mama mo kʼJõ. Tna soh Ait ykuk ana weto fee, ana mesait mtai mama mo kʼJõ fee ye. Tna meen Jõ tno ana beta mrok masen mam ti ro tabam refo haberek u. 45Tiwya Allah ybis nabi rAit sait yama ykom bokyas rAit yawe, ‘Allah kbe yfi guru ykyas watum rAit kʼraa beta.’ Awya sai ro yari bo ro Allah yawe tna yse mam yhaf mato rait to, kbe ait retait yama yo kʼJõ. 46Raa aro bo mmat Taja fee. Ait ro yama ybam Allah yesait aran ymat Taja oh. 47Nnaut: Awya ro smot Jõ to, meen yhau hame wajin.
48Jõ tno raa mhau maam hame wajin. Mnan fi roti ro mno re raa mhau maam mam tabam refo. 49Riwai anu nkyas nwe, ‘Anu hohos na tii mait manna ro mbam Allah mam yuk ro riamo.’ Mait fea! Menohe beta mhai. 50Roti ro mbam Allah oh mi Jõ mefi. Tna raa ro mait roti refo kbe mhai fee. 51Jõ fi roti ro mama mbam kʼAllah. Awya ro yait roti refo kbe yhau hame wajin.6:51 Yohanes 4:14.Roti refo fo kwiyan aJõ. Tsan kwiyan aJõ afo re tno riof kʼraa ro tabam refo.”
52Mari feto raa ro Yahudi santri anya mawe, “Fyi re raa refi yawe yoo kwiyan rAit yee kʼanu bbo?” 53Yesus yawe, “’Ait ro Yroh Yama Yfi Raa Sai’ tait, Soh anu nbo kwiyan rAit fee, tna soh nta mees rAit fee ye, kbe nkai riof ro hame fee. Bokyas ro ati oh mefo. 54Awya ro yabo kwiyan aJõ tna yata mees aJõ to, meen yhau hame wajin. Tna jõ tno ait yrok yasen mam ti ro tabam refo haberek u to. 55Kwiyan aJõ to boit ro niit oh meto. Tna mees aJõ to aya ro nta oh meto. 56Awya ro yabo kwiyan aJõ tna yata mees aJõ to yhaf sau su ysya Jõ renti, tna Har aJõ mjin mam ait yhaf rait renti ye.6:56 Galatia 2:20.57Taja ro yawyos retait ybis Jõ tama. Tna Ait yno re Jõ thau tawyos ye. Feto ye awya ro yabo kwiyan aJõ to yhau yawyos ye. 58Jõ fi roti ro mbam Allah. Hohos wanu tiwya mait manna. Tna beta mhai. Menohe roti ro Jõ tkyas refo mnan anya msya manna reto fee. Awya ro yait roti aJõ refo meen yhau hame wajin.”
59Bo wefo beta Yesus ykyas mam samu watum ro Kapernaum.
Kuber ro Yesus taro hawe kro Ait u
60Mari bokyas ro Yesus reto, tna kuber ro Yesus wAit mawat mawe, “Bokyas refo samyoh toni. Kbe awya ro yari tna yse kʼait?” 61Yesus yhar kuber wAit mmai kʼanya bokyas rAit reto. Tna yawe, “Anu kmo bokyas reto a? 62Jõ fi ’Ait ro Yroh Yama Yfi Raa Sai’. Meen Jõ hah u taut tamoʼt oo ro tii thau wia. Mfi bo meen anu nmat bo reto to, kbe anu ne nnaut nwe bawya?6:62 Yohanes 6:30.63Har ro Tuhan mno raa ro tabam refo, mhaf, srau wana mrok haberek. Mno re ana weto moo ‘mamos ro tna’. Raa mesait tomer mno mhaf wana haberek to, mtai fee, mkai riof ro hame wajin fee. Menohe bokyas ro Jõ tkyas kʼanu to bokyas Har ro Tuhan rAu. Tna bokyas reto mno raa mkai riof ro hame wajin. 64Anu nkin wefo to, taro smot Jõ fee.” (Maban tinyi wore Ait yamo guru Yesus yhar wia oh awya ro smot Ait fee, tna awya ro kbe hren serek Ait.) 65Tna Yesus yawe, “Reto oh mi Jõ tkyas kʼanu tawe soh Taja ybis wia to fee, kbe raa sait ytai yama yo kʼJõ fee ye.” 66Tna ayõ reto kuber wAit mawat sikba Ait, hawe bo kro Ait u fee.
Petrus sikba Yesus fee
67Tna Yesus ytu kuber wAit mabo 12 reto yawe, “Fyi, anu nwe sikba Jõ ye fe mfe a?” 68Simon-Petrus yawe kʼAit yawe, “Tuhan; amu kbe nmo no kʼawya u? Nyõ oh mi nkyas bokyas ro mno re raa mhau hame wajin. 69Amu smot Nyõ tna nhar nwe, Nyõ fi Ait ro Allah Ybis Yama.” 70Tna Yesus yawe, “Anu nbo 12 refo Jõ tsok oh. Menohe anu wefo sait tait kabes mhau kait yhaf mato rait.” 71(Ait ykyas Yudas, ku ro Simon Iskariot yare. Ait ysya raa mabo 12 ja kro Yesus. Menohe kbe ait besruf Yesus kʼraa re mame yajat.)
7Yesus ysya yao na
1Raa manes ro Yahudi mawe mame Yesus yajat. Tibyo Ait hawe yamoʼt provinsi ro Yudea fee. Yamo yur mam provinsi ro Galilea sai. 2Ti weto kene wo raa ro Yahudi ja mamoʼt Yerusalem makyõ korat rana sau. Korat refo masom Korat ro Sbyah.7:2 Tahun aro rau to, raa ro Yahudi mtor sbyah mkah bo ana mhau ti trion ngkrema. Mno mkah bo mnaut tiwya hohos wana mamo-ama mam tabam ro riamo tna mhau mam sbyah sai ye.3-5Tna Yesus yao na mawe kʼAit mawe, “Nyõ namo ye fea!” Ana smot Ait fefares ye. Tibyo mamus tna mbesre Ait mawe, “Nasen sikba befo. Namoʼt Yudea afo re raa ro kro Nyõ kbe mmat bo msai ro nno. Soh raa sait yawe yamo raa ro kbe masom to, ja ait ymyõt bo bawya ro yno to fee. Ja yno mam wore raa makin masu mmat. Soh Nyõ nno bo msai to, nno mam wore raa beta mmat tna mhar!” 6Yesus yawe kʼana yawe, “Jõ tamo fefares. Ayõ ro Jõ tamo to fefares. Ayõ rau snok fefares. Menohe anu fo, nmo ti woyõ-woya sai to moof. Bo ati fee. 7Raa ro wase Allah ja knait anu fee. Menohe Jõ tkyas bo ja raa mno to, tawe ana mno bo ro mkair-kar. Tibyo ana knait Jõ. 8Nesait nmoʼt korat reto oh. Jõ tamo fefares. Ayõ aJõ reto mama fefares.” 9Yesus ykyas bo feto tna yhau bait mam Galilea wea.
10Yesus yao na matim wia mamoʼt korat reto. Tna Ait yesait yamo yrof. Ait yasen yamo wai. Raa aro mhar fee. 11Mam korat reto raa manes ro Yahudi saso Ait. Tna mtu kʼanya mawe, “Ait miya mefi?” 12Raa mawat mkyas Ait kmun-kmun kʼanya. Taro mawe, “Bi Ait tait Raa ro yoof.” He taro mawe, “Mfe, Ait besruf raa mawat.” 13Menohe ana waa raa manes ro Yahudi. Tibyo ana mkyas Ait fari fee. Mkyas rere kʼanya sai.
Yesus ykyas Ait
14Korat reto raa makyõ ti baro oh tna Yesus twok mam Samu ro Allah. Tna yasen ykyas bo. 15Raa manes ro Yahudi mari Ait ykyas bo moof kaket, tna ana mrok miskawowo. Ana mawe, “Raa refi yhar bo mnan si, menohe ykom bo ysya guru agama to fee! Ykom bo mam remo rAit sai.” 16Yesus yawe, “Bo ro Jõ tkyas refo bokyas aJõ fee. Bokyas refo mbam kʼAit ro ybis Jõ. 17Awya ro ksoh yari tna yno bo ro Allah yawe to, kbe yesait yhar yawe soh bokyas ro Jõ tkyas refo fo mbam Allah fe mfe a. 18Awya ro ykyas bokyas rait yesait to saso yasom rait yesait. Ait ksoh yawe raa mmat ait tna bibi ait. Menohe soh anu nmat raa sait ykyas bi roto taro yasom rait to, nri ait. Ait ro ykyas yasom bi ait ro ybis ait yama to, ait retait saso raa yasom rait sai. Ait retait oh mi raa ro ja ykyas bokyas ro ati. Bosruf aro mhau kʼait fee.” 19Tna Yesus yawe, “Tii Musa yoo Watum ro Allah yee kʼanu fe mfe a? Fyi re anu wefo aro nri Watum reto nbo nno fee? Fyi re anu tomer nme Jõ?” 20Tna raa msis weto mawe kʼYesus mawe, “Kabes mbo Nyõ a? Awya yawe yame Nyõ to?” 21Yesus yawe, “Tiwya Jõ tno bo msai sau mam ayõ ro anu ntmoh to. Nmat bo msai reto tna anu nrok niskawowo. ⌞Tna anu kmo Jõ nwe tisoh raa ro kiyam mam ayõ ro anu ntmoh to ma. 22Menohe anu nesait nno bo mam ayõ ro anu ntmoh to ye.⌟ Tiwya Musa ysi bo kʼanu yawe anu nkom ku sme wanu (sunat). (Bo reto Musa sair fee, hohos ranu tiwya ysi bo reto kʼanu.) Bo reto ait ysi tibyo anu ja nno mam ayõ ro raa ntmoh to ye. 23Ati ro anu nkom ku sme wanu mam ayõ ro ntmoh to, anu nnaut nwe nno feto afo re niwer Watum ro Musa reto fee. Feto to fyi re anu kmo Jõ? Jõ tisoh raa yetsu rait muuf mrok moof mam ayõ reto. 24Anu nsu nmat bo mam ti sau sai. Tna ja nuun boun fooh. Nno feto ma. Rau ro moof to, anu nmat ati ewok ye. Nmat sas tna nnaut bau mam nhaf mato wia matim. Tna kbe nhar kaket. Nno feto wia tibyo nhar tu oh nwe bo ro raa mno aro to mkair fe mfe a.”
Raa santri kʼanya mawe, “Yesus fi Mesias fe mfe a?”
25Tna raa ro Yerusalem baro mawe, “Ait refi oh mi raa saso mawe mame mefi, fe mfe a? 26Mfo refo Ait ykyas bo wore raa mawat mmat tna waa fee. Menohe raa aro mkyas bo mai kʼAit fee. Raa mabi wanu mhar mawe Ait fi Mesias7:26 Som reto to, “Ait ro Allah ysok tna yawe yamo Raja.” Mai ro Ibrani mawe Mesias, tna mai ro Yunani raa mawe Kristus. a? 27He mfe. Ait refi anu bhar Ait ybam rabin hayo yama. Meen Mesias yama to, kbe raa sait bo yhar Ait ybam hayo yama to fee.” 28Yesus ykyas bo mam Samu ro Allah mato fares tna ykyas ymai fari yawe, “Anu saah nhar Jõ fi awya, tna nnaut nwe anu nhar nwe Jõ tbam rabin hayo tama. Menohe anu wase fares: Allah oh mi ybis Jõ tama fo. Jõ fi Raabis sai. Tna bo ro Ait yawe to mabo tu oh. Menohe anu wase Ait. 29Tiwya thau su tsya Ait. Tna Ait oh mi ybis Jõ tama fo. Tibyo Jõ thar Ait.”
30Yesus yawe feto tibyo raa mawe mfot Ait. He mfe. Ayõ ro raa mfot Ait to sboh rau fefares. Tibyo raa sait bo yfot Ait fee.
31Raa weto to, mawat smot Yesus. Ana weto mawe, “Ati ro Mesias ro amu nwof yama to, kbe ysair bo ro hnah mawat miwer Raa refi fe mfe a?” 32Raa ro Farisi mari he raa mkyas bo reto. Tna fo imam manes msya raa ro Farisi mbis raa sbe ro kmot Samu ro Allah reto to, mawe mamo mfot Ait. 33Tna Yesus yawe kʼraa mam Samu ro Allah yawe, “Thau boti sai tsya anu. Tna fo kbe hah tamo to kʼAit ro ybis Jõ tama. 34Kbe anu saso Jõ. Menohe yuk ro thau to anu ntai nma fee. Tibyo kbe nkai Jõ fee ye.” 35Raa ro kro agama Yahudi weto mawe kʼanya mawe, “Kbe yamo tiyo tna re kbe anu bmat Ait u fee? Kbe yamoʼt rabin roto rauk? Tna yo kʼraa agama wanu ro mhau mam rabin reto? Yamo ykyas bo kʼana rauk? Soh mfe Ait yamo yo kʼraa ro wase agama ranu rauk? 36Riwai yawe, ‘Kbe anu saso Jõ. Menohe nkai Jõ fee.’ Tna yawe, ‘Yuk ro thau to anu ntai nma fee.’ Reto fyi oh meto?”
Aya ro mno raa mhau hame wajin
37Korat reto ayõ ro tis rau to ayõ ro ati. Tna Yesus yros ytu yawe, “Awya ro yhai sbit to, yama yo kʼJõ re yata aya!” 38-39Yesus ykyas aya reto to, ykyas Har ro Tuhan. Tna yawe, “Awya ro smot Jõ to Bokom ro Allah refo mkyas ait retait. Mkyas bofret mawe, ‘Kbe ait yfi aya sau. Tna aya refo mbam ait miyi mamo. Aya reto mno re raa mhau hame wajin.’” (Meen Yesus raa mame yajat tna hah yamoʼt sawro ro Allah. Tna Yaja yoo bo yase rAit yee yno Yesus yrok yase toni. Tna fo ysan Har ro Tuhan mhau kʼraa ro smot Ait. Kbe mhau mam mhaf mato wana. Yesus yase toni fefares to, ysan Har ro Tuhan kʼraa wAit fefares ye.)
40Raa mari bo ro Yesus ykyas reto, tibyo taro mnaut mawe, “Ait refi fi nabi ro anu bwof Allah ybis yama tu oh mefi!” 41Taro mawe, “Mfe, Ait refi Mesias!” He taro mawe, “Ah, Mesias ybam Galilea fee!7:41 Yesus yamo yabi mam Galilea. Tibyo raa manes weto mnaut mawe Ait fnya mabe mam tno. He mfe. Bonaut wana weto sre. Soh ana mmat sas, mtu sas, kbe mrok mhar mawe Ait fi fnya mabe mam Betlehem; remo ro tiwya raja Daud yhau oh meto.42Bokom ro Allah mawe Mesias ybam kube ro raja Daud. Tna kbe Ait yama ybam Betlehem, remo ro raja Daud tiwya fnya mabe.” 43Tibyo raa mkyas Yesus to, ana mhaf sau fee tna santri anya. 44Raa taro mawe mfot Yesus, he mfe; ana sait bo yfot Ait fee.
Nikodemus hawe raa mfot Yesus
45Riwai imam manes ro agama Yahudi msya raa ro Farisi to, mbis raa sbe wana mamo mfot Yesus. Raa sbe weto to ja kmot Samu ro Allah reto. Ana masen mamo mfot Yesus. He mfe. Ana hah me mama sai. Tna raa mabi ro agama Yahudi weto mtu bo kʼana mawe, “Fyi re anu nfot Ait nkah nma fee!” 46Raa sbe mawe, “Raa sait ja ykyas bo mnan mfi raa retait ykyas to fee!” 47Raa ro Farisi mawe, “Anu Ait besruf ye a? 48Raa manes aro smot Ait fee. Tna raa ro Farisi aro smot Ait fee ye. 49Ro smot Ait to, raa makin ro wase Watum ro Musa sai. Kbe ayoh mroh kʼana.” 50Bi Nikodemus tait raa manes sait ye. (Tiwya mti sau ait yamo ykyas bo ysya Yesus.)7:50 Yohanes 3:1-21 Bokom far-far wefo mkyas wore wo Nikodemus yamo wai, yamo ykyas bo ysya Yesus mam ayõ ro mti sau. Mfo refo ait hre siret su ysya raa manes taro weto tna yawe kʼana yawe, 51“Ati ro anu, raa ro agama Yahudi, btu safo mana bmit raa to, anu ja bkyas safo reto, tna btu bo kʼait bri wia. Watum ranu mbis mawe anu bno feto. Bno feto afo re bhar bo ro raa retait yno kaket wia. Tna fo boo safo mana bmit kʼait retait. Ja anu bfot raa ninya tna bbu wia ma.” 52Raa manes taro mastako Nikodemus mawe, “Amu nnaut nwe nyõ raa ro Galilea ye! Nmat Bokom ro Allah! Amu nhar nwe Allah ybis nabi aro mbam Galilea fee!” [ 53Tna raa weto sait-sait hah yamoʼt amah rait-rait.
81Menohe Yesus yamoʼt faut ro Zaitun.
Fai au ro mwyah
2Rabu momo Yesus hah yamoʼt Samu ro Allah. Tna raa mawat mama mo kʼAit. Yesus hre tna ykyas bo kʼana. 3Hre ykyas bo tna guruagama Yahudi msya raa ro Farisi baro mama twok. Tna sai ana mfot fai ro mwyah sau tna makah mama. Mama mse au mros susai masuf raa mawat weto. 4Tna guruagama msya raa ro Farisi weto mawe kʼYesus mawe, “Guru; fai au refo mwyah msya raa sait kri-kri tna amu nfot. 5Watum ro Musa mawe fnya ro mnan fefo kbe raa mawah fraa mai tibyo majat to! Tna amu ntu bo kʼNyõ: Nyõ nawe kbe amu nno bo bawya? Amu nme au fe mfe a?” 6(Ana mtu bo reto kʼYesus mawe sanet Ait. Soh Ait ykyas bo ro sre kbe ana maun Ait.) Yesus yari feto to shaitrun bait sai. Tna hre mte, yatem ykom bo bait mam tabam sai. 7Menohe ana beroh mtu mitan kʼAit. Tibyo Ait yasen yros yawe kʼana yawe, “Anu nkin wefo, soh awya ro yno iro fefares meto ee, yasen yama tinyi yoo fraa yai kʼau wia.” 8Tna Yesus hre u tna yatem ykom mam tabam u. 9Ana mari bo ro Yesus yawe reto tibyo ana sait-sait yamo sikba yuk reto marak. Sait yamo-yamo mbam kʼana ro mabi mamo snok mam ro tna beta. Tna Yesus ysya fai au refo mbewok aran mhau akus. 10Yesus yasen yros ytu kʼfai au reto yawe, “Raa ro mros wefo sor to, ana beta miyo? Raa aro mamus nyõ fee mfe a?” 11Fai au mawe, “Mfe. Raa aro fee.” Tna Yesus yawe, “Jõ ye tamus nyõ fee. Namo bonyõ. Tna maban mfo refo nno iro u ma.”]
Yesus tait kek ro mram tabam refo
12Ti baro firwas Yesus ykyas bo u kʼraa mawat. Yawe, “Jõ fi kek ro mno raa ro tabam refo to masu maah. Awya ro kro Jõ to, tafos aJõ mno re ait yasu maah. Tibyo ait yamo ninya mam amur u fee. Too tafos ro tna tee kʼait tna meen yhau hame wajin ye.” 13Raa ro Farisi mari bokyas rAit reto mawe, “Nyõ nesait nkyas Nyõ ai. Feto to bo ro Nyõ nkyas reto to, raa mari fee, kbe mtu sioh.” 14Yesus yawe, “Jõ thar tawe Jõ tbam tiyo tama. Tna thar tawe kbe tamo tiyo ye. Tibyo tesait tkyas Jõ sai to, tna raa saah mhar tro mawe bokyas aJõ reto to, mabo bau yum oh. Menohe anu to wase wore Jõ tama tna wase wore kbe Jõ tamo ye. 15-16Ati ro Jõ hre susai tna tse srah kʼraa to tno tesait kar fee. Jõ tsya Taja ro ybis Jõ tama to hre su. Tibyo soh Jõ tawe tse srah raa aro tari to, tno mnan si. Jõ tesait tmit safo kʼraa to fee. Menohe ati ro anu ntu srah raa nri to, anu ntu mamyot mfi bo ja raa sei sai mtu bo mari. 17Ja anu nri Watum ro Musa. Tna Watum agama ranu reto mkyas mawe, ‘Soh raa mabo ewok mmat bo tna mros mkyas mnan anya to, raa mhar mawe bokyas reto mabo. Raa mtu sioh fee.’ 18Feto Jõ tesait tkyas Jõ ai tna Ait ro ewok to, Taja aJõ. Ait ro ybis Jõ tait ykyas Jõ ye.” 19Tna ana mtu kʼYesus mawe, “Naja yhau mam tiyo?” Menohe Yesus yawe, “Anu wase Jõ tna wase Taja ye. Soh anu nhar Jõ to, anu nhar Taja ye.” 20Bo weto Yesus ykyas mam Samu ro Allah, kene wore yuk ro raa mama mruk pitis ro ana msan kʼAllah. Menohe ti ro Yesus yhau mam tabam refo mkak fefares. Ayõ rau snok fefares. Tibyo raa aro mfot Ait fee.
Yesus yawe raa ro hawe smot Ait to mno iro meto
21Yesus ykyas u yawe, “Jõ kbe tamo. Tna anu saso Jõ. Menohe iro ro nno mhau fares. Tibyo meen nhai. Tna yuk ro Jõ tamo to, anu kbe nmo fee.” 22Ykyas feto tibyo raa ro Yahudi mtu kʼanya mawe, “Riwai Ait yawe ‘Yuk ro tamo to, anu kbe nma fee.’ Ykyas fyi meto? Kbe takoh Ait a?” 23Tna Yesus yawe, “Anu nma nbam te. Tna Jõ fi troh tama tbam uu. Anu fo nbam tabam refo. Menohe Jõ fi tbam tabam refo fee. 24Riwai tawe, ‘Iro ro nno mhau fares tibyo meen nhai.’ Soh anu smot nwe Jõ fi ‘Ait ro Yroh Ybam Uu Yama’ to fee, kbe iro ro nno mhau fares tna meen nhai tu oh!” 25Ana mtu kʼAit mawe, “Nyõ fi awya?” Yesus yawe, “Muhrin aro-aro Jõ tkyas betoo kʼanu oh, afo re anu nhar nwe Jõ fi awya. Menohe anu nri fee. 26Thar tawe iro msya bo mkair ro anu nno to mawat. Menohe Jõ tesait kar tmit safo kʼanu fee. Bi Ait sait ybis Jõ tama. Tna Ait oh mi ykyas kʼJõ yawe bo bawya ro Jõ tama tkyas kʼanu. Tkyas bo weto aran sai. Tna bo ro Ait yawe to mabo tu oh.” 27Ana wase bo Yesus ykyas Yaja Allah kʼana. 28Feto to Yesus yawe, “Anu kbe tubat8:28 Yesus yhar bo meen raa mame Ait yajat mam ara warok. Tna ykyas Ait yawe kbe raa ’tubat’ Ait, mbam bokom ro nabiYesaya 52:13–53:12. Jõ abyõ. Jõ fi ’Ait ro Yroh Yama Yfi Raa Sai’. Anu tubat Jõ abyõ tna fo anu nhar nwe Jõ fi awya. Ja tkyas bo kʼanu afo re anu nhar Jõ awya mefi. Tna kbe nhar nwe tesait kar tno bo aro fee. Menohe tkyas bo ro Taja ykyas kʼJõ to sai aran. 29Ait ro ybis Jõ tama to yatam Jõ yoyo. Tna tno bo bawya ro Ait yhaf ksoh sai yoyo. Feto to kbe Ait sikba jõ akus to fee.”
Kube ro Abraham wait
30Yesus ykyas bo reto tna raa mawat mari tna smot (percaya) Ait. 31Yesus yawe kʼraa ro Yahudi ro smot Ait yawe, “Soh anu nri bokyas aJõ nbo matak nwe mabo oh to, anu fo kuber woJõ ro ati tu oh. 32Kbe anu susit u fee. Kbe nhar nwe bo maja ro Allah to bo ro ati. Tna bohar reto kbe mno anu nros ntak tibyo. Bohar reto mno wa re kbe iro make anu matak u fee. Mno re anu nmo sryan boh u fee.” 33Menohe ana mawe, “Amu fo kube ro Abraham. Tiwya amu nmo sryan ro raa mbis fee. Nyõ nkyas bawya meto ee!” 34Tna Yesus yawe, “Nnaut: Tkyas bofret, tawe awya ro yno iro to yfi sryan boh. Iro mbo ait matak. Tna yako hawe sai yno iro. 35Raa ro mamo sryan to, ja mhau tibyo mam amah ro bobot rait fee. Ait ynan fi raa ro amah mato rait reto fee. Menohe ku ro bobot retait yare wotur retait oh mi yhau ysya yaja tibyo. 36Tna Bobot retait yawe Ku rAit retait oh mi yatak yno re anu nmo sryan u fee. Mabo oh: Ait yatak re yno wa bo mkair ro make anu matak. 37Jõ thar tawe anu fo kube ro Abraham. Menohe anu hawe bo nri bokyas aJõ. Tibyo nwe nme Jõ. 38Bo bawya ro Jõ tmat Taja yno oh mi tkyas kʼanu. Tna bo ro anu nno to, anu nri nja ranu ybis mfi feto ye.” 39Ana mawe, “Abraham tait amu nja ramu!” Menohe Yesus yawe, “Soh anu fo kube ro Abraham wait to, kbe nno bo mnan fi bo ro Abraham tiwya yno ye. 40Menohe anu nwe nme Jõ. Jõ fi raa ro tkyas bo ro ati kʼanu. Bo ro tkyas weto to, tari mbam kʼAllah. Tiwya Abraham yno bo ro mnan fi anu nno reto fee! 41Anu nno bawya ro nja ranu ja yno.” Ana mawe, “Raa mwyah re mabe amu fee! Nja ramu Allah yesait aran!” 42Yesus yawe, “Jõ fi tama tbam Allah. Ait oh mi ybis Jõ troh tama tabam refo. Ksoh aJõ tesait sai oh mi Jõ tama mefo fee. Soh Allah tait anu nja to, meto mi anu ksoh Jõ ye. 43Anu fo ntai nri tna nhar bokyas aJõ fee. Bo bawya mno re anu nri bo ro tkyas to fee? 44Kabes yabi (Iblis) tait anu nja ranu. Anu fo raa wait. Ja anu nri bo ro ait ykyas. Mbam tinyi rau Kabes Yabi tait ja yame raa. Ait tait raa ro sioh. Tna ykyas bo ro mabo aro fee. Bo mafa ro ja yno to, ykyas bo sioh. Raa ro ja mkyas bo sioh to, kabes yabi tait maja rana. 45Anu ja nri bo sioh sai. Menohe Jõ tkyas bo ro mabo kʼanu. Tibyo anu nri Jõ fee, smot Jõ fee. 46Anu weto, awya yasu ymat Jõ tno iro? Menohe soh Jõ tkyas bo ro mabo to, fyi re anu smot Jõ fee? 47Awya ro yamo ku ro Allah rAit tait, yari bokyas rAit. Menohe anu fo ku ro Allah wAit fee. Tibyo anu nri bokyas rAit fee ye.”
Yesus ysya Abraham
48Raa ro Yahudi mawe kʼYesus mawe, “Amu nnaut nwe nyõ fi nnan raa ro Samaria. Tna kabes mbo Nyõ!” 49Yesus yawe, “Jõ fi kabes mbo fee. Jõ fi waa Taja. Tari bo ro Ait yawe. Menohe anu fo nri Jõ fee tna waa Jõ fee ye. 50Bi Ait sait ksoh yawe raa bibi Jõ. Jõ tesait oh mi tomer tno bo afo re kbe raa bibi Jõ fee. Tna bi Ait retait oh mi Raa ro kbe yros susai tna beah srah raa. 51Awya ro yari bokyas aJõ ybo matak to, meen yhai fee. Bokyas aJõ to bokyas ro mabo.” 52Raa ro Yahudi mawe, “Mfo refo amu nhar nwe kabes mbo Nyõ tu oh! Tiwya Abraham yesait yhai oh, tna nabi na sor ro tiwya Allah ybis mama to, mhai beta ye. Menohe Nyõ nawe, ‘Awya yari bokyas aJõ meen yhai fee.’ 53Fyi, Nyõ fi nawe nase niwer nja ramu Abraham a? Ait yhai oh, tna nabi na sor mhai ye. Nyõ fi awya?” 54Yesus yawe, “Soh Jõ bibi Jõ ai to, mafer marak. Menohe Jõ Taja oh mi bibi Jõ. Tna anu nwe Ait retait tait Allah ro anu smot. 55Anu wase Ait. Menohe Jõ thar Ait. Mfi bo tawe Jõ wase Ait to, reto kbe Jõ raa ro sioh-nat tnan mfi anu fo ye! Jõ thar Ait tna bo ro Ait yawe to, tbo matak. 56Hohos ranu, Abraham ksoh yinaut yawe kbe Jõ tama. Yhar yawe tama tna ait simaut.” 57Tna raa ro Yahudi mawe, “Nyõ 50 tahun fefares! Tna re nawe Nyõ nmat Abraham oh a?” 58Yesus yawe, “Abraham fnya mabe fefares to, Jõ fi ‘Raa ro thau yum boJõ oh.’”8:58 Yesus ykyas bo refo fo, ykyas Allah yasom rAit sau. Tiwya tinyi Allah ykyas kʼMusa yawe yasom rAit tait ‘Raa ro yhau yum bait’. Keluaran 3:1459Yawe feto tibyo raa Yahudi ro mros weto sor moo fraa mawe mai Yesus yajat. Menohe Ait ymyõt Ait wai, tna yamo sikba Samu ro Allah mato.
9Yesus yisoh raa ro yasu mboh
1Yesus yamo tna ymat bi ro yasu mboh sait. Ait retait tii fnya mabe to, yasu mboh bait yum oh. 2Tna kuber ro Yesus mtu kʼAit mawe, “Guru; fyi re bi refi fi, fnya mabe to yasu mboh feto? Ait yno iro fe mfe a? Yaja, yme mno iro a?” 3Yesus yawe, “Ait yesait yno iro mi yasu mboh meto fee. Tna raa mabi wAit mno iro ro misti re yasu mboh meto fee ye. Ait yasu mboh afo re kbe raa mmat bo ro Allah yno tna mhar yatak rAit.” 4Tna Yesus ykyas bofret kʼana yawe, “Baas fares fo, feto nma, anu bno bo rAit ro ybis Jõ. Kbe mti mama tna hawe sai to, raa aro mno bo fee. 5Wore Jõ thau fares mam tabam refo to, Jõ fi kek ro mram tabam refo.” 6Yesus ykyas mkak tna fo tfeh oot mam tabam. Ait hre tna ysom tabam reto tna mka mfi hrotat. Ait yoo tabam reto karu mam bi ait retait yasu. 7Yawe, “Nasen namo nyon nasu mam aya masu ro Siloam.” (’Siloam’ mkah mai ro Ibrani to mawe ’raa mbis’. ) Raa retait yamo yyon yasu mam aya reto tna hah yamo to, yasu mrok moof oh.
8Raa mhar mawe ait tait raa ro yasu mboh tna ja hre yayoh bo kʼraa. Tna ana mmat ait yasu ymat bo yamo mam iso. Tibyo mtu kʼanya mawe, “Ait refi awya? Ait fi bi ro ja hre yayoh bo metait fe mfe a?” 9Taro mawe, “Ait oh metait.” He taro mawe, “Mfe, raa retait yasu ynaif ynan bi retait sai.” Tna ait yesait yisboh kʼana yawe, “Aha, jõ oh mefi.” 10Ana mtu kʼait mawe, “Nyõ nno fyi re nasu moof to?” 11Ait yawe, “Raa sait ro yasom Yesus yoo tabam kbet yno mka, tna karu mam tasu aJõ. Tna ybis jõ yawe, ‘Namo nyon nasu mam Siloam.’ Tibyo tamo tyon tasu. Tna fo tmat bo!” 12Ana mtu mawe, “Raa retait miya?” Ait yawe, “Jõ twase ye.”
13Ana weto makah ait ro riwai yasu mboh retait mamo mo kʼraa ro Farisi.14Ti ro Yesus yoo tabam yisoh raa ro yasu mboh retait to, yno mam ayõ ro raa ntmoh (hari Sabat).15Feto to raa ro Farisi mtu sas kʼait refi ye mawe, “Fyi re Ait yisoh nyõ nasu moof?” Tna ait yawe, “Ait yoo tabam ro hrotat yse mam tasu ajõ. Tna ybis tamo tyon tasu, tna tasu ajõ maah.” 16Raa ro Farisi weto taro mawe, “Raa ro yno bo msai refi fi raa ro Allah ybis fee. Soh Ait Allah ybis meto mi Ait yiwer ayõ ro raa ntmoh feto fee.” Menohe raa taro mawe, “Mfe, raa ro mno iro ja mno bo msai mnan fefo fee!” Tibyo raa ro Farisi masen santri kʼanya feto. 17Tna ana mtu kʼait ro riwai yasu mboh tait u mawe, “Nyõ oh mi riwai Ait yisoh. Nyõ nnaut nawe fyi? Ait tait awya metait?” Menohe ait yawe, “Raa retait tait nabi ro Allah ybis yama ykyas bo wAit.” 18Menohe raa ro Yahudi weto mtu sioh mawe tiwya ait retait yasu mboh fee, tna mfo yasu mrok moof to fee. Tibyo ana mtu raa mabi wait mama. 19Tna mtu sas kʼana mbewok mawe, “Ait refi ku ranu bewok fe mfe a? Tna ati ro yme mabe to ait yasu mboh fe mfe a? Fyi oh mi mfo ait yasu ymat bo fo?” 20Yaja ysya yme mawe, “Ait refi ku ramu. Tna amu nhar nwe ati ro yme mabe ait to yasu mboh yum bait oh. 21Menohe amu wase fyi re ait yasu moof. Tna amu wase awya ro yisoh ait yasu ye. Sik ma ntu kʼait yesait sai. Ait yabi oh tna yesait ykyas bo kʼanu.” 22Ana mbewok mhar mawe taa raa ro Farisi mawe, “Awya ro smot Yesus yawe, ‘Ait tait Mesias’ to, kbe amu nikyak ait, nwe ait skabuk su ysya raa ro Yahudi u fee.” Tibyo yaja yme waa raa manes ro Yahudi. 23Reto oh mi ana mbewok mawe, “Ait yabi oh. Feto to ntu kʼait yesait sai.” 24Tna raa ro Farisi mtu kʼait ro riwai yasu mboh refi mawe yama yo kʼana u. Yama tna ana mawe, “Amu nhar nwe Ait ro yasom Yesus retait tait Raa ro ja yno iro. Ait ytai yno re raa masu maah to fee! Nkyas nawe bi Allah yesait oh mi yisoh nyõ re nasu maah. Afo kbe raa bibi Allah.” 25Tna ait retait yawe, “Ait retait raa ro ja yno iro fe mfe a? Jõ wase ye! Ro jõ thar to tiwya jõ tasu mboh. Tna mfo refo jõ tmat bo oh.” 26Tna raa weto mtu kʼait u mawe, “Ait yno bawya kʼnyõ re nmat bo fo?” 27Ait retait yawe, “Riwai jõ tkyas kʼanu oh to, he anu nri fee. Fyi re anu nwe nri u? Anu nwe kbe nmo nkro Ait ye a?” 28Ana mari bo ait yawe reto tna mamus ait mawe, “Nyõ fi raa ro namo kuber Raa retait! Amu fo raa ro nri bo ro Musa ykom! 29Amu nhar nwe Allah ykyas bo kʼMusa oh. He amu wase Raa retait ybam tiyo meto!” 30Tna ait ro tii yasu mboh retait yasah yawe, “Ait yisoh jõ tasu mrok moof, tna anu wase nwe Ait retait ybam tiyo to fyi? 31Anu bhar bwe soh raa ja mno iro to, Allah kbe yari boyoh raa weto fee. Menohe bi Ait yari boyoh kʼraa ro ja mhau mrat msya Ait tna mno bo ro Ait yawe. 32Maban tiwya tinyi mamo snok mam mfo wefo to, raa sait bo yisoh raa ro masu mboh maban mam wore fnya mabe to fee. 33Soh Ait retait raa ro Allah ybis to fee, meto mi Ait ytai yno bo feto fee.” 34Tna ana mawe kʼait mawe, “Nbam ti ro nme mabe nyõ to nyo nno iro oh. Tna nyõ fi nawe nama watum bo kʼamu a?” Tna ana mikyak ait mawe ait skabuk su ysya raa ro Yahudi u fee.
35Yesus yari he ana mikyak ait ro yasu maah retait, tibyo yamo saso. Ykai tna ytu kʼait yawe, “Nyõ smot ’Ait ro Yroh Yama Yfi Raa Sai’ tait fe mfe a?” 36Bi ait ro yasu maah retait yawe, “Awya metait? Nawe kʼjõ ye re kbe jõ smot Ait ye.” 37Tna Yesus yawe, “Ait nyõ nmat oh. Ait ysya nyõ mbewok nkyas bo ngkri to, Ait oh metait.” 38Raa retait yawe, “Tuhan; jõ smot Nyõ.” Tna ait yaka mte ybaut Ait. 39Yesus yawe, “Jõ tamaʼt tabam refo mkah bo ttu srah raa tari. Tama afo re tno raa ro masu mboh to mmat bo. Tna ro masu mmat bo to, tno ana masu mti.” 40Raa ro Farisi mabo baro mros mam weto ye tna mari bo ro Yesus yawe reto. Tna ana mtu kʼYesus mawe, “Fyi? Nyõ nawe amu fo raa ro masu mboh ye a?” 41Yesus yawe, “Mfi bo anu nsu mboh meto mi safo makan mbtek mai kʼanu fee. Menohe anu nwe anu raa ro nmat bo. Feto to iro ro anu nno to mhau tu.”
10Yesus ynan fi ana masa rau
1,2Yesus yawe, “Nnaut: Domba mana mawat mhau mam ana (kandang). Tna ana reto masa rau sau aran sai. Raa sait ja yhau kmot masa reto. Ait ywan tok. Soh raa ro ja ysia domba wait yama to, ait ro kmot masa reto yawe raa refi yama twok. Menohe mfi bo raa sait yama wai, ait twok mam masa rau to fee, ait yaut ana reto yroh ti mato to. Anu bhar bwe ait retait raa ro ysyõf domba.3Ait ro ysia domba yama tna raa ro ja kmot ana masa reto yhar ait yawe, ‘Ae, nama ntruk.’ Tna ait ro ysia domba ytu domba wait weto. Ytu domba weto masom wana tna domba weto kro ait mamo. Domba wait weto mari ait ymai tna fo kro ait mamo. 4Ait yakah domba wait weto beta frok. Tna ait yamo. Yamo yatim tna domba weto mhar ait ymai tibyo nkro. 5Menohe soh raa srim sait yama ytu domba weto mama to; kbe domba weto hawe kro ait ye. Ana wase mai rait reto. Tibyo waa tna msam.”
6Yesus fret bo reto kʼana menohe ana wase bo maja rau ro Ait ykyas reto.
7Feto to Yesus yawe kʼana yawe, “Jõ fi tamo masa ro domba twok. 8Tiwya raa taro mama tna ksoh mawe raa kro ana. Ana sioh mawe soh raa kro ana to, kbe riof kʼana. He mfe. Raa ro tiwya mama, ti ro Jõ tarak fares to, ana beta raa ro msyõf bo sai. Tna domba mari ana mmai fee ye. 9Jõ fi tamo masa. Awya ro twok mam masa reto kbe ykai riof ro mase. Awya ro yama yo kʼJõ to, ait ynan fi domba ro ja mamo me mkai bosafom ro moof tna mabat. 10Raa taro to mnan fi raa ro mama mawe msyõf domba weto, tna mame domba weto, tna sikowah domba weto. Menohe Jõ tama afo re riof kʼana. Tama re kbe ana mhau bo mninon. Bokyas ro ati oh mefo.”
11-12Tna Yesus yawe, “Jõ fi Raa ro tsia domba woJõ kaket. Ait ro ja ysia domba wait kaket to, soh ymat mtah rbyoh mama mafit domba wait re mabo to, ait waa fee. Ait yno wa re mtah reto mafit domba wait fee. Ysan yetsu rait mkah riof ro domba wait. Menohe ait ro kmot domba raa to, soh ait retait ymat mtah rbyoh mama mafit domba weto to, kbe ysam yamo sikba domba weto. Tibyo mtah mafit domba taro mabo, tna taro mamo brir-brar. 13Raa retait saso boren ro kbe raa maren sai. Au oh mi ait kmot domba weto. Ait ye ynaut domba weto fee. Ait yisoh ymat domba weto kaket fee. Tibyo ysam sikba domba weto sai. 14Menohe Jõ fi raa ro kmot domba woJõ kaket. Jõ thar domba woJõ sau-sau, tna ana mhar Jõ ye. 15Taja yhar Jõ tna Jõ thar Ait mfi feto ye. Tna Jõ bitsre Jõ tetsu aJõ raa mame afo kbe riof raa ro mnan fi domba woJõ. 16Jõ kmot domba woJõ roto taro ye. Ana weto ja mberur su msya domba woJõ wefo fo fefares. Mhau hayah fares. Kbe takah domba weto nma. Kbe ana mari Jõ tmai tna kro Jõ ye. Meen tno re domba woJõ beta mberur su mamo domba mkbair sau. Tna kbe Jõ tesait aran kmot ana beta. 17Jõ tsan tetsu aJõ mkah riof raa woJõ weto beta. Reto oh mi Taja yhafri Jõ. Meen tsan tetsu aJõ raa mame mkah domba woJõ tna kbe trok tasen. 18Raa sait bo ytak tetsu aJõ kʼJõ fee. Jõ ksoh aJõ sai oh too tsan. Taja yno Jõ tatak re too tafos aJõ tsan tna tatak re tesait trok tasen ye.”
19Raa ro Yahudi mari bokyas ro Yesus reto tibyo mhaf sau fee. Ana santri anya u. 20Ana taro mawat mawe, “Ait refi fi kabes mbo tna yker meto! Nri Ait ma!” 21Menohe ana taro mawe, “Raa ro kabes mbo to ja mkyas bo feto fee! Ait kabes mbo fee. Raa ro kabes mbo to, ja ana misoh raa ro masu mboh to mno re masu mrok maah mfi feto fee.”
Raa mabi ro Yahudi hawe Yesus
22Mam soo ro arin ngkanam tna raa mfos to raa ro Yahudi ja makyõ korat sau ro masom ’PentahbisanBait Allah’. Tna ti reto to Yesus yamoʼt Yerusalem. 23Tna Yesus yamo-ama bait Samu ro Allah mam yuk ro masom ’Serambi Salomo’. 24Raa ro Yahudi mawat mama mur mtan Yesus. Tna mtu kʼAit mawe, “Snyi ja naut tna Nyõ nawe abyõ afo re amu nhar nwe Nyõ fi Mesias10:24 Som reto to, “Ait ro Allah ysok tna yawe yamo Raja.” Mai ro Ibrani mawe Mesias, tna mai ro Yunani raa mawe Kristus. fe mfe a?” 25Yesus yawe, “Riwai Jõ tawe oh kʼanu to. Menohe anu nhar nwe Jõ fi Mesias fefares. Bo msai ro Jõ tno sor to Taja ybis, tibyo tno. Tno mkah Ait yatak rAit afo re anu nmat tna nhar nwe Jõ fi awya. 26Menohe anu wefo fo domba woJõ fee. Tibyo anu smot Jõ fee. 27Domba woJõ to ja mhar Jõ tmai. Tna Jõ thar ana. Tna ana kro Jõ. 28Jõ tno re ana meen mhau hame wajin. Meen ana mhai fee. Tna raa sait bo yatak ytak ana mam Jõ tatem bo fee saut. 29Taja ro ysan ana kʼJõ retait tait yase ybo bombra beta. Tna raa aro matak re mtak ana mbam Ait yatem rAit fee. 30Jõ tsya Taja to Raa sau aran sai: Amu mbewok fo nhaf, nkit msya srau sau aran.”
31Yesus ykyas bo reto tna raa ro Yahudi moo fraa u mawe mai Yesus yajat. 32Tna Yesus yawe, “Jõ Taja ybis yawe tno bo ro msai. Bo msai ro Jõ tno weto to mawat oh. Tna tno bo msai ro ryo afo tibyo anu nwe nme Jõ?” 33Menohe ana mawe, “Bo ro nno fee. Nyõ fi raa tu sai menohe riwai nawe Nyõ nnan anya nsya Allah. Nyõ namus-amas Allah oh meto. Feto oh mi amu nwe nwah fraa nii Nyõ to.” 34Tna Yesus yawe, “Menohe Watum ro Musa ja anu nri to mawe,
‘Tawe anu fo raa matak nfi “allah.”’10:34 Mam bokom far-far refo Allah ykyas bo kʼraa mabi ro mbis raa mana ro Israel.
Mazmur 82:6
35Anu bhar bwe Bokom ro Allah to mhau bau yum. Tiwya Allah ykyas bo reto kʼraa baro. Soh Allah yawe ana weto mfi ‘allah’ to, 36tnaut tawe kbe Raa roto sait yfi ‘allah’ ye saah. Mabo oh: Allah ysok Raa sait tna yse Ait hayah. Ait yawe, ‘Ait tait Raa aJõ.’ Ait retait Allah ybis yroh yama tabam refo to. Tiwya Allah yawe feto. Tna Jõ tawe ‘Jõ fi Ku ro Allah yare.’ Fyi re anu nwe Jõ tamus-amas Allah oh meto? 37Soh Jõ tno bo ro mnan anya msya bo ro Taja ja yno to fee, smot Jõ ma. 38Bo ro tkyas sai mno re anu smot Jõ fee rauk. Menohe nmat bo ro tno. Jõ tno bo ro mnan Taja aJõ ja yno. Tno afo re anu smot Jõ. Jõ tno re kbe anu srau nwe Jõ Taja yhaf, srau rAit sau su ysya Jõ. Tna Jõ thaf, srau sau tsya Ait ye.”
39Yawe bo reto tna ana tomer u mawe mfot Ait. Menohe Ait frok yamo sikba ana.
Yesus yhau mam aya maam ro Yordan
40Tna fo Yesus hah yamo frit aya ro Yordan yamoʼt majoh ro tiwya Yohanes baptis raa wia. Tna yhau. 41Tna raa msis mama mo kʼAit. Tna mawe, “Tiwya Yohanes yno bo msai aro fee. Menohe ykyas Raa refi. Tna bo ro yawe to mabo mnan bo ro tii ait ykyas.” 42Tibyo raa msis ro siret mam beto smot Yesus.
11Lazarus yhai tna Yesus yno ait yrok yasen
1-2Raa sait yasom Lazarus yhau mam remo ro Betania. Yhau ysya yano na Maria msya Marta. (Yano Maria refo oh mi kbe moo minyak wangi karu Tuhan Yesus yaa rait tna mawah mana mawyan karu to.) Lazarus tait kiyam. 3Kiyam tibyo yano mbewok reto tiim soo kʼYesus mawe, “Tuhan; amu nno ramu ro nyõ nhafri tait kiyam.” 4Yesus yari feto tna yawe, “Kiyam reto to misti ait yhai fee. Bo mno feto re raa bibi Allah. Ait kiyam afo re kbe raa bibi Ku ro Allah yasom rAit ye.” 5Yesus yhafri Maria msya mao Marta msya mano Lazarus. 6Yesus yari soo ro raa mawe Lazarus ait kiyam. Menohe Ait beroh yhau mam beto ti ewok naut. 7Tna fo yawe kuber wAit yawe, “Nma hah bmoʼt Yudea.” 8Ana mawe, “Guru; taa sai raa ro Yahudi mam beto mawe moo fraa mai Nyõ! Tna re mfo nawe nhah namoʼt beto u a?” 9Yesus yawe, “Mbam rabu mamo snok hreha to, arin maah. Awya ro yamo ayõ ro maah to, kbe ait wasim fee. Kek ro mhau mam uu mno re tabam refo maah. 10Menohe soh yamo mamur to, kek aro fee, kbe ait wasim.”11:10 Yesus ykyas bofret reto afo re ana mhar he Allah yhar bo rAit, tna ayõ ro Ait yesait ysok. Feto to Ait yno wa raa mno bo mai Yesus. Allah ybis fefares.11Tna Yesus yawe, “Bfoh ranu, Lazarus, yjin oh. Tna Jõ tamo tti ait yrok yasen.” 12Menohe kuber ro Yesus mawe, “Tuhan; soh Lazarus yjin sai to, kbe kiyam marak.” 13(Yesus yhar yawe Lazarus yhai oh. Riwai yawe ’yjin’ to Ait fret bo sai. Menohe kuber wAit mnaut mawe ykyas yawe yjin mfi bo ja soo raa mno.) 14Tibyo Yesus yawe kʼana abyõ yawe, “Lazarus yhai oh. 15He Jõ tarak mam remo reto to, moof kʼanu. Soh anu nmat bo ro kbe tno to, kbe anu smot Jõ. Nma, anu bmo bmat ait.” 16Tna Tomas, ro ja raa mtu yasom Didimus tait, yawe kuber roto yawe, “Nma bmo kro Ait tna soh raa mame Ait to, kbe anu bjat su bsya Ait rof!”
17Ana mamo. Tna snok mam Betania to, tna raa mawe kʼYesus mawe Lazarus yhai tna raa mse mam isra mato yasno jiit oh. 18Remo reto to kene mam Yerusalem. Nmo to kilo mara tuuf bo feto. 19Tna raa ro Yahudi mawat mama mbam Yerusalem mawe hre mawia msya Lazarus yano mabo ewok reto. 20Marta mari he Yesus yama. Tna au frok mamo mtar Ait mam iso. Tna Maria mhau mam amah. 21Marta mamo mo kʼYesus tna mawe, “Tuhan; Nyõ nama mam befo fooh mi tano ajõ yhai fee. 22Menohe jõ thar tawe bo bawya sai ro Nyõ nayoh kʼAllah to, kbe Ait yari.” 23Yesus yawe, “Nano anyõ kbe yrok yasen.” 24Marta mawe, “Thar tawe meen tabam haberek u tna raa ro mhai kbe mrok masen. Feto meen Lazarus yrok yasen.” 25Yesus yawe, “Jõ oh mi Raa ro yno re raa mrok masen. Tna tno re meen ana mhau hame wajin. Raa ro smot Jõ kbe mhai to, menohe mhai tibyo fee. 26Awya ro yhau smot Jõ to, kbe yhai fee. Nyõ nhar nwe bokyas aJõ refo bo mabo to, fe mfe a?” 27Marta mawe, “Ae Tuhan. Jõ smot Nyõ. Jõ thar yum oh tawe Nyõ fi Mesias. Nyõ fi Ku ro Allah yare. Nyõ fi Raa ro tiwya raa mkyas mawe, ‘Meen Allah ybis Raa sait yroh yamaʼt tabam refo.’” 28Marta mawe feto tna au hah mamoʼt amah. Tna samoh kʼmao Maria mawe, “Bi Guru yhau mam wono. Tna Ait ytu nyõ yawe namo.” 29Maria mari feto tna masen fooh tna frok mamo mo kʼYesus. 30Ti reto Yesus twok remo reto fefares. Ait yhau fares mam yuk ro Marta riwai mkai Ait. 31Raa Yahudi ro hre mawia msya Maria mam amah to mmat he Maria masen tna frok fooh mamo. Ana mnaut mawe mamo mawia mam yuk ro isra wore raa mse Lazarus yetsu. Tibyo ana beta masen kro au. 32Menohe Maria mamo mo kʼYesus. Mmat Ait, tna mjit mimna mam wore Ait yros. Tna mawe, “Tuhan; ti ro Lazarus yhai to, soh Nyõ nhau mam wefo mi, tano ajõ yhai fee.”
33Yesus ymat Maria mawia feto tna ymat raa ro Yahudi mama msya au to mawia ye. Ymat tibyo Ait srau mham ye. 34Yawe, “Anu nse ait mam woyõ?” Tna ana mawe, “Nama nmat.” 35Tna Yesus yawia. 36Raa ro Yahudi weto mmat he Yesus yawia tna mawe, “Ait yhafri Lazarus toni.” 37Menohe taro mawe, “Ait yisoh raa ro masu mboh to masu maah. Fyi re Ait ymat Lazarus fee, tna yisoh kiyam rait yno wa re yhai fee?” 38Yesus sraujin toni u. Tna yamoʼt isra reto. (Tiwya raa moo Lazarus mse mam isra mato, tna muut mkah fraa mabi sau.) 39Yesus yawe, “Niyaban fraa reto!” Menohe Lazarus yano, Marta mawe kʼYesus mawe, “Nno ma! Ait yhau mam isra mato masno jiit oh. Ynis oh!” 40Yesus yawe, “Tkyas kʼnyõ oh tawe, ‘Soh nyõ smot Jõ to, kbe nmat bo yase ro Allah rAit.’” 41Tna ana miyaban fraa reto tna Yesus yasu heyut ayoh yawe, “Taja, Nyõ ja nari bo ro Jõ tkyas. Tibyo tayoh asik mase. 42Thar tawe Nyõ nari bo ro tkyas yoyo. Menohe tkyas bo refo afo re raa ro mhau mam wefo mari tna smot Jõ. Afo re ana mhar mawe Nyõ oh mi Raa ro nbis Jõ fo.” 43Yesus yawe feto, tna ytu mkah ymai fari yawe, “Lazarus, frok nama!” 44Tibyo Lazarus yari tna frok yama. Ait frok menohe hawee ro taa raa moo sro yetsu to make ait matak fares. Tna hawee sau sro yasu ye. Tna Yesus yawe kʼraa ro mros mam weto yawe, “Skur hawee reto re mbitsre ait yamo.”
Raa siret su saim re mame Yesus
45Raa Yahudi mama hre mawia msya Maria tna ana masu mmat bo msai ro Yesus yno reto. Tibyo ana mawat smot Yesus. 46Menohe ana taro mamo mo kʼraa ro Farisi tna mkyas bo ro Yesus yno reto.
47Tibyo raa ro Farisi msya imam manes mtu raa manes taro ro ja mtu safo raa ro Yahudi to beta mama. Mama hre siret su tna ana mtu kʼanya mawe, “Anu bno fyi? Raa refi yno bo msai mawat! 48Soh anu bno bo aro fee, kbe raa beta smot Ait mawe Ait fi Mesias! Tna tis rau to, raa pemerintah ro Roma kbe mama soyak yuk refo. Yuk refo tiwya Allah ysan kʼanu, raa mana ro Yahudi. Mfo refo pemerintah ro Roma mbo anu, menohe mbis mawe bo ro agama ranu to, besait bno tna bbis fares. Anu waa kbe Raa refi mno raa mrok mnin-nin. Tna fo pemerintah mama mbo anu matak. Tna mawe besait bbo raa wanu u fee ye.” 49Raa weto sait yasom Kayafas. Tahun reto to, ait retait yamo imam agama Yahudi ro yase. Tna ait yawe, “Anu nhar bo aro fee! 50Rau ro moof to, raa sait yhai sai. Soh mfe, kbe raa mana ranu ro Yahudi majat beta.” 51Kayafas yawe feto menohe bokyas reto mbam ait yesait fee. (Tahun reto ait oh mi yamo imam ro yase. Feto tibyo Allah oh mi ybis ait ykyas bo reto ynan fi nabi ro ykyas bokyas ro Allah.) Kayafas ykyas feto tna bonaut rait yesait yawe riof kʼraa mana ro Yahudi ⌞mam tabam refo. Menohe bo maja ro Allah ynaut yawe to: Yesus kbe yajat siwyan iso re raa mkai riof mase ro hame wajin.⌟ 52Yajat afo re yno bo moof kʼanu ro Yahudi kar fee. Kbe yajat afo re yno bo ro moof ku ro Allah makus mbrir-brar sor mam tabam refo beta ye. Mfo refo ana mhau ha-hayah. Menohe kbe mhau su tna mamo mhaf srau sau su ye. 53Maban ayõ reto raa ro Yahudi saim mawe mame Yesus yajat.
54Feto to Yesus sikba Yudea. Yawe yamoʼt wore raa masu makin mmat Ait fee. Tibyo yamoʼt remo sau ro masom Efraim. Efraim to mhau kene wo tabam ro riamo. Tna ysya kuber wAit mamo mhau mam weto.
55Korat ro Paskah kene oh. Tibyo raa ro Yahudi mawat mbam remo aro sor mamoʼt Yerusalem. Mamoʼt Yerusalem mawe misoh ana siwyan mamyot bo mafa raa ro agama Yahudi ja mno ati ro makyõ korat ro Paskah fefares. 56Raa mawat mamoʼt Yerusalem tna mamoʼt Samu ro Allah. Ana saso Yesus he mkai fee. Tibyo mros mam Samu ro Allah mkyas kʼanya mawe, “Anu nnaut nwe kbe Yesus yamaʼt korat refo fe mfe a?” 57Taa imam manes msya raa ro Farisi msi bo kʼraa mawe, “Awya ro yhar yuk ro Yesus yhau mam woyõ to, kbe raa retait yama yawe kʼanu.” Mbis feto re kbe ana mamo mfot Ait.
12Maria moo minyak wangi maas Yesus yaa
1Ti ntamam naut tna Korat ro Paskah. Tna Yesus yamoʼt Betania, remo ro Lazarus. Lazarus tait raa ro tiwya yhai tna Yesus yno yrok yasen. 2Yesus yama tibyo raa siwyan bo sohmaam. Tna Lazarus, Yesus msya raa taro hre su tna Marta masyõ bo sohmaam reto. 3Tna Maria moo minyak wangi ro mabyoh maut. Kusia reto liter hariyah bo. Moo minyak wangi reto mtu mam Yesus yaa. Tna ngkaru mkah mana mawyan rau. Minyak reto sawer fiyau mam amah mato reto beta. 4Yudas Iskariot tait, kuber ro Yesus sait. (Ait oh mi ro kbe hren serek Yesus.) Ymat bo ro Maria mno tna hafrah yawe, 5“Nno bawya meto ee? Fyi re minyak reto sikowah sai a? Rau ro moof to, nasim kʼraa tna noo mabyoh rau 300 dinar. Tna mabyoh ro mase reto kbe raa msan kʼraa kinyah ro mse bo fee.” 6Yudas ymat raa ro kinyah fee. Ait tait raa ro ybo pitis wana beta. Ait yasu mase ja ysyõf pitis wana baro. Au oh mi yawe feto. 7Menohe Yesus yawe, “Bhah au ma! Mno feto re mnaut ti ro kbe raa sama hai aJõ. 8Raa kinyah to, ja mhau su msya anu yoyo. Menohe Jõ fo kbe thau tsya anu yoyo fee.”
Raa mawe mame Lazarus
9Raa ro Yahudi mawat mari he Yesus yhau mam Betania. Tna ana masen mamoʼt beto. Mamo mawe mmat Yesus yesait ye, tna mamo mawe mmat Lazarus ro Yesus yno yrok yasen to ye. 10Feto tibyo imam manes ro agama Yahudi saim bo mawe mame Lazarus ye. 11Mawe ait yaam tna bo reto misti re raa ro agama Yahudi mawat mawe kro Yesus tna smot Ait tna sikba bo ro ana mkyas.
Raa bibi Yesus
12Korat ro Paskah kene oh. Tibyo raa ro Yahudi mawat mbam remo aro sor mamaʼt Yerusalem oh. Yesus sohmaam bo ysya Lazarus tna rabu ti fo yawe yamoʼt Yerusalem. Raa mawat mari he Yesus yamaʼt Yerusalem. Yama fares mam iso 13tna ana mama mtar Ait. Raa miji ara palem mata tna mbo mamo sikoyõ mtar Yesus mawe, “Hosana! Ait yase toni! Tuhan ybis Ait yama! Ait yamo Raja tna ybo raa ro Israel!”12:13 Mam mai ro Ibrani raa bibi raa to, ana mawe ‘hosana’.14Yesus tru keledai ro maku teta tna sau tna yaut hre abyõ. Bo reto yno mnan Bokom ro Allah mawe:
15“Anu raa ro Yerusalem, ro mhau mam atu ro Sion; waa ma. Nmat, Raja ro ybo anu tait yama yo kʼanu. Ait yaut keledai ro tna sau yama.”
Zakharia 9:9
16Ti reto kuber ro Yesus wAit mnaut bokom far-far reto fee. Ana srau bombra weto fefares. Menohe kbe Yesus yrok yasen tna fo ana mrok mnaut bo reto tiwya raa mkom oh mam Bokom ro Allah. Tna ana mrok mnaut mawe bo ro raa tiwya mno weto, ana mno kʼYesus mnan si Bokom reto.
17Ti weto to, raa ro mhau mam Yerusalem to, ana mawat tiwya mmat Yesus yno Lazarus yrok yasen tna frok ybam isra mato reto. Tna ana weto mkyas bo reto renti. 18Tibyo raa mawat mhar mawe Yesus yno bo msai reto. Feto tibyo ati ro Ait yamaʼt Yerusalem reto to, raa mawat mamo mtar Ait. 19Raa ro Farisi mmat he raa msis-sas mamo mo kʼAit tibyo mawe kʼanya mawe, “Raa arin aso beta mamo kro Yesus, tna anu bno bo aro u fee!”
Yesus ykyas yawe kbe Ait raa mame yajat
20Mam korat ro Paskah to, raa mawat mamo mbaut Allah mam Yerusalem. Ana ro mama makyõ korat reto to, ana baro raa ro Yunani ye. 21Ana weto mamo mo kʼYesus kuber wAit sait yasom Filipus. (Filipus tait remo rait Betsaida mam provinsi ro Galilea.) Mamo mo kʼFilipus tna mawe, “Amu nwe ksoh nmat Yesus.” 22Tna Filipus yamo yawe bo reto kʼAndreas. Tna ana mbewok mamo mawe kʼYesus. 23Tna Yesus yawe, “Jõ fi ’Ait ro Yroh Yama Yfi Raa Sai’. Ayõ kene wo Jõ thai. Kbe bo mai kʼJõ tna raa mmat Jõ tase aJõ. 24Nnaut: Tkyas gandum makan kʼanu tawe, ‘Ja gandum makan krioh mbam kayoh rau tna mbtek mai tabam. Tna mbrom-brom mhai. Tna fo kmoh frok. Tna mo maut. Tis rau to make. Make makan sarer. Soh gandum makan reto mbrom-brom mam tabam fee, kbe mhau makan sau yum. Soh mhai fee kbe make fee.’ 25Awya ro ksoh yhau mam tabam refo toni to, kbe ykai riof ro hame fee. Menohe awya ro yako yawe yhau mam tabam refo kait fee, meen ait retait yhau hame wajin. 26Awya ro yawe yno bo woJõ to, yako hawe sai yama kro Jõ. Wore wo thau to, kbe sryan aJõ yhau mam beto ye. Kbe Taja ymat sryan aJõ retait yawe ait yno bo ro moof.” 27Tna Yesus yawe, “Mfo refo to tnaut yyi toni. Ayõ refo mama tna tkyas tawe bawya? Tayoh Taja tawe riof kʼJõ fe mfe a? Mfe. Bitsre bo ro samyoh refo mai kʼJõ. Jõ tsan tafos aJõ oh mi tama mam tabam refo to! 28Tawe, ‘Taja bo ro tno refo, nno re raa mmat tibyo bibi Nyõ nasom aNyõ.’” Tna Allah ybam sawro rAit ykyas yawe, “Tno oh. Tna kbe tno u.” 29Raa ro mros mam weto to mawat. Ana mari mai reto tna taro mawe, “Barmabyõ mji!” Menohe taro mawe, “Mfe, malaikat sau mkyas bo kʼAit!” 30Yesus yawe, “Mai reto anu nri ye a? Fyi re Allah ykyas kʼJõ feto? Yno afo re anu nri mai rAit ye. 31Ayõ rau snok oh. Allah kbe ytu srah raa ro tabam refo. Yno tibyo kabes yabi (Iblis) ro ja ybo raa ro tabam refo to, Allah yikyak ait yamo. 32Menohe kbe raa tubat Jõ abyõ tna tajat. Feto kbe tkuk raa beta mama mo kʼJõ.” 33Yesus yawe feto afo re raa mhar mawe kbe raa mame yajat mam ara warok. 34Raa mawat mros mari bo ro Yesus ykyas. Ana mari bo ro yawe reto tna mawe, “Watum ro Musa mkyas mawe, ‘Mesias kbe yhau hame wajin.’ Fyi re Nyõ nawe, ’Ait ro Yroh Yama Yfi Raa Sai’ tait, kbe raa mame yajat? ’Ait ro Yroh Yama Yfi Raa Sai’ tait bi awya metait?” 35Yesus yawe, “Kek reto mhau su msya anu waor sai. Arin ro maah fo, nmat sas iso ro anu nmo. Kbe arin ro mti mama. Kbe nmo fyi-fya? Awya ro yamo mam amur wase iso ro ait yamo. 36Smot Kek reto wore mhau msya anu fares to. Smot Kek reto afo re kbe nhau mam arin ro maah.” Yesus ykyas bo reto mkak tna sikba yuk reto sesa Ait.
Raa ro agama Yahudi smot Yesus fee
37Yesus yno bo msai mawat ro merif Allah yatak rAit. Yno re kbe raa ro Yahudi mmat. Menohe ana smot Ait fee. 38Bo reto mamo mnan si bo ro tiwya Allah ybis nabi Yesaya ykyas yawe:
“Tuhan; awya yari bokyas ramu tna yfot yse kʼait? Awya ymat yatak aNyõ?”
Yesaya 53:1
39Ana mari watum aNyõ, menohe ana moo mse kʼana fee. Feto to nabi Yesaya ykyas u yawe:
40“Allah yno ana masu mboh afo re mmat bo ma. Tna yno makit wana mbin afo re ana mnaut bo kaket ma. Mfi bo ana hah me mama mo kʼJõ maami tisoh ana.”
Yesaya 6:10
41Tiwya tinyi Yesaya yhar Yesus yase rAit. Feto oh mi ykyas Ait feto.
42Feto sai, menohe raa mawat smot Ait tna msya raa manes ro Yahudi taro smot Ait ye. Menohe ana waa raa ro Farisi kbe mikyak ana. Waa kbe mawe ana skabuk su msya raa ro Yahudi mam samu watum rana u fee. Tibyo mawe abyõ fee. 43Ana weto hasu bo raa bibi ana sai, menohe ana mrok mawe Allah bibi ana to bo ati fee.
Raa taro smot bokyas ro Yesus tna taro hawe
44Tna Yesus yawe, “Awya ro smot Jõ to, ait smot Jõ tesait sai meto fee. Ait smot bi Ait ro ybis Jõ ye oh meto. 45Awya ro ymat Jõ to, ymat bi Ait ro ybis Jõ ye. 46Jõ tamaʼt tabam refo tnan kek. Tama afo re raa beta ro smot Jõ to, kbe mamo mam arin ro mamur u fee. 47Raa taro mari bokyas aJõ menohe mbo mno fee. Jõ too safo mana tmit kʼana weto to fee. Tama tabam refo mkah bo tmit safo kʼraa to fee. Tama tno riof kʼraa. 48,49Raa taro to mikyak Jõ tna mse bokyas aJõ mam mhaf mato rana to fee. Ati ro tabam refo haberek u to, kbe awya yoo safo mana ymit kʼana? Raa fee: Meen bokyas ro Jõ tkyas oh to, mesait mmit safo mana kʼana weto. Tesait kar tkyas bo aro fee. Menohe tkyas bo ro Taja ykyas kʼJõ to sai.12:48,49 Feto to bo ro ana weto mikyak reto to, bokyas ro Allah yesait yawe kʼana oh meto. Tna Jõ betoo bo bawya ro Ait yawe Jõ betoo kʼanu. Tibyo mam ati ro tabam refo haberek to bokyas aJõ mesait oh mi meen mmit safo mana kʼana weto. 50Bi Ait ysi bo, tna raa ro mari mno bo ro Ait ysi to meen mhau hame wajin. Feto to bo bawya ro tkyas to, bo reto mnan si msya bo ro Taja ysi kʼJõ yawe Jõ tkyas.”
13Yesus yyon kuber wAit maa wana
1Yesus ysya kuber wAit makyõ korat ro Paskah fefares tna Ait yhar yawe kbe Ait sikba tabam refo tna yamo yo kʼYaja. Ayõ rau to kene oh. Tna Yesus yno bo sau afo re ana mhar mawe Ait yhafri raa wAit ro mhau mam tabam refo. Ait yhafri ana toni syok. 2Mti oh tna Yesus ysya kuber wAit huwya mait boit. (Ti reto to, kabes yabi (Iblis) yisbyo bonaut rait kʼYudas Iskariot oh. Tna Yudas yari yawe kbe besruf Yesus. Yudas tait Simon yare.) 3Yesus yhar yawe Yaja ysan tak rAit kʼAit oh re yase ybo bombra beta. Tna yhar yawe Allah oh mi ybis Ait yama, tna kbe hah ye yamo yo kʼAllah u. 4Yhar bo reto tibyo yasen tna yrus ratan miyõ rait. Tna yoo hawee ftah sau ybin mam yaka. 5Tna ywyan aya yama. Tna fo hre yyon kuber wAit maa maban. Tna moo hawee reto karu. 6Yno tna snok Petrus yawe yyon yaa. Menohe Petrus yawe wa yawe, “Tuhan; fyi re Nyõ ro nase nawe nyon jõ taa a?” 7Yesus yawe, “Bo ro Jõ tno refo, mfo wefo fo nyõ wase fares. Menohe kbe meen nyõ nhar.” 8Petrus yawe, “Nyon taa ajõ ma!” Tna Yesus yawe, “Soh Jõ tyon nyõ naa to fee, nyõ namo kuber woJõ fee ye.” 9Simon-Petrus yawe, “Soh feto, nyon taa mesait sai ma! Nyon tatem msya tana ye re toof!” 10Yesus yawe, “Awya ro yate aya oh to yetsu rait moof oh. Ait yaa rait mesait aran kbe yyon u, tna yetsu beta moof oh. Anu sait aran yhaf moof fee, menohe anu beta taro nhaf moof oh.” 11(Yesus yhar oh awya ro kbe hren serek Ait. Reto oh mi Ait yawe, “Anu beta noof fee.”)
12Yesus yyon ana maa beta mkak. Tna fo yoo ratan rAit yyum u, tna yama hre u. Tna yawe, “Bo ro riwai tno to, anu nhar bo maja rau fe mfe fares a? 13Ja anu ntu Jõ ‘bi Guru’ soh mfe nwe ‘Tuhan’. Mabo oh, anu ntu feto bo moof. 14Jõ fi tamo Tuhan tna Guru ranu. Tna tyon anu naa to. Feto to tbis anu beta kbe nyon naa wanu kʼanya ye to.13:14 Mam wore weto to, raa twok mam amah to, raa ro yamo sryan oh mi ja yama yyon maa. Tna Yesus sisya yhaf mte re raa wAit mmat tna kro yiir rAit.15Tno feto afo re anu nhar bo moof ro nno. Tawe anu ye nno bo moof kʼraa anya, mnan fi ja Jõ tno kʼanu to! 16Nnaut: Sryan sait yase yiwer bobot rait fee. Tna raabis sait yase yiwer ait ro ybis fee ye. 17Anu nhar bo ro tkyas kʼanu weto beta. Au oh mi nhaf sneh sai to. Nhau nfi sryan ro ja yno bo moof kʼraa anya. Soh anu nno bo feto to, kbe Allah yno bo ro moof kʼanu.”
18Tna Yesus yawe, “Riwai tawe, ‘Anu nhaf moof oh.’ Tawe bo reto menohe tkyas anu beta fee. Jõ thar awya ro Jõ tsok. Bokom ro Allah far-far sau mkyas mawe,
‘Ait sait ro hre yait boit su ysya Jõ oh mi kbe yamo byoh kʼJõ.’
Mazmur 41:9
Tawe bokom reto mabo fo. 19Jõ tkyas bo refo kʼanu wia. Tkyas kʼanu wia matim afo re wore wo anu nmat bo refo mabo to, kbe anu smot Jõ. Tna kbe nhar nwe Jõ fi Mesias.13:19 Ait ro Allah ysok yawe yamo Raja. Mai ro Ibrani mawe Mesias, tna mai ro Yunani raa mawe Kristus.20Nnaut: Awya ro ymat tna hartu raa ro Jõ tbis to, ait ymat tna hartu Jõ oh meto. Tna awya ro ymat tna hartu Jõ to, ait ymat tna hartu bi Ait ro ybis Jõ ye oh meto.”
Yesus bhah Yudas
21Yesus ykyas bo refo mkak tna fo Ait sraujin. Tna bo ro yhar oh Ait ykyas abyõ yawe, “Anu nkin wefo sait kbe besruf Jõ.” 22Kuber wAit mmat sas anya. Mnaut mawe awya mi Yesus yawe metait. 23Kuber ro Yesus sait, ro Ait yhafri retait hre mam yajoh ti jaro. 24Tna Simon-Petrus skabuk yasu kʼait re ait ytu kʼYesus awya mi Yesus yawe metait. 25Tna kuber retait susu kene kʼYesus tna ytu yawe, “Awya oh mi Nyõ nawe metait?” 26Yesus yawe, “Nmat: Too roti ftah kebet. Tna Jõ beru mam aya refo tee kʼait.” Tna Yesus yoo roti ftah sau beru mam aya reto tna yee kʼYudas. (Yudas tait ku ro bi Simon yare.) 27Yudas yoo roti reto si fo, kabes yabi (Iblis) twok mam yhaf mato. Tna Yesus yawe kʼait yawe, “Bo ro kbe nno reto to, nno fooh oh!” 28(Ana taro ro hre mait boit to wase mawe fyi re Yesus ykyas feto kʼYudas. 29Yudas oh mi raa ro ja ybo pitis wana. Tibyo ana taro mnaut mawe Yesus ybis Yudas yamo yoo boit aro re kbe ana mait mam korat reto. Soh mfe ana mnaut mawe Yesus ybis ait yoo pitis aro yamo yee kʼraa ro masu awe.) 30Yudas yoo roti reto si fo, ait frok. Arin mamur oh.
Bosi ro tna
31Yudas yamo. Tna Yesus ykyas bo kbe yhai tna yrok yasen. Yawe, “Jõ fi ’Ait ro Yroh Yama Yfi Raa Sai’. Fooh sai tna kbe raa mmat Jõ tase aJõ. Kbe raa mmat bo ro Jõ tno tibyo ana mbaut Allah. 32Bo ro tno mno re kbe raa mbaut Allah. Feto to fooh re Allah yerif Jõ tase aJõ ye. 33Kukek woJõ sor: Ayõ baro firwas tna Jõ kbe thau kait tsya anu u fee. Anu kbe saso Jõ, menohe yuk ro Jõ tamo to anu ntai nma fee. Taa tkyas bo refo kʼraa manes ro Yahudi ye.
34Tbis bo ro tna sau kʼanu nbo nno. Jõ tatmof anu. Tna tawe, ‘Fyi-fya rau to anu natmof anya kaket mfi Jõ tatmof anu to!’ 35Soh anu natmof anya kaket to, kbe raa mmat tna mhar mawe anu fo kuber woJõ.” 36Simon-Petrus ytu yawe, “Tuhan; namo tiyo?” Yesus yawe, “Yuk ro Jõ tamo to, mfo refo nyõ kro fee. Kbe meen nyõ nama nrof.” 37Petrus yawe, “Tuhan; fyi re jõ kro Nyõ mfo refo fee? Jõ waa fee. Jõ kbe raa mame tajat saah! Menohe tawe tsan tetsu ajõ afo re riof kʼNyõ.” 38Tna Yesus yawe, “Petrus, nari: Nyõ nawe nsan netsu re riof kʼJõ to, nyõ nkyas niwer fe mfe a? Rere kook mara fefares to, kbe nyõ nwaar Jõ wia muhrin tuuf oh, nawe nyõ wase Jõ.”
Kbe amu nhau nsya Yesus su mam sawro ro Allah
141Tna Yesus yawe kuber wAit yawe, “Waa ma. Sraujin ma. Smot Allah oh! Nsam wai kʼAit. Tna smot Jõ. Nsam wai kʼJõ ye. 2Mam samu ro Taja yhau to yuk ro meen anu nhau to mawat. Jõ tamoʼt samu ro Taja re kbe siwyan yuk aro kʼanu kbe nma nhau. Soh samu reto marak to, Jõ tkyas kʼanu feto fee. 3Tamo siwyan yuk ro anu kbe nhau to, tna hah tama tmen anu bmo. Tmen anu re kbe anu nhau nsya Jõ su mam beto.
4Anu ye nhar iso ro mamoʼt yuk reto.” 5Menohe Tomas yawe, “Tuhan; kbe Nyõ namo tiyo? Amu wase! Feto to amu wase iso reto ye!” 6Tna Yesus yawe, “Jõ fi iso reto. Bokyas aJõ to mabo beta. Jõ oh mi tno re raa mhau hame wajin. Tna raa aro yamo yo kʼTaja mam iso roto to fee. Awya ro yawe yamo yo kʼTaja to, yako hawe sai kro Jõ. 7Anu nhar Jõ oh to, anu nhar Taja aJõ ye. Mfo refo anu nhar Ait oh. Anu nmat Jõ mnan anya mfi anu nmat Ait ye oh.”
8Filipus yawe, “Tuhan; nerif Naja kʼamu re kbe amu nmat Ait kaket rof tna fo kbe amu nnaut yyi u fee.” 9Yesus yawe kʼFilipus yawe, “Thau tsya anu ooh oh, menohe nyõ wase Jõ fares a? Awya ro ymat Jõ to, ait retait ymat Taja ye oh meto. Fyi re nyõ nawe, ‘Nerif Naja kʼamu’? 10Jõ fi srau sau, thaf sau tsya Taja. Tna Taja srau sau, yhaf sau su ysya Jõ ye. Menohe nyõ wase bo reto fares a? Bo ro tkyas kʼanu to, tkyas bonaut aJõ sai fee. Taja oh mi yatam Jõ yoyo tna Jõ tkyas bo ro Ait yawe kʼJõ. Ait yesait yno re tno bo wefo beta. 11Smot Jõ. Tna nhar nawe bokyas aJõ refo mabo: ‘Jõ fi srau sau, thaf sau tsya Taja. Tna Taja srau sau, yhaf sau su ysya Jõ ye.’ Soh nyõ ntu sioh bokyas aJõ reto fares to, sik nmat bo msai ro Jõ tno mkah tak rAit to, afo re nyõ smot Jõ matak. 12Nnaut: Awya ro smot Jõ to, kbe yno bombra mnan si bo ro Jõ tesait tno to ye. Tna tamo to kʼTaja. Tibyo kbe raa retait yno bo ro mase miwrek bo ro Jõ tno to ye. 13Bo bawya sai ro anu nyoh to, kbe Jõ tno. Bo ro nyoh mkah tak ro Jõ tasom aJõ to, kbe tno yum. Tno afo re raa mbaut Taja. 14Soh anu weto nyoh bo sau kʼJõ mkah tak ro tasom aJõ to, kbe Jõ tari tno yum.”
Meen Har ro Tuhan mama matam anu
15Tna Yesus yawe, “Soh anu nhafri Jõ to, kbe nbo nno bo ro Jõ tbis kʼanu to ye. 16Jõ tamo tayoh Taja afo re ybis Har rAit mama mhau matam anu mamo snok hame wajin. Bo ro nno to Har mban anu yoyo. Har reto ja mkyas bo ro mabo. 17Raa ro wase Allah to, ana mhar Har rAit fee. Srau Har rAit fee ye. Feto to raa weto to Har rAit mjin kʼana mhaf mato fee. Mako hawe sai ana mkai Har rAit fee. Menohe anu fo, Har ro Tuhan mhau mam nhaf mato wanu tna mhau matam anu yoyo. Feto to anu nhar Har rAit, srau Har rAit reto.
18Jõ kbe sikba anu nhau nkus mnan fi kukraa to fee. Jõ kbe hah te to kʼanu u. 19Mhau baro feto raa ro wase Allah kbe mmat Jõ u fee. Menohe anu fo kbe nmat Jõ u. Jõ fi raa ro tawyos. Tibyo anu meen nhau nawyos ye. 20Ayõ reto to, kbe anu nhar nwe Jõ thaf sau su tsya Taja, tna anu nhaf sau nsya Jõ ye. Tna Jõ thaf sau tsya anu ye.
21Awya ro ybo yno bo ro Jõ tbis kʼait to, ait retait oh mi yhafri Jõ ye. Ait ro yhafri Jõ tait kbe Taja yatmof ait retait ye. Tna Jõ kbe tatmof raa retait tna tno re ait yhar Jõ to ye.” 22Tna Yudas roto sait, (Iskariot fee,) ytu kʼYesus yawe, “Tuhan; Nyõ nno re amu nesait nhar Nyõ sai. Tna fyi mkah raa ro tabam refo, ana ro wase Allah ye?” 23Yesus yawe, “Awya ro yhafri Jõ kbe yari bo ro tbis kʼait ybo yno ye. Tna Taja kbe yhafri ait. Tna Jõ tsya Taja kbe nma nhau su nsya ait retait ye. 24Awya ro yhafri Jõ fee kbe yari bo ro tbis kʼait fee, ybo yno fee ye. Bokyas ro tkyas refo fo bonaut aJõ tesait to fee. Tkyas bo ro Taja ykyas kʼJõ sai.”
25Tna Yesus yawe, “Bo wefo beta Jõ tkyas kʼanu mam wore wo Jõ thau tsya anu fares fo. 26Tna kbe Taja ybis Har rAit mama mo kʼanu. Har reto kbe mkyas watum kʼanu tna bo ro nno to, Au mban anu ye. Taja ybis Har mama shauk Jõ re kbe mno bo woJõ renti. Har reto kbe mamo guru ro betoo bombra beta kʼanu tna mno anu nnaut bombra ro Jõ tkyas kʼanu to beta.
27Tawe tsan bo sau kʼanu. Jõ thau thaf tnok sai. Jõ tamo menohe tawe tno anu nhau nhaf tnok ye. Raa ro tabam refo mawe mno raa mhaf tnok ye. Menohe bo raa mno re mhaf wana tnok to hayah. Ana mhaf tnok mnan si Jõ thaf tnok to fee. Jõ tamo menohe tawe tno anu nhau nhaf tnok. Feto to waa ma. Sraujin toni ma. 28Riwai tawe, ‘Jõ tamo tna kbe thah te tama to kʼanu u.’ Taja tait yase yiwer Jõ. Tna tamo to kʼAit. Feto to sraujin ma. Rau ro moof to, soh anu nhafri Jõ to, kbe anu simaut bo nhar nwe tamo to kʼAit. 29Jõ tkyas bo refo kʼanu wia. Tkyas kʼanu wia matim afo re kbe nmat bo refo mabo to, kbe anu smot Jõ. 30Ayõ rau kene oh, tna kabes yabi (Iblis) yama. Tibyo ayõ aro u fee re tkyas bo mawat tsya anu. Kabes retait yase ybo raa ro tabam refo. Menohe ait yase yiwer Jõ fee. 31Menohe Jõ sayõ bo ro yno afo re raa ro tabam refo mhar mawe Jõ thafri Taja. Afo re ana mhar mawe bombra ro tno to tno mnan si bo ro Taja ybis Jõ.”
Tna Yesus yawe, “Nma, bsen bmo.”
15Anggur mara msya ngkre rau
1Kuber ro Yesus wAit msya Yesus mamo. Tna Yesus ykyas bo renti. Ait fret bo yawe, “Jõ fi anggur mara ro moof. Taja oh mi yamo Raa ro mkah tna misoh armato anggur reto. 2Anggur mara fo, ngkre rau ro make fee, kbe Taja ysot. Tna kre rau ro make to, kbe yisoh srof re make mawat renti.15:2 Raa ro mhar bo misoh anggur mara to, ja ana msot ngkre aro. Mno afo re ngkre ro mhau fares make kake ro moof tna mase.3Anu noof mfi anggur mara ro raa misoh oh. Bokyas ro anu nri kʼJõ reto mno re anu wefo nhaf moof. 4Nhau nrat nsya Jõ tna Jõ thau trat tsya anu ye. Ngkre sau mesait kar kbe make fee. Soh ngkre sau mhau mrat msya mara rau fee, kbe make fee. Tna soh anu nhau nhaf, srau sau nsya Jõ to fee, kbe nke fee ye. 5Jõ fi tnan fi anggur mara sau. Tna anu to nnan fi ngkre rau. Awya ro yhau yhaf sau ysya Jõ to, tna soh Jõ thau thaf sau tsya ait ye, kbe ait retait yake mawat. Soh anu nhaf sau su nsya Jõ to fee, kbe anu ntai nno bo aro fee ye. 6Awya ro yhau yhaf sau ysya Jõ fee, ait retait ynan fi ara ngkre sau ro raa msot tna beak makus. Ara ngkre reto mhau ngkaat. Tna kbe raa moo ngkre weto makrao mam wo sau mbeak tna mko mam tafoh tna mait. 7Soh anu nhau nhaf sau su nsya Jõ tna soh bokyas aJõ anu nme mam nhaf wanu to ye, kbe anu nyoh bo bawya ro anu nksoh sai to tna kbe nkai. 8Soh anu make mawat to, kbe raa mmat tna mhar mawe anu fo kuber woJõ oh meto. Soh anu nno bo wefo kbe raa mbaut Allah.”
Yesus ybis yawe kuber wAit kbe hafri anya to!
9Tna Yesus yawe, “Taja yhafri Jõ. Tna Jõ thafri anu wefo mfi feto ye. Nhau nhafri Jõ wer. 10Jõ tari bo ro Taja ybis kʼJõ tbo tno. Tibyo Ait yhafri Jõ wer. Soh anu nri bo ro tbis kʼanu, nbo nno to, kbe Jõ thafri anu wer mfi feto ye.
11Jõ simaut mase. Tna tkyas bo weto kʼanu afo re anu simaut mase ye. Jõ ksoh tawe anu simaut mase, mnan fi Jõ simaut mase; aro mabut fee. 12Bo ro Jõ tbis kʼanu oh mefo: Nhafri anya kaket. Nhafri anya kaket mnan fi Jõ thafri anu wefo ye. 13Soh raa sait yhafri yafoh wait to, ja ksoh yawe yno riof kʼana. Tna mfi bo raa mbis mawe raa retait ysan ait yetsu afo re riof kʼana to, kbe yawe, ‘Ae.’ Ait ro ysan yetsu rait feto to, kbe raa mmat tna mhar mawe ait retait yhafri yafoh wait toni miwer. 14Soh anu nno bo bawya ro Jõ tbis kʼanu to, anu fo Jõ tafoh woJõ. 15Sryan sor to, ja wase bo ro bobot rana yno. Menohe bo bawya ro Jõ tari kʼTaja to, tkyas kʼanu. Tibyo ati ro Jõ tkyas anu to, ttu anu sryan woJõ u fee. Anu fo Jõ tafoh woJõ. 16Anu nsok Jõ to fee. Jõ oh mi tsok anu. Tna tbis anu nmo tna tufrok make:15:16 Make refo, raa taro mnaut mawe maja rau to raa mhaf wana ro moof. Nmat Galatia 5:22,23. Menohe raa taro mnaut mawe make refo maja rau to raa taro ro mama smot Yesus renti. Make ro kbe mhau bau tibyo. Tna bo ro anu nyoh mkah tak ro Jõ tasom to,15:16 Raa ro mari bo ro Yesus yawe to, Ait ybis yawe ana weto oh mi mno bo tna mayoh bo ’mkah Ait yasom rAit’. Maja rau to ana skabuk soh mfe mno bo ’nan fi bo ro Yesus yhaf ksoh’. kbe Taja yoo yee kʼanu. 17Bo ro tbis kʼanu oh mefo: Hafri anya kaket.”
Raa ro tabam refo knait Yesus ysya kuber wAit
18Yesus yawe kuber wAit yawe, “Raa ro tabam refo knait anu. Menohe ktak ma. Nnaut nwe ana weto tiwya knait Jõ wia oh. 19Raa ro tabam refo smot Jõ fee. Menohe anu fo nhaf sau nsya ana weto fee. Mfi bo anu nhaf sau su nsya ana weto meto mi kbe ana ksoh anu to! He mfe. Anu smot Jõ tibyo anu nhaf sau su nsya raa ro tabam refo fee. Jõ tsok anu afo re anu nmo raa woJõ. Anu fo raa ro tabam refo u fee. Au oh mi ana weto knait anu. 20Nnaut bo ro riwai tkyas kʼanu tawe, ‘Sryan sait yase yiwer bobot rait fee.’ Jõ tnan fi bobot ranu. Tna ja raa sikowah Jõ. Feto kbe raa sikowah anu fo ye. Raa ro tabam refo ja mari bo ro Jõ tkyas kʼana to fee. Tna meen ana mari bo ro anu nkyas kʼana to ye fee. 21Ana wase Allah ro ybis Jõ troh tamaʼt tabam refo. Tibyo raa weto kbe mno bo ro mkair mai kʼanu. Anu kro Jõ oh mi kbe ana mno bo ro mkair mai kʼanu to. 22Mfi bo tama to kʼana fee tna tkyas bo kʼana fee, maami Allah ymit iro kʼana fee. Tna yawe ana masom iro wana to fee ye. He mfe, tama to kʼana oh. Tna ana mari bo ro Jõ tkyas kʼana fee. Tibyo kbe ana mesait masom iro wana yum. Kbe saak iro wana fee. 23Awya ro knait Jõ to, Ait retait knait Taja aJõ ye. 24Mfi bo tama to kʼana fee tna tno bo ro msai aro fee, maami Allah ymit iro yawe ana masom to fee. He mfe, ana mmat bo msai ro Jõ tno, bo ro ja raa mno fee. Tna ana beroh knait Jõ tsya Taja ye. 25Bo mkair ro ana mno reto to mnan si bo ro tiwya Musa ykyas. Watum ro agama rana reto mkyas ana matim wia. Au oh mi:
‘Jõ tno bo mkair aro fee menohe raa knait Jõ sai.’
Mazmur 35:19, 69:5
Bo ro tiwya Allah yawe to mhau rau oh.”
26Tna Yesus yawe, “Kbe tayoh kʼTaja re ybis Har rAit mama matam anu. Har reto kbe watum bo kʼanu. Tna bo ro nno to, kbe Har reto mban anu ye. Har reto mbam Allah mama to tna ja mkyas bo ro maja to sau sre fee. Mkyas bo ro mabo. Kbe mama tna mkyas Jõ tasom aJõ. 27Tna anu fo tiwya kro Jõ bmo su maban tinyi wore wo Jõ tamo guru. Tibyo anu nkyas Jõ tasom aJõ kʼraa ye.”
16Nros ntak!
1Yesus yawe kuber wAit yawe, “Riwai tkyas tawe, ‘Kbe raa ro tabam refo knait anu.’ Bo weto beta Jõ tkyas kʼanu wia matim afo re kbe nmat bo wefo mabo to, kbe anu beroh smot Jõ fares. Kbe anu btek nwe fee. 2Raa manes ro Yahudi kbe meen mikyak anu, mawe wa mawe anu skabuk su nsya raa ro Yahudi mam samu watum rana u fee. Tna kbe raa mame anu taro njat. Tna raa ro mame anu weto to mnaut mawe ana mno bo moof, mnaut mawe reto Allah yhaf mnan. 3Ana weto wase Taja tna wase Jõ ye. Tibyo mno bo feto. 4Kair weto mama mai kʼanu fe fares. Tiwya tinyi snok mfo refo thau tsya anu fares. Feto to tkyas bo mkair weto tna sai. Mfo refo Jõ tkyas bo wefo kʼanu wia matim. Tkyas wia re kbe meen, ati ro bo mkair weto mabo to, anu nnaut nwe bo weto tiwya tawe kʼanu oh.”
Meen Har ro Tuhan mama
5“Menohe ayõ baro firwas tna thah tamo to kʼAit ro tiwya ybis Jõ troh tama tabam refo. Menohe fyi re anu sait bo ytu kʼJõ fee yawe, ‘Nyõ namoʼt hayo meto?’ 6Jõ tkyas bo wefo tibyo anu sraujin. 7Anu hawe bo Jõ sikba anu. Tamo tna kbe tbis Har ro Tuhan mama mo kʼanu. Har reto kbe mkyas watum kʼanu tna bo ro nno to, Au mban anu ye. Nnaut: Jõ tamo menohe tis rau to mafer moof kʼanu meto. Soh Jõ tamo fee; kbe Har reto mama mo kʼanu fee ye. 8Meen Har ro Tuhan mama tna betoo bo kʼraa ro tabam refo. Mkyas kʼana ro hawe smot Jõ. Har rAit betoo iro ro ana ja mno to re mhar kaket. Tna Har rAit betoo bo ro Allah ksoh raa mno to ye. Raa ro tabam refo ja mnaut mawe ana mhar bo ro Allah ksoh ana mbo mno oh. He mfe. Kbe Har rAit betoo bo reto kʼana kaket. Tna raa ro tabam refo ja mros susai mtu sas safo raa to, mtu kaket fee ye. Kbe Har rAit betoo bo reto kʼana kaket ye. 9Raa ro tabam refo smot tna msam wai kʼJõ fee. Au oh mi Har rAit kbe betoo iro wana kʼana kaket. 10Tamo to kʼTaja to tna kbe anu nmat Jõ u fee. Feto to tesait tkyas bo kʼraa ro tabam refo u fee. Au oh mi Har ro Tuhan kbe betoo bo ro Allah ksoh raa mno to. 11Kabes yabi (Iblis) ja ybo raa ro smot Jõ fee. Menohe Allah yoo safo mana ymit kʼait oh. Au oh mi kbe Har rAit mama betoo iso ro Allah kbe yros susai ytu safo raa to.
12Tna Yesus yawe kuber wAit yawe, “Jõ tawe tkyas bo mawat kʼanu fares. Menohe tkyas bo weto beta fee. Bo ro samyoh meto tna mfo refo anu srau fefares. 13Menohe kbe Har ro Tuhan mama. Tna Har reto mkyas bo sioh fee. Mkyas bo ro Allah kʼanu re anu nhar bombra beta ro ati. Har reto mesait mkyas bonaut rau fee. Menohe mkyas bo ro mari kʼAllah. Tna mkyas bo ro meen mama ye. 14Har reto mari bo mbam kʼJõ tna mkyas bo reto kʼanu. Mno feto tna kbe raa mhar bo yase aJõ, tibyo bibi Jõ. 15Bombra ro Taja wAit msya bohar rAit weto beta to bo woJõ ye. Feto oh mi tawe kʼanu tawe, ‘Har reto kbe mkyas bombra ro Au mari mbam kʼJõ to mkyas kʼanu.’”
Kuber ro Yesus wAit sraujin wia tna kbe simaut
16Tna Yesus yawe, “Ayõ kbet baro sai tna kbe anu nmat Jõ u fee. Tna ayõ kbet sai naut tna anu nmat Jõ u.” 17Tna kuber ro Yesus mtu kʼanya mawe, “Ykyas bawya meto ee? Ait yawe yamo yo kʼYaja tibyo ayõ kbet sai baro tna kbe bmat Ait u fee. Tna ayõ kbet sai naut tna anu bmat Ait u. 18Bawya oh mi ykyas yawe, ‘Ayõ kbet sai?’ Anu wase bwe Ait ykyas bo bawya meto!” 19Menohe Yesus yhar yawe ana mawe mtu bo kʼAit. Tibyo yawe, “Riwai tawe, ‘Ayõ kbet sai baro tna kbe nmat Jõ u fee. Tna ayõ kbet sai naut anu nmat Jõ u.’ Reto oh mi anu ntu kʼanya meto a? 20Nnaut: Anu kbe sraujin tna nwia. Menohe raa ro tabam refo kbe simaut renti. Anu kbe nwia wia matim. Menohe kbe simaut mrof. 21Mfi bo fai sau ro mhaf kene wo mabe to, ayõ ro ngkine mabe to kborham toni. Tna ku frok. Tna au sorni bo riwai kborham reto. Ku rau frok yama oh tibyo au simaut. 22Mfo refo anu fo sraujin. Menohe kbe anu simaut mase mfi feto ye. Kbe hah tama fri anu u. Tna raa sait bo yatak yno re simaut ranu reto marak fee. 23Nnaut: Ti reto to, anu ntu bo aro kʼJõ u fee. Wore weto to, bo bawya sai ro anu nyoh mkah tak ro Jõ tasom aJõ to, kbe Taja ysan kʼanu. 24Mamo snok mam mfo refo to, anu nyoh bo aro mkah tak ro Jõ tasom fefares. Nyoh re kbe anu tru. Tna kbe simaut mase.”
25Tna Yesus yawe kuber wAit yawe, “Bo wefo beta Jõ tkyas kʼanu mkah bofret. Menohe meen tkyas bo maja ro Taja to, tkyas abyõ sai kʼanu. 26-27Ati weto to, kbe anu nesait nyoh bo kʼTaja mkah tak ro Jõ tasom. Jõ tayoh fee. Taja yesait yhafri anu. Tibyo anu nesait nyoh bo kʼAit. Anu nhafri Jõ tna smot Jõ to. Tna Anu nhar nwe Allah ybis Jõ tama. Feto tibyo Taja yesait yhafri anu to. 28Tbam Taja troh tamaʼt tabam refo. Tna mfo refo Jõ sikba tabam refo hah tamo to kʼTaja.”
29Tna kuber ro Yesus mawe, “Mfo refo Nyõ nkyas bo abyõ. Nyõ fret bo fee. 30Nkyas feto to tna mfo refo amu nhar nwe Nyõ nhar bombra beta. Riwai Nyõ nhar bo ro amu nwe ntu kʼNyõ oh, menohe amu ntu bo reto fefares! Nyõ nkyas bombra beta mkak oh. Reto oh mi amu smot Nyõ tna nhar nwe Nyõ nama nbam Allah. Kbe amu ntu bo aro u kʼNyõ to fee.” 31Tna Yesus yawe, “Mfo refo anu smot Jõ. 32Menohe kbe anu nsam. Anu aro yasen ysam yamoʼt samu rait-rait. Tna sikba Jõ tesait akus. Menohe Taja yatam Jõ tibyo tesait kar fee. 33Bo wefo beta tkyas kʼanu afo re nhaf tnok tna waa ma. Nhau nhaf sau, srau sau su nsya Jõ tna kbe nhaf wanu tnok tna waa ma. Anu nhau mam tabam refo fares tibyo kbe anu raa sikowah. Menohe sraujin toni ma, mbito ntak. Jõ tase tros tatak tbo ait ro ybo tabam refo.”
17Yesus skabuk
1Yesus ykyas bo weto kuber wAit mkak. Tna fo heyut ymat ayoh tna yawe, “Taja, Jõ fi Ku aNyõ. Kene wo ayõ rau sboh oh. Nno re raa mmat Jõ tase aJõ. Raa mmat Jõ tase aJõ mi ana mmat Nyõ nase aNyõ oh meto. 2Tiwya Nyõ noo tak nee kʼJõ tamo Raa ro tase tbo raa ro tabam refo beta. Nno feto afo re Jõ tatak tno raa mhau hame wajin. Nyõ nsok awya ro yamo raa woJõ, tna Jõ tno ana weto beta meen mhau hame wajin ye. 3Jõ ksoh re ana mhar Nyõ nhaf, srau aNyõ kaket, tna mhar mawe Nyõ fi Allah yesait aran tum. Tna Jõ ksoh re ana mhar mawe Jõ fi Yesus Kristus: Jõ fi Ait ro Nyõ nbis tama tabam refo. Soh ana mhar anu mbewok feto kbe ana mkai roon ro hame oh meto. 4Tno bo ro Nyõ nbis kʼJõ to, beta tno mkak. Au oh meto tno re raa mmat bo yase aNyõ. 5Tiwya tinyi thau tsya Nyõ su mam wore wo tabam refo raa mfen fefares. Bo yase wanu bewok to mninon. Mfo refo tayoh tawe Nyõ tubat Jõ hah te tamo to kʼNyõ, tna nno re tase mnan tii reto u.
6Taja, raa ro tabam refo to, taro mamo raa woNyõ. Tna Nyõ nawe raa weto to raa woJõ ye. Jõ tno re ana mhar Nyõ. Ana mari bo ro Nyõ nawe tna mbo mno. 7Bo ro Nyõ noo nee kʼJõ oh, mfo refo raa woJõ weto, mhar mawe Nyõ oh mi Raa ro noo bombra wefo beta nee kʼJõ. 8Bokyas ro Nyõ nawe kʼJõ to, Jõ tkyas kʼana oh. Tna ana mari tna moo mse kʼana oh. Ana mhar mawe Jõ tama tbam Nyõ. Ana mnaut maut-mroh fee. Ana smot Jõ tna mhar mawe Nyõ oh mi nbis Jõ tama. 9Mfo refo Jõ skabuk ana. Skabuk raa ro tabam refo fee. Skabuk ana ro Nyõ nsan kʼJõ sai. Ana wefo fo raa woNyõ. 10Raa woJõ beta to raa woNyõ ye. Tna raa woNyõ beta to raa woJõ ye. Ana weto, bo ro mno to merif bo yase aJõ.” 11“Taja, Nyõ nesait aran Raa ro nase. Thau mam tabam refo kait u fee tna Jõ tama to kʼNyõ. Menohe ana mhau mam tabam refo fares. Taja, Nyõ to Raa ro nase. Jõ tayoh kʼNyõ tawe kmot ana mkah natak aNyõ. Tak reto Nyõ nsan kʼJõ ye. Kmot ana re kbe ana mhau mhaf, srau sau, mnan fi Nyõ nsya Jõ bhaf sau to ye. 12Wore thau tsya ana fares to, Jõ kmot ana mkah natak aNyõ, tak ro Nyõ nsan kʼJõ reto. Jõ kmot ana tibyo ana beta beroh smot Jõ. Menohe Bokom ro aNyõ mawe ana sait kbe safe mkak. Reto tiwya nabi sait ykom tna kbe mabo mnan si Bokom reto.” 13Tna Yesus skabuk yawe, “Ayõ baro firwas tna hah tama to kʼNyõ mam teto. Menohe thau mam tabam refo fares to, tkyas bo wefo beta afo re ana wefo simaut toni mnan fi Jõ to ye. 14Jõ tnan anya tsya raa ro tabam refo fee. Jõ tkyas bokyas aNyõ kʼana ro Nyõ nsan kʼJõ oh. Ana wefo mnan anya msya raa ro tabam refo fee. Tibyo raa ro tabam refo knait ana. 15Jõ skabuk tawe Nyõ tufrok ana mbam tabam refo fee. He tayoh re Nyõ kmot ana re kbe kabes yabi (Iblis) yno ana ma. 16Ana wefo mnan anya msya raa ro tabam refo fee; mnan fi Jõ tnan anya raa ro tabam refo fee ye. 17Bokyas aNyõ to bo ro ati. Bokyas aNyõ to bo ro mabo tu oh! Jõ tayoh tawe nno re ana mari bokyas aNyõ tna mbo mno. Feto oh mi Nyõ noo ana nbo mkah mno bo woNyõ. 18Tiwya Nyõ nbis Jõ troh tama tabam refo. Tna tbis ana wefo mamo mo kʼraa ro tabam refo mfi feto ye. 19Tawe too Jõ tsan kʼNyõ re tno bo ro Nyõ nawe. Tno feto afo re mafer ro moof kʼana. Kbe ana beroh matak moo ana msan kʼNyõ re mno bo woNyõ to ye.”
20Tna Yesus yawe kʼYaja yawe, “Jõ skabuk ana wefo mesait aran fee. Meen ana mamo mkyas Jõ tasom aJõ renti. Tibyo kbe raa taro smot Jõ. Feto to Jõ skabuk raa weto ye. 21Tayoh re ana beta mhaf sau msya anya, mnan fi Nyõ nhaf sau nsya Jõ to ye. Tna mnan fi Jõ thaf sau tsya Nyõ ye. Jõ skabuk bo refo re kbe ana beta mhaf sau msya anu mbewok. Feto tibyo raa ro tabam refo mmat tna mhar mawe Nyõ oh mi Raa ro nbis Jõ troh tama tabam refo. 22Tiwya Nyõ nsan bo yase aNyõ to kʼJõ. Tna Jõ tsan bo yase aNyõ reto kʼana ro smot Jõ. Afo re ana beta mhaf sau, mnan fi Anu bewok bhaf sau ye. 23Jõ fi thaf sau su tsya ana. Tna Nyõ fi nhaf sau su nsya Jõ. Tayoh re ana ro smot Jõ to beta mhaf sau su mnan si. Soh raa woJõ mhaf sau su to, kbe raa ro tabam refo mhar mawe Nyõ oh mi nbis Jõ. Tna raa ro tabam refo mhar mawe Nyõ nhafri Jõ tna Nyõ nhafri ana ro smot Jõ mnan anya ye.”
24Tna Yesus skabuk renti yawe, “Taja, tiwya tabam refo Anu bfen fefares to, Nyõ hafri Jõ oh wia. Tibyo Nyõ nsan bo yase aNyõ kʼJõ. Jõ skabuk raa ro Nyõ nsan kʼJõ; raa beta ro kbe smot Jõ: Jõ ksoh tawe ana meen mhau su msya Jõ mam sawro aNyõ ye. Tna re ana mmat bo yase aJõ reto ye. 25Taja: Nyõ fi raa ro nhaf mato moof ati. Raa ro tabam refo wase Nyõ. Menohe Jõ thar Nyõ. Tna kuber woJõ wefo mhar mawe Nyõ oh mi nbis Jõ sai. 26Jõ tkyas Nyõ nasom aNyõ kʼana wefo oh. Tna kbe tno feto renti. Nyõ nhafri Jõ kaket. Tna tkyas nasom aNyõ kʼana afo re ana mhar bo hafri raa anya mnan fi Nyõ nhafri Jõ. Tno afo re Jõ tesait thaf sau tsya ana.”
18Yesus raa mfot
1Yesus skabuk mkak. Tna fo Ait ysya kuber wAit masen mamo. Ana frit aya ro Kidron mamoʼt maam jaro. Tna twok mam armato sau. 2(Yesus ysya kuber wAit ja mamoʼt armato reto. Tibyo Yudas ro besruf Yesus, yhar yuk reto oh.) 3Yudas yerif iso ro mamoʼt armato reto kʼraa sbe ro Roma. Tna riwai imam manes ro agama Yahudi msya raa ro Farisi, mbis aban mana wana mesait baro mama ye. Feto to Yudas yakah raa mawat yama mbam Yerusalem: Raa sbe ro Roma majin sau, msya aban mana ro agama Yahudi baro mama ye. Ana mama nkro Yudas to, mbo lentera, tafoh, msya masom sbe wana to ye.
4Yesus yhar bo ro kbe mai kʼAit wia oh. Tibyo Ait yasen yamo yo kʼraa weto yawe, “Anu saso awya?” 5Ana mawe, “Yesus, raa ro Nazaret.” Tna Yesus yawe, “Jõ Ait oh mefi.” (Yudas, ro besruf Ait, yros ysya ana mam weto ye.) 6Ati ro Yesus yawe, “Jõ Ait oh mefi.” to, ana susu mhah me tna mbtek mawe mam tabam. 7Yesus yawe u kʼana yawe, “Anu saso awya?” Ana mawe, “Yesus, raa ro Nazaret.” 8Ait yawe, “Tkyas oh tawe Jõ oh mefi. Soh Jõ tesait oh mi anu saso to, bitsre ana wefo taro mamo rof.” 9(Yesus yawe raa sbe weto bitsre kuber wAit mhau riof feto to, ykyas mnan fi bo ro riwai Ait skabuk wia matim yawe, “Raa ro Nyõ nsan kʼJõ to Jõ kmot ana tibyo ana beta beroh smot Jõ; sait bo kbe yarak fee.”18:9 Yohanes 6:39.) 10Tna Simon-Petrus ybo krewan rait tna ysot raa ro yama yfot Yesus sait yimara. (Ait retait yasom Malkhus. Ait tait sryan ro imam yase rait.) Petrus ysot yimara rait ro tem ati ktos. 11Tna Yesus yastako Petrus yawe, “Noo krewan anyõ reto srya mam tafat rau u! Taja ysi bo kʼJõ, yawe tasom bo ro samyoh ro mfo refo mama mai kʼJõ. Tna Jõ tawe tno bo beta mnan si bo ro Taja ybis oh!”
Yesus raa makah mamo mo kʼHanas
12Tna raa sbe ro Roma majin reto msya aban mana ro yase ybo ana mfot Yesus. Ana msya raa ro ja kmot Samu Ro Allah tna msya raa manes ro agama Yahudi weto sor mfot Yesus tna make yatem. 13Ana mbo Ait makah mamo mo kʼHanas. (Ti weto to bi Kayafas yamo imam agama Yahudi ro yase. Bi Hanas tait imam yase ro wia. Bi ait tait Kayafas snyim rait. 14Kayafas oh mi raa ro taa yawe kʼraa mabi ro agama Yahudi yawe, “Rau ro moof to, raa sait yhai sai. Soh mfe to, kbe raa wanu majat beta.”)18:14 Yohanes 11:49-51.
15Mbam armato reto, Simon-Petrus ysya kuber roto sait kro mam ttis mrof. Raa makah Yesus twok mam samu mato ro imam yase rait. Kuber roto retait, imam yase yhar oh. Tibyo ait kro Yesus mamo snok mam bohra reto. 16Menohe Petrus ste mne wea mam masa. Tna kuber roto retait yamo ykyas kʼsrian ro ano sau ro ja kmot masa, tna ymen Petrus twok mam bohra reto mato ye. 17Petrus twok tna sryan ro mros mam masa reto mtu kʼait mawe, “Nyõ refi kuber ro Raa retait ye, fe mfe a?” Petrus ywaar yawe, “Mfe.” 18Arin foos-foos tna sryan msya raa manes taro mros mam bohra mni foos. Tna Petrus yamo yros kene ysya ana mam tafoh reto yni foos ye.
19Imam yase ro wia yasom Hanas. Ait yhau mam amah mato tna ytu sas Yesus. Ytu yawe bo ro ja ykyas to bawya, tna raa ro ja kro Ait to awya. 20Yesus yawe, “Taja: Ja Jõ tkyas abyõ kʼraa mawat mari. Tkyas bo kʼraa ro Yahudi sor mam samu watum wana tna mam Samu ro Allah mam Yerusalem fo ye. Tkyas bo wai aro fee. 21Fyi re nyõ ntu bo kʼJõ? Ntu bo kʼana ro mari bokyas aJõ reto. Ana mhar bo ro Jõ tkyas reto.” 22Yesus yawe feto tna raa manes sait yiban yasu. Tna yawe, “Nasoh moof sai! Nkyas bo feto kʼimam ro yase retait ma!” 23Yesus yawe, “Soh Jõ tkyas bo ro mkair aro, feto nawe abyõ re raa mhar. Menohe soh Jõ tkyas bo ro ati to, fyi re nyõ niban Jõ?” 24Yesus yatem rait, riwai raa make mkah too. Tna Hanas ybis raa makah Yesus mamo mo Kayafas. (Ti reto to, bi Kayafas yamo imam ro yase.)
25Mam bohra samu reto to, Petrus yros yni foos fares. Tna raa mtu kʼait mawe, “Nyõ fi kuber ro Yesus!” Menohe Petrus ywaar yawe, “Mfe!” 26Sryan imam ro yase sait yros mam weto ye. Ait retait raa mana sau ysya sryan ro riwai Petrus ysot yimara retait. Tna yawe kʼPetrus yawe, “Jõ thar Nyõ. Nyõ oh mi riwai nsya Ait nmo su mam armato!” 27Tna Petrus ywaar yawe, “Mfe!” Yawe feto si fo kook sau mara.
Yesus yamo yo kʼGubernur Pilatus
28Rabu momo raa ro Yahudi weto makah Yesus mbam samu ro Kayafas mamoʼt samu wore wo Gubernur Pilatus ja ytu srah yari. Menohe ana raa ro Yahudi tibyo ana mesait twok mam samu reto mato fee.18:28 Pilatus tait raa ro Roma, raa ro agama Yahudi fee. Watum ro agama rana mawe samu raa ro agama roto to mbau kʼana. Tibyo ana kaket ana tna twok mam mato fee. Soh miwer watum reto kbe ana sohmaam bo msya raa wana mam korat ro Paskah to ma. 29Feto tibyo Pilatus frok yamoʼt mne yo kʼana tna ytu yawe, “Bo bawya ro anu nkyas mai kʼraa refi fo?” 30Ana mawe, “Soh Ait yno safo fee, fyi re amu nfot Ait nkah nma no kʼnyõ!” 31Pilatus yawe, “Nbo Ait nmo oh! Nesait nmit safo kʼAit mnan si Watum ro agama ranu rof.” Ana mawe kʼPilatus mawe, “Amu nwe nno yasu marak menohe Pemerintah Roma mawe amu raa ro Yahudi ntu srah wamu tna nmit safo menohe mbis mawe anu nme raa majat mamyot si watum ranu fee!” 32Bo refo ana mkyas mnan si bawya ro Yesus ykyas wia matim yawe iso ro kbe raa mame Ait yajat.18:32 Yohanes 3:14; 12:32Yesus ykyas yawe kbe raa mame Ait yajat mam ara warok. Ja raa ro agama Yahudi mno feto fee. Soh raa wana mno safo to, Watum ro Musa mbis mawe ana moo fraa mai raa retait re yajat. Raa ro Roma oh mi ja mame raa mam ara warok re yajat.
33Pilatus hah twok mam samu reto tna yawe Yesus kro Ait. Ait ytu bo kʼYesus yawe, “Nyõ fi Raja raa ro Yahudi fe mfe a?” 34Tna Yesus yawe, “Bokyas reto mbam kʼnyo nesait sai a? Bo ro nyõ nawe reto mbam raa roto fe mfe a?” 35Pilatus yawe, “Jõ fi raa ro Yahudi fee! Raa woNyõ ro Yahudi msya imam manes wonyõ mesait oh mi msan Nyõ kʼJõ tatem fo. Nyõ nno bo bawya re ana msan Nyõ kʼjõ fo?” 36Yesus yawe, “Wore wo Jõ tase tbo raa mnan fi Raja to, tno mam tabam refo fee. Mfi bo tawe tamo Raja mam tabam refo fo, maami raa ro kro jõ kbe mros tis kʼJõ. Soh feto to, kbe ana mafa tna mno wa afo re raa ro Yahudi mfot Jõ to ma. He mfe. Wore wo tbo raa mnan fi Raja to, tno mam tabam refo fee.” 37Tna Pilatus yawe, “Soh feto, Nyõ fi Raja fe mfe a?” Yesus yawe, “Ae, Jõ fi Raja. Au oh mi fnya mabe Jõ tna troh tama tabam refo. Tama tabam refo mkah tno bo sau aran, au oh mi; tama tkyas bokyas ro ati. Tama afo re tkyas bo ro ati kʼraa. Tna awya ro yros tis bo ro ati mbam kʼAllah to, ait yari bo ro Jõ tkyas.” 38Tna Pilatus ytu kʼAit yawe, “Bo ro ati to bawya meto?”
Raa mawe Yesus tait raa ro yber safo
Tna Pilatus frok yamo yo kʼraa ro Yahudi ro mros mam mne tna yawe, “Tkai bo ro Ait yno mkair aro fee. 39Menohe mfo refo anu nkyõ korat ranu ro Paskah. Tna bo mafa ro anu nno soo oh mi, ja tbis re raa ranu sait frok mbam bui tna yamo bait. Feto to anu ksoh nwe jõ kbe tufrok Raja ro Yahudi refi fe mfe a?” 40Ana mawe, “Mfe! Bitsre Ait yamo bait ma! Bitsre Barabas kʼamu!” (Barabas tait raa ro tiwya yno safo tibyo pemerintah Roma mbu ait mam bui to.)
191Tna Gubernur Pilatus yoo Yesus yee kʼraa nsaah Ait. 2Tna raa sbe ro Roma weto moo bo ro maan mnan fi bmun hyoh tna ste watau sau. Tna mse Yesus sbyõ yana. Tna ana mawah ratan ro mkof ngknu sau, ro ja raa mase myum to, tna mse kʼAit yyum. 3Tna ana mama mros mam Ait yasu tna sret Ait masah mawe, “Meen oh kʼNyõ, raja raa ro Yahudi!” Tna ana mai Ait yasu.
4Tna Pilatus frok yamoʼt mne mun sau naut yo kʼraa ro Yahudi, tna ybis raa sbe makah Yesus frok. Ait yawe, “Jõ tsan Ait kʼanu re anu nhar nwe jõ tnaut tawe Ait yno safo sau bo fee. Jõ tmit safo aro kʼAit fee ye.” 5Yesus yyum ratan ro mkof tna sbyõ watau ro maan reto to, tna raa makah Ait mama. Tna Pilatus yawe, “Nmat Ait oh metait.” 6Imam manes msya raa wana ro mabi mmat Ait fo ana masen mawe, “Name Ait yajat oh!” Pilatus yawe kʼana yawe, “Nesait nkah Ait nme yajat. Jõ tkai bo ro mkair sau aro Ait yno fee.” 7Menohe raa ro Yahudi weto mawe, “Ait yawe Ait fi Ku ro Allah yare. Tna watum ro agama ranu mbis mawe, ‘Soh raa yawe bo feto to, kbe Ait raa mame yajat.’”19:7 Menohe mam wore weto to raja ro Roma yase ybo tabam reto. Tna pemerintah reto mawe wa mawe raa ro Yahudi mame raa majat ma. Mawe pemerintah Roma mesait aran mame raa majat to.
8Pilatus yari bo reto to, ait waa toni renti. 9Tibyo Ait hah twok mam samu mato reto u. Tna raa sbe mbo Yesus twok ye. Tna Pilatus ytu kʼAit yawe, “Nyõ raa ro hayo?” Menohe Yesus yawe bo aro si kʼait fee. 10Pilatus yawe, “Nyõ hawe nkyas bo nsya jõ a? Nyõ wase nawe jõ fi tatak tbis raa mbitsre Nyõ namo bo Nyõ. Tna soh jõ tbis feto to, kbe raa mbitsre. Tna soh tbis raa mame Nyõ to, kbe raa mame.” 11Yesus yawe, “Allah oh mi Raa ro yoo tak reto yee kʼnyõ to. Soh Ait yoo yee fee maami nyõ natak fee ye. Feto to ait ro ysan Jõ kʼnyõ natem anyõ to iro rait reto msai miwer iro anyõ.” 12Pilatus yari bokyas ro Yesus reto tna yawe tomer bitsre Yesus. Menohe raa ro Yahudi mtu fari-fara mawe, “Bi yabi, soh nyõ bitsre Ait to, nyõ nafoh Kaisar fee! Awya ro yawe yamo raja to ait retait yamo byoh Kaisar!”
13Raa ro ytu srah to ja hre mam ambar sau. Ambar refo fo mhau mam yuk ro raa mtu mawe ’Litostrotos’. (Mai ro Ibrani to, raa mtu mawe ’Gabata’.) Pilatus yari bo raa ro Yahudi riwai mawe reto tna yamo hre mam ambar reto. Ait ybis raa sbe makah Yesus frok. 14(Ti reto to, raa siwyan bo re menrabu mno korat ro Paskah. Ayõ ro 12 baas bo feto.) Tna Pilatus yawe kʼraa ro Yahudi weto yawe, “Raja ranu mefi!” 15Menohe ana mtu mawe, “Nkah Ait nmo oh! Nmo nme Ait yajat! Nme ait yajat mam ara warok!” Tna Pilatus yawe, “Nwe tbis raa mame raja ranu mam ara warok a?” Tna imam manes weto mawe, “Kaisar yesait aran yamo raja ramu!” 16Tna Pilatus ysan Yesus kʼana re raa mame.
Yesus raa mame
Tna raa sbe ro Roma weto makah Yesus mamo. 17Ana moo ara warok mse kʼYesus yasom. Tna mamoʼt yuk ro masom Hamana. (Mai ro Ibrani to raa mawe ’Golgota’.) 18Mam beto raa mse Ait mam ara warok reto. Raa roto mabo ewok raa mame su msya Ait ye. Sait mam ti yatem ati, tna sait mam ti yatem ta, tna Yesus raa mse mam masuf. 19Tna Pilatus ybis raa mkom bo refo: “Yesus fi raa ro Nazaret. Ait fi raja raa ro Yahudi.” Bokom refo raa moo mse mam ara warok. 20Yuk ro raa mame Yesus to kene sai mam kota. Tibyo raa ro Yahudi mawat mmat bokom reto. Bokom reto raa mkom mam mai trion tuuf: Ibrani, Latin msya mai ro Yunani. 21Menohe imam manes ro agama Yahudi weto hafrah. Ana mamo mo kʼPilatus mawe, “Nkom ‘raja raa ro Yahudi’ ma! Nkom: ‘Raa refi yawe ait raja raa ro Yahudi.’” 22Menohe Pilatus yawe, “Ro jõ tkom reto mhau yum oh.”
23Raa sbe ro Roma mse Yesus mam ara warok. Tna fo ana moo ratan rait saim ftah trion jiit. Aro yoo ftah sau-sau. Menohe jubah rAit to, tiwya raa mfen kaket moof. (Jubah reto to, raa mtin mnan fi ja raa mtin ratan to fee. Raa moo benang tna sne muuf. Mfen mbam uu snok mam te.) 24Feto to raa sbe mawe kʼanya mawe, “Anu bhah jubah rAit reto ma. Nma, anu tane mkah undi re merif awya ro kbe ykai jubah reto.” Tna ana mno feto re mnan si mkah Bokom ro Allah mawe:
“Ana saim-sam ratan aJõ, tna jubah aJõ ana mno mkah botane.”
Mazmur 22:19
25Fnya mabo jiit mros kene mam ara warok mair ro Yesus. Ana oh mi: Yesus yme Maria, msya mao, msya Klopas yfain ro masom Maria ye, tna msya Maria Magdalena ye. 26Yesus ymat yme msya kuber wAit sait mros. Ait retait Yesus yhafri. Tna yawe kʼyme yawe, “Tme, ku anyõ retait.” 27Tna yawe kuber rAit retait yawe, “Nme oh meto.” Ayõ reto ye kuber retait ymen Yesus yme yamo yse mam samu rait.
Yesus yajat
28Tna fo Yesus yhar yawe bombra beta ro Yaja yawe kʼAit yno to, yno mkak oh. Tna yawe, “Thai sbit.” Yawe feto ykyas mnan si tiwya Allah ybis raa mkom mam Bokom rAit.19:28 Mazmur 22:16; 69:22.29Anggur maya ro mano baro mhau mam baah sau. Tna raa moo bo ro mmot aya mnan fi spon, make mam ara makit tna mberu mam anggur maya reto. Tna tubat mee kʼYesus yata. 30Yata tna yawe, “Bo ro tama tno mam tabam refo, tno mkak oh!” Tna yanwaruk ysan yamos rAit kʼYaja tibyo yhai.
31Ti reto to, ayõ ro jumat. Feto to, raa ro Yahudi siwyan bo mkah ayõ ro raa wana ntmoh (hari Sabat).19:31 Ja raa ro agama Yahudi skabuk Allah mam ayõ ro Sabtu. Ana ro manes hawe bo ajat weto mhau nkro akus mam ara warok ayõ menrabu reto. Menrabu to ayõ ro mase. Au oh mefo ana baro mamo mo kʼPilatus mayoh re ybis raa sbe wait miji raa weto maa wana19:31 afo re mhai fooh. tna skur ajat weto mbam ara warok trion tuuf reto. 32Pilatus ybis. Raa mana ewok raa mame msya Yesus fo. Tna raa sbe weto miji maa wana wia. 33Tna ana mawe miji Yesus yaa rAit, he Ait yajat wia oh. Tibyo miji Yesus yaa fee. 34Menohe raa sbe sait yawah sawya ysu yajoh. Tibyo mees msya aya miyi frok. 35Ti reto to, raa sait yesait ymat bo reto.19:35 Far-far 35 refo Yohanes ykyas ait yesait. Tna ait oh mi ro ykom aam refo. Tna bo ro ykyas to mabo tu. Ykyas bo refo afo re anu nhar nwe bo wefo beta ait ykyas sioh fee. 36Bo weto mabo feto afo re mnan si Bokom ro Allah mawe:
“Ytai rAit sau kbe raa miji fee.”
Keluaran 12:46; Bilangan 9:12; Mazmur 34:21
37Tna bokom far-far taro ye mawe:
“Ana kbe heyut mrom Ait ro ana msu.”
Zakharia 12:10; Wahyu 1:7
Yesus ajat rAit raa mse mam isra mato
38Bi Yusuf tait raa ro Arimatea. Tna ait kuber ro Yesus wAit sait ye. Menohe ait waa raa manes ro Yahudi. Tibyo smot bait wai. Yesus yajat tna Yusuf yamo yo kʼPilatus tna yayoh yawe yoo ajat ro Yesus. Tna Pilatus ybis Yusuf yamo yoo. 39(Nikodemus tait raa ro tiwya yamo yo kʼYesus mam wore arin mti sau.) Ati refo ait yama tna ysya Yusuf mbewok makah ajat reto mamo. Nikodemus yakah bo ro mnan fi gaharu. Bo reto raa srioh msya mur tna mabyoh maut toni. Samyoh rau to 34 kilo bo feto. 40Ana mabo ewok reto makah lenan (hawee ro moof) ye. Moo bo reto tna ngkaru mam hawee reto tna sro ajat ro Yesus. Mbewok mno mnan si ja raa ro Yahudi mno hai wana. 41Kene wo Golgota to armato ro moof sau. Tna wore weto to raa mabah isra mato mkah bo meen raa mse hai wana. Menohe mamo snok ayõ reto raa mse hai mam isra mato reto aro fefares. 42Menrabu ayõ ro raa ntmoh. Tna isra reto kene sai. Tibyo ana mbewok moo ajat reto sama mam isra mato ro armato reto.
20Yesus yrok yasen
1Ayõ ro minggu, rabu ati reto to, arin maah fefares. Tna Maria Magdalena mamoʼt isra reto. Mamo snok yuk reto tna mmat he isra reto to, masoh maa wea. Au mmat he fraa ro raa muut wa isra masoh reto to, raa mririk oh. 2Mmat feto tibyo mhoh fooh mamo saso Simon-Petrus ysya kuber ro Yesus yhafri retait. Mamo mo kʼana mbewok tna mawe, “Jõ tmat Tuhan yarak mam isra! Raa msyõf Ait oh! Amu wase raa mse Ait mam tiyo!” 3Tibyo Petrus ysya kuber roto sait masen mamo mmat Ait mam isra reto. 4Mbewok mhoh mamo, he kuber roto retait yhoh wia Petrus. Tna snok isra mato reto wia matim. 5Ait retait yaka koyo ymat mam isra mato. Ymat he hawee lenan ro raa sro Yesus reto sai mbris akus. He ait twok isra mato reto fee. 6Tna Simon-Petrus yama tis yrof ait snok mam yuk reto. Snok tna twok mam isra reto mato. Tna ait ymat hawee reto mbris akus mam weto. 7Tna ymat hawee mabuf ro raa make Yesus yana. Hawee reto raa beah tna mse hayah baro. 8Tna fo kuber ro riwai yhoh yatim wia Petrus fi yamo twok ye. Ymat tna ait yhar yawe Yesus yrok yasen. 9(Bokom ro Allah mawe Yesus kbe yrok yasen. Menohe ati reto to, ana mhar maja rau kaket fefares.) 10Tna fo kuber mabo ewok weto to hah mamoʼt amah.
Yesus yerif Ait kʼMaria Magdalena
11Maria Magdalena mros kait kene wo isra reto to, mawia. Mawia tna maka mmat isra mato. 12Menohe mmat he malaikat mabo ewok. Malaikat weto mbewok myum ratan ro mboh. Mbewok hre mam ati ro raa mse Yesus ajat rAit. Sau hre mam ati ro yana, tna sau hre mam ti yaa. 13Malaikat weto mawe kʼau mawe, “Fyi re nyõ nawia fo?” Maria mawe, “Tuhan ajõ ro smot tait, ajat rAit raa moo mamo marak. Tna jõ wase raa mse mam woyõ.” 14Mawe bo reto tna haberek mmat he Raa sait yros mam weto. Ait refi Yesus, menohe au wase Ait ye. 15Yesus ytu kʼfai au yawe, “Fyi re nyõ nawia fo? Nyõ saso awya meto?” Maria mrok mawe Ait fi raa ro kmot armato reto. Tibyo mawe kʼAit mawe, “Taja, soh nyõ noo Ait meto mi, nerif wore wo nyõ nse afo re jõ tamo too Ait takah tamo.” 16Tna Yesus yawe, “Maria!” Tibyo au msiur mmat Yesus tna mawe, “Rabuni!” (Mai ro Ibrani reto to, mawe ’Guru’.)17Tna Yesus yawe, “Nbo Jõ wia ma! Jõ hah te taut tamo to kʼTaja fefares. He namo no kʼtao woJõ na. Tna nkyas kʼana nawe mfo refo Jõ hah te tamo to kʼTaja aJõ. Ait fi anu Nja wanu ye. Ait fi Allah ro Jõ smot. Tna Ait fi Allah ro anu smot ye.” 18Maria mamo mo kuber ro Yesus wAit mawe, “Riwai jõ tmat Tuhan!” Tna mkyas kʼana bombra beta ro Ait yawe.
Yesus yerif Ait kuber wAit
19Ayõ ro minggu reto arin mti oh. Tna kuber ro Yesus wAit hre su mam amah sau. Ana waa raa Yahudi ro manes weto. Tibyo muut masa matak. Menohe Yesus yama yros tubor susai kʼana tna yawe, “Waa ma.” 20Ait ykyas feto tna yerif yatem msya yatefau rAit kʼana. Ana mmat Tuhan u to, ana simaut mase. 21Tna Yesus yawe u yawe, “Riof kʼanu oh! Tiwya Taja ybis Jõ tamo to kʼraa. Tna mfo refo tbis anu tawe nmo no kʼraa nfi feto ye.” 22Tna fo Ait yfi yafos rAit kʼana tna yawe, “Tsan Har ro Tuhan kʼanu mefo. Noo oh! 23Soh anu nwe kʼraa nwe, ‘Jõ tawe, iro ro nno to marak oh.’ Feto kbe Allah yyon iro ro ana mno oh. Menohe soh anu nwe iro ro ana mno mhau fares to, iro ro ana mno mhau bau.”20:23 Matius 16:19; 18:18.
Yesus ysya Tomas
24Tomas, ro ja raa mtu yasom Didimus ye, tait kuber ro Yesus wAit sait ye. Ana to mabo 12. Ti ro Yesus yerif Ait reto to, Tomas hre su ysya kuber taro to fee. Ait yarak. 25Yama tna kuber taro mkyas kʼait mawe, “Amu nmat Tuhan!” He Tomas yawe, “Soh jõ tmat yier ro paku mam yatem fee, tbo fee, tna tnit temkrem mam yhaf ate ro raa mame fefares to, jõ aro wase bokyas ranu reto bo mabo rau yum fee.”
26Minggu sau firwas tna kuber ro Yesus wAit hre su mam amah u. Tna Tomas hre ye. Mato beta raa muut matak. Menohe Yesus yama yros tubor susai ana tna yawe, “Riof kʼanu oh!” 27Tna Ait yawe kʼTomas yawe, “Nmat tatem aJõ nbo. Natem nbo tatefau aJõ. Nnaut maut-mroh ma. Smot Jõ oh!” 28Tomas yari yno tna yawe kʼYesus yawe, “Nyõ fi Tuhan ajõ! Nyõ fi Allah ro Jõ smot!” 29Tna Yesus yawe kʼait yawe, “Nyõ nmat Jõ oh mi nyõ smot Jõ. Raa taro mmat Jõ fee, menohe kbe ana smot Jõ. Kbe ana weto mhau simaut mase.”
Fyi re Yohanes ykom Injil refo?
30Amu, kuber ro Yesus nmat bo msai ro yno mawat. Menohe jõ tkom bombra beta mam aam refo fee. 31Bombra ro jõ tkom mam aam refo fo, tkom afo re anu nhar nwe Yesus tait Mesias20:31 Som reto to, “Ait ro Allah ysok tna yawe yamo Raja.” Mai ro Ibrani mawe Mesias, tna mai ro Yunani raa mawe Kristus.. Ait fi Ku ro Allah yare. Tkom afo re anu smot Ait. Anu ro smot Ait msya nri bo ro Ait yawe to, kbe nkai riof ro hame.
211Ti baro firwas tna Yesus yerif Ait kuber wAit mam maru ro Galilea. (Maru reto to, masom maru ro Tiberias ye.) Bo reto fefo: 2Simon-Petrus, Tomas (ro ja raa mtu yasom Didimus), Natanael (raa ro Kana mam provinsi ro Galilea), ku ro Zebedeus wait, tna msya kuber ro Yesus mabo ewok roto taro naut to ana hre su. 3Tna Simon-Petrus yawe kʼana yawe, “Tamo takam syoh.” Tna ana mawe, “Amu kro ye.” Ana maut wiak tna saso sioh mti reto mamo snok rabu. He mfot syoh aro fee.
4Isi ntara Yesus yros maru maam. Menohe ana mhar mawe Yesus metait fee. 5Tna Ait ytu kʼana yawe, “Tao na, nfot syoh aro fe mfe a?” Ana mawe, “Mfe!” 6Yawe, “Sik beak pukat ranu ti ntem ati kbe tru sioh!” Ana mari mno feto tna mkai syoh mawat toni. Tibyo ana mtai tubat fee. 7Kuber ro Yesus yhafri retait yawe kʼPetrus yawe, “Tuhan metait!” Petrus yari feto tna yasen yyum ratan ro riwai yrus. Tna tbat mam aya kni yamo yo kʼYesus. 8Kuber taro mhau mam wiak mato tna miin mamo mrof. Miin mamo tna mkuk pukat reto msya syoh weto mamoʼt maru mne. (Mne reto mhau fari fee; 100 meter sai bo feto.)
9Ana snok mne tna mroh mbam wiak. Tna ana mmat roti msya syoh baro raa konta mam tafoh masuf. 10Tna Yesus yawe, “Sgi nbo syoh ro anu tru baro nma!” 11Simon-Petrus yaut mam wiak tna ykuk pukat reto mamaʼt mne. Syoh ro mabi ran trion 153 mhau mam pukat reto mato menohe hri fee. 12Yesus yawe kʼana yawe, “Nma sohmaam bo.” Kuber weto mhar mawe Ait refi Tuhan tibyo ana beta waa mawe mtu kʼAit fee. Mtu mawe Ait awya fee. 13Tna Yesus yoo roti reto saim kʼana. Yoo syoh weto yee kʼana mabo ye. 14(Yesus yrok yasen tna ti ro yerif Ait kuber wAit reto to, muhrin tuuf oh meto.)
15Ana sohmaam bo mkak. Tna Yesus yawe kʼSimon-Petrus yawe, “Yohanes yare: Fyi, nyõ nhafri Jõ toni niwer raa taro fe mfe a?” Tna Petrus yawe, “Ae, Tuhan, Nyõ nhar nawe jõ thafri Nyõ.” Yesus yawe, “Feto to nsia domba maku woJõ.” 16Mun ro ewok u Yesus yawe kʼait yawe, “Yohanes yare: Fyi, nyõ nhafri Jõ kaket fe mfe a?” Tna Petrus yawe, “Ae, Tuhan, Nyõ nhar nawe jõ thafri Nyõ.” Yesus yawe, “Feto to kmot domba woJõ.” 17Tna Yesus ytu ro mun tuuf u kʼait yawe, “Yohanes yare: Fyi, nyõ nhafri Jõ fe mfe a?” Yesus ytu bo reto mun tuuf tna Petrus yari feto tna sraujin yawe, “Ae, Tuhan, Nyõ nhar bombra beta. Tibyo nhar nawe jõ thafri Nyõ.” Yesus yawe, “Feto to nsia domba woJõ. 18Nnaut: Ati ro nyõ mere fares to, nyõ nesait ntau hotom anyõ, tna namo tiyo-teya ro nyõ ksoh sai. Menohe ati ro nyõ nabi to, kbe nyum natem nee kʼraa roto mbo tna moo hotom anyõ mbo mtau mati kʼnyõ naka ye. Tna ana makah nyõ mamoʼt yuk ro nyõ hawe bo namo.” 19Yesus yawe bo reto yerif iso ro meen Petrus yajat. (Meen Petrus smot Yesus matak tibyo raa mame ait yajat Raa mmat bo ro yno tna mbaut Allah.) Tna Yesus yawe kʼait yawe, “Nama, kro Jõ oh!”
20Tna Petrus ymat he kuber ro Yesus yhafri retait kro ana mam tis. (Ait retait oh mi raa ro tiwya susu hre kene ysya Yesus tna ytu kʼAit yawe, “Tuhan; awya oh mi kbe besruf Nyõ to?”) 21Petrus ymat kuber retait tna ytu kʼYesus yawe, “Fyi? Bo bawya ro kbe mai kʼait refi?” 22Yesus yawe, “Mfi bo Jõ tawe ait yhau yroon snok mam ti ro Jõ tama u to, bo ro nyõ nsya nhar meto fee. He bo ro nyõ nno to, nyõ kro Jõ sai!” 23Tibyo kuber weto taro mabah bokyas mawe kuber retait meen yhai fee. Ebokfi Yesus yawe feto fee. Ait yawe, “Soh Jõ ksoh tawe ait yhau yaam mamo snok mam ati ro Jõ thah tama u to, bo ro nyõ nsya nhar meto fee.”
24Jõ oh mi kuber retait. Tmat bo ro Yesus yno weto tna tkom fo. Tna anu bhar bwe bawya ro jõ tkyas to beta mabo tu oh. 25Bo ro Yesus yno taro to mawat fares, raa mkom beta fee. Mfi bo raa mkom beta beryum to, aam ro raa mkom weto to mninon. Tnaut tawe kbe yuk ro raa mse bokom reto mam tabam refo to mnan fee.