Aam ro Yakobus Ykom
Yakobus
1Yakobus ymah meen kʼraa ro Yahudi
1Aam refo mbam kʼjõ, Yakobus. Jõ tamo sryan ro Allah ysya Kristus Yesus. Ja jõ tno bo ro ana mbewok mbis. Jõ tmah meen kʼanu raa mana ro Yahudi ro nso-sa nbam rabin ranu nmoʼt arin aso beta sor:
Bosmot msya bohar
2Taja, tme, tao, tano na; soh bo ro mkair-kar mama sanet anu to, simaut mase. 3Anu nhar nwe bombra ro mkair mama, sanet bosmot wanu to. Menohe mafer rau to moof sai. Feto to simaut mase. Bo mkair-kar sor ro mama mai kʼanu to, mafer rau mno bosmot wanu mrok matak renti. 4Bito nsom bo ro mkair-kar weto to, afo re anu nkai makit rau to. Bo weto, mno bosmot wanu matak; kbe anu smot Kristus matak aro mabut fee. Kbe anu nno bo ro Ait ksoh to mnan si, aro mabut fee ye. 5Tna soh anu nkin sait wase bo ro Allah ksoh ait yno to, feto skabuk yayoh Allah afo re yoo bohar yee kʼait. Allah tait Raa ro yatem miyõ, Raa ro yhaf ase. Kbe Ait yoo bohar yee kʼraa retait tu oh. Ait bhah raa retait fee. 6Awya ro yayoh bo to, ynaut myum-yam ma. Nhar nwe Allah ksoh yoo bohar yee kʼait ro yayoh. Ait ro ynaut mamo-me to yfi figyõm ro foos mfi maut mroh. 7Ait ro ynaut maut-mroh to, kbe ait ykai bo aro mbam Tuhan fee. 8Ait ro yhaf mko-ako yoyo tait, kbe bo beta ro ait yno to, ait yros ybo yno kaket fee ye.
Raa kinyah msya raa ro bobot
9Anu, raa Kristen ro kinyah aro to; nhau to, simaut mase. Allah ymat anu yawe anu raa ro mase. Feto to safuk nnaut bo ro Ait yawe reto. 10Tna anu ro bobot sor to; nnaut nwe meen anu safe marak mfi bosafom tafuf sai. Nnaut bo reto tna safuk nwe Allah ymat anu to yawe anu raa ro mase fee. 11Raa ro bobot to, mase wana mhau waor sai. Ana mfi bosafom. Allah yno ayõ moo mbait ktan-ktan mafit, tna bosafom samer. Tna tafuf mrur-rar marak. Moof rau mhau waor sai ye. Feto ye mkah raa ro bobot. Ana mhau mame kta wana to, kbe ana safe marak sai.
Bo ro mkair ja mama sanet anu
12Kbe Allah yno bo moof kʼraa ro bito mros masom bo ro mama mai kʼana to. Soh ana bito masom bo ro mkair reto mamo snok tis rau to, kbe ana siwyan moo boren wana ro Allah yaren kʼana ye. Allah siwyan boren ro mhau mamos mae. Meen Ait yoo boren reto yee kʼraa ro mhafri Ait to. 13Ati bo ro mkair mama mai kʼanu sait to, anu baro nwe, “Bo reto mbam kʼAllah. Ait tko anu bno iro.” He mfe. Bo aro tko Allah fee saut. Tna Ait ja tko raa mno iro fee ye. 14Raa aro yesait srau oot-oot yawe yno bo ro mkair-kar. Ait srau rait saro ait tibyo mbtek kayah. 15Ait srau rait oot-oot tna ait btek mam iro oh meto. Mafer rau to ait yno iro yoyo. Tna ait yhai tna meen ykai yamos mae fee ye.
16Taja, tme, tao, tano na ro jõ ksoh; kaket anu re bo ro mkair aro besruf anu ma. Bo weto mbam kʼAllah fee. 17Bouum ro moof msya bo ro ati to, mama yum oh mbam Allah ro yhau mam sawro rAit. Tna Ait yfen bombra ro mawyah mam ayoh sor to. Ait ja ye haberek fee. Ait yno bo moof yum. Rabu Ait yno bo sau, tna hreha Ait haberek yno bo roto hayah fee ye. Ait sait yum oh. 18Bo moof ro Ait yno weto to sau oh mefo: Mkah Ait ksoh rAit sai, Ait yno anu bmo raa mana wAit mkah bokyas rAit ro ati. Ait yno feto afo re yitbat anu yse mam wore ati syok mbam bombra ro Ait yfen taro to ye.
Nri watum ro Allah tna nbo nno
19Taja, tme, tao, tano na ro jõ thafri; nri bo refo kaket! Hoh-hoh nri bo fooh. Menohe nkyas fooh to ma, tna kmo fooh bo to ma ye. 20Raa ro kmo to, kbe mno bo ro Allah ksoh to fee. 21Feto to noo bo mkair-kar ro mhau mam nhaf to, mbeak war makus beta. Tna safo ro ja anu nno bo to, beak fari ye. Tna noo Watum ro Allah mkah nhaf ro sneh to, nse kʼanu nhaf riryõn. Watum reto matak moo riof ro mase mee kʼanu to.
22Nri Watum ro Allah to, nri tna nfot nse kʼanu. Soh anu nri sai menohe nbo nno fee, anu sioh anu sai meto. 23Awya sai ro yari Watum ro Allah menohe ybo yno fee; ait retait ynan raa ro yros wane ait yasu ynaif mam bo wane to. 24Ait tna sai yhaninin ait mam bo wane, menohe frok yamo si to ye sorni yasu ynaif ro riwai haninin reto fooh sai. 25Watum ro Allah to bo ro ati, bo ro mnan si. Watum rAit reto ja make raa matak fee. Menohe watum rAit reto ja skur raa re ana rero kro Ait. Awya sai ro bito ymat sas watum rAit ybo yno tna sorni fee; kbe Allah yno bo moof kʼAit. Raa retait yno bo to, kbe Allah yatam ait.
26Raa sait ynaut yawe ait ja smot Allah kaket tna yno bo ro Allah ksoh. Menohe soh ait kaket hrea rait fee; soh ait ykyas-kas bo to, ait retait sioh ait sai oh meto. Tna bosmot rait mafer marak. 27Kair mama mai ku kʼraa msya semit to, Allah, Bja ranu ksoh anu bmo bmat ana. Allah ynaut yawe bosmot ro matak oh meto. Raa baro kaket ana re kbe bo ro tabam refo saro ana fee. Tibyo ana btek kayah fee. Allah yawe raa weto mno bo ro moof ye, tna bosmot rana matak ye.
2Nmat raa to, nwe ana ro mase mnan anya msya raa kair
1Taja, tme, tao, tano na; anu smot Tuhan Yesus Kristus ro yase. Niwana raa taro-taro ma. Anu nhau to, nnit raa nwe raa taro maut tna raa taro mroh to ma. Nmat raa ro mase msya raa ro kinyah to, nwe ana weto beta mnan anya. 2Mfi bo raa mabo ewok mama skabuk su msya anu to: Raa sait fayir ait sria cincinemas mam yatem krem msya yyum ratan ro moof. Tna ait sait yyum ratan ro manyah sai. 3Ja anu nmat ait ro yyum ratan ro moof toni tna tam-tam ait. Ja anu nwe, “Bi yabi; nama hre mam wore moof wono.” Tna ja anu nwe kʼait ro ykair refi nwe, “Namo nros wore wono.” Tna nwe, “Namo hre mte wore wono.” 4Nno feto ma. Nmat raa to, nsok sait tna nwe ait ykair to ma. Soh anu nno feto to anu raa ro nhaf mkair. Nwe raa ati hayah tna raa kair hayah feto ma.
5Taja,tme, tao, tano na; nri oh: Raa kair ro mhau mam tabam refo fo, bosmot wana matak. Reto oh mi Allah ysok ana yawe ana mfi raa ro bobot. Tna Ait ysok ana re meen mamo mhau mam sawro ro Ait yamo Raja ybo ye. Bo reto tiwya Ait yawe yum oh kʼraa ro hafri Ait to. 6Allah ysok raa kair feto. Menohe ja anu niwana ana weto. Nnaut nwe raa ro bobot mam tabam refo oh mi raa ro ja mber hasyoh anu to. Tna ana mfot anu makah mamo mo kʼraa ro mtu srah mari bo to. 7Tna ana ro bobot ye oh mi mamus Yesus. Mkah Ait yasom ro moof reto, Allah ytu anu bmo raa wAit to.
8Watum ro matim mam Bokom ro Allah to mawe,
“Natmof raa anya kaket ye mfi ja natmof netsu anyõ nesait ai to ye.”
Imamat 19:18
Soh anu nbo watum reto nno to, reto moof oh meto. 9Menohe mfi bo anu nsok raa ro bobot nwe hayah, tna nsok raa kair nwe hayah feto to, anu niwer watum ro Allah oh meto. Anu nno iro oh meto. 10Awya ro ybo watum ro Allah beta yno, menohe yiwer watum rAit sau aran sai to, Allah ymat ait yawe yiwer watum rAit beta oh meto. Feto to, safo makan btek mai kʼait. 11Tiwya Allah yawe, “Nwyah ma.” Tna Ait yawe, “Nme ajat ma.2:11 Keluaran 20:13,14.” Feto to, awya ro ywyah fee menohe yame ajat to, ait yiwer Watum ro Allah oh meto.
12Mfo refo anu nhaf nse watum ro Yesus. Watum rAit reto ja make raa matak fee. Menohe Watum rAit reto ja skur raa. Skur re kbe ana rero kro Ait. Feto to nkyas bo mamyot bo ro Ait ykyas. Nno bo mamyot bo ro Ait ybis. Meen Allah ytu srah wanu to, ybo watum ro Yesus reto tna ytu kʼanu. Allah siwyan ytu srah kʼanu. Nnaut nwe soh anu nhaf nse bo ro Yesus yawe, feto kbe Allah ymit safo makan kʼanu fee. 13Tna awya ro ja yatmof raa anya to, ati ro Allah ytu srah rait yari to, kbe Allah yatmof ait retait ye. Menohe awya ro ja yatmof raa anya fee; ati ro Allah ytu bo kʼait yari to, kbe Allah yatmof ait fee ye.
Bosmot ro mafer marak
14Taja, tme, tao, tano na; raa sait yawe, “Jõ smot Tuhan.” Soh ait yawe feto menohe ybo Watum ro Tuhan fee, yno fee; bosmot rait reto mafer marak. Kbe Allah ymat bosmot rait reto, yawe yoo riof ro mase yee kʼait retait fee. 15Mfi bo raa wanu ro sme sait, soh mfe, ro ano sau bo, soh bo ro ana myum mabut tna boit ro ana mait mabut to, natmof ana. 16Soh anu sait yawe, “Meen oh kʼanu! Nmo kaket! Nyum ratan ro mno netsu mbe. Nmo niit bo!” Soh bo ro ana mse to mabut, menohe ait retait ykyas bo moof mkah yasoh sai menohe, yoo bo yatmof ana weto fee; bo ro ait ykyas reto to mafer marak sai. 17Feto ye mkah bosmot wanu: Soh anu smot Tuhan menohe nbo watum rAit nno fee; bosmot ranu reto mafer marak ye meto.
18Mfi bo raa taro mawe, “Nyõ nawe nyõ smot Tuhan kaket. Menohe jõ tari watum ro Tuhan, tbo tno.” Kbe jõ tawe kʼait retait tawe, “Sik nerif bosmot anyõ reto kʼjõ. Bo ro jõ tno oh mi merif bosmot ajõ re kbe raa mmat tna mhar mawe jõ smot Tuhan.”19Anu nhar nwe Allah tait sait aran to. Reto moof baro ye. Menohe nnaut nwe ja kabes magin mhar mawe Allah sait aran ye. Tna ana waa bi Ait tetet mhai ye. Ro moof to, anu nkit nhar bi Ait tna nri watum rAit nbo nno kaket ye. 20Anu taro wase bo! Anu nkyas nkah nasoh sai nwe anu smot Tuhan to, menohe ja anu nbo watum rAit nno fee. Bosmot feto mafer marak. 21Nnaut Abraham, anu hohos ranu: Ait yari bo ro Allah yawe kʼait to, ybo yno: Ait yakah ku rait Ishak yawe ktan ait ysan kʼAllah. Bo ro Abraham yno oh mi Allah ymat ait tibyo yawe ait yfi raa ro mhaf moof ati to. 22Anu bmat bo ro ait yno tna bhar bwe bosmot rait mamo wrok-rok anya su msya bo ro ait yno. Bo ro ait yno reto mno bosmot rait mnan si. 23Reto mamo mamyot Bokom ro Allah mkyas mawe:
“Bo ro Allah ykyas kʼAbraham reto to, ait yari tna smot (percaya). Smot yawe bo ro Allah yawe reto to meen mabo. Au oh mi Allah yawe Abraham tait raa ro yhaf moof ati.”
Kejadian 15:6
Tna raa mawe, “Abraham tait Allah yafoh rAit.” 24Feto to anu bhar bwe raa ro smot Tuhan sai menohe mbo watum rAit mno fee; Tuhan yhaf mnan kʼana weto fee ye. Menohe soh raa smot Tuhan tna mbo watum rAit mno ye to, Allah yhaf mnan kʼana weto. 25Rahab to fnya ro ja mwyah. Menohe nnaut bo moof sau ro au mno to ye: Tiwya au tam-tam raa ro Israel mabo ewok wore wo ana mama mmat tan kota ro Yerikho. Tna au mmyõt ana mbewok mam amah rau. Tna fo au merif iso roto re kbe ana msam mamo.2:25 Yosua 2:1-21. Au mno bo ro moof, tibyo Allah yawe fai au ja wase mber safo fee. 26Raa metsu wana, mesait mhau kar fee. Soh mafos marak to, kbe raa mhai tu oh. Feto ye soh anu smot Tuhan sai tna nbo watum rAit nno fee; mafer marak.
3Kaket anu bo ro nkyas
1Taja, tme, tao, tano na; anu nwat nwe nsen nmo guru to ma. Meen ati ro Allah ytu srah to, kbe Ait ytu bo ro samyoh toni mai kʼamu ro nmo guru sor to, miwrek raa roto. 2Anu beta fo ja bno bo ro mkair-kar mawat ye. Awya ro ja kaket ait re ykyas bo ro mkair-kar fee, ait retait yno bo moof. Ait yatak yisoh ait ysya yetsu rait beta to kaket oh metait. 3Anu bhar bke sna wa mam kuda masoh. Bno afo re kuda reto mno bo ro anu bwe, tna mhoh mkah metsu rau kro iso ro anu ksoh sai. 4Nmat sas kapal to. Kapal to bo ro maboh. Tna kemudi rau to maku sai. Foos ro mase mfi mai mamo, menohe kemudi ro maku mfi miin sai mno kapal reto mamo yum mam ti ro raa ksoh. Tna kapal reto kro raa ro ybo kemudi reto ksoh rait sai. 5Feto ye mkah anu hrea msya anu betsu. Hrea bo ro maku sai mhau kʼanu betsu refo ye. Tna hrea refo mno tibyo anu bibi anu bwe anu bno bo ro mase mbra sor. Tna kaan ro maku sai, soh btek to, kbe mbet safom ro msai mbra to, mait mkak sai. 6Hrea fo mnan tafoh to ye. Kabes Yabi oh mi yno anu hrea feto re anu hrea misti anu betsu mno bombra ro mkair-kar yoyo maban tinyi anu raa mabe, mamo snok mam wore wo anu bhai ye.
7Bombra ro mfi binatang ro ja safo, ruu, aban bo ro ja mton mam safom msya syoh ro mhau mam aya bo to, raa mhar bo mno ana mha ye oh. 8Menohe hrea to, ja raa sait bo yatak yno re mha fee ye. Hrea to ja mno bo ro mkair-kar yoyo sai. Hrea to mnan bosaro ro raa saro raa re mhai ye. 9Anu bkah hrea bbaut Tuhan, anu Bja ranu tait. Menohe anu bkah hrea wanu bto boto kʼraa ye. Nno feto ma! Nnaut nwe Allah oh mi yfen anu raa; yfen mfi Ait ye to. 10Mbam bsoh sau reto ye anu bibi Allah ye tna anu bmus raa anya ye. Raa wamu; Nno feto ma! 11Aya ja miyi frok mbam aya mato sau. Kbe aya ro frok reto mafah ewok a? Raa mata aya reto to, taro mafah moof tna taro mafah matan to fee. 12Tna feto ye kake sau ro masom ara to, ja mse kake zaitun make fee. Tna kake anggur mara mse kake ro masom ara make fee ye. Tna aya mato ro ja mafah matan to, kbe me haberek mafah moof u fee ye. Feto to, nkyas bo ro moof yum sai.
Bohar ro mbam Allah
13Mfi bo raa wanu sait yawe ait raa ro yhar bo kaket. Soh ait yno bo moof mkah yhaf ro sneh to, anu nmat nhar nwe ait raa ro yhar bo. Soh ait yhar bo ro ati to, kbe yno bo mkah yhaf ro sneh feto ye. 14Menohe soh anu naam bo toni, nhaf mkair, tna nnaut anu netsu ranu nesait kar sai to, feto mkair. Soh anu nno bo weto to, bibi anu ma! Anu nhar bo fee! Anu raa ro sioh anu sai meto. 15Bohar ro mnan feto to, mbam kʼAllah meto fee. Bohar reto to mbam tabam refo sai meto; mbam kʼanu raa msya mbam kabes yabi sai meto. 16Raa ro maam bo raa tna mnaut ana metsu mesait kar bo to, wore ana mhau to, ana mno bo kbik-kbak tna ana mno bo ro mkair-kar sor ye. 17Menohe raa ro Allah yoo bohar rAit yee kʼana to, tinyi rau to ana waa Allah re mno iro fee. Ana ksoh msya raa miranya sai, ana mhaf sneh, tna mari bo ro raa mawe. Ana matmof raa anya tna mno bo ro moof sai. Ana mmat raa to, tna mawe raa sait hayah-hayah fee, ja msok raa fee. Tna ana kro Tuhan kaket, mkah srau sau sai, srau ewok fee. 18Raa ro ja mno raa misoh miranya wana to, mafer rau oh mi raa mno bo ro ja Allah ksoh to.
4Anu ksoh bo ro tabam refo toni to ma
1Bo bawya misti re anu nmak tna nfa nsya raa anya bo to? Anu srau oot-oot bo ro tabam refo oh mi anu nmak tna nfa bo to. Bonaut mkair weto msya bonaut ro moof to, mbewok ja mafa anya mam kʼanu nhaf mato. 2Anu srau oot-oot bo sau menohe anu nkai bo reto fee, tibyo anu nme ajat. Feto ye, anu safo saso bo menohe anu nkai bo ro anu saso reto fee, tibyo anu nmak tna nfa anya bo to. Anu nyoh kʼAllah fee. Au oh mi anu nkai bo fee. 3Anu taro bonaut wanu ja mkair sai. Tna anu nyoh bo kʼAllah, menohe nyoh bo ro anu nhaf mato wanu ksoh sai. Soh anu nyoh feto, kbe anu nkai bo ro anu nyoh reto fee ye. 4Anu kro Allah kaket fee! Anu nhaf makin! Awya sai ro ksoh bo ro tabam refo toni to, ait knait Allah oh meto. Bo reto anu wase fares a? Feto to awya ro ksoh yno bo ro tabam refo wer to, Allah yiranya ysya ait fee tna ait yafa ysya Allah oh meto. 5Bokom ro Allah mawe, “Har ro Allah yse kʼanu to, Ait yhaf myoh. Au oh mi Ait ksoh yawe anu kro Ait yesait aran.”4:5 Nmat Keluaran 20:5. Nnaut nwe bokyas reto bokyas ro ati to. 6Menohe Allah yoo har mesait yee kʼanu sai fee. Ja Ait yoo bouum ro mase miwrek har reto yee. Reto oh mi Bokom ro Allah mawe,
“Allah beyun raa ro ja bibi ana ai. Menohe Ait yatmof raa ro mhaf sneh.”
Amsal 3:34
7Feto to, waa Allah. Nri bo ro Ait yawe. Beswan-swan kabes yabi (Iblis). Nikyak ait to, tna ait ysam yamo fari. 8Nmo nhau nrat nsya Allah. Niranya nsya Ait. Tna kbe Ait yama yrat yhau yiranya ysya anu ye. Anu taro ja nno iro. Ne nno iro u ma. Tna anu taro ja nhaf makin, anu kro Allah kaket fee. Nisoh nhaf wanu afo re anu nros tu smot Ait matak. 9Nnaut iro ro anu nno to, waa tna nwia surut anu kaket. Nashana! Sah ro anu nsah to, haberek mamo wia, tna simaut ro mase to, haberek mamo wian surut wia afo re Allah yatmof anu ye. 10Nka nanwaruk mkah nhaf ro sneh kʼTuhan, tna re Ait teta anu nmo raa ro nse.
Anu nwe kair anya to ma
11Taja, tme, tao, tano na; nwe kair anya ma. Awya ro yawe kair raa wamu sait, ait yawe kair Watum ro Allah ye oh meto. Tna awya ro ynaut mam yhaf mato yawe raa wamu sait yno bo mkair to, ait yawe kair Watum ro Allah ye oh meto. Soh anu nwe Watum ro Allah mkair to, anu nbo Watum ro Allah nno fee; menohe anu hre nwe watum rAit mkair sai oh meto. 12Allah yesait aran yoo watum rAit yee kʼraa. Tna Ait yesait aran kbe yhau susai, ytu bo kʼraa yari bo ye. Feto ye Ait yesait aran yatak yoo riof yee kʼraa. Tna Ait yesait aran yatak beak raa mamo mait mam rabin kair. Feto to awya oh mi anu to, re nwe kair raa anya nwe mno bo mkair to?
Safuk bo ro meen anu nno to wia ma
13Anu taro nwe, “Ifo, soh mfe menrabu to, kbe amu nsen nmoʼt kota tna nhau mam beto tahun sau. Amu nhau mkah nsim bo saso pitis tna kbe amu nkai mafer mawat.” Nkyas feto ma. Nri oh: 14Bo bawya ro menrabu btek mai kʼanu to, anu wase ye. Anu to nfi wasi ro maun maut. Wasi reto mhau waor sai tna marak. 15Ro moof to, nwe fefo: “Soh Tuhan ksoh yawe amu nhau naam to, kbe amu nhau naam. Tna soh Ait yawe amu nno bo sau to, kbe amu nno bo reto.” 16Nesait kar nsaim tna nkyas bo ro kbe anu nno to ma. Anu safuk tna bibi anu sai meto. Anu bibi anu feto to, mkair meto. 17Feto to, awya sai ro yhar yno bo ro moof, yhar bo moof ro Allah ybis yawe ait yno to, kbe yno tu oh! Soh ait ybo yno fee; yno iro meto.
5Yakobus bhah raa ro bobot
1Anu ro bobot to, nri kaket: Meen bo ro msai btek mai kʼanu. Feto to nsen nwia sut-sut anu. 2Kta wanu to, meen sasyoh makus. Tna ratan wanu to, meen bo mabat ye. 3Makyon sboh rau tna pitis emas msya perak wanu to, meen hesik mait ye. Kta ro anu nse weto to mafer marak. Hesik reto meen masen mkyas bo. Meen hesik reto mkyas mawe anu nno bo ro mkair. Mkyas mawe anu nhau to ja nwe nme kta sai. Hesik reto meen mait anu netsu wanu mfi tafoh to ye. 4Tna anu sioh raa ro anu nbis mryoh bo mam armato wanu to. Anu sioh tna boren rana reto anu nren fee. Feto to ana mkiyat ana hrowyõ rana. Tna Allah ro yatak toni yari bo ro ana mkyas reto. 5Anu nhau nhaf nse bombra ro tabam refo mfi raa ro bobot. Anu mfi fane bo to; raa moo boit ro mait. Metsu maboh tna raa ktan. 6Raa taro wase mber safo. Ana ja mafa msya anu fee. Menohe anu nkyas bo ro mkair mai kʼana weto tna nme ana majat.
Bo ro matu mai to, bito nsom sai
7Menohe anu ro kinyah sor: Nhau to, bito nsom bo mkair ro matu mai kʼanu. Bito nsom mamo snok mam ati ro Tuhan hah yama u. Nmat raa ro ja ykah armato rait. Ait yhau kait ste armato reto manes. Yhau to, snyi ro oom mais firwas tna oom hwyõm. Tna fo ait yhaf yse armato reto mafer rau. 8Nhau, nhau nnan ait feto ye. Ati ro Tuhan yama u to kene oh. Feto to nhau nfit nkar matak sai. 9Tna nmai kʼanya ma; kbe Tuhan beah srah wanu. Ait ro ytu bo kʼraa beta yari to, kene wo yama oh.
10Taja, tme, tao, tano na; nnaut nwe tiwya Tuhan ybis nabi wAit mama mkyas bo rAit. Ana mkyas bo rAit tibyo mkai bo ro mkair. Menohe ana mhau to, bito masom bo samyoh mbra ro btek mai kʼana to. 11Bo mkair mama mai to, menohe anu bhar bwe bi Ait yno bo moof kʼana. Nnaut bi Ayub: Tiwya ait bito yasom bo ro matu mai kʼait mamo snok tis rau to. Tna Tuhan yno bo moof kʼait riryõn. Nnaut nwe Tuhan tait, Raa ro ja yatmof raa.
12Bo ro ati syok to mefo: Nto boto ma! Ntom ayoh ma, tna ntom tabam refo ma ye. Ntom bo bawya sai to ma ye. Nwe, “Ae” atau “Mfe” sai. Soh anu nto bo aro to, kbe Allah yawe safo makan btek mai kʼanu to.
13Soh anu nkin sait ykai bo ro samyoh mai kʼait to, ro moof to, ait skabuk kʼAllah. Tna soh anu nkin sait simaut to, ro moof to, ait yji howes ybaut Allah. 14Tna soh anu nkin sait kiyam to, ro moof to, ait ytu raa majelis mama. Tna kbe ana skabuk Tuhan mtom Ait yasom. Tna ana moo minyak baro karu mam ait yetsu ye. 15Tna soh ana skabuk mkah bosmot rana ro matak to, kbe kiyam rait marak. Tna soh tiwya ait yno iro aro to, kbe Tuhan yyon iro reto ye. 16Feto to, nras iro wanu ro nno kʼanya tna skabuk anya ye afo re Tuhan yno kiyam ranu marak. Raa ja mhaf moof to, skabuk raa to, boyoh wana matak toni. 17Nabi Elia tait raa sai ynan anya yfi anu wefo ye. Ait safo skabuk kʼAllah re yno oom mais fee. Skabuk feto tibyo Allah yno oom mais fee mamo snok tahun trion tuuf hariyah. 18Tna ait ye skabuk u. Tibyo Allah yno oom mais u. Tna bombra ro mo mam tabam refo mrok mo u tna mse make ye.
19Taja, tme, tao, tano na; soh anu nkin sait btek mam iro to, tna anu roto sait yisoh ait retait afo re ait hah ye yamo yo kʼAllah to, feto moof ye. 20Nhar nwe awya sai ro ykyas bo kʼraa sait ro yno iro to, soh yno re raa retait yashana tna ye yno iro u fee to, riof mase kʼraa retait. Yafoh rait yno riof kʼraa retait re kbe yamos rait meen yhai fee. Tna ait yno Allah yatmof raa retait yyon iro wait ye meto.