Ibrani

Aam ro Raa Ykom tna Tiim Kʼraa Ibrani ro Smot Yesus

Ibrani

Yesus tait Ku ro Allah yare

¹Mam masno ro wia to, Allah ykyas bo kʼraa wanu; raa ro Yahudi.1:1 Raa wase awya ro ykom aam refo. Menohe anu bhar bwe ait tait raa ro Ibrani ye. Tibyo tiwya ait kro agama Yahudi reto tna fo yrok smot Yesus. Tna ykom aam refo kʼraa mana wait taro ro smot Yesus ye. Som ‘Yahudi’ reto mkyas raa mana weto ye, tna mkyas agama wana ye. Som ‘Ibrani’ ja mkyas mai ro raa weto mkyas. Ait ybis nabi wAit mama mkyas bo wAit. Mama mkyas bo kʼanu hohos na wanu mam ti aro rau-rau tna mkah iso aro rau-rau ye. ²Menohe mam masno ro tis refo to, Ku rAit Yesus oh mi Raa ro ykyas bo ro mbam kʼAllah kʼanu. Allah ysya Ku rAit Yesus yfen ayoh msya tabam refo msya bombra beta. Tna Allah ysan bombra weto beta Ku rAit. ³Bo yase ro Ku rAit to mnan anya msya Yaja yase rAit ye. Soh anu bmat tna bhar Ku rAit Yesus, reto mnan anya msya anu bmat tna bhar Yaja Allah ye. Yesus yhau ybo bombra beta. Ait yno mkah bokyas rAit ro matak toni. Tiwya Ait ysair iso ro yyon iro raa. Tna fo yaut yamoʼt sawro. Allah tait Raja ro yase toni. Tna Yesus yaut yamo hre ysya Ait mam ati ro yatem ati; hroh ro mase toni reto. ⁴Feto oh mi anu bhar bwe Yesus tait yase toni yiwer malaikat sor. Tna bhar bwe yasom rAit ’Ku ro Allah’ reto to, yase toni ye. ⁵Tiwya Allah yawe:

“Nyõ fi Ku aJõ oh. Ifo fo Jõ tamo Nyõ Naja.”

Mazmur 2:7

Tna Allah yawe:

“Jõ fo tamo Ait Yaja. Tna Ait tait Ku aJõ.”

1 Tawarikh 17:13

Ja Allah ytu malaikat aro yawe ku wAit to fee. ⁶Tna Allah ybis Ku bum rAit yamaʼt tabam refo. Ati reto Allah ybis malaikat wAit beta yawe:

“Nmo nbaut Ait.”

Mazmur 97:7

⁷Tna Allah ykyas malaikat yawe:

“Tno malaikat woJõ mnan fi foos. Tna tno sryan woJõ mnan fi tafoh.”

Mazmur 104:4

⁸Menohe Allah yawe Ku rAit yawe,

“Nyõ fi Allah ro nase. Tna namo Raja nbo raa msya bombra beta mamo snok mam hame wajin. Nyõ ja nbo raa woNyõ mkah nhaf ro moof ati. ⁹Bo ro raa mno moof to, Nyõ ksoh. Tna bo mkair ro ana mno to, Nyõ knait. Feto oh mi Jõ tsok Nyõ namo Raja. Tna ttu minyak mam nana aNyõ. Tno afo re raa mhar mawe Jõ tsok Nyõ tna teta Nyõ. Tawe, ‘Simaut mase oh; tse Nyõ mam hroh ro mase miwer raa roto beta.’”

Mazmur 45:7-8

¹⁰Tna Allah yawe kʼTuhan Yesus u yawe,

“Tuhan; tiwya tinyi Nyõ oh mi nfen tabam refo tna natem aNyõ nfen ayoh reto ye. ¹¹Ayoh msya tabam refo meen marak. Menohe Nyõ kbe nhau hame wajin. Ayoh msya tabam refo meen bose tna mkair, mnan fi ratan ro bose ja mhah hri marak ye. ¹²Meen Nyõ mbewakom ayoh msya tabam refo mnan fi raa mrus ratan ro bose oh, tna beak makus. Tna raa moo ratan ro tna, myum. Meen Nyõ nfen tabam msya ayoh ro tna shauk riryõn ye. Menohe Nyõ nesait ja nros tu. Nyõ nhau moof mnan si mamo snok mam hame wajin.”

Mazmur 102:25-27

¹³“Nama, hre nsya Jõ mam tajoh ro tatem ati.1:13 Yuk reto to hroh ro mase. Yesus hre mam yuk reto to, anu bhar bwe Ait ysya Yaja ybo bombra beta. Tna bombra beta kbe hartu Ait ye. Hre wea oh. Tna raa ro mamo byoh kʼNyõ to, meen tno ana mbtek mam mte. Kbe Nyõ naa nber ana weto. Tna Nyõ nros natak abyõ ana, nbo ana.”

Mazmur 110:1

Menohe Allah yawe bo feto kʼmalaikat wAit fee. ¹⁴Malaikat weto to, mase mfi Tuhan Yesus fee. Allah yfen ana weto to, mbis ana mno bo wAit, ana to sryan wAit. Tna Ait ybis ana mama mbet raa wAit ro kbe fri riof ro mase.

Yesus yerif iso re bkai riof

¹Yesus tait yase. Watum rAit to matak miwer watum taro sor. Feto to, bo ro tiwya anu nri kʼAit to, nbo tna kro kaket! Nno be kbe anu ne nmo tit. ²Tiwya Allah ybis malaikat wAit mroh mamo mkyas Watum rAit kʼMusa. Allah ybis yawe kbe raa mari Watum rAit reto, tna mbo mno kaket tu oh. Soh raa miwer Watum ro malaikat yoo yee kʼMusa reto to, Allah yno re bo mama mai kʼana tu oh. ³Menohe Tuhan Yesus yerif iso roto kʼanu re bkai riof. Tiwya Yesus ykyas riof ro mase reto kʼraa baro wia matim. Tna fo ana ro mesait mari bo ro Ait ykyas reto, me mkyas riof reto kʼanu. Soh anu biwana riof ro mase reto to, kbe Allah yoo safo mana reto ymit kʼanu tu oh. ⁴Ja Allah yno bo ro msai sor, tna sair bo ro hnah ye. Tna Allah ysok bouum (karunia) aro yoo yuumto kʼraa mkah Har rAit ye.2:4 Nmat 1 Korintus 12:4-11; msya Roma 12:6-8. Ait ksoh yno bo weto afo re raa mmat tna mhar mawe bokyas ro Yesus to, bokyas ro ati, bokyas ro merif riof ro mase.

Malaikat msya raa

⁵Wore wo meen raa mkai riof ro tkyas reto to, kbe awya yase tna ybo bombra sor? Allah ysan hroh reto kʼmalaikat fee. ⁶Au oh mi raa mkyas Allah mawe:

“Amu fo raa ro tabam refo sai. Fyi re Nyõ ro nase ja nmat amu ro nku sai? Tna fyi re Nyõ nmat ku ramu ye?” ⁷“Mam masno ro anu raa bhau mam tabam refo fo, malaikat ro Allah sor to, mase miwer raa. Nyõ noo bobot nee kʼraa; tna re bombra taro sor hartu mmat anu raa. Nyõ noo bo weto naren raa, mnan fi boren ro ja raa maren. ⁸Tna Nyõ nawe, ‘Mam tabam refo to, aro mase miwer raa fee. Menohe masno refo fo mhau kait fee.’”

Mazmur 8:5-7

Bokom reto mawe: “Allah yno raa mase mbo bombra beta.” Menohe anu bmat feto to fefares.

Malaikat msya Yesus

⁹Tiwya Yesus yama tabam refo tna yhai. Yhai afo re riof kʼraa. Allah yno Yesus yamo raa sai ro yhau mam tabam refo. Yesus yhau mam tabam refo mamo snok tahun baro to, yhau ynan fi raa sai, ro ja mase miwer malaikat sor fee. Mam tabam refo raa sikowah Ait tna mame yajat. Feto oh mi Allah teta Ait, yoo yase yee. Tna yno re bombra beta hartu Ait. Allah yatmof raa tibyo ybis feto. Yatmof raa re bitsre Yesus raa mame riryõn. Tna mafer rau moof kʼraa beta.

Yesus ysya raa

¹⁰Allah ybis Yesus haberek yamo raa, tna yama mam tabam refo. Ybis afo re Yesus yhar bo ro ja mai kʼraa to, yhar mnan si, aro mabut fee. Ait bitsre bo ro mkair mbtek mai kʼYesus, tna raa mame yajat. Yesus sair iso ro tna oh meto. Tna yakah raa mawat mamo mam iso reto tna re mkai riof. Allah yno bo moof meto. Allah oh mi yfen tna ybo bombra beta. Yfen afo re bombra beta bibi Ait. ¹¹Yesus oh mi yoo raa ysan kʼAllah re mno bo wAit. Anu bmo ku ro Allah wAit feto. Tibyo Yesus ysya anu to, Bja sait su. Tibyo bwe Allah tait Bja ranu. Tna Yesus hrenaut anu fee. Ytu anu yawe anu fo yao, yano na to. ¹²Yesus yawe kʼYaja yawe,

“Allah; kbe Jõ tkyas Nyõ nasom aNyõ kʼtao, tano na woJõ. Tna tsya ana nji howes nbaut Nyõ.”

Mazmur 22:23

¹³Tna Yesus yawe,

“Jõ smot Allah toni.”

Tna yawe,

“Jõ thau mam befo tsya raa ro Allah yoo yee kʼJõ.”

Yesaya 8:17-18

¹⁴Yesus yama tabam refo afo re bo ro kabes yabi (Iblis) yno to rarin beta. Tiwya kabes yabi yatak yno re raa mno iro. Yno wa raa mkai riof oh meto. Menohe Yesus haberek yfi raa. Tna yhau ynan fi raa sai. Yhau tna yhai ynan fi ja raa mhai ye. Yno feto afo re kabes yabi yhau mte. Tiwya kabes yabi yatak yno wa re kbe raa mkai riof fee. Menohe Yesus tait yatak yiwer. ¹⁵Ja raa beta waa bo kbe meen mhai. Menohe Yesus yno riof kʼraa wAit. Tibyo ana waa bo mhai to u fee. ¹⁶Tiwya Yesus tait yatmof malaikat fee. Ait yatmof raa. Tna yhau yban tis anu raa ro Yahudi. ¹⁷Yawe yban tis anu feto oh mi tiwya Ait yamo raa ynan fi anu. Anu bmo yao yano na. Tiwya Ait yhau mam tabam refo tna ykai bo ro ja raa mkai to ye. Yesus yhar anu kaket re kbe Ait yamo imam yase ro ja yatmof anu tna mur-mur yno bo ro Allah yawe. Tna Ait ysan bosan re kbe Allah yyon iro raa to ye. ¹⁸Tiwya yhau mam tabam refo fares to, raa msya bo ja tko Ait ye, ksoh mawe Ait yno iro. ⌞Menohe yno iro aro fee.⌟ Tna raa sanet Ait ye. Feto to Ait yhar yawe anu raa bhau mam tabam refo to, bo min toni, mnan-nan fee. Tibyo Ait yhar bo yban tis anu kaket to ye.

Yesus yase yiwer Musa

¹Taja, tme, tao, tano na; anu bmo raa ro Allah wAit. Tna ytu anu meen bkai roon mam sawro rAit ye. Nnaut Yesus ysya bo ro yno: Ait yamo raabis (rasul) ro Allah. Tna yamo imam ranu ro yase ye. Tibyo anu bhar bwe Ait oh mi ro yisoh bosmot ranu. Hre nnaut bo reto kaket. ²Tiwya Musa yno bo beta ro Allah ybis. Tna Yesus yno bo beta ro Allah ybis Ait feto ye. Ana mbewok ye mur-mur mno bo ro Allah yawe. Ana bewok mfi sryan ro ja kmot amah ro bobot rait kaket. ³Mfi bo raa sgi amah ro moof to, kbe raa bibi ait ro ski amah reto. Ana bibi amah ro ait sgi reto fee. Musa yno bo moof. Menohe Yesus yno bo moof toni. Feto kbe anu bibi Yesus yiwer. ⁴Raa mawat mhar bo sgi amah. Menohe Allah yesait aran yfen bombra beta to. ⁵Tiwya Musa yno bo ro Allah yawe: Ait mur-mur ymat raa ro Allah wAit. Tna ykyas bo ro Allah yawe meen mama mrof ye. Yawe meen Raa sait yama ykyas Bokyas ro Ati. ⁶Menohe Kristus tait Allah yare to. Ait yban tis raa ro Allah wAit, tna ymur-mur yno bo ro Allah yawe reto yfi sryan sai fee. Ait oh mi yase ybo raa ro Allah wAit. Soh anu bros tu smot Tuhan tna bhau binaut bwe bo ro Ait yawe to, kbe mabo to. Soh anu bhau bbo bno feto mamo snok mam oon sboh rau to, kbe anu bmo raa wAit tu oh.

Niwana bo ro Allah ykyas kʼanu to ma

⁷Feto to, Har ro Tuhan mkyas kʼanu mawe, “Nri bo ro Allah yawe!” Tna Allah yawe:

“Mfo wefo to, ⁸niwana bokyas aJõ to ma, mnan fi tii hohos wanu mno ye! Nros tna nri mai aJõ! Tiwya raa mana ro Israel mhau mam yuk ro riamo tna sanet Jõ. Ana mari bo ro Jõ tawe to fee. Ana to, mana mase sai. ⁹Anu hohos wanu mhau moof mam yuk ro riamo reto tahun trion 40. Mhau to mmat bo msai ro Jõ tno. Menohe ana moo mhaf wana mee kʼJõ fee. Ana sanet Jõ ⌞tna mawe, ‘Kbe Ait kmo anu to fee! Kbe Ait ymit safo kʼanu fee.’⌟ ¹⁰Au oh meto Jõ kmo hohos wanu weto. Tna tawe, ‘Ana weto to, ja kro Jõ fee. Ana weto wase iso ro Jõ terif kʼana.’ ¹¹Feto to Jõ kmo ana. Tawe, ‘Tiwya Jõ tawe kʼana tawe, kbe ana mhau mam wore wo raa hrowyõ u fee.’ Menohe Jõ tto boto tawe, ‘Kbe ana mamo mhau mam wore weto fee saut!’”

Mazmur 95:7-11

¹²Taja, tme, tao, tano na; nhau nisoh nhaf wanu afo re kbe anu smot Allah kaket. Kaket anu be anu aro hawe smot Ait. Hawe smot Ait feto, tibyo haberek nwaar Allah ro yaam to ma. ¹³Ti wawa to, sobu raa anya, nwe, “Nno iro u to ma! Soh nyõ nno iro renti to, kbe nyõ besruf nyõ ai. Niwana bo ro Allah ykyas kʼnyõ ma.” ¹⁴Nnaut maut-mroh to ma. Menohe ne smot Kristus3:14 Kristus to raa masom fee. Kristus to gelar ro raa mkyas “Raa ro Allah ysok mkah bo yoo riof ro mase yee kʼraa.” Mai ro Ibrani mawe Mesias, tna mai ro Yunani raa mawe Kristus. kaket mnan fi tiwya tinyi anu smot wia to. Soh anu beroh smot Ait mamo snok mam tis sboh rau to, anu fo raa wAit tu oh. ¹⁵Bokom ro Allah riwai jõ tkyas kʼanu to mawe:

“Mfo wefo to, niwana bokyas aJõ to ma, mnan fi tii hohos wanu mno ye! Nri mai aJõ! Tiwya raa mana ro Israel mhau mam yuk ro riamo tna sanet Jõ. Ana mari bo ro Jõ tawe kʼana fee. Ana to, mana mase sai.”

Mazmur 95:7-8

¹⁶Awya oh ana weto to? Tkyas raa mana ro Israel. Tii Musa yakah ana frok mbam rabin ro Mesir. Tna Allah ykyas bo kʼana. Menohe ana miwana bokyas rAit. Ana mno Allah kmo meto. ¹⁷Tii Allah kmo awya? Ait kmo ana ro mno iro weto. Ait kmo ana mamo snok 40 tahun. Tna ana weto beta mhai mam yuk ro riamo. ¹⁸Tiwya Allah yto boto yawe bawya? Ait yto boto yawe, “Raa mana ro Israel to, ja mari bo ro Jõ tawe to, fee. Feto tibyo tawe kbe ana mhau mam wore wo tiwya Jõ tsi kʼana to fee saut! ‘Wore wo raa hrowyõ u fee’, kbe ana mkai fee saut.” ¹⁹Tna anu bhar bwe ana weto smot Allah fee. Au oh mi ana mamo mhau mam wore weto fee.

Raa ro Allah wAit meen hrowyõ u fee

¹Tiwya Allah ykyas wore wo meen raa wAit hrowyõ u fee. Tna bo ro ysi reto to, Ait ynaut tna ybo fares. Feto to, nisoh anu kaket re kbe anu beta nkai bo ro Ait ysi reto. ²Tiwya raa mkyas Watum ro Allah kʼraa mana ro Israel. Ana mari bokyas reto, menohe mse mam mhaf wana fee. Tibyo bokyas reto mafer marak kʼana weto. Tna anu to, raa mkyas Bokyas Moof ⌞ro Kristus(Injil)⌟ kʼanu ye. Feto to smot Ait tna nse bokyas rAit mam anu nhaf wanu. ³Anu ro smot Yesus tibyo nbo Bokyas Moof reto kaket to, anu oh mi kbe nmo nhau mam wore wo raa wAit hrowyõ u fee meto. Tiwya Allah yawe,

“Jõ tkyas wore wo kbe raa hrowyõ u fee. Menohe Jõ kmo raa ro Israel toni. Tibyo tbo boto tawe, ‘Kbe ana mamo mhau mam wore weto, fee saut!’”

Mazmur 95:11

Allah yfen tabam refo tna siwyan wore wo raa wAit meen hrowyõ u fee ye. Siwyan mkak oh. Menohe raa ro Israel weto tii mkai wore weto fee. ⁴Bokom ro Allah mawe:

“Ti ro ntamam Allah yfen bombra ro tabam refo to beta mkak. Tna ti ro ngkrema to, Ait yitsre bo ro yno beta. Ayõ ro Allah hrowyõ fee oh meto.”

Kejadian 2:2

⁵Nnaut nwe Bokom ro Allah riwai mkyas ‘wore wo raa wAit hrowyõ u fee’ mawe: “Kbe ana mamo mhau mam wore weto fee saut!” ⁶Raa mana ro Israel tiwya mari bokyas ro moof sau wia, menohe ana mbo mno bokyas reto fee. Feto tibyo ana weto mkai wore weto fee. Anu bhar bwe wore wo Allah siwyan reto to, mhau fares. Kbe raa roto taro mkai wore weto. ⁷Tiwya raa mana ro Israel mamo mhau mam wore weto fee. Tibyo Allah ysok ti sau naut yawe ’mfo refo’. Masno aro rau firwas tna Daud ykyas yawe:

“‘Mfo refo’ to, nros tna nri mai ro Allah. Niwana bokyas rAit to ma!”

Mazmur 95:7-8

⁸Tiwya Yosua yakah raa ro Israel mamoʼt tabam ro Kanaan. Menohe mbam Bokom riwai reto to, anu bhar bwe bo ro Yosua yno reto to mabut fares. Tna masno ro kbe raa ‘hrowyõ u fee’ to, sboh fefares. Mabu rau mhau fares. Bhar bwe far-far mam Bokom ro Allah reto mkyas masno roto. ⁹Feto to anu bhar bwe raa ro Allah wAit meen mhaf mse bo ro Ait yawe reto. Masno ro ykyas reto to, mnan ayõ ro ja raa ntmoh tna hrowyõ mno bo wana to fee. Mnan ayõ ro ngkrema to, ¹⁰tiwya Allah yitsre bo ro yno beta. Ayõ reto to ayõ ro Ait hrowyõ u fee ye. Allah siwyan wore sau re kbe meen raa wAit hrowyõ u fee ye. Awya ro meen yhaf yse wore wo Allah siwyan reto to, kbe yitsre bo rait ro yno beta ye. ¹¹Nma, anu tomer re bkai wore weto. Tiwya raa mana ro Israel mari bo ro Allah yawe fee. Tibyo mkai fee. Niwana Allah mnan fi ana weto to ma, be kbe anu aro nkai wore weto fee ye.

¹²Bokyas ro Allah to bo ro mawyõs, bo ro matak toni. Bokyas ro Allah mhar raa mhaf mato wana ye tna mhar bombra beta ro raa mnaut mam makit, srau wana to ye. Bokyas ro Allah to mfi tfo ro maan toni: Mnan tfo ro mame raa mhaf mato ye, tna mitwat raa makor msya mtai bo ye. Tna Bokyas ro Allah ja mmat sas bo ro raa mnaut mam srau wana tna mmat sas bo ro raa makit saim mno ye. ¹³Tiwya tinyi Allah yfen bombra beta ro mhau mam tabam refo tna mam ayoh skes to ye. Allah ymat tna yhar bombra beta. Bo bawya sai ro raa mno to, Allah yasu ymat. Ymat bo beta ro ja raa mmyõt wai to ye. Meen mam wore Ait yros susai ytu srah yari to, anu raa kbe bros bkyas safo wanu beta ro anu bno.

Yesus tait Iman ranu ro yase

¹⁴Yesus tait Ku ro Allah yare. Ait yamo imam ranu ro yase. Ait yase re yamo ykyas boyoh wanu kʼAllah mam sawro rAit. Feto to nma, anu bros btak tna bbo bosmot ranu reto kaket! ¹⁵Imam ranu ro yase retait yhar yawe anu raa sai. Ait yhar yawe anu raa bhau mam tabam refo to, bo min toni, mnan-nan fee. Tiwya yesait yamo raa tna raa tko mawe Ait yno iro. Raa sanet Ait, tna bo ro samyoh mbtek mai kʼAit ye. Menohe Ait yno iro fee. ¹⁶Yesus yhar yawe ja raa matak mnan fee. Feto kbe Ait ykyas anu kʼAllah kaket ye. Nma bmo bo kʼAit. Waa ma. Anu bhar bwe Allah ja yatmof anu. Wore wo bombra sor mama mai anu to, anu bhar bwe Yesus yban tis anu. Anu bhar bwe Allah ksoh yoo tak rAit yee kʼanu.

¹⌞Tiwya ati ro Yesus yama fefares to,⌟ ja Allah ysok raa sait yawe yamo imam ro yase mam agama Yahudi. Tna raa ro yamo imam ro yase retait oh mi yayoh boyoh raa kʼAllah. Ja soh raa ksoh mayoh asik mawat kʼAllah to, ana moo bosan mee kʼimam. Tna kbe iman ysan bo weto kʼAllah. Tna imam retait ja ysan bo roto kʼAllah ye. Ysan re Ait kmo raa ro mno iro to fee ye.5:1 Ifo yoyo ait yoo kak tna ktan tna mko ysan to ye.²Imam ro yase, ait yesait raa sai. Tna yhar yawe raa taro wase bo, tna bosmot rana to matak fee, tna mno iro ye. Tna imam retait yhaf sneh yban ana. Yhar yawe ti aro bosmot rait yesait matak fee ye, tna yesait yno iro ye. Feto tibyo ait yhaf sneh yban tis ana ye. ³Au oh mi ait ja ktan kak tna yoo ysan mkah ait yesait wia matim. Ysan kʼAllah re yake safo wait ro yno to ye. Tna ait yoo bo ro raa roto makah mamo mee kʼait, yoo ysan kʼAllah. Ysan re yake safo wana ro mno to ye. ⁴Raa aro ja yesait ysok ait ai yamo imam ro yase to fee. Allah yesait ysok tna ytu imam sait yawe yamo imam ro yase. Ja Allah ysok tna ytu raa sait mnan tiwya ysok Harun yawe yamo imam ro yase to. ⁵Feto ye Kristus tubat Ait yesait fee. Ait ysok Ait ai yamo imam ro yase to fee. Allah yesait yawe,

“Nyõ fi Ku aJõ. Mfo refo tamo Nyõ Naja.”

Mazmur 2:7

⁶Tna Allah yawe,

“Tawe Nyõ namo imam mamyot Melkisedek.5:6 Kejadian 14:18mkyas raa sait yasom Melkisedek. Tiwya ait yamo raja mam kota Salem (Yerusalem) tna yamo imam ye. Nmat Ibrani 7:2 ye. Nyõ namo imam mamo snok mam hame wajin.”

Mazmur 110:4

⁷Ati ro Yesus yhau mam tabam refo fares to, Ait skabuk yayoh bo kʼYaja Allah. Ykyas bo kʼYaja ykyas fari to, yawia tna yukan mbtek. Ait yhar yawe Yaja yatak re yno riof kʼAit. Yesus ja yasu heyut yari bo ro Allah yawe. Tibyo Allah yari bo ro Yesus skabuk. ⁸Yesus tait Ku ro Allah yare, menohe bo ro mkair mno Ait ye. Tna bo ro mkair weto to, mno re Ait yari bo ro Allah yawe to, ybo yno kaket. ⁹Bo ro mkair mai kʼYesus tibyo raa mame yajat. Allah ybis afo re Yesus yhar bo ro ja mai kʼraa to, yhar mnan si. Yhar oh tna ysair iso re kbe raa mamo mkai riof. Awya sai ro yari bokyas rAit, tna ybo yno to, kbe meen yhau hame wajin. ¹⁰Tna Allah ysok Yesus yawe yamo imam ro yase mamyot Melkisedek. Allah yawe Yesus hre mam yuk ro mase.

Haberek kbor kʼYesus ma

¹¹Jõ tawe tkyas bo riwai reto msis kʼanu fares. Menohe anu nkit mbin, ja srau fee. Tna re jõ tifra sneh betoo bo reto rere sai kʼanu. ¹²Anu smot Yesus ooh-oh: Snyi firwas snyi tna tahun firwas tahun oh. Menohe anu nhar bosmot ranu kaket fefares. Nhar kaket fefares tna re nkyas bo refo kʼraa kaket fefares ye. Rau ro moof to, raa mama mbetoo bosmot ranu, maja ro tinyi rau u kʼanu, mkyas rere, afo re anu nesait srau. Feto to jõ tkyas maja ro msai aro kʼanu fee. Anu nfi ku mees ro mait sis sai fares. Anu ntak niit boit nfi raa mabi to fefares. ¹³Awya ro yait sis sai to, yfi ku mees fares. Tibyo wase bosmot ranu maja rau fares ye. Yhar bo yno bo ro moof fefares ye. ¹⁴Maja ro msai to mnan fi boit ro matak. Raa ro ja beroh mbo mno bo ro moof to, mrok makit maan, mrok mhar bo mmat sas bombra beta. Mmat sas tibyo mhar bo ro moof re mno. Tna mhar bo ro mkair re mno fee.

^1,2Watum ro Kristus, maja taro ro mnan-nan to, bo weto anu nhar oh. Feto nma, anu bkyas bokyas refo maja baro ro samyoh fares, re kbe anu brok btak. Watum rAit ro anu nhar oh mefo:

-Nashana tna nno bo ro mkair to ma. Raa ro mno bo ro mkair to, kbe mkai riof to fee.

-Smot Allah.

-Raa baptis anu.

-Nmo no kʼraabis ro Tuhan re ana moo matem mtor kʼanu abyõ tna skabuk anu.

-Raa ro smot Yesus tna mhai to, kbe meen mrok masen.

-Kbe meen Allah yoo safo mana ymit kʼraa. Tna bo ro yawe reto to, meen mabo yum.

Tiwya raa mkyas bo weto beta kʼanu re nhar oh. Feto to nno bo mnan fi ku mees u to ma. ³Anu bkyas bo weto oh. Tna soh Allah ksoh ybis to, tawe kbe anu bkyas bo ro mase renti. ⁴Raa taro tiwya mhau mam wore wo mamur menohe ana mamo mhau mam wore wo maah. Ana weto tiwya moo bouum ro Allah yoo yee kʼana oh. Tna Har rAit mjin mam mhaf wana oh. ⁵Tna mhar mawe bo ro Allah yawe to, moof toni. Tna ana mhar tak ro Allah ye tna minaut sawro ro Ait siwyan kʼana. ⁶Tna fo, soh ana weto haberek kbor to, ana mesait mame Yesus muhrin ro ewok u. Tibyo mno re raa miwana Ait tna sret Ait masah. Soh ana weto mamo tit tna mikyak Tuhan Yesus to, kbe ana me mashana u fee saut.

⁷Oom mais mroh mame tabam beta. Tabam taro to raa mkah tna tabam reto tufrok mafer mawat kʼraa ro mkah. Tibyo Allah yno bo moof kʼtabam reto. Tabam reto to mnan fi raa ro moo bouum ro mbam Allah tibyo mno bo ro moof. ⁸Menohe tabam roto taro to, tufrok abumun msya bo hyoh sai. Tibyo kbe Allah yto tabam reto. Meen tis rau to, Ait yuus tabam reto. Tabam reto to mnan fi raa ro moo bouum ro mbam Allah menohe me mno bo ro moof fee.

Nhau ste bo ro meen Allah yuumto kʼanu

⁹Tafoh na wojõ; jõ tkyas bo wefo menohe jõ tnaut tawe anu wefo kbe nhaf nse bo ro moof. Anu ja tufrok mafer ro mkair to fee. Tnaut tawe anu nmo mam iso ro meen nkai riof. ¹⁰Ati ro Allah ytu srah yari to, ja yno kaket. Tna kbe Ait ynaut bombra ro moof ja anu nno. Ja anu natmof raa wAit to. Tna Allah ynaut yawe nno feto to, mnan anya msya anu nno bo moof weto kʼAit yesait ye. Nno feto yhar yawe anu natmof Ait ye. ¹¹Amu ksoh nwe anu nhau nno bo weto mamo snok mam wore anu nhai. Beroh nno renti afo re meen anu nkai riof ro mbam kʼAllah. Kbe meen anu nkai bo ro anu nwof tna nhaf ninaut fares reto: Bo moof ro meen Allah yuumto kʼanu. ¹²Anu nhar bosi ro Allah ysi kʼanu, raa wAit. Feto to haweboh ma. Beroh nno bo ro moof mnan fi raa wAit ro matim wia. Nnaut raa wAit ro tiwya smot Allah: Tii ana weto mhau mwof bo ro Allah ysi kʼana. Ana mwof kait tna beroh smot Allah matak. Tibyo mkai.

¹³Nnaut: Tiwya Allah ysi bosi kʼAbraham. Ati ro ysi bo reto, Ait yto boto ye. Allah yto boto to, ytom yasom rAit ai. Allah tait Raa ro yase. Raa roto aro mase miwer Ait fee. Feto to ysi bosi reto to, tna yto boto mkah yasom rAit ai. ¹⁴Allah yawe,

“Kbe Jõ tno bo ro moof kʼnyõ. Tna meen tno nyõ nabe ku renti msis-sas.”

Kejadian 22:16-17

¹⁵Tibyo Abraham yhau to, beroh ste bo ro Allah ysi reto. Ait hrowyõ fee. Tna mabo. ¹⁶Soh raa sait yto boto to, ja ytom raa sait yasom ro yase yiwrek ait. Tna ait ro yase tait yhaf sau yawe kbe bo reto mabo ye. Ja raa mari feto mawe, “Kbe ait ybo yno tu oh!” Kbe raa mnaut maut-mroh bokyas rait reto fee. Kbe raa besboh bokyas rait fee. ¹⁷Allah ksoh yawe ku renti ro Abraham wait weto, kbe mhar mawe Ait tait Raa ro yros tu, susu fee. Afo re ana mhar mawe bo ro Ait ysi kʼana weto to, kbe meen yno tu oh. Feto to ykyas sai fee, ysi bo sai fee; Ait yto boto ye. ¹⁸Ait ysi bosi ye. Tna Ait yto boto ye. Bo ewok weto to, kbe mhau bau. Allah wase bo sioh to. Anu ro bsam wai kʼAit oh to, anu bhaf binaut bwe bo ro Ait tiwya ysi kʼanu weto to, kbe yno tu oh. Bohar reto to mban anu tis, misoh anu bhaf wanu. Tibyo waa ma. ^19,20Anu bhaf binaut bo ro meen mama kʼanu mbam Allah. Meen anu bhaf bse tu oh. Allah sorni bo fee saut. Bo ro yawe yno to, anu bbo matak. Soh anu bnaut bo moof weto to, kbe anu bros btak; susu fee. Bo moof weto to mnan si jangkar ro ja raa mbeak mam aya tna kapal reto mros matak. Yesus yban tis anu afo re anu bros btak ye. Ait yase re kbe yamo ykyas boyoh wanu kʼAllah. Ait yhau su ysya Allah. Yhau su ysya Allah ynan fi imam yase ro Yahudi. Tiwya soh imam retait yamo yo kʼAllah to, ait twok mam yuk ro mbau.6:19,20 Mam Samu ro Allah ro tiwya mhau mam Yerusalem to, hawar sau to mbau toni. Tna bo yase ro Allah rAit mhau mam beto. Tna horden sau nkro burut wa yuk ro mbau toni reto. Raa ro Ibrani mesait mamo mo kʼAllah fee. Ja imam rana ro yase sait aran twok mam hawar ro mbau toni reto. Yesus fi yamo imam ranu ro yase, ynan Melkisedek. Yamo imam mamo snok mam hame wajin, meen yhai fee. Tna Yesus fi yamo wia yatim ykyas boyoh wanu kʼAllah.

Melkisedek

¹Tiwya Melkisedek yamo raja ro ybo tabam ro Salem. Ait yhar yawe Allah tait Raa ro yase toni. Tna yamo imam rAit. Tii Abraham yamo yafa ysya raja makin sor. Ait yros yatak abyõ tna byoh weto to mhau mte. ⌞Tna Abraham ytak bo wana.⌟ Ati ro hah ye yamoʼt tabam rait to, raja Melkisedek yama ytar ait. Tna Melkisedek skabuk re Allah yno bo ro moof kʼAbraham.7:1 Kejadian 14:17-20.²Tna Abraham yoo bo ro taa ytak mbam raja makin msya raa wana weto. Yoo hariyah (sepersepuluh) mbam bo weto beta to, yee kʼMelkisedek. Som Melkisedek to, maja rau to ‘raja ro ybo raa wait tait, yhaf moof ati, ro wase bo yber safo.’ Tna bi ait tait raja ro ybo tabam ro Salem ye.7:2 Raa mnaut mawe Salem reto kota ro Yerusalem, som rau ro tinyi. Melkisedek tait ybo raa wait to mkah yhaf ro moof toni, mnan fi Allah ybo raa wAit mkah yhaf ro moof toni ye. Som Salem reto, maja rau to ’iranya moof’. Feto to ait raja ro yisoh iranya moof to ye. ³Melkisedek tait, raa mhar yaja msya yme bo fee. Mhar hohos wait fee ye. Tahun ro fnya mabe Ait to, anu wase ye. Tna soh ait yhai oh to, anu wase ye. Ait tait ynan fi Ku ro Allah yare. Ait yamo imam mamo snok mam hame wajin.

⁴Bi Melkisedek fi raa ro yase toni. Tiwya Abraham yoo bo hariyah (sepersepuluh) mbam bosatoh rait ro riwai ytak to, yee kʼMelkisedek. Feto anu bhar bwe bi Melkisedek fi yase yiwer Abraham, hohos ranu ro yasom. ⁵Watum ro agama ranu mkyas ku renti ro mbam bi Lewi. Ana ro mamo imam mam agama ro Yahudi to, Watum reto mkyas mawe, “Ana weto moo bosan raa ro Yahudi ja moo msan kʼana. Ana moo bo hariyah (sepersepuluh) mbam raa wana sor; ebokmi ana weto to ku renti ro Abraham wait ye.” ⁶Menohe Melkisedek, ait ku renti ro bi Lewi fee. Feto Abraham yoo bo wait hariyah, yee kʼMelkisedek yno fyi? Tiwya Allah ysi bosi kʼAbraham. Feto anu bhar bwe Abraham tait raa ro ati ye. Menohe bi Melkisedek fi yase yiwer Abraham. Tibyo Melkisedek oh mi skabuk Allah re yno bo ro moof kʼAbraham. ⁷Anu bhar bwe raa ro yase mi ja skabuk re Allah yno bo ro moof kʼraa ro kinyah. ⁸Raa ro mamo imam mam agama Yahudi to raa sei sai. Kbe mhai ye. Raa weto ja moo bo hariyah mbam raa anya sor. Menohe raa mawe Melkisedek fi yhai fee. Ait yhau yroon. ^9,10Ati ro Melkisedek yama ytar Abraham to, Lewi yarak fares. Hohos rait mabe ait fefares. Menohe raa mawe, “Ati ro Abraham ysan bo kʼMelkisedek to, reto mnan fi imam Lewi yesait yoo bo rait hariyah yee. Mawe mnan fi Abraham msya ku renti Lewi ro yabe fefares, msan bo reto su. Yoo yee ebokfi ja raa msan bo kʼLewi.”

Yesus yamo imam ro yase toni

¹¹Ati ro Allah yoo Watum ro Musa yee to, Ait ysok imam mbam ku renti ro Lewi msya bi Harun.7:11 Bi Harun tait ku renti sait ybam bi Lewi. Ait tait Musa yao, tna yamo imam mam agama Yahudi ye. Imam weto to watum raa afo re ana mari kro Watum ro Musa. Ana weto mbo raa afo re ana mari kro Watum ro Musa. Menohe imam weto matak misoh iranya raa msya Allah to fee. Feto to, Allah ybis imam roto taro sait yama. Ybis imam ro ynan fi Melkisedek yama. ¹²Imam sor ro mnan fi Harun mkyas Watum ro Musa. Tna mfo wefo Raa roto taro sait shauk yuk ro mase reto. Ait tait yatak yisoh iranya raa msya Allah. Tibyo Watum rAit shauk Watum ro Musa ye. ^13,14Bokom ro Allah mkyas Yesus. Yesus hohos wAit weto to, ku renti ro Lewi fee. Ait ybam ku renti ro Yehuda. Tna Watum ro Musa mkyas mawe ku renti ro Yehuda ja mamo imam fee. Ana ja moo bosan raa tna msan kʼAllah mam Samu rAit ye fee. ¹⁵Mabo oh. Imam roto sait yama. Tna Ait ynan fi Melkisedek. Yama tibyo bo ro riwai tkyas to, mfo refo anu srau bhar kaket. ¹⁶Kristus yamo imam fyi? Ait tait Ku renti bi Lewi fee. Feto yamo imam mkah tak ro Watum agama Yahudi ranu to, fee. Allah ysok Ait yamo imam mkah yatak rAit. Tak rAit reto oh mi yno Ait yhau yroon ye. Meen yhai fee. ¹⁷Allah yawe kʼYesus yawe,

“Tawe Nyõ namo imam mamyot Melkisedek. Nyõ namo imam mamo snok meen hame wajin.”

Kejadian 14:18

¹⁸Watum ro Musa mkyas mato ro imam tna mkyas mato mawat roto taro sor. Mato ro imam reto, bose oh. Matak fee. Mafer marak. Tibyo anu sorni makus oh. ¹⁹Watum reto to matak re misoh bo aro kaket to fee. Feto to Allah ysair iso ro tna. Iso reto moof miwer. Tibyo anu bhau binaut bwe soh anu kro iso ro tna reto kbe anu bmo biranya bsya Allah. ²⁰Ati ro Allah yawe Yesus yamo imam to, Ait yto boto.7:20 Ibrani 6:16. Menohe ati ro raa roto mamo imam to, Allah yto boto feto fee. ²¹Yawe kʼYesus yesait aran yawe,

“Nyõ namo imam mamo snok mam hame wajin. Jõ fi Tuhan Allah. Tawe feto tna tbo matak tu oh. Kbe tnaut maut-mroh fee.”

Mazmur 110:4

²²Allah ysi bosi ro tna sau tna yto boto. Kbe ybo matak. Yawe feto tibyo anu bhar bwe Yesus yno bo moof toni miwer bosi ro tiwya tinyi. ²³Mamyot bosi ro tiwya tinyi reto to, ku renti ro Lewi to, mabo mawat mamo imam oh. Menohe ana weto mabi tna mhai. Mhai tna ku wana masen mamo imam ro Yahudi riryõn. Imam weto sait yhau tibyo fee. ²⁴Menohe Yesus yhau yroon. Feto to Ait tait imam ro meen yhai fee. ²⁵Yamo imam ro meen yhau hame wajin. Ait yayoh bobyoh wanu kʼAllah. Feto to, raa ro mawe mamo kut-kut msya Allah to, Yesus yatak re yakah ana mamo mo kʼAllah. Tna yatak yno riof kʼana weto mamo snok mam hame wajin ye.

²⁶Yesus yamo imam ranu ro yase to, yban tis anu to, yno bo mnan si. Ait yhau yno bo ro Allah wAit sai. Yesus tait Raa ro ja wase bo yber safo. Ait yato mboh. Mfo refo Ait yhau su ysya raa ro mno iro to u fee. Allah yno Yesus yase toni. Yoo Ait yse hre mam sawro rAit. ²⁷Yesus tait ynan fi imam ro mase roto taro sor fee. Ait yoo kak tna ktan re ysan kʼAllah to fee. Imam ro mase roto taro to, ti wawa ja ana msan bosan. Ti wawa ana msan bosan mkah iro wana mesait to tinyi. Tna fo ana msan bosan mkah iro raa ye. Ja mno bo reto yoyo. Menohe ati ro Yesus ysan yetsu rAit yesait to, ysan mun sau aran sai. Feto tna re yyon iro raa mamo snok mam hame wajin. ²⁸Watum ro tinyi reto mkyas mawe raa sei sai mamo imam ro yase. Menohe anu raa sai fo, btak fee; ja bno iro sai. Tna ati ro Allah yawe Kristus yamo Imam ranu ro yase to, Ait yto boto. Allah ysok Ku rAit yawe yamo Imam. Allah yno Ku rAit yamo Imam ro ja yno bo ro moof toni yum.

Yesus oh mi yase ybo Bosi ro Tna

¹Jõ tkyas kʼanu tawe Yesus tait yamo Imam ranu ro yase. Reto to Ait yno bo ro moof toni. Allah tait Raja ro yase toni, tna Yesus yaut yamo hre ysya Ait mam ati ro yatem ati; hroh ro mase toni reto. ²Mam tno Ait yhau yno bo mam yuk ro mbau. Yuk reto Tuhan yesait yfen. Mnan anya msya Sbyah ro Tuhan raa mtor mam tabam refo to fee. ³Raa ro mamo imam mase to, ja moo bo ro raa mama mee kʼana, tna msan bosan weto kʼAllah. Ja soh raa ksoh mayoh asik mawat kʼAllah, ana moo bo mee kʼimam. Tna kbe ait ysan bosan weto kʼAllah. Tna imam retait ja ysan bosan mkah iro raa to ye. Tna Yesus, ro yamo imam ranu ro yase to, ysan bo bawya? ⁴Tii yhau mam tabam refo to, Ait yamo imam fee. Raa ro mamo imam makin mam agama Yahudi ja mhau oh. Tna ana oh mi mhau msan bo kʼAllah mamyot Watum ro agama ranu mbis mawe. ⁵(Tiwya Allah yroh yama yo kʼMusa mam atu sau. Yroh yama tna ybis Musa ytor Sbyah mam tabam refo. Ybis yawe, “Sbyah refo to, ntor kaket: Sgi mnan fi maja ro Jõ terif kʼnyõ. Sgi Sbyah reto kro maja mnan fi samu aJõ ro mhau mam sawro.”8:5 Keluaran 25:40. Tibyo Musa sgi Sbyah ro skabuk reto.) Feto tna mbam tii reto to, imam ro Yahudi ja mno bo wana mam Sbyah reto. Sbyah reto kebet sai mnan anya msya samu ro Tuhan rAit. Menohe samu ro Tuhan rAit, ro mhau mam sawro rAit to, samu rAit ro ati. ⁶Imam weto ja mno bo mamyot Watum ro Musa; Watum ro tii bose. Menohe Allah ysi yawe meen yno bo moof kʼanu miwer bo ro tiwya ysi yawe yno kʼhohos wanu. Feto to, Bosi ro Tna reto moof miwer Watum tii bose reto. Yesus ybo Bosi ro Tna reto, tibyo yros susai ykyas bo ysya Allah tna ysya raa. Tibyo bo ro Ait yno to, moof miwer bo ro imam weto mno. ⁷Watum tii bose reto to moof mnan si fee. Feto tibyo Allah saso bo ro tna aro; bosi ro moof miwer, tna re kbe shauk Watum tii bose reto. ⁸Tiwya tinyi nabi Yeremia ykom bo ro Allah yawe kʼraa ro Yahudi. Ait yawe ana mno bo ro mkair, yawe,

“Kbe meen Jõ tkyas bosi ro tna kʼraa ro Israel. Kbe meen Jõ tkyas bosi ro tna kʼraa ro Yehuda.8:8 Som Ibrani, msya Yahudi, Yehuda msya raa ro Israel to, masom trion jiit weto mkyas raa mana sau; ja mnan anya sai. Tiwya tinyi, ati ro nabi Yeremia mkyas bokyas refo fo, raa ro Yahudi beta mhau su fee: Ku be ro mbam bi Yehuda to mhau hayah. Tna miranya msya raa ro Yahudi taro fee.⁹Bosi ro tna refo fo mnan bosi ro tiwya tkyas kʼhohos wana to fee. Tiwya Jõ takah ana frok mbam tabam ro Mesir. Tna Jõ tkyas watum kʼana. Menohe ana mari bo ro tsi kʼana weto mbo mno fee. Feto tibyo Jõ haberek kbor. ¹⁰Kbe meen Jõ tkyas bosi ro tna kʼraa ro Yahudi. Meen tno re watum aJõ mhau kʼana makit msya mhaf wana yum. Kbe ana mbaut Jõ tesait aran. Kbe ana mbaut bo ro tabam u fee. Tna ana mamo raa mana woJõ. ¹¹Tna ati reto to, raa mabi msya kukek bo beta kbe mhar Jõ kaket. Feto kbe raa sait watum yafoh wait u fee. Yawe, ‘Saso Tuhan, tna kbe nhar Ait kaket!’ Kbe yawe feto u fee. Mam wore weto to, kbe raa beta mhar Jõ kaket oh: Raa ro mase ye, msya raa ro kinyah ye. ¹²Bo ro ana mno mkair to, kbe tyon beta. Mnan fi kbe Jõ sorni iro wana ro mno to makus.”

Yeremia 31:31-34

¹³Allah yawe bosi reto to ’Bosi ro Tna’. Yawe feto to, yno shauk Watum ro Musa, ‘Bosi ro Tinyi’ reto. Bosi tii bose reto to, kbe Allah yirenti makus sai.

Yuk ro Mbau

¹Bosi ro tinyi reto to, Allah ysi bo kʼraa ro Yahudi. Ykyas bo maja ro ana mama mo kʼAit, tna skabuk Ait. Tna ykyas Sbyah sau mam tabam refo, msya hawar rau ro mbau tna Allah yesait aran twok. ²Tiwya tinyi raa mtor Sbyah reto. Sbyah reto to, mato rau to, hawar trion ewok: Mam hawar ro tinyi reto, raa moo sawe ro mara sau mse mros, msya ambar sau. Tna roti ro mbau to, raa moo mse abyõ mam ambar reto. Hawar reto to, raa mtu mawe, ’yuk ro mbau’. ³Tna raa hero horden sau re burut wa hawar ro ewok reto. Tna hawar refo fo raa mtu mawe, ’yuk ro mbau toni’. ⁴Mam hawar reto to, wohat (mezbah) ro maku sau mhau.9:4 Keluaran 30:1-6. Mam wohat reto to, imam ro yase yko bo ro sawer. Wohat reto to, raa moo emas mfen. Tna mam Sbyah hawar mato ye to, peti perjanjian9:4 Keluaran 25:10-16Kotak refo tiwya Allah ybis Musa yfen mkah ara. ‘Peti perjanjian’ refo fret bo mawe: 1. Allah yatam raa wAit. 2. Bo ro bi Ait yawe to, meen Ait yno tu oh. mhau ye. Peti reto to, raa mfen mkah ara tna moo emas minin kait. Bo trion tuuf mhau mam peti reto mato: Ro sau to boit manna ro tiwya Allah yoo yee kʼraa ro Yahudi mait. Manna reto mhau mam baah (bulibuli) sau ro emas.9:4 Keluaran 16:33. Tna ro ewok, armuk ro Harun. Armuk reto tiwya tafuf frok.9:4 Bilangan 17:8-10. Tna ro tuuf to, raa mse bosi ro bose reto tiwya raa mkom mam fraa ye.9:4 Ulangan 10:3-5 Tiwya Allah ykyas watum rait kʼMusa tna ykom mam fraa.⁵Mam peti reto abyõ rau to, raa moo emas mfen kerub mabo ewok.9:5 Kerub to bo ro mno bo ro Allah yawe, mnan fi malaikat. Mam Kejadian 3:24 Allah ybis kerub kmot armato ro Eden. Amu wase bo masu mnaif to fyi. Ewok weto mros kmot peti reto. (Kerub weto to, raa mfen re imam yase ymat tna yhar yawe bo yase ro Allah rAit mhau mam weto.) Kerub weto maim wana mburut masa ro ja raa muut peti reto. Raa mtu bokait reto mawe, ‘Yuk refo fo Allah yyon iro raa’.9:5 Keluaran 25:17-22. Mam bokom ro mabuf refo fo, jõ betoo maja wau beta fee.

⁶Raa misoh Sbyah reto, moo bo weto mse mam Sbyah kaket feto. Tna imam ro Yahudi sor ja truk yoyo mam hawar ro tinyi reto sai. Truk tna mno bo wana.9:6 Bilangan 18:2-6.⁷Menohe imam ro yase yesait aran truk mam hawar ro mbau toni reto mato rau. Truk mam hawar ro mbau toni reto to, tahun sau truk muhrin sau aran sai. Ati ro ait truk to, truk yatem marak fee. Truk to ybo mees. Ysan bosan reto mkah iro ait yesait yno, tna mkah iro raa ro Yahudi mno ye. Iro wana ro ana mno he ana wase sai ye.9:7 Imamat 16:2-34.⁸Imam ro yase yno feto tna Har ro Tuhan betoo maja rau kʼanu. Mawe mam wore wo Sbyah reto mhau mam tabam refo fares to, raa mamo skabuk mam mne sai, menohe bo mno wa ana tibyo ana mamo kut-kut msya Allah fefares. Yuk ro Allah yhau to, ana mbau fares. ⁹Anu bmat bo ro imamagama Yahudi weto mno to, bhar bwe mamo snok mfo refo, bo ro mno to, matak fee. Soh raa mawe asik mawat kʼAllah to, ana msan bo kʼAit. Tna imam msan bosan mkah iro wana ro mno ye. Menohe bo ro mno weto to misoh raa mhaf wana fee. Tibyo ana mhar mam mhaf mato mawe ana mkair fares. ¹⁰Watum ro agama Yahudi to ⌞Watum ro Musa,⌟ aro mkyas boit ro mait, msya aya ro mata, tna iso ro mate aya afo re raa mrok moof. Menohe bo weto beta misoh raa mhaf mato fee. Bo weto misoh raa metsu wana sai. Raa mbo bo reto to, Watum ro tinyi reto to, matak mamo snok bosi ro tna mama sai.

Kristus yti bosi ro tna

¹¹Mfo refo Kristus yamo Imam ranu ro yase. Tna Ait yno bo ro moof miwer. Ait truk mam yuk ro mbau oh. Yuk ro mhau mam sawro ro Allah reto, ro mhau mam tabam refo fee, ro raa mfen fee. ¹²Tiwya Kristus truk mam yuk ro mbau toni to, Ait ybo mees ro kambing fee. Ybo mees ro sapi maku to ye fee. Menohe truk mam yuk ro mbau toni reto to, mkah mees rAit ai. Truk tna ysan bosan reto mun sau aran sai. Yno tibyo bain raa mhai oh. Yno tibyo raa mkai riof mamo snok mam hame wajin. ¹³Mamyot Watum ro Musa to, ⌞soh awya ro ksoh skabuk Allah, menohe yno bo aro yiwer Watum ro bose reto to, kbe ait yamo skabuk wia fee.⌟ Yamo yo kʼimam wia matim. Tna imam yoo mees ro kambing, soh mfe mees sapi ro sme, soh mfe mees sapi ro ano to, yko ysan kʼAllah. Yko mkak tna yoo boh rau furere abyõ mam raa retait. Tibyo Watum ro tinyi reto mawe raa retait yoof u. Raa retait yrok yoof tna kbe skabuk Allah u, ebokfi bo ro imam yno reto yyon ait yhaf mato moof fee. ¹⁴Soh feto to, fyi mkah mees ro Kristus yesait? Mees ro Kristus rAit reto matak re misoh anu bhaf mato wanu ye. Har ro Tuhan mhau hame wajin. Tna mkah matak rAu to, Kristus ysan Ait yesait ai kʼAllah. Ait ro yoof toni, ja yhar iro yno to fee. Anu ro bno iro. Ja raa ro mno iro kbe mkai riof fee. Menohe anu bhar mam bhaf mato bwe anu bkair u fee. Mees rAit matak re mno anu brok boof. Mees ro Kristus reto mno anu ksoh bno bo ro Allah yawe. Allah ro yaam oh metait. Bo ro Kristus yno reto to, moof miwer bo ro imam ja mno.

¹⁵Anu tiwya biwer Watum ro Musa. Kristus yhai afo re yyon iro wanu weto ye. Anu to, Ait bain mhai oh. Au oh meto Kristus tait ybo Bosi ro Tna reto. Tibyo yros susai ykyas bo ysya Allah tna ysya raa wAit ye. Yno feto, tibyo awya ro Allah ytu yawe yamo yo kʼAit to, kbe ykai bo ro tiwya Allah ysi reto: Kbe meen ait ykai mafer rau mamo snok mam hame wajin. ¹⁶Reto mnan si bi yabi sait ro yawe ysan kta rait kʼraa anya. Ytom raa yasom yawe meen, ati ro yhai to, kbe raa retait yoo kta rait. Tna ati ro raa mhar mawe bi ait yhai to, raa ro tiwya yawe reto kbe yoo bo ro ait yawe ysan kʼait. ¹⁷Wore wo bi retait yhau fares to, raa ro ja ait ytom yasom to, ykai kta reto fefares. ^18,19Reto oh mi tiwya Allah ysi bosi ro tinyi kʼMusa to, ati ro ysi to, Musa ktan kak ye: Ktan sapi ro tna, msya domba ro sme sau, tna yoo mees reto, srioh msya aya tna ysan kʼAllah. Ja mees oh mi make bosi to mno matak. Tiwya Musa yros ykyas Watum ro Allah kʼraa ro Israel beta. Tna ykyas bo ro Allah ybis beta kʼana. Ykyas mkak tna fo yoo domba mawyan ro mkek msya ara ’hisop’ ngkre rau. Ybo bo weto bero mam mees reto tna yitut abyõ mam aam ro Watum ro Allah tna yitut abyõ mam raa ro mros mari bokyas rait to beta ye.9:18,19 Keluaran 24:6-8.²⁰Musa yawe, “Bosi ro Allah ysi kʼanu to, mees refo mno bosi reto matak. Allah ysi yawe, ‘Nno bombra beta ro tsi kʼanu to, nno kaket!’” ²¹Tna Musa yoo mees reto yitut abyõ mam Sbyah reto ye. Tna yitut abyõ mam bombra sor ro mhau mam Sbyah reto ye.9:21 Imamat 8:15.²²Raa mkyas Watum ro Musa reto to, ja mawe, “Mam mato reto to, mees to bo ro ati: Watum reto mbis imam moo mees mitut abyõ mam bombra beta. Mkyas mawe mees reto oh mi mno re bombra mrok moof mnan si, afo re Allah ksoh ymat. Tna mees oh mi mno re Ait yyon iro raa. Iso roto aro fee.” ²³Tiwya Musa yoo mees, yno Sbyah ro mbau msya bombra ro mhau mam Sbyah reto mrok moof, afo re Allah ksoh ymat. Menohe bombra weto sor to, maja kro bombra ro mhau mam sawro ro Allah sai. Mnan anya fee. Bombra ro mhau mam sawro weto to bo ro ati. Bombra ro ati weto to, mrok moof mkah bosan ro moof toni. Tna bosan ro Kristus ysan reto to moof toni. ²⁴Kristus truk mam sawro ro Allah tna hre ysya Allah. Mfo refo Ait yhau mam sawro tna ja ykyas boyoh ro anu byoh to, yawe kʼAllah. Tiwya Ait truk mam Sbyah ro mbau mam tabam refo fee. Sbyah reto to, bo ro raa sgi sai. Sbyah ro ati mhau mam sawro. Ro mhau mam tabam refo to, tii raa sgi kro maja rau ro ati sai meto. ²⁵Tna Kristus truk mam sawro ro Allah tna re ysan bosan mun sau aran sai. Reto mnan. Menohe imamagama Yahudi ro yase ja truk mam Sbyah ro mbau reto to, mun aro rau. Tahun ti wawa ait ktan kak, tna yoo mees rau, truk. Truk mam Sbyah reto hawar ro mbau toni tna ysan bosan reto. Ybo mees ro kak sai. Ysan mees ro ait yesait to fee. ²⁶Mfi bo Kristus yamo imam yase, ynan imam yase ro ja yhau mam tabam refo to, reto moof mnan si fee. Soh feto to, mbam tiwya tinyi Allah yfen tabam refo to, maami Ait ye yama u, tna ye yhai mun aro rau-rau to. Menohe yno feto fee. Ait yama mun sau sai tna raa mame yajat mam ara warok. Yama mam makyon muktis wau wefo to, tna ysan yetsu rAit yesait ai. Yno afo re iro mbo anu u fee. Yno mun sau sai to, mnan. Tna bo ro yno to, mhau matak yum mamo snok mam hame wajin. ²⁷Anu raa ro bhau mam tabam refo to, ja bhai mun sau aran sai. Bhai tna kbe meen Tuhan yoo safo mana ymit kʼanu. ²⁸Kristus yhai mun sau aran to ye. Yoo yetsu rAit ysan mnan fi bosan ro ysan kʼAllah. Ysan bosan reto mun sau aran sai mkah bo yyon iro raa mawat ro mno. Kbe meen Ait hah yama u. Yama yyon iro raa fee. Reto tii Ait yno oh. Kbe Ait yama yno riof kʼraa ro mhau ste Ait.

Kristus ysan bosan ro moof toni

¹Watum ro Musa to, merif bo moof ro meen mama kʼanu mam sawro ro Allah. Menohe watum reto merif maja bo ro moof weto to sai. Anu bmat bo moof weto kaket fefares. Bo ro ja raa mno tna mmat mam tabam refo fo, bmat bo ro ati reto fefares. Au oh meto, imam sor ja ysan bosan mun aro rau-rau tna tahun firwas tahun. Tna anu bhar bwe bosan ro ana msan reto to, moof mnan si fee. Raa mama skabuk to, ja makah bosan. Mawe msan bosan afo re miranya msya Allah. Menohe bosan weto to matak re mno raa weto mhaf mato mrok moof mnan si to fee. ²Mfi bo bosan weto to, matak re mno raa mhaf mato moof to, kbe raa mamo msan bosan renti u to fee. Mfi bo bosan weto to matak mnan si to, kbe raa msan bosan mun sau aran sai. Feto tna mhar mawe mhaf wana moof mamo snok mam hame wajin. Mhar mawe ana mkair u fee. ³Menohe mfe: Ana ja msan bosan tahun firwas tahun. Mno tna me mnaut iro wana ro mno to u ye meto. ⁴Sapi msya domba bo to, mees wana matak myon iro raa to fee saut. ⁵Mees reto matak fee. Feto to Kristus yroh yama tabam refo tna yawe kʼAllah yawe,

“Jõ thar tawe bosan ja raa msan to mame kʼNyõ nhaf fee. Tna raa msan bosan roto aro mkah iro wana ro mno. Tna bosan weto to mame kʼNyõ nhaf aNyõ fee ye. Menohe Nyõ siwyan Jõ mkah tamo ‘Bosan’ ro mnan si moof kaket. ⁶Tiwya raa ktan kak, tna mko msan kʼNyõ. Tna msan bosan mkah iro wana ro mno to ye. Menohe bosan wana weto to mame kʼNyõ nhaf to fee.”

⁷Tna Yesus yawe kʼAllah yawe,

“Jõ fi Raa ro tiwya raa mkyas. Mam Bokom aNyõ tiwya raa mkom mawe, ‘Jõ siwyan tna ksoh tno bo ro Nyõ nawe.’”

Mazmur 40:7-9

⁸Mam uu to, tkom bo ro Yesus ykyas trion ewok. Ro tinyi to yawe, “Jõ thar tawe bosan msya kak ja raa mko msan to, tna msya bosan ja raa msan mkah iro wana ro mno to, mame kʼNyõ nhaf fee.” Fyi re Yesus yawe bo reto? Yawe ebokfi Watum ro Musa mbis mawe anu, raa ro Yahudi mno bo weto. ⁹Tna fo Yesus yawe kʼAllah yawe, “Jõ siwyan tna ksoh tno bo ro Nyõ nawe.” Anu bmat bokyas trion ewok weto to, tna bhar bwe iso ro tinyi reto Yesus skur beak. Tna re ysair iso ro tna sau. ¹⁰Yesus yama ysan yetsu rAit oh to, yno bo ro Allah ksoh. Yesus Kristus ysan yetsu rAit mun sau aran sai. Tna mkah iso reto to, Ait yoo anu ysan kʼAllah re bmo raa wAit.

¹¹Imam ro agama Yahudi sor mno bo ro Watum ro Musa mbis: Rabu wawa ana ktan kak tna msan mnan anya bo ro ja soo ana mno wia. Menohe bosan reto matak myon iro raa mno to fee. ¹²Yesus yamo Imam ro yase ye. Menohe yno feto fee. Ait ysan yetsu rAit muhrin sau aran sai. Bo ro Ait yno reto matak re kbe yyon iro raa ro mno. Bosan rAit reto ysan mun sau aran tna matak re kbe bain raa mhai oh. Tna yamo hre su ysya Allah mam ati ro yatem ati. Yaut hre mam hroh ro mase reto mamo snok mam hame wajin. ¹³Tna Yesus hre mam beto ste wea; ste ati ro Allah yno raa ro mamo byoh kʼAit to, mbtek mte. Tna kbe Ait yros yatak abyõ ybo ana. ¹⁴Yesus ysan bosan reto yno raa wAit mrok moof mamo snok mam hame wajin. Bosan reto to, ysan mun sau aran sai tna reto mnan si. Yesus yisoh raa wAit kri-kri fares ye. ¹⁵Mam bokom ro nabi Yeremia, Har ro Tuhan mkyas bo reto kʼanu ye. Mawe,

¹⁶“Kbe meen Jõ tkyas bosi ro tna kʼraa ro Yahudi. Meen tno re watum aJõ mhau kʼana makit msya mhaf wana ye.”

¹⁷Tna mawe,

“Iro msya safo ro ana mno to, kbe Jõ tyon mkak; mnan fi kbe Jõ sorni makus.”

Yeremia 31:33-34

¹⁸Yesus yatak yyon iro msya safo ro raa mno. Feto to raa ktan kak msan fares to, mkah bawya? Ne nno bo weto u ma.

Beroh smot Yesus matak

¹⁹Taja, tme, tao, tano na; mees ro Yesus rAit reto myon iro wanu oh, mno anu boof. Feto nma, anu bmo bo kʼAllah mam yuk rAit ro mbau toni reto. Waa ma. ²⁰Yesus sair iso ro tna refo. Ait yhai to, tna yetsu rAit mfi horden ro burut wa hawar ro mbau reto to, yno mrok ntwat tna mato maah. Tna mfo refo Ait yhau tna ytar anu truk bmo bo kʼAllah. ²¹Yesus yamo Imam ro yase ranu. Ait tait yerif iso re kbe anu bmo bo kʼAllah. Anu fo raa ro Allah wAit. ²²Feto to, nma, anu bmo biranya bsya Allah. ⌞Anu bashana oh.⌟ Tibyo raa baptis anu mkah aya oh. Feto tna anu bhar bwe bhaf wanu mrok moof. Anu bhaf wanu mrok moof oh, mnan fi raa ro mate aya ro moof oh, tibyo metsu moof. Anu bhar bwe anu smot Ait kaket. Anu fo srau ewok fee. ²³Anu bhau bkyas riof ro meen mama kʼanu. Bnaut bwe Yesus ro tiwya ykyas riof reto. Tna bo ro yawe yno to, kbe ybo yno tu oh. Feto to, nma, anu bhau bhaf binaut riof reto yoyo. ²⁴Nma, anu sobu anya nwe batmof anya tna bno bo moof kʼanya ye. ²⁵Nma, kbe anu hre su tna skabuk su ye. Raa taro ja haweboh bo skabuk. Anu bhar bwe ayõ ro Kristus hah yama u to, kene oh. Feto to nma, anu bros tis anya, tna bkyas bo moof kʼanya afo re anu smot Tuhan matak.

²⁶Soh anu bhar iso ro ati oh, menohe ja bno iro fares to, anu biwana Kristus, ro ysan yetsu rAit. Ysan mkah bo yyon iro wanu ro bno. Raa ro beroh mno iro fares to, ana mikyak bo ro Ait yno oh meto. Tna bosan roto aro ro kbe myon iro wana to, aro u fee. ²⁷Ana weto kbe waa fea! Ana mhar mawe meen Tuhan yoo safo mana ymit kʼraa ro mamo byoh kʼAit. Tna mhar mawe tafoh ro mase meen mait ana weto ye. ²⁸Tiwya bo mafa ranu, raa ro Yahudi to, anu bkyas bwe, “Awya sai ro yiwer Watum ro Musa to, raa mai ait yajat. Soh raa mabo ewok, soh mfe mabo tuuf maun ait to, kbe raa matmof ait fee, raa mai ait yajat yum.” ²⁹Soh raa yiwer Watum ro Musa to, yno bo ro mkair. Kbe raa moo safo mee mai tu oh. Soh feto to, kbe fyi soh raa yikyak Ku ro Allah yare? Bo reto bo ro mkair toni! Ro yno feto ymat mees rAit yawe mkair. Yesus mees rAit mno bosi ro tna reto matak. Tiwya mees ro Yesus misoh ait re yamo raa ro Allah rAit. Tna mfo refo raa retait yawe mees reto mkair. Ait retait yamus Har ro Tuhan oh meto. Yamus Har ro tiwya matmof ait. Tibyo kbe meen bo samyoh ro msai toni kbe btek mai kʼait. ³⁰Anu bhar Allah yhaf msya srau rAit. Bhar bwe Ait yawe,

“Jõ oh mi ska bo tna tno bo ro samyoh mai to. Bo woJõ weto kbe tno tu oh!”

Ulangan 32:35-36

Tna yawe,

“Kbe Tuhan yoo safo mana ymit kʼraa wAit.”

Mazmur 135:14

³¹Allah tait Allah ro yaam. Meen Ait yoo safo mana ymit to, bo ro msai toni reto. ³²Nnaut mam wore tinyi anu nmo no kʼYesus, tibyo nhau mam kek rAit. Ati reto to, bo ro samyoh mama mai kʼanu. Menohe anu nros ntak. ³³Ti aro rau raa masah anu. Tna raa mai anu. Tna ti aro rau bo ro samyoh feto mai nfoh na wanu ye. Menohe wore weto anu nros su nsya ana ye. ³⁴Nfoh na wanu taro to, raa mfot mbu mam bui mato. Menohe tiwya anu nmo nmat ana, nkyas bo ro moof kʼana. Anu smot Yesus tibyo ti aro to, raa mama mtak bo wanu ye. Menohe anu ja kmo fee. Anu nhar nwe mam mato ro bosmot ranu to, anu nhaf nse bo ro moof miwer bo ro anu bhaf bse mam tabam refo. Anu nhar nwe anu nbo bo ro meen mhau hame wajin. Feto to anu simaut mase. ³⁵Bo ro anu smot tna nhar weto to, nbo kaket matak oh! Anu smot Allah kaket tibyo Ait siwyan bo ro moof toni tna kbe yaren anu. ³⁶Beroh nno bo ro Allah yawe to, nno renti. Nno mkak, tna bo ro ysi kʼanu to, kbe yoo yee kʼanu. ³⁷Bokom ro Allah mawe:

“Tuhan tait kene wore yama oh meto. Kbe nyum ti aro u fee. ³⁸Raa ro ja beroh smot Jõ to, tawe ana weto oh mi mfi raa ro mhaf moof ati to. Menohe soh ana haberek kbor tna mawe me smot Jõ u fee, ana weto mame kʼJõ thaf fee.”

Habakuk 2:3-4

³⁹Menohe anu fo kbe haberek kbor fee. Anu fo kbe Allah yno safe mkak fee. Anu smot Ait tibyo yno riof kʼanu.

Raa ro tiwya smot Allah

¹Bosmot ro matak to bawya? Awya ro smot Tuhan matak yhar yawe bo ro yhaf yinaut to, kbe mabo tu oh. Bosmot rait reto to matak. Awya ste bo ro ait yasu ymat fefares to, tna yhar yawe bo reto meen mabo to, bosmot rait reto to matak. ²Tiwya tinyi hohos wanu taro smot Allah matak feto. Reto oh mi Allah yawe ana mno bo moof.

³Anu smot Allah matak tibyo anu bhar bwe Allah yfen tabam refo msya ayoh skes bo beta. Bo ro anu bmat mfo refo to, Ait yno re snok mbam bo ro marak fares sai. Yawe sai mkah yasoh tna yno bombra beta mabo oh meto.

⁴Tiwya Habel smot Allah matak. Ait yoo bo ro moof ysan kʼAllah. Menohe yao Kain yari bo ro Allah yawe fee. Tibyo yoo bo ro mkair tna ysan kʼAllah. Habel smot bo ro Allah yawe to kaket. Tibyo Allah yawe bosan ro ait ysan to, bo moof. Tna Allah yawe ait raa ro yhaf moof ye. Tiwya ooh-oh Habel yhai oh. Menohe mfo refo anu bmat tna bkyas bosmot rait fares.11:4 Kejadian 4:3-10.

⁵Tiwya Henokh smot Allah matak, tibyo yhai fee. Allah tubat ait mkah yaam yaut yamoʼt sawro rAit. Tibyo raa saso Henokh, menohe mkai fee. Bokom ro Allah mawe wore Henokh yhau fares to, Allah yhaf mnan ait. Yno feto tibyo Allah tubat ait mkah yaam, yaut yamo sai.11:5 Kejadian 5:21-24.⁶Awya ro yamo yo kʼAllah to, tinyi rau to ait yhar yawe Allah yabo tu oh. Tna yhar yawe ja Allah yno bo ro moof kʼraa ro saso Ait kaket. Raa ro smot Allah matak fee, mno Allah yhaf mnan fee saut.

⁷Tiwya Nuh smot Allah matak, tibyo yfen aken sau. Allah ykyas kʼNuh matim wia, yawe kbe yoo safo mana ymit kʼraa. Yawe kbe yno bo ro mkair mai kʼraa ro tabam refo. Bo ro Allah yawe kbe yno mai kʼraa to, yno fefares, Nuh yasu ymat fefares. Menohe yhar yawe Allah yesait aran yase. Tna re yari bo ro Ait yawe tna waa. Tibyo yfen aken reto mkah yasyõ fnya msya kukek wait ro sme, tna msya fnya wana bo re mkai riof. Bosmot ro Nuh matak. Tibyo ait yari bo ro Allah yawe, ybo yno. Tna Allah yawe ait raa ro yhaf moof. Bosmot rait reto mno riof kʼait ysya fnya, kukek wait weto. Menohe Allah ymat yawe raa taro smot Ait mfi Nuh fee. Tibyo ana weto safe mkak.11:7 Kejadian 6:13-22.

⁸Tiwya Abraham smot Allah matak, tibyo yari bo ro Allah yawe, tna ybo yno ye. Allah ytu ait ybis yawe yasen sikba rabin rait tna yamoʼt rabin roto; ro ait wase fares. Tibyo Abraham yasen, satoh bo wait, tna yamoʼt rabin raa. Allah ysi bo kʼait yawe meen ysan rabin reto kʼait.11:8 Kejadian 12:1-5.⁹Abraham smot Allah, tibyo yamo yhau mam rabin raa reto, yfi raa srim. Yhau mam rabin ro Allah ysi yawe ysan kʼait to, yhau mam sbyah sai. ⌞Yhar yawe yhau mam tabam reto kait fee.⌟ Tahun firwas tahun tna ku rait Ishak ysya yatat Yakub ja mhau mam sbyah sai ye. Ana mbewok mnaut bosi ro tiwya Allah ysi kʼana maja rana ye.11:9 Kejadian 35:27.¹⁰Abraham yhau mam sbyah sai tna yhaf yinaut yawe meen ait yamo yhau mam remo ro Allah rAit. Yhau mam remo ro matak tna mhau yum reto, remo ro Allah sgi tna siwyan kʼait yhau tibyo.

¹¹Abraham smot Allah matak. Tna ait yhar yawe bo ro Allah yawe yno to, kbe ybo yno tu oh. Tibyo Abraham ysya Sara11:11 Sara to fnya ro siban. mabe ku sait. Abraham ysya yfain fai Sara to, mabi toni oh.11:11 Kejadian 18:11-14.¹²Yabi oh, tibyo yetsu ssafo yabe ku u fee.11:12 Kejadian 21:2. Menohe yabe ku. Tna ku retait yabe ku renti mawat. Abraham tait raa sait aran sai, tna yabe ku renti wait mawat; mnan sken ro ja mhau mam ayoh skes. Tna kbe raa aro mros ntuu ku renti wait fee. Ana msis mnan fi snyik ro mftau mboh mam aya sawan maam.11:12 Kejadian 15:5.

¹³Raa wore wo tkyas mam uu to, ana mkai bombra ro Allah ysi weto fefares. Menohe bosmot wana matak fares; ana mhau to, mhaf minaut tna ste bombra weto ro meen mama. Ana ksoh bo weto tibyo simaut. Tii ana beta mhai to, mhaf mse bombra weto fefares. Ana mawe ana mhau mam tabam refo mnan fi raa srim sai. ¹⁴Soh raa mkyas feto to, anu bhar bwe ja ana ste rabin roto taro, rabin rana mesait. ¹⁵Ana mawe ana mnan fi raa ro srim. Mfi bo ana mnaut rabin wore wo tiwya ana mhau to fares, maami ana mhah me mamoʼt rabin reto. ¹⁶Menohe ana mhaf minaut rabin taro ro mhau mam tabam refo fee. Ana minaut rabin sau ro moof miwer; ro mhau mam sawro ro Allah rAit. Allah siwyan remo sau kʼana mkah bo meen mhau oh. Tna raa weto minaut remo reto. Feto to raa mkyas Allah to mawe, “Ait fi Allah ro ana weto smot.” Ana mawe feto tna Ait ksoh; Ait saban fee.

¹⁷Tiwya Abraham smot Allah matak, tibyo yari bo ro Allah yawe, tna ybo yno ye. Allah sanet ait ybis yawe yoo ku rait Ishak ktan. Tna Abraham yawe, “Ae, kbe tno oh.” Ti reto to, Allah ysi bo kʼait oh tna ykyas ku renti wait oh. Tna Ishak tait ku ro Abraham yabe sait aran. Menohe Abraham siwyan yawe ysan ku retait kʼAllah.11:17 Kejadian 22:1-14.¹⁸Ebokmi ait ynaut yawe tiwya Allah yawe ku rait Ishak oh mi meen yabe ku renti msis-sas. ¹⁹Abraham ynaut yawe Allah yatak yno Ishak yrok yasen. Tibyo Abraham siwyan ktan Ishak. Tna kene wo mabo oh. Kene mo sboh. Menohe Allah yno wa. Feto to Abraham ynaut yawe mnan fi mabo. Tna yawe Allah yno ku rait Ishak yrok yasen.

²⁰Tiwya Ishak smot Allah matak, tibyo skabuk yayoh Allah yawe yno bo ro moof ku wait mabo ewok. Yayoh Allah re meen yno bo ro moof kʼYakub ysya Esau.11:20 Kejadian 27:27-40.

²¹Tna Yakub smot Allah matak. Ati ro ait yabi oh, kene wo yhai to, ait skabuk yayoh Allah yawe yno bo ro moof ku ro Yusuf wait mabo ewok. Tna tmi yana mam armuk rait tna ybaut Allah.11:21 Kejadian 47:31–48:20.

²²Tiwya, mam tabam ro Mesir to, Yusuf kene wo yhai. Ait smot Allah matak. Tibyo ybo bo ro Ait yawe matak ye. Yhar yawe meen Allah yakah raa mana ro Israel snok mbam tabam reto. Tna Yusuf ysi bo kʼraa wait yawe ati ro ana snok mamo to, ana moo ait ytai rait to, makah mamo ye. Yawe ait ytai mhau akus fee.11:22 Kejadian 50:24-25.

²³Tiwya Musa yme mabe ait. Tna raja Mesir ybis yawe raa behoh ku sme beta majat. Menohe raa mabi wait mmat mawe ku retait yoof toni. Tna ana waa raja retait fee. Ana smot Allah matak, tibyo ana moo Musa mimyõt wai snyi trion tuuf.

²⁴Raja retait, ku ro ano rait, mayõ Musa, mtos. Tibyo Musa yhau mam amah rau tna yabi. Menohe ait smot Allah matak. Tibyo yawe kʼraa yawe ait ku ro au mabe metait to fee. ²⁵Ait hawe bo yhaf yse bo moof ro Mesir. Ait hawe bo yno iro. Tna yhar yawe bo moof mam tabam refo to, mhau waor sai. Feto to yasen yamo yhau ysya raa mana ro Allah rAit. Yhau ysya ana weto to, bo samyoh mai kʼait. ²⁶Yhar yawe Allah ysok raa mana rait ro Yahudi reto yawe ku renti wana weto oh mi meen mabe Kristus.11:26 Som reto to, “Ait ro Allah ysok tna yawe yamo Raja. Mai ro Ibrani raa mawe Mesias, tna mai ro Yunani raa mawe Kristus. Musa yhau ymat bo ro meen mama reto to, yawe mafer moof kʼait. Yawe mafer moof toni miwer kta ro Mesir beta. Feto tibyo Musa yawe yhau ysya raa mana ro Israel. Yawe kbe bo samyoh mai kʼait rof.

²⁷Ait smot Allah matak. Tibyo yasen frok ybam Mesir. Ait yhar yawe kbe raja kmo ait. Menohe ait waa fee. Ait smot Allah, ro ja raa mahni. Menohe Allah yerif Ait kʼMusa.11:27 Keluaran 3 mkyas tii wore wo Allah ykyas bo kʼMusa. Feto to ait yawe beroh sikba Mesir.

²⁸Musa smot Allah matak. Tibyo yari ybo bo ro Allah yawe. Tna yakyõ korat ro Paskah. Yno si to, yoo mees karu mam amah sor raa ro Israel wana ja mhau. Malaikat sau mama mame kubum raa ro Mesir beta. Menohe Musa yoo fito reto yai wa feto. Tibyo malaikat reto mama mame kubum raa mana ro Israel weto to fee.

²⁹Raa ro Israel smot Allah matak. Tibyo ana mroh mamo frit sawan ro ’Laut Merah’ mnan fi ana mamo mam tabam ro ngkaat sai. Tna raa ro Mesir mawe ana mno feto ye. Menohe mfe; Allah yno raa ro Mesir to beta msu mkak saut.11:29 Keluaran pasal 1-14

³⁰Raa ro Israel mamo mur mam remo ro mabi sau, masom Yerikho. Mamo mur ti trion krema. Ana smot Allah matak. Tibyo yno fraa ro raa mafir mur mam remo reto to, mrok nraref.11:30 Yosua 6:12-25.

³¹Tiwya raa ro Israel baro mama mmat tan remo ro Yerikho to. Mamo mmat tan, tna Rahab moo raa weto mimyõt wai mam amah rau. Tna re ana mkai riof. (Rahab to fnya ro Yerikho. Au to fnya ro ja mwyah.) Menohe raa roto ro mhau mam Yerikho ja mari bo ro Allah yawe fee. Tna raa sbe ro Israel mama mame raa ro Yerikho weto. Mama mame ana majat. Menohe Rahab smot Allah matak. Tibyo raa mame au majat fee.11:31 Yosua 2:1-21.

³²Kbe jõ tawe bo bawya naut u? Ayõ mnan fee. Feto to tkyas Gideon, Barak, Simson, Yefta, Daud, Samuel msya nabi makin sor taro fee. ³³Ana weto beta smot Allah matak. Feto to, ana taro mafa rabin roto taro tna ana mros matak. Tna raa ro mamo byoh kʼana to, mbtek mte. Ana roto taro mamo raa ro mase tna mbo raa wana kaket moof. Taro to fri singa ro nsafo, menohe singa weto mafit ana mabo fee. ³⁴Ana ro smot Allah weto to, taro truk mam tafoh ro mait. Menohe tafoh reto mait ana sohabyoh fee. Raa wanu taro to, byoh saka ana, mawe mame ana majat, menohe ana mkai riof. Taro to raa ro maka sne, ssafo fee, menohe mrok matak. Tna taro matak re mafa msya raa mana roto taro kaket. Tibyo raa ro mamo byoh kʼana weto msam mamo. ³⁵Fnya baro ro smot Allah kaket to, raa wana ro mhai oh to, mrok masen. Menohe raa roto taro smot Allah kaket, tibyo raa mfot ana mai. Raa sikowah ana. Menohe mawe raa mai ana majat rof, bitsre ana mamo fee. Mawe feto afo re meen Allah yno ana mrok masen. Mrok masen tna kbe yno bo moof kʼana miwer yno kʼraa roto taro. ³⁶Raa taro smot Allah kaket, tibyo raa sret ana masah. Tna moo too mok-mak ana. Taro to raa moo rantai make, tna mbu ana mam bui mato. ³⁷Taro to raa moo fraa mai majat. Tna taro to raa ktan mabuf ewok. Tna taro to raa moo tfo ro miyõ, takoh ana tna majat. Taro mse ratan aro fee, tibyo ana moo domba marak soh mfe kambing marak sai myum. Ana to, boit msya bo ro ana mse to, mabut. Raa mno bo ro samyoh mai kʼana. Raa mno bo mkair kʼana ye. ³⁸Amah ro ana weto mhau to aro fee. Tibyo ana mamo ninya mhau mam yuk ro riamo; mam atu, tna mam isra msya ako mato ye. Raa ro tabam refo hawe ana, mnaut mawe ana raa ro mkair. Menohe raa ro tabam refo to, Allah ynit msya ana weto yawe mnan anya fee. Anu bhar bwe raa ro smot Allah matak weto to, raa ro moof miwer. ³⁹Raa weto beta tiwya smot Allah matak. Reto oh mi ana mno Ait yhaf mnan. Menohe ana beta mhai. Mhai wia tna bombra ro moof Allah ysi kʼana to, sait ykai fefares. ⁴⁰Allah ynaut yawe soh ana mesait aran mkai bombra ro tiwya ysi to, moof fee. Yawe soh anu ro smot Ait mfo refo to, nsya ana ro tiwya tinyi smot Ait weto, kbe nkai bombra ro tiwya ysi weto su to, moof miwer. Allah ksoh yawe anu raa mkbair ewok weto, beta mamo raa ro mhaf moof mnan si, aro mabut fee.

Beroh smot Tuhan matak

¹Raa ro tiwya smot Tuhan to msis oh. Tna ana mhau mmat rof anu. Feto to nma, anu beroh smot Ait matak ye. Bo bawya ro mno wa bosmot ranu to, noo beak makus. Iro msya bo mkair ro anu bno to, kbe mno anu btek bwe. Feto to nno u ma. Nma, anu bros btak smot Tuhan matak mamo snok sboh rau. Nma, anu bhoh wai kʼAit mam iso ro moof. Ait yerif iso reto kʼanu oh. Mfi bo raa baro santri anya mhoh to, ana mhoh mamoʼt makit rau to, tna kbe moo bouum ro raa siwyan muumto mee kʼana. ²Nma, anu bsu bfi fon to, bmat Yesus aran. Ait oh mi raa ro sair iso re kbe anu smot Ait tna bmo bo kʼAllah oh meto. Tna Ait oh mi kro iso ro bosmot reto kaket mnan si mamo snok mam tis rau to ye. Tiwya yhau mam tabam refo to, Ait yhar yawe kbe meen Allah yoo simaut ro mase yee kʼAit riryõn shauk bo samyoh ro Ait yasom. Tibyo Ait yajat mam ara warok, menohe Ait hrenaut fee.12:2 Mam wore wo Yesus yhau to, raa ro mkair toni sai aran raa mame majat mam ara warok. Raa majat mfi feto to mti saban toni. Yawe kbe yasom bo mkair reto sai rof. Yajat tna fo yaut yamo yo kʼAllah. Allah hre mam ambar-tahta rAit. Tna Yesus hre su ysya Allah mam ati ro yatem ati. ³Kbe ati ro raa mno bo ro mkair mai kʼanu fo, nnaut Yesus. Tii raa ro ja mno iro to, ana mno bo mkair mai kʼAit ye. Yesus beroh tna yasom bo weto ro mai kʼAit. Ja anu bsom bo ro samyoh weto fee, bsom bo ro mnan-nan sai. Nnaut bo reto re kbe soh anu hrowyõ to, kbe anu bitsre bosmot wanu to ma. ⁴Ja anu beswan iro to. Menohe anu aro nno mamo snok nkai yaaf o nhai bo fefares. ⁵Nsorni ma watum ro Allah: Mam bokom sau raa sait ykyas bo ku sme rait. Bokom far-far wefo mkyas bo kʼanu, ku wAit ye, mawe:

“Ku ajõ: Ti aro Tuhan yno bo ro samyoh mai kʼanu afo re anu brok bhar bo. Soh Ait bhah anu to, niwana ma! Kmo ma! Tna ati ro anu nno bo ro mkair, tibyo Ait yastako anu to, hrowyõ ma.”

Ayub 5:17

⁶“Nnaut nwe Tuhan yno bo reto kʼraa ro Ait ksoh. Awya ro Ait ytu yawe yamo ku rAit to, soh ait retait yno bo ro mkair aro to, kbe yno bo mai kʼait riryõn afo re ait yhar yawe ye yno bo reto u ma.”

Amsal 3:11-12

⁷Bo ro Allah yno mai kʼanu to, mfi bo raa mabi ja mno kukek wana. Feto to beroh kanyin sai. Soh ku wana mno bo ro mkair to, raa mabi mastako tna mai ana fea! ⁸Ja raa mabi mastako kukek wana. Tna misoh ku wana, afo re ana mashana tna mari bo ro raa mabi mawe kaket. Tna anu fo ku ro Allah wAit. Feto oh mi Ait yastako anu tna yno bo mai kʼanu, afo re anu nashana ye. Soh yno feto fee, anu to ku wAit fee, menohe nfi ku ro ja fnya mabe-aba sai. ⁹Soh anu bno bo mkair to, kbe bja wanu ro tabam refo mai anu fea! Tna anu heyut bmat ana. Anu bri bo ro ana mawe. Feto kbe anu bsom bo ro Allah yno mai kʼanu feto ye. Ait tait anu Bja ro yhau mam sawro rAit. Kbe anu heyut bmat Ait tna bri bo ro yawe. Bhar bwe yno feto afo re riof kʼanu. ¹⁰Tiwya anu bja wanu mno bo mai kʼanu, tna mitsre bo ro samyoh mai kʼanu tahun baro sai, mam wore wo anu bkek fares sai. Mno bo ro ana mnaut mawe misoh anu boof. Tna anu bhau mam tabam refo fares to, Allah yitsre bo ro samyoh mai kʼanu afo re yisoh anu boof. Re kbe meen anu brok boof mnan Ait ye. ¹¹Bo samyoh ro Allah yitsre mai kʼanu to, ati ro anu bkai to, anu bnaut bwe bo mkair. Mno anu sraujin. Menohe raa taro bito masom bo weto mamo snok mam sboh rau. Tibyo bo samyoh reto misoh raa weto mhaf wana: Mno ana mhaf tnok tna mno re ana ksoh mno bo ro Allah ksoh ye.

¹²Anu ro naa sne to; nsen nsit nros.12:12 Far-far refo mkyas Yesaya 35:3, tna fret bo mawe, “Nisoh nhaf wanu. Nisoh bosmot wanu ro matak fefares. Nisoh kaket re matak.”¹³Anu bmo mam iso ro bosmot. Nisoh betrot iso reto, afo re anu smot Allah matak. Raa baro to, bosmot wana matak fee. Nno bo ro misoh bosmot wana mamo matak. Nisoh iso re kbe anu aro btek nwe fee. Feto re nros ntak.

¹⁴Tomer re kbe nhau niranya nsya raa beta. Tna tomer nhau nno bo ro Allah wAit sai. Raa ro mhau mno bo ro Allah wAit sai to, mesait sai aran kbe meen mmat Allah mam rabin rAit. ¹⁵Nhau to, kmot anya kaket. Afo re anu beta nmo mam iso ro Yesus sair tna yatmof anu reto. Nno be anu aro sikba iso reto tibyo nkai boatmof ro Allah fee. Raa ro mweh iso reto to, ana miwro raa mawat. Ana mno iro. Tibyo raa mawat kbe mkai riof fee. Ana weto mnan fi raa ro mji foo, tibyo syoh mawat mhai. ¹⁶Nhau to kmot anya. Afo re anu aro nwyah, nus-as bo to ma. Afo re anu aro wase Allah ma. Nno be anu nnan fi Esau, ro tiwya wase Allah. Ait wase Allah tibyo yiwana bo moof ro yaja yawe ysan kʼait. Yiwana kta ro yaja yse mkah ku bum rait reto tna ynaut boit ro ifo yait sai. Yno feto yasim kta reto. ¹⁷Esau yno bo reto. Tna fo hre ye ynaut bo ro yno. Tna yayoh yawe yaja yno bo ro moof reto kʼait. Menohe ait aro ye fri bo weto fee. Tibyo ait sraujin tna yawia. Yawia menohe aya mhau mam srau oh. Yaja yno bo moof reto kʼait fee.

Atu ro Sinai hayah tna faut ro Sion to hayah ye.

^18-21Tiwya Allah yoo watum rAit yee kʼMusa mam atu ro Sinai. Mam wore weto to, Allah yawe wa yawe raa aro mamo kene kait mam atu reto to ma. Allah yno tafoh mait mam atu reto, tna yno mamur hto msya foos ro msai bo mfi ye. Yno raa mari bo sau mawia fari mnan fi raa mfi saa bo feto. Tna ana mari mai ro mno ana waa toni. Mai reto mbis mawe,

“Raa msya kak bo to, aro mamo kene kait mam atu reto to ma. Soh bo aro mamo miir atu reto mair to, nme bo reto majat: Noo fraa nii kak reto majat.”

Keluaran 19:12-13

Ana mari mai reto tna mrok waa. Tibyo ana soh-soh Allah mawe ykyas bo kʼana u ma. Tiwya Allah yoo watum rAit kʼraa ro Israel to, yno bo ro msai toni weto. Musa ymat bo weto tna yhaf aya yawe,

“Jõ waa tetet thai!”

Ulangan 9:19

Menohe iso ro anu nmo no kʼAllah to, iso ro hayah. ²²Ja anu nmo no kʼAllah mam iso ro maut faut ro Sion.12:22 Faut ro Sion fret bo mawe iso ro tna. Yesus ysair iso ro tna mkah bo anu bmo bo kʼAllah. Sion to mnan fi Yerusalem ro mhau mam Sawro ro Allah. Tna anu nmo kait no kʼAllah ro yaam to, ro yhau mam sawro rAit. Anu nmo mam iso reto oh. Anu nmo no kʼmalaikat msis-sas. Malaikat weto hre su tna simaut mase. ²³Anu nmo mam iso reto tibyo anu nmo raa mkbair ro Allah wAit to. Anu fo ku wAit ro masom. Anu nsom wanu to, Allah ykom mam sawro rAit oh. Kbe meen anu nhau nsya Ait su mam sawro rAit. Anu nmo no kʼAllah oh. Ait oh mi meen yoo safo mana ymit kʼraa beta. Anu nmo raa mkbair sau su nsya raa wAit ro mhai wia matim; raa ro Ait yisoh mhaf wana moof mnan si, aro mabut fee. ²⁴Anu nmo no kʼYesus oh. Ait ybo Bosi ro Tna reto matak mkah mees rAit. Tibyo yros susai ykyas bo ysya Allah tna ysya raa wAit ye. Tiwya Habel raa mame yajat ye. Tna mees rait frok ye.12:24 Kejadian 4:10. Menohe mees ro Yesus ysan to, mafer moof miwer: Yesus yhai afo re Allah yyon iro wanu.

²⁵Nri bo ro Allah yawe kʼanu. Niwana ma! Musa tait raa ro tiwya yhau mam tabam refo sai. Tii ait ykyas bo ro mbam Allah kʼraa. Menohe raa miwana bokyas ro Allah reto. Tibyo bo ro mkair mama mai kʼraa weto. Mfo refo Kristus oh mi Raa ro ykyas bo ro mbam Allah kʼanu. Ait ybam sawro ro Allah yroh yama. Feto kbe nri bo ro Ait yawe. Haberek kbor kʼAit ma, be kbe bo ro mkair toni mama mai kʼanu. ²⁶Tiwya Allah ykyas bo mam atu ro Sinai tna tabam mrok mnah. Tna mfo refo Ait ysi yawe,

“Meen Jõ tno tabam refo mnah u ye, tna msya ayoh skes mnah ye!”

Hagai 2:7

²⁷Yawe yno tabam refo mnah u. Yawe kbe meen yno mnah toni tibyo bombra ro yfen mam tabam refo beta marak. Tna bo ro meen mhau mawyõs aran kbe mhau. ⌞Reto bo ro tii ysi kʼanu, raa wAit ye.⌟ ²⁸Meen anu bmo bhau mam sawro ro Allah yamo Raja ybo to. Tna sawro ro anu bhau reto to, mhau matak hame wajin. Feto to nma oh, anu byoh asik mase kʼAit tna heyut bmat Ait, tna waa Ait ye. Soh anu bbaut Ait kaket oh meto, kbe Ait yhaf mnan. ²⁹⌞Tiwya tinyi Musa yawe,⌟ “Allah tait yatak toni ynan fi tafoh ro mait bo mkak.”12:29 Ulangan 4:24.

¹Nhau nsya anya to, niranya moof. ²Raa ro srim to, msya raa ro anu wase to, nmen ana nmo nse mam samu wanu. Tna nsorni ma, noo boit nee kʼana mait ye. Raa ro mno feto to, baro moo boit mee kʼmalaikat oh meto. Menohe ana wase. ³Raa ro raa mbu mam bui mato to, nmo nmat ana ye. Nros tis nban ana. Nnaut nwe ana mnan anya mfi bo anu ai, oh mi raa mbu mam bui mato meto. Nros tis nfoh wanu, mam wore wo raa mno bo ro samyoh mai kʼana ye. Nnaut nwe mnan anya mfi bo weto mai kʼanu ai. ⁴Soh raa moo fnya tna fai reto mamo msya ait to, tawe raa beta kbe mros tis kʼana mbewok re miranya matak. Allah yawe wa yawe raa bitsre anya ma, tna mamo mwyah bo to ma. Kbe Allah yoo safo mana ymit kʼraa ro mwyah weto. ⁵Allah ykyas mam bokom rAit yawe,

“Jõ sikba anu fee saut. Jõ thau su tsya anu yum.”

Ulangan 31:6,8

Feto to, nsu mase mkah pitis to ma. Nhau to, nnaut nwe bo bawya ro anu nse oh to, mnan. ⁶⌞Riwai Bokom ro Allah mawe kbe Ait sikba anu fee.⌟ Tibyo anu bhar bwe, Tuhan ja yban tis anu. Tibyo anu waa bo ro kbe raa mno mai kʼanu to fee.13:6 Mazmur 118:6.⁷Nnaut raa ro tiwya mkyas watum ro Tuhan kʼanu. Nnaut bo ro moof ja ana mno msya mafer rau. Tna smot Tuhan kaket mnan fi ana ja smot ye. ⁸Yesus Kristus ja yhau ynan anya sai, ja haberek fee. Iis, riwai, tna mfo refo ye, tna mamo snok mam meen hame wajin to mnan anya sai. Ait yhau feto yum. ⁹Mfo refo raa baro mkyas watum roto taro sor. Ana mawe wa raa mawe mabo fane bo to ma. Mawe mbau. Kro watum rana reto to ma. Ana ro mno feto mkai mafer aro fee. Nnaut nwe bo mafa ro agama ja ana mno soo oh to, mno bosmot rana to, mo matak fee. Nri ana ma. Nri Tuhan ro yatmof anu. Ait oh mi ro ysan boatmof rAit u kʼanu. Nnaut nwe boatmof rAit oh mi kbe mno bosmot ranu mo matak renti. ¹⁰Soh imam ro Yahudi ksoh yawe Allah yyon iro raa wana to, ana truk mam Sbyah ro Allah. Tna msan sapi msya domba bo to, mam wohat ro mbau. Mbau menohe watum rana mbis mawe ana mesait moo baro mabo ye. Anu smot Yesus, tna bhar bwe bo ro Ait yno oh mi ’bosan’ ro matak mkah bo myon iro wanu. Imam weto smot Yesus fee. Tibyo ana fri mafer ro moof reto to fee ye. ¹¹Mam korat ro masom Pendamaian to, raa msan bo to, mno feto fee: Ja imam ro yase ktan sapi msya kambing. Tna yakah mees reto, ntruk mam yuk ro mbau toni. Mees reto ait ysan afo re Allah yyon iro ro raa mno. Menohe sapi msya kambing mabuf weto raa moo makah frok mbam Sbyah reto. Raa moo tafoh mamo mkah mam mne. ¹²Tiwya raa makah sapi msya kambing mabuf weto mamo frok mbam remo. Tna Yesus ye. Raa makah Ait mamo frok mbam remo mamo mame mam mne ye. Yitsre raa mame Ait afo re mees rAit reto myon iro ro anu bno. Au oh mi Ait yoo anu ysan kʼAllah re anu bno bo wAit sai. ¹³Ait raa mame mam remo mne rau. Tibyo raa makin miwana Ait, sret Ait masah. Nma, anu kro Ait bmoʼt remo mne ye. Bitsre raa miwana anu, sret anu masah feto ye.13:13 Nmat Ibrani 12:2msya catatan kaki rau.¹⁴Nnaut nwe mam tabam refo fo, yuk ro anu bhau tibyo fee. Anu bhaf binaut bwe ste remo ro anu meen bhau mamo snok mam hame wajin. ¹⁵Yesus yamo imam ranu ro yase. Bo ro anu bsan kʼAllah to, au oh mi anu bibi Allah yasom rAit tna bwe asik mase kʼAit yoyo. ¹⁶Nsorni ma nno bo moof kʼraa. Noo bo nee kʼraa. Bno feto to, Allah yawe mnan fi anu bsan bo kʼAit, tna bno yhaf mnan oh meto.

¹⁷Nri bo raa wanu ro mase mawe to. Nbo nno. Ana oh mi raa ro mbo anu tna kmot anu. Kbe meen Allah ytu bo kʼana tna ana mkyas bo bawya ro ana mno. Soh anu nri ana tna nno bo moof, kbe ana ksoh. Tna soh anu nno bo ro mkair, kbe ana sraujin, tna mafer marak kʼanu nesait ye.

¹⁸Skabuk amu ro nkom aam refo ye. Amu nnaut nwe ja amu nhau nhaf moof. Tna amu nhau to, ja nwe nno bo ro moof ye. ¹⁹Jõ soh-soh kʼanu tawe skabuk Tuhan re kbe jõ thah te fooh tama to kʼanu.

²⁰Allah tait yno re anu bhau bhaf tnok: Tiwya Tuhan Yesus yajat, tna mees rAit mno bosi ro tna matak. Bosi reto meen mhau tu mamo snok mam hame wajin. Tna Allah yno Yesus yrok yasen. Tna Ait yamo Raa ro yase ro kmot anu. Ait kmot anu kaket mnan fi raa ro ja kmot domba wait. ²¹Jõ skabuk Allah re Ait yoo bo ro moof yee kʼanu: Yisoh anu afo re anu nhar bo, tna re anu ntak re kbe nno bo ro Ait yawe. Jõ skabuk re yno anu nhau nhaf sau, srau sau su nsya Yesus. Kbe yisoh anu, re kbe bno bombra ro Ait ksoh. Re kbe Ait yhaf mnan. Tna jõ skabuk re kbe raa bibi Tuhan Yesus yase rAit mamo snok mam hame wajin. Amin: Mabo oh!

²²Taja, tme, tao, tano na; jõ tawe anu nri watum ro jõ tkom mam aam ro mabuf refo. ²³Anu bfoh ranu, Timotius; tii raa tufrok ait mbam bui mato oh. Soh ait yamaʼt befo fooh to, kbe amu mbewok nma su no kʼanu. ²⁴Nmah meen ajõ kʼraa wanu ro mase, tna msya raa ro Allah wAit beta ye. Raa wanu ro mhau mam rabin ro Italia to mmah meen kʼanu.

²⁵Jõ skabuk Tuhan afo re Ait yatmof anu beta.