Galatia

Aam ro Paulus Ykom tna Tiim Mamoʼt Jemaat ro

Galatia

Paulus ymah meen kʼraa Kristen ro mhau mam provinsi ro Galatia

¹Aam refo fo mbam kʼjõ, Paulus. Jõ fi raabis ro Yesus Kristus ysya Allah. Yesus Kristus tiwya yajat menohe Yaja Allah yno re Ait yrok yasen. Ana mbewok oh mi mbis jõ tamo tkyas watum refo. Raa ro tabam refo aro mbis jõ fee. ²Jõ tsya raa makin ro kro Kristus nmah meen tna tiim aam refo kʼanu, jemaat makin ro nhau mam provinsi ro Galatia. ³Amu skabuk Bja Allah, re Ait ysya Tuhan Yesus Kristus matmof anu tna mno re anu nhau nhaf tnok ye. ⁴Tiwya Kristus ymat iro wanu tibyo yoo yetsu rAit ysan yawe raa mame Ait yajat. Reto oh mi Ait yake safo wanu. Mfo wefo fo arin mkair toni: Raa ro wase Ait to ja mno-na bo sai. Arin mkair tibyo Bja Allah yawe Kristus yama yoo riof yee kʼanu. ⁵Nma, anu bbaut Bja Allah mamo snok mam hame wajin. Amin: Mabo oh!

Bokyas Moof ro Kristus to sau aran sai. Iso roto aro fee

⁶Taja, tme, tao, tano na; anu fo tna sai kro Kristus. Allah ytu anu mkah boatmof ro Kristus yawe anu nmo raa wAit. Menohe mfo refo jõ tari he anu nri bokyas roto sau. Ayoh ee! Anu haberek kbor kʼAllah! Tna jõ waa: Anu nri bokyas reto mfi Bokyas ro Moof (Injil) meto. Ebokfi bokyas reto bokyas ro sre meto. ⁷Bokyas ro anu nri reto to, mnan si Bokyas Moof ro Kristus meto fee! Raa mkbair sau mama mkyas bokyas roto reto kʼanu. Ana mama ksoh mno re anu nantutu. Tibyo anu nnaut mamo-me tna wase bokyas ro ati to miyo! Bo ro ana mkyas reto to, miwer Bokyas Moof ro Kristus. Ana mkyas bo ro mabo fee. ⁸Jõ tawe kʼanu tawe, “Mfi raa sait yama yo kʼanu tna ykyas bokyas roto kʼanu yawe, ‘Bokyas ajõ refo to Bokyas Moof ro Yesus!’ Nri ait ma!” Mfi bo meen amu nesait soh mfe, malaikat ro mbam sawro ro Allah mama mkyas bokyas roto, nri bo kʼana weto ma! Awya sai ro ykyas bo sre tait, kbe Allah yno ayoh mroh kʼait! ⁹Tna bo ro riwai reto to, jõ tawe te tkyas u kʼanu tawe, “Mfi bo raa awya sai ykyas bokyas roto kʼanu tna yawe, ‘Bokyas ajõ refo Bokyas Moof ro Yesus!’ Nri ait ma! Mfi bokyas rait reto miwer Bokyas ro Yesus tiwya anu smot meto; meen Allah yno ayoh mroh kʼait!”

¹⁰Jõ tkyas bo mabo sai tna raa taro hawe jõ. Anu nnaut fyi? Jõ tno bo re kbe raa mhaf mnan jõ to fe mfe a? Mfe, jõ tno bo ro moof re kbe Allah yhaf mnan jõ. Mfi bo jõ tkyas bo tna tno bo afo re raa mhaf mnan jõ to, soh tno feto jõ tnan sryan ro tno bo ro mfi raabis ro Kristus rAit to fee.

Paulus yamo raabis ro Allah to, yari bo ro Allah yesait ybis ait

¹¹Taja, tme, tao, tano na; nhar oh, nnaut oh: Bokyas ro Kristus tiwya tkyas kʼanu to, mbam raa ro tabam refo meto fee. ¹²Bokyas reto raa ro tabam refo mkyas kʼjõ tinyi fee. Mama mbam guru aro fee ye. Menohe Yesus Kristus oh mi yasbrah Bokyas reto kʼjõ to. ^13-14Tiwya weto to, tmat bokom raa ro agama Yahudi to kaket. Bo mafa msya bosmot weto to, amu hohos na wamu tiwya mbo mno ye. Tna jõ mur-mur kro bo mafa wana miwer tafoh wojõ na. Tna jõ somya agama reto mamo renti ye.1:13-14 Raa mkyas ’Yahudi’ to maja rau trion ewok: Ro sau to, mkyas raa mana sau. Ana oh mi kube ro bi Abraham, Ishak msya Yakub. Tiwya tinyi ana weto ja mkyas mai ro Ibrani. Tna raa mtu ana mawe ’raa ro Israel’ ye. Ro ewok to, mkyas agama rana. Ana weto ja kro Watum ro Allah tiwya yoo yee kʼMusa. Paulus tait tiwya kro agama Yahudi. Reto oh mi tiwya ait yari Watum ro Musa weto to, siko ybo yno beta. Menohe Paulus yamo raa ro kro Kristus. Tna yhar yawe raa mari Watum ro Musa msya bo mafa raa ro Yahudi roto taro to, bo ro ati fee. Watum reto kbe misoh iranya rana msya Allah fee. Ait fi raa mana ro Yahudi fares. Menohe kro agama reto u fee. Mamo snok mfo refo to, raa mana ro Yahudi mawat mhau fares mam rabin ro Palestina tna mam oo roto taro mam tabam refo ye. Tna ana mawat kro Watum ro Musa fares, tna taro kro Kristus. Feto to jõ safo toni saka raa ro kro Kristus. Anu nri bo ro jõ tno oh: Tiwya jõ simoyot raa ro kro Kristus. Tna jõ siko tawe tno jemaat ro Allah safe mkak. ¹⁵Menohe tiwya wore jõ thau mam tme mhaf fares to, Allah ysok jõ oh. Tamo snok tanes tna wase tawe Yesus tait Ku ro Allah yare metait fefares. Tna mam ati ro Allah ksoh to, Ait yatmof jõ, ytu jõ tna yawe tamo tkyas Bokyas Moof ro Yesus. ¹⁶Yatmof jõ, tna yasbrah Ku rAit kʼjõ re kbe jõ thar he Yesus yamo Mesias ranu. Thar tawe Ait oh mi Raa ro Allah ysok yamo raa sotak ranu. Allah yasbrah Ku rAit kʼjõ afo re tasen tamo tkyas Ait yasom. Raa mana ro Yahudi to, tkyas Ait yasom kʼana fee. Tkyas Ait kʼraa ro mbam raa mana roto makin. Tamo tkyas kʼana tawe, “Yesus tait Ku ro Allah yare.” Ati reto to, jõ tasen tamo fooh ttu bo kʼraa ro tabam refo wia fee. ¹⁷Tamoʼt Yerusalem to kʼraabis (rasul) roto taro fee ye. Ana mamo raabis ro Kristus wia matim tna mhar bo oh, menohe jõ tamo ttu bo kʼana wia fee. Jõ tasen tamo to kʼraa ro mhau mam oo ro Arab wia tna hah te tamoʼt kota ro Damsyik u.

¹⁸Tahun trion tuuf firwas tna tasen tamoʼt Yerusalem. Jõ tamo hre su tsya Kefas (Petrus)1:18 Ati weto to, raa mawat masom Petrus. Feto to ja raa mtu bi ait refi yasom Kefas ye. tna tsya ait thau ti trion 15 bo feto. ¹⁹Thau mam tno to, jõ fri Tuhan Yesus yao Yakobus ye. Menohe jõ fri raabis roto aro fee. Fri ana mbewok aran sai. ²⁰(Bawya ro jõ tkom kʼanu refo to mabo tu oh. Allah yhar yawe jõ sioh anu fee.) ²¹Tna tbam Yerusalem jõ tasen tamoʼt provinsi ro Siria msya provinsi ro Kilikia. ²²Ati weto to, raa jemaat ro kro Kristus mam provinsi ro Yudea to, ana mmat jõ mkah masu fefares. ²³Ana mari raa mkyas jõ sai mawe, “Paulus ro tiwya simoyot raa ro kro Kristus to, mfo yesait smot Kristus tna ykyas yasom rAit kʼraa.” ²⁴Ana to mari bo jõ tashana smot Yesus feto tibyo mbaut Allah.

Paulus yamoʼt Yerusalem tna hre su ysya raabis sor

¹Tahun trion 14 firwas tna jõ thah te tamoʼt Yerusalem. Tamo tsya Barnabas tna tmen Titus ye. ²Allah yasbrah bo kʼjõ, ybis jõ tasen tamoʼt Yerusalem. Jõ tamoʼt Yerusalem tna tamo siret su tsya raa manes ro kro Kristus.2:2 Ana weto to, mbam raa mana ro Yahudi. Tiwya ana kro Watum ro Musa mbo mno. Menohe mfo refo ana kro Kristus oh tna mamo aban mana jemaat ro Yerusalem. Jõ hre su tsya ana tna betoo tawe, “Bokyas ro Kristus refo ja jõ tamo tkyas kʼraa mana roto makin. Raa mana ro Yahudi to, tkyas kʼana fee.” Jõ tkyas bo tsya raa manes weto mesait aran wia. Jõ waa be kbe ana ro mase weto hafrah tna hawe bo raa mkyas Bokyas ro Kristus kʼraa mana roto. Tno feto be kbe raa mnaut mawe watum ro tkyas kʼraa mana roto reto to mafer marak. ³He mfe; raa manes weto mhaf mnan bo ro ja tamo tkyas kʼraa mana roto makin reto. Raa manes weto to mbam raa mana ro Yahudi. Tna Titus tait ybam raa mana ro Yunani. Menohe ana mmat ait tna mbis ait raa mkom tohmi (sunat) to fee. Bo mafa rana raa ro Yahudi sai aran meto.

⁴Tiwya raa mkbair roto taro mawe wa bokyas ajõ. Tna ana mawe mbis Titus ykom tohmi. Raa mkbair reto sioh mawe ana kro Kristus, he mfe.2:4 Raa mkbair refo to hafrah bokyas ro Paulus. Ana mnaut mawe mfi bo raa mawe mamo mo kʼAllah to, mako hawe sai, ana kro Watum ro Musa tna msya bo mafa raa ro Yahudi weto beta. Tibyo Watum ro Musa msya bo mafa raa ro Yahudi ja kro to, make ana matak fares. Ana weto baro ja mama wan-wan skabuk su msya amu. Ana mhar mawe ja amu kro bo mafa raa ro Yahudi fee. Tna re ana mama mmat tan amu. Ana mnaut mawe bko hawe sai, anu raa ro kro Kristus bbo Watum ro Musa tna bno bo mafa raa ro Yahudi beta ye. Menohe anu bhar bwe bo mafa weto to make anu u fee. ⁵Feto to amu aro ja nri bo ro raa mkbair reto mawe kebet bo fee saut! Amu nros tu nkyas Bokyas Yesus ro ati. Amu nwe nkyas Bokyas reto kʼanu raa ro kro Kristus mam provinsi ro Galatia. Amu nros ntak afo re Bokyas ro ati mhau kʼanu matak yum.

⁶Tiwya, amu nbo tuuf nsen nmoʼt Yerusalem. Tna ati ro amu hre su nsya raa manes ro kro Kristus mam tno to, ana hre mari bo ro jõ tkyas. Mari tna tgyõt bokyas roto aro fee. (Raa ro tabam refo mmat ana to, mawe ana raa manes. Menohe Allah ymat raa ro mase msya raa ro kinyah to, yawe mnan anya sai. Tna jõ tnaut tawe feto ye.) ⁷Ana weto mawe tgyõt bokyas roto aro fee. Ana makit sau su mnaut mawe, “Bokyas ro Paulus refo mnan si. Amu nnaut nwe Allah ysok ait tna ybis ait yamo ykyas Bokyas ro Yesus kʼraa ro wase agama Yahudi. Ait ysok Paulus refi mnan si tiwya ysok Petrus ye. Petrus tait, Allah ybis yamo ykyas Bokyas ro Yesus kʼraa mana ro Yahudi.” ⁸Ae, Allah yoo yatak rAit yse kʼPetrus yamo raabis rAit yamo yo kʼraa mana ro Yahudi. Feto ye bi Ait oh mi yoo tak yse kʼjõ, yawe jõ tamo to kʼraa mana roto makin. ⁹Tna ati reto to, Yakobus, Kefas (Petrus), msya Yohanes ana mawe, “Esre.” Tna ana mfot matem msya jõ tna msya Barnabas. Ana mabo tuuf reto to, mamo aban mana mam jemaat ro Yerusalem. Ana weto mfot matem msya amu tna mawe, “Anu fo bkah bo mana sau su. Amu nhar nwe Allah yoo bouum yee kʼanu mbewok, ybis anu nmo no kʼraa mana roto makin, raa mana ro Yahudi fee. Tna ybis amu nmo no kʼraa ro Yahudi.” ¹⁰Tis rau to ana msi bo kʼamu mbewok mawe, “Sorni ma: Nmat tna natmof raa kinyah ye!” Tna jõ ksoh tno bo reto ye. Tna amu mbewok nsen sikba Yerusalem tna nsen nmo bamu.

Paulus santri bo ysya Petrus mam Antiokhia

^11-13Raa ro kro Kristus mbam raa mana roto to, tiwya Kefas (Petrus) ja hre yait bo su ysya ana. Tna yiranya ysya ana ye. Menohe ti baro firwas tna Yakobus yafoh wait baro mama snok mam kota ro Antiokhia. (Ana weto mbam raa mkbair ro ja mnaut mawe, “Raa beta ro kro Kristus, mako hawe sai, kbe ana kro bo mafa ranu, raa mana ro Yahudi to beta!”) Tna Kefas (Petrus) tait waa ana. Tibyo yari tna kro bo ro ana mawe. Feto tna ait hawe bo yiranya ysya raa mana roto ro kro Kristus u. (Ait sesa ait feto to, ait yari Bokyas ro Yesus ybo yno fee.) Tna Barnabas ysya raa Yahudi ro kro Kristus beta to mmat bo ro Kefas (Petrus) yno. Tibyo ana mari bo mbam raa mkbair reto ye. Mari tibyo sesa ana ye tna miranya msya raa mana roto ro kro Kristus u fee ye. Ana beta masen sioh ana sai oh meto. Feto to ati ro jõ tmat Kefas (Petrus) to, jõ bhah ait tawe, “Nyõ sesa nyõ to, nno bo ro mkair meto!” ¹⁴Jõ tmat he ana miwer Bokyas Yesus ro ati oh meto. Feto to wore wo raa jemaat ro Antiokhia beta siret su to, jõ tawe Kefas (Petrus) tawe, “Fyi! Nyõ fi raa mana ro Yahudi fe mfe a? Menohe anu smot Kristus tibyo nyõ bitsre bo mafa raa ro Yahudi oh, tna nasen nno bo mnan raa mana roto sai. Nyõ nno feto moof. bo mafa weto to, make nyõ u fee. Menohe mfo refo nyõ nbis raa Yahudi ro mfo refo kro Kristus oh, nawe ana miranya msya raa mana roto to ma. Nbis bo reto mkah bawya!” ¹⁵Tna tawe kʼPetrus tawe, “Nyõ nsya jõ fo, anu mbewok bbam biin raa mana ro Yahudi. Tibyo anu raa ro bhar Watum ro Musa nteet. Menohe raa ro mbam raa mana roto to, ana wase Watum reto. Feto to raa ro Yahudi, ja mnaut mawe raa mana roto weto beta to ‘raa ro mno iro’. ¹⁶Menohe anu ro kro Kristus oh bhar bwe, ‘Watum reto mtai mno raa mhaf mato moof ati to fee.’ Allah ymat raa ro mari Watum ro Musa ja mbo mno to, tna yawe ana weto to, raa ro mhaf moof ati to fee. Awya ro smot Kristus Yesus oh mi Allah ymat tna yawe ana weto raa ro mhaf moof ati to. Watum ro Musa reto matak meto fee. Tiwya, ati ro anu brok bhar bwe bo reto mabo to, anu bashana tna smot Kristus Yesus. Tna anu bsen kro Ait oh. ¹⁷Feto to, anu raa Yahudi bitsre Watum ro Musa. Anu ksoh bwe Allah ymat anu yawe anu bhaf moof ati mfi raa ro wase mno iro. Feto to, anu bsen smot Kristus oh. Menohe raa ro Yahudi mmat he anu bitsre Watum ro Musa tibyo ana mkyas kair amu. Ana mawe, ‘Aha! Paulus na mno iro meto! Ana mnan anya mfi raa ro mbam raa mana roto! Kristus yisti re ana mno iro!’ He mfe: Kristus yisti re raa mno iro fee saut! Raa bitsre Watum ro Musa to iro meto fee. ¹⁸Jõ fret bo tawe Watum ro Musa to mnan anya msya amah ro rabo. Tna jõ titrah amah reto oh. Fyi re jõ haberek tbo ara ro rabo reto tna sgi amah reto u? Mfi bo jõ te tisoh jõ thaf moof mkah bo haberek tna tari Watum ro Musa tbo tno u to, jõ tno iro oh meto. ¹⁹Tiwya jõ thau tari Watum ro Musa to tbo tno. Menohe mfo refo jõ thar tawe Watum reto misoh irat ajõ tsya Allah moof to fee. Feto to jõ bitsre Watum reto afo re tno bo ro Allah yawe. Allah yawe jõ smot bo ro Kristus yno. Jõ smot tawe raa mame Ait yajat mam ara warok. Tibyo yisoh iranya ajõ tsya Allah. ²⁰Thau mam tabam refo tesait thau kar fee. Kristus yamos rAit ysan kʼjõ. Feto to thau tno bo kar u fee. Kristus yamos rAit mjin mam jõ thaf ajõ. Thau mam tabam refo fo, thau smot Ku ro Allah yare. Safo ajõ to Allah ymit Ku rAit Kristus. Feto oh mi Kristus yajat raa mame mam ara warok. Reto mnan bo jõ tesait tajat raa mame su tsya Ait ye. Au oh meto Allah ymat jõ to, yawe yoo riof yee kʼjõ. Ku ro Allah yare tait yatmof jõ tna ysan yetsu rAit shauk jõ. ²¹Jõ hawe bo haberek kro Watum ro Musa u. Maami jõ tiwana Allah boatmof rAit oh meto. Bo ro Yesus yno oh mi Allah ymat jõ tna yawe jõ tfi raa ro mhaf moof ati. Watum ro Musa to matak re misoh jõ thaf moof ati to fee. Mfi bo Watum reto matak mnan si maami tiwya Kristus ysan yetsu rAit fee!”

Allah yoo riof yee kʼawya?

¹Ayoh ee! Anu raa jemaat ro nhau mam Galatia fo, tnaut tawe raa sioh mno anu. Tibyo anu namboi tna nwe kro Watum ro Musa! Anu nno fyi sai meto ee? Tiwya tkyas Bokyas ro Yesus kʼanu to. Tawe Yesus tait raa mame yajat oh. Tna jõ betoo maja rau to kaket. ²Jõ ttu bo sau kʼanu tawe, “Tiwya anu nkai Har ro Tuhan to fyi? Anu kro Watum ro Musa tibyo nkai fe mfe a? Mfe, anu nri Bokyas ro Yesus tna smot (percaya) Bokyas reto nwe bo mabo. Tibyo nkai Har ro Tuhan fea! ³Tinyi rau to, Har rAit misoh iranya ranu nsya Allah. Mkah bawya anu ne nwe anu nesait ntai ntak nisoh iranya ranu nsya Allah feto! Mfo refo anu tomer nisoh iranya reto renti mamo snok tis rau to, mkah tak ranu nesait ai a? Anu wase bo toni sai meto a? ⁴Tiwya anu smot Bokyas ro Yesus. Tna bosmot ranu reto mno re raa sikowah anu. Tna mfo refo anu ksoh nwe bitsre bosmot ranu tna mbeak makus fe mfe a?” Jõ tinaut tawe anu nno feto ma. ⁵Tna te ttu bo kʼanu u tawe, “Fyi re Allah ysan Har rAit kʼanu to? Fyi re Allah yno bo ro hnah mam jemaat ranu to? Anu kro Watum ro Musa mi Ait yno meto, fe mfe a?” Mfe! Anu nri Bokyas ro Yesus tna smot (percaya) nwe Bokyas reto mabo.

⁶Nnaut Abraham: Tiwya tinyi ait yari bo ro Allah yawe tna smot (percaya). Smot yawe bo ro Allah yawe reto to meen mabo. Tna Bokom ro Allah mawe,

“Bo ro Allah ykyas kʼAbraham reto to, ait yari tna smot (percaya). Smot yawe bo ro Allah yawe reto to meen mabo. Au oh mi Allah yawe Abraham tait raa ro yhaf moof ati.”

Kejadian 15:6

⁷Feto to, nri oh, nhar oh: Raa ro smot Allah feto, ana mnan fi ku ro Abraham yabe. ⁸Bokom ro Allah tiwya mkyas raa ro mbam raa mana roto ye. Mawe ana ro smot Ait kbe Ait ymat ana mfi raa ro mhaf moof ati. Tna Allah ykyas Bokyas Moof reto matim wia tinyi wore bo weto mabo fefares. Bokyas ro Moof (Injil) reto to, Allah ykyas kʼAbraham matim wia. Yawe,

“Mkah nyõ to, meen Jõ tno bo ro moof kʼraa mana roto makin.”

Kejadian 12:3

⁹Feto to, anu bhar bwe raa ro mari tna smot Allah to, kbe Allah yno bo moof kʼana weto. Yno bo moof kʼana mfi tiwya Ait yno bo moof kʼAbraham wia.3:9 Reto oh mi Allah ymat raa ro smot Ait to mawe ana mfi raa ro mhaf moof ati. Abraham tait, raa ro smot Allah. Bo ro Allah yawe to, ait ynaut mamo-me fee. Ja yari tna yawe bo mabo.

Watum ro Musa moo riof mee kʼraa fee

¹⁰Raa taro mnaut sre mawe, “Amu ja nri Watum ro Musa, feto kbe meen amu nkai roon ro hame.” Menohe Bokom ro Allah mawe,

“Raa ro beroh mari Watum ro Musa tna mbo mno bo weto beta to fee, meen ayoh mroh kʼana weto. Hawe sai kbe ana mbo mno maja beta renti.”

Ulangan 27:26

Awya ro mtai mno bo weto beta? Raa aro mtai mno feto fee. Raa matak mari tna mbo mno bo weto beta mnan si to fee. Feto kbe ayoh meen mroh kʼana weto beta. ¹¹Bokom ro Allah mawe,

“Raa ro smot Jõ oh mi raa ro mhaf moof ati to. Tibyo meen Allah yoo roon yee kʼraa weto.”

Habakuk 2:4

Au oh mi Allah yawe Ait yoo roon yee kʼraa ro smot Ait. Feto to anu bhar bwe, “Awya ro kro Watum ro Musa tibyo yawe Watum ro ait kro reto mno re yhaf rait moof ati to, ait yawe bo ro sre meto. Awya ro kro Watum reto menohe smot Allah to fee; sait bo yhaf moof ati to fee.” ¹²Ati ro Allah yoo Watum reto yee kʼMusa to, Ait ykyas bo yawe bawya? Ykyas bosmot (iman) aro fee. Bokom ro Allah mawe,

“Kbe ayoh mroh kʼawya sai ro ybo yno bo weto beta mnan si to fee.”

Imamat 18:5

Soh raa mawe mamo raa ro mhaf moof mamyot Watum ro Musa to, mako hawe sai kbe mari bo beta ro Watum reto msi kʼana mbo mno sau-sau mnan si.

¹³Feto kbe meen ayoh mroh kʼanu, raa beta, fe mfe a? Anu beta biwer Watum ro Musa oh. Rau ro moof to, Allah kmo anu yno ayoh mroh kʼanu beta. Oos maami Kristus yfes anu. Watum ro Musa mawe,

“Allah kmo yno ayoh mroh kʼawya sai ro raa mame yajat mam ara warok.”

Ulangan 21:13

Kristus raa mame mam ara warok tibyo ayoh mroh kʼAit oh. Yno feto mkah anu riryõn, afo re kbe ayoh mroh kʼanu to fee. Ait yfes anu oh meto. ¹⁴Tiwya Allah ysi bosi akus kʼAbraham yawe yno bo ro moof kʼait ysya kube wait. Ti baro firwas tna Ait bitsre bosi reto kʼanu, raa ro nbam raa mana roto ye. Au oh mi Allah yno re Kristus yfes anu. Anu smot Kristus Yesus tibyo Ait yno bo ro moof kʼanu ye:3:14 Bo moof ro Ait yno kʼAbraham ysya anu to oh mefo: Yno re anu bfi raa ro mhaf moof ati. Ymat bosmot ranu tibyo yawe anu fo raa ro bhaf moof mnan si. Ait yoo Har ro Allah to mhau matam anu ye. Ysan Har ro Allah kʼanu mnan fi bo tiwya Ait yawe to ye.

¹⁵Taja, tme, tao, tano na; mam tabam refo to, ati ro bi yabi sait yuumto bombra wait ku rait sait to, ja raa roto taro mari tna kro bo ro bi retait yawe. Bo ro ait yawe to, kbe mabo tu. Raa roto mno wa ku retait fee. Ait yesait oh mi krek waan ro yaja yuumto reto. Raa aro yirenti fee. Tna bo ro Allah yawe yuumto kʼAbraham to mnan feto ye. Ait yawe yum, kbe yno tu oh. ¹⁶Allah yawe,

“Meen Jõ tuumto bo kʼAbraham kube wait sait.”

Kejadian 17:19

Bokom ro Allah far-far reto mkyas mawe yuumto bo kube ro Abraham ’magin’ to fee. Menohe Bokom refo mkyas kube rait sait aran sai. Tna Ait retait oh mi Kristus to. ¹⁷Nhar oh! Nnaut oh: Allah ykyas bo kʼAbraham wia matim yawe kbe yuumto bo kʼait. Tna tahun trion 430 firwas tna Allah yoo Watum yee kʼMusa. Tna bo ro tiwya Allah yawe yuumto kʼAbraham to, yawe yum oh. Allah ynaut tna ybo fares. Watum ro Musa reto mno wa bo ro Allah yuumto kʼAbraham to fee. ¹⁸Allah yawe yuumto bo reto kʼraa ro kro Watum ro Musa fe mfe a? Mfe. Tiwya yawe kbe yuumto bo reto kʼAbraham ysya kube wait. Allah ysi bosi akus tna bo ro Ait yawe yno to, kbe ybo yno tu oh. Tna bosi reto oh mi Ait yatmof Abraham.3:18 Anu ro smot Kristus tna bsam wai kʼAit to, bfi kube ro Abraham ye. Tibyo Allah ymat mees ro Yesus tna yawe anu bfi raa ro mhaf moof ati ye.

Allah yoo Watum yee kʼMusa mkah bawya?

¹⁹Soh Allah ksoh rAit sai mi Ait yuumto bo kʼraa to, Ait yoo Watum yee kʼMusa mkah bawya? Yoo afo re mbam Watum reto raa mrok mhar bo ro moof to miyo tna ro iro to miyo. Allah ksoh yawe raa kro Watum reto tibyo fee. Yawe raa kro Watum reto mamo snok ati ro Raa sait yama sai. Tiwya ati ro Allah ysi bo kʼAbraham to, Ait ykyas kube ro Abraham sait. Ait retait oh mi Kristus.3:19 Mbam far-far refo anu bhar bwe Allah ksoh yawe raa kro Watum ro Musa mamo snok Kristus yama yfes raa sai. Tiwya Allah ybis malaikat wait moo Watum reto mamo mee kʼMusa. Tna Musa yros susai yoo Watum reto yamo yee kʼraa ro Yahudi. ²⁰Mfi bo raa mabo ewok santri bo to, ja raa sait yros susai ana mbewok weto. Raa retait yno re kbe ana mbewok mrok makit sau su to. Tiwya, ati ro Allah yoo Watum reto yee kʼraa to, yno mnan feto ye: Musa yros susai ykyas bo ysya Allah tna ysya raa. Menohe tiwya Allah yesait aran ysi bosi reto kʼAbraham. Ait yno bo reto ai. Ybis Abraham yno bo aro fee. Rau ro ati to, Abraham smot bo ro Allah yawe meen mabo. Ait ynaut bo reto maut-mroh to fee. ²¹Tiwya Allah ysi bosi yawe yuumto riof kʼanu raa. Feto to fyi? Watum reto santri bo msya bosi reto fe mfe a?3:21 Tis rau to, Allah ksoh yawe raa mamo mhaf moof ati re kbe miranya msya Ait. Ait yoo Watum reto tna raa mrok mhar mawe ana mesait to raa ro mhaf mkair, mesait ai mamo raa ro mhaf moof ati to fee. Feto to far-far refo mawe, “Watum reto santri bo msya bosi reto fee.” Watum reto to bo ati re kbe raa mhar mawe ana raa ro ja mno iro, raa ro mhaf moof ati fee. Menohe Watum reto to iso ro raa mamo mhaf moof to fee. Anu smot bo ro Kristus yno bwe mabo oh. Bosmot (iman) feto oh mi Allah ymat anu yawe anu bfi raa ro mhaf moof ati. Mfe: Watum ro Musa matak re kbe mno anu bhaf moof to fee. Watum reto Allah yoo mkah yoo riof yee kʼraa to fee. Mfi bo Watum reto matak re mno anu bhaf moof to, maami Allah yno sai ye mfi feto. ²²Bokom ro Allah mawe raa beta mno iro. Menohe Allah ysi bosi kʼanu, raa ro mno iro to, re kbe yyon iro wanu: Yawe raa beta ro smot Yesus Kristus tna msam wai kʼAit to, kbe Ait yyon iro wana tna ysan riof kʼana. ²³Tiwya wore anu wase bo smot Yesus to, Watum ro Musa kmot anu. Kmot anu wa re kbe anu bno iro kbik-kbak to fee.3:23 Galatia 3:19. Watum reto kmot anu wa mamo snok Allah yerif iso ro bosmot (iman) reto. ²⁴Tiwya Watum ro Musa reto mnan mfi ’guru’ ro mber anu re bma bo Kristus. Afo re anu bsam wai kʼAit. Anu smot Yesus feto tna Allah ymat bosmot ranu reto tibyo yawe anu to bfi raa ro mhaf moof ati. ²⁵Mfo wefo anu smot Kristus. Tna Watum ro Musa mamo guru ranu u fee. ^26-27Mfo refo fo anu smot Kristus Yesus tna nsam wai kʼAit. Tibyo anu nmo ku ro Allah wAit oh meto. Anu to, Allah baptis oh. Au oh mi Ait yawe anu nhaf sau su nsya Kristus to. ²⁸Feto to raa mbam raa mana ro Yahudi msya anu raa ro nbam raa mana roto makin ye, anu beta bmo bhaf sau, srau sau, bkit sau su bsya Kristus Yesus oh. Anu ro mamo sryan boh ye, raa ro ja mros kar tna mamo sryan fee ye, raa sme ye, msya fnya ye to: Anu beta bmo bhaf sau, srau sau, bkit sau su bsya Kristus Yesus oh. Tibyo Allah ymat anu yawe anu nnan anya sai. ²⁹Tna soh anu beta smot Kristus oh to, anu fo nmo raa wAit. Anu beta to kube ro Abraham ye. Tibyo Allah ysi bosi yawe yuumto bouum kʼanu weto ye.

Watum ro Musa mbo anu u fee

¹Bi ro krek waan sait yhai. Mfi bo yhai tna ku rait ro yabe sait to ykek fares to, bi roto sait kbe yayõ ku retait ytos. Tna bi refi yoo waan ro yaja tii yhai to, yoo yse wia. Kbe ku retait yabi tna ye yrof yoo waan rait bi ait ro yse. Tii ykek fares ait ynan fi sryan boh: Bi retait ybis-baas ku retait, tna ait yse bo aro fee ye. Ebokmi bo wait to bo beta ro yaja tiwya krek ye. Ku retait yabi tna bi ait yoo waan rait yee. Tna yhar yawe bo wait. ²Wore ait ykek fares to, raa roto ytos ait. Tna bi retait ybo waan rait mamo snok mam ayõ ro ku retait yanes oh, mnan tiwya yaja ysi oh. ³Feto ye mnan amu raa ro agama Yahudi: Ati ro amu nkek fares mamo snok mam ayõ ro tiwya Allah Bja ranu ysi oh to, amu nri Watum ro Musa tna nno bo mafa raa ro agama Yahudi fares. Bo ro tabam weto mbo anu matak fares. Bo ro tabam weto mbo amu mnan fi raa bobot sait ybo sryan boh wait. ⁴Menohe oon sboh, tna Allah ybis Ku rAit yama. Fnya ro sai mabe Ait. Fnya ro mabe Ait ysya raa ro ytos Ait to, ana mbewok raa ro agama Yahudi. Tibyo Allah yno re Yesus tait raa ro yari Watum ro Musa ye. ⁵Allah ybis Ku rAit yama re kbe yfes amu. Yama yfes amu, raa ro tiwya nri Watum ro Musa. Yfes amu raa re Allah yayõ amu tibyo nmo ku wAit, tna kbe noo bo beta ro Ait ysan kʼamu. ⁶Tna anu nmo ku wAit ye. Tibyo Allah ybis Har ro Yesus mama mabum mam anu nhaf wanu ye. Har rAit mno re anu bkyas bo kʼAllah mam bhaf mato wanu bwe, “Abba, Taja!” Tna anu bhafri bi Ait bnan fi Ku rAit Yesus yhafri Yaja ye. ⁷Feto to, anu sait-sait nnan fi sryan boh to u fee. Allah yno re anu nmo ku wAit oh. Tibyo anu krek waan ranu ro Allah yuumto kʼanu oh.

Anu ne nno bo ro tiwya anu nno to mkah bawya?

⁸Tiwya anu nhar Allah fefares to, anu nri tna kro bo ro tabam sor. Bo weto to mnan Allah fee. Bo weto matak fee ye. ⁹Menohe mfo refo to anu nhar Allah to, Ait ro ati oh. (Rau ro ati to, Ait yhar anu ye!) Anu ne nri bo ro tabam refo to, nno fyi meto! bo mafa raa ro agama Yahudi msya Watum rana to mfi bo ro tabam sai. Bo weto to matak fee. Anu nri bo weto to mafer marak. Anu ksoh nwe bo weto mbo anu u to, nnaut nwe fyi meto! ¹⁰Tna fo jõ tari he anu nkyõ bokyõ ro agama Yahudi ye. Watum rana mkyas ayõ aro rau-rau msya snyi msya tahun wore ana makyõ korat wana. Tna mfo refo anu kro nkyõ bokyõ weto mnan ana ye. Anu nnaut nwe nno feto tibyo nisoh iranya wanu nsya Allah oh meto. He mfe. ¹¹Tiwya jõ thau tsya anu to, jõ hrowyõ thai tkyas Bokyas Moof ro Yesus kʼanu. Tna mfo refo to, jõ tnaut yyi tawe hrowyõ ajõ reto mafer aro fe mfe a?

Tiwya anu biranya kaket

¹²Taja, tme, tao, tano na; tiwya jõ bitsre Watum ro Musa tna jõ tnan fi anu. Feto to jõ soh-soh anu tawe, “Nitsre Watum reto tna nhau nnan fi jõ ye.” Tiwya jõ thau tsya anu to, anu nno bo ro mkair mai kʼjõ fee. ¹³Anu nhar nwe bo ro mno re jõ tamo to kʼanu to, jõ kiyam. Ti reto to, jõ kiyam tibyo jõ tamo thau mam beto. Thau tsya anu tna tkyas Bokyas Moof ro Yesus (Injil) kʼanu ye. ¹⁴Tna kiyam ajõ reto mno anu nsui. Menohe anu natmof jõ, tna anu nashoho fee, anu nikyak jõ fee ye. Menohe anu nisoh jõ moof. Anu nitrah nhaf wanu kʼjõ mnan fi anu nmat malaikat ro mbam kʼAllah. Anu nno bo moof kʼjõ mfi bo anu nmat Kristus Yesus yesait bo ye. ¹⁵Mam ati reto anu nhaf mnan kʼjõ. Anu nmat jõ to nhaf mbyõ. Tna anu ksoh ntufrok nsu mauf wanu nhaut mam jõ tasu ajõ ro mkair. Menohe mfo refo simaut ranu reto miyo? ¹⁶Mfo refo tkyas bo he anu nri fee sai. Bo ro tkyas abyõ reto to mabo ye.4:16 Raa ro Galatia mari Watum ro Musa sai ruman. Mnaut mawe mno bo weto to, kbe misoh iranya rana msya Allah. Paulus hafrah bo ro ana mno reto. Bo ro tkyas refo sioh fee. Tna mfo refo bokyas ajõ reto mno anu nrok nwe jõ tamo byoh kʼanu a? ¹⁷Raa mkbair reto masen mamo mo kʼanu tna mkyas bo matak.4:17 Nmat Galatia 2:4. Raa mkbair reto mbis raa ro Galatia mawe, “Raa ro kro Kristus to, hawe sai ana kbe mari Watum ro Musa msya bo mafa raa ro Yahudi to ye. Feto to soh anu nwe nisoh iranya ranu nsya Allah to, hawe sai nbo nno bo weto beta!” Menohe bo ro guru weto mkyas to bokyas ro sre meto. Ana weto mkyas bo re kbe anu kro ana. Menohe ana mkyas bo mkah bonaut rana ro mkair. Ana mawe mno re kbe anu twat nsya jõ, re kbe anu nsen nmo nkro ati rana. Nri bokyas rana ma. ¹⁸Mfi bo raa matak mkyas bo ro moof, tna anu nri bokyas rana to, jõ ksoh. Wore thau tsya anu ye tna wore jõ tarak ye to, jõ ksoh tawe anu nmur-mur nri tna nno bo ro moof yoyo.

¹⁹Taja, tme, tao, tano na; anu to nfi ku wojõ ro jõ ksoh. Tiwya tama tkyas Yesus yasom kʼanu to, tetsu mham-ham mfi fnya ro kborham tna mabe. Anu smot Yesus tna nsam wai kʼAit oh, menohe bosmot ranu matak fefares. Feto to jõ tnaut yyi tna tari kborham u. Tawe fooh re bosmot ranu matak. Fooh re anu nrok nhaf sau su nsya Kristus yhaf rAit. ²⁰Tna ksoh tawe tama thau tsya anu u, tna re tkyas bo kait tsya anu. Jõ hawe bo bhah anu. Jõ ksoh tawe tkyas bo rere tsya anu tna tisoh betrot bo wanu ro nno. Menohe thau fari ntefo tna kbe tno bawya u kʼanu?

Anu nnan ku ro tiwya Sara mabe

²¹Ayoh ee! Watum ro Musa anu nhar oh. Menohe maja rau to, anu nhar kaket fefares. Anu kro Watum ro Musa reto re kbe meen anu nkai riof a? Ebokfi mabo fee! ²²Bokom ro Allah mawe, “Tiwya Abraham yabe ku sme wait mabo trion ewok: Sait ybam Hagar ro mamo sryan boh,4:22 Kejadian 16:15. tna sait ybam yfain fai Sara ro mamo sryan ye fee.”4:22 Kejadian 21:2.²³Ku ro Abraham wait mabo ewok to: Ait ro mbam Hagar to bo ro msai fee. Hagar mhaf reto mfi bo ja raa mno sai feto. Menohe ati ro Sara mhaf ku Ishak to, fai au mabi oh. Tiwya Allah ysi bosi kʼAbraham to oh mi ait ysya Sara mtai matak mabe ku rau. Fai au mabe ku mam wore au mabi oh to, bo ro msai meto. ^24,25Fnya mabo ewok reto fret bo mawe bosi trion ewok. Hagar fret bo mawe Watum ro Musa. Allah yoo Watum reto yee kʼMusa mam atu ro Sinai, ro mhau mam oo ro Arab. Tna Watum reto make raa taro fares. Ana weto to mamo sryan mfi Hagar. Tna mfo refo raa ro mhau mam kota ro Yerusalem to, ja Watum ro Musa mbo ana to, make ana matak fares ye. ²⁶Tna bofret ro ewok to: Raa mkyas mawe Sara mnan anya ‘kota Yerusalem ro mhau mam uu’. Au oh mi wore Allah yamo Raja ybo raa wAit to. Anu fo bnan ku ro Sara mabe. Sara mamo sryan fee tna anu bros kar ye: Watum ro Musa make anu u fee. ²⁷Bokom ro Allah mawe,

“Fnya ro sfot to4:27 mnan fi Sara kbe ana mabe ku mawat. Tna fnya ro msya raa wana mhau su to4:27 mnan fi Hagar kbe mabe ku kebet sai. Tibyo: Fnya ro raa wana sikba ana makus tna ja mabe ku aro fee: Simaut oh! Fnya ro wase bo kborham to: Yok-yok tna sikoyõ oh!”

Yesaya 54:1

²⁸Taja, tme, tao, tano na; tiwya Allah ysi bosi yawe kbe Abraham yabe ku. Tna yabe Ishak. Tna anu fo bnan Ishak: Bosi reto mno re anu bmo ku ro Allah wAit. ²⁹Tiwya Hagar msya Abraham mabe ku Ismael mbam ksoh rana sai. Tna fo Har ro Tuhan mno re Abraham yabe ku Ishak. Ku Ismael yabi tna yno bo samyoh mai kʼIshak. Tna mfo refo to, mnan anya ye: Anu to bfi Ishak. Anu bmo ku ro Allah wAit mkah Har rAit ye. Tna raa ro kro Watum ro Musa fares to ja mno bo samyoh mai kʼanu. ³⁰Menohe ⌞tii Allah ybis Abraham yawe yikyak Hagar.⌟ Bokom ro Allah mawe,

“Nikyak sryan boh reto masen msya ku rau to mamo. Meen ku rau retait yasen yoo bouum anyõ aro fee. Ku ro yros kar, ybam fai au ro mros kar, meen yesait aran fri bouum reto.”

Kejadian 21:9-10

³¹Au oh meto: Anu fo ku ro sryan boh reto wau fee. Reto oh mi anu kro Watum ro Musa fee. Anu fo ku ro fai Sara. Anu bri tna smot Allah reto oh mi Ait meen yoo riof yee kʼanu to.

Raa ro kro Kristus to rero tna mamo mo kʼAllah

¹Kristus skur anu re bo aro matak make anu u fee. Kristus yno afo re anu nros kar oh! Feto to nros ntak oh! Nno be raa make anu mkah Watum ro Musa soh mfe bo roto to ma! Raa ro mari Watum ro Musa to masom bo fanes mnan fi sryan boh. ²Raa mkbair reto mbis anu mawe, “Nko hawe sai raa mkom (sunat) anu afo re nisoh iranya wanu nsya Allah.” He mfe. Jõ fi Paulus, raabis ro Allah. Tna jõ tawe kʼanu tawe, “Nri ana to ma! Mfi bo anu nno bo reto to, mafer bo ro Kristus mno to, aro fee kʼanu! Mfi bo anu nno bo reto to, anu fo nfi raa ro smot Kristus fee.” ³Nri a? Awya ro ynaut yawe, “Ro moof to, jõ raa mkom (sunat) afo re misoh iranya ajõ tsya Allah.” Ynaut sre meto. Awya ro yawe feto to, yako hawe sai, kbe yari tna kro Watum ro Musa weto sau-sau mnan si! ⁴Anu taro tomer kro Watum ro Musa afo re Allah yawe anu raa ro mhaf moof ati: Bonaut ranu reto to sre. Anu weto ja niranya nsya Kristus u fee. Anu nitsre boatmof ro Allah oh meto! ⁵Menohe Har ro rAit mhau mban anu. Anu smot Kristus tibyo nwof tna binaut oon wore meen anu bhau bhaf moof ati. Tibyo Allah yhaf mnan kʼanu. ⁶Anu bhaf msya bkit, srau sau su bsya Kristus Yesus. Anu bhar bwe anu raa mkom oo mkom fee bo to, bo ro ati meto fee. Ro ati to anu smot Kristus tibyo batmof raa anya kaket. ⁷Tiwya tinyi anu nno bo ro moof: Anu nri tna smot bokyas ro ati reto nwe bo reto mabo oh. Menohe raa roto taro mama sioh wa anu. Feto tibyo anu beroh smot bokyas ro ati reto fee. ⁸Awya ykyas bo kʼanu tna yoo anu nhaf wanu re anu nri bokyas ro sre reto? Allah ro ytu anu to yno meto fee. ⁹Bokyas ro raa mkbair reto to besruf anu beta a? “Ati ro raa maim roti to, kbe raa moo ragi kbet mno tepung mo mrok mtar mase.”5:9 1 Korintus 5:6. Bofret refo mkyas mawe bokyas ro sre kbet sai kbe besruf raa makin saah.¹⁰Menohe Tuhan yno re bokyas reto kbe beswan anu fee. Awya ro yno anu nrok nantutu to, kbe Allah yoo safo reto kbe ymit kʼait. ¹¹Taja, tme, tao, tano na; raa taro mawe, “Paulus ybis yawe raa mkom (sunat) raa re kbe misoh iranya rana msya Allah meto.” He jõ tkyas bo reto fee. Mfi bo jõ tkyas bo reto fares to, maami raa ro Yahudi sikowah jõ u fee. Jõ tkyas tawe, “Ro ati to, raa smot bo ro Yesus tiwya yno mam ara warok. Iso reto aran oh mi misoh iranya raa msya Allah.” Tna raa ro Yahudi to hawe mari bo ro jõ tkyas reto. Tibyo ana sikowah jõ. ¹²Ana mkbair reto mkyas bo sobu anu. Tna mbis mawe anu raa mkom (sunat). Ana mno re anu nantutu. Rau ro moof to, ana mamo msot bo wana rof!

¹³Taja, tme, tao, tano na; Allah ytu anu nmo no kʼAit. Tibyo bo aro make anu u fee. Menohe kaket anu re kbe nno iro to ma! Rau ro moof to, natmof raa anya. Tna nno bo moof kʼraa anya kaket. ¹⁴Au oh meto, bo ro Allah ysi beta, yawe anu bno to, maja weto beta to sau aran. Au oh mi:

“Natmof raa anya kaket mfi bo ja anu natmof netsu wanu nesait ai.”

Imamat 19:18

¹⁵Ntoh anya to ma! Santri anya to ma! Kaket anu, be kbe tis rau mti kair kʼanu anya ai.

Kbe anu bhau fyi mefo?

¹⁶Tawe kʼanu tawe, “Soh anu nri Har ro Tuhan reto to, mno re kbe anu hawe bo nno bo ro asmamo to u.” ¹⁷Bo ro anu raa nksoh bno to hayah. Tna bo ro Har ro Tuhan nksoh mawe anu bno to hayah ye. Mbewok santri anya. Menohe Har ro Tuhan matak re ja anu bno bo mkair ro anu bhaf mbis anu bno to fee. ¹⁸Soh anu nri Har ro Tuhan kaket to, kbe Watum ro Musa matak aro ye mbis anu to fee. ¹⁹Anu bhar bwe raa taro to mhaf wana mkair. Tna ana mari bo ro mhaf wana ro mkair weto to mbis ana. Tibyo ana mno iro mfi fefo: Ana taro maus-as bo. Taro srau oot-oot tibyo mno boasmamo, bo ro mti hrenaut. ²⁰Taro smot bo ro tabam, tna taro mari mafot ro kabes re saso matak rana. Taro knait anya, taro mbait mamus anya, ana taro waa kbe raa safto bo ro ana mse, taro mbo kmo mam matem, taro ja saso masom rana, taro mno bo re raa mbrir-brar mam jemaat tna safto-safto ana. ²¹Tna taro maam bo raa, ana taro bisir-basar, tna makyõ bokyõ mnin-nin yoyo bo. Tawe kʼanu u tawe, “Raa ro ja mno bo mfi fefo to meen Allah yuumto bo kʼana fee. Ana meen mamo mhau mam sawro ro Allah yamo Raja ybo to fee ye.” ²²Menohe raa ro mari bo kʼHar ro Tuhan to, kbe ana weto mno bo moof mnan ara ro tufrok make moof. Make ro moof weto oh mefo: Ana matmof raa anya kaket, ana simaut mase yoyo mam mhaf, srau wana, mhaf mato wana to tnok, ana kanyin sai masom bo ro mai kʼana, mhaf ase, ja ana mno bo moof kʼraa roto, tna bo ro ana mawe mno ja krim-krim mno tu oh. ²³Ana mhaf sneh, tna ja mbo metsu wana kaket tibyo mno bo nyi-nan fee. Raa ro ja mno bo ro moof weto to watum aro mno wa ana fee. ²⁴Raa ro Kristus Yesus ybo weto to, ana masmamo u fee. Boasmamo ro tiwya ana mno weto to, ana moo mbeak mam ara warok makus oh. ²⁵Har ro Tuhan mno re anu brok baam. Feto to nma, anu bri bo ro Har mawe. ²⁶Feto to saso nsom re kbe raa bibi anu to ma. Ntoh anya to ma. Tna kmo anya to ma.

Anu nbet anya

¹Taja, tme, tao, tano na; soh anu sait yno iro to, kbe anu baro nmo nmat ait. Anu baro ro ja nri bo kʼHar ro Tuhan to nmo tna watum bo kʼait nno mkah nhaf ro sneh. Nwe, “Nhah ne nno bo ro moof.” Tna kaket anu be kbe ana mno tibyo anu ntek ye. ²Tna nmat raa anya ro mkai bo ro samyoh to, nsen nmo nbet ana. Nsya ana tubat bo ro samyoh reto su. Nisoh ana mhaf wana re ana sraujin u fee. Anu nno feto to anu kro watum ro Kristus oh meto.6:2 Roma 13:8.³Soh raa sait ro ati fee ynaut yawe, “Jõ fi raa ro ati!” Ait tait sioh-sah ait oh meto. ⁴Menohe ait ro yawe bibi ait yesait ai to, rau ro moof to, ait ymat sas bo ro ja ait yno kaket to wia. Tna soh ykai mafer ro moof to, kbe ait simaut mam yhaf mato. Nmat sas bo ro raa roto mno to ma. ⁵Rau ro moof to, raa sait yesait kaket ait ai sai. Tna siko yno bo moof mnan si bo ro Allah yerif kʼait.

⁶Tna raa ro ja mkyas watum ro Allah kʼanu to, kbe anu sait-sait noo bo nee kʼana riryõn.

⁷Sioh anu nesait to ma: Allah ymat tna yhar bo ro anu sait yno-yno. Awya ro ynaut mam yhaf mato yawe, “Allah wase bo ro mkair ja jõ tno to.” Raa retait sioh ait yesait ai oh meto! Feto niwana Allah to ma! Jõ fret bo tawe, “Mfi bo raa sait furere bobat makan rau mam armato rait to, kbe meen bobat weto to make. Tna tis rau to ait yaret bobat mnan anya mamyot makan tiwya ait furere to.” ⁸Reto oh mi: Anu bhaf to mkair. Tna awya ro yari bo ro yhaf rait mbis, tibyo yno bo ro asmamo to, kbe ait safe mkak. Tna awya ro yari bo kʼHar ro Tuhan ybo yno to, kbe meen ykai roon ro hame mbam Har reto ye. ⁹Nma, anu beroh bno bo ro moof. Wore anu hrowyõ to, bitsre ma. Tna meen tis rau to, anu bkai bo ro moof. ¹⁰Wore wo moof refo. Feto to nma, anu bno bo moof kʼraa beta: Tinyi rau to, kbe anu bno bo moof kʼraa anya ro smot Kristus. Tna fo bno bo ro moof kʼraa roto beta ye.

Paulus ykyas watum ro tis beta tna ymah meen

¹¹Bokom ro tis refo fo, jõ tkom mkah tatem ajõ ai. Tkom mayir mase. ¹²Raa mkbair reto tomer mkuk anu re kro Watum ro Musa. Mno feto afo re kbe raa wana ro agama Yahudi nksoh. Au oh mi ana mbis anu mawe raa mkom (sunat). Ana mhar he bo reto bo ro ati fee. Rau ro ati to, raa smot (percaya) bo ro Yesus tiwya yno mam ara warok. Bo ro yno reto misoh iranya raa msya Allah. Raa mkbair reto mhar bo reto menohe beroh mbis raa mawe ana raa mkom (sunat). Raa mkbair reto waa kbe raa ro Yahudi to kmo tna sikowah ana. ¹³Ana ksoh mawe raa mari he anu raa mkom tna kro Watum ro Musa ye mnan si mkah bo ro ana mbis. Re kbe ana safuk mawe, “Raa ro mhau mam Galatia to mari tna kro amu oh.” Raa mkbair reto to, tiwya raa mkom (sunat) oh. Menohe ana mesait, kro Watum ro Musa mnan si fee. ¹⁴Jõ hawe bo safuk. Jõ hawe bo raa mmat jõ. Jõ ksoh re raa mmat bo ro Tuhan ajõ Yesus Kristus yno sai. Au oh mi ysan yetsu rAit mam ara warok. Watum aro msya bo ro tabam refo fo taro to, ja raa mnaut mawe bo ro ati. Menohe mfo refo jõ tnaut tawe bo weto to bo ro ati fee. Tna bo ro jõ tnaut tawe bo ro ati to, raa ro tabam refo to hawe bo weto ye. ¹⁵Mfi bo anu raa mkom oo mkom fee bo to, bo ati fee. Rau ro ati to anu smot Kristus tibyo nmos wanu to mrok maam. ¹⁶Jõ skabuk Allah re Ait yatmof awya-awa sai ro miwer bo maja ro jõ tawe refo fee. Tna jõ skabuk re Ait ysan riof rAit kʼana weto tna yno re ana mhau mhaf tnok ye. Ana oh mi raa ro Israel, raa ro Allah wAit.

¹⁷Tna jõ hawe te santri bo wefo tsya anu u fee. Raa roto ro mamo byoh kʼKristus sikowah jõ mnan oh! Jõ fi raabis ro Tuhan rAit tibyo raa mai jõ mayir-ayar mawat kʼjõ sai.

¹⁸Taja, tme, tao, tano na; jõ skabuk Tuhan ranu Yesus Kristus re yatmof anu sait-sait. Amin: Mabo oh.