Efesus

Aam ro Paulus Ykom tna Tiim Mamoʼt Jemaat ro

Efesus

Paulus ymah meen kʼraa ro smot Yesus mam kota ro Efesus

¹Aam refo mbam kʼjõ, Paulus. Allah ksoh tibyo jõ tamo raabis ro Kristus Yesus rAit. Jõ tkom aam refo kʼanu raa ro Allah wAit mam kota ro Efesus. Anu to, beroh smot Kristus tna Allah yse anu nmo raa wAit nsya Kristus Yesus su ye. ²Jõ skabuk Bja Allah, re Ait ysya Tuhan Yesus Kristus kbe matmof anu tna mno re anu nhau nhaf tnok sai.

Allah yno bo moof kʼanu tibyo anu bibi Ait

³Tuhan ranu Yesus Kristus tait, ytu Allah Yaja rAit. Tna Allah ymat anu bsya Kristus su tibyo Allah yno bo ro moof beta kʼanu. Bo ro moof weto to, anu bkai mam tabam refo fee. Menohe Allah siwyan bo ro moof weto kʼanu meen tru mam sawro rAit. Mabo oh tibyo anu bibi Allah bwe yno bo ro moof ati beta kʼanu to! ⁴Bo moof sau ro Allah yno to, tabam refo Ait ysair fefares to, Ait ysok anu oh. Feto to nma bibi Ait! Ait ysok anu afo re Allah ymat anu yawe anu bsya Yesus su oh. Anu bsya Yesus su oh mi Allah ymat anu yawe anu bfi raa ro wase mber safo ye. Tna Ait ysok anu re anu bhau bno bo wAit sai ye. ⁵Tna bo sau naut ro Allah yno kʼanu to, Ait yayõ anu bmo kukek ro Ait ytos. Feto to nma bibi Ait! Tiwya tinyi, anu brak fares to, Allah yhafri anu tibyo yesait yawe kbe Ait yayõ anu bmo kukek wAit feto. Tna Yesus Kristus siwyan iso re Yaja yayõ anu kʼAit ytos to. Allah yhaf moof tibyo yayõ anu mamyot bo ro Ait ksoh sai. ⁶Ait yayõ anu feto, afo re kbe anu bhar boatmof rAit ro msai toni tibyo bibi Ait. Tawe u tawe, Allah yhafri Ku rAit Yesus toni. Tna Yesus ysair iso re Allah yatmof anu tibyo yayõ anu bmo kukek wAit to. ⁷Iso ro Yesus ysair kʼanu reto oh mi yroh yoo mees rAit yfes anu. Iro ro anu bno to, Ait yyon beta. Allah ymat anu yawe anu bsya Yesus su oh. Allah yatmof anu yoo mees ro Yesus yyon anu feto. Tna boatmof ro Allah to, kta ro mabyoh maut toni. ⁸Tna Allah ro yhar bombra beta tna yakit maan ati tait, yhaf reo yoo boatmof rAit reto yatmof anu sai. ^9,10Tna bo sau naut ro Allah yno to, Ait yasbrah bo sau ro Ait ksoh anu nhar ye. Feto to nma bibi Ait! Tiwya Allah ymyõt bo ro Ait ksoh yno baro, raa mhar fee. Makyon ro matim wia mkak oh. Makyon ro tna fo, Allah yasbrah bo reto kʼanu yawe Yesus yatak ybo bombra beta fo. Ybo bombra ro mhau mam sawro ye tna bombra ro mhau mam tabam refo ye. Allah yhaf moof tibyo yno feto. Ait saim makyon refo matim wia tna Allah tubat Yesus yhau abyõ ybo bombra weto to. ¹¹Tna Allah ja yisti bombra beta mamo mnan si bo ro Ait ksoh. Tiwya tinyi, anu brak fares to, Ait ysok anu mnan si bo ro Ait ksoh sai. Ysok anu ymat anu yawe anu bsya Kristus su, tibyo yawe anu bmo raa wAit. ¹²Tiwya anu smot Kristus binaut bwe meen kbe yoo bo yuumto kʼanu. Allah ysok anu btim wia feto afo re kbe raa mmat bo moof ro Ait yno kʼanu reto tibyo mbibi Ait. ¹³Tna ati ro anu nri bokyas ro ati, ati ro anu nri Bokyas Moof (Injil) reto ro merif iso ro raa mkai riof to, anu nfot tna nse kʼanu. Anu smot Kristus to. Anu smot Ait tibyo Allah yoo Har rAit yse kʼanu re kbe anu nhar nwe anu nmo raa wAit nsya Kristus su. Har ro Ait yoo yee kʼanu reto to, Har rAit yesait ro tiwya ysi. ¹⁴Tiwya Allah yoo Har rAit yuumto kʼanu matim wia. Ait yno bo sau ro tiwya ysi kʼanu reto mabo oh. Feto to, anu bhar bwe meen Ait yuumto bo roto ro Ait tiwya ysi kʼanu to ye. Tna Allah yfes anu re anu bmo raa ro meen Ait ybo ye. Kbe raa mmat bo moof ro Ait yno weto to tibyo mbibi Ait. ^15,16Jõ tnaut bo weto beta. Tna raa mkyas anu kʼjõ ye. Raa mawe anu smot Yesus Tuhan ranu. Tna mawe anu raa ro Allah wAit beta to, ja anu natmof anya beta ye. Bokyas ro jõ tari reto mno re ja jõ skabuk anu tayoh asik mase kʼAllah. Jõ sorni anu fee. ¹⁷Tna jõ tayoh re Ait yoo Har rAit yno anu nkit maan tna yerif bonaut wAit kʼanu re kbe anu nhar Ait kaket ye. Yesus KristusTuhan ranu ja smot Allah ye. Tna Allah tait, Bja ranu. Ait yase rAit msai toni. ¹⁸Tna jõ tayoh re Allah yoo kek rAit yram anu nhaf afo re kbe anu nhar bo baro wefo: Ro sau to, anu ro Ait ytu nmo raa wAit to, jo skabuk re kbe anu nhar ninaut sawro ro Ait siwyan kʼanu. Ro nkro to, kbe anu nhar kta wAit ro meen Ait yuumto kʼanu. Kta ro msai toni weto, kbe yuumto kʼanu nsya raa wAit roto beta ye. ¹⁹Ro tis to, jo skabuk re kbe anu nhar Allah yatak rAit ro msai toni kʼanu ro smot Yesus. Tak roto beta to ssafo fee. Tak rAit ro msai toni reto oh mi tiwya mno Allah ytai ²⁰yno Yesus yrok yasen. Tna tubat Ait yamoʼt sawro rAit. Tna yse hre ysya Ait mam yajoh ro yatem ati; hroh ro mase reto. ²¹Mfo refo Kristus hre abyõ bombra beta. Tna ro masom roto beta mhau mte sai. Pemerintah ye, aban mana sor ye, ro mase ye, msya bobot sor ye, mhau mte beta. Kristus hre abyõ feto mam makyon refo sai fee. Kbe Ait hre abyõ feto mam makyon ro meen mama ye. Ait hre abyõ yum. ^22,23Tna Allah yoo bombra beta yse mam Yesus yatem ybo afo re kbe Ait yase tna bombra weto mari Ait. Tna jemaat rAit mfi Ait yetsu. Tna Allah yse Yesus yamo mana rau. Tna jemaat rAit msya Ait su to mhau muuf kaket. Tna Ait oh mi yhau mam bombra beta tna yno bombra beta weto mhau muuf kaket ye.

Tinyi anu bhai sai menohe Allah tubat anu brok baam

¹Anu tiwya tinyi to nhai sai. Tiwya anu niwer watum ro Allah. Iro weto oh mi anu nhai to. ²Tiwya ja anu nhau nno iro weto mamyot iso raa ro tabam refo ja nkro ye. Kabes yabi (Iblis) tait, ja ybo kabes beta. Ait tait har ro mfo refo ykah bo rait mam mhaf raa ro ja hawe mari bo ro Allah ksoh. Iso ro tiwya anu nkro reto to, mamo mamyot bo ro kabes retait ksoh ye. ³Tiwya amu nsya anu beta ye kro iso reto. Tiwya anu bhau srau oot-oot bo ro tabam sai. Tna bo ro anu srau ksoh msya bonaut ro tabam to, tiwya anu kro bno ye. Tna ati reto bo mafa wanu to mnan anya msya bo mafa raa ro tabam refo roto beta ye. Tna Allah kmo ana weto yawe meen yno bo ro samyoh btek mai kʼana to. ⁴He anu mfe! Allah yse boatmof wAit msis tna Ait yhafri anu toni syok. ⁵Tiwya anu ja biwer watum rAit tibyo bhai sai nkri-kri to, Allah yoo anu yno anu brok baam bsya Kristus su. (Boatmof rAit oh mi Ait yoo riof yee kʼanu oh to!) ⁶Tna Allah ymat anu bsya Kristus su tibyo Allah tubat anu bsya Kristus su tna yse anu hre mam sawro rAit bsya Kristus su ye. ⁷Allah ymat anu bsya Kristus su tibyo yatmof anu feto. Boatmof ro tiwya Allah yatmof anu weto to, mafer rau ro tis to, mfi bo kta ro mabyoh miwer kta roto beta. Ait yatmof anu feto afo re mam makyon ro meen mama to, kbe Ait yerif boatmof rAit weto kʼraa. Kbe ana mhar mawe Allah yhaf moof ymat anu to. ⁸Jõ tawe u tawe, anu smot Kristus tibyo Allah yatmof anu yoo riof yee kʼanu. Bo weto to, anu nesait nno fee. Bo weto to, tiwya Allah yuumto kʼanu sai. ⁹Anu raa besait bkah bo re bisoh biranya bsya Allah meto fee. Ait yatmof raa sai. Ait yesait yno feto re kbe raa safuk ana fee. ¹⁰Allah oh mi ysair anu to, Ait oh mi ymat bo ro Yesus yno tibyo yno anu brok raa ro tna. Allah yno anu brok raa ro tna feto, afo re mfo refo, mam tabam refo fares to, kbe anu ja bhau bno bo moof ro tiwya Ait saim kʼanu sait-sait bno.

Mfo refo raa ro Yahudi fee miranya msya raa ro Yahudi

¹¹Feto to, sorni bo ro kbe tkyas fo ma! Anu to, nbam raa mana ro Yahudi fee. Tna anu nma nkro Kristus oh. Ana ro mbam raa mana ro Yahudi to, ja santri bo msya anu. Bo mafa rana raa mana ro Yahudi to, ja ana mkom tohmi (sunat). Sunat tibyo safuk ana mawe ana to raa ro Allah wAit. (He mfe, bo reto to, ja raa mno mkah matem sai. Bo ro tabam sai meto.) Tna anu, ro ja wase agama rana ro Yahudi to, ja wase sunat feto. Tiwya fnya mabe anu to, anu nsya nme beta to raa ro Yahudi fee ye. Tibyo ana ro fnya mabe mamo raa ro Yahudi to, ja mtu ee anu mawe, “Anu raa ro wase bo sunat sai meto.” ¹²Anu to, nbam raa mana ro Yahudi fee. Ti tiwya weto to, anu beta nhau nsya Kristus su fefares. Tna ti weto to, Allah ymat anu yawe anu nhau nsya raa mana rAit ro Yahudi2:12 Alkitab mawe, ‘kewargaan Israel’. Mam far-far wefo fo, ‘Israel’ msya ‘Yahudi’ mnan anya sai. fee ye. Mfi bo raa ro srim, anu nwase bo ro tiwya Allah ysi kʼana ro Yahudi ye. Tiwya Ait ysi yawe, Ait kbe ybis Raa ro yase sait yama yoo riof ro mase yee kʼraa to. Tna ti weto ye to, anu nhau mam tabam refo to, tna nwase Allah fares tna wase bo ninaut riof ro mase ye. ¹³Menohe mfo refo, Allah yoo anu yakah yama yse kene kʼAit. Tiwya anu nhau fari menohe Allah ymat mees ro Yesus Kristus, tibyo yoo anu feto. ^14-15Tiwya anu ro wase agama Yahudi nhau hayah tna amu ro tiwya kro agama Yahudi nhau hayah ye. Ti reto to, Watum ro Musa mros mbetwat wa mfi bo tembok maboh sau mros masuf. Mbetwat wa re kbe anu biranya su fee. Tiwya amu nbo Watum reto matak. Tibyo amu kmo anu ro wase Watum reto. Menohe ati ro Kristus yamaʼt tabam refo tna yajat to, Ait yihabah tembok reto matu makus. Watum makin ro tiwya Allah yoo yee kʼMusa to, mbo raa u fee. Yesus yesait oh mi yno mkbair ewok weto mrok miranya. Ait ysair mkbair ro tna sau oh meto. Mam mkbair reto to, amu raa ro Yahudi nsya anu raa ro Yahudi fee ja bhau biranya su. Raa mkbair ewok ro tiwya mhau hayah weto to, Allah yoo ytan su mam raa mkbair ro tna sau. ¹⁶Ara warok ro Yesus oh mi misoh raa mkbair ewok weto re mamo yetsu rAit sau tibyo mkbair ewok weto mhau miranya su. Mkbair ewok weto kmo anya u fee. Tna anu ro bhau mam Ait yetsu sau reto su to, ara warok reto oh mi misoh iranya ranu bsya Allah ye.

¹⁷“Ait yama ykyas iso ro raa mrok miranya msya Allah. Anu to, nbam raa mana ro Yahudi fee. Tna Ait ykyas iso reto kʼanu ro tiwya nhau fari wase bo ro Allah ye. Tna Ait ykyas iso reto kʼana raa mana ro Yahudi ye, ana ro tiwya mhau kene mhar bo ro Allah baro to.”

Yesaya 57:19

¹⁸Yesus oh mi anu mkbair ewok mkai Har ro Tuhan sau reto su. Tibyo anu btai bros bkyas bo bsya Bja ranu yesait ye. ¹⁹Feto to, anu to raa ro srim u fee. Tna anu to raa ro mne u fee ye. Menohe anu nmo raa mana sau nsya raa ro Allah wAit. Nmo kukek wAit oh meto. ²⁰Anu weto su to, nmo amah ro bi Ait sgi. Tna raabis (rasul) wAit msya nabi ro Ait ybis mkyas bo wAit to, mamo sankaf wau. Tna Kristus Yesus yesait yamo sankaf ro matak toni miwer sankaf roto beta to. ²¹Allah ymat raa ro mhau msya Kristus su, yoo ana weto su sgi amah rAit reto kri-kri fares. Sgi maut maut feto mamo amah sau ro Tuhan yhau ybo ana to. ²²Tna anu ye. Anu nhau nsya Kristus su, tibyo Allah yoo anu sgi amah rAit reto ye. Tna Ait yhau mam amah reto mkah Har rAit.

Bo ro tiwya anu raa wase

¹Tiwya raa mfot jõ, Paulus, tna makah mamo mse jõ mam bui to. Anu to, nbam raa mana ro Yahudi fee. Yesus Kristus ybo jõ, tibyo tamo tkyas Ait yasom kʼanu. Tibyo raa mfot jõ to. ²Anu nri he Allah ysok jõ re takah boatmof (anugerah) rAit tamo tsan kʼanu. ³Tiwya raa wase boatmof reto. Menohe Allah betoo bo reto kʼjõ. Riwai tkom tkyas boatmof reto kebet. ⁴Tna anu nbaca bokom reto tibyo ntai nhar bo ro Allah betoo kʼjõ reto. Kristus oh mi anu tiwya wase tait. ⁵Tiwya anu raa hohos na wanu to, Allah betoo bo reto kʼana fee. Menohe mfo refo, Ait yoo Har rAit betoo bo reto kʼanu raabis wAit (rasul). Tna Ait betoo bo reto kʼnabi wAit ye. ⁶Ait betoo kʼamu yawe, raa awya sai ro smot Bokyas Moof ro Yesus to, kbe bi Ait ymat anu yawe anu bhau bsya Kristus su to. Raa ro Yahudi ye msya raa ro Yahudi fee ye to, kbe Ait yatmof anu beta su. Tna anu bnah su mam Kristus yetsu ye. Tna mkbair ewok weto su to, kbe anu bkai riof mase ro tiwya Allah ysi kʼraa wAit to ye.

⁷Allah yoo boatmof (anugerah) rAit baro ysan kʼjõ re tamo raa ro ja takah Bokyas Moof reto tkyas. Tamo tkyas to, Ait yoo yatak rAit yee kʼjõ ye. ⁸Anu raa ro Allah wAit to, tnaut tawe jõ fi thau mte toni. He mfe, Ait yoo boatmof reto saim kʼjõ re tamo tkyas kta reto kʼanu. Anu to raa ro Yahudi fee. Anu ro bhau bsya Kristus su to, kta ro anu bkai to, msis miwer. Anu raa btai ntuu mabyoh rau fee ye. ⁹Tna Allah ro ysair bombra beta tait, ysaim re jõ tasbrah maja rAit reto. Maja rAit reto to, maban tiwya tinyi Ait ymyõt re raa wase. Tna maja rAit reto oh mefo: Kristus yama siwyan iso re kbe mfo refo to, raa awya ro smot Ait to, kbe mkai riof ro mase. Raa mana ro Yahudi fee ye msya raa mana ro Yahudi ye. ¹⁰Ait saim feto afo re mfo refo kabes sor msya malaikat sor, aban mana wana msya raa mase wana ro mhau mam sawro to, kbe ana mmat sas raa mkbair ro kro Yesus. Ana mmat sas anu feto, tibyo mhar mawe Allah yakit maan saim bo ro moof aro rau-rau. ¹¹Allah saim maja reto yawe mhau yum maban tiwya tinyi mamo snok mam hame wajin. Tna Ait yoo Yesus KristusTuhan ranu to, yno maja rAit reto mabo. ¹²Anu smot Yesus tibyo Allah ymat anu su bsya Ait oh mi anu btai bros bkyas bo kʼAllah tna waa Ait fee. ¹³Feto to, anu nri jõ thau mam bui to, jõ tayoh re anu nsraujin toni to ma. Tis rau to, kbe Allah yse mafer ro msai kʼanu to.

¹⁴Reto oh mi jõ taka tjit timna hartu Bja ranu. ¹⁵Raa mana ro mhau mam tabam refo msya raa mana ro mhau mam uu to ye, Ait yamo Yaja yafan ana sau-sau beta. ¹⁶Ait yse kta wAit ro msai toni. Tibyo jõ skabuk kʼAit tayoh re yoo yatak rAit baro yee kʼHar rAit mbo mam kʼanu nhaf mato re anu nros ntak. ¹⁷Au oh mi anu smot Kristus oh tibyo jõ tayoh re Allah yse Kristus yjin mam kʼanu nhaf wanu meto. Tna jõ tayoh kʼAllah re kbe anu nbo boatmof matak toni ye mfi bo amah sau mros abyõ mam sankaf wau ye tna ara mtis ja mno re ara matu fee ye. ¹⁸Anu nbo boatmof matak feto to, kbe anu nsya raa wAit beta to, ntai nhar boatmof ro Kristus kaket. Kbe anu nnit boatmof rAit reto, nwe miyõ wer tna maboh wer ye tna mase wer ye bo. ¹⁹Anu raa btak bhar boatmof rAit beta fefares. Menohe tayoh re Allah yno anu nhar boatmof reto kaket baro naut. Tna jõ tayoh re Allah yoo yhaf rAit yfau mam kʼanu nhaf mato ye snok anu nhaf mrok sau su msya Ait yhaf rAit ro matot toni.

²⁰Tna nma anu bibi Allah! Bonaut wanu msya bo ro ja anu byoh kʼAit beta to, kbet aran. Tna Ait yatak rAit ro yse kʼanu to, ytai ybo yno bo miwer bo weto toni. ²¹Anu bmat Kristus Yesus ysya raa mkbair wAit to, bwe bibi Allah bwe bo yase wAit to msai toni. Bwe feto to, maban tiwya tinyi mamo snok mam hame wajin. Amin: Mabo oh!

Nno re anu nhau nhaf sau su

¹Jõ kro Tuhan oh mi raa mfot jõ mse hre mam bui fo. Tna tiwya Allah ytu anu re nma nkro iso ro Tuhan ye. Tna anu bnaut bo ro riwai tkom beta to, jõ sobu anu nsen nno bo ro moof mnan fi anu nkro iso rAit meto. ²Bo bawya ro anu nno nkro iso rAit to, yok-yok anu to ma, nhau nhaf sneh sai. Tna nbi-ba to ma. Natmof raa anya tibyo kanyin anya ye. ³Ja Har ro Tuhan mno anu nhau nhaf sau su. Nhau mur-mur noo iranya ranu nke anu beta su re anu nhau nhaf sau, srau sau feto. Nhau mur-mur nisoh anu su feto kaket! ⁴Anu beta ro smot Yesus bmo yetsu rAit sau aran sai. Tna Har ro Tuhan to, sau aran ye. Tiwya Allah ytu anu nmo raa wAit tibyo sawro ro anu ninaut to sau aran ye. Feto to, nhau nhaf sau su to. ⁵Tuhan ranu sait aran ye. Bosmot ranu sau aran ye. Tna anu baptis raa re betoo bo sau aran ye. Feto to, nhau nhaf sau su to ye. ⁶Allah ranu tait, anu beta Bja ranu tait, sait aran ye. Ait yesait ybo anu beta. Ait yesait yoo anu beta re ybo anu yno bo wAit. Tna Ait yesait yjin mam kʼanu bhaf beta ye. ⁷Tna Kristus yoo yatak rAit baro saim kʼanu sait-sait. Bouum (anugerah) weto to, Kristus ynit kaket. ⁸Tiwya Allah ykyas bouum weto mam Bokom rAit yawe,

“Ait yfot raa byoh msis-sas yakah yamo. Ati ro Ait yaut yamoʼt abyõ to, Ait yakah ana weto yamo ye. Tna Ait saim bouum kʼraa.”

Mazmur 68:19

⁹Bokom reto, mabuf rau mawe, “Ait yaut yamoʼt abyõ.” Maja rau mawe, Yesus yroh yamoʼt tabam refo mato ti no ye. ¹⁰Ait ro yroh yesait oh mi Ait ro yaut yamoʼt abyõ yiwer bo beta. Tibyo Ait hre abyõ ybo bombra beta ye. ¹¹Ait ro ja saim bouum kʼraa tait oh mi yoo raa weto baro ysan mamo raabis ro Allah (rasul), taro mamo nabi ro ja Allah ybis mamo mkyas bo wAit, taro ja masen mamo mkyas Ait yasom rAit kʼraa ro wase Ait fares, taro mhau kmot jemaat mkyas watum ro Allah kʼana bo. ¹²Ait ybis ana mama mkyas Watum rAit kʼanu raa wAit makin afo re anu siwyan bban anya bisoh anya bo. Ait ksoh anu tomer bban anya re kbe anu bfen anu su matak bmo yetsu ro Kristus rAit su. ¹³Ana watum kʼanu bo feto, mno yum mamo snok mam tis rau. Tis rau oh mi kbe anu beta brok bhaf sau su, bbo bosmot ranu sau aran sai to. Tna kbe anu bhar ku ro Allah yare kaket su to. Au oh mi anu beta bmo Ait yetsu tna Ait yetsu mo mamo raa meto. Anu mkbair rAit kbe mo maut renti snok mase rau, mnan fi Ait yase rAit. ¹⁴Anu bmo yetsu rAit feto oh mi anu bfi kukek kinyah aro u fee. Wore wo raa mama mawe besruf anu to, kbe anu bbo watum ro Allah matak. Bri ana fee saut! Raa taro to, kbe mkyas watum rana ro sre to, saim miwro anu, sioh anu bo feto. He mfe, kbe anu bros btak su. Wore wo figyõm weto mai kʼanu msya foos mfi mai kʼanu to, kbe anu bnaut bo weto mamo-me fee ye. Kbe bros btak bhar Yesus kaket su yum. ¹⁵Tna anu bsait to, besruf anya to ma. Menohe anu bwe bhaf moof kʼanya to, bkyas bokyas ro ati kʼanya. Bkyas bokyas ro ati kʼanya feto oh mi kbe anu bmo Kristus yetsu rAit ro mo maut kaket moof to. Tna bo ro anu bno beta to, kbe anu bwe bno mnan fi Ait ksoh rAit. Nnaut nwe anu raa wAit bnan yetsu rAit to. Tna Ait tait yamo yetsu rAit mana to. ¹⁶Ja Ait yoo anu raa wAit sait-sait yfen yetsu rAit kaket. Ait yse anu kaket, yake anu su kaket ye. Yake anu su feto afo re kbe anu bhaf moof kʼanya, tibyo bisoh yetsu rAit kaket ye. Anu bisoh anya to, anu bno mkah tak ro Ait yoo saim kʼanu sait-sait oh. Tibyo kbe yetsu rAit moo kaket moof to.

Iso ro tabam refo hayah tna iso ranu ro tna to hayah ye

¹⁷Feto to, jõ takah tak ro Tuhan sobu anu tawe, anu nkro iso ro ja ana ro wase Allah nkro to aro u ma. Ana mamo to, srau wana ja mnaut-nat bo ro mafer marak sai. ¹⁸Mhaf srau wana weto to, mhau mam wore wo mamur sai. Ana wase bo tna mana matak mari bo fee, tibyo mhau fari mne. Allah yoo yamos rAit yee kʼana fee. ¹⁹Bo ro mti hrenaut to, ana mberoh mno sai. Ana srau oot-oot bo, mhai bo moo bo to, tibyo mno bo ro mkair-kar makin. ²⁰Menohe anu ro nkro Kristus to, ja nkro iso rAit ro hayah. Iso ro tiwya raa merif kʼanu reto to, ja anu nkro nno bo mkair-kar weto u fee. ²¹Bo maja wAit to, bo ro ati beta. Tna anu nri bo maja wAit weto oh. Anu nmo raa wAit tna bo maja weto to, raa mbetoo kʼanu oh. ²²Ana merif kʼanu mawe, iso ro mnis, iso ro tiwya anu nkro to, ntomer re nkro iso reto u ma. Raa ja mrus ratan ro mnis tna beak makus to. Tawe sikba iso reto makus feto ye. Nkro iso ro wia reto u ma. Iso ro tiwya anu nkro reto to, ja anu srau oot-oot bo, tna srau wanu sioh anu re srau nhaf mrok mnis riryõn. ²³Menohe anu nsrau msya nhaf to, nhau re kbe Allah yisoh yisoh moof tna to. ²⁴Tna Allah ysair iso ro tna sau. Iso ro tna reto to: Yawe anu nno bo moof kʼanya mkah sioh aro fee. Tna ja anu nhau nno bo wAit sai mkah sioh aro fee ye. Anu nkro iso ro tna refo, tibyo anu nsrau nsya nhaf haberek moof mamyot srau yhaf rAit. Reto mfi anu noo ratan ro moof to, nyum. Nmat iso ro tna refo tna nkro ye.

²⁵Anu nkro iso ro tna reto to, anu nhau mam Kristus yetsu rAit sau aran. Feto to, sioh anya u ma. Nkyas bo kʼanya to, nkyas bo ro mabo sai. ²⁶Ati ro anu nrok kmo to, kmo anya kait ma be kbe nno iro. Nkmo anya to, nkmo maban rabu snok mti to ma. Nisoh niranya ranu fooh sai. ²⁷Nno feto be kbe kabes yabi (Iblis) yno anu. ²⁸Anu aro ro tiwya nsyõf bo to, nsyõf bo aro u ma. Menohe ro moof to, nsen nmo nkah bo hrowyõ mkah ntem wanu. Tibyo mafer to, kbe nse mnan mkah noo baro saim kʼraa ro yu marak ye. ²⁹Tna anu nkyas bo kʼraa awya sai to, mai ro mafer marak to, nkyas ma! Menohe nmat ana ro kbe mari bo ro anu nkyas wia to, nkyas bo ro kbe mafer moof kʼana sai. ³⁰Nkaket nasoh feto be kbe Har ro Allah mrok sraujin! Ait yoo Har rAit yse kʼanu re kbe anu nesait nhar nwe anu nmo raa wAit mamo snok mam makyon tis rau. Tna mam makyon tis rau reto to, kbe Ait yfes anu to. ³¹Nhaf kek kʼraa to ma! Nhaf safo kʼraa to ma! Nkmo raa to ma! Nmai nsya raa to ma! Nmus raa to ma! Bo ro mkair-kar mfi feto to, noo nbeak makus beta. ³²Menohe nhau nhaf moof kʼanya sai. Tna nhau nhaf ase kʼanya ye. Tiwya Allah ymat anu yawe anu nsya Kristus su, tibyo yyon iro wanu. Allah yatmof anu feto to, ati ro raa mno bo mai kʼanu to, natmof ana mfi feto ye.

Nkro iso ro maah

¹Mfi bo ku yaku sait ro yaja hasu tait, ja kbe ku retait ymat sas bo ro yaja yno tibyo yawe kro yno ye. Anu to, kukek ro Allah wAit to, feto to, bo bawya ro Allah ja yno to, tomer nkro nno ye. ²Nhau to, natmof raa anya. Nno mnan fi Kristus tiwya yatmof anu to. Ait ymat anu tibyo yoo yetsu rAit ysan kʼAllah. Tna Allah ksoh bo ro Kristus yno reto. Tiwya raa makah kak bo to, mamo ktan tna mko msan kʼAllah mam wohat (mezbah) sau. Mko kak tna Allah yari sawer rau yawe yhaf mnan to. Kristus ysan Ait yetsu kʼAllah feto ye. Tibyo Allah yhaf mnan bosan ro Yesus ysan reto ye. ³Tna anu raa ro Allah wAit to, anu nhau nno bo ro mkair-kar u to ma. Nus-as bo to ma. Nhau nhaf mato mboh sai. Tna nhai bo raa noo to ma. Ro moof mam mkbair ranu to, kbe anu nkyas safo weto u fee. Safo weto mhau marak beta! ⁴Tna nkyas bo kʼanya to, nkyas bo ro nasoh mkair-kar to ma, sioh-sah sai to ma, nkyas bosret ma. Bo weto to, mamo mamyot bo mafa ramu fee. Ro moof to, nwe asik mawat kʼAllah. ⁵Bo sau ro anu nhar oh to: Ana ro maus-as bo, ana ro mato mboh fee, msya ana ro mhai bo raa moo to, ana weto sor to, mhaf saso bo ro tabam sai meto. Ana to, mfi raa ro ja smot fraa sai meto. Kbe ana beta mkai sawro ro Allah fee. Ati ro Kristus ysya Allah mbewok mamo Raja mbo raa wana to, kbe ana mbewok muumto bo kʼana ro ja mno bo mkair-kar weto to aro fee. ⁶Raa mkbair ro hawe mari bo ro Allah yawe, tibyo mno bo mkair-kar weto to, Allah kmo ana. Tna Allah kbe yoo safo mana ymit kʼana weto. Feto to, ati ro raa mama besruf anu mawe bo ro mkair weto bo moof to, nri ana to ma! Sioh sai meto! ⁷Berur su nsya ana weto to ma! ⁸Tiwya anu nhau mam wore wo mamur. Menohe mfo refo anu nberur su nsya Kristus tibyo nhau mam wore wo maah. Raa mkbair ro mhau mam wore wo maah to, ja mno bo ro moof. Feto to, ntomer re nkro iso ro moof reto ye. ⁹(Nhau mam wore wo maah to, tis rau to, kbe anu nno bo ro moof, kbe anu ja nno bo ro Allah ksoh, tna kbe anu nhau nhaf ntrot ye.) ¹⁰Tna ntomer saso bo ro mno Tuhan yhaf mnan to. ¹¹Tna ana ro mhau mam wore wo mamur fares to, ja mno bo ro mafer marak. Nsya ana nno bo mkair weto u ma! Menohe nros hayah tna nitras bo ro ana mno weto. ¹²Bo mkair ro ja ana mno wai weto to, soh anu nkyas bo mfi weto sai to, kbe mti hrenaut kʼanu. ¹³Menohe bo beta ro kek mama mram nkri-kri to, kbe raa mmat kaket. ¹⁴Reto oh mi raa mkyas mawe, “Anu ro njin to, nrok nsen! Anu ro naam fefares to, nsen tibyo kbe Kristus yram anu!” ¹⁵Feto to, iso ro anu nkro to, nmat sas wia kaket. Nhau nsrau miyõ. Nsrau mabuf to ma! ¹⁶Wore wefo fo wore wo kair mawat. Feto to, ayõ ro nhau fares fo, nbo somya kaket re mafer moof toni. ¹⁷Anu nbo anu nmo kaket feto to, namboi ma! Menohe iso ro Tuhan yhaf ksoh anu nkro to, ntomer re nhar kaket! ¹⁸Nta jyõ anggur bisir to ma! Raa ro bisir to, ja mno bo kbik-kbak sai. Menohe ro moof to, Har ro Tuhan mbo anu nsrau nhaf beta matak. ¹⁹Har ro Tuhan mbo anu feto to, anu nhre su nkyas bo kʼanya to, kbe anu bibi Tuhan mkah Mazmur, mkah howes ro mbibi Ait, mkah bobaut bo to. Tna mam kʼanu nhaf mato to, nji howes kʼAit yari tna bibi Ait ye. ²⁰Yesus Kristus yamo Tuhan ybo anu. Tibyo bo bawya ro anu nkai to, nwe asik mase kʼanu Nja Allah yoyo sai. ²¹Tna Har ro Tuhan mbo anu feto to, kbe anu waa Kristus tibyo nhaf sneh hre mte nri bo raa anya mawe ye.

Raa sme msya mfain

²²Anu fnya ro nsya raa oh to, nri bo ro anu naa mawe. Nri nbo nno mfi bo ja raa mari bo ro Tuhan yawe mbo mno ye. ²³Raa sme mamo aban mana mbo ana mfain wana. Mfi bo Kristus yamo aban mana ybo raa mkbair ro kro Ait. Tna Ait sotak iro wanu ro bhau mam Ait yetsu ye. ²⁴Tna mfi bo raa mkbair ro nkro Kristus ja mari bo ro Ait yawe to, feto ye, kbe fnya mari bo beta ro ana maa mawe kʼana mbo mno feto ye. ²⁵Tna anu raa sme ro noo fnya oh to, natmof anu nfain wanu. Natmof ana mnan si tiwya Kristus yatmof anu raa mkbair ro nkro Ait. Ait yoo Ait ysan mkah anu. ²⁶Ait ysan Ait feto re kbe yoo raa mkbair rAit ysan kʼAllah ybo. Ait yyon anu wia, raa baptis anu tna watum ro Tuhan misoh anu ye. Au oh mi Ait yoo anu bmo raa ro Allah wAit feto. ²⁷Ait yisoh anu feto afo re meen ati ro Ait yroh yama u to, kbe raa mkbair rAit siwyan mkah Ait yoo kʼAit. Mfi bo fnya ro ait sait siwyan yoo kbe mfayir au moof syok mfi bo fnya-fain fares tna metsu rau to bo ro mkair aro mhau fee ye. Mfi feto kbe Kristus fayir anu ye. Kbe Ait yno anu bhau bno bo ro Allah wAit sai. Tna kbe anu bmo raa ro ja wase bber safo fee ye. ²⁸Anu raa sme nno mfi feto ye. Tawe kʼanu tawe, anu sait-sait tomer natmof anu nfain ranu mnan si ja anu natmof anu netsu ye. Ait ro yatmof yfain to, yatmof ait yesait oh meto. ²⁹Raa sait bo ja knait ait yetsu rait ai fee saut. Raa to, ja kaket metsu rana, saso boit kaket, moo ratan ro moof miyum bo to. Raa ja kaket metsu rana mfi bo Kristus ja kaket raa mkbair rAit. ³⁰Anu to, Ait yetsu haber na. Tibyo Ait ja kaket anu. ³¹Watum ro Allah mawe,

“Feto to, kbe ku ro sme sikba yaja ysya yme na tna yamo ysya yfain rait mhau su. Tibyo ana mbewok to makit sau su, srau sau su tna bonaut wana mbewok to mnan anya ye.”

Kejadian 2:24

³²Watum reto to, maja rau ro ati sau to, tiwya raa wase. Jõ tkyas Kristus ysya raa mkbair rAit oh meto. ³³Menohe anu raa sme sait-sait to, ntomer re natmof nfain ranu mnan si anu ja natmof anu netsu ai. Tna anu fnya sau-sau to, ntomer re waa naa to ye.

Kukek msya maja mme na

¹Tna anu ro nkek fares to, ro Tuhan ybo to; nri bo ro nja nme na mawe tna nbo nno. Nno feto to, nno bo ro moof mnan si meto. ²Watum tinyi ro Allah ysi yawe kbe mafer moof to, yawe feto ye yawe,

“Nmat nja msya nme na to kaket! ³Nmat ana feto re kbe anu nhau noof tna nmos miyõ mam tabam refo ye.”

Ulangan 5:16

⁴Tna kukek maja to; nno re kukek wanu mrok kmo to ma be kbe tis rau to ana hawe mari anu u. Menohe ntos ana kaket! Nisoh ana tna watum ana mamyot iso ro Tuhan ksoh to. ⁵Tna anu ro sryan boh to; ana ro mbis anu mam tabam refo to, nri bo ro ana mawe to, nbo nno beta. Nhau nhaf ntrot waa tna ntetet ana ro mbis anu. Nri ana mfi Kristus yesait oh mi ybis anu to. ⁶Nri ana to, nno re kbe ana mbibi anu sai to ma! Nno bo nhaf ewok feto to ma. Nnaut nwe anu nmo sryan boh ro Kristus wAit ye. Nri bo ro bobot wanu mawe to, nbo nno mkah nhaf sau. Feto oh mi anu mur-mur nno bo ro Allah ksoh to. ⁷Nri bobot wanu kaket to, nno mfi anu nri raa sai to fee. Nhaf reo nri ana to, mfi bo anu nri bo ro Tuhan yawe nbo nno to. ⁸Anu ro sryan ye nsya anu ro sryan fee ye to; anu nhar oh nwe bo moof bawya sai ro anu nno to, meen kbe Tuhan yisroh kʼanu. ⁹Tna anu bobot ro nbo sryan boh to; nno bo ro moof kʼsryan boh wanu mfi feto ye. Tna nmus sryan wanu to ma. Anu nhar oh nwe bi ro uu yase ybo ana weto ye, tna ybo anu ye. Tna ja Ait ysok raa sait yawe yase tna sait yawe yaku to fee. Ymat anu beta yawe nnan anya beta.

Bo ro Allah yoo yee yban anu

¹⁰Tna bo ro jõ tkyas tis oh mefo, Tuhan yatak rAit to matak toni. Anu nhau su nsya Ait oh. Feto to, noo yatak rAit nbo re kbe anu nros ntak smot Ait ye. ¹¹Kabes yabi (Iblis) ja yama yawe besruf anu. Feto to, noo bombra ro Allah siwyan kʼanu to, nbo re ntai nros ntak nno wa kabes retait. ¹²Byoh ro mhoh mama mafa msya anu to, raa sei fee. Byoh wanu to, kabes makin sor. Ana to, kabes mase ye, aban mana wana ye, kabes ro matak mbo tabam refo tna misti wore wo mamur refo ye, tna msya kabes ro mhoh mam ayoh mno bo ro mkair-kar ye. ¹³Feto to, noo sbe, karef bo bombra ro Allah siwyan kʼanu to, re ntak nfa nsya kabes to. Noo beta siwyan nbo wia. Feto oh mi anu ntai nno wa kabes tna nros matak mam ati ro kair mama mai kʼanu to. ¹⁴Feto to, nros matak: Siwyan anu wia mfi bo raa sbe ro mamo mafa anya to, ja siwyan ana wia ye. Raa sbe ja mkyar hotom re siwyan mafa to. Siwyan anu feto ye: Nhau nkyas bo ro ati sai tna sioh-sah raa anya to ma! Tna mfi bo ana ro sbe ja moo bo mse kmot matmato to, nhau nno bo ro Allah ksoh sai. ¹⁵Tna ja ana moo sepatu ro matak mse mam maa wana. Mfi feto, Bokyas Moof ro mno anu nrok niranya nsya Allah to, noo nbo matak re siwyan anu kaket ye. ¹⁶Tna msya bo ro riwai weto, raa sbe ja moo perisai mbo mban ana. Mfi feto, nbo bosmot wanu kaket re nban anu nno wa karef ro kabes yabi (Iblis). Karef weto to, mfi bo yse tafoh ro mait mam karef maan tna ynak anu to. Kabes yabi tait ja yetsu mnis safo. ¹⁷Tna raa sbe ja moo helem sbyo mana wa to. Mfi feto, noo riof mase ro Tuhan yoo yee kʼanu nbo ye. Tna Har ro Tuhan siwyan pedang kʼanu to ye. Watum ro Allah oh meto. ¹⁸Tna Har ro Tuhan kbe matam anu re anu skabuk nkyas bo kʼAllah kaket yoyo. Skabuk to, skabuk bo aro rau-rau tna nyoh re Ait yban anu mam bo ro anu nno beta to ye. Skabuk to, hre byõ abyõ re bito skabuk raa ro Allah wAit beta ye. ¹⁹Tna skabuk jõ ye re kbe ati ro jõ tkyas bo kʼraa to, kbe Allah yoo bo ro tkyas yerif kʼjõ wia. Tna re kbe jõ tros tkyas Bokyas ro Moof reto to, jõ waa fee. Bokyas reto tiwya raa wase, tna tros betoo kʼraa to. ²⁰Tiwya Allah ysok jõ ybis yawe tamo tkyas Bokyas Moof reto. Au oh mi raa mfot jõ moo rantai make tna mse mam bui fo. Feto to, skabuk jõ re kbe jõ tros tatak tkyas Bokyas reto fares tna waa fee. Re kbe tno bo ro tiwya Allah ybis jõ tno meto.

Paulus ykyas bi Tikhikus tna skabuk ana

²¹Bi Tikhikus tait, raa ranu sait ro amu nhafri tait, ait yamo sryan Tuhan ro mur-mur yno bo ro Tuhan ye. Ati ro ait yamo yo kʼanu to, kbe ait ykyas bo ro jõ tkai mam wefo msya wore wo jõ thau fo kʼanu. Kbe ykyas bo weto beta kʼanu. ²²Au oh mi jõ tbis ait yamo yo kʼanu. Yamo re kbe anu nhar bo wamu. Tna kbe ait ykyas bo moof kʼanu afo re anu sorni bo mkair ro mai kʼanu ye. ²³Anu ro ja kro Kristus to, Jõ skabuk Bja Allah, re Ait ysya Tuhan Yesus Kristus kbe mno re anu nhau nhaf tnok sai. Tna jõ tayoh kʼAllah re kbe anu natmof anya kaket tna kbe anu nhau smot Ait kaket ye. ²⁴Tna anu ro nhafri Tuhan ranu Yesus Kristus yum to, jõ tayoh re Allah yatmof anu beta ye.