Kolose

Aam ro Paulus Ykom tna Tiim Mamoʼt Jemaat ro

Kolose

Paulus ymah meen kʼraa ro smot Yesus mam kota ro Kolose

¹Aam refo mbam kʼjõ, Paulus tsya anu bao Timotius. Allah ksoh tibyo jõ tamo raabis (rasul) ro Kristus Yesus rAit. ²Amu mbewok nkom aam refo kʼanu raa ro Allah wAit mam kota ro Kolose. Anu to, beroh smot Kristus tna Allah yse anu nmo raa wAit nsya Kristus Yesus su ye. Amu skabuk Bja Allah, re Ait kbe yatmof anu tna yno re anu nhau nhaf tnok sai.

Raa ro Kolose smot Kristus tibyo Paulus yayoh asik mase kʼAllah

^3,4Raa mkyas anu kʼamu nri mawe anu smot Yesus Kristus matak. Tna raa ro Allah wAit beta to, ja anu natmof ana beta kaket ye. Amu nri bo ro anu nno weto, tibyo amu skabuk anu to, ja amu nyoh asik mase kʼAllah yoyo. Tuhan ranu Yesus Kristus tait, ytu Allah Yaja rAit. ⁵Watum ro ati to, Bokyas Moof ro Yesus (Injil) to, tiwya raa mkyas kʼanu nri. Anu nri tna ninaut nwe meen anu nkai bo ro Allah siwyan kʼanu yse mam sawro rAit. Anu ninaut tna ste bo ro yse mam sawro rAit weto, tibyo anu smot Ait matak. Tna anu ninaut bo weto tibyo natmof anya kaket feto ye. ⁶Tiwya tinyi anu nri Bokyas Moof reto tibyo nhar nwe boatmof ro Allah to bo mabo. Maban tinyi rau weto mamo snok mam mfo refo to, Bokyas Moof reto to, anu fri mafer mawat. Tna anu nkyas Bokyas Moof reto kʼraa roto renti ye. Tibyo ana fri mafer rau ye. Bokyas Moof reto mfi ara make sau ro mo maut tna make mawat. Tna mam woyõ-woya raa mkyas Bokyas Moof reto mam tabam refo beta to, raa mkai mafer rau tna mkyas renti mnan fi anu feto ye. ⁷Bi Epafras tait, ait ysya amu ja nkah bo ro Kristus su. Tna amu nhafri ait ye. Tiwya ait yamo ykyas Bokyas Moof reto kʼanu nri. Tna ait ja mur-mur yno bo ro Kristus ybis ait yno re anu fri mafer rau ye. ⁸Tna ait ykyas anu kʼamu yawe, ja Har ro Tuhan mno anu natmof anya ye.

⁹Feto to, maban tii tinyi Epafras ykyas anu kʼamu to, amu sorni anu fee. Amu skabuk anu tna nyoh re kbe Har ro Tuhan yno anu nsrau miyõ tna nkit maan ye. Re kbe anu nhar bo ro Ait ksoh anu nno to kaket. ¹⁰Amu nyoh bo weto re kbe anu nno bo ro moof mnan raa ro ja nkro iso ro Tuhan. Re kbe Ait yhaf mnan bo ro anu nno beta. Tna amu skabuk re kbe bo moof ro anu nno beta to, kbe raa fri mafer rau yoyo. Re kbe anu nhar Allah renti-renti naut. ¹¹Allah yatak rAit to msai toni. Amu nyoh re kbe Ait yoo yatak rAit reto yse kʼanu ye. Re kbe bo bawya ro btek mai kʼanu to, kbe anu beroh smot Ait tna nhau nhaf knar. ¹²Tna amu nyoh re kbe anu simaut mase nyoh asik mase kʼanu Bja ranu. Ait oh mi tubat anu yse nsya raa wAit. Anu to, Ait ysok yse hayah mam wore wo maah. Tna kbe Ait yuumto bouum baro kʼanu beta ye. ¹³Tiwya, kabes yabi (Iblis) ybo anu mam wore wo mamur. Tna Allah oh mi yisnok anu bbam wore wo mamur reto tna yse anu mam raa mana ro mfo refo Ku rAit yamo Raja ybo. Tna Ku rAit tait, Allah yhafri toni. ¹⁴Allah yoo Yesus yfes anu. Au oh mi iro ro anu bno to, Ait yyon beta.

Yesus yase ybo bosair wAit beta

¹⁵Allah tait, anu raa bmat bkah bsu fee. Menohe Yesus tait, raa mmat oh. Yesus yhaf srau rAit to merif Allah yhaf srau rAit kʼanu ye. Yesus tait, Kubum ro yhau abyõ ybo bosair wAit beta. ¹⁶Allah ybis Yesus ysair bombra beta. Bombra ro mhau mam sawro ye, bombra ro mhau mam tabam refo ye, bo ro ja raa mmat ye, bo ro ja raa mahni ye to, Yesus ysair beta. Bo ro ja anu bahni to: Kabes msya malaikat sor ye, aban mana wana ye, ro mase ye, bobot ye beta to. Yesus yesait ysair beta re kbe yesait fri mafer rau ye. ¹⁷Bombra weto beta marak fares to, Yesus yhau wia yatim oh. Tna Ait yno re bombra weto mhau muuf sai fares. Oos Ait maami bombra weto mbtek-tak makus sai. ¹⁸Raa ro smot Ait makin (jemaat) to mfi Ait yetsu rAit. Tna Ait yamo mana ybo Ait yetsu rAit reto ye. Ait oh mi ysair jemaat rAit tinyi to. Tna Ait ro tinyi yrok yasen. Allah yno feto, afo re Kristus yesait yrok yase yatim raa msya bombra beta. ¹⁹Tna bo yase ro Allah rAit msya bobot wAit beta to mhau mam Kristus. Allah ksoh yse bo yase rAit mam Kristus feto to. Tibyo Allah yse Kristus yamo yase yatim raa msya bombra beta to. ²⁰Raa mame Kristus yajat mam ara warok. Tna Allah yoo mees ro Kristus rAit reto yisoh iranya ro Allah ysya bombra beta. Bo ro mhau mam tabam refo ye msya bo ro mhau mam sawro ye to, Allah yoo mees ro Kristus yno Allah yrok yiranya ysya bo beta to. ²¹Tna anu to, tiwya anu nhau hayah mfi raa ro srim sai. Tna tiwya anu srau wanu to, ja mafa msya Allah tibyo nno bo ro mkair-kar. ²²Menohe mfo refo, Allah yisoh iranya ranu nsya Ait oh. Ati ro Kristus yhau mam tabam refo, raa mame Ait yetsu yajat. Ajat rAit oh mi misoh iranya ranu nsya Allah to. Tna yisoh iranya ranu afo re meen yse anu mam wore wo Allah yhau. Yse anu mam sawro rAit to, tna kbe ymat anu yawe anu to, raa wAit ro nhau nno bo wAit sai. Tna mam sawro rAit to, kbe Ait ymat anu yawe anu nfi raa ro wase mber safo to. Tna mam sawro rAit to, kbe raa maun boun anu aro u fee ye. ²³Menohe beroh nbo bosmot wanu kaket be kbe nkai iranya reto nsya Allah fee. Bito oh! Nros ntak. Bokyas Moof ro ja jõ, Paulus, tkyas to, Allah ybis jõ tamo tkyas. Tna Bokyas reto ja raa mkyas woyõ-woya mam tabam refo ye. Tna Bokyas Moof reto to, anu tiwya nri ye to, tibyo ninaut nwe meen kbe anu nkai roon ro hame wajin. Ninaut bo reto matak. Susu fari re sorni bo reto ma!

Bo ro Allah ybis Paulus yno

²⁴Tiwya Kristus yno bo ro mafer moof mkah anu bkin ro smot Ait. Anu weto to Ait yetsu rAit oh meto. Yno feto, tibyo bo ro samyoh mawat btek mai kʼAit. Tna mfo refo fo, jõ ye. Jõ tno bo ro mafer moof kʼanu, tibyo bo ro samyoh baro btek mai kʼjõ tetsu ye. Jõ tkai bo samyoh ro mabut fares weto baro to, jõ simaut mase. ²⁵Allah ysok jõ ybis re tamo sryan rAit. Tamo sryan rAit tno bo ro kbe mafer moof kʼanu raa wAit. Re kbe jõ tkyas watum rAit beta kʼanu. ²⁶Maban tiwya tinyi anu hohos na wanu wase watum wAit baro. Ait betoo watum weto kʼana fee. Ait ymyõt watum weto sai. Menohe mfo refo, Ait yasbrah watum weto kʼanu raa wAit to. ²⁷Anu raa ro Kolose to, nbam raa mana ro Yahudi fee. Tna Allah ksoh re anu nrok nhar mafer watum ro tiwya raa wase weto. Tna mafer watum reto to, mfi bo kta ro msai toni kʼanu. Kʼanu raa mana ro Yahudi fee.1:27 Raa ro Yahudi fee msya mafer ro ana fri refo fo, Paulus beto mam Efesus 3:1-9. Bo ro tiwya raa wase reto to, Kristus yhau mam kʼanu. Tibyo anu ninaut nwe meen kbe anu nkai bo yase rAit mam sawro rAit. ²⁸Kristus oh mi amu nkyas kʼraa. Allah yisoh amu nkit re maan toni. Tibyo amu nkyas Kristus to, amu bhah wa raa awya sai, tna amu betoo bo kʼraa awya sai kaket ye. Afo re meen raa awya sai ro mari bokyas ramu reto kbe siwyan moof kaket. Tna kbe Allah yoo ana ymat yawe ana msya Kristus su to mrok moof mnan si meto. ²⁹Tna jõ tomer siwyan raa feto to, Kristus yatam jõ yoo yatak rAit yee ybo jõ matak. Tna Ait yatak rAit to matak toni!

¹Tna jõ ksoh anu nhar nwe jõ safo tomer siwyan anu feto ye. Anu ro nhau mam Kolose ye, ana ro mhau mam Laodikia ye, msya raa wamu ro mkai jõ mam tabam refo fefares beta ye. ²Jõ tomer re kbe anu nros smot Yesus matak mam anu nhaf wanu. Kbe anu natmof raa anya tibyo nhau nhaf sau su. Mkah iso reto oh mi kbe anu nros smot Yesus matak to. Tna jõ tomer re kbe anu nhar Yesus kaket. Ait oh mi watum ro tiwya Allah ymyõt tibyo raa wase to. Tna soh anu raa wAit nhar bo wAit beta kaket to, tna nbo bohar ro ati weto matak to, kbe mfo refo bohar weto mse mafer kʼanu. Tna mafer rau msai mfi bo kta ro mabyoh maut toni. ³Allah yoo bohar msya watum ro mabyoh maut toni weto beta to yse ymyõt mam Yesus yesait sai. ⁴Jõ betoo bo refo kʼanu re kbe raa mama besruf anu ma. Ana mama to, kbe masoh moof re besruf anu. ⁵Mfo refo jõ tabo fo thau fari tsya anu. Menohe thaf ajõ fo mrat msya anu fares. Jõ thau to, tnaut anu yoyo. Jõ thau mam tefo to, jõ tari he anu ja nkro iso ro ntrot su tna anu ja smot Kristus matak ye. Tari feto, tibyo jõ simaut mase.

Nhau nkro Kristus mnan si

⁶Tiwya anu nkai Yesus Kristus tna nmen Ait yamo Tuhan ro yase ybo anu. Feto to, nhau nkro Ait kaket. ⁷Anu nkro Ait kaket to, anu nfi bo ara ro mtis rau ja mno re ara reto matu fee. Tna Yesus yfi bo tabam ro mbo mtis weto matak. Tna anu nfi bo amah sau ro raa sgi sgi matak abyõ tna Yesus yamo sankaf rau ye. Tiwya raa mkyas Yesus kʼanu. Ana betoo bosmot ranu to, maja rau kaket. Tawe nbo bosmot ranu reto matak re kbe anu nros ntak ye. Tna nayoh asik mase kʼAllah yoyo ye.

⁸Bo maja ro tabam refo hayah tna bo maja ro Kristus hayah ye. Bo maja ro tabam refo to, mafer marak tna miwro raa. Tna masmair rau to, mbam bo mafa raa sai tna mbam kabes sor ro mbo tabam refo ye. Masmair rau to mbam Kristus fee. Feto to, kmot anu wa, be kbe raa mama mkyas bo maja ro tabam refo tna mfot anu. ⁹Bo yase ro Allah rAit msya bobot wAit beta to, mhau mam Kristus yetsu yum. Au oh mi anu bbo bo maja wAit sai aran to. ¹⁰Tna Allah ymat anu nsya Kristus su, tibyo bo ro anu nnaut re nkro Ait to, mabut aro fee. Kristus hre abyõ ybo bombra beta. Tna kabes msya malaikat sor to msya aban mana ye mhau mte beta. ¹¹Tiwya raa sai moo matem wana tna mkom tohmi (sunat) anya. Menohe anu ro nhau su nsya Kristus to, Ait yisoh anu nhaf mato wanu. Bo ro mkair-kar ro tiwya mhau mam anu nhaf to, Ait sbi bo ro mkair-kar weto tna yoo beak makus oh. Sunat ro ja Kristus yno kʼanu raa wAit oh meto. ¹²Ati ro raa baptis anu to, Allah yoo anu tna kubur anu nsya Kristus su ye. Tna mam ati reto to, anu smot nwe Allah yatak yno Kristus yrok yasen oh. Tna Allah ymat bosmot wanu reto, tibyo Ait yno anu nrok nsen nsya Kristus su oh. ¹³Tiwya tinyi anu nhau nfi raa ro mhai sai beta. Bo ro niwer watum ro Allah msya nhaf mkair-kar ro Kristussunat fefares weto, oh mi misti re anu nhai beta to. Tiwya anu nhau nfi raa ro mhai sai nkri-kri to, Allah yoo anu yno anu nrok naam nsya Kristus su. Allah yyon iro ro tiwya anu bno biwer watum rAit beta, tibyo yno anu brok baam to. ¹⁴Safo ro anu sait-sait bber to, Allah ykom mam aam wanu sau-sau beta. Aam weto mko mawe anu hrat tuu oh. Tibyo anu biranya bsya Allah fee. Menohe Ait yatmof anu yoo aam weto yawe makus rof. Au oh mi Ait yoo aam weto tna paku mam ara warok ro Yesus. Mees ro Yesus oh mi make safo wanu raa bno to. ¹⁵Tna kabes sor msya aban mana wana beta to, Ait yoo matak wana beak makus sai. Tibyo kabes weto matak mbo anu u fee. Tna Kristus yerif ana kʼraa makin re raa makin mhar mawe Kristus yaut abyõ ybo beta tna kabes sor msya aban mana mroh mte, hrenaut sai beta. Raa mame Ait yajat mam ara warok reto oh mi Ait yaut abyõ ybo beta to.

Allah yno bo weto, tibyo anu bno bo bawya?

¹⁶Kabes sor msya aban mana weto matak aro u fee. Feto to, fyi re anu nri watum wana fares to? Awya sai ro bhah anu yawe, “Boit ro mbau meto, niit ma! Bo ro nta reto mbau!” to, nri ait ma! Tna soh sait yawe, ayõ aro mbau to, nri ait ma ye! Mfi bo sait yawe, “Bokyõ refo mbau!” soh mfe, “Mti fo, snyi frok tna, tibyo mbau!” soh mfe yawe, “Ifo fo, ayõ ro raa ntmoh.” Nri watum mfi feto to ma! ¹⁷Watum ro tiwya raa mkyas weto to, matim merif iso ro mama tna sau. Mfi bo raa mawyan sai. Tna mabo rau to Kristus yesait. ^18-19Kristus yesait yoo anu raa wAit beta su sgi yetsu rAit sau aran kaket. Tna Ait yamo mana ybo anu beta mam yetsu rAit. Ait yoo anu yse yake matak. Tna ja Ait yoo bo ro anu bnaut to saim kʼanu ye. Tna yno re anu bhau biranya su ye. Tibyo kbe Allah yno yetsu ro Kristus rAit reto mo kaket moof. Menohe raa baro hawe mari mana reto. Ana ksoh kro iso roto. Ana to, mawe ana mhaf sneh sai, he mfe. Ana to, ja smot malaikat. Ana mjin smi-sma bo to, mbo bosmi weto matak, mawe bo ro ati toni! Makit wana mnot-nat bo ro tabam sai tibyo ana mrok mana mase ye. Menohe bo ro ana safuk to, bo ro ati fee ye. Tna anu to, kmot anu wa be kbe ana mama miwro anu btek to. Soh ana miwro anu btek to, meen anu nkai bo ro Allah siwyan kʼanu fee ye.

²⁰Kristus yajat to, anu nhai su nsya Ait ye. Tibyo kabes sor ro mbo tabam refo fares fo, mbo anu u fee. Fyi re anu nwe nkro iso ro tinyi mfi bo kabes weto mbo anu fares? Anu nhai nsya Kristus oh! Nkro iso reto u ma! Ana ro mawe miwro anu to watum anu mawe: ²¹“Nbo bo weto ma!” “Noo boit reto sanet kebet ma!” “Niir bo reto ma!” ²²Boit reto to, bo ro ati fee. Raa mait tna makus sai. Tna watum mfi weto to, watum msya maja ro frok mbam raa sai. Feto to, nri watum mfi weto to ma! ²³Watum weto mamo mamyot bosmot ro raa sair sai. Tna raa ro kro watum weto to, mawe ana mhaf sneh sai, he mfe. Tna ana mnaut mawe soh raa mhau bo mait bo to, kbe fri mafer rau. Raa baro mmat bo weto mawe, ja raa ro makit maan mno bo weto to. Menohe watum weto misoh raa mhaf fee. Kbe ana mhaf masmamo fares.

¹Allah yno anu nrok nsen nsya Kristus su. Feto to, tomer saso bo ro mhau abyõ mam wore wo Ait yase hre ysya Allah mam tem ati rAit. ²Bo ro mhau mam abyõ weto to, nbo kbo mam nsrau wanu. Tna nnaut-nat bo ro mhau mam tabam refo to ma. ³Tiwya anu nhai nsya Kristus su. Tibyo mfo refo, anu nhau naam nsya Kristus su tna nsya Allah su ye. Anu nhau naam feto, menohe mabo rau to, Allah ymyõt fares. ⁴Menohe ati ro meen Allah yasbrah Kristus ysya bo msai wAit to, kbe Allah yasbrah anu nsya bo msai wanu ye. Kristus oh mi anu nhau naam to. Feto to, saso bo ro mhau mam abyõ to.

Bhau baam to, bno bo bawya?

⁵Anu nhau naam nsya Kristus su to, nkro iso raa ro tabam refo aro u to ma! Raa ro tabam refo to, taro maus-as bo, ana taro to mato mboh fee, taro to masmamo, taro to srau oot-oot mno bo ro mkair-kar, tna ana taro to mhai bo raa moo. Ana weto to, mfi bo raa ro smot fraa sai meto. Ana ro mhai bo raa moo to, mnaut-nat bo ro tabam sai tna mnaut-nat bo ro Kristus fee. Anu to, nistre bo weto beta beak fari makus sai. ⁶[Raa mkbair ro hawe mari bo ro Allah yawe, tibyo mno iro weto to,] Allah kmo ana. Tna Allah kbe yoo safo mana ymit kʼana weto. ⁷Tiwya anu nkro iso reto ye. Au oh mi tiwya anu nhau nno bo ro mkair-kar weto to. ⁸Menohe mfo refo fo, bo ro mkair-kar beta to, nitsre tna mbeak fari makus. Mfi bo raa ja mrus ratan ro mnis tna beak makus to. Nkmo raa to ma! Nhaf safo kʼraa to ma! Nhaf ro mkair-kar kʼraa to ma! Nmus raa to ma! Bokyas ro nsoh mkair-kar to, frok mbam nsoh wanu to ma! ⁹Sioh anya to ma! Tiwya iso ro bose oh msya bo mafa wau ro mkair-kar to anu nrus beak makus oh. Feto to, nno bo ro mkair-kar weto u ma! ¹⁰Anu nyum ratan ro tna oh. Au oh mi anu nkro iso ro tna oh. Tibyo nmo raa ro tna (baru) to. Tna anu raa ro tna to, ja Allah yisoh yisoh anu fares fo, re kbe anu nhar Ait kaket baro naut. Ait yisoh yisoh anu feto mamo snok anu nsrau msya nhaf haberek mamo mnan si Ait srau msya yhaf ye. Ait oh mi ysair raa ro tna to. ¹¹Anu ro Ait ysair tna to, anu bibi anu nesait ai to ma. Anu beta nnan anya sai. Anu raa mana ro Yunani nsya anu raa mana ro Yahudi to, nnan anya sai. Tna anu ro tiwya raa mkom tohmi (sunat) nsya anu ro tiwya raa mkom (sunat) to fee, anu nnan anya sai ye. Raa ro tiwya mhau fari tna mkyas bo mam mai rana mesait sai msya raa ro tiwya mhau mam safom sai ye. Anu ro sryan boh nsya anu ro sryan boh fee ye. Anu beta nnan anya sai. Menohe ro ati to, Kristus yesait aran. Ait oh mi yhau mam kʼanu raa wAit nhaf beta to.

¹²Allah ysok anu nmo raa wAit. Tna Ait yatmof anu ye. Tna anu nmo raa ro tna ye. Allah yno bo ro moof weto beta kʼanu. Feto to: Nhau natmof anya kaket, nhau nhaf moof sai, yok-yok anu to ma, nhau nhaf sneh sai, nhaf to mhau knar sai, ¹³kanyin anya ye. Tna anu awya sai ro ynaut yawe raa mno bo mai kʼait to, ait yatmof ana sai. Yhaf kair ma. Tiwya Tuhan ymat iro wanu tna yatmof anu. Feto to, natmof anya mfi Ait yatmof anu feto ye. ¹⁴Tna bo moof ro jõ sobu anu nno weto to, bo sau naut ro ati toni miwer watum roto weto: Nhafri raa anya. Mfi bo raa moo too make ara matak. Anu nhafri raa anya kaket to, kbe anu nhau srau sau su nsya nhaf sau su kaket matak beta to. ¹⁵Tna Allah ytu anu nma nrok niranya su nmo Kristus yetsu sau aran su. Kristus yno anu nrok niranya. Feto to, ati ro anu saim bo ro kbe anu nno to, nnaut iranya ranu kaket wia. Tna nyoh asik mase kʼAllah ye. ¹⁶Tna bokyas ro Kristus to, nhau nnaut mam kʼanu nhaf kaket re kbe mafer wau to mninon kʼanu. Tibyo kbe anu nkit maan nwatum raa anya kaket tna nwe wa raa ro mawe mno bo ro mkair ye. Nji howes kʼAllah to, nyoh asik mase kʼAit mkah nsoh mabyõ sai to ma! Nji howes mkah nhaf srau mato kaket! Bibi Tuhan mkah Mazmur, mkah howes ro mbibi Ait, tna mkah bobaut bo to ye. ¹⁷Tna bo bawya ro anu nno msya bo bawya ro anu nkyas beta to, nri bo kʼTuhan Yesus ro ybo anu. Tibyo nno bo weto beta mamyot iso ro Ait yawe anu nkro to. Nno bo weto to, nyoh asik mase kʼAllah anu Nja ranu ye. Yesus yisoh iranya ranu nsya Nja re nyoh bo kʼAit to.

Raa sme, fnya, msya kukek wana

¹⁸Yesus yamo Tuhan ybo anu feto to, ro moof to, anu fnya nri bo ro anu naa mawe. Nri nbo nno! ¹⁹Tna anu raa sme to; natmof anu nfain wanu. Nkyas bo kʼana to, nbait ktan-ktan to ma! ²⁰Tna anu ro nkek fares to; nri bo ro nja nme na mawe tna nbo nno beta. Nno bo weto to, kbe Tuhan yhaf mnan anu to. ²¹Tna kukek maja to; nno re kukek wanu mrok kmo to ma be kbe tis rau to ana hawe mari anu u. ²²Tna anu ro sryan boh to; ana ro mbis anu mam tabam refo to, nri bo ro ana mawe to, nbo nno beta. Nri ana to, nno re kbe ana mbibi anu sai to ma! Nhaf makin feto to ma. Nri bo ro ana mawe to, waa Tuhan, tibyo nbo nno mkah nhaf sau. ²³Bo bawya ro anu nno to, nno re kbe raa mmat tna bibi anu sai to ma. Menohe nno bo weto kaket mkah nhaf ro moof tna kbe Tuhan yesait aran ymat tibyo yhaf mnan kʼanu to. ²⁴Anu nhar oh nwe meen kbe anu nkai boren ro kbe Tuhan yuumto kʼanu. Anu nhar bo reto, tibyo nno bo ro raa mbis anu nno mam tabam refo kaket to. Anu nno bo ro TuhanKristus oh meto. ²⁵Menohe sryan boh ro mno safo aro to, meen kbe Tuhan ymit safo weto kʼana. Ja Tuhan ysok raa sait fee. Kbe ymit safo ro raa mno beta.

¹Tna anu ro nbo sryan boh to; anu nhar oh nwe Ait sait ro yase ybo anu tait, Ait hre mam sawro rAit. Feto to, nmat sryan ro anu nbo kaket. Nno bo ro moof kʼana mamyot bo ro ati (adil). Tna niwana ana to ma! Menohe nmat ana mfi bo ja anu nmat anu nesait ye. ²Tna anu beta to, nhau mur-mur skabuk nkyas bo nsya Allah. Skabuk feto, nnaut bo ro anu nkyas kʼAit kaket. Tna nyoh asik mase kʼAit ye. ³Skabuk feto to, skabuk amu ye. Nyoh kʼAllah re kbe Ait siwyan iso ro amu nmo nkyas Bokyas rAit ro Moof. Re kbe amu nkyas Kristus. Tiwya tinyi raa wase Ait, menohe Allah yasbrah Ait kʼanu. Tna tiwya jõ tkyas Ait tibyo raa mfot jõ tna mse jõ mam bui refo fo. ⁴Tna skabuk re kbe jõ betoo bokyas reto kaket mnan si Allah ybis jõ tkyas to. ⁵Ati ro anu nhau nsya raa ro wase Tuhan fares fo, nmo kaket mfi bo raa ro makit maan. Nmo kaket feto, tna nbo ati ro nhau nsya raa ro wase Allah weto to, somya kaket re kbe mafer moof kʼana ye. ⁶Nkyas bo nsya ana to, nhau nhaf moof kʼana yoyo tna nkyas mkah iso ro kbe ana ksoh mari ye. Nkyas feto, tibyo kbe anu nhar nkyas bo si kʼana sait-sait mam ati ro ana mtu bo kʼanu ye.

Paulus ykyas bi Tikhikus tna ymah meen kʼana

⁷Bi Tikhikus tait, raa ranu sait ro amu nhafri. Ait yamo sryan Tuhan ro mur-mur yno bo ro Tuhan ye. Tna ja ait ykah bo ysya amu ye. Ati ro ait yamo yo kʼanu to, kbe ait ykyas bo ro jõ tkai mam wefo msya wore wo jõ thau fo kʼanu. Kbe ykyas bo weto beta kʼanu. ⁸Au oh mi jõ tbis ait yamo yo kʼanu. Yamo re kbe anu nhar bo wamu tibyo anu ne sraujin amu u fee. ⁹Tna jõ tbis Onesimus yamo ysya bi Tikhikus ye. Onesimus tait, raa ranu ro Kolose sait ye. Tna amu nhafri ait ye. Tna ait mur-mur kro Tuhan ye. Kbe ana mbewok mkyas bo ro amu nkai mam wefo beta kʼanu.

¹⁰Aristarkhus ymah meen kʼanu. Ait tait, raa mfot mse mam bui ysya jõ fo. Tna Markus, bi Barnabas tmo tait, ymah meen kʼanu ye. (Markus tait, tiwya raa makah soo ro ajõ mkyas.) Soh ait yama to, nitrah nhaf wanu kʼait. ¹¹Tna Yesus ro ja raa mtu yasom Yustus tait, ait raa Yahudi ro smot Kristus oh. Ana raa ro Yahudi mabo tuuf aran ro mfo refo mkah bo msya jõ. Raa mana ro Allah yamo Raja ybo oh mi amu nkyas to. Tna ana ja misoh thaf ajõ re jõ sorni sraujin ajõ ye. ¹²Tna bi Epafras, raa ranu ro Kolose sait, ait ro yamo sryan ro Kristus Yesus tait, ymah meen kʼanu ye. Ait skabuk to, ja ait skabuk anu hrowyõ yhai yoyo ye. Ait skabuk re kbe anu nros smot Tuhan matak. Tna ait skabuk re kbe anu nhar bo ro Allah ksoh anu nno beta to, nhar nbo kaket. ¹³Jõ tasu tmat ait hrowyõ skabuk anu feto. Tna ait skabuk raa ro smot Tuhan mam kota ro Laodikia msya kota ro Hierapolis mfi feto ye. ¹⁴Tna Lukas ro ja tkif raa tait, ro raa mhafri tait, ymah meen kʼanu ye. Tna Demas ymah meen kʼanu ye. ¹⁵Nmah meen ajõ kʼraa wamu ro mhau mam Laodikia ye. Tna nmah meen ajõ kʼfai Nimfa msya jemaat ro ja skabuk mam amah rau. ¹⁶Aam refo fo, raa mbaca kʼanu mkak wia, tna nno re raa makah mamo mbacakʼjemaat ro skabuk mam kota Laodikia ye. Tna aam ro jõ tiim kʼjemaat ro Laodikia to, noo nbaca mam jemaat ranu ye. ¹⁷Tna nwe kʼbi Arkhipus nwe, “Tiwya Tuhan ybis nyõ nno bo wAit. Kaket nyõ re nno beta!” ¹⁸Tna jõ Paulus tmah meen kʼanu ye. Tna meen refo fo, bokom ro tis refo fo, jõ tkom mkah jõ tatem ajõ. Skabuk jõ mam bui refo. Sorni ma! Tna jõ tayoh re Allah yatmof anu ye.