2 Tesalonika

Aam ro Ewok Paulus Ykom tna Tiim Mamoʼt Jemaat ro Tesalonika

2 Tesalonika

Paulus ymah meen kʼraa ro smot Yesus mam kota ro Tesalonika

¹Aam refo mbam kʼamu Paulus, Silas ysya Timotius. Amu nmah meen kʼanu jemaat ro Tesalonika. Anu smot Allah, anu Bja ranu ysya Tuhan Yesus Kristus.²Amu skabuk Allah, anu Bja ranu, nyoh re Ait ysya Tuhan Yesus Kristus kbe matmof anu tna mno re anu nhau nhaf tnok sai.

³Taja, tme, tao, tano na; ja anu smot Yesus Kristus kaket renti naut. Tna anu natmof raa anya to, ja nno matak renti naut ye. Tibyo amu nyoh asik mase kʼAllah yoyo. ⁴Bo weto oh mi amu nkyas jemaat ranu kʼraa. Wore wo amu nmo nirer jemaat Allah roto to, amu nkyas anu. Amu nwe, “Ja bombra ro samyoh mama mai kʼjemaat ro Tesalonika. Tna raa sikowah ana ye. Menohe bosmot rana matak sai fares.” ⁵Anu smot Yesus oh mi bo mkair ja mbtek mai kʼanu. Allah ymat he anu beroh nsom bo mkair-kar feto. Tibyo yawe anu noof nmo nhau mam sawro ro Ait yamo Raja ybo. Anu bmat bo weto to, tna bhar bwe ati ro Allah hre susai ytu srah to, Ait soko raa sait ye fee. Ja yno bo ro moof sai. ⁶Allah ja yno bo moof toni. Tna meen Ait yno bo ro mkair ska kʼraa ro mno bo ro mkair mai kʼanu to, riryõn. ⁷Tiwya raa mno bo ro mkair mbtek mai kʼanu menohe Allah kbe yoo riof yee kʼanu riryõn, tna yoo riof yee kʼamu ye. Meen Ait yno bo weto beta mam ati ro Tuhan Yesus hah ye yama ybam sawro rAit. Yama mkah yatak rAit ro mase. Kbe yama ysya malaikat wAit mroh mama mam tafoh ro mait warah to. ⁸Tna Ait kbe yno bo ro mkair ska kʼraa ro wase Allah msya raa ro hawe mari tna kro Bokyas Moof (Injil) ro Tuhan Yesus ranu. ⁹Bo ro samyoh meen mbtek mai kʼana mamo snok hame wajin. Tna Tuhan kbe beak ana frok mbam kʼAit mamo mhau hayah. Meen ana weto mahni tak msya bo yase rAit ye. ¹⁰Bo weto beta meen mabo mam ati ro Ait hah yama. Yama to, kbe raa wAit mbaut yase rAit. Tii anu nri bokyas ro amu nkyas kʼanu to, nfot nse kʼanu. Tibyo meen anu bibi Ait su nsya raa wAit beta ro ja smot Ait. ¹¹Amu nnaut bo weto tna re amu skabuk anu yoyo. Amu skabuk re kbe Allah ymat anu yawe anu noof tna ytu anu nmo raa mana rAit ro ybo. Mfo refo anu nwe nno bo ro moof. Anu smot Yesus tibyo nwe nkah bo wAit ye. Tibyo amu nyoh kʼAllah re kbe yoo yatak rAit yee kʼanu re anu nno bo weto kaket. Re kbe yno bo weto beta mrok moof. ¹²Raa mmat anu, raa ro Kristen to. Tna amu skabuk bo ro riwai weto, afo re raa ro mmat anu to, mmat bo yase ro Tuhan rAit ye. Re kbe raa bibi Tuhan Yesus. Tna re raa mmat bo ro anu nno mam ait yasom to, kbe bibi anu ye. Boatmof ro Allah ranu ysya Tuhan Yesus Kristus oh mi yno bo weto beta mabo.

Bo ro meen mabo mam wore wo Tuhan Yesus hah ye yama u

¹Taja, tme, tao, tano na; jõ tkyas baro kʼanu betoo wore wo meen Tuhan ranu Yesus Kristus, kbe hah ye yama tabam refo u. Tkyas wore wo Ait yakah anu yamo yse mberur su bhau mam wo sau bysa Ait to. ²Amu nri he raa baro mkyas kʼanu mawe Tuhan Yesus hah yama u oh. Waa ma, bo reto mabo fefares! Soh raa mawe Har ro Allah merif bo reto kʼana to, nri ana ma! Soh raa mawe amu nkom bokyas reto mam aam to ye, nri ana ma! Amu nkyas bo feto fee. Nnaut yyi ma. Bo reto mabo fefares. ³Soh fyi-fya sai to, nri bo ro raa mkyas sioh anu to ma. Wore wo Ait hah yama fefares to, bo ewok kbe matim wia: Ro sau to, raa mawat ro ja kro Tuhan to, kbe haberek kbor tna hawe kro Ait u. Tna ro ewok to, raa ro yetsu mnis safo sait yama wia. Ait refi Allah siwyan mkah bo yamo yait mam tafoh ro mroon. ⁴Ait retait kbe safuk tawyõ ait uu kar yiwrek bo taro sor ro ja raa smot mfi allah ye. Tna ait bito yaut yamo hre mam Samu ro Allah tna yawe ait tait Allah. ⁵Nnaut nwe mam wore tiwya jõ thau tsya anu to, bo wefo beta jõ tkyas kʼanu oh. ⁶Bo ro mno wa re ait ro yetsu mnis safo retait frok yama fefares to, anu nhar oh. Tna meen ati ro Allah ybis to, kbe ait retait frok yama. ⁷Tak mkair ro ja misti raa mno iro to, mno bo rau oh. Tak reto mhau mno bo rau to, mno wai sai fares. Menohe raa sait ririt tak reto fares. Meen Tuhan ybis tna ait ro ririt tak ro mkair reto kbe bitsre tak reto. ⁸Tna kbe raa mmat ait ro yetsu mnis safo retait frok yama. Menohe ati ro Yesus Kristus hah ye yama to, Ait kbe yame ait ro yno safo retait mkah yafos rAit. Tna fo Yesus frok yama to, tna yase rAit yno raa retait yajat ye. ⁹Raa ro yetsu mnis safo retait meen frok yama. Tna wore wo yhau mam tabam refo to, kbe yno bo ro msai mkah yatak ro kabes yabi (Iblis) rait. Kbe yno bo ro msai, tna sair bo ro hnah afo re raa mhar yatak rait. He mfe. Bo ro ait ysair weto to bo sioh beta. ¹⁰Wore weto to, raa msis kbe hawe mari watum Allah ro ati. Soh raa ksoh mari tna mbo watum ro Allah reto, kbe ana mkai riof ro mase. Menohe ana weto to, hawe. Ana weto to, meen mait mam tafoh ro mroon reto. Ana ksoh smot bo mkair-kar. Ait ro yetsu mnis safo retait ja sioh ana sai. ¹¹Reto oh mi Allah ybis bo ro mkair reto mama sioh ana. Tna ana mari ait ro yetsu mnis safo retait tna mfot bokyas rait mse kʼana. ¹²Ana weto mari bokyas ro sioh feto. Ana miwana watum ro Tuhan. Raa weto to, ja nksoh mno iro. Tna kbe Tuhan yno safo mana ymit kʼana weto beta.

Allah ysok anu mkah yoo riof yee kʼanu

¹³Taja, tme, tao, tano na ro Tuhan ksoh; tiwya tinyi Allah ysok anu oh yawe yoo riof yee kʼanu. Har rAit misoh anu re nhau nno bo ro Allah wAit sai. Tna anu nri watum rAit tna nhar nwe bo mabo. Au oh mi Allah yoo riof yee kʼanu. Feto oh mi rabu ti wawa to, amu nyoh asik mawat kʼAllah. ¹⁴Bokyas Moof (Injil) ro amu nkyas kʼanu refo oh mi iso ro bi Ait ytu anu nma no kʼAit to. Allah ytu anu nma no kʼAit to, yawe anu nsya raa wAit taro, kbe nhaf nse bo yase ro Tuhan ranu Yesus Kristus rait to. ¹⁵Taja, tme, tao, tano na; reto oh mi amu nwe kʼanu nwe, “Nros ntak!” Ja amu nkyas watum kʼanu, tna nkom aam tiim kʼanu ye. Nbo watum ramu reto kaket matak ye. ¹⁶Amu skabuk Allah Bja ranu. Ait ja yatmof anu. Yatmof anu tna ykyas bo moof kʼanu mamo snok mam hame wajin. Tna Ait yno re anu binaut sne Yesus hah yama u mkah simaut ro mase ye. Amu nyoh re kbe Allah ysya Tuhan ranu Yesus Kristus¹⁷mkyas bo ro moof kʼanu re kbe anu nhau smot Yesus matak. Amu nyoh kʼAna mbewok re kbe Ana moo matak rAna mee kʼanu. Feto kbe anu ntak nkyas bokyas ro moof yoyo tna nno bo ro moof yoyo ye.

Amu ksoh nwe anu skabuk amu ye

¹Taja, tme, tao, tano na; tiwya tinyi amu nkyas watum ro Tuhan kʼanu. Tna anu nri tna nse mam nhaf mato wanu. Mfo refo jõ tawe anu beta skabuk amu afo re watum ro Tuhan, kbe amu nkyas renti mam rabin taro sor ye. Skabuk re kbe raa mari watum reto tna mawe mbo mno kaket ye. ²Raa makin sor ro mari watum refo to, ana taro smot fee. Ana weto baro mimara mtuk. Taro saim bo mkair-kar mai kʼamu. Feto to, skabuk amu afo re Allah kmot amu wa. ³Tuhan tait yoof toni. Bo ro bi Ait yawe to, kbe yno tu oh. Kbe Ait yno re bosmot ranu matak. Tna kbe Ait kmot anu ye mbam bo mkair ro kabes yabi (Iblis) yno mbtek mai kʼanu to. ⁴Amu nhar nwe Tuhan yno re anu ja nbo nno bo beta ro amu nkyas kʼanu. Tna amu nhar nwe kbe meen anu nbo nno bo weto ye. Kbe anu susu fee. ⁵Amu skabuk re kbe anu nhar boatmof ro Allah rAit. Tna mam wore wo bo mkair mai kʼanu to, amu skabuk re kbe anu bito nsom bo reto, tna susu fee. Menohe nros ntak nfi bo tiwya Yesus Kristus yros yatak tna bito yasom bo ro mbtek mai kʼAit to ye.

Haweboh ma

⁶Taja, tme, tao, tano na; amu nbis kʼanu mkah Tuhan Yesus Kristus yasom rAit nwe, soh raa wanu aro haweboh tna mari watum ro amu nkyas kʼanu fee, kbe niranya nsya ana weto ma. Sesa anu sai. ⁷Anu nhar nwe, tii wore wo amu nhau nsya anu to, amu haweboh fee. Amu nesait safo nkah bo wamu. Anu beta nesait nmat bo ro amu nno feto. Tna tawe anu kro nno mfi bo tiwya amu nno feto ye. ⁸Tiwya amu sohmaam bo raa to, makus fee. Amu noo pitis nee. Mti baas to, amu nsafo nkah bo wamu afo re amu nno anu hrowyõ ma. ⁹Amu nesait nkah bo wamu sai feto amu raabis ro Kristus wAit. Ja raa jemaat moo boit mee kʼamu niit sai, he mfe. Amu safo nkah bo wamu nesait sai nimyoh marak. Amu nno feto afo re anu nmat bo moof ro amu nno to, tna kro nno bo mfi bo amu ja nno feto ye. ¹⁰Tiwya wore amu nhau nsya anu fares to, amu nkyas kʼanu nwe, “Awya ro haweboh to, ja ykah bo fee to, noo boit nee kʼait retait yait ma!” ¹¹Raa mawe kʼamu mawe raa taro ro mhau msya anu sor to, ja haweboh. Ana mkah bo aro kʼana fee. Ana mhau mkyas bo ro raa mati sai. Reto oh mi amu nkyas bo weto kʼanu. ¹²Mkah Yesus Kristus yasom rAit, amu nbis raa weto nwe, “Nhau knar! Tna nkah bo aro kʼanu nesait. Re kbe anu sohmaam mafer mbam bo ro anu nesait nkah to.” ¹³Taja, tme, tao, tano na; beroh nno bo ro moof. Ne hrowyõ ma.

¹⁴Mfi bo raa jemaat ranu, taro hawe mari bo ro amu nkom wefo fo, sesa anu sai. Nhau niranya nsya ana ma, re kbe ana hrenaut. ¹⁵Menohe nmat ana mfi raa ro byoh to ma. Watum ana rere sai, mfi bo nao na kʼanya bo feto ye.

Amu nmah meen kʼanu

¹⁶Tuhan tait yatak yno re anu bhau bhaf tnok. Tna amu skabuk nyoh re anu nhau nhaf tnok mam bombra beta ro anu nno. Tna amu nyoh re kbe Ait yhau yatam anu beta yoyo ye. ¹⁷Meen mbam kʼjõ Paulus. Aam refo mbam kʼjõ. Anu nhar bokom ajõ to mfi fefo. ¹⁸Amu skabuk Allah re Yesus KristusTuhan ranu yatmof anu beta. Au oh meto.