2 Petrus

Aam ro Ewok Petrus Ykom

2 Petrus

Petrus ymah meen

¹Aam refo mbam kʼjõ, Simon-Petrus. Jõ tamo sryan tna raabis (rasul) ro Kristus Yesus rAit. Ait tait Allah, tna Ait sotak iro wanu ye. Ait tait Raa ro yhaf moof ati. Ait ysan bosmot ro moof toni kʼanu. Tkom aam refo tee kʼanu ro fri bosmot refo ye, mnan anya nsya amu ye. ²Jõ skabuk Allah re anu nhar Ait ysya Yesus ro yamo Tuhan ybo anu. Nhar Ana kaket tibyo Ait yatmof anu beta toni tna yno re anu beta nhau nhaf tnok toni ye.

Allah ysok tna ytu raa

³Allah tait yhaf moof ati. Tna bo yase rAit to msai toni ye. Tibyo Ait ytu anu bma bo kʼAit tna re bhar Ait. Tna mkah bohar reto Allah yatak rAit yno re anu bhar bombra beta re kbe bhau bno bo ro Ait ksoh. ⁴Ait ysi bosi ro mafer moof kʼanu oh meto. Ysi yawe yno bo weto re anu bhau bhaf moof bnan fi Ait yhaf moof ye. Anu kro Yesus tna Ait yno iso re anu biranya bsya Allah ye. Raa ro tabam refo to, ana masmamo. Ana mnaut bo ro mkair yoyo tibyo ksoh mno bo ro mkair ye. Menohe Allah ysi bosi weto kʼanu afo re bhaf mato wanu ro tiwya mkair to, mrok moof. ⁵Allah yno bo weto beta. Feto oh mi soh anu nwe nrok noof to, nno bo wefo sor: Anu smot Kristus oh. Mfo refo tomer kaket afo re nno bo ro moof ye. Nno bo ro moof tna tomer nhar Allah kaket ye. ⁶Nhar Allah kaket, tna nisoh anu ai re nno-na bo ma. Nisoh anu. Tna beroh kro Yesus. Beroh kro Yesus, tna nno bo ro Allah ksoh to ye. ⁷Nhau nno bo ro Ait ksoh tna niranya nsya raa anya ro Kristus wAit ye. Niranya nsya raa anya tna natmof raa anya beta ye. ⁸Soh anu mur-mur nno bo ro moof weto beta kaket yoyo to, bo weto mno mafer moof. Bo weto mno anu nhar Tuhan Yesus Kristus kaket tibyo anu kbe tufrok mafer ro moof ye. ⁹Menohe awya ro yno bo weto to fee, ait yfi raa ro masu mboh tna hre mumu. Ait yfi raa ro sorni bo ro Yesus yno: Ait sorni yawe Yesus yyon iro wait ro yno to fee.

¹⁰Tafoh na wojõ ro jõ ksoh; tomer nno bo weto renti. Nno feto tna kbe anu nhar nwe Allah ysok anu oh. Nhar nwe Allah ytu anu oh. Soh anu nno bo weto to, kbe meen anu btek nwe fee. ¹¹Tna meen anu twok mam sawro ro Yesus Kristus yamo Raja ybo to tu oh. Ait yamo Tuhan ro ybo anu. Tna Ait sotak iro wanu ye. Sawro rAit reto meen mhau hame wajin. Allah ksoh yawe anu twok tu oh. Ait huwya ymah meen kʼanu.

¹²Anu ja nros tu tna nhar bokyas ro ati reto oh. Menohe jõ te tkyas bo weto kʼanu u, re kbe anu nnaut yoyo. ¹³Tnaut tawe tkyas bo weto u to, moof re kbe anu sorni ma. Tibyo mam wore thau fares to, kbe te tkyas bo weto kʼanu u. ¹⁴Thar tawe kbe thau kait fee. Baro feto sai oh to, jõ thai tamo bojõ. Tuhan Yesus Kristus ykyas feto kʼjõ oh. ¹⁵Meen jõ tarak. Reto oh mi jõ tomer tno bo re kbe anu nhau nnaut bo wefo fares.

Amu nhar nwe bo weto mabo

¹⁶Amu nkyas kʼanu oh nwe Tuhan Yesus Kristus tait Raa ro yatak. Tna nwe meen Ait yama u. Amu nkyas bo reto mfi bo mna ja raa mkyas-kas to fee. Tiwya amu nesait nmat yase rAit, nmat mkah amu nsu wamu. ¹⁷Tiwya Yaja Allah bibi Ait tna teta Ait. Bo yase ro Allah rAit to msai toni. Yesait yawe, “Ku aJõ ro tatmof oh mefi. Ait tait Jõ thaf mnan.”1:17 Matius 17:1-5 Tii Petrus, Yakobus ysya Yohanes ye maut atu reto msya Yesus.¹⁸Tiwya amu nros su nsya Ait mam atu wore Allah ykyas bo kʼAit. Tna nesait nri mai reto mbam sawro ro Allah.

¹⁹Nnaut mai ro amu tii nri reto. Tna amu ja nbo bokom ro tiwya tinyi Allah ybis nabi wAit mama mkom to ye.1:19 Ana mkyas Mesias ro meen yama. Tibyo mfo refo amu nhar tu oh nwe bo ro nabi wAit mkom weto to, bo ro ati. Tawe nri bo ro nabi weto mawe to kaket. Soh anu nri bokom wana weto to, kbe anu nhar nwe bokyas roto taro to, bo ro ati ye, fe mfe a. Bo ro tii nabi wAit mkom to mnan fi kek ro mram yuk ro mamur. Soh raa mbo kek to, kbe mmat iso ro mamo. Feto to nri bo ro nabi wAit weto mawe to, mamo snok mam ati ro Tuhan Yesus Kristus yama u. Meen ati reto to, kbe yno re anu bhar Allah kaket. Reto mnan fi reen mama, mnan fi sken ro ja mor-mor mam ti to brat.1:19 Wahyu 22:16.²⁰Tna ro ati to, nnaut bo refo: Nabi mesait mkyas tna betoo Bokom ro Allah fee. ²¹Bokyas reto to, bonaut ro mbam raa fee. Nabi na ja mkyas bokyas ro mama mbam kʼAllah. Tna Har rAit oh mi mno re ana mkyas bo weto.

Raa ro sioh mawe Allah ybis ana mama

¹Tiwya tinyi to raa baro sioh mawe ana to nabi ro Allah ybis mama mkyas bo wAit. He mfe. Ana mkyas bo ro ntrot fee. Guru weto mamo mkyas bo kʼraa ro Allah wAit, sioh mawe Allah ybis ana mama. Mfo refo, kbe guru aro mama mo kʼanu tna mberur su re mbesruf anu feto ye. Mama tna mkyas bo ro mti kair kʼanu ye. Ana mkyas Tuhan Yesus ro ybo anu. Menohe ana sioh mawe, “Tiwya Ait yhai afo re yfes anu to fee.” Tna ana mawe, “Ait yyon iro wanu to fee ye.” Ana mkyas bo ro sre feto tibyo Allah yno srot re ana safe mkak. ²Guru weto ja mno bo ro mti saban. Tna raa ro mkyas mawe ana kro Kristus to, kbe mawat mari guru weto tna kro mno bo ro mkair mnan fi ana to ye. Mno feto tna raa ro mne mmat. Mmat tna mkyas-kas iso ranu ro moof to, mawe iso ro mkair. ³Guru weto masu mase mkah pitis. Kbe mkai mabyoh mawat mbam kʼanu. Ana mkyas bokyas ro sioh kʼanu afo re mbesruf anu. Menohe Allah yako bo ro ana mno. Ait siwyan kair ro meen mai ana. Meen ait yno ana safe mkak tu oh.

Ja Allah ymit safo kʼraa ro mno bo ro mkair

⁴Tiwya malaikat taro mno iro ye. Tna Allah ybis ana mamoʼt sawro ro kair. Tna ybu ana mam kayah ro mamur. Ybu mamo snok meen Ait ymit safo kʼana. ⁵Tna tiwya tinyi yno raa mawat safe mkak ye. Nuh yawe wa kʼana, yawe, “Nhau nno bo ro Allah ksoh!” Menohe ana mari ait fee. Feto to Allah yno riof kʼNuh ysya raa mabo krema mesait aran sai. Tna Ait yno aya mabo mbetru ana beta ro ja mari bo ro Allah yawe fee. ⁶Tna tiwya Allah yoo safo mana ymit kʼraa ro mhau mam Sodom msya Gomora ye. Ait ykah kota ewok weto mait makus. Yno afo re raa mmat tna mhar mawe kbe Allah yoo kair mai kʼraa ro ja hawe mari bo ro Ait yawe. ⁷Menohe Ait yno riof kʼbi Lot. Lot tait raa ro yhaf moof. Ait ymat bo asmamo raa mno. Ymat he ana miwer watum ro Tuhan. Tibyo yhaf hri. ⁸Lot yhau mam wore wo raa mno bo mkair. Yesait yhau yhaf moof sai. Rabu reha to ait ymat tna yari bo ana weto mno miwer watum ro Allah. Tibyo yhaf tnok fee. ⁹Anu bmat bo weto beta to, bhar bwe Allah ja ymat tna yhar bo ro raa mno. Taro mno bo ro Ait ksoh. Tna ati ro bo mama mai kʼana, sanet ana to, Ait yatak yno riof kʼana. Taro mber safo. Tna anu bhar bwe Ait ymat ana weto ye. Tna Ait yatak sikowah ana ye. Sikowah tna meen yoo srah ymit kʼana ye. ¹⁰Meen Allah sikowah raa ro masmamo, ro ksoh mno bo ro mkair. Tna kbe sikowah raa ro ja hawe bo raa ro mase mbo ana to ye. Meen Ait sikowah ana weto tu oh.

Guru weto to miwana Allah tna mnaut mawe ana raa ro mase. Tibyo ana mamus malaikat msya bo sor ro mhau mam sawro ro Allah. Ana waa bo weto fee, hartu bo weto fee ye. ¹¹Malaikat sor matak miwer guru weto. Menohe malaikat sor ja waa tna hartu bombra sor ro mhau mam sawro msya Allah. Waa bo weto tibyo berasi fee. ¹²Guru weto to, ntoo bombra sor ro ana wase. Ana makit marak mfi kak. Ana srau masmamo sai. Tibyo mno-na bo ye. Kak mabi ja mabe maku rau tna tis rau raa mame sai. Kbe meen guru weto safe mkak ye. ¹³Kbe Allah yno bo ska kʼguru weto ro tiwya mkyas bo ro mkair kʼraa. Guru weto ksoh mno-na bo mam ayõ ro baas ye. Ana weto mno bo asmamo ye, menohe mama hre msya anu sohmaam bo su msya anu ye: Ana wase hrenaut. Ana mfi bo mkair ro mhau mrat kʼanu. ¹⁴Ana mmat fnya to, mawe mwyahte. Ana mno iro yoyo. Raa taro to bosmot wana matak fee. Tna guru weto mama tko ana re mno iro. Guru weto to, masu mase mawe mame kta bana yoyo. Tibyo Allah kbe yno ayoh mroh mai kʼana. ¹⁵Ana to sikba iso ro ati tna mamo tit. Nabi Bileam tait ku ro bi Beor: Tiwya ait yno bo mkair re ykai bombra ro ait ksoh.2:15 Tiwya Bileam saso pitis. Tibyo ait tko raa ro Israel afo re ana miranya msya raa ro wase Allah. Tibyo mbtek mno iro. Tna guru weto mno feto mfi Bileam ye. ¹⁶Menohe tiwya, ati ro Bileam yno bo mkair reto to, keledai rait mastako ait. Keledai ja mmai marak. Menohe ati reto, Allah yno keledai reto mmai mfi raa tna mno wa Bileam. Tibyo nabi retait yrok bitsre bo ro mkair yno reto.

Guru ro besruf raa

¹⁷Guru weto mnan fi aya mato ro ja raa mamo mwyan aya. He mfe, aya msa marak. Tna ana mfi bias sai; raa mmat tna mawe kbe oom mais. He mfe. Foos mfi tna bias reto to, smut somya marak. Allah siwyan yuk ro mamur toni mkah bo yawah ana weto beak. Meen ana mhau mam beto mamo snok mam hame wajin. ¹⁸Ana tawyõ ana ai. Ana sioh-nat sai; ja miwro raa mkyas mawe bo ro raa ksoh sai. Ana mhar mawe raa ro tabam refo ja ksoh mno bo masmamo. Tibyo ana saso raa ro tna sai haberek, ro taa sikba mafoh wana ro ja mno bo mkair. Tna Guru weto tko ana re me hah me mno iro. ¹⁹Guru weto tko ana mawe, “Nno bo bawya sai ro anu ksoh. Nri watum aro fee! Raa aro mbo anu u fee! Anu nmo sryan fee!” Menohe guru weto mesait ja mari tak ro misti iro to. Iro mbo ana matak. Mako hawe sai ana mno bo ro mkair. Feto to ana weto ja mfi sryan ye. ²⁰Ana weto tiwya raa ro tabam refo sai. Ana mhaf mato wana mkair. Menohe ti sau ana mashana; ana ksoh mawe Yesus sotak iro wana. Ana mawe kro Tuhan Yesus Kristus. Tibyo bitsre iro ro mno. Mhau tna hah me haberek kbor, kro Yesus u fee. Mfo refo iro mbo ana u. Feto to, meen kair ro mase miwer ro tinyi kbe mai kʼana. ²¹Ro moof miwer to, tiwya ana wase iso ro raa kro re mno bo ro Allah ksoh. Soh feto, meen bo ro mkair kbe mai kʼana. Menohe ana haberek tna mhar kro Kristus. Mhar Kristus tna raabis wAit mkyas bobis ro Allah ybis kʼana weto ye. Tna fo ana me haberek kbor tna mhah me miwer bobis reto. Mno feto tibyo meen kair ro mase toni kbe mai kʼana. ²²Bo ro ana mno to mfi bo ja raa mawe:

“Mtah ja ntoom tna mhah me mait u.” Tna “Fane ro moof ja mhah mamo mate mtum rau.”

Amsal 26:11

Ati ro Yesus yama u

¹Tafoh na wojõ ro jõ ksoh; refo aam ro ewok ro jõ tiim kʼanu oh mefo. Tkom aam trion ewok wefo tee kʼanu tawe tti bonaut kʼanu. Re kbe anu nmat aam wefo tibyo nnaut bo ro moof mam nhaf wanu tna sorni fee. ²Tiwya Allah ybis nabi wAit mama mkyas bo wAit. Jõ tkom aam refo re kbe anu nnaut bokyas wAit weto u. Tuhan sotak iro wanu to. Tna ybis amu, raabis (rasul) wAit to, nmo nkyas bo ro Ait ybis weto kʼanu ye. Tkom aam refo re kbe anu nnaut bobis wAit weto u ye. ³Tna nnaut bo refo, bo ro ati oh mefo: Masno ro tis to, raa ro wase Tuhan kbe sret bokyas ranu. Tna ana kro bonaut rana mesait; bonaut rana ro masmamo. ⁴Kbe ana mawe, “Ja anu nwe Yesus kbe hah yama u ⌞tna yoo safo mana ymit kʼraa.⌟ Menohe mfo refo to Ait yhau mam wore woyõ? Ait kbe yama fee! Hohos wanu tiwya mhau tna fo mhai marak. Tna mfo refo raa mhau tna fo meen mhai ye. Mnan anya sai! Tabam refo to, mhau tu bau feto oh maban tinyi rau Allah yfen no.” ⁵Ana weto mhar menohe mfi bo wase bo, tiwya tinyi Allah watum rAit mfen ayoh skes to. Ykyas sai tna yno aya miyi mamo saim anya tibyo tabam refo frok.3:5 Kejadian 1:6-9.⁶Tna mkah watum rAit reto yno aya mabo mbetru tabam refo ye. Ait sikowah tabam refo oh meto. ⁷Tna mkah watum rAit reto ye, Ait saim yawe meen Ait yoo tafoh yse mait ayoh msya tabam refo. Mam ati reto to, kbe yoo safo mana ymit kʼraa: Raa ro ja mari bo ro Allah yawe to fee, kbe safe marak.

⁸Tafoh na wojõ ro jõ ksoh; nsorni ma: Tuhan ymat ti sau to, yawe mnan tahun trion 1000. Tna ymat yawe tahun trion 1000 mnan anya mkah ti sau sai. ⁹Tuhan ranu tait, soh ysi bosi to, kbe yno tu oh. Ait yyum mabu rau to, menohe Ait sorni fee. Ait yhau ywof anu sai. Ksoh yawe raa beta mashana wia. Allah hawe yawe aro safe mkak fee. ¹⁰Meen Ait yama tubor. Kbe raa siwyan fefares tibyo mrok. Yama ynan raa ro mama msyõf bo. Ati reto to, kbe raa mari bo ro msai toni mji. Tna ayoh mrok marak. Tna bombra ro mhau mam ayoh beta mait marak. Tabam refo msya bombra rau to, kbe mait ye. ¹¹Anu nhar nwe kbe tafoh mait bombra beta marak. Feto kbe nisoh anu kaket. Nno iro ma. Nhau nno bo ro Allah ksoh. ¹²Nhau nno bo weto to, tna kbe anu nhau ste ayõ ro Allah yawe reto to, mkah simaut. Tna nno bo afo re kbe ayõ reto sboh fooh. Ati reto to, kbe Ait yoo tafoh yse mait ayoh. Tna kbe tafoh reto mno bombra beta mam tabam refo meyom-eyom marak ye. ¹³Menohe anu binaut bo ro Allah ysi yawe. Anu ste masno ro meen Allah yfen ayoh ro tna msya tabam ro tna. Mam wore weto to, raa beta kbe mhau mno bo ro Allah ksoh.

¹⁴Tafoh na wojõ ro jõ ksoh; anu ste masno reto. Feto to tomer re nhau mam tabam refo fares to, nno iro u ma. Nber safo aro u ma. Nhau niranya nsya Allah ye. ¹⁵Nnaut nwe Tuhan ranu yhau rere afo re raa roto mkai riof ye. Tiwya Allah yoo bohar yee kʼPaulus, anu bfoh ranu. Tiwya ait ykom aam tiim kʼanu to, ykyas bo weto ye. ¹⁶Ykyas ati ro meen tabam refo haberek mam aam wait ro ykom sor to ye. Bo ro ait ykom to taro raa srau mnaut kaket fee. Raa taro wase Tuhan tna bosmot rana matak fee. Ana weto mmat bo ro samyoh weto to, tna mbetoo maja rau kbik-kbak; ana haberek-barak bawya ro Paulus ykom. Ana mbetoo Bokom ro Allah far-far roto taro sre ye. Mkyas Bokom ro Allah sre tibyo meen Allah yno bo ro samyoh matu mai kʼana.

¹⁷Tafoh na wojõ ro jõ ksoh; anu nhar bo weto oh. Feto to, kaket anu afo re anu kro raa ro miwer watum ro Tuhan to ma. Nri bo mkair ro ana mkyas to ma. Anu ja smot Yesus kaket. Nri bokyas rana ma be kbe bosmot ranu maut-mroh tna kbe nmo tit meto. ¹⁸Jõ ksoh tawe anu nhar Tuhan Yesus Kristus, ro sotak iro wanu to. Nhar Ait kaket renti. Tna ksoh tawe anu nhar boatmof rAit kaket renti ye. Nma, anu bbaut bo yase rAit mamo snok mam hame wajin. Amin: Mabo oh!