2 Korintus

Aam ro Ewok Paulus Ykom tna Tiim Mamoʼt Jemaat ro Korintus

2 Korintus

Paulus ymah meen

¹Aam refo mbam kʼjõ, Paulus. Allah ksoh tibyo jõ tamo raabis (rasul) ro Kristus Yesus rAit. Jõ tsya Timotius nmah meen kʼanu. Timotius fi raa ranu ro ja kro Kristus ye. Amu mbewok nkom aam refo nee kʼanu jemaat ro Allah, mam kota ro Korintus. Amu nkom aam nee kʼanu nmat wia tna nwe anu nee kʼraa ro mhau mam remo makin sor mam provinsi ro Akhaya.1:1 Korintus to kota mam provinsi ro Akhaya. Remo mawat taro sor mhau mam provinsi ro Akhaya reto ye. Nee kʼana ro Allah wAit re ana beta mmat aam refo ye. ²Amu mbewok skabuk Bja Allah nyoh re kbe Ait ysya Tuhan Yesus Kristus matmof anu beta tna mno re anu nhau nhaf tnok sai.

Paulus ysya Timotius mayoh asik mase

³Nma anu bibi Allah! Ait tait Yesus Kristus Yaja. Yesus Kristus tait Tuhan ranu. Tna Allah tait anu Bja ranu beta ro smot Yesus to ye. Boatmof beta to mbam bi Ait yesait aran yum. Tna ati ro anu sraujin to, Ait ykyas bo kʼanu, yno re anu sorni sraujin wanu weto. ⁴Ti aro-aro bo knik-knak ro mkair-kar mama mai kʼanu. Tna raa mno bo ro mkair-kar mai kʼanu ye. Tibyo anu sraujin. Menohe Allah yno re anu sorni sraujin wanu weto. Yno re anu bhaf wanu me simaut u. Yno bo reto afo re anu bhar bno bo reto kʼraa roto ye. Bo knik-knak ro mkair ja mama mai kʼraa. Tna mfo refo soh anu bmat he raa sraujin to, anu bmo bkyas bo moof kʼana bno re ana sraujin u fee. Bno ana me simaut u. Anu be bno bo ro tii Allah yno kʼanu feto. ⁵Kristus tii ykai bo ro mkair-kar mawat. Tna Allah yno re Ait sorni sraujin rAit reto. Anu kro Kristus, tibyo anu fri bo ro mkair-kar mawat mnan fi Ait ye. Reto mnan fi kair ro mama mai kʼYesus msis-sas hofyat tibyo mama mai kʼanu ye. Menohe Allah ja yno re anu be bnaut sraujin wanu u fee. Yno feto kʼanu mnan fi tii yno Kristus ye. ⁶⌞Amu mbewok nkyas riof ro mase kʼraa.⌟ Tibyo ti aro aro kair mama mai kʼamu. Tna ti aro rau-rau Allah ykyas bo moof kʼamu nhaf wamu ye. Ait yawe, “Waa ma. Sraujin ma. Nnaut yyi ma. Bito ntak oh!” Ait yno amu nhaf mnem feto. Yno amu sraujin toni fee. Amu fri kair ye, tna Allah yno amu nhaf wamu me mnem u. Bo ewok weto Allah ybis afo re anu nros ntak smot Yesus. Anu raa ro kro Kristus to, ja fri bo ro mkair, mnan fi bo mkair ro mbtek mai kʼamu mbewok feto ye. Tna Allah ykyas bo moof kʼanu nhaf wanu ye. Yno anu sraujin u fee feto. Ait yno anu nhaf mnem feto. Tis rau to, ati ro anu nkai bo ro samyoh to, anu ntai ntak beroh nsom kair reto. ⁷Ja bo ro mkair-kar mbtek mai kʼanu ye, mnan fi bo mkair ro ja mbtek mai kʼamu mbewok feto ye. Menohe amu nhar nwe kbe Allah yno anu sraujin u fee. Yno feto mnan ja Ait yno kʼamu mbewok ye. ⁸Raa wamu sor: Amu mbewok nkyas bo baro kʼanu, afo re anu nhar arin ro mkair tii amu nkai mam rabin ro Asia Kecil. Ati reto to, raa mno bo ro mkair toni mai kʼamu. Tibyo amu ntak nsom bo ro fanes reto to fee. Amu ntai fee. Tibyo amu nnaut nwe kbe amu nhai. ⁹Ti reto to, amu nnaut nwe ayõ ro amu nhai to kene oh. Menohe amu nhai fee; amu nhau sai. Allah ybis arin ro mkair reto mama afo re amu nhar nwe amu nesait ntak nno riof kʼamu ai fee. Allah yno amu nfos wanu miyõ fares afo re amu nhar nwe Ait oh mi Raa ro yatak yno riof kʼraa tna yatak yno raa ro mhai to, mrok masen. ¹⁰Wore weto to bo ro msai toni mama mai kʼamu. Tibyo amu kene wo nhai. Menohe ati reto to, Allah yno riof kʼamu. Tna mam wore wo bo ro mkair-kar meen mama to, amu nhar nwe kbe Ait yno riof kʼamu sai ye. ¹¹Sik ma nros tis amu mbewok mkah bo skabuk amu. Kbe Allah yari boyoh wanu tibyo yno amu nhau fares. Feto tibyo raa mawat mmat bo ro moof Allah yno kʼamu mbewok. Soh Ait yno re amu nhai fee, kbe ana mayoh asik mase kʼAit sai.

Paulus yawe yama yo kʼana. Menohe yama fefares

¹²Amu mbewok simaut toni nwe amu ja nno bo beta mkah nhaf ro moof sai. Wore amu nhau mam tabam refo to, amu nhau nno bo ro Allah wAit sai. Bo ro ati reto. Tna amu nno bo ro moof kʼanu ro nhau mam kota ro Korintus to, amu sioh anu aro fee ye. Raa ro tabam refo mnaut mawe, “Amu nno bo feto fee; Paulus ysya Timotius wase bo.” He mfe, Allah yatmof amu oh mi amu ntak nno bo ro moof sai. ¹³Amu mbewok nkom aam kʼanu to, amu nkyas bo abyõ sai, re kbe anu srau nhar kaket. Amu nmyõt bo aro fee. Tna jõ tawe ksoh re kbe anu nhar nwe ¹⁴amu mbewok to raa ro nhaf moof. Anu nhar amu kaket fefares. Menohe kbe anu nhar amu kaket. Tna meen ati ro Tuhan Yesus yhah yama u to, kbe anu bibi amu, nwe amu nno bo ro moof syok. Ati reto to, kbe amu mbewok bibi anu beta feto ye.

^15,16Tii jõ tnaut tawe, “Jemaat ro mhau mam kota ro Korintus to, ana ksoh jõ. Feto to, ana ksoh mawe jõ tamo tmat ana.” Tibyo tawe tamoʼt provinsi ro Makedonia to, tna tawe tama tmat anu wia. Tii tawe tamo iti tmat anu ro nhau mam Korintus. Tna thah tama to, tawe tmat anu iti u. Tna mun ro ewok reto to, tawe kbe anu noo boit aro, noo bo ro jõ tawe bo to baro nee kʼjõ, re kbe tbo tamo renti mam provinsi ro Yudea. ⌞Tawe tamo, tama tna tkyas watum ro Tuhan kʼanu u.⌟ Tawe kbe tno bo moof reto kʼanu muhrin ewok. He mfe. Tii tama mun ro ewok reto fee. ⌞Ati reto to, jõ ksoh tawe tama. Menohe tnaut myum-yam mam thaf mato tawe anu taro hawe jõ. Anu nhar jõ kaket fefares. Anu wase jõ thaf moof sai. Mno tibyo tawe rau ro moof to, tyum ati ro tama u.⌟ Feto to tii tama tmat anu muhrin ro ewok reto fee.1:15,16 2 Korintus 2:1.¹⁷Tii tnaut tawe tama to kʼanu. Menohe tama fee; tyum ati ro tama u. Tibyo anu hre nnaut ntu banu nwe fyi? Nno be anu nnaut nwe ja tno tfi raa ro tabam refo sai. Ana weto ja srau ewok. Ana weto ja mawe, “Ae, kbe tno bo reto.” Menohe ana ja mno bo ro ana mawe reto fee. ¹⁸Bo ro Allah yawe yno to, Ait kbe yno tu oh. Tna Watum rAit ro amu nkyas kʼanu to, ja sioh fee ye. ¹⁹Tii jõ tsya Silwanus, ysya Timotius nma nkyas Yesus Kristus yasom kʼanu. Ait fi Ku ro Allah yare. Yesus tait Raa ro srau makin-akan fee. Ait ja ykyas bo mabo rau sai aran. Tna bo ro yawe yno to, Ait yno yum. ²⁰Allah ysi bosi mawat. Tna Kristus tait Raa ro yno bo weto beta. Au oh mi raa ro kro Yesus ja bibi bo yase ro Allah rAit. Tna anu bwe, “Amin: Mabo oh!” ²¹Nnaut nwe Allah oh mi Raa ro ysok anu tna yawe anu bmo raa wAit. Tna Ait oh mi Raa ro yno amu nsya anu bros btak smot Kristus.²²Ait yoo Har rAit yse kʼanu afo re raa mmat tna mhar mawe anu fo raa wAit yum oh. Tna yoo Har rAit yse mjin mam anu bhaf mato wanu ye. Allah yoo Har rAit reto yse matim wia. Yno afo re kbe anu bhar bwe Ait kbe yno bombra sor ro yawe meen mama mrof. Meen yno yum feto oh.

²³Jõ hawe bo tama bhah anu. Tto bo mkah Allah yasom tawe reto oh mi jõ thah te tamaʼt kota ro Korintus fefares to. ²⁴Amu ro nmo raabis ro Allah rAit to, amu hawe bo nbis-baas anu, tko-tka anu nwe, “Smot fefo!” Amu nno feto fee! Nnaut bo reto ma! Amu nhar nwe anu ja nros ntak smot Kristus matak oh. Tna amu ksoh nros tis tna nban anu afo re anu simaut mase.

¹Tiwya tama to kʼanu to, tna bhah anu. Bokyas ajõ mno anu sraujin. Tna mno jõ sraujin ye. Jõ hawe bo tno feto u. Feto to ati reto te tama tmat anu mun ro ewok reto fee. Tyum ti aro. ²Mfi bo jõ tama tno anu sraujin to, kbe awya oh mi ye yno jõ simaut u to? Kbe raa aro fee. Kbe anu beta sraujin sai. ³Jõ hawe tama bhah anu. Tibyo tiwya tkom aam sai ro bhah anu.2:3 Paulus ykom aam ro tinyi (1 Korintus). Raa ro mkom tafsiran aro mkyas mawe Paulus ykom aam roto taro ye. Menohe aam reto mfo refo marak; tibyo raa mse mam Alkitab ranu fee. Mam aam reto ait yafriri raa ro mno bo mkair. Tesait tama fee. Tkom aam reto to, ⌞re kbe raa ro tii mno bo ro mkair weto to, kbe mari tna manwaruk. Manwaruk tna me mno bo ro moof.⌟ Jõ hawe bo tama tkyas bo ro mno anu sraujin. Feto to tama fefares, tyum ti aro. Soh anu ne nno bo ro moof to, tna re ne simaut u to, reto mno jõ simaut mase ye. Anu nhar nwe ati ro jõ simaut mase to, anu ja simaut mase ye. ⁴Tako hawe sai tkom aam reto bhah anu. Jõ ksoh anu toni sai tibyo tkom. ⌞Tkom afo re anu nanwaruk, tna ne saso Tuhan.⌟ Tii tkom aam reto to, jõ srau mham tna yukan mbtek ye, menohe jõ beroh tkom. Jõ hawe bo bokom ajõ mno anu sraujin. Menohe tkom re kbe anu nhar nwe jõ thafri anu.

Ait ro ye yashana u tait, ne niranya nsya ait u.

⁵Raa ro jemaat ranu sait tii yno bo ro mkair. Bo ro yno reto mno jõ sraujin. Tna mno anu ro jemaat Korintus reto beta sraujin toni. Bo ro tawe reto to, jõ tkyas tiryõ ye fee. ⁶Anu nwat nifah ait. Reto mas mafer ro ati kʼait: Tibyo ait yashana oh. Mnan oh. Bhah ait renti u ma. ⁷Mfo refo ntu ait yama tna nbo yatem tna ne niranya nsya ait u. Nkyas bo rere kʼait afo re ait sraujin toni fee. Nno be ait sraujin toni, ⌞tibyo yitsre bosmot rait.⌟ ⁸Tawe nkyas bo kʼait nwe anu natmof ait fares, afo re kbe ait sraujin toni fee. ⁹Aam ro tii tkom tee kʼanu reto to, sanet anu. Tkom afo re kbe thar tawe soh anu nri bo ro tawe beta to, fe mfe a? ¹⁰Soh anu sorni bo ro ait yno tna ne nbo ntem nsya ait to, kbe jõ sorni bo ro ait retait yno to ye. (Ebokmi jõ kmo ait u fee: Safo ro yno reto to mai kʼjõ fee.) Kristus ymat tna yhar yawe jõ tnaut anu tibyo kmo raa retait u fee. ¹¹Anu bhar bwe ja kabes yabi (Iblis) hawe bo anu biranya bsya raa anya. Ait saim bo yawe anu bhaf kair. Feto to, ne nbo raa retait yatem afo re kbe kabes yabi retait besruf anu fee.

Paulus yamoʼt remo ro Troas tna fo yamoʼt provinsi ro Makedonia

¹²Tiwya tamoʼt remo ro Troas. Tamo tkyas Bokyas Moof ro Kristus. Tamo tna Tuhan yno re raa ro mhau mam remo reto ksoh mari bo ro jõ tawe. ¹³Titus tait anu bfoh ranu mam Kristus. Tnaut tawe Titus yatim wia oh, tna ste jõ mam tno. He mfe; ait yarak fares. Tibyo jõ tnaut yyi ait. Yarak fares feto, tibyo thau kait mam remo ro Troas fee. Tmah meen kʼraa weto, tna tasen tamo bojõ mam provinsi ro Makedonia.

Paulus yayoh asik mase

¹⁴Amu mbewok kro Kristus. Ait yamo aban mana ramu. Tna amu noo nhaf wamu nee kʼAit oh. Reto mfi bo Ait yatim wia yamo. Tna amu simaut mase kro Ait mam tis. Allah yno Kristus yase yros yatak abyõ. Tna amu nros ntak su nsya Ait ye. Tna raa ro byoh mhau mte. Tayoh asik mase kʼAllah. Mam woyõ-woya amu mbewok nmo to, amu nkyas Bokyas Moof ro Kristus kʼraa. Amu nkyas Ait yasom afo re ana mhar Ait ye. Bokyas Moof reto to, mfi bo ro sawer moof. ¹⁵Amu mbewok nkyas Bokyas ro Moof reto. Amu nkyas bo reto tna Allah ksoh. Soh Kristus yesait ysan bo kʼAllah to, Ait ksoh bo reto toni. Amu mno bo ro Kristus ybis yawe. Feto to ati ro amu nno bo weto to, reto mnan fi Kristus yesait ysan bo ro sawer kʼAllah ye. Tna ntwe rau to, raa ro mkai riof ro mase to, ana masan ye. Tna raa ro mamo mam iso ro mkair to, ana masan ntwe rau to ye. Menohe ana hawe. Tibyo kbe ana safe mkak to. ¹⁶Raa ro mkai riof to, ana masan ntwe reto mnaut mawe, “Bo ro sawer reto to! Bo moof ro mno riof kʼamu.” Menohe raa ro kbe safe mkak to, ana masan ntwe rau to, mnaut mawe, “Bo mnis! Bo ro meen mno amu safe mkak!” Amu raabis ro Allah fo, nesait ntak nno bo ro msai refo to fee. Anu beta fo raa tu sai. Anu aro besait btak bkyas Bokyas Moof ro Yesus fee.2:16 2 Korintus 3:4-6 mbetoo mawe Allah yesait oh mi yoo tak yee afo re raa mtai mkyas Bokyas Moof ro Yesus.¹⁷Guru taro mno bo ro mkair. Ana mawat saso pitis sai tna reto oh mi ana mkyas bokyas ro Allah. Menohe amu fo raa ro srau ewok fee. Allah oh mi ybis amu nkyas bokyas rAit to. Tibyo amu nfi sryan ro Kristus wAit nmo nkyas bokyas refo. Amu nhar nwe Allah yros ymat sas amu.

Bosi ro Tna msya Bosi ro Tinyi

¹Ti aro-aro to, guru ro srim mama ⌞mawe mkyas watum ro Allah mam jemaat ranu.⌟ Ana ja bibi ana ai afo re anu nnaut nwe ana to raa ro mhar bo. Tna guru ro srim weto to, baro mama moo aam (surat perkenalan) mee kʼanu nmat. ⌞Aam wana weto to mbam jemaat wana ro mhau fari. Raa manes mam jemaat wana mam wono tii mkom aam weto. Mkom aam bibi guru weto. Bibi ana afo re kbe anu nhar nwe ana weto to raa ro moof.⌟ Menohe anu ro nhau mam kota ro Korintus nhar amu mbewok oh. Feto to amu nma bibi amu nesait ai fee. Tna amu nma nerif aam (surat perkenalan) kʼanu feto fee ye. ²⌞Tiwya anu wase Kristus. Tna amu nma nkyas Ait yasom kʼanu. Tibyo anu nashana. Au oh mi anu nhar nwe amu fo raabis ro Allah tu oh.⌟ Tna raa beta soh ana mmat anu to, mmat he mfo refo anu nhaf, srau wanu to moof. Mmat feto tibyo ana weto mhar mawe bo reto mbam bokyas ramu ro anu beta nri. Feto mi ana mhar mawe amu fo raabis ro Allah to ye. Mhar mawe tii amu nkyas watum rAit kʼanu kaket. Anu beta nhar bo ro amu ja nno oh. Feto to, amu nbo aam (surat perkenalan) aro noo nee kʼjemaat ranu nmat to fee. Amu nno mkah bawya? Tna amu nyoh nwe anu nkom aam ro bibi amu fee ye. Amu nwe nbo aam re kbe jemaat roto mmat to mkah bawya? ⌞Amu nno bo nfi guru ro anu wase fares weto fee.⌟ Amu nhar mam amu nhaf mato wamu to, nwe mfo refo anu kro Kristus.³Anu nrok smot Kristus. Tna raa mmat he anu nhaf, srau wanu to mrok moof. Reto mnan fi Kristus yesait ykom aam sau. Amu mbewok oh mi ro tiwya nma nkyas Ait yasom kʼanu. Reto mnan fi anu nesait oh mi ’aam’ ro Ait ykom reto. Aam reto mkyas amu ye mawe amu oh mi raabis wAit. Allah tait Allah ro yaam. Tna Har rAit oh mi Kristus yoo yama ykom aam reto. Yoo bokom msya tinta ykom abyõ mam aam fee. Ykom abyõ mam fraa fee ye.3:3 Mnan si tiwya tinyi Allah ykom watum ntraa mam fraa trion ewok. Ait yse watum rAit mam anu nhaf mato. (Reto mnan fi Ait ykom yno mayir abyõ mam raa mhaf mato.) ⁴⌞Amu mbewok nhar nwe anu nrok smot Kristus tu oh. Tna Har ro Allah mama mhau mam anu nhaf mato ye.⌟ Kristus oh mi yno re amu nhar bo weto. ⌞Feto to amu nhar nwe Allah oh mi ybis amu nmo nkyas Bokyas ro Moof reto kʼanu.⌟ ⁵Amu nkah armato ro Tuhan mkah tak ramu ai fee. Allah oh mi yno bo aro sor ro amu nkah to, tufrok mafer ro moof. ⁶Allah yno amu srau tna ntai re kbe mbetoo Bosi ro Tna kʼanu. Bosi ro Tinyi reto tii Allah ykom mam fraa. ⌞Au oh mi Watum ro Musa.⌟ Tna soh raa miwer bobis aro ro ybis tinyi weto to, misti re raa weto mhai. Menohe Bosi ro Tna reto to, Allah ykom mam fraa fee. Har rAit yesait mno re raa srau watum rAit. Har rAit matak mno afo re meen raa mhau hame wajin. Feto oh mi Allah yawe amu mbetoo Bosi ro Tna reto kʼanu. ⌞Au oh mi Bokyas Moof (Injil) ro Yesus.⌟

⁷Tiwya Allah ykyas Watum ro Tinyi kʼMusa. Tna ykom yiir abyõ mam fraa. Tna Musa ymat bo yase ro Allah rAit, tibyo Musa yesait yasu ynaif mrok mawyah.3:7 Keluaran 34:34-35. Bosi ro Tinyi reto misti re raa mhai. Menohe Bosi reto to, matak tna mbetoo Allah yase rAit ye. Ti baro firwas tna Musa yasu ynaif ro mawyah reto to, kren rau mroh maku baro. Maku baro menohe raa ro Israel mtai mros sayõ ait yasu rait kaket fefares. Yasu rait kren toni fares. ⁸Bosi ro Tinyi reto mbetoo Allah yatak rAit. ⌞Menohe Bosi reto to, matak misoh raa mhaf, srau wana to fee.⌟ Tna misti re raa mhai. Menohe mfo refo Allah yno bo wAit mkah Har rAit. Reto mbetoo bo yase ro Allah rAit to moof miwer. ⁹Bosi ro Tinyi reto to, moo safo mana mmit kʼraa. Menohe Bosi reto mbetoo bo yase ro Allah rAit ye. Mfo refo Har rAit mbetoo Iso ro Tna. Iso ro Tna reto to, Allah ⌞ymat mees ro Yesus tibyo⌟ yawe raa mhaf moof ati oh. Tibyo Allah ymit safo kʼraa ro mhaf moof weto fee. Iso ro tna refo fo, mbetoo bo yase ro Allah rAit reto moof miwer Bosi ro Tinyi reto. ¹⁰Jõ tmat Bosi ro Tinyi reto tna Iso ro Tna refo to, tnaut tawe ro Tinyi to, merif bo yase ro Allah rAit to, kaket fee. Tna Iso ro Tna refo merif bo yase ro Allah rAit reto kaket. ¹¹Tii Musa yasu ynaif mrok kren toni. Ti baro firwas tna kek reto mawyah maku sai baro. ⌞Au oh mi anu bhar bwe Watum ro Tinyi matak rau to mroh kebet-kebet.⌟ Menohe Iso ro Tna reto merif bo yase ro Allah rAit mamo snok mam hame wajin. Tibyo mase rau to moof tna matak toni.

¹²Amu mbewok ninaut nwe Iso ro Tna refo meen mhau mamo snok mam hame wajin. Amu nhar bo reto, tibyo amu nkyas Iso refo yoyo. Amu shait fee. Amu waa fee. ¹³Tii Musa yoo hawee mabuf tna burut wa yasu ynaif. Ait yhar yawe kek reto mroh mroh tibyo burut wa yasu ynaif. Ait ksoh raa ro Israel mnaut mawe kek reto mhau fares. Ait hawe ana mmat bo kek reto mroh mamo marak. Menohe amu nno feto fee. ¹⁴⌞Amu nhar nwe Bosi ro Tna, matak rau reto meen mhau tibyo hame wajin. Kbe mroh marak fee.⌟ Menohe tiwya raa ro Israel weto to srau bokyas ro Allah fee. Ana makit mbin. Tna mamo snok mam mfo refo ye, raa ro Israel mmat Bokom ro Musa fares ye menohe srau Bosi ro Tinyi reto fefares. Bo sau burut wa ana makit wana. Tibyo ana wase Allah. Bo reto mnan fi hawee ro mno wa. Tibyo raa mahni bo yase ro Allah rAit. Kristus yesait aran oh mi Raa ro ytai matak yrus hawee reto afo re raa srau Bokyas ro Allah. ¹⁵Mamo snok mfo refo, ati ro raa ro agama Yahudi mmat Bokom ro Musa reto, bo burut wa ana makit wana, afo re ana srau bokom reto fee. ¹⁶Menohe soh raa haberek tna mamo mo kʼTuhan to, kbe Ait yrus hawee reto. ¹⁷Tuhan tait Har. Soh Har rAit reto mjin mam raa mhaf wana to, kbe ana mamo mo kʼAllah to, bo aro burut iso reto wa u fee. ¹⁸⌞Amu nfi Musa fee. Tii Musa yoo hawee mabuf tna burut wa yasu rait.⌟ Menohe anu bmat bo yase ro Tuhan rAit. Anu bmat Iso ro Tna mase rAu. Tna Har rAit moo bo yase rAit baro mse kʼanu ye. Tibyo ati ro raa mmat anu to, ana mmat bo yase ro Tuhan rAit oh meto. Anu bfi bowane oh meto. Tuhan tait Har. Har rAit ja mhau misoh anu. Misoh, misoh anu fo, mno anu haberek bmo bfi Yesus. Reto oh mi Har rAit reto mno bo yase ro Tuhan rAit ro mse kʼanu oh to, mawyah rau maut, maut mase renti.

Paulus ysya Timotius mamo mkyas bo ro Har mno

¹⌞Allah yoo Har rAit yse kʼraa mhaf wana.⌟ Yno feto tibyo amu mbewok nmo tna nkah bo wAit, nmo nkyas Bosi rAit ro Tna reto. Amu hrowyõ saah, menohe amu beroh nkah bo wAit. Bitsre fee. Ait yatmof amu. Tibyo amu ntai matak nmo nkyas Bosi rAit ro Tna renti. ²⌞Raa taro mawe amu mbewok ja besruf raa.⌟ He mfe. Amu hawe bo nno bo ro mkair, hawe bo besruf raa. Amu nkyas bokyas ro Allah to, amu sioh niryõ maja aro fee ye. Amu nkyas watum rAit to, nkyas abyõ sai. Allah ja yros ymat sas bo ro amu nno. Feto kbe raa mhar mawe amu nkyas bo refo mabo. ³Raa taro to, bo sau ja burut wa ana masu wana afo re ana wase Allah. Bo reto mnan fi hawee ro mno wa. Tibyo masu mti. Ana weto mhar Allah kaket fee. Tibyo ana kbe mari bo ro amu mbewok ja nkyas to fee. Ana weto srau Bokyas Moof refo fee. Tna meen ana mkai riof fee ye. ⁴Kabes yabi (Iblis) tait yfi allah ro ybo tabam refo. Tna ait besruf ana weto beta. Ait burut wa masu wana afo re mmat bo yase ro Kristus rAit fee. Au oh mi yno re ana mari tna srau Bokyas Moof ro Kristus reto (Injil) fee. Kbe ana srau wase bo Kristus tait ynan fi Allah. Masu maah fee. ⁵Amu mbewok nmo, nmo to, ja nkyas amu nsom wamu fee. Amu nmo to, nkyas nwe Yesus Kristus tait Tuhan4:5 ‘Tuhan’ to mai ro Indonesia; raa masom fee. ‘Tuhan’ to gelar ro raa mkyas kʼraa ro mase tna mbo ana. Mnan anya msya ‘tuan’ mam mai ro Melayu. Tiwya tinyi fnya sor mkyas bo kʼmaa na, mtu ana mawe ‘tuhan’. Tna sryan ykyas kʼbobot ro ybo ait to, ytu yawe ‘tuhan’ ye. Nmat Lukas 6:46; 1 Petrus 3:6. ro yase ybo raa. Yesus ybis yawe amu nma nkah armato rAit mam kota ro Korintus. Ybis yawe amu nma nros tis sai tna nban anu. ⁶Ati ro Allah yfen tabam refo fo, Ait yawe sai yawe, “Maah!” Tna mabo: Maah mbrah nenat mama.4:6 Kejadian 1:3. Ait oh mi Raa ro yno kek mawyah mram anu bhaf mato wanu ye. Yno bsu maah re bhar bo yase ro Allah rAit. ⌞Anu bmat kek reto mam Musa yasu rait fee;⌟ bo yase ro Allah rAit reto anu bmat mam Kristus yasu rAit.

Bo satoh ro mabyoh maut to, Allah yse kʼanu bbo

⁷⌞Amu nhar Bokyas ro Moof reto (Injil).⌟ Nhar nwe bo reto to, bo ro mabyoh maut toni, mfi bo satoh. Menohe amu mbewok fo raa sei sai. Amu nse nfi Allah fee. Allah yerif yase rAit kʼamu raa sei sai, ro ja ntak fee. Tak rAit reto yse kʼamu. Reto mnan fi raa moo bosatoh ro mabyoh maut to, mse mam kusia mato. Ja kusia to matak fee, mhau kait fee. Allah yno bo refo afo re raa mhar mawe tak rAit ro msai toni reto to, mbam kʼamu fee, mbam kʼAllah yesait. ⁸Amu fo raa sai. Amu ntak fee. Tna kbe meen amu netsu wamu nhai ye. Tna bo ro mkair ja mai kʼamu mbewok. Bo aro rau-rau mama mai. Menohe amu btek nwe fee. Ti aro bo mno amu namboi, tibyo amu wase bo bawya ro kbe amu nno. Menohe amu beroh nno bo ro moof sai. ⁹Raa mawat knait amu. Menohe Raa sait yhau yatam amu fares. Raa ro byoh mai amu tibyo amu btek nwe. Menohe amu njat fee, amu nhau naam fares. ^10,11⌞Amu mbewok smot Yesus tibyo ja nmo, nmo nkyas yasom rAit. Nkyas yasom rAit yoyo tna raa taro hawe bo mari.⌟ Ana weto mno bo mkair-kar mai kʼamu mbewok. Amu nhau mam tabam refo to, ja bo ro mkair-kar mai kʼamu, mnan fi tii bo ro mkair-kar sor mai kʼYesus ye. Ait raa mame yajat ye oh. Menohe yrok yasen. Amu raa sai. Tna kbe meen amu netsu wamu nhai ye. Menohe amu nhar nwe tak ro mno Yesus yrok yasen reto to, ja mros tis mban amu fo ye. Mban amu afo re amu beroh ⌞smot Ait tna nkyas yasom rAit renti.⌟ Amu nno feto afo re kbe raa mmat yatak rAit ro yse kʼamu. Soh raa mmat yatak rAit ro yse kʼamu to, kbe ana mhar mawe Ait yesait yhau yaam fares ⌞tibyo smot Ait ye. Raa taro hawe bo mari amu nkyas Yesus yasom.⌟ Tibyo ana ja mayõ hre saim-sam bo mawe mame amu njat. ⌞Menohe amu nhau naam fares tna beroh nkyas yasom rAit renti.⌟ ¹²Feto tibyo amu wase nwe tija kbe amu njat. Menohe amu nsom bo ro fanes reto afo re anu kbe meen nkai riof ro mase reto.

¹³Mam Bokom ro Allah raa sait ykyas yawe, “Jõ smot Allah. Tibyo tkyas kʼraa tawe, ‘Jõ fi raa ro smot Allah.’”4:13 Mazmur 116:10. Amu mbewok smot Allah ye. Tna nhar nwe meen Ait yno amu nrok nsen. Tibyo amu nkyas bokyas rAit reto ye. ¹⁴Amu mbewok nhar nwe tii Allah yno Yesus yrok yasen. Tna nhar nwe meen Allah yno amu nrok nsen mfi feto ye. Anu to raa mana ro Kristus ye. Feto kbe meen Allah yno anu beta nrok nsen ye. Meen yakah anu beta yamo yo kʼAit. Yse anu bros su mam wore wo Ait yhau. ¹⁵Amu nsom bo mkair ro mama mai kʼamu. Nsom sai afo re anu nsya raa taro nri Bokyas Moof ro Yesus. Tna re kbe raa mawat mkai boatmof ro Allah rAit ye. Raa mkai boatmof rAit reto to, tna ana mkyas yasom rAit, mbo faram renti. Tna fo raa roto fri boatmof rAit ye. Tis rau to, raa msis-sas mayoh asik mase kʼAllah tna mkyas yase rAit ye.

¹⁶Feto to, amu mbewok nkyas Tuhan yasom rAit renti feto. Amu nkah bo wAit fo, bo mkair-kar aro sor mbtek mai kʼamu. Tna amu nrok hrowyõ ye. Menohe amu nhau nkah bo mam armato rAit renti fares. Bitsre fee. Amu netsu wamu hrowyõ-rawa. Netsu wamu wefo kbe meen mkair tna fo amu nhai. Ti aro rau-rau amu sraujin ye. Menohe ti firwas ti Tuhan yisoh amu nmos wamu fo, yno re me matak. ¹⁷Mfo wefo bo ro mkair-kar sor mai kʼamu. Menohe amu nnaut nwe, “Mbau a; bo ro mkair weto mai kʼamu rof, kbe meen mhau kait fee. Kbe meen amu nhaf nse bo ro moof miwer mamo snok mam hame wajin.” Soh amu nnaut tna nnit bo ewok reto to, amu nnaut nwe, “Bo mkair-kar ro mai kʼamu mam tabam refo fo, bo ro samyoh kʼamu fee. Bo weto to mfi bo ro mnan-nan sai; bo ro ati fee. Kbe marak fooh. Tna bo samyoh ro amu mfo refo beroh nsom weto to, kbe mno mafer ro moof. Meen amu nhaf nse bo yase ro Allah wAit mase miwer.” ¹⁸Amu nmat sas bo ro ja raa mahni, bo ro amu nsu nmat fefares. Au oh mi amu beroh nnaut bo moof ro meen mama. Amu nnaut bo weto yoyo. Bo weto to meen mhau mamo snok mam hame wajin. Bo ro ja amu nmat mam tabam refo fo kbe mhau waor sai.

Meen anu bhai tna kbe Tuhan yoo betsu ro tna yee kʼanu

¹Anu betsu wanu mfi amah ro manyah tibyo mantrat. Amu mbewok nhar nwe, kbe meen amu nhai tna amu netsu wanu wefo mnis makus. Reto bo ro ati fee. Meen anu beta sikba tabam refo. Menohe Allah siwyan wore wo meen anu bhau mam sawro rAit oh. Reto mnan fi amah ro matak. Mnan fi amah ja raa mfen fee. Tna ’amah’ wanu weto meen mhau mroon mamo snok mam hame wajin. ²Anu bnaut bwe bhau mam tabam refo fares to, bo ro samyoh toni. Anu bwia tna srau kero bwe bse betsu wanu ro tfia. Anu bnaut bwe, “Fooh re Tuhan yoo anu bestu wanu ro moof, yee kʼanu.” ³Meen anu bhai tna bmo bhau mam sawro ro Allah to, kbe anu bmos wanu mesait aran mhau fee. Meen Allah yoo betsu ro tna yee kʼanu. ⁴Mam tabam refo fo, anu betsu wanu wefo matak fee. Kbe bhai. Menohe anu hawe bo bhau betsu marak sai. Feto to anu bwia tna srau kro bwe bse betsu wanu ro tna. Reto mfi ’amah’ ro matak. Anu betsu wanu ro tna to, meen mhai fee. Betsu wanu ro tna weto kbe mhau mamo snok mam hame wajin. ⁵Allah yesait oh mi yawe ksoh kbe meen yoo betsu wanu ro tna weto yee kʼanu byum. Tna mfo wefo Ait yoo Har rAit yse kʼanu. Yse wia matim afo re anu bhar bwe bo ro yawe meen yno reto to, kbe yno tu oh!

⁶Amu mbewok nhar nwe bo refo meen mabo. Tibyo amu waa fee. Tna amu nhar nwe wore wo amu nhau mam netsu wamu wefo fo, amu nhau mam tabam refo fares. Amu nmo nhau su nsya Tuhan mam sawro rAit fefares. ⁷Amu nhau mam tabam refo to, amu nahni tna nwe bo reto mabo fefares. Menohe amu nhar nwe bo reto meen mabo tu oh. ⁸Nhar bo reto tibyo amu waa fee. Amu nnaut nwe soh amu nhai to moof. Feto kbe amu nmo nhau su nsya Tuhan mam sawro rAit. Nhau mam wore weto to moof miwer amu nhau mam tabam refo. ⁹Rau ro ati to, amu beroh nno bo ro moof afo re kbe ja Ait yhaf mnan kʼanu. Amu ksoh nno bo ro moof yoyo; mam tabam refo ye tna meen mam sawro rAit ye. ¹⁰Bko hawe sai meen anu beta bmo bo Kristus. Tna Ait ytu srah wanu. Tna ymit safo kʼraa ro mno bo ro mkair mam tabam refo. Tna ysan bo moof kʼraa ro mno bo ro Ait ksoh, bo ro Ait yhaf mnan.

¹¹Amu mbewok nhar bo reto. Feto to amu waa Tuhan, tna nkyas Ait yasom. Amu nwe kʼraa nwe, “Nashana oh!” Allah yhar amu nhaf mato. Tna jõ ksoh tawe anu nhar amu nhaf mato ye: Nhar nwe amu nma no kʼanu to, mkah nhaf wamu ro moof. Amu raa ro srau ewok fee. ¹²⌞Guru taro miwana amu, mawe amu mbewok nwe besruf anu. Menohe mfe. Ana wase amu nhaf wamu.⌟ Ati ro Guru weto mnit raa to, ana ja mmat raa metsu mne sai. Ana mmat raa yasom rait, msya bobot rait bo to. Mmat bo weto sai, tna mawe ana mesait raa ro moof. Tibyo ana miwana amu mbewok. Amu nkom aam refo nkyas amu fefo afo re anu nhar amu kaket. Tna re anu nhar nwe kbe ne nkyas bawya kʼraa ro miwana amu. Amu ksoh nwe anu nhar amu kaket afo re anu nhar nwe amu nhaf wamu moof. Amu ja hawe bibi amu ai fefo. Menohe sik ma nri amu bibi amu wia. Amu nnaut nwe soh anu nhar amu kaket to, kbe anu nksoh amu tna nros tis kʼamu kaket ye. ¹³Soh raa mamus amu, tna mawe amu nkit mkair to, mbau a. Bo ro ana mnaut mawe to, bo ro ati fee. Thar tawe bo ro ja amu mbewok nno weto to, bo ro Allah ybis yawe. Raa taro mawe amu nkit moof. Nnaut nwe bo ro amu ja nno to, nno afo re mafer moof kʼanu. ¹⁴Amu nhar nwe Kristus yatmof amu. Au oh mi amu ksoh nwe nno bo bawya ro Ait ybis. Amu nhar nwe Ait yajat tna mafer mawat kʼraa beta. Raa sait aran yajat menohe reto mnan mfi raa beta mhai oh ye meto. ¹⁵Kristus yajat afo re mafer moof kʼraa beta. Yno afo re raa ro mhau mam tabam refo fares to,5:15 Roma 6:4. kbe mno bo ro moof kʼana mesait aran u fee. Tna kbe mno bo ro ana mesait aran ksoh mno to fee ye. Yajat afo re ana mhau mno bo ro Kristus yhaf mnan. Tii Ait yajat tna yrok yasen. Reto oh mi mno re kbe mafer msis kʼana weto.

¹⁶Tiwya amu mbewok nwase Kristus fares to, amu bonaut wamu mfi raa ro tabam sai. Tna ati reto, soh amu mbewok nnit raa to, amu nnit kaket fee: ⌞Ati reto amu nmat raa yasom rait tna msya bobot rait bo feto sai.⌟ Menohe mfo refo amu nhar nwe, ⌞rau ro ati to: Anu raa kbe bhau bno bo ro Kristus ksoh.⌟ Feto to, mfo refo ati ro amu nnit raa to, ⌞amu nmat sas raa mhaf mato wana.⌟ Tiwya soh amu mbewok nnit raa to, ja nmat ait mkah amu nsu wanu sai. Tibyo amu nnit bo ro yetsu mne sai. Tii amu nnit Kristus feto ye. ⌞Ati reto to, amu nnaut nwe Ait tait raa sei sai.⌟ Menohe mfo refo amu nnit Ait feto u fee. ⌞Mfo refo amu nhar nwe Ait tait Tuhan ro ybam Allah yama.⌟ Tna mfo refo soh amu nwe nnit raa to, ⌞amu nwe nhar ait yhaf mato rait.⌟ ¹⁷Raa ro tabam refo to, ja mhaf wana to mkair. Menohe awya ro kro Kristus to, kbe yamo srau sau, yhaf sau su ysya Ait. Allah yno ait yhaf rait to, haberek. Raa retait yhaf ro tii tinyi mkair reto to, haberek mamo moof kaket. Feto to, awya ro kro Kristus to, yfi bo Allah ye yfen yhaf, srau rait u. Ro tinyi to mamo firwas. Raa retait yhaf, srau rait masen mfi Kristus yhaf, srau rAit ye. Bombra ro tii ro wia smut marak beta. Allah yno yhaf rait mrok tna sai. ¹⁸Allah oh mi yno bo ro moof weto beta to. Yno anu be biranya bsya Ait. Ait ysan Kristus. Tna yitsre raa mame yajat afo re anu be biranya bsya Ait. Tna Ait ybis amu mbewok yawe amu nmo nkyas bo weto kʼraa. ¹⁹Amu nkyas nwe, “Kristus yno iso ro tna. Tna Allah ytu raa beta yawe ana mamo mam iso reto re kbe me miranya msya Allah. Ait ysan Yesus tna raa mame Ait yajat. Yno feto tna safo ro raa mno to, meen ait ymit kʼana fee.” Ait ybis amu nmo nkyas bokyas reto kʼraa. ²⁰Tna re amu nmo raabis ro ja mkyas Kristus yasom kʼraa. Reto mnan fi amu nsoh wamu nkyas bo ro Allah yawe kʼanu. Amu soh-soh anu nwe nnaut bo ro Kristus yno reto to, tna nse mam nhaf mato wanu oh! Allah yawe anu ne niranya nsya bi Ait. ²¹Nnaut nwe Kristus tait Raa ro yno iro aro fee. Menohe Allah yatmof anu tibyo ybis Kristus yama. Yama tna Allah yno Kristus yasom iro wanu ro bno. Tii yama yno bo reto re kbe meen Allah ymit safo aro kʼanu fee. Allah ymat mees ro Kristus tibyo yawe anu bfi raa ro mhaf moof ati.

Paulus ysya Timotius mkah armato ro Tuhan

¹Amu mbewok nkah armato ro Allah su nsya anu. Amu nkyas watum refo kʼanu nwe, “Anu fri boatmof rAit oh to. Tna boatmof reto to, nbo sibosom-bosam sai to ma!” ²Tii mam aam ro nabi Yesaya to, Allah ykyas wore wo Ait ysan riof kʼraa. Yawe:

“Mam wore wo Jõ ksoh tawe tatmof anu to, Jõ tari bo ro anu skabuk. Mam ati ro Jõ ksoh tawe tno riof kʼanu to, Jõ tama tban anu.”

Yesaya 49:8

Tna amu mbewok nwe kʼanu nwe, “Nri oh: Allah siwyan oh yawe yatmof raa. Masno ro tii yawe ysan riof kʼraa to, mfo refo mama oh. ⌞Ait yno iso reto oh.”⌟ ³Amu mbewok nkah armato ro Allah rAit to, ja amu nno kaket. Amu nno bo ro moof sai, afo re raa mmat tna ksoh mawe smot Yesus ye. Mfi bo amu nno bo ro mkair to, kbe raa mkyas-kas amu. Tna ati ro amu nkyas Yesus yasom to, kbe raa hawe bo mari. ⁴Amu mbewok fo raabis ro Allah. Nmat bo ro amu nno, afo re anu beta nhar nwe amu ksoh nno bo wAit sai. Bo bawya ro Ait yawe to, amu nri tna nno: Ti aro amu mbewok nsom bo ro samyoh. Ti aro bo ro mkair-kar mbtek mai kʼamu. Bo ro msai mama mai kʼamu, tna amu beroh nno bo ro Ait yawe. ⁵Tii raa moo too mmok amu ye. Tna ti aro-aro to, raa mfot amu, mbu mam bui mato. Raa hafrah bo ro amu nwe ye tna mno raa mafa. Amu ja nkah bo mawat, tna njin kaket fee. Tna boit ro niit mnan fee ye. ⁶Bo weto mai kʼamu menohe amu ja nhau nhaf moof sai: Amu nhau nto mboh sai ye, tna amu mur-mur nri tna nhar bo ro Allah yawe. Tna amu nhau nno bo ro moof sai kʼraa. Tna mam wore kair mama mai kʼamu to, amu kanyin sai. Har ro Tuhan mjin mam amu nhaf wamu ye. Tna amu ja natmof raa ye, mkah srau ewok fee; mkah srau sau sai. ⁷Amu mbewok ja nkyas watum ro Allah: Amu nkyas bo mabo yum oh. Tna Allah yatak rAit mhau kʼanu. ⌞Raa ro byoh mamus amu.⌟ Menohe amu fo nhau nhaf moof sai bamu. Amu nhau nno bo ro Allah yawe sai. Amu mbewok nhau nhaf moof sai bamu. Reto mnan fi ’sbe’ ro Allah yse kmot wa amu. Tna reto mfi bo sbe ro bewas wa bokyas ro mkair-kar ja raa mkyas mai kʼamu. Amu nhau nhaf wamu moof to, reto mban wa raa ro mhoh byoh mama. ⁸Ti aro to, raa miwana bo ro amu nwe. Ti aro raa maun amu mawe amu fo besruf raa sai. He mfe; amu ja nkyas bo abyõ sai, nkyas bo mabo yum oh. Fyi-fya sai raa mamus amu to, ⌞amu mbewok ja nri bo ro Allah yawe tna nno sosor.⌟ Raa taro mawe amu fo noof. Raa taro bibi amu. ⁹Amu raa ro nsom marak. Raa taro wase amu. Menohe raa taro mnaut mawe amu raa ro nse. Rabu wawa raa kmo amu. Ana saim mawe kbe mame amu njat. Menohe mamo snok mfo refo amu mbewok nhai fefares. Bo ro samyoh weto sor mai kʼamu. Menohe amu nhau naam sai bamu fares mefo. ¹⁰Bo mno amu sraujin ye, menohe ja amu simaut fares ye. Amu fo raa kinyah sai, ro nse bo kebet sai. Menohe Tuhan yoo bohar rAit ysan kʼamu mbewok. Bohar reto mnan fi bo satoh ro mabyoh maut. Amu ja nkyas watum ro Allah reto kʼraa mawat. Amu nsan bo satoh refo saim kʼraa mawat oh meto. Tibyo ana beta masen bobot. Amu nse bombra aro fee. Menohe amu fri bo ro moof mbam Tuhan. Reto moof miwer toni sai.

Nrat su nsya raa ro wase Allah to ma

¹¹Raa wamu ro nhau mam kota ro Korintus; riwai amu mbewok nkyas bo abyõ sai. Amu nkyas feto afo re anu nhar amu nhaf srau wamu. ¹²Amu noo nhaf wamu mbewok nee kʼanu oh. Menohe anu to noo nhaf wanu nee kʼamu fee. ¹³Jõ tkyas bo refo kʼanu mfi fo anu beta ku wojõ ro jõ tatmof. Jõ ksoh tawe anu noo nhaf wanu nee kʼamu si ye.

¹⁴Raa ro smot Yesus fee to, nno irat ranu nsya ana to matak ma. Raa ro ja mari bo ro Tuhan yawe, tna msya raa ro ja mno bo ro mkair-kar to, ewok weto to mnan anya fee. Raa ro mhau mam kek ro Tuhan to, mhaf wana sau su msya raa ro mhau mam wore wo mamur to fee. ¹⁵Kristus yhaf rAit mnan anya msya Belial fee.6:15 Belial to mai ro Ibrani, mawe ’ro mkair’. Mam bokom ro bose roto taro, soh raa mkyas Iblis to, ana mtu yasom rait Belial. Yhaf rAit hayah sai. Feto ye raa ro smot Kristus ja mhaf wana to mhau hayah msya raa ro smot Ait fee. ¹⁶Berhala msya bo ro tabam ja raa skabuk to hayah. Tna Samu ro Allah reto hayah. Mfo refo anu beta fo haberek bmo samu ro Allah yhau oh meto. Allah tait Allah ro yaam.

Tiwya Tuhan Allah yawe,

“Meen Jõ thau su tsya raa woJõ. Jõ oh mi tesait thau tatam ana. Ana weto meen smot Jõ. Tna kbe ana mamo raa mana woJõ.”

Yehezkiel 37:27

¹⁷Feto to Allah yawe,

“Tufrok mbam raa ro wase Jõ. Nhau su nsya ana weto ma. Nbo bo wana ro mkair aro ye to ma. Nno feto tna Jõ thaf reo to, titrah thaf tawe Jõ ksoh anu nma no kʼJõ.”

Yesaya 52:11

¹⁸Tuhan Allah tait Raa ro yase ybo bombra beta. Tna Ait yesait ykyas yawe,

“Nno feto tna kbe Jõ tfi anu Nja ranu ye. Tna kbe anu nfi ku sme woJõ msya ku ro ano woJõ ye oh meto.”

2 Samuel 7:14

¹Raa wamu, ro amu mbewok ksoh; tii Allah ysi bo weto kʼanu oh. Yawe Ait yfi anu Bja ranu. Feto to nisoh nhaf, srau wanu kaket. Bo knik-knak ro mno anu netsu wanu mkair to, beak fari. Bo ro mkair sor ro anu nno to, nitsre makus oh! Nisoh netsu wanu ye, nhaf wanu ye. Anu beta waa Allah. Feto to, nisoh nisoh anu re nhau nno bo wAit yoyo sai.

Allah yisoh yno re raa sraujin u fee

²Noo nhaf wanu nee kʼamu mbewok. ⌞Raa taro mawe amu fo raabis ro Tuhan fee. Nri ana ma.⌟ Ana mamus amu, mawe amu nno bo ro mkair. Mawe amu saso pitis sai tibyo besruf raa sai mefo. Menohe mfe. Amu nhaf mato wamu moof toni sai, amu sikowah tna besruf raa fee. Amu ja sioh raa aro fee. ³Tkyas bo refo besus kʼanu fee. Amu mbewok ksoh anu toni. Mam wore wo amu nhau mam tabam refo fares to, amu nnaut anu yoyo. Soh fyi-fya sai to, kbe amu njat su nsya anu ye tu oh. ⁴Thar tawe anu ro nhau mam kota ro Korintus to, kbe nhau nno bo ro moof sai. Tna jõ bibi anu. Tkyas bo reto kʼraa roto ye. Bo mkair mawat mama mai kʼamu mbewok mam befo fares. Menohe tari he anu ne nno bo ro moof tna jõ trok simaut mase toni.

⁵Woyõ-woya sai amu mbewok nmo to, amu fri bo ro mkair. Ati ro amu twok mam provinsi ro Makedonia to, kair mai kʼamu mbewok ye: Raa hafrah bo ro amu nkyas. Tna amu nnaut yyi tna waa ye. ⁶Allah tait Raa ja yisoh raa ro mnaut yyi tna sraujin. Yno re ana mnaut yyi u fee, tna sraujin u fee. Ait yno feto kʼamu mbewok ye: Yno re Titus frok mam provinsi ro Makedonia refo. Allah yno re amu nhaf wamu tnok oh meto. ⁷Amu ne sraujin u fee. Amu simaut mase nmat Titus u. Ait ybam kota ranu ro Korintus yama. Tna bo ro ait yama ykyas to, mno amu simaut mase toni: Yawe anu ksoh jõ tama to kʼanu u. Yawe anu sraujin. Yawe ⌞anu nri bo ro tii jõ tkyas kʼanu. Nri tna nashana. Tna mfo refo anu nhar nwe bo ro tii anu nno reto to, mkair toni.⌟ Jõ simaut mase toni tari he anu nfot bo ro tii tawe reto tna nno. Titus yawe anu ne nros tis kʼjõ. Bo reto mno Titus ye simaut u tna mno re jõ sraujin u fee ye.

⁸Tii tkom aam tna bhah anu.7:8 Paulus ykom aam ro tinyi (1 Korintus). Raa ro mkom tafsiran aro mkyas mawe Paulus ykom aam roto taro ye. Menohe aam reto mfo refo marak; tibyo raa mse mam Alkitab ranu fee. Mam aam reto ait yafriri raa ro mno bo mkair. Tna anu nmat aam reto nrok sraujin. Reto mno re jõ sraujin ye. Menohe anu sraujin tibyo fee. Bo ro tawe kʼanu to, mafer rau to moof sai. Mfo refo anu sraujin u fee ye. Tna jõ aro bo sraujin anu u fee ye. ⁹Jõ hawe bo tno re anu sraujin. Menohe bo mafer rau to, anu nwe nashana to. Bo ro tkom to, mno anu sraujin wia. Tna Allah yno re tis rau to, anu sraujin ranu reto misti bo ro mkair aro fee. ¹⁰Ti aro raa sraujin bo ro mkair ana mno. Sraujin tibyo masahana tna mkai riof. Raa mrok takoh srau feto to moof. Allah yno tis rau to mafer moof: Raa mkai riof. Raa ro Allah wAit soh sraujin to, ja me mari bo ro Allah yawe. Tibyo mafer rau to, Allah yno ana mhaf, srau to me moof u. Menohe raa taro mrok takoh srau fee. Mamo mo kʼAllah ye fee. Tibyo ana sraujin kait mamo snok mhai si. Raa sraujin kait mfi feto to mkair. Raa ro tabam refo fo, ja ana sraujin feto. ¹¹⌞Tiwya raa wanu sait yno safo.7:11 1 Korintus 5:1,2 mkyas mawe raa wana sait ywyah: Yoo yaja yfain. Tna anu nastako ait fee. Menohe anu sayõ rof safo reto. Anu noo safo mana nmit kʼait fee ye. Anu nesait nno bo mkair oh meto. Menohe tiwya jõ bhah anu tna anu nri bo ro tawe.⌟ Sraujin mfi feto to moof. Allah yno re mafer ro moof frok: Anu nashana bo ro mkair tii anu nno. Au oh mi anu nsen noo safo mana nmit kʼait oh. Reto moof. Mfo refo anu ksoh toni nno bo moof. Tna re raa mhar mawe jemaat ranu reto me mno bo ro moof sai. Jõ tari bo beta ro anu nno weto to, tna thar tawe anu nri bo ro jõ tkom mam aam ro tii tkom tee kʼanu reto.

¹²Tii tkom aam reto fyi? Tkom tawe bhah ait ro yisti safo reto fee. Tna tkom tkyas raa ro ait yno reto sai ye fee. Tii tkom aam reto afo re anu nesait nrok nhar nhaf wanu. Nhar nwe anu noo nhaf wanu nee kʼamu. Allah ksoh yawe anu nhaf sau su nsya amu mbewok. ¹³Mfo refo amu nhar bo anu ne ksoh amu mbewok tna ne nri bo ro amu nwe. Tibyo amu mbewok ne sraujin u fee. Titus ymat anu mam kota ro Korintus tna hah yama. Tna ait simaut ye. Tna amu ksoh toni nmat he ait simaut toni. Anu nno ait yhaf rait me simaut u. ¹⁴Tii Titus yama yo kʼanu mam Korintus fefares to, Jõ tkyas anu kʼait. Tkyas bo ro moof. Tna ait yama yo kʼanu to, ymat yawe bo ro jõ tawe reto mabo oh meto. (Mnan anya msya bombra beta ro ja jõ tkyas kʼanu oh. Ja jõ tkyas bo ro mabo sai.) Tis rau bo ro tii tkyas kʼait to, yesait ymat yawe mabo. Tibyo jõ hrenaut fee. ¹⁵Mam ati ro Titus yama yo kʼanu reto to, anu nitrah nhaf wanu tna nri bo ro ait ykyas. Ait ynaut yawe anu waa tna hartu ait. Tibyo ait ksoh anu toni ye. ¹⁶Mfo refo thar tawe anu ksoh nno bo ro moof. Tibyo jõ simaut mase.

Raa moo pitis mee kʼraa kinyah ro smot Kristus

¹Raa wamu sor; amu mbewok nwe nkyas jemaat sor ro mhau mam provinsi ro Makedonia kʼanu. Allah yatmof ana. Yoo tak yee kʼana. ²Tibyo ana me matmof raa anya. Mam wore wefo fo kair toni mai kʼana weto. Tna ana mse bo kebet sai. Menohe ana simaut mase fares. Tna ana matmof raa ro smot Yesus, ro mhau mam kota ro Yerusalem mkah mhaf ase toni. Tibyo ana msan bo ro msai kʼraa weto. ³Thar tawe raa ro Allah wAit mam provinsi ro Makedonia weto to, mse pitis kebet sai. Menohe ana ksoh moo pitis kebet ro ana mse weto to, msan kʼraa kinyah ro Allah wAit mam kota ro Yerusalem. Ana ro mhau mam Makedonia weto mnaut ana mesait ai sai fee. ⁴Ana mhar mawe jemaat roto taro ye mawe kbe moo pitis mee kʼraa kinyah weto. Tna ana mawe kʼamu mbewok mawe, “Amu ro nhau mam Makedonia fo, nesait ksoh toni nno bo reto ye.” Raa aro bo mbis ana mawe msan pitis wana ye fee. Ana mhaf mbyõ sai. ⁵Raa ro mhau mam Makedonia weto to, moo mhaf wana mee kʼAllah wia matim. Tna mari bo ro Allah yawe. Tibyo ana moo mhaf wana mee kʼamu ye. Ana mno bo moof reto miwer bo ro tii jõ tnaut tawe ana mno. ⁶Tahun ro wia raa ro mhau mam Makedonia weto mno bo reto. Tna tii Titus yama ykyas raa ro Yerusalem weto kʼanu ro nhau mam kota ro Korintus ye. Yawe ana mhau bo marak sai. Ati reto to, anu nwe natmof ana. Ati reto to, anu nwe nsan pitis kʼana. He mfe. Anu bitsre bo ro anu nwe nno reto. Anu nno fefares! Feto to, mfo refo amu nbis Titus nwe ait hah yama yo kʼanu mam kota ro Korintus u. Amu nbis ait yama yawe kʼanu ye yisobu anu yawe, “Pitis ro anu tii nwe nsan kʼraa ro kinyah to, anu nsan fefares! Anu natmof raa ro mhau mam Yerusalem fe mfe a! Nsan pitis wanu mnan si tiwya anu nwe feto oh!” ⁷Anu raa jemaat ro Korintus to, ja nno bombra sor kaket: Bosmot ranu ja matak. Anu nkyas maja ro Tuhan kʼraa moof toni ye. Anu nkit maan tna nhar bo ye. Anu ja ksoh nno bo ro moof. Tna anu nhafri amu ye. Bombra wanu beta weto to mninon oh. Feto to, jõ tisobu anu tawe, “Natmof raa ro mhau mam Yerusalem oh! Nno mkah nhaf ase ranu ye.”

⁸Jemaat taro msan pitis kʼraa ro kinyah. ⌞Tii Titus yama yo kʼanu mam Korintus. Tna anu nwe anu natmof raa ro kinyah ye. Nwe anu ksoh nsan bo kʼraa kinyah ro mhau mam Yerusalem.⌟ Tna jõ tkom aam kʼanu tawe sanet boatmof wanu. Tawe tbis bo kʼanu fee. Tkyas afo re raa mhar boatmof ranu reto ye. Anu ja natmof raa anya kaket ye fe mfe a? ⁹Nnaut nwe Tuhan ranu Yesus Kristus yatmof anu beta toni ye. Tiwya bo wAit ro yse to mninon oh. Menohe Ait yatmof anu. Tibyo Ait yitsre bo yase rAit msya bosatoh wAit beta tna yroh yama tabam refo. Yama yhau mam tabam refo ynan raa ro suawe sai. Yno bo reto afo re anu nsen bobot sor ye meto. Feto tibyo tawe ne natmof raa kinyah makin sor to, mkah nhaf ase nfi Ait feto ye oh!

¹⁰Tahun ro wia anu nwe anu ksoh nsan pitis kʼraa kinyah wanu ro mhau mam kota ro Yerusalem. Anu fo jemaat masmair ro nwe nno bo reto. Ati weto to, jemaat roto aro moo pitis mee kʼraa ro Yerusalem weto fefares. Tahun ro wia, anu aro noo pitis wanu baro berur su oh. Tna fo anu bitsre bo moof ro tii anu nwe nno reto. Anu nno mkak fefares. Jõ tnaut tawe ro moof to, ne makrau pitis wanu u. ¹¹Mfo refo noo pitis wanu berur su to, nno mkak oh! Tii anu hre nkyas su oh, nwe anu ksoh natmof raa ro mhau mam kota ro Yerusalem. Bo ro tii ksoh nno to, nno mamo snok mkak oh! Nno mkah simaut ranu tii ro wia reto yum oh. Awya ro yatem miyõ, kbe ysan pitis mawat. Tna awya ro yatem mabuf, kbe ysan kebet sai. ¹²Soh raa ksoh moo bo wana msan kʼraa mamyot si bo ro ana mse to, kbe Allah yhaf mnan. Mfi bo ana mse pitis kebet sai, tibyo msan pitis kebet sai to; kbe Allah yhaf mnan raa weto ye.

¹³Tkyas bo refo kʼanu to, tawe tse bo samyoh kʼanu nsom to fee. Jõ hawe bo anu nfi raa ro kinyah afo re ana weto mse pitis mawat. Tawe feto fee! Jõ ksoh anu mkbair ewok nse bo mnan anya sai. ¹⁴Mfo refo anu fo nhau to bo mninon. Tna ana mhau bo marak. Meen soh anu nhau bo marak to, kbe ana me matmof anu feto ye. Ro moof to anu nsya ana nhau to nse bo mnan anya sai. ¹⁵Bokom ro Allah mkyas bo reto. ⌞Mkyas ati ro raa wAit tufrok tabam ro Mesir. Tna boit ro ana mait to marak.⌟ Mawe:

“Raa sait yanyah boit ⌞manna⌟ mawat. Tna bo ro kbe yait to mnan si. Yait mkak tna aro mhau fee. Tna raa sait roto yanyah bo kebet sai. Menohe kbe bo ro ait retait yait to mnan si ye feto.”8:15 Tiwya tinyi raa ro Allah wAit tufrok tabam ro Mesir. Tna boit ro ana mait to marak. Tna Ait yoo boit sau ro masom ‘manna’ yse kʼana mait. Tna Ait ybis raa moo manna ro ana manyah reto to, tna saim kʼraa anya. Saim afo re manna mkah raa sait-sait mait to, mnan.

Keluaran 16:18

Kbe Titus yamo yo kʼanu

¹⁶Amu mbewok nyoh asik mase kʼAllah. Ait yno re Titus yhaf rait mnan anya msya jõ thaf ajõ: Ait ksoh yawe yros tis yban anu ro nhau mam kota ro Korintus ye. ¹⁷Amu nkyas kʼait nwe amu ksoh ait hah yama yo kʼanu u. Tna ait yawe ait yesait ksoh toni yawe yno bo reto. ¹⁸Kbe Titus yesait yama fee. Penginjil sait kbe kro Titus yama. Penginjil retait, raa ro jemaat magin mhar ait oh, tna mawe ait fi raa ro yoof. Ja ykyas Bokyas Moof ro Yesus kʼraa kaket. ¹⁹(Tii jemaat sor msok penginjil retait tna mbis ait mawe meen yamo su ysya amu mbewok nmoʼt Yerusalem ye. Mfo refo ait kro Titus yama. Meen ait kro jõ tsya Timotius ye, nmoʼt Yerusalem. Ati reto to, amu nbo tuuf kbe nmo su noo pitis ro anu siwyan reto, nkah nmo nee kʼraa jemaat mam Yerusalem reto. Kbe raa mmat bo ro amu nno refo tna bibi Tuhan. Tna kbe raa mhar mawe amu nesait ksoh natmof ana mam Yerusalem ye. ²⁰Amu hawe bo raa mkyas mawe amu noo pitis reto tna nmo nno-na bo. Feto to, amu nwe amu nbo tuuf kbe nmo su nsan pitis mase reto. ²¹Bo ro amu nno to, amu nno abyõ sai. Bosan reto amu nisoh nbo kaket. Amu ksoh Tuhan ymat sas bo ro amu nno refo, tna yawe amu nno bo refo kaket. Tna kbe raa mmat bo ro amu nno refo ye, tna mawe amu nbo bo refo kaket ye.) ²²Tna amu mbewok nbis nfoh ramu sait naut kbe yama ysya ana mbewok mo kʼanu mam kota ro Korintus ye. Ait retait tait amu sanet oh: Ti ro wia sor to, ait yno bo ro amu nwe to, ja ksoh yno beta kaket sai. Tna mfo refo ait ksoh toni yawe yama yo kʼanu. Ait yhar yawe anu ksoh nno bo ro moof. ²³Nnaut nwe Titus tait ja ykah bo su ysya jõ. Tna amu nfoh mabo ewok reto, raa ro jemaat sor taro msok ana mbewok. Msok ana mbewok tna mbis ana mama su kro Titus ye. Raa mmat bo moof ro ja ana mbewok mno tna bibi Kristus.²⁴Natmof raa weto. Tna jemaat taro sor kbe mmat bo moof ro anu nno reto. Mmat tna mhar mawe bo tii tkyas kʼana to, bo mabo. Mhar mawe anu ja nno bo ro moof.

Nsiwyan pitis wea

¹Jõ tkyas pitis ro anu nwe nsan kʼraa ro Allah wAit mam Yerusalem. Menohe tkyas u fyi? ²Thar tawe anu ksoh toni noo pitis reto nee kʼana. Tna tkyas anu kʼraa ro Allah wAit mam provinsi ro Makedonia oh. Tawe kʼana tawe, “Raa ro mhau mam kota ro Korintus msya raa taro ro mhau mam provinsi ro Akhaya weto to, ana ksoh moo pitis mee kʼraa ro pitis marak. Tahun ro wia ana ksoh berur pitis wana oh.” Ana mari bo reto tna mawat mawe ana ksoh berur pitis wana msan kʼraa ro Yerusalem weto ye. ³Jõ tbis Titus ysya amu nfoh mabo ewok weto mama mo kʼanu. Ana mama re kbe mmat soh raa jemaat ranu siwyan pitis reto wea oh fe mfefares a. Ja amu bibi anu; nwe kʼraa ro Makedonia nwe anu ksoh nno bo ro moof refo. Meen soh ana baro msya jõ nma no kʼanu to, kbe ana mmat mawe bosan reto anu siwyan oh. Mnan fi bo jõ tawe kʼana wia oh. ⁴Pitis tii anu nwe ksoh nsan reto to, soh amu nma tna ana mmat he anu siwyan pitis reto fefares to, kbe amu hrenaut ye tna anu hrenaut ye. ⁵Reto oh mi jõ tbis ana mabo tuuf weto matim wia mama mo kʼanu. Kbe ana mama mros tis mban jemaat ranu. Mban anu siwyan bo ro nsan reto wea. (Jõ bibi anu, anu nwe noo pitis mawat nee kʼraa ro Yerusalem weto to, tawe anu raa ro nhaf moof toni.) Pitis ro anu nwe ksoh nsan to, soh anu siwyan pitis reto wea oh to, reto moof. Tna fo jõ tama mam tis. Soh feto to, kbe raa mmat tna mhar mawe anu nesait ksoh nno bo ro moof reto. Tna mhar mawe raa tko anu re nsan bo reto fee.

Noo bo nsan mkah nhaf ase

⁶Nnaut oh; raa mawe,

“Awya ro furere ⌞sfo⌟ makan kebet sai to, meen yatu kebet sai. Tna awya ro yoo furere mase to, meen yatu mase ye.”

⁷Ro moof to, anu beta nnaut pitis mabyoh jya ro kbe nsan. Nnaut mnan mam nhaf mato wanu aro sait-sait wia matim. Tna nesait nhar nwe kbe noo pitis mabyoh jya nee. Tna fo noo nee. Nno be raa tko anu nsan bo wanu. Tna anu ro hawe bo nsan pitis kʼraa to, kbe nsan ma. Nno be anu nsan pitis mkah nhaf ro mkair meto. Allah ksoh yawe raa msan bo mkah mhaf ro simaut mase. ⁸Tna Ait yatak re kbe yoo bouum mninon yee kʼanu. Ait yatak yno re anu nse bombra beta mnan, aro mabut fee. Ja yoo bo mninon yee kʼanu yoyo afo re anu natmof raa anya ye. Afo re anu nno bo moof aro rau-rau kʼraa ye. ⁹Bokom ro Allah mkyas mawe,

“Ait ja yoo bombra saim kʼraa. Ait yoo bo yee kʼraa ro mse bo aro fee. Yhaf rAit moof yum mamo snok mam hame wajin.”

Mazmur 112:9

¹⁰Allah oh mi Raa ro yoo ⌞sfo⌟ manaf yee kʼraa furere to. Yno ⌞sfo⌟ manaf reto mo miyõ tna manes. Tna Allah yoo boit yee afo re raa mait ye. Ait yno re anu nse bo mnan. Yno bo wanu ro nkah to, mafer mninon ye. Tna yno re kbe anu nmo raa ro mhaf moof ati miwer bo ro ti ro wia ye. ¹¹Ait kbe yoo bobot aro rau-rau yee kʼanu. Yno bo reto afo kbe anu noo bo nee kʼraa mkah nhaf wanu ro mbyõ sosor. Amu nbo tuuf kbe nkah bosan ro anu nsan reto nmo nee kʼana mam tno. Tna tis rau to, ana weto kbe me mayoh asik mase kʼAllah. ¹²Anu nsan pitis kʼraa ro mse bo aro fee weto. Reto kbe mno bo ro moof trion ewok: Kbe raa ro Allah wAit weto mse bo mnan ye. Tna mno re kbe raa simaut mase mayoh asik mase kʼAllah ye. ¹³Anu nsan pitis mawat kʼana ro mhau mam Yerusalem. Bosan sor ro anu nsan weto mno raa bibi bo yase ro Allah rAit. Tna kbe raa mhar mawe ja anu nri Bokyas Moof ro Yesus tna nbo nno ye. ¹⁴Raa ro smot Yesus mam Yerusalem weto to, mhar mawe Allah yatmof anu toni. Tna boatmof rAit oh mi mno re anu nno bo moof kʼana si. Feto to, ana mhafri anu tna skabuk anu kʼAllah ye. ¹⁵Allah ysan bo ro moof miwer toni kʼanu ye.9:15 Tafsiran aro rau-rau mkyas mawe bosan ro Paulus ykyas refo fo Yesus yesait (nmat Yohanes 3:16; 1 Yohanes 4:9-11) soh mfe ‘boatmof ro Allah’ (nmat 2 Korintus 8:9). Nma, anu byoh asik mase kʼAit.

Paulus hafrah guru baro ro miwana yasom

¹Jõ fi Paulus, ⌞raabis ro Tuhan.⌟ Anu nhar nwe Kristus tait Raa ro ja yhaf sneh. Tna jõ soh-soh anu mam Kristus yasom rAit, tawe ⌞nri bo ro jõ tawe kʼanu.⌟ Tiwya, ati ro jõ tama to kʼanu to, ja tkyas bo mkah thaf sneh ye. Menohe ati ro jõ thau fari tna tkom aam ro tee kʼanu to, jõ tkyas bo ro matak toni. ²Raa ro jemaat ranu mam kota ro Korintus to, taro mamus jõ. Tawe soh ana mari bo ro jõ tawe fee, kbe jõ bhah ana tu oh! Jõ hawe bo tkyas bo tbait ktan-ktan. Menohe ana weto maun amu mbewok mawe amu nhaf ranu mkair, mnan fi raa ro wase Allah. Ana maun mawe amu raa ro saso bo ro tabam refo sai. Meen jõ tama to kʼanu to, tna soh jõ tari bo ana mkyas bo reto fares to, kbe jõ bhah ana tu oh! ³Ae; amu mbewok nhau mam tabam refo fares. Menohe amu ⌞nmak, soh mfe⌟ nme anya nsya raa mfi raa ro tabam refo ja mno to fee. ⁴Amu ja safo nsom sbe mfi raa ro tabam refo ja mno to fee. Mkah Allah yatak rAit oh mi amu ntai beswan bo ro mbam kabes. Mkah Allah yatak rAit amu nmo simoyot snek ro kabes sor to brir-brar marak. ⁵Raa taro miwana Allah tna safuk mawe ana u kar. Tna raa taro mkyas Allah to, menohe mkyas maja ro sre. Bo ro ana mkyas reto to, bo mabo fee. Bokyas rana ro sre reto oh mi mno wa re kbe raa mhar Allah kaket fee. Raa ro beswan Allah weto to, Ait yoo tak yee kʼamu afo re amu ntak nikyak bonaut wana ro sre weto makus sai. ⌞Amu nno mkah tak ro Allah,⌟ tibyo kbe ana ksoh mari bo ro Kristus yawe. Kbe ana ksoh mhar Allah kaket tna msya mhar maja rAit ro ati reto. ⁶Tawe beroh nri bo ro Kristus yawe kaket! Nri tna nbo nno oh! Tna meen kbe amu mbewok nhar awya ro ja yari bo ro Kristus yawe, tna nhar awya ro yari Ait fee. Meen amu nma to, kbe amu nsen bhah awya ro hawe yari bo ro Kristus yawe. Tna kbe amu nmit safo mana kʼait retait.

⁷Awya raa ro Kristus rAit? Soh anu nmat sas raa to, nmat bo ro mne sai ma! Soh anu nnaut nwe anu fo raa wAit to, nnaut nwe jõ fi raa rAit sait feto ye. ⌞Raa taro santri mawe, “Paulus tait raabis ro Kristus fee.” Ana mawe ana mesait oh mi raabis ro Kristus. Menohe ana weto mmat sas raa tna mnit ana kaket fee. Ana ja mmat bo ro raa mno tna mmat ratan ro myum msya raa masom wana, tna msya bombra ro raa mse bo to sai. Ana mmat raa mhaf mato wana fee.⌟ ⁸Riwai jõ tesait tkyas tak ro Tuhan yoo yee kʼamu mbewok. Tkyas amu feto jõ bibi amu ai. Menohe jõ hrenaut fee. Tuhan ybis amu nma afo re nti bonaut kʼanu. Ybis amu nma nros tis anu. Amu hawe nma nmit safo mana mai kʼanu. ⁹Jõ tkom bo tna bhah anu mkah aam to fyi? Aam ro tii tkom tee kʼanu to, msya aam ro tkom refo ye to, tkom tee afo re anu waa jõ to fee. ¹⁰Raa taro mamus jõ mawe, “Ati ro Paulus ykom aam yee kʼamu to, ait ykyas bo ro ktan-ktan toni kʼamu. Ait bhah amu toni afo re amu waa ait. Menohe ati ro yama yo kʼamu, tna yros ykyas su ysya amu to, reto hayah: Yama ykyas bo ysya amu to, aro mfi feto fee ye! Amu nmat he ait raa ro yatak fee. Raa ro mase ja mhar mkyas bo mmai moof kaket, menohe Paulus yhar feto fee! ⌞Tibyo ja amu nri bo ro ait yawe fee ye.⌟” ¹¹Meen ati ro jõ thah tama to kʼanu u to, tama hafrah raa ro mamus jõ. Kbe tkyas bo rere kʼana weto u fee. Kbe tama thaf sneh to fee. Tama hafrah ana weto mkah tak ro Tuhan. Bo ro ja jõ tkom tee kʼanu mam aam sai, kbe tkyas abyõ. Tna kbe ana weto mhar mawe jõ fi raa ro sne-sna sai fee.

¹²Guru ro mhau msya anu baro safuk mawe, ⌞“Amu oh mi raa ro nse, raa ro Allah ybis.”⌟ Ana mawe ana mase abyõ miwer awya? Ana mnit ana mase rana reto, mmit msya ana mesait aran sai. Mno feto to ana wase bo sai. ⌞Ana weto safuk tna mkyas bo miwer bo ro ana mesait mno. Ana mkyas bo miwer.⌟ Amu aro ja nno mfi feto fee. ¹³Amu mbewok nkah bo mam wore wo Allah ybis kʼamu sai aran. Amu maum mamo snok mam wore weto sai. Amu nmo fari nmo niwer to fee. Ait ybis amu nma no kʼanu tna nkyas bokyas rAit. Amu safuk ⌞nwe amu nisoh bosmot wanu kaket. Bosmot wanu taro mo matak oh.⌟ Raa ro mhau mam remo roto taro to, Allah ybis re penginjil roto taro mkyas bokyas rAit kʼana. Allah ybis amu mbewok nmo no kʼana weto fee. Tibyo amu oh mi safuk nwe amu nse nbo jemaat weto to fee. ¹⁴Tiwya amu mbewok nma no kʼanu mam kota ro Korintus, tna nkyas Bokyas Moof ro Kristus reto. Amu raa ro tinyi ntim wia nma fari snok mam kota ranu. Feto to amu safuk anu to, saah. Reto miwer bo ro Allah ybis kʼamu mbewok nmo nno to fee. Tna ati reto to, amu nmo nkyas watum ro Tuhan mam remo ro miwrek kota ro Korintus majoh ro tino fefares. ¹⁵Allah ybis raa roto taro mamo mkyas ⌞Yesus yasom⌟ kʼraa ro mhau mam remo roto taro. Jemaat mam remo weto to, mnan fi armato ro penginjil roto mkah. Allah ybis amu mbewok nmo nkah bo mam remo weto fee. Tna amu safuk nwe amu nisoh bosmot raa weto fee ye. Jemaat ranu mam kota ro Korintus reto oh mi mnan mfi armato ro Tuhan ybis yawe amu nkah. Feto to amu safuk nwe, “Raa ro mhau mam kota ro Korintus to, mfo refo ana smot Kristus ye.” Amu safuk nkyas feto to, bo ro mkair meto fee. Amu ksoh ⌞anu nri bo ro amu nwe. Soh anu nri bo kʼamu to, amu ninaut nwe kbe⌟ bosmot ranu mo matak. Tna kbe amu ne nti bonaut ro mase naut u kʼanu ye. Tibyo bosmot wanu mo matak. ¹⁶Tna fo meen amu mbewok nmo nkyas Bokyas ro Moof mam rabin roto taro. Mam rabin weto to raa aro mkyas Bokyas Moof reto fefares. Amu hawe bo nmo nkah bo mam yuk ro raa mkyas Yesus yasom oh. Allah ybis penginjil roto taro mamoʼt wore weto oh. Tna kbe ana safuk armato ro ana mesait mkah weto saah. Amu safuk nkyas armato ro amu nesait nkah sai. ¹⁷Bokom ro Allah mkyas mawe,

“Soh raa safuk to, rau ro moof to, kbe ana mawe, ‘Nmat bo moof ro Tuhan yno refo!’”

Yeremia 9:24

¹⁸Ati ro raa mesait bibi ana ai to, bo ro ana mawe weto to bo ati fee. Bo ro ana mkyas mawe reto to, kbe mno Tuhan bibi ana fee. Rau ro ati to, Tuhan oh mi ynaut yawe anu aro bno bo ro moof to! Tuhan yhaf mnan raa weto.

Guru sor ro mama mo kʼanu to, ana weto taro Allah ybis fee

¹Taja, tme, tao tano na; sik nri bo ro jõ tawe refo: Kbe tkyas bo tfi raa ro wase bo hrenaut wia. ⌞Kbe jõ bibi jõ tesait ai.⌟ Thar tawe ja anu nri bo ro tawe. ²Jõ thafri anu, mnan fi Allah yesait yhafri anu. ⌞Jõ takah tayun anu rere tibyo anu nmo kro Kristus. Tna jõ tros wa kmot anu afo re anu smot Ait kaket.⌟ Nmo su nsya Ait kaket. Re kbe raa aro mno anu fee. Jõ tnan fi raa sait ro ytos ku rait ro ano. Tna tbis raa sait, tawe yoo ku au. Tna jõ kmot ku au kaket re kbe meen ati ro ait yama ymen au to, au mhau mato mboh fares. ³Menohe raa taro mama besruf anu. Jõ waa be kbe anu nri bo ro ana mawe tna anu nmo kro ana. (Mno mfi tiwya tinyi aban ro srau wer reto besruf Hawa mam armato ro Eden.) Nri ana ma. Anu nmo su nsya Kristus oh. Nros ntrot nsya Ait. Smot Ait yesait aran. Srau ewok ma. ⁴Tii amu mbewok nma nkyas Yesus yasom kʼanu to, amu nkyas kaket. Tna fo raa taro mama mawe ana raabis ro Allah. He mfe. Bo ro ana mkyas to, mnan anya msya bo ro amu nkyas to fee. Hre nifra sneh nri bo ro ana mkyas reto to ma! Ana mkyas Yesus ye, menohe ana mkyas bo miwer. Bo ro ana mkyas aro mnan si msya bo ro Yesus tii ykyas fee. Har ro tii mama mjin mam anu nhaf mato wanu to Har ro ati. Menohe ana weto mkyas har roto aro. Tii anu nri Bokyas Moof ro amu nkyas kʼanu. Iso reto to, iso sau mesait aran ro raa mamo tna kbe mkai riof. Menohe guru weto merif iso roto, iso ro sre. Ana sioh mawe raa kbe mkai riof mam iso ro ana merif reto. ⁵⌞Raa weto sioh mawe ana to raabis (rasul) ro mbam Allah mama. He mfe. Ait ro ybis ana mama fee. Tna ana mawe⌟ ana raa ro mase toni. Menohe ana mase miwer jõ fee. Jõ fi raa ro Allah ybis yawe tkyas Bokyas ro Moof reto kʼanu. ⁶Jõ tkyas bo to, ja tasoh mnan-nan fee sai. Menohe takit maan tna thar bo ro Allah miwer ana. Nnaut wore wo tii jõ betoo maja ro Allah kʼanu: Anu nhar nwe bo ro tii tawe to, bo weto beta to, bo mabo. Guru weto to mhar bo mkyas mayoh mno raa mhaf. Menohe ana mhar maja ro Allah kaket fee.

Paulus ja yayoh bo aro kʼana fee

⁷Ati ro jõ tama tkyas Bokyas Moof kʼanu to, tawe kbe anu noo boren nren jõ fee. ⌞Jemaat sor ja maren boren kʼraabis ro mama mkyas watum ro Tuhan kʼana.⌟ Menohe jõ tawe anu kbe noo pitis aro nren jõ fee. Anu nnaut nwe jõ tno bo ro mkair meto? Tawe tno feto afo re anu nhar nwe jõ ja hartu anu. ⌞Watum ro Tuhan jõ tkyas kʼanu mno anu nsen bobot tna⌟ jõ tfi sryan ranu sai. ⌞Nno be anu aro nnaut nwe bokyas ajõ ja mafer marak, tna reto oh mi tawe kʼanu tawe anu nren boren kʼjõ fee: Nnaut bo reto ma!⌟ ⁸Tii jõ tama thau tsya anu to, tna jemaat roto oh mi maren boren kʼjõ. Anu raa ro Korintus to noo boren nren jõ fee. Reto mfi bo jõ ttak bo wana weto, afo re tama tno bo moof kʼanu. ⁹Tii thau tsya anu to, boit msya bo ro tse aro mabut. Tna raa ro smot Kristus mbam provinsi ro Makedonia mama. Ana oh mi moo pitis, bo to mee kʼjõ. Tibyo bo ro tse to mnan. Jõ hawe bo tno anu aro nsui. Tibyo tii tayoh pitis kʼanu ro Korintus fee. Tna meen tayoh bo aro kʼanu fee ye. ¹⁰Jõ safuk tawe jõ tkyas watum ro Tuhan kʼanu menohe ja tayoh pitis kʼanu fee. Wore wo jõ tamo mam provinsi ranu ro Akhaya to, kbe tno feto ye: Kbe tawe kʼraa tawe, “Noo boren nren jõ ma.” Jõ smot Kristus tibyo anu nhar nwe bo ro jõ tawe refo to bo mabo tu oh. ¹¹Jõ tatmof anu. Menohe jõ hawe bo too pitis ro anu nwe nee kʼjõ. Allah yhar yawe jõ tatmof anu.

¹²Guru ro mkair taro weto bibi ana mesait ai mawe ana weto ja mno bo mnan anya mfi bo ro amu mbewok ja nno. He mfe. Jõ tkah bo ro Tuhan to, ja jõ tayoh pitis kʼanu fee. Tna meen tama tkyas watum ro Tuhan kʼanu to, kbe tayoh bo aro kʼanu fee ye. Tno feto to tno wa guru weto. Tno afo re anu nhar nwe guru weto to hayah. Ana mnan anya mfi amu fo fee. ¹³Guru ro bibi ana mesait ai weto to, mawe ana raabis (rasul) ro Kristus ye. Menohe mfe: Ana weto to raa ro mamo wan-wan sai. Ana mawe ana mkah bo mam armato ro Tuhan, he mfe. Ana besruf anu. ¹⁴Nrok tna ktak ma! Kabes yabi (Iblis) tait ja yamo wan-wan ye. Ait besruf raa tibyo raa taro mnaut mawe ait ynan fi malaikat ro moof sau. Yamo wan-wan haberek yfi malaikat ro moof. ¹⁵Feto to nrok tna ktak ma! Nnaut nwe soh kabes yabi ja besruf raa to, kbe raa ro mari ait ja mno feto ye fea! Ana mamo wan-wan ye. Kaket anu! Bokyas rana siroyõ-raya. Tis rau to, kbe Allah ymit bo kʼraa ro ja mno bo feto fea!

Paulus ykyas bombra ro mkair tii mai kʼait

¹⁶Riwai jõ tawe, “Nnaut nwe jõ fi raa ro wase bo hrenaut to ma!” Nnaut nwe jõ hawe bo bibi jõ ai. Tako hawe sai mfo refo tkyas bo baro ro tiwya jõ tno. Sik hre sai nifra sneh nri bo ro tawe refo. ⌞Tkyas bo wefo afo re anu nhar nwe jõ fi raabis ro Kristus tu oh.⌟ ¹⁷Ja Tuhan hawe bo raa mesait bibi ana ai. Menohe mfo refo tkyas bo feto tfi raa ro wase bo sai. ¹⁸Raa mawat bibi ana mesait ai. Ana safuk mawe ana raa ro mase mam tabam refo. Feto kbe jõ tfi ana weto tna tkyas bo baro mfi ana weto wia ye. ⌞Menohe jõ tnaut tawe bo ro ana safuk mawe mkyas reto to, bo ro ati fee.⌟ ¹⁹Anu nnaut nwe anu raa ro nhar bo. Tna re anu ja sayõ rof raa ro wase bo mkyas bo. ²⁰Tmat bo anu sayõ rof raa awya sai ro yhau ysya anu. Anu hre nri bo ro guru aro sor beta mawe. Anu ja nri bo kʼana ro moof tna nri bo kʼana ro mno bo mkair ye. Kaket anu! Ana taro mbis-bas anu weto nfi sryan boh wana sai. Tna ana mayoh bo mawat kʼanu. Ana besruf anu. Ana mawe ana raa ro mase miwer anu. Ana mamus anu ye. Reto mnan fi ana mai-a anu mkah bokyas rana. ²¹Menohe amu mbewok ja nno bo feto kʼanu fee. ⌞Amu ja nhaf sneh. Feto to raa taro mkyas mawe amu fo raabis ro Allah fee.⌟

Guru weto ja mesait mkyas mase rana. Feto to, tako hawe sai, mfo refo jõ tesait tkyas bo wojõ baro feto ye. Tkyas re kbe anu nri bo kʼjõ ye. (Ja raa ro wase bo hrenaut mesait aran bibi ana mesait sai.) ²²Ana weto tawyõ mawe ana raa ro Ibrani. (Au oh mi raa mana ro tiwya Allah ysok.): Jõ fi raa ro Ibrani ye. Ana weto mawe ana ku renti ro bi Abraham. (Ait oh mi raa ro tii Allah ysok.): Tna jõ fi ku renti ro bi Abraham ye. Ana weto mawe ana raa ro Israel: Feto tna jõ fi raa ro Israel ye.11:22 Som trion tuuf wefo fo (raa ro Ibrani, ku renti ro bi Abraham, msya Israel) beta mkyas raa mana sau.²³Ana mawe ana mamo sryan ro Kristus. Tna jõ tamo sryan rAit ye. Menohe jõ tno bo ro bi Ait ybis yawe to, tno moof miwer. (Tako hawe sai, jõ bibi jõ ai fefo, tfi raa ro mamboi!) Jõ tno bo ro Kristus ybis to, au oh mi bo mkair mawat mai kʼjõ: Jõ tkah bo rAit to, samyoh toni. Ana weto to mno bo rAit kaket fee. Tkyas Kristus yasom oh mi tii raa mfot jõ tna mbu mam bui mato mun aro firwas-firwas to. Ana weto to, raa mfot mbu mam bui mato fee. Ti aro to, raa hawe bo jõ tkyas Kristus yasom. Tibyo ana mfot jõ tna mmok-mak jõ. Menohe guru weto to, raa mfot tna mmok-mak to fee. Tna ti aro firwas-firwas to, raa sikowah jõ ye maami jõ thai. Menohe thau fares. Ana weto to, aro mnan jõ feto fee. ²⁴Tna muhrin maat raa ro Yahudi mfot jõ tna moo too mmok-mak jõ. Ti wore weto to, ana mok-mak jõ muhrin mawat (39). ²⁵Tna raa mfot jõ muhrin tuuf to, mfot jõ tna mai-a jõ mkah armuk wana. Mai-a jõ mfi ja ana mai raa ro yber safo sait. Tna ti sau to, raa moo fraa mai jõ ye. Tna jõ taut mam kapal thoh mam sawan to, tna muhrin tuuf kapal ro masyõ jõ weto fri bo ro mkair. Tna kapal sau reto hoh. Tibyo ti sau, ayõ sau jõ soso sai abyõ mam aya mata. Menohe tkai riof sai. ²⁶Ja jõ tamoʼt rabin ro fari so oh. Tamo tkyas Bokyas Moof ro Yesus (Injil). Wore weto to, jõ tkai bo msai roto aro ye: Jõ tamo mam iso tna frit aya tamoʼt ati jaro tna kene wo tsu. Ti aro raa ro msyõf bo mfot jõ mtak bo wojõ. Ti aro to, raa wojõ mbam raa mana ro Yahudi to, kmo jõ. Tna ti aro raa ro mbam raa mana roto to, kmo jõ ye. Bo ro msai mai kʼjõ mam wore jõ thau mam kota ye. Tna bo ro msai mai kʼjõ mam wore wo tamo mam yuk ro riamo ye. Bo msai mai kʼjõ mam wore wo jõ taut wiak thoh mam aya sawan ye. Tna ti aro raa mamo wan-wan tna mawe ana raa ro kro Yesus ye. Tna mawe ana mafoh wojõ. He mfe. Tis rau to ana besruf jõ, mno bo ro mkair mai kʼjõ. ²⁷Jõ tkah bo wojõ ye tna timyoh mbtek. Jõ hrowyõ thai ye. Ti aro tkah bo wojõ ti ro miyõ mamo snok mam reen, tna tjin fee ye. Ti aro jõ thai awyah ye, thai sbit ye. Ti aro amah ro tjin to marak. Tna ratan ro tyum to mabut-abat ye, tibyo tfos toni. ²⁸Bo ro msai weto beta mai kʼjõ oh. Tna jõ thafri anu mam jemaat beta ye. Tibyo jõ tnaut yyi tawe skabuk anu beta yoyo. Reto mnan fi jõ tasom bo ro samyoh toni yoyo. ²⁹Soh anu aro kiyam, netsu ssafo fee to, reto mno jõ tfi bo tesait kiyam ye tsya anu. Tna soh raa mno re anu aro mbtek mam iro to, reto mno jõ sraujin su tsya anu ye.

³⁰Jõ tkyas bo weto beta afo re anu nri bo kʼjõ kaket ye. Tna nri bo ro guru weto mkyas ma. Jõ hawe bo tesait bibi jõ ai. Feto to, jõ safuk tkyas bo roto taro kʼraa. Tkyas bo ro ja mai jõ sai. Kbe anu nri bo wefo tna nhar nwe jõ tesait tatak fee. ³¹Allah yhar yawe bo ro jõ tkyas refo to, bo mabo. Jõ sioh fee. (Allah tait Tuhan Yesus Yaja. Rau ro moof to, kbe raa bibi Ait mamo snok mam hame wajin.) ³²Tna tkyas kʼanu tii wore wo tamo tkyas Bokyas Moof reto (Injil) mam kota ro Damsyik: Ati reto raja Aretas ybo tabam reto. Tkyas Bokyas Moof reto mno raa kmo jõ. Tibyo tsam snok tamo tbam kota reto wai. Tawe tsam tamo wai menohe aban mana ro ybo kota reto ybis raa wait kmot iso wa. Ana hre mwan kota reto makit rau. ⌞Remo reto raa mtan mur mkah tembok ro matak toni.⌟ Tna raa kmot iso beta wa. Raa ste wa mam kota kitana re huwya mfot jõ. Tibyo jõ frok tamo fyi? ³³⌞Tamoʼt samu sau ro mhau mam kota makit rau. Tna mti to, tafoh wojõ moo keranjang maboh sau. Moo tna mbis jõ hre mam keranjang reto mato rau.⌟ Tna moo keranjang reto, mruk jõ wai mam hroh ro tembok reto sau. Feto tibyo jõ frok mbam kota reto tna aban mana ro kota reto to, yfot jõ fee.

Allah yerif bo ro msai kʼPaulus

¹Soh raa mesait bibi ana ai to, mafer aro fee. Ja tno feto fee; menohe tako hawe sai, tkyas bo wefo kʼanu renti ⌞afo re anu nhar nwe jõ fi raabis ro Allah tu oh.⌟ Mfo refo jõ tkyas ati ro Tuhan ybo jõ. Ybo tna yno re tari bo ro msai, tna yerif bo kʼjõ ye. Yerif bo ro Ait ja ymyõt. ²Jõ thar raa ro kro Kristus sait.12:2 Anu bmat far-far ro 7 to, bhar bwe Paulus ykyas ait yesait. Menohe ait hawe bo teta ait yesait. Tibyo ykyas yfi raa roto ymat bo refo.Tahun 14 ro wia to, ait yaut yamoʼt sawro ro Allah. Allah yakah ait yamoʼt sawro rAit ro mhau abyõ mam u reto. (Sawro rAit ro tuuf reto. Allah ybo yetsu rait yaut yamo, soh mfe yakah yamos rait sai yaut to, jõ wase ye. Reto to Allah yesait aran yhar bait.) ³Thar tawe raa retait Allah yakah yaut yamoʼt sawro ro moof reto. (Allah yakah ait yetsu rait yaut yamo, soh mfe yakah yamos rait sai yamo to, jõ wase ye. Allah yesait aran yhar sai bait.) ⁴Yaut yamoʼt sawro tna yari bo ro msai. Yari bo ro ja raa mhar fee. Bo weto to msai toni. Allah ja ymyõt bo reto. Tna Ait yawe wa yawe raa aro me mkyas bo weto ma. ⁵Jõ safuk raa retait, bo ro ymat saah. Menohe soh tkyas jõ tesait to, tkyas bo weto fee. Tkyas bo roto taro sai. Tkyas tawe jõ ja ssafo fee sai. Jõ ksoh raa mhar mawe jõ tesait tatak fee. ⁶Menohe soh jõ ksoh raa bibi jõ to, kbe tkyas bo naut u. Tna soh jõ ksoh tawe tkyas bo weto renti to, bo weto beta to bo mabo ye. (Raa ro mkyas bo miwer maja rau to, raa ro wase bo oh meto.) Menohe jõ hawe tkyas bo moof ro jõ tno. Ro moof to, raa mesait mmat bo ro ja tno, tna mesait mari bo ro ja tawe. Feto tna soh ana mesait mawe bibi jõ to, saah.

⁷Allah ybis re bo sau mama sikowah jõ. Yno afo re jõ tnaut tawe jõ fi raa ro taku sai. Tii Allah yerif bo ro msai kʼjõ, menohe Ait hawe bo reto mno jõ bibi jõ. Ait hawe jõ tnaut tawe jõ fi raa ro tase tiwer raa taro. Feto to Ait yitsre kabes yabi (Iblis) ybis kabes roto sau mno jõ, sanet jõ. Bo yno reto sanet jõ yoyo mnan fi bo abumun mami jõ. ⁸Tna jõ skabuk Allah muhrin tuuf oh. Jõ soh-soh Ait tawe, “Mnan oh! Natmof jõ. Nno re bo reto sikowah jõ u fee.” ⁹Menohe Ait yawe si kʼjõ yawe, “Mfe, bo reto kbe mno nyõ renti. Menohe nnaut nawe Jõ tatmof nyõ yoyo. Boatmof aJõ reto to, aro mabut fee. Ati ro nyõ natak fee, ati ro nyõ ntai marak to, kbe nyõ nnaut nawe tak aJõ mnan si oh.” Yawe feto tna thar tawe soh jõ safuk bo samyoh sor ro mno re jõ sne-sna to, kbe raa mhar mawe Kristus yatak rAit ja matam jõ yoyo oh meto. Feto oh mi jõ simaut fo. Feto oh mi jõ safuk tkyas wore wo jõ tatak ajõ to mabut. ¹⁰Ae; ebokmi bo ro mkair mama mai kʼjõ to, tna jõ tatak fee, tna raa mamus jõ, tna jõ tasom bo ro fanes to, tna raa mno bo ro mkair mai kʼjõ, tna bo ro msai mama mai bo to, menohe ja jõ tnaut yyi fee. Jõ waa fee. Jõ thaf mnem fares. Thar tawe ati ro jõ tatak fee, kbe Kristus ysan tak rAit kʼjõ. Yno afo re kbe raa mmat tna smot Kristus.

Paulus ynaut yyi jemaat ro Korintus

¹¹Guru ro riwai tkyas weto to, ana taro mnaut mawe ana raabis (rasul) ro Allah. Tna ana miwana jõ, mawe, “Paulus tait raa ro yase fee.” Ana weto to matak miwer jõ fee. Menohe anu taro nri ana. Au oh mi, tako hawe sai, jõ tesait tkyas jõ ai tfi raa ro wase bo. Ro moof to, anu oh mi bibi jõ; jõ tesait ai fee. Ro moof to, anu teta jõ, tna nros tis nban jõ; jõ tesait ai fee. ¹²Nnaut nwe tii ati ro thau tsya anu to, tno bo ro msai, tna jõ sair bo ro hnah.12:12 Raabis ro Yesus ja mno bo ro hnah mkah Allah yatak rAit (Yohanes 14:12; Ibrani 2:3-4). Kisah Para Rasul mkyas bo ro hnah baro ro Paulus yno: Ait yisoh raa ro yaa maka (Kisah 14:18), tna yisoh raa ro yhai tna yti yrok (Kisah 20:9-10), bo to (Kisah 19:10-12). Ati reto to, jõ beroh tno bo weto sor afo re anu nhar nwe, “Bo mabo. Paulus tait raabis ro Allah tu oh.” ¹³Anu taro nnaut nwe Jõ tno bo moof kʼjemaat roto taro, tna bo ro mkair kʼanu sai. Anu nkyas bo reto, nno mkah fyi? Tii thau tsya anu to, tno bo mnan anya msya bo ja jõ tno wore wo thau tsya jemaat roto ye. Menohe jõ tayoh pitis kʼanu weto aro fee. ¹⁴Tna jõ siwyan tawe tama to kʼanu u. Tama muhrin ro tuuf refo fo, tna kbe tayoh pitis kʼanu fee. Menohe jõ tayoh tawe anu noo nhaf wanu sai nee kʼjõ. Tawe noo pitis nee kʼjõ ma. Anu to nfi ku wojõ. Tna kukek ja moo pitis mee kʼmaja, mme na wana fee. Raa mabi oh mi ja moo pitis mee ku wana to. ¹⁵Jõ ksoh too bo tee kʼanu. Jõ tawyan marak anu. Tibyo too thaf ajõ tee kʼanu tna tawe too bo wojõ ro tse beta tiryõ kʼanu ye. Anu nhar nwe Jõ tatmof anu. Reto mno re anu taro hawe bo noo nhaf wanu nee kʼjõ fe mfe a?

¹⁶Anu nhar nwe ja tayoh pitis aro kʼanu fee. Menohe jõ ksoh tatmof anu. Fyi, anu taro nwe jõ besruf anu oh meto a? Pitis ro jõ tawe anu nsan kʼraa kinyah weto to, jõ too aro kʼjõ feto fee. ¹⁷Raa ro jõ tbis mama mo kʼanu to, ana aro besruf anu fe mfe a? ¹⁸Tii tbis Titus ysya nfoh ramu sait mamo mo kʼanu. Ait besruf anu fe mfe a? Mfe, ait yhaf rait moof mnan anya mfi amu mbewok nhaf wamu. Tna bo ro amu mbewok ja nno to, mnan anya ye. ¹⁹⌞Amu aro ja nno bo ro mkair mai kʼanu fee.⌟ Feto tna amu nkom aam refo nwe saak-saak amu fee. Feto fee. Amu nkom aam refo mkah bo betoo amu ai kʼanu to fee. Amu nkom aam refo mkah mti bonaut wanu. Amu nkom aam refo afo re nno bosmot ranu kbe matak. Allah yhar yawe amu nhaf wamu sau su nsya Kristus. Tna amu ksoh anu toni. Bo bawya ro amu nno to, amu nno afo re bo reto nban anu tis oh meto. ²⁰Meen ati ro jõ tamaʼt kota ro Korintus to, anu nnaut nwe kbe jõ bibi anu. Menohe jõ waa be kbe tama tna tmat he anu nhau nno bo ro mkair fares. Nno be anu ngo-ngat anya, tna naam bo raa, kmo anya, nnaut bo ro netsu wanu ai, nyi-ntoo raa, nkyas-kas raa, bibi anu ai, tna nno-na bo kbik-kbak sai. Soh jõ tama tna tmat he anu nno bo ro mkair weto to, kbe tkyas tna tno bo bawya u kʼanu? Jõ tako tama te bhah anu. ²¹Tiwya jõ bibi anu. Menohe jõ waa be kbe te tama u to, tmat he anu taro nno bo ro mkair-kar fares: Tiwya anu taro nasmamo, taro nus-as bo tna taro ntak fnya mabi raa bo ye. Soh jõ tama tna tmat he anu nwat ne nashana fefares to, kbe jõ sraujin tna hrenaut. Allah ymat bo ro anu nno to, yawe, “Ja Paulus bibi raa ro Korintus fyi?”

Watum ro ttis

¹Nnaut nwe Bokom ro Allah mawe:

“⌞Soh raa sait yaun baun yawe raa roto sait yber safo to, nmit safo kʼraa retait wia ma:⌟ Nko hawe sai raa mabo ewok, soh mfe tuuf mama tna hre su: Raa mabo ewok, soh mfe tuuf ro mesait mmat bo reto to, ntu ana mama. Tna ana weto kbe hre mkyas bo ro ana mmat. Soh ana beta mmat bo mnan anya, mawe raa retait yno bo ro mkair reto, feto tna fo raa moo srah mmit kʼraa retait.”

Ulangan 19:15

⌞Nko hawe sai hre su tna nkyas safo reto, tna nke oh!⌟ Kbe tama to kʼanu mun ro tuuf. ²Tii wore tamoʼt kota ro Korintus mun ro ewok to, tawe wa kʼanu tawe, “Ati ro jõ hah tama to kʼanu u to, kbe tmit safo kʼanu.” Mfo refo thau fari tna tkom bo reto u kʼanu beta: Tkyas kʼanu ro tii nno iro ye, tna kʼanu taro sor ye. ³Menohe anu nnaut maut-mroh nwe, “Paulus tait raabis ro Allah fee. Ait ykyas bo ro Kristus yawe to fee. Kristus tait Raa ro yatak. Bi Ait yatak re ymit safo kʼraa. Menohe Paulus tait raa ro yatak fee sai.” ⁴Nnaut nwe tiwya Kristus yroh yama tabam refo to, Ait haberek yamo raa sai ro yatak fee. Ait yama yfi raa ro yhaf sneh sai. Yitsre yatak rAit tna yajat mam ara warok. Menohe Allah yatak rAit mno Ait yasen yaam u. Jõ thaf sau su tsya Kristus. Tibyo titsre tatak ajõ reto ye: Tii tama to kʼanu tfi raa ro thaf sneh sai, tfi raa ro tatak fee. ⌞Wore weto jõ bhah anu fee.⌟ Menohe Allah yno re jõ tatak re kbe tama tisoh bosmot wanu. ⁵Tawe kʼanu aro sait-sait tawe, “Nmat sas nhaf mato wanu. Anu ja smot Yesus Kristus kaket fe mfe a? Bo ro yawe to, anu nnaut maut-mroh fe mfe a? Anu nnaut nwe bo ro ysi to, ja Ait ybo ye fe mfe a? Ati ro nmat sas anu nhaf mato wanu to, soh anu nkai bosmot ro matak to, anu nhar nwe Ait yhau ysya anu tu oh.” ⁶Ati ro nmat sas anu nhaf mato wanu to, jõ ksoh tawe anu nkai bosmot ro matak. Tii jõ tama tkyas Bokyas Moof ro Yesus kʼanu. Tna mfo refo bosmot wanu mo matak oh. Soh bosmot wanu matak feto to, anu nhar nwe amu mbewok oh mi tii nti bonaut kʼanu to. Tibyo nhar nwe amu mbewok fo raabis ro Tuhan tu oh.

⁷Amu mbewok skabuk anu kʼAllah. Amu nyoh re kbe anu nno bo ro mkair aro u fee. Soh anu nno bo ro mkair to, kbe raa taro mmat tna mnaut mawe amu raabis ro Tuhan fee. Menohe bo ro ana mnaut mawe reto to, bo ro ati fee. Fyi-fya sai raa mnaut mawe amu mbewok fo raa ro nkair to, rau ro ati to, anu nhau nno bo ro moof yoyo. ⁸Kbe amu mbewok nma no kʼanu u. Tna soh amu nmat he anu niwana watum ro Allah to, kbe amu bhah anu wa. Menohe soh amu nmat he anu nri bo ro ati mbam kʼAllah reto, tna nbo nno kaket fares to, amu nban tis anu fea! (Amu fo raa ro ja nno wa bo ro moof to fee.) ⁹Soh amu bhah raa fee, kbe raa taro mnaut mawe amu ntak fee. Feto to raa taro mnaut mawe amu fo raabis ro Allah fee. Bo ro ana mnaut mawe reto to, bo ro ati fee sai. Soh amu nma tna nmat he anu nros ntak fares to, kbe amu simaut mase sai. Tii anu taro nno bo ro mkair. Tna re amu skabuk Allah nyoh re kbe Ait yisoh anu nhaf wanu me mrok moof. ¹⁰Jõ tarak fares tna tkom aam refo tiim kʼanu. Tkom aam refo afo re meen, ati ro tama to, kbe jõ thafrah bo ro anu nno fee. Jõ hawe bo bhah anu mkah tak ro Tuhan yoo yee kʼjõ. Tuhan ybis jõ tama tno re bosmot wanu mo matak. Ait yoo tak yee kʼjõ afo re kbe tisoh bosmot wanu. Yoo yee afo re tno bosmot ranu kbe mbraun to fee.

Paulus ymah meen

¹¹Taja, tme, tao, tano na; meen oh kʼanu! Simaut mase oh! Nisoh anu nhaf wanu moof. Nri bo ro jõ tawe wefo beta. Nhau nsya anya to, nhaf msya nkit sau su. Niranya nsya raa anya kaket. Allah tait Raa ro yatmof raa tna yno anu nhau nhaf tnok ye. Jõ skabuk re Ait yatam anu yoyo.

¹²Nmah meen kʼanya ye tna hana anya. Raa ro Allah wAit mam befo to, beta mmah meen kʼanu ye.

¹³Jõ skabuk re kbe Tuhan Yesus Kristus ysya Allah matmof anu beta. Tna re kbe Har rAit mno anu beta niranya kaket tna nhau nhaf sau su ye.