Aam Tinyi ro Paulus Ykom tna Tiim Mamo mo kʼTimotius
1 Timotius
1Paulus ymah meen kʼTimotius
1Aam refo mbam kʼjõ, Paulus. Allah tait Raa Sotak ranu. Tna anu bhaf wai Kristus Yesus. Ana mbewok mbis jõ tamo raabis ro Yesus rAit. 2Timotius; jõ tkom aam refo tiim kʼnyõ. Tii jõ betoo bosmot refo kʼnyõ. Tna nyõ nrok smot Yesus ye. Feto to jõ tawe nyõ nfi ku ajõ. Jõ skabuk Allah, Bja ranu, ysya Tuhan ranu Kristus Yesus afo re ana mbewok matmof nyõ tna mno re nyõ nhau nhaf tnok sai.
Guru baro mkyas bo ro sre
3Tiwya jõ sikba nyõ tamoʼt oo ro Makedonia to, jõ tbis nyõ nhau wea mam kota ro Efesus. Guru ro mkyas watum ro Tuhan mam kota reto to, baro mkyas sre. Feto to tawe nyõ nhau mam beto tna nawe wa guru weto nawe, “Nkyas watum ro Tuhan to, nkyas maja rau kaket!” 4Nawe wa raa nawe, “Nkyas mna ro ti ro wia ma! Nkyas masmair biin wanu yoyo to, mnan oh.” Raa ro mkyas bo weto to, saso mak sai meto. Mafer marak sai. Menohe watum ro Tuhan to, kbe raa mari tna smot Ait tibyo mkai mafer ro moof. 5Bo ro Allah ybis mam watum rAit reto, mafer rau oh mi raa matmof anya. Soh raa mhau mato mboh, tna mhau mhaf moof tna mhau smot Yesus kaket; mkah srau sau sai, mkah srau ewok fee; kbe ana weto ja matmof raa anya ye. 6Raa taro me haberek, mhau moof feto fee. Ana weto mamo mweh iso ro mkair sau hayah. Tna ja mkyas bokyas ro mafer marak sai. 7Ana mawe mamo guruagama Yahudi. Ana mbetoo Watum ro Musa kʼraa. Menohe ana wase Watum reto. Ana mbetoo Watum reto mfi ana mhar kaket menohe ana mesait srau maja rau kaket fee.
8Anu bhar bwe, soh raa kro Watum ro Musa reto, mbo mno kaket to, kbe ana fri mafer. 9Tna Allah yoo Watum reto yee afo kbe misoh raa ro ja mno bo ro mkair fo: Raa ro miwer Watum reto ye, msya raa ro ja hafrah raa ro mase ye, tna msya raa ro miwana Allah ye, raa ro mno iro ye, raa ro wase bo skabuk Allah fee ye, tna msya raa ro mame raa majat, ro mame maja, mame mme majat ye. Allah yoo Watum yee re kbe raa weto mmat tna waa. 10Tna raa ro mwyah ye, tna msya raa sme ro msya anya ye, tna msya raa ro ja mfot raa mabu ye, raa ro sioh-sah ye, tna awya sai ro yiwana watum ro Tuhan roto aro ye. Watum rAit to moof mkah anu raa bbo bno to. 11Tna Watum rAit reto mamo mamyot si Bokyas Moof ro Allah (Injil) ye. Tna Allah ro ja anu bbaut tait, sair Injil rAit ro msai reto. Tna Injil rAit reto, Ait yehau kʼjõ tbo tkyas renti.
Allah yatmof Paulus tibyo ait yayoh asik mase
12Jõ tayoh asik mase Kristus Yesus, Tuhan ranu ro yoo yatak yee. Ait yawe jõ raa ro thaf ntrot tibyo ybis jõ yawe tamo tno bo rAit. 13Tiwya jõ fi raa ro tamus bi Ait. Tna jõ safo tno bo mkair mai kʼraa wAit ye. Menohe Yesus yatmof jõ. Ti weto to, jõ smot Ait fefares tna jõ wase bo ye. Au oh mi Yesus yatmof jõ. 14Tuhan ranu yatmof jõ toni. Jõ smot Kristus Yesus tibyo Ait yno jõ smot Ait kaket. Tna yno jõ thafri raa anya ye. 15Bokyas ro mrof refo fo bo ro ati. Feto to nri nbo kaket:
“Kristus Yesus yama tabam refo mkah yoo riof yee kʼraa ro ja mno iro.”
Tna jõ fi tno iro mase miwer raa weto beta. 16Menohe Tuhan yatmof jõ: Jõ fi tno iro mase sai feto tna Tuhan yatmof jõ. Yno re kbe raa mmat tna mhar mawe Kristus Yesus tait raa ro yhaf sneh. Kbe raa mmat feto tna smot Ait. Tna mkai riof ro mase ye. Meen ana weto mhau hame wajin ye.
17Jõ ksoh raa beta waa kʼAllah. Ait tait Raja ro yatak ybo tabam refo. Ybo ti ro wia mamo snok mam hame wajin. Ait meen yhau yroon yum. Ait raa mmat fee ye. Tna Ait sait aran ro yase. Nma, anu beta hawyõn tna bbaut Ait mamo snok mam hame wajin. Amin: Mabo oh!
18Timotius, ku ajõ; jõ tsi bo kʼnyõ: Nari bo ro jõ tkom kʼnyõ refo beta. Tiwya raa mkyas bo kʼnyõ, mkyas bo ro mbam kʼAllah. Tna bo ro jõ tsi refo mamyot bo ro tiwya ana weto mkyas ye. Kbe meen bo mama mai kʼnyõ. Tna soh nyõ nnaut bokyas reto to, kbe nyõ nros natak tna beroh nno bo ro Tuhan.19Kbe nyõ nhau to smot Ait kaket. Tna kbe nyõ nhar mam nhaf anyõ nwe ja nyõ nno bo ro moof ye. Raa taro to, ana mhar bo ro moof menohe ana haberek tna hawe bo mbo mno u fee. Tna tis rau to ana smot Tuhan Yesus fee ye: Ana bitsre bosmot rana sai makus. 20Himeneus ysya Aleksander mno feto oh: Bosmot wana ana beak makus sai. Tibyo jõ tsan ana kabes yabi (Iblis) afo re ana waa tna mashana tna kbe mamus Allah u ma.
2Skabuk Tuhan to, nno fefo:
1Ro sau to, jõ tkyas bo skabuk: Ati ro anu skabuk to, skabuk bo aro rau-rau: Nyoh boyoh ye tna skabuk raa beta ye. Soh-soh bi Ait re kbe yban anu mam bo beta ro anu nno, tna nyoh asik mase kʼbi Ait ye: 2Skabuk raja na sor msya raa ro mase taro beta re misoh raa wana kaket. Afo re anu bhau kbum, mam arin ro moof. Skabuk re kbe anu bhau bno bo ro Allah ksoh, tna waa bi Ait ye. 3Allah, Raa Sotak ranu, ksoh yawe anu skabuk feto. 4Ait ksoh yawe raa beta kbe mkai riof ro mase. Tna ksoh yawe raa beta mhar watum rAit ro ati. 5Au oh mi: Allah tait sait aran yase. Tna Kristus Yesus yamo Raa Sotak, yros susai masuf ysya Allah tna ysya anu ye. Yesus fi Raa ro 6ysan yetsu rAit mkah raa mame. Anu raa beta bno iro. Menohe Yesus bitsre Ait raa mame riryõn. Yesus yno bo reto mam ati ro Allah yawe. 7Tna Allah ybis jõ tama tkyas bo refo. Yawe jõ betoo bosmot ro ati refo kʼraa mana ro Yahudi to fee. Yawe jõ tamo tkyas kʼraa mana roto makin sai. Bokyas refo mabo, jõ sioh fee.
8Jõ tkyas kʼraa sme beta tawe, “Nisoh anu re nhau nno bo ro Allah wAit sai. Nisoh anu wia feto, tna tubat ntem wanu abyõ skabuk nkyas bo kʼAit. Tna kmo anya to ma. Ntoh anya to ma.”
9Tna jõ tkyas kʼfnya beta tawe, “Nyum ratan ro kmun. Nyum ratan ro mabyoh maut afo re raa mmat tna mbibi anu to, ma. Nyum ratan ro afo sai. Naya nana toni ma. Fayir anu toni ma. 10Anu ro nwe anu ja nhau nrat nsya Allah to, nhau nno bo ro moof sai. 11Ati ro jemaat skabuk su to, anu fnya hre shait tna knar nri watum sai. Nsu heyut tna nri raa ro mase mbo anu. 12Soh anu fnya nmo guru to, nwatum raa sme to ma. Nbis-bas bo kʼraa sme to ma. Shait sai nri bo ro ana mawe.” 13Tiwya tinyi rau to, Allah yfen Adam wia yatim tna yfen Hawa. 14Tna kabes yabi (Iblis) besruf Adam fee. Fnya oh mi Iblis besruf tna au mbtek mam iro to. 15Ro moof to, fnya mhau smot Yesus, tna matmof raa anya, tna mhau mno bo ro Allah wAit sai, tna mbo ana kaket to. Soh fnya mbo bo weto mno to, kbe mabe ku tna mkai riof mbam Allah.
3Ait ro yamo majelisjemaat to, kbe yno fefo:
1Bokyas refo fo bo ati: “Raa ro yawe yamo majelisjemaat to, ait ksoh yaut hre mam hroh ro moof.” 2Anu nsok raa ro yamo majelis wanu sait to, nsok kaket. Nsok raa ro wase mber safo be kbe raa mkyas-kas ait. Nsok raa ro ja yno bo mfi fefo: Raa ro yoo fnya sau aran sai, ro yiramu ait rere, ro ynaut ait re yno-na bo fee, ro ja yitrah amah rait kʼraa, tna ro yhar bo watum raa ye. 3Ro ksoh yata anggur fee, ro kmo yoyo fee, ro sneh sai, ja yiranya ysya raa roto ye, tna yasu mase mkah pitis fee ye. 4Nsok ait sait ro ja yisoh fnya rait msya ku wait kaket moof. Tna ybo ku wait kaket re ana waa ait tna mari bo ro ait yawe. 5(Soh ait tait wase ybo fnya msya kukek wait kaket fee to, kbe ait yisoh jemaat Allah to fyi?) 6Nsok raa ro yashana smot Yesus tna sai to ma. Soh ait tna sai yamo raa ro Kristen to, tna yamo majelis to, kbe ait tawyõ ait ai tna btek yno iro mnan tiwya tinyi kabes yabi (Iblis) yno ye. Feto to nsok raa sait ro smot Yesus ooh oh. 7Nsok raa ro yasom rait to moof kbe yamo majelis. Raa retait ja raa ro mne mhar ait tna mawe ait yasom rait to moof ye. Soh mfe to, kbe raa maun, tna ait btek mam kayah ro kabes yabi saro to.
Raa ro mamo diaken to, kbe mno fefo:
8Raa ro mamo diaken to, nsok raa ro ja mfi fefo: Raa ro waa Allah, ro srau ewok fee, ro ksoh mata anggur fee, ro srau mnaut bosatoh re kbe mno bo mkair fee ye. 9Raa ro mbo bosmot ranu matak. Bosmot ranu refo to, maja rau taro samyoh. Tna raa ro mamo diaken to, nsok raa ro mhar bo maja weto tna mhar mam mhaf mato mawe bo mabo. 10Raa ro mawe mamo diaken to, nsok ana fooh ma. Nsanet raa weto wia. Tna soh ana mhau mno bo ro moof to, kbe nsok ana nse mamo diaken mno bo ro jemaat.11Nmat sas raa retait yfain ye. Diaken yfain to, fnya ro ja waa Allah, ro ja mkyas mun-mun raa fee, ro miramu au rere, tna raa taro mmat au, tna mhar mawe bo bawya ro au mno to ja mno bo moof. Au wase bo sioh raa. 12Raa ro mamo diaken to yoo fnya sau aran sai. Raa ro ja yisoh kukek msya raa wait kaket moof ye. 13Soh diaken yno bo ro jemaat kaket moof to, kbe raa hartu ait. Tna ait yhar yawe bosmot rait to, bo ro ati. Tibyo ja ykyas Kristus Yesus yasom msya bosmot rait to, ykyas kʼraa kaket ye.
14Bo wefo beta jõ tkom tiim aam refo kʼnyõ. Jõ tksoh tama tmat nyõ fooh, tna tiim aam refo matim wia kʼnyõ ye. 15Soh jõ tarak fares to, nmat aam refo re kbe nhar iso ro jemaat mhau mno bo ranu. Anu fo raa ro Allah wAit. Allah ro yaam. Anu raa jemaat to, ja nros tubat watum rAit ro ati. Anu ja nros kaket nbo watum rAit matak. Anu nfi sankaf ro mros matak ja tubat amah rau ye. 16Bosmot ranu maja rau baro samyoh: Ja raa srau mnaut fooh to fee ye. Menohe anu ro smot Ait to bhar bwe:
“Yesus yama tabam refo. Yama tna yetsu rAit yfi raa sai. Tna Har ro Tuhan mawe Ait raa ro wase yber safo. Tna malaikat sor mmat Ait ye. Tna raa mkyas Ait yasom kʼraa mana ro mhau mam tabam refo beta. Tna raa smot Ait. Tna Allah tubat Ait yakah yamoʼt sawro rAit.”
4Raa ro yakah kair yama besruf
1Har ro Tuhan mawe ayõ ro meen wono to, raa ro ja smot Kristus baro kbe haberek kbor wana tibyo smot Ait u fee. Ana me mari har ro besruf raa, tna kro bokyas ro kabes. 2Bokyas wefo mbam kʼraa ro hren ksuk. Raa weto mamo wan-wan sai. Ana mkyas bo siroyõ. Ana mhaf mkair. Soh Har ro Tuhan mbesi bo kʼana to, ana mari fee. 3Ana weto mawe wa kʼraa mawe, “Noo fnya ma!” Mawe raa mhau sai semana bana. Mawe fnya mhau bana seren sai. Tna raa weto mawe wa mawe, “Nbo kak ma!” Nri ana weto ma. Nnaut nwe kak to, tii Allah yfen mkah bo raa mabo. Kak weto Ait yfen mkah bo anu raa Kristen to bbo. Anu ro smot Kristus fo bhar iso rAit ro ati re ja anu byoh asik mase kʼAllah tna bbo sai. 4Bombra ro Ait yfen to weto beta moof. Soh raa mayoh asik mase kʼAllah mkah bo ro ana mabo to, bo sohmaam ro mbau to, aro fee. 5Watum ro Allah msya skabuk ranu to, mno bo weto beta to, bo ro Allah yawe moof sai.
6Timotius; soh nyõ betoo bo ro riwai weto beta kʼraa Kristen mam weto to, reto moof. Nyõ nno bo ro Kristus Yesus ybis kʼnyõ nno to, kaket oh meto. Nno feto to, nyõ nkro iso ro bosmot ranu kaket, tna ja nari maja rau ro ati kaket ye. 7Nnaut oh: Bokyas mna ro mafer marak to, mbeak fari. Nari ma. Beroh nhau nrat nsya Allah. 8Mfi bo raa mur-mur yno yetsu rait yrok yoof to, mafer reto mabuf sai. Menohe raa beroh mhau mrat msya Allah to, mafer mase mkah bombra beta; mfo refo ye tna meen mkah makyon rouu ye.
9Nari oh: Bokyas refo bo ro ati! 10Anu fo bsam wai kʼAllah. Ait tait Raa Sotak ranu, Allah ro yaam. Anu bhar bwe bo ro Ait yawe to, meen mabo. Ait yawe yoo riof yee kʼraa beta. Anu bsam wai kʼYesus tibyo ait ysan riof kʼanu beta. Au oh mi anu safo bkah bo rAit.
11Timotius; nkyas tna mbetoo bo wefo beta kʼjemaat ⌞ro Efesus reto.⌟ 12Soh raa miwana nyõ tna mawe nyõ mere fares to, hrenaut ma. Nhau nbo kek mram iso ro moof kʼraa Kristen taro: Nkyas bokyas ro moof sai. Nno bo ro moof. Natmof raa, smot Yesus kaket, tna waa kʼAllah re kbe nno iro fee. Soh raa jemaat reto mmat bo ro nyõ nno weto to, kbe ana mno mfi bo nyõ nno feto ye. 13Tna wore nyõ nhau ste jõ tama to, nmur-mur baca Bokom ro Allah kʼjemaat. Tna betoo maja rau kaket re kbe raa mari mbo mno ye. 14Tiwya majelisjemaat skabuk nyõ. Ana mawah matem wana mse kʼnyõ abyõ. Tna nabi na mawe Allah yoo bouum ysan kʼnyõ. Bouum reto mno kbe nyõ nno bo ro jemaat kaket. Feto kbe nmur-mur nno bo weto kaket! 15Beroh nno bo weto kaket afo kbe raa beta mmat mawe bo ro nyõ nkah weto moof miwer bo ro tiwya nyõ nno ye. 16Hamer nkyas watum ro Allah maja rau ro ati. Beroh nno bo wefo beta kaket afo kbe nyõ nesait nkai riof tna nsya raa makin ro mari nyõ to, kbe mkai riof ye.
5Raa ro jemaat
1⌞Mfi bo raa yabi sait yno bo mkair to,⌟ bhah ait ma. Hartu bi ait tna nerif iso ro moof kʼait yfi bo nyõ naja anyõ ye. Nmat raa sme ro tna mfi bo nao na ye. 2Nmat fnya mabi mfi bo nme anyõ ye. Tna nmat ku ro ano mfi bo nano na sai ye. Nmat ana to, waa Allah re nno iro to ma.
Fnya ro semit
3Nkyas kʼraa jemaat reto nbis nawe ana mmat fnya semit ro mesait mhau kar. Nno be ana weto mhau bo marak. 4Semit ro ku wana aro mhau fares, soh mfe semit ro matat wana mhau fares to, nbis raa wana weto kbe mmat semit rana. Mmat ana to, sroh bo ro tiwya fai au mno kʼana to. Reto to, Allah ksoh. 5Semit taro mesait mhau kar. Raa ro mmat ana aro fee. Ana msam wai kʼAllah ro ymat ana sai. Mti-baas to ana skabuk Allah tna msan ana kʼBi Ait ymat. 6Menohe semit roto taro mhau mnaut bo ro tabam sai. Ana mnaut Allah fee. Ana wefo mhau maam fares. He mamos wana ro smot Allah to, mhai oh. 7Nkyas bo wefo beta kʼraa jemaat ye. Soh ana mno bo moof kʼsemit wana to, kbe raa mkyas-kas ana fee ye. 8Tna mfi bo raa sait hawe ymat raa wait to, bhah ait nawe, “Raa ro smot Kristus fee mno bo mkair rof, mbau a. Menohe nyõ beak bosmot anyõ nno-na bo feto to, nno bo ro mkair toni meto!”
Semit taro nkom ana masom mam daftar
9Nmat semit mam jemaat ranu. Nsok semit taro tna nkom ana masom mam daftar. Semit ro kbe jemaat mmat to, semit mfi fefo: Semit ro umur 60 tahun maut yut. Tna ro tii msya raa sait aran sai. 10Nsok semit ro ja raa mhar oh. Mhar tna mawe au ja mno bombra ro moof: Tii au misoh kukek wau kaket. Tna semit reto ja mitrah amah rau kʼraa ye. Raa ro Allah wAit mbam remo roto mama to, au mmat ana, kamus maa wana bo to. Semit reto ja moo bo mee kʼraa ro bo marak. Nsok semit ro mur-mur mno bo moof aro rau ye. Tna nkom ana masom wana mam daftar reto.
11Semit ro fnya fain fares to, nkom ana masom mam daftar reto ma. Kbe ana mawe mamo msya raa u. Tna kbe ana mnaut Kristus kaket fee. 12Ana weto kbe msya raa rouu tna miwana bo ro tii ana mawe. 13Nno be jemaat mmat semit ro fnya fain fares to, tna fnya weto haweboh sai. Kbe ana hre mam amah mafoh na wana sai. Hre msya ana rabu wawa tna mkyas raa. Kbe ana mkyas bo raa mati, tna mkyas-kas bo ro mkair-kar ye. 14Reto oh mi jõ tawe ⌞nkom ana masom mam daftar reto ma.⌟ Ro moof to semit ro fnya fain fares mamo msya raa u. Tna mabe ku, tna mhau msui misoh amah wana msya kukek wana. Feto kbe raa ro hawe anu to, kbe mkyas-kas anu raa ro Kristen bsom ranu fee. 15Semit baro hah me kro iso ro kabes yabi (Iblis) oh. 16Semit to, nbis kukek wana mesait mban semit wana wia. Menohe semit ro mesait mhau kar to, kbe jemaat mban ana mesait sai aran. Afo re jemaat msui fee.
17Majelis ro ja misoh jemaat kaket to, nbis raa jemaat nawe, “Hartu raa weto.” Tna majelis ro mur-mur mkyas tna betoo watum ro Allah to, nbis raa jemaat nawe, “Hartu raa weto kaket matak!” 18Bokom ro Allah mkyas mawe,
“Wore sapi mkah bo wanu to, nke masoh rau to ma, nhau au mait bo.”
Ulangan 25:4
Tna,
“Raa ro ykah bo wanu to, nren ait tu oh.”
19Soh raa sait yaun boun majelisjemaat to, nari boun ro ykyas reto ma. Soh raa mabo ewok, tuuf mkyas feto ye, kbe nari tna nkyas bo reto. 20Raa ro mno iro to, bhah ana wore raa jemaat mari ye, afo re raa taro mrok waa ye. 21Nari bobis riwai wefo fo kaket. Ati ro nyõ nhau susai ntu srah to, nno ntrot sai. Soko raa sait bo ma. Bo ro jõ tbis nyõ nno wefo fo, Allah yros ymat ye, Kristus Yesus yros ymat ye tna malaikat ro Allah ysok to, ana mmat ye.
22⌞Ati ro nyõ nsas raa sait yamo majelis to, srot-srot nsok raa sait ma.⌟ Srot-srot tubat natem nse kʼraa retait to ma. Tna kaket nyõ: Soh raa taro mno iro to, nsya ana nno-na bo ye to ma. Kaket nyõ tna waa Allah re nno iro fee 23(Timotius; ntkif nhaf anyõ ro ja mham to. Nata aya mesait kar sai ma. Nata anggur maya kebet ye.) 24⌞Nsok raa ro mamo majelisjemaat to, kaket.⌟ Iro ro raa mno taro to, raa mhar tetara. Tna raa mtu srah wana fefares. Iro ro raa mno taro to, ana mno wai. Tna mamo muktis rau to raa mhar tis ye tu oh. 25Feto ye bo moof ro raa mno to, taro kbe raa mhar ye. Bo moof ro raa mno taro to, raa mno mmyõt wai menohe kbe raa mhar ye tu oh.
61Raa Kristen ro mamo sryan boh kʼbobot wana to: Waa tna nri bobot wanu kaket. Hartu ana afo re raa ro Kristen fee kbe mmat anu nhaf mato ro moof to. Feto kbe ana mkyas-kas Allah ranu yasom to fee. Feto kbe ana mkyas kair bosmot ranu fee ye. 2Soh bobot wanu raa ro Kristen fee, hartu ait retait ye. Tna soh bobot wanu raa ro Kristen to, hartu ait retait ye. Ait ynan fi anu nao ranu. Feto to, niwana ait ma. Hartu tna nri bo kʼbobot retait kaket. Nno bo rait kaket ye. Bobot ro mkai bo ro moof mbam kʼanu to, ait smot Yesus ye. Tna Allah yatmof bobot retait ye.
Timotius; nkyas bokyas refo kʼjemaat ye. Nbis nawe ana mbo mno. 3Raa taro mkyas watum ro Allah to, menohe mkyas maja rau to, kaket fee. Ana miwer maja rau ye. Ana sioh miryõ bonaut wana ye. Raa taro to, mno mkair feto. Soh raa sait ykyas watum ro Allah to, menohe yisnak maja ro Allah feto to, ait wase iso ro Tuhan ranu Yesus Kristus. Ait srau rait ha-hayah. Ait yerif iso ro mkair. Yerif iso ro moof ati to fee. 4Ait retait wase bo. Ait bibi ait yesait sai ai, tna ait tri-tri santri bosmot sininya ro mayõ raa mmak ye. Raa santri bo feto to, ana mno re raa mhaf mkair, ja mno raa maun boun kʼanya ro mkair, tna mbat-bat anya ye. 5Raa ro mkyas bo mweh feto to, mno raa ngko-ngkat anya miyõ kait. Ana weto mhaf, srau wana mkair, ana wase watum ro ati. Tna ana mnaut mawe mbam bosmot ranu ro Kristen to, kbe mbobot.
6Raa baro ja mno bo ro Allah ksoh tna mawe mhaf wana mnan oh meto. Ana weto mkai mafer ro moof ati mbam bosmot ranu. 7Tiwya ati ro anu fnya wanu mabe anu to, anu bbo bo aro frok fee. Tna meen anu frok bbam tabam refo bbo bo aro bmo fee ye. 8Feto to, soh anu bkai boit ro biit, msya ratan ro byum baro to, bo weto mnan sai oh. 9Raa ro saso bobot sai, srau wana ro mkair ja miwro ana. Tibyo ana mamo mam iso ro mkair tna mbtek mam kayah mato. Bo ro msai mbtek mai kʼana. 10Raa ro ja srau mnaut pitis sai to, kbe bonaut reto misti re ana mweh iso ro mwak. Tna ana kro iso ro bosmot ranu u fee. Tibyo mno bo ro mkair-kar msis. Tiwya raa ro Kristen mabo baro mamo mam iso ro mkair reto oh. Tibyo bombra ro mkair mbtek mai kʼana.
Watum ro tis
11Menohe nyõ fo raa ro Allah rait. Feto to nhau toto mam bo ro mkair riwai to beta. Tomer nno bo mfi fefo: Nno bo ro moof, bo ro Allah ksoh sai. Smot Tuhan kaket. Natmof raa. Beroh nros nasom bo mkair-kar ro mbtek mai kʼnyõ. Tna nno bo mkah nhaf ro sneh sai yoyo. 12Nhau smot Yesus matak. Beroh smot Ait nfi raa ro santri anya mhoh to. Ana ja beroh mhoh mamo snok si tis rau feto ye. Beroh tna mkai roon ro meen hame wajin. Reto oh mi tiwya Allah ytu nyõ yawe namo no kʼAit. Tna tii reto to, nyõ nkyas kʼraa makin nawe nyõ kro Yesus to ye.
13Mfo refo jõ tsi bo kʼnyõ. Tsi bosi wefo mam wore Allah ymat ye, tna mam wore wo Kristus Yesus ymat ye: (Allah oh mi Raa ro yoo yafos yum kʼraa msya bombra wofo beta. Tna Kristus tiwya ykyas bosmot ro ati refo wia kʼPontius Pilatus ye.) 14Tsi tawe: “Nari tna nno bo ro jõ tkom mam aam refo. Nno bo weto beta kaket. Nno bo mkair ma be kbe raa mkyas-kas nyõ. Nhau nno bo weto yoyo mamo snok mam ati ro Tuhan ranu Yesus Kristus hah yama u.” 15Meen Yesus hah yama u mam ati ro Allah yawe. Allah tait yase yiwrek raa beta. Anu bbaut bi Ait. Ait tait Raja ro yase tna ybo raja ro mhau mam tabam refo beta. Tna Ait Bobot ro yase yiwer bobot taro sor beta. 16Ait yesait aran yhau yroon, bi Ait meen yhai fee. Tna Ait yhau mam wore kek ro maah tna kren-kran toni. Raa aro mamo mros kait mmat Ait fee. Nama, anu heyut bi Ait ro ybo bombra beta mkah yatak rAit ro meen mhau hame. Amin: Mabo oh.
17Nkyas kʼraa ro bobot to, nawe ana safuk mawe ana u kar to ma. Kbe bosatoh ro ana mse mam tabam refo to mno riof kʼana fee. Bosatoh mhau kait fee. Kbe meen bo weto mhau akus mam tabam refo. Ro moof to, ana msam wai kʼAllah sai ro yoo bombra msis-sas yee kʼanu bhaf bse. 18Nkyas kʼana nawe bo moof ro ana mno to, bo ro ati miwrek bosatoh ro ana mse. Ro moof to, ana msan bo kʼraa. Tna saim kta wana mkah mhaf wana ro ase. 19Feto oh mi ana mame kta ro meen mhau hame. Feto oh mi ana siwyan bo matim wia mkah meen wore wono. Feto oh mi ana mkai roon tna mhau hame wajin.
20Timotius; Allah yoo watum rAit yehau kʼnyõ nbo kaket. Nirit nyõ nkah bokyas mkair ro mafer aro fee ye. Nhau toto mam bo santri ro mno raa mhar bo fee. Bo santri reto to mkair. 21Bo santri reto misti re raa mabo baro sikba bosmot ranu ro Kristen.
Jõ skabuk Allah afo re Ait yatmof anu.