1 Tesalonika

Aam Tinyi ro Paulus Ykom tna Tiim Mamoʼt Jemaat ro Tesalonika

1 Tesalonika

¹Aam refo mbam kʼamu, Paulus, Silas nsya Timotius. Amu nmah meen kʼanu jemaat ro nhau mam kota ro Tesalonika. Anu smot Allah, anu Bja ranu, ysya Tuhan Yesus Kristus. Amu skabuk afo re bi Ait yatmof anu beta tna yno re anu nhau nhaf tnok ye.

Raa ro Tesalonika mbo watum ro Tuhan mno

²Amu skabuk nkyas bo kʼAllah to, ja amu skabuk anu beta ye. Skabuk anu nyoh asik mase kʼbi Ait yoyo. ³Amu nkyas anu kʼAllah Bja ranu to, amu nnaut nwe anu smot Tuhan Yesus kaket, tibyo ja nkah bo wAit. Tna anu ja mur-mur natmof anya kaket ye. Tna anu ja beroh ninaut nwe Tuhan ranu Yesus Kristus meen hah ye yama u. ⁴Amu nhar nwe Allah yatmof anu tna ysok anu nmo raa mana rAit ye oh. ⁵Tiwya amu nkyas Bokyas Moof ro Yesus (Injil) kʼanu tna Bokyas reto mroh mami mam kʼanu nhaf. Har ro Tuhan mno re anu nhar nwe Bokyas reto to, bokyas ro mabo tu. Bokyas ro mbam raa sai fee. Tiwya amu nhau nsya anu su. Tna anu nmat sas amu. Nmat tna nhar nwe amu ja nno bo ro moof kʼanu. Tibyo nhar nwe bo ro amu nwe to bo mabo. ⁶Anu nri Injil ro amu nkyas to, Har ro Tuhan mno anu simaut mase. Tna anu kro nno bo ro ja amu nno ye afo re anu nnan amu tna nnan Tuhan ye. Anu nno feto tibyo bo ro mkair mama mai kʼanu oh. Menohe anu beta beroh nbo Injil reto kaket. ⁷Raa Kristen ro mhau mam provinsi ro Makedonia msya provinsi ro Akhaya to, beta mmat bo ro anu nno. Mmat feto tna ana mawe kro mno bo ro ja anu nno ye, afo re ana mnan anu. ⁸Anu ja nkyas tna nno watum ro Tuhan. Tna raa beta mari oh: Raa ro Makedonia msya Akhaya ye tna raa mam arin aso wofo beta. Raa beta mhar mawe anu smot Allah kaket. Feto kbe amu nesait nkyas bosmot ranu kʼraa mkah bawya u? ⁹Raa weto mesait mkyas anu ro Tesalonika mawe, “Tiwya raa ro mhau mam Tesalonika ja smot bo ro tabam sai. Menohe Paulus sya mamoʼt kota reto tna mkyas Allah. Raa ro mhau mam Tesalonika weto mitrah mhaf wana tna ana mari bo ro Paulus sya, mawe. Feto tibyo raa ro Tesalonika haberek smot Allah ro yroon. Ana smot Allah ro ati tna kro Ait mno bo ro Ait yawe. ¹⁰Tna ana mhau ste Ku ro Allah yare hah ye yama ybam sawro rAit. Yasom Yesus. Tiwya Ait yhai menohe Allah yno re Ait yrok yasen. Meen ati ro tabam refo haberek tna kair mama mai kʼraa to, Yesus kbe yoo riof yee kʼanu raa wAit”

Bo ro Paulus tii yno mam Tesalonika

¹Taja, tme, tao, tano na; anu nhar nwe bo ro tiwya jõ tama tkyas kʼanu to mafer msis oh. ²Tiwya tinyi amu nmoʼt kota ro Filipi to, raa mno bo ro mkair mai kʼamu tna mikyak amu ye. Ana hawe mari Bokyas Moof ro Allah (Injil). Menohe Allah ranu yatam amu. Tna amu nsen nmo no kʼanu mam kota ro Tesalonika. Tna raa mama mno anu. Menohe amu beroh nkyas Injil kʼanu, amu waa fee. ³Watum ro Tuhan amu nma nkyas kʼanu to, bo ro ati. Amu nkyas watum rAit to, nkyas sre fee. Amu nkyas bokyas reto mbam nhaf wamu ro moof. Amu besruf anu fee. ⁴Allah yawe amu noof tna yoo Bokyas Moof ro Yesus (Injil) yehau kʼamu to, yawe amu nmo nkyas to. Amu nmo nkyas Injil afo re raa nksoh amu to, fee. Amu ja nno bo afo re Allah ksoh amu. Bi Ait oh mi Raa ro ja sanet amu nhaf mato wamu. ⁵Anu beta nhar nwe amu nhaf mato wanu to moof sai. Amu nkyas bo nsoh moof sai fee. Menohe amu nkyas bo abyõ sai kʼanu. Amu nmyõt bo aro fee. Amu nsu mase mkah pitis wanu fee. Allah ja ymat tna yhar bo ro amu nkyas reto. Yhar yawe amu sioh anu fee. ⁶Amu nwe anu bibi amu fee! Amu hawe anu nsya raa roto bibi amu. Menohe amu fo raabis (rasul) ro Kristus. Feto to amu nse re nbis anu feto. He mfe, amu hawe. Tibyo ja amu nbis-bas anu fee. ⁷Amu fo raabis ro Kristus wait menohe amu sneh sai nhau susai nsya anu. Amu nhaf sneh nfi fnya ro misoh ku mkek wau ye. ⁸Amu natmof anu oh mi amu nma nkyas Bokyas Moof ro Allah reto kʼanu. Amu nksoh anu toni sai oh mi amu nhau niranya nsya anu ye. ⁹Wore weto to, amu nkyas Injil kʼanu ye, tna nkah bo wamu nesait to ye. Nnaut nwe rabu-reha ja amu nimyoh marak nkah bo ramu nesait. Amu nesait saso boit mkah bo amu niit bo to, re kbe amu nno anu beta hrowyõ nmat amu fee. ¹⁰Amu nhau nsya anu ro smot Yesus to, anu nmat amu nhaf oh. Wore weto to, amu nhau nno bo ro Allah wAit sai. Amu ja nno bo ro Ait ksoh sai. Amu wase nber safo ye. Ja Allah ysya anu nesait nmat nhar bo reto oh. ¹¹Nnaut nwe amu nhau nsya anu tna nisoh anu aro sait-sait mfi bi sait ro yisoh ku wait. ¹²Amu nkyas watum kʼanu re kbe nisoh bosmot ranu. Ja amu nkyas bokyas mas mafer ro ati kʼanu. Amu nno feto afo re anu nhau nno bo mamyot bo ro Allah ksoh anu bno. Bi Ait ytu anu meen nmo nhau mam sawro ro Ait yamo Raja ybo. Mam tno to, kbe anu nhar bo yase rAit kaket ye.

Paulus simaut mase yari jemaat ro Tesalonika mhau moof

^13,14Taja, tme, tao, tano na; bo roto sau naut ro mno amu nyoh asik mawat kʼAllah yoyo to fefo: Bokyas ro tiwya amu nkyas kʼanu to, anu nri tna nwe watum ro mbam kʼAllah oh meto. Anu nhar nwe bokyas reto to, bokyas ramu nesait sai fee. Anu nri watum rAit reto tna nfau nse kʼanu nhaf wanu sait-sait. Watum reto matak re misoh anu nhaf wanu. Watum ro Allah kbe mas mafer ro ati kʼanu ro smot Yesus Kristus. Anu beta nnan raa Kristen ro mhau mam provinsi ro Yudea. Jemaat ro Allah weto mkai bo ro mkair mbam raa wana mesait ye. ¹⁵Raa wana ro Yahudi oh mi tiwya mame Tuhan Yesus ysya nabi na majat to. Tna ana mikyak amu ye to. Bo ro ana mno weto to, Allah knait. Tna ana mamo raa ro byoh kʼraa beta ye. ¹⁶Ana hawe amu nkyas Watum ro Tuhan kʼraa mana roto. Ana hawe raa ro mbam raa mana roto makin mkai riof ro mase. Ana mno wa amu nkyas Bokyas Moof reto to, iro ro samyoh oh meto. Feto oh mi Allah kmo tna yno bo ro mkair btek mai kʼana ro Yahudi to.

Paulus ksoh hah ye yamo yirer raa ro Tesalonika

¹⁷Taja, tme, tao, tano na; tiwya anu betne anya, amu nmo si tna anu nhau akus si mam beto to. Anu betne anya mno amu sraujin toni tna amu nnaut anu yoyo sai. Amu nwe fooh aro re amu hah ne nma nmat anu u. ¹⁸Amu nhau to, nnaut nwe hah ne nma nmat anu. Tiwya jõ tawe thah tama tmat anu menohe mfe. Kabes yabi (Iblis) yno wa. ¹⁹Amu nwyan marak awya? Awya ro mari Bokyas Moof mbam kʼamu tna re mno amu simaut mase. Anu, raa ro Tesalonika fea! Meen ati ro Tuhan Yesus hah yama u to, kbe amu safuk anu fea! Kbe anu beta bros su bsya Tuhan Yesus. ²⁰Ati ro amu naut anu to, amu safuk tna simaut mase.

Timotius hah yama ybam kota ro Tesalonika

¹⌞Amu nbo tuuf nri he bo ro mkair mama mai kʼanu ro nhau mam Tesalonika.⌟ Amu srau kero anu beta ntu nwe anu nhau fyi? ⌞Amu wase fares. Feto to amu nbis Timotius yama yo kʼanu.⌟ Tna amu mbewok nesait nhau akus sai mam kota ro Atena. ²Timotius tait amu nfoh ramu ro ja ysya amu ykyas Bokyas Moof ro Kristus ye. Amu nbo tuuf refo ja nhau nno bo ro Allah ybis yawe amu nno. Amu nbis Timotius yama yawe kʼanu yawe, “Waa ma. Nnaut yyi ma. Bito ntak sai.” Ykyas feto re kbe anu nhau smot Kristus kaket matak. ³Tiwya anu nesait nhar oh nwe kbe bo ro mkair mama mai kʼraa ro Kristen beta. Bo ro mama mai kʼanu reto to, Allah oh mi ybis mama meto. Tna mfo refo mabo oh. Feto to amu mbewok nbis Timotius yama ykyas bo kʼanu re kbe anu nros tu. Tna bito nsom sai, ne susu ma. ⁴Tiwya amu nhau nsya anu beta fares to, amu nkyas bo refo kʼanu wia matim ye. Amu nwe kbe raa mama mno anu beta. Tna anu nesait nhar nwe bo reto mabo oh. ⁵Jõ waa tnaut tawe kabes yabi (Iblis) sioh yno anu kawi. Be kbe kabes yabi sanet anu, yno re anu smot Yesus u fee. Be kbe yno anu beak Bokyas Moof (Injil) ro tiwya amu nkyas kʼanu. Feto oh mi jõ thau ste kait fee; jõ tbis Timotius yama yo kʼanu fooh. Jõ tbis ait yama ymat bosmot ranu. Tawe ymat anu tna hah yama ykyas kʼjõ.

⁶Tna sai Timotius hah yama. Tna jõ simaut mase tari bokyas rait. Yawe bosmot ranu matak fares. Tna ait yawe anu ja beta natmof anya ye. Yawe anu nnaut amu yoyo ye, nwe soo aro fooh re anu beta nmat amu nsu nnaif, ja nahni ooh oh. Tna amu ksoh nma nmat anu beta ye. ⁷Mfo refo bombra ro mkair-kar sor mama mai kʼamu mam befo. Menohe amu nri bo ro Timotius yama ykyas reto. Yawe bosmot wanu beta matak fares. Amu nri feto tna amu nnaut yyi anu u fee. ⁸Amu nhar nwe anu smot Tuhan matak fares. Feto to amu nhau to, nhaf wanu tnok sai. ⁹Allah yari skabuk wamu oh. Yno bo moof kʼanu oh meto. Amu simaut mase tna nyoh asik mase kʼbi Ait ye. ¹⁰Rabu-reha to, amu skabuk Allah, nyoh nwe amu hah nma no kʼanu u, mkah bo nisoh bosmot wanu ro mabut fares.

¹¹Amu skabuk Allah, anu Bja ranu, ysya Yesus Kristus,Tuhan ranu. Amu nyoh nwe Ana misoh iso ramu; mno re amu nma fri anu beta u. ¹²Tna amu skabuk re kbe Ait yno anu natmof anya myum mase, tna yno anu natmof raa roto beta ye. Nno feto mfi bo amu ja natmof anu beta ye. ¹³Meen Tuhan Yesus yama u ysya raa wAit beta. Tna anu beta bros bmat Allah; anu Bja ranu. Kbe Tuhan ytu safo wanu yari. Tna amu nyoh bi Ait afo re Ait yisoh anu nto wanu mboh. Yisoh anu feto tibyo ymat anu yawe anu nber safo aro fee.

Paulus ykyas watum kʼraa ro Tesalonika afo re ana mhau to, mno bo ro Allah ksoh sai

¹Taja, tme, tao, tano na; tiwya amu watum kʼanu nkyas iso ro Allah ksoh anu nkro re kbe Ait yhaf mnan anu. Tna amu nhar nwe anu ja nhau kro iso reto. Tna mfo refo amu ne sobu anu nwe kro iso reto kaket renti. Amu soh-soh anu feto mkah Tuhan Yesus yasom rAit. ²Iso ro tiwya amu nbis anu nkro reto to, anu nhar oh. Tna mkah Tuhan Yesus yatak rAit to, amu nbis anu nkro iso reto. ³Bo sau ro Allah ksoh anu nno to, yawe nhau nfi raa wAit ro mato mboh sai. Au oh mi mbeak wyah bo to fari. ⁴Ait ybis anu raa sme aro sait-sait yoo fnya rait tna yhau su, yjin su ysya au mesait aran sai. Iso ro raa makin mawe moof meto. Tna raa ro mhau mno bo ro Allah wAit sai to, ja nkro iso reto ye. ⁵Srau oot-oot fnya raa to ma. Nno bo nfi raa ro wase Allah to ma. Ana weto ja masmamo. ⁶Soh raa sme aro yno-na bo to, ait yno bo ro mkair mai yafoh rait oh meto. Nnaut nwe kbe Tuhan yno bo ro samyoh btek mai kʼraa sme ro yno bo mkair mfi feto to. ⁷Allah ysok anu bma bo kʼAit to, yawe anu bno bo ro mkair to ma tna bwyah ma. Ait ybis anu bhau bno bo wAit sai to. ⁸Awya ro hawe bo yari bo refo fo, ait yiwana raa fee, yiwana Allah ro yoo Har rAit yse kʼanu oh meto.

⁹Anu raa Kristen ja natmof raa anya. Bo reto anu beta nhar oh. Bo reto anu nri kʼAllah yesait. Feto to amu ne nkom bo reto nwe afat fee. ¹⁰Jõ thar tawe anu natmof raa Kristen ro mhau mam provinsi ranu ro Makedonia reto beta. Menohe amu ksoh nwe anu ne nno u hair sai. ¹¹Nhau nsya raa anya knar sai. Nbet nkyas bo ro raa mati to ma. Nhau to, nesait nkah bo wanu sai mfi bo tiwya amu nkyas kʼanu to. ¹²Nhau nno bo reto afo re raa ro mne mmat anu to, mawe, “Raa ro Kristen weto, ja raa ro mno bo ro moof sai.” Tna nhau nkah bo wanu feto re kbe anu nhau bo marak fee, tna kbe anu aro nwof bo ro raa roto mno mati fee ye.

Oon ro Tuhan yama

¹³Taja, tme, tao, tano na; nnaut raa Kristen ro mhai oh to, sraujin toni ma. Nhar nwe meen ana me mrok masen. Menohe raa ro smot Yesus fefares to, soh raa wana mhai to, kbe ana sraujin tu oh. ¹⁴Anu bhar bwe Tuhan Yesus tiwya yhai tna ye yrok yasen. Feto anu bhar bwe Allah meen yno raa ro msam wai kʼYesus tna mhai to, kbe mrok masen ye. Mrok masen tna msya Ait mhau su ye. ¹⁵Tiwya Tuhan yesait yawe kʼanu yawe meen anu ro bhau fares ati ro Ait yama to, kbe anu bsen bmo tru Ait wia fee. ¹⁶Ati reto to, raa mari mai maboh mbam malaikatTuhan ro mase sau, tna raa mari saa buk-buk ro Allah mfi ye. Tna Tuhan yesait yroh ybam sawro rAit yama. Tna raa beta ro smot Tuhan Yesus tna mhai wia to, kbe ana mrok masen maut mamo mo kʼAit matim wia. ¹⁷Tna fo anu ro bhau baam mam tabam refo fares to, kbe Allah tubat anu buut bmo ye. Meen anu buut bmo bsya ana ro mhai tna mrok masen wia ye. Tna anu beta bmo bkai Tuhan Yesus mam ayoh skes abyõ tna bmo bhau bsya Ait mamo snok mam hame wajin ye. ¹⁸⌞Soh anu aro nhai to,⌟ nnaut tna nkyas bokyas refo kʼanya. Bokyas refo kbe mno re anu sraujin toni fee.

Siwyan wea kaket: Kbe meen Yesus hah yama u

¹Wore wo Tuhan hah yama u to, amu ne nwe kʼanu u nno fyi? ²Anu nhar oh nwe wore wo Ait hah yama u to, kbe yama tubor. Kbe raa siwyan fefares tibyo ana mrok. Reto mnan fi wore wo raa mama msyõf bo ti sai. Ja raa siwyan fefares ye. ³Tna raa ro wase Tuhan fares to, taro mawe, “Arin moof sai. Kbe bo mkair-kar aro mai kʼamu fee. Kbe amu nhau riof sai.” He mfe. Mam wore weto kbe Tuhan yno bo ro mkair btek mai abut kʼana. Kbe ana mkai riof fee. Mnan mfi fnya ro mhaf to. Au mhau, mhau to, tna wase wore wo au kborham tna kbe ku rau mbtek. ⁴Anu fo raa ro Kristen. Anu nhau mam wore wo mamur u fee. Anu nhar nwe kbe meen tabam haberek tna Tuhan hah yama u. Nhar oh. Feto kbe ati ro Yesus hah yama u to, kbe anu nrok fee. Raa roto kbe mrok. Kbe mrok mnan mfi ja raa mrok mam ati ro raa mama msyõf bo wana ti sai. ⁵Anu fo raa ro nhau mam wore wo maah. Anu fo nfi raa ro mhau mam wore mamur fee. Anu nhau mam mti fee. ⁶Menohe raa taro wase bo ro Tuhan. Ana mfi raa ro mjin tu sorni ana sai. Menohe anu fo bhau siwyan yoyo wea sai. Bhau bkit wanu maah. Bhau btak bisoh anu kaket ye. ⁷Raa ro mjin to, ja mjin mti. Tna raa ro bisir bo to, mbisir mti ye. ⁸Menohe anu fo hayah. Anu ja bhau mam wore wo maah. Feto to anu ja bnaut anu re bno-na bo fee. Tna anu beroh smot Tuhan ye. Anu beroh bhaf moof kʼanya ye. Anu bno bo weto to, bno wa re kbe anu aro btek bwe mam iro fee. Anu bfi raa ro sbe. Ana myum bo wa mawe mno riof kʼana. Raa ro sbe ja myum ratan ro besi mkah bo mno wa kbe raa mama mame ana majat fee. Tna anu bmo wai Tuhan Yesus, kbe yoo riof ro mase yee kʼanu. Reto mfi raa sbe ja sbyõ watau ro besi. Ana myum bo wa mawe mno riof kʼana. ⁹Allah ysok anu fo. Ysok tna ksoh yawe meen yno bo ro mkair mbtek mai kʼanu to fee. Bi Ait ysok anu tna ksoh yawe Yesus KristusTuhan ranu yoo riof ro mase yee kʼanu. ¹⁰Tiwya Ait yhai. Yhai afo re kbe anu bhai tibyo fee. Yawe anu ro bhau baam mam tabam refo fares tna bsya anu ro bhai wia oh, meen anu bsen beta bmo bhau su bsya Ait ye. ¹¹Nkyas bokyas ro moof weto kʼanya re kbe anu nhau smot Yesus matak. Nkyas bo moof kʼanya re kbe anu aro waa fee. Tna sraujin fee. Tna nnaut yyi fee ye. Thar tawe anu ja nno bo weto, nno kaket oh.

Paulus watum bo ro tis tna ymah meen

¹²Taja, tme, tao, tano na; hartu raa ro Allah yse mbo anu. Ana weto ja mur-mur mkyas Tuhan Yesus yasom kʼanu. Tna ana ja watum bo kʼanu ye. ¹³Ana mno bo ro moof feto. Tibyo natmof ana tna hartu ana ye. Nhau to, niranya kaket nsya raa anya ye.

¹⁴Taja, tme, tao, tano na; soh raa wanu aro ja yno bo kbik-bak to, nmo nastako ait. Tna soh raa ro sraujin aro to, nmo nkyas bo moof kʼana re ana sorni sraujin wana. Tna ana ro smot Tuhan kaket fee, nmo nkyas bo re nno bosmot rana me matak u. Tna sneh-sneh nsya raa anya beta ye. ¹⁵Kaket anu: Soh raa mno bo ro mkair mai kʼanu to, ne nno bo ro mkair ska mai si kʼana ma. Nno bo moof kʼraa wanu ro smot Yesus ye. Tna nno bo moof kʼraa roto taro ye. ¹⁶Nhau to, simaut mase yoyo sai. ¹⁷Tna skabuk yoyo ye. ¹⁸Anu fo raa ro smot Kristus Yesus. Allah ksoh yawe bo bawya sai ro mama to, nyoh asik mase kʼbi Ait. ¹⁹Tna soh Har ro Tuhan mkyas bo kʼanu to, nri kaket, niwana bokyas reto ma. ²⁰Bokyas ro Tuhan ykyas kʼraa (mfi raa ro nabi) to, niwana bokyas rAit reto ma. ²¹Tna bokyas ro raa mkyas kʼanu to, sanet wia. Ntu tna nmat sas kaket wia. Bokyas ro moof to, nbo nno. ²²Bo ro mti safo to, beak fari.

²³Allah tait Raa ro yatak yno raa mhaf tnok. Amu nyoh kʼAit re yama yatam anu re nhau nno bo wAit yoyo sai. Yno anu nhaf, srau wanu beta to mhau moof mfi raa ro wase mber safo. Amu nyoh kʼAit re yatam anu feto mamo snok mam oon ro Yesus Kristus hah ye yama to. ²⁴Allah ysok anu ytu yawe nma no kʼAit. Tna bo ro Ait yawe yno to, kbe yno tu oh. ²⁵Taja, tme, tao, tano na; skabuk amu nbo tuuf ye. ²⁶Nmah meen kʼanya ye tna hana anya ye. ²⁷Mkah Tuhan yatak rAit, amu nbis anu nwe baca aam refo kʼraa ro Kristen beta ro mhau mam Tesalonika, afo kbe ana mari beta ye. ²⁸Amu skabuk Allah re Tuhan ranu Yesus Kristus yatmof anu.