1 Petrus

Aam Tinyi ro Petrus Ykom

1 Petrus

Petrus ymah meen

¹Aam refo mbam kʼjõ, Petrus. Jõ tamo raabis (rasul) ro Kristus Yesus rAit. Tkom aam refo tee kʼanu ro nhau mam provinsi ro Pontus, provinsi ro Galatia, ro Kapadokia, ro Asia Kecil msya ro Bitinia bo. Anu to raa ro Allah ysok. Anu kro Kristus tibyo nhau mam tabam refo to, nfi raa ro srim sai. ²Tiwya tinyi Allah, anu Nja ranu, ysok anu. Ati ro anu nrak fares to, Ait ysok anu mnan si bo ro Ait yhar oh meto. Ysok anu tna Har rAit misoh anu re nhau nno bo ro Allah wAit sai. Allah ysok anu re kbe anu nri bo ro Yesus Kristus yawe tna nbo nno. Tna re kbe mees rAit myon anu noof.

Jõ skabuk Allah, re kbe Ait yatmof anu beta tna yno re anu beta nhau nhaf tnok toni ye.

Meen Allah yuumto bouum ku wAit

³Nma anu bibi Allah! Ait tait Tuhan Yesus Yaja. Tna Ait yatmof anu toni. Allah ‘yabe anu muhrin ro ewok u’. Tibyo anu fo bmo ku wAit. Yesus Kristus tiwya raa mame yajat tna Ait yrok yasen. Tna kbe yhau yroon mamo snok mam hame wajin. Feto to, anu bhar bwe bo ro Ait ysi kʼanu to, kbe yno tu oh. Tibyo anu ja bhau binaut yoyo bwe bo weto meen mabo tu oh. ⁴Tna bouum ro meen Ait yuumto ku wAit sor reto to, kbe meen mhau mamo snok mam hame wajin. Bouum reto mhau mam sawro ro Allah. Mhau mam tno, mrat kʼanu matak. Kbe aro marak fee. Meen mhau mawyõs. ⁵Anu smot Ait kaket. Tibyo Ait kbe kmot anu mkah yatak rAit. Kmot anu afo re meen anu bkai riof ro mase. Riof ro mase reto, Allah siwyan oh. Menohe mfo refo Ait ymyõt bAit fares. Ymyõt mamo snok mam ati ro tabam refo haberek. Tna fo yno riof reto mabo. ⁶Anu bhar bwe kbe meen anu bkai riof ro mase. Bo reto mno anu simaut mase. Anu simaut mase ebokfi mfo refo bo ro mkair-kar aro rau mama mai kʼanu wia. ⁷Bo samyoh ro mama mai kʼanu weto to, sanet bosmot (iman) wanu. Kbe anu bhau smot Yesus matak fe mfe a? Bo ro samyoh mama mai kʼanu, menohe bo mafer rau to moof: Mno bosmot wanu matak mnan si. Emas to bo ro mabyoh maut, menohe bosmot wanu to, mabyoh moof miwer. Emas to mhau hame wajin fee. Menohe bosmot ranu to, meen mhau hame wajin. Ja raa moo emas mse mam tafoh. Tibyo meyom-eyom. Tna bo roto taro ro mhau mrat kʼemas reto mait marak. Tno fo emas mabo rau mhau fares to. Au oh meto tafoh reto mno emas ro mkair mrok moof miwer. Tna bo samyoh ro mama mai kʼanu weto to, mfi tafoh; kbe mno bosmot wanu matak miwer ye. Tna meen, ati ro Yesus Kristus hah yama to, soh bosmot wanu matak fares to, meen Allah bibi anu. Tna yoo bobot yee kʼanu, ymat anu. ⁸Anu nmat Ait fefares, menohe anu nhafri Ait. Anu nahni Ait menohe anu smot Ait. Anu simaut mase, tna nwyan marak, hasu toni ye. ⁹Anu fri mafer mbam bosmot ranu. Mafer rau oh mi riof ro mase. Tibyo anu simaut mase.

¹⁰Tiwya nabi na sor saso riof ro mase reto. Allah ybis ana mama mkyas boatmof ro meen mama kʼanu. Tna ana saso, mtu ninya, saso. He mfe. Mesait mhar kaket fee. ¹¹Nabi weto to, Har ro Kristus mhau mam ana mhaf wana ye. Har reto mkyas kʼana mawe meen Kristus ykai bo ro mkair wia. Tna fo ykai bo ro msai. Menohe ana wase wore meen tija bo weto mabo. Tna ana wase iso ro bo weto mabo ye. ¹²Tna Allah ybis Har reto mama mhau msya raa mam mfo wefo baro ye. Tna raa weto baro mama mkyas Bokyas Moof ro Yesus kʼanu oh. Tiwya Har reto mkyas boatmof reto kʼnabi na ye. Mkyas mawe kbe meen sboh rau to mam wore wo nabi weto mhau fares fee. Meen ana mhai marak wia tna bo weto mabo. Allah yoo bonaut yee kʼnabi weto re mhar mawe bo ro ana mkyas tna mkom to, mkah anu. Kbe mafer reto kʼanu. Meen mabo mam masno ro anu wefo bhau. Boatmof reto moof toni tibyo malaikat sor ksoh mawe mmat tna mawe mhar bo weto ye.

¹³Allah yno bo weto beta. Feto to, nhau nkit nnaut bo kaket. Tna nbo anu kaket re nno bo ro kbik-kbak to ma. Nhau to, ninaut tna ste boatmof ro Allah yoyo. Ste nwe meen Ait yoo boatmof reto yee kʼanu mam ati ro Yesus Kristus hah yama mun ro ewok. ¹⁴Anu to ku ro Allah wAit. Feto to, nri bo ro Ait yawe to, nbo nno. Tiwya anu wase Ait. Tibyo anu ksoh nno bo ro masmamo sai. Ne nno feto u ma. ¹⁵Allah ytu anu yawe anu nmo ku wAit. Ait yhau to, yno bo ro moof sai. Feto to, bo bawya sai ro anu nno to, nno bo ro moof sai nfi Ait ye. ¹⁶Bokom ro Allah mawe:

“Jõ fi ja thau tno bo ro moof sai. Feto to nhau nno bo ro moof sai nfi Jõ ye.”

Imamat 11:44-45, 19:2

¹⁷Anu nmo no kʼAllah oh. Tna ja ntu Ait nwe Nja ranu. Anu nhar nwe Ait ymat raa ro mase msya raa ro kinyah to, yawe mnan anya sai. Tna Ait ymat bo ro raa beta mno. Ait oh mi Raa ro meen yros susai ytu srah ro anu bno to. Nnaut nwe anu bhau mam tabam refo to, bhau boti sai. Meen Ait ytu srah ro anu bno. Feto to mam wo nhau mam tabam refo fares to, waa tna nri bi Ait. ¹⁸Tiwya anu nri bo ro Allah yawe fee, nhau mnan fi tii anu hohos na ro tiwya mhau wia. Tii anu nhau to, mafer marak; anu nhau-ha sai to. Menohe nnaut nwe Raa sait yama tho anu. Yoo perak tho anu fee. Yoo emas tho anu fee. Perak msya emas to mabyoh mroh, meen sari marak. ¹⁹Menohe yoo mees rAit yfes anu. Kristus tait yfi domba maku sau. Tiwya ja raa moo domba maku ro moof sau, ktan tna msan kʼAllah. Kristus mees rAit to moof miwer. ²⁰Tiwya tinyi, wore Allah yfen tabam refo fefares to, Ait ysok Yesus Kristus. Ysok tna yhau ti firwas ti, snyi firwas snyi. Tna yoo Ait yee kʼanu mam wore tis refo. ²¹Anu nhar bo ro Yesus Kristus yno, tibyo anu smot Allah. Tii Kristus yhai, tna Allah yno Ait yrok yasen. Tna Allah yse Kristus mam yuk ro yase ye. Allah yno bo weto beta re kbe anu ninaut nwe Allah tait Raa ro yhaf moof. Yno re kbe anu nsam wai kʼAit tna smot Ait.

²²Bo ro Allah yawe to, bo ro mabo rau tu oh. ⌞Ait ksoh yawe anu kro Yesus.⌟ Anu nri nno bo weto; tibyo Allah yyon iro wanu ro nno oh. Tna anu ja natmof raa anya ro smot Yesus ye. Tawe natmof anya kaket! ²³Allah ‘yabe anu muhrin ro ewok u’. Tibyo anu to ku wAit. Anu Nja ranu tait meen yhau hame wajin, kbe yhai fee. Bokyas rAit to mhau mamo snok hame wajin ye. Mfo refo anu smot bokyas rAit ro mroon reto. Tibyo nmo ku wAit oh. ²⁴Anu bhar bwe Bokom ro Allah mkyas mawe:

“Raa to mfi bosafom: Mbewok ye mhau waor sai tna mhai. Mbewok ye raa mmat mawe moof. Reto mfi bosafom tafuf sai: Ewok ye kbe mrur tna marak fooh sai. ²⁵Menohe Bokyas ro Tuhan meen mhau hame wajin.”

Yesaya 40:6-8

Bokyas ro Moof refo tii raa mama mkyas kʼanu oh.

Yesus yfi fraa sau ro mroon

¹Feto to, noo bo mkair to, mbeak: Nno bo ro mkair kʼraa to ma. Besruf raa anya ma. Sioh nmo tite to ma. Tna nsu mase bo raa ma. Naam bo ro raa anya mse to ma. Ntoo raa anya ma. ^2,3Anu nhar oh nwe Tuhan tait yoof.2:2,3 Mazmur 34:8. Feto to, nnaut Watum ro Tuhan yoyo; nfi ku mees ro ja mnaut sis mait. Mait tna kbe mabi tna masen matak. Watum ro Tuhan reto mnan fi sis maya ro moof. Kbe mno bosmot ranu mrok matak. ⁴Nma no kʼYesus. Ait yfi fraa sau ro mroon. Fraa reto to, raa beak makus. Menohe Allah ysok fraa reto yawe fraa ro mabyoh maut, fraa ro ati. ⁵Anu to nfi fraa ro mroon ye. Tna Allah yoo anu re kbe sgi yuk ro Ait yhau. Anu, raa mkbair rAit to nfi Samu ro Allah. Ait ysok anu re nhau nno bo wAit: Nfi imam wAit. Anu smot Yesus Kristus tibyo ja nno bo moof, bo ro mno Allah yhaf mnan oh meto. Bo ro anu nno weto to, mnan bosan ro anu nsan kʼAit. ⁶Bokom ro Allah mawe Yesus ynan fi fraa. Mkyas mawe:

“Nmat, Jõ tsok ‘Fraa’ sau ro mabyoh maut. Jõ too ‘Fraa’ ati reto tse mam Sion. Tna raa ro smot Ait to, meen sraujin fee.”

Yesaya 28:16

⁷Anu ro smot Yesus nnaut nwe Ait yfi ’Fraa’ ro mabyoh maut. Menohe raa taro mnaut feto fee. Ana weto smot Ait fee. Bokom ro Allah mawe:

“Tiwya raa ro sgi amah to, moo ‘Fraa’ reto beak makus. Menohe mfo refo ‘Fraa’ reto mamo ‘Fraa’ ro ati syok.”

Mazmur 118:22

Tna mawe,

“‘Fraa’ reto mburut wa iso. Tibyo raa wasim tna mbtek mawe.”

Yesaya 8:14-15

⁸Raa ro smot Yesus fee ja mari bokyas ro Allah fee ye. Mbo mno fee. Tibyo ana mbtek mawe. Tiwya tinyi Allah ysok ana fee. Ati ro ana marak fares to, Ait yhar yawe meen ana weto kbe mbtek mawe.2:8 Roma 9:22.

⁹Menohe anu to, raa mkbair ro Allah ysok. Anu to, nfi imam sor ro mno bo ro Allah wAit. Anu to raa mana rAit. Anu nmo raa mkbair rAit. Allah yno bo weto afo re kbe anu nkyas yase rAit kʼraa. Tiwya anu nhau mam wore wo mamur. Menohe Ait ytu anu oh, yawe frok. Ytu anu yawe nma nhau mam wore wo kek. Yawe nhau mam wore wo kek rAit ro msai toni. ¹⁰Tiwya anu to raa wAit fee. Menohe mfo refo anu nmo raa mana rAit oh. Tiwya anu nhar boatmof rAit fee. Menohe mfo refo to, anu nhar boatmof rAit oh.2:10 Hosea 2:22.

¹¹Tafoh na wojõ; anu nfi raa srim mam tabam refo.2:11 Tabam ranu ro ati to, sawro ro Allah. Anu bhau mam tabam refo boti sai. Feto to, nnaut anu, afo re anu srau oot-oot nno bo ro mkair to ma. Nno ma be kbe bo ro mkair weto mno wa anu tna kbe kro Tuhan kaket fee. ¹²Mam wore anu nhau mam tabam refo to, kaket anu, nhau nno bo ro moof sai. Feto tna mfi bo raa ro wase Allah sioh mawe anu nber safo aro to, kbe ana mhar mam mhaf mato wana mawe ja anu nno bo ro moof sai. Ana mmat bo moof ro anu nno weto. Tibyo meen, ati ro Allah yama to, kbe ana bibi Ait.

Nri bo ro raa mase mbis kʼanu to, nbo nno

¹³Nri bo ro raa mase mbis kʼanu to, nbo nno. Bo ro Tuhan ksoh oh meto. Nri raja ro yase, ¹⁴tna nri gubernur bo ye. Ana weto to raabis ro raja.Raja sor ja mbis gubernur bo mawe moo safo mee kʼraa ro mno bo mkair. Tna ana bibi raa ro mno bo moof. ¹⁵Raa taro wase bo tna wase Allah ye. Tna kbe ana sioh mawe anu nno bo ro mkair. Allah ksoh yawe anu nhau nno bo ro moof sai yoyo. Tibyo raa mmat tna mhar he raa weto to mkyas bo sioh sai. Tna re kbe raa mari bokyas rana fee. ¹⁶Nnaut: Tiwya ⌞iro bo to⌟ make anu. Menohe mfo refo anu kro Yesus. Tibyo yno anu rero; bo reto make anu u fee. Nnaut feto mam nhaf mato wanu wia tna nwe kbe anu nhau nno bo ro moof sai. Nno be anu aro nno bo ro mkair wai. Nnaut nwe anu nmo sryan ro Allah wAit re nhau nno bo ro moof sai. ¹⁷Hartu raa ro mase. Nhau to, nmat raa anya. Natmof raa anya ro smot Yesus. Waa bi Allah. Tna heyut nmat raja.

¹⁸Anu ro nmo sryan boh ro raa: Tawe nri bo ro bobot wanu mawe to, nbo nno. Heyut nmat ana ro mhaf moof ye, tna heyut nmat ana ro mbait ktan-ktan to ye. ¹⁹Soh raa mno bo ro mkair kʼanu to, rau ro moof to, anu kanyin sai, kmo ma. Ati ro nno bo moof menohe bo ro mkair mai si to, nnaut nwe, “Allah ksoh yawe jõ thau thaf moof, ska si bo fee.” Soh anu beroh nno bo moof sai to, reto moof. ^20,21Menohe soh anu nno bo ro mkair, tibyo raa mai; feto tna anu kanyin sai, kbe Allah bibi anu fee. Soh anu nno bo ro moof menohe raa mai to, anu nnan fi Yesus oh meto. Soh anu nno bo moof feto tna beroh nsom bo mkair ro mai kʼanu si to, tna kmo fee, feto kbe Allah bibi anu. Tiwya raa mai Kristus. Bo ro mkair mama mai Kristus menohe Ait kanyin yasom. Ja yno bo moof menohe yasom bo mkair ro mai Ait. Yasom afo re kbe Allah kmo anu fee. Tiwya raa mno bo mkair mai Kristus, menohe yhaf rAit moof fares. Tna Allah ysok anu ybis yawe soh raa mno bo mkair mai kʼanu to, anu nsom bo ro msai reto; nno mnan tiwya Ait yno feto ye. ²²Bokom ro Allah mkyas Yesus mawe:

“Ait ja yhar iro yno fee. Ait sioh fee.”

Yesaya 53:5-9

²³Tna mam ati ro raa mamus Kristus to, Ait yamus ana ska si fee. Ati ro raa mno bo ro mkair-kar kʼAit to, Ait kmo si fee. Ait yhar yawe bombra weto Allah ymat. Tibyo Ait shait kanyin yasom sai. Yhar yawe meen Allah yros susai ska bAit. Ait raa ro yros susai; ja soko raa sait ye fee. ²⁴Anu bno iro. Menohe Yesus oh mi raa mame yajat mam ara warok. Ait yesait yasom iro wanu ro bno tna raa mame yajat. Yno afo re anu be bno iro u fee. Tna bhau bno bo ro Allah ksoh sai. Raa mai Ait afo re anu bhau boof. ²⁵Tiwya anu nri bo ro Ait yawe fee. Tibyo anu nmo tiit. Anu nfi domba ro mesait mhau kar; tna raa ro ja yatam tna kmot domba weto to yarak. Tna mfo refo anu hah ne nmo no kʼAit oh. Ait kbe yatam anu tna kmot anu.

Fnya

¹Tme, tano na; tawe anu nri bo ro naa na mawe to, nbo nno. Nno feto afo re naa na, kbe ksoh kro Yesus ye. Soh ana miwana bokyas ro Tuhan to, kbe ana mmat bo moof ro anu nno tna ksoh kro Ait ye. Nhau shait sai tna bo ro anu nno to, kbe mno ana ksoh mama kro Ait ye. ²Soh anu ja waa Allah tibyo nno iro fee, kbe ana mmat bo ro anu nno reto. ³Kbe raa mnaut mawe anu fnya ro noof. Menohe ana mmat tiin ro emas ja anu hero mam nimara to fee. Mmat haban ro nabe mam namyõm to fee. Mmat ratan moof ro anu nyum to fee. Mmat bo anu nisoh nna moof bo fee ye. Anu fnya fayir anu to, bo ro ati fee. ⁴Rau ro ati to, raa mmat bo ro anu nno. Mmat bo ro anu nno tibyo mhar mawe anu fnya ro nhaf mato moof. Fnya metsu wana mamo snok mo mabi tna moof u fee. Menohe soh anu ja knar tna nhaf tnok bo to, meen anu nbi to, nhau nhaf moof sai fares. Allah yawe rau ro ati oh meto. ⁵Tiwya tinyi fnya taro mno ana moof feto ye. Tii fnya ro smot Allah misoh ana mhaf wana. Ana minaut mawe bo ro Allah yawe to, kbe yno tu oh. Tna ana mari bo ro maa na mawe to, kro. ⁶Tii Sara mari bo ro maa Abraham yawe tna mbo mno. Au heyut mmat ait. Tna mtu ait mawe bobot ro ybo au (tuan). Waa ma. Nno bo ro moof mfi tii Sara mno. Soh anu nno feto anu nfi ku renti wau to ye.

Raa Sme

⁷Taja, tao na; tawe nhau nsya fnya wanu to, nkit marak ma. Hartu ana. Fnya ro anu noo to, mfi nfoh wanu ro metsu matak fee. Nnaut nwe Allah yatmof ana yawe meen ana weto mhau hame wajin ye mnan anu ye. Hartu ana afo re kbe Allah yari bo ro anu skabuk nyoh kʼAit.

Raa Kristen beta

⁸Taja, tme, tao, tano na beta; nhau niranya nsya anya kaket. Natmof anya kaket. Nmat anya kaket mkah nhaf ro sneh. ⁹Tna soh raa mno safo mai kʼanu to, nber safo ska si ma. Soh raa mamus anu to, nmus si to ma. Menohe nkyas bo moof kʼana sai. Allah ytu anu yawe nmo raa wAit afo re anu nno bo moof feto ye. Tna kbe Allah yno bo ro moof kʼanu ye. ¹⁰Bokom ro Allah mawe:

“Awya ro yawe yhau moof to; kaket ait re ykyas bo ro mkair ma, sioh to ma. ¹¹Awya ro yawe yhau moof to; kbe yoo bo knik-knak ro mkair-kar, bo ro mimara to, tna beak fari. Kbe yno bo ro moof sai aran. Tna kbe ait tomer yno re yiranya ysya raa beta. ¹²Tuhan ja kmot raa ro mno bo moof. Tna yari skabuk ro ana mayoh kʼAit ye. Menohe Ait knait raa ro mber safo.”

Mazmur 34:13-17

¹³Soh anu ja nno bo ro moof to, kbe awya yawe yno bo ro mkair mai kʼanu? Ja raa roto aro mno bo ro mkair mai kʼanu fee. ¹⁴Menohe mfi bo anu nno bo ro moof tibyo raa mhaf kair tna mno bo mkair aro mai kʼanu to, waa ma. Kbe Allah ymat tna yno bo ro moof kʼanu. ¹⁵Nnaut nwe hartu Kristus mam nhaf mato wanu. Nnaut nwe Ait tait Tuhan3:15 Tuhan to mai ro Indonesia; raa masom fee. Tuhan to gelar ro raa mkyas kʼraa ro mase tna mbo ana. Mnan anya msya ‘tuan’ mam mai ro Melayu. Tiwya tinyi fnya sor mkyas bo kʼmaa na, mawe ‘Tuhan’. Tna sryan ykyas kʼbobot ro ybo ait to, yawe ‘Tuhan’ ye. Lukas 6:46; 1 Petrus 3:6 ro ybo anu. Soh raa mtu kʼanu mawe, “Anu ja smot Kristus mkah bawya? Tna fyi re anu nwof nwe kbe Ait yno bo ro tiwya ysi kʼanu?” Nnaut bo ro kbe nyõ nkyas si kʼana to kaket. Nnaut bo ro kbe anu betoo reto wia matim. Tna nwe si kʼana to, nkyas mkah nhaf ro sneh. Hartu ana. ¹⁶Anu kro Yesus tibyo ja raa mamus anu. Menohe nhau nno bo ro moof sai re kbe anu nhar mam nhaf mato wanu to, nwe ja anu nno bo ro moof. Tawe nhau nno bo ro moof sai, afo re raa ro mamus anu to, mrok hrenaut. Ana mkyas bo kbik-kbak sai menohe anu ja nno bo aro mfi bo ana mkyas feto fee. Tibyo kbe ana hrenaut. ¹⁷Nno be anu nno bo ro mkair tibyo bo ro samyoh mai. Soh anu nno bo ro moof menohe Allah ybis tibyo, bo ro mkair mama mai kʼanu to, soh anu nros nsom sai to, anu nno moof meto. ¹⁸Tiwya Kristus yno bo ro moof sai. Menohe bo ro mkair mai kʼAit ye. Tibyo yajat. Anu ro bno iro. Menohe Ait oh mi ro yasom bo ro mkair tna yajat. Yajat mun sau aran. Yajat afo re yakah anu yamo yo kʼAllah. Yetsu rAit raa mame yajat, menohe Yamos rAit mrok maam u.

^19,20Tiwya tinyi bi Nuh sgi aken ro mase sau. Raa ro mhau mam masno reto to, ana weto mari bo ro Allah yawe fee. Allah ksoh yawe ana mari bo ro yawe tna twok mam aken reto. Nuh sgi aken fares tna Allah ste ana, ksoh yawe ana mashana. He mfe. Raa mabo krentuuf sai aran twok mam aken reto tna mkai riof. Aya mabo tna raa roto beta msu. Mhai tna mamos wana mamo mhau mam bui mato. Tahun firwas tahun tna Yesus yhai tna yrok yasen. Yrok yasen tna yakah yamos rAit to, yamo ykyas Bokyas Moof kʼraa weto. Ykyas kʼraa ro tiwya mari bo ro Allah yawe fee, ro tiwya mhai sor. Aya mabo tna raa mabo krentuuf sai aran mari bo ro Allah yawe. Allah ybu raa mabo krentuuf weto mhau bana mam aken reto mato. ²¹Aya mabo mbetru tabam refo. Tna aya reto fret bo mawe anu raa baptis mkah aya. Anu ⌞nashana oh. Tna⌟ ksoh nhar mam nhaf mato wanu nwe anu nkair u fee. Nhar nwe Allah yawe anu nrok noof oh. Tibyo anu nbis raa baptis anu. Mno bo reto afo re netsu ranu ro mkair to myon tna mrok moof to fee. Raa baptis anu feto fret bo mawe Yesus Kristus yrok yasen. Tna mawe Ait yatak re yno riof kʼanu ye. ²²Mfo refo Yesus yhau mam sawro ro Allah. Tna Ait hre ysya Yaja Allah mam ati ro yatem ati; yuk ro mase reto. Yesus Kristus yase tna Ait hre abyõ ybo bo beta. Yhau mam tno tna yatak ybo malaikat msya kabes sor msya bo beta. Bo weto beta mari bo ro Ait yawe tna mbo mno.

¹Tiwya Kristus yno bo ro moof sai. Anu ro bno iro. Menohe raa mai Ait tna sikowah yetsu rAit. Kbe meen raa mno bo mai kʼanu feto ye. Soh anu tru kair to, nfit nkar matak mnan fi Ait. Tawe bito nros sai. Awya ro fri kair mam yetsu rait to, ait yno iro u fee. ²Feto tibyo wore wo ait retait yhau renti mam tabam refo to, ait yno bo ro Allah ksoh. Ait yno bo masmamo ro ja raa ksoh mno to, u fee. ³Tiwya anu ja nno bo ro mkair mfi raa ro wase Allah ja mno. Mnan oh! Nno feto u ma. Ana mhau to, ja mno bo ro kbik-kbak sor: Ana makyõ bokyõ yoyo, tna simaut nashe-nsha anya yoyo, ana mwyah msya anya, ana bisir yoyo, ana mbaut kabes, tna mno iro ro mkair toni mawat fares ye. ⁴Menohe mfo refo anu nno bo ro ana ja mno to u fee. Tna nfoh na wanu ro bose to, mmat mawe anu hawe kro ana u. Anu nber safo mfi bo tiwya anu nsya ana nno to u fee ye. Tibyo ana sret anu masah, tna mamus anu bo ye. ⁵Nnaut nwe mako hawe sai, meen ana weto beta mros betoo safo ro ana mno sor to kʼAllah. Kbe meen Ait yoo safo mana ymit kʼana: Ana ro mhai oh tna ro maam fares to ye. Kbe meen ana weto hrenaut tna manwaruk. ⁶Meen Allah ymit safo kʼraa ro mhai oh ye. Au oh mi raa mamo mkyas Bokyas Moof (Injil) kʼana ye, afo re raa weto mari tna smot Yesus ye. Afo re mamos wana meen mhau hame wajin; mamyot bo ro Allah ksoh.

⁷Mfo wefo to, kene wore bombra beta sboh rau oh. Feto to, nnaut anu kaket. Tna nisoh anu re nno-na bo ma. Nno feto re kbe anu skabuk kaket. ⁸Awya ro yatmof raa anya kaket to, ja ye ynaut iro bo raa mno mai kʼait to fee. Feto to, rau ro ati to, natmof anya kaket. ⁹Soh raa mama to, nitrah amah mato wanu, tna noo boit nee kʼana mait, tna ana msya anu njin ye. Nno mkah nhaf ro moof; knot-knot ma. ¹⁰Bouum (karunia) aro-aro ro mbam kʼAllah mhau kʼanu. Ait yno re anu aro sait-sait ntai nno bo aro moof kaket. Nno bo aro rau-rau weto to, nbet raa anya. Nno bo weto nbet raa anya mamyot si boatmof aro rau hayah-hayah ro Ait ysan kʼanu sait-sait. ¹¹Anu taro ja nkyas Watum ro Allah kʼraa. Mkah bouum reto nkyas watum ro mbam kʼAllah mnan si! Tna anu taro ja nbet raa anya. Mkah bouum msya tak ro Allah yoo yee reto to, nbet raa kaket! Yesus Kristus yno re anu ntai nno bo weto beta. Mkah bouum weto to nno bo ro moof afo re kbe raa bibi Allah. Meen raa bibi Ait ysya yatak rAit mamo snok mam hame wajin. Amin: Mabo oh!

Raa ro Kristen kbe mkai bo

¹²Tafoh na wojõ ro jõ ksoh; bo ro mkair mama mai kʼanu to. Ati ro bo mama mai kʼanu to, nrok ma. Ktak ma. Mam tabam refo bo ro samyoh ja mai kʼraa soo oh. ¹³Menohe simaut sai! Nnaut nwe anu nkai bo ro samyoh toni to, anu nnan fi Kristus oh meto. Meen ati ro Ait hah yama u to, kbe yno re raa beta mmat bo yase rAit. Tna kbe anu simaut mase! ¹⁴Anu kro Kristus, tibyo kbe raa mamus anu. Ati ro ana mamus anu to, nnaut nwe Allah ja yno bo moof kʼanu. Sraujin ma. Ait yno re Har rAit matam anu. Har ro Allah ja bibi bo yase rAit. ¹⁵Nno be anu aro nno bo mkair. Tna au oh mi raa mno bo ro samyoh mai kʼanu. Nno be anu aro nme ajat, soh mfe nsyõf bo raa, soh mfe nber safo aro, soh mfe srioh-sfa bo raa roto bo. ⌞Raa ro mno bo weto kbe hrenaut tna nanwaruk fea!⌟ ¹⁶Menohe anu to, ja kro Kristus. Tibyo kbe raa mno bo ro samyoh mai kʼanu. Soh bo reto mama mai to, hrenaut ma, nanwaruk ma. Raa mhar mawe anu kro Kristus to, bo ro moof meto. Feto to bibi Allah. ¹⁷Mabu sboh oh: Bo mkair mama mai kʼanu oh. Anu to ku wAit. Tna Ait ytu safo ro anu bber wia matim. Tna meen Ait yoo safo mana ymit kʼraa ro wase Allah ye. Ayoh ee! Fyi mkah ana weto? Ana mari Bokyas Moof rAit menohe mbo mno fee! ¹⁸Bokom ro Allah mawe:

“Raa ro ja mno bo moof sai to, meen ana mkai riof to, bo ro min. Meen fyi mkah ana ro wase Tuhan, msya raa ro mno iro ye?”

Amos 11:31

¹⁹Allah ybis yawe bo ro samyoh mama mai kʼraa wAit. Menohe anu bhar bwe Allah yhar bait oh. Feto to, anu nhau mam tabam refo to, nsan anu kaket kʼAllah ybo mam yatem rAit. Ait Raa ro yfen anu. Tna bo ro yawe yno to, anu bhar bwe kbe meen ybo yno tu oh. Nma, anu bhau bno bo ro moof sai.

Raa manes ro mamo majelis

¹Taja tna tao na ro manes tna nmo majelis; jõ tamo raa majelis ye. Tii jõ tmat Kristus yajat mam ara warok tkah tasu ajõ ai. Tna meen jõ tsya raa wAit roto kbe bmat tna fri bo yase rAit ye. ²Tawe kmot raa mam jemaat ranu kaket. Ana weto to, raa ro Allah wAit. Anu nmo aban mana, tna kmot ana. Anu nmo majelis fyi? Raa aro tko anu yawe nmo majelis fee. Anu nesait nwe ksoh nmo majelis, reto Allah ksoh ye. Jõ hawe bo anu nsu mase mkah pitis oh mi nwe nmo majelis. Menohe tawe anu ksoh nno bo aro rau-rau re kbe tubat tna nros tis nban raa ro jemaat ranu. ³Nbo raa jemaat ranu to, nbait ktan-ktan ma, tna kmo ana ma. Nnaut nwe anu nse toni niwrek ana to ma. Menohe nno bo ro moof re ana mmat tna ksoh mno bo ro moof mnan anu ye. ⁴Nno feto tna meen, ati ro Tuhan5:4 Ait tait raa yase ro kmot anu beta; ynan fi raa ro yase sait kmot domba wait. ranu hah yama u to, kbe yoo boren yaren anu. Boren ro Ait yaren reto to, moof toni. Meen mhau hame wajin ye.

⁵Tao na ro tna fares: Tawe nri bo ro raa mabi mawe kʼanu to, nbo nno. Bokom ro Allah mawe,

“Allah beyun raa ro bibi ana mesait ai. Menohe raa ro mhaf sneh to, Ait yoo bouum yee kʼana.”

Amsal 3:34

Feto to, nri Bokom reto kaket: Nno bo kʼanya mkah nhaf ro sneh. ⁶Allah yatem rAit ybo anu. Feto to, nhau nhaf sneh kʼAit, nfi raa ro kinyah. Soh anu nhau nhaf sneh kʼAllah to, kbe Ait tubat anu. Meen, mam ayõ ro Ait yawe to, kbe meen Ait tubat anu hre mam yuk ro moof. ⁷Tna Allah srau ynaut anu yoyo. Feto to, skabuk bo mkair-kar ro mai kʼanu. Nnaut yyi ma. Nsan bo weto kʼAit yatem ybo riryõn.

⁸Kabes yabi (Iblis) tait yamo byoh kʼanu. Ait yfi singa ro mhaisre tna saso raa mafit tna mabo. Feto to nisoh nhaf, srau wanu. Nsen tna nhau siwyan anu kaket ye; nno be bo miwro anu. ⁹Anu nhar nwe raa ro smot Kristus mam arin aso beta to, Iblis yno bo ro samyoh mai kʼana beta mfi bo anu feto ye. Feto to nfa nsya Iblis. Nfa to, beroh nros ntak tna smot Kristus kaket.

¹⁰Allah yatmof anu. Tiwya Ait ytu anu, yawe niranya nsya Kristus. Tibyo meen anu fri bo yase rAit ro mhau hame wajin. Menohe mfo refo bo ro samyoh mai kʼanu. Bo ro mkair-kar reto kbe mhau kait fee, tna mrok marak. Ait kbe yisoh anu. Kbe yno anu nros ntak tna nhau smot Ait. ¹¹Bi Ait yatak ybo bombra beta mamo snok mam hame wajin. Amin: Mabo oh!

¹²Aam refo jõ tiim kʼanu. Silwanus oh mi ykom aam refo. Tnaut tawe ait tait jõ tafoh ro yros tu, susu fee. Jõ tkyas bo baro kʼanu re tisoh bosmot wanu. Nnaut nwe Allah yatmof anu; tibyo yoo riof ro mase yee kʼanu. Ait yuumto bouum ro ati kʼanu oh meto. Nnaut boatmof rAit reto tna nros ntak.

¹³Raa jemaat ro mhau mam Babilon,5:13 Petrus ybam provinsi ro Roma ykom aam refo. Tna raa mawe provinsi reto mnan fi kota Babilon mmah meen kʼanu ye. Allah ysok ana msya anu beta yawe nmo raa wAit. Tna Markus, ro jõ ksoh tait, ymah meen kʼanu ye. ¹⁴Nmah meen kʼanya tna hana anya ye. Jõ skabuk anu beta ro nhaf sau nsya Kristus. Jõ skabuk re kbe anu beta nhau nhaf tnok ye.