1 Yohanes

Aam Tinyi ro Yohanes Ykom

1 Yohanes

Yesus tait Bokyas ro Mroon

¹Tabam refo tiwya tinyi rau to raa ro yasom rAit ’Bokyas ro Mroon’ yhau wia. Tna fo Ait yama yhau mam tabam refo. Tiwya amu nesait nmat Ait mkah nsu wamu. Amu nri bokyas rAit tna nbo Ait nkah ntem ramu ye. Tna amu ksoh nkyas Bokyas ro Mroon reto kʼanu:

Yesus yhau mam tabam refo fares to, kuber wAit ja miranya msya Ait

²Tiwya Ait yama yhau mam tabam refo to, amu nesait nmat Ait. Tibyo amu nkyas bo ro amu nmat to kʼanu. Bi Ait ro amu nkyas retait tiwya tinyi yhau yum oh ysya Yaja. Tna kbe meen yhau yroon ye. ³Ait ro amu nri tna nmat retait, yasom rAit Yesus Kristus. Amu nkyas yasom rAit kʼanu afo re anu nmo raa ro Kristen ye. Anu nmo raa ro Kristen to, kbe iranya ranu nsya amu mnan anya. Amu ja niranya nsya Allah tna nsya Ku rAit Yesus Kristus ye. ⁴Tna soh anu nri bokyas ro amu nkom refo moof kaket to, kbe amu simaut mase.

Raa ro ja mno bo ro moof sai aran oh mi mamo iso ro maah

⁵Bokyas ro amu nri mbam kʼYesus, tna ne nkyas kʼanu beta, au oh mefo: Allah tait yfi kek, tna arin mamur aro mhau kʼAit fee. ⁶Soh anu sait yawe, “Iranya ajõ tsya Allah matak.” to, he mfe; ja yno bo ro mkair-kar fares. Ait oh mi yamo iso ro mamur fares. Ait retait sanet yawe sioh-sah awya mefi! Ait retait yiranya ysya Allah ye fee. ⁷Menohe soh anu bhau mam arin ro maah to bnan fi bi Ait ja yhau mam wore wo maah to ye, kbe anu biranya kaket. Tna mees ro Yesus Ku rAit reto mroh mama tna myon iro wanu.

Allah yhar yawe raa beta ja mno iro

⁸Soh anu bwe, “Anu ja wase iro bno!” to, anu sioh-sah anu sai. Anu bkyas feto to, anu bkyas bo ro mabo fee. ⁹Soh anu ja betoo iro ro ja anu bno abyõ to, kbe Ait yyon iro wanu; Ait yyon anu boof. Ait retait Raa ro yhaf moof, tna bo ro bi Ait yawe to, kbe Ait yno tu oh. ¹⁰Watum ro Allah mkyas mawe, “Raa beta ja mno iro.” Soh anu sait yawe, “Mfe, jõ ja twase iro tno!” Ait retait yiwana Watum ro Allah reto. Fyi, ynaut yawe Watum ro Allah ja sioh-sah raa a?

Yesus yros susai masuf

¹Kukek wojõ: Aam refo jõ tkom tiim mama kʼanu re kbe anu nno iro ma. Tna soh anu sait yno iro to, kbe Yesus Kristus ro yhau yoof retait, yamo yo kʼAllah tna yros susai masuf yawe, “Nyõ kmo ait toni to ma.” ²Ait fi Raa ro sotak iro wanu tna yno re iro wanu Allah yyon beta. Yyon iro wanu besait sai fee. Ait yyon iro raa makin ro mhau mam tabam refo beta ye.

³Soh anu bri tna bno bo ro Allah ybis kʼanu to, reto merif mawe, anu bhar Ait yhaf mato rAit. ⁴Mfi bo raa sait yawe, “Jõ thar Allah yhaf mato rAit.” Soh ait retait ja yari yno bo ro bi Ait ybis to fee, ait fi raa ro ykyas bo sioh retait. Ait ykyas bo ro ati meto fee. ⁵Awya sai ro yari tna ybo yno bo ro Allah yawe to, ait retait yhafri Allah kaket, aro mabut fee. Fyi re anu bhar bwe anu bhaf sau su bsya Allah fe mfe a? ⁶Raa ro ja mno bo ro Kristus yno to, ana mesait sai aran oh mi raa ro mhaf sau su msya Allah oh. Raa roto taro mhaf sau su msya Allah fee.

Bosi ro ati au oh mefo: Anu natmof raa anya kaket

⁷Taja, tme, tao, tano na ro jõ ksoh; tkom aam refo tsi bo ro tna kʼanu fee. Bosi ro Allah ykyas ooh-oh bo ro ati fares: Tiwya tinyi Ait yawe, “Nko hawe sai, anu natmof raa anya kaket oh!” Mfo refo jõ te tsi bosi reto kʼanu u. ⁸Tna jõ betoo bosi refo maja rau ro tna: Maja rau oh mi Yesus yama mam tabam refo fo, tna raa mmat he Ait ja yatmof raa kaket. Yno feto yerif iso ro ati reto kʼanu. Tna mfo refo raa mmat anu beta ja batmof raa anya kaket ye. Boatmof reto to, mfi kek ro mama mram tabam ro mamur refo. Mfo refo kek reto mo maut tna mamur to mroh baro. ⁹Awya ro yawe, ‘Jõ thau mam kek ro Kristus’ to, menohe ait knait raa ro Kristen taro, ait retait yhau wore wo mamur fares. ¹⁰Awya ro yatmof raa Kristen taro to, kek ro Kristus mhau kʼait retait. Tna kek reto kbe mram iso ro ait yamo re kbe ait ytek yawe mam iro fee. ¹¹Awya ro knait raa anya ro Kristen to, ait retait yhau mam wore mamur fares. Yasu mti tibyo wase iso ro yamo ye.

Yohanes ybaut bo ro moof raa ro Kristen aro rau-rau mam weto ja mno

¹²Kukek wojõ; jõ tkom aam refo tiim kʼanu tna thar tawe Kristus yno re Allah yyon iro wanu oh to.

¹³Taja na; jõ tkom aam refo tiim kʼanu tna thar tawe anu nhar bi Ait yhaf mato rAit kaket oh. Anu nhar bi Ait ro tiwya yhau bait wia wore tabam refo Allah tii yfen fefares.

Tao na ro tna; jõ tkom aam refo tiim kʼanu tna thar tawe anu nsya kabes yabi (Iblis) nfa oh. Tna anu ntak nikyak ait ro yetsu mnis safo retait. Ait yros yatak abyõ fee.

¹⁴Kukek na; jõ tkom aam refo tiim kʼanu tna thar tawe anu ja nhar Bja ranu yhaf mato rAit kaket.

Taja na; jõ tkom aam refo tiim kʼanu tna thar tawe anu ja nhar Tuhan yhaf mato rAit. Ait yhau bait wea wore tabam refo tii yfen fefares.

Tao na ro tna: Jõ tkom aam refo tiim kʼanu tna thar tawe bosmot ranu to matak oh, tna anu ja nri bokyas ro Allah nbo nno. Tibyo anu ntak nikyak ait ro yetsu mnis safo oh to.

¹⁵Kaket anu: Saso-sasa bo knik-knak ro tabam refo toni to ma! Awya ro yhafri bo weto to, ait yhafri Allah ranu fee. Allah tait anu Bja ranu. ¹⁶Bo knik-knak ro tabam refo fo boasmamo ro mase: Raa ro masmamo ja mno bo ro ana metsu rana ksoh sai, ana mnaut ttis to fee. Ana weto oh mi hafri bo ro tabam refo. Raa ro mmat bo tna srau oot-oot mawe moo; ana weto oh mi hafri bo ro tabam refo. Tna raa ro saso masom ro mase, re raa bibi ana; ana weto oh mi hafri bo ro tabam refo. Bo weto beta to bo ro tabam refo sai, mbam kʼAllah anu Bja ranu fee. ¹⁷Tabam fo msya bombra aro rau-rau ro ja raa masmamo to, meen aro mhau mawyõs fee. Bo weto beta kbe saef mkak. Ro meen mhau mawyõs oh mi raa ro mari tna mbo mno bo ro Allah ksoh.

Raa ro knait Kristus

¹⁸Kukek wojõ; tabam ro mfo refo fo, kene wore nsboh rau oh. Tiwya anu nri raa mkyas mawe, “Raa yase sait ro yasom rait ‘Kabes ro Knait Kristus’ kbe frok yama.” Mfo wefo fo raa makin mari Kabes ro Knait Kristus oh. Bo reto merif kʼanu mawe makyon sboh rau kene oh mefo. ¹⁹Ana ro knait Kristus weto to, tiwya skabuk msya anu su. Menohe ana mhaf rana to hayah tibyo ana masen frok sikba anu mamo. Bo reto merif kʼanu mawe ana mhaf sau su msya anu to fee. Raa ro mhaf sau su mnan msya anu to, ana mhau skabuk su msya anu fares. ²⁰Menohe Tuhan yesait ybis Har rAit mama mjin kʼanu nhaf wanu tibyo anu beta ja nhar bo ro ati kaket. ²¹Taja, tme, tao, tano na; tkom aam refo kʼanu fyi? Tnaut tawe anu wase bo a? Mfe. Anu nhar bo kaket. Anu nhar nwe bokyas ro mbam kʼAllah to bo ro ati sai. Tna anu nhar nwe bokyas reto maja ro sioh aro fee ye. ²²Mfi bo raa sait ywaar Yesus yawe, “Yesus tait Mesias2:22 Som reto to, “Ait ro Allah ysok tna yawe yamo Raja.” Mai ro Ibrani mawe Mesias, tna mai ro Yunani raa mawe Kristus. fee.” Raa retait raa ro knait Kristus. Raa ro knait Kristus weto to, ja mwaar Yesus tna mwaar Yaja rAit ye. ²³Awya ro ywaar yawe, ‘Yesus tait Ku ro Allah yare metait fee.’ to, ait retait yiranya ysya Allah fee. Tna awya ro yitbat yawe, ‘Yesus tait Ku ro Allah yare oh metait.’ to, ait oh mi ja yiranya ysya Allah to. ²⁴Reto to bokyas ro ati tiwya anu nri tna smot tinyi rau. Soh anu smot bokyas reto nbo renti to, kbe anu nhaf sau su nsya Allah tna nsya Ku rAit ye. ²⁵Tna bi Ait ysi kʼanu yawe, meen anu bhau broon.

²⁶Bo wefo beta jõ tkom tiim kʼanu weto afo re anu nhau kaket anu. Nri raa ro mama mkyas bo ro mkair tna besruf anu to ma! ²⁷Yesus Kristus ybis Har rAit mroh matam anu. Feto to anu nhar bo ro ati weto oh. Soh raa sait yama ykyas bokyas roto naut kʼanu to, nri ait retait ma! Har ro mjin kʼanu nhaf to mesait merif bombra ro ati kʼanu. Har reto ja mkyas bo ro siroyõ fee. Feto to, rau ro moof to, anu nhau nhaf sau su nsya bi Ait, mfi bo tiwya tinyi Har rAit mkyas mawe kʼanu.

Kukek ro Allah

²⁸Kukek wojõ; beroh nhau nhaf sau su nsya Kristus afo re meen ati ro Ait hah yama u to, anu waa bo ntru Ait to fee, tna anu hrenaut Ait fee ye. ²⁹Anu nhar nwe Ait tait Raa ro yhaf moof yum bait sai. Tibyo anu nhar ye nwe awya sai ro ja mno bo moof to, ana oh mi ku ro Allah wAit to.

¹Nnaut oh; Allah tait yawyan marak anu toni syok re yawe anu fo ku wAit! Ae, anu fo ku wAit ro wotur fea! Tna raa ro tabam refo mhar Allah yhaf mato rAit kaket fee. Ana weto wase Bja ranu tibyo ana mhaf rana mnan msya anu bhaf ranu to fee. Feto to ana mhar anu, ku wAit weto fee ye. ²Taja, tme, tao, tano na ro jõ tksoh; mfo wefo fo anu bhar oh bwe anu ku ro Allah wAit. Menohe anu hre bnaut bwe bmos ranu fo meen mnan fyi? Anu wase fares. Menohe anu bhar bwe meen Yesus yama tabam refo mun ro ewok to, kbe anu beta bmat bi Ait. Bmat tibyo haberek bnan bi Ait ye. ³Tna awya ro yinaut tna ywof ti ro Ait yama reto to, ja yisoh ait kaket re yno iro fee. Yawe yhau yhaf mato moof ynan bi Ait ro yhaf moof sai. ⁴Awya ro yiwana watum ro Allah to, Ait retait yno iro meto. Tibyo awya ro yno iro to, ait retait yiwer watum ro Allah. ⁵Anu nhar nwe Yesus yama mkah bo yyon iro wanu. Tna bi Ait yno iro aro fee. ⁶Tibyo awya ro yhau yhaf sau su ysya bi Ait to, ja hawe yno iro aro u. Awya ro ja yno iro yoyo to, ait retait yamo yo kʼbi Ait fefares, tna wase bi Ait fares.

⁷Kukek wojõ ro jõ ksoh; raa mama mkyas bo mawe moo nhaf wanu to, nri ma! Nnaut oh; awya ro ja yno bo moof to, ait retait raa ro yoof yfi bi Ait ro yoof. ⁸Tna awya ro ja yno iro to, ait retait raa ro kabes yabi (Iblis) rait. Mbam tiwya tinyi snok ttis rau to kabes yabi yno iro bait. Tna Ku ro Allah yare yama mkah bo yitrah bo ro kabes yabi yno mkair weto. ⁹Kukek ro Allah wAit to, ja mno iro yoyo fee. Har rAit mhau matam ana tibyo ana ja wase mno iro. Ana mnan fi Maja rana ro ja wase yno iro. ¹⁰Feto to, fyi re anu bhar bwe Ku ro Allah wAit weto miyo? Tna fyi re anu bhar bwe raa ro kabes yabi wait weto miyo? Tawe kʼanu tawe; awya ro ja yno bo ro mkair to ait retait ku ro Allah fee. Tna awya ro ja yatmof raa anya kaket to fee, ait retait ku ro Allah fee ye.

Raa matmof anya kaket to merif mawe ana to ku ro Allah wAit

¹¹Tiwya tinyi raa mkyas watum reto kʼanu mawe, “Nko hawe sai, natmof raa anya kaket.” ¹²Feto to knait raa nnan fi Kain tiwya knait yao to ma! Tiwya Kain tait kabes yabi (Iblis) ybo ait. Ait yno bo ro mkair tna ymat he yao rait yno bo ro moof. Ymat feto tibyo yhaf sarok yame yao yajat.

¹³Taja, tme, tao, tano na; raa ro mimara mboh to, kbe knait anu tu oh. Ana knait anu feto, nrok ktak ma! ¹⁴Anu batmof raa anya ro Kristen to, feto oh mi anu bhar bwe anu bwyan wanu ro tiwya mhai weto to, mfo refo mrok maam oh. Tna awya ro yatmof raa anya to fee, yawyan rait to mhai fares. ¹⁵Allah yawe, “Awya ro knait raa anya ro Kristen to, ait retait yber safo ynan raa ro yame raa yajat.” Tna anu nhar nwe raa ro yame ajat retait tait meen ykai roon ro hame fee.

¹⁶Anu bno fyi re batmof raa anya kaket? Kristus yerif iso ro moof kʼanu: Ait ysan yetsu rAit, yawe yno bo re anu meen bhau hame wajin. Rau ro moof to, anu ye bno bo bawya sai afo re riof kʼraa Kristen anya ye. ¹⁷Soh raa sait yse bombra msis oh tna ymat raa Kristen anya ro mse bo marak to fyi? Soh ait yatmof raa weto ait retait ynan Allah ro ja yatmof raa ye. Soh ait yatmof raa weto fee, ait retait wase boatmof ro Allah.

¹⁸Kukek wojõ; mfo refo anu bmo raa ro Kristen, tibyo anu bhar bo ro ati. Tna anu bbo bno bo ro ati ye. Anu ja nkyas nwe, “Ja amu natmof raa anya kaket.” Nkyas feto nkah nsoh wanu sai ma. Rau ro moof to, anu natmof raa anya tna nno bo ro moof kʼana ye. Nkyas nsoh sai ma. ¹⁹Fyi re anu bhar bwe anu kro Allah mam iso rAit ro ati to? Raa ro ja yatmof raa anya mnan fi feto to, ait retait yhar yawe ait kro iso ro ati tu. Tibyo ait yamo yo kʼAllah to waa fee. ²⁰Menohe soh anu sait yno bo ro mkair. Rau ro moof to, ait hah ye yamo yo kʼAllah fooh. Tna yisoh yhaf moof u. Nnaut kaket oh: “Allah yhar bombra beta tna Ait yatak yisoh anu nhaf wanu u.”

²¹Taja, tme, tao, tano na ro jõ ksoh; soh Allah yisoh anu bhaf wanu oh to, anu waa fee. Anu bmo bo kʼbi Ait sai. Anu tetet fee. ²²Soh anu ja bri bo ro Allah ybis kʼanu tna bbo bno, kbe Ait yhaf mnan ysya anu. Soh feto to, bo bawya ro anu byoh kʼAit to, kbe Ait yoo yee kʼanu. ²³Tna bo ro Ait ysi kʼanu to, au oh mefo: Smot Ku rAit Yesus Kristus kaket. Tna bko hawe sai anu batmof raa anya kaket, mnan fi tiwya Ait ysi kʼanu oh. ²⁴Awya sai ro yari bo ro Allah yawe tna ybo yno to, ait oh mi raa ro yhaf sau su ysya Allah. Tna bi Ait yhaf sau su ysya ait retait ye. Allah yse Har rAit mjin kʼanu bhaf wanu afo re anu bhar kaket bwe Ait yhaf sau su ysya anu.

Kaket anu: Kbe guru makin mama mkyas watum ro siroyõ

¹Taja, tme, tao, tano na ro jõ ksoh; watum aro rau beta ro anu nri to, nfot srot to ma! Nse kʼanu nhaf ma! Raa mawat sioh mawe ana nabi. Raa mawat sioh mawe Allah ybis ana mama mkyas bo wAit. Ana sioh mawe feto, he mfe; bokyas wana to mbam kabes. Tna ana masen mamo mbesruf raa mam woyõ-woya ana mamo mam tabam refo ye. Feto to, raa mama mkyas bo kʼanu to, anu sanet nmat sas watum rana wia. Tna mfi bo bokyas rana mbam kʼHar ro Tuhan to fee, nri tna smot bokyas reto ma! ²Kbe anu bno fyi re bhar watum reto to mbam Har ro Tuhan fe mfe a? Ro moof to anu btu sanet raa ro mkyas watum reto wia bwe, “Fyi, nyõ smot nawe Yesus Kristus tait ybam Allah yama mam tabam refo, tna haberek yamo raa ati, fe mfe a?” Tna soh ait yawe si yawe, “Ae, Jõ smot.” Kbe anu bhar bwe Har ro mjin kʼait yhaf mato to mbam kʼAllah. Feto to bokyas raa retait reto anu bri. ³Menohe soh ait ywaar bo reto yawe si yawe, “Yesus Kristus tait Raa ro ybam Allah yama to fee.” Kbe anu bhar bwe watum raa retait mbam Har ro Tuhan fee. ⌞Feto to nri bokyas rait to ma! Smot ma!⌟ Bokyas rait reto mbam Kabes ro Knait Kristus. (Tiwya anu nri raa mkyas mawe, “Ait sait ro yasom ‘Kabes ro Knait Kristus’ kbe yama.” Tna jõ tawe kʼanu tawe ait retait yama oh.)

⁴Kukek wojõ; nnaut nwe anu fo ku ro Allah wAit. Tna Har rAit ro mjin kʼanu bhaf wanu to, mase toni miwer. Kabes Yabi (Iblis) tait yase ybo bombra ro tabam refo sai. Tibyo kabes sor ro ait ybo to mtai miwro anu, ku ro Allah, to fee. Har ro Tuhan reto matak miwer. Kbe mno kabes weto mhau mte. ⁵Guru sor ro wase Allah weto to mama mkyas bo ro mbam tabam refo sai. Tibyo raa ro wase Allah ja mari bokyas ro guru weto mkyas. ⁶Menohe anu fo ku ro Allah wAit. Tna awya ro yari bokyas ro anu bkyas to, anu bhar bwe ait retait yhar Allah yhaf mato rAit kaket. Tna raa ro mari bo ro anu bkyas to fee, anu bhar bwe ana weto to ku ro Allah wAit fee. Iso reto oh mi anu bhar kaket bokyas aro rau weto mbam tiyo: Taro mbam Har ro ati, tna taro mbam har kabes ro besruf raa ye.

Allah ja yatmof raa

⁷Taja, tme, tao, tano na ro jõ ksoh; natmof raa anya kaket. Allah oh mi yno re anu natmof raa anya saah. Awya ro yatmof raa anya kaket to, ait retait ku ro Allah rAit. Tna yhar Allah yhaf mato rAit ye. ⁸Allah ja yatmof raa. Feto to anu bhar bwe awya ro yatmof raa anya to fee, ait retait wase Allah. ⁹Allah tait yabe Ku sait aran tomu yum. Tna ybis Ku ro yare retait yama tabam refo yno iso re kbe anu bhau hame wajin. Feto oh mi anu bhar bwe Allah yatmof anu toni. ¹⁰Tiwya anu nhafri Allah fee. Menohe Allah yatmof anu matim wia fefo: Tiwya iro ro anu bno weto misti re Allah kmo anu. Tna Ait ybis Ku rAit yroh yama yake safo wanu. Feto to yno re Allah kmo anu u fee. ¹¹Taja, tme, tao, tano na ro jõ ksoh; Allah yatmof anu toni. Fyi-fya rau to, batmof raa anya kaket mfi Ait yatmof anu! ¹²Raa sait bo aro ymat Allah fefares. Menohe bi Ait yhau yhaf su ysya anu to, mafer rau to anu batmof raa anya. Raa mmat bo anu ja batmof raa anya to, aro mabut fee. Tna kbe ana mhar mawe, “Allah oh mi yno re ana matmof raa anya.”

¹³Anu fo bhau bhaf sau su bsya Allah fe mfe a? Tna bi Ait yhau yhaf sau su ysya anu fe mfe a? Allah ybis Har rAit mama mjin kʼanu bhaf wanu oh. Feto oh mi anu bhar kaket bwe anu bhaf sau su bsya bi Ait tna bi Ait yhaf sau su ysya anu ye. ¹⁴Tiwya ati ro Ait yhau mam tabam refo fares, amu4:14 Yohanes ykyas ait yesait ysya kuber ro Yesus wAit taro sor. nesait nbo tna nmat Yesus yabo rAit. Feto to amu nhar nwe bokyas refo mabo tu oh. Tna amu nkyas yasom rAit nwe Allah ybis Ku rAit yroh yama tna sotak iro raa beta. ¹⁵Awya ro ykyas abyõ yawe, “Yesus tait Ku ro Allah yare.” Allah yhau yhaf sau su ysya raa retait tna raa retait yhaf sau su ysya Allah ye. ¹⁶Allah yno bo ro riwai weto afo re anu bhar kaket bwe, “Bi Ait yatmof anu toni.” Feto to anu smot bi Ait.

Allah ja yatmof raa. Tna awya ro ja yatmof raa anya to, ait retait yhau yhaf sau su ysya Allah tna Allah yhaf sau su ysya ait retait ye. ¹⁷Bo ro riwai reto oh mi mno re anu ja batmof raa anya to, aro mabut fee. Soh anu bhau bhaf sau su bsya Allah to, meen ati ro bi Ait ytu safo mana kʼraa sait-sait to, kbe anu waa fee. Anu bhar bwe wore anu bhau mam tabam refo fares to, anu ja batmof raa anya ye mnan fi bi Ait yesait ja yatmof raa ye. ¹⁸Soh anu batmof raa anya kaket to, anu bhar bwe meen ati ro bi Ait ytu safo mana kʼraa to, kbe yno bo mai kʼanu fee. Feto to anu waa Allah fee. Menohe raa ro ja matmof raa anya fee, ana weto kbe mnaut yyi ana mamos wana tna ana waa ye fea! ¹⁹Allah yatmof anu wia matim tibyo anu ne nhafri bi Ait ye. ²⁰Awya ro yawe, “Jõ thafri Allah.” Menohe ait knait raa ro Kristen taro to, ait retait yhar Allah boatmof rAit fee saut! Yawe ait yhafri Allah to, ait sioh! Raa ro tabam refo ja anu bmat bkah bsu wanu. Tna soh ait retait wase yatmof raa ro ja ymat to, fyi mkah Allah; raa ro anu bsu wanu bahni? Ait ro riwai retait wase yhafri Allah ye tu oh! ²¹Bobis ro Allah oh mefo: “Awya ro yhafri Jõ to, fyi-fya rau to, kbe ait yatmof raa ro Kristen taro ye.”

Bombra ro tabam refo meen miwro anu fee

¹Awya ro smot Yesus Kristus tna yhar yawe, “Yesus tait Raa ro Allah ysok mkah bo yoo riof ro mase yee kʼraa” to, ait retait ku ro Allah. Tna awya ro yhafri Allah to, kbe ait retait yhafri Allah yare ye. ²Anu fo ja batmof raa ro Kristen taro fe mfe a? Soh anu ja bri bo ro Ait ybis kʼanu tna ja bbo bno to, kbe anu bhar kaket bwe, “Anu batmof raa ro Kristen taro ye.” ³Soh anu bhafri Allah to, kbe anu bri bo ro Ait ybis kʼanu tna ja bbo bno bo weto ye tu oh. Tna bo ro Ait ybis weto to samyoh fee. ⁴Bombra ro tabam refo ja miwro ku ro Allah wAit re ana mbtek mam iro fee. Bosmot ranu mno re anu bros btak bikyak bo mkair-kar ro tabam refo. ⁵Raa ro smot Yesus tna mhar mawe Ait Ku ro Allah yare to, ana weto mesait aran kbe mros matak. Bombra ro tabam refo meen miwro ana weto fee.

⁶Tiwya raa baptis Yesus mkah aya. Tna Ait ysan yetsu rAit kʼraa mame yajat tna mees rAit frok ye. Tna Har ro Allah mesait mkyas mawe, “Bo weto to mabo tu oh.” Anu bhar bwe Har rAit ja mkyas bo mabo sai. ^7,8Tna Allah yerif bo trion tuuf refo kʼanu: Har rAit, aya reto, msya mees reto. [Yerif bo tuuf wefo beta kʼanu afo re anu smot bwe Yesus Ait oh mi Raa ro yoo riof yee kʼanu.] ⁹Bokyas ro raa mkyas kʼanu to, ja anu smot tna nnaut mamo-me fee. Tna Allah tait Raa ro yase toni, feto to bokyas rAit to matak miwer! Bi Ait ykyas Yesus kʼanu yawe, “Yesus tait Ku aJõ.” Feto tibyo anu bhar bwe bokyas rAit reto matak yum. ¹⁰Awya ro smot bokyas reto yawe “Yesus tait Ku ro Allah yare” to, ait yhar kaket yawe bokyas ro Allah riwai reto to bo ati oh. Tna awya ro smot bokyas ro Yesus reto fefares to, ait retait ywaar yawe bokyas ro Allah riwai reto to bo ro ati fee. Tna ait ro hawe smot Tuhan reto ait ynaut yawe fyi? Ynaut yawe Allah tait Raa ro siroyõ a? ¹¹Bokyas ro ati oh mefo: Allah ysan roon ro hame kʼanu oh. Tna Ku rAit oh mi yama yno re anu bhau hame to. ¹²Feto to awya ro smot Ku rAit to, kbe ait retait ykai roon reto. Tna awya ro hawe smot Ku rAit to, kbe yhau hame fee.

¹³Jõ tkom bo wefo beta tiim kʼanu ro smot Ku ro Allah rAit afo re anu nhar nwe meen anu nhau hame wajin. ¹⁴Tna anu nhau skabuk Allah to waa fee. Anu bhar bwe soh boyoh ranu mnan anya msya Ait ksoh rAit to, kbe Ait yari boyoh ranu. ¹⁵Anu bhar bwe Ait yari boyoh ranu tna bhar bwe kbe anu bkai bombra ro anu byoh kʼAit weto ye.

¹⁶Soh anu sait ymat raa ro Kristen yno iro aro to, rau ro moof to, nyõ skabuk nayoh kʼAllah afo re bi Ait yatmof ait retait, yoo riof yee kʼait. Iro taro to, Allah ynaut yawe safo toni, kbe misti raa mhai tu oh. Tna jõ tawe anu skabuk raa ro mno iro ro safo weto to ma. ¹⁷Bombra ro mimara beta to Allah yawe, “Iro meto.” Tna iro taro to misti re raa mhai fee.

¹⁸Anu bhar bwe ku ro Allah wAit to ja mno iro fee. Yesus yatam ana tna saka wa kabes yabi (Iblis). Tibyo kabes yabi ytai yno ana fee. ¹⁹Tna anu bhar bwe kabes yabi yase ybo raa beta ro mhau-ha sai mam tabam refo. Menohe anu fo ku ro Allah wAit to, kabes yabi ytai ybo anu u fee. ²⁰Anu bhar bwe Yesus yroh yama mam tabam refo tibyo anu btai bhar maja ro Allah. Ait yroh yama afo re kbe anu bhar Allah ro yase, yhaf mato rAit. Tibyo anu fo bhaf sau su, srau sau su, tna bonaut wanu ro bnaut sau su bsya bi Ait tna bsya Ku rAit Yesus Kristus ye. Ait retait Allah ro yase, ro ysan roon ro hame kʼanu. ²¹Kukek wojõ; smot bombra ro tabam refo fo ma! Smot Allah ranu ro yaam sai.