1 Korintus

Aam Tinyi ro Paulus Ykom tna Tiim Mamoʼt Jemaat ro Korintus

1 Korintus

Paulus ymah meen kʼraa Kristen ro mhau mam kota ro Korintus

¹Aam refo mbam kʼjõ, Paulus. Tiwya Allah ytu jõ yawe tamo raabis (rasul) ro Kristus Yesus rAit. Jõ tsya bi Sostenes nmah meen kʼanu. Sostenes tait raa ranu ro ja kro Kristus.²Aam refo amu nkom tna tiim kʼanu, raa jemaat ro Allah mam kota ro Korintus. Allah ymat anu nsya Kristus su tibyo Allah yoo anu nmo raa ro ja mno bo wAit sai. Ait ytu anu nmo raa wAit nsya raa magin ro mamo mo kʼYesus Kristus oh to ye. Yesus Kristus tait Tuhan ro ybo anu bsya raa ro kro Kristus beta ro mhau mam woyõ-woya ye. ³Amu mbewok skabuk Bja Allah, re Ait ysya Tuhan Yesus Kristus matmof anu tna mno re anu nhau nhaf tnok ye.

⁴Anu nmo no Kristus Yesus oh. Allah yatmof anu oh. Feto to jõ tayoh asik mase kʼAllah yoyo. ⁵Anu nma no kʼKristus Yesus oh. Tibyo Allah yoo bouum ro mase yee kʼjemaat ranu: Yno re anu nhar bo knik-knak kaket, tna yno re anu ntak nkyas bo kaket moof ye. ⁶Ait yoo bouum rAit yee kʼanu mi raa mhar mawe bokyas ro Kristus tiwya amu mbewok nkyas kʼanu to bokyas ro mabo. ⁷Mfo refo anu nhau ste Tuhan ranu, Yesus Kristus ro kbe yama mun ro ewok. Anu ste Ait yama to, anu nhaf nse bouum (karunia) ro Allah yuumto kʼanu to, aro mabut fee. ⁸Tna bi Ait kbe yban anu snok mam tis rau reto. Yban anu afo re anu nros ntak tu. Tna meen ati ro Tuhan ranu, Yesus Kristus yoo safo mana ymit kʼraa to, kbe yawe anu nber safo aro fee. ⁹Allah ymen anu oh yawe anu bma biranya bsya Ku rAit, Tuhan ranu Yesus Kristus. Tna bo ro Ait yawe to, kbe ybo yno tu oh.

^10-11Taja, tme, tao, tano na; raa ro Kloe mawe kʼjõ mawe anu riwai nfa anya. Jõ soh-soh kʼanu mam Tuhan ranu, Yesus Kristus yasom tawe, “Nfa anya ma! Tawe nhau nhaf sau su tna bonaut ranu sau su.” ¹²Anu taro nwe, “Jõ fi kro Paulus!” Tna taro nwe, “Paulus fee, jõ kro Apolos!” Tna taro nwe, “Jõ kro Kefas-Petrus!” Tna anu roto taro nwe, “Jõ kro Kristus aran sai!” ¹³Anu nno fyi meto? Kristus yetsu rAit sau aran sai! Jõ oh mi raa mame tajat fee! Jõ too riof ro mase tee kʼanu to fee! Raa baptis anu aro to mkah jõ tasom ajõ to fee ye! ^14,15Jõ hawe bo raa mnaut mawe, “Paulus ja baptis raa mawat afo re kbe ana ksoh kro ait!” Tiwya jõ tesait baptis Krispus ysya Gayus, mbewok aran sai. Tibyo jõ tayoh asik mase kʼAllah. ¹⁶(Tna tiwya jõ tesait baptis Stefanus ysya raa wait ye. Jõ baptis ana weto sai aran.) ¹⁷Mhau raa roto baptis raa. Kristus ybis jõ tkyas Bokyas ro Moof (Injil) rAit sai. Tiwya Kristus yajat mam ara warok afo re raa fri riof ro mase. Tna bokyas reto oh mi bokyas ro matak toni. Jõ hawe bo bokyas ajõ ro moof mi mayõ raa tibyo ana ksoh mama mo kʼKristus. Menohe bo ro Kristus yno reto oh mi kbe mayõ raa mhaf wana to bo ro ati. Jõ thar bo tkyas kaket fee. Ara warok reto au oh mi merif Allah yhaf rAit kaket matak.

¹⁸Raa taro mamo iso ro mkair. Meen Allah yno ana safe mkak. Ana weto mari amu nkyas nwe, “Yesus raa mame yajat mam ara warok afo re kbe raa fri riof ro mase.” Mari feto to, ana mnaut mawe amu wase bo. Menohe anu ro bkai riof ro mase to, bhar bwe bokyas reto to matak toni. ¹⁹Bokom ro Allah mawe fefo:

“Raa ro makit maan to, meen Jõ tno re ana mamboi. Bombra ro ana mhar reto to, meen Jõ sibrir marak.”

Yesaya 29:14

²⁰Raa ro makit maan to, Allah yawe, “Ana wase bo.” Raa ro mnaut mawe ana mhar bo kaket tna mamo guru to, Allah yawe, “Bonaut rana to mabuf sai.” Raa ro mhar bo tna hre mkyas iso ro raa mnaut bo to, Allah yawe, “Bo ro ana mhar to mafer aro fee.” ²¹Allah yno re raa ro makit maan to, bombra ro ana mhar to, iso ro raa mkai riof to fee. Menohe yno re Bokyas Moof ro Yesus (Injil) ja amu nkyas reto mi merif iso ro raa mamo mo kʼAit tna mkai riof ro mase. Raa ro wase Allah to mnaut mawe amu ro ja nkyas Bokyas (Injil) reto to, raa ro wase bo. Menohe Allah ysan riof ro mase kʼraa beta ro mari Bokyas reto tna mse kʼana mhaf. ^22,23Mfi bo amu nkyas ara warok ro Kristus to, raa mana ro Yahudi ja mari fee. Ana weto mawe mmat bo hnah wia tna fo ana smot bokyas ramu reto. Tna raa mana ro Yunani mnaut mawe kbe ana mkai Allah mkah bonaut rana sai. Feto to raa ro Yahudi mnaut mawe Yesus tait Kristus rana fee, mnaut mawe bokyas ramu mamyot bo ro ja ana smot fee. Tna raa ro mbam raa mana roto makin to, mnaut mawe ana saso bohar ro ati. He mfe. Tna ana mnaut mawe amu wase bo! He mfe ye. ²⁴Menohe raa taro Allah ymen yawe, “Nma smot Kristus!” Ana taro to raa mana ro Yahudi ye. Tna Ait ymen raa ro mbam raa mana roto makin ye. Ana weto smot Kristus. Ana mhar mawe Kristus oh mi Allah yatak rAit. Tna ana mhar mawe Kristus oh mi bohar rAit ye. ²⁵Raa ro tabam sai ana mnaut mawe iso ro Allah yerif re raa mamo mkai riof reto to, iso ro mkair. He mfe. Bo ro ana weto mhar to mabuf sai. Bohar ro Allah reto to mase miwer. Tna raa ro tabam sai mnaut mawe ana mesait to raa ro matak. He mfe. Ana raa ro sne sai. Allah tait raa ro yatak tna raa ro tabam refo aro matak fee.

²⁶Taja, tme, tao, tano na; nnaut nwe: Tiwya raa mnaut mawe anu nkin nhar bo kebet aran sai. Raa ro wase Allah mnaut mawe anu nkin to raa ro nse fee. Raa ro wase Allah mnaut mawe anu nkin to raa manes fee. Tna fo Allah ytu anu yawe, “Nma smot Kristus!” ²⁷Menohe Allah ysok raa ro tiwya wase bo to, yawe ana mamo mo kʼAit. Tna yno re ana mhar bo miwrek raa tabam ro ja mhar bo tna mamo mo kʼAllah fee. Yno feto afo re ana ro tabam refo to hrenaut. Tna Allah ysok raa ro ssafo fee to, ytu ana mamo mo kʼAit. Tna yno re ana matak miwrek raa ro ja matak. Yno afo re ana ro hawe mamo mo kʼAit to hrenaut ye. ²⁸Tna bombra ro ati fee, msya bombra ro ja raa hawe to, bo weto to, bi Ait ysok tna yawe bo weto to bo ro ati meto. ²⁹Allah yno feto afo re raa safuk ma. Raa taro mawe, “Jõ fi raa ro thar bo. Feto to Allah ysok jõ yawe tamo raa wAit sait.” He mfe. Allah hawe bo raa mkyas feto, bokyas reto to, bokyas ro sre. ³⁰Bi Ait yesait oh mi yno re anu nhau nsya Kristus Yesus su. Nhau nsya Kristus su tibyo Allah ymat anu yawe anu bfi raa ro mhaf moof ati. Tna Allah yawe anu nhau nno bo wAit sai. Tna Kristus yoo yetsu rAit yfes anu.1:30 Raa wAit mno iro. Menohe Allah sikowah ana fee. Yesus yawe Ait raa mame riryõn. Feto to Ait yake raa ro mno iro weto mkah yetsu rAit. Feto to Allah yno re bo beta ro anu bhar to, Kristus oh mi sair to. ³¹Bokom ro Allah mkyas mawe,

“Safuk bombra ro anu nno to ma. Rau ro moof to, nnaut bombra ro Tuhan yno kʼanu sai, tna safuk bibi Ait.”

Yeremia 9:24

Rau ro moof to, kbe anu nri bokom ro Allah reto.

Paulus ykyas bo to, ait yasu heyut Har ro Tuhan

¹Taja, tme, tao, tano na; tiwya jõ tama tkyas bo ro Allah yawe kʼanu to tkyas bo reto mkah mai ro moof kaket fee. Tna jõ tkyas bo mfi raa ro ja mhar bo toni to fee ye. ²Bo ro jõ tkyas kʼanu oh mefo: “Yesus Kristus tiwya raa mame yajat mam ara warok oh.” Jõ tkyas bo ro mase aro kʼanu fee. ³Jõ tama tinyi to kʼanu to, jõ waa tna tetet thai. ⁴Ati reto to, jõ tkyas mfi raa ro mhar bo mbetoo mase fee. Menohe Har ro Tuhan mno re ati ro jõ tkyas to, raa mari tna mawe bokyas ro jõ tkyas to mbam Allah. ⁵Har ro Tuhan mno feto afo re anu nhar nwe bo ro jõ tkyas reto mbam bonaut raa sai fee, menohe mbam Allah yatak rAit. Jõ tkyas feto tibyo anu nrok smot Ait.

Bohar ro mbam kʼAllah

⁶Raa ro kro Kristus taro to bosmot wana matak oh. Tna ati ro amu mbewok hre nsya ana weto to, kbe amu nkyas maja ro Tuhan mase kʼana. Tna bo bawya ro amu nkyas refo mbam kʼAllah, mbam kʼraa ro makit maan mam tabam refo fee. Tna bawya ro amu nkyas reto mbam kʼraa manes ro tabam refo fee ye. Meen ana mkah bohar wana weto to msat marak sai. ⁷Tinyi rau to, bombra ro Allah yhar to, Ait ymyõt fares. Tinyi rau Ait yfen tabam refo fefares to, Allah siwyan bohar reto wia oh. Yawe kbe yoo yee kʼanu mam wore wo anu bkai bo yase rAit. ⁸Raa manes ro tabam refo, ana mhar bohar reto fee. Mfi bo tiwya ana mhar bohar reto oh to, Tuhan Yesus ro ja anu bibi tait mi kbe ana mfot mame Ait yajat mam ara warok to fee. ⁹Raa manes weto wase bohar refo. Bokom ro Allah mkyas mawe fefo:

“Meen Allah yno bo ro moof toni kʼraa ro hafri Ait kaket. Bo weto to, raa aro mmat fefares. Tna mari fefares. Tna mhar bo weto fefares ye.”

Yesaya 64:4

¹⁰Har rAit mmat sas bombra beta. Mhar bo ro Allah ymyõt fares ye. Mhar tna masbrah bo weto kʼanu raa ro kro Kristus oh. ¹¹Mfi raa sait ynaut bo mam yhaf mato rait to, raa aro mhar bonaut rait fee. Ait yesait aran yhar bait. Tna raa aro mhar bombra ro Allah ynaut mam yhaf mato rAit fee ye. Har rAit mesait aran mhar bombra ro Allah rAit. ¹²Tna Har ro mjin kʼanu bhaf to har ro mbam tabam refo fee. Har ro mbam kʼAllah oh mi mjin kʼanu bhaf ranu to. Har rAit mjin mam anu bhaf ranu afo re anu bhar bombra ro Allah yuumto kʼanu. ¹³Feto to bo ro amu nkyas tna mbetoo kʼraa to bohar ro mbam kʼraa ro tabam refo fee. Menohe Har ro Tuhan mjin kʼamu nhaf ramu tibyo amu nhar tna nkyas bohar ro ati mbam kʼAllah. Har rAit oh mi mno re amu nkit wamu maan afo re amu ntai nkyas bohar ro mbam Allah kaket. ¹⁴Raa ro wase Allah to, ana mhar bombra ro mbam Har rAit fee. Anu bkyas bo weto to, ana mnaut mawe anu wase bo. Har rAit mjin kʼana mhaf rana to fee, tibyo ana weto mtai mhar bo ro mbam kʼAllah to fee ye. ¹⁵Menohe anu to, Har rAit mjin kʼanu bhaf wanu, au oh mi anu bhar bo ro mbam kʼAllah weto. Menohe raa taro mhar maja rau ro anu bkyas to fee. ¹⁶Bokom ro Allah mawe fefo:

“Awya oh mi yhar Tuhan yhaf msya yakit rAit? Tna awya oh mi ytai ykyas watum kʼAit to?”

Yesaya 40:13

Amu fo nhaf sau su nsya Kristus tna nhar bo rAit reto.

Nsok raa ma

¹Taja, tme, tao, tano na; tiwya wore wo jõ tama tmat anu to, tmat he anu to raa ro kro Kristus oh. Menohe bosmot ranu to matak fefares. Tibyo jõ tkyas bo kʼanu mnan fi tkyas kʼraa ro ksoh bo ro tabam sai. Anu nfi ku mees fares. ²Feto to jõ tkyas maja Tuhan ro msai aro kʼanu fee. Anu nfi ku mees ro mata sis maya sai fares. Anu ntak niit boit nfi raa mabi to fefares. ³Anu ja ksoh bo ro tabam refo sai fares. Jõ tari he anu taro naam bo raa anya fares. Tna anu nmak nsya raa anya fares ye. Feto to jõ tnaut tawe anu nfi raa ro tabam refo sai fares. ⁴Anu taro nkyas nwe, “Jõ fi kro Paulus!” Tna anu taro nwe, “Paulus fee, Jõ fi kro Apolos!” Soh anu nkyas feto to, jõ thar tawe anu nfi raa ro tabam refo sai. Anu nfi raa ro kro Kristus fee. ⁵Jõ tsya Apolos fo sryan ro Tuhan wAit sai. Amu mbewok ja nno bo ro bi Ait ybis sai. Ait oh mi ybis amu mbewok nkyas Yesus yasom kʼanu tna re anu nri tna nsam wai kʼKristus.⁶Bokyas ajõ reto to, mfi kake makan sau ro jõ tyum. Tiwya jõ tyum kake makan reto mam anu nhaf mato wanu. Tna Apolos ywyan aya ytu. Menohe Allah Ait oh mi yno re moo to. ⁷Raa ro myum tna msya raa ro mwyan aya mtu weto to raa ro ati fee. Allah tait raa ro ati, ro yno re bo moo. ⁸Raa ro yyum ysya raa ro ywyan aya ytu to, ana mbewok to mnan anya sai. Mbewok mkah bo mana sau su. Menohe kbe boren ro Allah yaren ana to, aro rait hayah-hayah. Meen ait yaren bo kʼana mamyot bo samyoh aro rait-rait. ⁹Amu mbewok nfoh kʼanya tna nkah armato ro Allah rAit to su. Anu, jemaat ro Korintus fo, nnan fi armato ro Allah rAit.

Anu ro nkyas Yesus yasom to, nkyas kaket

Tna anu fo nfi samu ro Allah rAit ye. ¹⁰Allah yoo bouum yee kʼjõ: Ait yno re jõ thar tamo tkyas Yesus Kristus yasom kʼraa kaket re ana mama smot bokyas rAit. Bo ro jõ tno reto mfi jõ sgi samu sau: Tinyi rau to, jõ tati sankaf mros. Tna fo raa roto mama sgi renti. Anu ro sgi renti to, sgi kbik-kbak to ma! ¹¹Yesus Kristus tait yfi sankaf ro ati. Sgi samu abyõ mam sankaf roto taro to ma! ¹²Kbe raa moo bo aro rau-rau makah mama misoh sgi mam sankaf reto to abyõ. Raa misoh sgi amah reto mkah bo ro moof mfi emas, perak, fraa ro moof aro rau-rau ye. Tna taro moo bo ro mkair mfi ara atau bosafom ro ngkaat bo to ye. ¹³Meen ayõ ro Tuhan yama to, kbe Ait sanet bo ro raa sait-sait rait yno. Sanet mkah tafoh ro mait. Sanet re yhar soh ait yno bo rait kaket fe mfe a? ¹⁴Meen Tuhan yoo tafoh yuus bo ro raa sgi. Ana taro to mno bo wana kaket wore wo ana mhau mam tabam refo. Bo ro ana mno kbe mberoh mros matak tibyo Tuhan yaren ana. ¹⁵Tna raa taro to, mno bo wana kaket fee wore wo ana mhau mam tabam refo. Bo ro ana mno to, kbe mait mkak beta. Hrowyõ rana to makus. Kbe ana mkai boren aro fee. Kbe ana mabo rana mkai riof, menohe kene wo tafoh mait ana.

¹⁶Nnaut oh: Anu raa magin ro kro Kristus beta to samu ro Allah rAit. Tna Har ro Allah mjin kʼanu nhaf wanu beta. ¹⁷Wore wo Allah yhau to, yuk ro mbau meto. Anu beta to samu ro Allah rait oh meto. Mfi bo raa aro mitrah samu ro Allah reto, kbe Allah yno ana safe mkak ye.

^18-20Raa ro tabam refo ro mhar bo to, Allah ymat ana tna yawe, “Ana wase bo.” Bokom ro Allah mawe fefo:

“Raa ro tabam refo mnaut mawe, ‘Anu bhar bo!’ Ana mawe feto tna mamo mno bo wana mamyot bo ro ana mesait mhar sai. Menohe Allah yno re bo ro ana mawe mno to, mabo fee. Allah yaka boka yse mam iso wore raa mno bo wana mamyot bo ro ana mesait mhar sai.”

Ayub 5:13

Tna Bokom ro Allah mawe fefo:

“Raa ro mhar bo to, Tuhan ymat bonaut wana tna yawe, ‘Bonaut wana weto to mabo aro fee.’”

Mazmur 94:11

Mfi bo raa ro tabam refo fo mnaut mawe, “Anu fo raa ro bhar bo.” Jõ tnaut tawe ana weto sioh ana ai sai. Raa ro mhar bombra ro mbam kʼAllah kaket to, ja raa ro tabam refo mnaut mawe ana wase bo. Nnaut oh: Rau ro moof to, anu nri bohar ro mbam kʼAllah to. Mfi bo anu nno feto, kbe raa ro tabam refo mnaut mawe anu weto wase bo. Menohe Allah ymat anu to, yawe anu raa ro nhar bo. Feto to nitsre raa ro tabam refo mnaut feto rof! ²¹Feto to bibi raa sai toni to ma. Nwe raa sait yhar bo toni tibyo anu nwe kro-kro ait to ma. Bombra beta to mhau mkah merif mafer ro moof kʼanu, raa ro Allah wAit. ²²Jõ tsya Apolos tna tsya Kefas-Petrus ye, amu nbo tuuf nkyas watum mkah merif mafer ro moof kʼanu. Tna bo bawya ro anu nkai mam tabam refo; mam wore anu nhau fares ye, tna wore anu aro nhai ye, tna bombra ro meen mama ye to, Allah yno re bo weto beta merif mafer ro moof kʼanu ye: ²³Tna anu weto beta to raa ro Kristus wAit. Tna Kristus tait Ku ro Allah rAit.

Tuhan yesait aran ymat sas anu bhaf

¹Jõ tsya Apolos nmo sryan ro Kristus. Tna bi Allah ysan bohar rAit kʼamu mbewok nbo yawe amu mbewok nmo mbetoo bohar rAit reto kʼraa renti. Bohar reto to, raa ro tabam refo wase fares. ²Mfi bo raa mawe moo bo wana mee kʼraa taro sait yse wea to, ja ana mamo saso raa sait ro yhaf makin fee. Ja ana saso raa ro kbe kmot bo reto kaket. ³Jõ tari he anu nnaut nwe jõ tno bo ro mkair. Nwe jõ srau ajõ ewok tama tkah armato ro Tuhan. Jõ tnaut mamo snok mam wore anu nkyas weto fee. Jõ tesait wase thaf ajõ ai! ⁴Tuhan yesait aran oh mi Raa ro hre susai tna ymat sas bo ro jõ tno. Jõ tnaut tawe thaf ajõ to moof sai. Menohe bo ro jõ tesait tnaut mam thaf mato ajõ to bo ro ati meto fee. Bo ro Tuhan ynaut yawe to, rau ro ati oh meto. ⁵Feto to, anu nesait nuun boun kʼanya wia to ma. Nhau meen Tuhan yesait yama yoo safo yerif raa sait-sait tiwya yno to. Bi Ait yhar bo beta ro ja raa mmyõt wai to. Yhar bo ro raa mnaut mam mhaf mato wana ye. Meen Ait yama yasbrah bo beta ro mhau mam raa mhaf mato wana beta ye. Ati reto kbe Allah bibi raa sait sait ro yhaf moof.

Amu, raabis ro Allah to, raa taro nksoh amu, tna taro hawe amu

⁶Taja, tme, tao, tano na; ti tinyi raa sait yawe, “Nno bo niwrek maja ro Allah yawe kʼanu to ma.” Tna jõ ksoh betoo u sai kʼanu. Au oh mi jõ tkom bofret riwai4:6 Nmat 1 Korintus 3:5-9 mkyas mawe ja Paulus ysya Apolos mbewok mkah armato ro Allah su. reto kʼanu tawe, “Apolos ysya jõ mbewok nkah armato ro Allah su.” Nnaut oh; raa ro mnaut mawe raa sait yase yiwrek raa taro to, ana weto miwrek maja ro Allah oh meto. ⁷Anu to raa ro Allah yfen beta. Anu taro ja nmat raa taro nwe, “Nyõ to raa ro ati fee!” Mkair feto! Bawya oh mi anu sait safuk yawe ait yase yiwrek raa taro to! Bombra beta ro anu nkai to mbam kʼawya? ⁸Anu taro ja nnaut sre-sre nwe, “Amu fo bobot oh. Feto to amu hawe nri watum ro anu, raabis ro Allah ja nkyas u to ma! Amu fri bobot mninon oh. Amu nnaut bawya u? Amu nfi raja oh!” Mfi bonaut ranu reto mabo oh kbe amu simaut mase nsya anu ye. Tna amu ksoh kro anu to, bsen bmo raja bbo raa ye! He mfe.4:8 Paulus yawe ana wase Allah yhaf rAit. Rau ro moof to, ana mari watum ro ait ykyas kʼana to fares.⁹Jõ tnaut tawe Allah yno re raa ksoh mama horit amu, raabis (rasul) wAit. Raa horit amu mfi bo amu to raa ro safe mkak. Tna raa msya malaikat mawe mama mmat bo ro mbtek mai kʼamu. ¹⁰Amu fo mur-mur nri Kristus tibyo raa taro mnaut mawe amu fo raa ro wase bo. Anu jemaat ro Korintus to, anu baro ja tawyõ bo nwe anu to raa ro kro Kristus tna nhar bo. Ja anu nnaut nwe amu fo raa ro ssafo fee. Tna anu safuk nwe anu raa ro ja ntak. Ja anu nnaut nwe amu fo raa kair sai tna ja anu safuk nwe anu to raa ro manes. ¹¹Ja amu nhai sre, nhai sbit, tna ratan wamu to ro mrat mam amu netsu wamu sai. Tna raa mai amu. Tna wore amu njin to aro kaket fee. Tna amu nmo ninya sai mam tabam. ¹²Tna amu ja mur-mur saso boit wamu nesait sai. Soh raa mamus amu to, amu nno bo moof kʼana sai. Tna soh raa sikowah amu to, amu kanyin sai. ¹³Mamo snok mfo refo to, raa mkyas-kas amu to, amu kmo ana si fee. Amu nkyas kʼana mkah nhaf ro sneh sai. Tna raa mnaut mawe amu fo nfi bo ro mnis ja raa mbeak makus sai.

¹⁴Jõ tkyas watum riwai reto kʼanu, tawe mti hrenaut kʼanu fee. Tno afo re kbe anu nnaut, tna kaket anu. Anu to nfi ku wojõ ro jõ ksoh. ¹⁵Guru ro mbetoo bo ro Kristus kʼanu to magin. Menohe jõ oh mi tama tna tkyas Bokyas ro Yesus kʼanu tatim wia tibyo anu nhaf smot Kristus Yesus. Feto to jõ fi tfi anu nja ranu. Jõ fi anu nja sait aran. ¹⁶Reto oh mi jõ tkyas watum reto tawe, “Anu nmat bo ro ja jõ tno to, tna anu kro nno ye.” ¹⁷Ja jõ tamo iso ro Kristus kaket. Reto oh mi riwai jõ tbis Timotius yamo yo kʼanu: Kbe ait ye ykyas iso ro ja jõ tamo reto kʼanu re anu ne nnaut u. Timotius ynan fi ku ajõ ro ksoh. Ait tait ja mur-mur kro Kristus. Kbe ait snok kota ro Korintus teto tna ykyas iso ro Kristus kʼanu. Bokyas reto ja jõ tkyas woyõ-woya jõ tamo, mam jemaat magin.

¹⁸Jõ tari he anu taro safuk nwe anu to raa ro nhar bo. Ana weto mnaut mawe, “Kbe Paulus yama u yo kʼanu fee.” ^19,20Raa ro mhau mam raa mana ro Allah yamo Raja ybo to, ja anu bhar ana. Ja bo ro ana mno to, ana mno mkah tak ro Allah rAit. Raa roto taro ja mkyas mkah masoh sai. Bo ro ana mno to, mkah matak rana sai. Feto to, kbe jõ tama fooh to kʼanu, soh Tuhan yiserar tamos ajõ miyõ rere. Tama tmat anu ro safuk weto. Tna kbe thar soh anu ja nno bo nkah tak ro Allah, fe anu ja nno bo nkah tak ranu nesait sai. ²¹Anu ksoh ranu sai: Mfi bo anu nno bo ro moof to, kbe jõ tama tkyas bo kʼanu mkah thaf ro sneh. Tna mfi bo anu beroh nno bo ro mkair weto kbe jõ tama tkyas watum kʼanu mkah kmo.

Raa sait mam jemaat ranu yno iro

¹Jõ tari he raa ro jemaat ranu sait ja yaus yaja yfain. Bo ro ait wyahte reto to, mkair toni! Ja raa ro wase Allah to, ana hawe bo ro mnan feto mno. Fyi re raa ro kro Kristus sait yasen yno bo feto! ²Fyi re anu nsen safuk nwe, “Amu raa to nno bo moof!” Anu hrenaut tna sraujin fea! Raa ranu sait yno bo mkair wyahte to fyi re anu nbe ait nwe yhau ysya anu? Rau ro moof to, anu nikyak ait frok ybam jemaat ranu too! ³Jõ tabo fo thau fari tsya anu menohe thaf ajõ fo mrat msya anu. Jõ thau to tnaut anu yoyo. Jõ thau mam tefo to, jõ too safo mana tse kʼraa retait oh. ⁴Mam Tuhan Yesus yasom rAit to, jõ tbis jemaat ranu tawe anu nmo berur siret su tna nkyas safo reto. Siret su tna nno bo mnan mfi bo jõ tsya anu hre su ye. Tna kbe Tuhan Yesus yatak rAit yatam anu ye. ⁵Jõ tbis anu tawe, “Noo safo mana nmit kʼait retait oh! Tufrok ait ybam jemaat ranu reto! Tna nsan ait kabes! Nsan ait kabes yabi (Iblis) re kbe bo mkair mbtek mai kʼait. Soh yetsu rait ro masmamo marak to, kbe yamos rait mkai riof mam ati ro Tuhan yama.” ⁶Anu ja safuk nwe, “Amu raa ro nno bo moof.” He mfe. Anu nmo sre. ⌞Raa ro jemaat ranu sait yhau yno bo ro mkair fares, menohe anu sayõ rof sai! Nno feto ma!⌟ Anu nhar bofret refo fe mfefares a? Raa fret bo mawe: “Ragi kebet to, raa mno tepung to mase.”5:6 Mam bofret refo to, ragi mkyas iro.⁷Tufrok raa retait ybam jemaat ranu mnan fi raa ro Yahudi ja beak ragi wana wore ana makyõ Korat ro Paskah. Tufrok ait retait fooh re kbe anu to nhau noof. Tna kbe iro ro ait yno to mbet anu fee! Nnaut raa ro Yahudi: Korat ro Paskah to, ja ana ktan domba. Ana ktan domba to mno tibyo ana mkai riof. Menohe anu raa ro kro Kristus to bnaut bwe Kristus tait tiwya raa mame yajat. Kristus raa mame yajat tibyo riof ro mase mama kʼanu. ⁸Nma, anu simaut mnan mfi bo ja raa simaut wore wo ana makyõ korat reto. Tna nitsre kmo msya iro ro ja raa mno to. Beak iro makus mfi bo raa ro Yahudi ja beak roti ro raa mno mkah ragi to makus ye. Tna anu bmo raa ro ja srau makin fee. Bmo raa ro bhaf wanu to moof ati.

⁹Aam ro tiwya jõ tkom tiim kʼanu to tawe, “Anu to niranya nsya raa ro maus-as bo to ma.” ¹⁰Au oh mi jõ bhah anu tawe, “Niranya nsya raa ro kro Kristus tna ja maus-as bo to ma!” Raa ro wase Tuhan fares to mawat toni. Tna ana weto to ja soo oh maus-as bo, tna masmamo, besruf raa, tna smot kabes fares sai. Woyõ-woya anu raa ro ja kro Kristus nmo mam tabam refo to, raa ro mimara mboh to mhau mam wore weto ye. Kbe anu fri ana tna nkah bo nsya ana su fares. ¹¹Jõ tkom aam refo tiim kʼanu tawe, “Raa mawat mkyas mawe ana mamo raa ro kro Kristus oh. Menohe ana taro to maus-as bo fares, tna masmamo, tna smot kabes fares, tna mkyas-kas raa, tna bisir-basar, tna besruf raa. Raa weto oh mi jõ tawe wa kʼanu tawe, ‘Niranya nsya ana weto ma!’” Raa ro mkyas mawe ana raa ro kro Kristus menohe ja mno bo ro mkair to, tawe anu niranya nsya ana weto ma. Tna hre niit boit su nsya ana weto ma! ^12,13Jõ fi tase re tse srah kʼraa ro wase Tuhan to fee! Meen Allah yesait aran ymit safo mana kʼana weto. Menohe raa ro kro Kristus to, tbis anu tawe, “Raa ro jemaat ranu to anu nesait betoo srah wanu kʼanya!” Bokom ro Allah to mawe bau fefo yum oh:

“Nikyak raa ro mber safo to frok mbam jemaat ranu.”

Ulangan 13:5

Nkyas safo to, nno kaket

¹Anu raa ro Allah wAit to, nkyas safo to, nno kaket. Mfi anu sait yno safo mai kʼanu roto sait to, nmo no kʼraa ro wase Tuhan tna nwe ait hre susai to ma! Jõ tawe kʼanu tawe, “Anu saso raa ro Allah wAit sait re kbe ait hre susai tna ymat sas safo ranu reto.” ²Nnaut oh: Meen anu raa ro Allah wAit to meen bkyas safo raa ro tabam refo beta. Soh meen anu btai bkyas safo wana weto to, mfo refo anu besait btai hre susai bkyas bo sre maku ro raa wanu aro mno fea! Ja bo ro ana mno mkair to bo ro samyoh fee. ³Nnaut oh: Meen anu to btu safo ro malaikat aro mno to ye. Safo ro ja raa mno mam tabam refo to mase fee. Anu bhar bkyas safo weto saah. Bo samyoh fee! ⁴Jõ tawe kʼanu tawe, “Mfi bo raa wanu aro mno bo ro mkair to, anu nesait hre nkyas bo reto. Saso raa manes ro ja kro Kristusatau raa kinyah wanu ro ja kro Kristus sai. Ana mbewok ye mhar bo mnan si re kbe hre susai mtu srah ro raa wanu aro mno to.” ⁵Anu nsis nhar bo. Feto to anu nesait nisoh bo mkair ro anu aro nno to! Menohe ja anu nno feto fee. Tibyo jõ bhah anu, afo re anu hrenaut! ⁶Jõ tari he anu raa ro kro Kristus to, ja nmo no kʼraa ro wase Tuhan tna ait hre susai ykyas bo mkair ro anu nno. Jõ tari feto tna hawe. Anu nno bo fyi meto! ⁷Rau ro moof to, anu nisoh niranya fooh. Menohe anu mbrir-brar mam jemaat ranu fares. Bo ro anu nno reto to mkair. Rau ro moof to, mfi bo raa wanu mno bo mkair mai kʼanu tna besruf anu to, ska si to ma! Ana mno feto rof sai, tna anu kanyin sai. ⁸Menohe jõ tari he anu ja besruf anya tna nno bo mai kʼraa anya ro ja kro Kristus!

Nitsre bo knik-knak ro mkair ja anu nno fares

⁹Nnaut oh! Sioh anu ai to ma! Raa ro ja mno-na bo to, meen mamo mhau mam sawro ro Allah yamo Raja ybo to fee. Raa ro maus-as bo, msya raa ro smot kabes, msya raa ro mwyah, msya raa sme ro ja haberek mnan fnya tna soo bo maus, ¹⁰msya raa ro msyõf bo, msya raa ro masmamo, msya raa ro bisir-basar, msya raa ro mkyas-kas raa, tna msya raa ro besruf raa: Ana weto beta to, meen mamo mhau mam sawro ro Allah yamo Raja ybo to fee. ¹¹Tiwya anu baro nno bo mfi feto ye. Menohe Yesus yyon iro wanu oh. Tna yoo anu ysan kʼAllah re nno bo wAit sai. Tibyo Allah ymat anu tna yawe anu nfi raa ro mhaf moof ati sai. Tuhan Yesus Kristus yno feto mkah Har ro Allah matak rAu.

¹²Jõ tari he raa ro kro Kristus taro ksoh mno-na bo fares. Tna ana mkyas mawe, “Soh watum aro mawe wa bo ro tno reto fee; kbe tno bo bawya sai ro jõ ksoh!” Menohe nnaut nwe bombra taro to mafer marak. Watum ranu mkyas mawe bo aro mbau kʼanu fee. Feto to jõ saah tno bombra weto beta; menohe jõ hawe bo tno. Nno be bo ro mkair aro mbo jõ. ¹³Anu taro nwe, “Allah yfen anu bhaf wanu tna yno re anu biit bo. Tna yfen boit re kbe raa mait. Menohe anu bhaf wanu msya boit ro anu biit to, meen Allah yno sasyoh sai.” Anu saak-saak anu feto nwe, “Nno bo bawya ro anu ksoh sai.” Anu nwe fyi meto! Bokyas ranu reto mnan anya msya bokyas sre ro kro refo: “Tuhan yfen anu betsu wanu to re anu bus-as bo bsya fnya to saah.” He mfe! Tuhan yfen betsu wanu to re anu bno bo ro Ait ksoh. Tna Tuhan yatak ybo anu betsu wanu reto ye. ¹⁴Tna meen yno anu betsu wanu refo me mrok masen. Yno mkah yatak rAit mnan fi tiwya Ait yno Tuhan Yesus ye yrok yasen to. ¹⁵Nnaut oh: Anu netsu wanu to Kristus yetsu rAit jaro oh meto. Anu aro nkah netsu ro Kristus rAit reto to, njin nsya fnya ro ja mwyah to ma! ¹⁶Nnaut oh: Raa sait ysya fnya ro ja mwyah sau mjin su to, mbewok mrat mkah kwiyan sau. Bokom ro Allah mawe fefo:

“Raa ro yjin ysya fnya to, mbewok mrat mkah kwiyan sau.”

Kejadian 2:24

¹⁷Awya ro yrat ysya Tuhan to, kbe Har ro Tuhan to mrat msya raa retait matak tu oh. ¹⁸Feto oh mi jõ tawe kʼanu tawe, “Bitsre wyah to mbeak fari!” Iro roto taro to ja mno raa metsu wana mesait ai mkair to fee. Menohe raa ro yaus-as bo to, yno iro ro sikowah yetsu rait yesait ai oh meto. ¹⁹Sorni bo refo to ma: Anu netsu ranu to amah. Tna Har ro Tuhan ja mjin mam amah weto. Har ro Tuhan mhau mam anu nhaf mato wanu. Tibyo anu netsu ranu to, bo ranu nesait aran nbo to fee. ²⁰Anu fo Allah bain mhai oh mkah mabyoh ro msai. Anu fo raa ro bi Ait rAit. Feto to anu nkah netsu nhaf wanu to nno bo ro moof afo re raa mmat tna bibi Allah.

Paulus ykyas raa ro msya anya

¹Riwai anu nkom aam tiim kʼjõ tna ntu bo kʼjõ nwe, “Paulus; nyõ nkyas watum kʼamu tna betoo nawe soh amu, raa ro kro Kristus nwe nmen fnya to fyi?” Tna jõ tawe kʼanu tawe, “Soh raa yawe yhau semana sai bait feto to moof. ²He raa mawat mhau muut bo maus fee. Tibyo ana maus-as bo sai. Rau ro moof to fefo: Fai sau to msya raa sait tna bi sait ymen fai sau; tna kbe ana mbewok to mhau su.” ³Raa sme ysya yfain to ana mbewok mjin su soo oh. Soh anu sait ksoh yjin su ysya yfain to, kbe fai au miwana maa ma. Tna soh anu sau ksoh njin su nsya naa to, kbe ait yiwana anu ma ye. ⁴Nno be fai sau mkyas kʼmaa mawe, “Jõ tetsu ajõ fo bo ajõ kar!” Raa ro au msya to, au metsu rau to bo rait oh. Tna nno be raa sme sait ykyas kʼyfain yawe, “Jõ tetsu ajõ fo bo ajõ kar!” Fnya ro ait yoo to, ait yetsu rait to bo rau oh. ⁵Anu nwe wa kʼanya ma. Anu mbewok njin hayah to ma. Anu mbewok ja nsya anya njin su oh. Menohe soh anu mbewok nnaut nwe njin hayah ti baro re anu skabuk Tuhan to, anu mbewok hre su nkyas wia, tna anu njin hayah ti baro. Njin hayah ti baro feto tna anu mbewok hah ne nsya anya u. Nno feto afo re anu mbewok srau oot-oot toni to ma. Tna kbe kabes yabi (Iblis) yiwro anu re anu nus-as bo to ma. ⁶Bo ro riwai jõ tkyas weto to, tawe tbis kʼanu fee. Tkyas watum ajõ sai. ⁷Tnaut tawe rau ro moof to, raa mhau semana mfi jõ fefo sai. Menohe raa sait-sait fri bo mbam Allah to aro rait hayah-hayah. Taro to mawe moo fnya, taro to mawe ana moo fnya fee.

⁸Tna jõ tkyas watum kʼraa ro moo fnya fefares to, tna kʼfnya ro msya raa fefares ye, tna kʼsemit to ye tawe, “Rau ro moof to, anu to nhau kar nfi jõ. ⁹Soh anu aro nuut fee to, anu nsya anya rof. Soh mfe to, kbe anu srau oot-oot tibyo anu mbtek mam iro.”

¹⁰Tna jõ tbis fnya ro msya raa oh to tawe, “Tuhan ysi bo kʼanu yawe, ‘Anu aro to sikba naa tna nhau hayah to ma!’ ¹¹Soh fnya sau sikba maa mamo to, au me mamo msya raa roto to ma. Mfi bo au mesait hawe mhau kar to, au hah me u msya raa rau riwai sai.” Tna tbis raa sme ro yoo fnya oh to, tawe, “Anu aro hawe fnya wanu tna nbis frok to ma!”

¹²Tna jõ tkyas watum ajõ kʼanu taro to tawe, “Mfi bo anu, raa ro kro Kristus sait, tiwya noo fnya ro kro Kristus fee, tna soh au reto mawe mhau msya nyõ matak to; kbe nyõ nbis au frok to ma!” (Watum riwai reto mbam kʼjõ sai, Tuhan ybis fee.) ¹³Tna mfi bo anu fnya ro kro Kristus aro tiwya nsya raa ro kro Kristus fee, tna soh ait retait yawe yhau su ysya nyõ to tawe kʼnyõ tawe, “Nyõ nako ait yakus ma!” ¹⁴Soh raa ro kro Kristus fee yoo fnya ro ja kro Kristus oh, au misti Allah yno bo ro moof kʼau maa ye. Tna soh fai ro kro Kristus fee msya maa ro kro Kristus oh, ait yisti Allah yno bo moof kʼait yfain ye. Ana mno feto tna ku wana ro tiwya mkair to, Allah yno bo ro moof baro kʼana ye.

^15,16Fyi rau re anu fnya ro kro Kristus nhar raa ro anu nsya to, kbe ykai riof ro mase ye fe mfe a? Tna ro sme to, fyi rau re anu nhar fai ro noo to, kbe mkai riof ro mase ye fe mfe a? Menohe Allah yawe anu, raa ro kro Kristus to siko nhau nsya raa tna niranya sai. Feto to mfi bo fai ro kro Kristus fee sau mako maa ro kro Kristus tna mawe sikba ait to anu nbe au to ma. Tna mfi bo raa ro kro Kristus fee sait yako yfain ro kro Kristus to yawe sikba fai au to anu nbe ait to ma.

¹⁷Tiwya Tuhan saim tna yno re anu raa fo aro bno bombra wanu to aro rau-rau. ⌞Raa taro mamo bobot tna Tuhan yno re raa taro mamo awe. Tna Tuhan yno re raa taro mhau semana bana tna taro to yawe moo fnya.⌟ Tna mfo refo Allah ymen anu nmo raa ro kro Kristus oh. Tna jõ tawe kʼanu tawe, “Anu aro yhau yno bombra rait mnan si bo bawya ro tiwya Allah ysan kʼait yno. Ybo yno renti.” Bo refo ja jõ tkyas mam jemaat aro-aro beta. ¹⁸Soh anu aro raa ro Yahudi tna tiwya raa sunat anu oh to, tna fo Allah ymen anu nmo kro Kristus to; mbau a, anu netsu ranu mhau feto oh. Tna soh anu aro to, raa sunat fefares to, tna fo Allah ymen ait yamo kro Kristus to, anu saso raa sunat ait to ma. ¹⁹Raa mana taro to, bo mafa rana to ja raa sunat ku sme wana. Tna raa mana taro to ja sunat ku sme rana to fee. Bo mafa raa mana taro ja mno feto to bo ro ati fee. Rau ro ati to anu nri bo ro Allah ybis kʼanu tna nbo nno. ²⁰Rau ro moof to, anu aro nhau nkah bo wanu mnan mfi bo bawya ro tiwya tinyi rau anu nno wia wore wo Allah ymen anu nma kro Kristus.

Bobot ysya sryan to Allah ymat ana mbewok yawe, “Ana mbewok mnan anya sai.”

²¹Anu taro to, ati ro anu nma kro Kristus to, nmo sryan boh wia oh. Sraujin bo reto ma. Nhau nno bo ro bobot wanu mbis to renti. Menohe mfi bobot yawe bitsre anu sait yawe, “Frok namo nno bonyõ sai.” Feto moof toni, nyõ snok oh! ²²Tna jõ tawe kʼanu ro ja nmo sryan ro bobot fares to tawe, “Simaut oh! Nnaut nwe ati ro Tuhan ymen anu nmo kro Ait to, Tuhan yno tibyo anu nmo sryan ro ja kabes mbo to u fee!” Tna jõ tawe kʼanu raa ro bobot tawe, “Anu nmo kro Kristus to, anu nmo sryan rAit!” ²³Allah fi bain anu mhai oh. Ait bain anu mkah mabyoh ro msai oh. Mfo refo Allah ybo anu. Feto to nri Ait abyõ raa ro tabam refo. ²⁴Tao, tano na; tiwya tinye wore wo Ait ytu anu nmo kro Kristus fefares to, anu aro sait-sait ykah bo hayah-hayah ye. Tna mfo refo anu kro Kristus. Rau ro moof to, bo ro tiwya anu nkah to, nhau nkah renti sai.

²⁵Tna fo jõ tkyas raa sme msya fnya ro msya anya fefares to baro kʼanu: Bo ro anu ntu reto to, jõ tari bokyas mbam Tuhan fefares. Bo ro jõ tkyas fo mbam kʼjõ sai. (Tuhan yatmof jõ yno re jõ thar bo. Feto to nri bonaut ajõ fo:) ²⁶Mfo refo to wer ro mkair toni mam kota ranu. Feto to jõ tkyas watum refo tawe, “Nhau nfi ja anu nhau to fares: ²⁷Anu ro nmen fnya oh to, nhau nsya fnya wanu fares. Hawe fnya wanu ma. Tna nbis au frok mamo mhau hayah to ma. Tna anu ro nmen fnya fefares to, saso fnya noo fooh to ma.” ²⁸Ana ro msya anya oh to ja masom bo ro samyoh mam tabam refo. Tna jõ hawe bo anu nsom bo ro samyoh. Au oh mi jõ tkyas watum ro riwai reto kʼanu. Raa ro mmen fnya oh to, bo ro ana mno reto to, mkair fee. Tna fnya ro msya raa oh to, bo ro ana mno reto mkair ye fee ye.

²⁹Tao, tano na; ayõ aro u fee oh. Mfo refo anu ro tiwya noo fnya oh to, tawe anu to nhau nnan mfi bo anu noo fnya fefares. ³⁰Tna anu ro sraujin tna nwia to, nnaut nwe, “Ayõ aro u fee re kbe jõ hre tawia sai.” Tna anu ro simaut to, nnaut nwe, “Ayõ aro u fee re jõ hre tasah sai.” Tna anu ro nse bo mawat to, nnaut nwe, “Bo wojõ wefo to, kbe mhau kʼjõ kait fee.” ³¹Tna anu ro nkah bo to, nnaut bo ro anu ja nno mam tabam refo toni to ma. Nno be kbe bo ro tabam refo mbo anu matak. Bo ro anu bmat mam tabam refo fo kbe msat marak beta. ³²Jõ hawe anu sui toni nno bo ro tabam refo. Raa ro ymen fnya fefares to, kbe ait ynaut bo ro Tuhan sai. Yhau rero yno bo ro Allah ksoh. ³³Menohe raa ro yoo fnya to, srau rait ynaut bo ro tabam, yhau yno bo ro yfain ksoh. ³⁴Kbe ait srau ewok. Mnan feto ye, fnya ro msya raa fefares to rero mno bo ro Tuhan ksoh sai: Au mhau rero ti wawa mnaut Tuhan tna mno bo ro Tuhan ksoh. Ro msya raa oh, ja sui mno bo ro maa ksoh. ³⁵Jõ tkom bo ro riwai reto tawe tifah anu fee. Tkom afo re anu nhau noof, tna nhafri Tuhan to kaket, srau ewok fee.

³⁶Tna mfi bo raa sait ykir fnya sau, tna ait yhau yut mkah bo yaus fee, ro moof to, ait yoo au. Ait yoo au to iro meto fee. ³⁷Tna mfi bo raa sait kaket ait tna ksoh yhau bait semana sai, bonaut rait reto to moof ye. Ait yoo fnya reto ma. ³⁸Feto ait sait ro yoo fnya to yno bo moof. Tna raa ro yoo fnya fee; ait yno bo moof toni.

³⁹Tna jõ tawe kʼfnya ro msya raa oh to tawe, “Nhau nrat nsya raa wanu oh.” Tna soh meen maa yhai to, au mhau mrero me msya raa rouu ro ja kro Kristus ye; reto to au ksoh rau sai. Au me msya raa ro kro Kristus fee to ma. ⁴⁰Menohe tkyas watum refo kʼfai ro maa yhai oh to, tawe, “Soh anu ne nsya raa rouu fee; kbe anu nhau moof sai banu.” Tna tnaut tawe watum ro jõ tkom kʼanu refo to mbam Har ro Allah.

Kak ro raa moo msan kʼberhala

¹Tna fyio jõ tkyas kak ro ja raa moo msan kʼberhala8:1 Berhala to bo ro raa mfen tna mse mkah smot mfi Allah. Wore weto to, raa ktan kak tna moo msan kʼberhala soh mfe kabes aro. Tna raa baro ja moo kak reto masim mam pasar to, pitis mabyoh mroh. Tna raa Kristen ro mhau mam Korintus mtu kʼPaulus mawe, “Fyi, kak reto mbau kʼamu fe mfe a? Kbe amu nbo fe mfe a? wia. Tkyas bo reto baro kʼanu: Anu beta to raa ro nhar bo oh. Tna jõ tawe kʼanu tawe: “Kaket anu; re kbe bo ro anu nhar reto mno re anu safuk anu ai to ma.” Raa taro to safuk ana ai mawe ana mhar bo toni. Bohar ro ja ana safuk reto to, ja tubat raa taro to fee. Nnaut nwe: Anu natmof raa anya to bo ro ati. Iso reto oh mi anu tubat raa anya to. ²Mfi bo raa sait tait safuk tna ynaut yawe, “Jõ fi thar bo.” Ait retait yhar bo ro ati fefares. ³Raa ro ja hafri Allah to, ana weto oh mi raa ro Allah yhar.

⁴Kbe anu, raa ro kro Kristus nbo kak ro raa riwai moo msan kʼberhala wia to fe mfe a? Berhala ro raa mfen to, anu bhar bwe berhala weto to Allah meto fee. Allah yesait aran yum. Allah roto aro magin fee. ⁵Raa taro smot bombra aro rau-rau ro mhau mam tabam refo tna mam ayoh ye. Bombra ro ja raa smot msya kabes aro ro mbo raa to msis. Tna raa taro mari kabes weto mnan fi ’tuhan’ rana. ⁶Menohe anu bhar bwe Bja ranu Allah tait yesait aran yase tna yatak yum. Tiwya Ait yfen bombra beta. Tna anu bhau mam tabam refo mkah bo bbaut Ait. Tna anu bhar bwe Yesus Kristus yesait aran tait Tuhan ro ybo anu. Yesus yesait yfen bombra beta mkah Allah yatak rAit. Tna Yesus yatak rAit reto oh mi mno re anu bhau baam mam tabam refo fo.

⁷Menohe bo reto to, raa taro to wase fares. Tiwya ana weto mamo kro Kristus fefares to, ana smot berhala weto ye. Tna ana weto mnaut mawe kak ro raa moo msan kʼberhala to mbau. Ana mnaut feto fares. Tna mfi bo ana weto mnaut mamo-me fares menohe mberoh mabo kak reto to, ana mnaut mawe ana mno iro meto. ⁸Boit aro ja misoh iranya ranu bsya Allah to fee. Tna boit aro ja mno re iranya ranu bsya Allah to mkair fee ye. Tna mfi bo anu bhau biit boit aro to, bo ro bno feto to misoh iranya ranu bsya Allah to fee ye.

⁹Anu fo boo bo bawya-bawa biit sai saah. Menohe raa taro to, ana mnaut mamo-me fares. Feto to kaket anu afo re bo ro anu ksoh bno to mno re raa taro mbtek mam iro fee. Bo reto to, bo ro ati. ¹⁰Anu weto, taro smot Yesus kaket matak oh. Tna taro nhaf smot Ait matak fefares. Mfi bo anu taro ro nhar bo to nmo twok mam samu ro berhala sau tna hre niit bo to, tna raa sait yamo twok to, kbe fyi? Mfi bo ait ro yama retait ynaut mamo-me fares tna ymat bo ro anu nno to, kbe ait yait boit reto ye. ¹¹Kaket anu! Soh raa ro yhaf rait smot Yesus matak fefares ymat he nyõ nait bo reto to, bo ro nyõ nhar tna nno reto kbe tko ait retait tibyo ait ynaut yawe yno iro. Nno be anu sait yisti meto. Kristus Ait tiwya yajat afo re ana weto mkai riof ye. ¹²Anu ja biit bo bawya-bawa sai saah. Tna raa taro mamo kro Kristus oh menohe ana mnaut boit ro mait mamo me fares. Mfi bo anu sait to beroh yait bo bawya sai wore raa ro ynaut mamo-me fares to hre ye, fyi? Nyõ ntko ait re yno bo ro ait ynaut yawe mkair to, nyõ nesait nno iro meto. Nyõ nno iro mai kʼait retait. Tna nyõ nno iro mai Kristus ye oh meto. ¹³Feto to jõ hawe bo tko raa ro kro Kristus yabo kak ro ait ynaut yawe mbau to. Nno be jõ tisti re ait yno iro. Mfi bo tafoh ajõ sait waa yabo kak ro raa msan kʼberhala wia to, kbe jõ tabo kak u fee saut.

Paulus saak ait yawe ait tait raabis ro Allah tu oh

^1,2Raa taro msi mawe jõ kro tno bo mafa rana. Menohe bo mafa wana weto mbo jõ matak fee. Jõ fi raa ro ana mbis fee. Jõ fi raabis (rasul) ro Tuhan rAit. Tiwya jõ tmat Yesus to mkah tasu ajõ. Tna ati ro jõ tama tkyas Bokyas ro Yesus kʼanu mnan fi Tuhan ybis to anu haberek tna nmo kro Kristus. Feto to anu nhar nwe jõ fi raabis ro Tuhan tu oh. Menohe raa taro mkyas mawe jõ fi raabis ro Tuhan fee. ³Raa taro hafrah jõ. Feto to jõ tkyas bokyas refo tawe saak wa jõ:

⁴Jõ tsya Barnabas, amu mbewok fo raabis ro Tuhan. Feto to rau ro moof to, anu noo boit nee kʼamu niit sai. ⁵Tna raabis ro Tuhan roto taro ksoh mmen fnya to, tna wore wo ana mamo to, au nkro su msya ana ye saah. Raabis taro to mno feto. Tna Yesus yao na ro tis taro ja mno mfi feto ye. Tna Kefas-Petrus tait yno mfi feto ye. ⁶Raabis taro to ja ana mkah armato wana u fee. Ana msui mkyas watum. Tna raa mawe moof meto. Menohe jõ tsya Barnabas to, ja anu nisoh nmat amu kaket fee. Tibyo amu mbewok nesait saso boit wamu ro niit to kar sai.

⁷Ja raa sbe ro mamo mafa msya raa mana roto taro to, aban mana ro ybis ana mamo to, kbe ait yoo boren yaren ana fea! Tna mfi bo raa sait yyum anggur mara mam armato rait to, meen anggur mara reto make to, kbe bi ait yait anggur make reto taro fea! Tna raa ro ja yhau kmot domba to, ait ksoh rait yoo sis maya ro domba weto yata sai! ⁸Bo mafa weto to, ja raa mno. Tna Watum ro mbam Allah mkyas mnan anya msya bo mafa weto ye. ⁹Watum ro tiwya Musa yoo ybam Allah reto to, mawe rau ro moof to, raa yisoh ymat sapi wait ro mkah bo msya ait to ye:9:9 Wore weto ati ro raa sait mbajak tabam mam komabah to, ait yesait yabah tabam fee, ja sapi rait mno bo mfi kerbau to mkuk bajak.

“Ati ro sapi mkah bo su msya anu mam armato ranu kri-kri to, anu nke sapi reto masoh to ma. Feto to anu mbitsre sapi reto mabat gandum baro sai.”

Ulangan 25:4

Allah ykyas sapi mam Watum rAit mkah bawya? Watum rAit to Ait yoo yee mkah yisoh anu raa fea! ¹⁰Allah ykyas bo ro sapi reto yawe, “Sapi mnan anu raa fyi?” Ja soh raa mkah bo mam armato to, ana minaut mawe meen ana moo make rau tna mait: Ait ro yabah tabam reto ye, ait ro tusnok pasa mbam padi rau ye, tna sapi ro mkah bo su msya raa mam armato reto ye, beta minaut mawe meen ana moo make baro tna mait. Watum riwai reto mkyas anu, raabis wAit ye.

¹¹Ati ro Barnabas ysya jõ nkyas watum kʼanu to, mnan fi bo amu nso naf. Tna anu fo mnan fi armato. Ja soh raa ykah bo mam tabam refo to, ait yinaut yawe meen ait yoo bo ro ait ynaut re yhau mam tabam refo ye. Ynaut boit ro yait, ratan ro yyum, msya samu ro yjin bo to. Bo ro Barnabas ysya jõ nkah to armato ro Allah. Rau ro moof to, anu beta noo bo ro amu mbewok nnaut mam tabam refo to, nsaim kʼamu riryõn. ¹²Raa roto mama mkyas Kristus yasom kʼanu tna ja anu nmat ana tna noo boit ro mait nee kʼana ye. Rau ro moof to, anu nmat amu mbewok mnan ana ye. Menohe ja amu mbewok nyoh boit ro niit mbam kʼanu beta fee. Tuhan yawe amu mbewok nyoh feto, menohe amu hawe. Amu nnaut nwe, “Mfi bo amu mbewok nyoh boit ro niit to, kbe anu hawe nri bokyas ro amu nkyas.” Feto to tiwya amu mbewok nma nkyas Bokyas ro Kristus kʼanu to, amu nyoh bo aro kʼanu fee. Boit ro amu niit to mnan fee. Menohe amu kanyin sai. Amu mbewok nnaut nwe, “Nno be ana hawe bo mari bokyas ro amu nkyas.” ¹³Nnaut nwe: Ati raa ro agama Yahudi mawe msan bo kʼAllah to, ana moo bo sohmaam makah mamoʼt samu ro Allah msan bo reto. Tna Allah ybis imam moo bo reto baro kʼana mkah bo kbe ana mesait sohmaam ye. Tna ati ro raa Yahudi moo domba msya, sapi bo to mawe msan kʼAllah to, ja imam ktan tna yoo haber jaro yse mam wohat ro Allah rAit (mezbah) tna yoo jaro kʼait yesait yabo. Yno bo reto mnan fi bi Ait ybis oh.9:13 Imamat 7:28-36; Ulangan 18:1.¹⁴Feto ye Allah ybis yawe raa ro mkyas Bokyas ro Yesus to, kbe ana moo bo ro mait mbam raa ro mari bokyas rana reto.

¹⁵Allah yawe amu, raa ro ja nkyas bokyas rAit to, noo bo ro niit mbam raa ro mari bokyas ramu. Menohe jõ hawe tno bo reto. Tna jõ tkom aam refo tayoh bo kʼanu fee. Feto jõ thai sai rof. Jõ safuk tawe, “Allah ybis raa mawsse ana moo bo mee kʼjõ, menohe jõ tawe, ‘Mbau a, jõ hawe bo raa moo bo mee kʼjõ.’” ¹⁶Allah ysi bo kʼjõ yawe jõ tamo tkyas Bokyas ro Yesus reto. Tibyo jõ tari tna tno sai. Feto jõ tyok-yok jõ fee. Soh jõ tkyas Bokyas ro Yesus reto to fee, kbe ayoh mroh kʼjõ! ¹⁷Mfi bo jõ ksoh ajõ tamo tkyas Bokyas reto maami raa moo bo maren jõ saah. He mfe! Jõ tfi sryan ro Allah ybis sai tibyo tamo tkyas Bokyas reto kʼraa. Ja raa moo boren maren sryan wana to fee.

Jõ hawe bo raa moo boren maren jõ

¹⁸Riwai jõ betoo tawe Allah ybis yawe raa moo bo mee kʼjõ soh jõ ksoh. Menohe jõ hawe bo raa maren jõ.9:18 1 Korintus 9:25-26. Feto to raa moo boit msya pitis bo to maren jõ fee. Menohe tkyas Bokyas ro Kristus kʼraa tna raa moo pitis mee kʼjõ aro fee. Tna jõ thaf mnan meto. Jõ tayoh boren aro fee.

¹⁹Raa aro moo pitis maren jõ fee. Tna raa mfot jõ mbis jõ tamo sryan rana to fee. Jõ ksoh raa mawat mari tna mbo bokyas ajõ reto, tibyo tamo tkyas Yesus yasom kʼraa to. bo mafa raa make jõ matak fee. Menohe jõ thaf reo kro bo mafa ranu weto afo re anu nri tna nbo bokyas ajõ reto. Jõ ksoh ajõ sai tamo tnan sryan raa beta. ²⁰Jõ tamo tkyas Yesus yasom kʼraa mam wore woyõ-woya to, bo mafa rana to hayah-hayah. Ati ro jõ tkyas Yesus yasom kʼraa mana ro Yahudi to jõ tno bo mnan fi raa ro Yahudi ja mno to ye. Tno feto afo re kbe ana weto ksoh mari bokyas ajõ mhaf reo. Mari tibyo ana mawat mawe ana smot tna kro Yesus. Tna ati ro jõ tkyas kʼraa ro ja matak mari Watum ro Musa yoo mbam Allah to, jõ tari kro Watum reto ye. Tno feto afo re kbe ana weto mari bokyas ajõ tibyo ana mawat mawe smot tna kro Yesus ye. (Menohe ati ro jõ tesait thau kar to, trero tari Watum ro Musa reto fee.) ²¹Tna ati ro jõ tkyas Yesus yasom kʼraa ro wase Watum ro Musa reto to, jõ tnan ana weto ye. (Menohe jõ tari tna tno bo ro Allah ysya Kristus mbis kʼjõ matak to fares.) Tno feto re kbe raa msis ksoh mari bokyas ajõ tibyo smot tna kro Yesus ye. ²²Tna ati ro jõ tkyas Yesus yasom kʼraa ro mhaf wana mamo-me fares to, jõ kaket jõ afo re jõ tno bo ro ja ana mhar mno mkah mhaf ro moof sai. Tno feto afo re kbe ana mari bokyas ajõ tibyo smot tna kro Yesus ye. Jõ tamo tkyas Yesus yasom kʼraa mam wore woyõ-woya to, ja jõ kro bo mafa wana ye. Tno feto afo re ana taro mari bokyas ajõ tibyo smot tna kro Yesus ye. ²³Jõ tawe tno bo reto beta afo re raa mari Bokyas ro Kristus. Tno feto tna anu beta bkai bo ro moof mbam Bokyas reto.

²⁴Mfi bo raa baro santri anya mhoh to, ana beta mhoh mamoʼt makit rau to. Menohe sait aran ro snok wia tinyi to, kbe yoo bouum ro raa siwyan muum kʼait. Tna tawe kʼanu tawe, “Anu nmo nhoh iso ro Kristus rAit to, nhoh kaket oh! Re kbe anu nkai bouum ro Tuhan siwyan yum kʼanu feto ye.” ²⁵Anu nhau nno bo ro Kristus ybis kʼanu to siko nno kaket. Sanet anu nesait nfi raa ro santri anya yhoh ja sanet yetsu rait yesait: Rabu wawa ait yhoh tna yait boit ro moof yawe yno ait yetsu rait mrok matak. Ait yno bo feto tna yinaut yawe yoo bouum ro kbe raa moo mee kʼait. Bouum reto to mhau kait fee.9:25 Wore weto raa sait ro yno bo moof miwer to, ait yoo watau sau ro raa makoh mbam bosafom bo feto. Bouum reto hroyoh fooh sai. Menohe bouum ro anu, raa ro kro Kristus kbe boo to, meen mhau mawyõs. ²⁶Feto to jõ thoh-hah fee. Jõ hamer thoh tamo iso ro Kristus rAit to kaket. Tna raa ro petinju ja yhar yai raa kaket, yai sre fee. Feto ye jõ thau tno bo ro Kristus ybis jõ to tomer tno kaket ye. ²⁷Jõ kaket jõ tna thoh thoh thai afo re jõ tetsu ajõ matak. Jõ fi ja tkyas kʼraa roto tna terif iso ro Kristus kʼana. Nno be jõ tesait tamo sre-sre tibyo meen Kristus yoo boren yaren jõ fee!

Nnaut iro ro raa Yahudi tii mno

¹Taja, tme, tao, tano na; sorni bo ro hohos wanu tiwya mno to ma: Raa mana ro Yahudi weto beta tiwya frok mbam tabam ro Mesir. Ana frok mbam Mesir to, raja ro ybo Mesir to saka ana. Menohe Allah yno iso re ana frit aya sawan ro masom ’Laut Merah’ tna mkai riof. Tna Allah yhau mam barmabyõ sau ro sbyah ana wa. ²Tiwya hohos wanu weto beta kro Musa tibyo raa mawe barmabyõ reto msya aya sawan reto ’baptis’ ana.10:2 Musa yerif iso kʼana re ana mkai riof to, fret bo mawe kbe meen Yesus yama tna yerif iso kʼanu re anu bkai riof. Nmat Kisah 3:22; Roma 6:4-11; Ibrani 3:2-6.³Tna Allah yno bo ro msai: Ait yoo boit yee kʼana mait mam iso. Tna ana beta mait boit reto ro masom manna.⁴Tna Allah yno bo msai re aya snok mbam fraa sau. Tna ana beta mata aya reto. Fraa reto fret bo mawe Kristus. Tiwya Ait yatam ana yamo.10:4 Far-far refo fret bo mawe Kristus tait yno re raa mhau maam.⁵Raa magin reto to, beta mmat bo ro hnah weto ro Allah yno. Menohe ana beta mno Allah yhaf rAit to mnan fee. Tibyo ana mawat mhai akus mam yuk ro riamo reto.

⁶Tna bokyas reto raa mkom afo re anu bmat tna bhar tna bisoh anu kaket. Nno be anu bno bo ro mnan fi hohos wanu weto tii mno to ma. Ana weto masmamo tna saso bo ro mkair-kar. ⁷Tna ana taro mbaut berhala. Kaket anu re anu aro nbaut berhala nnan ana ma! Bokom ro Allah mawe,

“Raa ro Israel sohmaam bo tna ana smar simaut tna mbaut berhala ro ana mfen.”

Keluaran 32:6

⁸Nus-as bo nnan fi ana taro to ma. Bokom ro Allah mawe,

“Raa ro Israel mabo 23.000 mno bo ro feto tibyo mhai mam ayõ sau.”

Bilangan 25:1-18

⁹Sanet Tuhan ranu ma, mnan fi ana taro tiwya mno. Ana taro sanet Tuhan tibyo Ait ybis aban mafit ana weto majat.10:9 Bilangan 21:5-6.¹⁰Kmo Allah tna nmai wer mnan fi ana taro to ma. Tiwya ana weto baro mno mai mawe, “Anu bhau mam yuk ro riamo mam befo to, tna boit ro moof aro fee!” Tibyo malaikat sau mama mame ana weto majat.10:10 Bilangan 16:41-49.

¹¹Bo weto mbtek mai kʼana afo re anu bmat tna bisoh anu kaket. Anu bmat bokom ro Allah reto tna bnaut kaket re kbe anu bno bo mnan fi ana tiwya mno to ma. Anu mfo bhau mam ti sboh rau oh mefo. ¹²Raa ro yawe, “Jõ fi smot Yesus matak. Jõ ja tno iro fee saut!” Rau ro moof to, ait retait yisoh ait yno kaket re kbe ait ytek mam iro to ma. ¹³Ati ro bo aro mama sanet anu re anu kene wo mbtek nno iro to, nnaut oh: Bo weto mama sanet raa beta. Allah kbe yerif iso kʼanu frok nmo re kbe anu nno iro fee. Tna Ait yhar anu ntak wanu to mamo snok woyõ. Ait yno wa re bo weto tko anu toni to ma. Bo ro Allah yawe yno to, kbe ybo yno tu oh.

Raa ro wase Allah to, nmo sohmaam korat wana to ma

¹⁴Feto to noo berhala msya bombra ro tabam refo tiwya anu smot to, mbeak fari. ¹⁵Anu to nnan raa ro srau manes oh. Anu nesait nnaut nwe bo ro jõ tkyas refo mabo fe mfe a: ¹⁶Anu, raa ro kro Kristus ja bkyõ Korat ro Biit Roti Su. Tna anu byoh asik mase kʼAllah tna bta anggur maya baro.10:16 Raa ro Korintus taro to raa ro Yahudi. Tna ati ro ana makyõ korat rana ro masom Paskah to, ja mata anggur maya ye. Ana mata anggur maya reto mawe, “Anu bta anggur maya refo fo mayoh asik mase kʼAllah.” Feto ye Paulus yawe anggur maya ro ja anu raa ro Kristen bta to, ja anu bnaut Yesus, mees rAit tna byoh asik mase kʼAllah ye. Anu bta anggur maya reto to, tna bhaf sau, srau sau bnaut Yesus mees rAit, ati ro raa mame yajat. Tna roti ro anu biit reto to, fret bo mawe Yesus tait kwiyan rAit oh meto. Anu sohmaam korat reto to, anu bhaf sau su bnaut Yesus ati ro raa mame yajat. ¹⁷Roti reto to, sau aran tna anu sait-sait beta biit roti reto su. Anu bhaf sau, srau sau, bonaut sau feto to, anu beta to betsu ranu sau aran. ¹⁸Nnaut raa mana ro Israel: Ana moo domba, sapi, msya boit bo to, makah msan kʼAllah mam wohat (mezbah)10:18 Bokom ro Musa mkyas iso hayah-hayah ja raa moo bo msan kʼAllah. (Nmat Imamat pasal 1-7.) Wore weto raa mno: Korban Penebus Salah to hayah, tna Korban Bakaran hayah, tna Korban Sajian, Korban Penghapus Dosa, msya Korban Keselamatan to hayah ye. Bosan taro to, imam mko abyõ mam wohat ro Allah. Far-far 18 refo mkyas Korban Keselamatan. Korban Keselamatan refo mno iranya raa weto msya Allah to moof. Bosan reto haber taro imam mko abyõ mam wohat ro Allah tna haber taro to imam moo mkah ana mesait sohmaam, tna haber roto taro raa weto mesait moo tna hre sohmaam su. ro mhau mam Samu ro Allah. Ana moo bo weto msan kʼAllah mnan si iso ro bi Ait ybis oh. Tna Allah yawe ana weto moo bo reto baro kʼana mesait mabo ye. Ana mhaf sau su msya anya tna msya Allah to, mbaut bi Ait meto.

¹⁹Tna jõ tkyas kak msya bombra ja raa moo msan kʼberhala: Raa taro smot berhala sor mnan fi allah wana. Menohe berhala weto to ara, atau fraa bo to sai. Tna bosan ro raa msan weto to kak msya bo ro sei sai, bo ro mbau fee. ²⁰Bo weto to, ana msan kʼAllah fee. Ana weto wase Allah. Bo ro ana msan weto to, ana msan kabes sor. Ana miranya msya kabes aro rau-rau oh meto. Tna jõ hawe anu aro niranya nsya kabes. Feto to, jõ tawe kʼanu tawe, “Anu nsya ana hre su tna nbo kak ro ana msan kabes to ma! Mfi bo anu nno bo feto to, anu niranya nsya kabes ye meto.” ²¹Anu nkyõ Korat ro Niit Roti Su to mkah bo niranya nsya Allah. Anu ja nta anggur maya tna niit roti mkah bo nnaut Tuhan. Nkyõ korat ro kabes tna niranya nsya kabes ye to ma! ²²Kbe Tuhan yawe, “Anu kro Jõ oh! Anu kro jõ tna kabes mnan anya to fee saut ye!” Bo msai meto! Tuhan tait yatak yiwer, kbe Ait kmo anu!

²³Raa ro kro Kristus taro to ksoh mno-na bo fares. Tna ana mkyas mawe, “Soh watum aro mawe wa bo ro tno reto fee; kbe tno bo bawya sai ro jõ ksoh!” Menohe jõ tawe kʼanu tawe, “Bombra taro merif mafer aro fee, tna bombra taro tubat raa anya to fee.” ²⁴Saso bo ro moof mkah netsu wanu nesait sai to ma. Rau ro moof to, anu nno bo ro moof mkah raa anya beta.

^25,26Bokom ro Allah mawe:

“Tabam refo msya bombra beta to bo ro Tuhan wAit.”

Mazmur 24:1

Feto to, ati ro anu nmoʼt pasar nwe noo kak to, ntu bo kʼraa ro masim kak wia to ma. Nwe, “Kak refo riwai raa msan kʼberhala10:25,26 Imamat 7:28-36; Ulangan 18:1. to fe mfe a?” to ma. Noo kak bawya ro anu nksoh noo sai. Noo mkah nhaf ro moof sai.

²⁷Mfi bo raa sait ro kro Kristus fee to ymen anu yawe, “Nma biit boit su mam amah ajõ.” Nmo oh tna niit mkah nhaf ro moof. Niit bo bawya ro ait saruk yse kʼanu niit. Ntu nwe “Boit refo riwai raa msan kʼberhala to fe mfe a?” to ma. ²⁸Menohe mfi bo anu hre su niit boit tna raa sait yawe kʼanu yawe, “Boit refo riwai raa msan kʼberhala wia oh.” Yawe feto anu nhar nwe raa retait yhaf rait yawe wa. Feto niit boit reto ma. ²⁹Jõ tkyas bo ro ait retait ynaut yawe sai. Anu nesait nhar nwe bo ro mbau aro fee. Menohe Ait retait ynaut yawe boit reto to mbau. Feto to anu nmat ait. Niit boit reto ma! ³⁰Raa taro hawe bo mmat raa anya tna mawe, “Ja jõ tayoh asik mase kʼAllah ro yoo boit yee kʼjõ tait. Boit aro mbau kʼjõ fee. Fyi re raa mkyas jõ, mawe jõ tno bo ro mkair?” Nno feto ma! ³¹Bo ro anu niit tna aya ro nta tna bo beta ro ja anu nno to, nno kaket re kbe raa mbibi Allah. ³²Mfi bo anu hre su nsya raa ro Yahudi to, kaket anu re kbe anu nisti ana mno iro to ma. Tna mfi bo anu hre su nsya raa ro Yunani to, kaket anu re kbe anu nisti ana mno iro to ma. Tna mfi bo anu hre nsya raa anya ro kro Kristus to, kaket anu re kbe anu nisti ana mno iro to ma. ³³Ja jõ tno feto ye. Bo bawya ro jõ tno to jõ hamer tno bo ro moof mkah raa beta. Jõ saso bo ro moof kʼjõ tesait sai fee. Tno feto re kbe ana fri riof ro mase ye.

¹Jõ tawe kʼanu tawe, “Anu boti iso ajõ, mnan fi jõ boti iso ro Kristus.”

²Anu rabu wawa ja nnaut jõ yoyo. Tna watum ro yum bau oh, ro tiwya jõ tkyas kʼanu to ja anu nri. Anu nno moof meto.

Ati ro jemaat ranu siret su skabuk to raa sme msya fnya kbe mno bawya?

³Tna jõ tkyas bo sau kʼanu naut: Nnaut oh: Allah tait yase abyõ Kristus. Tna Kristus tait yase abyõ kʼanu raa sme aro sait-sait. Tna raa sme sait-sait tait yase abyõ kʼyfain. ⁴Kristus tait yase abyõ raa sme. Feto to mfi bo raa sme sait skabuk soh mfe ykyas bokyas ro mbam kʼAllah kri-kri to, tna ait sbyõ watau rait fares to, ait retait yiwana Kristus meto. ⁵Tna raa sme sait-sait tait yase abyõ kʼyfain. Feto to mfi bo fai sau mawe skabuk soh mfe mkyas bokyas ro mbam kʼAllah to ja au moo hawee mai mana wa to. Soh au moo bo sbyõ mana wa to fee, au miwana maa ro yase kʼau meto. Fai reto to, mti saban mnan fnya ro mmur mana mawyan. ⁶Mfi bo fnya hawe moo bo sbyõ mana wa to fee, fai reto mamo ktan mana mawyan mabuf sai rof. Fnya ro ktan mana mawyan mabuf soh mfe mmur mana to, fai reto mno bo ro mkair tna mno au hrenaut ai ye. Ro moof to fnya ja sbyõ bo.

⁷Taja nsya tao wojõ na; Allah yfen anu ynan fi Ait yesait. Anu ro sme merif bo yase ro Allah rAit. Raa mmat anu tna bibi Allah. Feto to ati ro anu skabuk soh mfe ati ro anu nkyas bokyas ro mbam kʼAllah to, sbi bo mam nna wanu to ma. Reto to bo ro kmun fee. Menohe fnya sbyõ bo mana wana wa to, ana merif maa yase rait oh meto.

⁸Tiwya Allah yfen raa sme mbam kʼfnya to fee. Yfen fnya mbam kʼraa sme. ⁹Raa sme to Allah yfen mkah bo mban fnya to fee. Fnya saah Allah yfen mkah bo mban raa sme. ¹⁰Reto oh mi fnya ja moo hawee mai mana: Re raa mmat au to mhar mawe maa tait yase ybo au. Tna malaikat ro mmat bo ro fai au mno to, mmat mawe bo reto au mno moof ye.

¹¹Tuhan tait yase abyõ kʼanu. Feto to fnya wanu mesait mros kar fee. Tna raa sme nesait nros kar fee ye. ¹²Tii tinyi to Allah yfen fnya mbam kʼraa sme. Tna mfo refo raa sme snok mbam fnya ro mabe ana. Tna bombra beta mama mbam kʼAllah. ¹³Nesait nnaut banu sai nwe, “Ati ro fnya skabuk Allah to, mfi bo au moo bo sbyõ wa mana rau to fee, reto to bo ro kmun fe mfe a?” ¹⁴Mfi bo raa mmat raa sme sait betau yana mawyan miyõ to, ja mnaut mawe reto to, bo ro kmun fee ye. ¹⁵Fnya to, mana rana miyõ to mfi bosnyam rana. Allah yno mana mawyan wana to burut wa mana wana. Feto to bo mafa ro ja amu nno to oh mefo: Fnya wamu to ja betau mana rana miyõ.

¹⁶Soh anu aro santri watum riwai reto, jõ tawe, “Amu nsya jemaat ro Allah taro to, ja amu nno bo mafa sau aran reto.”

Iso ro makyõ Korat ro Biit Roti

¹⁷Tna jõ tkyas bo ro mtan to, jõ bibi anu meto fee: Anu siret su to, mafer rau to mkair. Tibyo jõ bhah anu. ¹⁸Ro sau to, jõ tari he anu siret su to, anu baro nhau hayah-hayah tna nmak anya ye. Bo ro raa mkyas weto to, jõ thar tawe baro mabo. ¹⁹Fyi, Tuhan yhaf rAit mhau kʼanu ro ati ryo? ²⁰Ati ro anu hre su nkyõ Korat ro Niit Roti reto to, anu ja nhaf sau su nnaut Yesus mees rAit fee! ²¹Anu aro sait-sait safto sohmaam bo mase. Tibyo boit mkak tna raa taro to mhau muut mhai sre. Tna taro to, mata anggur maya toni tibyo bisir. ²²Bo ro ja anu nno feto to mkair! Mfi bo anu nno feto kbe raa sret jemaat ro Allah. Tna anu niwana raa kinyah wanu meto tna nno re ana hrenaut. Ro moof to mi ati ro anu nma to, anu sait-sait sohmaam bo wia mam amah wanu.

²³Bo ro Tuhan tiwya yawe kʼjõ to, jõ te tkyas kʼanu u. Mti ro Yudas besruf Yesus reto to, Tuhan Yesus yoo roti sau. ²⁴Yoo tna skabuk yayoh asik mase kʼAllah. Tna Ait haber roti reto yee kʼana beta mait. Tna yawe, “Nmat roti refo. Tetsu aJõ ro tsan mkah anu oh mefo. Niit oh. Tna kbe nno fefo u re nnaut Jõ.” ²⁵Ana sohmaam bo mkak tna Ait yoo hawereh tna yno mnan feto u yawe, “Anggur maya refo to, mees aJõ mefo. Kbe Jõ raa mame tna Allah ysair bosi ro tna kʼanu oh meto. Anu nta bo refo renti to, nnaut Jõ.” ²⁶Feto oh mi anu ja nkyõ Korat ro Niit Roti. Ati ro anu niit roti reto tna nta anggur maya reto to, anu beta nkyas u nwe ’Tuhan raa mame yajat’ oh meto. Nno korat refo mfi bo mafa ro ja anu nno to, nno u mamo snok ati ro meen Tuhan hah ye yama u. ²⁷Reto oh mi awya ro yakyõ Korat reto to, tna yait kbik-kbak sai, yno iro meto. Ait retait yiwana Tuhan yetsu rAit msya mees rAit oh meto. ²⁸Feto to ati ro anu nwe niit Korat reto to, nisoh nhaf wanu sait-sait to wia matim. ²⁹Awya ro ynaut Tuhan yetsu rAit wia fee, menohe yait Korat reto sai to, kbe Tuhan yoo kair mbtek mai kʼait. ³⁰Mabo oh! Reto oh mi raa jemaat ranu taro mawat kiyam, ssafo fee, tna taro mhai oh to. ³¹Soh anu bisoh anu bhaf mato wanu wia to, kbe Tuhan yoo kair mbtek mai kʼanu to fee. ³²Ja Tuhan yoo kair mbtek mai kʼanu, raa ro kro Kristus to fyi? Yno afo re anu bmat sas bhaf mato wanu tna bisoh anu. Anu bisoh bhaf mato wanu wia to, meen tis rau to, ati ro Ait ymit safo mana kʼraa ro tabam refo to, kbe ymit safo mana kʼanu fee.

³³Taja, tme, tao, tano na; anu nma nkyõ Korat ro Niit Roti reto tna sohmaam bo kbik-kbak sai to ma. Nma tna hre sne raa ro jemaat beta mama wia, tna beta sohmaam korat reto su. ³⁴Mfi bo anu aro nhai sre to, niit boit wia mam amah wanu. Niit boit wia tna nmo siret su re kbe anu aro nhai sre fee. Tibyo niit Korat reto tna nasmamo fee. Soh anu niit Korat reto mkah nhaf wanu ro moof to, meen Tuhan yoo safo mana ymit kʼanu fee.

Kbe meen jõ tama to kʼanu u to, kbe jõ terif bo roto taro kʼanu u.

Har ro Tuhan muum bouum (karunia) kʼraa

¹Taja, tme, tao, tano na; tna fo jõ tkyas bouum (karunia) Har ro Tuhan moo muumto kʼanu. Jõ betoo bouum weto aro rau-rau afo re anu nhar kaket. Har ro Tuhan moo bouum wefo muumto kʼanu afo re anu tubat anya tna smot Allah kaket. ²Nnaut tiwya tinyi weno to, wore anu wase Allah fares to, anu nbaut berhala sor. Bawya mno re anu nbaut berhala weto ro wase bo mkyas a? Tiwya raa besruf anu tibyo anu smot berhala weto. ³Ati ro anu nri raa mkyas bo to, fyi re anu nhar nwe bokyas reto mbam kʼAllah fe mfe a? Tawe kʼanu tawe mfi bo anu nri raa sait ykyas Yesus yawe, “Kbe ayoh mroh kʼAit!” Anu nhar nwe Har ro Allah mjin kʼraa retait yhaf rait fee. Tna mfi bo anu nri raa sait yawe, “Yesus tait Tuhan ro yase.” Kbe anu nhar nwe Har ro Allah mjin kʼait yhaf rait.

⁴Bouum to aro rau-rau, menohe weto beta to, Har rAit oh mi moo muumto kʼanu to. ⁵Tna anu bno bo aro rau-rau re tubat raa jemaat wanu. Menohe bo ro anu ja bno weto beta to, anu bno mkah Tuhan Yesus yasom rAit. Tuhan tait sait aran. ⁶Tna Allah yno re anu tubat raa mhaf wana to, mkah iso aro rau-rau. Menohe Ait ro yno bo weto tait sait aran ye. ⁷Tna Har rAit moo bouum aro rau-rau muumto kʼanu beta mkah bawya? Mno mkah anu, raa ro kro Kristus to, kbe bisoh anya, teta anya tna bno raa makin rAit beta moof. ⁸Tna bouum Har ro Allah moo muumto kʼanu raa ro kro Kristus to, au oh mefo: Mno re raa taro mhar bo watum raa kaket. Tna Har reto moo bohar muumto kʼraa taro re ana mhar maja ro Tuhan kaket. ⁹Tna Har reto mno re raa taro smot Tuhan kaket matak. Tna mno re raa taro to skabuk raa ro kiyam to re mrok moof. ¹⁰Tna Har reto moo matak mee kʼraa taro to, afo re ana mno bo ro msai.12:10 mujizat Tna moo matak mee kʼraa taro re ana mari mai ro mbam Tuhan tna mkyas bokyas rAit reto kʼraa mfi raa ro nabi.12:10 bernubuat Tna moo matak mee kʼraa taro re ana mhar har aro rau.12:10 membedakan bermacam-macam roh Ana weto mari raa mkyas bo tna mmat sas bokyas reto tna ana mhar mawe bokyas reto mabo mbam Tuhan fe kabes a. Tna Har ro Tuhan moo matak mee kʼraa taro re ana mkyas mkah bahasa roh. (Ana mkyas mai aro rau hayah-hayah ro ja ana mesait wase.) Tna moo matak mee kʼraa taro re ana mhar mai weto. Kbe ana me mkyas bokyas riwai reto kʼraa jemaat ro hre mam weto to mkah mai rana. Tibyo raa ro jemaat beta mari tna mhar ye (menafsirkan)12:10 Raa weto menterjemahkan bahasa roh reto.. ¹¹Har sau aran oh mi moo bouum (karunia) ro riwai jõ tkyas weto beta muum kʼraa. Har reto moo tak aro rau-rau tna saim kʼraa aro sait-sait mkah ksoh rAu mesait sai.

Betsu sau aran he haber to mawat

¹²Raa yetsu rait to sau aran sai. Menohe yatem, yaa, msya yana bo to mrat yetsu rait reto. Yetsu rait haber to msis bia. Tna anu, raa ro Kristus wAit to bsis bia ye. Menohe anu beta brat su bsya Ait tibyo bmo raa mana sau su. Au oh mi raa fret bo mawe anu fo bnan yetsu rAit. ¹³Anu beta to bsis tna anu fo raa aro rau hayah-hayah ye: Anu taro to raa ro Yahudi tna taro to raa ro Yunani. Anu taro raa kinyah bmo sryan boh tna taro to sryan boh fee. Menohe Har sau aran baptis anu beta. Au oh mi Har ro moof mjin mam anu bhaf wanu beta oh to. Tna mno re anu beta smot Kristus. Tna Har reto oh mi Har ro mbam kʼAllah.

¹⁴Raa yatem, yaa, yana bo to mrat yetsu rait reto. Raa yetsu rait to haber sau aran fee; haber msis.12:14 Paulus fret bo yawe haber msis weto to mnan fi bouum msis ro mbam Har ro Allah.¹⁵Mfi bo jõ taa maban ajõ mkyas mawe, “Jõ fi Paulus yatem sau fee. Feto to jõ hawe bo trat tsya yetsu rait!” Kbe mabo a? Mfe. Mako hawe sai, jõ taa reto to, mhau mrat jõ tetsu ajõ fares. ¹⁶Tna mfi bo jõ timara ajõ to mawe, “Jõ fi Paulus yasu rait fee. Feto to jõ hawe bo trat tsya yetsu rait!” Kbe mabo a? Mfe. Mako hawe sai jõ timara reto to, mhau mrat jõ tetsu ajõ fares. ¹⁷Mfi bo jõ haber beta haberek mamo tasu to, kbe jõ tari bo fyi? Tna mfi bo jõ haber beta haberek mamo timara to, feto kbe jõ tasan bo ro sawer to fyi? He mfe. ¹⁸Allah yfen betsu wanu to Ait yfen haber aro hayah-hayah yse kʼanu betsu. Yfen yse mam yuk ro betsu aro rau-rau mkah bonaut rAit sai. ¹⁹Mfi bo anu betsu wanu haber msis fee, anu betsu ranu to fyi? ²⁰Anu raa fo haber msis menohe betsu sau aran sai.

²¹Mfi bo jõ tasu ajõ to mkyas kʼtatem mawe, “Natem, nyõ to bo ro ati fee!” Tna mfi bo jõ tana to mawe kʼjõ taa ajõ to mawe, “Naa, nyõ to bo ati fee!” Reto to mkair meto! ²²Tna anu haber aro ro sne oh mi haber ro ati syok. ²³Ja anu hawe raa mmat betsu wanu haber taro to fee. Anu hrenaut. Haber wanu weto taro anu bwe moof fee. Feto to anu kaket haber wanu weto. Tna haber wanu weto anu byum ratan wa re raa mahni. ²⁴Menohe haber wanu ro moof weto, ja anu kaket haber weto fee; mhau rof raa mmat. Allah yesait yfen anu tna yse haber beta mhau su. Tna haber wanu ro ja anu nwe mkair to, Ait yawe haber ro ati oh meto. ²⁵Yno feto afo re haber wanu aro to twat hayah-hayah fee. Beta bisoh bmat anya kaket to moof. ²⁶Mfi bo raa haber sau mham to, kbe ait yetsu rait beta mkair. Mfi bo haber sau raa mbaut to, kbe ait yetsu rait beta simaut ye.

²⁷Raa magin ro kro Kristus to, anu fo yetsu rAit. Tna anu beta to haber aro rau-rau ro brat bsya Ait. ²⁸Allah ysok yawe anu bfi haber ro Kristus yetsu rait aro rau-rau. Tna fo jõ ntuu haber wAit weto taro:

1. Raabis wAit (rasul).

2. Nabi ro Allah ybis mama mkyas bo wAit.

3. Guru ro mbetoo bokyas ro Allah maja rau.

4. Raa ro mno bo ro msai.

5. Raa ro skabuk raa ro kiyam tibyo ana weto mrok moof.

6. Raa ro ja mbet raa anya.

7. Raa ro mamo aban mana.

8. Raa ro mkyas bo mkah bahasa roh.

²⁹Menohe ja raa beta mamo raabis ro Allah fee. Tna raa beta mamo nabi wAit to fee. Beta mamo guru ro ja mbetoo bokyas ro Allah maja rau to fee. Beta mno bo ro msai to fee. ³⁰Beta skabuk raa ro kiyam tibyo ana weto mrok moof to fee. Beta mkyas mkah bahasa roh to fee. Tna raa beta menafsirkanbahasa roh weto tna me mkyas bokyas riwai reto kʼraa jemaat to fee ye. ³¹Har ro Tuhan muumto bouum (karunia) weto kʼraa. Rau ro moof to, anu hamer fri bouum ro moof ati.

Anu natmof anya kaket to iso ro moof ati

Tna fo jõ terif iso ro moof ati kʼanu:

¹Mfi bo jõ tkyas bo mkah mai aro rau hayah-hayah: Mai ro tabam refo beta ye tna mai ro ja malaikat mkyas to ye. Mfi bo jõ thar mai weto beta menohe ja jõ tatmof raa anya to fee, kbe mafer marak sai.13:1 Jemaat ro Korintus fri bouum ro mbam Har ro Tuhan oh to. Tibyo ja ana safuk. Tna Paulus yisoh betnen ana yawe, “Sorni natmof raa anya to ma!” Tno mnan feto to, jõ fi tnan ain ro raa mai kaket fee. Tna jõ tnan bo ro mawia mho menohe mafer rau marak. ²Soh jõ wase bo tatmof raa anya menohe jõ thar tari mai ro mbam Tuhan tna tkyas bokyas rAit reto kʼraa to, kbe tno mkah bawya? Mafer rau to miyo? Mfi bo jõ wase tatmof raa anya menohe bonaut ajõ maah tibyo thar bo maja ro samyoh beta kaket to, kbe bo reto tis rau to, meen mafer aro fe mfe a? Tna mfi bo jõ smot bi Ait kaket matak to tna tbis atu sau mirenti mamo mros mam yuk roto to, tibyo atu reto mirenti mamo oh. Kbe mafer rau to miyo? Rau ro ati to jõ tatmof raa anya. Mfi bo jõ tno bo riwai weto beta, menohe tatmof raa anya to fee, kbe mafer marak. ³Mfi bo jõ too bombra wojõ beta saim kʼraa ro mse bo aro fee to, mafer rau to miyo? Mfi bo raa ro ja ngknait raa magin ro kro Kristus to, mfot jõ tna mko tajat rof, mafer rau to miyo? Mfi bo jõ tatmof raa anya fee to, kbe mafer marak.

⁴Raa ro mhar bo matmof raa anya kaket to, ja ana mbi-ba to fee. Raa ro mhar bo matmof raa anya to, ja mhaf sneh. Raa ro matmof raa anya to, wase bo maam bo raa, tna ana wase safuk mawe ana uu kar, tna ana wase bo tawyõ ana mesait. ⁵Tna raa ro mhar bo matmof raa anya to, ja mmat raa anya, tna ja mbat mkyas bo msya raa anya taro to fee, tna ja mbo kmo fooh mam matem to fee, tna ja wase botoh ye. ⁶Mfi bo raa mhar bo matmof raa anya to, ati ro ana mmat bo mkair to, ana mrok sraujin. Tna ati ro ana mmat bo ro moof to, ana ksoh simaut. ⁷Tna raa ro mhar bo matmof raa anya to, ja ana kmot raa anya re bo mbtek mai kʼraa weto fee. Tna raa ro mhar bo matmof raa to, ja mari bo ro Allah ysi kʼana to, tna mse kʼana mhaf. Tna ja ana beroh minaut mawe bo weto kbe meen mabo tu. Ana mnaut maut-mroh fee ye. Tna raa ro mhar bo matmof raa anya to, bo bawya sai ro mama mai kʼraa weto to ana beroh siko masom sai.

⁸Kbe raa hafri Tuhan ysya raa anya yum. Menohe meen raa bernubuat u fee. Tna meen raa mkyas bo mkah bahasa roh to u fee. Tna bohar ro raa mhar to, kbe saef ye. ⁹Mfo refo anu bhar bo mnan si fee. Tna raa ro mkyas bokyas ro Allah to, bohar wana to mnan si fee ye. ¹⁰Meen Allah yno bombra beta mrok moof mnan si. Tna bombra ro mnan si fee to, kbe saef beta. ¹¹Ti tinyi to jõ tkek fares, tna jõ tkyas tfi ku mkek ja mkyas fares tna tnaut bo mnan fi ja ku mkek mnaut bo to ye. Tna mfo refo jõ tabi oh tibyo tno bo mnan fi kumkek ja mno to u fee. ¹²Mfo refo anu bhar bo kaket fefares. Mnan fi raa sait ymat yasu rait mam bowane ro mkair to, tibyo ymat yasu rait kaket fee. Menohe anu meen bhar bombra beta kaket. Mfo refo jõ thar bo mabut fares. Menohe meen jõ thar bo kaket mnan si. Mnan fi Allah ja yhar jõ mnan si to. ¹³Tna jõ tawe kʼanu tawe, “Bo tuuf refo meen saef fee: Kbe raa smot Tuhan renti yoyo. Tna kbe raa minaut mawe bo moof ro meen mabo to yoyo. Tna kbe raa hafri Tuhan ysya raa anya yoyo mamo snok woyõ-woya sai ye. Bo tuuf refo to, meen mhau mawyõs. Tna raa matmof raa anya to, bo ro mase miwer bombra beta.”

Bouum (Karunia) ro mase toni to bawya?

¹Rau ro ati to, anu natmof raa anya kaket. Ja Har ro Tuhan moo bouum aro rau-rau muumto kʼraa ro kro Kristus. Siko nkai bouum weto! Bouum (Karunia) ro mase toni to raa bernubuat.²Raa ro mkyas bo mkah bahasa roh to mkyas bo kʼraa meto fee. Mkyas bo kʼAllah sai meto. Raa roto mhar mai ro ana mkyas reto fee. Mamos wana mkyas bo kʼAllah. Tna Ait yesait yhar bo ro ana mkyas reto. ³Menohe awya ro yari mai ro mbam Tuhan tna ykyas bokyas rAit reto kʼraa (bernubuat) mkah mai rana to, ja bokyas rait reto raa mari tna mhar. Raa taro mari tibyo bokyas reto mno re ana smot Tuhan kaket. Taro mari tibyo misoh ana re kro Tuhan kaket. Tna taro mari tibyo sraujin u fee. ⁴Ait sait ro ykyas mkah bahasa roh to tubat ait yesait aran. Menohe ait ro bernubuat mkah mai ro raa mhar to tubat raa ro jemaat beta oh meto re ana smot Allah kaket ye. ⁵Rau ro moof to, anu beta nkyas mkah bahasa roh. Menohe soh anu beta nri mai ro mbam Tuhan tna bernubuat mkah mai ranu nesait to, reto merif mafer kʼraa msis. Feto to bo reto moof miwer. Ait ro bernubuat retait raa ro ati yiwer ait ro ykyas mkah bahasa roh. Menohe mfi raa aro mhar menafsirkan bahasa roh to. Kbe Har ro Tuhan mno re ait yhar bahasa roh weto re ytai ye ykyas kʼjemaat mkah mai rana. Tibyo raa jemaat mari tna mhar bokyas ro mbam Har riwai raa mkyas reto ye. Feto to moof miwer.

⁶Taja, tme, tao, tano na; mfi bo jõ tama to kʼanu tna tkyas bo mkah bahasa roh sai to, mafer aro kʼanu fee! Menohe karunia aro rau ro Har msan kʼjõ to, kbe merif mafer kʼanu: Mfi bo jõ tkyas soo ro mbam kʼAllah kʼanu mkah mai ranu to, kbe merif mafer kʼanu. Tna mfi bo jõ tkyas watum ro mbam kʼAllah mkah mai ranu to, bo reto kbe merif mafer kʼanu ye. Tna mfi bo jõ bernubuat to, kbe bo reto merif mafer kʼanu ye. Tna soh jõ tasyah anu mkah mai ranu to, mafer aro kʼanu ye. ⁷Oor msya kerombi-kecapi bo to, bo ro maam fee. Menohe bo weto mmai saah. Mfi bo raa sait yfi oor soh mfe yai kerombi-kecapi kaket fee, kbe raa wase bobaut ro ait retait ysom reto fee. Kbe raa mamboi, tna msya ait mbaut bobaut reto su fee. ⁸Tna mfi bo raa sait yfi saa kaket fee, kbe raa mnaut mawe, “Raa retait yfi-fa sai a?” Tibyo mama fee. ⁹Feto ye ati ro anu nkyas mkah mai aro rau hayah-hayah to. Mfi bo raa wase mai ro anu nkyas to, kbe ana mari tna mhar fe mfe a? Mai ranu weto marak sai. Bokyas reto merif mafer aro kʼraa fee. ¹⁰Mai ro tabam refo fo msis bia. Tna raa aro mhar mai rana-rana. ¹¹Menohe jõ thar mai weto beta fee. Ati ro raa srim mkyas to, jõ tari tna tnaut tawe mnan fi ana mmai-ma sai. Jõ tari saah menohe tamboi sai. Tna raa srim mhar mai ro jõ tkyas fee ye. Ati ro ana mari jõ tkyas to, mnan fi jõ tmai-ma sai. Ana mari saah menohe mamboi sai.

¹²Taja, tme, tao, tano na; jõ thar tawe Har ro Tuhan msan bouum kʼanu oh tna anu ksoh toni. Rau ro ati to, anu sait-sait siko nkai bouum aro ro misoh raa ro jemaat ranu. ¹³Feto to awya ro ja ykyas bo mkah bahasa roh to, rau ro moof to, ait skabuk ye. Skabuk yayoh kʼAllah re ybis Har ro Moof mno re ait yhar mai ro riwai ait ykyas reto. Tna re kbe ait ye ykyas bo reto kʼjemaat mkah mai rana (menafsirkan) afo re ana mari tna mhar ye. ¹⁴Mfi bo jõ skabuk mkah bahasa roh to, kbe tamos ajõ fri mafer saah. Menohe jõ twase bo ro jõ skabuk to bawya meto. ¹⁵Soh feto to jõ kbe tno fyi? Rau ro moof to, jõ tno ewok ye: Tamos ajõ skabuk mkah bahasa roh ye tna jõ skabuk mkah mai ajõ ye afo re bonaut ajõ fri mafer ye. Tna jõ tamos ajõ tbaut bobaut mkah bahasa roh ye. Tna jõ tbaut bobaut mkah mai ajõ ye afo re bonaut ajõ fri mafer ye. ¹⁶Mfi bo nmos ranu mbibi Allah tna nyoh asik mase kʼAit mkah bahasa roh to, kbe raa ro hre su skabuk msya anu to wase bo ro anu nkyas reto tna ana msya anu mbibi Allah fyi? Tna mfi bo ana wase bo nyõ nayoh asik mase meto fee. Fyi re kbe ana mawe, “Amin.” ¹⁷Nyõ nayoh asik mase kʼAllah mkah bahasa roh to moof. Menohe bokyas anyõ reto misoh raa roto taro fee.

¹⁸Jõ ksoh tkyas mkah bahasa roh tna ja jõ tno bo reto mase miwer anu beta. Har ro Moof msan bouum reto kʼjõ tna jõ tayoh asik mase kʼAllah. ¹⁹Menohe ati ro jemaat siret skabuk su to, jõ hawe tkyas bo wer mkah bahasa roh to. Mfi bo jõ tkyas bo mabuf sai kʼraa mkah mai ro ana mhar to mafer rau to moof miwer.

²⁰Taja, tme, tao, tano na; jõ hawe bo anu nhar bo mabuf mnan fi ja kumkek sai to ma. Rau ro moof to, anu nhar bo kaket mnan fi raa ro mabi. Menohe ku mees ja wase-wasa bo mno safo. Tna ro moof to, anu ye wase bo mno safo mfi ku mkek feto ye. ²¹Watum ro Musa mkyas mawe:

“Meen Jõ tbis raa ro srim mamo mkyas bo kʼraa mana refo. Tna raa ro mmai hayah to, kbe mama mkyas bokyas aJõ kʼana ye. Menohe ana hawe bo mari sai fares.”14:21 Paulus ykyas bokom ro tiwya nabi Yesaya ykom wore raa ro mamo byoh kʼraa ro Israel mama. Mama tna mkyas mawe, “Ayoh mroh kʼraa mana ro Israel!” Menohe raa ro Israel wase mai raa byoh weto mkyas tibyo mari bokyas rana fee.

Yesaya 28:11,12

²²Har ro Moof mno re raa taro mkyas mkah bahasa roh to, mno mkah raa ro smot Yesus oh fee. Mno afo re raa ro wase Yesus kbe mari tna mrok. Mno afo re ana weto mhar mawe bo ro ana mari reto to, bo ro msai mbam kʼAllah. Tna Har ro Moof muumto bouum (karunia) roto kʼraa taro re ana bernubuat mkah mai ro jemaat ja mhar oh. Bouum reto oh mi merif mafer kʼraa ro smot Yesus wia oh. ²³Feto to, mfi bo jemaat ranu berur skabuk su, tna anu beta nkyas mkah bahasa roh to fyi? Mfi bo raa ro smot Yesus fee mama twok to, kbe ana mrok mawe anu beta nker. ²⁴Menohe mfi bo anu beta bernubuat mkah mai ranu to fyi? Soh raa sait ro smot Yesus fee tait yama to, kbe ait yari bokyas ro mbam Tuhan. Bo ro anu beta nkyas reto merif iro ro ait yno. Ait yari tna bokyas reto mame kʼait yhaf tibyo ait yashana. ²⁵Anu beta nri mai ro Tuhan feto tibyo bo ro anu nkyas reto sibrer bo ro ja ait ynaut mam yhaf mato rait. Tibyo yanwaruk tna ybaut Allah yawe, “Mfo refo thar tawe Allah yhau ysya anu oh.”

Iso ro jemaat siret su tna mbaut Tuhan kaket

²⁶Ati ro anu siret su skabuk Tuhan to, kbe anu nno fyi? Rau ro moof to, anu taro nbaut bobaut, tna anu taro nkyas watum, tna anu taro nkyas soo ro mbam kʼAllah, tna taro nkyas mkah bahasa roh, tna Har mno re raa taro menafsirkan bahasa roh riwai raa mkyas to, ne nkyas kʼjemaat mkah mai rana, re ana mari tna mhar. Bo ro anu nno weto to, nno beta re kbe jemaat fri mafer ro moof. ²⁷Mfi bo raa mawe mkyas mkah bahasa roh to, raa mabo ewok o tuuf sai aran bo feto. Sait ykyas wia tna kbe sait naut yasen ykyas. Tna Har mno re raa sait taro menafsirkan mai ro riwai raa mkyas weto. Ait yasen ye ykyas bokyas riwai reto kʼjemaat mkah mai rana re ana mari tna mhar. ²⁸Mfi bo raa ro ja menafsirkan (ye ykyas bokyas riwai reto kʼjemaat mkah mai rana) to yarak, kbe anu aro nsen nkyas mkah bahasa roh to ma. Nhau shait sai. Tna nesait nkyas sai mam nhaf mato wanu nsya Allah.

Iso ro anu skabuk su

²⁹Tna nabi ro ja Allah ybis mama mkyas bo wAit to: Rau ro moof to, ana mabo ewok, tuuf bo to, masen mkyas sai bo feto. Sait ykyas kri-kri to, ana taro to, hre mari kaket. Mari bokyas reto tna mnaut mawe, “Bokyas ro ati meto, fe mfe a?” ³⁰Anu nkin hre nri bo reto nkri-kri to, tna mfi bo anu sait yari bokyas ro mbam kʼAllah tna yawe yasen ykyas to, nabi ro ykyas nkri-kri to shait yari wia. Tna ait retait ro yari bokyas ro mbam kʼAllah tait, yasen ykyas bokyas reto ye. ³¹Mkah iso reto anu aro sait-sait nkyas bokyas ro Allah, tibyo raa ro jemaat beta nri watum reto. Tna watum reto to, mno anu nros ntak. ³²Ati ro Allah ybis nabi wAit mkyas bo to, ja Ait ybo ana matak afo re ana sorni ana to fee. Ait ybis sait yros ykyas bo to, kbe ybis ana roto hre mbo ana re shait wia. ³³Allah tait hawe bo raa mno bo mnin-nin. Yawe anu nno bo kbik-kbak to ma.

³⁴Watum ro jõ tkyas kʼfnya na mnan si Watum ro Musa ykom yee kʼraa ro Yahudi to. Ati ro raa jemaat mama skabuk su to, fnya masen mros mkyas bo to ma. Kbe ana hre shait sai tna mmat raa sme. Bo refo ja jõ tkyas mnan anya kʼraa ro Allah wAit mam jemaat aro-aro beta. ³⁵Mfi bo fnya wase bo ro raa sme mkyas to, kbe ana shait wia. Tna rere ana mamoʼt amah tna fo mtu bo reto kʼmaa. Fnya mkyas bo mam ati ro jemaat mama hre siret su to ma; ana hrenaut fea!

³⁶Fyi re anu hawe nri bokyas riwai reto? Bokyas reto to, Bokyas ro Allah. Fyi re anu ro nhau mam kota ro Korintus nnaut nwe anu nhar bo miwer raa anya ro Kristen taro! Anu tna sai nmo kro Kristus. Rau ro moof to, anu nri watum ro Allah ykyas kʼjemaat taro ye. ³⁷Anu taro nwe, “Allah ybis jõ tamo nabi wAit sait.” Tna anu taro nwe, “Har muumto bouum (karunia) roto taro kʼjõ.” Soh mabo to, Har reto mno re anu nhar bo. Tibyo anu nhar nwe bo ro jõ tkom wefo to, mbam kʼAllah yum bau oh. ³⁸Mfi bo raa sait hawe bo yari bokom ajõ refo to, nmat ait to ma.

³⁹Taja, tme, tao, tano na; raa mari watum mam mai rana mesait to bo ro ati. Feto to, bouum ro ja Har msan kʼanu raa ro kro Kristus to, rau ro mase toni to au oh mefo: Mno re raa taro bernubuat. Rau ro moof to, saso bouum reto. Tna bhah raa ro mkyas bo mkah bahasa roh to ma. ⁴⁰Menohe bo bawya ro anu nno to nisoh nno beta kaket, nno kbik-kbak to ma!

Bokyas Moof ro Yesus

¹Taja, tme, tao, tano na; ne nnaut Bokyas Moof ro Yesus (Injil) tiwya jõ tkyas kʼanu. Tiwya anu nri tna smot Bokyas reto tna ja anu nbo Bokyas reto matak fares. ²Mfi bo anu nri Bokyas Moof ro Yesus (Injil) nse kʼanu, tna nbo matak renti yoyo to, anu nkai riof ro mase. Soh mfe to, Bokyas reto mraun sai, kbe anu nkai riof reto fee. ³Tiwya jõ tari Bokyas ro Yesus refo tna jõ tama somya kʼanu. Rau ro ati to, anu smot nwe Kristus yajat re yyon iro wanu. Bo reto tiwya mayir matim mam Bokom ro Allah oh. ⁴Tna raa moo ajat rAit mse mam isra sau. Tna ti ro tuuf to Allah yno Ait yrok yasen. Bo reto to mayir matim mam Bokom ro Allah wia oh. ⁵Ait ye yrok yasen tna yerif Ait Kefas-Petrus, tna yerif Ait kuber wAit mabo 12 to ye. ⁶Tna yerif Ait u kʼraa ro kro Kristus mabo trion 500 bo feto mam siret rana. Ana weto mawat taro mhau fares tna raa taro to mhai oh. ⁷Yerif Ait kʼana weto tna yerif Ait kʼYakobus ye. Tna yerif Ait kʼraabis wAit (rasul) beta ye. ⁸Ttis rau to, yerif Ait kʼjõ ye. Yesus yerif Ait kʼJõ tis beta, tna jõ fi raa ro ati fee. Jõ tnan ku mees ro fnya mabe myoh.

⁹Tiwya jõ tamo saka raa ro kro Kristus to simoyot-mayat. Feto jõ tanwaruk tna tnaut tawe jõ fi raa ro mase fee. Jõ tari he raa mawe jõ fi raabis ro Allah to, tnaut tawe jõ thaf moof mnan si fee. Jõ tnan raa kinyah sai. ¹⁰Jõ fi raa ro tno bo mkair menohe Allah yatmof jõ. Yatmof jõ tibyo tamo raabis rAit. Tna boatmof rAit reto merif mafer ro moof. Mno re jõ safo tno bo ro Ait ybis kʼjõ to kaket miwer raabis rAit roto taro. Bo reto jõ tno mkah tatak ajõ meto fee. Tatak reto mbam kʼAllah yesait boatmof rAit ro ja matam jõ. ¹¹Awya oh mi tiwya yama ykyas Bokyas ro Yesus reto kʼanu re anu nri tna smot to? Jõ tesait soh mfe raa taro a? Anu bsom ranu to bo ro ati fee. Ro ati to anu nri bokyas ro ait ykyas reto tna nfot, nse kʼanu.

Raa taro mnaut bo sre mawe Kristus yrok yasen fee

¹²Amu, raabis rAit to, ja nkyas nwe, “Kristus yajat tna Allah yno re Ait yrok yasen.” Mfi bo anu smot bokyas reto to, fyi re anu taro nwe, “Aha, raa ro mhai to meen ana mrok masen fee!” ¹³Anu taro to srau ewok nwe “Raa ro tii kro Kristus oh tna mhai to meen mrok masen fee.” Menohe anu nnaut nwe tii Kristus yajat tna yrok yasen fe mfe a? ¹⁴Tna mfi bo anu nnaut nwe Kristus yajat tna yrok u fee, bo ro amu nkyas kʼanu reto to, mafer aro fee. Mfi bo reto mabo fee, anu smot Kristus mkah bawya? Soh feto to, bosmot ranu reto mabo marak ye. ¹⁵Ja amu nkyas nwe, “Allah yno Kristus yrok yasen.” Mfi bo Allah yno feto fee, bo ro amu nkyas to sioh-sah sai. Anu nnaut nwe amu nma besruf anu fe mfe a? Mfe saut! Ana ro mkyas mawe, “Raa ro mhai meen mrok masen fee.” Ana weto mkyas bo ro Allah to mweh! ¹⁶Mfi raa meen mrok masen to fee, ana mnaut mawe bawya? Mawe, “Kristus yrok yasen fee ye tna Ait yhai tibyo.” Bonaut rana reto sre! ¹⁷Mfi bo Kristus yrok fee, maami bosmot ranu to mkai mafer aro fee ye. Tna mfo refo to iro wanu mbo anu matak fares. ¹⁸Mfi bo reto mabo aro fee maami, raa ro tiwya kro Kristus tna mhai oh to meen fri riof fee ye. ¹⁹Mfi bo ro ana mkyas reto mabo to, fyi re anu binaut bwe, “Kbe Ait yerif riof kʼanu.” Mfi bo ro anu binaut reto mater mam wore anu bhau mam tabam refo sai to, meen bhai tna kwiyan wanu to sari-sara sai. Mfi bo reto mabo to, anu raa ro kro Kristus to mamboi toni miwrek raa roto taro sor!

²⁰He mfe: Allah yno Kristus yrok yasen tu oh! Kristus yrok yasen yatim wia tna meen raa ro mhai to, kbe Allah yno ana mrok masen ye. ²¹Ja raa beta to, kbe bhai. Tna raa sait aran yisti. ²²Adam tait hohos anu raa beta. Tna ait yno iro. Feto to anu raa kbe bhai beta. Feto ye Kristus tait ynan fi hohos anu beta ye. Tna Ait yrok yasen oh. Feto kbe anu meen brok bsen u ye. ²³Raa beta meen mrok masen beta mam ayõ sau su fee: Tiwya Kristus yrok yasen tinyi wia yatim. Tna oon ro Ait yama tabam refo u to, meen raa wAit beta mrok masen ye. ^24-26Tna tabam haberek. Tna ana ro mamo byoh Kristus to, kabes beta, aban mana, bobot, raa ro matak, msya raa ro mase bo to, kbe Kristus yno ana beta safe mkak. Kristus yamo Raja tna ybo raa mamo snok ati ro Ait yber hasyoh raa beta ro mamo byoh kʼAit. Kristus kbe yhau abyõ ybo bombra beta. Tna tis rau to yno re kbe raa waa bo mhai u fee. Tna yoo yatak rAit ysya hroh rAit reto yee kʼYaja. ²⁷Bokom ro Allah mawe Allah yoo Kristus yse abyõ ybo bombra beta.15:27 Mazmur 8:6. Bokom reto mawe ’bombra beta’. Menohe Allah tait, kbe Kristus ybo fee. Allah oh mi Raa ro yoo bombra weto beta yse kʼYesus. ²⁸Kristus yber hasyoh raa beta ro mamo byoh kʼAit mkak to tna Ait ysan bo beta kʼYaja. Tna Kristus yesait yawe Yaja yase ybo Ait ye. Feto to tis rau to, Allah yesait aran ro yase toni tna ybo bombra beta. ²⁹Raa baro mnaut raa wana ro mhai oh. Tibyo ana ksoh raa mbaptis ana. Mfi bo raa ro mhai meen mrok masen fee, raa mno bo reto mkah bawya? ³⁰Amu ja nkyas Yesus yasom kʼraa tibyo raa taro kmo amu yoyo, mawe mame amu njat. Mfi bo ro amu nkyas to, bo ro mabo fee; mkah bawya amu beroh nmo nkyas bokyas refo renti? ³¹Jõ tkyas Bokyas ro Yesus reto tibyo raa taro to knait jõ. Ti wawa raa saim bo mawe mame jõ tajat. (Bo ro jõ tkyas reto mabo tu oh!) Tna anu haberek smot Kristus Yesus Tuhan ranu tibyo jõ simaut. Bo reto mabo tu oh! ³²Jõ thau mam Efesus fo, wore tiwya raa ro kmo jõ to mama mafa msya jõ. Ana weto safo mfi kak rbyoh. Mfi bo raa ro mhai kbe mrok masen to fee, kbe jõ bitsre bokyas refo rof. Jõ bitsre bo refo afo re raa kmo jõ u fee. (Menohe Kristus yrok yasen to mabo oh, sioh fee! Tna meen raa wAit beta kbe mrok masen ye.) Feto to nri raa ro hawe bo mari Allah to ma! Ana taro mkyas mawe, “Mfi bo anu menrabu kbe bhai to, nma, ifo biit bo wer, bta jyõ wer! Mbau a! Tnaut tawe raa mamos wana mhau mawyõs fee. Fyi re anu kaket anu bno bo ro moof? Mafer marak!” ³³Nri bokyas rana reto ma! Ana weto mkyas bo sioh-sah. Nnaut oh: “Mfi bo raa sait yiranya ysya raa ro mimara mboh to, kbe ait retait yasen yno bo mnan ana ye.” Bokyas reto to mabo oh. ³⁴Feto to nisoh nhaf wanu nno bo ro moof. Nno iro u to ma. Anu baro nhar Allah fefares. Bo reto tawe kʼanu afo re anu hrenaut tna nanwaruk.

Anu betsu ranu ro tna

³⁵Raa taro mtu bo mawe, “Raa ro mhai to, kbe meen mrok masen fyi? Metsu wana weto to meen mnan bawya?” ³⁶Anu wase bo a? Metsu raa ro meen mrok masen to moof miwer. Ati ro anu nyum ⌞yafrun⌟ to makan weto sari mam tabam wia tna kmoh moo maut. Feto ye raa metsu rana ro mhai to, msya metsu rana ro mrok masen to, kbe hayah, mnan anya fee. ³⁷⌞Yafrun⌟ makan ro anu nyum weto mnan mara rau ro kbe moo to fee. Bobat manaf rau ro tinyi raa myum to maku sai fares. ³⁸Menohe Allah yno bo makan aro sor to haberek tna moo maut mkah bonaut rAit sai. Bo makan masu aro rau to hayah-hayah. Allah yno re bo ro ja raa myum aro hayah-hayah to moo maut mse make aro hayah-hayah. ³⁹Tna bo knik-knak ro maam to beta mnan anya fee: Raa metsu wana to mnan anya msya kak to fee ye. Tna ruu to metsu rau to hayah ye. Tna syoh to metsu rau to hayah ye. ⁴⁰Tna bombra ro mhau mam ayoh uu to bo weto mnan anya msya bombra ro mhau mam tabam refo fee. Bombra ro mhau mam ayoh uu weto moof wau to hayah, tna bombra ro mhau mam tabam refo to moof wau to hayah ye. ⁴¹Ayõ msya snyi msya sken to mnan anya fee. Bo weto moof beta. Tna sken weto to aro rau-rau hayah ye. ⁴²Feto ye mkah raa ro mhai tna meen mrok masen. Hai ro raa sama to, kbe mnis. Tna metsu ro meen mrok masen reto to hayah, kbe meen mhau mroon. ⁴³Hai ro raa sama to moof fee tna matak fee. Menohe metsu ro meen mrok masen to hayah. Anu raa betsu wanu ro meen mrok masen reto kbe matak tna moof ye. ⁴⁴Anu raa betsu ranu to mtai mhau mam tabam refo sai. Anu bhai tna hai ranu raa sama. Menohe anu betsu wanu ro meen mrok reto to hayah. Betsu wanu ro tna to, meen matak mhau mawyõs mam sawro ro Allah.

Wore anu bhau mam tabam refo fares to Allah yfen anu betsu wanu mfi betsu wanu wefo. Tna kbe meen Allah ysan betsu ro tna kʼanu. ⁴⁵Bokom ro Allah mawe, “Allah yfen Adam yasen yamo raa ro maam tinyi wia.15:45 Kejadian 2:7.” Menohe ’Adam ro Ttis’ tait hayah. Ait fi Kristus. Tna Ait yno re anu bfos ranu maam. ⁴⁶Raa betsu wanu ro tinyi fo matak mhau mam tabam refo sai. Tna fo meen bi Ait ysan betsu ro meen mhau mroon to kʼanu. ⁴⁷Raa ro tinyi tait, Allah yoo koh yfen. Tna Raa ro Ttis tait yfen mkah koh sai fee. Ait ybam sawro ro Allah yama. ⁴⁸Raa ro tabam refo to mnan hohos ranu, Adam. Tna raa ro meen mhau mam sawro ro Allah to, kbe ana mnan fi Kristus.⁴⁹Anu ro bhau mam tabam refo fo betsu wanu to bnan Adam. Tna meen anu fri betsu ro mnan Ait ro yama ybam sawro ro Allah.

⁵⁰Taja, tme, tao, tano na; jõ tawe kʼanu tawe, raa betsu wanu wefo to, Allah yfen yno kwiyan msya mees sai. Tna betsu wanu wefo ro kbe mhai tna sari to, meen mhau mam sawro ro Allah yamo Raja ybo to fee. Sawro rAit reto to, bombra beta mamo mhau tno fee: Bo ro mhai tna bo ro sari to, meen mhau tno fee. ⁵¹Nri a? Bo ro tkyas kʼanu refo ja raa mhar kaket fefares. Anu beta meen bhai fee. Menohe anu beta kbe haberek. ⁵²Meen, ati ro raa mfi saa buk ro ttis mawia to, bo reto kbe frok tubor. Tna raa ro mhai to, ana mse metsu wana ro mroon. Tna mrok masen. Tna anu betsu wanu beta to, kbe haberek ye. ⁵³Betsu wanu mam tabam refo to, sne tna kbe mhai. Menohe meen anu bse betsu wanu ro tna. Betsu wanu weto to matak. Tna kbe mhau mroon, mhai fee. ⁵⁴Meen anu brus betsu wanu ro bose wefo tna haberek bse betsu wanu ro matak weto. Tna mam wore weto to raa mhai u fee. Kbe anu bros btak. Tna ati reto to, kbe bokom ro Allah refo mabo:

“Oon ro raa mhai to maum oh. Mamo snok mam mfo refo fo, Ait ro yase tait yros abyõ mam bombra beta!”

Yesaya 25:8

⁵⁵“Ait sait yhau abyõ bombra beta mefi! Kbe raa mhai u fee. Ait fi yhau abyõ tibyo raa sraujin bo kbe ana mhai to u fee!”

Hosea 13:14

⁵⁶Raa ro mno iro kbe mhai. Tna Watum ro Musa yoo mbam Allah oh mi mno re raa mhar mawe ana mno iro to. Tibyo anu raa to ja waa bo anu bhai. ⁵⁷Menohe Allah ybis Tuhan ranu Yesus Kristus yama yoo riof yee kʼanu. Ait yno feto tibyo anu waa bo meen bhai to aro u fee. Kbe anu bros btak. Tibyo byoh asik mase kʼAit. ⁵⁸Taja, tme, tao, tano na ro jõ ksoh; Allah ysan riof kʼanu oh. Feto tibyo jõ tawe kʼanu tawe, “Bito nros tu. Tna smot bi Ait kaket renti mamo snok tis rau. Susu ma. Nno bo ro Tuhan ysi kʼanu to, nno kaket. Anu nhar nwe bombra ro anu nno weto to, kbe meen saef fee.”

Pitis ro anu noo tiim mamoʼt Jemaat ro Yerusalem

^1,2Tna ro mtan to, tkyas pitis ro anu noo nsan kʼraa kinyah ro Allah wAit. Tiwya jõ tawe kʼjemaat mam provinsi ro Galatia weto tawe, “Ayõ ro minggu yoyo to, anu aro sait-sait yoo pitis wait baro yse hayah wia.” Tna jõ tawe anu beta nno bo mnan raa ro jemaat mam Galatia weto tii mno ye: Anu sait-sait kbe tufrok pitis wanu mamyot bo ro ja anu nkai to, noo baro nsan. Siwyan pitis wanu to wia re ati ro jõ tama to, kbe anu nhoh-hoh saso to ma. ³Nsok raa ro ja mno bo moof baro re ana moo pitis ranu reto to, makah mamo mee kʼraa ro Yerusalem. Jõ tama tna kbe tkom aam sau tee kʼana weto makah mamo ye. Tkom aam reto tkyas pitis ro anu nee reto afo re jemaat ro Yerusalem mhar ana weto ro mbam jemaat ro Korintus mama to awya sya. ⁴Soh anu ksoh to, kbe jõ tsya ana nmo su kota ro Yerusalem ye.

⁵Meen jõ tbam Yerusalem tama frit Makedonia, tna tama to kʼanu mam Korintus. ⁶Tna thau hari minggu baro soh mfe snyi baro tsya anu mam beto. Twase fares. Karik jõ thau snyi ro foos mfi to ska wia. Tna kbe anu noo bo ro jõ tnaut to baro nee tna re tasen tamo iso renti. ⁷Jõ hawe bo tama thau ti mabuf sai. Soh Tuhan ybis to, jõ ksoh thau kait baro tsya anu. ⁸Jõ tawe thau mam Efesus fo baro rere mamo snok mam korat ro Pentakosta wia. ⁹Raa mawat mam befo beswan bokyas ajõ. Menohe Tuhan yerif iso afo re jõ tkyas Bokyas ro Yesus kʼraa tna mafer rau to moof.

¹⁰Tna soh Timotius yama yo kʼanu to, nmat ait kaket. Tna nmen ait nse yhau ysya anu mam amah wanu re ait waa ma. Ja ait ykah bo ro Tuhan ybis to, ynan jõ ye. ¹¹Nitrah nhaf wanu kʼait. Niwana ait to ma. Tna ati ro ait snok ybam kota ranu yamo to, noo bo nee kʼait afo re ait yamo kaket. Jõ tsya raa ro kro Kristus taro to, ste ait kbe hah ye yamaʼt Efesus. ¹²Tna ro mtan to, jõ tkyas bfoh ranu, Apolos kʼanu. Riwai jõ tbis ait kro raa ro smot Kristus taro to mama mmat anu. Jõ soh-soh ait ysya ana mamo. Menohe ait yako. Yawe ait sui. Yawe meen ti aro to tna ait yama.

¹³Jõ tawe kʼanu tawe, “Nhau kaket anu. Bito nros ntak tu. Tna smot Kristus matak snok mam tis rau. Waa ma. ¹⁴Bombra beta ro anu nno to, nno mkah nhaf ro natmof raa anya.” ¹⁵Anu nhar nwe Stefanus ysya raa wait weto to, ana raa ro tinyi smot Kristus mam provinsi ro Akhaya. Ana moo mhaf wana mee kʼTuhan tna mfo refo ja ana mhau mbet raa anya ro Allah wAit. Ana weto to mamo sryan kʼanu beta. ¹⁶Tna tawe kʼanu tawe, “Niwana ana ma. Nmat ana to, tna nri bo ro ana mawe kʼanu to kaket.” Ana weto mur-mur mkah bo ro Tuhan kaket. Jõ tawe kʼanu tawe, “Nri bo kʼawya sai ro ja mboti iso ro Stefanus ysya raa wait mno to.” ¹⁷Stefanus, Fortunatus ysya Akhaikus mama mo kʼjõ oh. Tibyo jõ simaut toni. Anu jemaat ro Korintus to nhau mam tabam ro fari tna anu ntai nma no kʼjõ fee. Feto to ana mabo tuuf weto mama mkah bo msya jõ su. ¹⁸Ana mno re jõ simaut. Mnan fi tiwya ana mno anu simaut ye. Jõ tawe kʼanu tawe, “Nyoh asik mase kʼraa ro mnan feto.”

Paulus ymah meen kʼraa ro Korintus

¹⁹Jemaat ro Asia weto mmah meen kʼanu. Akwila ysya Priskila msya jemaat ro siret skabuk su mam amah rana to mmah meen kʼanu beta ye. ²⁰Raa ro kro Kristus to ro mhau mam befo beta to mmah meen kʼanu ye. Jõ tawe kʼanu tawe, “Hana anya tna nmah meen kʼanya.” ²¹Tna jõ tmah meen kʼanu beta ye. Jõ tesait tkom aam refo tiim kʼanu.

²²Awya ro hawe bo yhafri Tuhan to, kbe ayoh mroh mai kʼait. Maranata; Tuhan, nama fooh sai!

²³Jõ skabuk afo re Tuhan Yesus yatmof anu beta.

²⁴Tna Kristus Yesus yno re jõ thafri anu beta ye.