SOFONÍAS

SOFONÍAS

¹ Tatitux aka yatiyäwi arunak Sofonías profetarux churäna, kunapachatix Amón chachan Josías yuqapax Judá markan reyipäkän ukapacha. Sofonías profetax Cusí sat chachan yuqapänwa, Cusí chachasti Gedaliasan yuqapa, Gedaliasasti Amariasan yuqapa, Amariasasti Ezequiasan yuqaparakïnwa. ² Tatitux akham siwa: “Taqi kunatix akapach uraqin utjki ukanak q’al tukjä. ³ Taqi jaqinakaru, uywanakaru, jamach’inakaru, chawllanakarus q’al tukjä, jan wali lurir jaqinakar lanqtasiyäwa, jaqirux akapach uraqitsa chhaqtayarakïwa.” Tatitux akham siwa: ⁴ “Judá markaruw mutuyä, Jerusalén markankirinakarux mutuyarakïwa. Nayaw, akawjan utjir jaqin lurata Baal diosat jilt’irinak q’al chhaqtayä, sacerdotenakapan sutinakapsa taqpach chhaqtayarakï. ⁵ Uta patanakar mistusin warawaranakar yupaychirinakarux tukjäwa, Tatitun nayraqatapan killt’askasa, jaqin lurat Milcom sat diosan sutip layku juramento luririnakarux tukjarakïwa. ⁶ Ukatsti khitinakatix nayar arkkasin qhipar kuttapki ukanakarus tukjarakïwa, khitinakatix nayar jan thaqhapkitu, janirak nayar jiskt’asiris jutapki ukanakarus tukjäwa.” ⁷ ¡Tatit nayraqatan amukt’apxam, Tatitun mutuyañ urupaw jak’achasini! ¡Taqi kunas wakicht’atawa! ¡Jawsatanakax akankxapxiwa, ¡Markaxarux q’al jiwarayä! ⁸ “Uka urunxa, jach’a jilïrinakarusa, reyin wawanakaparus mutuyäwa, nayar jan iyawsirinakaru, jan wali luräwinakapan sarnaqirinakarus mutuyäwa. ⁹ Uka urunsti yaqha diosanakar arkirinakarux mutuyarakïwa, uywiripan utap lunthatat yänakampi, sallqjañampi phuqt’ayirinakarusa” sasa. ¹⁰ Tatitux akham siwa: “Khä urunxa, Chawlla Punku satäkis ukäkatpacha yanap mayisa warariñanakaw ist’asini. Jaqin art’asitapax maysäx markatpachaw ist’asini, qullunakatsti allthaptkaspas ukhamaw ist’asirakini. ¹¹ ¡Mortero sat chiqankir alakip lurir jaqinaka, wararipxam, taqi alakip luririnakaw jiwarani, sallqjañamp qullqi apnaqir jaqinakax tukjataw uñjasipxani! ¹² “Uka urunakanxa, Jerusalén markarux mä qhanampi qhant’ayasaw uñakipäxa. Kawkïr jaqinakatix jucha luratanakapat jan amthapisis qamasisipki ukanakarux mutuyäwa, chuymanakapansti sapxaraki: ‘¡Janiw Tatitux walsa jan walsa lurkaniti!’ sasa. ¹³ Ukham jan wali amuyatanakapat taqi yänakapas aparatäpxani, utanakapas t’unjatarakïni. Utanaksa lurasipxaniwa, ukampis janiw uka utanakan jakapkaniti; uva alinaksa ayrusisipkaniwa, ukampis janiw uka uvat vino umapkaniti” sasa. ¹⁴ ¡Tatitun jach’a urupax jak’achasisinkiwa! ¡Jak’ankiwa, jank’akiw purinini! Tatitun jutäwip urusti wali jachañ urüniwa, jan axsarir ch’aman jaqinakas axsarañat wararipxaniwa. ¹⁵ Uka urusti q’apisiñ urüniwa, llakisiña, jachañ ururaki, t’unjatäña, apanukutäña, qinayampi urpumpi phuqhantat ch’amak ch’iwi ururakïniwa; ¹⁶ uka urux trompet phust’añampi, warariñampiw ist’asini, suma uyuchrantat markanakaru, jach’a alaykam lurat pukaranakar t’unjañataki. ¹⁷ Tatitusti siwa: “Jaqinakarux t’aqhisiyäwa, jupanakasti jucha luratanakap laykux juykhunakjamaw sarnaqapxani. Wilanakapas laq’ar uñtat wartatäniwa, janchinakapas wanjam phint’atarakïniwa” sasa. ¹⁸ Tatitun q’apisïwi urupanxa, aka uraqix uka q’apisiñapampix q’ala nakhantatäniwa, janiw jaqirux qullqipasa, quripas qhispiykaniti. ¡Aka uraqin jakir jaqinakax jan mayan tukjatarakïniwa!

¹ Jan p’inqan jaqinaka, mayaruk tantacht’asipxam, ² t’unar uñtat thayampi janïr khuysutäkasina, Tatitun jach’a q’apisiñapax ninjam jumanakxaru janïr purinkipana, Tatitun taripäwi urupax jumanakxar janïr purinkipana. ³ Jumanakax Tatituruy thaqtapxam, aka uraqin llamp’u chuyman jaqinaka, arunakapar phuqhas sarnaqirinaka. Ukatsti chiqa kankañampi llamp’u chuymampirak sarnaqapxam, inas ukhamat Tatitun jach’a q’apisiñ urupan jumanakax imantasiñ jikxatapxchisma. ⁴ Gaza markasti ch’usa wasarar tukuyatäniwa, Ascalón markasti q’ala t’unjatarakïniwa; Asdod markan jakirinakasti urpachaw jaqunukut uñjasipxani, Ecrón markankirinakasti saphitpach jik’inukutarakïniwa. ⁵ ¡Ay, Creta tuqinkir quta thiyan jakir jaqinaka! Diosasti jumanakar akham mutuyañ amti: “¡Canaán uraqi, filisteonakan markapa, q’al t’unjäma, jan mä jaqin tukuyarakïma! ⁶ Quta iramankir uraqinakax uywanak awatisiñ uraqiruw tukuni, ukawjan awatirinakax tantachasipxani, uywa uyunakaruw tukurakini” sasa. ⁷ Kunapachatix Tatit Diosax yanapt’añataki jutkani ukkhaxa, Judá markan jilt’ir jaqinakaxa, jaya markar apanukutat kutt’anisax uka uraqinak katuntasipxani, jupanakasti ukan uywanakap awatipxani, Ascalón markan utanakapan arumanakax ikipxarakini. ⁸ Israel markan jach’a ch’aman Tatitu Diosapax akham siwa: “Nayax Moab markan jan wali parlatanakap ist’twa, Amón markan ñanqha arunakapsa ist’araktwa. Jupanakax markaxaruw jisk’achapxi, markaxan uraqinakap katuntasisax uraqinakapsa jach’aptayasipxarakiwa. Ukat naya jakkiri Tatitux arsta: Moab markasti Sodoma markjamaw tukuni, Amón markasti Gomorra markjamarakiw tukuni, uraqinakapansa ch’aphinakakiw jilxani, jayu uraqiruw tukuni, wiñayatakiw ch’usa wasar uraqir tukuni. Markaxat jilt’ir jaqinakaw uraqinakap aparasin katuntasipxarakini” sasa. ¹⁰ Ukäniw Moab markampina, Amón markampin mutuyäwipaxa, Tatitun markapar jisk’achapxatapata, uraqinakapsa jach’a ch’aman Tatitun markapan uraqinakapampi jach’aptayasipxatapata. ¹¹ Tatitusti jupanakampix wali axsarkañanak lurani. Markanakan diosanakapsa q’al t’unjani, taqi chiqan jakir jaqinakasa, quta wat’anakan jakir jaqinakas juparukiw yupaychapxarakini. ¹² ¡Etiopía markan jakir jaqinaka, jumanakax Tatitun espadapampi chhuxriñchjataw uñjasipxarakïta! ¹³ Tatitux alay tuqiruw amparap luqtani Asiria markar q’al t’unjañataki, Nínive markarusa jan jaqini ch’usa laqayaruw tukuyani, mä waña wasar uraqiruw tukuyarakini. ¹⁴ Uta lawanakapas jaqunukutäniwa, utanakapas uywa uyunakar tukuyatäniwa, kunayman laq’unakaw ukan jakapxani. Jukumpi, añathuyar uñtata ch’aphirar laq’unakampiw uta mantañ lawanakan ikipxani, siwiq’aranakasa uta patanakar chukt’asaw qaraqipxarakini. ¹⁵ Ukhamaw uka jach’a jach’a tukur markax tukuni, jupa pachpar alkatasir markaxa, jaqinakapas jach’achasiñampiw sapxäna: “Aka markjamax aka uraqin janiw yaqha markax utjkiti” sasa. ¡Uka markax t’unjata, jan kunani, pampa laq’unakan putupar tukuyataw jikxatasi! Uka chiqanjam sarakipirinakasti kusipayapxaniwa, jisk’achapxarakiniwa.

¹ ¡Ay, Jerusalén marka, Tatitur saykatir marka, juchansa q’añuchjata, yaqha markanakarus t’aqhisiyiriraki! ² Tatitun aruparux janiw ist’känti, chiqachäwi arunaksa janiw ist’añ munkänti, Diosaparus janiw katuyaskänti, juparus jak’achasiñ janiw munkarakïnti. ³ Jach’a jilïri jaqinakapax leonanakjamaw wararipxi; juchanak taripir jilïrinakapasa, wasaran sarnaqir qamaqinakjamaw ch’akhanaksa q’al manq’antapxi, qhipürutakix jan jilt’ayasa. ⁴ Profetanakapas wali jach’achasiri, sallqa arunak parlirïpxiwa; sacerdotenakapax Tatitun qullan utapsa q’añuchapxiwa, kamachinakapsa p’akintapxarakiwa. ⁵ Ukampis Tatituw uka markankaski; luräwinakapax taqinitakis askipuniwa. Sapa qhantatiw jan armt’asis chiqa arunakap arsuraki. Ukampis juchan phuqhantat jaqixa, luratanakapat janiw p’inqasipkarakisa. ⁶ Tatitux siwa: “Nayax markanakap t’unjta, pirqanakapan utjir jach’a pukaranakapsa q’al tinkurayta, markan thakhinakapsa jan mä jaqini ch’usa tukuyarakta. ¡Uka ch’usa markanakanxa janirakiw mä jaqis sartkxiti! ⁷ Ukat sista: ‘Jerusalén markax axsartitaniwa, iwxa arunakaxsa ist’arakitaniwa; mutuyatäñapax janiw wakiskxaniti, janirakiw utanakapas t’unjatäkaniti.’ Ukampis jupanakax jank’akiw kunayman juchanak lurañanakar puripxaraki. ⁸ Jichhaxa, ukham lurapxatanakamatxa, jumanakar mutuyañ urux jak’ankiwa. Naya, Tatituw Israel markan Diosapätxa, arsutaxarux phuqhapuniwa. Markanakar mayar tantachthapiñatakiw amtta, jach’a q’apisiñaxampiw uka markanakar mutuyä. Q’apisitäkta ukkhaxa, mä ninjamätwa; ¡aka uraqpach nakhantayarakïxa! ⁹ “Kunapachatix uka urux purinini ukkhaxa, taqi markanakan parläwinakap q’umachä, taqinis nayar yupaychapxañapataki, taqinis nayar arkapxañapataki. ¹⁰ Etiopía jawir tuqinakata, ch’iqitatat markaxasti, achikt’asisaw waxt’äwinak apanisin nayan ukar jutapxani. ¹¹ Uka urunsti, nayan Jerusalén markaxa, naya tuqi sayt’asitamatxa, kunayman luratanakampi nayar qallkatatamat janiw p’inqaskxätati, nayaw uka jach’a jach’a tukuri jaqinakarux juma thiyat apaqxäma, ukatsti nayan qullan qulluxanxa, janiw mayampis jach’a jach’a tukxätati. ¹² Nayasti jumanak taypirux llamp’u chuymani, aski jaqinak jaytawayä, jupanakasti nayar iyawsas sarnaqirïpxaniwa. ¹³ Israel markan jilt’iri jaqinakasti, jan wali luräwinakxa janiw lurkxapxaniti, k’arisiñsa apanukxapxaniwa, jupanakax sallqa arunaksa janiw parlkxapxaniti. Jupanakax jan kun axsarasaw manqt’asipxani, samart’apxarakini” sasa. ¹⁴ ¡Sión marka, q’uchunak q’uchum! ¡Israel marka, kusisiñ arunakamp q’uchum! ¡Jerusalén marka, taqi chuymampirak kusisim! ¹⁵ Tatituw juchanakamat mutuyatäñxa apaqtam, uñisirinakamarus jaqunukurakiwa. Israel markan Reyipa Tatituw, juma taypinkaski; janiw kunat axsarañamas utjañapäkxiti. ¹⁶ Khä urux Jerusalén markarux sapxaniwa: “Sión marka, jan axsaramti, janirak amparamas jan ch’amanjam tukurakpanti” sasa. ¹⁷ Tatit Diosamaw juma taypinkaski; ¡jupax taqi ch’amapampiw jumarux qhispiyätam! Tatitusti jumar uñjasin kusisiniwa. Munasiñapampiw machaq jakañ churätam; kusisiñapan q’uchuni, ¹⁸ phunchhäwi urunakanjam q’uchurakini. Tatitux siwa: “Nayaw jan walt’añanakamat qhispiyäma, uka jach’a p’inqamsa apaqarakïmawa. ¹⁹ Khä urunakanxa, nayaw t’aqhisiyir jaqinakat arxatäma. Kayu p’akit ovejanakjamäpxsta ukasa qullt’apxämawa, saranukutanakarus kuttayanxarakïwa, t’aqhisitanakamsa, jan walt’atanakamsa askiruw tukuyarakï, ukhamat akapachan jach’ar aptatäpxañamataki. ²⁰ Khä urunxa, taqi jumanakar kuttayanxasinxa, mayarukiw tantacht’xapxäma; jaya markaru apanukutat uraqimar kuttayanxasinsti, askiruw tukuyapxarakïma, taqi markanak taypin jach’ar aptatäpxañamataki. Naya, Tatituw uk arsta.”