TITO

TITO

¹ Naya Pablox Tatitun luqtiripätwa, Jesucriston apostolupa, jupan khithataraki, khitinakarutix Tatitux ajlliski jupanakar iyawsañar irpaniñaxataki, Tatitun chiqa yatichäwinakap uñt’apxañapataki, ² ukhamarak wiñay jakañ suyt’äwirusa. Uka wiñay jakañ churañatakix Tatitux janïr aka uraqi qalltaskipan phuqhañatakiw arsuwayi, Tatitusti ukham arsutap phuqhapuniwa. ³ Jichhasti pachaparuw Tatitux uka arsutapxa arup tuqi qhanañchistu, kawkïr yatiyäwtix Tatitu Qhispiyirisax iwxt’awaykitu jupan kamachi arunakaparjam parlañaxataki. ⁴ Tito, iyawsäwi tuqin wawaxa, nayax jumaruw aka qillqat apayansma. Dios Awkisampi, Jesucristo Qhispiyirisampiy jumarux khuyapayasiñapsa, samarañapsa churanpan. ⁵ Kuna jan walt’añanakatix Creta wat’an utjkäna ukanak askichañamatakiw jaytaniwaysma, ukatsti sapa markankir iglesianakan jilïri irpirinak utt’ayañamataki, kunjämtix nayax sisksma ukhamarjama. ⁶ Mä jilïri irpirix jan khitinsa kuns kamskaya jakañapawa. Mä sapa warminikïñapawa. Wawanakapax Tatitur iyawsirïñapawa, janirakiw jan walitsa, jan wali sarnaqiritsa uñt’ayasipxañapäkiti. ⁷ Khititix jilïr irpirit uchatäki ukax Tatitun yänakap uñjirit uchatawa, ukat chiqap jakañapax wakisi. Janiw jalta chuymäñapäkiti, janirakiw jan wali chuymanïñapäkisa, janiw machirïñapäkiti, ch’axwañ munirïñapäkisa, janirakiw lunthatasiñampi qullqsa jikxatañ munirïñapäkiti. ⁸ Jan ukasti, utapar sart’irir katuqañatakix jank’akïñapawa, taqirus khuyapt’ayirïñapawa, suma amuyun jaqi, chiqapa, Tatitur katuyat aski jaqi, suma yatichatarakïñapawa. ⁹ Ukhamarakiw uka chiqa yatichat arunak katxäsiñapa, ukhamat yaqhanakar uka suma yatichäwimpi ch’amañcht’añapataki, khitinakatix Tatitur jan ist’añ munapki ukanakar iyawsayañapataki. ¹⁰ Ukampis uka chiqa yatichäwinakar jan iyawsirinakax waljaniw utjapxi, khitinakatix judaísmo saräwit jutapxi ukanaka, jupanakasti jan amuyt’asaw arsupxi ukat jaqinakar sallqjapxi. ¹¹ Ukanakarux amukt’ayañaw wakisi, taqpach wila masinakaruw mayjt’ayapxi, kunatix jan walïki ukanak yatichasina, jan wali chuymampi qullqi jikxatasiñ laykuki. ¹² Pachpa Creta wat’ankir profetapaw marka masinakap tuqi arsüna: “Cretankirinakax k’arïpxapuniwa, qhuru axsarkañ animalanakjama, sinti manq’irinaka jayra jaqinakäpxiwa” sasa. ¹³ Ukax chiqapunïskiwa, jupanakarusti iyawsäwipan chiqäñapatakix wal tuqinuqam. ¹⁴ Judionakan jan wali parlataparux jan yäqapxpanti, janirak chiqapat saraqir jaqin arunakaparus ist’apxpanti. ¹⁵ Khitinakatix Tatit Jesucristor jaysapki ukanakatakix taqi kunas sumawa, ukampis jupar jan jaysapki ukanakatakix taqi kunas janiw walïkiti, jupanakax kunatix jan walïki ukak lup’isipki, amuyunakapana, chuymanakapan q’añütap layku. ¹⁶ Jupanakax: “Tatiturux uñt’apxtwa” sapxiwa. Ukatsti luräwinakapampix janiw ukham uñacht’ayapkiti, jupanakax uñisirinakäpxiwa, jan yäqasiñan qhuru jaqinakäpxiwa, janirakiw kuna sumsa lurirjamäpkiti.

¹ Kuntix jumax parlkta ukax, q’uma yatichäwimpix mayakïñapawa. ² Chuyman jilïrinakasti jan kamskayäpxpan, axsart’añani, suma amuyuni, suma iyawsañani, munasiñani, yant’anakar saykatañatakis ch’amañcht’ata. ³ Uka kipkaraki chuyman warminakas suma sarnaqirïpxpan, jaqxat jan parlasirïpxpati, janirak machirïpxpasa. Mayninakatakisti mä suma uñtäwïpxañapawa, ⁴ ukhamat tawaq warminakarus chachapar munañ yatichañataki, wawanakapar munañ yatichañatakiraki, ⁵ suma amuyunïpxañapawa, q’uma chuymaninaka, utapsa sum apnaqirinaka, chachaparus suma chuymampi ist’irinaka, ukhamat Diosan arunakapat jan khitis jan wali parlasipkañapataki. ⁶ Waynanakarus suma amuyunïpxañapatak iwxt’am. ⁷ Juma pachparaki mä suma uñtäwi taqi kunansa uñacht’ayam. Yatichañansti, chiqa kankañampi phuqhasarak yaticham, ⁸ sum parlasa, khitinsa jan juchañchañapataki. Ukhamat khititix jiwasxat jan wal parlki ukax p’inqachat uñjasini, janirakiw jiwasanakat kuna jan walsa parlkaniti. ⁹ Uywatanakarusti, uywirinakapar taqi kunan ist’apxañapatak iwxt’am, munasirïpxpan, janirak jupanakarux qallasirïpxpati. ¹⁰ Jan lunthatasipxpasa, jan ukasti chiqa jaqinakäpxpan, ukhamat taqi kunansa Tatit Qhispiyirin yatichäwipan sumätap uñacht’ayañataki. ¹¹ Tatitusti khuyapayasiñapxa, taqi jaqitak qhispiyasiñap apanisaw uñacht’ayistu. ¹² Uka khuyapayasiñapaw juchampi, akapachar munañampi apanukuñ yatichistu, ukat aka uraqinxa mä suma amuyumpi, chiqapa, Tatit chuymaraki sarnaqañasa, ¹³ ukatsti kusiskañ suyt’äwimpi jakañas yaticharakistu, jach’a Qhispiyir Tatit Jesucriston kutt’aniñap suyasa. ¹⁴ Jupaw jiwas layku jiwawayi jan walinakat jiwasar qhispiyañataki, q’umachañataki, ukhamat jiwasanakan jupan markapäñasataki, askinak lurañasatakiraki. ¹⁵ Akanak jumax yatichañama, ch’amacht’asa, taqi jilïr kankañampi iwxt’asa, jan khitimpis jisk’achayasisa.

¹ Tatitur iyawsirinakar amtayam, marka apnaqirinakaru, jilïrinakaparus ist’apxpan, kunatix sumäki uk lurañatakis jank’akïpxarakpan. ² Janiraki khiti tuqsa jan wal parlapxpati, jan ukasti sumankirïpxpan, ukhamarak munasiñan llamp’u chuyma taqinirus uñacht’ayapxpan. ³ Nayrapachasti jiwasanakax ukham jan amuyt’anïpxäyätanwa, Tatitur jan jaysiri, chhaqtata, kunayman jan wali munañanakan t’aqhisiyatapäyätanwa. Ñanqha lurañanakana, munapayañanakana, uñisita, jiwaskam uñisis jakaskarakïyätan. ⁴ Ukampis kunapachatix Qhispiyir Tatitux khuyapayasiñapa, munasiñapsa taqi jaqinakar uñacht’ayistuxa, ⁵ janiw kuna aski luratas laykuti, jan ukasti khuyapayasiñap laykuw qhispiyistu, q’umachasa, machaqat yuriyasa, ukhamarak Qullan Ajayu tuqi machaq jakañ churasa. ⁶ Qhispiyir Jesucristo tuqiw Diosax Qullan Ajayu jilarkir churistu, ⁷ ukhamat khuyapayasiñapan jiwasar katuqañapataki, ukhamarak wiñay jakañ suyt’ktansa uk katuqañasataki. ⁸ Aka arunakasti chiqawa, nayax juman ch’aman sayt’asiñam munta, khitinakatix Tatitur iyawsapki ukanakan askinak lurapxañapataki. Ukanakax taqitakis sumawa, askirakiwa. ⁹ Ukampis jan wali jiskhisiñanakat jithiqtam, nayra arunaka, ch’axwanaka, Moisesan kamachipxat ch’axwañanaksa jan munamti. Ukanakax inamayawa, jan kunatak askirakiwa. ¹⁰ Maynitix iglesian t’aqanuqtañanak utjaychi ukaxa, juparux mä pä kuti iwxt’am, ukattix jan ist’kätam ukkhasti, iglesiat jaqunukxam, ¹¹ ukampix uka jaqin ñanqhar katuyasxatap yatïta, juparusti pachpa juchapaw juchañchaski. ¹² Kunapachatix Artemasaru, jan ukax, Tiquicorus khithankäma ukapachaxa, Nicópolis chiqan nayamp jikisir jutañamapuniwa, nayax thaya pachan ukan qamarañ amtasta. ¹³ Jumax, Zenas arxatirimpiru, Apolo jilatampirus kunatix wakiski uk churasin yanapt’apunïtawa, ukhamat jupanakan saräwinakapan jan kunas pist’añapataki. ¹⁴ Jiwasankirinakasti aski lurañ yatiqapxarakpan, pist’añansa yanapt’asa, ukhamat jakäwinakapan askïñapataki. ¹⁵ Nayampïski ukanakax aruntanipxtamwa. Jumasti Tatitur iyawsir munat jilatanakasar aruntarakim. Diosay taqi jumanakxar khuyapayasiñap churanpan.