APOCALIPSIS

APOCALIPSIS

¹ Diosaw Jesucristor uñacht’ayäna, kunatix jank’ak luraskani ukanakxata, ukhamat jupax luqtirinakaparu yatiyañapataki. Ukat Jesucristox aka uñacht’äwxa Juan luqtiripar mä angelap tuqi yatiyäna. ² Juan luqtiripasti kuntix uñjkatayna taqi ukanakxa ukhampach qillqi. Jupaw Diosan arup qhanañchi, Jesucristot arsuraki. ³ Aka yatiyäwi arunak ullaririx kusisiñaniwa. Diosat katuqat arunak ist’irinakasa, akan qillqatäki uka arunakarjam sarnaqirinakas kusisiñanïpxarakiwa, uka arunakan phuqhasiñap urux niy jak’ankxiwa. ⁴ Naya, Juanax, Asia suyunkir paqallqu iglesianakaruw aruntanipxsma. Jumanakax Diosan askipampi, sumankañapampi katuqapxam. Uka Diosasti jakiwa, jakapunïnwa, jichhax jutañampïskiwa, uka pachparaki, Diosan reyi qunuñapan nayraqatapankir uka paqallqu ajayunakampita, ⁵ Diosan chiqa qhanañchiripa Jesucristotsa katuqasipxarakim. Uka Jesucristow jiwatanak taypit nayrïr jaktirixa, taqi akapach reyinakar apnaqañatakis jupax munañanirakiwa. Jesucristox jiwasar munasistuwa, juchanakasatsa wilap wartasaw jariqistu, ⁶ ukatsti reyinaka sacerdotenak jiwasarux tukuyistu Dios Awkiparu luqtañasataki. ¡Qhapaq kankañasa, ch’aman kankañas wiñayatak jupankpan! Ukhamäpan. ⁷ ¡Uñtapxam, Cristox qinay patanjam jutaski! Taqi jaqiw jupar uñjani, jupar chhuxriñchirinakas uñjapxaniwa; akapachankir taqpach markanakas jupar uñjasax wal jachapxani. Jïsa. Ukhamäpan. ⁸ Tatitux siwa: “Nayätwa qalltasa tukuyasa, khitïkitix uka, khitïkäntix uka, khititix jutkani uka; jupasti Taqi Munañaniwa. ⁹ Naya, Juanax, jumanakan jilamätwa, Jesusampi mayacht’asitax layku, t’aqhisïwinakan ch’amampi mututax laykusti, jumanakamp chikax Diosan ajllit markapankirïtwa. Diosan arunakap yatiyatax layku, Jesucristot parlatax laykurakiw Patmos quta wat’an nayax katuntat jikxatasïyäta. ¹⁰ Kunürutix Tatitun urupäkän uka urun nayax Qullan Ajayun apnaqat uñjasta, ukatsti mä jach’a aru ist’ta qhipäxaxat art’asiniri, uka arusti mä trompetas phust’askaspa ukhamänwa, ¹¹ uka arusti situwa: “Uñjktas ukanak qillqam, ukatsti Asia suyunkir paqallqu iglesianakar apayam: Éfeso, Esmirna, Pérgamo, Tiatira, Sardes, Filadelfia, Laodicea, uka iglesianakaru” sasa. ¹² Nayasti arxaykitu ukar uñtañatakiw qhipäxar uñakipasta; kutikipstasinsti, qurit lurat paqallqu candeleronak uñjta, ¹³ uka paqallqu candeleronak taypinsti mä jaqjam uñjta, niyas Jaqin Yuqapar uñtata, isipasti kayukamänwa, jaraphipäki ukkharusti quri wak’ampi wak’antata. ¹⁴ Ñik’utapasti t’awrjama, jan ukax, khunjama janq’ünwa, nayranakapasti aqaskir ninjamarakïnwa. ¹⁵ Kayunakapasti wali lliphipkirïnwa, hornon parintayata, mä suma llijsuyat broncer uñtata; arupasti wali ch’amanirakïnwa, uma phaxchanakan qhututitapjama. ¹⁶ Kupi amparapansti paqallqu warawaranakaw utjäna, lakapatsti purapar arini espadarakiw mistusinkäna. Ajanupasti intin wali qhant’atapjamänwa. ¹⁷ Jupar uñjasasti, kayunakap nayraqataruw jiwatjam liwista. Ukampis jupax kupi amparapampi luqxatasaw nayar situ: “Jan axsaramti; nayätwa qalltasa tukuyasa, ¹⁸ jakaskaraktwa. Nayax jiwatäyätwa, jichhasti wiñayatakiw jakaskta. Nayaw jiwampina, manqha pachampin jist’arañanakap katuskta. ¹⁹ Kuntix uñjktas uk qillqantam, kunatix jichhax utjki, kunatix akat qhipar utjkani ukanaksa qillqantarakim. ²⁰ Kupi amparaxan paqallqu warawaranak jumax uñjktas ukampi, qurit lurat paqallqu candelerompix akawa: paqallqu warawarax paqallqu iglesian angelanakapawa; paqallqu candelerosti paqallqu iglesianakarakiwa” sasa.

¹ “Éfeso iglesiankir angelar qillqasin apayam: ‘Kupi amparapar paqallqu warawar apt’atäki, paqallqu quri candeleronak taypin sarnaqki ukax akham siwa: ² Nayax taqi luratanakam yatta; ch’ama tukutamsa, llamp’u chuymanïtamsa yattwa. Ñanqha lurir jaqinakar jan uñkatañ munatamsa yatiraktwa. Jan apostolükasin ‘Tatitun apostolupäpxtwa’ siri jaqinakar yant’atam yatiraktwa, ukham yant’asin uka jaqinakan k’arisipxatanakap katjaraktawa. ³ Jumax llamp’u chuyma kankañanïtawa, sutix laykusti jan qarjasisaw wal t’aqhisiraktaxa. ⁴ Ukampis jumatak arsuñaxaw utjitu: qalltan utjkäyätamsa uka munasiñamax janiw utjkxtamti. ⁵ Amuythapisim, nayra pachan kunjämäyätas ukat amtasim, ukatsti Tatitur kutikipstam. Jan wali luräwinak apanukum, kunjämtix qalltan sarnaqkäyätas ukham sarnaqam. Janitix ukham lurkätaxa, nayax jumar mutuyiriw jutä, ukatsti candeleromxa uchañapat apaqarakï. ⁶ Ukampis aski luratamax utjaskiwa, uka nicolaíta sat jaqinakan luratanakap jumax uñisisktawa, nayax jupanakar uñisiraktwa. ⁷ ¡Khititix jinchunïki ukax, ist’pan kuntix Tatitun Ajayupax iglesianakar siski uka! Jan walt’añanakar atipjirirusti, Diosan suma markapan utjki uka jakañ churir quqan achupat manq’ayä’ sasa. ⁸ “Esmirna iglesiankir angelarux qillqarakim: ‘Khititix nayrïrïki, qhipïrïki, jiwasin jaktirïki ukax akham siwa: ⁹ Nayax taqi luräwinakam yatta, t’aqhisitamsa, pist’añan sarnaqatamsa yatiraktwa, ukampis ajay tuqin qamirïtawa. ‘Judiöpxtwa’ siri jaqinakan jumxat jan wali parlatanakap yatiraktwa, ukampis chiqpachan jupanakax supayan tamapankasipkiwa. ¹⁰ Kuna t’aqhisiñanakatix jumxar jutkani ukanakat jan axsaramti, supayax jumanakat yaqhipanakarux carcelaruw jist’antayani, taqpach jumanakan yant’atäpxañamataki; tunka ururakiw t’aqhisipxäta. Ukampis jiwañkam sayt’asim, nayasti wiñay jakañ churäma. ¹¹ ¡Khititix jinchunïki ukax, ist’pan kuntix Tatitun Ajayupax iglesianakar siski uka! Jan walt’añanakar atipjiristi, janiw payïri jiwäkis ukan, kuna t’aqhisiñsa katuqkaniti’ sasa. ¹² “Pérgamo iglesiankir angelarux qillqarakim: ‘Khititix purapar arini espada ayt’atäki ukax akham siwa: ¹³ Nayax taqi luratanakam yatta, kawkhantix supayax reyi qunuñanïki uka markan jakatamsa yatiraktwa, ukampis taqi chuymampiw sutix katxäsisktaxa, nayar iyawsatam janipuniw jaytanukktati. Uka markan Antipas sat aski arsurixar jiwayapxi, ukham jiwayapkipansa, janiw ukapachas nayar iyawsañam apanukktati. ¹⁴ Ukampisa, jumatak arsuñaxaw utjitu: Balaam sat jaqin yatichäwinakap jan apanukuñ munirinakaw ukan utjaski, jumasti janiw kamsktasa. Uka Balaam jaqix Balac chacharuw amtayäna israelita jaqinakar juchar puriyañataki, idolonakar luqtatäkis ukanak manq’ayasa, uka idolonak nayraqatan wachuqa jucha lurayasa. ¹⁵ Janirakiw jumax nicolaitanakan yatichäwinakap arkirinakarux kamsktasa. ¹⁶ Ukhamasti, Diosar kutikipstam, jan ukasti, nayax mäkiw juman ukar jutä, ukatsti jupanakampix lakaxat mistki uka espadampiw nuwasï. ¹⁷ ¡Khititix jinchunïki ukax, ist’pan kuntix Tatitun Ajayupax iglesianakar siski uka! Jan walt’añanakar atipjirinakarusti, maná sat imantat t’ant’at manq’ayä; ukatsti mä janq’u qala churarakï, uka qalansti mä machaq sutiw qillqt’ata, uka sutsti janiw khitis yatkiti, uka qala katuqirikiw yati.’ sasa. ¹⁸ “Tiatira iglesiankir angelarux qillqarakim akham sasa: ‘Diosan Yuqapax, khititix nina lawranakjam nayranïki, kayunakapas suma lliphipkir broncer uñtatäki ukax akham siwa: ¹⁹ Nayax taqi luratanakam sum yatta; munasiñamsa, iyawsañamsa, yaqhanakar luqtatamsa, llamp’u chuymanïtamsa sum yatta, jichhax qalltat sipan juk’amp jupanakar yanapaskatamsa yatiraktwa. ²⁰ Ukampis jumatak arsuñaxaw utjitu. Jumax uka Jezabel warmirux janiw kamsktasa. Uka warmix ‘Diosaw khithanitu’ sasaw sarnaqi, yatichäwipampix luqtirinakaxaruw pantjayaski, wachuqa juchan jakayasa, idolonakar luqtatäkis ukanak manq’ayasa. ²¹ Nayax uka warmin kutikipstañap suyta; jupasti janiw jaysaskiti, janirakiw k’ari diosanakar iyawsañap apanukuñ munkiti. ²² Jichhasti, uka warmirux usuntayäwa, ikiñar jaqt’añkama, ukatsti jupan yatichäwinakapar jaysirinakampi, k’ari diosanakar iyawsirinakampix jiwarasipkpan. Ukampis jupanakatix kutikipstapxani, ukatsti nayar jaysapxarakitani ukaxa, janiw kuna jan walsa lurkäti. Ukhamat taqpach iglesianakax yatipxani, jaqin amuyupsa, chuymapsa nayan uñt’irïtaxa; jumanakarusti luräwinakamatjam sapaqat maynirus mutuyä. ²⁴ Ukampis jumanakat khitinakatix Tiatira iglesian uka yatichäwinakar jan arkapkta, janirak kuntix jupanakax ‘supayan imantat yatichäwipa’ sapki, ukanaksa uñt’apkta, jumanakaruw sapxsma, janiw kunampsa mayipkämati. ²⁵ Ukampis katxäsipxam kuntix yatipkta ukxa, nayan jutañaxkama. ²⁶ Khitinakatix jan walt’añanakar atipjkani, ukatsti kuntix nayax munkta ukhamarjam tukuykam lurarakini ukarux, nayaw markanak apnaqañapatak ch’aman kankañ churä, ²⁷ kamisatix Awkixax nayar munañanïñ kankañ churkitu ukhama; markanakarusti hierro thujrumpiw apnaqapxani, ñiq’i phukhunakarjamaw t’unthapipxani. Jupanakarusti qhantati warawara churarakï. ²⁹ ¡Khititix jinchunïki ukax, ist’pan kuntix Tatitun Ajayupax iglesianakar siski uka!’ sasa.

¹ “Sardes iglesiankir angelar qillqasin apayam: ‘Diosan paqallqu ajayupanïki, paqallqu warawaranïki ukax akham siwa: Taqi luratanakam nayax yatta; nayar taqi kunan iyawskitasma ukham uñt’ayasitam yatiraktwa. Ukampis chiqpachan janiw jayskistati. ² P’arxtasim, ukatsti tukusirjamäki ukanakar ch’amañcham. Luratanakam uñjaraktwa ukasti Diosaxan nayraqatapan janiw chiqapäkiti. ³ Yatichäwi katuqatamat amtasimaya; ukarjam arkam, Diosar kutikipstarakim. Janitix p’arxtaskätaxa, lunthatar uñtataw akatjamat jutä, janiw kunapacha puriniñaxsa yatkätati. ⁴ Ukampisa, Sardes iglesian mä qawqha jaqinakaw utjasktam, jupanakasti janiw ñanqha lurapkiti. Ukat jupanakax nayampi chika janq’ut isthapt’ata sarnaqapxani, askïpxatap layku. ⁵ Jan walt’äwinak atipjirinakaru, nayar iyawsañ katxäsirinakarux, janq’u isimpiw isthapiyä, janirakiw wiñay jakañ qillqatat sutinakap apanukkäti, jan ukasti, Awkixan nayraqatapana, angelanakap nayraqatan jupanakarux uñt’asxä. ⁶ ¡Khititix jinchunïki ukax, ist’pan kuntix Tatitun Ajayupax iglesianakar siski uka!’ sasa. ⁷ “Filadelfia iglesiankir angelarux qillqasin apayarakim: ‘Khititix qullanäki chiqapäkaraki, David reyin jist’arañapsa katxäski, jist’aratapar jan khitis jist’antirïki, jist’antatapar jan khitis jist’arirïki ukax akham siwa: ⁸ Nayax taqi luratanakam yatta; uñtam, nayraqataman nayaw punku jist’ararapsma, uksti janiw khitis jist’antkaspati, jumax pisi ch’amäksta ukasa, arunakax ist’istawa, janirakiw kunapachas jan uñt’ir tukkistati. ⁹ Uñjätawa, kuntix supayan tamapankasipki uka k’ari jaqinakampi lurkä uka. Jupanakax judío jaqjamaw tukupxi, ukampis chiqpachan janiw judío jaqinakäpkiti. Juma nayraqatan jupanakar killt’asiyä, nayan jumar munasitax yatipxañapataki. ¹⁰ Llamp’u chuymanïma sataxa ist’istawa, nayasti yant’a urun jumar imarakïma, uka yant’asti taqpach akapachan utjir jaqinakar yant’añatakiw jutaski. ¹¹ Jank’akiw jutä. Nayar iyawsañ chuyma katxäsiskakim, ukhamat janiw khitis churäwim apaqkätamti. ¹² Jan walt’äwinakar atipjirinakaru, nayar iyawsañ chuyma katxäsirinakarux, Diosaxan utapan katxäsir pirqanakapäkaspas ukham tukuyä, janipuniw mayampsa ukat mistkxapxaniti; ukanakaruw Diosaxan sutipsa qillqä, Diosaxan markapan sutipsa qillqarakï, ukasti alaxpachat saraqanir machaq Jerusalenawa; ukanakarusti machaq sutixsa qillqarakïwa. ¹³ ¡Khititix jinchunïki ukax, ist’pan kuntix Tatitun Ajayupax iglesianakar siski uka!’ sasa. ¹⁴ “Laodicea iglesiankir angelar qillqasin apayam: ‘Khititix chiqapäki, kunsa chiqapapun arski, khititix Diosan luratanakapat nayrïrïki ukax akham siwa: ¹⁵ Taqi luratanakam nayax yattwa. Jan thayätamsa, janirak junt’ütamsa yatiraktwa. ¡Mäpit thayäsmasa jan ukax, junt’üsmasa! ¹⁶ Janiw junt’üktasa thayäkaraktasa, llaphïtam laykuw lakaxat kutsuyanïma. ¹⁷ Jumax sistawa: Nayax qamirïtwa, taqi kunas sumaruw misturapitu, taqi kunan phuqt’atätwa, janiw kunas pist’kituti, sasa. Ukampis janiw amuyasktati: juman aynacht’ata juykhütama, jan kusisiñani, mich’a, q’alalarakïtama. ¹⁸ Ukatpï nayax amuyt’aysmaxa: ninar naksuyat suma quri nayat alasita, ukampi qamiriptañamataki, isthapisiñamatakisti, janq’u isinak nayat alasita, uka p’inqa q’alal janchim imxatañataki, ukatsti nayramatak qulla nayat alasita, nayramar ch’aqt’ayasisin uñjañamataki. ¹⁹ Khitinakarutix nayax munaskta ukanakarux tuqinuqtwa, chiqacharaktwa, amuyt’asimaya Tatitur kutikipstam. ²⁰ Uñtam, nayax punkunkasktwa, jawsaskaraktwa; khititix nayan aruxa ist’asin jist’aritanixa, nayax jupan ukaruw mantä, jupampiw manq’asirakï. ²¹ Jan walt’añanakar atipjirinakarux, qhapaq qunuñaxan nayamp chik qunt’asiyä, kamisatix nayax atipjasin Awkixampi chik qhapaq qunuñapan qunt’askta ukhama. ²² ¡Khititix jinchunïki ukax, ist’pan kuntix Tatitun Ajayupax iglesianakar siski uka!’” sasa.

¹ Uka qhipatsti alaxpachan mä punku jist’arat uñjta; ukatsti trompetan phust’atapar uñtat nayraqat parlxaykitu uka arux sarakituwa: “Akawjar makhatanim, ukatsti kunanakatix akat qhipar luraskani ukanak uñacht’ayäma” sasa. ² Nayasti ukspachaw Qullan Ajayun apnaqat uñjasta, ukatsti alaxpachan mä qhapaq qunuñ uñjta, uka qunuñansti mayniw qunt’atäskäna. ³ Qhapaq qunuñan qunt’atäkän ukasti diamante, rubí qalanakar uñtataw k’ajäna, qhapaq qunuñarusti mä kürmiw muyuntäna, ukasti esmeralda qalar uñtatarakiw k’ajäna. ⁴ Uka qhapaq qunuñasti pä tunka pusin qhapaq qunuñanakampi muyuntatänwa, uka qunuñanakansti pä tunka pusin jilïrinakaw qunt’atäsipkäna, jupanakasti janq’u isinakanïnwa, p’iqinakapasti quri pillunakan asxatatänwa. ⁵ Uka qhapaq qunuñatsti uxutanakampi, lliju llijunakampi, q’ixu q’ixunakampiw mistunïna, uka qunuñ nayraqatansti paqallqu nina wiyanakaw aqarakïna, ukanakasti Diosan paqallqu ajayupawa. ⁶ Uka qhapaq qunuña nayraqatansti suma ch’uwa umani qutar uñtataw utjarakïna, mä qhispir uñtatjama. Taypinsti, uka qhapaq qunuñar muyuntki ukawjansti, pusi jakaskirinakaw utjarakïna, ukanakasti nayräxarusa qhipäxarusa walja nayranakanïnwa. ⁷ Uka pusi jakaskirinakat mayïrix mä leonar uñtatänwa, ukxankiristi mä urqu vacar uñtatänwa, kimsïristi mä jaqir uñtatänwa, pusïristi tuyunaqaskir jach’a pakar uñtatarakïnwa. ⁸ Uka pusi jakaskirinakat sapa maynix suxta chhiqhankamänwa, patatsa manqhatsa nayranakampi phuqsutänwa. Arumay ururakiw jan samaras sapxäna: “¡Qullana, qullana, taqi ch’aman Tatit Diosax qullanawa Jupax utjaskapunïnwa, utjaskakiwa, jichhas utjaskakiniwa!” sasa. ⁹ Uka pusi jakaskirinakasti, sapa kuti khititix qhapaq qunuñan qunt’atäki, wiñayan wiñayapatak jakaski ukar jach’añchapki, yuspagarapkaraki ukkhaxa, uka pä tunka pusin jilïrinakax jupa nayraqatan killt’asisin jupar yupaychapxäna, ukatsti qhapaq qunuñan nayraqatapar pillunakap liwnuqasin sapxarakïna: ¹¹ “Tatay, nanakan Diosaxay, jach’añchäwimpi, qhapaq kankañampi, munañanïñ kankañampi katuqañatakix askïtawa. Jumaw taqi kunsa ina ch’usat lurtaxa; munañamat taqi kunas utji, juman uskutarakiwa” sasa.

¹ Ukatsti qhapaq qunuñan qunt’atäkän ukan kupi amparapan mä qillqat uñjta, patatsa manqhatsa qillqsuta, paqallqu sellonakampi uchantata. ² Ukatsti mä wali munañan angelaruw uñjarakta, wali jach’at art’as jiskt’askiri: “¿Khitirak aka qillqat jist’arañataki, sellonaksa ch’iyarañatak askïspasti?” sasa. ³ Ukampis janiw alaxpachansa, akapachansa, aka uraqi manqhansa utjkänti uka qillqat jist’arirjamaxa, uñxatañatakis askïpkänti. ⁴ Nayasti walpun jachäyäta, uka qillqat jist’arasin uñxatañataki jan maynis aski utjatapata. ⁵ Ukampis uka jilïrinakat maynïriw akham situ: “Jan juk’ampi jachkxamti, uñtam, Judá ayllunkir Leonaw atipji, jupax Davidan jathapat saraqiriwa, jupax ch’amaniw uka qillqat jist’arañataki, uka paqallqu sellonak ch’iyarañatakisa” sasa. ⁶ Ukatsti qhapaq qunuñ jak’an mä Cordero uñjta. Uka Corderosti, kharinukutäkaspa ukhamaw sayt’atäskäna, uka pusi jakaskirinakampi, pä tunka pusin jilïrinakampi muyuntata. Paqallqu waxranïnwa, nayranakapas paqallqurakïnwa. Uka paqallqu nayranakasti Diosan paqallqu ajayuparakïnwa, uraqpachar khithanitäki ukanaka. ⁷ Uka Corderosti sartasin qhapaq qunuñan qunt’atäkän ukan kupi amparapat uka qillqat apaqi; ⁸ ukatsti ukspachaw, uka pusi jakaskirinakasa, uka pä tunka pusin jilïrinakas Cordero nayraqatan killt’asipxäna. Sapa maynin arpax utjäna, inciensompi phuqt’ata qurit lurat qiru ast’atkamarakïnwa, uka inciensosti Diosan markapan mayisitanakapänwa. ⁹ Jupanakasti taqpachaniw aka machaq q’uchu q’uchupxäna: “Jumakiw uka qillqat katuñatak askïtaxa, sellonakap ch’iyaqañatakis askirakïtaxa, jiwayat uñjasitam layku; wilam wartasaw Diosatak alawayta, taqi jaqinaka, kunayman parlan jaqinaka, jisk’a markanaka, jach’a markanaka. ¹⁰ Jupanakat mä marka tukuytaxa, reyinaka, sacerdotenak Diosatak tukuytaxa, taqi aka uraqpachar apnaqapxañapataki” sasa. ¹¹ Ukatsti walja angelanakan arunakap ist’arakta, waranqa, waranqa angelanakänwa qhapaq qunuñampiru, jakaskirinakampiru, uka pä tunka pusin jilïrinakampir muyuntata. ¹² Wali jach’at art’apxarakïna: “¡Kharinukut Corderox askiwa, munañanïñ kankaña, qamir kankaña, yatiñ kankaña, ch’aman kankaña, aytat kankañ katuqañataki, jach’añchatäña, yupaychatäñas askirakiwa!” sasa. ¹³ Ukatsti Diosan taqi luratanakaparuw arsur ist’arakta; alaxpachankirinakaru, akapachankirinakaru, uraqi manqhankirinakaru, jach’a quta manqhankirinakar akham sapxiri: “¡Yupaychañasa, jach’añchañasa, jach’a kankañasa, munañanïñ kankañasa, qhapaq qunuñan qunt’atäki ukar churatäpan, ukhamarak Corderorusa wiñayan wiñayapataki!” sasa. ¹⁴ Uka pusi jakaskirinakasti ukxaruw sapxäna: “Ukhamäpan” sasa. Uka pä tunka pusin jilïrinakasti killt’asisin yupaychapxarakïna.

¹ Ukatsti uka paqallqu sellonakat mayïr sello Corderor ch’iyaqir uñjarakta, ukapachaw uka pusi jakaskirinakat maynïrir ist’arakta, qhixu qhixur uñtata, wali jach’at art’iri: “¡Jutam!” sasa. ² Uñtasinsti, mä janq’u caballo uñjta, uka caballor lat’xatatäkän ukasti amparapar mich’inak antutt’añ apt’atänwa, juparusti mä pillu churapxäna. Jupax uñisirinakaparuw atipjatayna, jichhasti juk’ampi atipjañatakiw mistuwayäna. ³ Corderox payïr sello ch’iyaqkän ukkhasti, payïr jakaskiriruw arsur ist’ta: “¡Jutam!” sasa. ⁴ Ukatsti mä wila caballow mistunïna. Uka caballor lat’xatiristi munañanïñ kankañ katuqäna, akapachan suman sarnaqasiñ chhaqtayañataki, jaqinakas jupanak pura jiwarayasiñapataki; juparusti mä jach’a espada churapxarakïna. ⁵ Corderox kimsïr sello ch’iyaqkän ukkhasti, kimsïr jakaskiriruw arsur ist’ta: “¡Jutam!” sasa. Uñtasinsti, mä ch’iyär caballo uñjarakta. Uka caballor lat’xatatäkän ukasti mä balanza apt’atänwa. ⁶ Ukatsti uka pusi jakaskirinak taypit mä aru ist’arakta akham siri: “Mä urpacha irnaqatat qullqi katuqatax mä kilo trigo, jan ukax, kimsa kilo cebada alasiñatakikïniwa; ukampis janiw aceitempina, vinompin alap irxattayätati” sasa. ⁷ Corderox pusïr sello ch’iyaqkän ukkhasti, uka jakaskirinakat pusïriruw arsur ist’ta: “¡Jutam!” sasa. ⁸ Uñtasinsti mä q’illu caballo uñjarakta. Uka caballor lat’xatatäkän ukan sutipasti “Jiwaña” satänwa, jupan qhipapsti manqha pachan jilïripaw arkäna. Ukatsti panpachaniw munañanïñ kankañ katuqapxäna, akapach uraqin jaqinakar chikatan chikatapar jiwayañataki, nuwasiñanak tuqi, mach’anak tuqi, usunak tuqi, qhuru animalanak tuqi. ⁹ Corderox phisqïr sello ch’iyaqkän ukkhasti, altar manqhan uñjta, khitinakatix Tatitun arunakap parlapxatap layku jiwarayat uñjasipkatayna ukanakaru. ¹⁰ Ukanakasti jach’at art’asisaw sapxäna: “Taqi ch’aman Dios Tata, jumax qullanätawa, arsutamax chiqawa. ¿Kunapachkamarak jan juchañchkäta, uraqin jakapki uka nanakar jiwarayirinakarusti?” sasa. ¹¹ Ukatsti Diosax sapa mayniruw janq’u isinak churäna, jupanakarusti sarakïnwa: mä juk’a pacha suyt’apxakim sasa, Cristonkirinakan janïr jupanakjam taqpachani jiwarayat uñjasipxatap layku. ¹² Corderox suxtïr sello ch’iyaqkän ukkhasti, mä jach’a uraq khathati uñjarakta. Intix ch’amakt’awayxänwa, phaxsisti wilaruw tukuwayxäna. ¹³ Warawaranakasti alaxpachat uraqiruw willirtanïna, kunjämatix higo quqax jach’a thayan khiwiliyatax higonak willirtayki ukhama. ¹⁴ Alaxpachasti chhaqtawayxänwa, mä llawur uñtatakiw llawthaptawayxäna, ukatsti taqpach qullunakampi, quta taypin utjir wat’anakampix yaqha chiqar unxtayataw uñjasïna. ¹⁵ Akapach reyinakasa, munañan jaqinakasa, qamirinakasa, jilïr militaranakas qarqa p’iyanakaruw imantasxapxäna, uywat jaqinakampi, antutat sarnaqasir jaqinakamp chika. ¹⁶ Jupanakasti taqpachaniw uka qullunakampiru, qarqanakampir sapxarakïna: “¡Nanakxar tinkxattapxita, qhapaq qunuñan qunt’atäki ukan nanakar jan uñjañapataki, Corderon q’apisiñapat imantapxarakita! ¹⁷ Jach’a t’aqhisiñ urux purinxiwa, ¿khitirak mutuyäwitak sayt’asispasti?” sasa.

¹ Uka qhipatsti, pusi angelanakaruw uñjarakta. Jupanakasti aka uraqin pusi tuqitpach sayt’atäsipkänwa, pusi tuqit jutir thayanak jark’asipkäna, kuna thayas aka uraqxar jan thayt’aniñapataki, janirak jach’a qutanakxarusa, kuna quqanakxarusa. ² Ukatsti inti jalsu tuqit yaqha angelar jutaskir uñjarakta, jupasti jakaskir Diosan chimpupanïnwa. Uka angelasti wali jach’at art’äna maynïr pusi angelanakaru, uka angelanakasti munañanïñ kankañ katuqapxatayna aka uraqimpiru, jach’a qutampir jan walt’ayañataki, ³ akham sasa: “¡Jan kuna ñanqhsa uraqir lurapxamti, janirak jach’a qutarusa, janirak quqanakarusa, Tatit Diosasan luqtirinakapar paranakapat chimpuntañkama!” sasa. ⁴ Ukatsti khitinakatix chimpuntatäkän ukanakan, patak pusi tunka pusin waranqa jaqinakätap aytir ist’arakta, israelankir wawanakan taqpach ayllupankirinaka. ⁵ Judá ayllunkiritxa, tunka payan waranqaniw chimpuntatäpxäna; Rubén ayllunkiritxa, tunka payan waranqa; Gad ayllunkiritsti, tunka payan waranqa; ⁶ Aser ayllunkiritxa, tunka payan waranqa; Neftalí ayllunkiritxa, tunka payan waranqa; Manasés ayllunkiritsti, tunka payan waranqa; ⁷ Simeón ayllunkiritxa, tunka payan waranqa; Leví ayllunkiritxa, tunka payan waranqa; Isacar ayllunkiritsti tunka payan waranqa; ⁸ Zabulón ayllunkiritxa, tunka payan waranqa; José ayllunkiritxa, tunka payan waranqa; Benjamín ayllunkiritsti tunka payan waranqa. ⁹ Uka qhipatsti, walja jaqinak uñjta taqi markanakata, kunayman janchini, kunayman parlani; uka jaqinakasti waljanipunïnwa, janiw khitis jakt’irjamäkänti. Jupanakasti qhapaq qunuñ nayräxana, Cordero nayräxan sayt’atäsipkänwa, janq’u isin isthapitkamakïnwa, amparanakapar layminakas ayt’atkamakirakïnwa. ¹⁰ Taqiniw wali jach’at art’asipxäna akham sasa: “¡Qhispiyasiñax Diosasat juti, qhapaq qunuñan qunt’atäki ukata, Corderota!” ¹¹ Taqpach angelanakasti qhapaq qunuñar muyuntat sayaratäpxänwa, uka jilïrinakampiru, uka pusi jakaskirinakampir muyuntata. Ukatsti uraqkam alt’asaw qhapaq qunuñ nayraqatan killt’asipxäna, ukatsti Diosaruw yupaychapxarakïna ¹² akham sasa: “¡Ukhamäpan! Tatit Diosasar churatäpan: Yupaychañasa, qhapaq kankañasa, yatiñ kankañasa, yuspagarañasa, jach’añchañasa, munañanïñ kankañasa, ch’aman kankañasa, wiñayan wiñayapataki. ¡Ukhamäpan!” ¹³ Ukxarusti, jilïrinakat mayniw nayar jiskt’itu: “¿Khitinakarak janq’ut isthapit jaqinakasti? ¿Kawkitarak jutapxisti?” sasa. ¹⁴ Nayasti ukxaruw sista: “Tata, jumaw yattaxa” sasa. Jupasti sarakituwa: “Uka jaqinakax uraqin wali jach’a llakinakampi t’aqhisinipki ukanakawa, isinakap Corderon wilapampi t’axsusaw janq’uptayapxi. ¹⁵ “Ukat jichhax Diosan qhapaq qunuñap nayraqatankasipki, uruy arumaw utapan jupar luqtapxi. Qhapaq qunuñan qunt’atäki ukaw, jupanakampïni, jupanakar imarakini. ¹⁶ Janiw manq’atsa umatsa t’aqhiskxapxaniti, janirakiw intis nakhantkaniti, lupis jupanakar jan walt’aykarakiniti, ¹⁷ qhapaq qunuñ taypinkki uka Corderow jupanakarux ovejanakarjam awatini, jakkir uma jalsunakaruw anakirakini, Diosasti taqi jachanakap nayranakapat phiskhurxani” sasa.

¹ Corderox qillqatan paqallqüri sello jist’arkän ukkhasti, alaxpachanxa taqi kunaw amukt’äna niya kimsa tunka k’atanakjama. ² Ukatsti paqallqu angelanakar Diosan nayraqatapankaskir uñjarakta, jupanakarusti paqallqu trompetanakaw churasïna. ³ Ukatsti yaqha angelarakiw jutäna, qurit lurat incienso q’apichañ apt’ata, jupasti altar nayräxaruw sayt’asïna. Uka angelasti walja incienso katuqi, qhapaq qunuñ nayraqatankir quri altarxan luqtañataki, qullan markan mayisïwinakapamp chika luqtañataki. ⁴ Incienso jiwq’isti angelan amparapat Diosan nayraqataparuw makhatäna, qullan markan mayisitanakapamp chika. ⁵ Ukatsti angelax incienso q’apichañ katusinxa, altarankir nina sank’anakampiw ukar phuqhantäna, ukatsti aka uraqiruw uk wartanxäna; ukapachasti taqi chiqanakan qhixu qhixunakampi, uxuñanakampi, lliju llijunakampi, uraq khathatimpiw utjarakïna. ⁶ Ukatsti paqallqu trompetanak apt’atäpkän uka paqallqu angelanakax phust’añatakiw wakichasipxäna. ⁷ Nayrïr angelaw trompetap phust’äna, ukatsti chhijchhimpi, ninampiw aka uraqirux warxattanïna, wilampi kituntata. Uraqisti niya chikatan chikatapaw nakhantäna, quqanakatsa, taqi ch’uxña quranakatsa niya chikatan chikatapaw nakhantarakïna. ⁸ Ukxarusti payïr angelaw trompetap phust’äna, ukatsti nina nakhaskir jach’a qullükaspas ukar uñtataw jach’a qutar liwintatarakïna, jach’a qutasti niya chikatan chikatapaw wilar tukxäna. ⁹ Qutan jakir taqpach laq’unakat niya chikatan chikatapaw jiwaräna, barconakatsa niya chikatan chikatapaw t’unjat uñjasïna. ¹⁰ Ukxarusti kimsïr angelarakiw trompetap phust’äna, ukatsti mä jach’a warawaraw alaxpachat jalaqtanïna, nina wiyar uñtat nakhaskiri, ukasti niya chikatan chikatap jawiranakxaru, uma jalsunakxaruw jalxattäna. ¹¹ Uka warawarasti K’allk’u satänwa; umanakasti niya chikatan chikatapaw k’allk’u tukuwayxäna, walja jaqinakarakiw jiwarapxäna uman wali k’allk’ütap layku. ¹² Ukxarusti pusïr angelarakiw trompetap phust’äna, ukatsti intimpi, phaxsimpi, warawaranakampix niya chikatan chikatapaw t’unjat uñjasïna, janiw qhant’kxänti. Ukat intix urun niya chikatan chikatap jan qhant’känti, phaxsimpi, warawaranakampisti niya chikatan chikatapaw aruman jan k’ajapkänti. ¹³ Uñtaskakïyätwa, ukatsti mä pakaruw uñjta, alaxanjam tuyuskiri, wali jach’at sarakïna: “¡Ay! ¡Kunakïkan aka uraqin jakir jaqinakatxa, kunapachatix yaqha kimsa angelanakax trompetanakap phust’apkani ukapachaxa!” sasa.

¹ Ukxarux phisqïr angelaw trompetap phust’äna, ukatsti mä warawar uñjta, alaxpachat uraqiruw jalaqtanitayna; uka warawarasti uraqi manqha pachan jist’arañanakap katuqäna. ² Ukatsti uka ch’amak manqha jist’aräna, uka ch’amak manqhatxa jiwq’iw mistüna mä jach’a hornot mistunkaspa ukhama; uka jiwq’iw intiru, saman thayar q’al ch’amakt’ayäna. ³ Uka jiwq’itsti t’iju t’ijunakaw misturäna, ukatsti aka uraqin phuqhantapxäna, ukanakasti munañanïñ kankañ katuqapxäna, jaqinakar alacrán sat laq’unakar uñtat achjañataki. ⁴ Ukanakasti uraqinkir quranakaru jan ñanqha lurapxañapatakiw ixwa katuqapxäna, janirak kuna ch’uxñanakarusa, kuna quqanakarus ñanqha lurapxañapataki, jan ukasti, khitinakatix Tatitun chimpupampi paranakapan jan chimpt’atäpki uka jaqinakaruk t’aqhisiyañataki. ⁵ Janiw uka t’iju t’ijunakax jaqir jiwarayañatak munañanïñ katuqapkänti, jan ukasti, jaqinakar phisqa phaxsi t’aqhisiyañatak uskutäpxänwa; t’iju t’ijunakan achjatapasti, alacrán sat laq’un mich’ipat sipan juk’amp usuykirïnwa. ⁶ Uka phisqa phaxsinsti, achjat uñjasipkatayna uka jaqinakax, jiwañak munxapxäna, ukampis jakasipkakïnwa. Jiwax jupanakat jaltkaspa ukhamänwa. ⁷ Uka t’iju t’ijunakasti nuwasiñatak wakichat caballonakar uñtatänwa, p’iqinakaparux niyas quri pillumpjam asxatatänwa, jaqi ajanut ajanunjamarakïnwa. ⁸ Ñik’utanakapasti warmi ñik’utar uñtatänwa, laka ch’akhanakapasti leonan laka ch’akhapar uñtatarakïnwa. ⁹ Janchinakapasti hierro isimpi isthapitäkaspas ukhamänwa, chhiqhanakapan jawq’alitanakapasti, nuwasiñar mantir caballonakan qatatit walja carronakan uxutapjamänwa. ¹⁰ Wich’inkhanakapasti, alacranan mich’ini wich’inkhapjamänwa, ukampisti ch’amanirakïnwa jaqir phisqa phaxsi t’aqhisiyañataki. ¹¹ Uka t’iju t’ijunakan jilïripasti manqha pachan angelapawa. Aka angelasti hebreo arunxa Abadón satawa, griego arunsti Apolión satarakiwa, paypach arunsti sutipax “T’unjiri” sañ muni. ¹² Nayrïr t’unjäwix tukusxänwa, ukampis payampiw jutañapäski. ¹³ Suxtïr angelax trompetap phust’arakïna. Ukatsti akatjamat mä aru ist’ta, uka arusti Diosan nayräxapankkis uka quri altaran pusi waxrap taypit mistunïna. ¹⁴ Uka arusti trompeta phust’katayna uka suxtïr angelaruw säna: “Éufrates jawir thiyan chinuntatäkis uka pusi angelanakar antutnukxam” sasa. ¹⁵ Ukapachaw uka pusi angelanakax jaranukut uñjasipxäna, niya chikatan chikatap jaqinakar jiwarayañataki, jupanakasti uka pachataki, uka urutaki, uka phaxsitaki, uka maratak wakichatäpxataynawa. ¹⁶ Ukatsti ist’araktwa, caballot sarir soldadonakan pä patak waranqätapa. ¹⁷ Ukham uka unañchäwin caballonak uñjta, uka caballonakar lat’xatat soldadonakasti, metalat lurat jark’aqasiñan uchatäpxänwa, ukasti ninar uñtat wila, zafiro qalar uñtat sajuna, azufrer uñtat q’illurakïnwa. Uka caballonakan p’iqinakapasti león p’iqinakar uñtatänwa, lakanakapatsti ninampi, jiwq’impi, azufrempiw mistüna. ¹⁸ Jaqinakasti niya chikatan chikatapaw jiwaräna, uka caballonakan lakanakapat mistur ninampi, azufrempi, jiwq’impi. ¹⁹ Uka caballonakan ch’amapasti lakampina, wich’inkhampinkänwa; wich’inkhanakapax katarinakar uñtatänwa, p’iqinakapampiw jaqinakar usuchjapxäna. ²⁰ Uka t’aqhisïwinakampi jan jiwarir jaqinakasti, jichhax janirakiw jan wali luratanakap apanukupkänti, kunayman ajayunakar yupaychañsa janirakiw apanukupkänti; qurita, qullqita, bronceta, qalata, lawat lurat diosanakarus yupaychasipkakïnwa, jan uñjiri, jan ist’iri, jan sarnaqiri diosanakaru. ²¹ Uka jaqinakax janiw jaqi jiwayatanakapat kutikipstapkänti, layqasitanakapatsa, wachuqa juchan sarnaqatanakapatsa, lunthatasipxatapatsa janirakiw kutikipstapkänti.

¹ Ukatsti ch’aman kankañan yaqha angelaruw uñjta, alaxpachat qinayan llawuntat saraqasinkiri; p’iqipxansti mä kürmiw utjäna, ajanupax intir uñtataw qhanäna, kayunakapasti nina lawranakar uñtatänwa. ² Amparaparusti jist’arat mä jisk’a qillqat apt’atänwa. Ukatsti kupi kayup jach’a qutxaruw takt’asïna, ch’iqa kayupsti uraqxarurakiw takt’asïna. ³ Ukatsti mä leonar uñtataw wali jach’at art’asïna; art’askän ukkhasti, paqallqu qhixu qhixunakaw arunakap ist’ayasirakïna. ⁴ Uka paqallqu q’ixu q’ixunakan ist’ayasitapatsti, nayax qillqañampïskäyätwa, ukampis alaxpachat mä aru ist’ta, uka arusti situwa: “Amuki imxäsim kuntix uka paqallqu qhixu qhixunakax parlki ukxa, janirak qillqamti” sasa. ⁵ Ukapachaw kawkïr angelatix qutxaru, uraqxaru takt’atäkän uka angelax, kupi amparap alaxpachar aytäna, ⁶ ukatsti mä juramento lurarakïna, khititix wiñayatak jakki, khitirakitix alaxpachsa, akapachsa, qutsa, ukan utjir taqi kunsa lurki ukan sutiparu. Sarakïnwa: “Janiw jichhax juk’ampi suyaskxaniti, ⁷ paqallqür angelax trompetap phust’añ qalltkani ukkhaxa, Diosan imantat amtatanakapax phuqhasxaniwa, kunjämtix jupax profetanakap tuqi yatiykän ukhamarjama” sasa. ⁸ Alaxpachat aru ist’käyät uka arusti, wasitat nayampi parläna, akham sasa: “Jak’achasim, uka jist’arat jisk’a qillqat katum. Qutxampiru, uraqxampir takt’atäkis uka angelan amparapat katuqam” sasa. ⁹ Nayasti angelan ukar jak’achasin uka jisk’a qillqat mayista, jupasti sarakituwa: “Katum, ukat manq’antarakim. Lakaman misk’ir uñtat muxsäniwa, purakamansti wali k’allk’urakiw tukxani” sasa. ¹⁰ Nayasti angelan amparapat uka jisk’a qillqat apaqta, ukatsti manq’antaraktwa; lakaxansti misk’ir uñtat wali muxsapunïnwa, purakaxansti wali k’allk’üxarakïnwa. ¹¹ Ukat sapxitu: “Jichhax Diosan amtäwinakap walja markanakankir jaqinakar yatiyañamawa, kunayman parlani jaqinakaru, reyinakaru” sasa.

¹ Ukatsti tupt’añ lawa churapxitu, suqusar uñtata, ukat sapxarakitu: “Sartasim, Tatitun utap tupt’anim, altar tupt’arakim, ukatsti qawqhanitix ukan yupaychapki taqi jupanakar jakt’anim. ² Ukampis uta anqäxäkis ukxa janiw tupt’kätati, ukasti jan judiöpkis uka jaqinakar katuyatäxiwa, uka jaqinakasti pusi tunka payan phaxsiw Jerusalén qullan marka apnaqapxani. ³ Nayasti pani profetanakaruw khithanï nayan chiqpach yatiyäwix parlapxañapataki. Jupanakarusti chhankha isinakampi isthapit khithanï, profecía arunak uka waranqa pä pataka suxta tunkani urun yatiyapxañapataki” sasa. ⁴ Uka pani profetasti, Tatitun nayraqatapankapki uka pä olivo quqampi, pä candelerompiwa. ⁵ Khititix uka paninir kuna jan walsa lurañ munanixa, jupanakax lakapat nina axsupxi, uka ninasti uñisirinakaparux q’al nakhanti; ukham nakhantataw jiwani, khititix kuna jan walsa jupanakar lurkani ukanakaxa. ⁶ Jupanakax alaxpach jist’antañatakisa munañanïpxiwa, Diosat katuqat arunak parlapkani uka urunakan jallun jan puriñapatakisa, umanakan wilar tukuñapataki, akapach jaqinakar kunayman mutuñanakampi munataparjam qawqha kuti t’aqhisiyañatakis munañanïpxarakiwa. ⁷ Kunapachatix lurañap phuqhapxani ukkhaxa, aka uraqi manqhat mistuniri axsarkañ jach’a animalaw jupanakar nuwantasin atipjani, ukat jiwayarakiniwa. ⁸ Amayanakapasti, kawkintix Tatitux ch’akkatatäkän uka jach’a markan thakhinakapan jaqtatäskaniwa. Uka markasti mä arunxa Sodoma, ukhamarak Egipto satarakiwa. ⁹ Kimsa uru chikataniw kunayman markankir jaqinaka, kunayman jaqinaka, kunayman parlani jaqinaka, taqi markanakata uka jiwat janchinak uñjapxani, janiw khitisa p’amp’antasiñap munkaniti. ¹⁰ Aka uraqin jakirinakasti wal kusisipxani jupanakan jiwarapxatapata. Kusisiñatsa jupanakkamaw churäwinaksa waxt’asipxani, uka pani profetanakan jaqinakar wali t’aqhisiyirïtap layku. ¹¹ Uka kimsa uru chikatan qhipatsti, Diosax uka pani profetarux jakatatayxänwa, jupanakax wasitat sayt’asxapxäna; jaqinakasti jupanak uñjasax wal axsarapxäna. ¹² Ukapachasti uka pani profetanakax alaxpachat mä aru ist’apxäna, jupanakar jach’at art’aniri, uka arusti sarakïnwa: “¡Akar makhatanipxam!” sasa. Jupanakasti mä qinayanjam alaxpachar makhatapxäna, taqpach uñisirinakapan uñjkata. ¹³ Ukapachaw mä jach’a uraq khathatix sartäna, uka uraq khathatisti markan mä qawqha chiqanakap t’unthapïna, paqallqu waranqa jaqinakarakiw uka uraqi khathatimpix jiwaräna. Qhiparirinakasti, axsarañatsa alaxpachankir Diosaruw yupaychapxäna. ¹⁴ Payïr t’aqhisiñax ukänwa, kimsïrïk ukasti jank’akiw jutaski. ¹⁵ Paqallqür angelasti trompetap phust’äna, ukatsti alaxpachan jach’at art’asir arunakaw ist’asïna: “Akapach markanakax Tatit Cristosaruw jaqkattxapxi, jichhax jupaw wiñayan wiñayapatak marka apnaqani” sasa. ¹⁶ Ukatsti uka pä tunka pusin jilïrinakax, khitinakatix qunuñanakapan Dios nayräxan qunt’atäsipkän ukanakax, ajanunakap uraqkam alt’asaw killt’asis, Diosar yupaychapxäna, ¹⁷ akham sasa: “Taqi ch’aman Dios Tatay, yuspagarapxsmawa, jumax jakasktawa, utjaskapunïyätawa, utjaskaktawa, jichhas utjaskakipunïtawa. Jichhax jach’a ch’amam katxartaxa, aka uraqi apnaqañ qalltaraktaxa. ¹⁸ Jumar jan iyawsir markanakax q’apisitäpxiwa; ukampis q’apisiñam urux puriniwa, jiwatanakar taripkäta uka uruxa. Jumar luqtir profetanakarusti mä waxt’äwi churäta, qullan markamarusa, sutim waqaychirinakarus waxt’äwi churarakïta, jisk’arusa, jach’arusa; aka uraqi t’unjirinakarusti, jumax t’unjarakïtawa” sasa. ¹⁹ Ukatsti Tatitun utapan punkunakapaw alaxpachan jist’artäna, uka utap manqhansti arust’äwipa arcaw uñstäna. Ukatsti lliju llijunakampi, qhixu qhixunakampiw utjäna, wali uxuñanaka, uraq khathatinaka, wali ch’aman chhijchhimpiw utjarakïna.

¹ Alaxpachansti mä jach’a chimpuw uñstäna: mä warmiw intin llawuntat uñstäna, phaxsisti kayunakapankänwa, p’iqiparusti mä pillumpi asxatatänwa, uka pillunsti tunka payan warawaranakaw utjäna. ² Uka warmisti usurïnwa, walpun warariskäna, wawachasiñatakiw wal t’aqhisiskäna. ³ Ukatsti yaqha chimpuw alaxpachan uñstarakïna: mä jach’a wila dragón animalaw uñstäna, ukasti paqallqu p’iqinïnwa, tunka waxran kuna, sapa p’iqirusti mä pillumpi asxatata. ⁴ Wich’inkhapampisti niya chikatan chikatap alaxpach warawaranak qatatïna, ukatsti uraqiruw willirtayanïna. Uka dragonasti wawachasir warmin nayräxaparuw sayt’asi, yurkani uka wawar ukspach manq’antañataki. ⁵ Uka warmisti mä yuqall wawa wawachasïna. Uka wawaw akapach uraqin taqpach markanakar wali qhuru kankañampi apnaqani. Ukampis wawapar apaqapxänwa, ukatsti Diosan nayraqataparuw irpapxäna, qhapaq qunuñap nayräxaru. ⁶ Warmisti wasararuw jaltxäna, Diosax jupatak mä chiqa wakichkatayna ukkharu, ukawjan waranqa pä pataka suxta tunkan uru jupar uñjapxañapataki. ⁷ Ukatsti mä jach’a nuwasiñaw alaxpachan utjäna: Arcángel Miguelasti angelanakapampi sayt’asisin uka dragonampiw nuwasïna. Dragonampi angelanakapampisti sayt’asipxarakïnwa, ⁸ ukampis janiw atipjapkänti, janirakiw alaxpachan jupanakatak mä chiqax utjkxänti. ⁹ Uka jach’a dragonasti alaxpachat jaqunukutaw uñjasïna, ukax nayratpach utjir katariwa, supaya, Satanás satarakiwa, jupaw aka uraqin jaqinakar sallqanti. Jupampi angelanakapampisti aka uraqir jaquqanitaw uñjasipxäna. ¹⁰ Ukatsti mä jach’a aru alaxpachan ist’ta, uka arusti sänwa: “Tatitusan qhispiyasiñapampi, munañanïñ kankañapampi, marka apnaqañapampix purinxiwa; Jesucriston munañanïñ kankañapax purinxiwa. Jilanakasar k’arintas juchañchirix jaqunukutäxiwa, uruy aruma, jilanakasar Dios nayraqatan juchañchirix jaqunukutäxiwa. ¹¹ Jilanakasax atipjapxiwa, Corderon wartat wilapampi, chiqa arunak qhanañchapxatapampi; janirakiw jiwañsa axsarapkänti, jiwañatakis jank’akïpxarakïnwa. ¹² Ukalayku, ¡kusisipxam, alaxpachanaka, ukan utjirinakas kusisipxam! Ukampis, ¡kunakïkan uraqimpina qutampin jakirinakatakixa! Supayasti urunakapan juk’akïxatap yatisinxa jumanakampi katuntasiriw wali q’apisit saraqani” sasa. ¹³ Uka dragonasti uraqir jaqunukuta uñjasxasinxa, yuqall wawa wawachaskän uka warmiruw arknaqañ qalltäna. ¹⁴ Ukampis warmirux pakan pä jach’a chhiqhanakapaw churasïna, uka chhiqhanakampi wasarar jaltxañapataki, dragonat jayaru, kawkhantix kimsa mara chikatan manq’ayapkani ukkharu. ¹⁵ Uka dragonasti lakapat walja uma mistuyäna, mä jawirar uñtata, warmir uka jawirampi apayañataki; ¹⁶ ukampis uraqiw warmirux yanapt’äna, uraqisti mä p’iya jist’aräna, ukasti lakapäkaspas ukhamaw dragonan lakapat warstkän uka uma umantäna. ¹⁷ Uk uñjasasti dragonax warmitak walpun q’apisïna, ukatsti warmin mayni wawanakapampi nuwasiriw saräna, Diosan kamachinakap jaysirinakampi, Jesucriston arunakap katxäsirinakampi nuwasiriw sararakïna. ¹⁸ Uka dragonasti quta lakxaruw utjantasïna.

¹ Ukatsti axsarkañ mä jach’a animalar qutat mistur uñjta, ukasti paqallqu p’iqinïnwa tunka waxran kuna. Sapa waxrarusti mä pillunïnwa, p’iqinakapansti Diosar ñanqhachir jan wali sutinak qillqataw utjäna. ² Nayax uñjkta uka axsarkañ animalasti leopardo animalar uñtatänwa; kayunakapasti oso animalan kayunakapjamänwa, lakapasti leonan lakapjamarakïnwa. Dragonasti uka animalarux ch’amapampi, reyi qunuñapampi, wali munañanïñ kankañapampi katuyäna. ³ Uka animalan mayïr p’iqipasti jiwañapatak chhuxriñchatjamänwa, ukampis uka chhuxripax qullatäxänwa. Aka uraqpacharakiw uk uñjasax wal muspharäna, ukatsti uka animalaruw arkapxäna. ⁴ Taqiniw dragonarux yupaychapxäna, uka jach’a axsarkañ animalar munañanïñ kankañ churatapata; uka axsarkañ animalarux yupaychapxarakïnwa: “¿Khitirak aka jach’a axsarkañ animaljam utjisti? ¿Khitirak jupampi nuwasispasti?” sasa. ⁵ Uka axsarkañ animalarusti, jach’a jach’a tukuñampi Diosar ñanqhachas jan wali arunak parlañapatak munañanïñaw churatarakïna, pusi tunka payan phaxsinak marka apnaqañapatakiraki. ⁶ Ukatsti ukhampun luräna; Diosatak jan wali arunak parläna sutip jisk’achasa, qullan utjäwip jisk’achasa, alaxpachan utjirinakar jisk’achasa. ⁷ Ukatsti Diosan wawanakapampi nuwasiñatakis munañanïñ kankañax churatarakïnwa jupanakar atipjañkama; ukhamarus kunayman jaqinakaru, markanakaru, kunayman parlani jaqinakar apnaqañataki. ⁸ Taqi khitinakatix aka uraqin jakapki, ukatsti uraqi qalltatpacha luqtat Corderon jakañ qillqatapan sutinakapas jan qillqatäpki ukanakaxa, uka jach’a axsarkañ animalaruw yupaychapxani. ⁹ Khititix jinchunïki ukax, ist’pan: ¹⁰ “Katuntat apatäñapäki ukanakax, katuntat apatäpxaniwa; espadampi jiwayatäñapäki ukanakax, espadampi jiwarayatäpxaniwa.” Taqi akanakan yatisini, Diosan qullan markapan ch’amanïtapasa, iyawsañanïtapasa. ¹¹ Ukatsti yaqha jach’a axsarkañ animalar uraqit mistusinkir uñjarakta. Ukasti pä waxranïnwa, waxranakapasti urqu ovejan waxranakapar uñtatänwa, parlapasti dragonan parlapjamänwa. ¹² Nayrïr jach’a axsarkañ animaljam munañanirakikïnwa, jupan nayraqatapana. Aka uraqin utjirinakarusti uka nayrïr jach’a axsarkañ animalar yupaychapxañapatakiw wayt’äna, jach’a chhuxripat waliptkataynas ukaru. ¹³ Jupax wali jach’a muspharkañanak lurarakïna, uraqirus alaxpachat nina jalluyanïna, taqi jaqin uñjkata. ¹⁴ Nayrïr axsarkañ animalan churata munañanïñ kankañampiw aka axsarkañ jach’a animalax muspharkañanak luratap tuqi uraqin jakir jaqinakar sallqantäna. Ukatsti nayrïr jach’a axsarkañ animalar uñtat lursuyarakïna, kawkïritix espadampi chhuxriñchjatäsin jakaskatayna ukar uñtata. ¹⁵ Aka payïr jach’a axsarkañ animalasti munañanïñ kankañ katuqäna, nayrïr jach’a axsarkañ animalar uñtasit lursutar jakañ churañapataki, ukhamat ukan parlañapataki, uka lursutar jan yupaychirinakarusti jiwarayañapataki. ¹⁶ Ukhamarus taqinin kupi amparapampiru, jan ukax, parapampiruw mä chimpu chimpt’ayäna, jisk’a jaqirusa, jach’a jaqirusa, pist’añan jakasir jaqirusa, qamirirusa, antutat sarnaqasirirusa, uywat jaqirusa. ¹⁷ Janirakiw khitis kun alasiñapäkänti, aljasiñapäkänsa, janitix uka chimpunïkäna, jan ukax, uka jach’a axsarkañ animalan sutipampi chimpt’atäkäna, jan ukax, uka axsarkañ animalan sutipan jakhupanïkän ukaxa. ¹⁸ Yatiñ kankañax akankiwa: Khititix amuyt’ki ukax, uka axsarkañ animalan jakhüwip amuyt’pan, uka jakhüwisti jaqin jakhupawa, ukasti suxta patak suxta tunka suxtaniwa.

¹ Ukatsti Corderoruw uñjta, Sión qullu patan sayaskiri. Jupamp chikasti patak pusi tunka pusin waranqa jaqinakaw ukankaskäna, jupanakasti paranakaparux Corderon sutipampi, Awkipan sutipampi qillqt’atäpxänwa. ² Ukatsti alaxpachat mä aru ist’ta, ukasti uma phaxchanakas qhututkaspa, jan ukax, mä qhixu qhixus ist’askaspa ukhamänwa; walja jaqinakas arpanakap jat’intapkaspa ukhamarakïnwa. ³ Jupanakasti mä machaq q’uchu q’uchupxäna qhapaq qunuñ nayräxana, uka pusi jakaskirinakan nayraqatapana, ukhamarak uka pä tunka pusin jilïrinakan nayraqatapana. Janiw maynis uka q’uchu yatiqirjamäkänti, jan ukasti patak pusi tunka pusin waranqa jaqinakakiw yatiqapxäna, ukanakasti uraqit irpsuta qhispiyatanakänwa. ⁴ Jupanakasti janiw k’ari diosanakar yupaychas q’añuchasipkataynati, jupanakax taqpachaniw Corderor arkapxäna, kawkirutix jupax sarkän ukaru. Jupanakax jaqinak taypit qhispiyatäpxataynawa, nayrïr churäwi Diosampir Corderompir luqtañataki. ⁵ Janirakiw jupanakan kuna k’arisitapas utjkänti, jupanakax Diosan nayraqatapan jan juchañchkayänwa. ⁶ Ukxarusti yaqha angelaruw alaxpachan tuyunaqaskir uñjta, jupasti wiñay suma yatiyäwi apt’atänwa, uraqin jakir jaqinakar yatiyañataki, taqi markanakaru, kunayman jaqinakaru, kunayman parlan jaqinakar yatiyañatakiraki. ⁷ Jupax wali jach’a arumpiw art’äna: “Diosar axsartapxam, jupar yupaychapxarakim, taripañap urux purinxiwa. Alaxpacha, akapacha luririr yupaychapxam, qutanak luririru, uma jalsunak luririr yupaychapxam” sasa. ⁸ Uka angelarusti yaqha angelarakiw arkäna, akham sasa: “¡Aynacht’xiwa, aynacht’xiwa, jach’a Babiloniaw aynacht’xi, taqpach markanakar jucha lurañanak yatichiri, k’ari diosanakar jaysañ yatichir markax t’unjataw uñjasxi!” sasa. ⁹ Ukxarusti kimsïr yaqha angelarakiw jupanakar arktäna, wali jach’at art’asisa: “Khititix uka jach’a axsarkañ animalar yupaychkani, ukar uñtasit lursutarus yupaychkani, uka axsarkañ animalan chimpupampi amparaparusa, jan ukax, paraparus uchayaskani ukaxa, ¹⁰ Diosat jutkani uka jach’a mutuyäwi katuqani, q’apisiñapasti wakichatawa; azufrempi ninampi t’aqhisiyataw uñjasini, qullan angelanakampi, Corderompiw mutupxatap uñjapxani. ¹¹ T’aqhisiykani uka ninan jiwq’ipasti wiñayapuniw jiwq’ini, uka jach’a axsarkañ animalar yupaychirinakampi, ukar uñtasit lursutar yupaychirinakampi, amparaparus, paraparus uka animalan sutipampi chimpt’ayasirinakax, wiñayaw t’aqhisipxani, janirakiw urus arumas samarañ jikxatapkaniti” sasa. ¹² ¡Taqi akanakan yatisini, Diosan qullan markapan ch’amanïtapasa, kamachi arunakapar phuqhirinakan ch’amanïtapasa, Jesucristor iyawsañanïtapasa! ¹³ Ukapachaw mä aru ist’ta, alaxpachat art’asisinkiri: “Aka arunak qillqantam: ‘Khitinakatix akat uksar Tatitur iyawsas jiwapki ukanakax kusisiñanïpxiwa’ ” sasa. Diosan Ajayupax siwa: “Ukhamawa,” jupanakax taqi t’aqhisiñanakapata, jan walt’añanakapat samarxapxani, Diosasti jupanakar taqi aski luratanakapat waxt’äwip churani” sasa. ¹⁴ Ukatsti uñtasin mä janq’u qinay uñjta, uka qinayxansti mayniw qunt’atäskäna, jupasti Jaqin Yuqapar uñtatänwa. P’iqiparux quri pillumpi asxatatänwa, amparaparusti yawiñ ayt’atarakïnwa, uka yawiñasti wali arïnwa. ¹⁵ Ukatsti Tatitun utapat yaqha angelaw mistunïna, ukat uka qinay patan qunt’atäkis uka angelar jach’at art’äna: “¡Yawiñamampi yawthapiñ qalltam, apthapiñ urüxiwa, yapusti q’illuratäxiwa!” sasa. ¹⁶ Ukspachaw qinay patan qunt’atäkän ukax, yawiñapampi yapunak apthapi aka uraqina. ¹⁷ Ukatsti yaqha angelarakiw Tatitun utapat mistunïna, jupasti mä ari yawiñ ayt’atänwa. ¹⁸ Yaqha angelasti altarat mistunirakïna. Uka angelasti ninar apnaqañatak munañanïnwa, ukatsti ari yawiñ ayt’atäkänsa uka angelaruw jach’at art’äna: “¡Uka ari yawiñamampi yawirañ qalltam! ¡Uraqin utjir uva yapunakat uva achunak apthapim, uvasti puquratäxiwa!” sasa. ¹⁹ Angelasti yawiñapampiw uraqin utjir uva yapunakan achunakap yawthapïna, ukatsti mä jach’a uchañaruw warantäna, ch’irwsutäñapataki, ukasti Diosan mutuyäwipax ukhamäniwa sañ muni. ²⁰ Uka uvanakasti marka anqäxan ch’irwsutänwa, uva uchañatsti wilax waljapuniw mistunïna, kimsa metro chikatankam makhatasa, kimsa patak kilómetro ukch’ar llumitatasa.

¹ Ukatsti alaxpachan yaqha jach’a chimpurak uñjta, ukasti wali muspharkañänwa. Paqallqu angelanakaw paqallqu mutuyäwimpi uñstanïna, ukanakasti qhip qhipa mutuyäwinakawa, ukanakampiw Diosan q’apisiñapax tukusxäna. ² Ukatsti uñjaraktwa qhispir uñtat mä jach’a quta, ninampi kituntatjama; uka quta thiyansti khitinakatix jach’a axsarkañ animalar atipjapkatayna ukhamaraki uka animalan sutipan jakhupampi chimpuntayasiñ jan munapkatayna, janirak uka animalar uñtasit lursutapar yupaychapkatayna ukanakaw sayt’atäsipkäna. Diosax jupanakar churkatayna uka arpanak apt’atkamaki. ³ Ukatsti Diosan luqtiripa Moisesan q’uchupampi, ukhamarak Corderon q’uchupampi q’uchupxäna, akham sasa: “Taqi ch’aman Tatit Diosay, luratanakamax jach’awa, muspharkayarakiwa. Markanakan Reyipa, sarnaqäwinakamax chiqapawa, askirakiwa. ⁴ Tatay, ¿khitirak jumar jan axsarätamsti? ¿Khitirak sutimar jan yupaychanisti? Juma sapakïtaw qullanaxa; taqi markanakaw jumar yupaychir jutani, chiqa aski luratanakaman qhanstatap layku” sasa. ⁵ Uka qhipatsti, alaxpach tuqiruw uñtarakta, ukatsti qullan utjäwi jist’artir uñjta, arust’äwin carpapa. ⁶ Uka qullan utjäwitsti paqallqu angelanakaw mistunïna, paqallqu mutuyäwinakas apt’ata. Uka angelanakasti suma q’uma qhankir lino isinakampi isthapitänwa, quri wak’anakampi wak’antatarakïnwa. ⁷ Ukatsti uka pusi jakaskirinakat mayniw, sapa mayni angelaru qurit lurat mä qiru churäna, ukanakasti wiñayan wiñayapatak jakki uka Diosan jach’a axsarkañ q’apisiñapampi phuqhantata. ⁸ Qullan utjäwisti jiwq’impi phuqhantatänwa, uka jiwq’isti Diosan jach’a kankañapata, ch’amapat jutäna, janirakiw khitis ukarux mantañatak ch’amanïkänti, kuntix paqallqu angelanakax paqallqu t’aqhisïwinak apapkän ukanakan phuqhasiñapkama.

¹ Ukatsti mä jach’a aru ist’arakta qullan utjäwit mistuniri, paqallqu angelanakarusti sänwa: “Sarapxam, ukatsti Diosan q’apisiñapamp phuqhantat paqallqu qirunak uraqir waranukunipxam” sasa. ² Nayrïr angelasti sarasin uraqiruw qirup waranuküna; ukatsti taqi khitinakatix uka jach’a axsarkañ animalan chimpupampi chimpt’atäpkäna, ukar uñtasit lursutarus yupaychapkarakïn uka jaqinakarusti, jan wali llixti usuw janchinakapar mistüna, wal usuyasa. ³ Payïr angelasti jach’a qutxaruw qirup warxatäna, jach’a qutasti wilaruw tukuwayäna, jiwayat jaqin wilapjamaw tuküna, jach’a qutan taqi jakirinakasti q’alaw jiwaräna. ⁴ Kimsïr angelasti jawiranakxaru, uma jalsunakxaruw qirup warxatarakïna, jawiranakampi uma jalsunakampisti wilaruw tukuwayxäna. ⁵ Ukatsti umanakar apnaqir angelar akham arsur ist’arakta: “Jumax chiqapapunïtawa, akham taripatamata Qullan Dios Tatay. Jumax utjasktawa, utjaskapunïyätawa, jichhas utjskapuntawa. ⁶ Uka jaqinakax jumar katuyat jaqinakarusa, profetanakarus jiwarayapxänwa. Jichhasti jumax jupanakar wila umayaraktaxa. ¡Luratapatjam katuqasisipki!” sasa. ⁷ Ukatsti maynirakiw altarat art’asinïna akham sasa: “Jïsa, taqi ch’aman Dios Tatay, juman taripatamax chiqapapuniwa, askirakiwa” sasa. ⁸ Pusïr angelasti intxaruw qirup warxatäna, ukatsti intix munañanïñ kankañ katuqäna, taqi jaqinakar nakhantañataki. ⁹ Jaqinakax llakkañaw intimpi nakhantat uñjasipxäna, ukatsti Diosan sutip ñanqhachapxäna, uka mutuyäwinak apaqañatak ch’amanïkipansa; uka jaqinakax janiw Diosar yupaychañatak kutikipstapkänti. ¹⁰ Phisqïr angelasti uka jach’a axsarkañ animalan reyi qunuñapxaruw qirup warxatäna, uka marka apnaqäwipasti ch’amakan chhaqtataw uñjasïna. Jaqinakasti t’aqhisiñat laxranakap t’urjasipxäna; ¹¹ ukampis janiw ukhamäkasinsa jan wali luräwinakap apanukupkänti, jan ukasti, jan wali q’añu arunakampiw alaxpachankir Diosar ñanqhachapxäna, llixti usumpi mutupxatap layku. ¹² Suxtïr angelasti Éufrates jach’a jawirxaruw qirup warxatäna, ukatsti uka jawiran umanakapax q’alaw wañsüna, inti jalsu tuqit jutir reyinakan sarakipapxañapataki. ¹³ Ukatsti uñjaraktwa dragonan lakapatsa, uka jach’a axsarkañ animalan lakapatsa, uka k’ari profetan lakapatsa, kimsa ñanqha ajayunak mistusinkiri k’ayranakar uñtata. ¹⁴ Ukanakasti ñanqhanakan ajayunakapänwa, muspharkañanak lurapxarakïna. Akapach taqpach reyinakar tantachiriw mistupxäna, taqi ch’aman Diosan jach’a urupan nuwasiñataki. ¹⁵ “Amuyasipxam, nayax lunthatar uñtataw akatjamat jutä. Suyasapun sarnaqir jaqix kusisiñanïniwa, isinakap imasir jaqis kusisiñanïniwa, q’alal jan sarnaqaskañapataki, p’inqapa jan uñachayaskañapataki.” ¹⁶ Uka ñanqha ajayunakasti mä chiqawjaruw reyinakarux tantachapxi, hebreo arunsti uka chiqax Harmagedón satawa. ¹⁷ Paqallqür angelasti saman thayarurakiw qirupankir waranuküna, ukatsti mä jach’a aruw ist’asini, qullan utjäwinkir qhapaq qunuñatpacha, uka arusti sarakïnwa: “¡Jichhax luratäxiwa!” sasa. ¹⁸ Ukatsti lliju llijunakampi, qhixu qhixunakampi, uxuñanakampi, jach’a uraqi khathatinakampiw utjäna, ukar uñtatax janipuniw kunapachas jaqinakan utjatapatpach uñjaskänti. ¹⁹ Jach’a markasti kimsaruw jaljtäna, akapachankir markanakas q’alarakiw t’unthaptäna; Diosasti Babilonia jach’a markat amtasïna, jach’a q’apisiñapampi mutuyañataki. ²⁰ Ukapachaw taqpach quta wat’anakasa, qullunakas chhaqtxarakïna, ²¹ alaxpachat jach’a chhijchhinakaw jaqinakxar purïna, sapa mayasti pusi tunka kilot jilänwa. Jaqinakasti ukham chhijchhi uñjasax, jan wali arunakampiw Diosar ñanqhachapxäna, uka mutuyäwin sinti jach’ätap layku.

¹ Ukatsti paqallqu qirunïpki uka paqallqu angelanakat mayniw nayan ukar jutasin situ: “Jutam, q’añu lurañanakan sarnaqirin mutuyäwip uñjayäma, jupasti walja jawiranak taypin qunt’atawa. ² Akapach reyinakax jupampiw chikachasipxi k’ari diosanakar yupaychañataki, uraqin utjirinakasti pachparak lurapxi” sasa. ³ Ukatsti, Ajayux uñacht’aykitu uka unañchäwi tuqiw angelax wasarar irpitu. Uka wasaransti mä warmi uñjta, mä axsarkañ jach’a wila animalxar qunxatata. Uka axsarkañ animalasti Diosar ñanqhachir sutinakampi qillqsutänwa, paqallqu p’iqinïnwa, tunka waxranirakïnwa. ⁴ Warmisti wila chupika suma isimpi isthapitänwa, qurimpi, suma qalanakampi, perlanakampi k’achachatarakïnwa. Kupi amparaparusti qurit lurat qiru ast’atänwa, uka qirusti ñanqha luratanakapampi, q’añusitanakapamp phuqhantatänwa; ⁵ paraparusti jan uñt’at sutiw qillqata utjäna, uka sutisti akhamänwa: “Jach’a Babilonia, q’añusirinakan taykapa, akapachan utjir taqi ñanqhanakampina, uñisiñäki ukanakampin taykapa” sasa. ⁶ Ukatsti mäkiw amuyasta uka warmix Diosan wawanakapana, Jesucristot qhanañchirinakan wilapampi machjatätapa. Uk uñjasinsti wali musphataw uñjasta. ⁷ Ukat angelax sarakitu: “¿Kunatarak muspharastasti? Nayaw kuntix aka unañchäwix sañ munki uk amuyt’ayäma. Khitïkitix uka warmisa, khitïkitix uka paqallqu p’iqini, tunka waxrani jach’a axsarkañ animalas uk sarakïma. ⁸ Jumax uñjkta uka axsarkañ animalax nayrapachan jakkäna ukawa, jichhasti ukax janiw jakkxiti, ukampis aka uraqi manqhat mistsunini, jiwañar janïr sarkasa. Uraqin jakirinakasti, khitinakantix sutinakapax akapach qalltatpach jakañ qillqatan jan qillqantatäki ukanakasti, uka axsarkañ animalar uñjasax walpun muspharapxani, uka axsarkañ animalasti nayraw utjäna, jichhasti janiw utjkxiti, ukampis wasitat uñstanini. ⁹ “Ak amuyt’añatakisti, yatiñ kankañaw wakisi: Uka paqallqu p’iqisti, warmix qunt’atäki uka paqallqu qullunakawa, paqallqu reyinakarakiwa. ¹⁰ Uka reyinakat phisqanix jiwaratäxiwa, mayniw jichhax reyit utt’asi, maynisti janïraw jutkiti. Jutkani ukkhasti, juk’a urunakatakikïniwa. ¹¹ Kawkïri jach’a axsarkañ animalatix nayrax jakaskäna, jichhax janirak jakkxiti ukax, uka paqallqu reyinakat maynïriwa. Ukasti payïr kutin reyit utt’asini, uka reyisti paqallqür reyïniwa, ukampis wiñayatak t’unjataw uñjasini. ¹² “Tunka waxranak uñjktas ukax, tunka reyinakawa, jupanakasti janïraw reyit utt’atäpkiti, ukampis mä juk’atakikiw reyi kankañ katuqapxani, uka jach’a axsarkañ animalamp chika. ¹³ Uka tunka reyinakasti mä arust’akïpxiwa, uka jach’a axsarkañ animalarux munañanïñ kankañap churapxani. ¹⁴ Ukatsti, uka jach’a axsarkañ animalampi, uka tunka reyinakampix Corderompiw nuwasipxani, ukampis Corderompi jupar arkirinakampix ukanakar atipjaniwa, Corderox munañaninakansa Munañanipa, reyinakansa Reyipätap layku. Jupar arkirinakax jupampïniwa. Diosan jawsata ajllitanakapawa, suma arkirinakäpxatap layku” sasa. ¹⁵ Angelasti sarakituwa: “Uñjktas uka jawiranaka, kunxarutix q’añusir warmix qunt’atäki ukanakasti, akapacha markanaka, jaqinaka, kunayman parlani markanakawa. ¹⁶ Uñjktas uka tunka waxranakampi, uka jach’a axsarkañ animalampisti, uka q’añusir warmirux uñisipxaniwa, utjirinakap taqpach apaqapxani; q’alalpacharak irpanukupxani, janchip manq’apxani, ukatsti ninaruw nakhantayapxani. ¹⁷ Diosaw uka tunka reyinakan chuymapar usku mayakïpxañapataki, ukatsti kuntix Diosax munki uk lurapxañapataki, uka jach’a axsarkañ animalar munañanïñ churasa, Diosax arski uk phuqhasiñapkama. ¹⁸ Uñjktas uka warmix, uka jach’a markawa, reyipasti aka uraqin utjir taqi reyinakaruw apnaqi” sasa.

¹ Taqi ukanak qhipatsti, yaqha angelaruw uñjarakta alaxpachat wali munañan kankañampi saraqasinkiri; uraqisti uka angelan k’ajatapampiw qhanäna. ² Wali jach’at art’asirakïna: “¡Aynacht’xiwa, jach’a Babiloniax t’unjatawa! ¡Supayanakan utjäwiparuw tukuwayi, kunayman ñanqha ajayunakan putuparuw tukuwayi, kunayman q’añu jamach’inakan tapaparuw tukuwayi, q’añu qhuru uñisit animalanakan tapaparuw tukuwayxaraki! ³ Wachuqa jucha lurat vinopampiw taqi markanakax macharapxi; akapach reyinakasti uka Babiloniampiw wachuqa juchan sarnaqapxi, alakipa lurir jaqinakasti, jupan jan wali sarnaqatapampiw qamiriptapxi” sasa. ⁴ Ukatsti yaqha aru ist’arakta, alaxpachat art’asiniri: “Uka markat mistupxam, jumanakax markaxankirïpxtawa, jan jupamp chika jucha lurasipkañamataki, jupanakxar jutkani uka t’aqhisiñanakas jumanakxar jan purisinkañapataki. ⁵ Jucha luratanakapasti walipuniwa, alaxpachkamarakiw puri. Diosasti ñanqha luratanakap amxäsiwa. ⁶ Kuntix jupax yaqhanakar lurkänxa uka pachpa juparux lurapxam, pä ukkhampirak luratanakapat kutt’ayapxam. Kuna machjañanaktix jupax mayninakatak wakichkän ukatxa, pä ukkhampi wali machjayir uma wakicharapipxam. ⁷ Kunjämtix jupax jach’a jach’a tukurïkänxa ukhamarak jichhax t’aqhisiyapxam, ayquyapxam; jupax chuymapan amuyiwa: ‘Nayax akan reinar uñtat qunt’atäsktwa, janiw ijmäkti, janirakiw t’aqhiskäsa’ sasa. ⁸ Uka arsutap laykuw jupatak t’aqhisiñax mä urunak purinini: jiwañampi, t’aqhisiñampi, manq’at awtjayasiñampi, ninar nakhantayataw uñjasirakini; taqi ch’aman Tatitu Diosaw jupar mutuyañ amti” sasa. ⁹ Akapachankir reyinakasti, nina jiwq’i uñjasax uka warmit wal jachapxani, jakhusipxarakini, jupampi q’añusipxatap layku, k’achachasiñanakar katuyasipxatap layku. ¹⁰ Ninan mutuyäwipar axsarasasti, jayatak uñch’ukipxani, sapxarakiniwa: “¡Ay! ¡Babilonia jach’a marka, ch’aman marka, kunarus purt’asta! ¡Akatjamatakirakis mutuyäwimax purinixä!” sasa. ¹¹ Akapachan alakipa lurir jaqinakasti uka markar uñjasax jachapxaniwa, jakhusipxarakiniwa, janiw khitis aljañanakap alasirix utjkxaniti. Babiloniax jupanakat ¹² quri, qullqi yänak alasïna, suma k’ajkir qalanaka, perlanaka, linot lurat suma sawutanaka, suma wila chupika sawutanaka; suma q’aphin kunayman lawanaka; marfilat lurat yänaka, suma lawanakat lurata, bronceta, hierrota, marmolat lurat yänak alasïna; ¹³ canela, suma q’apkir qullanaka, incienso, mirra, vino, aceite, suma jak’u, trigo; khumur uywanaka, ovejanaka, caballonaka, caballompi qatatiñ carronaka, uywat jaqinaksa. ¹⁴ Uka markarusti sapxarakiniwa: “¡Janirakis suma muxsa achunakamax utjkxtamtixä, uka achunak walxay jumax munirïstaxa; wiñayatakiw apt’asxtaxa, taqi suma kankañama, qamir yänakamsa!” sasa. ¹⁵ Uka yänakampi alakipa luririnakasa, uka markïpan qamiriptirinakasa, mutuyäwir axsarasax jayatak uñch’ukipxani. Jachasisa, jakhusisarakiw ¹⁶ sapxani: “¡Ay! ¡Kunarurak purt’asta! ¡Llakkañätaw ch’aman jach’a marka! Suma lino isinakampi isthapitaw sarnaqäyätaxa, suma wila chupika isinakampi, qurimpi, suma k’ajkir qalanakampi, suma perlanakampiw k’achachasïyätaxa. ¹⁷ ¡Akatjamat ukataqi qamir yänakax tukusiwayxi!” sasa. Barco apnaqir capitananakasa, qutanjam saririnakasa, barcon irnaqirinakasa, alakipa luririnakasa, axsarañatsa jayatak sayt’anipxäna. ¹⁸ Uka markan nakhatapat jiwq’i mistur uñjasasti, jach’at art’apxarakïna: “¡Janipuniw Babilonia markjam wali ch’amanix utjkänti!” sasa. ¹⁹ Ukatsti laq’ampiw p’iqinakapat willxatasipxäna, jachapxäna, wararipxarakïna: “¡Ay, kunarurak purt’asta! ¡Llakkañätaw ch’aman jach’a marka! Qamir yänakamampiw qutan barcompi irnaqirinakax qamiriptapxi. ¡Jichhasti jank’akirakis uka qamir yänakamax tukusiwayxixä!” ²⁰ “¡Alaxpacha, jichhax uka markan tukusitap layku kusisim. Qullananaka, apostolunaka, profetanaka, kusisipxam; Tatituw uka luratapampix chiqapar uñjapxtam” sasa. ²¹ Ukatsti mä wali ch’aman angelaw mä jach’a qala apti, ukasti molino qalar uñtat jach’änwa, ukatsti jach’a qutaruw jaqunti akham sasa: “Jach’a Babilonia marka, akham jaquntataw uñjasïta, janirakiw mayampsa uñjapkxätamti. ²² Marka thakhinakamansti janipuniw arpan jayllitapasa, pinkillunakana, trompetanakan phust’asitapas ist’askxaniti, janirakiw kunayman irnaqirinakasa marka thakhinakaman utjkxaniti, molino qalan ñut’uchatapas janirakiw ist’askxaniti. ²³ Janipuniw juman mä micha qhanas qhankxaniti, jaqichasïwinakan kusisiñ uxutanakapas janirakiw ist’askxaniti. Alakipa lurir jaqinakamax aka uraqpachan wali munañan jaqinakäpxänwa, jumasti layqasitanakamampiw taqpach markanakar sallqanttaxa.” ²⁴ Diosaw uka jach’a markarux mutuyäna, profetanakaru, Diosan markapankirinakar jiwayatapat juchanïtap layku. Uka markaw aka uraqin waljaninakar jiwarayäna.

¹ Uka qhipatsti, walja jaqinakan arunakap ist’ta, alaxpachan akham art’asiri: “¡Aleluya! Qhispiyasiñasa, jach’a kankañasa, munañanïñas Diosasankiwa, ² jupax chiqapar uñjasaw markanakar taripi; jach’a q’añusirirusti juchañchiwa, uka q’añusitapampiw taqi jaqinakar jan walir apaskäna; Diosan luqtirinakapar jiwarayatapat juchañcharaki” sasa. ³ Ukatsti wasitat art’apxarakïna: “¡Aleluya! Aka jach’a q’añusirin jiwq’ipax wiñayan wiñayapatakiw makhatani” sasa. ⁴ Uka pä tunka pusin jilïrinakaxa, ukhamaraki uka pusi jakaskirinakasa, uraqir alt’asin, qhapaq qunuñan qunt’at Diosar yupaychapxäna, akham sasa: “¡Ukhamäpan! ¡Aleluya!” sasa. ⁵ Ukatsti qhapaq qunuñat mä aruw ist’asirakïna: “¡Diosasar yupaychapxam, taqi jupar luqtirinaka, taqi jupar axsartirinaka, jisk’anaka, jach’anaka!” sasa. ⁶ Ukatsti walja jaqis arnaqaskaspa ukham ist’arakta. Ukasti uma phaxchanakan qhututitapjamänwa, jach’a qhixu qhixunakar uñtata, sapxarakïnwa: “¡Aleluya! Taqi munañan Dios Tatitusaw aka uraqir apnaqañ qallti. ⁷ Kusisipxañäni, kusisiñan phuqt’at jupar jach’añchapxañäni, Corderon jaqichasiñap urux purinxiwa. Esposapasti wakicht’atäxiwa. ⁸ Juparuw suma lino lliphipkir q’uma isinakampi isthapisim sataxa, uka suma lino isisti, Diosar axsartasa sarnaqapki ukanakan chiqa jakataparuw uñtasi” sasa. ⁹ Ukatsti angelax sarakituwa: “Aka arunak qillqam: ‘Corderon jaqichasïwipar jawsayatanakax kusisiñanïpxiwa’ ” sasa. Ukatsti saskakiwa: “Aka arunakax Diosan chiqa arunakapawa” sasa. ¹⁰ Nayasti yupaychañatak angelan nayraqataparuw killt’asta, ukampis jupax situwa: “Jan uk luramti, nayax jumjam luqtirikïtwa, ukhamarak khitinakatix Jesucriston qhanañchatapar taqi chuymampi arkapki ukanakjam luqtirikirakïtwa. Diosaruy yupaycham” sasa. Jesucriston uka qhanañchatapasti Diosat parlirinakaruw amuyt’ayi. ¹¹ Ukatsti alaxpach jist’arat uñjta, mä janq’u caballorakiw uñstanïna. Uka caballor lat’xatat jaqisti, Chiqa, Aski, sutinïnwa. Jupasti chiqa kankañampiw apnaqäna, chiqapat nuwasirakïna. ¹² Nayranakapax nina lawranakar uñtataw qhanäna, p’iqipasti walja pillunakampi asxatatarakïnwa, mä sutimpi qillqt’atarakïnwa, uka sutsti jupa sapakiw yatïna. ¹³ Wilampi wilachsut isinïnwa, sutipasti: “Diosan Arupa” satänwa. ¹⁴ Alaxpachankir ejercitonakaw qhipap arkapxäna, suma lino janq’u q’uma isimpi isthapitkama, taqinis janq’u caballor lat’xatatkamaraki. ¹⁵ Lakapatsti mä ari espadaw mistüna markanakar ukampi chhuxriñchjañataki. Uka markanakarusti wali qhuru kankañampiw apnaqani. Jupa pachparakiw vino ch’irwsuñatak uvanak takirani, ukasti taqi ch’aman Diosan q’apisiñapawa. ¹⁶ Isipansa, charapansa mä suti qillqt’atarakïnwa: “reyinakansa Reyipa, munañaninakansa Munañanipa” sasa. ¹⁷ Ukatsti mä angelaruw uñjarakta, lupin sayt’atäskiri, jupasti alaxan tuyunaqir jamach’inakaruw wali ch’amampi art’äna, akham sasa: “¡Jutapxam, Diosan jach’a manq’äwipatak tantacht’asipxam, ¹⁸ reyinakan janchip manq’apxäta, militaranakan jilïripan janchipa, jan axsarir jaqinakan janchipa, caballonakan aychapa, uka caballonakar lat’xatirinakan janchipa, katuntat jaqinakan janchipa, jisk’a jaqinakan janchipa, jach’a jaqinakan janchip manq’apxarakïta!” sasa. ¹⁹ Ukatsti uka jach’a axsarkañ animalaruw uñjta, ukhamarak akapach reyinakaru, ejercitonakapampiru. Jupanakasti janq’u caballon lat’xatat jaqimpi, ejercitopampi nuwasiriw tantachasipxatayna. ²⁰ Uka jach’a axsarkañ animalasti k’ari profetamp chika katuntatäxänwa, uka k’ari profetasti muspharkañanak lurirïtayna uka axsarkañ animal nayraqatana. Uka muspharkañ luräwinak tuqiw, uka k’ari profetax sallqjatayna khitinakarutix jach’a axsarkañ animalan chimpupampi chimpuyasipkatayna, ukatsti ukan uñtasit lursutapar yupaychapkatayna ukanakaru. Ukatsti k’ari profetasa, uka axsarkañ animalasa azufrempi aqaskir nina qutar jakkirpacha jaquntataw uñjasipxäna. ²¹ Mayninakasti janq’u caballonin lakapat mistkän uka espadampi jiwarayataw uñjasipxäna, taqi jamach’inakasti uka aychanakampiw sisarapxarakïna.

¹ Ukatsti alaxpachat mä angelar saraqasinkir uñjta, amparaparusti mä jach’a cadena iqt’ata, manqhapach ch’amakan jist’arañap apt’ata. ² Uka angelasti dragonaruw katuntäna, nayrapachan utjir katariru, ukasti Supayawa. Katuntasinsti waranqa maratakiw ñach’antäna. ³ Ukatsti manqhapacha ch’amakaruw jaquntäna, ukaruw jist’antarakïna, punkurusti mä chimpu uchantäna, ukhamat waranqa mara phuqhasiñapkam uka dragonan markanakar sallqjir jan mistuniñapataki. Waranqa mara qhipatsti, uka dragonax mä juk’a pachatak antutnukutaw uñjasini. ⁴ Ukatsti reyi qunuñanak uñjarakta, uka qunuñanakansti, khitinakatix Jesucriston qhanañchataparu, Diosan yatiyäwipar taqi chuymampi sayt’apxatap layku jiwayat uñjasipkatayna, ukanakaw qunt’atäsipkäna. Jupanakax janiw uka jach’a axsarkañ animalarusa, ukar uñtasit lursutarus yupaychapkataynati, janirakiw chimpupsa paranakaparu, amparanakapar uchayasipkataynati. Jupanakasti jaktapxänwa, Diosasti jupanakar reyi qunuñanak churäna, Cristompi waranqa mara apnaqapxañapataki. ⁵ Jupanakaw nayrïr jaktirinakäni. Ukampis mayni jiwirinakax uka waranqa mara phuqhasiñapkamax janiw jaktapkaniti. ⁶ ¡Nayrïr jaktäwin jaktirinakax kusisiñanïpxiwa, ajllita qullan markankirïxapxiwa! Payïr jiwasti janiw jupanakxarux kuna ch’amanïkisa, jan ukasti, jupanakax Diosampin, Cristompin sacerdotepäpxaniwa, waranqa maraw jupampi reyit qunt’asipxani. ⁷ Uka waranqa mara phuqhaskani ukkhasti, Supayax jist’antatäki ukawjat antutnukutaw uñjasini, ⁸ ukatsti pusi tuqinpach utjir markanakar sallqjiriw mistuni, Gog, Magog sat markanakar sallqjiri, ukatsti nuwasiñatakiw uka markanakan ejercitonakapar tantachthapini, ukanakasti quta iranan utjir ch’allar uñtatäniwa. ⁹ Jupanakax uraqpach muytapxani, ukatsti Diosan wawanakapan utjasïwiparu, Diosan munat markaparuw muyuntapxani. Ukampis alaxpachat ninaw saraqanini, ukaw jupanakar q’al nakhantani. ¹⁰ Sallqjir supayasti nina azufre qutar jaquntataw uñjasini, kawkirutix k’ari profetampi uka jach’a axsarkañ animalampix jaquntat uñjasipkarakïn ukaru. Ukan uruy aruma taqpachan t’aqhisipxani, wiñayan wiñayapataki. ¹¹ Ukatsti mä jach’a janq’u qhapaq qunuñ uñjarakta, ukan qunt’atäkän ukampiru. Jupan nayraqatapat uraqimpi alaxpachampix jan mayampitakiw chhaqtawayxäna, janirakiw kawkinsa wasitat uñjañäkxänti. ¹² Ukatsti taqpach jiwirinakaruw uñjta, jisk’arusa, jach’arusa qhapaq qunuñan nayraqatapan sayt’atäskiri. Ukatsti qillqatanakaw jist’arasïna, ukhamarak yaqha qillqatasa, uka qillqatasti wiñay jakañ qillqata, satawa. Jiwirinakasti qillqatanakan qillqatäki uka lurataparjam taripataw uñjasipxäna. ¹³ Lamar qutax ukan jiwirinak katuyxäna, manqhapachas jiwatanak katuyxarakïna; taqpach jiwatanakasti luräwinakaparjam taripataw uñjasipxäna. ¹⁴ Ukatsti, Jiwañasa manqhapachasa, nina qutar jaquntatäxänwa. Uka nina qutasti payïr jiwawa, ¹⁵ khitinakan sutinakapatix wiñay jakañ qillqatan jan qillqatäkän ukanakax, ukar jaquntataw uñjasipxäna.

¹ Ukatsti machaq alaxpachampi, machaq uraqimpi uñjarakta. Nayrïr alaxpachampi uraqimpix tukusxataynawa, janirakiw qutas utjkxänti. ² Ukatsti qullan marka uñjta, machaq Jerusalén. Uka markasti Diosan nayraqatapat saraqasinkäna, jaqichasiñatak suma isthapt’at mä tawaqur uñtata, jaqichasir waynar katuqañatakjama. ³ Ukatsti jach’a aru ist’arakta qhapaq qunuñat art’asiniri: “¡Akaxay, Diosax jichhax jaqinak taypin jaki! Jupanakampiw jakani, jupanakasti markapäniwa, Dios kipkarakiw jupanakampïni, jupanakan Diosaparakïniwa. ⁴ Jupaw taqi jachanakap nayranakapat picharani, janirakiw jiwañasa, jachañasa, warariñasa, usuyasiñas utjkxaniti, taqi kunanakatix nayrax utjkän ukanakax tukusxiwa” sasa. ⁵ Ukatsti qhapaq qunuñan qunt’atäkän ukax sänwa: “Nayax taqi kun machaqat lurta” sasa. Sarakïnwa: “Qillqam, aka arunakax chiqapawa, iyawskañarakiwa” sasa. ⁶ Ukatsti sarakituwa: “Taqi kunas luratäxiwa. Nayätwa qalltasa, tukuyasa. Umat pharjatarusti nayax inakiw jakañ churir jalsu umat churä. ⁷ Jan walinakar atipjiristi taqi akanak katuqani; nayasti jupan Diosapäyäwa, jupasti nayan wawaxäniwa. ⁸ Ukampis axsaririnaka, jan iyawsirinaka, uñisisirinaka, jaqi jiwayirinaka, wachuqa juchan sarnaqirinaka, layqasirinaka, idolonakar yupaychirinaka, k’arisirinakampisti, azufrempi nakhir nina qutar jaquntataw uñjasipxani, ukasti payïri jiwawa” sasa. ⁹ Ukatsti mä angelaw juti, uka angelasti qhipïr paqallqu t’aqhisïwinakan phuqt’ata paqallqu qirunak ast’atakän uka angelanakat maynirïnwa, uka angelasti situwa: “Jutam, khititix Corderon esposapäkani ukaruw uñacht’ayäma” sasa. ¹⁰ Ajayux uñjaykitu uka unañchäwinsti, angelax mä jach’a qullur irpsusin uñacht’ayitu, Diosan nayraqatapat qullan Jerusalén jach’a markar saraqasinkiri. ¹¹ Uka markasti Diosan qhanapampiw k’ajäna, k’ajatapasti suma qalan k’ajatapjama, qhispir uñtat diamante qalan k’ajatapjamänwa. ¹² Uka markasti amstakam muyuntat jach’a pirqanïnwa, tunka payan punkunïnwa, mä angelaw sapa punkunkäna; uka punkunakansti Israel markan tunka payan ayllunakapan sutipaw qillqatarakïna. ¹³ Kimsa punkux inti jalsu tuqir uñtatänwa, kimsa punkusti alax tuqir uñtatarakïnwa, kimsa punkux aynach tuqir uñtatänwa, kimsa punkusti inti jalanta tuqir uñtatarakïnwa. ¹⁴ Markar muyuntir pirqapasti tunka payan jach’a qalanakxar utt’atänwa, uka qalanakasti Corderon tunka payan apostolunakapan sutinakapampi qillqantatänwa. ¹⁵ Nayampi parlkän uka angelasti qurit lurat tupu ayt’atänwa, uka tupumpi marka tupt’añataki; punkunakapa, pirqanakap tupt’añataki. ¹⁶ Uka markax pusi thiyanïnwa; sayt’u tuqirusa iran tuqirus ukch’apurakïnwa. Angelasti quri tupupampiw uka marka tupt’äna, markasti pä waranqa pä patakani kilometronïnwa; iranarusa, amstarusa, sayt’urusa ukch’apurakïnwa. ¹⁷ Ukatsti pirqarak tupt’äna, uka pirqasti suxta tunka pusin metronïnwa, jaqinakan tupuparjamaw angelax tupt’askäna. ¹⁸ Markan pirqapasti diamante qalat luratänwa, markax quritkamakïnwa, llijsuyat qhispir uñtata. ¹⁹ Pirqan utt’at jach’a qalanakasti kunayman k’ajkir qalanakampi k’achachatänwa: Nayrïrix, diamante qalampi; payïristi, zafiro qalampi; kimsïristi, ágata qalampi; pusïristi, esmeralda qalampi; ²⁰ phisqïristi, ónice qalampi; suxtïristi, cornalina qalampi; paqallqüristi, crisólito qalampi; kimsaqallqüristi, berilo qalanakampi; llätunkïristi, topacio qalanakampi; tunkïristi, crisoprasa qalampi; tunka mayanïristi, jacinto qalanakampi; tunka payanïristi, amatista qalampi k’achachatänwa. ²¹ Tunka payan punkusti tunka payan perlänwa; sapa punkusti mä perlat luratänwa. Markan jach’a thakhipasti qurikamakïnwa, suma qhispir uñtata. ²² Janiw kuna qullan utsa uka markan uñjkti, uka markan qullan utapasti Tatituwa, taqi ch’aman Diosawa, Corderorakiwa. ²³ Uka markatakix janiw intisa, phaxsisa qhanañapatak munaskiti, Diosan k’ajatapa qhantayatap layku, qhaniripasti Corderowa. ²⁴ Uka qhanapan markanakax sarnaqapxani, akapach reyinakasti uka qhanaruw qamir yänakap katuyapxani. ²⁵ Punkunakapasti janiw urux jist’antatäkaniti, janirakiw arumax uka markan utjkaniti. ²⁶ Uka markaruw markanakan jach’a kankañapa, aytat kankañapsa apapxani. ²⁷ Janipuniw uka markarux kuna q’añus mantkaniti, janirakiw k’ari diosanakar yupaychirinakasa, sallqjirinakas mantkaniti. Jan ukasti, khitinakan sutipatix Corderon wiñay jakañ qillqatapan qillqatäki ukanakakiw uka markarux mantapxani.

¹ Ukatsti angelax jakañ churir mä suma q’uma jawir uñacht’ayitu. Uka jawirasti Diosampina, Corderompin qhapaq qunuñapat mistunïna, qhispir uñtat suma ch’uwarakïnwa; ² umanakapasti markan jach’a thakhip taypi sarakipäna. Purap jawir thiyan quqanakaw utjarakïna; sapa phaxsi achur quqanakänwa, maran tunka payan kuti achur quqanaka. Achunakapax wiñay jakañ chuririwa, laphinakapasti akapach markanakan usunakap qulliriwa. ³ Janiw ukanxa khitis ñanqhachatäkxaniti. Diosampina, Corderompin qhapaq qunuñapaw uka markankani, Diosan luqtirinakapasti juparuw yupaychapxani. ⁴ Taqiniw ajanuy ajanu Diosar uñkatapxani, paranakaparusti Diosan sutip qillqantat apapxani. ⁵ Ukanxa janiw arumax utjkxaniti, ukan jakirinakasti janiw micha qhansa, intin qhanapsa munkxaniti, Dios Tatitukiw qhanani, jupanakasti wiñayatakiw ukan jakapxani. ⁶ Angelasti sarakituwa: “Aka arunakax aski chiqap arunakawa, profetanakar unañchir pachpa Tatit Diosaw angelapar khithani, jank’ak phuqhaskani ukanak luqtirinakapar uñacht’ayiri” sasa. ⁷ “¡Jank’akiw jutä! ¡Khititix aka qillqatankir profecía arunak chuymapar katuqkani ukax, kusisiñaniwa!” ⁸ Naya, Juanaw, ist’ta, taqi ukanak uñjarakta. Ukanak ist’asa, uñjasasti, uñacht’aykitu uka angelan nayraqataparuw jupar yupaychañatak killt’asta. ⁹ Ukampis jupax situwa: “Jan uk luramti. Diosaruy yupaycham, taqpach jiwasanakax jupan luqtiripätanwa, nayasa, jumasa, profetanakasa, Diosan arunakapar jaysirinakasa” sasa. ¹⁰ Sarakituwa: “Akan qillqatäki uka profecía arunakxa, jan imxäsimti, phuqhasiñap urusti jak’achasinxiwa. ¹¹ Ñanqha lurir jaqix, ñanqhanak luraskakpan; q’añu chuyman jaqisa, q’añunak luraskakpan; ukampis aski jaqix, askinak luraskakpan, Dios chuyma jaqisti, taqi chuyma arkaskakpan” sasa. ¹² “Nayax jank’akiw jutaskta. Sapa maynitakirakiw churäwi apasinkta luratanakaparjam churiri. ¹³ Nayätwa qalltasa tukuyasa, nayrïrisa qhipïrisa.” ¹⁴ Jakañ churir quqan achupat manq’asiñatak isinakap t’axsusirinakax kusisiñanïpxiwa, ukhamarak markar punku chiqa mantañ munirinakasa. ¹⁵ Ukat sipana, anqaruw qhiparapxani jan wali sarnaqirinaka, layqasirinaka, wachuqa juchan sarnaqirinaka, jaqi jiwayirinaka, idolonakar yupaychirinaka, taqi sallqjirinaka, jan wali luras sarnaqirinakasa. ¹⁶ “Naya, Jesusaw angelaxar khitta iglesianakar taqi akanak yatiyañapataki. Nayätwa David reyit saraqirixa; qhantati ururi warawarätwa.” ¹⁷ Qullan Ajayumpi Corderon esposapampisti sapxiwa: “Jutam” sasa. Ist’irïki ukasti sarakpan “Jutam” sasa. Umat pharjayasiristi, jutpan; um muniristi, jakañ umat inak umt’arakpan. ¹⁸ Akan qillqatäki uka profecía arunak ist’irinakarux, taqpachaniruw nayax sista: Khititix akan qillqatäki uka arunakar kunsa yapxatanixa, Diosax jupar kuna mutuyäwinakattix aka qillqatan parlki ukxa yapt’arakiniwa. ¹⁹ Khititix akan qillqatäki uka profecía arunakata kunsa apaqanixa, janiw Diosax jakañ churir quqan achupat jupar jalt’asiykaniti, janirakiw akan qillqatäki uka qullan markar mantaykaniti. ²⁰ Akanak qhanañchiristi siwa: “Nayax jank’akiw jutä” sasa. Ukhamäpan. ¡Tatit Jesús, jutakimaya! ²¹ Tatit Jesusan munasiñapax jumanakampïpan. Ukhamäpan.