FILIPENSES

FILIPENSES

¹ Filipos markankir munat jilatanaka, kullakanaka: Naya Pablompi, Timoteompi, Jesucriston luqtirinakapaw jumanakar aruntanipxsma, jumanakaw Jesucristompi mayakïpxatamat Diosan qullan markapäpxtaxa. Qullan marka irpirinakarusa, diacononakarus aruntanipxaraktwa. ² Dios Awkisana, Jesucristo Tatitusan khuyapayasiñapampi, sumankañapampiy jumanakampïpan. ³ Jumanakat sapa kuti amtaskta ukkhax Diosaruw yuspagarta; ⁴ kunapachatix Diosat mayiskta ukkhax, kusisiñampiw jumanakatak mayirapipxsma; ⁵ jumanakasti qalltatpach jichhürkamax Tatitun suma yatiyäwi arunakap yatiyañ yanapapxista. ⁶ Diosaw suma luräwinakap jumanakampix qalltawayi, ukanakasti Jesucriston jutañapkamax juk’amp sumaw tukuskani. ⁷ Jumanakat ukham lup’iñaxax askiwa, nayasti jumanakarux walpun munasipxsma, katuntat uñjasïwixana, jilïrinak nayraqatan qhispiyasiñ arunakax chiqaw sas arsusïwixana, jumanakax nayampi chikäpxtawa. ⁸ Diosakiw yati kunjämtix nayax jumanakar Jesucriston munasiñapampi munasipksma uka. ⁹ Diosaruw mayiskta jumanakan munasiñaman juk’ampi utjañapataki, jupasti yatiñ kankaña, amuyt’a kankañsa jumanakar churañapataki, ¹⁰ ukhamat kunatix askïki ukpun ajllipxañamataki. Ukapachakiw q’uma chuyman jakapxäta, Cristox jutkani ukkhasti, janiw khitis jumanakar juchañchapkätamti; ¹¹ Jesucriston yanapapampix askinakpun lurapxäta, ukhamat mayninakan Diosar yupaychas jach’añchapxañapataki. ¹² Munat jilatanaka, yatipxam, kunatix nayamp luraskän ukax suma yatiyäwi arunak yatiyañanxa, mä yanapänwa. ¹³ Reyin utapan uta uñjirinakasa, taqi jaqinakasa, Cristor arkatax layku nayan katuntatätax yatipxi. ¹⁴ Nayar katuntat uñjasinxa, waljaniw jilatanakax Diosan arunakap yatiyañatakix juk’ampi ch’ama katxatapxi. ¹⁵ Chiqpachansa yaqhipanakax nayar uñisiñata, timasiñatak Cristot parlapxi, yaqhipanakasti suma amtäwimpiw yatiyapxaraki. ¹⁶ Mayninakasti taqi munasiñampiw Cristot arsupxi, jupanakasti sum yatipxi, qhispiyasiñ arunakar arxatañatak katuntat uñjasitaxa; ¹⁷ ukampis mayninakax jupatak taqi kun thaqhasakiw Cristot arsupxi, janiw chiqa chuymäpkiti, jan ukasti, nayan juk’amp jan walt’añaxak munapxi, katuntat uñjasitax layku. ¹⁸ Kunäpansaya, jupanakax qhana chuymampisa, jan ukax, jan qhana chuymampisa, Cristot yatiyapxi; ukasti nayarux walpun kusisiyitu. Jichhas juk’amp kusisiskakïwa, ¹⁹ jumanakan Diosat mayipxatamata, Qullan Ajayun yanapapampi katuntatat qhispiñaxatak yatitaxata. ²⁰ Nayax p’inqasiñar jan puriñatakiw ch’amachasiskta, ukampis jakaskäsa, jan ukax jiwxäsa, nayan suyt’äwixax nayan ch’amachasitax laykuw Cristox jach’ar aptatäni. ²¹ Nayatakisti jakañax Cristowa, jiwañasti sumanak katuqañawa. ²² Jakaskakï ukasti, Diosatakix irnaqaskakiristwa, jiwxä ukkhasti, Jesucristompi chik jakiriw sarxirista, ukasti nayatakix juk’ampi sumäspawa; nayatakix wali ch’amaw aka payat kawkïr ajllisiñasa; ²⁴ mä tuqitxa, nayan jakaskañaxax jumanakatak wali askiwa. ²⁵ Ukhamasti, jumanakan juk’ampi Diosar katuyasipxañamataki, kusisit jakapxañamatakix jumanak taypin jakaskakïwa. ²⁶ Ukhamat nayax wasitat jumanak taypin jikxatasï, ukatsti Cristo Jesusan jumanakax jach’añchasipxäta. ²⁷ Jumanakasti, kunjämtix Jesucriston suma yatiyäwi arunakapax yatichki ukhamarjam sarnaqapxam. Nayasti jumanakar uñjir jutäsa jan ukax janis jutkäxa, jumanakan mä wawar tukt’asak jakasipxañam munta, taqi kunansa mä amtäwir purisa, ukatsti qhispiyasiñ arunak qhanañchañatak wal ch’amachasisa, ²⁸ uñisirinakamarus jan axsarasaraki. Jumanakatix wali ch’aman sayt’asipxätaxa, jupanakan chhaqhañar saraskatap uñjapxäta, jumanakasti qhispiyatäpxätawa, Diosan jumanakar atipt’ayatap layku. ²⁹ Diosaw jumanakarux Cristor iyawsapxatam layku kusisiñ churapxtam, ukatsti jupa layku t’aqhisiñ churapxaraktam. ³⁰ Ukhamasti, jumanakasa, nayasa uka kipka jan walt’añanakar saykatañasaw wakisi, jumanakax niy yatipxtawa kunjämtix nayax t’aqhiskäyäta, jichhas t’aqhisiskakta uka.

¹ Ukhamasti, Cristotix ch’amañchañ chuyma churapxstam, munasiñanakam laykutix mayninakar chuymachapxsta, taqinis uka kipka Ajayunïpxsta, chuymanakamansa khuyapayasiñan phuqt’atäpxaraksta ukax, ² kusisiyapxita: mä wawak jakasipxatamampi, pachpa munasiñampi mayacht’ata, pachpa ajayumpi, pachpa amtäwimpi. ³ Janipun kunsa purapat ch’axwasa, jach’a jach’a tukuñ munasas lurapxamti, jan ukasti llamp’u chuymampi taqi kunsa lurapxam, sapa maynix jupat juk’amp sumäkaspas ukham uñjapxam. ⁴ Janipun khitis jupatakik askïki uk thaqpati, jan ukasti kunatix mayninakatak askïki ukpun thaqpan. ⁵ Kunjäm amuyunïkäntix Cristox uka pachpa amuyunïpxarakim: ⁶ Jupax Diosäkchïn ukasa, janiw Diosjam uñjatäñ munkänti, ⁷ jan ukasti, Dios kankañap apanuküna, uywat kankañ katxarüna. Jiwasanakjamaw tuküna, taqinin luqtiripaw tukurakïna, ⁸ jaqjamasti, jupa kipkaw jisk’ar tukuwayäna, jiwañapkamaw Diosar jaysäna; cruzan jiwañkamaw jaysäna. ⁹ Ukat Diosax jach’ar aptäna, taqi sutit sipansa mä jach’a suti churäna. ¹⁰ Ukat Jesusan sutipar taqi jaqin killt’asiñapataki, alaxpachansa, akapachansa, manqhapachansa, ¹¹ ukatsti taqi jaqirakiw yatipxañapa: Jesucriston Tatitütapa, Dios Awkir jach’añchañataki. ¹² Munat jilatanaka, jumanakampïkäyät ukkhax nayarux jaysapxapunistawa, jichhasti jumanakat jayankatax laykux juk’ampiy jaysapxita. Axsartañampi, khathatiñampiy qhispiyasiñamatak ch’amachasipxam; ¹³ Diosaw suma amtäwinak churapxtam, jupa pachparakiw uka lurañanak phuqhañan jupan munañaparjam yanapasipktam. ¹⁴ Taqi kunsa jan jaqxat parlasisa, jan ch’axwas lurapxam, ¹⁵ ukhamat jan khitis jumanakar mä kunatsa juchañchaskañapataki, jan ukasti Diosan wawanakapjam jan akch’as q’añuni uka jan wali jaqinak taypin jikxatasipxañamataki. Jumanakasti, ch’amak taypin k’ajir warawarjam jupanak taypin k’ajapxapunim, ¹⁶ jakañ arunak jach’ar aptasa. Ukhamat kunapachatix Cristox jutkani ukkhaxa, jumanakat kusisiñaxataki, jan inamay ch’am tukus irnaqatax yatisina. ¹⁷ Jumanakax Diosar iyawsasaw jupar arkapxtaxa, ukasti juparu luqtäwi katuyatäkaspas ukhamawa. Inas nayarux jiwayapxchitani, jiwataxasti Diosatakix mä luqtäniwa, ukhamäspa ukasti, nayax wali kusisitäyäwa, jumanakampi chikarakiw kusisirakï. ¹⁸ ¡Ukhamax, nayamp chik kusisipxam! ¹⁹ Tatitun munañapatsti, Timoteor jumanakar uñjir jank’ak khithaniñ suyaskta, ukat jumanakan luräwinakam yatisin kusisiñaxataki. ²⁰ Nayatakisti janiw khitis jupjam munasirix utjkiti, jumanakan suman jikxatasiñatakis wal llakisiraki. ²¹ Mayninakasti jupanakan yänakapatak llakisisipki, janiw kunatix Jesucristotak askïki uk thaqhapkiti. ²² Ukampis jumanakax Timoteon askin sarnaqatap sum yatipxtaxa, ukatsti wawaxäkaspas ukham Tatitun arunakap parlañ yanapkitu uksa yatipxaraktawa. ²³ Kunjämaruy akan nayar taripapxchitani, ukarjamaw Timoteor jumanakan ukar khithanï; ²⁴ Tatituruw mayiskta naya kipka jank’ak jumanakar uñjir jutañaxataki. ²⁵ Amuyataxatxa, wakisisamachakiw Epafrodito jilatar jumanakan ukar khithaniñaxa, jupasti nayamp chika irnaqiriwa, nayamp chik ch’am tukurirakiwa, jumanakaw nayar yanapt’ir juparux khithanipxista. ²⁶ Jupasti jumanakar walpun uñjañ munapxtam, jumanakan jupan usuntatap yatipxatam laykux llakisirakiwa. ²⁷ Chiqpachansa jupax usutäskapunïnwa, niya jiwirjamänwa; ukampis Diosaw jupat khuyapt’ayasïna, janiw juparukit khuyapt’aykänxa, jan ukasti nayarus khuyapt’ayarakitänwa, ukhamat nayan jan juk’amp llakit jikxatasiñaxataki. ²⁸ Ukat nayax jumanakan ukar jank’ak khithanta, jumanakan wasitat jupar uñjasin kusisipxañamataki, nayasti jan llakisxañaxataki. ²⁹ Ukhamax taqi kusisiñampiy juparux katuqapxam, kunjämatix Tatitunkir mä jilatarux katuqañäki ukhama, ukatsti jupjam jilatanakarus munasipxapunim, ³⁰ jupasti Cristo layku irnaqasax niyapuniw jiwi, lurañanakaxan jumanak lanti irnaqasas niyapuniw jakañap apt’asi.

¹ Munat jilatanaka, Tatitunkxasin kusisipxam. Nayatakix janiw kuna ch’amäkis jumanakar wasitat qillqaniñaxa, jumanakatakisti ukax wali askiwa. ² Khitinakatix anunakjam sarnaqapki, jan walinak lurapki ukanakat amuyasipxam, jupanakasti janchi khariqañ munirinakawa; ³ chiqpach q’umachatanakax jiwasanakätanwa, khitinakatix Diosaru Ajayun yupaychapktan ukanaka. Cristo Jesusankxasin kusisitätanwa, janirakiw kunatix janchin luraski ukanakarux iyawskxtanti. ⁴ Jiwasanakasti qhispiyatäñatakix janiw kunsa lurksnati, qhispiyasiñatix circuncisión katuqas jikxatañäspa ukax, naya pachpaw uka tuqit jach’achasirista. ⁵ Yuritaxat kimsaqallq uru saraqataru circuncisión katuqatätwa, Israelankir jaqïtwa, Benjaminan ayllupankirïtwa, hebreo jaqïtwa, awkixampi, taykaxampix, hebreo jaqinakänwa. Judeankir jaqinakan kamachiparjamasti, fariseo tamankir jaqïtwa; ⁶ kamachir phuqhañ laykusti, Diosan iglesiapar uñisiñampi arknaqirïyätwa, janiw khitis kamachi jan phuqhataxat juchañchkitaspati. ⁷ Taqi ukanakasti, nayatakix nayrax wali askïnwa, jichhasti Cristo laykux janiw kunatakis askïkxiti. ⁸ Ukat juk’ampis, taqi kunatix nayan utjkitu ukanaksti chhaqhatäkaspas ukham amuyta, Cristo Tatituxar uñt’añan mä jach’a askïtap layku. Cristo laykusti taqi kun apanukuwayta, Cristor jikxatañ laykusti, t’unarjamaw taqi kun uñjta, ⁹ jupampi chikt’ata jikxatasiñaxataki; janiw kamachirjam chiqa kankañ jikxatatax laykuti, jan ukasti, Cristor iyawsatax laykuwa, kuntix Diosax jupar iyawsirinakar churki uka. ¹⁰ Nayax Cristorukiw uñt’añ munta, jakatatäwipan ch’amap katuqañ munta, jupjam t’aqhisiñ munta; jupjam jiwañ munta, ¹¹ ukatsti Diosan munañapat jiwatanak taypit jakatatañ munarakta. ¹² Akampix janiw: “Taqi akanak jikxatxtwa” siskti, janirakiw “Wali q’umätwa” sañsa munkaraktti; jan ukasti kunatix askïki uk jikxatañkamaw nayraqatar jalaskta, kunjämatix Cristo Jesusax nayar nayraqat jikxatkitu ukhama. ¹³ Jilatanaka, janiw ukampix nayax niy jikxatxtwa sañ munapksmati, jan ukasti kunatix qhipankki uk armanukta, nayrankkis uk jikxatañatakiw ch’amachasiskta, ¹⁴ jalañ tukuyar puriñ munasaw jalaskta, Jesucristo tuqi katuqäwi churañatak Diosax jawskistu uk katuqasiñataki. ¹⁵ Taqi khitinakatix iyawsañan wali jiltatäxtan ukanakax ukham amuyañasa. Jumanakatix mä kunansa mayja amuyapxstaxa, Diosaw jumanakarux uk uñjayasipkätam. ¹⁶ Ukhamasti, kuntix katuqapktan ukarjam jakañasaw wakisi. ¹⁷ Jilatanaka, taqinis nayjam sarnaqapxam, ukatsti khitinakatix nanakjam sarnaqapki ukanakar uñtasarak sarnaqapxam. ¹⁸ Nayasti walja kutiw jumanakar sapxsma, jichhas jacht’asis wasitat sasipkaksmawa: “Waljaninakaw Criston cruzan jiwatapax jan kunatakis askïkaspa ukham amuyas jakasipki” sasa, ¹⁹ jupanakasti nina infiernor jaquntatäpxaniwa, diosapasti jupanakan kipka munañanakapakiwa, jupanakasti p’inqasiñ lantix jach’a jach’aw tukupxi. Akapach yänakatak lup’isipki. ²⁰ Ukampis jiwasanakax alaxpachankir jaqinakäpxtanwa, ukatsti Qhispiyir Cristo Tatitun alaxpachat jutañap suyasipktan. ²¹ Jiwasanakan jan wali janchis jupaw k’ajkir janchipar uñtat tukuyani. Uksti kawkïr ch’amapampitix taqi kun apnaqki uka ch’amapampiw tukuyani.

¹ Munat jilatanaka, jumanakampix walipuniw jikisiñ munta; nayan munatanakaxa, jumanakakïpxtaw nayan kusisiñaxaxa, ukhamarak nayan waxt’asïwi katuqañaxasa, ch’amanipun Tatitumpix sarantapxam. ² Evodia, Síntique, jupanakarux achikt’araktwa, Tatitunkir kullakanakjamax taqi kunansa mä amtäwiruk puripxpan. ³ Juma, nayampi chik irnaqiri, jumaruw uka kullakanakar yanapt’añamatak achikt’assma, jupanakasti nayamp chikaw qhispiyasiñ arunak yatiyañan irnaqapxäna, Clemente jilatampi, mayni yanapirinakaxampi kunaw irnaqapxäna. Jupanakan sutinakapasti wiñay jakañ qillqatan qillqantatäxiwa. ⁴ Tatitunkasax kusisipxapunim. Wasitat sapxsma, ¡Kusisipxam! ⁵ Taqi jaqinakasti jumanakarux suma chuymanïpxatam uñt’apxpan. Tatitux niyaw jutaski. ⁶ Janipun kunatsa llakisipxamti, taqi kunsa Diosarupun mayisipxam, ukatsti yuspagarapxarakim. ⁷ Ukkhakiw Diosax jumanakarux samarañap churapxätam, uka samarañapasti jaqitakix jan amuyt’kayawa; uka samarañarakiw jumanakan chuymanakama, amuyunakamsa imani Cristonkapxatam layku. ⁸ Tukuyañatakisti, jilatanaka, kunatix chiqäki, kunatix maynir aski uñjañäki, kunatix sumäki, kunatix q’umäki, kunatix munkañäki, kunatix aytat luräwinakäki, taqi ukanakatay lup’ipxam. Taqi kunatix sumäki, jach’ar aptañäki ukanakatay lup’ipxam. ⁹ Kuntix yatichapksma ukanakay lurapxam, kuntix nayat ist’apkta, uñjapkarakta ukanakay lurapxam, ukatsti sumankañan Diosax jumanakampïniwa. ¹⁰ Walpun nayax kusista jumanakan nayat amtasipxatamata. Janiw ukampix nayat armasipxpachawa sañ munkti, jan ukasti janiw kunjämatsa nayar yanapt’añ jikxatapkäyätati. ¹¹ Uksti, janiw nayan pist’ayasitax laykuti sapksma, ukatsipan utjkitu ukampik jakañ yatitätwa. ¹² Pist’añan jakañsa yattwa, taqi kunan phuqt’at jakañsa yatiraktwa. Kunjäm sarnaqiris yatitätwa; sist’atasa, manq’at awtjatasa, taqi kunanïñsa, jan kunanïñsa yatitätwa. ¹³ Criston ch’amapampix taqi kunaruw saykatirista. ¹⁴ Ukampis jumanakax llakisiñaxan nayampi chikachasisin askpun lurapxtaxa. ¹⁵ Filipos iglesiankirinaka, jumanakax sum yatipxtaxa; qhispiyasiñ arunak yatiyañ qallta urunakana, Macedonia markat nayax sarxta ukapachasti, janiw kawkïr iglesiatsa yanap katuqkti, jumanakakiw yanapt’a apayanipxista. ¹⁶ Tesalónica markan jikxataskäyät ukapachasa, pist’ayasiñaxan walja kutiw jumanakax yanapt’a apayanipxista. ¹⁷ Uksti, janiw nayan jumanakat katuqañak layku siskti, jan ukasti Diosat jilarkir waxt’äwinak katuqapxañam munta. ¹⁸ Epafrodito jilatampi apayanipkista uk taqpach katuqxta, jichhasti jilarkiriw utjitu. Kuntix apayanipkista ukax mä suma q’apkir inciensökaspas ukhamawa, uksti Diosax kusisiñampiw katuqi. ¹⁹ Ukhamax taqi kunatix jumanakan jan utjkani uksti, Diosaxaw jumanakar churapxätam, Jesucriston qhapaq qamir kankañapax utjki ukarjama. ²⁰ ¡Dios Awkisasti wiñayatak jach’añchatäpan! Ukhamäpan. ²¹ Cristonkir jilatanakaru, kullakanakar aruntarapipxita. Nayamp chikäki uka jilatanakas aruntanipxaraktamwa. ²² Taqi khitinakatix Diosan qullan markapankirïpki jupanakas aruntanipxtamwa, ukatsti khitinakatix romano emperadoratak irnaqapki jupanakas aruntanipxaraktamwa. ²³ ¡Jesucristo Tatitusay jumanakarux jakañanakaman munasiñap phuqhantpan!