NÚMEROS

NÚMEROS

¹ Israelitanakax Sinaí wasarankasipkänwa, ukapachaw Tatitux Moisesar parläna, Diosampi Jikisiñ Carpana. Jupanakan Egipto markat mistunitapax, tunka kimsan phaxsïxänwa. Tatitusti Moisesar akham säna: ² “Israelitanakar taqpachanir jakthapipxam, ayllutkama, wila masitkama, taqi chachanakan sutip qillqantapxam, qawqhanïtaynas uk yatiñataki, ³ pä tunka maranit amstaru, nuwasïwir sarirjamäpki ukanaka. Tamankiritjam qillqantapxäta, Aarón chachan yanapt’apampi, ⁴ sapaqat ayllut ajllita wila masinakan jilïripan yanapt’apampi. ⁵ Jumanakar yanapt’ir jilïrinakan sutinakapax akanakawa: “Rubén ayllutxa: Elisur sat Sedeúr chachan yuqapa. ⁶ “Simeón ayllutxa: Salumiel sat Surisadai chachan yuqapa. ⁷ “Judá ayllutxa: Nahasón sat Aminadab chachan yuqapa. ⁸ “Isacar ayllutxa: Natanael sat Suar chachan yuqapa. ⁹ “Zabulón ayllutxa: Eliab sat Helón chachan yuqapa. ¹⁰ “Efraín ayllutxa, Elisamá sat Amihud chachan yuqapa. “Manasés ayllutxa, Gamaliel sat Pedasur chachan yuqapa. ¹¹ “Benjamín ayllutxa: Abidán sat Guidoní chachan yuqapa. ¹² “Dan ayllutxa: Ahiézer sat Amisadai chachan yuqapa. ¹³ “Aser ayllutxa: Paguiel sat Ocrán chachan yuqapa. ¹⁴ “Gad ayllutxa: Eliasaf sat Reuel chachan yuqapa. ¹⁵ “Neftalí ayllutxa: Ahirá sat Enán chachan yuqapa.” ¹⁶ Jupanakaw israelita marka taypita, ayllunakan jilïrinakapat ajllitäpxäna, sapaqat wila masi tamat sayt’añataki. ¹⁷ Ukhamaw Moisesampi, Aaronampix uka jaqinakar jawsayapxäna, yanapt’iritak sutitkam ajllitäpkatayna jupanakaru, ¹⁸ ukatsti payïr phaxsina mä uru saraqataruw taqpach markar tantachthapipxäna. Uka urunsti jaqix mayat mayat jakthapitäpxänwa, wila masitkama, tunu awkit saraqiritkama. Ukhamat taqpach chachanakan sutinakapax qillqantasïna pä tunka maranit amstaru, ¹⁹ kunjämtix Tatitux Moisesar iwxkatayna ukhamarjamaw Sinaí wasaran jaqix jakthapisïna. ²⁰ Kunapachatix jaqinakax ayllutkama, tunu awkit saraqiritkama, wila masitkam jakthapitäxäna, sapa maynin sutinakapas qillqantatäxäna, pä tunka maranit amstaru chachanakas qillqantatäxarakïna ukapachax, taqpachani jakthapitasti akkhanïpxänwa: Rubén ayllunkirita, Israelan tayna yuqapa: pusi tunka suxtan waranqa phisqa patakan chachanakänwa, nuwasïwir sarañatak wakicht’atanakaxa. ²² Simeón ayllunkiritxa: phisqa tunka llätunkan waranqa kimsa patakani. ²⁴ Gad ayllunkiritxa: pusi tunka phisqan waranqa suxta patak phisqa tunkani. ²⁶ Judá ayllunkiritxa: paqallq tunka pusin waranqa suxta patakani. ²⁸ Isacar ayllunkiritxa: phisqa tunka pusin waranqa pusi patakani. ³⁰ Zabulón ayllunkiritxa: phisqa tunka paqallqun waranqa pusi patakani. ³² José chachan wawanakapa, Efraín ayllunkirita: pusi tunkan waranqa phisqa patakani. Manasés ayllunkiritxa: kimsa tunka payan waranqa pä patakani. ³⁶ Benjamín ayllunkiritxa: kimsa tunka phisqan waranqa pusi patakani. ³⁸ Dan ayllunkiritxa: suxta tunka payan waranqa paqallq patakani. ⁴⁰ Aser ayllunkiritxa: pusi tunka mayan waranqa phisqa patakani. ⁴² Neftalí ayllunkiritsti, phisqa tunka kimsan waranqa pusi patakan chachanakaw jakt’atarakïna. ⁴⁴ Taqi ukanakaw Israelan wawanakapan ayllutkama, wila masitkam jakthapitäpxäna, uksti Moisesampi, Aaronampiw jakthapïna, israelitanakan ayllunakapata, wila masi tamanakapat sayt’iri uka tunka payan jilïrinakapamp yanapt’ayasisa. ⁴⁵ Israelitanakat khitinakatix pä tunka maranit amstar jakhutäkäna, ukhamarak, nuwasïwirus sarirjamäpxarakïna ukanakax, ⁴⁶ taqpachanix suxta patak kimsani waranqa phisqa pataka phisqa tunkan chachanakänwa. ⁴⁷ Leví chachat saraqirinakax janiw mayni ayllunkirinakjamax nayra awkinakapan ayllunakap taypin jakhutäpkänti, ⁴⁸ Tatituw Moisesar satayna: ⁴⁹ “Israelitanakar jakthapkäta ukkhaxa, janiw jupanak taypir Leví chachat saraqirinakarux jakhütati. ⁵⁰ Jupanakarux Tatitumpi Jikisiñ Carpan luqtapxañapatakiw uchäta, taqi kunanakatix uka qullan chiqawja manqhan utjki ukanak uñjapxañapataki. Jupanakaw arust’äwi qullan carpampi, uka manqhan utjir yänakamp apapxani, ukhamarakiw jupanakax qullan chiqawjar muyuntas utjnuqtapxani. ⁵¹ Markax sarantkani ukapachasti, Leví ayllunkirinakaw arust’äwi qullan carpa apthapipxani; utjnuqtapkani ukkhasti, jupanakarakiw wasitat sayt’ayapxani. Khiti jaqitix jan Leví ayllunkirïkasin uka qullan chiqawjar jak’achasini ukaxa, jiwaniwa. ⁵² Israelan maynïr ayllunakapasti, militaranakan saraparjamaw sapaqat maynis pachpa tamapana, wiphalap jak’an utjnuqtapxani. ⁵³ Leví ayllunkirinakasti Tatitun arust’äwi qullan carpar muyuntasaw utjnuqtapxani, uk uñjapxarakini, Tatitux israelitanakatak jan q’apisiñapataki.” ⁵⁴ Israelitanakasti kunjämtix Tatitux Moisesar siskatayna ukhamarjamaw lurapxäna.

¹ Tatitux Moisesampiru, Aaronampiruw säna: ² “Israelitanakax Tatitumpi Jikisiñ Carpäkis ukkhat jaya chiqat muyuntasaw utjnuqtapxani, sapaqat maynisa wiphalapampi, wila masitkam mä chimpun uchata. ³ “Inti jalsu tuqirux Judá ayllun wiphalapanïki uka tamanakaw utjnuqtapxani. Judá ayllun ejercitopan jilïripasti Nahasón chachawa, Aminadab chachan yuqapa, ⁴ jupanakasti jakthapitarjamax paqallq tunka pusin waranqa suxta patakan chachanakawa. ⁵ Judá ayllunkirinakat kupi tuqirusti Isacar ayllun ejercitopaw utjnuqtani, jilïripasti Natanael chachawa, Suar chachan yuqapa, ⁶ jupanakasti jakthapitarjamax phisqa tunka pusin waranqa pusi patakan chachanakawa. ⁷ Ch’iqa tuqirusti, Zabulón ayllun ejercitopaw utjnuqtarakini, jilïripasti Eliab sat chachawa, Helón chachan yuqapa, ⁸ jupanakasti jakthapitarjamax phisqa tunka paqallqun waranqa pusi patakan chachanakawa. ⁹ Ukhamat uka ayllunakan tamanakapax Judá ayllunkir wiphalapar arkapxani. Taqpachanisti pataka kimsaqallq tunka suxtan waranqa pusi patakan chachanakawa. Taqpachaniw israelita ejerciton nayraqatap sarantapxani. ¹⁰ “Aynach tuqirusti Rubén ayllun wiphalapanïki uka ejercitow utjnuqtani. Rubén ayllun ejercitopan jilïripax Elisur chachawa, Sedeúr chachan yuqapa, ¹¹ jupanakasti jakthapitarjamax pusi tunk suxtan waranqa phisqa patakan chachanakawa. ¹² Rubén ayllunkirinakat kupi tuqirusti Simeón ayllun ejercitopaw utjnuqtani, jilïripasti Selumiel chachawa, Surisadai chachan yuqapa, ¹³ jupanakasti jakthapitarjamax phisqa tunk llätunkan waranqa kimsa patakan chachanakawa. ¹⁴ Ch’iqa tuqirusti Gad ayllun ejercitopaw utjnuqtani, jilïripasti Eliasaf chachawa, Reuel chachan yuqapa, ¹⁵ jupanakasti jakthapitarjamax pusi tunka phisqan waranqa suxta patak phisqa tunkan chachanakawa. ¹⁶ Ukhamat uka ayllunakan tamanakapax Rubén ayllunkir wiphalapar arkapxani. Taqpachasti pataka phisqa tunka mayan waranqa pusi patak phisqa tunkan chachanakawa; jupanakasti nayrïr tamar arktasaw taqpachan sarantapxani. ¹⁷ “Leví chachat saraqirinakax jupanak qhipat Tatitump Jikisiñ Carpa apt’at sarantapxani. Uka pusi tamanakax mayat mayat sarantapxani, utjnuqtatanakaparjamaw wiphalapamp sarantapxani. ¹⁸ “Inti jalanta tuqirusti Efraín ayllunkirinakan wiphalapanïki uka ejercitonakaw utjnuqtapxani. Efraín ayllun ejercitopan jilïripax Elisamá chachawa, Amihud chachan yuqapa, ¹⁹ jupanakasti jakthapitarjamax pusi tunka waranqa phisqa patakan chachanakawa. ²⁰ Efraín ayllunkirit kupi tuqirusti Manasés ayllun ejercitopaw utjnuqtarakini, jilïripasti Gamaliel sat chachawa, Pedasur chachan yuqapa, ²¹ jupanakasti jakthapitarjamax kimsa tunka payan waranqa pä patakan chachanakawa. ²² Ch’iqa tuqirusti Benjamín ayllun ejercitopaw utjnuqtani, jilïripasti Guidoní chachan Abidán sat yuqapawa, ²³ jupanakasti jakthapitarjamax kimsa tunk phisqan waranqa pusi patakan chachanakawa. ²⁴ Ukhamat uka ayllunakan tamanakapax Efraín ayllunkir wiphalapanïki ukar arkapxani. Taqpachanisti pataka kimsaqallqun waranqa patakan chachanakawa; jupanakasti kimsïr t’aqa tamxaruw sarantapxani. ²⁵ “Amsta tuqirusti Dan ayllun wiphalapanïki uka ejercitonakaw utjnuqtani. Dan ayllun ejercitopan jilïripax Ahiézer sat chachawa, Amisadai chachan yuqapa, ²⁶ jupanakasti jakthapitarjamax suxta tunka payan waranqa paqallqu patakan chachanakawa. ²⁷ Dan ayllunkirit kupirusti, Aser ayllun ejercitopaw utjnuqtarakini, jilïripasti Paguiel sat chachawa, Ocrán chachan yuqapa, ²⁸ jupanakasti jakthapitarjamax pusi tunka mayan waranqa phisqa patakan chachanakawa. ²⁹ Ch’iqa tuqirusti Neftalí ayllun ejercitopaw utjnuqtani, jilïripasti Ahirá sat chachawa, Enán chachan yuqapa, ³⁰ jupanakasti jakthapitarjamax phisqa tunka kimsan waranqa pusi patakan chachanakawa. ³¹ Ukhamat uka ayllunakan tamanakapax Dan ayllun wiphalap arkapxani. Taqpachanisti pataka phisqa tunka paqallqun waranqa suxta patakan chachanakawa; jupanakaw taqi tamanakan qhipap wiphalapamp sarantapxani.” ³² Taqi israelita wila masinakat jakthapitax, taqpachanix suxta patak kimsan waranqa phisqa patak phisqa tunkan chachanakänwa. ³³ Ukampis Leví chachat saraqirinakax janiw jakthapitäpkänti, kunjämtix Tatitux Moisesar iwxkatayna ukhamarjama. ³⁴ Israelit jaqinakasti kunjämtix Tatitux Moisesar siskatayna ukhamarjamaw taqpach lurapxäna: Sapaqat tamaw wiphalanakapamp utjnuqtapxäna, ukatsti wila masitkama, ayllutkam sarantapxarakïna.

¹ Tatitux Sinaí qullun Moisesar parlkän ukapachaxa, Aarón chachax pusi wawanïnwa: ² Nadab, Abihú, Eleazar, Itamar jupanakänwa. Nadabasti tayna wawapänwa. ³ Pusinpachaw sacerdotëñatak ajllitäpxäna, utt’ayatäpxarakïna, ⁴ ukampis Nadab, Abiú chachanakax Tatitu nayräxan jiwapxäna, jupanakan mä jan uñt’ata nina Sinaí qullun luqtapxatap layku. Jupanak paninisti janirakiw wawanïpkänti, ukatwa Eleazarampi, Itamar chachampix sacerdote kankañ phuqhapxäna. ⁵ Tatitux Moisesar sänwa: ⁶ “Leví ayllunkirinakar jawsayam, Aarón sacerdoten arsutaparjam jupar yanapapxañapataki. ⁷ Jupanakaw Tatitump Jikisiñ Carpan, Aaronan lurañanakap jupataki, taqpach markachirinakampitak lurapxani, qullan chiqawjan luqtäwinak phuqhasa. ⁸ Tatitump Jikisiñ Carpan yänakap uñjapxarakini, ukatsti israelitanakan lurañanakap lurapxani, qullan chiqawjan luqtäwinak phuqhasa. ⁹ Taqpach Israel markankirinak taypitxa, Aaronampi, wawanakapampikiw sacerdote kankañ katuqapxani. Ukat ukxar utjir levitanakarux yaqhachätawa, Aaronampiru, jupat saraqirinakampir luqtapxañapataki. Yaqha jaqitix, jan Aaronan yuqapäkasin sacerdoten lurañap lurani ukasti, jiwaniwa.” ¹¹ Tatitux Moisesar sarakïnwa: ¹² “Nayaw israelitanak taypit levitanakarux ajllista, sapa utankirin jilïr wawap lanti. Jupanakax nayankiwa, ¹³ taqi jilïr wawanakan nayankatap layku. Egipcionakan jilïr wawanakap jiwaraykäyät ukapachaw nayax, israelitanakan jilïr yuqall wawanakap nayatak yaqhachasta, uywanakapan nayrïr wawachat qallunakapsa yaqhachasirakta. Ukhamasti nayankituwa. Nayätwa Tatituxa.” ¹⁴ Tatitux Sinaí wasaran Moisesar parläna, akham sasa: ¹⁵ “Leví chachat saraqirinakar jakthapim, wila masitkama, tunu awkit saraqiritkama, ukatsti taqi yuqall wawanakar mä phaxsinit amstar qillqantam.” ¹⁶ Moisesasti Tatitun arsutaparjamaw jakthapïna. ¹⁷ Leví chachan wawanakapax: Guersón, Quehat, Merarí ukanakänwa. ¹⁸ Guersón chachan wawanakapax: Libní, Simí ukanakänwa. ¹⁹ Quehat chachan wawanakapax: Amram, Ishar, Hebrón, Uziel ukanakänwa. ²⁰ Merarí chachan wawanakapax: Mahli, Musí ukanakänwa. Leví chachan tamapankir wila masitkam jakhutanakax taqi ukanakänwa. ²¹ Guersón chachan wila masinakapax Libní, Simí ukanakänwa. ²² Taqpach yuqall wawanakapat mä phaxsinit amstaru qillqantatanakax, paqallq waranqa phisqa patakanïnwa. ²³ Uka tamanakasti, inti jalanta tuqin utjnuqtapxäna, qullan chiqawja qhipäxana. ²⁴ Guersón chachat saraqir wila masi tamanakan jilïr irpiripax Eliasaf chachänwa, Lael sat chachan yuqapa. ²⁵ Jupanakaw Tatitump Jikisiñ Carpan qullan chiqawja uñjapxäna, uka carpan janxata lip’ichinakapa, mantañar uchatäkis uka cortina, ²⁶ anqäxan utjir cortinanakapa, mantañapan utjir cortinapa, qullan chiqawjampiru, altarampir muyuntki uka cortinanaka, ukhamarus cortinanak chinuña wiskanak uñjapxarakïna. ²⁷ Quehat chachat saraqir wila masi tamanakax Amram, Ishar, Hebrón, Uziel ukanakänwa, ²⁸ taqpach yuqall wawanakapat mä phaxsinit amstar qillqantatanakax, kimsaqallq waranqa kimsa patakanïnwa. Uka tamanakaw qullan chiqawja uñjapxäna, ²⁹ jupanakasti qullan chiqawjat aynach tuqin utjnuqtapxäna. ³⁰ Uka tamanakan jilïr irpiripax Elisafán sat chachänwa, Uziel chachan yuqapa. ³¹ Uka tamanakaw Tatitun arust’äwi arcap uñjapxäna, ukhamarak Tatitutak yaqhachat t’ant’a uchañ mesa, candelero, altaranaka, velo, Tatitur yupaychañatak wakiski uka qullan yänakampi, taqi yaqha yänakampi. ³² Levitanakan jilïr irpiripax Aarón sacerdoten yuqapa Eleazar chachänwa, jupasti qullan chiqawja uñjirinakar uñch’ukiyañatak uchatänwa. ³³ Merarí chachan wila masinakapax Mahli, Musí ukanakänwa. ³⁴ Taqpach yuqall wawanakapa mä phaxsinit amstar qillqantatanakasti, suxta waranqa pä patakanïnwa. ³⁵ Jupanakan jilïr irpiripax Suriel sat chachänwa, Abihail chachan yuqapa, jupanakasti qullan chiqawjat amsta tuqin utjnuqtapxäna. ³⁶ Merarí chachan saraqirinakapax qullan chiqawjan utjir tablanak uñjapxäna, ukhamarak uka tablanakan lawanakapa, kawkïri lawatix mä thiyat mä thiyaru sarki uka lawanakapa, sayir lawanakampi, katxäsirinakapampi, taqi yänakapampi, ³⁷ uka kipkaraki uta anqäxar muyuntki uka sayir lawanaka, katxäsirinakapampi, ch’akurunakapampi, wiskanakapampi. ³⁸ Moisesampi, Aaronampi, wawanakapampix, Tatitump Jikisiñ Carpa nayräxaparu, inti jalsu tuqiruw utjnuqtapxäna. Jupanakaw israelitanakan sutipar qullan utjäwi uñjapxäna. Mayni jaqitix jan sacerdotëkasin, sacerdoten lurañap lurkän ukapachaxa, jiwayatäñatak juchañchatänwa. ³⁹ Moisesampi, Aaronampix Tatitun arsutaparjamaw Leví ayllunkirinakar, wila masitkam jakthapipxäna, jupanakar qillqantapxarakïna, mä phaxsinit amstaru yuqall wawanakasti, taqpachanix pä tunka payan waranqanïnwa. ⁴⁰ Tatitux Moisesar sänwa: “Israelitanakan wawanakap taypin jilïr wawanak mä phaxsinit amstar jakthapim, sutinakap qillqantarakim. ⁴¹ Ukatsti Leví chachat saraqirinakar nayatak yaqhacharapita, taqi israelitanakan tayna yuqall wawanakap lanti. Uka kipkaraki, Leví ayllunkirinakan uywanakap nayatak yaqhacharapita, taqi israelitanakan uywanakapat nayrïr wawachat qallunakap lanti. Nayätwa Israelan Tatitupaxa.” ⁴² Moisesasti kunjämtix Tatitux siskatayna, ukhamarjamaw taqi israelitanakan tayna yuqall wawanakap jakthapïna, ⁴³ taqpachanisti mä phaxsinit amstaru qillqantat yuqall wawanakax, pä tunka payan waranqa pä patak paqallq tunka kimsanïnwa. ⁴⁴ Uka qhipatsti Tatitux Moisesar sarakïnwa: ⁴⁵ “Leví chachat saraqirinakax nayankituwa, jupanakasti taqpach israelitanakan tayna yuqall wawanakap lantïniwa. Jupanakan uywanakapas israelitanakan uywanakap lantiw nayankarakitu. ⁴⁶ Ukampis israelitanakan jilïr yuqall wawanakapax, Leví chachan saraqirinakapat sipan jilawa; ukhamasti, jiläki uka pä patak paqallq tunka kimsan jilïr wawanak kutsuyasiñatakixa, ⁴⁷ sapaqat jaqita phisqa qullqi mayïta, qullan utjäwin tupuparjama, sapa qullqisti tunka mayan gramonakaniwa, ⁴⁸ uka qullqsti Aaronampiru, wawanakapampiruw churäta, jupanakat kutsuyatäkaspas ukhama. Nayätwa Israelan Tatitupaxa.” ⁴⁹ Moisesasti israelitanak taypin jilarir tayna yuqall wawanak kutsuyañatakix qullqi apthapïna, ⁵⁰ waranqa kimsa patak suxta tunka phisqan qullqi apthapirakïna, qullan utjäwin tupuparjama. ⁵¹ Uka qullqinaksti Aaronampiru, wawanakapampiruw churxäna, kunjämtix Tatitux siskatayna ukhamarjama.

¹ Tatitux Moisesampiru, Aaronampiruw parläna, akham sasa: ² “Quehat chachan wawanakapäki uka levitanakat wila masitkam jakthapim, ³ kimsa tunka maranita, phisqa tunka marankama, jupanakasti Tatitump Jikisiñ Carpan lurañatakis walirakïpxpan. ⁴ “Quehat chachan wawanakapan lurañanakapax wali qullanawa, ukanakasti akanakawa: ⁵ Kunapachatix markax yaqha chiqar sarañatak sarxarkani ukkhax, Aaronampi, wawanakapampiw jutasin Qullanansa Qullanapa chiqawjat velo apaqapxani, ukatsti ukampiw arust’äwi arcar janxatapxani. ⁶ Uka patxarusti suma lip’ichinakampiw imxatapxani, ukxarusti jan ch’ukuni morado telampiw janxatapxarakini, ukat lawanakampi apañatak uchapxani. ⁷ Ukatsti Tatitutak yaqhachat t’ant’anak uchañ patxarux, morado telampiw janxatapxani, uka patxaruw chuwanaka, wisllanaka, qirunaka, vino luqtañ chatunaka, sapür luqtañ t’ant’anak uchapxani. ⁸ Taqi uka patxarusti wila telampiw janxatapxani, ukxarusti suma lip’ichinakampiw imxatapxani, ukat lawanakampi apañatak uchapxani. ⁹ Ukatsti morado tela aptasin ukampiw candelero imxatapxani, ukhamarak lamparanaka, nina jawriñanaka, jisk’a chuwanaka, aceitetak apnaqaski taqi uka qirunaksa. ¹⁰ Taqi ukanaksti suma lip’ichinakampiw llawuntapxani, ukatsti lawanak patxaruw kallañatak uchapxani. ¹¹ “Qurit lurat altar patxarusti morado isi janatatapxani, suma lip’ichinakampiw ukar llawuntapxani, altar aptañatakisti lawanakampiw uskupxani. ¹² Ukxarusti qullan utjäwin apnaqaski taqi uka yänak apthapisin, morado telaruw uchapxani, ukanaksti suma lip’ichinakampiw llawuntapxani, ukatsti lawanakxaruw kallapxani. ¹³ Ukatsti altarat qhillanak picharapxani, ukxarusti ch’iyar wila telampiw imxatapxani. ¹⁴ Uka patxarusti taqi kunanakatix altaran yupaychañatak wakiski ukanak uchapxani: nina sank’a nakhayañanaka, nina jawriñanaka, lampanaka, jach’a qirunaka; taqi kunanakatix altaran apnaqaski ukanaka. Taqi ukanakaruw suma lip’ichinakamp imxatapxani, kallañatakisti lawanak uskupxarakini. ¹⁵ Aaronampi, wawanakapampix taqi uka qullan yänak llawthapiñ tukuyxapxani, sarantañatakis niya jank’akïpxarakini ukapachasti, Quehat chachan wawanakapaw jutapxani, taqi uka yänak apañataki. Ukampis kunatix qullanäki ukxa janiw llamkt’apxañapäkiti, jupanakan jan jiwapxañapataki. Quehat chachan wawanakapax, taqi aka qullan yänak Tatitump Jikisiñ Carpat apapxañapa. ¹⁶ Aarón sacerdoten Eleazar yuqapax lamparanak qhanayir aceite imañapa, ukatsti suma q’apkir incienso, sapür nayar luqtañ juyra waxt’anaka, luqtañ aceite imañaparaki. Ukatsti qullan utjäwi uñjañaparaki, taqi kunanakatix ukan utjki ukanaksa, ukan apnaqañatak wakiski taqi uka qullan yänakampi.” ¹⁷ Tatitusti Moisesampiru, Aaronampirux sänwa: ¹⁸ “Jan jumanakax munapxamti, levitanak taypit Quehat chachan wila masinakapan chhaqtapxañapa. ¹⁹ Jan jupanakan qullan yänak llamkt’apxatap layku mutuyat uñjasis jiwasipkañapatakix, akanak lurapxañapa: Aaronampi, wawanakapampiw sapa maynir unañchani, kunanaktix lurapxañapäki, kunanaktix apapxañapäki ukanaka. ²⁰ Ukhamat jupanakax kunatix qullanäki ukanak uñjir jan mantapkaniti, janirakiw jiwapkanisa.” ²¹ Tatitux Moisesar saskakïnwa: ²² “Guersón chachan wawanakapar jakthapirakim, saraqiripatkama, wila masipatkama, ²³ kimsa tunka maranit amstaru phisqa tunka marankam jakthapisa, jupanakasti Tatitump Jikisiñ Carpan lurañanakatakis walïpxarakpan. ²⁴ “Guersón chachan wawanakapax akanak lurapxani: ²⁵ Qullan utjäwin cortinanakap apapxani, Tatitumpi Jikisiñ Carpa, suma lip’ichinakamp patxar janxatatäkis uka, Tatitumpi Jikisiñ Carpar mantañankki uka cortina, ²⁶ uta anqäxan cortinanakapa, qullan utjäwimpiru, altarampir muyuntki uka mantañapan uchat cortina, chinuñanaka, luqtañatak wakiski taqpach yänakampi. ²⁷ Aaronampi, wawanakapampiw Guersón chachan wawanakapar kuntix lurañanakapäki, apapxañapäki ukanaksa uñachayapxani. Jumanakaw jupanakar lurañap katuyapxäta. ²⁸ Taqi ukanak Guersón chachan wawanakapax Tatitump Jikisiñ Carpan lurapxani, jupanakarusti Aarón sacerdoten Itamar yuqapaw sarayani. ²⁹ “Ukatsti Merarí chachan wawanakapar uka kipkarak jakthapim, saraqiripatkama, wila masipatkama. ³⁰ Taqinin sutinakap qillqantam, kimsa tunka maranit amstaru, phisqa tunka marankama, Tatitumpi Jikisiñ Carpan irnaqañatakis walïpxarakpan. ³¹ Jupanakan lurañanakapasti Tatitumpi Jikisiñ Carpanxa, akanakawa: tablanakampi, sayt’u lawanakampi, sayir lawanakampi, katxäsirinakapamp apapxani. ³² Ukatsti qullan utjäwir muyuntki uka sayir lawanakap apapxarakini, lawanak katxäsirinakapampi, ch’akurunakapampi, chinuñanakapampi, kunanakatix yupaychañatak munaski taqi ukanakampi. Jumaw sapa maynir kuntix apañapäki ukanak sarakïta. ³³ Taqi ukanakaw Merarí chachat saraqir wawanakapan lurañanakapaxa, jupanakarusti Itamar chachaw sarayani.” ³⁴ Ukatsti Moisesampi, Aaronampi, markan jilïrinakapampiw Quehat chachan wawanakapar jakthapipxäna, saraqiripatkama, wila masipatkama, ³⁵ kimsa tunka maranit amstaru phisqa tunka marankam yuqall wawanakaru, Tatitumpi Jikisiñ Carpan irnaqañatakis walïpkarakïn ukanakaru, ³⁶ taqpachani qillqantatasti pä waranqa paqallqu patak phisqa tunkan yuqall wawanakänwa. ³⁷ Quehat chachan saraqirinakapax taqi ukanakänwa, Tatitump Jikisiñ Carpan irnaqañatakis walïpkarakïn ukanaka. Moisesampi, Aaronampiw taqi jupanakar jakthapipxäna, kunjämtix Tatitux Moisesar arskatayna ukhamarjama. ³⁸ Guersón chachan wawanakapax saraqiripatkama, wila masipatkam jakthapitanakax, ³⁹ khitinakatix kimsa tunka maranit amstar phisqa tunka marankamäpkäna, Tatitump Jikisiñ Carpan lurañatakis walïpkarakïn ⁴⁰ ukanakasti, pä waranqa suxta patak kimsa tunkan jaqinakänwa. ⁴¹ Guersón chachan saraqiripatkam jakthapit yuqall wawanakax taqi ukanakänwa, khitinakatix Tatitump Jikisiñ Carpan irnaqañatakis walïpkarakïn ukanaka; Moisesampi, Aaronampiw jakthapipxäna, kunjämtix Tatitux Moisesar arskatayna ukhamarjama. ⁴² Merarí chachan wawanakapax saraqiripatkama, wila masipatkama, ⁴³ khitinakatix kimsa tunka maranit amstar phisqa tunka marankamäpkäna, Tatitump Jikisiñ Carpan irnaqañatakis walïpkarakïn ⁴⁴ ukanakax, kimsa waranqa pä patakanïnwa. ⁴⁵ Merarí chachan saraqiripatkam jakthapit yuqall wawanakax taqi ukanakänwa, Tatitump Jikisiñ Carpan irnaqañatakis walïpkarakïn ukanaka, Moisesampi, Aaronampiw jupanakar jakthapipxäna, kunjämtix Tatitux Moisesar arskatayna ukhamarjama. ⁴⁶ Moisesampi, Aaronampi, Israelan jilïrinakapampix taqpach levitanak jakthapipxäna, saraqiripatkama, wila masipatkama, ⁴⁷ kimsa tunka maranit amstaru phisqa tunka marankama, Tatitumpi Jikisiñ Carpan irnaqañatakis walïpkaraki ukanaka, ⁴⁸ taqpachanisti kimsaqallq waranqa phisqa patak kimsaqallq tunkan yuqall wawanakänwa. ⁴⁹ Uka jakthapïwisti kunjämtix Tatitux Moisesar arskatayna ukhamarjamaw lurasïna. Ukhamaw Moisesax sapa maynir kuntix lurañapäki, kuntix apañapäki ukanaksa uñachayäna, Tatitux jupar arskatayna ukhamarjama.

¹ Tatitux Moisesarux sänwa: ² “Israelitanakar parlam, jupanak taypit lepra usun jaqinakar jaqunukupxpan, wila apa usuninakaru, jan ukax, amayar llamkt’apxatap layku q’añuchat uñjaski ukanakaru. ³ Chachäpasa, warmïpasa campamento anqar jaqunukupxpan. Ukham lurasax janiw campamentor q’añu tukuyapkaniti, nayan jupanak taypin jakatax layku.” ⁴ Israelitanakasti Tatitux Moisesar siskatayna ukhamarjamaw jaysapxäna, ukatsti taqi uka jaqinakaruw campamentot jaqunukupxäna. ⁵ Tatitux Moisesarux sänwa: ⁶ “Israelitanakar akham sarakim: Kunapachatix khiti jaqisa, mä warmisa, Tatitur jan suma arkkani, ukhamarak kuna jan walinaksa jaqi masipar lurani mä jach’a jucha lurasa, ⁷ uka jaqisti juchanakap arsusiñapawa, ukhamarus jan walt’ayatapat jaqi masiparux taqpach kuttayxañapa, chikatan chikatapampi yapxatasa. ⁸ Ñanqhachat jaqitix jiwaspa, ukat janirak khiti wila masipar ukanak kuttayañas utjkaspa ukapachasti, ukax Tatitutakïniwa, sacerdoten katuqañapataki. Ukhamarus, ñanqhachir jaqix mä urqu oveja sacerdoten ukar apañapa, wilañcha luqtañapataki, ukhamat juchapat pampachäwi jikxatañapataki. ⁹ “Taqi churäwinakampi, waxt’anakampi, kawkïrinaktix israelitanakax Tatitur luqtapkani, ukatsti sacerdoten ukar apapkani taqi ukanakax, sacerdotetakïniwa. ¹⁰ Taqi kunanakatix Tatitutak yaqhachatäki, ukatsti sacerdoten ukar apatäki ukanakax, sacerdotetakïniwa.” ¹¹ Tatitux Moisesar yaqha kamachi churäna, sarakïnwa: ¹² “Israelitanakar parlam, akham sarakim: Mä warmitix chachanïkasin jan wal sarnaqas chachapar sallqjaspa, ¹³ ukatsti chachapan jan yatkasin yaqha chachampi wachuq jucha luraspa, ukham luratapamp q’añuchjasispa, ukat janirak khitis yatkaspa ukham luratapxa. ¹⁴ Inas chachapax warmin jan wal luratap amuyasin mayjt’aschispa, jan ukax, warmin jan kuna jucha luratapat mayjt’asispa ukaxa. ¹⁵ Ukhamäni ukapachasti, chachax sacerdoten nayraqataparuw warmipar irpani, ukatsti Tatiturux pä kilo cebada jak’u waxt’a warmipat churani. Ukampis janiw jak’u patxar aceitempi warxatkaniti, janirakiw incienso uchkaniti, uka waxt’an chuyma mayjt’at chachan waxt’apätap layku, warmipan juchap qhanstayañ munatap laykuraki. ¹⁶ “Sacerdotex warmiru jak’apar irpkatasinxa, Tatitun nayraqataparuw uñstayani. ¹⁷ Ukxarusti Tatitur luqtat uma ñiq’i chatur aptanini, ukarusti qullan utjäwit mä juk’a laq’a aptasin jach’intani. ¹⁸ Ukatsti, sacerdotex Tatitun nayraqatapar warmir irpkatasax, ñik’utap jararani, ukatsti warmin amparaparux ch’uxña lurasiñ tuqit jucha qhanar uñstayañatak waxt’äwïki uk uchani; ukchañkamasti jupax amparapan katuni, jucha luririnakar jan walt’ayir uka k’allk’u uma. ¹⁹ Ukapachaw sacerdotex warmir mä juramento lurayani, juparusti sarakiniwa: ‘Janitix yaqha chachamp sarnaqksta, chachamarus ch’uxña lurksta, janirak q’añu lurañamp atipayasksta ukapachax, aka ñanqha apanir k’allk’u uma umantkäta ukkhaxa, janiw kunas kamachkätamti. ²⁰ Ukampis jumatix chachamar yaqha chachamp ikintas sallqjsta, ukham lurasin q’añu tukuraksta ²¹ ukapachasti, Tatitux marka nayraqatan jumar ñanqhachpan, purakamas ch’itkatpan, janirak wawanïkamsa. ²² Ñanqhachäwi apanir uma umt’kät ukapachaw uka mutuyäwi katuqäta’ sasa. Warmisti saniwa: ‘Ukhamäpan’ sasa. ²³ “Ukat sacerdotex uka ñanqhachäwi arunakxa mä papelaruw qillqantani, ukatsti uka k’allk’u umampiw phiskhurarakini. ²⁴ Uka qhipatsti uka k’allk’u uma warmir umantayani, ²⁵ warmisti amparapankki uka waxt’a sacerdoter churarakini, altarxar uchañapataki, Tatitun nayraqatapar uñstayasa, ²⁶ ukxarusti waña juyranak waxt’at mä jach’i aptasinxa, altarxaruw nakt’ayani, ukhamat khitin waxt’apäki uk Tatitun amtasiñapataki. “Ukat warmix uka k’allk’u uma umantani, ²⁷ uka warmitix chachapar sallqjchïn ukapachaxa, uka k’allk’u umax wali k’allk’uw tukurapini, ukatsti purakap ch’itkatayani, janirakiw wawanïkanisa, markap taypinsti ñanqhachataw uñjasini. ²⁸ Ukampis uka warmitix jan juchanïkchi ukkhaxa, janiw kunas jupar kamachkaniti, ukatsti wawanïskarakiniwa. ²⁹ “Aka kamachinakax kunapachatix mä warmix chachanïkasin yaqha chachanakamp sarnaqas sallqjkani ukatakiwa, warmin chachapas ch’uxña luratat chuyma mayjt’ayaskani ukataki, ³⁰ jan ukax, warmipan yaqha chachampi sarnaqatap amuyaskani uka chachatakiwa. Chachax Tatitun nayraqataparuw warmipar uñstayani, ukatsti sacerdotex aka kamachinakarjamaw lurani. ³¹ Chachax janiw juchañchat uñjaskaniti, ukampis warmitix juchanïchi ukasti, mutuyataw uñjasini.”

¹ Tatitux Moisesaruw parläna akham sasa: ² “Israelitanakar parlam jupanakarusti sarakim: Maynitix chachäpasa, jan ukax warmïpasa nazireöñatak Tatitur katuyasiñ munchi ukaxa, ³ janiw kuna vinonaksa, machjayir umañanaksa umañapäkiti, janirakiw p’usqtat umañanakat lurat vinagre umañapäkiti, uvanakat ch’iwrsut umapsa umañapäkiti; janirakiw uvanak manq’añapäkiti, chhuyüpasa, wañäpasa. ⁴ Tatitur katuyasiñ arsüwip phuqhasiñapkamasti janiw uva achunakapat kunsa manq’añapäkiti. ⁵ Janirakiw ñik’utapsa mururaskaniti, jan ukasti arsüwip phuqhasiñapkamaw ñik’utap jilantayasini, Tatitur katuyataw sayt’asiñapa. ⁶ Taqi uka urunakansti janirakiw kuna jiwatarus jak’achasiñapäkiti, ⁷ jupan awkipasa, taykapasa, jan ukax, khiti jilapasa, kullakapas jiwaspa ukkhasa, q’añuchat jan tukuñapataki, Tatitur katuyasiñatak arsutap layku. ⁸ Arsutapan phuqhasiñapkamasti q’uma sayt’añapawa. ⁹ “Maynitix akatjamat jupa thiyar jiwani, ukhamat ñik’utap q’añu tukuyarakini, Tatitur katuyatäkchi ukasa, jupax ukat paqallq ururuw ñik’utap mururasini, q’umachasiñap uru purinkan ukapacha. ¹⁰ Kimsaqallqür ururusti, sacerdoten ukaruw apani pä qhurukutu, jan ukax, pä paloma chhiwchhinaka, uksti sacerdoteruw katuyani qullan utjäwir mantañana. ¹¹ Ukatsti sacerdotex ukanak luqtani; mayax jucha luratat wilañcha luqtäniwa, mayasti nakt’at luqtarakïniwa, ukampiw mä jiwatar llamkt’ata jucha luratapat pampachayasiñ jikxatani. Ukürpachaw Tatitur katuyasit jaqix ñik’utap wasitat qullanañchasxani, ¹² ukatsti Tatitur katuyasiñatak arsüwi urunakap machaqat jakhuñ qalltani. Nayra pacha katuyasit urunakax janiw jakhutäkxaniti, qullanañchkatayna uka ñik’utan q’añur tukutap layku. Tatitun nayraqataparux mä maran urqu oveja aparakini, jucha luratat wilañcha luqtañataki. ¹³ “Tatitur katuyasiñ urunak phuqhasxipansti, nazireo jaqix Tatitump Jikisiñ Carpa mantañaruw sarani, ¹⁴ ukatsti Tatiturux jan kuna kamacht’at mä maran urqu oveja taqpach nakt’ayas luqtani; uka kipkaraki, jan kuna kamacht’at mä maran urqu oveja jucha luratat pampachäwi jikxatañatak wilañcha luqtani, ukatsti jan kuna kamacht’at urqu oveja sumankxañatak wilañcha luqtarakini. ¹⁵ Ukhamarus uka nazireo jaqix qullan utjäwir apañaparakiwa, jan levaduran t’ant’anakan walaya; ukasti suma jak’uta, aceitemp chapuntata luratäñapawa, ukatsti grano achunakampita, vinompit waxt’anak apañaparaki. ¹⁶ Tatit nayraqatan sacerdotex jucha luratat wilañcha luqtani, nakt’ayat luqta katuyarakini, ¹⁷ ukatsti urqu oveja luqtarakini sumankthapiñ wilañcha luqtäwi, jan levaduran t’ant’anakan walayamp chika, ukatsti grano achunakampita, vinompit waxt’a luqtani. ¹⁸ Uka nazireo jaqisti ñik’utap mururasini Tatitump Jikisiñ Carpa mantañana, ukat sacerdotex uka ñik’uta aptasin, sumankthapiñ wilañchamp chika nakhantayani. ¹⁹ Uka qhipatsti, sacerdotex urqu ovejan qhathita jikhanip aptasin nazireo jaqir churani, jan levaduran mä t’ant’ampi, mä tortillampi, kunapachatix jupax p’iqipan ñik’utap khuchuraskani ukapacha. ²⁰ Ukatsti sacerdotew uka uywan jaraphipa, lankhu charapa Tatit nayraqatan luqtani, ukanakasti qullanawa, sacerdotenakar churañatakikiwa. Taqi ukanak phuqhasasti, nazireo jaqix vino umxarakispawa. ²¹ “Tatitur katuyasiñatak arsuri nazireo jaqix, aka kamachirjamaw phuqhani, ukatsti aka waxt’anak Tatitun nayraqatapar luqtarakini, ukhamarus munaspa ukax utjataparjamaw yaqha yänakamp luqtani. Jupasti Tatitur katuyasitapat arsutap phuqhañapawa, nazireo kankañ kamachirjama.” ²² Tatitux Moisesar sarakïnwa: ²³ “Aaronampiru, wawanakapampir parlam, jupanakax israelitanakar aka aski arunak sapxpan: ²⁴ ‘Tatituy jumarux aski waxt’äwip churpan, imarakpan. ²⁵ Tatituy kusisiñamp jumar uñtanpan, khuyapayasiñap jumar uñacht’ayarakpan; ²⁶ Tatituy jumarux munasiñamp uñtanpan, sumankañsa churarakpan.’ ²⁷ “Ukham jupanakax israelitanak taypin sutix aytapxani, nayasti jupanakarux askinak churarakï.”

¹ Kunürutix Moisesax qullan chiqawja sayt’ayañ tukuykän ukürux, aceitemp jawintasaw qullan chiqawjan yänakapampi, altaran yänakapamp qullanañchäna. ² Ukatsti ayllunakan jilïrinakapax, khitinakatix jaqinak jakthapiñ yanapt’apkatayna jupanakax, sarasin, ³ Tatituruw waxt’a luqtapxäna, sapaqat pä jilïrinakat mä carreta, taqpachax suxta carretanaka, ukatsti sapaqat maynit mä urqu vaca, taqpachax tunka payan urqu vacanaka. Taqi ukanaksti qullan chiqawjaruw uchapxäna. ⁴ Ukatsti Tatitux Moisesar akham sarakïna: ⁵ “Uka carretanakampi, uka urqu vacanakamp katuqam, ukatsti levitanakar churxam, Tatitump Jikisiñ Carpan kuna lurañatix sapa maynir wakt’ki ukhamarjam apnaqapxañapataki” sasa. ⁶ Moisesasti carretanakampi, urqu vacanakamp katuqasin, levitanakaruw lakintäna. ⁷ Guersón chachan wawanakaparux pä carretampi, pusi urqu vacampi churäna, jupanakan ukanakamp irnaqapxañapataki. ⁸ Merarí chachan wawanakaparusti pusi carretampi, kimsaqallq urqu vacampi churäna, jupanakan ukanakamp irnaqapxañapataki, jupanakarux Aarón sacerdoten Itamar yuqapaw ukham sarayäna. ⁹ Ukampis Quehat chachan wawanakaparux janiw kuna carretanaksa, urqu vacanaksa churkänti, jupanakan luräwinakapasti qullan yänaka kallachipxar apapxañapänwa uka layku. ¹⁰ Kunürutix altarax qullanañchatäxän ukürusti, ayllunakan jilïr irpirinakapax waxt’anak apanipxäna, ukatsti altar nayräxaruw uskupxäna. ¹¹ Ukat Tatitux Moisesar säna: “Sapaqat ayllut mä jilïrix, altar katuyañatak waxt’ap sapür apanpan” sasa. ¹² Nayrïr urux, Judá ayllunkir Aminadab chachan Nahasón yuqapaw waxt’ap apäna. ¹³ Jupan waxt’apasti akänwa: qullqit lurat mä llataku, ukasti waranqa pusi patak kimsa tunkan gramonïnwa, ukatsti qullqit lurat qiru, ukasti paqallq patak paqallq tunkan gramonirakïnwa qullan utjäwin tupuparjama, paypach churäwisti suma jak’ump phuqhantatänwa, aceitemp chaputa, grano achunak waxt’ataki; ¹⁴ ukxarusti qurit lurat mä wislla, ukasti patak tunkan gramonïnwa, inciensompi phuqt’ata, ¹⁵ nakt’ayat waxt’a luqtañatakisti, mä vaca qallu, mä urqu oveja, mä maran urqu oveja, ¹⁶ jucha luratat wilañcha luqtañatakix, mä chivo, ¹⁷ sumankañ luqta wilañchatakisti, pä urqu vacanaka, phisqa urqu ovejanaka, phisqa chivonaka, mä maran phisqa ovejanaka. Ukanak Aminadab chachan Nahasón yuqapax waxt’atak apäna. ¹⁸ Payïr urusti, Isacar ayllunkir Suar chachan Natanael chachaw waxt’ap apäna, Suar chachan yuqapa, ¹⁹ jupasti Nahasón chachan waxt’ap kipkak pachpa waxt’anak luqtarakïna. ²⁴ Kimsïr urusti, Zabulón ayllun jilïripa Eliab chachaw waxt’ap apäna, Helón chachan yuqapa, ²⁵ jupasti mayninakjamaw pachpa waxt’anak luqtarakïna. ³⁰ Pusïri urusti, Rubén ayllun jilïripa Elisur chachaw waxt’ap apäna, Sedeúr chachan yuqapa, ³¹ jupasti maynïr jilïrinakjamaw pachpa waxt’anak luqtarakïna. ³⁶ Phisqïri urusti, Simeón ayllun jilïripa Selumiel chachaw waxt’ap apäna, Surisadai chachan yuqapa, ³⁷ jupasti maynïr jilïrinakjamaw pachpa waxt’anak luqtarakïna. ⁴² Suxtïri urusti, Gad ayllun jilïripa Eliasaf chachaw waxt’ap apäna, Reuel chachan yuqapa, ⁴³ jupasti maynïr jilïrinakjamaw pachpa waxt’anak luqtäna. ⁴⁸ Paqallqür urusti, Efraín ayllun jilïripa Elisamá chachaw waxt’ap apäna, Amihud chachan yuqapa, ⁴⁹ jupasti maynïr jilïrinakjamaw pachpa waxt’anak luqtäna. ⁵⁴ Kimsaqallqür urusti, Manasés ayllun jilïripa Gamaliel chachaw waxt’ap apäna, Pedasur chachan yuqapa, ⁵⁵ jupasti maynïr jilïrinakjamaw pachpa waxt’anak luqtäna. ⁶⁰ Llätunkïr urusti, Benjamín ayllun jilïripa Abidán chachaw waxt’ap apäna, Guidoní chachan yuqapa, ⁶¹ jupasti maynïr jilïrinakjamaw pachpa waxt’anak luqtäna. ⁶⁶ Tunkïr urusti, Dan ayllun jilïripa Ahiézer chachaw waxt’ap apäna, Adai chachan yuqapa, ⁶⁷ jupasti maynïr jilïrinakjamaw pachpa waxt’anak luqtäna. ⁷² Tunka mayan ururusti, Aser ayllun jilïripa Paguiel chachaw waxt’ap apäna, Ocrán chachan yuqapa, ⁷³ jupasti maynïr jilïrinakjamaw pachpa waxt’anak luqtäna. ⁷⁸ Tunka payan ururusti, Neftalí ayllun jilïripa Ahirá chachaw waxt’ap luqtäna, Enán chachan yuqapa, ⁷⁹ jupasti maynïr jilïrinakjamaw pachpa waxt’anak luqtäna. ⁸⁴ Ukhamaw kunapachatix altarax katuyatäxän ukkhax, israelitanakan ayllunakapan jilïrinakapax tunka payan qullqi llatakunak churapxäna, tunka payan qullqi qirunaka, tunka payan quri wisllanaka. ⁸⁵ Sapa qullqi llatakusti pusi patak kimsa tunkan gramonïnwa, sapa qirusti paqallqu patak paqallqu tunkan gramonirakïnwa. Taqpachasti, llatakunakana, qirunakan qullqipax pä tunka suxtan waranqa pusi patakan gramonakanïnwa, qullan utjäwin tupuparjama. ⁸⁶ Tunka payan quri wisllanakaw incienson phuqt’at utjarakïna, sapa mayax patak tunkan gramonïnwa, qullan utjäwin tupuparjama. Taqpach wisllanakan quripax waranqa kimsa patak pä tunkan gramonakaw tupt’asïna. ⁸⁷ Nakt’ayat luqtäwitak uywanakax, tunka payan urqu vacanaka, tunka payan urqu ovejanaka, tunka payan mä maran urqu ovejanaka, ukanakänwa, sapaqat maynis grano waxt’ampi, jucha luratat wilañcha luqtañatakisti tunka payan chivonakampi. ⁸⁸ Sumankxañ wilañcha luqtañataki uywanakax, taqpachasti pä tunk pusin vaca qallunaka, suxta tunk urqu ovejanaka, suxta tunk chivonaka, suxta tunka mä maran ovejanaka, ukanakänwa. Taqi uka waxt’anakaw altar katuyxañatak luqtasïna, kunapachatix katuyatäkän ukapacha. ⁸⁹ Moisesax Tatitump parlañatak Jikisiñ Carpar mantkän ukapachasti, Tatitun jupar parlaskatap ist’äna, arust’äwi arcan qhuphiñ patapankir pä querubines sat chhiqhaninak taypita.

¹ Tatitux Moisesar sarakïnwa: ² “Aaronamp parlam, juparusti sarakim: kunapachatix paqallqu lamparanak aqtaykani ukapachax, nayräxar qhant’kir candelero patxar apxatpan” sasa. ³ Aaronasti kunjämtix Tatitux Moisesar siskatayna ukhamarjamaw phuqhäna, lamparanak nayräxar qhant’kir candelero patxar ucht’äna. ⁴ Candelerox qurit luratänwa, kayut p’iqikam panqarar uñtat martillompkam liq’sutänwa. Tatitux uñacht’aykatayna ukhamarjamaw Moisesax luräna. ⁵ Tatitux Moisesar sänwa: ⁶ “Israelitanak taypit Leví chachat saraqirinakar yaqhacham, ukatsti jupanakar q’umacharakim. ⁷ Jupanakar q’umachañatakisti, q’umachasiñ umampiw jupanakar ch’allakipäta, ukatsti janchipan utjir ñik’utanakap q’al khuchhurasiyäta, isinakapsa t’axsurayarakïta, ukhamat q’uma tukupxani. ⁸ Ukatsti mä vaca qallu katusin apapxpan, aceitemp chaputa suma jak’u waxt’ampi. Jumasti, yaqha vaca qallu katurakïta, jucha luratat pampachäwi jikxatañ wilañcha luqtañataki. ⁹ Jumarakiw levitanakar Tatitump Jikisiñ Carpar jak’achayäta, ukatsti taqpach israelitanakar tantachthapirakïta. ¹⁰ Ukatsti levitanakar nayan nayraqataxaruw uñstayitäta, israelitanakasti amparanakapampiw levitanakan p’iqinakapxar luqxatapxani. ¹¹ Aaronasti nayan nayraqataxaruw levitanakar uñstayani israelitanakan waxt’apjama, ukhamat levitanakax nayan luqtirixat katuyatäni. ¹² Ukatsti levitanakax vaca qallunakan p’iqipxaruw amparanakapamp luqxatapxani, jumasti jucha luratat mä vaca qallu wilañcha luqtäta, mayïr vaca qallsti Tatitutak nakt’ayat luqtäwi churarakïta. ¹³ Ukatsti levitanakarux Aaronampina, wawanakapampin nayraqataparuw sayarayäta, jupanakarusti luqta katuyañäki ukarjamaw nayar katuyitäta; ¹⁴ ukham lurasaw levitanakarux mayni israelitanak taypit nayankxañapatak yaqhachäta. ¹⁵ Ukatsti jupanakax Tatitump Jikisiñ Carpan yanapiriw sarapxani. Jupanakarux q’umachata, mä suma waxt’äwïkaspas ukham nayar katuyitäta, ¹⁶ taqi israelitanak taypit jupanakan nayar katuyatäpxatap layku. Nayaw jupanakar taqi israelitanakan jilïr tayna yuqall wawanakap lanti katuqta, ¹⁷ israelitanakan jilïr tayna yuqall wawanakapax nayankituwa, kunjämatix uywanakapan nayrïr qallunakapax nayankki ukhama. Egipcionakan jilïr tayna yuqall wawanakap jiwaraykäyät ukapachaxa, israelitanakan jilïr tayna yuqall wawanakap nayatakiw yaqhachasïyäta. ¹⁸ Ukat nayax levitanakar jupanak lanti katusta. ¹⁹ Nayaw levitanakarux mayni israelitanak taypit ajllista, jupanaksti Aaronampiru, wawanakapampiruw katuyta, Tatitumpi Jikisiñ Carpan israelitanakan sutipxar yanapapxañapataki, ukat Tatitun pampachäwip israelitanakatak katuqapxañapataki. Ukhamat israelitanakan qullan utjäwir jan jak’achasiñapäkaniti, janirakiw kunas jupanakar kamachkaniti.” ²⁰ Ukatsti Moisesasa, Aaronasa, Israel marka markachirinakas phuqhapxänwa, kuntix Tatitux Moisesar levitanakxat siskatayna taqi ukanaka. ²¹ Levitanakax q’umachasipxänwa, isinakapsa t’axsurasipxänwa, Aaronasti jupanakar Tatit nayraqatan mä suma waxt’äwïkaspas ukham katuyxäna, q’umachäwi luräwi jupanakat lurasina. ²² Taqi ukanak qhipatsti, levitanakax Tatitump Jikisiñ Carparuw lurañanakap phuqhir sarapxäna, jupanakax Aaronampina, wawanakapampin sarayataw lurañanakap phuqhapxäna. Kunjämtix Tatitux levitanakxat Moisesar arskatayna ukhamarjamaw phuqhasïna. ²³ Tatitux Moisesar akham sarakïna: ²⁴ “Levitanakax pä tunka phisqan maranit Tatitump Jikisiñ Carpan luräwinakap qalltapxañapa, ²⁵ phisqa tunka maranirusti, janiw jupanakan juk’amp lurañapax wakiskxaniti. ²⁶ Uka maranak phuqhatatsti, Tatitump Jikisiñ Carpa uñjañak jilanakapar yanapapxaspa, ukampis janiw juk’amp lurañanak lurkxapxaniti. Ukham jumax levitanakan luräwinakap apnaqäta.”

¹ Israelitanakan Egipto markat mistunipxatapatsti, pä mara saraqataru, nayrïr phaxsina Sinaí wasaran Tatitux Moisesar parläna, akham sasa: ² “Israelitanakax Pascua uruyañxa, kuna urutakitix amtatäki ukhamarjamaw uruyapxañapa, ³ nayrïr phaxsina, tunka pusin uru saraqat jayp’thapiru, kawkïr yatichäwinaktix churapksma ukhamarjamaw uruyapxäta” sasa. ⁴ Ukat Moisesax israelitanakar Pascua uruyapxañapatak säna, ⁵ jupanakasti uka phaxsina, tunka pusin uru saraqat jayp’thapiruw Sinaí wasaran uruyapxäna, kunjämtix Tatitux Moisesar siskatayna ukhamarjam sum phuqhasa. ⁶ Ukampisa, mä qawqha jan q’umachat jaqinakaw utjäna, jupanakan jiwat jaqir llamkt’apxatap layku; ukat ukürux Pascua jan uruyapkänti. Jupanakasti Moisesampiru, Aaronampir parliriw sarapxäna, ⁷ Moisesarusti akham sapxäna: —Nanakax mä jiwat jaqin amayap llamkt’apxta, uka laykuw q’añuchat uñjasipxta. Ukhamasti, ¿janit nanakasti mayni israelitanakamp chika amtatäki uka urun Tatitur waxt’a luqtapkiriststi? —sasa. ⁸ Moisesasti jupanakarux sänwa: —Suyt’apxita, Tatituruw kuntix lurapxañamäki uk jiskt’ä, —sasa. ⁹ Tatitusti Moisesar akham sarakïna: “Israelitanakar akham säta: ¹⁰ Taqi jumanakawa, wawanakamamp kuna nayar jach’añchas Pascua uruyapxäta. Khitinakatix mä jiwatar llamkt’atap layku jan q’umäpki, jan ukax, khitinakatix jayan jikxatasipki, saräwinkasipki, ¹¹ ukanakasti, payïr phaxsina, tunka pusin uru saraqat jayp’thapiruw uruyapxani. Jupanakasti ovejxa, jaru quranakampi, jan levaduran t’ant’amp manq’apxani, ¹² janiw qhipärmanthitak kunas jilt’ayatäñapäkiti, janirakiw uywan ch’akhanakapas p’akjatäñapäkiti. Yatichäwinak churapksma ukhamarjamaw Pascua uruyapxäta. ¹³ Ukampis khititix q’uma jikxataskasina, jan saräwinkkasina Pascua jan uruykani uka jaqix, markap taypit apanukutaw uñjasini. Uka urun Tatitur waxt’a jan luqtatap laykusti, uka juchapat mutuyataw uñjasini. ¹⁴ “Jumanak taypin jakasir jaya markat jutir jaqinakax, Pascua uruyapxarakiniwa, nayar jach’añchasa, kawkïr yatichäwinaktix churkta ukhamarjama. Uka yatichäwinakax yaqha markat jutir jaqinakatakisa, pachpa markan yurir jaqinakatakis pachpakïniwa.” ¹⁵ Kunürutix Arust’äwi Carpa sayt’ayapkän uküruxa, mä qinayaw imxatäna. Jayp’untxän ukapachasti, Arust’äwi Carpa patxan mä ninaw uñstäna, ukampis willjtarux chhaqtawayxänwa. ¹⁶ Ukhamaw sapa kuti lurasïna: Urux qinayaw carpar imxattäna, arumasti ninar uñtataw ukar qhant’äna. ¹⁷ Qinayax carpa patxat unxtkän ukkhasti, israelitanakax sarxarupxänwa, ukatsti kawkharutix qinayax sayt’kän ukkharuw israelitanakax utjnuqtapxäna. ¹⁸ Tatitun aruparjamaw israelitanakax sarxarupxäna, jan ukax utjnuqtapxänsa; kunapachkamatix qinayax Arust’äwi Carpa patxar imxatkän ukkhakamaw uka chiqan qhiparapxäna. ¹⁹ Qinayatix walja urunak Arust’äwi Carpa patxan qhiparkän ukkhaxa, israelitanakax pachparuw Tatitur yupaychañatak qhiparapxarakïna. ²⁰ Qinayatix mä qawqha urunakak Arust’äwi Carpa patxan qhiparkän ukkhaxa, israelitanakax Tatitun arsutaparjamaw jank’ak sarxarupxäna, sayt’apxarakïna. ²¹ Yaqhip urun qinayax arumakiw qhiparäna, qhipärmanthisti uka chiqat unxtäna; ukapachasti jupanakax sarxarupxänwa. Arumäpasa, urüpasa, qinayax unxtkän ukkhaxa, jupanakax sartawayapxarakïnwa. ²² Qinayatix Arust’äwi Carpa patxan pä uru, mä phaxsi, jan ukax, mä maras sayt’kän ukapachaxa, israelitanakax sayt’apxarakïnwa, janiw juk’amp sarkxapxänti, pachpan utjnuqtapxäna. Qinayatix unxtkän ukkhasti, jupanakax sartawayapxänwa. ²³ Tatitun arsutaparjamaw utjnuqtapxäna, arsutaparjamarakiw sarxarupxäna. Tatitun arsutap phuqhasa, kunjämtix Tatitux Moisés tuqi jupanakar siskatayna ukhamarjam jaysasa.

¹ Tatitux Moisesar sarakïnwa: ² “Qullqit pä trompetanak luram, martillomp liq’suta, ukampiw jaqinakar tantachthapïta, ukampiw sarxaruñatakis yatiyäta. ³ Paypach trompeta phust’askan ukapachasti, taqpach markaw juma nayraqatan tantachasini, Tatitump Jikisiñ Carpa mantañana. ⁴ Ukampis mä sapa trompetak phust’askani ukapachax, ayllunakan jilïr irpirinakapakiw tantacht’asini. ⁵ Trompetanak phust’atxaru, jach’at arnaqasiñanakampïni ukkhasti, inti jalsu tuqin utjnuqtatäpki ukanakaw sarxarupxani, ⁶ payïr phust’atxarusti, aynach tuqin utjnuqtatäpki ukanakaw sarxarupxarakini. Ukhamasti, trompetanak phust’atxar jach’at arnaqasiñanakampix sarxaruñatakïniwa. ⁷ Jaqinakan tantachasiñapatakisti, trompetak phust’apxani, ukasti mä chimpüniwa. ⁸ Aarón chachat saraqir sacerdotenakakiw trompetanak phust’apxani. Aka kamachinakax jumanakatak wiñayatakïniwa. ⁹ “Nuwasïwi utjipantix, jumanakan nuwasir mistupxañam wakiskan ukapachasti, uka trompetanak phust’apxäta, ukatsti taqi ch’amamampiw art’asipxäta. Ukhamat naya, Tatit Diosamax jumanakat amtasï, ukatsti uñisirinakamat jumanakarux qhispiyapxäma. ¹⁰ Kusisiñ urunakansa trompetanak phust’apxarakïta, uruyañ urunakansa, machaq phaxsi urunakansa, kunapachatix nakt’ayat luqtäwinaka, sumankañ wilañchanak luqtasipkäta ukapachasa. Ukhamat nayax jumanakat amtasipxäma. Nayaw jumanakan Tatit Diosamätxa.” ¹¹ Tatitump Jikisiñ Carpa patxankkän uka qinayanakax, pä mara, payïr phaxsina, pä tunka uru saraqataruw unxtxäna. ¹² Ukürusti, israelitanakax kunjämtix Tatitux jupanakar Moisés tuqi arsuwaykatayna ukhamarjamaw sartasin uka qinayar arkapxäna, Sinaí wasarata, Parán wasarkama. ¹⁴ Nayraqat sarantirinakax Judá ayllun wiphalapanïkän uka ejercitow sarantäna, jupanakan jilïripax Nahasón chachänwa, Aminadab chachan yuqapa. ¹⁵ Isacar ayllun ejercitop nayraqatarusti Natanael sat Suar chachan yuqapaw sarantäna, ¹⁶ Zabulón ayllun ejercitop nayraqatarux Eliab sat Helón chachan yuqapaw sarantäna. ¹⁷ Ukapachasti, Tatitump Jikisiñ Carpa jararapxäna, ukatsti Guersón chachat saraqirinakampi, Merarí chachat saraqirinakampiw, uk apapxäna. ¹⁸ Ukxarusti Rubén ayllun wiphalapanïki uka ejercitow sarantäna; jilïr irpiripax Elisur chachänwa, Sedeúr chachan yuqapa. ¹⁹ Simeón ayllun ejercitop nayraqatarusti Selumiel jilïr irpiripaw sarantäna, Surisadai chachan yuqapa. ²⁰ Gad ayllun ejercitop nayraqatarusti, Eliasaf sat Reuel chachan yuqapaw sarantäna. ²¹ Ukxarusti Quehat chachan saraqirinakapaw Tatitump Jikisiñ Carpan yänak apt’asit sarantapxäna. Utjnuqäwir puripxän ukkhasti, Tatitump Jikisiñ Carpax niyaw sayt’ayatäxäna. ²² Ukxarusti Efraín ayllun wiphalapanïki uka ejercitow sarantäna, jilïr irpiripax Elisamá chachänwa, Amihud chachan yuqapa. ²³ Manasés ayllun ejercitop nayraqatarux Gamaliel sat Pedasur chachan yuqapaw sarantäna. ²⁴ Benjamín ayllun ejercitop nayraqatarux Abidán sat Guidoní chachan yuqapaw sarantäna. ²⁵ Tukuyarusti, mayni ejercitonakan qhipapatxa, Dan ayllun wiphalapanïki uka ejercitow sarantäna, jilïr irpiripasti Ahiézer chachänwa, Amisadai chachan yuqapa. ²⁶ Aser ayllun ejercitop nayraqatarusti Paguiel sat Ocrán chachan yuqapaw sarantäna. ²⁷ Neftalí ayllun ejercitop nayraqatarusti Ahirá sat Enán chachan yuqapaw sarantarakïna. ²⁸ Ukhamaw israelitanakan ejercitonakapax thakhinjam tam tama sarantapxäna. ²⁹ Mä urusti, Moisesax warmipan jilaparuw jawsäna, ukasti Hobab satänwa, Reuel sat madianita chachan wawaparakïnwa, juparusti akham säna: —Tatitux churapkitani uka uraqiruw nanakax sarasipkta. Jutam, nanakamp chik saram, nanakax sum uñjapxäma, Tatitux arupampiw arsu Israel markar munasiñamp uñjañataki —sasa. ³⁰ Ukampis Hobab chachax jupar sänwa: —Janiw sarkiristti, nayax uraqixarukiw kuttxä, wila masinakax jak’aru —sasa. ³¹ Moisesasti saskakïnwa: —Jan jaytanukupxistati, jumax sum uñjtaxa kawkharutix wasaran utjnuqtapkirista ukxa, jumaw nanakar irpapxitasma. ³² Nanakamp chikatix sarätaxa, kuna suma yänaktix Tatitux churapkitani ukanakat jaljt’asiñäni —sasa. ³³ Ukhamaw jupanakax Tatitun qullupat sartawayxapxäna, ukatsti kimsüruw sarapxäna. Tatitun arust’äwi arcapax jupanakan nayrap saräna, kawkharutix samart’apkaspa ukawja thaqhasa. ³⁴ Sarxarupkän ukapachasti, Tatitun qinayapax urun jupanakxankänwa. ³⁵ Arca apxarupkän ukkhasti, Moisesax sänwa: “¡Tatituxay, sartasim! ¡Uñisirinakamax aywitatapxpan! ¡Jumar uñjasax uñisirinakamax jaltxapxpan!” sasa. ³⁶ Arcax sayt’kän ukkhasti, Moisesax sänwa: “¡Tatay, Israel markar jan apanukumti, wali mirantat markamar jan apanukumti!” sasa.

¹ Mä urusti, israelitanakax Tatitutakiw arusipxäna, jupanakan jan walt’añanakan jikxatasipxatap layku. Tatitusti ukanak ist’asax walpun q’apisïna, ukat jupanakar mä nina apayanisax utjnuqäwin thiyanakap phichhantäna. ² Jaqinakax jach’at wararisaw Moisesar yanap mayipxäna, Moisesasti Tatituruw jupanakatak mayïna, ukat ninax jiwarxäna. ³ Ukat uka chiqarux Taberá sas sutichapxäna, uka arusti “phichhantata” sañ muni. Uka chiqan Tatitun ninapan jupanakatak nakhatap layku. ⁴ Israelitanak taypin yaqha markankir jaqinakaw utjatayna, jupanakasti manq’añatak llakisisipkäna. Israelitanakasti jupanak uñjasax jachapxarakïnwa, akham sasa: “¡Aychakis manq’añatak utjaspa! ⁵ ¡Egipto uraqin chawlla inak manq’atasasti kawkinkaraki! Ukatsti, pepinonaka, melonanaka, puerronaka, cebollanaka, ajonak khayan manq’ayätan. ⁶ Jichhasti manq’atjamaw jiwarasktan, janirakiw kunas utjkiti, aka maná manq’akiw utjaski” sasa. ⁷ Maná manq’asti cilantro quqan jathapar uñtatänwa; samipasti niyas q’illur uñtatarakïnwa, resina aceitjama, ⁸ mallt’atasti aceitemp chaputa jak’ut lurat t’ant’jamänwa. Jaqinakax ukanak apthapiriw mistüna, ukatsti ukanak k’iyapxäna, ukatsti ch’axt’asisaw phayasipxäna, jan ukax, t’ant’anak lurasipxarakïna. ⁹ Arumthapirusti, sullax utjnuqtapkän ukxaruw sullantäna, maná manq’ax sullampi chikaw purirakïna. ¹⁰ Moisesax israelitanakampi wila masinakapampi chhujlla mantañanakapan jachasipkatap ist’äna. Tatitusti wali q’apisitapunïnwa. Moisesax mayjt’asirakïnwa, ¹¹ ukat Tatitur akham jiskt’äna: —Nayax juman luqtirimätwa. ¿Kunatarak ukham jan wal luristasti? ¿Kunarak juchäxi nayan aka markamp akataq ch’am tukuñaxatakisti? ¹² ¿Nayasti jupanakan awkipätti, taykapätcha, nayra awkinakapar churañatak arsut uraqir puriyañkam ñuñur wawanakarjam amparaxar ichuskañatak nayar mayiñamatakisti? ¹³ Jupanakax jacht’asisaw nayan ukar jutapxitu: ‘Aycha manq’añatak churapxita’ sasa. ¿Kawkitarak akataq jaqinakar manq’ayañatak aycha apsüsti? ¹⁴ Janiw naya sapaki taqi aka jaqinakar irpirjamäkti; nayatakix wali ch’am tukuñawa. ¹⁵ Jumatix nayar ukham luraskakitätaxa, jakañaxak apaqxita chiqpachan munaschista ukaxa. Ukataq jan walt’añan uñjasiñaxax tukusxaspawa —sasa. ¹⁶ Tatitusti Moisesar sänwa: —Israelitanak taypit paqallq tunka jilïr chachanak tantacham, jupanakasti juman uñt’at marka sarayir jaqinakäñapawa, jupanakarusti Tatitump Jikisiñ Carpar irpanim, ukan jumamp chik suyapxpan. ¹⁷ Nayax saraqanisin jumar parläma, ukatsti juman ajayumat apaqasaw uka jilïr jaqinakar churä, jumar aka marka apnaqañ yanapt’añapataki; jan juma sapak taqi kun luraskañamataki. ¹⁸ Ukatsti jaqinakarux arumanthitak q’umachasir khitham, ukat aycha manq’apxani. Nayax jupanakan jachatanakapampi, parlatanakapamp ist’xtwa: “¡Aychakis manq’añatak utjistaspa! ¡Egipton walikipuniw sarnaqaskäyätan!” sasa. Walikiwa, nayaw manq’apxañapatak aycha churä, ¹⁹ janiw mä urukiti, pä urukicha, phisqa urukicha, tunka urukicha, pä tunka urukicha aycha manq’apkani, ²⁰ jan ukasti phaxspachaw aycha manq’apxani, axtasiñkama, nasanakapat mistuyañkama, jupanak taypin jikxataskasasa, naya, Tatitur jisk’achapxatapata, naya nayräxan jachapxatapata: ‘¿Kunatakirak Egiptot mistunpachätansti?’ sapxatap layku. ²¹ Moisesasti sänwa: —Tatay, ¿kawkitarak phaxspach manq’ayañamatak ukataq aycha apsütasti? Niya suxta patak waranqa chachanakawa, warminakar jan jakhusa. ²² Nanakax apasinipkta uka vacanakampi, ovejanakampi taqpach kharirapkirista ukasa, jan ukax, qutan utjir taqpach chawllanak churksna ukasa, janiw taqinitak utjkaspati —sasa. ²³ Ukampis Tatitux Moisesar sänwa: —¿Janis nayax ch’amanïkirista ukhamti amuyista? Jichhaw uñjäta, arsutaxax phuqhasiniti, janich phuqhaskani uka —sasa. ²⁴ Ukatsti Moisesax kuntix Tatitux jupar siskatayna ukanak markar yatiyir saräna, paqallq tunka israelitanakan jilïrinakaparuw tantachäna, jupanakarusti qullan utjäwi muytaruw uchäna. ²⁵ Ukapachasti Tatitux qinayanjam saraqanisinxa, Moisesampiw parläna; ukatsti Moisesan utjkän uka ajayut apaqäna, ukatsti uka paqallq tunka jilïr jaqinakaruw churäna, ajayux jupanakxar purkän ukkhasti, jupanakax Tatitut katuqat arunak yatiyañ qalltapxäna; ukasti mä kutikiw ukham lurasïna. ²⁶ Uka paqallq tunk ajllitanak taypin pä chachaw utjäna, maynix Eldad sutinïnwa, maynisti Medad sutinirakïnwa, jupanakasti janiw qullan carpar sarapkataynati, jan ukasti, campamenton qhiparapxatayna. Ukampisa, ajayux jupanakxar purirakïnwa, ukatsti jutir urunakat parlañ qalltapxarakïna. ²⁷ Ukapachaw mä waynax jalasin Moisesar yatiyäna, akham sasa: —¡Eldad, Medad chachanakax profetanakjamaw campamenton parlasipki! —sasa. ²⁸ Ukat Josué sat Nun chachan yuqapa, khititix Moisesar waynatpach yanapkän ukax säna: —¡Moisés, tatay, uka arunak jan parlayamti! —sasa. ²⁹ Moisesasti jupar sänwa: —¿Kunatarak jumasti naya sapan parlañaxak muntasti? ¡Nayax Tatitun taqpach markapar ajayup churañapa, ukatsti taqinis profetäpxañap munirista! —sasa. ³⁰ Uka qhipatsti, Moisesampi, Israelan jilïrinakapampix campamentoruw kuttxapxäna. ³¹ Tatitux jach’a quta tuqit wali ch’aman thaya thayt’ayanïna. Uka thayasti walja khullunak apanïna, ukatsti israelitanakan campamento jak’aruw puriyäna. Khullunakasti waljapunïnwa, mä uru sararjamaruw phuqhantäna, niya mä metrokam amsta tuqirux phuqhantarakïna. ³² Jaqinakasti uka uru, uka aruma, qhipärmanthi urumppachaw khullunak apthapïna. Juk’a apthapirix, tunka qutu khullunak apthapïna, uksti campamento thiyanakaruw wañachapxäna. ³³ Ukampis israelitanakax khullun aychap manq’antapkän ukapachaw Tatitux jupanakatak q’apisïna, jupanakar walpun mutuyäna, waljaniw jiwararakïna. ³⁴ Ukat uka chiqawjarux Quibrot-hataavá sas sutichapxäna, uka chiqan manq’añak munaskir jaqinakan amayap imantapxatap layku. ³⁵ Markasti Quibrot-hataavá chiqat sartasin, Haserot chiqar puriñkamaw sarasipkakïna, ukatsti ukan qhiparxapxäna.

¹ Mariampi, Aaronampix Moisés jilapat jan wal parlapxäna, jupan mä etiope warmimpi jaqichasitap layku. ² Ukhamarus sapxänwa: “Tatitux janiw Moisesampik parlkiti; jiwasampix parlarakiwa” sasa. Tatitusti uka parlatanakap ist’änwa. ³ Chiqpachansa, Moisesax taqi akapachan wali llamp’u chuyman jaqïnwa. ⁴ Ukat Tatitux Moisesampiru, Aaronampiru, Mariampirux säna: “Jumanak kimsanix Tatitump Jikisiñ Carpar sarapxam” sasa. Ukatsti kimsanpachaw ukar sarapxäna. ⁵ Ukapachaw Tatitux qinay taypinjam saraqanïna, ukatsti Jikisiñ Carpa mantañawjaruw sayt’asïna; ukatsti Aaronampiru, Mariampiruw jawsäna, jupanakax uñstapkän ukkhasti, ⁶ Tatitux jupanakaruw säna: “Ist’apxam kuntix sapkäm uka arunaka: Jumanak taypin mä profetax nayan arunakax yatiyir utjki ukapachax, nayaw jupampix unañchäwinak tuqi parlta, samkanak tuqi parlarakta; ⁷ ukampis Moisés luqtirixampix janiw ukham lurkti. Jupax taqpach luqtirinakaxat sipan aski jaqipuniwa, ⁸ jupampisti ajanuy ajanuw parlta, qhana arunakampiraki. Jupatix ajanuy ajanu uñjchitu ukasti, ¿kunatarak jumanakasti jupar k’umipxtasti?” sasa. ⁹ Diosasti jupanakatak walpun q’apisïna, ukatsti sarxarakïnwa. ¹⁰ Qinayax qullan utjäwit jithiqtawayxän ukapachasti, Mariax lepra usuniw uñstäna, janchipax khunjam janq’uw tuküna. Aaronax Mariar uñtañatakiw kutikipstäna, lepra usun jupar uñkatasinsti, ¹¹ Moisesarux sänwa: —Tata, janikiy jan amuyunjam jucha luratanakaxat mutuyapxistati. ¹² Marian janchipax q’ala tukjatawa, janïr yurkasa jiwir wawanakan janchipar uñtatawa. Diosar achikt’amaya jupar k’umarachañapataki —sasa. ¹³ Moisesasti Tatituruw achikt’asïna, akham sasa: “Dios Tatay, Mariar k’umarachakimaya” sasa. ¹⁴ Tatit Diosasti ukxarux sänwa: “Awkipatix ajanut thuskataspa ukkhax, paqallq uruw jupax p’inqachat uñjasispa. Ukhamasti juparux paqallq uru campamentot anqar jaqunukupxpan, uka qhipat kutt’asinkaniwa” sasa. ¹⁵ Ukhamaw Mariax paqallq uru campamentot jaqunukut uñjasïna. Ukchañkamasti, markax janiw ukawjat sartkänti. ¹⁶ Mariax jupanakamp chikäxän ukapachaw, Haserot chiqat sartawayapxäna, ukatsti Parán wasarar puriñkamax janiw sayt’apkänti.

¹ Tatitux Moisesar sänwa: ² “Mä qawqha jaqinak Canaán uraqir khitham, kawkïr uraqtix nayax israelitanakar churkä uka uraq uñaqanipxañapataki. Sapa ayllut mayni jilïripar khitham” sasa. ³ Moisesasti Tatitun arsutaparjamaw Parán wasarat jupanakar khithäna. Uka jaqinakasti israelitanak taypin jilïr chachanakkamakïnwa. ⁴ Khithat jilïrinakasti akanakänwa: Rubén ayllutxa, Samúa sat Zacur chachan wawapa; ⁵ Simeón ayllutxa, Safat sat Horí chachan yuqapa; ⁶ Judá ayllutxa, Caleb sat Jefuné chachan yuqapa; ⁷ Isacar ayllutxa, Igal sat José chachan yuqapa; ⁸ Efraín ayllutxa, Oseas sat Nun chachan yuqapa; ⁹ Benjamín ayllutxa, Paltí sat Rafú chachan yuqapa; ¹⁰ Zabulón ayllutxa, Gadiel sat Sodí chachan yuqapa; ¹¹ Manasés ayllutxa, Gadí sat Susí chachan yuqapa; ¹² Dan ayllutxa, Amiel sat Guemalí chachan yuqapa; ¹³ Aser ayllutxa, Setur sat Micael chachan yuqapa; ¹⁴ Neftalí ayllutxa, Nahbí sat Vapsí chachan yuqapa; ¹⁵ Gad ayllutxa, Gueuel sat Maquí chachan yuqapa. ¹⁶ Ukanakaw Moisesan khithat jilïr jaqinakan sutinakapaxa, jupanakarusti Canaán uraqi uñakipiriw khithäna. Oseas sat Nun chachan yuqaparux Josué sutimpiw Moisesax sutichäna. ¹⁷ Moisesax Canaán uraqir jupanak khitkän ukapachasti, akham sänwa: —Négueb wasar chiqanjam sarapxam, ukatsti qullu tuqinakaruw makhatapxäta. ¹⁸ Uka markax kunjämätaynas uk sum uñjanipxäta, ukan jakir jaqinakax ch’aman jaqinakati, jan ukax t’ukha jaqinakakicha; juk’anikiti jan ukax waljanïtaynacha taqi ukanak uñjanipxäta. ¹⁹ Markanakapax chhujllanakat luratakiti, jan ukax, suma pirqanakampi sayt’ayatacha, kawkha uraqintix jakapki ukax suma laq’ati, jan ukax janicha, ²⁰ uraqix suma achur uraqiti, jan ukax, janich suma achurïki, quqanakaniti, jan ukax, janicha, taqi ukanak uñjanipxam. Jan axsarapxamti; ukatsti uka uraqin achunakap apanipxäta —sasa. Ukapachasti uvanakan nayrïr achunakap apthapiñ urunakänwa. ²¹ Uka chachanakasti sarasin uka uraq uñakipapxäna, aynach tuqit qalltapxäna, Sin sat wasarata, ukawjatsti Rehob chiqakamaw sarapxäna, ukasti Hamat jak’ankiwa. ²² Négueb wasaranjam mantasin Hebrón chiqakamaw puripxäna. Hebrón markax Soan sat egipcio marka utt’ayaskän ukat paqallq mara nayraw utt’ayasitayna. Uka markan Ahimán, Sesai, Talmai chachanakax jakapxäna, jupanakasti Anac sat jach’a tansa jaqin wawanakapänwa. ²³ Ukatsti mä jisk’a jawiraruw puripxäna; ukawjan jupanakax uva wayun alip khuchhuqapxäna, uksti paniniw mä lawar warkuntat kallanipxäna, ukatsti granadanaka, higonaka apthapipxarakïna. ²⁴ Uka jisk’a jawirarusti Escol sutimpiw sutichapxäna, ukawjan israelitanakax uva wayun alip khuchhuqapxatap layku. ²⁵ Ukxarusti, pusi tunka urunak uka uraqi uñakipasinsti, ²⁶ Parán wasaran Cadés sat chiqaruw kuttanxapxäna. Ukan Moisesampi, Aaronampi, taqpach israelitanakampix jikxatasipxäna. Ukatsti kuntix yatxatanipkatayna taqi ukanak jupanakar yatiyapxäna, uka uraqit apanipkatayna uka achunaksa uñacht’ayapxarakïnwa. ²⁷ Moisesarusti sapxänwa: —Khithapkista uka uraqiruw nanakax sarapxta. Chiqpachapuniw uka uraqin lechesa, misk’isa umjam jalsuski, uñjam, aka achunakaw uka uraqin achuraki. ²⁸ Ukampis ukan jakir jaqinakax wali ch’amaninakawa, markanakasti wali jach’anakawa, suma uyuchrantatarakiwa. Anac sat jach’a tansa jaqin wawanakaparus uñjanipxtwa. ²⁹ Négueb wasar tuqinxa amalecita jaqinakaw jakapxi, qullu tuqinakansti hitita jaqinaka, jebuseo jaqinaka, amorreo jaqinakaw jakapxi, ukatsti quta irananakana, Jordán jawir jak’anxa, cananeo jaqinakaw jakapxaraki —sasa. ³⁰ Jaqinakax Moisesatakiw arusipxäna, ukampis Caleb chachaw uka jaqinakar amukt’ayäna, akham sasa: —¡Uka uraq katuntir sarapxañäni! ¡Jiwasax katuntañäniwa! ³¹ Ukampis jupamp chik saririnakax sapxänwa: —¡Janiw uka jaqinakampix nuwasksnati! Jupanakax jiwasat sipan juk’amp ch’amaniwa —sasa. ³² Ukatsti israelitanakarux uñaqanipkatayna uka uraqin jan walïtap sapxäna: —Uñakipir sarapkta uka uraqix, ukan jakir jaqinakarux jiwarayiwa, ukan uñjanipkta taqi uka chachanakax wali jach’anakawa. ³³ Jach’a tansa jaqinak uñjanipxarakta, Anac chachan wawanakaparu. Nanakasti jupanak thiyanxa, t’iju t’ijunakar uñtatakiw uñjasipxta, jupanakas ukham uñjapxarakitu —sasa.

¹ Ukatsti israelitanakax warariñ qalltapxäna, uka arumasti jacht’asisaw qhantatipxarakïna. ² Jupanakax taqpachaniw Moisesampitaki, Aaronampitakix jan wal parlapxäna, akham sasa: “¡Egipto uraqinsa jiwaraskasäna, jan ukax, aka wasaransa jiwaraskasäna! ³ ¿Kunatakirak Tatitusti aka uraqir irpanpachïstusti? ¿Jiwasan nuwasïwin jiwarañasataki, warminakasasa, wawanakasas uñisirisan amparapar katuntat uñjasiñasatakit irpanpachïstusti? ¡Egiptor kuttxañasakiw walïspa!” sasa. ⁴ Ukatsti maynit maynikamaw parlarasipxäna: “Egiptor kuttxañatakix mä jilïr utt’ayasiñäni” sasa. ⁵ Ukapachasti Moisesampi, Aaronampix israelitanak nayräxan ajanunakap uraqir puriyañkamaw alt’apxäna, ⁶ ukatsti Josué chachampi, Caleb chachampix, llakisiñat isinakap ch’iyanuqasipxäna, jupanakax mayninak chikaw uka uraqinak uñakipanipxatayna, ⁷ jupanakasti israelitanakarux akham sapxarakïnwa: —¡Nanakax uñakipir sarapkta uka uraqix, wali suma uraqipuniwa! ⁸ Tatitutix khuyapayasistanixa, uka uraqir mantañ yanapt’istaniwa, jiwasanakaruw churarakistani. Uka uraqin leches, misk’is umjamaw jalsuski. ⁹ Janiy Tatitur qallasipxamti, janirak uka markankir jaqinakar axsarapxamti, jupanakar atipjañax jiwasatak janiw kuna ch’amakänisa; jupanakar arxatirix janiw khitis utjkiti, ukatsipana, Tatituw jiwasampïski. ¡Jan jumanakax axsarapxamti! sasa. ¹⁰ Ukhamäkipansa, jaqinakax qalampiw jupanakar k’upjañ munapxäna. Ukapachaw Tatitun qhapaq kankañapax Tatitump Jikisiñ Carpana uñstäna, taqpach israelitanakan uñjkata, ¹¹ Tatitusti Moisesarux sänwa: —¿Kunapachkamarak aka markasti nayar jisk’achaskakitanisti? ¿Kunapachkamarak nayat pächasisipkakini, jupanak taypin walja muspharkañanak lurkipansa? ¹² Nayaw jupanakar jiwarayir usu apayanï, uka uraq jan katupxañapataki; ukampis jumarux taqit sipan mä jach’a markaruw tukuyäma, jupanakat sipan juk’amp ch’amani —sasa. ¹³ Ukampis Moisesax Tatitur sänwa: —Jumaw aka markarux jach’a ch’amamampi Egipto markat irpsuntaxa. Kunapachatix egipcionakax kuntix lurkäta uk yatipxani ukkhasti, ¹⁴ Canaán uraqinkir jaqinakaruw yatiyapxani. Jupanakax ist’apxarakiw juma, Tatitun aka marka taypinkaskatama, ajanuy ajanu uñjayasitama, qinayamas jupanak patxankaskatapa; urunsti jupanakan nayraqatap mä qinay tuqi saraskatama, arumansti mä nina tuqirak saraskatama. ¹⁵ Jumatix aka markar may jawq’antasin jiwayäta ukkhax, juman jach’a kankañamat yatir markanakax sapxaniwa: ¹⁶ “Diosasti kawkïri uraqtix churä siskatayna uka markarux janiw irpantkiti, ukat wasaran jiwarayi” sasa. ¹⁷ Ukat jichhax Tatay, jach’a ch’amam uñacht’ayañamatak mayt’asinsma. Juma pachpaw sistaxa: ¹⁸ “Janiw jank’ak phiñasirïkti, khuyapayasiñaxax jan tukuskiriwa, ñanqha luratsa, nayatak sayt’asiñanaksa pampachtwa, juchanirux mutuyapuntwa, awkimpina taykampin jucha luratanakapatxa, wawanakaparu, allchhinakaparu, allchhinakan allchhinakaparuw mutuyarakta” sasa. ¹⁹ Tatay, munasiñamax sinti jach’awa, aka markan juchanakap pampachakimaya, kamisatix Egiptot akakam khuyapt’ayaskta ukhama. ²⁰ Tatitux Moisesar sarakïnwa: —Walikiwa, nayax juman mayitamarjamaw jupanakan juchap pampachä. ²¹ Ukampis naya layku, taqpach uraqi phuqhantir jach’a kankañax laykuw juramento lurta, ²² khitinakatix jach’a kankañax uñjkasinsa, Egiptompina, wasarampin muspharkañanak luratax uñjkasinsa, nayar wasaran mayampi mayamp yant’apxitu, arunakaxar jan jaysañ munirinakax, ²³ janipuniw jupanakat maynis arsut uraqi uñjkaniti, awkipar taykapar churañatak arskta uka uraqi. Janirakiw nayar jisk’achirinakat maynis uka uraq uñjapkaniti. ²⁴ Caleb luqtirixakiw jan mayninakjamäkiti, jupasti taqi chuymampiw iyawsitu. Ukat juparux kawkïr uraqtix uñakipir sarki uka uraqirux mantayä, wawanakapasti ukan utjantasipxani. ²⁵ Amalecitanakampi, cananeonakampiw qhirwa tuqin jakapxi, ukhamasti jumanakax qharürpacha wasar tuqir kuttapxam, ukatsti Mar Rojo quta thakhinjam sarapxam. ²⁶ Tatitusti Moisesampiru, Aaronampirux saskakïnwa: ²⁷ —¿Kunapachkamarak aka ñanqhar jichuntat israelitanakan parlatanakap isch’ukïsti? Niyaw ist’ta nayxat jan wali parlatanakapa. ²⁸ Niyakixay ‘mutuyapxituw’ sasa sarnaqapxchixa, jichhaw jupanakar mutuyä. Nayaw Israelan Diosapätxa, juramentompiw arsta, parlatanakaparjamaw lurä. ²⁹ Jaqinak jakthapïwin pä tunka maranit amstar qillqantatäpki jupanakata, nayatak jan wali parlirinakax, jiwapxaniwa; amayanakapasti aka wasaran jaqurpayataw uñjasini. ³⁰ Jumanakat janiw maynis jumanakar churañatak arskta uka uraqir mantkaniti, Caleb chachampi, Josué chachampikiw uka uraqirux mantapxani. ³¹ Ukatsipana, wawanakamarux mantayäwa, jumanakax sapxtawa: wawanakasax uñisirinakasan amparaparuw jalt’ani, sasa. Uka wawanakaruw jumanakan jisk’achat uraqir irpä, uka uraqin achunakapamp kusisit sarnaqapxañapataki. ³² Jumanakan amayanakamasti, aka wasaran jaqunukutaw uñjasini, ³³ wawanakamasti pusi tunka maraw aka wasaran ovejanak awatis sarnaqapxani. Ukhamat jupanakax jumanakan jan iyawsatanakam phuqhapxani, jumanakan taqpachan aka wasaran jiwarapxañamkamaw suyt’apxani. ³⁴ Jumanakax pusi tunka uruw uraqinak uñakipasax sarnaqanipxtaxa; ukhamarakiw jichhax pusi tunka mara mutuyäwi phuqhapxäta, sapa uruta mä mara. Ukhamat jumanakax yatipxäta, kunjämäkitix nayar qallkatasiñax uka. ³⁵ Naya, Tatituw uk arsta, ukham lurä, aka ñanqhar jichuntat nayatak mayachasisin qallkatasir markaruxa. Aka wasaran tukusipxani; akan jiwarapxarakini —sasa. ³⁶ Moisesax uraq uñakipir khitkatayna uka chachanakax, kuttanisin uka uraqi jisk’achasaw jan walinak yatiyapxäna, ukat jaqinakax jan walinak Tatitutak arusipxäna; uka chachanakarusti Tatitux akatjamat jiwarayäna. ³⁸ Uraqi uñakipir khithat taqpachani chachanakatxa, Josué chachampi, Caleb chachampikiw jan jiwapkänti. ³⁹ Moisesax kuntix Tatitux israelitanakar siskatayna taqi ukanak yatiykän ukapachasti, taqpachaniw walpun llakt’asipxäna. ⁴⁰ Qhipärmanthisti willjtat sartasin, qullunak tuqiruw sarapxäna, alay qullu chiqar makhatasinsti, sapxänwa: —¡Niyaw akkhanktan! Tatitux churañatak arskistu uka chiqar sarapxañäni, jiwasax jucha luratanakas uñt’astanwa —sasa. ⁴¹ Ukampis Moisesax jupanakar sänwa: —¿Kunatarak Tatitun arunakapar jan jaysapxtasti? ¡Uka amtäwix inaruw tukuni! ⁴² Jan sarasipkakimti, Tatitux janiw jumanakampïkxiti, uñisirinakamax atipjapxätamwa. ⁴³ Jumanakax Tatitut saraqtapxtaxa, ukat jupax jumanakar apanukupxtam. Uka uraqirutix sarapxätaxa, amalecita jaqinakampi, cananeo jaqinakampiw jumanakamp nuwasir mistsunini, jumanakarusti jiwarayapxätamwa —sasa. ⁴⁴ Ukham siskatpachasa, israelitanakax qullu patar makhatañ munasipkakïnwa; ukampis arust’äwi arcampi, Moisesampix, janiw campamentot unxtapkänti. ⁴⁵ Ukapachaw uka chiqan jakir amalecita jaqinakampi, cananeo jaqinakampix mistunipxäna, israelitanakar Hormá sat chiqakam arktanisa, jupanakar q’al atipjañkama.

¹ Tatitux Moisesaruw parlän akham sasa: ² “Israelitanakar akham sarakim: Nayax jumanakan jakapxañamatak churapkäma uka uraqir mantapkäta, ³ ukatsti nayar jach’añchas mä urqu vaca, jan ukax, mä ovejsa luqtapxitäta suma q’apkir wilañcha nakt’ayañataki, kuntix arsupkta ukanak phuqhasa, jan ukax, chuymanakamatjam waxt’a churasa, jan ukax, mä uruyäwi uruyasasa ukapachaxa, ⁴ khititix waxt’a churkani ukax, mä litro aceitemp chaputa suma jak’ut pä kilo yapt’ani. ⁵ Uka wilañchanakarusti mä litro vino waxt’ampi yapt’añapa, sapaqat ovejata. ⁶ Wilañchatix mä urqu ovejächi ukax, pusi kilo suma jak’ump yapxatani, mä litrot jilpacha aceitemp chapuntata, ⁷ mä litrot jilpacha vinompi, nayatak suma q’apkir luqtäñapataki. ⁸ Wilañchatix mä vaca qallüchi, nakt’ayat luqtäwi luqtañataki, jan ukax, sumankayir wilañchataki, jan ukax, arsüwi phuqhasin luqtächi ukapachasti, ⁹ suxta kilo suma jak’ump yapt’ani, pä litro aceitemp chapuntata, ¹⁰ pä litro vinompi, nayatak suma q’apkir nakt’ayat luqtäñapataki. ¹¹ Ukham lurani, sapa urqu vaca luqtampi, sapa urqu oveja luqtampi, sapa mä marani urqu oveja luqtampi, sapa cabrito luqtampi. ¹² Sapaqat uywa luqtaskan ukatxa, wakiski uka waxt’ap churasini, qawqha uywanakatix utjki ukhamarjama. ¹³ Taqi israelitanakaw aka kamachinakarjam phuqhañapa, suma q’apkir nakt’ayat waxt’a luqtkitan ukapacha. ¹⁴ “Yaqha markat jutir jaqitix jumanak taypin jakaspa, ukat suma q’apkir nakt’ayat waxt’a nayar luqtañ munitaspa ukaxa, jupax jumanakjamarakiw pachpa kamachinak phuqhañapa. ¹⁵ Uka pachpa kamachinakaw jumanakatakisa, yaqha markat jutir jaqinakatakisa, wawanakamatakisa; uka kamachix wiñayatakïniwa. ¹⁶ Mä pachpa kamachikiw utji, jumanakatakisa, yaqha markat jutir jaqinakatakisa” sasa. ¹⁷ Tatitux Moisesar sänwa: ¹⁸ “Israelitanakar akham sarakim: Nayax irpapkäm uka uraqir puripkäta, ¹⁹ ukatsti ukan achur trigo apthapisin manq’añ qalltapkät ukapachasti, uka achunakat mä qawqha nayar luqtañatak yaqhachapxäta. ²⁰ Kunjämatix nayrïr jawq’at trigot mä juk’a luqtapkistaxa, ukhamarakiw nayrïr jak’u chaputatxa, t’ant’a waxt’a luqtapxitäta. ²¹ Uka waxt’a lurapxapunïtawa. ²² “Jumanakatix jan amuyasis nayrïr urutpach Moisesar arsut arunakarjam jan phuqhapkätaxa, akanak lurapxäta: ²⁴ “Markpachatix jan amuyasis pantjasinixa, taqpach markaw mä urqu vaca qallu luqtitani, nakt’ayat suma q’apkir luqta, wakiski uka grano achunakampi, vino waxt’apampi, Diosan arsutaparjama; ukxarusti, jucha luratat mä chivo wilañcha luqtapxitäta. ²⁵ Ukatsti sacerdotew Israel markpachatak luqta katuyani, juchat pampachäwi jikxatañataki, nayasti jupanakarux juchapat pampachäwa, jan amuyasisin pantjasipxatap layku; jupanakan uka jucha luratat waxt’apa, wilañchapa nayar luqtapxatap layku. ²⁶ Nayaw taqpach Israel markaru, jumanak taypin jakir yaqha markat jutir jaqinakan juchap pampachä, markatix jan amuyasis pantjaskan ukapachaxa. ²⁷ “Mä sapa jaqitix jan amuyasis jucha lurkani ukapachasti, uka jaqix jucha luratat mä marani qachu cabra wilañcha luqtani. ²⁸ Ukatsti sacerdotew nayan nayraqataxan uka jaqitak luqtäwi katuyani, jan amuyasis jucha luratapat pampachäwi jikxatañataki, nayasti uka jaqirux juchap pampachäwa. ²⁹ Mä pachpa kamachikiw utji, israelitanakatakisa, jumanak taypin jakir yaqha markat jutir jaqitakisa, mä jaqitix jan amuyaskasin pantjaskan ukapacha. ³⁰ “Ukampis mä jaqitix sum yatkasin juch lurani, israelit jaqïpansa, yaqha markat jutir jaqïpansa, ukasti nayaruw ñanqhachitu. Ukhamïpansti, uka jaqix markap taypit jaqunukutaw uñjasini, ³¹ nayan arunakax jisk’achatap layku, arsutanakax jan phuqhatap layku; uka jaqix jaqunukutaw uñjasini, juchap uñt’asirakini.” ³² Israelitanakax wasaran jikxatasipkän ukapachax, mä jaqiruw sábado urun phayañ lawanak apthapiskir jikxatapxäna. ³³ Ukat uka jaqir Moisesampina, Aaronampin nayraqatapar irpapxäna, taqpach markachirinak nayräxaru. ³⁴ Jupanakasti uka jaqir katuntasin jak’atak uñch’ukipxäna, uka jaqir janïra kuna lurañ yatisitap layku. ³⁵ Ukapachaw Tatitux Moisesar säna: “Uka jaqix jiwañapawa. Taqpach marka jupar qalamp k’upjapxpan campamentot anqäxana” sasa. ³⁶ Israelitanakasti uka jaqir campamentot anqäxar irpsusinxa, jiwayañkamaw qalamp k’upjapxäna, Tatitux Moisesar arskatayna ukhamarjama. ³⁷ Uka qhipatsti, Tatitux Moisesar sänwa: ³⁸ “Israelitanakar akham sarakim: Jumanakampi, wawanakamampix isinakar t’ikhachanakamp muytat isinakampiw uchasipxäta. Uka t’ikhachatanakasti morado ch’ankhat luratäñapawa. ³⁹ Uka t’ikhachatanak uñjasin jumanakax nayan churat taqpach kamachi arunakat amtasipxäta, ukat phuqhapxarakïta; janirakiw jumanakan pachpa amtäwinakamampi, munañanakamampi apayasipxätati, ukanak laykuw jumanakax nayar iyawsañ apanukupxtaxa. ⁴⁰ Ukhamat jumanakax taqi kamachinakaxat amtasipxäta, phuqhapxarakïta, ukatsti naya, Diosamar katuyatäpxätawa. ⁴¹ Nayätwa jumanakan Tatit Diosamaxa, nayaw jumanakan Diosamäñatak Egipto uraqit irpsunipxsma. Nayätwa jumanakan Tatit Diosamaxa” sasa.

¹ Mä levita chachaw utjäna Quehat chachan saraqiripata, Coré sutini, Ishar chachan yuqapa. Coré chachax kimsa masinakanïnwa, uka masinakapasti Rubén ayllunkirinakänwa: Datán, Abiram sutinakanix Eliab chachan yuqanakapänwa, On sat masipasti Pélet chachan yuqapänwa. ² Uka chachanakasti Moisesatakiw sayt’asipxäna, jupanakarusti pä patak phisqa tunkan israelitanakaw jaqkattapxäna, uka jaqinakasti markanxa taqininsa wali uñt’at jilïr chachanakänwa, amuyt’ayir jaqinak taypinkirinakänwa. ³ Taqpachaniw jupanakax tantachasisin Moisesampiru, Aaronampir saykatapxäna, akham sasa: —¡Jumanakakiw taqi kunsa munasipktaxa! Taqpach markaw Diosar katuyata, Tatitusti taqi jiwasanakampïskiwa. ¿Kunatarak jumanakasti Tatitun markapxar mä jach’a munañanïpkasmas ukham sartapxtasti? —sasa. ⁴ Moisesasti uk ist’asinxa uraqir ajanup puriyañkamaw alt’äna, ⁵ ukatsti Coré jaqimpiru, arkirinakapampirux sänwa: —Arumanthiw Tatitux yatiyani khitis jupanki, khitis jupar katuyata, khitirakis jupar waxt’anak luqtaspa ukanaka. Jupax khitirutix ajlliskan ukakiw waxt’anak luqtani. ⁶ Akham lurapxam: Coré chachampina, arkirinakapampin incienso q’aphichañanakap apanipxam, ⁷ ukarusti nina sank’anak uchapxam, incienso willxatapxarakim, ukatsti arumanthix Tatitun nayraqataparuw uk uchanipxäta. Khitinakarutix Tatitux qullan carpapan luqtañapatak ajlliskani, jupanakakiw uk lurapxani. ¡Levitanaka, jichhax jan juk’amp arusipxamti! ⁸ Ukatsti Moisesax Coré chacharuw säna: —Levita jaqinaka, ist’apxita: ⁹ ¿Amuyatanakamat juk’akiti Diosan jumanakar israelitanak taypit Tatitump Jikisiñ Carpan jupar luqtapxañamatak ajllitapasti? ¹⁰ Tatitux jupa jak’ankapxañamatakiw jumanakar ajllisipxtam. Jichhasti, ¿kunatarak sacerdotëñ munapxaraktasti? ¹¹ Chiqpachansa janiw jumanakax Aaronatak arusipktati, jan ukasti, Tatituruw jumasa, masinakamas saykatapxtaxa —sasa. ¹² Ukatsti Moisesax Datán, Abiram uka chachanakaruw jawsayanïna, ukampis jupanakax sapxänwa: —Janiw sarapkiristti. ¹³ ¿Amuyatamatsti juk’akiti kawkha uraqintix lechesa, misk’is umjam jalaski uka uraqit nanakar irpsunitamasti, ukat wasaran nanakar jiwarayiri, ukhamarus munañamar nanakar apnaqañ munatamasti? ¹⁴ Janiw jumax lechempi, misk’impi jalaski uka uraqir irpapkistati, janirakiw jumax mä uraqsa churapkistati, uva yapunaksa churapkistati. ¿Juykhur uñtatti, taqinin irpayasiñap muntasti? Janiw jumar uñjañsa, jumamp parlañsa munapkti —sasa. ¹⁵ Moisesasti wali q’apisitaw Tatitur säna: —¡Jupanakan waxt’anakap jan katuqamti! Janiw nayax jupanakan mä asnopaksa mayirïkti, janirakiw jupanakat maynirusa jan walinak lurkti —sasa. ¹⁶ Ukatsti Moisesax Coré chacharuw säna: —Jumampi, jaqinakamampix Tatit nayraqatan qharür uñstapxam. Aaronasti ukankarakiniwa. ¹⁷ Sapa mayni incienso q’aphichañap apaspan, incienso ucharakpan. Jumampi, Aaronampix, incienso q’aphichañanakam apasipxarakïta, ukatsti Tatitu nayraqatan uk uchapxäta, yaqha pä patak phisqa tunka incienso q’aphichañanakamp chika. ¹⁸ Qhipärmanthisti, sapa mayniw incienso q’aphichañap apxarusïna, aqaskir k’illimampi, inciensompi ucharakïna, ukatsti Moisesampi, Aaronampi chikaw Tatitump Jikisiñ Carpa nayraqatan sayt’asipxäna. ¹⁹ Coré chachasti niyaw Jikisiñ Carpa uñkatasin taqpach jaqinakapar tantachatayna, Moisesampiru, Aaronampir saykatañataki. Ukapachasti Tatitux jach’a qhapaq kankañapampiw jupanakar uñstäna, ²⁰ ukatsti Moisesampiru, Aaronampiruw säna: ²¹ —¡Aka jaqinakat jithiqtapxam, nayaw taqpachanir tukjä! —sasa. ²² Moisesampi, Aaronampisti ajanup uraqir puriñkamaw alt’apxäna, Tatiturux sapxarakïnwa: —Tatit Diosay, jumaw taqi jaqinakarus jakañ churtaxa, ¿mä sapa jaqin juchap laykukiti taqpach markatak q’apisïtasti? —sasa. ²³ Tatitusti Moisesarux akham sarakïna: ²⁴ —Taqpach israelitanakar sanim, Coré, Datán, Abiram, chachanakan chhujllanakapat jithiqtapxpan —sasa. ²⁵ Moisesasti sayt’asisin Datán, Abiram jaqinakan ukaruw saräna, jupamp chikasti Israelan jilïrinakapaw sararakïna. ²⁶ Ukapachaw markar säna: —Uka ñanqha jaqinakan chhujllanakapat jithiqtapxam, kunatix jupanakankki ukanak janiw llamkt’apxätati, jumanakax juchanakap layku jan jiwasipkañamataki —sasa. ²⁷ Ukatsti taqpach jaqiw Coré, Datán, Abiram jaqinakan chhujllanakapat jithiqtxapxäna. Datán, Abiram uka chachanakasti chhujllanakap mantañaruw mistsunipxatayna, ukawjan jupanakax warminakapampi, taqpach wawanakapamp chika sayt’atäsipkäna. ²⁸ Moisesasti saskakïnwa: —Tatituw taqi akanak lurañaxatak nayar khithanitu, janiw nayax chuymaxatjam kuns lurkti, jichhaw jumanakax uk uñjapxäta. ²⁹ Aka jaqinakatix mayni jaqinakjam jiwañap jiwaskani ukaxa, Tatitun nayar jan khithanitap yatiyani; ³⁰ ukampis Tatitutix mä jach’a muspharkañ lurani, ukatsti uraqis jist’artasin jupanakar taqi yänakapamp chika manq’antani, jakaskirpach p’amp’antat uñjasipxani ukkhasti, jumanakax aka chachanakan Tatitur saykatapxatap yatipxäta —sasa. ³¹ Moisesax parlañ tukuyxän ukapachaw uraqix jist’artäna, ³² ukatsti Coré chachar jaqkattapkatayna taqi uka chachanakaruw manq’antäna, wila masinakapampiru, yänakapampiru. ³³ Jupanakax jakaskirpachaw manqha pachar jalantapxäna, taqi yänakapamppacha, ukatsti uraqix jist’antasxänwa. Ukhamaw taqi uka jaqinakax israelitanak taypit chhaqtayatäxäna. ³⁴ Uka jaqinakar wararir ist’asasti, uka thiyanakan jikxatasir israelitanakax, taqpachaniw jaltxapxäna akham sasa: “¡Jaltxañäni, jiwasamppacharurak uraqisti manq’antistaspa!” sasa. ³⁵ Ukxarusti, Tatitux mä nina apayanïna, uka ninasti incienso luqtapkatayna uka pä patak phisqa tunkan levita jaqinakaruw nakhantas jiwarayäna. ³⁶ Tatitusti Moisesarux sänwa: ³⁷ “Aarón chachan Eleazar yuqapar khitham, uka nina nakhantat taypinakat incienso q’aphichañanak apsunpan, nina sank’anak utjaskchi uksti jayar jaqtanpan. ³⁸ Jucha luratapat uka jaqinakax jiwaraski, jupanakan incienso q’aphichañanakapax, qullanañchatäxiwa, naya nayraqataxan incienso luqtañatak apnaqasitap layku. Altarar apakipañatak uka metalanak sillp’ar tukuyapxam, ukanakasti israelitanakan amtasiñapatak uchatäpan” sasa. ³⁹ Ukatsti Eleazar sacerdotex uka jaqinakan broncet lurat incienso q’aphichañanakap apthapisin altarar muyuntayañatakiw sillp’ar tukuyayxäna. ⁴⁰ Ukasti israelitanakan amtasiñapatakïnwa, uka qhipat Aarón sacerdoten saraqirinakapat jan khiti jaqis altarar incienso luqtir jak’achasiskañapataki; kamisatix Coré chachampi, masinakapampix jiwarapki ukham jan jiwarasipkañapataki. Ukhamaw taqi ukanakax phuqhasïna, kunjämtix Tatitux Moisés tuqi Eleazarar siskatayna ukhamarjama. ⁴¹ Qhipärmanthisti Israel markpachaw Moisesampitaki, Aaronampitak parlañ qalltapxäna akham sasa: —¡Jumanakax Tatitun markaparuw jiwayasipktaxa! —sasa. ⁴² Taqpachaniw Moisesampiru, Aaronampir muyuntapxäna; ukampis jupanakax Tatitump Jikisiñ Carpäkis uksaruw sartawayxapxäna. Ukapachaw qinayax ukar imxattäna, Tatitun qhapaq kankañapas uñstarakïnwa. ⁴³ Ukhamasti Moisesampi, Aaronampix Jikisiñ Carpan uñkatasiparuw sayt’apxäna, ⁴⁴ Tatitusti Moisesarux sänwa: ⁴⁵ —Uka jaqinakat jithiqtapxam, jichhpachaw jupanakar t’unjä —sasa. Moisesampi, Aaronampisti p’iqinakap uraqir puriyañkamaw alt’asipxäna, ⁴⁶ Moisesasti Aaronar sänwa: —Incienso q’aphichañam aptanim, ukarusti altarat apaqasin nina sank’a uchäta, inciensompiw ukar warxatarakïta; ukatsti jank’akiw israelitanak thiyar saräta, Tatitut jupanakatak pampachäwi mayirapïta, Tatitux wali q’apisitawa, jaqinakaruw mutuyaski —sasa. ⁴⁷ Aaronasti Moisesan arsutaparjamaw luräna, ukatsti markax tantachatäkän ukkharux jalakamaw saräna. Tatitun apayanit mutuyäwix jaqinakarux markan q’al tukjaskäna, ukat Aaronax incienso uskusin luqtäna, markpachatakiw Tatitut pampachäwi mayirakïna. ⁴⁸ Ukxarusti Aaronax jaqi jiwatanak taypina, jakaskirinak taypin sayt’asïna, ukat Tatitun mutuyäwipax t’akurxäna. ⁴⁹ Ukürusti tunka pusin waranqa paqallqu patakan jaqinakaw jiwaräna, Coré chachamp chika jiwarapkatayna uka jaqinakar jan jakhusa. ⁵⁰ Jaqi jiwarañ sayt’xipansti, Aaronax Tatitump Jikisiñ Carparuw Moisesamp jikisiñatak kuttawayxäna.

¹ Tatitux Moisesaruw parläna, akham sasa: ² “Taqpach israelitanakar parlam, sapa maya ayllun jilïripax mä thujru ayanpan, taqpachasti tunka payan thujrüniwa. Ukatsti jumaw sapa maynin thujrupar sutip qillqantäta, ³ Leví ayllun thujruparusti Aaronan sutip qillqantäta, sapa maya ayllun jilïripat mä thujruw utjañapa. ⁴ Uka thujrunaksti Tatitump Jikisiñ Carparuw uchanïta, arust’äwi arca nayräxaru, nayax jumanakamp jikiskta ukkharu. ⁵ Nayaw ajllitaxan thujrup panqarayä, ukhamat israelitanakax jumanakatak jan juk’amp naya nayraqatan jan walinak parlaskañapataki” sasa. ⁶ Moisesasti israelitanakarux pachpa arunak säna, ukatsti sapa ayllun jilïripaw Moisesar thujrup churäna; taqpachasti tunka payan thujrunakänwa, Aaronan thujrupasti ukanak taypinkarakïnwa. ⁷ Ukatsti Moisesax Tatitun nayraqataparuw thujrunak uchäna, arust’äwi arca nayräxaru. ⁸ Qhipärmanthisti, Tatitump Jikisiñ Carpar Moisesax mantkän ukapachaw Aaronan thujrup ch’uxñatatat uñjäna, panqaranakani, puqurat almendra achunakan kuna. ⁹ Ukatsti Moisesax Tatitump Jikisiñ Carpat taqpach thujrunak apsunïna, ukatsti israelitanakaruw uñachayarakïna; uñjasinsti sapa mayniw thujrup aytasxäna. ¹⁰ Tatitusti Moisesar sänwa: “Aaronan thujrup arust’äwi arca nayräxar kutintayam, ukawjan ukax imatäpan, aka saykatasir markan uk amtasiñapataki. Naya nayraqataxan jan arusisipkañapataki. Jaysapxitani ukasti, janiw jiwapkaniti” sasa. ¹¹ Moisesasti Tatitun arsutaparjamaw taqpach luräna, ¹² ukampis israelitanakax Moisesar sapxänwa: —¡Aynacht’atätanwa! ¡Taqpachaniw jichhax jiwarañäni! ¹³ Tatitump Jikisiñ Carpar jak’achasirix taqiniw jiwarapxi. ¿Taqinit jiwarapxañänisti? —sasa.

¹ Tatitux Aaronaruw säna: “Kunapachatix israelitanakax Tatitump Jikisiñ Carpar ñanqhachañatak kuna juchsa lurapkani ukkhaxa, jumampi, wawanakamampi, Leví ayllunkir mayni jilanakamampikiw jupanakan jucha luratapat pampachäwi mayipxäta; ukampis kunapachatix jumampi, wawanakamampi sacerdote kankañ phuqkasin jucha lurapxäta ukkhaxa, janiw khitis jumanakan jucha luratanakamat pampachäwi maykaniti, jan ukasti, jumanakpachaw mayisipxäta. ² Ukampis Tatitump Jikisiñ Carpan lurañanakanxa, Leví ayllunkir mayni jilanakamampix jumarusa, wawanakamarus yanapt’añapawa. ³ Jupanakax juman yanapirinakamäniwa, carpan kuna lurañatix utjki ukanakansa yanapasirakiniwa, ukampis Tatitump Jikisiñ Carpan yänakapampiru, altarampirux jan jak’achasipxpati; jan ukasti, jupanakax jiwapxaniwa, jumanakas jiwapxarakïtawa. ⁴ Jupanakax Tatitump Jikisiñ Carpa luräwinakan, taqi luqtäwinakan juma chikäpxañapawa. Ukampis janiw khiti jan uñt’at jaqis jumanakar jak’achasiñapäkiti; ⁵ jumanakaw qullan utjäwimpina, altarampin luräwinak phuqhañatak utt’ayatäpxtaxa. Ukhamat israelitanakatakix wasitat jan phiñaskxäti. ⁶ Nayaw levita jilanakamarux israelitanak taypit yaqhachta, jumanakar churañataki, Tatitump Jikisiñ Carpan luräwinakan yanapasipxañapataki; ⁷ ukampis jumampi, wawanakamampikiw sacerdote luräwinak phuqhapxäta, altarana, velo qhipäxansa. Uka lurañasti jumanakaruw wakt’apxtam, nayaw jumanakar sacerdote luräwinak churapxsma. Maynitix jan sacerdotëkasin sacerdoten luräwip luranixa, jiwañapatak juchañchatäniwa” sasa. ⁸ Tatitusti Aaronarux sänwa: “Nayar luqtat waxt’anak uñjañamatakiw katuysma. Israelitanakax qullan waxt’anak churapkitu ukanaksti, jumampiru, wawanakamampiruw churapxsma, wakt’apktam ukhamarjama; ukasti wiñayatak arsut kamachïniwa. ⁹ Nakt’at wilañchanakatxa, grano juyra waxt’anakaw jumar wakt’ätam, ukhamarak jucha luratat israelitanakax luqtapkitu uka wilañchanakampi; taqi uka qullan waxt’anakax jumampitaki, wawanakamampitakïniwa. ¹⁰ Jumanak taypin utjir chachanakax aka waxt’anakat manq’asipkaspawa, ukanaksti pachpa qullan chiqan manq’apxañapa, uka waxt’anakan qullanätap layku. ¹¹ “Ukatsti, israelitanakax luqtapkitan uka suma waxt’anaksti jumampitaki, jumamp jakasir yuqall wawamampitaki, imill wawamampitakiw churaraksma. Ukasti wiñayatak arsut kamachïniwa. Utamankir jaqinakat q’umachat jikxatasirix manq’askarakispawa. ¹² Israelitanakax nayrïr achunak sapa mara apanirapipkitu ukanakat churarakïmawa: sumïr aceite, sumïr vino, sumïr trigo. ¹³ Taqi kuntix uraqix achuyki, taqi uka achunakat nayrïr achunakap jupanakax apanipxani, nayasti jumaruw ukanak katuyäma. Q’umachat jikxatasir jaqix, ukanak manq’askaspawa. ¹⁴ Kuna waxt’anaktix israelitanakax nayar luqtapkitan ukanakax jumatakïniwa. ¹⁵ “Taqi israelitanakan jilïr wawanakapampi, uywanakan nayrïr wawachat qallunakapa nayar luqtapkitan ukanakax jumatakïniwa. Ukampis jaqinakan jilïr wawanakapampita, q’añu uywanakan nayrïr wawachat qallunakapampitxa alap mayïta kutsuyasxañapataki. ¹⁶ Uka kutsuyasiñasti wawax mä phaxsinïxani ukapachaw alapax churatäxañapa, kutsuyañ alasti phisqa qullqïñapawa, qullan utjäwin tupuparjama, tunka mayan gramo qullqi. ¹⁷ Ukampis janiw vacanakan nayrïr qallunakap yaqha waxt’amp kutsuyätati, janirakiw cabritonakan nayrïr qallupsa kutsuyätati, janirakiw ovejanakan nayrïr wawachat qallunakapsa kutsuyätati. Ukanakasti nayatak yaqhachatawa, nayatakiw jiwarayäta; ukatsti altarxaruw wilap warxatäta, lik’ipsti nayatak mä suma q’apkir waxt’äñapatakiw nakt’ayäta. ¹⁸ Uka uywanakan aychapasa, jaraphipasa, kawkïritix suma waxt’a churatäki uka, ukhamarak kupi charapas jumatakïniwa. ¹⁹ Israelitanakax nayatak yaqhachapkani taqi uka churäwinaksti, jumaruw churäma, ukhamarak jumamp chika jakkani uka yuqall wawamampiru, imill wawamampiru. Uka arsutax wiñayatak arsut kamachiwa. Jan p’akintkaya, wiñay arust’äwiwa, nayaw jumampi, juman saraqirinakamamp uka arust’äwi lurta.” ²⁰ Tatitusti Aaronarux sänwa: “Janiw jumanxa Israel jaqinak taypin uraqimasa, tuti katuqäwimas utjkaniti. Nayaw Israel markan juman uraqimäyäxa, tutimäyäsa. ²¹ Leví chachat saraqirinakarux, mä tutïkaspas ukham uk churta, kuntix israelitanakax achunakapat sapa tunkat maya churañapäki ukanaka, qullan utjäwin irnaqapxatap layku. ²² Mayni israelitanakax janiw Tatitump Jikisiñ Carpar jak’achasipxañapäkiti, ukham lurasax jucha lurapxaspa, ukatsti jiwataw uñjasipxaspa. ²³ Levitanakakiw Tatitump Jikisiñ Carpan luräwinakap phuqhapxani, jupanakarakiw kuna pantjasitanakatsa juchañchat uñjasipxani. Ukasti, jumanakatakisa, wawanakamatakis wiñayatak arsut kamachïniwa. Leví chachat saraqirinakax janiw Israelan uraqinïpkaniti. ²⁴ Jupanakarux kuntix israelitanakax achunakapat sapa tunkat maya churapkitani ukanakxa, mä tutïkaspas ukham churta. Ukat nayax jupanakar sista: janiw israelitanak taypin uraqi katuqapkätati” sasa. ²⁵ Tatitux Moisesar sarakïnwa: ²⁶ “Levitanakarux akham sätawa: Israelitanakan achunakapata, sapa tunkat maya katuqapkan ukapachaxa, ukanakat sapa tunkat maya yaqhachapxpan nayar luqtañataki. ²⁷ Ukaw jupanakan waxt’apäni, kunjämtix israelitanakax trigonakapatsa, vinonakapatsa sapa tunkat maya churapki ukhama. ²⁸ Ukhamat israelitanakat sapa tunkat maya katuqapkani ukatxa, levitanakax Tatitur churañatak yaqhachapxani, uka waxt’anaksti Aarón sacerdoteruw churapxani. ²⁹ Taqi kunanaktix katuqapkan ukanakatxa, sumäki ukpun yaqhachapxani, nayar waxt’a churañataki. ³⁰ “Ukxarusti sarakim: Nayatak sumäki ukanak yaqhachxasinsti, ukat jilt’anakxa jupanakan trigopäkaspasa, vinopäkaspas ukham uñt’asxapxani, ³¹ ukanaksti kawkhantix munapkani ukawjan wila masinakapamp chik manq’asipkani. Churäwipax ukäniwa, Tatitump Jikisiñ Carpan irnaqatap layku. ³² Nayatak sumäki uk yaqhachxasinsti, jan kuna jucha lurasaw jilt’anakat manq’asax janiw juchañchatäpkaniti; ukhamat israelitanakan q’uma waxt’anakap jan q’añuchaskañataki, janirakiw jiwayatäñatak juchañchatäpkaniti” sasa.

¹ Tatitux Moisesampiru, Aaronampirux sänwa: ² “Naya Tatituw akanak arsta: Israelitanakar parlam mä wila vaca juman ukar irpanipxpan, uka vacasti janirak usuchjatäkpansa, janirak kunapachas kunkapar yuku ayxatatäkpanti. ³ Jumanakax Eleazar sacerdoteruw uka vaca churapxäta, campamentot anqäxar irpsuwayañapataki, ukatsti jupan uñjkataw kharinukuyani. ⁴ Eleazar sacerdotex luk’anapar mä juk’a wilar aytasin, paqallqu kutiw Tatitump Jikisiñ Carpar ch’allakipani. ⁵ Ukatsti uka vacxa jupan uñjkataw taqpach nakhantayapxani, lip’ichipsa, aychapsa, wilapsa, ukhamarak phurupsa. ⁶ Ukxarusti sacerdotex cedro lawampi, hisopo alin laymipampi, wila isimpi aptasin, vacax nakhantaski uka ninar jaquntani; ⁷ ukatsti sacerdotex isip t’axsusxani, janchipsa umampiw jariqasxani, ukat campamentorux mantxani, ukampis jayp’ukamaw q’añuchat uñjasini. ⁸ Vaca nakhantayki uka jaqisti, isip t’axsusxani, janchipsa umampi jariqasxarakini, ukampis jayp’ukamaw q’añuchat uñjasini. ⁹ Uka qhipatsti, mayni jan q’añuchat jaqiw nakhantayat vacan qhillanakap apthapini, uksti campamentot anqäxan mä q’uma chiqaruw uchxani. Uka qhillampiw Israel markax q’umachasir uma wakichani, taqi ukanakasti juchanakat wilañcha luqtäwïniwa. ¹⁰ Qhillanak apthapir jaqisti isip t’axsusxani, jupasti jayp’ukamaw jan q’umat uñt’atäni. Ukasti wiñayatak arsut kamachiwa, jumanak israelitanakataki, jumanak taypin jakir jaya markat jutir jaqinakatakisa.” ¹¹ “Maynitix jiwat jaqin amayap llamkt’anixa, paqallqu uruw q’añut uñt’asini. ¹² Ukat kimsa ururu, jan ukax, paqallqu ururusa q’umachasiñ umampiw q’umachasiñapa, ukat q’umachat uñjasxani. Janitix kimsïr ururusa, paqallqür ururusa q’umachaskan ukaxa, janiw q’umachat uñjaskaniti. ¹³ Maynitix jiwat jaqin amayap llamkt’asin jan q’umachaskanixa, Tatitun qullan utjäwip q’añuchi, ukhamäni ukasti, uka jaqix Israel marka taypit jaqunukutäñapawa, q’umachasir umampi jan q’umachasitap laykux, q’añut uñt’atäniwa. ¹⁴ “Kamachix akawa: Maynitix carpan jiwanixa, ukan jikxatasirinakampi, ukar mantirinakampix, paqallqu uruw q’añut uñt’atäni. ¹⁵ Uka carpan utjir jan qhuphintat phukhunakasa, jan ukax, jan wali qhupxatat phukhunakas, q’añut uñt’atäniwa. ¹⁶ “Maynitix mä pampan espadampi jiwayat jaqin amayap llamkt’ani, jan ukax, jiwañap jiwir jaqin amayapsa, jaqi ch’akhanaksa, amay imäwsa llamkt’ani, uka jaqix paqallqu uruw q’añut uñt’atäni. ¹⁷ “Ukham q’añut uñt’at jaqir q’umachañatakix, jucha luratat wilañcha luqtaski uka vacan qhillap mä chuwar aptasini, ukatsti jalsur umampiw ukxar warxatasini. ¹⁸ Ukatsti mayni q’umat uñt’at jaqiw hisopo laymi aptasin umar juricht’ani, ukampiw carpar ch’allakipani, ukatsti phukhunakaru, uka manqhan jikxatasipkän uka jaqinakaru, uka kipkarak khititix jaqi ch’akhanaksa, pampan jiwayat jaqin amayapsa llamkt’katayna, jan ukax, jiwañap jiwir jaqin amayapsa, amay imäwi llamkt’katayna ukanakar ch’allakiparakini. ¹⁹ Q’umat uñt’at jaqix kimsïr uruna, jan ukax, paqallqür uka urunakan, q’añuchat jaqirux ch’allakipani. Paqallqür urutakisti q’umachatäxaniwa. Ukatsti q’añuchat jaqix isip t’axsusiñapa, umampi jariqasiñaparaki, ukampis jayp’ukamax q’añut uñt’atakïskaniwa. ²⁰ Q’añuchat jaqitix jan q’umachaskanixa, markap taypit apanukutaw uñjasini, Tatitun qullan utjäwip jupan q’añuchatap layku. Q’umachasir umampi jan ch’allakipasitap laykusti, jupax q’añukïskaniwa. ²¹ Uka kamachisti wiñayatakïniwa. Q’umachasir umampi yaqha jaqir ch’allakipirixa, isip t’axsusiñapawa. Q’umachasir uma llamkt’iristi, jayp’ukamaw q’añuchat uñjasini. ²² Taqi kunarutix q’añuchat jaqix llamkt’kan ukasti, q’añuchataw tukuni, q’añuchat jaqir llamkt’iristi, jayp’ukamaw q’añuchat uñjasini.”

¹ Israelitanakax marat nayrïr phaxsi saraqataruw Sin sat wasarar puripxäna; ukatsti Cadés chiqan mä qawqha pacha qamarapxäna. Ukan Mariax jiwxäna, ukanarak p’amp’atäxäna. ² Uka chiqansti janiw jaqinakatak umax utjkänti, ukat taqpachan tantachasisin, Moisesampitaki, Aaronampitak arusiñatakiw sartasipxäna, ³ ukatsti Moisesaruw sapxäna: —¡Tatitux mayni israelitanakar jiwarayki ukanakamp chik jiwarapxiriskäyäta! ⁴ ¿Kunatakirak aka wasarar Tatitun markapar irpanipxtasti? ¿Nanakampi uywanakaxampi jiwarañapti munapxtasti? ⁵ ¿Kunatakis Egiptot irpsunipxista aka axsarkañ wasarar puriyaniñkamasti? Akan janiw kunas yapuchañjamäkiti; janiw higo quqanakasa, uva yapunakasa, granado quqanakas utjkiti; ¡umas janirakiw umt’añatak utjkiti! —sasa. ⁶ Moisesampi Aaronampisti jaqinakat jithiqtawayxapxänwa, ukatsti Tatitump Jikisiñ Carpa mantañaruw sarxapxäna; ukkhansti p’iqinakap uraqir puriyañkamaw alt’apxäna. Tatitusti jach’a kankañapampiw jupanakar uñstäna, ⁷ Tatitux Moisesar akham säna: ⁸ —Thujrum ayxarum, ukatsti Aarón jilamamp yanapt’ayasisin taqpach markar tantachthapim. Ukatsti taqpach jaqinak nayraqatan qarqar parlam jupanakar uma churañapataki, ukat qarqat uma jalsunir uñjäta, jupanakana, ukhamarak uywanakapan umt’apxañapataki. ⁹ Moisesasti Tatitun arsutaparjamaw luräna, Tatit nayraqatankkäna uka thujru aytanïna; ¹⁰ ukxarusti Moisesampi Aaronampix taqpach jaqinakaruw qarqa nayräxar tantachthapipxäna, Moisesasti jupanakarux sänwa: —Qallasir chuyman jaqinaka, ist’apxam: ¿aka qarqatti umt’apxañamatak uma apsupxästi? —sasa. ¹¹ Uka arunak arsusasti, Moisesax amparap aytäna, ukatsti pä kutiw qarqar thujrump jisktäna, ukatsti walja umaw jalsüna. Ukat jaqinakampi, uywanakampix umarapxäna. ¹² Ukampis Tatitux Moisesampiru, Aaronampirux sänwa: —Janiw jumanakax nayar iyawsapkistati, janirakiw israelitanakan nayraqatapansa jach’añchapkistati, ukat aka jaqinakamp chikax, churkä uka uraqirux janiw mantapkätati —sasa. ¹³ Ukasti Meribá chiqan lurasïna, uka chiqan israelitanakax Tatitutak arusipxäna, ukampis jupax qullan kankañap uñacht’ayäna. ¹⁴ Moisesax Cadés chiqatpach jaqinakar khithäna Edom markan reyipar akham sañapataki: “Israelit jilanakamax akham siriw khithanipxitu: ‘Jumax sum yatta nanakan wali ch’ama tukutanakaxa. ¹⁵ Nanakan nayra awkinakaxax Egiptoruw jakir sarxapxäna, ukatsti walja maranakaw ukan jakapxäna, ukampis egipcionakax nanakar jan wal uñjapxitu, nayra awkinakaxarjamaw uñjapxarakitu; ¹⁶ ukat nanakax Tatitur yanap mayisipxta, jupasti arnaqasitanakaxar ist’apxituwa, angelap khithanipxitu, jupaw Egipto uraqit irpsunipxitu; jichhasti Cadés markan jikxatasipxta, markamampi qurpa uraqina. ¹⁷ Jichhasti uraqim chiqay sarakipt’ayapxita, janiw nanakax yapuchat uraqinjam sarapkäti, uva yapunjamsa sarakipapkäti, janirakiw phuch’unakamatsa umt’apkäti. Thakhinjamak sarapxä, uraqinakam sarakipañkamax janiw uka thakhit kawksarus saraqapkäti’ ” sasa. ¹⁸ Ukampis Edom markankir reyix sänwa: —¡Janiw uraqixanjam sarakipapkasmati, mantanipxäta ukasti, ejercitoxampiw jumanakar nuwantir mistunï! —sasa. ¹⁹ Israelitanakasti ukxaruw sapxäna: —Thakhim chiqak sarakipt’ayapxita, nanakampi uywanakaxampitix phuch’unakamat uma umt’apkä ukax, qullqi churapxäma. Uraqim sarakipt’añak munapxta —sasa. ²⁰ Ukampis Edom markankir reyix saskakïnwa: —¡Janiw uraqixanjam sarakipapkasmati! —sasa. Ukatsti reyix wali wakichrantat ejercitompiw mistsuwayäna, ukatsti israelitanak nayraqatan sayantäna, ²¹ uraqipanjam jan sarakipayañataki. Israel markasti jan kamacht’irjamäsax, yaqha thakhi thaqhapxäna. ²² Israelitanakax Cadés chiqat sartawayasax, Hor sat qullu tuqiruw sarxapxäna, ²³ Edom uraqimpi qurpaski uka chiqan Tatitux Moisesampiru, Aaronampir parläna, akham sasa: ²⁴ —“Aaronax jiwxaniwa, janiw jupax Israelan wawanakapar churkta uka uraqir mantkaniti, jumanakan Meribá chiqan arunakaxar jan jaysapxatam layku. ²⁵ Jumasti Moisés, Aaronampiru, Eleazar yuqapampir Hor sat qullu patar irpam; ²⁶ Aaronax ukan jiwxani. Jiwxipansti, sacerdote isip apsüta, ukatsti Eleazar yuqaparuw ukamp isthapiyäta” —sasa. ²⁷ Moisesasti Tatitun arsutaparjamaw luräna. Taqpach israelitanakan uñjkataw Hor sat qullur makhatapxäna. ²⁸ Aaronax jiwxän ukkhasti, Moisesax sacerdote isip issuyxäna, ukatsti Eleazar yuqaparuw ukamp isthapiyäna. Uka qhipatsti, Moisesampi, Eleazarampix qullut saraqanxapxäna. ²⁹ Israelitanakasti Aaronan jiwatap yatisinxa, kimsa tunka uruw jupat jachapxäna.

¹ Négueb wasarankir Arad markan cananeo reyix jakäna, jupasti israelitanakan Atarim thakhinjam jutasipkatapat ist’asinxa, jupanakamp nuwasiriw mistüna, ukatsti jupanakar nuwantasin yaqhipanakar katuntawayäna. ² Ukat israelitanakax Tatitur mayisipxäna, arsutap phuqhañatakiw jupar arsupxarakïna akham sasa: “Jumatix uka reyimpiru, markapampir atipjañ yanapapxitätaxa, nanakax taqpach markanakap q’alpun tukjapxä” sasa. ³ Tatitusti kuntix israelitanakax mayipkatayna ukarux ist’änwa, ukatsti uñisirinakapar atipjañ yanapt’äna. Israelitanakasti cananeonakarux taqinirupuniw jiwarayapxäna, markanakapsa taqpach t’unjapxäna. Ukat uka chiqarux Hormá sas sutichapxäna. ⁴ Israelitanakax Hor sat qullut mistuwayasax, Mar Rojo tuqiruw sarapxäna, Edom reyin uraqip muyt’asa, uka chiqa jan sarakipaskañataki. Thakhinsti jaqinakax ch’am thayjtayasipxäna, ⁵ ukat jupanakax Tatitutak arusiñ qalltapxäna, Moisesarusti sapxänwa: —¿Kunatakirak Egiptot irpsunipxistasti? ¿Wasaran jiwarayañatakit irpsunipxistasti? Janiw umasa, manq’as utjapkituti. ¡Aka jan sist’ayasir manq’ampix amjatäxapxtwa! —sasa. ⁶ Ukat Tatitux mich’isir katarinak apayanïna, ukanakasti jupanakarux mich’intänwa; walja israelitanakaw jiwararakïna. ⁷ Ukat jaqinakax Moisesan ukar sarasin jupar sapxäna: —¡Tatitumpitaki jumampitak arusisax jucha lurapxta! ¡Jumay Tatitur mayim aka katarinak apanukuñapataki! —sasa. Moisesasti israelitanakar juchapat pampachañapatakiw Tatitur mayïna, ⁸ Tatitusti jupar sänwa: —Uka katarinak kipka mä katari lurasim, ukatsti mä wiphalan lawapar uk warkkatam. Maynitix katarin mich’intat uñjasinixa, uka warkkatat katarir uñtpan, ukatsti janiw jiwkaniti —sasa. ⁹ Ukatsti Moisesax broncet mä katari luräna, ukatsti mä wiphalan lawaparuw warkkatäna, katarimpi mich’intayasiristi, broncet lurat katariruw uñtäna, ukat jan jiwkänti. ¹⁰ Israelitanakax thakhinjam sarasipkakïnwa, ukatsti Obot sat chiqaruw puripxäna. ¹¹ Obot chiqat sartawayasinxa, Moab uraqit inti jalsu tuqiruw sarapxäna, ukatsti wasarankir Iié-abarim chiqan utjnuqtapxarakïna. ¹² Uka chiqat sartawayasinsti, Zéred sat uma jalsuruw utjnuqtapxäna. ¹³ Uka chiqat sartawayasin Arnón jawir khurkataruw utjnuqtapxarakïna. Uka jawirax, wasarankiwa, Moab uraqimpi amorreonakan uraqipampi jaljaraki. ¹⁴ Tatitun nuwasïwinakapa sat qillqatan ukxat saraki: “Vaheb chiqaw sarakipapxta, Sufá uraqi chiqa, Arnón jawiran jisk’a jawiranakapanjam sarapxta. ¹⁵ Ar sat uraqir purki uka jisk’a jawiranak muytawayapxta, kawkïritix Moab uraqin qurpapkam purki ukakama” sasa. ¹⁶ Arnón jawiratsti, israelitanakax kawkhankäntix phuch’ux ukkharuw puripxäna, kawkhantix Tatitux Moisesar siskatayna: “Markar tantachthapim, ukatsti nayaw uma churä” sasa. ¹⁷ Ukürun israelitanakax akham jayllipxäna: “¡Phuch’ut umax jalspan! ¡Phuch’ur jayllipxam! ¹⁸ ¡Jilïrinakan allit phuch’u, markan yäqat jilïrinakan thujrunakapamp jist’arat phuch’u!” sasa. Wasarat sartawayxasasti, israelitanakax Mataná chiqaw sarakipawayapxäna, ¹⁹ Mataná chiqatxa, Nahaliel chiqaruw puripxäna, Nahaliel chiqatsti Bamot chiqaruw puripxäna, ²⁰ Bamot chiqatsti, Moab uraqinkir qhirwa chiqa sarakipapxäna, Pisgá sat qullu patar puriñkama, kawkhattix wasarax uñstki ukkharu. ²¹ Israelitanakax jaqinak khithäna amorreonakan Sehón reyipar akham sañapataki: ²² “Uraqim chiqa sarakipt’ayapxita. Janiw yapuchat yapunakamar mantapkäti, uva yapunakamsa taksupkäti, janirakiw umsa phuch’unakamat umt’apkäti. Thakhinjamak uraqim sarakipawayapxä” sasa. ²³ Ukampis Sehón reyix janiw israelitanakarux uraqipanjam sarakipayañ munkänti, jan ukasti, taqpach jaqinakapar tantacht’asin, wasararuw israelitanakar jikxatir mistunïna, Jahas chiqar purisinsti jupanakaruw nuwantäna. ²⁴ Ukampis israelitanakax sayt’asipxänwa, jupanakarux atipjapxarakïnwa, ukatsti uraqinakap katuntasipxäna, Arnón jawirata Jaboc sat jawirkama, amonitanakan uraqipampi qurpaski uka chiqkama, uka uraqisti suma uyuchrantatänwa. ²⁵ Ukhamaw israelitanakax amorreonakan taqi uka markanakap katuntasipxäna, uka markanakan utjantasipxarakïna, Hesbón markampina ukankir jisk’a markanakapampina. ²⁶ Amorreonakan Sihón sat reyipax Hesbón markan jakäna. Sihón reyix Moab uraqinkir nayrïr reyipampix nuwasiñankataynawa; ukatsti taqpach uka uraqi aparatayna, Arnón sat jawirkama. ²⁷ Ukat jayllirinakax sapxi: “¡Hesbón markar jutapxam, Sihón reyin markaparu! ¡Wasitat sayt’ayapxam, sum uyuchrantapxam! ²⁸ Hesbón markatpacha, Sihón reyin markapatpacha, nakhantir ninax lawrsunïna, Moab uraqinkir Ar markar t’unjasa, Arnón jawiran qullunakap t’unjasa. ²⁹ ¡Moab marka, jachkañätawa! ¡Quemós diosan markapa, aynacht’atätawa! Jupax jaqinakamsa jaltayakiwa, warminakamsa Sihón reyin amparaparuw jalt’ayi. ³⁰ Hesbón markan ch’amapax t’unjatawa; Dibón uraqit Nófah uraqkamax laqayar tukutawa, Medebá chiqakamaw ninax purïna.” ³¹ Ukhamat israelitanakax amorreonakan uraqinakap katuntasipxäna. ³² Moisesax Jazer marka uñaqayir khitharakïnwa. Israelitanakasti uka marka katuntasipxäna, uka jak’anakankir markanakampi, ukatsti ukan jakir amorreo jaqinakarux jaqunukupxänwa. ³³ Uka qhipatsti Basán uraqiruw sarxapxäna, ukampis Basán markan Og reyipax taqpach ejercitopampiw Edrei chiqar saräna jupanakamp nuwasiri. ³⁴ Ukapachaw Tatitux Moisesar säna: “Og reyir jan axsaramti, nayaw amparamar jupar katuyäma, taqpach ejercitoparu, markapamppacharu, jumasti kunjämtix Hesbón markan jakir amorreo Sihón reyir lurktaxa, uka pachparak luräta” sasa. ³⁵ Israelitanakax ukham Og reyimpiru, wawanakapampiru, ejercitopampiru, taqpach jaqinakapampiruw jiwarayäna. Janiw maynirus jakayapkänti, ukatsti uraqinakap katuntasipxäna.

¹ Israelitanakax thakhinjam sarasipkakïnwa, ukatsti Moab pampanakaruw purintapxäna, Jordán jawirat inti jalsu tuqiru, Jericó marka uñkatasiru. ² Sipor chachan Balac sat yuqapax Moab markan reyipänwa. Balac reyix kunjämtix israelitanakax amorreonakar lurkatayna ukanak yatïna. ³ Israelitanakan waljanïpxatap uñjasax, Moab markankir jaqinakax axsarapxarakïnwa. ⁴ Ukat Moab markankir jaqinakax, Madián markan jilïrinakapar jawsayasin sapxäna: “Israelitanakax kunatix utjkistu taqi ukanak tukjapxani, kunjämtix vacanakax pampanakan utjir ch’uxñanak tukuntki ukhama” sasa. ⁵ Ukapachasti, Beor chachan Balaam sat yuqapax wila masinakapampiw Petor markan jakäna, uka markasti Éufrates jawir thiyankänwa. Balac reyisti markapan jilïrinakaparuw khithäna Balaamar akham sapxañapataki: “Egiptot jaltanxasin mä jach’a markax, nanakan uraqix jak’aruw purinti. ⁶ Jichhpachay jutam, aka markar ñanqhachañataki, nanakat sipan juk’amp ch’amaniwa. Inampis ukhamat nayax jupanakar atipjirista, aka uraqitsa jupanakar alisnukurista. Nayax yattwa juman askinak arsutanakamasa, ñanqhachatamasa, phuqhasirïtapa” sasa. ⁷ Ukatsti Moab, Madián markanakan jilïrinakapax qullqi apt’ataw sarapxäna, israelitanakar ñanqhachatat churañataki, Balaam jak’ar purisasti, Balac reyin arunakap yatiyapxäna. ⁸ Balaamasti jupanakar sänwa: —Jichha arumax akar qhiparapxam, nayasti Tatitun arsutaparjamaw yatiyxapxäma. Moab markankir jilïrinakasti jupampiw qhiparapxäna. ⁹ Uka arumasti Tatitux Balaam chachar uñstasin, jupar jiskt’äna: —¿Khitinakarak jumamp chikäki uka jaqinakasti? —sasa. ¹⁰ Balaamasti sänwa: —Moab markat jutapxi; Balac reyin khithanakapawa. ¹¹ Reyiw jupanakarux akar khithanitayna, reyisti nayan sarañax muni, Egiptot jaltanir mä markxar nayan ñanqhachañaxataki. Uka markasti Moab marka jak’aruw purintatayna, reyisti uraqipat jupanakar jaqunukuñ muni —sasa. ¹² Tatitusti Balaamarux sänwa: —Jan jupanakamp chik saramti, janirak uka markar ñanqhachamsa, uka markarusti nayaw askinakamp phuqt’ta —sasa. ¹³ Qhipärmanthisti Balaamax sartasisin, Balac reyin khithanit jilïrinakaparuw yatiyxäna: —Markamar kuttxapxam. Janiw Tatitux jumanakampi chika sarañax munkiti —sasa. ¹⁴ Moab uraqit jutir jilïrinakasti Balac reyin ukaruw kuttawayxapxäna, juparusti sapxänwa: —Balaamax janiw nanakamp chik jutañ munkiti —sasa. ¹⁵ Ukampis Balac reyix mayamp yaqha jilïrinak khithaskakïnwa, jichhasti waljaniru, nayrïrinakat sipan juk’amp yäqat jilïrinakaru. ¹⁶ Jupanakasti Balaam thiyar purisinxa sapxänwa: —Sipor chachan Balac yuqapax jumar sistamwa: “Jutakimaya, janikiy ‘janiw’ sistati. ¹⁷ Nayaw wali jach’añchäwinak churäma, maykität uksa nayax phuqhäwa; aka markar ñanqhachañatak jutakimaya” sasa. ¹⁸ Ukampis, Balaamax jupanakar sänwa: —Balac reyix qullqini, qurini phuqhantat reyi utapsa churaskitaspa ukkhas nayax janiw jupan mayitap lurkiristti. Janiw nayax Diosaxan arsutapar ch’urkhiskiristti. ¹⁹ Ukampis jumanakax akan jichhärmax qhiparapxam, kunxay Tatitux luram sischitani —sasa. ²⁰ Uka arumasti, Tatitux Balaamar uñstasin akham sarakïna: —Uka jaqinakatix jumar irptir jutapxchi ukaxa, jupanakamp chik saram, ukampis kuntix nayax siskäma ukak luräta —sasa. ²¹ Qhipürusti, Balaamax willjtat sartasïna, ukatsti sarañatak qachu asnop karunt’asinxa moabita jilïrinakamp chikaw saräna. ²² Balaamax qachu asnopar lat’xatataw saräna, pani uywatapaw jupamp chik sarapxarakïna. Ukampis Tatitux wal jupatakix q’apisïna, uka jilïrinakamp chik saratapata. Ukat Tatitun angelapax jupa nayraqatan thakhin sayantasïna jan saraskakiñapataki. ²³ Qachu asnosti Tatitun angelapar espadas ayt’asit chika thakhin sayt’at uñjasaxa, thakhit maysaruw saranuküna, yaqha tuqinjam sarasa; ukampis Balaamax wal asnorux jawq’jäna, thakhir kuttayaniñataki. ²⁴ Ukxarusti Tatitun angelapax mä k’ullk’u chiqaruw sayt’asïna, thakhix uva yapu taypinjam saräna, ukasti purap tuqit qalamp pirqantatänwa. ²⁵ Asnox Tatitun angelapar uñjasax, maysa pirqa tuqiruw liwkattäna, Balaaman kayup usuchjasa. Ukat Balaamax wasitat asnor jawq’jäna. ²⁶ Ukatsti Tatitun angelapax jupanakat nayrst’asinxa, mä k’ullk’u chiqaruw sayt’asïna, ukawjat janiw kawksarus saranukuñjamäkänti. ²⁷ Qachu asnosti Tatitun angelapar uñjasax, uraqiruw liwitattäna. Ukat Balaamax q’apisisin, asnorux mä lawampiw jawq’jäna. ²⁸ Ukapachaw Tatitux qachu asnor parlayäna, asnosti Balaamarux sänwa: —¿Kunarak jumar kamächsmasti? Akampix kimsa kutiw nayar jawq’jista —sasa. ²⁹ Balaamasti sänwa: —Jumax nayat phiskasiskistaxa, mä cuchillotix amparaxan utjitaspaxa, anchhitpachaw jiwayirisma —sasa. ³⁰ Ukampis asnox sänwa: —¡Taqi jakäwiman nayax jumar khumunaqsma, uksti sum yattaxa, janiw nayax kunapachas qallkatirïksmati! —sasa. Balaamax sarakïnwa. —Ukax chiqawa —sasa. ³¹ Ukapachaw Tatitux Balaaman nayrap jist’ari, Balaamasti Tatitun angelapar espadas ayt’at thakhin uñjäna. Ukat jupax ajanup uraqir puriyañkam alt’äna. ³² Tatitun angelapasti juparux sänwa: —¿Kunatarak qachu asnomar kimsa kuti jawq’jtasti? Nayaw jumar thakhit jark’antsma, Moab markar saratamax janiw nayatak walïkiti. ³³ Asnox nayar uñjituwa, ukat kimsa kuti thakhit saranuku. Janitix ukham maysar saranukkasapänxa, nayax niyaw jumarux jiwayiriskasamäna, ukampis asnorux janiw jiwaykiriskäyätti —sasa. ³⁴ Balaamasti Tatitun angelaparux sänwa: —Nayax juch lurta, janiw yatkäyätti juman uka chiqan thakhi jist’antaskatama. Jumatix Moab markar sarañax jan munkstaxa, jichhpachaw utaxar kuttawayxä —sasa. ³⁵ Tatitun angelapasti sänwa: —Uka jaqinakamp chik saraskakim, ukampis kuntix nayax siskäma ukak parlarakïta —sasa. Ukatsti Balaamax Balac reyin khithanit jilïrinakamp chikaw saräna, ³⁶ Balac reyisti Balaaman jutaskatap yatisinxa, Moab uraqinkir mä markaruw katuqir mistuwayäna, Arnón jawir thiyaru, marka qurpäkis uka chiqaru, ³⁷ Balac reyisti Balaamarux sänwa: —Nayax walja kutiw jutañamatak jawsaysma; ¿kunatarak jan juttasti? ¿Janit nayasti jumar wali yäqañampi uñjkirismasti? —sasa. ³⁸ Balaamasti sarakïnwa: —Akaxay, nayax akanktwa. Ukampis nayax kuntix Diosax siskitani ukak arsü —sasa. ³⁹ Ukatsti Balaamax Quiriat-husot tuqiruw Balac reyimp chik saräna. ⁴⁰ Ukansti Balac reyix urqu vacanakampi, ovejanakampi wilañcha luqtäna, ukatsti Balaamampitaki, uka jilïrinakampitakiw jach’a manq’äwi luräna. ⁴¹ Qhipärmanthisti, Balac reyix Balaamaruw Bamot-baal sat qullur irpkatäna, ukawjat israelitanakan campamentopax maysa thiypachaw uñstäna.

¹ Ukapachaw Balaamax Balac reyir säna: —Aka chiqar paqallqu altaranak sayt’ayarapita, ukatsti paqallqu vaca qallumpi, paqallqu urqu ovejampi wakicharapita —sasa. ² Balac reyisti Balaaman aruparjamaw luräna, ukatsti panpachaniw sapaqat altarxar mä vaca qallumpi, mä urqu ovejampi wilañcha luqtapxäna. ³ Ukxarusti Balaamax Balac reyir sänwa: —Jumax wilañcha luqtat jak’an qhiparam. Nayasti Tatitun jutañap suyañaxawa, kuntix lurañaxäki uk sarakitani —sasa. Ukapachasti Balaamax mä ch’usawja pata chiqaruw saräna. ⁴ Jupan uka chiqankañapkamasti, Diosaw jupar uñstäna. Ukat Balaamax Tatitur säna: —Jumar jach’añchasaw paqallqu altaranak sayt’ayta, ukatsti sapa altarxan mä vaca qallumpi, mä urqu ovejampi waxt’a luqtta —sasa. ⁵ Tatitusti uka pachax, Balaaman lakapar kuntix parlañapäki uka arunak uchäna, jupar sarakïnwa: —Balac reyin ukar kutt’am, juparusti kuntix sisksma uka pachpa arunak yatiyam —sasa. ⁶ Balaamasti kutt’xasina, Balac reyir wilañcha luqta jak’an sayt’at jikxatäna, moabita jilïr jaqinakamp chika. ⁷ Ukapachaw Balaamax aka arunak arsüna: “Inti jalsu tuqi qullunakata, Aram chiqatpach Balac sat Moab markan reyipax jutayitu. ‘Jutam, Israelar ñanqhacharapita’ situwa, ‘Jacobun markapatak jan walinak mayirakim’ sasa. ⁸ ¿Kamisarak nayasti, Diosax jan ñanqhachki ukar ñanqhachästi? ¿Kamisarak jan walir puriñapatak mayïsti, Tatitux jan lurki uksti? ⁹ Aka jach’a qarqanak patat uñjta, aka quntu patanakat uñtarakta; yaqhachat markaw jakasi, janiw yaqha markanakjamäkisa. ¹⁰ Jupanakax laq’ar uñtatawa; ¿khitirak jupanakar jakt’aspasti? ¿Khitirak qawqhätapsa yatirakispasti? ¡Nayax uka aski jaqinakjam jiwañ munirista, tukuy urunakaxas jupanakan tukuyapjamarakïspa!” sasa. ¹¹ Uk ist’asasti, Balac reyix Balaamar sänwa: —¿Kunarak lurasktasti? Nayax uñisirinakaxar ñanqhachiriw irpansma, jumasti jichhax aski arunak jupanakatak arsuraptaxa —sasa. ¹² Balaamasti sänwa: —Tatitux nayan arsuñax munki uka arunakak saskta —sasa. ¹³ Ukampis Balac reyix saskakïnwa: —Jutam, yaqha chiqar sarañäni, ukawjat inas jupanakat mä juk’aniruk uñjasin ñanqhachañ munchisma —sasa. ¹⁴ Ukatsti Balac reyix Sofim chiqaruw Balaamar irpäna, Pisgá sat qullu pataru. Uka patansti paqallqu altaranak sayt’ayäna, sapaqat altarxan mä vaca qallumpi, mä urqu ovejampi wilañcha luqtäna. ¹⁵ Ukatsti Balaamax Balac reyir sänwa: —Jumax akan suyt’ita, altaranak jak’ana, ukchañkamasti nayax Tatitump jikisiriw sarä —sasa. ¹⁶ Tatitusti Balaamar uñstasin, kuntix arsuñapäkän uka arunak yatiyäna, juparusti sarakïnwa: —Balac reyin ukar kutt’am, juparusti kuntix sisksma uka pachpa arunak säta —sasa. ¹⁷ Balaamasti kutt’xasina, Balac reyir wilañcha luqta jak’an sayt’at jikxatäna, moabita jilïr jaqinakamp chika. Ukapachaw Balac reyix Balaamar jiskt’äna: —¿Tatitux kamstamsa? —sasa. ¹⁸ Balaamasti aka arunak arsüna: “Balac, Sipor chachan yuqapa, sum ist’ita. ¹⁹ Tatitux janiw jiwir jaqinakjamäkiti: janiw k’ariskiti, janirakiw amuyt’äwip mayjt’aykisa. Jupax arsutaparjam lurapuniwa. Jupax arsutap phuqhapuniwa. ²⁰ Tatituw markapatak aski arunak arsuyitu; Tatituw ukham arsu, janiw nayax jupar jark’kiristti. ²¹ Tatitux Israel markan reyipawa. Jupax markap taypin jakaski. Tatitux janiw jupanakan jan walt’añap munkiti, janiw jupanakar ñanqhsa lurañ munkiti. ²² Tatituw markaparux Egiptot qhispiyani, búfalo animalan ch’amapat sipan wali ch’amampi. ²³ Tatitun markapar ñanqhachañatakix janiw layqasiñanakax kunäkisa. ¡Uñtapxam qawqha muspharkañ luräwinaksa Tatitux markap layku luri! ²⁴ Aka markax axsarkañ leonar uñtataw sartasi, katjatapar manq’antañkamax janiw samarkaniti, uñisirinakapar atipjat uñjañkamax janiw samarkaniti” sasa. ²⁵ Ukapachaw Balac reyix Balaamar sarakïna: —¡Janitix aka markar ñanqhachirjamäkstaxa, janirakiy aski arunak jupanakatak arsumtixa! —sasa. ²⁶ Ukxaruw Balaamax sarakïna: —¿Janit nayasti sisksma, kuntix Tatitux siskitani ukak lurä sasasti? —sasa. ²⁷ Ukat Balac reyix jupar säna: —Jutam, yaqha chiqawjaruw irpäma. Inas Tatitux uka chiqawjatpach israelitanakar ñanqhachayiristam —sasa. ²⁸ Ukhamaw Balac reyix Balaamar irpäna, Peor sat qullu pataru, kawkhattix wasarax taqpach uñstki ukawjaru. ²⁹ Ukan Balaamax Balac reyir säna: —Aka chiqan paqallqu altaranak sayt’ayarapita, ukatsti paqallqu vaca qallumpi, paqallqu urqu ovejamp wakicht’arapita —sasa. ³⁰ Balac reyisti Balaaman aruparjamaw luräna, ukatsti sapa altaran mä vaca qallumpi, mä urqu ovejampi wilañcha luqtäna.

¹ Israel markar jach’añchañax Tatitur kusisiyatap Balaamax uñjäna, ukat jupax jan kuns lurkxänti Tatitun jupar uñstañapataki, kunjämtix walja kutinak lurkatayna ukhama, jan ukasti, jupax wasar tuqirukiw uñtäna. ² Balaamax Israel markarux ayllunakapatkam utjnuqtat uñjäna, ukhamaruw Tatitun ajayupax jupxar jutäna, ³ ukapachasti Balaamax aka arunak arsüna: “Balaaman arunakapawa, Beor chachan yuqapa; qhan arsur chachan arunakapawa. ⁴ Tatitun arunakap ist’irin arunakapawa, Taqi ch’amanin unañchäwinakap yatirin arunakapawa, ajayunkki ukapacha unañchäwinak uñjirin arunakapawa. ⁵ ¡Jacob, chhujllanakamax wali sumanakawa! ¡Israel, utjnuqäwimax sumapuniwa! ⁶ Walja siqintat palmeranakar uñtatawa, jawir lakanakan utjir panqaranakar uñtatawa, Tatitun ayruntat áloe panqaranakar uñtatawa, ¡uma thiyanakan alir cedro quqanakar uñtatawa! ⁷ Israel markax jilarkir umanïniwa, yapunakap qarpañataki, umt’añataki. Reyipax Agag reyiruw atipjani; marka apnaqäwipax jach’aptaniwa. ⁸ Tatituw jupanakar Egipto markat irpsunïna, búfalo animalan ch’amapar uñtat ch’amampi. Israel markax uñisir markanakaruw t’unjani; mich’inakapampiw usuchjani ch’akhanakap p’akirarakini. ⁹ Samarañatak winkt’aski uka leonar uñtata ukhamätaw jumax, Israel. ¡Janiw khitis sartayañ yant’kaspati! ¡Jumar jach’añchirix, jach’añchataw uñjasini, jumar ñanqhachirix, ñanqhachataw uñjasini!” sasa. ¹⁰ Uk ist’asinsti, Balac reyix walpun Balaamatak phiñasïna, amparanakap t’axllisisaw jupar säna: —Nayax uñisirinakaxar ñanqhachayiriw jumar jawsaysma, jumasti kimsa kutiw jupanakar jach’añchtaxa. ¹¹ ¡Jichhpach utamar sarxam! Nayax jumar walja churäwinak churañ arsüyäta, ukampis Tatituw jan ukham lurasiñap munkiti —sasa. ¹² Balaamasti ukxaruw sarakïna: —Nayax khithanit jaqinakamar sistwa: ¹³ “Balac reyix qullqini, qurini phuqhantat reyi utap churkitaspa ukkhas nayax janiw jupan mayitap lurkiristti. ¡Janiw nayax Tatitun arsutapar ch’urkhiskiristti! Kuntix Tatitux nayar siskitani ukakpun arsuskä” sasa. ¹⁴ Jichhax markaxar kuttawayxä, ukampis janïr sarkasin, kuntix akat qhipar Israel markax markamar lurkan uk arsuwayä —sasa. ¹⁵ Ukapachaw Balaamax aka arunak arsüna: “Balaaman arunakapawa, Beor chachan yuqapa, qhan uñjir chachan arunakapa. ¹⁶ Tatitun arunakap ist’irin arunakapawa, Alaxpachankirin amtäwip uñt’irin arunakapawa; Taqi ch’amanin unañchäwinakap uñjirin arunakapawa, ajayunkkasin unañchäwinak uñjirin arunakapawa. ¹⁷ Tatitux uñacht’aykitu ukax janïräkiwa; ukax akat qhiparüskaniwa. Israelan mä reyiw sartani, jupasti mä warawarar uñtataw k’ajani. Jupaw Moab markarux p’iqit takxatani, Set chachan saraqirinakapar taqpachanir pampachjani. ¹⁸ Edom markaruw katuntani, Seír uñisiripax atipjataw uñjasini. Israel markax jach’a luräwinak lurani. ¹⁹ Jacobun markapat mä atipjiriw sayt’ani, jupaw markan qhiparirinakar t’unjani” sasa. ²⁰ Uka arunak sasinsti, Balaamax Amalec uraqi tuqir uñtasaw aka arunak arsüna: “Amalec markax wali ch’aman markawa; taqpach markanakat sipan wali ch’amaniwa, ukampis q’ala t’unjataw uñjasini” sasa. ²¹ Ukhamarakiw Balaamax quenitanakar uñtasax aka arunak arsüna: “Caín chachan saraqirinakapa: utjäwinakamax suma chiqar sayt’atäskpansa, utanakamax qarqanak taypir utachatäskpansa, uka utanakamax ninampi t’unjataw uñjasini, Asiria markax katuntapkätam ukapachaxa” sasa. ²³ Tukuyañatakisti, Balaamax wasitat arsüna: “¡Ay, kunakïkan jakir jaqinakatxa, Tatitux taqi akanak lurkan ukapachaxa! ²⁴ Chipre quta thiyanakatpach barconakax jutani, Asiria, Éber markanakaruw tukjani, Éber markas t’unjatarakïniwa” sasa. ²⁵ Uka qhipat Balaamax utapar kuttawayxäna, Balac reyisti thakhipanjam sarxarakïna.

¹ Israelitanakax Sitim chiqan utjantasipkän ukapachasti, chachanakax moabita warminakampiw wachuq jucha lurañ qalltapxäna, ² uka warminakasti diosanakapar wilañchanak luqtäwiruw jupanakarux jawsapxäna. Israelitanakax uka manq’äwinakapat manq’apxäna, moabitanakan diosanakapatakiw killt’asipxäna, ³ ukhamat jupanakax Baal-peor sat diosar yupaychañatak arkapxäna. Ukat Tatitux Israel markatak q’apisïna, ⁴ Moisesarusti sarakïnwa: —Markan taqpach jilïrinakapar tantachthapim, ukatsti nayraqataxan urpach jiwarayam. Ukhamat q’apisiñaxax Israel markatak t’akurani —sasa. ⁵ Ukspachaw Moisesax Israelan taripirinakap thiya saräna, jupanakarusti sänwa: —Sapa mayniw jumanakax ayllunakamankirinakar, khitinakatix Baal-peor diosatak killt’asipki uka chachanakar jiwarayapxañama —sasa. Ukatsti ukhampun lurapxäna. ⁶ Ukampis Moisesampi israelitanakampix qullan utjäwir mantañan jacht’asisa jikxatasipkän ukchañkamasti, mä israelita jaqix chujllaparuw mä madianita warmir jupanakan uñjkat irpantasiskäna. ⁷ Uk uñjasinsti, Finees chachax, Eleazaran yuqapa, Aarón sacerdoten allchhipax, maysar jithiqtawayasaw, mä lanza aptasin, ⁸ uka israelitan chhujllapar saräna, ukat lanzapamp uka israelit jaqimpiru, madianita warmimpirux purakat jununtasin jiwayäna. Ukhamat Tatitun mutuyäwipax Israel markatak tukusïna. ⁹ Ukkhakamasti jiwaratanakax pä tunka pusin waranqa jaqinakänwa. ¹⁰ Ukatsti Tatitux Moisesar sänwa: ¹¹ —Finees chachaw israelitanakatak q’apisitax apaqitu, jupax nayan aytat kankañax waqaychi, ukat nayax israelitanakar q’apisiñaxan atipat jan taqpach jiwaraykti. ¹² Jichhasti juparux samaya, nayax jupamp sumankañ arust’äwi lurta, ¹³ ukat jupampiru, wawanakapampirux sacerdote luräwi wiñayatak katuyta, nayan aytat kankañax waqaychatap layku, ukhamarak israelitanakatak jucha luratat pampachäwi jikxatatap layku —sasa. ¹⁴ Khiti israelita jaqitix madianita warmimpi chik jiwayat uñjaskän jupax Zimrí sutinïnwa, jupasti Salú chachan yuqapänwa, Simeón ayllunkir wila masi taman jilïriparakïnwa. ¹⁵ Madianita warmisti Cozbí satänwa, jupasti Sur chachan phuchhapänwa, Madián markankir aytat wila masipan jilïripa. ¹⁶ Uka qhipatsti, Tatitux Moisesar sänwa: ¹⁷ —Madianita jaqinakar nuwantapxam, jupanakar atipjapxam, ¹⁸ kunjämtix jupanakax jumanakar nuwantapktam k’ari luräwinakamp Baal-peor diosar yupaychayasa, ukhamarak madianita jilïrin Cozbí phuchhapan lanzamp jununtas jiwayatätapatsa, ukasti Baal-peor diosar yupaychapxatam layku mutuyäwi apayankta ukapachaw ukham lurasïna. ¹⁹ Uka jaqinak jiwarat qhipatsti,

¹ Tatitux Moisesampiru, Aarón sacerdoten Eleazar yuqapampiruw parläna, akham sasa: ² —Jaqinak jakthapipxam, wila masitkama, pä tunk maranit amstaru, nuwasïwirus sarirjamäpki taqi uka israelitanakaru —sasa. ³ Moisesampi, Eleazar sacerdotempisti Moab pampanakana, Jordán jawir jak’ana, Jericó marka uñkatasin jikxatasipkän ukapachaw israelitanakar sapxäna, ⁴ taqinin qillqayasipxañapataki, pä tunka maranit amstaru, Tatitux Moisesar siskatayna ukhamarjama. Egiptot mistunipkatayna, ukatsti qillqantatäpkän taqi uka israelita jaqinakax akanakänwa: ⁵ Rubén chachan wawanakapa, Jacobun tayna yuqapana, Henoc, Falú, ⁶ Hesrón, Carmí jupanakänwa; ⁷ jakthapitarjamasti, Rubén chachan saraqirinakapax pusi tunka kimsan waranqa paqallq pataka kimsa tunkan chachanakänwa. ⁸ Falú chachax mä wawanikïnwa, Eliab sutini, ⁹ Eliab chachasti kimsa wawanïnwa: Nemuel, Datán, Abiram sutininaka. Datán, Abiram jupanakax, Coré chachan tamapar jaqkattirinakänwa, jupanakasti Tatitumpitaki, Moisesampitaki, Aaronampitakiw sayt’asipxäna. ¹⁰ Ukampis uraqiw jist’artasin jupanak paniniru, Coré chachampir manq’antäna, tamapankirinakasti taqpachaniw jiwaräna, pä patak phisqa tunka jaqinakaw ninan jiwarapxäna. Ukasti markan waniñapatakiw ukham lurasïna. ¹¹ Coré chachan wawanakapakiw jan jiwapkänti. ¹² Simeón chachat saraqir wila masi tamanakan wawanakapax Nemuel, Jamín, Jaquín, ¹³ Zérah, Saúl, jupanakänwa; ¹⁴ jakthapitarjamasti, Simeón chachan saraqirinakapax pä tunka payan waranqa pä patakan chachanakänwa. ¹⁵ Gad chachat saraqir wila masi tamanakan wawanakapax Sefón, Haguí, Suní, ¹⁶ Ozní, Erí, ¹⁷ Arod, Arelí jupanakänwa; ¹⁸ jakthapitarjamasti, Gad chachan saraqirinakapax pusi tunk waranqa phisqa patakan chachanakänwa. ¹⁹ Judá chachat saraqir wila masi tamanakan wawanakapax Er, Onán, Selá, Fares, Zérah jupanakänwa. Er, Onán jupanakax Canaán uraqin jiwarapxäna, ukat jupanakax jan jakhutäpkänti. ²¹ Fares chachax pä wawanïnwa: Hesrón, Hamul jupanaka; ²² jakthapitarjamasti, Judá chachan saraqir wawanakapax paqallq tunka suxtan waranqa phisqa patakan chachanakänwa. ²³ Isacar chachat saraqir wila masi tamanakan wawanakapax Tolá, Puvá, ²⁴ Jasub, Simrón jupanakänwa; ²⁵ jakthapitarjamasti, Isacar chachan saraqirinakapax suxta tunka pusin waranqa kimsa patakan chachanakänwa. ²⁶ Zabulón chachat saraqir wila masi tamanakan wawanakapax Séred, Elón, Jahleel jupanakänwa; ²⁷ jakthapitarjamasti, Zabulón chachan saraqirinakapax suxta tunka waranqa phisqa patakan chachanakänwa. ²⁸ José chachat saraqir wila masi tamanakan wawanakapax Manasés, Efraín jupanakänwa. ²⁹ Manasés chachax mä wawanikïnwa: Maquir sutini. Maquir chachasti mä wawanikirakïnwa: Galaad sutini; ³⁰ Galaad chachat saraqir wila masi tamanakan wawanakapax Iéser, Hélec, ³¹ Asriel, Siquem, ³² Semidá, Héfer, jupanakänwa. ³³ Héfer chachax mä wawanikïnwa Selofhad sutini. Selofhad chachax janiw yuqall wawanïkänti, jan ukasti imill wawanakapakiw utjäna, sutinakapasti: Mahlá, Noá, Hoglá, Milcá, Tirsá jupanakänwa. ³⁴ Jakthapitarjamasti, Manasés chachan saraqirinakapax phisqa tunka payan waranqa paqallq patakan chachanakänwa. ³⁵ Efraín chachat saraqir wila masi tamanakan wawanakapax Sutélah, Béquer, Tahán jupanakänwa. ³⁶ Sutélah sat chachan saraqirinakapax Erán sat wila masi tamankirïnwa. ³⁷ Jakthapitarjamasti, Efraín chachat saraqir wila masi tamanakan wawanakapax kimsa tunka payan waranqa phisqa patakan chachanakänwa. Taqi jupanakampi, Manasés ayllunkirinakampix José chachat saraqirinakapänwa. ³⁸ Benjamín chachat saraqir wila masi tamanakax Bela, Asbel, Ahiram, ³⁹ Sufam, Hufam jupanakänwa. ⁴⁰ Bela chachax pä wawanïnwa: Ard, Naamán jupanaka. ⁴¹ Jakthapitarjamasti, Benjamín chachan saraqirinakapax pusi tunka phisqan waranqa suxta patakan chachanakänwa. ⁴² Dan chachat saraqirinakax Suham sat wila masi tamankirïnwa. ⁴³ Jakthapitarjamasti, Suham chachan saraqirinakapax suxta tunka pusin waranqa pusi patakan chachanakänwa. ⁴⁴ Aser chachat saraqir wila masi tamanakax Imná, Isví, Beriá jupanakänwa. ⁴⁵ Beriá chachax pä wawanïnwa: Heber, Malquiel jupanaka. ⁴⁶ Aser chachax mä imill wawanirakïnwa, Sérah sutini. ⁴⁷ Jakthapitarjamasti, Aser chachan saraqirinakapax phisqa tunka kimsan waranqa pusi patakan chachanakänwa. ⁴⁸ Neftalí chachat saraqir wila masi tamanakan wawanakapax Jahseel, Guní, ⁴⁹ Jezer, Silem jupanakänwa. ⁵⁰ Jakthapitarjamasti, Neftalí chachan saraqirinakapax pusi tunka phisqan waranqa pusi patakan chachanakänwa. ⁵¹ Jakthapitarjamasti, israelitanakax suxta patak mayan waranqa paqallqu patak kimsa tunkan chachanakänwa. ⁵² Tatitux Moisesar wasitat parlxayäna, juparusti sarakïnwa: ⁵³ “Taqi aka jaqinakaruw uraqinak lakintäta, qawqha jaqinakatix qillqantatäki ukhamarjama. ⁵⁴ Waljanïki uka tamanakarux jilpach uraqi churäta; juk’anïki uka tamanakarusti jisk’a uraqik churarakïta. Sapaqat tamaruw jakthapitarjam uraqix churasini. ⁵⁵ Uraqinak lakiñasti suertet wakt’atarjamäniwa. Sapaqat mayniw tunu awkit saraqir ayllunkiritjam uraqip katuqani. ⁵⁶ Uraqinak lakintañax suertetjamaw wakt’ani, ayllunkiritjama, wila masi tamankiritjama” sasa. ⁵⁷ Leví chachat saraqir wila masinakarux jakthapipxarakïnwa, Leví chachax kimsa wawanïnwa: Guersón, Quehat, Merarí jupanaka. Ukhamat kimsa wila masi tamanak utjayapxäna; uka tamanakatsti, yaqha phisqa wila masi tamanakaw uñstäna: Libní, Hebrón, Quehat, Mahlí, Musí jupanaka. Quehat chachax mä wawanikïnwa, Amram sutini. ⁵⁹ Amram chachax Leví chachan mä phuchhapampiw jaqichasïna, jupasti Jocabed satänwa. Uka phuchhapasti kunapachatix Leví chachax Egiptonkaskän ukapachaw yuritayna. Amram chachampi, Jocabed warmimpix pä yuqall wawani, mä imill wawanïpxänwa: Aarón, Moisés, María jupanaka. ⁶⁰ Aarón chachax pusi wawanïnwa: Nadab, Abihú, Itamar, Eleazar jupanaka. ⁶¹ Ukampis Nadab chachampi, Abihú chachampix, Tatitun iwxt’apar jan ist’as incienso luqtapxatap laykuw jiwarapxäna. ⁶² Leví chachat saraqir taqpach yuqall wawanakapax mä phaxsinit amstarux, pä tunka kimsan waranqanïnwa. Jupanakasti janiw israelitanak taypin jakhutäkänti, uraqix jupanakar jan churatätap layku. ⁶³ Taqi ukanakänwa Moisesampi, Eleazar sacerdotempi jakthapipkän uka israelita jaqinakat jakthapitanakaxa, kunapachatix Moab pampanakana, Jordán jawir jak’ana, Jericó marka uñkatasin jikxatasipkän ukapacha. ⁶⁴ Uka jakthapitanak taypinsti, janiw maynis utjkänti, Moisesampi, Aaronampix jaqinak nayrïr kutin Sinaí wasaran jakthapipkän uka jaqinakatxa. ⁶⁵ Jupanakax taqpachaniw wasaran Tatitun mutuyäwip katuqas jiwarxapxatayna. Caleb chachampi, Josué chachampikiw qhiparäna.

¹ Manasés ayllun phisqa imill wawanakaw utjäna, sutinakapasti Mahlá, Noá, Hoglá, Milcá, Tirsá jupanakänwa. Jupanakasti Selofhad sat chachan imill wawanakapänwa, Héfer, Galaad, Maquir, Manasés, José uka chachanakat saraqirinakarakïnwa. ² Mä urusti, uka phisqa kullakanakax qullan utjäwi mantañaruw sarapxäna, Moisesampi, Eleazar sacerdotempi, markan jilïrinakapampi, taqpach israelitanakamp parlañataki. Ukat jupanakar sapxäna: ³ —Nanakan awkixax wasaran jiwxi, jupasti janiw Tatitutak sayt’asir Coré chachan tamapankirïkänti. Jupax pachpa juchap laykuw jiwaski, janirakiw yuqall wawanak jaytawaykiti. ⁴ Janiw askïkiti awkixan jan yuqall wawanïtap layku sutipan wila masi tamapat chhaqtañapaxa. Ukhamax awkixan jilanakap taypir mä uraq nanakar churapxita —sasa. ⁵ Moisesasti uka warminakan mayitanakap Tatituruw yatiyäna, ⁶ Tatitusti jupar sänwa: ⁷ “Selofhad chachan phuchhanakapax walik arsusipki. Awkipan jilanakap taypin utjir uraq churam, awkipan tutip jupanak katuqpan. ⁸ Israelitanakar sarakim: maynitix jan yuqall wawani jiwxani ukkhax, uka jaqin tutipax imill wawaparuw churatäxani; ⁹ janitix kuna imill wawapas utjkani ukkhasti, jilanakaparuw tutip jaytawayxani; ¹⁰ janitix jilanakapas utjkan ukkhax, awkipan jilanakaparuw tutip jaytxani. ¹¹ Awkipantix jan kuna jilapas utjkan ukkhasti, jak’a wila masiparuw tutip jaytxani. Aka kamachisti taqpach israelitanakatakiwa, kunjämtix nayax jumar sisksma ukhamarjama.” ¹² Tatitux Moisesar sänwa: —Abarim qullur makhatam, israelitanakar nayax churkta uka uraqi ukawjatpach uñatatam. ¹³ Uka uraq uñatatasinsti, jiwxätawa, ukatsti nayra awkinakamampiw tantachasxäta, Aarón jilamjama, ¹⁴ jumanak paninix Sin sat wasaran nayar jan jaysapkistati, markax nayatak sartkän ukapacha, janirakiw jumanakax uma mayipkän ukkhax jupanak nayraqatan jach’añchapkistati, —sasa. (Akasti Cadés chiqankir Meribá uma jalsut parli, Sin wasarana). ¹⁵ Moisesasti Tatitur sänwa: ¹⁶ —Tatitu Diosay, jumaw taqi jaqinakarus jakañ churtaxa, markaman nayraqatap sarañapatak mä jilïr utt’ayam, jupasti taqi chiqanjam irparakpan, jupanakan jan awatirin tamar uñtat jan sarnaqasipkañapataki —sasa. ¹⁸ Tatitusti Moisesarux sarakïnwa: —Josué sat Nun chachan yuqapar irpanim, jupax suma chuyman jaqiwa. Jupar amparamamp luqxatam, ¹⁹ ukat Eleazar sacerdoten nayraqatapar irpam, taqpach markan nayraqataparu, ukatsti taqi jupanak nayraqatan lurañap katuyäta; ²⁰ jumasti jilïr kankañamat jupar churäta, taqpach Israel markan jupar jaysañapataki. ²¹ Josué chachax Eleazar sacerdoten nayraqataparuw uñstañapa, Eleazarasti Urim tuqiw sutipxar nayar jiskt’itani. Josué chachaw israelitanakar apnaqani taqi kuna lurañanakapansa —sasa. ²² Moisesasti Tatitun arsutaparjamaw luräna. Josué chachar irptawayasinxa, Eleazar sacerdoten nayraqataparuw irpkatäna, taqpach marka nayraqatampiru. ²³ Ukatsti, Tatitun arsutaparjamaw amparapamp p’iqipxar luqxatasin lurañap churxäna.

¹ Tatitux Moisesaruw säna: ² “Israelitanakar parlam, jupanakar sarakim: wakisit uruyañanakan, jan armt’asis nayar luqtapxitpan, t’ant’ampi, nakt’ayat waxt’anakampi, nayatak suma q’apkir waxt’a luqtanaka. ³ “Jupanakar sarakim: nayar jach’añchasaw nakt’ayapxañapa aka waxt’anaka: Sapüruw mä maran pä urqu oveja nakt’ayat wilañcha luqtapxani, uka uywasti jan kuna kamacht’atäñapawa. ⁴ Willjta tuqirux maya luqtapxani, mayïrsti jayp’thapiruw luqtapxarakini. ⁵ Grano juyranakat waxt’ax mä litro oliva aceitempi chapuntata pä kilo suma jak’utäñapawa ⁶ (Sinaí qullunxa, sapüruw aka waxt’a nakt’ayasïna, Tatitur mä suma q’apkir waxt’a luqtasina). ⁷ Vino waxt’atsti sapa ovejat mä litro vino luqtapxani. Uka vinompiw Tatitur jach’añchasa qullan utjäwir warakipapxani. ⁸ Maynïr urqu ovejasti jayp’u tuqiruw wilañcha luqtatäni, ukarusti grano juyra waxt’ampi, vino waxt’ampiw yapt’asini, kamisatix willjtan luqtatäki ukhama. Ukasti Tatitur jach’añchas nakt’ayat mä suma q’apkir luqtawa. ⁹ “Sábado urunakanxa, jumanakax mä maran pä urqu ovejanak luqtapxäta, uka ovejanakasti jan kuna kamacht’atäñapawa, pusi kilo suma jak’u aceitemp chaputa, grano juyranak waxt’ata, vino waxt’apamp kuna. ¹⁰ Aka nakt’ayat waxt’ax sábado urunakan luqtatäni, vino waxt’apamp kuna, sapüru nakt’ayat waxt’a luqtanakax yaqhäskaniwa. ¹¹ “Sapa phaxsit qallta uru saraqkipan Tatiturux nakt’ayat waxt’a luqtapxäta, pä vaca qallumpi, mä urqu ovejampi, mä maran paqallqu urqu ovejampi, uka uywanakasti jan kuna kamacht’atäñapawa. ¹² Sapaqat vaca qallut suxta kilo suma jak’u aceitemp chaput luqtapxäta; sapaqat urqu ovejatsti, pusi kilo jak’u aceitemp chaputa, ¹³ uka pachparaki mä marani oveja qallutxa, pä kilo jak’u aceitemp chaputa. Ukasti Tatitur jach’añchasa nakt’ayat mä suma q’apkir luqtäniwa. ¹⁴ Vino waxt’asti, pä litro vino sapaqat vaca qalluta, mä litro chikatan sapaqat urqu ovejata, mä litro sapaqat mä maran oveja qalluta. Taqi aka nakt’ayat waxt’anak luqtapxäta, marpacha, sapa phaxsina. ¹⁵ Sapüru nakt’ayat waxt’a luqtatat sipansa, Tatiturux jucha luratat mä chivo wilañcha luqtapxäta, vino waxt’amp kuna. ¹⁶ “Sapa mara qallta phaxsina, tunka pusin uru saraqatarusti, Pascua uruyapxäta, Tatitun jach’a kankañapat amtasisa, ¹⁷ tunka phisqan uru saraqatasti, jach’a urüniwa. Paqallq uruw jan levaduran t’ant’a manq’apxäta. ¹⁸ Uka paqallqu urunakat nayrïr urunxa, mä qullan tantachäwiwa utjani. Ukürusti janiw jumanakax kuna irnaqañanaksa lurapxätati. ¹⁹ Tatituruw nakt’ayat waxt’a luqtapxäta, pä urqu vaca qallu, mä urqu oveja, mä maran paqallqu urqu oveja, uka uywanakasti jan kuna kamacht’atäñapawa. ²⁰ Uka wilañchanakamp chikax, suma jak’u aceitempi chapuntat waxt’xa, akham lurapxäta: sapaqat vaca qallutxa, suxta kilo jak’u, sapaqat urqu ovejatxa, pusi kilo jak’u, ²¹ ukatsti sapaqat maran oveja qallutxa, pä kilo jak’u. ²² Juchanakamat pampachayasiñ jikxatañatakisti mä chivo wilañcha luqtapxarakïta. ²³ Taqi akanak luqtapxäta, willjtanak nakt’ayat waxt’a sapür luqtaski ukanakat sipana. ²⁴ Ukham lurapxäta, sapüru, uka paqallqu uruyañ urunakana, Tatitur jach’añchasa nakt’ayat suma q’apkir waxt’a luqta. Ukasti vino waxt’apampiw luqtasini, sapa urun nakt’ayat waxt’a luqtat sipana. ²⁵ Paqallqüri ururusti qullan tantachäwi lurapxäta. Uka urusti janiw kuna irnaqañanaksa lurapxätati. ²⁶ “Nayrïr achunak luqtañ urunxa, Tatitur yapunakamat machaq achunakap apthapisin luqtapkäta ukapachax, Semananaka sat uruyañ urunxa, qullan tantachäwi lurapxarakïta. Uka urusti janiw kunsa irnaqapxätati. ²⁷ Tatituruw luqtapxäta, nakt’ayat mä suma q’apkir waxt’a, pä urqu vaca qallu, mä urqu oveja, maran paqallqu urqu oveja; uka uywanakasti jan kuna kamacht’atäñapawa. ²⁸ Sapaqat vaca qallutxa, suxta kilo suma jak’u aceitempi chaput luqtäta; urqu ovejatxa pusi kilo suma jak’u; ²⁹ sapaqat urqu oveja qallutxa, pä kilo suma jak’u. ³⁰ Jucha luratanakamat pampachayasiñ jikxatañatakix, mä chivo wilañcha luqtapxarakïta. ³¹ Uka luqtasti sapüru nakt’ayat waxt’at sipana, grano juyranakat waxt’ampi, vino waxt’amp chika luqtapxäta. Uywanakasti jan kuna kamacht’atäñapawa.

¹ “Paqallqür phaxsina, nayrïr uru saraqataruw jumanakax mä qullan tantachasïwi lurapxäta. Uka urusti janiw kuna irnaqañanaksa lurapxätati, trompetanak phust’asaw uka uru yatiyapxäta. ² Tatitur jach’añchas nakt’at mä suma q’apkir waxt’a luqtapxäta, mä urqu vaca qallu, mä urqu oveja, maran paqallqu urqu ovejanaka, uka uywanakasti jan kuna kamacht’atäñapawa. ³ Urqu vaca qallump chikax, suxta kilo suma jak’u aceitempi chapuntat waxt’a luqtapxäta; urqu ovejamp chikasti pusi kilo suma jak’u, ⁴ sapa maya urqu oveja qallump chikasti pä kilo jak’u. ⁵ Ukxarux jumanakan jucha luratanakamat pampachayasiñ jikxatañatakix, mä chivo wilañcha luqtapxäta, ⁶ sapa phaxsi nakt’ayat luqtata, sapür nakt’ayat luqtat sipana, grano juyra waxt’apampi, vino waxt’apampi, Tatitun arsutaparjama. Aka luqtax Tatitutak nakt’ayat mä suma q’apkir waxt’äniwa. ⁷ “Pachpa paqallqür phaxsina, tunka uru saraqkipana, jumanakax qullan tantachasïwi lurapxarakïta. Ukürusti ayuno lurapxäta, janirakiw kuna irnaqañanaksa lurapxätati. ⁸ Tatitur jach’añchas nakt’at suma q’apkir waxt’a luqtapxäta, mä urqu vaca qallumpi, mä urqu ovejampi, marani paqallqu urqu ovejampi, uka uywanakasti jan kuna kamacht’atäñapawa. ⁹ Urqu vaca qallump chikax, suxta kilo suma jak’u aceitemp chaput luqtapxäta; urqu ovejamp chikasti pusi kilo jak’u, ¹⁰ sapa oveja qallump chikasti pä kilo jak’u. ¹¹ Ukxarusti jucha luratat mä chivo wilañcha luqtapxarakïta, juchanakat pampachasiñ urun wilañchax luqtatäki, sapür nakt’ayat waxt’ax grano juyra waxt’apampi, vino waxt’anakapamp chik luqtatäki ukanakat sipana. ¹² “Paqallqür phaxsina, tunka phisqan uru saraqatarusti, jumanakax qullan tantachasïwi lurapxäta. Uka urux janiw kunanaksa irnaqapxätati. Paqallqu uruw Tatitun jach’a kankañapar jach’añchasa uruyapxäta. ¹³ Nayrïr urux Tatitur jach’añchasa nakt’ayat mä suma q’apkir waxt’a luqtapxäta, tunka kimsani urqu vaca qallunaka, pä urqu oveja, marani tunka pusin urqu oveja qallunaka, ukanakasti jan kuna kamacht’atäñapawa. ¹⁴ Sapaqat urqu vaca qallutxa suxta kilo suma jak’u, aceitemp chaputa luqtapxäta; sapaqat urqu ovejatxa, pusi kilo jak’u, ¹⁵ sapaqat urqu oveja qallutsti pä kilo jak’u. ¹⁶ Jucha luratat mä chivo wilañcha luqtapxarakïta, ukasti sapür nakt’ayat waxt’at sipan yaqhäskaniwa, grano juyra waxt’ampi, vino waxt’amp chika. ¹⁷ “Payïr urusti tunka payan urqu vaca qallumpi, pä urqu ovejampi, tunka pusin mä marani urqu oveja qallumpi luqtapxäta, ukanakasti jan kuna kamacht’atäñapawa. ¹⁸ Uka luqtanakamp chikasti grano juyra waxt’anakampi, vino waxt’anakamp lurapxäta, qawqhäkitix urqu vaca qallunakasa, urqu ovejanakasa, mä marani urqu oveja qallunakasa, kunjämtix Diosax siski ukhamarjama. ¹⁹ Jucha luratat mä chivo wilañcha luqtasirakini, ukasti sapüru nakt’ayat waxt’anakat sipan yaqhäskaniwa, grano juyra waxt’anakampi, vino waxt’anakamp chika. ²⁰ “Kimsïr urusti tunka mayan urqu vaca qallunak luqtapxarakïta, pä urqu ovejampi, tunka pusin mä marani urqu oveja qallumpi, ukanakasti jan kuna kamacht’atäñapawa. ²¹ Uka luqtanakamp chikasti grano juyra waxt’anakampi, vino waxt’anakamp lurapxäta, qawqhäkitix urqu vaca qallunakasa, urqu ovejanakasa, mä marani urqu oveja qallunakas ukhamarjama, kunjämtix Diosax siski ukhama. ²² Jucha luratat mä chivo wilañcha luqtapxarakïta, ukasti sapüru nakt’ayat waxt’anakat sipan yaqhäskaniwa, grano juyra waxt’anakampi, vino waxt’anakamp chika. ²³ “Pusïri urusti tunka urqu vaca qallunak luqtapxäta, pä urqu ovejampi, tunka pusin mä maran urqu oveja qallunakampi, ukanakasti jan kuna kamacht’atäñapawa. ²⁴ Uka luqtanakamp chikasti grano juyra waxt’anakampi, vino waxt’anakamp lurapxäta, qawqhäkitix urqu vaca qallunakasa, urqu ovejanakasa, mä marani urqu oveja qallunakas ukhamarjama, kunjämtix Diosax siski ukhama. ²⁵ Jucha luratat mä chivo wilañcha luqtapxarakïta, ukasti sapüru nakt’ayat waxt’anakat sipan yaqhaskaniwa, grano juyra waxt’anakampi, vino waxt’anakamp chika. ²⁶ “Phisqïr urusti llätunk urqu vaca qallunak luqtapxäta, pä urqu ovejampi, tunka pusin mä marani oveja qallunakampi, uka uywanakasti jan kuna kamacht’atäñapawa. ²⁷ Uka luqtanakamp chikasti grano juyra waxt’anakampi, vino waxt’anakamp luqtapxäta, qawqhäkitix urqu vaca qallunakasa, urqu ovejanakasa, mä marani urqu oveja qallunakas ukhamarjama, kunjämtix Diosax siski ukhama. ²⁸ Jucha luratat mä chivo wilañcha luqtapxarakïta, ukasti sapüru nakt’ayat waxt’anakat sipan yaqhaskaniwa, grano juyra waxt’anakampi, vino waxt’anakamp chika. ²⁹ “Suxtïr urusti kimsaqallqu urqu vaca qallunakampi, pä urqu ovejampi, tunka pusin mä maran urqu oveja qallunakampi luqtapxäta, ukanakasti jan kuna kamacht’atäñapawa. ³⁰ Uka luqtanakamp chikasti grano juyra waxt’anakampi, vino waxt’anakamp luqtapxäta, qawqhäkitix urqu vaca qallunakasa, urqu ovejanakasa, mä marani urqu oveja qallunakas ukhamarjama, kunjämtix Diosax siski ukhama. ³¹ Jucha luratat mä chivo wilañcha luqtapxarakïta, ukasti sapüru nakt’ayat waxt’anakat sipan yaqhäskaniwa, grano juyra waxt’anakampi, vino waxt’anakamp chika. ³² “Paqallqür urusti paqallqu urqu vaca qallunak luqtapxäta, pä urqu ovejampi, tunka pusin mä marani urqu oveja qallunakampi, ukanakasti jan kuna kamacht’atäñapawa. ³³ Uka luqtanakamp chikasti grano juyra waxt’anakampi, vino waxt’anakamp luqtapxäta, qawqhäkitix urqu vaca qallunakasa, urqu ovejanakasa, mä maran urqu oveja qallunakas ukhamarjama, kunjämtix Diosax siski ukhama. ³⁴ Jucha luratat mä chivo wilañcha luqtapxarakïta, ukasti sapüru nakt’ayat waxt’anakat sipan yaqhäskaniwa, grano juyra waxt’anakampi, vino waxt’anakamp chika. ³⁵ “Kimsaqallqür urusti mä jach’a tantachasïwi lurasaw uruyapxäta, uka urusti janirakiw kuna irnaqañanaksa lurapxätati. ³⁶ Tatituruw mä suma q’apkir nakt’ayat waxt’a luqtapxäta, mä urqu vaca qallumpi, mä urqu ovejampi, mä maran paqallq urqu oveja qallumpi, ukanakasti jan kuna kamacht’atäñapawa. ³⁷ Uka luqtanakamp chikasti grano juyra waxt’anakampi, vino waxt’anakamp luqtapxäta, qawqhäkitix urqu vaca qallunakasa, urqu ovejanakasa, mä maran urqu oveja qallunakas ukhamarjama, kunjämtix Diosax siski ukhama. ³⁸ Jucha luratat mä chivo wilañcha luqtapxarakïta, ukasti sapür nakt’ayat waxt’anakat sipan yaqhäskaniwa, grano juyra waxt’anakampi, vino waxt’anakamp chika. ³⁹ “Uka wilañchanak jumanakax uruyañ urunakan Tatitur luqtapxäta, chuymanakamatjam waxt’a luqtapkäta, arsuta phuqhasin waxt’a luqtapkäta ukax yaqhäskaniwa, nakt’ayat waxt’äpansa, grano juyra waxt’äpansa, vino waxt’äpansa, jan ukax, sumankthapiñ wilañchäpansa.” ⁴⁰ Ukatsti Moisesax taqi kunanaktix Tatitux jupar siskatayna ukanak israelitanakar yatiyäna.

¹ Moisesax israelitanakan ayllunakapan jilïrinakaparuw säna: “Tatitux akham siwa: ² maynitix mä kun lurañatak Tatitur arsuni, jan ukax, phuqhañatak juramentompi arsuni ukapachasti, uka jaqix arsutap phuqhañapawa, kuntix arski taqi ukanak lurañaparaki. ³ “Mä tawaqutix mä kun lurañatak Tatitur arsuni, ⁴ awkipasti uka arsutap yatisin jan kamskan ukkhaxa, tawaqux uka arsutap phuqhañapawa. ⁵ Ukampis awkipatix uka arsutap yatisin jan munkaspa ukaxa, Tatitux janiw tawaqur arsutap phuqhañapatak wayt’kaniti. ⁶ “Mä tawaqutix jan sum amuyt’asisa kun lurañatakis Tatitur arsuni, ukat jaqichasxarakini, ⁷ chachapatix yatisin jan kamskani ukapachasti, tawaqux lurañatak arski ukarux phuqhañapawa. ⁸ Ukampis chachapatix yatisin jan phuqhañap munkaspa ukapachasti, janiw warmipax arsutap phuqhañatak wayt’atäkaniti. Tatitux janiw phuqhañapatak wayt’kaniti. ⁹ “Mä ijma warmitix, jan ukax, chachampi jaljtat warmis kuna lurañatak Diosar arsuni ukaxa, taqi kuntix lurañatak arski ukar phuqhañapawa. ¹⁰ “Chachan warmitix kuna lurañatakis arsuni, ¹¹ ukat chachapatix warmipan arsutaparux walikiw sanixa, ukapachasti warmix lurañatak arsutaparux phuqhañapawa. ¹² Ukampis chachapatix warmipan arsutap jan phuqhañap munkanixa, warmix janiw uka arsutap phuqhañapäkiti. Diosasti warmirux pampacharakiniwa. ¹³ “Warmipan Diosar phuqhañatak arsutapatsti, chachapapuniw ‘walikiw’ sañapaxa, jan ukax ‘janiw’ sañapasa. ¹⁴ Chachapatix warmipan arsutap yatini, ukat warmipan arsutaparux walikiw sanixa, ukapachasti warmix lurañatak arsutaparux phuqhañapawa. ¹⁵ Ukampis chachapatix walikiw sasin ukat warmipan uka arsutapar jan phuqhayañ munkani ukasti, jupaw Diosan nayraqatapan juchañchatäni.” ¹⁶ Tatitux taqi uka kamachinak Moisesar churäna, chachax warmipampi, awkix phuchhapampi, kunapachatix phuchhax tawaqüxasin awkipan utapan jakkani ukapachan suman jakapxañapataki.

¹ Tatitux Moisesaruw säna: ² “Israelitanakan sutipxar madianita jaqinakat phuqsusim, uka qhipat jiwxäta” sasa. ³ Ukat Moisesax markar parläna, akham sasa: —Jumanakat mä qawqhanix nuwasiñatak wakichrantasipxam, ukatsti Madián markar katuntapxam, jupanakat Tatitun sutipxar phuqsusiñataki, jiwasar jan yanapt’añ munapxatap layku. ⁴ Sapaqat ayllut waranqa jaqinak uka nuwasïwir khithañapa —sasa. ⁵ Ukat Israelan utjir ayllunakapat waranqa chachanak sapa ayllut khithapxäna, taqpachanisti tunka payan waranqa chachanakaw sarthapipxäna, nuwasiñatak wakichrantatanaka. ⁶ Moisesasti jupanakar nuwasïwiruw khithäna, Finees chachamp chika, Eleazar sacerdoten yuqapa. Finees chachax qullan yänak apäna, nuwasïwi qallantañ yatiyañatakisti trompetanak aparakïna. ⁷ Ukatsti kunjämtix Tatitux Moisesar siskatayna ukhamarjamaw israelitanakax nuwasiñ qallantapxäna, ukatsti taqpacha madianita jaqinakaruw jiwarayapxäna. ⁸ Jiwarayat chachanak taypinsti madianita phisqa reyinakaw ukankäna: Eví, Réquem, Sur, Hur, Reba jupanaka. Beor chachan Balaam sat yuqapas ukankarakïnwa. ⁹ Israelitanakax madianita warminakampiru, jisk’a wawanakapampiruw katuntasin apapxäna, ukatsti uywanakapampi, jila alani yänakapamp jupanakat aparapxäna; ¹⁰ ukhamarusa, taqpach markanakapampi, campamentonakapamp phichhantapxarakïna. ¹¹ Ukatsti taqi kunanaktix aparanipkäna, jaqinaksa, uywanaksa, ¹² ukanak Moisesan ukaruw apapxäna, Eleazar sacerdoten ukampiru, Israel marka nayraqatampiru, jupanakasti ukapachax Moab uraqi pampan jikxatasipxäna, Jordán jawira thiyana, Jericó marka uñkatasina. ¹³ Israelit ejercitor kuttanir uñjasasti, Moisesampi, Eleazar sacerdotempi, markan taqpach jilïrinakapampix, campamentot anqäxaruw katuqir mistuwayapxäna. ¹⁴ Moisesasti ejerciton jilïrinakapatak wal q’apisïna, ¹⁵ ukat jupanakar säna: —¿Kunatarak warminakarusti jan jiwarayapxtasti? ¹⁶ Uka warminakaw Balaaman jan wali amuyt’ayatax, israelitanakar iyawsayasin Tatitut saraqayapxäna, Baal-peor diosar yupaychayasa. Ukat Tatitux mä jan wali usumpi markapar mutuyäna. ¹⁷ Jichhpach taqpach yuqall wawanakar jiwarayapxam, ukhamarak chachamp sarnaqir taqpach warminakaru, ¹⁸ chacha jan uñt’ir tawaqunakarusti jan jiwarayapxamti, jumanakatak qhiparayasipxam. ¹⁹ Jumanakat khitinakatix jaqi masipar jiwayki, jan ukax, jiwat jaqin amayap llamkt’ki ukax, paqallqu uruw campamento anqäxan qhiparapxäta. Jumanakasa, katuntanipkta uka jaqinakasa, Tatit nayraqatan kimsïr urumpina, paqallqür urumpin q’umachasipxäta. ²⁰ Taqpach isinakam t’axsurasipxäta, ukatsti lip’ichit lurat yänaka, cabriton t’arwapat lurat yänaka, lawat lurat yänak q’umachapxarakïta —sasa. ²¹ Ukatsti Eleazar sacerdotex nuwasïwit kuttanirinakar taqpachaniruw sarakïna: —Tatitux Moisesar churkän uka kamachix akham siwa: ²² quri, qullqi, bronce, hierro, estaño, plomo ukanakat lurat yänaka, ²³ ninatak ch’ullqhïki uka yänakxa, ninar apantasin q’umachapxäta, ukatsti q’umachir umampiw jariqxapxäta. Ukampis ninatak jan ch’ullqhïki uka yänaksti, q’umachir umampikiw jariqapxäta. ²⁴ Paqallqür urun isinakam t’axsusipxäta, ukat q’umachat uñjasxapxäta. Uka campamentorux mantxapxarakïta —sasa. ²⁵ Tatitux Moisesar sänwa: ²⁶ —Eleazar sacerdotempi, markan jilïrinakapamp yanapt’ayasisin, madianita jaqinakar aparanit warminakampi, uywanakamp jakthapim, ²⁷ ukatsti payaruw jaljäta, mä chikatxa, nuwasir sarir soldadonakaruw lakintäta, mä chikatsti, markan qhiparir jaqinakaruw lakintarakïta. ²⁸ Soldadonakar wakt’ki ukanakatxa, sapa phisqa patakat maya jilt’ayarapita, warminakatsa, vacanakatsa, asnonakatsa, ukhamarak ovejanakatsa, ²⁹ ukanaksti Eleazar sacerdoteruw churäta, nayar luqtatäkaspas ukhama. ³⁰ Israelitanakar wakt’ki uka chikatatxa, sapa phisqa tunka warminakatsa, vacanakatsa, asnonakatsa, ovejanakatsa, taqpach uywanakatsa maya jilt’ayäta, ukanaksti qullan utaxan yanapasir levitanakaruw churäta —sasa. ³¹ Moisesampi, Eleazar sacerdotempisti Tatitux Moisesar siskatayna ukhamarjamaw lurapxäna. ³² Taqi kunanaktix uñisirinakapat soldadonakax aparanipkatayna ukanak jan jakt’atasax, suxta patak paqallqu tunka phisqan waranqa ovejanaka, ³³ paqallqu tunka payan waranqa urqu vacanaka, ³⁴ suxta tunka mayan waranqa asnonaka, ³⁵ kimsa tunka payan waranqa chacha jan uñt’iri tawaqunakampïnwa. ³⁶ Ukhamasti, soldadonakar wakt’ki uka chikatax, kimsa patak kimsa tunka paqallqun waranqa phisqa patakan ovejanakänwa, ³⁷ ukanakat suxta patak paqallqu tunka phisqan ovejanakaw Tatitur katuyatäxäna; ³⁸ uka kimsa tunka suxtan waranqa vacanakatxa, paqallq tunka payan vacanakaw Tatitutak katuyatäxäna; ³⁹ uka kimsa tunka waranqa phisqa patakan asnonakatxa, suxta tunka mayan asnonakaw Tatitur churatäxäna; ⁴⁰ uka tunka suxtan waranqa tawaqunakatsti, kimsa tunka payan tawaqunakaw Tatitur katuyatäxäna. ⁴¹ Moisesasti Tatitun arsutaparjamaw Tatitur wakt’ki ukanak Eleazar sacerdoter katuyxäna. ⁴² Ukatsti israelitanakar wakt’kän uka chikatasti, kawkïr chikattix Moisesax yaqhachkatayna ukanakax, ⁴³ pachparakïnwa: kimsa patak kimsa tunka paqallqun waranqa ovejanaka, ⁴⁴ kimsa tunka suxtan waranqa urqu vacanaka, ⁴⁵ kimsa tunka waranqa phisqa patakan asnonaka, ⁴⁶ tunka suxtani waranqa tawaqunakampi. ⁴⁷ Aka chikatat Moisesax sapa phisqa tunkat maya, warminakatsa, uywanakatsa apaqäna, ukanaksti Tatitun qullan utapan yanapasir levitanakaruw Tatitun arsutaparjam churxäna. ⁴⁸ Ukatsti nuwasïwir sarapkatayna uka ejerciton jilïrinakapax, Moisesan ukar sarasin ⁴⁹ juparuw sapxäna: —Nuwasïwir sarir israelita soldadonakaruw nanakax jakthapipxta, jupanakax phuqhatpachäskiwa. ⁵⁰ Ukat nanakax jikxatapkta uka taqpach quri yänak Tatitutak apanipxta, chipananaka, surtijanaka, aretenaka, yaqha k’achachasiñanaka, taqi ukanaka Tatitur luqtañataki, jucha luratat nanakar pampachañapataki —sasa. ⁵¹ Moisesampi, Eleazar sacerdotempisti taqpach uka quri yänak jilïrinakat katuqapxäna. ⁵² Soldadonakan jilïripax churapkatayna uka quristi, patak kimsaqallq tunka pusin kilot juk’ampïnwa, ⁵³ sapa soldadow uñisirinakapat aparanit yänakat apanipxäna. ⁵⁴ Ukhamaw Moisesampi, Eleazar sacerdotempix jilïrinakat quri katuqapxäna, ukanaksti Tatitun israelitanakat amtasiñapatakiw Tatitump Jikisiñ Carpar apapxäna.

¹ Rubén, Gad ayllunkir jaqinakan uywanakapax waljapunïnwa. Jupanakasti Jazer uraqimpi, Galaad uraqimpi, uywanak uywañatak wali suma uraqïtap uñjasinxa, ² Moisesampiru, Eleazar sacerdotempiru, markan jilïrinakapampir jikxatiriw sarapxäna, ukat jupanakar sapxäna: ³ —Uñtapxam: Atarot, Dibón, Jazer, Nimrá, Hesbón, Elalé, Sebam, Nebo, Beón uka uraqinakax ⁴ uywanakatak suma ch’uxñanakan uraqinakawa, nanakansti walja uywaw utjapxitu. Tatituw uka uraqinak markapatak katuntawayi. ⁵ Jumanakan amuyatamat walïspa ukkhaxa, nanakar uka uraqinak churapxita, ukatsti Jordán jawir khurkatar jan makhatayapxistati —sasa. ⁶ Moisesasti jupanakarux sänwa: —¿Jumanakasti akanti qhiparañ munapxta, marka masinakaman nuwasïwir sarañapkamasti? ⁷ ¿Kunatarak israelitanakar mayjt’ayañ munapxtasti, Tatitux churapktam uka uraqir jan mantapxañapatakisti? ⁸ Uka kipkarak awkinakamax lurapxäna, jupanakar nayax Cadés-barnea chiqat uka uraqinak uñakipir khitkäyät ukkhaxa. ⁹ Jupanakax Escol sat jisk’a jawirkam purisin uka uraqinak uñatatanipxäna, ukat israelitanakarux mayjt’ayapxäna, Tatitux churkatayna uka uraqir jan mantapxañapataki. ¹⁰ Ukat Tatitun q’apisiñapax ukürun aqtäna, juramentompiw jupax arsurakïna: ¹¹ “Nayar taqi chuyma jan iyawsapxatap layku, juramentompiw arsta Egiptot mistunipki uka jaqinakax janiw maynis pä tunka maranit amstarux mantkaniti, kawkïr uraqtix Abraham, Isaac, Jacob nayra awkinakapar churañatak nayax arsuwaykta uka uraqiruxa. ¹² Caleb sat Jefuné chachan yuqapampi, Josué sat Nun chachan yuqapampikiw mantapxani, nayar iyawsapxatap layku” sasa. ¹³ Tatitun q’apisiñapaw Israel markatak aqtäna, ukat jupanakar wasaran pusi tunka mara uksar aksar sarnaqayäna, jan wali luräwinakapampi jucha lurapkatayna uka jaqinakan taqpach jiwarañapkama. ¹⁴ Jichhasti jumanakax jucha lurir awkinakan wawanakapa, awkinakamjamaw lurañ munapxaraktaxa, Israel markatak wasitat Tatitun q’apisiñap aqtayañataki. ¹⁵ Jumanakatix Tatitur jan arkañ munapkstaxa, jupax walja maranakampiw israelitanakarux wasaran sarnaqayani, ukatsti jumanakaw juchanïpxäta jupanakan t’unjat uñjasiñapataki —sasa. ¹⁶ Ukapachaw jupanakax wasitat Moisesar jak’achasisin sapxäna: —Nanakax aka chiqan uywanakaxatak uywa uyunak lurapxä, wawanakaxatakisti markanak sayt’ayapxarakï. ¹⁷ Ukampis nanakax ejerciton nayraqatap sarantapxä, ukatsti mayni ayllunakamp chikaw nuwasiñatak wakichrantasipxä, jupanakan jakañatak uraqip utjañapkama. Ukchañkamasti wila masinakaxax suma sayt’ayat markanakan qhiparapxani, uka chiqan jakirinakax jupanakar jan kuna jan walsa lurasipkañapataki. ¹⁸ Mayni israelitanakax jakañatak uraqipar utt’asipkani ukapachaw nanakax uraqixar kuttanxapxä. ¹⁹ Nanakax janiw jupanakamp kuna uraqsa Jordán jawirat khurkatankirit jaljasiñ munapkti, nanakan katuqäwixax akankiwa, jawirat inti jalsu tuqina. ²⁰ Ukxaruw Moisesax jupanakar säna: —Jumanakatix ukham lurañ munapxstaxa, wakichrantasipxam, nuwasïwir sarantapxam. ²¹ Jordán jawir khurkatar wakichrantat makhatapxam, ukatsti Tatitun yanapapamp uñisirinakamar jupan jaqunukuñapkam ch’amamp nuwasipxam. ²² Tatitux uka uraqi katuntkani ukapachasti, jumanakax utanakamaruw kuttanxapxäta, ukampix arsüwinakamsa Tatit nayraqatana, Israel marka nayraqatansa phuqhapxätawa. Aka uraqisti, Tatitun arsutaparjamaw jumanakankani. ²³ Ukampis janitix ukham lurapkätaxa, Diosatakiw juchachasipxäta, uka jucha luratat mä uruw mutuñax jumanakatak purinini. ²⁴ Ukhamasti utamankirinakatak markanak sayt’ayapxam, uywanakamatakis uyunak lurapxam, arsutanakamarusti phuqhapxarakim —sasa. ²⁵ Gad, Rubén ayllunkirinakax ukxaruw Moisesar sapxäna: —Nanakax juman luqtirinakamäpxtwa, arsutamarjamaw lurapxä. ²⁶ Nanakan warminakaxampi, jisk’a wawanakaxampi, taqpach uywanakaxampix, aka Galaad markanakan qhiparapxani, ²⁷ nanak luqtirinakamasti, wakichrantasisin Tatitun arsutapar jaysasin nuwasïwirux sarantapxä, jumax sapkista ukhamarjama —sasa. ²⁸ Moisesasti Josué chachampi, Eleazar sacerdotempi, Israelan ayllunakapan jilïrinakapampiw parläna, jupanakarusti akham säna: ²⁹ —Gad, Rubén ayllunakankir taqpach jaqinakapatix jumanakamp chika Jordán jawir wakichrantat makhatapxani, Tatitun arsutapar jaysasa, jumanakan uka uraqi katuntañamkamaxa, ukapachasti jumanakax Galaad uraq jupanakar churapxäta. ³⁰ Ukampis jupanakatix arsutanakaparjam jan phuqhapkanixa, Canaán uraqin jupanakax jumanak taypin jakir sarapxani —sasa. ³¹ Ukxaruw Gad, Rubén ayllunkirinakax sapxäna: —Nanaka, juman luqtirinakamax Tatitun arsutaparjamaw lurapxä. ³² Wakichrantataw Tatitur jaysas Canaán uraqir makhatapxä, ukampis nanakax Jordán jawirat akkatan jakiriw kuttanxapxä. Akäniw nanakan uraqixaxa —sasa. ³³ Ukhamaw Moisesax Gad, Rubén ayllunkirinakaru, Manasesan chikat ayllupar uka uraqit churäna. Sihón sat amorreo reyin uraqinakapa, ukhamarak Og sat Basán reyin uraqipa, jupanakan markanakapampi, markanak muyuntir pampanakapampi. ³⁴ Ukatsti Gad ayllunkir jaqinakax, Dibón, Atarot, Aroer sat markanak wasitat sayt’ayapxäna, ³⁵ ukhamarak Atarot-sofán, Jazer, Jogbehá, ³⁶ Bet-nimrá, Bet-arán uka markanakampi, uka markanakar sum uyuchrantapxäna, uywanakapatakis uywa uyunak lurapxarakïna. ³⁷ Rubén ayllunkir jaqinakax, Hesbón, Elalé, Quiriataim sat markanak wasitat sayt’ayapxäna, ³⁸ ukhamarak Nebo, Baal-meón, Sibmá markanakampi, yaqhip markanakan sutinakapsa yaqha sutimpiw uchapxäna, jupanakan sayt’ayat markanakarusti machaq sutinak uchapxäna. ³⁹ Manasés chachan Maquir sat yuqapan saraqirinakapax, Galaad uraqir mantantasin uka uraqi katuntasipxäna, uka uraqin jakir amorreo jaqinakarusti jaqunukupxänwa. ⁴⁰ Ukat Moisesax Maquir chachan saraqirinakaparux Galaad uraqinak churäna, jupanakasti ukan utjantasipxäna. ⁴¹ Manasés chachan Jaír sat yaqha yuqapax amorreo jaqinakan mä qawqha campamentonakap katuntasïna, ukarusti Havot-jaír sutimpiw uchäna. ⁴² Nóbah chachan tamapankir jaqinakax Quenat uraqi katuntasipxäna, uka thiyanakan utjir markanakamppacha, uka uraqirusti Nóbah sutipampiw uchapxäna.

¹ Israelitanakax Egipto uraqit mistunipkän ukapachax, mä ejercitor uñtataw tam tama siqicht’at sarantapxäna, Moisesampi Aaronampi irpata. ² Moisesax Tatitun arsutaparjamaw qillqäna, kawkha chiqattix sartawayapkäna, kawkha chiqarutix purintapkän ukawjanakan sutinakapa. Israelitanakan thakhi sarapxatapax akhamänwa: ³ Israelitanakax nayrïr phaxsina, tunka phisqan uru saraqataruw Ramsés uraqit mistunipxäna, Pascua uruyäwit qhipüru. Jupanakax wali ch’amaniw mistunipxäna, taqpach egipcio jaqinakan uñjkata. ⁴ Uka pachpa uruw, egipcionakax tayna yuqall wawanakapan amayap p’amp’asipkäna, Tatituw jupanakarux jakañap apaqatayna, Egipto uraqin diosanakapar mutuyañataki. ⁵ Israelitanakax Egiptonkir Ramsés markat sartawayasax Sucot chiqan utjnuqtapxäna. ⁶ Sucot chiqat mistuwayasax Etam chiqaruw purintapxäna, wasar qurpa thiyana. ⁷ Etam chiqat sartawayapxäna, Pi-hahirot tuqi muytapxäna, Baal-sefón inti jalsu tuqina, ukatsti Migdol uñkatasin utjnuqtapxäna. ⁸ Pi-hahirot chiqat sartawayasasti, jach’a quta makhatasin wasararuw puripxäna. Etam wasaranjam kimsa uru sarasasti, Mará chiqan utjnuqtapxäna. ⁹ Mará chiqat sartawayasax Elim chiqaruw puripxäna, kawkhantix tunka payan uma jalsunakampi, paqallqu tunka palmera quqanakamp utjkatayna ukkharu, ukatsti ukawjan utjnuqtapxäna. ¹⁰ Elim chiqat sartawayasasti Mar Rojo quta thiyaruw utjnuqtapxäna. ¹¹ Mar Rojo quta thiyat sartawayasax Sin sat wasararuw utjnuqtapxäna. ¹² Sin wasarat sartawayasasti Dofcá sat chiqaruw utjnuqtapxäna. ¹³ Dofcá chiqat sartawayasasti Alús sat chiqan utjnuqtapxäna. ¹⁴ Alús chiqat sartawayasasti Refidim sat chiqan utjnuqtapxäna, markan uma umt’añapatak jan utjkän ukkharu. ¹⁵ Refidim chiqat sartawayasasti Sinaí wasaran utjnuqtapxäna. ¹⁶ Sinaí wasarat sartawayasasti Quibrot-hataavá sat chiqan utjnuqtapxäna. ¹⁷ Quibrot-hataavá chiqat sartawayasasti Haserot sat chiqan utjnuqtapxäna. ¹⁸ Haserot chiqat sartawayasasti Ritmá sat chiqan utjnuqtapxäna. ¹⁹ Ritmá chiqat sartawayasasti Rimón-peres sat chiqan utjnuqtapxäna. ²⁰ Rimón-peres chiqat sartawayasasti Libná sat chiqan utjnuqtapxäna. ²¹ Libná chiqat sartawayasasti Risá sat chiqan utjnuqtapxäna. ²² Risá chiqat sartawayasasti Quehelata sat chiqan utjnuqtapxäna. ²³ Quehelata chiqat sartawayasasti Séfer sat qullun utjnuqtapxäna. ²⁴ Séfer qullut sartawayasasti Haradá sat chiqan utjnuqtapxäna. ²⁵ Haradá chiqat sartawayasasti Maquelot sat chiqan utjnuqtapxäna. ²⁶ Maquelot chiqat sartawayasasti Táhat sat chiqan utjnuqtapxäna. ²⁷ Táhat chiqat sartawayasasti Térah sat chiqan utjnuqtapxäna. ²⁸ Térah chiqat sartawayasasti Mitcá sat chiqan utjnuqtapxäna. ²⁹ Mitcá chiqat sartawayasasti Hasmoná sat chiqan utjnuqtapxäna. ³⁰ Hasmoná chiqat sartawayasasti Moserot sat chiqan utjnuqtapxäna. ³¹ Moserot chiqat sartawayasasti Bené-jaacán sat chiqawjan utjnuqtapxäna. ³² Bené-jaacán chiqat sartawayasasti Hor de Guidgad sat chiqawjan utjnuqtapxäna. ³³ Hor de Guidgad chiqat sartawayasasti Jotbata sat chiqawjan utjnuqtapxäna. ³⁴ Jotbata chiqawjat sartawayasasti Abroná sat chiqan utjnuqtapxäna. ³⁵ Abroná chiqawjat sartawayasasti Esión-guéber sat chiqawjan utjnuqtapxäna. ³⁶ Esión-guéber chiqawjat sartawayasasti Cadés chiqan utjnuqtapxäna, Sin sat wasarana. ³⁷ Cadés chiqawjat sartawayasasti Hor sat qullun utjnuqtapxäna, Edom uraqi qurpana. ³⁸ Tatitun arsutaparjamaw Aarón sacerdotex Hor sat qullur makhatäna, jupasti ukan jiwxäna, phisqïr phaxsina, nayrïr uru saraqataru, pusi tunka mara israelitanakax Egiptot mistunipkatayna uka urut jakt’asina. ³⁹ Aarón sacerdotex Hor sat qullun jiwxäna, jupasti ukapachax patak pä tunka kimsan maranïnwa. ⁴⁰ Arad chiqankir cananeo reyix, Négueb chiqan utjasïna Canaán uraqina, jupax israelitanakan purinitap yatïna. ⁴¹ Hor sat qullut sartawayasasti Salmoná chiqawjan utjnuqtapxäna. ⁴² Salmoná chiqawjat sartawayasasti Punón sat chiqan utjnuqtapxäna. ⁴³ Punón chiqawjat sartawayasasti Obot sat chiqawjan utjnuqtapxäna. ⁴⁴ Obot chiqat sartawayasasti Iié-abarim sat chiqawjan utjnuqtapxäna, Moab uraqi qurpana. ⁴⁵ Iié-abarim chiqat sartawayasasti Dibón-Gad sat chiqan utjnuqtapxäna. ⁴⁶ Dibón-Gad chiqat sartawayasasti Almón-diblataim sat chiqan utjnuqtapxäna. ⁴⁷ Almón-diblataim sat chiqat sartawayasasti Abarim sat qullu patanakan utjnuqtapxäna, Nebo qullut inti jalsu tuqina. ⁴⁸ Abarim qullunakat sartawayasasti Moab pampanakan utjnuqtapxäna, Jordán jawir thiyana, Jericó marka uñkatasina. ⁴⁹ Jupanakax Jordán jawira irananakan utjnuqtasipxäna, Bet-jesimot chiqawjata, Abel-sitim sat chiqakama, Moab uraqi pampanakana. ⁵⁰ Moab uraqi pampanakana, Jordán jawira thiyana, Jericó marka uñkatasina, Tatitux Moisesar parläna, akham sasa: ⁵¹ “Israelitanakar akham sarakim: Jumanakax Jordán jawir makhatapkäta, ukatsti Canaán uraqir mantapkät ukkhaxa, ⁵² uka uraqin jakir jaqinakaruw alisnukupxäta, qalampita, metalampit lurat diosanakapar taqpach t’unjapxäta, ukatsti diosanakapar qullu patanakan yupaychapki ukawjanak t’unjapxarakïta. ⁵³ Uka uraqi katuntapxam, ukan utjantasipxam, nayaw jumanakar uka uraq katusxapxañamatak churapxsma. ⁵⁴ Ukampis suerte jaqtasaw uraqi jaljapxäta, taqpach ayllunakan utjir wila masi tamanakaru; walja jaqini wila masi tamarux jach’a uraqinak churapxäta, juk’a jaqini wila masi tamanakarusti jisk’a uraqinak churapxarakïta; suertet wakt’ki ukhamarjamaw sapa wila masi tamanakax katuqani. ⁵⁵ Jumanakatix uka uraqin jakir jaqinakar jan alisnukupkätaxa, uka uraqin qhiparirinakax jisk’a t’una lawar uñtata, jan ukax, janchinakamar jan walt’ayir ch’aphir uñtataw jan walt’ayapkätamti; ⁵⁶ ukapachaw nayax jumanakar kuntix uka jaqinakar lurañ amtkäyät ukanak lurä” sasa.

¹ Tatitux Moisesaruw säna: ² “Israelitanakar parlam jupanakarusti sarakim: Jumanakax Canaán uraqir mantañampïpxtawa. Aka uraqinakaw jumanakankani, qurpanakapasti akanakäniwa: ³ “Aynach tuqirux Sin wasarampi, Edom uraqimpi qurpäniwa. Inti jalsu tuqit sartasinsti, Mar Muerto quta aynachat qurpax qalltani, ⁴ ukatsti aynach tuqirux Acrabim sat amsta chiqakamaw sarani, Sin chiqanjam sarakipani, ukatsti Cadés-barnea chiqakamaw purini. Ukatsti Hasar-adar chiqatxa, Asmón chiqakamaw sarani, ⁵ Asmón chiqatsti Egiptompi qurpaski uka jisk’a jawirkamaw sararakini, ukatsti Mediterráneo jach’a qutaruw tukuyani. ⁶ “Inti jalanta tuqirusti, Mediterráneo jach’a qutampi qurpäniwa. ⁷ “Amsta tuqi qurpax, Mediterráneo jach’a qutat Hor sat qullukamaw sarani, ⁸ Hor qullutsti Hamat uraqin mantañapkama, ukawjatsti Sedad chiqakama. ⁹ Sedad chiqatsti, Zifrón sat chiqakamaw sarani, ukatsti Hasar-enán chiqaruw tukuyani, ukäniw amsta tuqinkir qurpaxa. ¹⁰ “Inti jalsu tuqitakix, qurpax Hasar-enán chiqat qalltasina Sefam chiqakamaw sarani, ¹¹ ukawjat Riblá sat chiqakamaw sarani, ukasti Ain sat inti jalsu tuqinkiwa; uka chiqatsti qurpax Quinéret qutat inti jalsu tuqinjam sarani, ¹² ukatsti Jordán jawiranjam sararakini, Mar Muerto qutakama. “Jumanakan uraqiman qurpanakapax ukanakäniwa.” ¹³ Moisesax israelitanakar sarakïnwa: —Aka uraqinak jumanakax suertetkam lakintasipxäta; Tatituw uka uraqinak churasiñapatak arsüna, llätunk chikatani qhiparir ayllunakaru. ¹⁴ Rubén ayllunkirinakampi, Gad ayllunkirinakampi, Manasesan ayllupankir chikat jaqinakampix, wakt’ki uka uraqip katuqasxapxiwa, Jordán jawirat inti jalsu tuqiru, Jericó marka uñkatasina —sasa. ¹⁶ Tatitusti Moisesar sarakïnwa: ¹⁷ “Jumanak taypin uraqinak lakintapkani ukanakax, Eleazar sacerdotempi, Nun chachan Josué yuqapampiwa. ¹⁸ Uraq lakintañatakisti, sapa ayllutkam mä jilïriparuw jumanakar yanapt’ir jawsapxäta. ¹⁹ Jawsapxañamäki uka chachanakan sutinakapax akanakawa: “Judá ayllutxa: Caleb sat Jefuné chachan yuqapa. ²⁰ “Simeón ayllutxa: Samuel, Amihud chachan yuqapa. ²¹ “Benjamín ayllutxa: Elidad sat Quislón chachan yuqapa. ²² “Dan ayllutxa: Buquí jilïri, Joglí chachan yuqapa. ²³ “Manasesan ayllunakapatxa: Haniel, Efod chachan yuqapa. ²⁴ Efraín ayllutxa: Quemuel sat Siftán chachan yuqapa. ²⁵ “Zabulón ayllutxa: Elisafán sat Parnac chachan yuqapa. ²⁶ “Isacar ayllutxa: Palatiel sat Azán chachan yuqapa. ²⁷ “Aser ayllutxa: Ahihud sat Selomí chachan yuqapa. ²⁸ “Neftalí ayllutxa: Pedahel sat Amiud chachan yuqapa.” ²⁹ Tatitux uka chachanakaruw Canaán uraqi israelitanakar lakintapxañapatak jaytäna.

¹ Israel markax Moab uraqi pampanakan jikxataskäna, Jordán jawira jak’ana, Jericó marka uñkatasina, ukapachaw Tatitux Moisesar parläna, akham sasa: ² “Israelitanakar parlam, jupanakar wakt’ki uka uraqinakatxa, levitanakan jakasipxañapatak markanak churapxpan, uka markanakar muyuntir uraqinak taypin, uywanak awatisiñ uraqinak churapxarakpan. ³ Uka markanakan levitanakax jakapxani, pampanakansti uywanakapampi, yaqha animalanakamp uywapxani. ⁴ Levitanakar churapkäta uka uywa awatisiñ uraqinakatxa, pusi patak phisqa tunkan metrow utjañapa pirqat anqäx tuqiru. ⁵ Taqpach uraqix pusi thiyanïniwa, llätunka patak metro sapa thiyaru, inti jalsu tuqitsa, inti jalanta tuqitsa, amsta tuqitsa, aynacha tuqitsa tupupax pachpäniwa. Markasti chika taypinkaniwa, uywa awatiñ uraqinakamp muyuntata. ⁶ “Levitanakar churapkäta uka markanakatxa, suxta markax imantasiñ markäniwa, jaqi jiwayir jaqix uka markan imantasini. Uka suxta markanakxarusti yaqha pusi tunka payan markanakamp churapxäta; ⁷ taqpacharusti, pusi tunka kimsaqallqun markanak levitanakar churapxäta, ukhamarak uywa awatiñ uraqinakapamppacha. ⁸ Israelitanakan uraqipat levitanakatak markanak churapkäta ukkhaxa, sapaqat ayllunakaw churani qawqhatix wakt’katayna ukhamarjama: Jilpach uraqinakan ayllunakaxa, jilpach markanak churani; juk’a uraqinakan ayllunakasti, juk’a markanakak churarakini.” ⁹ Tatitux Moisesar sänwa: ¹⁰ “Israelitanakar parlam, jupanakarusti akham sarakim: Jumanakax Canaán uraqir mantañataki, Jordán jawir makhatapkäta ukkhax, ¹¹ imantasiñ markanak ajllisipxäta, jan jiwayañ amtampi jaqi masipar jiwayirix ukar imantasir jaltxañapataki. ¹² Ukhamat qhispiyat uñjasini, jiwayat jaqin wila masinakapan jan jupar phuqsusiñ amtampi jiwayaskañapataki; uka jaqisti taripatäñatak marka nayraqatan uñstañapkamax janiw jiwkaniti. ¹³ Markanakat churapkäta ukanakatxa, suxta markax imantasiñatakïniwa: ¹⁴ Jordán jawirat inti jalsu tuqirux kimsa markanak yaqhachapxäta, Canaán uraqinsti kimsa marka yaqhachapxarakïta. ¹⁵ Uka suxta markasti imantasiñ markanakäniwa, israelitanakatakisa, yaqha markat jutasin jumanak taypin jakir jaqitakisa. Uka markanakan imantasini, khiti jaqitix jan jiwayañ amtampi jaqi masipar jiwaykani ukaxa. ¹⁶ “Maynitix masipar hierromp jawq’antasin usuchjani, ukatsti usuchjat jaqitix jiwanixa, jawq’antir jaqix, jaqi jiwayiriwa, uka jaqisti jiwañapatak juchañchataw uñjasini. ¹⁷ “Maynitix masipar qalampi jaqt’asin jiwayanixa, qalamp jaqt’irix, jaqi jiwayiriwa, uka jaqisti jiwañapatak juchañchataw uñjasini. ¹⁸ “Maynitix masipar mä lawampi jawq’antasin jiwayanixa, jawq’antirix jaqi jiwayiriwa, uka jaqisti jiwañapatak juchañchataw uñjasini. ¹⁹ Jiwayat jaqin jak’a wila masipaw jaqi jiwayirir jikxatasin jiwayani. ²⁰ “Maynitix masipar uñisiñat nukt’ani, jan ukax, jan wali amuyumpi kunampisa jaqt’arakini, ²¹ jan ukax, uñisiñat nuwjasin jiwayani ukasti, juchanix jiwañapatak juchañchataw uñjasini, jupan jaqi jiwayirïtap layku. Jiwatan jak’a wila masipaw uka jiwayirirux jikxatasin jiwayarakini. ²² “Ukampis maynitix jan munkasin masipar nukt’ani, janirak uñisiñatsa; jan ukax, jan kuna jan wali amuyumpi kunampis jaqt’ani, ²³ jan ukax, jan sum uñtasin qalamp jaqt’ani, ukat qalampi jaqtat jaqix jiwaspa, jan jupanakpura uñisirïkasina, janirak jupax masipar kuna ñanqha amtañampi lurkaspa, ²⁴ ukapachasti markaw taripirit sayt’ani, ukatsti aka kamachinakarjamaw jiwayki uka jaqimpiru, jiwayat jaqin wila masipampiru phuqsusiñ munatapat uñjani. ²⁵ Jan munkasin jaqi masipar jiwayir jaqirux markaw arxatañapa, phuqsusiñ munir wila masipata, ukatsti juchañchatarux imantasiñatak jaltkatayna uka markaruw kuttayxañapa. Jiwayir jaqix ukan qhiparañapa, sacerdotenakan jilïripa jakañapkama. ²⁶ Ukampis juchañchat jaqitix imantasiñ markan qurpapat mistuwayanixa, ²⁷ jiwayat jaqin wila masipax jiwayaskaniwa, marka anqäxantix jiwayir jaqir jikxatkani ukkhaxa, janiw jupax jiwayatapat juchañchat uñjaskaniti. ²⁸ Jiwayki uka jaqix imantasiñ markan qhiparañapa. Sacerdotenakan jilïripan jiwatap qhipatsti, jupax utapar kuttaskaniwa, janiw khitis jupar kamachkanisa. ²⁹ “Aka arunakasti jumanakatakix mä kamachïniwa, ukanakasti wawanakaman wawanakapatakïniwa, kawki chiqantix jakapkäta ukana. ³⁰ “Mä jaqi jiwayir jaqix walja uñjirinak qhanañchañatak utjchi ukapachakiw jiwañapatak juchañchat uñjasini. Mayni sapakix janiw askïkiti khitir jiwañapatak juchañchañatakisa. ³¹ “Jaqi jiwayatapat jiwañapatak juchañchat jaqix, janiw qullqi churas qhispit uñjaskaniti; uka jaqix jiwañapapuniwa. ³² “Jaltxasin imantasiñ markan jakir jaqix, janiw qullqimpi uka markat mistkaniti, utaparus kuttkaniti. Sacerdotenakan jilïrip jiwañapkamaw suyañapa. ³³ “Jakapkäta uka uraqirux jan jaqi jiwayañanakamp q’añuchapxamti, jaqi jiwayañax uraqi q’añuchi, janiw kunampi kuttsuyasiñas mä jaqi jiwayatat utjkiti, jan ukasti jiwayirix jiwañapapuniwa. ³⁴ “Jakapkät uka uraqir janiw ñanqhachapxätati, nayax uka uraqin jakarakï, naya, Tatitux israelitanak taypin jakasta.”

¹ Mä urusti, Manasés chachan ayllupankiri, Galaad chachan wila masi tamapan jilïrinakapax, Moisesamp parliriw sarapxäna. Jupanakasti Israelan ayllunakapan jilïrinakap nayraqatan jupar sapxäna: ² —Tatitux suertet wakt’kani uka uraqinak israelitanak taypin lakintañamatakiw jumar sistam, ukatsti saraktamwa Selofhad wila masixar wakt’añapäki uka uraqi phuchhanakapar churxañamataki. ³ Jichhasti jupanakatix israelitanakan yaqha ayllunkir chachanakampi jaqichasipxanixa, jupanakar wakt’ki uka uraqinakax, janiw nanakan ayllunakaxankxaniti, jan ukasti jaqichasipki uka chachanakan ayllupankirïxaniwa. Ukhamat suertet wakt’apkitän uka uraqinakax jisk’ar tukxani. ⁴ Israelan qhispiyasiñ mara uruyäwix purinkan ukkhasti, uka uraqinakapax wiñayatakiw uka yaqha ayllutakïxani, nanakan aylluxasti wakt’ki uka uraqit jisk’a uraqinikïxaniwa —sasa. ⁵ Moisesasti Tatitun arsutaparjamaw israelitanakar säna: —José chachan ayllupankir chachanakax walik arsusipki. ⁶ Tatitux Selofhad chachan phuchhanakapan khiti chachanakamp jaqichañapsa munaskaniwa, ukampis uka chachanakax awkipan ayllupankirïñapawa. ⁷ Israelan sapa maynir wakt’ki uka uraqinakax, janiw mä ayllut yaqha ayllur sarakipkaniti; taqi israelit jaqiw uraqipa pachpa ayllupan katxäsiñapa. ⁸ Mä ayllunkir imill wawatix uraqinak katuqanixa, jupax pachpa ayllupat wila masi tamankir chachampiw jaqichasini. Ukhamat sapa israelita jaqix awkinakapat katuqat tuti katxäsini. ⁹ Janiw katuqat uraqix, mä ayllut yaqha ayllurux sarakipkaniti. Israelan sapaqat ayllunakapaw wakt’ki uka uraqinak katxäsiñapa. ¹⁰ Ukat Mahlá, Tirsá, Hoglá, Milcá, Noá sat Selofhad chachan phuchhanakapax, kunjämtix Tatitux Moisesar siskatayna ukhamarjam lurapxäna, jupanakasti awkipan jilanakapan yuqanakapampiw jaqichasipxäna, ¹² uka chachanakasti Manasés ayllunkirinakänwa. Ukhamat uka imill wawanakan katuqat uraqinakapax, awkipan ayllupankir uraqipakïskäna. ¹³ Aka arsutanakampi, kamachinakamp Tatitux Moisés tuqi israelitanakar churäna, kunapachatix jupanakax Moab pampanakana, Jordán jawir jak’ana, Jericó marka uñkatasin jikxatasipkän ukapacha.