NAHÚM

NAHÚM

¹ Aka yatiyäwisti Nínive markatakiwa, Elcós sat uraqinkir Nahúm profetan unañchäwi uñjatap qillqata. ² Tatitux taqinin jupar chiqa arkañas muni; khitinakatix jupar saykatapki, uñisipkaraki ukanakarux mutuyiwa. ³ Dios Tatitux wali llamp’u chuymaniwa, ukampis wali ch’amanirakiwa, juchanirus juchapxa uñt’asiyapuniniwa. Tatitux jach’a axsarkañ thayanak patan sarnaqi, qinayanakasti kayunakapan laq’a sartayatapawa. ⁴ Jach’a qutarusti tuqintasin wañt’ayi; taqi jawiranaksa wañt’ayarakiwa. Basán tuqinkir pampa uraqinakapasa, Carmelo qullun ch’uxñanakapas wañsuwayxiwa, Libanonkir panqaranakas pharsuwayxarakiwa. ⁵ Jupa nayraqatanxa qullunakas khathatiwa; nayräxapansti jisk’a qullunakas chullutatawayxakiwa. Taqi aka uraqpachan jakirinakasa jupar uñjasax wal khathatipxi. ⁶ ¿Khitirak q’apisitap nayraqatan sayt’aspasti? ¿Khitirak phiñasitapar qallkataspasti? Q’apisiñapax ninjamaw aqatati, jupa nayraqatansti qarqanakas payaruw ch’iyjtawayi. ⁷ Tatitux wali suma Diosawa, llakisiñanakan arxatasiriwa; jupar alkatirinakarux arxatarakiwa. ⁸ Ukampis Tatitux jupar saykatirinakarux walja umjamaw q’al tukjas aparaki; uñisirinakaparusti ch’amak manqhakamaw arktaraki. ⁹ ¿Kunsa jumanakax Tatitu Dios tuqix amtasipkta? ¡Jupax q’al tukjapxätam! ¡Janiw khitis pä kuti jupar saykatkaspati! ¹⁰ K’ithuntat ch’aphinakjama, waña jichhur uñtataw nakhantatäpxäta. ¹¹ Nínive marka, jumanak taypit Tatit tuqi jan walinak amtir jaqix mistu; ñanqha amuyt’ayir jaqixa. ¹² Ukat Tatitux markapar sixa: “Asiriankir jaqinakax waljanïpkchisa, ch’amanïpkarakchisa, jan mayampitak tukjatäpxaniwa. Judá marka, nayaw jumarux t’aqhisiysma, jichhax janiw juk’ampi t’aqhisiykxämati. ¹³ Nayaw jumar t’aqhisiyir yuku akch’a akch’a tukjä, chinuñanakamsa t’aqanuqarakïwa” sasa. ¹⁴ Nínive markankir rey, Tatitux jumat akham siwa: “Janiw jichhax wawanakamax utjkxaniti sutimat amtasiñatakixa; diosaman utapat yaqha diosanaksa, idolonaksa q’al t’unjäxa, jan wali lurir jaqïtamatsti, uka pachparurakiw jumarux imantäma”. ¹⁵ ¡Judá markankir jaqinaka, uñtapxam! Suman sarnaqasiñ yatiyäwinak apanirix niyaw qullunjam jutaski. Phunchhäwi urunak lurapxam; arsutanakamsti phuqhapxarakim. Qhuru jaqinakasti janiw juk’ampi jumar nuwirix jutkxapxaniti; q’ala t’unjatäxapxiwa.

¹ Nínive marka, jumar t’unjirix jutantaskiwa. ¡Soldadonakam tantachthapim! ¡Thakhi sum uñch’ukirakim! ¡Espadam apxarusim! ¡Walpun ch’amañcht’asim! ² Tatitux Jacobun jach’añchäwinakapa, Israelan jach’añchäwinakap wasitat kuttayxani, kunjamäkäntix yänakap janïra aparatäkäna, q’ara uva lawanakjam janïra jaytatäkän ukhama. ³ Nuwasirinakapan jark’aqasiñanakapax wila samikamakiwa, soldadonakapan isinakapas wila samirakiwa. ¡Nuwantañatakisti jank’akïpxiwa! Nuwasir sarañ carronakapasti ninar uñtatawa; caballonakapas wal takisipxaraki. ⁴ Carronakapax wali phiñasitäpkaspas ukhamaw marka thakhinakanjam jalnaqapxi, plazanakansa maysat maysa jalapxi, nina wiyanakar uñtata, lliju llijunakjamarakiw chhaqtawayapxi. ⁵ Reyisti jilïri soldadonakaparuw jawsi, jupanakasti phuqhañatakix jalakamakiw ukkhar puripxi, nuwantañatakiw jach’a pirqanak wakichasipxi, ukampis pirqa patar mistkasin liwiqtanipxi. ⁶ ¡Asiria marka, uñisirinakamaw markaman punkunakap t’unantanipxi! Markax soldadonakan phuqhantatawa, reyin utapansa taqiniw axsarañat khathatipxi. ⁷ Reyin warmiparusti jayaruw katuntat apapxi; jupar luqtirinakas jupa chika apataw uñjasipxi, urpilar uñtataw walpun ayqupxi, chuymanakap jacht’asisaw liq’isipxaraki. ⁸ Nínive markan utjirinakax taqiniw jaltxapxi, kunjämatix uma chakt’atax phallasin taqi tuqir jalixa ukhama. “¡Suyt’apxam! ¡Kuttanipxam!” sasaw art’apxaraki, ukampis janiw maynis kuttankiti. ⁹ ¡Qullqsa, qursa, q’al lunthatsupxam! ¡Asiria markan qamir kankañapasti jan tukuskiriwa! ¹⁰ T’unjata, ch’usa wasarar tukuyata, jachkañ lurjataw Nínive markax uñjasi. Chuymanakapas axsarañat tukusiwayxiwa, kayunakapas wal khathatiraki, taqinis ch’ama thayjtatkamakiwa, ajanunakapasti q’illuw tukuwayxi. ¹¹ Asiria markax mä qhuru leonar uñtatänwa: Uñisirinakaparux jan kunak jiwarayasin q’al tukjäna, yänakap katuntasisinsti jaqinakaparuw lakirpayarakïna. Janiw khitis uraqipar mantañatak ch’amanïkänti. Jichhasti, ¿kawkinkarak uka jach’a ch’amapasti? ¿Kawkinkarak uka qhuru soldadonakapasti? ¹³ Taqi ch’amani Dios Tatitux siwa: “Akanktwa jumar saykatañataki; nuwasiñar sarir carronakamsa nakhantayäwa, jaqinakamarus q’al jiwarayä; lunthatasiñanakamsa q’al tukjarakï; yatiyirinakaman arunakapax janiw juk’ampi ist’askxaniti. Nayätwa Israel markan Diosapaxa, arsutaxsa phuqhapunïwa” sasa.

¹ ¡Jaqi jiwayir Nínive marka, kunakïkan jumatxa, k’arisiñampi, nuwasiñampi phuqhantatätawa; jan tukuskir lunthatasiñampi phuqhantata! ² ¡Chicoten jawq’asitapa, ruedanakan chhulluqitapa! ¡Caballonakan jalnaqatapa, carronakan jalatapa! ³ ¡Caballerian sartatapa! ¡Espadanakan llijtatapa, lanzanakan llijutapa! ¡Usuchjatanakax waranqanaka, jaqi jiwaratanakas jan jakt’kayaraki! ¡Uka jiwatanakar lanktasaw jaqinakax liwisipxi! ⁴ Asiria marka, taqi ukanakasti yaqha markanakar sallqjatamat lurasiski, uka markanakasti juman diosanakamaru, layqasiñanakamaruw munapayapxäna, ukat jan walinak lurañatak jumampix sumar mantapxäna. ⁵ Taqi ch’aman Tatitux siwa: “Akanktwa jumar saykatañataki; isimxa ajanumkamaw lluch’täma, ukhamat markanakan jumar q’alal uñjañapataki, marka apnaqäwinakasa p’inqam uñjapxañapataki. ⁶ Jumarusti q’añunakampiw warxatäma; taqi jaqinsa uñtkañaw p’inqachjat uñjasïta. ⁷ Jumar uñjirinakasti jumat jaltxapxaniwa, akham sasa: ‘¡Nínive markax t’unjatawa! ¿Khitirak khuyapt’ayasispasti? ¿Kawkinarak utjaspa jupar chuymachiristi?’ ⁸ ¿Jumasti Tebas markat sipan juk’ampi sumätati?, kawkïri markatix Nilo jawir jak’ankki walja umanakamp muyuntata, jawiran muyuntayata umanakampi pirqaniraki. ⁹ Etiopía, Egipto markanakax jupan jan tukuskir ch’amapänwa; Fut, Libia markanakasti jupan yanapirinakapänwa. ¹⁰ Ukampis Tebas markankirinakax yaqha markar apayatänwa; wawanakapas marka thakhinakan uraqirkam jisktas jiwarayatänwa; jach’a aytat jilïrinakaparusti suertet jaqtasarakiw yaqha markanakar ñach’antat apayapxäna. ¹¹ Jumasti Asiria marka, machat jaqjamaw uksar aksar liwinaqtarakïta; uñisirinakamat imantasiñ munäta, ukampis janiw imantasiñ jikxatkätati. ¹² Markaman pirqanakapasti; kunjämatix puqt’at higo achux, khitin unxtayatas uraqirkam willirtixa, ukatsti jaqiw manq’antaraki, ukhamaw uka pirqanakax liwirtani. ¹³ Ninaw jach’a punkunakam nakhanti, uñisirinakamasti mantañampïskiwa; ukham uñjasin soldadonakamax llaythasipxi. ¹⁴ Uñisirinakamar saykatañatak walja uma imasiskäta ukasa; janiw kunatakis askïkaniti. Pirqanakam jach’aptayañatak walja ñiq’i tikanak luraskäta ukasa, ¹⁵ ninamp nakhantataw jiwäta, nuwasiñan tukjataw uñjasïta; uñisirinakamax t’iju t’ijunakjamaw jumar tukjätam. Jach’a ch’aman walja soldadonakamas inamayäskaniwa. ¹⁶ Alakip lurir jaqinakamaxa, warawaranakat sipansa juk’amp waljaniwa. ¹⁷ Marka apnaqirinakamax, t’iju t’ijunakar uñtatäpxiwa; soldadonak apnaqirinakax laq’u tamanakar uñtatawa: thayäki ukkhax pirqa patanakaruw junt’urt’asiñatak puripxi, inti lupt’anipansti sarawayxapxiwa, janiw kawkir saratapas yatiskiti. ¹⁸ “¡Asiria markankir rey, awatirinakamax ikiraskiwa! Jilïrinakamas samarasipkiwa, jaqinakamasti qullunakan ananukutaw sarnaqasipki, janirakiw khitis jupanakar anthapirix utjkiti. ¹⁹ ¡Usuchjasitamatakisti janiw qullax utjkiti, chhuxrimasti jan qullkayawa! Aynacht’atam ist’irinakax kusisiñat amparanakap t’axllisipxi, jumax walja markanakaruw ñanqhanak lurtaxa.”