MALAQUÍAS

MALAQUÍAS

¹ Tatitux Malaquías profeta tuqiw Israel markar aka arunak yatiyäna: ² Tatitux siwa: “Nayax jumanakar munasipxsmawa” sasa. Jumanakasti sapxtawa: “¿Kunjämatsa yatipxirista juman nanakar munatamxa?” sasa. ¿Janit Esaú chachasti Jacob chachan jilapäkänsti? Ukampisa, nayax Jacoburuw munasïyäta, ³ Esaú chacharusti uñisiyätwa, qullunakap ch’usa wasar tukuyäyäta, uraqinakapsti wasarankir qamaqinakaruw utjasiñapatak katuyäyäta” sasa. ⁴ Esaú chachan saraqirinakapäki uka Edomitanakatix sapxaspa: “Markasax t’unjatawa, ukampis wasitat sayt’ayañäni” sasaxa, taqi ch’aman Tatitux akham sarakispawa: “Jupanakax markanakap wasitat sayt’ayasipkan ukasa, nayax wasitat t’unjarakï. Markapax ‘Juchan phuqt’at marka’ satäniwa; uraqinakapasti ‘Tatitun wiñay q’apisiñ uraqi’ sasa sutichatarakïniwa.” ⁵ Jumanakax pachpa nayranakamampiw uñjapxarakïta, ukatsti sapxarakïtawa: “¡Tatitux jach’a ch’amaniwa, Israelan qurpapat jayansa jilarkir ch’amaniwa!” sasa. ⁶ Taqi ch’aman Tatitux sacerdotenakar akham siwa: “Wawanakax awkinakapar waqaychapxiwa, uywatanakas uywirinakaparux yäqapxarakiwa. Nayatix jumanakan awkimästa ukasti ¿kunatarak nayar jan waqaychapxistasti? Nayatix jumanakan uywirimästa ukasti, ¿kunatarak nayar jan yäqapxistasti? Jumanakax nayar jisk’achapxistawa, yatkasas sasipkakistawa: ‘¿Kun lurasarak nanakasti jumar jisk’achapxsmasti?’ sasa. ⁷ Jumanakax altaraxar q’añu t’ant’anak apanipxtaxa, ukampis jiskhisipkakistawa: ‘¿Kun lurasarak jumar ñaqhachapxsmasti?’ sasa. Altaraxax jumanakan ñanqhachañatakïkaspas ukham amuyapxtaxa, ⁸ nayax janis kuna yäqañäkiristsa ukham nayar luqtañatak apanipxtaxa: juykhu uywanaka, kayu p’akit uywanaka, usut uywanaka; ukax ¿jumanakatak walikïskiti? ¡Sarapxam, mark apnaqirinakaman jilïrinakapar ukanak churanipxam, inach jupanakax ‘Walikiw’ sas katuqapxätam!” sasa. ⁹ Jumanakasti jichhax Diosaruy mayisipxam, jiwasat khuyapt’ayasiñapataki. Ukampis jumanakatix ukhama jan wali waxt’äwinak churasipkäta ukkhaxa, jan amuyapxamti Tatitun uka waxt’äwinaka suma chuymampi jumanakat katuqasitapa. ¹⁰ Taqi ch’aman Tatitux siwa: “¡Walïspaw jumanakat kawkïrisa utaxan punkunakap jist’antaspa ukaxa, ukhamat jan inamayataki altaraxan ninapa aqtayasipkañamataki. Janiw jumanakatak chuymaxax utjkituti, janiw waxt’äwinakam katuqkarakïti. ¹¹ Taqi akapach uraqin nayarux jach’añchapxitu, taqi chiqanakan nayar jach’añchasax incienso q’aphiyapxi, ukatsti q’uma waxt’äwinakarak luqtapxitu. ¹² Ukampis jumanakax ñanqhachapxistawa. Altaraxax jisk’achañäkaspas ukham amuyapxtaxa, ‘uchatäki uka manq’anakax axtqañawa’ sasaw jisk’achapxaraktaxa. ¹³ Jumanakax sapxtawa: ‘¡Taqi akanak lurkäwix qaritäxapxtwa!’ sasa. Ukatsti jisk’achapxistawa. Nayax uka lunthatata, usuta, kayu p’akit uywanak luqtanipkista ukanakxa kusisiñampis katuqapkirisma ukham amuyapxaraktaxa. ¹⁴ Kawkïr jaqitix suma k’umar uywa nayar luqtañatak yaqhachkasina, mä usut uywaki luqtxitaspa ukax ñanqhachatäpan. Nayax ch’aman Reyïtwa, taqi markanakaw axsarapxitu.” Ukham siw taqi ch’aman Tatituxa.

¹ “Sacerdotenaka, aka arunakax jumanakatakiwa: ² Jumanakasti nayarux jaysañanakamawa, sutixsa taqi chuymampiw jach’añchapxañama. Janitix ukham lurapkäta ukaxa nayax ñanqhachapxämawa. Taqi chuymampi jan jach’añchapxatamatxa, jumanakatak aski waxt’äwinakaxsa, ñanqhachañaruw tukuyä, sacerdote kankañ katuqapkta ukanaksa apaqapxämawa” siwa, taqi ch’aman Tatituxa. ³ “Taqi ch’amanïñamsa nayax apaqapxämawa, ukatsti kawkïr uywanaktix luqtañatak apanipkäta uka uywanakan wanupampiw ajanut qhallkatapxäma, uka wanump chikarakiw pichanukut uñjasipxäta. ⁴ Ukhamat yatipxäta, nayan aka kamachi arunak jumanakaru churataxa, Leví ayllumpi suma arust’äwir mantataxan jan tukusiñapataki” siwa, taqi ch’aman Tatituxa. ⁵ “Nayan arust’äwixax Leví ayllutakix jakañänwa, samarañarakïnwa. Uka arust’äwsti jupan nayaru waqaychañapataki, axsarañapatakiw churarakïyäta, jupasti alt’at chuyma, axsartañ chuyma uñacht’ayitu. ⁶ Leví sacerdotex kunatix chiqapäki uk yatichäna, janirakiw lakapan ñanqha parlañax utjkänti. Nayampisti sumana, aski samarañan jakarakïna, waljanirurakiw jucha lurañat jithiqtayäna. ⁷ Sacerdotenakan lurañanakapasti, jaqinakaru nayar uñt’aña yatichapxañapawa, ukatsti taqinirakiw jupanakan ukaru sarapxañapa suma yatichäwinak katuqiri, jupanakax taqi ch’aman Tatitun suma arunakap qhanañchiri khithanita jaqinakäpxatap layku. ⁸ “Ukampis juma sacerdotenakax suma chiqa thakhit saranukupxtawa, waljaniruw yatichäwinakamampix lanktasiyapxtaxa. Leví chachampi lurat suma arust’äwi ñanqhar tukuyapxtaxa. ⁹ Ukat nayax jumanakar taqi jaqinakamp uñisiyapxäma, jan wali jaqinakat uñt’ayapxarakïma, jumanakan nayar jan ist’apxatamata, jaqinakar yatichapkta ukkhasa, mä khuskhak taqpachanir jan uñjapxatamata” siwa, taqi ch’aman Tatituxa. ¹⁰ ¿Janit jiwasasti mä sapa awkinikïktansti? ¿Janit mä sapa Diosan uskutäktansti? ¿Kunatarak jiwasasti maynit maynikam sallqjasis sarnaqasktansti, kawkïr suma arust’äwirutix Tatitumpi awkinakasampix mantawayapki uka arunak p’akintasasti? ¹¹ Judá markax Tatitumpi arust’äwir mantatapxa janiw phuqkiti, Jerusalén markansa, Israel uraqinsa wali axtaskay juchanak lurapxi. Judá markasti jan wali sarnaqañanakampiw Tatitun munat qullan utap q’añuchi, Judá markankir jaqinakax k’ari diosanakar yupaychir warminakampiw jaqichasipxi. ¹² ¡Walïspawa, Tatitux ukham q’añu sarnaqir jaqinakaru aka markat jaqunukuñapaxa, kawkïrïskpasa, khitïskpasa, taqi ch’aman Tatitur waxt’äwinak luqtirïskpasa! ¹³ Ukhamarus jumanakax janiw ukanakak lurapktati, jan ukasti jumanakan waxt’äwinakam Tatitux taqi chuymamp jan katuqxatap laykusti, jachañanakamampi, warariñanakamampiw Tatitun altarap phuqhantayapxtaxa. ¹⁴ Ukatsti jiskt’asisipkaktawa: “¿Kunatsa ukhamäpacha?” sasa. Tatituw uñjaraktam, kuna arunaktix jumax waynäkasin, jaqichaskta uka warmir arsutam jan phuqhatama. ¡Warmimax jumamp chika sarnaqirïnwa, jumasti jupa sapampik jakañatakiw arsuraktaxa! ¹⁵ Diosax jiwasar mä janchiki, mä sapa ajayukïñasatakiw uskusistu. Jupar luqtat mä suma markäñasatakiw irnuqarakistu. ¹⁶ Israel markan taqi ch’aman Tatitupax siwa: “¡Jumanakpachat amuyasipxam, jan warminakamarux sallqjapxamti. Nayasti uñistwa kawkïri jaqitix warmipampi jaljtki ukaruxa, uka jach’a jucha lurasin jakäwipa q’añuchasi!” ¹⁷ Tatitux jumanakan arunakam isch’ukkäwix qaritäxiwa; jumanakasti jiskhisisipkaktawa: “¿Kunarak jiwasasti parltan jiwasar isch’ukkäwi qarjasiñapatakisti?” sasa. Jumanakasti sapxtawa: “Jan wali lurir jaqinakax Tatitutakix walikïskiwa, ukanakampix kusisikiwa” sasa; ukatsti arusipxaraktawa: “¿kawkinkarak chiqapar uñjir Diosasti?” sasa.

¹ Taqi ch’aman Tatitux siwa: “Nayaw yatiyirixa khitanï, jupaw nayatak thakhi wakichani. Jumanakax thaqhapkta uka Tatitux, akatjamat utaparux mantanini. ¡Arust’äwir mantat yatiyirix niyaw purisinki!” ² Ukampis, ¿khitirak jutañap urumpi q’iwtasispasti? ¿Khitirak jupa nayraqatan sayt’asispasti? Ninar uñtataw jupax purinini, jiwasar q’umachañataki, jabonar uñtataw q’añunak jiwasan chuymasat apaqani. ³ Tatitux sacerdotenakar q’umachañatakiw qunt’asini, Leví ayllut saraqir sacerdotenakaru, kunjämtix maynix qullqsa, qursa ninampi q’umachki ukhama. Ukat jupanakax waxt’äwinakapxa Tatitur luqtapxani, kunjämtix jupanakax luqtapxirïki ukhama. ⁴ Tatitusti kusisiñampiw Judá, Jerusalén markanakan waxt’äwinakap katuqani, kunjämtix khä urunakan katuqasirïkän ukhama. ⁵ Taqi ch’aman Tatitux siwa: “Nayaw jumanakar taripir jutä. Ukhamarus nayax uñjkta ukanak arsü khitinakatix layqasipki, yaqha warminakamp sarnaqapki, k’ari juramento lurapki, irnaqirinakarus sallqjapki, ijmanakarusa, wajchanakarus jachayapki, yaqha markat jutir jaqinakarus jan wal uñjapki, nayarus jan axsarapkituti ukanakatakiw arsurakï. ⁶ “Nayätwa Tatit Diosaxa, nayax pachpakïsktwa. Ukat jumanakax Jacobun wawanakapa, jan tukjatäpktati. ⁷ Jumanakax awkinakamjamarakiw nayan kamachi arunakaxat saranukupxtaxa, janiw kamachinak phuqhañ munapkaraktati. Naya, taqi ch’aman Tatituw sapxsma: ¡Nayar kuttanxapxam, nayasti jumanakar kuttanxarakïwa! Ukampis jumanakax sapxtawa: ‘¿Kunatsa nanakasti jumar kuttanipxäma?’ sasa. ⁸ Nayasti jumanakarux jiskt’apxsmawa: ¿Jaqix Diosat lunthataspati? sasa. ¡Jumanakax lunthatapxistawa! ‘¿Kunanarak nanakasti jumar lunthatapxsmasti?’ sasas jiskt’asipkakistawa. ¡Jumanakax sapa tunkat maya churañanaka, waxt’äwinaka nayat lunthatapxista! ⁹ Jïsa, taqi markpacha, taqi jumanakaw nayat lunthatasipkistaxa, ukat nayax jumanakar ñanqhachapxsma. Naya, taqi ch’aman Tatituw sapxsma: ¹⁰ Sapa tunkat maya churañamäki uksti nayan utaxar apanipxam, ukhamat manq’añax utaxan utjañapataki. Jichhax yant’apxita, nayaw jumanakaru alaxpach ventananak jist’arasin jilarkir suma waxt’äwinak apayanipxäma. ¹¹ Janirakiw kuna laq’unakas yapunakamarux tukjkaniti, uva yapunakamas wañskarakiniti. ¹² Ukatsti taqpach markanakaw jumanakar wali kusisiñan markat uñt’apxätam, munkaya uraqinïpxatam layku. Naya, taqi ch’aman Tatituw arsta”. ¹³ Tatitusti siwa: “Jumanakax jan wali arunakampiw nayat parlapxtaxa. Ukatsa jiskhisipkaktawa: ‘¿Kunarak nanakasti jumat parlapxtsti?’ sasa. ¹⁴ Jumanakax akanak sapxtaxa: ‘Diosar arkañax inamayakiwa. ¿Kunaraki jiwasasti apsuñäni jupan arunakaparjam sarnaqasasti, taqi ch’aman Tatit nayraqatan llakt’at sarnaqasasa? ¹⁵ Jiwasax uñjtanwa, jach’a jach’a tukurinakax kusisitäpxiwa, qhuru jaqinakatakisti jan walinak lurkasas taqi kunas jupanakatakix sumakipuniwa, Tatiturus yant’apxarakiwa, ukampis janiw kuna mutuñsa Tatitut katuqapkiti’ ” sasa. ¹⁶ (Tatitur axsartas sarnaqirinakasti jupanakkamaw parlasipxäna, Tatitusti jupanakar ist’änwa. Ukatsti, jupan nayraqatapan qillqasïna, Tatitur axsartañampi yäqirinakataki, sutip waqaychirinakataki). ¹⁷ Taqi ch’aman Tatitux siwa: “Niyaw urux purisinki, jupanakax wasitat nayankxani uka uruxa. Jupanakax nayatakix mä suma imat qurïkaspas ukhamäniwa, janiw kunampis jupanakar ñanqhachkäti; kunjämtix mä awkix wawapat khuyapayaski ukhamaw jupanakat khuyapayasirakï. ¹⁸ Ukapachaw jumanakax amuyasipxäta kunatix askïki, kunatix jan askïki uka, ukhamaraki, khititix Diosar yupaychki, khititix jan yupaychki ukanaka” sasa.

¹ Taqi ch’aman Tatitux siwa: “Urux jak’achasisinkiwa, hornor uñtat parintata, uka urusti taqi jach’a jach’a tukurinakampi, ñanqha luririnakampix jichhur uñtataw nakhantani. Uka uru purinkani ukapachaw jupanakar saphitpach nakhantani, janirakiw kunas jupanakat jilt’kaniti. ² Ukampisa, khitinakatix nayar axsartas sarnaqapkta ukanakatakixa, chiqapar uñjañaxax intir uñtataw k’ajani, qhanapasti jaqinakatakix qhispiyasiñ apanini. Jumanakasti kusisiñata jalnaqapxäta kunjämtix vaca qallunakax uyut mistusax jalnaqapki ukhama. ³ Nayax wakichaskta uka urunxa, jumanakax uka ñanqha lurir jaqinakarux laq’arjamaw takichasipxäta. ⁴ “Horeb qullun Moisés luqtirixar churkta uka kamachinakat amtasipxam. ¡Ukanakasti iwxa arunakampi, kamachi arsutanakampiwa taqpach Israel markan phuqhañapataki! ⁵ “Kunürutix nayax mutuyapkäma uka uru janïra purinkipanxa, nayax Elías profetaruw khithanipxäma. ⁶ Jupaw awkinakampi wawanakampi sumankthapiyxani. Janitix ukhamäkani ukapachasti, nayaw jutasin aka uraqi q’ala t’unjä.”