LEVÍTICO

LEVÍTICO

¹ Tatitux Moisesaruw jupamp Jikisiñ Carpatpach jawsäna, ukatsti sarakïnwa: ² “Israelitanakampi parlam, jupanakarusti sarakim, kunapachatix maynix uywanak nayar luqtañatak apankani ukkhaxa, urqu vacanaka jan ukax, urqu ovejanakapat apaniñapawa. ³ “Luqtañ uywatix nakhantayañatak urqu vacänixa, ukax jan kuna kamacht’atäñapawa. Katuqatäñatakisti, Tatitun nayraqatapana, jupampi Jikisiñ Carpar mantañäkis ukawjan luqtatäñapawa, ⁴ uka uywan p’iqipxar amparampi luqxatasa. Ukhamat uka uywan jupa lanti juchanakapat pampachatäñatak katuqatäñapataki. ⁵ Urqu vacarux Tatitun nayraqatapan kharinukuni; ukxarusti Aaronan sacerdote yuqanakapaw wila luqtapxani, ukatsti Tatitump Jikisiñ Carpar mantañawjan altaran thiyanakaparuw ch’allakipapxani. ⁶ Khititix uka uywa nakt’at luqtkani ukasti, lip’ichi kharsusin aychap kharinuqxani, ⁷ sacerdotenakasti altarxaru nina aqtayapxani, lawanaksa sum suk’xatapxani, ⁸ ukxaru uka kharinuqat aychsa, p’iqipsa, jiphillanakan lik’ipsa uchañataki. ⁹ Khititix luqtkani ukasti uka uywan jiphillanakapsa, chhuchhullinakapsa umampiw jariqañapa, uksti sacerdotew altarxar taqpach nakhantayani, Tatitutak mä suma q’apkir luqtäwïñapataki. ¹⁰ “Luqtañ uywatix nakhantayañatak oveja tamapata jan ukax, cabra tamapat churatäkani ukax, jan kamacht’at mä urqüñapawa, ¹¹ ukasti Tatitun nayraqatapan altarat amstäxan kharinukutäñapawa. Aaronan sacerdote yuqanakapasti altararuw puspach thiyapat wilampi ch’allakipapxani; ¹² ukatsti uywan aychap kharinuqapxani, uka kharinuqat aychanaksti sacerdotew p’iqimppacha, jiphillanakan lik’ipamppacha altarxan ninax aqaski ukxar uchani. ¹³ Khititix luqtkani ukasti uka uywan jiphillanakapsa, chhuchhullinakapsa umampiw jariqañapa, uksti sacerdotew altarxar taqpach nakhantayani, Tatitutak mä suma q’apkir luqtäwïñapataki. ¹⁴ “Nakhantayañatak Tatitur luqtäwitix mä jamach’ïnixa, ukax mä qhurukutüñapawa, jan ukax mä paloman chhiwchhipäñapawa. ¹⁵ Sacerdotew uka palomxa altaran luqtani: p’iqip q’iwiqasax altarat mä thiyar wilap ch’aqsuyasaw nakhantayani. ¹⁶ Ukatsti kutupxa jiphillanakamppacha, altarat inti jalsu tuqiru, kawkharutix qhillxa wartanipxirïki ukkharuw liwtanxani. ¹⁷ Ukxarusti uka palomxa chhiqhanakat katt’asaw ch’iyjañapa, jan payar jaljtayasa, ukatsti sacerdotew altarxan ninax aqaski ukxar uka paloma nakhantayani, Tatitutak mä suma q’apkir luqtäñapataki.

¹ “Kunapachatix maynix granonakat wakichata mä luqtäwi Tatitur luqtañatak apanini ukkhaxa, suma jak’ükis ukat apaniñapawa, ukxarusti aceitempi, inciensompi warxatt’atäñapawa. ² Uksti Aaronan sacerdote yuqanakapan ukaruw aparakini, sacerdotesti aceitempi, inciensompi warxatatäkis uka jak’u jach’xatasin altarxar nakhantayxani, ukatsti Tatitutakix amtaskañatak mä suma q’apkiri waxt’ar uñtatäniwa. ³ Uka jak’u waxt’at jilt’ki ukasti, aski qullanätap laykuxa, Aaronampitaki, wawanakapampitakïxaniwa. ⁴ “Kunapachatix grano achunakat hornon qhathita mä waxt’a churäta ukkhasti, uka t’ant’ax suma jak’uta aceitempi chapt’at jan levadurani luratäñapawa, jan ukax, jan levadurani sillp’a t’ant’anakas aceitempi jawikipatäñapawa. ⁵ “Waxt’äwimatix grano achunakat sartenar qhathiyatächixa, suma jak’uta, aceitempi chapt’at jan levadurani luratäñapawa, ⁶ ukatsti jisk’a jisk’a pachinuqasax aceitempiw warakipäta grano achunakat waxt’äwïtap layku. ⁷ “Waxt’äwimatix grano achunakat phukhur qhathiyatänixa, suma jak’uta aceitempi luratäñapawa. ⁸ Ukanakampi uka waxt’a wakicht’xasasti, Tatitun nayraqataparuw apxäta, sacerdoteruw katuyxarakïta, ukatsti jupaw altarkama apxani. ⁹ Sacerdotex ukan uka waxt’at mä juk’a aptasax altarxan nakt’ayxani ukasti, Tatitutakix amtaskañatak mä suma q’apkir waxt’ar uñtatäniwa. ¹⁰ Uka waxt’at jilt’ki ukasti, Tatitutak aski qullanätap laykux Aaronampitaki, wawanakapampitakïniwa. ¹¹ “Janipuniw jumanakax Tatitur luqtañatak grano achunakat wakichat waxt’arux levadura uchapxätati. Janipuniw kuna levadurasa, misk’isa Tatitur luqtat waxt’jamax nakhantayatäñapäkiti. ¹² Nayraqat achunakamp chikax levadursa, misk’sa Tatitur luqtasipkasmawa, ukampis janipuniw altaran suma q’apkiri waxt’jama nakt’ayasin luqtatäñapäkiti. ¹³ “Taqi granonakat wakichat waxt’amarux jayuñchapunïtawa, jayux Tatitumpi suma arust’äwir mantat unañchäwïtap layku. ¹⁴ “Jumatix Tatitur nayrïr grano achunakat mä waxt’a luqtätaxa, ukasti suma puqurat puyanakat ch’axirt’asin ninar jamp’ikipatäñapawa. ¹⁵ Ukxarusti aceitempi, inciensompiw warakipañama, grano achunak waxt’ätap layku. ¹⁶ Ukatsti sacerdotew mä juk’a grano ch’axirt’atxa, aceitempi, inciensompi nakhantayxani, ukasti Tatitur jach’añchañatak amtaskañ mä suma q’apkir waxt’äniwa.

¹ “Khititix uywanakapata mä qachu vaca jan ukax mä urqu vacsa Tatitumpi sumankthapiñatak luqtkani ukax jan kuna kamacht’at uywäñapawa. ² Khititix waxt’a luqtkani ukax, uka uywan p’iqipxarux amparap luqxatañapa, ukatsti Tatitump Jikisiñ Carpar mantañäkis ukawjan kharinukuñapa. Ukatsti sacerdotenakaw altaran thiyanakap uka wilampi ch’allsupxañapa. ³ “Khititix sumankthapiñatak uywa luqtkani ukax mä nakt’ayat waxt’a Tatitur luqtañapa, jiphillanakan lik’inakapa, ⁴ maymurunakan lik’inakapa, jikhanin lik’inakapa, k’iwchxankki uka lik’inaka, maymurunakamp chika apaqatäñapawa. ⁵ Sacerdotenakaw taqi uka lik’inak altarxar nakhantayapxani, kawkhantix altarxan nakhantayatäñatak luqtäwix nakhaski ukxar apxatasa, ukasti Tatitutakix mä suma q’apkir waxt’äniwa. ⁶ “Khititix sumankthapiñatak mä oveja luqtkani ukasti, urqüpasa, qachüpasa, jan kuna kamacht’atäñapawa. ⁷ Uka luqtäwitix mä ovejänixa, Tatitur luqtkasax ⁸ uka uywan p’iqipxaruw amparap luqxatani, ukat Tatitump Jikisiñ Carpa nayraqatan kharinukxani. Ukatsti sacerdotenakax uywan wilapampiw altaran thiyanakap ch’axch’suni. ⁹ “Khititix sumankthapiñatak mä oveja Tatitur luqtkani ukasti nakhantat waxt’jam luqtañapawa, wich’inkxa jikhanitpach khariqani, jiphillanakan lik’ipamppacha, ¹⁰ maymurunaksti lik’imppacha, jikhani lik’inakamppacha, k’iwchxankki uka lik’inakamppacha, uksti maymurunakamp chika apaqarakini. ¹¹ Ukatsti, sacerdotex taqi ukanak altarxaruw nakhantayani, ukasti Tatitur jach’añchañatak nakt’ayat manq’añ waxt’äkaspas ukhamäniwa. ¹² “Uka luqtäwitix mä cabränixa, Tatitur luqtkani ¹³ ukkhasti, amparap uka uywan p’iqipxar luqxatani, ukat Tatitump Jikisiñ Carpa nayraqatan kharinukxani. ¹⁴ “Khititix uka uywa luqtkani ukax nakhantat waxt’ata Tatitur luqtañapawa, jiphillanakan lik’inakapa, ¹⁵ maymurunakan lik’inakapa, jikhanin lik’inakapa, k’iwchxankki ukan lik’inakapa, maymurunakamp chika apaqatäñapawa. ¹⁶ Ukatsti, sacerdotex altarxaruw taqpach nakhantayani mä suma q’apkiri manq’añ waxt’ata. Taqpach lik’inakasti Tatitutakiwa. ¹⁷ “Aka kamachisti wiñayatakiwa, wawanakapan wawanakapatakiwa, kawkhantix jumanakax jakapkäta ukkhanxa, janipun wilsa, lik’sa manq’apxamti.”

¹ Tatitux Moisesaruw parläna akham sasa: ² “Israelitanakar sarakim: Maynitix jan amuyaskasina Tatitun kamachinakap p’akintas juch lurani, ukatsti kunatix jan wakiski ukanak lurani ukaxa, akham lurañapawa: ³ “Jilïr sacerdotetix juch luranixa, uka jucha luratapan taqi jaqinakxar puritap laykux, mä k’umar urqu vaca uka jucha luratapat luqtañapa. ⁴ Ukatsti Tatitun nayraqataparuw apani Tatitump Jikisiñ Carpar mantañäkis ukkharu; ukan amparap uywan p’iqipxar luqxatani, ukatsti Tatitun nayraqatapan kharinuqxani. ⁵ Ukatsti jupa kipkaw vaca qallun mä juk’a wilap katusin Tatitump Jikisiñ Carpar apani, ⁶ ukan luk’anap wilar juricht’asini, Tatitun nayraqatapan paqallqu kutiw ch’allt’arakini, kawkïritix qullan utan velopäkix uka tuqiru. ⁷ Sacerdotesti mä juk’a wila aptasin q’apkiri incienso uchañäkis uka altaran waxranakaparuw jawirt’ani, ukasti Tatitump Jikisiñ Carpan jikxatasi; ukat jilt’iri wilsti, nakhantat waxt’a churañäkis uka altar kayuruw taqpach wartxarakini, kawkïritix Tatitump Jikisiñ Carpa mantañäkis ukankki ukkharu. ⁸ Ukatsti juchat luqtatäkis uka vaca qallutxa taqpach lik’inakap apsxarakini, ⁹ maymurunaksti lik’imppacha, jikhani lik’inakamppacha, k’iwchxankki uka lik’inakamppacha, maymurunakamp chika apsxani, ¹⁰ kunjämatix sumankthapiñatak luqtat urqu vacat apsutäkix ukhama. Ukatsti, sacerdotew nakhantayañatak luqtañ altarxar nakhantayxani. ¹¹ Vaca qallun lip’ichipamppacha, taqi aychapamppacha, p’iqipamppacha, kayunakamppacha, jiphillanakamppacha, kuna jilt’anakatix utjki ukanakamppacha, ¹² jan ukax maypach urqu vaca qallu, campamentot anqäxar mä q’uma chiqar apsuwayxani, kawkhantix altaran nakhayat qhillax warañäki ukkharu; ukan lawanak uchasa, qhilla patxan ninampi phichkatxani. ¹³ “Taqi israelit jaqinakatix jan amuyaskasin kuna jan walsa lurapxanixa, ukat janirak jupanakat maynis amuykani Tatitun kamachinakap p’akintapxatapata, ukhamat juchañchjasipxchi ukaxa, ¹⁴ kunapachatix uka jucha luratax yatisxani ukapachaw juchapat taqini mä urqu vaca wilañcha luqtapxani. Tatitump Jikisiñ Carpa nayraqataruw apapxani, ¹⁵ ukan Tatitun nayraqatapan taqi jilïri jaqinakax uka urqu vacan p’iqipxar amparanakap luqxatapxani, uka pachpanarak kharinukupxani. ¹⁶ Ukxarusti jilïri sacerdotew uka urqu vacan mä juk’a wilapa Tatitump Jikisiñ Carpar apani, ¹⁷ ukatsti luk’anapampi wilar juricht’asaxa, paqallqu kutiw Tatitun nayraqatapan ch’allt’ani, velo uñkatasinkki ukkharu. ¹⁸ Ukan mä juk’a wilampi Tatitun nayraqatapankki uka altaran waxranakaparuw jawirt’ani. Ukat taqpach wila jilt’irïki uksti, Tatitump Jikisiñ Carpar mantañäkis ukkhankki uka waxt’a luqtaña altaran kayuparuw wartani. ¹⁹ Ukhamarakiw uka urqu vacat taqpach lik’inaka apsxani, ukatsti altarxaruw nakhantayxani, ²⁰ jan ukax, uka urqu vacampix kunjämatix juchat wilañcha mä yaqha urqu vaca luqtapkän uka kipkarakiw luqtañapa, ukhamat sacerdotex jupanakan juchanakapat pampachatäñ jikxatani, ukatsti juchanakapax pampachatäxaniwa. ²¹ Ukatsti uka urqu vacax campamentot anqäxar apsusin nakhantayatäxaniwa, kunjämatix nayraqat urqu vacax nakhantayatäkän ukhama, taqi israelit jaqin juchapat wilañcha luqtatätap layku. ²² “Mä jilïritix jan amuyaskasina Tatit Diosapan kamachi arunakap p’akintanixa, uka jilïrix juchanipunïniwa. ²³ Kunapachatix uka jucha luratapa amuyasxani ukapachasti mä jan kuna kamacht’at chivo waxt’a luqtañatak apxarakini. ²⁴ Uka chivon p’iqipxaru amparap luqxatasin Tatitun nayraqatapan kharinukxani, kawkhantix uywanakax nakhantayañatak kharinukutäki ukkhana, jucha luratat wilañcha luqtäwïtap layku. ²⁵ Ukxarusti sacerdotex juchat wilañcha luqtat chivon mä juk’a wilap luk’anapar juricht’asaxa, altaran waxranakaparuw jawirt’ani; ukat jilt’ki uka wilsti, pachpa altaran kayuparuw wartxani, ²⁶ ukatsti taqpach lik’i altarxar nakhantayxarakini, kunjämatix sumankthapiñatak luqtat lik’i nakhantayapki ukhama. Sacerdotex ukham lurasaw jilïritakix juchapat pampachatäñ jikxatani, jilïrin juchapasti pampachatäxaniwa. ²⁷ “Mä markankir jaqitix jan amuyaskasina Tatitun kamachi arunakap p’akintanixa, ²⁸ kunapachatix jucha luratap amuyasxani ukapachasti, mä jan kamacht’at cabra waxt’a luqtañatak apxani. ²⁹ Ukatsti uka cabran p’iqipxaruw amparap luqxatani, ukat kawkhantix uywanakax nakhantayañatak kharinukutäki ukkhan kharinukxani. ³⁰ Ukatsti sacerdotex mä juk’a wilampi luk’anap juricht’asax altaran waxranakaparuw jawirt’ani, ukat jilt’ki uka wilsti, pachpa altaran kayuparuw wartxani. ³¹ Lik’inakapsti, kunjämtix sumankthapiñatak luqtatäki uka uywanakat apsutaxa, uka kipka apsutarakïniwa, uka lik’sti altarxaruw nakt’ayxani Tatitutak suma q’apkiri waxt’ata, ukhamat sacerdotex uka jaqitakix juchapat pampachatäñ jikxatani, uka jaqin juchapasti pampachatäxarakiniwa. ³² “Uka jaqitix jucha luratapat luqtañatak mä oveja apanini ukapachax jan kamacht’at qachu oveja apanini. ³³ Ukatsti amparap ovejan p’iqipxar luqxatani, ukat jucha luratapat luqtatäñapatak kharinukxani, kawkhantix uywanakax nakhantayatäñatak kharinukutäki ukawjana. ³⁴ Ukatsti sacerdotex mä juk’a wilampi luk’anap juricht’asax altaran waxranakaparuw jawirt’ani, ukat jilt’ki uka wilsti, pachpa altaran kayuparuw wartxani. ³⁵ Lik’inakapsti, kunjämtix sumankthapiñatak luqtatäki uka uywanakat apsutaxa, uka kipka apsutarakïniwa, uka lik’sti Tatitutak suma q’apkir waxt’at altarxar nakt’ayxani, ukhamat sacerdotex uka jaqitak juchapat pampachatäñ jikxatani, juchapasti pampachatäxaniwa.

¹ “Kuntix maynix uñjki, jan ukax ist’ki uk qhanañchañapatak jawsatäni, ukat jan qhanañchañ munkani ukaxa, uka jaqix juch luri, uka jucha luratapatsti mutuñapawa. ² “Maynitix kuna q’añsa llamkt’ani, mä jiwat q’añu uywa, uywañ uywäpasa, jan ukax jan uywañ uywäpasa, jan ukax q’añu asirüpasa, ukham llamkt’atapampix q’añuchataw uñjasini, janisay amuyaskpan, ukampis juchañchatäniwa. ³ “Maynitix jan amuyaskasin jaqin kuna q’añuchatapsa llamkt’anixa, uka qhipat amuyasxani ukapachax juchañchataw uñjasini. ⁴ “Maynitix jan sum amuyt’askasin chiq lurañatakisa, jan ukax jan wal lurañatakis juramento luranixa, ukattix uka jan wali luratapat amuyasxani ukax juchañchatäniwa. ⁵ “Khititix aka luräwinakat kawkïritsa juchañchat uñjasinixa, uka jucha luratap arsxañapawa, ⁶ ukatsti jucha luratapat mä qachu oveja Tatitur wilañcha luqtani, jan ukax mä qachu cabräpasa, uka wilañcha luqtäwimpiw sacerdotex uka jaqin juchapat pampachatäñ jikxatani. ⁷ “Janitix mä jisk’a oveja alañatak qullqix utjkani ukapachasti, Tatitun ukarux pä qhurukutu, jan ukax pä paloman chhiwchhipa uka jucha luratapat apani; ukanakat maysti jucha luräwit wilañcha luqtani, maynïrsti nakhantayatäñatakiw luqtarakini. ⁸ Uksti sacerdoteruw katuyani, sacerdotesti juchat luqtäwïkisa uk nayraqatax luqtani, kunkat q’iwinukusa, p’iqipsti janiw apaqkaniti; ⁹ ukatsti kawkïritix juchat luqtatäki ukan mä juk’a wilapampiw uka altar thiyar ch’allt’ani, jilt’äki uka wilsti altar kayuruw ch’umsuyxani jucha luräwit wilañcha luqtatätap layku. ¹⁰ Payïrimpisti nakt’at waxt’a luqtxarakini, kunjämarutix satäki ukhamarjama; ukhamat jucha lurir jaqin juchanakapax pampachatäxani. ¹¹ “Ukat janipun qullqix utjarapkani pä qhurukutu, jan ukax pä paloman chhiwchhipa alt’asiñatakixa, uka jucha luratapat waxt’a luqtañatakix pä kilo wali suma jak’u apani. Uka jak’urusti janiw aceitempisa, inciensompis warxatañapäkiti jucha luratat mä waxt’a luqtatätap layku. ¹² Uka jak’usti sacerdoten ukaruw apatäni, sacerdotesti mä amtasïwïñapatakix mä jach’i jach’tasaw altarxan uk nakhantayani, Tatitur jach’achañatak maya waxt’anakamp chika. Ukasti jucha luratat luqtäwi waxt’awa, ¹³ ukhamat sacerdoten uka jaqin juchanakap pampachatäñ jikxatañapataki, uka juchapasti pampachatäxaniwa. Uka waxt’at jilt’ir granonakasti, sacerdotetakïniwa.” ¹⁴ Tatitusti Moisesaruw akham säna: ¹⁵ “Maynitix jan amuyaskasin juch lurani, Tatitur luqtat yänakat sallqjatapas uñstkani ukapachax, oveja tamapat jan kuna kamacht’at mä urqu oveja Tatitun ukar wilañcha luqtañatak apaniñapawa. Uka urqu ovejan alapasti qawqhäkitix qullan utjäwin qullqipax ukarjam chaniñcht’atäñapawa, kunjämatix jucha luräwit waxt’a luqtañax wakiski ukhamarjama. ¹⁶ Ukatsti uka jaqix kunatix Tatitur luqtat qullana yänakat sallqjkäna ukanakat yapxatat phuqxañapawa. Chikatan chikatapäki uksti, sacerdoteruw katuyxañapa. Ukatsti kuna urqu ovejatix wilañchat luqtaski ukampix sacerdoten juchat pampachatäñ uka jaqitakix jikxatañapa, ukat juchanakapax pampachatäxani. ¹⁷ “Maynitix jan amuyaskasin Tatitun kamachi arunakap p’akintani ukax juchañchatäniwa, jucha luratapatsti phuqxañapäniwa. ¹⁸ Ukhamasti oveja tamanakapat mä jan kamacht’at urqu oveja apanini, uka ovejan alapsti jumaw qawqhänisa uk säta, ukatsti sacerdoten ukaruw uka jucha luratapat luqtañatak apatarakïni, ukhamat kuntix uka jaqix jan amuyaskasin jucha lurkatayna ukat pampachatäñataki. ¹⁹ Uka wilañchasti jucha luratanakat luqtatawa, uka jaqin Tatit nayraqatan juchanïtap layku.”

¹ Tatitux Moisesaruw akham sas parläna: ² “Kunapachatix maynix juch lurani, jan ukax juchanis Tatitun nayraqatapan uñjasini, jaqi masipar sallqjatap layku, jan ukax, kuna qullqitix jupar katt’ayatäkän ukanak sallqjatapata, jan ukax, jaqi masipat ch’amampik aparxatap layku, ³ jan ukax, mä kuna jikxatasas jan arsutap layku, jan ukax, k’ari juramento luratap laykusa, taqi uka juchanak luratap laykux ⁴ juchañchatäniwa. Ukhamasti kuntix lunthatkatayna, ch’amampis aparkatayna ukanak kuttayxañapawa, qullqi katuyatat lunthatatapatsa, mä kun jikxatasin jan arsutapata, ⁵ jan ukax, mä kunatsa k’ari juramento luratapata. Taqi ukanakxa khitittix aparkatayna ukarux chikatan chikatapamp kuttayxañapawa, kunapachatix jucha luratapat wilañcha luqtkani ukapacha. ⁶ Tatitur luqtäwipasti mä jan kamacht’at urqu ovejäñapawa, uka ovejan alapsti jumaw qawqhänisa uk sisxäta, uka ovejsti oveja tamapat aptanini, ukat sacerdoten ukaruw jucha luratat wilañcha luqtañatak aparakini. ⁷ Ukatsti sacerdotex taqi uka juchanaka, kawkïrïpasa, ukanak luratatsti, uka jaqitakix juchat pampachatäñ jikxatani, uka juchasti pampachatäxarakiniwa.” ⁸ Tatitux Moisesaruw akham sas parläna: ⁹ “Aaronampiru, sacerdote wawanakapampirusti, nakhantayatäñatak luqtäwinak tuqit akham sas parlam: Uka luqtat uywax kuna ninatix altar patxan sank’aski uka ninxar paqar arum apxatatäñapawa, ukhamat ninan nakhantañapataki. ¹⁰ Sacerdotesti suma lino isimpi, linot lurat calzoncillompiw isthapisini, ukatsti kuna uywatix altarxan nakhantayatäkän ukan qhillap apthapxani, uksti altarat maysa thiyaruw uskurakini. ¹¹ Ukxarusti yaqha isimpiw isthapisxani, ukatsti uka qhillanakxa campamento anqäxaruw mä q’uma chiqawjar apxani. ¹² “Altaran nakhaski uka ninasti janipuniw jiwarañapäkiti. Sacerdotew sapärmanthi qhantatix uka altarar lawanak apxatani, ukatsti kawkïri uywatix wilañchat luqtatäkani ukxa uka ninxaruw apxatarakini, sumankthapiñatak nakt’ayat lik’inakamp kuna. ¹³ Altarankir ninasti aqtatapunïñapawa, janipuniw kunapachas jiwt’añapäkiti. ¹⁴ “Aka yatichäwinakasti granonakat waxt’a luqtäwinakxat yatichäwinakawa: Sacerdotenakax altar nayräxan Tatit nayraqatan luqtapxani. ¹⁵ Jupanakat mayniw uka luqtat jak’umpita, aceitempit mä jach’i aptani, waxt’ampi chik sarki uka taqpach inciensomp kuna, ukatsti amtasiñatak altarxan mä nakt’at waxt’a nakt’ayani, Tatitutakisa mä suma q’apkiriraki. ¹⁶ Uka waxt’ata jilt’irsti Aaronampi, sacerdote wawanakapampix jan levaduran manq’apxani, Tatitur katuyata chiqana, Diosampi Jikisiñ Carpa anqäxana. ¹⁷ Janiw levadurani phayapxañapäkiti. Jupanakaruw churxarakta kuna waxt’anakatix nakt’ayasina nayar luqtatäki ukanakata, kunatix jupanakaru wakt’ki ukanaka, ukanakasti wali qullanarakiwa, kunjämäkitix juchata, ukhamarak jan yatkasin pantjasïwi juchanakat luqtat waxt’ax ukhama. ¹⁸ Akat qhiparusti, Aaronan sacerdote yuqanakapax kunatix Tatitur luqtasin nakt’ayatäki uka waxt’anakat manq’apxarakini. Uka waxt’ampi jikthaptir yänakasti, qullanaptayatäniwa”. ¹⁹ Tatitux Moisesaruw parläna, sarakïnwa: ²⁰ “Aaronampi sacerdote yuqanakapampixa, kunapachatix jupanakax sacerdotet Tatitur katuyatäxapxani ukapachasti aka waxt’anak Tatitur luqtapxañapa: Pä kilo suma jak’u, ukasti granonakat sapa uru waxt’a luqtatäkaspas ukhama, chikatxa qhantatiw luqtxani, chikatsti jayp’u tuqirurakiw luqtxani, jan mä urus armasisa. ²¹ Uka waxt’sti mä sartenat wakicht’anipxani, aceitempi wali suma kittata, ukatsti jisk’a jisk’a jalanuqasin Tatitutak mä suma q’apkir waxt’a luqtapxarakini. ²² Aaronan yuqanakapat jilïri sacerdotesti, kawkïritix jupa lanti utt’askani ukasti uka kipkarakiw wakicht’ani, uka luqtäwisti Tatitutaki satapunïniwa, ukatsti q’ala nakhantayatäñapawa. ²³ Sacerdotenakan taqi waxt’anakapasti q’ala nakhantayatäñapapuniwa, janirakiw khitis uk manq’añapäkiti.” ²⁴ Tatitux Moisesaruw akham sas parläna: ²⁵ “Aaronampiru, sacerdote yuqanakapampirux, jucha luratat wilañcha luqtañxat aka yatichäwinak churam: Kuna uywtix jucha luratat luqtapkani ukax Tatitun nayraqatapan kharinukutäñapawa, kawkhantix nakhantayañatak luqtäwix luraski uka chiqana, ukasti wali qullanapuniwa. ²⁶ Jucha luratat uka wilañcha luqtasinxa, sacerdotex uka pachpat manq’arakini, ukampis kawkhatix qullana chiqäki ukkhan manq’añapa, Tatitump Jikisiñ Carpa anqäxana. ²⁷ Mä kunasa uka uywan aychapamp jikthaptani ukax qullanaruw tukuni, mä isitix uka wilampi ch’allkatat uñjaschi ukasti, qullan chiqan t’axsuqatäñapawa. ²⁸ Luqtäwinak churañ aychatix ñiq’i phukhur qhathiyatänixa, uka ñiq’i phukhux p’akjatäxañapawa, ukampis uka luqtäwitix broncet lurata phukhuru qhathiyatänixa, uka phukhux khitsusin umampi aytsutäxañapawa. ²⁹ “Aka luqtäwix qullanansa qullanapapuniwa. Uka luqtäwitsti Aaronan sacerdote yuqanakapakiw manq’apxañapa. ³⁰ Ukampisa kawkïr uywatix juchat luqtatäki, wilapas juchanakat pampachañatak Tatitump Jikisiñ Carpar apatäki uka uywan aychapax janipuniw manq’askaniti. Uka luqtäwisti ninampi nakhantayatäñapawa.

¹ “Jucha luräwinakat wilañcha luqtäwix aski qullanawa. Uka tuqinakat yatichäwinakasti akanakawa: ² Yatkasin pantjasïwi jucha luratanakat luqtat uywax, kawkhantix nakt’ayañatak luqtat uywanakax kharinukuski uka chiqan kharinukusini, wilapampisti uka altaran thiyapar taqi tuqit ch’allsutäñapawa. ³ Uka uywan taqi lik’inakapasti: kuna lik’itix wich’inkhan utjki, jiphillanakana, ⁴ paypach maymurun lik’inakapa, jikhaninkki uka lik’inaka, k’iwchxankki uka lik’imppacha, ukanakax maymurunakamp chika apaqatäñapawa. ⁵ Ukatsti sacerdotex taqi ukanak altarxaruw nakhantayxani, Tatitutak mä suma q’apkir waxt’a luqtatätap layku. Ukasti yatkasin pantjasïwi jucha luratanakat wilañcha luqtatawa, ⁶ uka wilañcha luqtäwitsti taqi sacerdotenakaw manq’apxani, uka wilañchan qullanätapatxa, kawkhatix qullana chiqäki ukkhan manq’apxani. ⁷ “Yatkasin pantjasïwi juch luratat wilañcha luqtäwisti, jucha luratat kunjämatix wilañchax luqtaski uka kipkarakiw luqtasiñapa, yatichäwinakasti paypachatakix uka pachparakiwa. Uka luqtatasti, kawkïr sacerdotetix jucha luratat pampachañatak luqtki ukatakïniwa. ⁸ Uka kipkaraki, maynitix altarxan mä uywa nakt’ayañatak churani, uka uywan lip’ichipax wilañcha luqtir sacerdotetakïniwa. ⁹ Granonak luqtäwinakatsti, kawkïrinakatix hornon qhathiyatäki, phukhuna, jan ukax sartenan qhathiyatäki ukanakax, uka waxt’a luqtir sacerdotetakïniwa. ¹⁰ Uka kipkaraki taqi granonakata luqtatanaka, aceitemp chaputanaka, waña juyranaka, taqpachax Aaronan sacerdote yuqanakapatakïniwa, taqinirus ukkha pura churatarakïniwa. ¹¹ “Sumankthapiñatak wilañchanak churaña tuqitxa, kunatix Tatituru churaskani ukanakatxa, aka yatichäwinakaw utjaraki: ¹² Uka wilañchäwitix yuspagarañatakïchinixa, aceitempi chapt’ata jan levaduran t’ant’anaka, aceitempi warakipt’ata sillp’a t’ant’anaka, wali suma jak’uta aceitempi chapt’at t’ant’anak churapxäta, ¹³ uka yuspagaräwita, ukhamarak sumankthapiñatak wilañchampi chiksti, levaduran t’ant’anak luqtapxarakïta. ¹⁴ Taqi uka luqtäwinakatsti mä qawqha apaqt’apxäta, ukat Tatituruw mä luqtäwïkaspas ukham uñstayapxarakïta, ukasti sumankthapiñatak wilañchan wilap ch’allir sacerdotetakïniwa. ¹⁵ “Kawkïri uywatix yuspagarañataki, ukhamarak sumankthapiñataki luqtaski ukan aychapax uka urpacha pachpan manq’antatäñapawa, janiw mä jisk’a aychas qhipürutakix jilt’ayatäñapäkiti. ¹⁶ Mä uywatix mä arsüwi phuqhañataki, jan ukax chuymasatjama mä waxt’äwïni ukapachasti, ukan aychapax ukürpach manq’antatäxañapawa, ukat jilt’iristi qhipürus manq’atäskarakispawa; ¹⁷ ukampis uka uywan aychapatix kimsürunsa utjaskakinixa, ukax taqpach nakhantayatäxañapawa. ¹⁸ Ukampisa maynitix uka sumankthapiñataki wilañcha luqtatäki uka uywan aychap kimsïr urunsa manq’askakinixa, uka wilañchax janiw katuqatäkxaniti, janirakiw uka luqtatax kunatakis askïkxaniti; uka aychasti jan kunatak aski uñjatarakïniwa. Khititix uka aycha manq’kani ukasti juchanit uñt’atäxaniwa. ¹⁹ “Kawkïr aychatix mä kuna q’añumpi jak’achasiyatänixa, uka aychax janiw manq’atäñapäkiti, jan ukasti ninar nakhantayatäñapawa. “Taqi khitinakatix q’umachatäki ukanakaw aychxa manq’apxarakini. ²⁰ “Kawkïri jaqitix jan q’umachatäkasin uka sumankthapiñatak Tatitur luqtata aycha manq’kani ukasti, markap taypit apanukutäxañapawa. ²¹ “Kawkïri jaqitix mä kuna q’añunaksa llamkt’ani, mä jaqin q’añupäpasa, mä uywan q’añupäpasa, jan ukax kawkïr axtaskay yänakäpasa, ukat Tatitunkki uka sumankthapiñatak wilañcha luqtat aycha manq’kani ukasti, markap taypit apanukutäxaniwa.” ²² Tatitusti Moisesarux saskakïnwa: ²³ “Israelitanakarusti akham sarakim: Urqu vacana, ovejana, cabran lik’inakapsa janipuniw manq’apxañapäkiti. ²⁴ Jiwata uywanakan lik’ipampi, ch’uminkir animalanakan jiwayat uywan lik’ipampis kunsa lurasipkaspawa, ukampisa janipuniw manq’apxañapäkiti. ²⁵ “Nakt’at waxt’äwi Tatitur luqtatäki uka uywanakan lik’ip manq’ir jaqisti, markap taypit apanukutäniwa. ²⁶ “Kawkhantix jumanakax jakapkäta, uka chiqanakan janipuniw jamach’inaka, jan ukax uywanakan wilapsa manq’apxätati. ²⁷ Khititix uka uywanakan wilap manq’kani ukasti, markap taypit apanukutäniwa.” ²⁸ Tatitusti Moisesaruw parläna, akham sasa: ²⁹ “Israelitanakarusti akham sarakim: Maynitix sumankthapiña wilañcha Tatitur luqtañatak mä uywa apani ukaxa, Tatitun nayraqataparuw apañapa. ³⁰ Jupa pachparakiw amparapampi nakhantayañat waxt’a Tatitun nayraqatapar apañapa, jaraphi aychampi, ukan utjkis uka lik’ipamppach Tatitun nayraqatapan mä uñstäwita luqtañataki. ³¹ Uka lik’sti sacerdotew altarxar nakt’ayxani, ukampisa jaraphi aychax Aaronampitaki, yuqanakapampitakïniwa. ³² Uka uywanakan kupi charapasti, kawkïritix sumankthapiñatak luqtatäki ukax, luqtäwi luratapat sacerdoter churatäxaniwa. ³³ Uka kupi charasti kawkïri sacerdotetix lik’sa, wilsa sumankthapiñatak wilañchanak luqtki ukatakïxaniwa, ³⁴ kuna wilañchanaktix israelitanakax sumankthapiñatak nayar luqtapkitu uka jaraphi aychanakxa, mä suma luqtäwïkaspas ukham katuqta, lankhu charsti, mä churäwïkaspas ukhamaraki, uka waxt’anaksti Aaronampiru, sacerdote yuqanakapampiruw churxta, jupanakarupun wakt’atap layku.” ³⁵ Kuna waxt’anakatix Tatitutaki nakt’ayatäki ukanakax Aaronampiru wawanakapampiruw wakt’i, kunürutix Tatitux jupanakar sacerdotëpxañapatak utt’ayaski uka uruta. ³⁶ Tatitusti israelita jaqinakaruw ukham churapxañapatak mayïna, wiñayatak mä luräwïkaspas ukhama, awkinakat qalltasina wawanakapan wawanakapkama. ³⁷ Nakhantayañatak luqtäwi tuqita, granonakat luqtäwi tuqita, jucha luratata, yatkasina jucha luratanakata, Tatitur katuyasiñ waxt’a tuqita, sumankthapiñatak waxt’a luqtañ tuqitsa taqi ukanakaw yatichäwinakaxa. ³⁸ Tatituw uka kamachinak Sinaí qullu patan Moisesar churäna, kunapachatix uka Sinaí wasaran israelitanakarux waxt’anak churapxañapatak siskäna uka uru.

¹ Tatitux Moisesaruw parläna, akham sasa: ² “Jichhax Aaronampiru, wawanakapampir irpxarum, ukatsti sacerdotenakan isinakapa, luqtañatakïki uka aceite, kuna urqu vacatix jucha luratata Tatitur luqtaski uka, paypach urqu ovejanaka, uka kipkarak kawkïri walayatix jan levaduran t’ant’anaka churañatak uskutäki taqi ukanak apxarum, ³ ukatsti taqi israelita jaqinakarux Tatitump Jikisiñ Carpar mantañäkis uka chiqar tantacht’arakim” sasa. ⁴ Moisesasti, kunjämtix Tatitux siskatayna ukhamarjamaw phuqhäna, taqi jaqinakasti Tatitump Jikisiñ Carpar mantañäkis uka chiqaruw tantacht’asipxäna. ⁵ Ukat jaqinakarux sarakïna: “Tatitux ukham lurañas mayistu” sasa. ⁶ Ukat Aaronampiru, yuqanakapampiruw jak’achasinipxañapatak mayïna, ukatsti umampiw jariqarakïna. ⁷ Ukatsti Aaronarux sacerdote isimpiw isintayäna, mä wak’ampiw wak’t’ayarakïna. Ukxarusti túnica sat isimpiw uskuntäna, uka patxarux pectoral sat isimpiw isintayäna, pachpa pectoralan chint’añapampiw uka túnica chint’arakïna. ⁸ Ukxarusti pectoralampiw uskuraki, uka patxarusti Urim, Tumim uka qalanak ucharaki, uka jisk’a qalanakax Tatitun munañap yatiñatakïnwa. ⁹ Ukatsti mä ch’uqañampiw p’iqit ch’uqanti, paraparusti, qurit lurata mä placa ucharakïna, uka placaw sacerdoter tukuyxäna, kunjämtix Tatitux Moisesar siskatayna ukhamarjama. ¹⁰ Ukxarusti Moisesax luqtañ aceite aptäna, ukatsti kawkhatix qullanäki uka patxaruw warxatäna, kunanakatix uka manqhan utjkän ukanakarusa, ukhamat taqi ukanakax Tatitur luqtatäxarakïna. ¹¹ Uka pachpa aceitempirakiw altarxa paqallqu kuti ch’allt’äna, kunanakatix altaran utjkän ukanakxaru, ampar jarisiñ llatakxaru, qunt’añapxaru, ukhamat taqi ukanakan Tatitur luqtatäñapataki. ¹² Ukxarusti Moisesax Aaronan p’iqipxaruw uka aceitempix warxatäna, ukhamat sacerdotet Tatitur luqtxañataki. ¹³ Ukhamarakiw Aaronan wawanakaparus jak’achasinipxañapatak mayïna, ukatsti sacerdote isimpiw taqpachanir isintayäna, wak’anakampi wak’t’ayasa, ch’uqasiñanakampi p’iqinakapar ch’uqt’asa, kunjämtix Tatitux Moisesar siskatayna ukhamarjama. ¹⁴ Ukxarusti Moisesax kuna urqu vacatix jucha luratat luqtatäkani uk irptayanïna, ukatsti Aaronampi, yuqanakapampix uka urqu vacan p’iqipxaruw amparanakap luqxatapxäna. ¹⁵ Ukatsti Moisesax uka urqu vaca kharinukxäna, luk’anap uka wilar juricht’asaw altaran utjkän uka waxranakar jawirt’äna, ukhamat q’umachañataki, ukat jilt’ir wilsti altar kayuruw warnuqxarakïna, ukhamat uka altarax q’umachata, ukhamarak Tatitur luqtatäxäna ukawjan juchanakat pampachatäñ jikxatañataki. ¹⁶ Ukxarusti Moisesax jiphillanakan taqi lik’inakap katüna, k’iwchxan utjkis uka lik’inaka, paypach maymurxankkis uka lik’inaka, ukatsti taqi uka lik’inak altarxaruw nakt’ayxäna; ¹⁷ Ukampis lip’ichipa, aychapa, phusnunakapsa, campamentot anqäxan ninampiw nakhantayxäna, kunjämtix Tatitux Moisesar siskatayna ukhamarjama. ¹⁸ Ukatsti Moisesax kuna urqu ovejatix nakhantayasin luqtatäkani uk irptayanïna, ukatsti Aaronampi, yuqanakapampiw uka urqu ovejan p’iqipxar amparanakap luqxatapxäna. ¹⁹ Ukat Moisesax uka oveja kharinukxäna, uka ovejan wilapsti altar muytaruw waratatxäna, ²⁰ uka ovejan aychapsti jisk’a jisk’a kharinuqäna, ukatsti p’iqimpi, lik’imppach nakhantayxarakïna; ²¹ ukatsti uka ovejan jiphillanakapa, chhuchhullinakap jariqxarakïna, taqi ukanaksti, Tatitutakix mä suma waxt’äkaspas ukham altarxarux nakt’ayxäna, kunjämtix Tatitux Moisesar siskatayna ukhamarjama. ²² Ukatsti Moisesax jank’akiw yaqha urqu oveja irptayaniraki, kawkïritix Tatitur luqtasiñatak uskutäki uka, Aaronampi, yuqanakapampisti uka ovejan p’iqipxaruw amparanakap luqxatapxäna. ²³ Ukat Moisesax kharinukxäna, mä juk’a wila aptasasti, Aaronan kupi jinchuparu, kupi amparapan tayka luk’anaparu, kupi kayupan tayka luk’anaparuw jawintäna. ²⁴ Ukatsti Aaronan yuqanakaparuw jupar jak’achasinipxañapatak mayïna, uka kipkarakiw jupanakarux kupi jinchuparu, kupi amparan tayka luk’anaparu, kupi kayun tayka luk’anapar jawirt’äna; ukat wila jilt’irïki uksti, uka altar muytaruw waratatxarakïna. ²⁵ Moisesasti uka urqu ovejan wich’inkhapa, kuna lik’inakatix jiphillanakana, k’iwchana, paypach maymurun utjkäna, kupi charampi, taqi ukanak aptäna. ²⁶ Jan levaduran t’ant’a uchañ walayatxa, kawkïritix Tatitun nayraqatapar uchatäki ukatxa, Moisesax jan levaduran mä t’ant’a aptäna, aceitempi chapt’ata mä t’ant’a, mä sillp’a t’ant’amp kuna, taqi ukanaksti lik’inakampi, uka kupi charampi chik apnuqarakïna; ²⁷ ukatsti taqi ukanak Aaronan amparapxaru, yuqanakapan amparanakapxaruw katuyxaraki, ukhamat Tatitun nayraqatapar kunjämatix luqtañax wakiski ukhamarjam lurapxañapataki. ²⁸ Uka luqtäwi tukuyatatsti, Moisesax taqi ukanakxa jupanakan amparanakapat apaqxarakïna, ukatsti altarxaruw kawkïr uywatix luqtañatak churatäkän uka uywampi chika nakt’ayxarakïna, ukasti Tatitutakix mä suma q’apkir waxt’äwïnwa. ²⁹ Ukxarusti Moisesax uka uywan jaraphi aychap katusaw Tatitun nayraqatapar uñstäna kunjämarutix wakiski ukhamarjama. Kuna urqu ovejatix Tatitur luqtañatak wilañchat churatäkän ukatxa, uka jaraphiw Moisesarux wakt’äna, kunjämtix Tatitux siskatayna ukhamarjama. ³⁰ Ukatsti Moisesax jank’akiw kuna aceitetix Tatitur luqtasiñatak uskutäkän uk aptäna, kuna wilatix altar patxankkäna ukampi, ukatsti ukanakampiw Aaronaru, ukhamarak yuqanakaparux ch’allt’äna, uka kipkaraki jupanakan sacerdote isinakapxarusa. Aaronaru, wawanakaparu, uka kipkarak sacerdote isinakaparus ukham Tatitur luqtxäna. ³¹ Ukatsti Moisesax Aaronampiru, yuqanakapampirux sarakïnwa: “Uka aychxa Tatitump Jikisiñ Carpar mantañäkis uka chiqan qhathiyapxam, ukatsti uka pachpan Tatitur luqtañ walayan utjki uka t’ant’amp manq’apxam, kunjämtix Tatitux ‘Aaronampi, yuqanakapampiw aka t’ant’xa manq’apxani’ siskitu ukhamarjama. ³² Ukatsti jilt’kani uka aychsa, t’ant’sa q’al nakhantayapxam, ³³ ukhamarus Tatitump Jikisiñ Carpat janipuniw sarapxätati paqallqu uru phuqhasiñapkama, uka paqallqu urun jumanakan Tatitur luqtasipxatamax phuqhasirakini. ³⁴ Tatitusti siwa, jucha luratanakamat pampachäwi jikxatañatakisti, kunjämtix jichhax lurapkta uka kipkarak lurapxäta. ³⁵ Ukhamasti, jumanakax paqallqu uruw Tatitump Jikisiñ Carpar mantañäkis uka chiqan qhiparapxäta, uruy arumaw paqallqu uru phuqhasiñkam ukankapxäta. Tatitun arunakaparusti ist’apxapunim, ukatsti janiw jiwapkätati, uka arunak nayax Tatitut katuqta” sasa. ³⁶ Aaronampi, yuqanakapampisti, kuntix Tatitux Moisesar siskatayna ukhamarjamaw phuqhapxäna.

¹ Kimsaqallqu uru saraqatarusti, Moisesax Aaronampiru, yuqanakapampiru, taqi jilïri jaqinakampiruw jawsäna, ² Aaronarusti sarakïnwa: “Jichhax mä urqu vaca qallu irpxarum, ukhamarak mä urqu ovejampi, ukanakax jan kuna kamacht’at uywanakäñapawa, ukanaksti nakt’at wilañcha Tatitur luqtarakim. ³ Israelitanakarusti sarakim, jupanakax mä chivo churapxpan jucha luräwit wilañcha luqtañataki, nakt’ayat waxt’a luqtañatakisti, marani mä urqu vacampi, marani mä ovejampi apanipxpan, uka uywanakasti jan kuna kamacht’atäñapawa, ⁴ ukhamarak mä urqu vacampi, mä urqu ovejampi sumankthapiñatak wilañcha luqtañatak Tatit nayraqatan kharinukuspan. Ukxarusti granonakat aceitempi chapt’at waxt’a apanipxpan, Tatituw jichhürux jumanakar uñstapxätam uka layku” sasa. ⁵ Israelitanakasti, kuntix Moisesax siskatayna ukhamarjamaw Tatitump Jikisiñ Utäkis uka nayräxar apapxäna, ukatsti taqi jaqinakaw Tatit nayraqatan sayt’at jikxatasipxäna. ⁶ Ukat Moisesax sarakïna: “Tatituw ak arsuwayi, jichhax phuqhapxam, ukatsti Tatituw jumanakarux jach’a qhanapampi uñstapxätam” sasa. ⁷ Moisesasti Aaronarux sarakïnwa: “Altarar jak’achasinim, ukatsti kuntix juchamata, israelitanakan juchanakap pampachatäñatak wilañcha luqtkäta uka uywxa, nakt’at waxt’a luqtam. Ukatsti kunjämtix Tatitux sisktam ukhamarjam israelitanakan waxt’anakap luqtarakim, ukhamat juchanakapan pampachatäñapataki” sasa. ⁸ Aaronasti altarar jak’achasisinxa, kuna urqu vaca qalltix juchapat luqtañataki irpankän uk kharinuküna. ⁹ Ukxarusti yuqanakapax wila apkatapxäna, Aaronasti luk’anap uka wilampi juricht’asaw altaran waxranakapar jawsüna, jilt’ki uka wilsti, altar kayuruw warnuqxarakïna. ¹⁰ Ukxarusti jank’akiw altarxarux kawkïri uywatix juchata wilañcha luqtatäkän uka uywan lik’ipa, maymurunaka, k’iwchan lik’inakax utjki ukanak nakt’ayxäna kunjämtix Tatitux Moisesar siskatayna ukhamarjam phuqhasa. ¹¹ Ukampisa aychampi, lip’ichimpxa, campamentot anqäxar apsusaw nakhantayxäna. ¹² Aaronasti, kawkïr uywatix taqpacha nakhantayas luqtañatakïkäna uka uywa kharinuküna, yuqanakapasti uka wila apapxäna, uka wilampisti Aaronax altar thiyanakaruw warakipäna. ¹³ Ukxarusti uka uywan p’iqipa, luqtañatak kharinuqatäkis uka aycha apapxarakïna, Aaronasti taqi ukanak altarxaruw nakhantayxäna; ¹⁴ ukxarusti jiphillanaka, chhuchhullinak jariqxäna, uksti altarxaruw nakt’ayxarakïna kunjämtix maypach uywa nakhantaykän ukhama. ¹⁵ Ukxarusti, Aaronax israelitanakan jucha lurapxatapat pampachäwi jikxatañatakiw mä waxt’a luqtäna. Mä chivo katusin Tatitur mä waxt’a luqtäna, kunjämtix nayraqatax luqtkän ukhama. ¹⁶ Uka uywsti, kunjämarutix satäkän ukhamaruw nakt’at luqtarakïna. ¹⁷ Granonakat wakichatäki uka waxt’atxa, mä jach’i jach’tasin altarxaruw nakt’ayäna, kuna waxt’anakatix willjtax nakt’ayatäkän ukanakamp chika. ¹⁸ Aaronasti kawkïri urqu vacampi, urqu ovejamptix israelitanakax sumankthapiña wilañcha luqtañatak irpanipkatayna ukanak kharinukurakïna. Yuqanakapasti Aarón awkiparuw uka wila luqtapxäna, Aaronasti uka wilampix altar thiyanakaruw warakipäna. ¹⁹ Uka kipkarakiw yuqanakapax uka urqu vacana, urqu ovejampin lik’inakapa, wich’inkhanaka, jiphill lik’inaka, maymurunaka, k’iwchxankki uka lik’inak katuyxapxäna, ²⁰ uka lik’inaksti jaraphi aychamp chik apnuqxapxarakïna. Ukat Aaronax uka lik’inak altarxar nakt’ayxäna, ²¹ ukampisa jaraphi aychanakampi, kupi lankhu charanakampxa, uñstayäwi luqtak luräna, kunjämatix Tatitux Moisesar siskatayna ukhamarjama. ²² Aaronasti israelitanakxar amparap luqtasaw aski waxt’äwinak churäna, taqi uka wilañchanak luqtasinsti, altar chiqat sarawayxäna. ²³ Ukatsti Moisesampi, Aaronampix Tatitump Jikisiñ Utäkis ukaruw mantapxäna, ukat mistunxasinsti Israelitanakaruw aski waxt’äwinak churapxäna. Ukat Tatitux taqi jaqinakarux jach’a k’ajkir qhanapampi uñstarakïna: ²⁴ Tatitun nayraqatapatsti ninaw mistüna, uka ninasti kawkïri uywatix nakhantayatäñapäkäna, kuna lik’itix altarxan apnuqatäkän taqi ukanak nakhantäna. Taqi ukanak uñjasinsti, israelitanakax taqpachaniw kusisiñat wal arnaqasipxäna, ukatsti killt’asisin paranakapsa uraqir puriyañkamaw alt’apxarakïna.

¹ Nadab, Abihú chachanakax Aaronan yuqanakapänwa, jupanakasti nina sank’a uchañ katusinxa, ukaru ninampi, inciensompi apxatasin Tatit nayaraqatan luqtapxäna, uka ninasti mayjänwa, janiw kunjämtix Tatitux siskatayna ukhamar lurapkänti. ² Ukat mä ninax Tatitun nayraqatapat mistunïna, jupanakarusti q’al nakhantasin jiwarayäna. ³ Moisesasti Aaronarux sarakïnwa: —Tatitux akpï sañ munänxa kunapachatix siskäna: “Nayar jak’achasirinakarux q’uma kankañax uñacht’ayä, taqi israelitanakarusti k’ajkir qhanax uñacht’ayarakï” —sasa. Aaronasti uka arunak ist’asax janiw kunsa siskxänti. ⁴ Ukat Moisesax Misael, Elsafán uka jaqinakaruw jawsäna, jupanakasti Aaronan tiopa Uziel sat jaqin yuqanakapänwa, jupanakarusti sänwa: —Jutapxam, wila masinakaman jiwat janchinakap qullan chiqawjat apsusinxapxam, ukatsti campamentot anqäxar apasxapxam —sasa. ⁵ Jupanakasti iyaw sasaw jutapxäna, ukatsti pachpa isinakapar llawt’asaw campamentot anqäxar apasxapxarakïna, kunjämtix Moisesax siskatayna ukhamarjama. ⁶ Ukat Moisesax Aaronampiru, Eleazar, Itamar uka yuqanakapampiruw sarakïna: —Jichhax jan ñik’utanakamsa jararasipxamti, janirak llakisiñatsa isinakam ch’iyanuqasipxamti, ukatarak jumanakamppach jiwarasipkasma, Tatitus aka markxar phiñasiñap wartasinkaspa. Wila masinakapax jachasipkpan, ukhamarak israelita jaqinakasa, Tatitux uka jaqinakar ukham nakhantayatapata. ⁷ Tatitump Jikisiñ Carpatsa janiraki jayarux sarapxamti, jan jiwarapxañamataki, jumanakasti Tatitun aceitepampi jupar katuyatäpxtawa —sasa. Ukatsti, kunjämtix Moisesax siskäna ukhamarjamaw phuqhapxäna. ⁸ Ukampis Tatitux Aaronampiw parläna; akham sarakïnwa: ⁹ “Kunapachatix jumasa, yuqanakamasa Tatitump Jikisiñ Carpar mantañatakïpxäta ukapachax, janiw vinsa, kuna p’usqtat umañanaksa umapxätati, jan jiwapxañamataki. Aka arsüwisti, wawanakaman wawanakapatak mä kamachiwa, ¹⁰ ukhamat kunatix qullanäki, ñanqhäki, kunatix q’añüki, kunatix q’umäki ukanak sum amuyapxañamataki, ¹¹ ukatsti kuna kamachinaktix Tatitux Moisés tuqi jumanakar churapktam ukanak israelitanakar yatichapxañamataki” sasa. ¹² Ukxarusti Moisesax Aaronampiru, ukatsti Eleazar, Itamar uka pani yuqapampiruw säna: —Tatitutak nakt’ayas luqtatäki uka granonakat jilt’ki ukanak apsunipxam, uksti jan levaduranik altar jak’an manq’apxam, ukan aski qullanätap layku. ¹³ Mä qullan chiqawjan manq’apxam, kawkïr waxt’anakatix Tatitutak nakt’ayatäki ukanakatxa, ukawa jumampiru, wawanakamampirux wakt’apxtam. Tatitux nayar ukham situ. ¹⁴ Ukatsti jaraphi aycha, kawkïritix mä suma waxt’äwïki, ukhamarak chara aycha kawkïritix mä suma churäwïkaraki ukanaksti, jumampi, yuqalla, imill wawanakamampiw mä q’uma chiqawjan manq’apxäta, ukaw jumanakarux wakt’apxtam, kuntix israelita jaqinakax sumankthapiñataki waxt’a luqtapki taqi ukanakata. ¹⁵ Chara aychax mä churäwïkaspas ukhamawa, jaraphi aychasti mä suma waxt’äkaspas ukhamarakiwa, ukanaksti Tatitun nayraqatapar apatäniwa, mä suma waxt’äkaspas ukham luqtatäniwa, kawkïri lik’inakatix nakhantayañatak luqtatäki ukanakamp chika. Ukanakasti jumampina, wawanakamampinkaniwa, kunjämtix Tatitux arsuwayki ukhamarjama. ¹⁶ Ukatsti Moisesax kawkïri chivotix jucha luratata wilañcha luqtañatakïki uk tumpäna, ukatsti uka chivon nakhantayatäxatap yatisinxa, Moisesax Eleazar, ukhamarak Itamar jupanakatakiw phiñasïna, jupanakasti Aaronan pani yuqanakapänwa, ukat jupanakarux sarakïna: ¹⁷ —¿Kunatsa uka juchat luqtata chivo qullan utan jan manq’apxta? Jumanakax askiw yatipxta uka waxt’an qullanätapa, Tatitux jumanakaruw churapxtam, ukhamat jumanakan aka jaqinakan juchanakap apapxañamataki, ukhamarak Tatitut juchat pampachatäñ mayipxañamataki. ¹⁸ Uka chivon wilapas janirakiw qullan uta manqhar apatäkataynati, jumanakasti uka wilañchat luqtat aychxa uka qullan utan manq’apxañamänwa kunjämtix nayax sapkäyäsma ukhamarjama —sasa. ¹⁹ Aaronasti ukxaruw säna: —Uñjam, jichhüruw yuqanakaxax jucha luratat wilañchanaksa, nakt’ayat luqtäwinaksa Tatitur luqtasipki, nayatakisti uka jan walinakax jichhapuniw utjarapitu. Nayatix jichhürux uka jucha luratata wilañcha luqtat uywan aychap manq’antiriskäyät ukaxa, ¿Tatitutakix walikïsapänti? —sasa. ²⁰ Moisesasti ukanak ist’asax amukïxarakïnwa.

¹ Tatitux Moisesampiru, Aaronampiruw säna: ² “Israelita jaqinakarux sapxam, aka uraqin utjki taqi uka animalanakat manq’apxäta, ³ kawkïrinakatix khisthurïpki, kayu sillunakapas payar jaljtatäki ukanaka; ⁴ ukampisa janiw aknïri animalanakan aychap manq’apxätati, khisthurïskpasa, jan ukax kayu sillunakapas payar jaljtatäskpan: “Camello, tejón, jach’a jinchun wank’u, uka animalanakan aychap janiw manq’apxätati, qawqhas khisthurïskpan, ukampis kayu sillunakapax janiw payar jaljtatäkiti. ⁷ “Khuchhi aychsti janirakiw manq’apxätati, khuchhin kayu sillunakapas payar jaljtatäskpan, ukampisa janiw khisthurïpkiti. Khuchhirux q’añu animalat uñt’apxäta. ⁸ “Uka animalanakan aychapsti janipuniw manq’apxañamäkiti, janirakiw uka jiwat janchinakapsa llamkt’apxañamäkiti. Uka animalanakarusti q’añu animalanakat uñt’apxäta. ⁹ “Kawkïri animalanakatix qutansa, jan ukax jawiranakansa jakapki ukanakatxa, kawkïrinakatix chhiqhanakanïpki, k’ilinakanïpki ukanakak manq’apxäta. ¹⁰ Ukampis kawkïrinakatix jan chhiqhanakanïkani, janirak k’ilinakanïkani uka animalanakxa, janiw manq’apxañamäkiti, jach’a qutana, jan ukax jawir umanakan utjirinakäskpasa. Ukanakarusti jan wali animalanakat uñt’apxañamawa, jiwat janchip uñxatasas axtasipxañamawa. ¹³ “Akïr jamach’inaksti janiw manq’apxätati; jan ukasti axtaskañ jamach’inakat uñt’apxäta: Paka, jach’a pakali, quta pakali, milano, tiptiri, allqamari, suri, ch’usiqa, qillwa, gavilanes, cormorán, ibis, siwiq’ara, juku, cisne, pelícano sat quta jamach’inaka, cigüeña, waq’ana, abubilla sat jamach’i, chiñi, taqi ukanaka. ²⁰ “Kawkïr jisk’a laq’unakatix chhiqhanakanïpki, ukat pusi kayut sarnaqapki ukanakax axtaskay laq’unakat uñt’apxäta. ²¹ Ukampisa aka laq’unakatxa kawkïrinakatix jach’a kayunïtapat uraqin thuqnaqapki ukanak manq’asipkasmawa. ²² Ukhamax kunayman t’iju t’ijunaka, grillonak manq’apxäta. ²³ Ukampis kawkïri laq’unakatix chhiqhanakanïpki, ukat pusi kayupampi sarnaqapki ukanakarux jan wali laq’unakat uñt’apxäta. ²⁴ “Jumanakax aka luräwinak lurasax, q’añuchataw uñjasipxäta: “Khititix uka jiwat animalanakar llamkt’kani ukasti, jayp’thapiñapkamax q’añupuniw uñjasini. ²⁵ “Khititix uka jiwat animalanak aptkani ukasti, isipxa t’axsuqasxañapawa, ukampis jayp’thapiñapkamax q’añukipunïskaniwa. ²⁶ “Kawkïr animalan kayu sillunakapatix payar jan jaljtatäkani, jan ukax janis khisthurïkchini ukanakxa, q’añu animalanakatpun uñt’apxäta, khititix uka animalar llamkt’kani ukax q’añurakiw uñjasini. ²⁷ “Kawkïri pusi kayuni animalanakatix sarnaqañatak kayu qutunakapampi takt’asipki ukanakarux, q’añu animalanakat uñt’apxäta. ²⁸ Ukhamaraki, khititix uka jiwat animalanakar llamkt’kani ukanakax, jayp’thapiñapkam q’añukipuniw uñjasipxani, isinakapsa t’axsuqasipxañapawa, jumanakasti uka animalanakarux q’añu animalanakat uñt’apxäta. ²⁹ “Kawkïr laq’unakatix uraqinjam qatatnaqtapki ukanakarusti q’añu laq’unakat uñt’apxäta, ukanakasti akanakawa: Chayinaka, achakunaka, kunayman asirunaka, ³⁰ salamanquesas sata laq’unaka, cocodrilonaka, jararankhunaka, jisk’a jararankhunaka, camaleón sat jararankhunaka. ³¹ “Taqi animalanak taypinsti uka laq’unakarux q’añu laq’unakat uñt’apxäta. Khititix uka jiwat laq’unakar llamkt’kani ukasti, jayp’thapiñapkamaw q’añuchat uñjasini. ³² “Uka kipkaraki, uka jiwat animalanakan janchipatix lawat lurata yänakxaru, lip’ichit lurat yänakxaru, isinakxaru, jan ukax lurañataki yänakxaru liwxattani ukax, jayp’thapiñkamaw q’añuchat uñjasini. Q’umachañatakisti, umampi sum jariqatäñapawa. ³³ “Uka jiwat animalanakan janchipatix mä phukhxaru liwxattani ukaxa, taqi kunatix uka phukhun utjki ukax q’añut uñt’atäxaniwa, uka phukhusti p’akjatäxañapawa. ³⁴ Uka phukhun utjir umatix kuna manq’añxarus ch’aqxatani ukax, q’añut uñt’atäniwa; ukatsti kuna umatix uka phukhun utjkani ukas q’añut uñt’atarakïniwa. ³⁵ Uka jiwat animalan janchipatix mä qhiri patxar liwxattani ukasti, q’añut uñt’atäxaniwa; taqi ukanakasti t’unjatäñapawa. Ukanaksti q’añuchat yänakat uñt’apxarakïta. ³⁶ “Taqi khitinakatix uka jiwat animalanakan janchip llamkt’apkani ukanakasti, q’añut uñt’atapunïniwa. Ukampis kawkha phuch’unakattix umax apsutäki uka phuch’ux q’umakipunïskaniwa. ³⁷ “Uka animalanakan jiwat janchipatix yapuchañ jatharu liwxattani ukasti, uka jathax q’umakïskaniwa; ³⁸ ukampisa uka jathatix umampi warxatasispa, ukat uka jiwat animalan janchipax ukxaru liwxattani ukapachasti, uka jathax q’añut uñt’atäniwa. ³⁹ “Kawkïri uywanaktix jumanakax manq’añatak uskusipkäyäta ukat uka uywax jiwxarakini ukasti, khiti jaqitix uka jiwat uywar llamkt’kani ukax, jayp’ukam q’añuw uñjasini; ⁴⁰ uka jiwat uywan aychap manq’kani ukasti, isipxa t’axsuqasxañapawa, ukatsti q’añurakiw jayp’ukam uñjasini; khititix uka jiwat uywar waysuñatak llamkt’kani ukasti, isipxa t’axsuqasxañapawa, jupasti jayp’ukamaw q’añuchat uñjasini. ⁴¹ “Uraqinjam qatatnaqtki uka laq’unakan aychapsti janipuniw manq’apxätati, uka laq’unakasti axtaskañ laq’unakawa. ⁴² “Uraqinjam qatatnaqtir animalanaksti janipuniw manq’apxätati, purakapamp uraqinjam qatatnaqtirïskpasa, pusi kayuta, jan ukax walja kayunakat sarnaqirïskpasa, uka laq’unakax wali axtaskañ laq’unakawa. ⁴³ Jumanakax uka qatatnaqtir animalanak manq’asax jan q’añuchasipxamti, janirak axtaskañas tukupxamti. ⁴⁴ Nayätwa jumanakan Tatit Diosamaxa. Jumanakasti q’umachasipxañamawa, ukatsti qullanäpxañamarakiwa, nayan qullanätax layku. Janipuniw jumanakax kawkïri laq’unakatix uraqinjam qatatnaqtapki ukanakampix q’añuchayasipxätati. ⁴⁵ Nayätwa Tatituxa, nayarakiw jumanakan Diosamäñaxatak Egipto markat irpsunipxsma. Jumanakax qullanäpxañamawa nayan qullanätax layku.” ⁴⁶ Taqi ukanakawa kunanakatix animalanak tuqitxa lurapxañamäki uka yatichäwinakaxa, jamach’inakxata, uman jakapki ukanakxata, uraqinjam qatatnaqtapki ukanakxatsa, ⁴⁷ ukhamat kunäkitix q’umaxa, q’añusa uk yatipxañamataki, ukhamarak kawkïr animalanakatix manq’añäki, jan manq’añäki ukanak yatipxañamataki.

¹ Tatitusti Moisesaruw säna: ² “Israelitanakar akham sarakim: Kunapachatix mä warmix usur jaqiptani, ukatsti mä yuqall wawa wawachasini ukkhasti, uka warmix paqallqu urukamaw q’añu uñjasini, kunjämatix phaxsi wila urunakapan uñjasirïki ukhama. ³ Uka yuqall wawasti kimsaqallqu uru saraqataruw circuncisión luräwi katuqani. ⁴ Ukampisa uka taykax kimsa tunka kimsani urunakampiw wila jutatapat q’umachasiskani. Kunanakatix Tatitur luqtatäki ukanaksti janipuniw llamkt’kaniti, q’umachasiñ urunakapan phuqhasiñapkamax janirakiw Tatitump Jikisiñ Carparus mantkaniti. ⁵ Ukampisa mä imill wawa wawachaskani ukkhasti, tunka pusin uruw q’añu uñjasini, kunjämatix phaxsi wila urunakapan uñjasirïki ukhama, ukatsti wila jutatapatxa suxta tunka suxtani urumpiw q’umachasiskakini. ⁶ “Kunapachatix q’umachasiñ urunakax phuqhasxani, wawapax yuqallächini, jan ukax, imillächini ukapachasti taykax Tatitump Jikisiñ Carpäkis uka nayraqataruw sarani, ukatsti mä marani urqu ovejampi, paloman chhiwchhipampi jan ukax, mä qhurukutumpi aparakini, juchat nakt’at wilañcha Tatitur luqtañataki. Uksti sacerdoteruw katuyani, ⁷ sacerdotex Tatitun nayraqataparuw ukanak luqtxani uka warmin juchapat pampachatäñapataki; ukhamat uka warmix wila jutatapat q’umachat uñjasxarakini.” Taqi ukanakawa mä yuqall wawana, jan ukax, mä imill wawan yuriñap tuqit yatichäwinakaxa. ⁸ Ukampisa uka taykantix mä urqu oveja alañataki qullqix jan utjarapkani ukapachasti, pä qhurukutu jan ukax paloman pä chhiwchhipa apanirakispa, mayax nakt’ayas luqtañataki, mayasti jucha luratat wilañcha luqtañataki; ukapachaw sacerdotex uka warmitak juchapat pampachatäñ mayini, uka warmisti q’umachataw uñjasxarakini.

¹ Tatitusti Moisesampiru, Aaronampiruw säna: ² “Kunapachatix khitin janchipansa p’usux uñstani, jan ukax phallanuqatänisa, jan ukax janchipan janq’u janchisa uñstani, jan ukax, lepra usur uñtat kuna llixtinak uñstani ukkhasti, uka jaqix Aarón sacerdoten ukar irpatäñapawa, jan ukax Aaronan yuqanakapat maynïri sacerdoten ukarusa. ³ Sacerdotew uka jaqin janchipan llixtjtatap sumpach uñxatani, ukatsti llixtinkki uka ñik’utatix janq’ur tukxchi, ukatsti uka llixtis janchi manqhar mantatäxchixa, amuyatarjamasti uka llixtix lepra usütap yatisxani. Sacerdoten uka jaqir ukham sum uñxatasinxa, q’añütap qhanañchxarakini. ⁴ “Ukat janchipantix janq’u janchix utjaspa, ukampis janirak ukax janchit sipan juk’amp manqhar mantatäkaspa ukapachasti, sacerdotex paqallqu uruw uka usut jaqirux jist’antani. ⁵ Uka paqallqu urunak qhipatsti, sacerdotex wasitat uka usut jaqir uñxatani, ukat uka llixtitix pachpakïskani, janiraki juk’ampi aqatatatäkchi ukkhasti, wasitat uka jaqirux yaqha paqallqu urumpi jist’antani. ⁶ Uka paqallqu urunak qhipatsti wasitat sacerdotex uka usut jaqirux uñxatani, ukat uka llixtitix niya chhaqtaskchixa, janirak juk’amp aqatatkchi ukkhasti, sacerdotex uka usut jaqirux q’umat uñt’xani, uka usun janchina aliqa mä jisk’a llixtikïtap layku. Usut jaqisti isip t’axsuqasxani, ukat q’umaw uñjasxarakini. ⁷ “Ukampis uka llixtitix sacerdoten uñxatat qhipatsa, q’uma jaqit uñt’atatsa juk’ampi aqatataskakini ukkhaxa, sacerdoten ukaru wasitat uñjayasir sarañapawa. ⁸ Ukatsti sacerdotex wasitat uñxatasinxa, uka llixtitix juk’ampi taqpach janchipar aqatatatätap amuyxani ukkhasti, sacerdotex uka jaqirux q’añu jaqit qhanañchxani, uka jaqin lepra usunïtap layku. ⁹ “Kunapachatix maynix lepra usumpi llixtjtatäni ukkhaxa, sacerdoten ukar irpatäñapawa. ¹⁰ Sacerdotew juparux sum uñxatani, ukat uka janchin p’usupatix janq’üchi, janchi ñik’utas janq’ur tukutächi, p’usutäkis uka janchin wawa janchir tukutächixa, ¹¹ uka jaqix jan qullkay lepra usuniwa. Uka jaqirusti sacerdotex q’añu jaqit qhanañchxañapa, ukatsti janiw jist’antatäñapax wakiskxaniti, q’añu jaqïxatap layku. ¹² “Ukat uka lepra usutix jank’aki aqatatani, kayut p’iqikama q’al chhaqtayani, kawkhakamatix sacerdotex uñjkaspa ukkhakama ukasti, ¹³ sacerdotex uka usut jaqirux sum uñxatani; uka usutix taqpach janchip chhaqtaychi, uka usun janq’u tukxatap laykuxa, sacerdotex uka jaqir q’uma jaqit qhanañchxani, jupasti q’umaw uñjasxarakini. ¹⁴ Ukampisa kunürutix uka jaqin janchipan wawa janchik uñstxani ukapachasti, uka jaqix q’añu jaqit uñt’atäxaniwa. ¹⁵ Ukhamasti sacerdotex uka wawa janchi sum uñxatani, ukatsti q’añütap qhanañchxarakini, uka wawa janchix q’añu, lepra usütap layku. ¹⁶ “Ukampis uka wawa janchitix janq’ur tukxani ukkhasti, uka usut jaqix sacerdotempi ¹⁷ uñxatayasir sarañapawa, sacerdotetix uka llixtin janq’ur tukxatap uñjani ukapachasti, uka jaqirux q’uma jaqit qhanañchxani, q’umäxatap layku. ¹⁸ “Kunapachatix mayni jaqin janchipan mä llixtix uñstani, ukat uka llixtix jakxarakini, ¹⁹ ukatsti uka p’usux janq’ur tukxani, jan ukax janq’u wilaratas tukxani ukkhasti, uka jaqix sacerdoten nayraqataparuw uñstañapa. ²⁰ Uñxatasintix sacerdotex uka janchin kawkhatix p’usutäki ukkhax juk’amp janchi manqhankatapa, ñik’utas janq’ur tukutap uñjani ukkhasti, sacerdotex uka jaqirux q’añut qhanañchxarakini, uka llixtin lepra usütap layku. ²¹ Ukampis sacerdotetix uka llixtjtatäki ukkhan janq’u ñik’uta jan utjatap uñjani, janirak uka llixtis janchir juk’amp manqhar mantatapa, jan ukasti chhaqtaskatapa, ukapachasti sacerdotex uka jaqirux paqallqu uruw yaqha chiqan jist’antat utjayani. ²² Ukatsti uka llixtitix juk’ampi janchipar aqantaskakini ukapachasti, sacerdotex uka jaqirux q’añut qhanañchxarakini, lepra llixtinïtap layku. ²³ Ukampisa uka llixtjata chiqatix jan juk’ampi aqatatkani ukkhasti, sacerdotex juparux q’uma jaqit qhanañchxarakini. ²⁴ “Kunapachatix maynix janchip qhathsuyasini, ukatsti uka qhathsuta wawa janchi patarutix wila, jan ukax, janq’u llixtis uñstkani ukkhasti, ²⁵ sacerdotew uñxatañaparaki. Uka janchin t’arwapatix janq’ur tukxani, uka llixtis janchir juk’ampi manqhar mantani ukkhasti, uka nakhantat janchinxa lepra usun sartatapaw yatisini; ukhamasti sacerdotex uka jaqirux q’añut uñt’xani, lepra usunïtap layku. ²⁶ Ukampis sacerdotetix uñjani uka llixtjtatäki ukkhan janq’u ñik’utax jan utjatapa, janirak uka llixtis janchir juk’amp manqhar mantatapa, jan ukasti chhaqtaskatapa, ukapachasti sacerdotex uka jaqirux paqallqu uruw yaqha chiqan jist’antat utjayani. ²⁷ Ukat uka paqallqu urunaka phuqhasxipansti, sacerdotex wasitat uka jaqirux uñxatani, ukatsti uka llixtitix juk’ampi janchipar aqantaskakini ukapachasti, sacerdotex uka jaqirux q’añu jaqit qhanañchxani, uka llixtin lepra usütap layku. ²⁸ Ukampisa uka llixtitix jan juk’ampi janchin aqatatkani, ukatsti chhaqtaskarakini ukkhasti, uka llixtix janchi qhatsutat p’usutakiwa, ukhamasti sacerdotex uka usut jaqirux q’uma jaqit qhanañchxani, uka llixtix janchi qhatsutat t’iri jakthapiskatap layku. ²⁹ “Kunapachatix mä chachana, jan ukax mä warminsa p’iqipana, jan ukax sunkhapansa mä llixtix uñstani ukkhasti, ³⁰ sacerdotew uk uñxatañapa. Uka llixtitix janchit juk’ampi manqharu mantatäni, ñik’utasa jan ukax sunkhas chuchirkipstatäni, ukatsti mä mayakirakïni ukkhasti, sacerdotex uka jaqirux q’añu jaqit uñt’xani, tiña sat yaqha lepra usunïtap layku. ³¹ Uka llixti uñxatasatix sacerdotex uka llixtin janchir jan juk’amp mantatap uñjani, ñik’utapasa, jan ukax sunkhapas ch’iyarar jan tukutäkchi ukaxa, uka usut jaqirux paqallqu uruw yaqha chiqan jist’antat jakayani. ³² Paqallqu uru qhipatsti, sacerdotex wasitat uka jaqin janchip uñxatani, uka llixtitix jan juk’ampi aqatatatäkani, janchi manqharus juk’amp jan mantatäkani, janirak ñik’utapasa, sunkhapas chuchïkani ukkhasti, ³³ sacerdotex uka jaqirux ñik’utapsa, sunkhapsa q’al mururasiyani, kawkhatix llixtjtatäki uka chiqak jilt’ayani, ukatsti yaqha paqallqu urumpi yaqha chiqan jist’antat jakayani. ³⁴ Uka paqallqu urutsti sacerdotex wasitat uka jaqin janchip uñxatani, ukat uka llixtitix jan juk’ampi aqatatatäkchi, janirak juk’ampi janchi manqharus mantatäkchi ukapachax, sacerdotex uka jaqirux q’uma jaqit uñt’xani, ukat uka jaqix isip t’axsuqasxani, ukatsti q’uma jaqit uñt’atäxarakiniwa. ³⁵ Ukampisa uka llixtitix q’uma jaqit uñt’atäxatap qhipat juk’ampi aqatataskakini ukkhasti, ³⁶ sacerdotex wasitat uka usut jaqirux uñxatani, ukat uka llixtitix juk’amp aqatatatakïskani ukapachasti, janiw chuchi ñik’uta thaqhañax munaskxaniti, jan ukasti uka jaqix q’añuta uñt’atakïxaniwa. ³⁷ Ukampis sacerdotetix uka llixtin juk’ampi jan aqatatatap uñjani, ch’iyar ñik’utas jilsunkchi ukasti, uka llixtin niya jakthapiskatap amuyxani, ukapachaw sacerdotex uka jaqirux q’uma jaqit qhanañchxani. ³⁸ “Kunapachatix mä chachana jan ukax mä warmin janchiparus janq’u chhayphu llixtjama uñstkani ukapachasti, ³⁹ ukax janchin mä jisk’a usukïtap amuyasini, ukatsti uka jaqix q’umakïskaniwa. ⁴⁰ “Mä jaqirutix p’iqi ñik’utapax willirtxchi, ukat p’iqi q’ara uñjasxarakchi ukkhasti, uka jaqix q’uma jaqit uñt’atäskiwa. ⁴¹ Mayni jaqirutix ñik’utapax nayräxa tuqit willirtxchi, ukat p’iqipan nayräxa tuqit q’ara uñjasxchi ukapachasti uka jaqix q’umäskiwa. ⁴² Ukampisa mä janq’u wila llixtitix p’iqi q’arawjan uñstkani ukkhasti, ukax p’iqi q’arawjan lepra usu sartaskatap sañ muni. ⁴³ Ukhamïpansti, sacerdotew ukxa sum uñakipani, uka llixtitix p’iqi q’arawjan janq’u wiläni, kunjämatix lepra usux janchin mistki uka kipkäni ukkhasti, ⁴⁴ uka jaqix lepra usuniwa, ukatsti sacerdotex q’añu jaqit qhanañchxani. ⁴⁵ “Khititix lepra usunïki ukax ch’iyanuqat isimpiw uchasini, p’iqipasti q’arakiraki, ajanupas chikat imt’ataw akham sas arnaqasini: ‘¡Q’añütwa! ¡Q’añütwa!’ sasa. ⁴⁶ Uka llixtinakapan utjañapkamasti uka jaqix q’añut uñt’atäniwa, sapakirakiw campamentot anqäxana jakani. ⁴⁷ “Kunapachatix kuna q’añus t’awrat lurata, jan ukax linot lurat isin uñstani, ⁴⁸ jan ukax lip’ichit lurat mä kuna yänakansa uñstani, ⁴⁹ ukat uka q’añutix ch’uxñaptani jan ukax wilaptanisa, ukapachasti ukax lepra usütap qhanañchani, uksti sacerdoteru uñacht’ayatäñapawa. ⁵⁰ Sacerdotew uka q’añuchat isi uñxatani, ukatsti paqallqu urutakiw q’añuchat yänak yaqhachas jist’antani. ⁵¹ Paqallq uru qhipatsti sacerdotex wasitat uñxatani, ukat uka q’añutix p’itat isinakana, lip’ichit lurat yänakan juk’ampi aqatatatäni ukapachasti, uka q’añux lepra usütapaw yatisini, uka yänakasti q’añuta uñt’atäxarakiniwa. ⁵² Ukhamasti kawkïri yänakatix ukham q’añuchjatäni ukanakasti q’ala nakhantayatäxañapawa, jan wali lepra usütap layku; ⁵³ ukampis sacerdotetix uka q’añun jan juk’ampi aqatatatap uñjani ukkhasti, ⁵⁴ sacerdotex uka isinak t’axsuqatäñapatakiw mayini, ukatsti uka yänakax paqallqu urunakampi jist’antatarakïniwa. ⁵⁵ “Uka isinak t’axsutat qhipatsti, sacerdotex wasitat uñxatani. Uka q’añun jan chhaqtataptix amuyani ukkhasti, jan walt’ayir q’añütap laykusti, uka yänakax phichkatatäñapawa. ⁵⁶ Uka q’añu uñxatasintix sacerdotex amuyani ukax t’axsuqatäxatapat chhaqtxatapa, ukapachasti, q’añüki uka chiqsti isitsa, jan ukax lip’ichitsa ch’iyaqañapawa. ⁵⁷ Ukampis wasitattix uka isina, jan ukax uka lip’ichit lurata yänakansa uka q’añux aqatatat uñstani ukapachasti, uka yänakax q’ala nakhantayatäxañapawa. ⁵⁸ Ukampis t’axsuta qhipat q’añux chhaqtani ukaxa, wasitat t’axsuqatäñapawa, ukat q’umachat yänakäxarakini.” ⁵⁹ Akanakaw isin utjir lepra usun yatichäwinakapaxa, t’awrat lurat isinakansa, jan ukax lip’ichit lurat yänakansa uñstpan, ukhamat uka yänakarux q’umata jan ukax q’añutsa uñt’xañataki.

¹ Tatitusti Moisesaruw parläna, akham sarakïnwa: ² “Akanakaw mä lepra usuni jaqin q’umachasiñapxat yatichäwinakaxa: Usut jaqix sacerdoten nayraqatapar irpatäniwa, ³ sacerdotesti uka jaqirux campamento anqäxan uñxatani. Uka usut jaqitix k’umar jikxatasxani ukapachasti, ⁴ sacerdotex uka jaqin q’umachasiñapatakix jakaskir suma q’uma pä jamach’inak aptayanini, ukhamarak cedro lawampi, mä wila isimpi, hisopo alimpi. ⁵ Mayïr jamach’xa ñiq’i phukhu patxaru jiwayañapatakiw mayini, uka phukhusti jalsur phuch’ut aptanita umanirakïniwa, ⁶ Ukatsti, jakaski uka jamach’impi, cedro lawampi, wila isimpi, hisopo sat alimpi katurakini, ukatsti jiwat jamach’in wilapampiw taqi uka yänakaru, jakaski uka jamach’irus ch’allsuni uma jalsut aptanit uma patxaru. ⁷ Ukatsti kawkïri jaqitix uka lepra usut q’umachatäkani ukarux paqallqu kutiw uka wilampi ch’allsuni, ukat q’umätap qhanañchxarakini. Jakaskiri jamach’irusti antutnukxarakiniwa. ⁸ “Uka q’umachasiri jaqisti isinakap t’axsuqasxañapawa, jupas jariqasxañaparakiwa, ñik’utapsa, taqpach janchipan utjki uka t’arwanaksa q’al mururasiñapa, ukhamat q’uma uñjasxañapataki. Ukapachakiw wasitat campamentor mantxaspa, ukampisa paqallqu urunakampiw chhujllapat anqäxan jakañapa. ⁹ Paqallqu urunaka phuqhasxipansti, wasitampiw ñik’utapsa, sunkhanakapsa mururasxani, nayra phichhunakapsa, janchipan utjki uka t’arwanaksa q’al khithurasxani, ukhamarak isinakapsa t’axsurasxani, jupas jariqasxarakini, ukapachaw taqpach q’umachat uñjasxani. ¹⁰ “Kimsaqallqu ururusti jan kunas kamacht’at pä urqu ovejampi, marani mä qachu ovejampi, suxta kilo chikatan aceitempi chapt’at suma jak’umpi, ukxarusti niya chikat litro aceitempi, taqi ukanaksti waxt’a luqtañatak apaniñapawa. ¹¹ Kawkïri sacerdotetix q’umachkani ukasti, q’umachatäkani uka jaqiru, kuna waxt’anaktix luqtañatak apankani ukanakampirux, Tatitump Jikisiñ Carpar mantañäkis uka nayräxaruw uchani, Tatitun nayraqataparu; ¹² ukatsti maynïr urqu ovejampi, uka chikat litro aceitempi katusaw jucha luratat mä wilañchäkaspas ukham luqtani, kunjämtix Tatitur luqtañäki ukham lurasa. ¹³ Uka urqu ovejsti kawkhantix wilañcha luqtañataki uywanakax kharinukusirïki ukkhan kharinukxañapa. Sumankthapiñataki, ukhamarak jucha luratat wilañchanak luqtäwisti sacerdotetakïniwa, ukanakan qullana yänakätap layku. ¹⁴ “Ukatsti sacerdotex jucha luratat luqtatäkis uka uywan wilapampi luk’anapar juricht’asaw kawkïri jaqitix q’umachasiski ukan kupi jinchuparu, kupi amparapan tayka luk’anaparu, kupi kayupan tayka luk’anaparuw jawintani. ¹⁵ Ukatsti mä juk’a aceite aptasaw ch’iqa ampar qutapar warxatani; ¹⁶ kupi amparapan wikucht’ir luk’anapsti, uka aceiteruw juricht’ani, ukampirakiw paqallqu kuti Tatitun nayraqatapar ch’allt’ani. ¹⁷ Amparapan jilt’kani uka aceitempisti, kawkïri jaqitix q’umachasiski ukaruw kupi jinchupata, kupi amparapan tayka luk’anapata, kupi kayupan tayka luk’anapat jawirt’ani, uksti juchata wilañcha luqtat uywan wilap patxan lurarakini. ¹⁸ Ukat jilt’ki uka aceitxa, kawkïri jaqitix q’umachasiski ukan p’iqiparuw warxatani. Ukhamat sacerdotex uka jaqin juchapat pampachatäñ jikxatani. ¹⁹ Ukatsti sacerdotex jank’akiw kuna wilañchatix juchat luqtatäki uk luqtxani, ukhamat uka jaqin q’umäxañapataki; ukxarusti kawkïri uywatix nakt’ayasin luqtañäki uk luqtxarakini, ²⁰ uksti altarxaruw luqtani, granonakat waxt’a churatäkis ukanakamp chika. Ukhamat sacerdotex uka jaqin juchapat pampachatäñ jikxatani, uka jaqisti q’umaw uñjasxarakini. ²¹ “Q’umachaskani uka jaqitix wali t’aqhin jakani, janirak qullqipas taqpach jikxatañatak utjarapkani ukapachasti, mä urqu ovejak jucha luratat wilañcha luqtañatak apanini, uksti mä suma waxt’äkaspas ukham juchanakapat pampachatäñ jikxatañatakiw luqtani, ukxarusti aceitempi chapt’ata pä kilo suma jak’u apanini, ukax granonakat mä waxt’a luqtäwïkaspas ukhama, niya chikat litro aceitempi, ²² pä qhurukutumpi jan ukax pä paloma chhiwchhimpi, qawqhatix qullqipax utjarapki ukhamarjama; mayax jucha luratat wilañcha luqtañataki, mayasti taqpacha nakt’ayas waxt’a luqtañataki. ²³ Kimsaqallqu ururusti, q’umäxañatakix taqi ukanak sacerdoten ukar apani; taqi ukanaksti Tatitun nayraqatapan Tatitump Jikisiñ Carpapäkis uka nayraqatan katuyani. ²⁴ Sacerdotesti, kawkïri ovejatix jucha luratat wilañcha luqtañatak wakichatäki ukampi, uka niya chikat litro aceitempi, ukanaksti Tatitun nayraqataparuw mä suma waxt’äkaspas ukham uñstañapatak katuyxani; ²⁵ kawkïri ovejatix juchat luqtatäkani uk kharinukuni, ukat uka ovejan wilapampiw kawkïri jaqitix q’umachasiski ukan kupi jinchupat jawt’ani, ukhamarak kupi amparapan tayka luk’anapatsa, uka kipkaraki kupi kayupan tayka luk’anapatsa; ²⁶ ukatsti mä juk’a aceite aptasaw ch’iqa ampar qutapar warxatani; ²⁷ kupi amparapan wikucht’ir luk’anapsti, uka aceiteruw juricht’ani, ukampiw paqallqu kuti Tatitun nayraqatapar ch’allt’ani. ²⁸ Amparapan jilt’kani uka aceitempisti, kawkïri jaqitix q’umachasiski ukaruw kupi jinchupata, kupi amparapan tayka luk’anapata, kupi kayupan tayka luk’anapat jawirt’ani, uksti juchata wilañcha luqtat uywan wilap patxan lurarakini. ²⁹ Ukat jilt’ki uka aceitxa, kawkïri jaqitix q’umachasiski ukan p’iqiparuw warxatani, ukhamat uka jaqin Tatitut juchanakapat pampachatäñ jikxatxañapataki. ³⁰ Ukxarusti sacerdotex mayïri qhurukutu, jan ukax mä paloma chhiwchhi luqtxani, kunjämarutix q’umachasiri jaqix apankani ukhamarjama. ³¹ Mayïr qhurukutux jucha luratat wilañcha luqtäwitakïniwa, mayïristi nakhantayat luqtäwitakirakïniwa, granonakat waxt’a luqtaski ukanakamp kuna. Ukhamat sacerdotex q’umachasir jaqin juchapat pampachatäñ jikxatani.” ³² Taqi ukanakaw yatichäwinakax kawkïri jaqinakatix lepra usuni uñstkani ukanakatakixa, khitinakatix q’umachasïwipan walja luqtanak jan churirjamäpki ukanakataki. ³³ Tatitusti Moisesampiru, Aaronampiruw akham säna: ³⁴ “Kunapachatix jumanakax Canaán uraqir mantxapxäta, kawkïr uraqtix nayax jumanakar churapxsma ukaru, ukat nayax uka markan yaqhip utarus lepra usu apayankä ukkhaxa, ³⁵ uka utanix sacerdoter uñjiriw sarani, ukatsti sarakiniwa: ‘Amuyatax utaxan pirqanakapan lepra usjamakiw utji’ sasa. ³⁶ “Sacerdotesti janïra uka utar mantkasaxa, uka utat taqin mistxañap mayini, ukhamat kunanakatix uka utan utjki ukanakan jan q’añur tukuñapataki. Ukat sacerdotex uka lepra usu uñxatir mantani. ³⁷ “Sacerdotetix uka lepra usun ch’uxñätapa, jan ukax wilätapsa amuyani, ukatsti pirqar juk’amp manqhar mantatätap uñjani ukkhasti, ³⁸ utat mistunisax, uka utan paqallqu uru jist’antatäñap mayini. ³⁹ Paqallqu uru phuqhasipansti sacerdotex wasitampiw uka lepra usur uñakipani, uka usutix uta pirqan juk’ampi aqatatatäni ukkhasti, ⁴⁰ kawkïr qalanakatix uka lepra usun q’añuchat uñstkani uka qalanak apsupxañapatakiw mayini, ukatsti uka qalanakxa markat anqäxaru kawkhatix q’añu chiqäki ukkhar willtanipxañapatakiw mayirakini; ⁴¹ uka kipkarakiw uka utan pirqanakap q’al khitsupxañap mayini, ukatsti uka pirqan laq’anakap markat anqäxaru, kawkhatix q’añu chiqäki ukkhar wartanipxañapataki. ⁴² Kawkïri qalanakatix apsutäkäna uka lantisti yaqha qalanak uskxapxani, ukatsti uka pirqxa yaqha ñiq’impiw lluch’katxapxani. ⁴³ “Ukham taqi ukanak luratattix uka lepra usun q’añupax uñstaskakini ukkhasti, ⁴⁴ sacerdotex wasitat uka utar mantasax uñakipani. Uka usutix wasitat uka utan aqatatatächixa, ukax jan qullkay lepra usütapa sañ muni, ukhamïpansti uka utax q’añu utat uñt’atäxaniwa. ⁴⁵ Ukhamasti uka utax allinukutäñapawa, uka laq’anakas markat anqäxaru q’añu chiqar apanukutäxañapawa. ⁴⁶ Khititix uka urunakan Sacerdoten jist’antayat utar mantkani ukasti, uka jaqix jayp’ukam q’añut uñt’atäniwa. ⁴⁷ Khititix uka utan manq’kani, jan ukax ikkani ukasa, q’umachasxañatakix isinakap t’axsuqasxañapäniwa. ⁴⁸ “Sacerdotetix uka utan lepra usu chhaqtxatap amuyxani ukkhasti, uka utarux q’uma utäxiwa sasaw qhanañchxani. ⁴⁹ Uka uta q’umachañatakisti pä jamach’i katuni, cedro lawampi, mä wila isimpi, ukhamarak hisopo sat alimpi. ⁵⁰ Uka jamach’inakatsti mayïrwa mä ñiq’i phukhxaru jiwayani, uka phukhusti phuch’ut aptanita umanïñapawa. ⁵¹ Ukatsti, cedro lawampi, hisopo sat alimpi, wila isimpi, jakaski uka jamach’imp katuni, ukatsti jiwat jamach’in wilapampi, uma jalsut apsunit umampiw taqi uka yänakaru, jakaski uka jamach’irus q’al ch’allsuni, utarusti umampix paqallqu kutirakiw ch’allsuni. ⁵² Ukham uka uta q’umachani uka jamach’in wilapampi, jalsu umampi, jakaskiri jamach’impi, cedro lawampi, hisopo sat alimpi, wila isimpi kuna. ⁵³ Uka qhipatsti marka anqäxaruw uka jakaskir jamach’irux antutxani, ukhamat kunatix uka uta q’umachañatakix munaski ukanakampix phuqharakini.” ⁵⁴ Taqi ukanakaw lepra usunakata, jan ukax tiña sat usunakat q’umachasiñatak yatichäwinakaxa, ⁵⁵ isinakan uñstkani, jan ukax uta pirqanakansa uñstkani ukapacha, ⁵⁶ ukhamarak p’usunakasa, janchi phallaratanakasa, jan ukax llixtjamas janchin uñstkani ukanak q’umachasiñataki, ⁵⁷ ukhamat kunatix q’umäki, q’añükaraki ukan yatisiñapataki. Akkhakamaw lepra usunak tuqit yatichäwinakaxa.

¹ Tatitusti Moisesampiru, Aaronampiruw akham sarakïna: ² “Israelitanakarux akham sapxam: Kunapachatix mä chachax usutäkasin chhuxurasiñapat aliqak jathap aywiyxani ukkhax, uka jaqix q’añut uñt’atäxaniwa. ³ Ukham usutäsin maynitix jathap aliqak aywiyatapata, jan ukax uka pachpa jathas chhuxurasiñap llupantatapatxa, uka jaqix q’añut uñt’atakipunïniwa. ⁴ “Kawkharutix uka usut jaqix ikt’kani uka chiqasti q’añut uñt’atäxaniwa. “Kawkharutix uka jaqix qunt’kani uka chiqas q’añut uñt’atäxarakiniwa. ⁵ “Khititix uka jaqin ikiñap llamkt’kani ukasti, isip t’axsuqasxañapawa, jupa kipkas jariqasxañaparakiwa, ukampis jayp’ukamax q’añut uñt’atakïskaniwa. ⁶ “Khititix uka usut jaqin qunuñapar qunt’kani ukasti, isip t’axsuqasxañapawa, jupa kipkas jariqasxañaparakiwa, ukampis jayp’ukamax q’añut uñt’atakïskaniwa. ⁷ “Khititix uka usut jaqir llamkt’kani ukasti, isip t’axsuqasxañapäniwa, jupa kipkas jariqasxañapawa, ukampis jayp’thapiñapkamax q’añut uñt’atakipunïskaniwa. ⁸ “Jathap aywiyir usut jaqitix mayni q’uma jaqir thuskatani ukasti, uka jaqix isip t’axsuqasxañapawa, jupa kipkas jariqasxañaparakiwa, ukampis jayp’thapiñapkamax q’añut uñt’atakipunïskaniwa. ⁹ “Uka usut jaqitix caballor qunxatañ qunuñar qunxatani ukasti, uka qunuñax q’añut uñt’atäxaniwa. ¹⁰ “Khititix uka jathap aywiyir usut jaqin mä kuna qunt’atapxarus llamkt’kani, jan ukax uka yänaksa aptawaykani ukax, isip t’axsuqasxañapawa, jupa kipkas jariqasxañaparakiwa, ukampis jayp’thapiñapkamax q’añut uñt’atakïskaniwa. ¹¹ “Uka usut jaqitix amparap jan jariqasis yaqha jaqir llamkt’kani, uka llamkt’at jaqisti isip t’axsuqasxañapawa, jupa kipkas jariqasxañaparakiwa, ukampis jayp’thapiñapkamax q’añut uñt’atakipunïskaniwa. ¹² “Uka usut jaqitix mä ñiq’i phukhurus llamkt’kani, uka phukhux p’akjatäxañapawa; lawat lurat yänakas jariqatäxañapawa. ¹³ “Uka jaqitix usupat k’umarachasxani ukkhasti, q’umachasiñapatakix paqallqu uru suyt’añapawa, isinakap t’axsuqasxani, jupa kipkas jalsu umampiw jariqasxarakini, ukapachakiw q’umachatäxani. ¹⁴ Kimsaqallqu ururusti pä qhurukutu jan ukax pä paloma chhiwchhinak apanini, ukanaksti Tatitump Jikisiñ Utäkis uka nayräxan Tatitun nayraqatapan sacerdoter katuyxani. ¹⁵ Sacerdotesti mayxa jucha luratat wilañcha luqtxani, maysti nakt’ayasaw luqtxarakini, ukhamat Tatitun nayraqatapan jatha aywiyir usun jaqitakix q’umachasïwi lurañ phuqxani. ¹⁶ “Mä chachatix inamayak jathapsa wartkani ukkhax taqi janchip umampiw jariqasxani, ukatsti jayp’thapiñapkamaw q’añut uñt’atarakïni. ¹⁷ “Mä isirusa, jan ukax lip’ichit lurat kuna yänakxarusa uka jaqin jathapax ch’aqxatani ukax umampi t’axsuqatäxañapawa, ukanakasti jayp’thapiñkamax q’añut uñt’atäniwa. ¹⁸ “Mä chachatix mä warmimpi ikintasin mayachasipxani ukkhasti, panpachaniw umampi jariqasxapxañapa, ukatsti panpachanirakiw jayp’ukamax q’añut uñt’at qhiparapxani. ¹⁹ “Mä warmitix phaxsi wilapampïni ukasti, paqallqu uruw q’añut uñt’atäni. “Khititix uka warmir llamkt’kani ukasti, jayp’thapiñapkamax q’añut uñt’atäniwa. ²⁰ “Kawkharutix uka warmix phaxsi wilanïkasin ikt’kani ukax, uka ikiñapax q’añut uñt’atäniwa. “Kawkharutix qunt’askani uka chiqas q’añut uñt’atarakïniwa. ²¹ “Khititix uka phaxsi wilan warmin ikiñap llamkt’kani uka jaqix isip t’axsuqasxañapawa, jupa kipkas jariqasxañaparakiwa, ukatsti jayp’thapiñapkamax q’añut uñt’atakipunïskaniwa. ²² “Khititix uka warmin mä kunar qunxatatapxarus llamkt’kani ukasti, isip t’axsuqasxañapawa, jupa kipkas jariqasxañaparakiwa, ukatsti jayp’thapiñapkamax q’añut uñt’atakipunïskaniwa. ²³ Uka warmin ikiñapsa jan ukax mä kunapsa maynix llamkt’kani ukkhax jayp’thapiñapkamax q’añut uñt’atakipunïskaniwa. ²⁴ “Mä chachatix uka phaxsi wilan warmimpi ikintani ukkhax uka phaxsi wilapampi q’añuchjataw uñjasini, ukatsti paqallqu urunakaw q’añut uñt’at jikxatasini, kawkha chiqarutix uka jaqix ikintkki uka chiqas q’añut uñt’atarakïniwa. ²⁵ “Mä warmitix jan phaxsi wilanïkasin walja urunak wila sarayasini, jan ukax phaxsi wilapas saraqirïki ukat walja urunakampi saraskakini ukapachax, uka warmix wilapan sayt’añapkamax q’añut uñt’atäniwa, phaxsi wilanïkaspasa ukhama. ²⁶ “Kawkharutix uka wila apayasir warmix ikt’kani, jan ukax kunanakxarus qunxatkani ukanakax q’añut uñt’atäxaniwa, kamisatix phaxsi wilapan saratax q’añut uñt’atäki ukhama. ²⁷ “Khititix uka yänak llamkt’kani ukasti q’añut uñt’atäxaniwa. Isip t’axsuqasxañapawa, jupa kipkas jariqasxañaparakiwa, ukatsti jayp’ukamax q’añut uñt’atakipunïskaniwa. ²⁸ “Kunapachatix uka wilapax t’akt’xani ukkhatsti, q’umäxañatakix paqallqu uruw suyt’ani. ²⁹ Kimsaqallqu ururusti pä qhurukutu jan ukax pä paloma chhiwchhinak apanini, ukanaksti Tatitump Jikisiñ Utäkis uka nayräxan Tatitun nayraqatapan sacerdoter katuyxani. ³⁰ Sacerdotesti mayxa jucha luratat wilañcha luqtxani, maysti nakt’ayasaw luqtxarakini, ukhamat uka wila apayasir warmix wasitat q’umäxarakini, ³¹ ukhamat jumanakax israelitanakarux q’añu lurañanakat jithiqtayapxäta. Jan ukhamäkani ukasti, uka qullan chiqar q’añunakampi phuqhantapxatapat jiwarapxaniwa.” ³² Aka iwxt’anakasti, kawkïr chachanakatix chhuxurasiñapat aliqak jathap aywiyxani, ukat q’añut uñt’atäpxaraki; ³³ ukhamarak kawkïri warminakatix phaxsi wilanïpki, jan phaxsi wilanïkasinsa wila sarayapki, chachanakas uka phaxsi wilani warmimpi ikintapki, taqi jupanakatakiwa.

¹ Tatitux Moisesampiw parläna Aaronan yuqanakapan jiwarxatap qhipata, jupanakasti Tatitun nayraqatapar sinti jak’achasipxatap laykuw jiwarapxäna. ² Ukat Tatitux Moisesar säna: Aarón jilamarux akham sas yatiyam, jan kuna pachas mantkpati kawkïr qullan chiqatix velo qhipäxan utjki uka chiqaruxa, janirak arcar qhupxatatäki uka nayraqatarus mantkpati, ukhamat jan jiwañapataki; nayasti mä qinay taypin uka juchat pampachayasiñäki uka qhuphiñ patxan uñstarakï. ³ Aaronasti uka qullan chiqarux mä urqu vaca irpt’ataw mantañapa, ukasti jucha luratat wilañcha luqtañatakiwa, ukhamarak mä urqu ovejampi, ukasti taqpach nakt’ayas luqtañatakirakiwa. ⁴ Kunatix sacerdoten isipäki uka isimpi isthapitaw mantani, linot lurat calzoncilloni, wak’amp chint’ata, linot lurat mä ch’uqañampi p’iqipar ch’uqt’ataraki. Aka isisti qullan isiwa, uka isimpi janïra isthapiskasax umampiw sum jariqasini. ⁵ “Israelita jaqinakatsti, Aaronax pä cabritompi mä urqu ovejampi apani, uka cabritonakxa jucha luratat wilañcha luqtani, urqu ovejsti taqpach nakt’ayasaw luqtarakini. ⁶ Jupan kipka juchapat uka urqu vaca wilañchat luqtani, ukhamat jupan juchapasa, wila masipan juchanakapas pampachatäñapataki. ⁷ Uka qhipatsti uka pä urqu cabrito Tatitur katuyxani Tatitump Jikisiñ Carpa nayraqatana; ⁸ ukxarusti uka pä cabritotxa, kawkïris Tatitutakïni, kawkïris Azazelatakïni uk yatxatarakini. ⁹ Kawkïri cabritotix Tatitutaki satäkani uksti Aaronax jucha luratat wilañcha luqtxani, ¹⁰ ukampis kawkïri cabritotix Azazelatakïkani uksti, jakkirpach juchat pampachatäñataki Tatitun nayraqatapar uñstayani, ukatsti uka cabritorux wasararuw Azazelatak antutnukxani. ¹¹ “Uka qhipatsti Aaronax jucha luratat uka urqu vaca wilañcha luqtxani, jupan pachpa juchapata, wila masipan juchanakapan pampachatäñapataki. ¹² Ukxarusti altarxan Tatit nayraqatan jikxataski uka sank’anakampi phuqxatat incienso q’aphichañ aptani, ukhamarak pä jach’i k’iyat suma q’apkir inciensompi, uksti velo qhipäxaruw apani, ¹³ uka inciensompisti, Tatit nayraqatan uka ninxaruw jach’xatani, uka incienson jiwq’ipasti Tatitumpi amtäwi arcapar qhupxatatäki ukaruw chhaqtayani. Ukhamat Aaronax jan jiwkaniti. ¹⁴ Ukatsti, Aaronax uka urqu vacan wilapar luk’anap juricht’asaw arcan qhuphiñapan maysäx thiyat ch’allt’ani. Ukxarusti paqallqu kutirakiw uka arcan qhuphiñap nayräxar ch’allt’ani, ¹⁵ uka qhipatsti jaqinakan juchanakapat mä wilañchäkaspas ukham luqtañatakiw cabritorux jiwayxani, wilapsti velo qhipäxaruw apxani; uka manqhan arcan qhuphiñaparux kunjämtix vacan wilapampix ch’allt’käna ukham ch’allt’arakini. ¹⁶ Ukhamat uka qullan chiqa taqi uka q’añunakat q’umachxani, israelitanakan Diosar saykatatapata, ukhamarak taqi jucha luratanakapatsa. Uka kipkarakiw Tatitump Jikisiñ Carpampis lurasiñapa, kawkïritix jupanak taypinkki, ukhamarak q’añu luratanakap taypinkki uka. ¹⁷ “Janipuniw khitis Tatitump Jikisiñ Utäkis uka jak’ankañapäkiti, Aaronan uka qullan chiqan jikxataskani taqinitak juchat pampachatäñ jikxatañapkama. Juchanakat pampachatäñ jikxatxani ukkhasti, ¹⁸ kawkïri altaratix Tatitun nayraqatapankki ukar q’umachañatakiw mistunini. Uka vacan wilapata, cabriton wilapat mä juk’a aptani, uka wilampix altaran waxranakaparuw jawikipani, ¹⁹ luk’anapampisti paqallqu kutiw altarar ch’allt’arakini. Ukhamat israelitanakan q’añu luratanakapax q’umachatäxani, ukatsti Tatituruw katuyxarakini. ²⁰ “Kunapachatix Aaronax uka qullan chiqa, Tatitump Jikisiñ Carpa, ukhamarak altarsa q’umachxani ukkhasti, jakaski uka cabritoruw aptayanini, ²¹ uka cabriton p’iqipxar amparap luqxatasasti, israelita jaqinakan ñanqha juchanak luratanakap arsuni. Ukhamat uka cabriton p’iqipxaru taqi juchanak apxatxani, ukatsti khititix uk apañatak ajllitäki ukaw uka cabrito irpasin wasarar antutnukunxani. ²² Uka cabritosti, taqi jaqinakan juchanakap q’ipt’ataw wasara uraqinak tuqir sarawayxani. ²³ Ukxarusti Aaronax Tatitump Jikisiñ Carparuw mantxani, kawkïri lino isimpitix qullan chiqar mantañatak isthapiskäna ukanak isirasiri, uka isinaksti uka chiqaruw jaytawayxarakini. ²⁴ Ukatsti qullan chiqan umampi jariqasxani, isthapisitatsti, jupa kipkat wilañcha luqtiri, taqi jaqinakatak luqtiriw mistunxani, ukampiw jupan juchanakapata, jaqinakan juchanakapatsa pampachasïwi jikxatani. ²⁵ Kawkïr uywatix jucha luratat wilañcha luqtatäkän ukan lik’inakapsti altarxaruw nakt’ayxani; ²⁶ ukxarusti, khititix Azazelataki uka cabrito wasarar apkäna ukasti, isip t’axsuqasxani, jupa kipkas umampix jariqasxarakiniwa, ukat campamentor mantanxani. ²⁷ “Jucha luratat wilañcha luqtatäkän uka urqu vacampi, cabritompi, ukanakan wilapas qullan chiqar juchanakat pampachasïwi jikxatañatak apatäkän ukanakax, campamentot anqäxar apatäxañapawa, lip’ichipasa, aychapasa, thaxanakapas taqpach nakhantayatäxaniwa. ²⁸ Khititix taqi ukanak nakhantaykani ukasti, isinakap t’axsuqasxañapawa, jupa kipkas umampix jariqasxañapawa, uka qhipat campamentor mantanxarakini. ²⁹ “Aka kamachinakasti jumanakatakix wiñayatakïniwa: paqallqüri phaxsina tunka uru saraqatarusti jumanakax ayunapxätawa, uka urusti janiw kunsa lurapxätati, taqi israelita jaqinaka, jaya markat jutasin jumanak taypin jakir jaqinakasa, ³⁰ ukürurakiw jumanakax Tatitun nayraqatapan juchanakamat pampachatäñ jikxatapxäta, taqi jucha luratanakamatsa q’umachataw uñjasxapxarakïta. ³¹ Aka kamachisti wiñayatakiwa: uka urusti jumanakatakix samaraña mä jach’a urüniwa, Tatitutak yaqhachata ayuno lurañ ururakïniwa. ³² Kawkïri sacerdotetix ajllitäkani jupaw kuna luqtañanakatix juchat pampachatäñatak wakiski ukanak luqtani; jupasti linot lurat sacerdote isimpiw isthapisini, ³³ juparakiw uka qullan chiqa, Tatitump Jikisiñäkis uka Carpampi, altarampi q’umachani, ukatsti sacerdotenakataki, taqi jaqinakatakis juchat pampachatäñ jikxatani. ³⁴ “Aka kamachisti jumanakatakix wiñayatakïniwa: maran mä kutiw akanak lurapxäta, kuna juchanaktix israelitanakax lurapkani ukanakat pampachatäñ jikxatapxañamataki.” Taqi ukanakasti, kunjämtix Tatitux Moisesar siskäna ukhamarjamapuniw phuqhasïni.

¹ Tatitusti Moisesaruw akham sarakïna: ² “Aaronampiru, yuqanakapampiru, taqi israelita jaqinakampirusa, kuntix Tatitux siski uka arunak akham sarakim: ³ “Mä israelitatix mä urqu vaca, mä ovejsa, jan ukax mä cabritsa, campamento anqäxana jan ukax campamento manqhansa jiwayani, ⁴ ukatsti janirak Tatitump Jikisiña Carpäkis uka nayraqatar Tatitur mä suma waxt’a luqtañatak apankani ukkhasti, wila wartatapat juchañchatäniwa, markap taypitsa apanukutäniwa. ⁵ Aka kamachisti kawkïri uywanaktix Israelitanakax pampan jiwayapki ukanak Tatitur luqtapxañapatakiwa, ukatsti Tatitump Jikisiñ Carpäkis uka nayraqatar apanisin sacerdoter churapxañapawa, ukhamat sacerdoten jupanakan Tatitumpi sumankthapiñatak wilañcha luqtxañapataki. ⁶ Sacerdotesti kawkïritix Tatitump Jikisiña Carpa nayräxankki uka Tatitun altaraparuw wilampi ch’allsuni, lik’inaksti Tatitutakix mä suma q’apkir waxt’äkaspas ukham nakt’ayxarakini. ⁷ Janipuniw mayampsa uka ñanqha ajayunakarux waxt’anakap luqtaskxapxaniti, kawkïrinakarutix jupanakax yupaychas q’añuchasipxäna ukanakaru. Aka kamachisti jumanakatakix wiñayatakïniwa, awkinakamataki, ukhamarak wawanakamatakisa. ⁸ “Ukxarusti kawkïr israelita jaqitixa, jan ukax yaqha markat jutasin jumanak taypin jakir jaqisa mä wilañcha luqtani, ⁹ ukatsti janirak Tatitump Jikisiñ Carpäkis uka nayraqatar apkani ukkhasti, uka marka taypit jaqunukutäniwa. ¹⁰ “Mä israelitatix, jan ukax yaqha markat jutasin jumanak taypin jakir jaqisa wilanpach aycha manq’kani ukkhax, nayax jupatakiw sayt’äxa, markapatsa jaqunukurakïwa. ¹¹ Taqi jakirinakan jakañapax wilankiwa. Naya pachpaw jumanakarux uka uywanakan wilap churapxsma altaran nayar luqtapxañamataki, uka wilan jakañax utjatap laykuw jumanakax juchat pampachatäñ jikxatapxta. ¹² “Ukhamasti, janipuniw jumanakaxa, jumanak taypin jakir yaqha markat jutir jaqinakas wilan aycha manq’apxañamäkiti. ¹³ Mä israelitatixa, jan ukax yaqha markat jutirisa manq’añatak mä uywa, jan ukax mä jamach’sa katjasin jiwayanixa, wilap uraqiruw wartxani, ukatsti laq’ampiw imt’xarakini, ¹⁴ taqi jakirinakan jakañapax wilankatap layku. Ukatpï sapxsmaxa, wilan aycha jan manq’apxamti sasaxa, jakañan uka wilankatap layku, khititix wilan aycha manq’kani ukasti, markapat jaqunukutäniwa. ¹⁵ “Mä israelitatixa, jan ukax yaqha markat jutir jaqisa mä jiwat uywan aychapa jan ukax mä monte animalan jiwayat uywan aychapsa manq’kani ukax, isip t’axsuqasxañapawa, jupa kipkas umampi jariqasxañapawa, ukatsti jayp’thapiñapkamaw q’añut uñt’atäni. Ukat jupax q’umachatäxarakini. ¹⁶ Ukampis janitix isinakap t’axsuqaskani, jupa kipkas janirak umampi jariqaskani ukkhax, ñanqha luratapat mutuyatäniwa.”

¹ Tatitux Moisesaruw sarakïna: ² “Israelitanakar akham sarakim: “Nayätwa Tatit Diosapaxa. ³ “Egipto markan sarnaqäwinakaparjamax jan jakapxamti, kawkïr markantix jumanakax jakapkäyät ukana. “Canaán uraqin sarnaqäwinakaparjamax jan jakapxamti, kawkïr uraqirutix nayax jakapxañamatak irpapksma uka uraqina, janirak uka markan kamachinakaparjamas jakapxamti. ⁴ “Nayan arsutanakaxar phuqhapxam, nayan kamachinakaxarjam sarnaqapxam. Nayätwa Tatit Diosapaxa. ⁵ “Nayan arsutanakaxa, kamachinakaxsa phuqhapxapunim. Kawkïri jaqitix ukanak phuqkani ukasti jakaniwa. Nayätwa Tatituxa. ⁶ “Janipuniw khiti chachasa pachpa wila masipankir warmiparux warmisiñapäkiti. Nayätwa Tatituxa. ⁷ “Janirak taykamar warmisisax awkimar ñanqhachamti; ukhamarus taykamawa, janiw jupampix jucha lurañamax wakiskiti. ⁸ “Awkimarux jan ñanqhachamti warmipar warmisisaxa. ⁹ “Janipuniw kullakamarux warmisïtati; awki tuqitsa jan ukax tayka tuqitsa kullakamäskpan; utamansa jan ukax yaqha chiqan yurirïpasa, janipuniw jupampix jucha lurañamax wakiskiti. ¹⁰ “Janipuniw khitis imill wawa allchhiparux warmisiñapäkiti, ukax yuqaman wawapäskpasa jan ukax phuchhaman wawapäskpasa. Janipuniw jupampix jucha lurañamax wakiskiti. ¹¹ “Janipuniw awkiman warmipan phuchhaparux warmisïtati. Jupax awkiman phuchhapawa, ukhamarus kullakamarakiwa. Janipuniw jupampix jucha lurañamax wakiskiti. ¹² “Janipuniw awkiman kullakaparux warmisïtati, jupax tiamawa, ukhamarus pachpa awkiman wilapat wilapanirakiwa. ¹³ “Janirakiw taykaman kullakaparus warmisïtati, jupax pachpa taykaman wilapat wilapaniwa, ukhamarus tiamawa. ¹⁴ “Tiomarux jan ñanqhachamti warmipar warmisisaxa, jupasti tiamawa. ¹⁵ “Yuxch’amarux jan warmisimti, jupax yuqaman warmipawa; janipuniw jupampix jucha lurañamax wakiskiti. ¹⁶ “Janirak jilamarus warmipar warmisisax ñanqhachamti. ¹⁷ “Mä warmiru, uka warmin phuchhaparusa, allchhiparusa, ukanakax yuqapan phuchhapäskpasa, jan ukax phuchhapan phuchhapäskpasa, jupanakarux janipuniw warmisïtati. Uka luräwisti sinti jach’a juchapuniwa, pachpa wila masïtap layku. ¹⁸ “Warmiman kullakaparux jan warmisimti, janirak jupampix wachuq juchsa luramti warmim jakaskipanxa, jan ukasti kullakpuraw jan walt’añar puripxani. ¹⁹ “Phaxsi wilan warmirusti janipuniw warmisïtati. ²⁰ “Jaqi masiman warmiparusti janipuniw warmisïtati, ukham lurät ukkhasti, q’añuchjasïtawa. ²¹ “Wawanakamsti janipun Moloc sat diosarux wilañchat luqtamti. Janirak ukham lurasax Diosan sutipsa ñanqhachamti. Nayakïtwa Tatituxa. ²² “Jan mä chachampix warmimpjam ikintamti. Ukham chachapur ikintañax sinti jan wali q’añu luräwipuniwa. ²³ “Janirak animalanakampis wachuq jucha luramti, ukhamat jan q’añuchasiskañamataki. Janirakiw mä warmisa animalanakampix wachuq jucha lurañapäkiti. Ukax sinti jan wali q’añu luräwiwa. ²⁴ “Janipun ukanakampix q’añuchjasipxamti. Kawkïr markanaktix nayax jumanak nayraqatat ananukkä ukanakasti uka luräwinakampiw q’añuchasipxäna, ²⁵ uraqinakapas uka kipkarakiw q’añuchjat uñjasxarakïna, ukatpï nayax jupanakarux uka ñanqha luratanakapat wayt’araktxa, uka markas taqi jakirinakaparuw ananukxaraki. ²⁶ Ukampisa jumanak israelitanaka, ukhamarak kawkïri yaqha markat jutasin jumanak taypin jakir jaqinakasa, nayan kamachinakaxar phuqhas sarnaqapxam, janirak uka q’añu luräwinak lurapxamti, ²⁷ kawkïr jaqinakatix jumanakat nayräxa aka uraqin jakapkän ukanakax, taqi uka q’añu luräwinak lurapxäna, ukham lurapxatapampiw uka uraqis q’añuchat uñjasirakïna. ²⁸ ¡Uka uraqisti janirak jumanakarux apanukpati, kunjämtix jumanakat nayra jakapkän ukanakar apanukkän ukhama! ²⁹ Khititix uka q’añu luräwinak luraskani ukasti, markap taypit apanukutäniwa. ³⁰ Ukhamasti, nayan kamachi arunakax phuqhas sarnaqapxam, kuna q’añu luräwinak lurasatix jumanakat nayräxa jakir jaqinakax sarnaqapkäna uka luräwinakarux jan puripxamti, janirak ukanakampis q’añuchjasipxamti. Nayätwa jumanakan Tatit Diosamaxa” sasa.

¹ Tatitux Moisesar sarakïnwa: ² “Israelitanakarux akham sarakim: “Jumanakasti qullanäpxam, naya Tatit Diosamax qullanätwa. ³ “Sapa maynisa awkiparu taykaparu yäqas sarnaqpan. “Nayan sábado urunakaxsa imapxarakim. Nayätwa jumanakan Tatit Diosamaxa. ⁴ “Janipun yaqha diosanakarux yupaychapxamti, janirak kuna kasta metalanak umatatayasas diosanak lurasipxamti. Nayätwa jumanakan Tatit Diosamaxa. ⁵ “Kunapachatix Tatitur sumankthapiñ wilañchanak luqtapkäta ukapachasti, kunjämtix Diosax siski ukhamarjamaw jupan katuqañapatak luqtapxäta. ⁶ Luqtatäkani uka uywan aychapsti uka urpachaw manq’antatäxañapa, jan ukax qhipürusa; ukampisa kunatix kimsïri urutak jilt’kani ukasti nakhantayatäxañapawa. ⁷ Uka luqtat aychatix kimsa urkama manq’atakïskani ukasti, uka wilañchax janiw askïkxaniti, Diosasti janirakiw uka luqtäwi katuqkaniti; ⁸ khititix manq’kani ukasti juchap laykuw mutuyat uñjasini, markap taypitsa jaqunukutäniwa, kunatix Tatitur luqtatäki ukar jan yäqatap layku. ⁹ “Kunapachatix trigo yapuman achunakap apthapkäta ukkhasti, janiw taqpach yawthapïtati, jalaqtki uka puyanaksa janirakiw pallthapisïtati. ¹⁰ Uva yapumatsti janiw taqpach apthapïtati, willirtki uka uvanaksa janirakiw pallthapisïtati; ukanakax t’aqhin jakirinakatakiwa, ukhamarak jaya markat jutirinakataki. Nayätwa jumanakan Tatit Diosamaxa. ¹¹ “Jan lunthatasipxamti. Jan k’arisipxamsa, jumanakkamas janirak sallqjasipxamti. ¹² “K’ari arsüwinak nayan sutixar jan luramti, ukham lurasax Tatit Diosaman sutip ñanqhachtaxa. Nayätwa Tatituxa. ¹³ “Jan jaqi masimarux ch’amampiki saykatamti, kunatix jupankki uksa janirak aparamti. “Irnaqirin irnaqatapat qawqhatix churañäki uk janirak qhipürkam apxäsimti. ¹⁴ “Uqar jaqitsti jan phiskasimti. “Juykhun sarnaqañapäwjarusti janirak kuna jan walt’añanaksa liwisiñapatak uskumti. Tatit Diosamar axsartam. Nayätwa Tatituxa. ¹⁵ “Kunapachatix mä jan walt’añ taripañas wakisini ukkhasti, kunatix chiqäki ukhamarjamapun luram; janirak pisi ch’amanirukisa, jan ukax qamirirukisa arxatamti. Juchañchañ wakisipanxa, kunatix chiqapäki ukhamarupun uñjam. ¹⁶ “Jaqinak taypinsti janipun arunak apnaqas sarnaqamti. “Jaqi jiwayañanakansa janirak chikachasimti. Nayätwa jumanakan Tatit Diosamaxa. ¹⁷ “Jilamar uñisiñanakxa chuymamar jan imxäsimti. “Kunapachatix jaqi masimar tuqinuqañax wakischi ukkhasti, tuqinuqam, janirak jupamp chikas juchar purimti. ¹⁸ “Jaqi masimarux janipun kun luratas phuqsusimti, janirak jupa tuqi phiñasitamsa chuymamar imxäsimti. Jaqi masimarusti juma kipkarjam munasim. Nayätwa Tatituxa. ¹⁹ “Nayan kamachinakaxsti phuqhapunim. “Uywanakamsti janipun yaqha uywanakampix katusiyamti. “Uraqimarus janipun yaqha jathanakamp ch’arqhuntasax yapuchamti. “Janirak kunayman telanakat lurat isinakampis isisimti. ²⁰ “Yaqha chachampi jaqichasiñatak churatäki uka uywatarutix maynix warmisini, ukampis uka uywatax janïra antutatäki ukkhaxa, uka chachan jan wal luratapatxa, wakisiw qullqi churas phuqhañapa, ukampis janiw jiwayatäñatak juchañchatäpkaniti uywatax janïra antutatätap layku. ²¹ Uka jaqisti Tatiturux mä urqu oveja jucha luratat churani mä wilañchäkaspas ukhama, uka ovejsti Tatitump Jikisiñ Carpa nayraqataruw irpani. ²² Uka ovejsti wilañchat luqtasaw sacerdotex Tatitun juchat pampachañapatak mayini, ukatsti uka jaqin juchapax pampachatäxaniwa. ²³ “Kunapachatix jumanakax uka uraqiru puripxäta, ukatsti achunak churir quqanak yapuchapxarakïta ukapachasti, janiw uka achunak apaqapxätati, janirakiw manq’apxätasa kimsa mara phuqhasiñapkama. ²⁴ Pusi mara purinxipansti taqi uka achunakax mä phunchhäwi urun Tatitur luqtatäxani, ²⁵ phisqa mara purinxipan jumanakax uka achunak manq’xapxäta. Ukhamat uka quqax juk’ampi achunakanïni. Nayätwa jumanakan Tatit Diosamaxa. ²⁶ “Janipun kunsa wilanpach manq’apxamti. “Janipun yatirïñ munapxamti, kunatix akat qhiparux luraskani ukanak yatiñarus janipun uskusipxamti. ²⁷ “Jan ñik’utanakam muypach mururasipxamti, janirak sunkhanakamsa taqpach mururasipxamti. ²⁸ “Mä jaqin jiwatapatxa, jan janchinakam q’allunuqasipxamti. Janipun kunayman qillqanaksa janchinakamar qillqantasipxamti. Nayätwa Tatituxa. ²⁹ “Phuchhamarus janipun chachanakampi sarnaqir tukuyamti, ukham lurasax phuchhamxarusa, markxarus ñanqha apanispa. ³⁰ “Sábado urunak imapxapunim. Nayan utaxatakisti wali axsartañax utjarakpan. Nayätwa Tatituxa. ³¹ “Janipun layqanakan ukarusa, yatirinakan ukarus sarapxamti. Jupanakar jiskhisisax jan ñanqhachasipxamti. Nayätwa jumanakan Tatit Diosamaxa. ³² “Kayut sayt’asisin chuyman jaqinakar mä suma yäqañampi uñjam. Tatit Diosamar axsartatamsa uñacht’ayarakim. Nayätwa Tatituxa. ³³ “Yaqha markat jutir jaqinakaru, khitinakatix jumanak taypin jakki ukanakarusti janipun t’aqhisiyapxamti. ³⁴ Jumanakat maynïrïkaspas ukham uñjapxam; jupanakarux jumanakjam jaqïtapat munasipxam. Ukhamarus jumanakax Egiptonxa, jaya markat jutir jaqinakjamäpxayätawa. Nayätwa jumanakan Tatit Diosamaxa. ³⁵ “Kuna tupt’añanakansa, janipun sallqjapxamti. ³⁶ Balanzanakamasa, taqi tupunakamas phuqhatäñapapuniwa. Nayätwa jumanakan Tatit Diosamaxa, khititix Egipto markat irpsunipktam ukaxa. ³⁷ “Ukhamasti taqi kamachinakax phuqhapxapunim. Nayätwa Tatituxa.”

¹ Tatitux Moisesar sarakïnwa: ² “Israelita jaqinakarux akham sama: “Kawkïr israelita jaqitix jan ukax jumanak taypin jakir yaqha markat jutir jaqis wawanakapa Moloc sat diosar wilañchat luqtani ukasti, markankir jaqinakan qalampi k’upjas jiwayatäñapawa. ³ Nayasti uka jaqir mutuyañatakiw sayt’ä, ukatsti markap taypitsa apanukurakïwa, nayan qullana utax q’añuchatapata, ukhamarak nayan qullana sutixarus Moloc sat diosar wawap luqtatapampi takisitap layku. ⁴ Markankir jaqinakatix uka jaqir qalampi k’upjas jan jiwayapkani ukasti, ⁵ naya pachpaw uka jaqirux wila masinakapamppach mutuyä, markapatsa apanukurakïwa. Janiw jupa saparukit apanukkäxa, jan ukasti, taqi khitinakatix Moloc diosar yupaychapkäna ukanakaruw apanukü. ⁶ Maynitix ch’amakani layqanakar jiskt’asir sarani, ukat ukanakar arkasarak q’añuchjasini ukasti, nayax jupatakiw phiñasï ukatsti jiwayarakïwa. ⁷ “Nayarupun taqpach katuyasipxita, ukatsti qullan jaqinakäpxarakim, nayätwa jumanakan Tatit Diosamaxa. ⁸ Nayan kamachinakaxsti phuqhapxapunim, ukarjamarak sarnaqapxam. Nayätwa Tatituxa, nayatakiw jumanakarux yaqhachasipxsma. ⁹ “Khititix awkiparu, taykaparu ñanqhachani ukax jiwayatäñatak juchañchatäniwa. ¹⁰ “Maynitix jaqi masipan warmipar warmischi ukasti, jupasa, warmisa jiwayatäñatak juchañchatäñapawa. ¹¹ “Maynitix awkipan warmipar warmischi ukasti, awkiparuw ñanqhachaski. Uka layku, chachamppacha, warmimppach jiwayatäñatak juchañchatäñapawa, ukhamarus jupanakpachaw jiwatapat juchanïsipkani. ¹² “Maynitix yuxch’apar warmischi ukasti, panpachan jiwayatäñapawa; jupanak kipkarakiw jiwapxatapat juchanïsipkani, ukampis ukham warmisitapax jach’a juchapuniwa. ¹³ “Mä chachatix yaqha chachar warmischi ukasti, panpachan jiwayatäñapawa, jupanakpacharakiw jiwatapat juchanïsipkani ukham lurapxatap layku. ¹⁴ “Mä jaqitix taykampiru, phuchhampiru warmisinixa, uka jaqix jan walpun luri, jupasa, uka warminakasa jakkirpach ninar nakhantayas jiwarayatäñapawa. Ukhamat jumanak taypin ukham luririnakax jan utjkxaniti. ¹⁵ “Mä chachatixa, jan ukax mä warmisa mä animalampi q’añusini ukanakasti, jiwayatäñatak juchañchatäpxaniwa, uka animalas jiwayatarakïniwa. ¹⁷ “Maynitix kullakapar warmt’asini, ukax awki tuqitsa jan ukax tayka tuqitsa kullakapäskpan, ukanakasti marka masinakapan uñjkat jaqunukutäñapawa, pachpa kullakar ukham warmisiñax mä p’inqapuniwa, khititix uk lurki ukasti juchañchatäñapawa. ¹⁸ “Mä chachatix phaxsi wilanïski uka warmir warmischi ukasti, markapat panpachan jaqunukutäpxaniwa. ¹⁹ “Maynitix tiapar warmischi ukaxa, panpachaniw mutuyatäpxani, jupanakasti wila masinakäpxiwa. ²⁰ “Maynitix tiopan warmipar warmischi ukasti, ukampix tioparuw ñanqhachi; jupanakasti panpachaniw jan wawan jiwarapxani. ²¹ “Maynitix jilapan warmipar warmischi ukasti, pachpa jilaparuw ñanqhachi, ukampix mä jach’a juchpun luri, panpachanirakiw jan wawan qhiparapxani. ²² “Nayan kamachinakax phuqhapxapunim, ukarjamarak sarnaqapxam. Ukhamat kawkïr uraqirutix irpapksma uka uraqit janiw jumanakarux apanukupkämati. ²³ Kawkïr jaqinakatix uka uraqin jakapki, jupanakar jaqunukkä ukanakan sarnaqäwinakapan janipun sarnaqapxamti; jupanakasti taqi ukanak luratanakapampiw nayarux q’apisiyitu. ²⁴ Nayasti sapxsmawa, kawkïr uraqtix nayax churapkäma uka jaqinakan uraqinakapax jumanakankxaniwa. Uka uraqisti wali suma uraqipuniwa, manq’añanakamas jan tukuskayapunïniwa. “Nayätwa jumanakan Tatit Diosamaxa, jumanakarusti nayaw yaqha markanakat sipan mä suma marka yaqhachapxsma. ²⁵ Uka laykupï jumanakax q’uma animalanakxa q’añu animalanakat yaqhachapxañamaxa, q’uma jamach’inaksa q’añu jamach’inakat yaqhachapxañamarakixa. Jumanakasti jan q’añuchasipxamti kawkïr animalanaktixa, jamach’inaksa, asirunaksa ñanqhaw siskta ukanakampixa. ²⁶ Jumanakasti nayatakix q’uma jaqinakäpxam, naya Tatit Diosamasti q’umätwa, ukampis yaqha markanakat sipan nayan markaxäpxañamatakiw yaqhachapxsma. ²⁷ “Mä chachatix jan ukax mä warmisa ñanqha ajayun apnaqatäni, jan ukax yatirïpxanisa, jupanakasti qalampi k’upjasin jiwayatäpxañapawa, ukatsti jupanakpacharakiw uka jiwäwipat juchanïsipkani.”

¹ Tatitux Moisesar akham sänwa: “Aaronan yuqanakapa sacerdotenakampi parlam, jupanakarusti sarakim, jan q’añuchasipxpati mayni wila masin amayap llamkt’asa, ² jak’a wila masi jiwïpanak llamkt’aspaxa, taykapäspa, awkipäspa, yuqall wawapäspa, jan ukax imill wawapäspa, jilapäspa, ³ jan ukax jupa jak’ankir jan chachani kullakapäspa; ukanak laykukiw q’añuchasispaxa. ⁴ Ukampis chachanïki uka kullakapan amayaparusti, janipuniw llamkt’añapäkiti. ⁵ “Janipuniw ñik’utanakapsa, sunkhanakapsa mururasipxañapäkiti, janirakiw janchinakapsa chhuxrinuqasipxañapäkiti, ⁶ jan ukasti, Tatit Diosaparuw katuyasipxañapa, jupan sutip janirakiw ñanqhachapxañapäkiti, jupanakaw taqi nakt’at waxt’anaksa, Tatitun t’ant’apsa luqtapxi; ukhamasti jupanakax Tatitutak yaqhachatapuniw sarnaqapxañapa. ⁷ “Sacerdotenakax Tatit Diosatak yaqhachatäpxatap laykux janiw chachanakampi sarnaqir warminakampisa, jaljtat warminakampis jaqichasipxañapäkiti. ⁸ Jupanakarusti yaqhachatpun utjayam, jupanakax Tatitun t’ant’ap luqtirinakäpxiwa. Juma nayraqatansti q’uma jaqinakäpxañapawa; naya Tatitun qullanätax layku, nayarakiw jumanakarux qullana tukuyapxsma. ⁹ “Mä sacerdoten phuchhapatix jan wal sarnaqani, ukatsti chachanakampi sarnaqir warmirak tukxani ukasti, pachpa awkiparuw ñanqhachaski, uka warmix jakkirpach nakhantayatäñapawa. ¹⁰ “Sacerdotenakan jilïripasti, taqi sacerdotenakat sipansa wali askipuniwa, kunapachatix nayar luqtañatak yaqhachatäkän ukkhaxa, sacerdoten isip katuqäna, p’iqipxarus luqtañ aceitempi warxatatarakïnwa. Ukatpï uka sacerdotex janipun ñik’utap t’isatatatax sarnaqañapäkitixa, isipsa janirakiw mä llakisiñ uñacht’ayañ laykux ch’iyanuqasiñapäkitixa; ¹¹ kawkhantix mä amayax kallnuqatäski ukarux janiw mantañapäkiti, uka amayax awkipana jan ukax taykapan amayapäskpasa; janipuniw ukanakampix q’añuchasiñapäkiti. ¹² Tatitun qullan utapatsti janipuniw mistuñapäkiti, janirakiw uka qullan utsa jisk’achayañapäkiti, jupxar luqtañ aceitempi warxatatätap layku. Nayätwa Tatituxa. ¹³ “Warmipäñapatakisti uka sacerdotex chacha jan uñt’ir mä q’uma tawaqu thaqhasiñapawa. ¹⁴ Janipuniw mä ijma warmimpisa, jaljtat warmimpisa, munkay jan munkay warmisit warmimpisa, chachanakampi sarnaqir warmimpis jaqichasiñapäkiti; warmipasti chacha jan uñt’iri warmïñapawa, ukhamarus jupan wila masipatäñaparakiwa, ¹⁵ ukhamat taqi jaqinakap taypin wawanakapax jan jisk’achatäñapataki; naya Tatituw juparux nayatak yaqhachasta uka layku.” ¹⁶ Tatitux Moisesaruw akham sarakïna: ¹⁷ “Aaronarusti akham sarakim: Akat uksarusti, kawkïr wawanakamatix janchipan jan k’umaräpkani ukanakax janipuniw t’ant’a waxt’anak Diosar luqtapkaniti. ¹⁸ Jan ukax qhana arunxa, juykhünisa, kayu wixchünisa, nasapas wist’üni, jinchupas ch’ulla ch’ulläni, ¹⁹ charanakapasa, amparapas p’akitäni, ²⁰ atipas k’umüni, jisk’a tansa jaqïnisa, nayrapas quyrüni, sarna usunïnisa, janchipas phallaraskani, jan ukax q’urutapas usuchjatäni ukanakax janipuniw waxt’anak Diosar luqtapkaspati. ²¹ Aaronan yuqanakapatsti khitinakatix jan k’umaräpki ukanakax janipuniw waxt’anak Diosar luqtapkaniti; jupanakax janiw k’umaräpkiti, ukat jupanakax Tatit Diosarux waxt’anak jan luqtapkaspati. ²² Ukampisa janchipan jan k’umaräpxatapatxa, kuna suma waxt’anaktix israelitanakax apanipkani ukanakat manq’asipkaspawa, ²³ ukampis janipuniw velo qhipäxarux mantkaniti, altararus jak’achaskarakiniti, ukhamat jan k’umarätapampix uka qullan uta jan q’añuchaskañapataki. Naya Tatituw uka qullan uta nayatak yaqhachasta.” ²⁴ Moisesasti taqi aka arunakxa Aaronaru, yuqanakaparu, uka kipkaraki taqi israelita jaqinakaruw yatiyäna.

¹ Tatitux Moisesaruw akham säna: ² “Aaronampiru wawanakapampirusti akham sarakim: Jupanakax wal amuyasipxañapawa kuna yänaktix israelitanakax nayar luqtapkitu ukanakatxa, ukhamat jupanakax nayan qullan sutix jan ñanqhachasipkañapataki. Nayätwa Tatituxa. ³ “Jupanakarusti sarakim, jichhasa akat qhiparusa kawkïritix Aaronan yuqanakapat jan q’umäkasina, kuntix israelitanakax nayatak yaqhachapki ukanak nayar luqtkitani ukasti, nayan nayraqataxat apanukutäniwa. Nayätwa Tatituxa. ⁴ “Aaronan yuqanakapata, kawkïritix lepra usunïki jan ukax chhuxurasiñapat jathapsa inak aywiyaskani ukasti, jupanakan q’umachasiñapkamax janiw qullan yänakat manq’apkaniti. “Khititix mä jiwat jaqin kuna q’añupsa llamkt’ani, jan ukax jathap aywiyir jaqirus llamkt’ani, ⁵ mä katarir llamkt’asas q’añuchasini, mayni jaqisa q’añükasin mayni jaqi masipar llamkt’asin q’añu tukuyani, ⁶ uka jaqisti jayp’ukamax q’añuw uñjasini, janirakiw qullana yänakatsa manq’añapäkaniti janitix umampi jariqaskani ukapachaxa. ⁷ Intix jalantxani ukkhaw q’uma uñjasxani, ukapachaw uka qullan yänakat manq’asxani jupan manq’añapätap layku. ⁸ Jupa pachpa jiwata mä uywan aychapsa, jan ukax monte animalan jiwayat uywan aychapsa janipuniw manq’kaniti, ukhamat jan q’añuchasiskañapataki. Nayätwa Tatituxa. ⁹ “Jupanakarusti nayan kamachinakaxar phuqhas sarnaqapxpan sarakim, janitix uka kamachinakar phuqhapkani ukasti, jiwarapxaniwa. Naya Tatituw jupanakarux nayatak yaqhachasta. ¹⁰ “Janipuniw yaqha jaqix kunatix qullanäki ukanakat manq’añapäkiti. “Sacerdoten qurpachatapäpasa, irnaqiripäpasa, janipuniw uka qullan manq’anakat manq’apxañapäkiti. ¹¹ “Sacerdotetix mä irnaqirip qullqipampi alasini ukkhasti, uka alasit irnaqiripax uka qullan manq’anakat manq’askaspawa. Sacerdoten utapan yuririnakas uka qullana manq’anakat manq’asipkaspawa. ¹² “Sacerdoten phuchhapatix jan sacerdote mä jaqimp jaqichaskani ukasti, jupax uka qullan manq’anakat janiw manq’añapäkiti. ¹³ Ukampis ijma warmïxchi, chachapamp jaljtatäxchi, janirak wawanïkchi, awkipan utaparus sapäkaspas ukham kuttanxchi ukkhakiw awkipan manq’añapat manq’aspaxa. Ukatsipana janipuniw yaqha jaqinakax uka manq’at manq’añapäkiti. ¹⁴ “Maynitix pantjasisin uka qullan manq’a manq’ani ukkhaxa, sacerdoterux uka manq’atxa mä juk’amp yapxatasaw kuttayxañapa, ¹⁵ ukampis sacerdotenakax janipuniw israelitanakan qullan luqtanakap takisipxañapäkiti, ukanakan Tatitur luqtatätap layku, ¹⁶ khititix uka qullan manq’anakat manq’kani ukasti juchanchatäniwa. Naya Tatituw ukanak yaqhachasta.” ¹⁷ Tatitux Moisesaruw akham sarakïna: ¹⁸ “Aaronampi, yuqanakapampi parlam, taqi israelitanakarus akham sarakim: Israelita mä jaqitixa, jan ukax jumanak taypin jakir yaqha markat jutir jaqisa, mä uywa nakt’ayasina Tatitur luqtaña munanixa, mä arsüwi phuqhañatakisa jan ukax chuymapan churañ munatapatsa, ¹⁹ uka uywax mä urqu vacäpasa, mä urqu ovejäpasa jan ukax mä cabritöpasa, ²⁰ katuqatäñapatakix jan kamacht’at k’umara uywäñapawa, janitix k’umaräkani ukapachasti janiw katuqatäkaniti. ²¹ “Khititix sumankthapiñatak wilañcha Tatitur luqtani, mä arsüwi phuqhañatakisa jan ukax chuymapan churañ munatapatsa, uka urqu vacasa, jan ukax urqu ovejasa jan kamacht’ata k’umara uywäñapawa. ²² Jan Tatiturux juykhu uywanaka, usuchjatanaka, kayu wixchunaka, sirk’iraranaka, qarachrantatanaka, ukham uywanak altaran nakt’ayasax luqtapxamti. ²³ Kawkïr urqu vacatixa, jan ukax urqu ovejan kayunakapach ch’ulla ch’ulläni uka uywxa, chuymaman luqtañ munatamat luqtaskasmawa, ukampis mä arsüwim phuqhañ munasintix luqtäta ukkhaxa, janiw katuqatäkätati. ²⁴ Tatiturusti janipuniw q’urut usuchjata, jan ukax capsut uywanaksa luqtapxätati. Jumanakasti uka luräwinakxa janipuniw uraqiman lurapxätati. ²⁵ Ukham usuchjat uywanaksti, yaqha markat jutir jaqinakatxa janipuniw Tatitur luqtañatakix katuqapxätati. Tatitux janiw ukham usuchjat uywanak katuqapkätamti.” ²⁶ Tatitux Moisesar sänwa: ²⁷ “Kunapachatix uywanakamax mä vaca qallu wawachani, jan ukax mä urqu oveja qallsa, jan ukax mä cabritsa wawachan ukkhasti, uka qallunakax paqallqu uru phuqhasiñapkamaw taykap jak’ankasipkani, ukampis kimsaqallqu uru phuqhasxipansti, uka qallunakax Tatitur wilañchat luqtatäxaniwa. ²⁸ “Janiw mä urunak vacarusa, ovejarusa, qallupamppach kharinukupxätati. ²⁹ “Kunapachatix Tatitur yuspagaras mä waxt’a churkäta ukkhasti, wali sumpun luqtam, ukhamat uka luqtäwin sum katuqatäñapataki. ³⁰ Ukhamarus ukürpach manq’antxarakim, janirak qhipürutak kuns jilt’ayamti. Nayätwa Tatit Diosaxa. ³¹ “Nayan kamachi arunakaxarjam sarnaqapxam; phuqhapxapunim. Nayätwa Tatit Diosaxa. ³² “Nayan qullana sutixsti janipun takisipxamti, ukhamat taqi israelitanak taypin nayax askit uñt’atayä. Naya Tatituw jumanakarux nayatak yaqhachasipxsma, ³³ nayax jumanakan Diosamäñatakiw Egiptot irpsunipxsma. Nayätwa Tatit Diosaxa.”

¹ Tatitux Moisesar akham sänwa: ² “Israelitanakar akham sarakim: Akïr urunakaw Tatitutak sat yaqhachat urunakaxa, jumanakasti uka urunakan qullana tantachasïwinak lurasa tantacht’asipxäta. ³ “Suxta uruw irnaqäwim luräta, ukampis paqallqu urunsti janipuniw kunsa lurätati; uka urux samarañ urüniwa, uka urusti mä qullana tantachasïwi luräta. Kawkhansa jakaskam, uka urux Tatitur yupaychañ urüniwa. ⁴ “Tatitur yupaychasa qullan tantachasïwinak lurapxañamataki uka urunakax akïrinakawa. ⁵ “Nayrïr phaxsina tunka pusini uru saraqat jayp’thapirux Tatitut amtasisin Pascua uruyañ qalltapxäta. ⁶ “Uka pachpa phaxsina tunka phisqani uru saraqatarusti, jan levaduran t’ant’anak manq’añ phunchhäwi amtapxarakïta. Paqallqu urunakaw jan levaduran t’ant’a manq’apxäta. ⁷ Qallta urusti mä qullan tantachasïwi lurapxäta. Uka urux janipuniw kuna ch’ama tukuñ irnaqañanaksa lurapxätati. ⁸ Paqallqu urunakaw Tatiturux waxt’anak nakt’ayas luqtapxäta, paqallqu uru purinxipansti mä qullan tantachasïwi lurapxäta. Janipuniw uka urux yaqha irnaqäwinak lurapxätati.” ⁹ Tatitux Moisesaruw mayïna ¹⁰ israelitanakar akham sañapataki: “Kunapachatix jumanakax kawkïr uraqtix churapkäma ukar mantapkäta ukkhaxa, apthapipkäta uka trigotxa, nayrïr marqa sacerdoteruw churapxäta. ¹¹ Samarañ uru qhipürusti sacerdotex Tatituruw mä suma q’apkir waxt’äkaspas ukham churxani, ukhamat jumax katuqatäñamataki. ¹² Trigo marqa churapkäta uka pachpa urunsti, mä maran jan kamacht’at urqu oveja nakt’ayas luqtañapatak churapxarakïta. ¹³ Ukhamarus pusi kilo chikatani aceitempi chapt’ata suma jak’u apanipxarakïta, ukasti Tatitutak nakt’ayas suma q’apkir luqtatäñapataki. Warakipt’añatak mä waxt’äwjamsti, mä litro vino churapxarakïta. ¹⁴ Tatitun ukaru waxt’anakam apaniñkamasti, janiw t’ant’sa, trigo jamp’sa, jan ukax chhuyu trigsa manq’apxätati. Kawkhansay jakasipkam, aka kamachisti jumanakatakixa, wawanakamatakis wiñayatakipunïniwa. ¹⁵ “Kunürutix jumanakax uka trigo marqa apapkäta Tatitur mä suma waxt’äkaspas ukham luqtañataki, mä arunsti, sábado mä uru qhipatxa, pusi tunk llätunkani uru jakt’apxäta. ¹⁶ Ukatsti sábado uru phuqhasxani ukampisti, phisqa tunka urunakäxaniwa. Ukapachaw jumanakax machaq trigot Tatiturux mä waxt’a luqtapxäta, ¹⁷ utanakamatsti suma trigot levadurani lurt’at pä t’ant’a apapxäta, sapa t’ant’asti niya pusi kilonjamäniwa, ukasti nayraqata achunakamat Tatitur luqtäwïniwa. ¹⁸ T’ant’anakamp chiksti, mä maran jan kamacht’at paqallqu urqu ovejanak apapxarakïta, mä urqu vacampi, pä urqu ovejampi, ukanakasti Tatitutak nakt’ayas luqtatäniwa, kuntix jumanakax granonakatsa, vinotsa waxt’a luqtapkäta ukanakatxa, mä suma q’apkir luqtarakïniwa. ¹⁹ “Jucha luratanakatsti mä cabrito wilañchat luqtapxäta, sumankthapiñatakisti mä marani pä urqu oveja luqtapxarakïta. ²⁰ Sacerdotew uka uywanak mä suma q’apkir waxt’äkaspas ukham Tatit nayraqatan luqtani, t’ant’ampi, pä oveja apanipkäta ukanakamp chika. Ukanakax Tatitur luqtatäniwa, ukasti sacerdotetakïxarakiniwa. ²¹ “Uka urusti jumanakax mä suma qullan tantachasïwi nayatakix lurapxäta, janirakiw uka urux kunanaksa irnaqapxätati. Kawkhansay jakasipkam, aka kamachisti jumanakatakisa, wawanakamatakis wiñayatakipunïniwa. ²² “Kunapachatix achunak apthapkäta ukkhasti, trigo yapumatxa janipun jan mayan apthapisimti, trigo puyanak jalaqtirinaksa janirak pallthapisimti. Ukanakxa t’aqhin sarnaqirinakataki, jaya markat jutirinakatakiw jilt’ayäta. Nayätwa jumanakan Tatit Diosamaxa.” ²³ Tatitux Moisesaruw mayïna ²⁴ israelitanakar akham sañapataki: “Paqallqüri phaxsina nayrïr uru saraqatarux jumanakax samarañ uru uruyapxäta, ukatsti suma qullan tantachasïwi lurapxarakïta trompetanak phust’asa. ²⁵ Uka urux jumanakax Tatituruw mä suma nakt’ata waxt’a luqtapxäta, janirakiw uka urux kuna irnaqäwinaksa lurapxätati.” ²⁶ Tatitux Moisesarux akham sarakïnwa: ²⁷ “Uka pachpa paqallqüri phaxsina tunka uru saraqatarusti, uka urux juchat pampachatäñ urüniwa. Uka urusti jumanakax mä suma qullan tantachasïwi lurapxäta, ukhamarak ayuno lurapxäta, Tatitutakisti mä waxt’a nakt’ayasina luqtapxarakïta. ²⁸ Uka urusti janipuniw kunanaksa irnaqapxätati juchat pampachatäña urütap layku, jumanakasti uka uruw Tatit Diosamat juchat pampachatäñ katuqapxäta. ²⁹ Khititix uka samarañ urun jan ayunkani ukasti, khitïskpasa, markap taypitxa apanukutäniwa. ³⁰ Ukhamarak khititix uka samarañ urun irnaqaskani ukasti, khitïskpasa, markap taypitxa apanukutäniwa. ³¹ “Janipun uka urux kuna irnaqañanaksa lurapxamti. Kawkhansay jakasipkam, aka kamachisti jumanakatakisa, wawanakamatakis wiñayatakipunïniwa. ³² Jumanakatakisti uka urux samaraña, ayuno lurañ ururakïniwa, uka phunchhäwi ursti uka phaxsina llätunka uru saraqataru jayp’u chiqat qalltapxäta, qhipüru pachpa jayp’u chiqar tukt’ayasa.” ³³ Tatitux Moisesaruw mayïna ³⁴ israelitanakar akham sañapataki: “Uka pachpa paqallqüri phaxsina, tunka phisqani uru saraqatarusti, paqallqu uruw Tatitut amtasiñatak Chhujllanakan phunchhäwip lurapxäta, ³⁵ qallta urunsti mä suma qullan tantachasïwi lurapxäta. Janirak uka urun kuna irnaqañanaksa lurapxamti. ³⁶ Uka paqallqu urunakasti nakt’at luqtäwinak Tatitur churapxäta, kimsaqallqu urunsti mä suma qullana tantachasïwi lurapxäta, Tatiturusti mä waxt’a luqtapxarakïta. Uka urux qullan phunchhäwi uruwa, janipuniw uka urunxa kuna irnaqäwinakamsa lurapxätati. ³⁷ “Taqi uka urunakax Tatitutak satawa, jumanakasti uka urunakan mä suma qullana tantachasïwinak lurapxäta, Tatituruw waxt’anak nakt’ayasin luqtapxarakïta, granonakata, wilañchanaka, vinota waxt’anaka; kunjämarutix sapa uru wakiskani ukhamarjamaw churapxäta, ³⁸ jumanakasti uka churäwinakxa, kuntix sábado urun Tatitur churapxirïkta, ukhamarak chuymanakamatsa luqtapxirïkta ukanakat sipan yaqpun luqtapxäta. ³⁹ “Uka paqallqüri phaxsina, tunka phisqani uru saraqatarusti, kunapachatix jumanakax achunak apthapisxapxäta ukkhasti, Tatitutakiw jumanakax paqallqu uru mä phunchhäwi lurapxäta, qallta urunsa, ukhamarak kimsaqallqu uru purinipansa samart’asa. ⁴⁰ Qallta urusti kawkïri achunakatix quqanakan sumäkani ukanak apaqapxäta, palmeranakata, wali ch’uxñantat quqanakata, jawirankki uka saucenakat layminak apaqapxäta, ukatsti paqallqu urunakaw Tatit Diosaman nayraqatapan kusisipxäta. ⁴¹ Sapa mararakiw paqallqu phaxsi saraqatarux paqallqu urunaka Tatitutaki mä phunchhäwi lurapxäta. Aka kamachisti jumanakatakisa, wawanakamatakis wiñayatakipunïniwa. ⁴² Uka paqallqu urunakanxa jumanaka israelitanakax chhujllanakan jakapxäta, ⁴³ ukhamat taqi wawanakamax yatipxani kunapachatix israelitanakar Egiptot irpsunkäyäta ukapachax nayax chhujllanakan jupanakar jakayäyäta. Nayätwa jumanakan Tatit Diosamaxa.” ⁴⁴ Moisesax ukham israelitanakarux yatiyäna kuna urunakatix Tatitutak satäkis uka phunchhäwinak lurañ tuqitxa.

¹ Tatitux Moisesar akham sänwa: ² “Israelitanakarux olivo achut apsuta aceite apanipxpan sama, ukasti lamparanakax jan jiwt’ayas aqayañatakïniwa. ³ Aaronaw uka lamparanak askicht’askani, ukhamat Tatitun nayraqatapan Tatitump Jikisiñ Carpa manqhan arum paqari aqañapataki, uka lamparanakasti velo anqäxan aqani. Aka kamachisti wiñayatakiwa, awkinakata wawanakapkama. ⁴ Uka lamparanakasti Tatit nayraqatanpun qurit lurat candelero patxan aqani. ⁵ “Mä suma jak’uta, tunka payan suma muxsa t’ant’anak lurt’am, sapa t’ant’asti pusi kilo chikatanïñapawa, ⁶ ukatsti Tatitun nayraqatapankki uka qurit lurat mesa patxar apxatam, ukasti pä siqïñapawa, sapa siqinsti suxta t’ant’anakaw utjañapa. ⁷ Sapa siqinsti q’uma incienso uskum, uka inciensosti t’ant’a lanti amtasiñatak nakt’at waxt’a Tatitutak luqtatäniwa. ⁸ Uka luräwisti sapa sábado urun lurasini, israelitanakan mä wiñay arust’äwipäkaspas ukhama. ⁹ Uka t’ant’anakasti Aaronampitaki, yuqanakapampitakïniwa, jupanakasti uka t’ant’a qullan chiqan manq’apxani, uka waxt’an aski qullan waxt’ätapa, Tatitutak nakt’ayat waxt’ätap layku.” ¹⁰ Israelitanak taypinsti mayni jaqiw utjäna, tayka tuqitxa israelita taykanïnwa, awki tuqitsti mä egipciorakïnwa. Taykapax Selomit satänwa, Dan ayllunkir Dibrí siski ukan phuchhapänwa. Mä urusti uka jaqimpi, mayni israelitampiw nuwasipxäna, ukatsti kawkïritix israelita taykanïkän ukaw Tatitun sutipar ñanqhachäna. Ukat uka jaqirux Moisesan nayraqatapar irpapxäna, ¹² kuntix Tatitux Moisesar uka jaqit siskani uk yatiñkamaw uñjapxarakïna. ¹³ Ukhamasti Tatitux Moisesaruw akham säna: ¹⁴ “Kawkïr jaqitix nayar ñanqhachkitu ukarux campamentot anqäxar irpsupxam, khitinakatix nayar ukham ñanqhachatap ist’apkäna ukanakasti amparanakap uka ñanqhachir jaqin p’iqipxar luqxatapxpan, ukatsti uka jaqirux qalampi k’upjas jiwayapxpan. ¹⁵ Israelitanakarux sarakim: Kawkïritix Tatit Diosapar ñanqhachkani ukarusti, juchap uñt’asiyapxäta, ukatsti taqi jaqinakaw qalamp k’upjas uka jaqirux jiwayapxani. Yaqha markat jutirïskpasa jan ukax pachpa israelita jaqïskpasa, Tatitun sutiptix ñanqhachkani ukasti, uka jaqix jiwayatäñapatak juchañchatäniwa. ¹⁷ “Khititix jaqi masiparu jiwayani ukasti jiwayatarakïniwa. ¹⁸ “Khititix jaqin uywapa jiwayani ukasti ukhamat ukham yaqha uywa kutt’ayañaparakiwa. ¹⁹ “Khititix mayni jaqi masipar mä ñanqhsa lurkani ukasti, kuna ñanqhtix lurki uka kipka ñanqharak katuqani. ²⁰ P’akjatatxa p’akjatarakïniwa; uñkatatasti, uñkatatarakïniwa; tuqjatax, tuqjatarakïniwa; kuna ñanqhtix lurkäna uka kipka ñanqha katuqarakini. ²¹ “Khititix mä uywa jiwaykani ukasti, yaqha uywa kutt’ayxani. Khititix jaqi masipar jiwaykani ukasti jiwayatarakïniwa. ²² “Aka kamachisti yaqha markat jutirinakataki, ukhamarak pachpa israelitanakatakïniwa. Nayätwa jumanakan Tatit Diosamaxa.” ²³ Ukhamasti Moisesax israelitanakampiw parläna, ukatsti kawkïr jaqitix Tatitur ñanqhachkatayna uka jaqirux campamentot anqäxar irpsusaw qalamp k’upjas jiwayapxäna. Kunjämtix Tatitux Moisesar siskatayna ukhamarjamaw israelitanakax phuqhapxäna.

¹ Tatitux Moisesaruw Sinaí qullun ² israelitanakar akham sañapatak mayïna: “Kuna uraqtix jumanakar churapkäma ukar mantapkäta ukapachasti, uka uraqix mä maraw samarañapa, uka samaräwisti Tatitutakïniwa. ³ Yapunakamxa suxta maraw yapuchasipxäta. Uva yapunakamsa suxta maraw alinakap khuchhurapxäta, uva achunaksa apthapipxarakïta, ⁴ ukampis paqallqu mara purinxipansti uka uraqix Tatitutakiw samarani; uka marasti janipuniw yapunakam yapuchapxätati, janirakiw uva alinaksa khuchhurapxätati. ⁵ Qhipa trigo achunak apthapitat jupapachpa külltanir trigo jan yawthapipxamti, jan khuchhurat uva alinakan uvanakapsa janirak apthapipxamti, uraqix marpach samarañapapuniwa. ⁶ Kunatix uka samarañ maran uka uraqin jupapachpa achkani ukax jumanakana, uywatanakamana, luqtirinakamana, jumanak taypin jakapki uka yaqha markat jutirinakan manq’apxañapatakïniwa; ⁷ ukhamarak uywanakamatakisa, qullunkir animalanakatakis manq’añax utjaskani. Kunatix uraqin achkani ukax taqinin manq’añapatakïniwa. ⁸ “Jumanakasti paqallqu kutiw paqallqu mara jakt’apxäta, ukhamat uka paqallqu maran pusi tunka llätunkan mara jakt’asiñapataki, ⁹ uka marana paqallqu phaxsina tunka uru saraqatarusti, uka urux juchanakat pampachatäñ jikxatañ uruwa, ukapachaw jumanakax mä pututu phust’as taqi uka markpachar ist’ayapxäta. ¹⁰ Phisqa tunka mara purinxipansti jumanakax uka mararux qullan mara sasaw sapxäta; uka marasti qhispiyasiñ maräniwa, uka maranarak markpachan taqinitak qhispiyasiñ utjatap yatiyapxäta. Uka maransti khitinakatix uraqinakap apt’asipkäna ukanakax uraqinakap tumpasxapxani, t’aqhisiyat jakirinakasti wila masipan ukaruw kutt’xapxani. ¹¹ Uka phisqa tunka marasti jumanakatakix qhispiyasiñ maräniwa, uka marasti janiw jumanakax yapuchapkätati, jupapacha achuri trigsa janiw yawthapipkätati, janirakiw uva yapuman achunakapsa apthapipkätati, ¹² uka maran qullan marätapata, jumanakatak qhispiyasiñ marätap layku. Kunatix uraqin jupapach achkani ukak manq’apxäta. ¹³ “Uka qhispiyasiñ maransti jumanakax taqiniw uraqinakam tumpasxapxäta. ¹⁴ Maynitix mä uraqi aljani jan ukax khititsa alasini ukasti, jan jumanakkamax sallqjasipxamti; ¹⁵ khititix alaskani ukasti, kunapachatix qhispiyasiñ marax utjkän ukkhatpach qawqha maratix sarakipkani uk sum jakt’asin chiqpach alap churxañapawa, aljiristi qawqha maranakas uka uraqix yapuchañäski ukarjamaw aljañapa; ¹⁶ walja maratix yapuchañatak utjaskchi ukkhasti, uka uraqin alapax jiläniwa; juk’a marakïxani ukasti, alapax juk’akirakïniwa, ukampis kunatix aljaski ukax qawqha maras yapuchañatakix utjaski ukak aljasixa. ¹⁷ “Jan khitis mayni masiparux jan wal lurpati. Tatit Diosarusti axsartapxapunim, nayätwa jumanakan Tatit Diosamaxa. ¹⁸ Nayan kamachinakaxarjam sarnaqapxam, arsutanakaxarus phuqhapxarakim. Ukanakarusti phuqhapxapunim, ukapachakiw uka uraqin kusisit jakasipxäta; ¹⁹ uraqix suma achunak churani, jumanakasti uka uraqin kusisitaw jakasipxäta, uka achunaksa sist’asiñkamaw manq’asipxarakïta. ²⁰ “Inas jumanakax sapxarakchïta: ‘¿Ukhamasti kunarak manq’añänisti uka paqallqu mara purinin ukkhasti, jan yapuchkañäni, janirak achunaksa apthapkañäni ukkhasti?’ sasa. ²¹ Nayaw jumanakarux suxtïri maräki ukkhax walja achunak apayasinipkäma, uka achunakasti kimsa maratakix jilarkiriw apthapisini; ²² ukhamat jumanakax kimsaqallqu maran yapuchasipkäta ukkhax uka imat trigot manq’asipkäta, ukhamarus kunapachatix achu apthapiñax purinkani uka llätunkiri marakamas manq’asipkakïtawa. ²³ “Uraqisti janiw wiñayatak aljatäñapäkiti, uka uraqix nayankiwa; jumanakasti uka uraqinxa sart’ir jaqinakakïpxtawa. ²⁴ Ukhamasti kawkïr uraqinaktix jumanakax katupkta ukanaksti, nayra uraqiniruw kuttayxapxäta, jupanakaw wasitat uka uraqinak tumpasxapxani. ²⁵ “Mayni marka masimatix aynacht’at uñjasini, ukat uraqipa jumar aljätam ukaxa, mayni jak’a wila masipaw kuntix wila masipax aljkatayna uka uraq kutsuyir jutani. ²⁶ “Maynitix uka uraq kutsuyañatak jan jak’a wila masinïkani, ukampis uka uraq kutsuyasiñatak jupapachpa qullqi jikxatani ukasti, ²⁷ qawqha maranakas mäkipxatayna uka uraq aljatapatxa ukhamarjamaw amuyt’ani, ukatsti alasirirux qawqhatix qullqix churañ wakiski ukkha kuttayxani, ukatsti jupax wasitat uraqip tumpasxani. ²⁸ Ukampisa janitix uka uraq kutsuyasiñatak qawqha qullqitix munaski uk jikxatkani ukasti, uka uraqix alasirin amparapankaskakiniwa qhispiyasiñ mara puriniñapkama; uka maraw uka uraqix wasitat kutsuyatäxani, aljiristi wasitat uka uraq katusxarakini. ²⁹ “Maynitix uyuchrantat markan mä uta aljani ukasti, aljatat uksarux mä maraw utjaski aljasirin uka uta kutsuyasxañapataki. ³⁰ Ukampis uka utatix uka maran jan kutsuyatäkani ukapachasti, alasirimpi, wawanakapampiw uka uta wiñayatak katxapxani. Qhispiyasiñ maransti janipuniw uka utax kutsuyatäkxaspati. ³¹ Ukampisa, kawkïri utanakatix markat anqäxankki ukanakampix kunjämtix uraqinakampi luraski ukhamäniwa; qhispiyasiñ maranxa nayra utanipar kutkatayatäxaniwa. ³² “Levitanakasti kawkïri utanakatix jupanakan markanakapankki ukanak wasitat kutsuyasipxani. ³³ Maynitix levitanakan markapan mä uta alasini ukasti, uka utax qhispiyasiñ maran levitar kutkatayatäxaniwa, kawkïri utanakatix levitanakan markapan utjki ukanakax Leví ayllunkirinakankiwa, israelitanakan jupanakar uka utanak churapxatap layku. ³⁴ Kawkïr uywa awatisiñ uraqinakatix levitanakan markapan utjki ukanakax janipuniw aljatäkaspati, uka uraqinakax wiñayatak levitanakar churatawa. ³⁵ “Mayni marka masimatix aynacht’at uñjasini, ukat juman ukar yanap mayir jutani ukasti, jaya markat jutir jaqïkaspas ukham utamarux katuqäta. ³⁶ Kuntix mayt’käta ukanakatsti janipuniw juk’amp jila mayïtati; jan ukasti, Diosamar axsartam, uka marka masimarux utamar katuqarakim. ³⁷ Kuna qullqtix mayt’käta ukatsti janiw juk’amp jila mayïtati, kuna manq’tix churkäta ukatsa janirakiw juk’amp jila mayisïtati. ³⁸ Nayätwa jumanakan Tatit Diosamaxa, nayaw jumanakarux Egipto uraqit irpsunipxsma, aka Canaán uraqsa churapxaraksma, nayan jumanakan Diosamäñataki. ³⁹ “Mayni marka masimatix jumampïkasin aynacht’at uñjasini, ukat jumar aljasxarakïtam ukapachasti, juparux jan mä t’aqhisiyat jaqjam irnaqaykamti; ⁴⁰ juparusti utaman irnaqirïkaspasa, jan ukax mä qurpachasir jaqïkaspas ukhamar uñjam. Jumatakisti qhispiyasiñ mara puriniñapkamaw irnaqarapïtam, ⁴¹ ukatsti qhispitaw jupasa, wawanakapasa uñjasxani, kawkhankkitix wila masinakapax ukkharuw pachpa uraqipar kuttawayxani, ⁴² jupanakasti nayan luqtirinakaxäpxiwa; nayaw jupanakarux Egiptot irpsunta, janipuniw jupanakax t’aqhisiyat jaqjam aljatäñapäkiti. ⁴³ Jan qhuru kankañamp jupanakarux uñjamti, jan ukasti, Diosamar axsartam. ⁴⁴ “Jumatix t’aqhisiyat jaqinakanïñ munsta ukasti, kawkïr yaqha markanakatix markam jak’ankki ukanakat alasinim. ⁴⁵ Jan ukax kawkïrinakatix yaqha markat jutir jaqinakan wawanakapäki, jumanak taypinarak jakapki ukanakarux jumankañapatak alasiskasmawa, ⁴⁶ ukatsti kunapachatix jumanakax jiwxapxäta ukkhax wawanakaparuw mä tutïkaspas ukham jaytxapxäta; ukhamat luqtayasipxañamataki. Ukampis jumanakax janipuniw israelita masinakamarux t’aqhisiyapxañamäkiti. ⁴⁷ “Yaqha markat jutir jaqitix jumanak taypin qamiriptxani, ukatsti mayni israelita jaqitix aynacht’at uñjasini, ukham aynacht’atätap laykutix t’aqhisiyat jaqjam uka jaya markat jutir jaqir aljasxani ukasti, ⁴⁸ uka israelita jaqix wakisiw kutsuyatäñapaxa. Uksti pachpa wila masipaw ukham luraspa, ⁴⁹ mä tiopa, mä primo jilapa, jan ukax kawkïri jak’a wila masipas kutsuyakispawa, qullqip utjaspa ukkhax jupa kipkas kutsuyasirakispawa. ⁵⁰ Jupampi alasiripampisti qawqha maräxisa jupan aljasitapata qhispiyasiñ marakamax uk sum jakt’apxani. Kutsuyasiñatakix qawqtix mä irnaqirix uka maranakan irnaqatapat katuqkaspa ukhamarjamaw kutsuyasiñapan alapax tantiyt’atäni. ⁵¹ Walja maranakatix utjaskchi ukapachasti, qawqha qullqirutix jupapachpa aljaskäna ukat chikat qullqimpiw kutsuyasxani, ⁵² ukampis uka qhispiyasiñ maratakitix juk’a urunakakïxani ukkhasti, qawqha maranakatix qhispiyasiñatak jilt’ki ukarjamakiw qullqi kuttayxarakini. ⁵³ Juparusti mä maratakis irnaqañapatak jawsatäkaspa ukhamarjamaw uñjatäni; janipuniw uka israelita masimarux qhuru kankañamp uñjayätati. ⁵⁴ “Uka maranakantix uka jaqix jan kutsuyatäkani ukkhasti, kunapachatix qhispiyasiñ marax purinkani ukapachaw wawanakapampach qhispitäxani, ⁵⁵ israelitanakasti nayan luqtirinakaxawa; nayaw jupanakarux Egipto markat irpsunta. Nayätwa jupanakan Tatit Diosapaxa.

¹ “Janipun yaqha diosanak lurasipxamti; janirak ukanakarus yupaychapxamti. Nayätwa jumanakan Tatit Diosamaxa. ² Nayan qullan utaxsti sumpun yäqapxam, sábado urusti samarapxarakim. Nayätwa Tatit Diosaxa. ³ “Jumanakatix nayan kamachinakaxarjam sarnaqapxäta, arunakaxsa phuqhapxarakïta ukasti, ⁴ nayax jallunakxa pachaparuw apayanipxäma, uraqisa, quqanakasa suma achunak churapxani; ⁵ trigosti jumanakatakix uvanak apthapiñkamaw utjani, uvanakas yapuchañ urukamaw utjarakini; sist’asiñkamaw t’ant’sa manq’apxäta, markamansti wali sumanarak utjasipxäta. ⁶ Jumanakarux uka uraqin samarañ churapxäma, ukatsti jan kuna llakinikiw ikt’apxäta, nayaw jumanakan markamat monte animalanaksa, nuwasiñanakatsa jark’askä. ⁷ Jumanakasti uñisirinakamarux jaltayapxätawa, espadampi jiwarayataw jumanak nayraqatan uñjasipxani; ⁸ jumanakat phisqanikiw patakanir chhuktayañatak munasini, jumanakat patakanisti tunka waranqa uñisirinakaruw chhuktayapxani; uka uñisirinakamasti jumanak nayraqatan jiwarapxani. ⁹ Jumanakarusti sum uñjapxäma, waljaniruw tukuyapxarakïma; jumanakampi arust’äwi lurataxsti phuqhapunïwa. ¹⁰ Nayra mara imasit trigo manq’asipxäta, jichha mara apthapit trigo imañatakisti, nayra mara imat trigo apanukxañamaw wakisini. ¹¹ “Nayaw jumanak taypin jakä, janirakiw jumanakarux apanukupkämati; ¹² jumanak taypinpun sarnaqasï, nayax jumanakan Diosamäyäwa, jumanakasti nayan markaxäpxätawa. ¹³ Nayätwa jumanakan Tatit Diosamaxa, nayaw jumanakarux Egiptot irpsunipxsma ukan jan juk’amp t’aqhisiyat sarnaqasipkañamataki; kuna t’aqhisiñatix jumanakxankkäna uksa nayaw apaqapxsma, ukatsti p’iqis waytat sarnaqayapxsma. ¹⁴ “Ukampis jumanakatix nayar jan ist’apkitäta, kamachi arunakaxsa janirak phuqhapkätati, ¹⁵ jan ukasti, nayan kamachinakaxsa, arsutanakaxsa jisk’achapxarakïta, ukhamat nayan jumanakampi arust’asitaxsa jan phuqhapkätati ukapachasti, ¹⁶ nayax jumanakampix akanak lurarakï: axsarañanaka, jiwayir usunaka, junt’u usunaka, nayra usunaka, janchin aynacht’añanaka, taqi uka usunak apayanï; inamayaw yapuchasipkäta, uka yapuchasitanakamsti uñisirinakamaw manq’antapxani. ¹⁷ Nayasti jumanakar jan walt’ayañatakiw sayt’ä, uñisirinakamas atipjapxätamwa; khitinakatix jumanakar wal uñisipktam ukanakampi t’unjataw uñjasipxäta, jan khitin arktataw jaltxapxarakïta. ¹⁸ “Taqi akanak katuqasas janipun nayar jaysapkitäta ukapachasti, nayax jumanakarux paqallqu kutimpiw juchanakamat t’aqhisiyapxäma. ¹⁹ Jumanakarux q’al jisk’achjapxäma, jallsa janirakiw jumanakxarux apayankxäti, alaxpachax hierror uñtataw tukuni, aka uraqisti cobrer uñtataw tukurakini. ²⁰ Inamayakiw ch’amsa tukusipkäta, uraqisti jumanakatakix janiw kuns achuykxaniti, janirakiw quqanakas achunakap churapkätamti. ²¹ “Jumanakatix nayar janipun ist’apkitäta ukasti, nayax jumanakarux paqallqu kutimp jucha luratanakamat mutuyapxäma. ²² Jumanakxarusti qullunkir qhuru animalanak antutanï, ukanakasti wawanakamsa, uywanakamsa q’al manq’antapxani, ukat jilt’irinakasti juk’akïxapxaniwa, thakhinakamas ch’usa wasarar tukutäniwa. ²³ “Taqi ukanak katuqkasinsa, janipun nayar jaysapkitäta ukasti, ²⁴ nayax jumanakar jan walt’ayañatakiw sartä, ukatsti jucha luratanakamatxa paqallqu ukkhamp mutuyapxäma. ²⁵ Jumanakxarux mä nuwasiñ jutayä, ukaw juchanakam uñt’asiyapxätam nayan arust’äwi arunakax p’akintapxatamata, jumanakasti markanakamar imantasiriw jaltxapxäta; ukampis nayax usunak apayanipxäma, jumanakasti uñisiriman amparaparuw jalt’apxarakïta. ²⁶ “Kunapachatix jumanakan trigo yapunakam q’al tukjkä ukapachasti, tunka warminakaw mä sapa hornon jumanakatak t’ant’a qhatiyapxani, ukatsti jisk’a jisk’a lakinuqapxätam, qawqsa uka t’ant’xa manq’asipkätawa, ukampis janiw sist’asipkätati. ²⁷ “Taqi ukanak katuqkasinsa janipun nayar ist’apkitäta, jan ukasti nayatak sayt’asisipkakïta ukasti, ²⁸ nayax jumanakar jan walt’ayañatakiw sartä, ukatsti jucha luratanakamatxa paqallqu ukkhamp mutuyapxäma. ²⁹ Ukapachaw jumanakax imill wawanakamsa, yuqall wawanakamsa manq’arasxapxäta. ³⁰ Nayaw jumanakan yaqha diosanakar yupaychañ altaranakam t’unthapï, incienso luqtañ altaranakamsa payaruw jaljtayä, jumanakan jiwat janchinakamsti diosanakam patxaruw liwxatä, ukatsti nayan jumanakar axtasitax uñacht’ayapxarakïma, ³¹ jumanakan markanakama, yaqha diosanakar yupaychañ utanakamsa t’unjarakïwa; kuntix jumanakax nayar luqtanipkitäta ukanakan q’aphinakapsa janiw katuqapkämati. ³² “Jumanakan markanakamsti q’al t’unjä, uñisirinakamatix ukar jakir jutapxani ukkhasti, ukham t’unjat uñjasax wal musphasipxani. ³³ Jumanakarux markanak taypiruw ananukupxäma, espadampi jiwayañatakiw arknaqapxäma; uraqimasti ch’usa wasarar tukutaw uñjasini, markanakamas axsarkañ q’ala t’unjataw uñjasini. ³⁴ Ukhamasti uraqix ch’usa wasarar tukuta uñjasitäñapkamax samaraniwa, ukkañkamasti jumanakax uñisirinakaman markapan jakapxäta, uka uraqix nayrax janiw samarkataynati ukat jichhax samarani. ³⁵ Kunapachkamatix uka uraqix ch’usa wasar uñjasini ukapachkamaw uka uraqix samarani, jumanakax uka uraqin jakkasax janiw samarayapkäyätati. ³⁶ “Khitinakatix jumanakat uka uñisirin uraqipan jakasipkakini ukanakarusti, walpun axsarayä, mä quqa laphin jalaqtatapatsa khathatipxätawa; mä jaqis jumanakarux espada ayt’at arknaqkaspa ukham jaltxapxäta, ukatsti jan khitin arknaqkataw liwirtapxäta; ³⁷ nuwasiñatsa jaltxapkasma ukhamaw jan khitin arknaqat jumanakkam liwirtapxäta; ¡jumanakatsti janipuniw khitis uñisirinakapar saykatirjamäkaniti! ³⁸ Jumanakax yaqha markanak taypin jiwarayataw uñjasipxäta; uñisirinakaman jiwarayataw uñjasipxäta; ³⁹ khitinakatix uñisirinakaman uraqipan qhiparapkani ukanakasti, juchanakap laykuw jiwarapxani, ¡awkinakamamp chikaw jupanakan jucha lurapxatapat jiwarapxäta! ⁴⁰ “Jumanakax jucha luratanakamsa, awkinakaman jucha luratanakapsa, nayar saykatasisin jan taqi chuymampi arkapxatamsa uñt’asisipkam, ⁴¹ nayasti jumanakar jan walt’ayañatakiw uñisirinakaman markapar apayapxäma; ukan Diosar jan uñt’ir amuyumax jisk’achat uñjasini, juchanakamatsa mutuyatäpxarakïtawa. ⁴² Ukapachaw nayax kuna arust’äwtix Jacobumpi, Isaacampi, Abrahamampi lurkäyät ukanakat amtasï, uraqitsa amtasirakïwa, ⁴³ kawkïr uraqtix jumanakax jaytaniwayapkäta ukkañkamasti uka uraqix samart’aniwa; ukampis jumanakax juchanakamat t’aqhisipxäta, nayan arsutanakaxampi, kamachinakaxampi jisk’achapxatam layku. ⁴⁴ “Ukhamäkipansa, jumanakax uñisiriman markapan jakapkäta ukasa, janiw nayax jumanakarux apanukupkämati, jisk’achapkämasa; t’unjapkarakïmasa, janirakiw kuna amtäwirutix nayra awkinakamamp lurkäyät ukanakatsa armt’askäti, nayan jumanakan Tatit Diosamätax layku. ⁴⁵ Jan ukasti, kuna arust’äwtix jupanakampi lurkäyätxa, kunapachatix taqi markanakan uñjkaya, jupanakan Diosapäñatak Egiptot jupanakar irpsunkta ukapachaxa, taqi ukanakat amtasipunïwa. Nayätwa Tatit Diosaxa.” ⁴⁶ Akanakawa kamachinakaxa, arsüwinakasa, yatichäwinakasa, kuntix Tatitux Moisés tuqi Sinaí qullu patan churkäna ukanakaxa, uka kamachinakasti Tatitumpi, israelitanakampi luratänwa.

¹ Tatitux Moisesaruw säna: ² “Israelitanakarux akham sarakim: Kunapachatix maynix Tatitur mä arsüwi phuqhañ munani ukasti, qawqhäkitix mä jaqin alapax ukhamarjamaw churañapa, ³ mä chachatix pä tunkat suxta tunka marankamäni ukanakasti phisqa tunka qullqinak churañapawa, qawqhäkitix qullan utan tantiyt’at qullqipax ukhamarjama, ⁴ mä warmitsti, kimsa tunka qullqi churañapawa. ⁵ Kawkïr chachatix phisqa maranita pä tunka marankamäni ukanakasti, pä tunka qullqi churañapawa, mä warmitsti tunka qullqiraki. ⁶ Mä yuqall wawatix mä phaxsita phisqa marankamäni ukasti phisqa qullqi churañapawa, imill wawatsti kimsa qullqiraki. ⁷ Kawkïr jaqinakatix suxta tunka maranit amstarüni ukanakatsti, chachatxa tunka phisqan qullqi, warmitsti tunka qullqi churañapawa. ⁸ Uka jaqitix t’aqhin jakani ukatsti janirak ukkha qullqi churañatak utjarapkani ukasti, sacerdoten ukar sarañapawa, sacerdotew qawqtix uka jaqix churkaspa ukhamarjam alap sani. ⁹ “Uywanak tuqitsti kawkïrinakatix Tatitur luqtatäkani ukanakax Tatitutakipunïniwa, ¹⁰ janirakiw yaqha uywampix turkakipatäkaspati, uka uywax juk’ampi sumäskpasa jan ukax jan walïskpasa. Turkakipatapunïni ukkhasti, luqtat uywasa, turkat uywäki ukas paypachaw Tatitutak satäni. ¹¹ “Mä q’añu uywatix Tatitur luqtañatak yaqhachatächi ukasti, uka uywax sacerdoten ukar irpatäñapawa, ¹² ukhamat sacerdotex qawqhänis uka uywan alapax uk sañapataki. Qawqtix sacerdotex churam siskani ukax jaysatäñapapuniwa, ¹³ jaqipatix uka uywa kutsuyasiñ munani ukkhasti, qawqtix sacerdotex churam siskäna ukat chikatan chikatapamp yapxatat churañapäniwa. ¹⁴ “Maynitix Tatitur utap luqtani ukasti, sacerdotew uka utan alap tantiyt’ani. Sacerdotex qawqhaw siskanitix ukax jaysatäñapapuniwa. ¹⁵ Ukampis khititix utap Tatitur luqtkäna uk kutsuyasxañ munani ukasti, qawqhatix churam satäkän ukxarux chikatan chikatapamp yapxatat churatäxaniwa, ukhamat uka utax wasitat jupankxani. ¹⁶ “Maynitix uraqipat mä chikata Tatitur luqtani ukasti, uka uraqin alapax qawqhatix uka uraqin achkaspa ukhamar alapax tantiyt’atäniwa, sapa pä patak pä tunkan kilo cebada granonakatxa, phisqa tunka qullqi churasini. ¹⁷ Uka jaqitix qhispiyasiñ maran uraqip churani ukasti, alapax qawqha satäkitix ukax phuqhasiñapapunïniwa, ¹⁸ ukampis qhispiyasiñ mara qhipattix Tatitur luqtani ukkhasti, sacerdotew qawqha qullqitix uka uraqit churañäki uk amuyt’ani, qawqha maratix qhispiyasiñ maratak utjaski ukarjamaw alapax iraqasini. ¹⁹ “Maynitix luqtat uraqip kutsuyasxañ munani ukasti, qawqhatix alapäki ukxarux chikatan chikatapamp yapxatat churani, ukat uka uraqix wasitat jupankxarakini; ²⁰ ukampis janitix uka uraqi kutsuyaskani, ukat uka uraqix yaqhar aljatäxarakini ukkhasti, janiw wasitat uka uraq kutsuyaskxaspati. ²¹ Kunapachatix uka uraqix qhispiyasiñ maran qhispit uñjasxani ukkhasti, Tatitutaki sata yaqhachatäxaniwa, sacerdotew uka uraq katusxarakini. ²² “Maynitix wila masipan jan uraqipäkasin mä alat uraqi Tatitur churani ukkhasti, ²³ qhispiyasiñ mara puriniñapkamax qawqha maräskis ukhamarjamaw sacerdotex uka uraqin alap sani, ukatsti uka jaqix uka urpachaw qawqhäkitix uka uraqin alapax ukarjam churxani, ukatsti uka uraq Tatituruw luqtxani. ²⁴ Qhispiyasiñ maransti, khititix chiqpach uraqinïkasin uraqip aljkatayna uka pachpa jaqir churatäxaniwa. ²⁵ “Taqi alanakax kawkïr qullqitix qullan utan apnaqatäki ukhamarjam amuyt’atäniwa, uka qullqix tunka mayan gramoniwa. ²⁶ “Uywanakan nayrïr qallunakapasti, vaca qallüpasa, jan ukax mä oveja qallüpasa, taqi ukanakax Tatitunkxiwa, janiw wakiskxiti yaqhachañaxa. ²⁷ Mä q’añu uywatix Tatitur luqtañatak yaqhachatächi ukasti, uka uywax kutsuyatäspawa qawqhäkitix alapax ukar chikatan chikatapat mä juk’amp yapxatasa. Ukampis janitix uka uywax kutsuyatäkani ukkhasti, nayra alapar aljatäxaniwa. ²⁸ “Maynitix Tatitur yänakapat luqtxani, jaqinakäpasa, uywanakäpasa, jan ukax tuti uraqinakäpasa, taqi ukanakax janipuniw aljatäkaspati, janirakiw kutsuyatäkaspasa; taqi kunanakatix Tatitur churatäki ukanakax qullan yänakapuniwa. ²⁹ Kawkïr jaqitix jiwayatäñatak juchañchatäkän ukas janipuniw qhispiyatäkaspati, jan ukasti jiwañapapuniwa. ³⁰ “Taqi achunakata, jathanakata, quqanakan achuri achunakatsa sapa tunkat mayax Tatitunkapuniwa, jupar katuyatarakiwa. ³¹ Maynitix uka tunkat maya churatäkän uk kutsuyasiñ munani ukkhasti, qawqhäkitix alapaxa, ukxarux chikatan chikatapat mä juk’ampi yapxatat churañapawa. ³² “Uywanakatsti sapa tunkat mayax Tatitur luqtatapunïniwa, ³³ kawkïritix sumäki, jan sumäki ukanaksa janiw ajllitäñapäkiti, janirakiw yaqhampis turkakipatäkaspati. Turkakipatäni ukasti, suma uywasa, jan sumäki ukas paypachaw nayankani, janirakiw kutsuyatäkaspati.” ³⁴ Aka kamachi arunak Tatitux Moisesar Sinaí qullun israelitanakatak churäna.