LAMENTACIONES

LAMENTACIONES

¹ ¡Walja jaqinakan markax kunja sapakis uñjasxi! ¡Markanakan jilïripa markax mä ijma warmir uñtatakïxiwa! ¡Uñtkañ suma markaxa ch’ama irnaqañanakamp t’aqhisiyataw uñjasxi! ² Arumanakax jachkäwiw tukusiski; ajanupansti jachakiw jalaski. Munirinakapatsti janiw maynis jupar chuymachirix utjkiti. Taqi masinakapasti maysa uñtxapxi, uñisirinakapaw tukxaraki. ³ T’aqhisiñanakampitsa, ch’ama tukuñanakampitsa, jichhax Judá markax katuntat apatawa. Khititix nayrax markanak taypin apnaqir markäkäna ukasti, jichhax janiw samarañ jikxatkxiti. Jupar arknaqirinakasti, jikxatapxiwa, jan walt’añan uñjasiyapxaraki. ⁴ ¡Jerusalén markan thakhinakapax llakiskayawa! ¡Janiw khitis phunchhäwinakar kusisir jutirix utjkxiti! Markan punkunakapasti ch’usa wasarar tukutawa; sacerdotenakax wal jachapxi, tawaqunakas wal llakisipxi, Jerusalén markax walpun t’aqhisi. ⁵ Uñisirinakapaw jupar apnaqapxi, awqanakapax qamirkiptapxiwa. Sinti jach’a juchanak luratapat Tatitux ukham t’aqhisiyi. Wawanakapasti jaya markar apatawa, uñisirinakapaw katuntat apapxi. ⁶ ¡Jerusalén markan jiwakïtapas jichhax chhaqatawa! Jilïri irpirinakapasti jan ch’amaniw uñjasxapxi, arknaqirinakapatsa jaltxapxiwa. ¡Manq’at awtjat tarujanakar uñtataw chhuxllanak thaqhasis sarnaqapxi! ⁷ Jerusalén markax khaya urunakat amtasi, sapaki, llakt’ata qhiparkäna uka urunakat amtasi; kuna qamir yänakapatix nayrax utjkäna taqi ukanakat amtasi; kunjämsa uñisiripan amparapar jalt’käna uk amtasi, janiraki khitis jupar yanapt’iri jutkänti ukanak amtasi, kunapachatix uñisirinakapax jupar uñjasinxa, aynacht’atapat larusipkäna uk amtasiraki. ⁸ Jerusalenax sintipuniw juchañchjasi, jisk’achjayasiñkamaw juchañchjasi. Khitinakatix nayrax jach’ar aptapkäna ukanakasti, jichhax jupar q’alal uñkatasax jisk’achapxiwa. Ukatpï jichhax jachaskixa, p’inqapatsa maysa uñtxaraki. ⁹ Isipasti q’ala q’añuchjatapuniwa; ukhamar puriñ janiw amuykänti. Aynacht’atapasti jan amuyt’kayapuniwa; janiw jichhax khiti chuymachiris utjkiti. ¡Tatay, nayan t’aqhisitax uñtanitaya, uñisirinakaxan jach’a jach’a tukutapsa uñtanimaya! ¹⁰ Uñisirinakaw Jerusalén markan suma yänakap katuntasxi. Markasti, Diosar jan uñt’ir jaqinakan Tatitun utapar ch’amampi mantir uñjaraki, ¡kawkïr jaqinakarutix jumax: “Janiw nayan utaxar mantapxätati” siskta ukanakaw mantapxi! ¹¹ Taqi markachirinakapaw jichhax wal jachapxi, manq’añ thaqhasaw sarnaqasipki; qamir yänakapsa manq’ampiw turkasipxi, ukhamat manq’atjam jan jiwañataki. ¡Tatay, nayan aynacht’atax uñtanimaya! ¡Jan walt’ataxsa amuyarakimaya! ¹² ¡Jumanaka, thakhinjam saririnaka, amuyt’apxamaya, t’aqhisitaxar uñtatax utjpachati, nayarux ukataq t’aqhisiyxitu! ¡Tatituw phiñasiñapan aka t’aqhisiñ apayanitu! ¹³ Tatitux alaxpachatpach mä nina apayani ukasti ch’akhanakkam nayarux naksutu; saräwixarusti mä sipit uskuraki, ukampisti qhiparuw kuttayitu; nayarux q’al apanukutu, t’aqhisiñaxas jan tukuskayawa. ¹⁴ Tatituw nayan juchanakax uñji; jupa kipkarakiw uka juchanak chinkatitu, uka juchanakasti mä yukükaspas ukhamaw jatxattitu: ¡ch’amaxas janiw utjkxiti! Tatituw uñisirinakan amparapar katuyitu, janiw jichhax ukanakar saykatirjamäkti. ¹⁵ Tatitux khitinakatix ch’amampi nayar arxatapkitäna ukanakarux jayaruw apanuku. Nayar nuwantañatakisti mä ejército khithanukuni, ukhamat ch’aman jaqinakaxar tukjañataki. ¡Tatitux ukhampach nayarux takxatitu, uvar uñtataw ch’irwsurakitu! ¹⁶ Taqi ukanakasti nayaruw jachayitu. Nayraxasti jachampi phuqhantatawa, janiw nayar khiti chuymachiris utjkiti, nayar khiti ch’amañchiris utjkarakiti. Wawanakaxasti t’unjat pirqanak taypin qhiparapxi, uñisirinakaxax nanakat sipansa juk’amp ch’amaniwa. ¹⁷ Jerusalenasti yanap mayisaw amparap luqtani, ukampis janiw khitis jupar chuymachirix utjkiti. Tatituw Jacoburux uñisirinakapamp muyuntayi; Jerusalenasti uñisirinakapatakix jisk’achkañ markakïxiwa. ¹⁸ Tatitux kunatix askïki uk luraski, nayan kamachi arunakapar jan yäqataxata. ¡Taqi markanaka, ist’apxita; t’aqhisitaxsa uñjapxarakim! ¡Markaxankir waynanakasa, tawaqunakasa, katuntat apataw uñjasipxi! ¹⁹ Munirinakaxaruw yanap mayta, ukampis jupanakax nayarux sallqjapxituwa. Markaxankir sacerdotenakasa, jilïr jaqinakasa, pachpa markan jiwarapxi: ¡Manq’a thaqhasaw sarnaqapxäna manq’atjam jan jiwañataki! ²⁰ ¡Tatay, nayan t’aqhisitax uñtanimaya! ¡Chuymaxas phallañ munitu! Juchaxat amthapista ukapachaxa, llakisiñaw chuymaxar llupt’añ munitu. Khä anqanxa wawanakaxarux espadampiw jiwarayapxi, aka manqhansa jiwañakiw utjaraki. ²¹ Jaqinakax wararitax ist’asipkiwa, ukampis nayar chuymachirix janiw khitis utjkiti. Taqi uñisirinakaxaw nayan aynacht’atax yati, juman nayaru t’aqhisiyatamatsti kusisipxarakiwa. ¡Juman yatiyatäki uka urux purinpanaya, jupanakasti kunjämtix nayax t’aqhiskta ukham t’aqhisipxarakpan! ²² Kuna ñanqhanaktix lurapki ukanakax nayraqatamar purinpan; juchanakaparjam jupanakarux uñjam, kunjämatix nayar juchañchkista ukhama; ¡jachataxax sintipuniwa, chuymaxas wal usxarakitu!

¹ ¡Tatitun phiñasiñapax sinti jach’apuniwa, ukkha suma Jerusalén markarusti q’al ch’amakt’ayi! Israel markan sumäñapsa pampa t’unji, alaxpachat akapacharus jaquqankaspa ukhama; Phiñasiñapanxa, pachpa apnaqäwipatsa janiw amtaskiti. ² Tatitux Jacobun utanakap jan mayan t’unjawayi; Suma Judá markan pirqanakapsti phiñasiñapan atipjataw q’al t’unjawayi; reyirux qunuñap apaqawayi, jilïrinakaparusti wal p’inqachjawayaraki. ³ Tatitusti phiñasiñapan atipjataxa, Israelan ch’amapxa q’al chhaqtäwayi. Uñisirinakarux saykatasktanwa ukampis Tatitux janiw yanapkistuti. ¡Jacobun uraqipansti mä ninaw aqti, uka ninasti kunatix utjki ukanak taqpach nakhantawayi! ⁴ Tatitux mä uñisirïkaspas ukhamaw mich’ip antutt’añatak wakicht’asi; awqäkaspas ukhamarakiw taqi kunatix sumäki ukanak t’unjawayi; phiñasiñapxa mä ninjamaw ukkha suma Jerusalén markxar jaqxatani. ⁵ Tatitux uñisirïkaspas ukham uñjistu: Israel markarux q’al tukji; reyin utanakapsti taqpach t’unthapi, suma jach’a pirqanakapsa pampa tukuyaraki. Ukkha suma Judá markarusti, t’aqhisiñatsa, t’aqhisiñampiw phuqhantaraki. ⁶ Qullana utapsti, mä lunthatjamaw t’unjawayi; tantachasiñäki uka chiqsa q’al t’unjawayi. Tatitux Jerusalén markanxa, sábado urunakatsa, phunchhäwi urunakatsa armasiyistuwa. Aqkir phiñasiñapansti, sacerdoterusa, reyirusa apanukuwa. ⁷ Tatitux altarap apanukuwa, qullan utapsa jisk’achjarakiwa; markar jark’ir jach’a pirqanaksa uñisirinakan amparaparuw katxaruyi. ¡Tatitun utapansti mä phunchhäwi urükaspas ukhamaw jaqinakan arnaqasitapax ist’asi! ⁸ Tatitusti ukkha suma Jerusalén markan jark’aqasiñ pirqanakap t’unjañ amti. Jupaw t’unjañatak wakichäna, jan samart’asaw uka wakichäwip phuqharaki. Uka jach’a pirqanaksa, jupax llakimpiw phuqhanti, uka pirqanakasti pampaw tukuraki. ⁹ Markasti jan punkuni, jan jist’katañaniw uñjasi: ¡punkunakasti t’unjata, pampan liwirpayatawa! Reyipasa, jilïr apnaqirinakapas Tatitur jan uñt’irinakamp chikakïxiwa; Tatitun kamachinakapax janiw utjkxiti. ¡Janirakiw profetanakapas Tatitut kuna unañchäwinaksa katuqkxapxiti! ¹⁰ Jerusalén markankir jilïr jaqinakas amukiw uraqin qunurxapxi, p’iqinakapxarus laq’ampiw jach’xatasipxi, chhankha isinakampiw uchasipxi. Jerusalén markankir tawaqunakasti p’iqinakapsa uraqkamaw alt’apxaraki. ¹¹ Jachkäwisa nayrax usxituwa, chuymas llakisiñat phallañjamak munxitu; jan ch’amaniw uñjasta jaqinakaxan markap t’unjat uñjasa, ñuñuskir wawanakar manq’atjama jiwaraskir uñjasa. ¹² Wawanakasti taykanakaparux sapxänwa: “¡Janiw t’ant’asa, vinosa utjkxistuti!” sasa. Markan thakhinakapansti wawanakax jiwaratjamaw liwirtapxäna, taykanakapan amparanakapan samaqkäwiw amukt’awayxapxäna. ¹³ Suma munkañ Jerusalén marka, ¿kunampirak jumarusti kikipasiyirismasti? Suma munkañ Jerusalén marka, ¿kun lurasarak jumarusti chuymachirismasti? Juman t’unjäwimax lamar qutar uñtat jach’awa; ¿khitirak jichhasti jumar chuymachiristamsti? ¹⁴ Kuna unañchäwinaktix profetanakamax yatiykäyätam ukanakax k’arikamakïnwa. Juchanakam janiw qhanañchapkäyätamti, ukhamat juman kuttanxañamataki, k’ari unañchäwinak jumarux yatiyapxäyätam, ukanakarusti jumax iyawsarakïyätawa. ¹⁵ Thakhi sarir jaqinakasti jumar uñjasaxa, larusisaw amparanakap t’axllisipxi; jumat phiskasisax p’iqsa khiwisipxiwa, suma Jerusalén markat sapxarakiwa: “¿Akati kawkïri markattix aka uraqpachan wali suma munkañ markapuniwa sapkäna ukasti?” sasa. ¹⁶ Taqi uñisirinakamaw jichhax jumatak arsu. Lakanakapsa t’ururt’asisaw axsarayañ arunak sapxi: “¡Q’alpun t’unjtanxa. Akpun suyaskäyätanxa; kunjämtix uñjañ munkäyätan, ukham uñjtanxa!” sasa. ¹⁷ Tatitux amtäwinakap phuqhapuniwa, arsutap phuqharakiwa. Kuntix nayratpach t’unjañ amtkäna ukxa, jichhax jan khuyapt’ayasisaw t’unji, uñisirinakamampis larusiytamwa, uñisiriman ch’amapsa jach’aruw aptaraki. ¹⁸ ¡Suma Jerusalén marka, Tatitut yanap mayim! ¡Jawir umar uñtat uruy arumay jachanakam jalayam! ¡Jan samart’as jacham, nayranakamas janirak samarpati! ¹⁹ Jerusalén, sartasim, arumanakas Tatitur arnaqasim; Tatitun nayraqatapan chuymamsa ch’allxtayasim, umar uñtat jalayarakim; amparanakam luqtas Tatitut mayt’asim, wawanakaman jakañapatakis jupat achikt’asim, uka wawanakamasti marka thakhinakan manq’atjam jiwaraski. ²⁰ Uñjam Tatay, amuyt’amaya, janipuniw khitirus nanakarjamax t’aqhisiyktati. ¿Taykanakan ñuñuskir wawanakapar manq’antasiñapax wakisipunpachati? ¿Sacerdotenakana, profetanakan qullan utaman jiwarayatäñapax wakisipunpachati? ²¹ Waynanakampi, chuymani jaqinakampix marka thakhinakan jiwarataw liwirtasipki; markaxankir waynanakasa, tawaqunakasa, espadampi jiwarayataw uñjasipxi; phiñasiñam urunsti jiwarayañkamaw chhuxriñchjtaxa, ¡jan khuyapt’ayasisaw jiwarayaraktaxa! ²² Jan walt’añanaksti taqi tuqit apayantaxa, mä phunchhäwirus jutapkaspa ukhamaw purintanipxi; Tatay, juman q’apisiñam urunsti, janipuniw khitis jiwañat qhispkiti. Kawkïrinakarutix nayax uywaskäyäta, yatichkarakïyäta, ukanakarusti uñisirinakaw jan khuyapt’ayasis jiwarayxi.

¹ Nayaw jach’a t’aqhisiñanak katuqta, Tatitun jach’a phiñasiñap tuqiw katuqarakta. ² Tatitux ch’amak tuqinakaruw irpitu, ch’amak thakhinakan sarnaqayitu, ³ nayar mutuyañatakix sapa kutiw mayamp mayampi amparap ayti. ⁴ Janchixsa q’ala chuymankipstayxi, ch’akhanakaxsa q’al t’unjaraki; ⁵ nayarusti t’aqhisiñampi jachañanakampiw mä pirqampjam muyuntayitu; ⁶ ch’amak tuqinakan utjayitu, nayra pachan jiwarapki ukanakar uñtata. ⁷ Jan mistuñani pirqampiw muyuntayitu; jathi cadenanakamp chinuntasaw t’aqhisiyitu; ⁸ yanap mayisa arnaqaskchïyäta ukasa, janiw mayisitaxarux ist’kituti; ⁹ qala pirqampiw sarañaxar jark’antitu, ¡thakhinakaxsa maysaruw uñtayaraki! ¹⁰ Tatitusti nayatakix mä imantasit leonjamänwa, manq’antañ munir osor uñtataraki. ¹¹ Thakhit maysaruw saranukuyitu, jisk’a jisk’a tukjitu, ¡jach’a axsarañampiw phuqhantarakitu! ¹² ¡Mich’inakap wakicht’asisasti, mich’imp wakt’ayañatakiw illapjitu! ¹³ Tatitun antutt’ata mich’inakapaxa, chuyma manqharuw chhuqhuntitu. ¹⁴ Jaqinakaxax taqiniw nayat larusipxitu; sapa kutis jupanakan larusiñakïtwa. ¹⁵ Tatitux jachañanakampiw phuqhantitu; k’allk’u uma umañ churitu. ¹⁶ Laka ch’akhanakaxsa uraqir liwnuqasaw williritu; laq’a jallq’ayarakitu. ¹⁷ Sumankañas nayat jayarst’xiwa, janiw yatkxti kunäskchix kusisiñasa. ¹⁸ Amuyatax Tatitut janjamakiw kuns katuqxäti. ¹⁹ Llakisitanakaxsa, sapak sarnaqatanakaxsa, jachatanakaxsa, t’aqhisitanakaxsa amthapisiraktwa; ²⁰ ukanakat amthapisisasti, jan ch’amanjamaw uñjasirakta. ²¹ Ukampis nayax may chuymaxan amtasiñ munta, ukaruw suyt’añ munarakta: ²² Tatitun munasiñapax jan tukuskiriwa, khuyapayasiñapas jan pist’kiriwa. ²³ Sapärmanthiw machaqar tukuraki; ¡kunja jach’as Tatitun chiqapätapaxa! ²⁴ Naya pachpas sasiraktwa: “¡Nayatakix Tatitukiw taqi kunasa; ukatpï jupar iyawsaraktxa!” sasa. ²⁵ Tatitux jupar iyawsirinakatakix askiwa, jupar jak’achasipki ukanakatakisa. ²⁶ Tatitur llamp’u chuymamp suyt’añaw wakisi, jupaw jiwasar yanapt’ir jutaskani. ²⁷ Jaqix waynatpacha t’aqhisiñanak katuqañ yatiqañapa. ²⁸ Jaqix sapaki, amukirakiw qhiparañapa, Tatitux munañap lurañ munkani ukkhaxa; ²⁹ llamp’u chuymampiw uraqir alt’añapa, inampis kuna suyt’añas utjaskaspa; ³⁰ nuwantiriparux maysa ajanut nuwataxa, maysa ajanumppachat nuwayasiñapawa; jach’a ñanqhachäwinaksa katuqañaparakiwa. ³¹ Tatitux janiw jiwasar wiñayatak apanukkistaniti. ³² T’aqhisiykchi ukasa, jupax khuyapt’ayasirakiwa, munasiñapax sinti jach’apuniwa. ³³ Jupax janiw llakisiyañ munkapuniti, janirakiw jaqirus t’aqhisiyañ munkiti. ³⁴ Markankir katuntatanakar jan khuyapt’ayasis t’aqhisiyañasa; ³⁵ Tatitun nayraqatapan jaqin jakañap t’unañasa, ³⁶ chiqapar uñjañäki uk maysar q’iwiñasa, Tatitux taqi ukanakarux juchañchiwa. ³⁷ Kunapachatix mä kunas parlasi, jan ukax mä kunas utjki ukanakaxa, Tatitun munañapat ukham lurasi. ³⁸ Ñanqhanakasa, askinakasa alaxpachankir Tatitun munañapat ukham lurasi. ³⁹ Juchanakasat mutuyaskistu, janiw kunat arusiñasäkisa. ⁴⁰ Sarnaqäwinakasat sum amuythapisiñäni, ukatsti Tatitur wasitat kutkatxañäni. ⁴¹ Alaxpachankir Tatitur luqtañäni jiwasan amtäwinakasa, mayisïwinakassa. ⁴² Nanakax juchañchasipxtwa, jumarus saykatapxaraksmawa, jumasti janiw pampachapkistati. ⁴³ Phiñasiñamampiw muyuntayapxista, arknaqapxarakista, ¡jan khuyapt’ayasisaw jakañanakaxsa apaqapxarakista! ⁴⁴ Nanakan mayisitanakax jan ist’añatakisti qinay taypiruw imantastaxa. ⁴⁵ Jaqinak nayraqatansti q’añu t’unar uñtat jisk’achjapxistaxa. ⁴⁶ Taqi uñisirinakaxaw nanakatak arsupxi; ⁴⁷ axsarañanakampi, sipitanakampi, t’unjatäñanakamp katuqapxta. ⁴⁸ Nayranakaxatsti jachax jawir umjamaw jalaritu, nayan munat markaxa t’unjat uñjasaxa. ⁴⁹ Nayranakaxas jan samart’asaw jacharaki, janiw samarañax utjkaniti, ⁵⁰ alaxpachankir Tatitux jiwasar alayatpach uñtaniñapkama. ⁵¹ Markaxankir warminakan t’aqhisitap uñjasaxa, chuymaxax sintipuniw usurakitu. ⁵² Jan yänikiw uñisirinakaxax mä jamach’irjam katuntxapxitu; ⁵³ jakkirpach mä phuch’ur allintapxitu, mistuñaxarus mä qalampiw atxatapxitu. ⁵⁴ Umax q’al chhaqtayitu, ukatsti: “Jiwxakipunchïxaya” saraktwa. ⁵⁵ Nayax Tatay, uka phuch’u manqhatpach juman sutimar art’asinsma: ⁵⁶ arunakax jumax ist’istawa, mayisitaxarus ist’arakistawa. ⁵⁷ Kunürutix nayax jawsksma uka urux nayan ukarux juttawa, ukat sarakista: “Jan axsaramti” sasa. ⁵⁸ Tatay, jumaw taqi jan walt’añanakaxan yanapt’ista, jumaw jakañaxsa qhispiyarakista. ⁵⁹ Tatay, jumaw nayan t’aqhisitax uñjta, ¡kunatix chiqäki ukhamarjamay uñjarakita! ⁶⁰ Jumaw nayar jan wal lurañ amtapki ukanak uñjtaxa, nayar ñanqhachañ amtapki ukanaksa uñjaraktaxa. ⁶¹ Tatay, nayar chuyma usuchjatanakap ist’amaya, nayataki jan wali amtatanakap uñjarakimaya; ⁶² uñisirinakaxan parlatanakapsa ist’amaya, sapa kutis nayatakikiw jan walinak arsusipki. ⁶³ ¡Uñtanimaya, taqi luräwinakapansa, jupanakatakix larusiñakïtwa! ⁶⁴ Tatay, jupanakarux kunatix wakt’ki ukhamar uñjam, luräwinakaparjam jupanakarux uñjarakim. ⁶⁵ Amuyunakapsa qalarayam, ñanqhachañam jupanakxar wakt’ayam. ⁶⁶ Tatay, jupanakarux jach’a phiñasiñamamp arktam, ¡aka uraqitsti chhaqtayarakim!

¹ ¡Qurix ch’iyärkiptawayxiwa! ¡Ukkha suma qurix janiw k’ajkxiti! Tatitun qullan utapankir qalanakas uka pirqa q’iwt’anakan willirtaski. ² Jerusalén markan jakirinakasti, wali munatäpxänwa, qurïpkaspas ukham uñjatäpxänwa, jichhasti ñiq’i phukhükaspas ukham uñjatakïxiwa, jan yäqañ sañu luririn luratjama. ³ Qamaqinakas qallunakaparux ñuñt’ayasipxapuniwa, ukampis israelita qhuru taykanakasti, wawanakaparux apanukupxiwa. ⁴ Ñuñuskir wawanakasti umat sinti pharjatapuniwa, laxranakapas laka manqharuw lip’katxi. Wawanakax t’ant’a mayipxi, ukampis janiw khiti t’ant’a churiris utjkiti. ⁵ Khitinakatix nayrax sist’asiñkam manq’apkäna ukanakaxa, jichhax uka anqanakan manq’atjamaw jiwarasipki. Khitinakatix nayrax wali qamir yänak taypin jilapkän ukanakasti, jichhax q’añu taypinak jakxapxi. ⁶ Jerusalén markax tinkuwa, juchapasti Sodoma markan juchapat sipan juk’amp jilapuniwa, uka markax jan khitin nuwantataw mä juk’a pachan t’unjat uñjasïna. ⁷ Ajllit jaqinakapasti khunut sipan juk’amp janq’ünwa, lechet sipan juk’amp janq’üpxarakïnwa; janchipasti coral siski ukatsa juk’amp suma wila samïnwa; sayt’atapas zafiro siski ukat sipan juk’amp sumarakïnwa. ⁸ Ukampis jichhax jan khitinsa uñt’kaya, q’ala usuntatäpxiwa. Janchinakapas qaqa lawanakar uñtat wañsutawa, ¡ch’akhanakapas uñartaskarakiwa! ⁹ Taqiniw juk’ata juk’at manq’atjam jiwarxapxi. ¡Mä ch’axwäwin jiwañax askïspawa manq’atjam jiwañat sipana! ¹⁰ ¡Jerusalén markax q’ala t’unjataw uñjasi! Suma munasir taykanakas pachpa wawanakaparuw phayantasxapxi, ukhamat manq’atäpxañapataki! ¹¹ Tatitun phiñasiñapax sinti jach’apunïnwa, aqkir phiñasiñapax jan t’akuykayänwa; Jerusalén markarusti ninampiw phichkatäna, uraqitpach q’al t’unjarakïna. ¹² Aka uraqinkir reyinakaxa, taqi akapach apnaqir reyinakasa, janipuniw Jerusalén markan punkup chiq uñisirinakapan mantaniñap suyapkänti. ¹³ ¡Taqi ukanaksti profetanakapan juchapata, sacerdotenakapan ñanqha luratapata, pachpa marka manqhan jan juchan jaqiru jiwayapxatapat ukham lurasïna! ¹⁴ Juykhur uñtatarakiw Jerusalén markan payinaqapxi; amparanakapas wilakamakiwa, janirakiw khitis jupanakan isip llamkt’añ munkiti. ¹⁵ “¡Jithiqtapxam, jithiqtapxam, q’añu lurir jaqinakawa, jan llamkt’apxamti!” sasaw arnaqasipxi. Yaqha markankir jaqinakas “muyuyku jaqinakawa, janiw akan jakapkaspati” sasaw arnaqasipxaraki. ¹⁶ Tatit pachpaw jupanakar q’al ananuku, janirakiw mayampis jupanakar uñkatkxiti. Sacerdotenakar axsartañax janiw utjkxänti, jilïr jaqinakar khuyapt’ayasiñas utjkxänti. ¹⁷ Nayranakasas uñch’ukkäwix qarirxiwa, inamayakiw yanap suyasktanxa. Mä jan qhispiyir markan puriniñap suyasktan. ¹⁸ Jiwasan sartäwinakasas uñch’ukitawa; janiw anqarus mistuñjamäkiti. Tukusïwisax jak’ankxiwa, pachax purinxistuwa; ¡tukjatäñasax purinxiwa! ¹⁹ Jiwasar arknaqirinakasti alayan tuyur pakanakat sipan juk’amp jaltirïpxiwa; qullunak tuqinakan arknaqistu, ¡wasar tuqinakansti sipitanak jiwasatak uchantapxaraki! ²⁰ Tatitun ajllitapasti, katuntataw uñjasi, jakañasar ch’amachkistäna uka, jupa reyit säyätanxa: “Jupaw markanak taypin sum uywasistani” sasa. ²¹ ¡Edom marka, jichhax larusim, kusisirakim; Us uraqin munañan apnaqiri! ¡Jumarux t’aqhisiñax wakt’arakïtamwa, ukatsti machjata, q’alalaw uñjasïta! ²² Jerusalén marka, mutuyäwimax tukusxiwa; Tatitux janiw juk’ampi apanukuykxätamti. Ukampis Edom marka, jan wali luratamat mutuyapunïtamwa, juchanakamsa qhanaruw uñstayarakini.

¹ Tatay, aynacht’atanakaxat amtasimaya; ñanqhachapkitu uksa uñtanimaya. ² Uraqinakaxasa, markaxasa jichhax yaqha jaqinakan amparapankxiwa. ³ Jan awkini wajchaw qhiparapxta; taykanakaxasti ijma warminakaw qhiparxapxi. ⁴ ¡Nanakan pachpa umaxwa jichhax alasipxta, phayañ lawanakaxsa qullqimpiw alasipxta! ⁵ Nanakan kunkaxarusti mä yuku ayxatapxitu; qarjasipxtwa, janirakiw samart’ayapkitusa. ⁶ Nanakar wali uñisirinakaxaruw manq’añ mayiñax wakt’apxitu. ⁷ Nayra awkinakaxaw juch lurapxäna, ukampis nanakaruw ukanakat Tatitux mutuyapxitu. ⁸ Uywatanakampi apnaqataw uñjasipxta, jupanakan amparapat janiw khiti qhispiyirisa utjkiti. ⁹ T’ant’a jikxatañ munasasti, wasaran niyapuniw jiwarapxta. ¹⁰ Janchinakaxas ninjamaw nakhi, manq’atjam inakiw paqaqxapxta. ¹¹ Jerusalén markansa, Judá markanakansa, warminakasarux warmisiwäpxiwa. ¹² Jilïrinakasar axsartañax janiw utjkxiti; jupanakarux amparanakapat warkkatapxi. ¹³ Jila ch’amani jaqinakarux molinon irnaqayapxi, waynanakasti, phayañ lawanak q’ipt’ataw liwisipxi. ¹⁴ Marka punkunakansti waynanakan jayllitapax janiw ist’askxiti, janirakiw chuyman jaqinakas tantachaskxapxiti. ¹⁵ Janiw kunat kusisiñas utjkxiti; kusisiñat thuqt’añanakas llakisiñaruw tukxi. ¹⁶ ¡Kunakïkan jiwasatxa! Jucha luratasat marka apnaqañsa q’al apt’astanxa. ¹⁷ Ukatpï jichhax chuymasas usustuxa, nayrasas chhurkt’añ munarakistuxa. ¹⁸ Jerusalén markax laqayar tukuyatawa, qamaqinakakiw ukan aywtaski. ¹⁹ Jumasti Tatay, wiñayatakiw apnaqätaxa. ¡Jumaw nanakan jach’a reyixätaxa! ²⁰ ¿Kunatarak wiñayatak armapxitätasti? ¿Kunatarak walja maranak apanukupxitätasti? ²¹ ¡Tatay, juman ukar kuttayanxapxita, nanakasti kuttanxapxäwa! ¡Kunjämtix nayrax jakapkäyät ukhamay jakayxapxita! ²² ¡Ukampis jumax q’al apanukupxista; juman phiñasiñamasti nanakatakix sinti jach’apuniwa.