JOSUÉ

JOSUÉ

¹ Tatitun luqtiripa Moisesan jiwxatapatxa, Tatitux Nun chachan Josué yuqapampiw parläna, khititix Moisesan yanapiripäki, juparusti sänwa: ² “Moisés luqtirixax jiwxiwa, jichhasti jumaruw taqi israelit jaqinakampix Jordán jawir makhatañax wakt’tam, kawkïri uraqtix jumanakar churapkäma ukar sarañataki. ³ Kunjämtix Moisesar arskäyäta uka arunakarjamaw, nayax kawkïr uraqtix kayunakamax takt’kani uka uraqinak jumanakar churapxäma. ⁴ Jumanakarux wasarata, Líbano qullunakat qalltasa, Éufrates jach’a jawirkam churapxäma, hitita jaqinakan taqi uraqinakapa, Mediterráneo sat jach’a qutakama. ⁵ Juman jakañamkamax janiw khitis atipjkätamti, nayasti kunjämatix Moisesamp chikäkäyät ukhamarakiw jumampïskä, janipuniw jumarux jaytanukkämati. ⁶ Jumasti wali ch’amani sayt’asim janirak axsaramti, jumaruw aka markaru uraq lakiñax wakt’tam; uksti nayaw nayra awkinakapar churañatak arsüyäta. ⁷ Nayax ch’aman sayt’asiñamak maysma, ukatsti kuna kamachinaktix Moisés luqtirixax churktam ukanak phuqharakim. Kuntix uka kamachinakax siski ukanakat janipun maysar saranukumti, ukhamat taqi luräwinakamax sumaki sarañapataki. ⁸ Kuntix Tatitun kamachi qillqatapanxa siski ukanak amtasipunïtawa, uruy arumaw lup’irakïta, kuntix uka arunakan siski ukhamarjam phuqhañamataki. Ukhamat taqi luräwinakamax sumaru sarani. ⁹ Nayaw jumarux ch’amani sayt’asiñamatak sisma. Jan axsaramti, janirak mayjt’asimsa, naya, Tatitu Diosamaw kawkharutix sarkäta ukkhan jumampïskä” sasa. ¹⁰ Ukatsti Josué chachax markankir jilïrinakaruw lurapxañapatak säna: ¹¹ “Jumanakax campamentpacharu sarapxam, ukatsti taqi jaqinakar sapxarakim: ‘Manq’añanak wakichasipxam, akat kimsürurux Jordán jawir makhatasin kawkïr uraqtix Tatitu Diosasax churkistani uka uraqi katuntañäni’ ” sasa. ¹² Josué chachax Rubén, Gad, Manasés ayllun chikat jaqiparux sarakïnwa: ¹³ —Tatitun luqtiripa Moisesan arunakapat amtasipxam: Tatitu Diosamax aka uraqi churasax samarañ jumanakarux churapxätam, sasa. ¹⁴ Warminakamsa, wawanakamsa, uywanakamsa Jordán jawirat akkataru, kawkharutix Moisesax uraqi churapxtam uka chiqaru jaytasiwayapxam. Ukampis kawkïri chachanakatix nuwasiñatak wakicht’atäpkta ukanakasti nuwasiñ yänakam apxarusisin jilanakamar yanapt’añatak sarxarupxam, ¹⁵ Tatitun jupanakaru samaraña churañapkama, kunjämtix jumanakar churapktam ukhama, kawkïr uraqtix Tatitux churkani uka uraqin jupanakankañapkama. Ukatsti jumanakax jawirat akkatanki uka uraqinakamaruw kuttanxapxäta, kawkharutix Tatitun luqtiripa Moisesax churapktam uka uraqi wiñayatak katuntasipxañamataki —sasa. ¹⁶ Jupanakasti sapxänwa: —Nanakax kuntix sapkista ukanak lurapxäwa, kawkharutix khithapkitäta ukkharuw sarapxarakï. ¹⁷ Kunjämtix nanakax Moisesar taqi kunan jaysapxäyäta, ukhamarakiw jumarux jaysapxäma. Nanakasti Tatitu Diosaman jumampïñap munapxta, kunjämtix Moisesampïkan ukhama. ¹⁸ Khiti jaqitix arunakamar jan ist’kani ukax jiwaniwa. Nanakax ch’amampi, chiqa chuymampi sayt’asiñamak munapxta —sasa.

¹ Josué chachax Sitim chiqat pani uñaqir jaqinak jamasat khithäna, jupanakarusti sänwa: “Sarapxam, kunjamätaynasa uka uraqixa, Jericó markasa uk uñaqanipxam” sasa. Jupanakasti sarapxänwa, Jericó markar purisax mä jan wali sarnaqir warmin utaparuw puripxäna, sutipax Rahab satänwa, uka arumax ukan qurpachasipxäna. ² Ukampis mayni jaqiw Jericó markan reyiparux uk yatiyäna akham sasa: —Israelit jaqinakaw jichha arumax markasar uñaqir mantanipxi —sasa. ³ Ukat reyix Rahab warmin ukar khithäna akham sañapataki: —Utamankki uka chachanakax mistunipxpan, jupanakax uñaqanakäpxiwa —sasa. ⁴ Ukampis Rahab warmix uka pani chachanakar imantänwa, ukatsti sarakïnwa: —Chiqaw ukaxa, pani chachanakaw utaxar sart’anitu, ukampis janiw nayax kawkinkirïtapsa yatkti. ⁵ Niya ch’amakthapki, markan punkunakap janïr jist’antapkipan sarxapxi, janirakiw kawkir sarapxatapsa yatkti. Ukampis jumanakatix arktapxasmaxa inas jikxatapxchisma —sasa. ⁶ Ukampisa Rahab warmix uta pataruw uka pani chachanak irpkatatayna, ukansti jupanakax lino alinak wañachat taypin imantatäsipkänwa. ⁷ Reyin soldadonakapasti Jordán jawir tuqir sarki uka thakhinjam arktapxäna. Jupanakan mistupxatap ukspachaw marka punkux jist’antasxäna. ⁸ Ukatsti uka uñaqa chachanakan janïr ikirkipan, Rahab warmix uta patar makhatasin jupanakarux säna: ⁹ —Nayasti Tatitun aka uraqi jumanakar churatap yattwa, nanakax jumanakat parlir ist’asax wal axsarayasipxta. Aka markankirinakax taqiniw jumanakat ist’asax axsarañatsa khathatipxi. ¹⁰ Nanakax yatipxtwa, kunjämtix Tatitux Egipto markat mistunipkta ukkhax, uka Mar Rojo quta wañt’aykäna, ukat ukanjam jumanakan makhatapxañamataki ukxa. Ukatsti kunjämtix amorreonakan Sihón, Og sat reyinakaparu Jordán jawir khurkatan jumanakax tukjapkta uksa yatipxaraktwa. ¹¹ Ukanak ist’asax walpun axsarapxta, janirakiw khitis jumanakampi nuwasiñ munkiti. Jumanakan Tatitu Diosamax alaxpacha, akapacha apnaqir Diosawa. ¹² Ukat jichhax jumanakar mayipxsma, akawjanpach Tatitun sutipxar juramento lurapxañamataki, wila masinakaxar khuyapayasiñampi uñjapxañamataki, kamisatix nayax jumanakat khuyapayaskta ukhama. Jumanakan chiqa chuymanïpxatam uñacht’ayapxita, ¹³ ukatsti awkixaru, taykaxaru, jilanakaxaru, kullakanakaxaru, taqi jupanakampïpki ukanakarus janiy jiwayapxampti. ¡Taqiniruy jiwañat qhispiyapxita —sasa. ¹⁴ Jupanakasti sapxänwa: —Jumatix nanakan jutataxa jan khitirus yatiykäta ukaxa, nanakax pachpa jakañanakaxampiw jumanakat sayt’apxä. Kunapachatix Tatitux aka uraq churapkitan ukkhaxa, nanakasti jumatxa khuyapt’ayasipxämawa, arsutanakaxsa janiw mayjaptayapkäti. ¹⁵ Rahab warmin utapax markar muyuntki uka pirqa patankänwa, ukatsti uka pä chacharux mä wiskata uta ventanap chiqa warkuqäna. ¹⁶ Jupanakarux sarakïnwa: —Qullunak tuqir sarxapxam, khitinakatix jumanakar thaqhasipktam ukanakampi jan katjayasiñataki. Uka qullunsti kimsüruw imantasipxäta, jupanakan markar kutiniñapkama, uka qhipat sarxapxäta —sasa. ¹⁷ Uka chachanakasti sapxänwa: —Nanakax mayipkista uka juramentompix phuqhapxämawa. ¹⁸ Ukampis kunapachatix nanakax aka markaru mantanipkä ukkhaxa, jumax aka wila wiska kawkïr ventanattix warkuqapkista ukawjat warkuqanïta. Ukatsti utamarux awkimaru, taykamaru, jilanakamaru, awkiman taqpach wila masinakaparuw tantachäta. ¹⁹ Jupanakat maynitix utamat anqar mistuni ukasti jiwaniwa; nanakax janiw uka jiwatapat juchanïpkäti, ukampis maynitix utamankaskirir jiwayañ munanixa, juchax nanakxankaniwa. ²⁰ Jumatix aka tuqit arsüta ukaxa, nanakax janiw juramentompi arsupkta uk phuqhapkäti. ²¹ Warmisti sänwa: —Arunakamarux phuqhaspan —sasa. Ukatsti uka chachanakar khithanukusax, mä wila wiska uta ventanapar chinuntäna. ²² Uka pani uñaqanakasti qullunakar sarasin kimsa uruw ukan imantasipxäna, ukchañkamasti soldadonakax inamayakiw taqi chiqa thaqhasipkäna; jan jikxatasinsti, Jericó markaruw kuttanxapxäna. ²³ Ukatsti uka pani uñaqanakax qullunakat saraqanxapxäna, Jordán jawir makhatasinsti Josué chachan ukaruw sarapxäna, kunanakatix luraskatayna ukanak yatiyapxäna. ²⁴ Juparusti sapxänwa: “Tatitux taqi uka uraqinak amparasaruw katuyistu, jichhasti uka uraqin jakir jaqinakax jiwasat yatisax axsarañat wal khathatipxi —sasa.

¹ Qhipürusti, Josué chachampi, taqpach israelitanakampix Sitim sat chiqat wali willjtaw mistuwayapxäna, ukatsti Jordán jawir chiqaruw puripxäna; janïr makhatkasasti ukawjaruw utjnuqtapxäna. ² Kimsa uru saraqatarusti, jilïrinakax campamentpacha muytapxäna, ³ ukatsti israelitanakarux akham sapxäna: “Kunapachatix Tatitun arust’äwi arcap levita sacerdotenakar apaskir uñjapkät ukkhaxa, kawkhankapktatix ukkhat mistunipxäta, ukatsti qhipap arkapxäta, ⁴ ukhamat yatipxäta kawkha chiqtix sarapxañamäki uka, jumanakat jan maynis uka thakhinjam jan kunapachas sarapxatam layku; janipuniw arcarux jak’achasipxätati, jan ukasti, niya mä waranqa metronak qhipatak arkapxäta.” ⁵ Josué chachasti jupanakarux sänwa: “Q’umachasipxam, Tatitux qharüru willjtax muspharkañ luräwinak jumanak taypin lurani” sasa. ⁶ Sacerdotenakarusti sarakïnwa: “Tatitun arust’äwi arcap aptawayapxam, ukatsti jaqinakan nayräxap jawir makhatapxam” sasa. Sacerdotenakasti Tatitun arust’äwi arcap apxaruwayapxäna, ukatsti jaqinakan nayräxap apapxäna. ⁷ Tatitusti Josué chacharux sänwa: “Jichhürut uksarux israelitanakan nayraqatapan jach’aruw tukuyäma, ukhamat jupanakax nayan jumampïskatax yatipxani, kunjämatix nayax Moisesampïkäyät ukhama. ⁸ Jumasti Tatitun arcap apapki uka sacerdotenakarux akham säta: ‘Kunapachatix Jordán jawir thiyar puripkät ukkhaxa, ukawjaruw sayt’apxäta’ ” sasa. ⁹ Josué chachasti israelitanakarux sänwa: “Aksar jutapxam, ukatsti kuntix Tatitu Diosamax parlapkätam uk ist’apxam. ¹⁰ Jakkir Diosan jumanak taypinkaskatapat chimpux akäniwa, jumanakan saratanakarjamaw Tatitux cananeonakaru, hititanakaru, heveonakaru, ferezeonakaru, gergeseonakaru, amorreonakaru, jebuseo jaqinakar q’al tukjani. ¹¹ Uñtapxam, Tatitun arust’äwi arcapaw jumanakan nayraqatam Jordán jawir makhatani. ¹² Jichhax tunka payan chachanak ajllipxam, Israelan tunka payani ayllunakapatxa sapa mayat mayniru. ¹³ Kunapachatix sacerdotenakax taqi akapachankir Tatitun arust’äwi arcap apapkani, ukatsti umar takt’apkani ukkhasti, jawir umanakax payaruw jaljtani, alay tuqit jutir umanakax mayäwjaruw mä pirqar uñtat sayt’ani” sasa. ¹⁴ Israelitanakasti, Jordán jawir makhatañatakiw chhujllanakapat mistunipxäna, Tatitun arust’äwi arcap apapkäna uka sacerdotenakasti jupanak nayraqatap sarapxäna. Jordán jawirax yapu apthapiñ urunakanxa jilarirïnwa, ukampis kunapachatix sacerdotenakax jawiraru mantapkäna, kayunakapas uma taypinkxäna ukkhasti, alay tuqit jutir umax pachparukiw sayt’xäna, mä pirqar uñtata, Adam sat chiqatsa juk’ampi jayaru, kawkïri markatix Saretán marka jak’ankkäna uka chiqaru. Mar Muerto quta tuqir sarir umasti chhaqtañkam jalaskakïnwa. Ukhamaw uka jawirax payar jaljtäna, ukat israelitanakax Jericó marka uñkatasir makhatapxäna. ¹⁷ Israel markasti taqpachaniw Jordán jawir wañanjamaki makhatapxäna, ukchañkamasti Tatitun arust’äwi arcap apapkäna uka sacerdotenakax chika jawir taypin waña uraqin sayt’atäsipkänwa.

¹ Kunapachatix israelit jaqinakax taqini Jordán jawir makhatxapxän ukkhaxa, Tatitux Josué chacharuw säna: ² “Israelan ayllupat tunka payan chachanak ajllim, sapa ayllut mayniru, ³ jupanakarusti sarakim, jawir taypita, kawkhantix sacerdotenakax sayt’atäpkän ukawjat tunka payan qalanak apsunipxpan, ukatsti uka qalanak apasin kawkhantix jichha arumax samarapkäta ukawjar uchapxpan” sasa. ⁴ Ukatsti Josué chachax ajllkatayna uka tunka payan jaqinakaruw jawsäna, ⁵ jupanakarusti sänwa: “Jordán jawirar chika taypikam mantapxam, Tatitu Diosaman arcapa nayraqataru, ukatsti jumanakat sapa mayniw kallachimxaru mä qala apsunipxäta, qawqhatix Israelan ayllunakapax utjki ukhamarjama, taqpachax tunka payanïñapataki. ⁶ Uka qalanakasti jumanakatakix qhipürun amtasiñatakïniwa, kunapachatix wawanakamax jiskt’apkätam: ‘¿Kunsa aka qalanakax uñacht’ayañ munistuxa?’ sasa, ⁷ jumanakasti akham sapxätawa: ‘Kunapachatix Tatitun arust’äwi arcapax Jordán jawir makhataskän ukkhaxa, jawir umanakax arca nayraqatan payaruw jaljtäna. Aka qalanakax israelitanakatakix kunatix akan luraskäna ukanak amtasiñatakiw uchata’ ” sasa. ⁸ Jupanakasti kunjämtix Josué chachax siskäna ukhamarjamaw lurapxäna, Jordán jawirat tunka payan qalanak apsunipxäna, Israelan sapaqat ayllunakapat mä qala, ukatsti kunjämtix Tatitux Josué chachar siskatayna ukarjamaw campamentor apasin ukawjar uchapxäna. ⁹ Ukhamarusa, Josué chachax yaqha tunka payan qalanak ucharakïna, kawkha chiqarutix arust’äwi arca apir sacerdotenakax sayt’asipkän uka chiqaru. Uka qalanakasti jichhürkamaw ukankaski. ¹⁰ Tatitun arust’äwi arcap apapkäna uka sacerdotenakasti Jordán jawir taypin qhiparapxäna, ukchañkamasti israelitanakax kuntix Tatitux Josué tuqi jupanakan lurapxañapatak siskäna ukanak phuqhasipkäna. Taqi kunas kunjämtix Moisesax Josué chachar iwxkatayna ukhamarjamaw phuqhasïna. Jaqinakasti jank’akiw jawir makhatapxäna, ¹¹ ukatsti kunapachatix taqini jawir khurkatankxapxän ukkhaxa, sacerdotenakax Tatitun arcap apt’ataw makhatapxäna, ukatsti jaqinakan nayräxap sarapxäna. ¹² Ukatsti kunjämtix Moisesax arsuwaykatayna ukhamarjamaw Rubén, Gad, ukhamarak Manasés ayllun chikat jaqipat nuwasir jaqinakax jawir khurkataru makhatapxarakïna. Jupanakasti nuwasiñ yänakani wakicht’atkamakiw makhatapxäna, ukatsti maynïr israelitanakan nayräxap sarapxäna. ¹³ Niya pusi tunka waranqa chachanakaw nuwasiñatak wakicht’ata, Tatitun arust’awi arcap nayraqatan sarakipapxäna, ukatsti Jericó pampanak tuqiruw mistuwayapxäna. ¹⁴ Tatitusti uka urux Josué chachar taqpach Israel marka nayraqatan jach’añchi, jupanakasti yäqapxänwa, kunjämtix Moisesaru jakañapkam yäqapkäna ukhama. ¹⁵ Ukatsti Tatitux Josué chacharux sänwa: ¹⁶ “Arust’äwi arca apiri sacerdotenakax Jordán jawirat mistunxapxpan” sasa. ¹⁷ Josué chachasti sacerdotenakarux “mistunxapxam” sänwa, ¹⁸ ukatsti kunapachatix sacerdotenakax Jordán jawirat mistunisin waña uraqir takt’apkän ukkhasti, ukspachaw jawirax kunjämtix jalirïkäna ukham jilarkir jaläna. ¹⁹ Israelitanakax nayrïri phaxsita tunka uru saraqataruw Jordán jawirat mistunipxäna, ukatsti Guilgal sat uraqina, Jericó markat inti jalsu tuqiruw utjnuqtapxäna. ²⁰ Josué chachasti Guilgal chiqan, Jordán jawirat apanipkän uka tunka payan qalanak uchäna, ²¹ israelitanakarusti sänwa: “Kunapachatix wawanakamax qhipürun jiskt’apkätam: ‘¿Kunsa aka qalanakax uñacht’ayañ munistuxa?’ sasaxa, ²² jumanakasti jupanakarux kunjämtix Israel markax Jordán jawir wañanjam makhatkäna uk yatiyapxäta, ²³ ukatsti kunjämtix Tatit Diosamax Jordán jawir wañt’aykäna jumanakan makhatapxañamataki, kunjämtix nayrax Mar Rojo sat quta wañt’aykatayna jumanakan makhatañamataki. ²⁴ Ukhamat uraqinkir taqi markanakax kunja ch’amanïkitix Tatitux uk yatipxani, jumanakasti Tatitu Diosamarux jach’añchapxapunïtawa” sasa.

¹ Jordán jawirat inti jalanta tuqinkiri amorreo reyinakasa, Mediterráneo jach’a quta jak’ankir cananeo reyinakasa, kunjämtix Tatitux Jordán jawir wañt’ayas israelitanakar makhataykatayna uk yatipxäna, uk yatisasti, uka reyinakax wal axsarayasipxäna, ukatsti jupanakampi nuwasiñxa wal axsarapxäna. ² Ukapachaw Tatitux Josué chachar säna: “Jumax qalat cuchillonak lurasim, ukatsti wasitat israelitanakar circuncisión katuqayam” sasa. ³ Josué chachasti cuchillonak luräna, ukatsti Aralot qullun israelit chachanakarux circuncisión katuqayäna. ⁴ Uka lurañasti wakisïnwa, kawkïr chachanakatix Egipto markat janïr mistkasin circuncisión katuqapkatayna uka chachanakax, thakhin jutkasin wasaran jiwarxapxatayna uka layku. ⁵ Egipto markat mistunipkatayna uka chachanakasa, waynanakasa taqiniw circuncisión katuqxapxatayna, ukampisa khitinakatix wasaran yuripkän ukanakax janiw circuncisión katuqatäpkänti. ⁶ Israelitanakax pusi tunka mara wasaran sarnaqañkamax Egipto markat mistunkän uka nuwasir chachanakax taqiniw jiwarxapxatayna. Uka chachanakax janiw Tatiturux jaysapkänti, ukat Tatitux jupanakar kawkïr uraqtix nayra awkinakapar churapxämaw siskatayna uka uraqi jan uñjaykänti, lechesa misk’isa umjama jalaski uka uraqi. ⁷ Ukat Josué chachax uka jaqinakan wawanakaparux circuncisión katuqayäna, jupanakax saräwinkasipkatap laykuw circuncisión jan katuqapkataynati. ⁸ Kunapachatix taqini circuncisión katuqatäxapxän ukkhaxa, jupanakax campamentonaki qamarapxäna, ukhamata circuncisión katuqirinakax k’umarachasiñapkama. ⁹ Ukatsti Tatitux Josué chacharux sänwa: “Aka circuncisión lurañampix jumanakat Egipto markan p’inqachat uywatar tukupxatamat apaqapxsma” sasa. Ukat uka chiqax jichhürkam Guilgal sutimpi uñt’ata. ¹⁰ Israelitanakax Guilgal chiqaruw utjnuqtapxäna, ukatsti phaxsit tunka pusin uru saraqataruw jupanakax Jericó pampanakan Pascua uruyapxäna. ¹¹ Uka urusti jupanakax jan levaduran t’ant’ampi, trigo jamp’itampi manq’apxäna, ukampis qhipürux kuntix uraqin achkäna ukanak manq’xapxäna. ¹² Ukat uksarusti Diosax janiw mayampsa maná manq’xa apayankxänti, ukhamasti israelitanakax kunatix Canaán uraqin achkäna ukaki uka marax manq’asipxäna. ¹³ Mä urusti, Josué chachax Jericó marka jak’ankasin, jupan nayräxapan mä chacharuw uñjäna, amparapar espadas apt’ata. Josué chachasti jupar jak’achasisin akham jiskt’äna: —¿Jumax nanakankirïtati, jan ukax uñisirinakaxankirïtacha? —sasa. ¹⁴ Uka chachasti sänwa: —Janiw kawkirïktsa. Nayax Tatitun ejercitopan jilïripätwa, ukat jutta —sasa. Ukat Josué chachax p’iqip uraqir puriyañkam alt’äna, juparusti jiskt’arakïnwa: —¿Kamsis Tatituxax naya luqtiripatakixa? —sasa. ¹⁵ Tatitun ejercitopan jilïripasti sänwa: —Wiskhum apsusim, kawkha chiqarutix takt’kta uka chiqax qullanawa —sasa. Josué chachasti jaysänwa.

¹ Jericó markarux janiw khitis mantkänti, janirakiw mistkänsa. Uka markan punkunakapax israelitanakar axsarasax jist’antatänwa. ² Ukampis Tatitux Josué chacharux sänwa: “Nayaw jumarux Jericó marksa, reyipsa, soldadonakapsa amparamar katuysma. ³ Jumanakasti, Israelit soldadonaka, suxta uruwa, urun mä kuti Jericó marka muytapxäta. ⁴ Paqallqu sacerdotenakaw Tatitun arust’äwi arcap nayräxa sarani, sapa maynis oveja waxrat lurat trompeta apt’atkama, paqallqüri urux paqallq kutiw marka muytapxäta, ukchañkamasti sacerdotenakax trompetanak phust’apxani. ⁵ Kunapachatix jumanakax trompetanakan mä suma phust’asitap ist’apkät ukkhaxa, wali jach’at art’asipxäta, Jericó markan uyu pirqapasti tinkuraniwa. Ukatsti sapa mayniw chiqaki Jericó markar mantaranttapxäta” sasa. ⁶ Josué chachax sacerdotenakar jawsasinxa sänwa: “Tatitun arust’äwi arcap apapxam, jumanakat paqallqunix waxrat lurat trompetanak apt’ata arcan nayräxap sarapxam” sasa. ⁷ Jaqinakarusti sarakïnwa: “Jumanakax marka muytapxam. Nuwasir chachanakax Tatitun arcap nayräxap sarapxpan” sasa. ⁸ Ukatsti taqiniw Josué chachan aruparjam lurapxäna. Paqallqu sacerdotenakasti Tatitun arcapa nayräxap sarapxäna, paqallqu trompetanakat phust’asisa, Tatitun arcapax jupanakan qhipap saräna. ⁹ Nuwasir chachanakax sacerdotenakan nayräxap sarapxäna, qhipat jutir jaqinakasti Tatitun arcap qhipap sarapxäna, ukchañkamasti sacerdotenakax jan samart’asaw trompetanak phust’apxäna. ¹⁰ Ukampis Josué chachax markar akham satayna: “Janiw kuna arus ist’asiñapäkiti, janiw parlapxätati ch’ujukiw sarapxäta, ukampis kunapachatix art’asipxam sapkäma ukkhax, jumanakax taqi ch’amampiw art’apxäta” sasa. ¹¹ Josué chachax Tatitun arcap mä kutiw Jericó marka muytayäna. Ukatsti campamentoruw kuttanxapxäna, uka arumax ukan qhantatipxäna. ¹² Qhipürusti, Josué chachax wali willjtat sartasïna, sacerdotenakasti Tatitun arcap apxarupxäna. ¹³ Uka paqallqu sacerdotenakasti Tatitun arcap nayräxap sarapxäna, trompetanakap phust’asisa, jupanakan nayräxapsti nuwasir chachanakaw sarapxäna, mayninakasti arcan qhipap sarapxarakïna, trompetanakan phust’asitapax janiw amukt’känti. ¹⁴ Payïr urusti mä kutimpiw markar muytapxäna, ukatsti campamentoruw kuttxapxäna. Suxta uruw ukham lurapxäna. ¹⁵ Paqallqüri urusti willjtat sartasin wasitat Jericó marka muytapxäna, kunjämtix nayrïr urunakax lurapkatayna ukhama, ukampis uka urux paqallqu kutiw marka muytapxäna. ¹⁶ Kunapachatix sacerdotenakax paqallqu kuti trompetanak phust’apkän ukkhasti, Josué chachax jaqinakaruw säna: “¡Taqi ch’amamp art’apxam! Tatituw jumanakarux aka marka katuyapxtam. ¹⁷ Aka markampi, kunanakatix ukan utjki ukanakamppachax q’ala tukjatäniwa, Tatituw ukham lurasiñapatak arsu uka layku. Ukampis Rahab jan wali sarnaqir warmimpiru, utapan imantasitäpkani ukanakarukiw jakañapax qhispiyatäni, khitkäyätan uka uñaqir chachanakar jupan imantatap layku. ¹⁸ Jumanakasti janiw markan utjir yänakapat kunsa aptasipxätati, janirakiw llamkt’apxätasa, jan ukasti taqiw t’unjatäñapa Tatitur luqtatäkaspas ukhama. Jumanakatix ukham lurapxäta ukkhaxa, Israelan campamentoparux jan walt’añaruw puriyapxäta. ¹⁹ Ukampisa qurimpi, qullqimpi, ukhamarak bronceta, hierrot lurat yänakax Tatitur luqtatäniwa, ukatsti jupataki imatarakïniwa” sasa. ²⁰ Jaqinakax jach’at art’asipxäna, trompetanakan phust’atapas ist’asirakïnwa. Israelitanakax trompetanakan phust’atap ist’asasti, wali jach’at art’asipxäna, ukatsti Jericó markan uyu pirqanakapax mayak tinkxäna. Ukat taqiniw markar katuntañataki chiqak mantapxäna. ²¹ Ukatsti espadampkamaw chachanakaru, warminakaru, waynanakaru, chuyman jaqinakaru, ukhamarak vacanakaru, ovejanakaru, asnonakar jiwarayapxäna. Kunatix utjkän ukanak q’alpun tukjapxäna. ²² Josué chachasti kawkïr chachanakatix uraq uñaqanipkatayna uka pani chacharux sänwa: “Uka Rahab warmin utapar sarapxam, ukatsti juparux taqi utapankirinakapamp chika irpsunipxam, kunjämtix jumanakax sapkatäta ukhamar phuqhasa. ²³ Jupanakasti Rahab warmin utapar mantasax, awkiparu, taykaparu, jilanakaparu, taqi wila masinakaparuw irpsunipxäna, ukatsti jupanakarux jan kunas kamachañapatakix israelitanakan campamentopat jaya chiqaruw irpapxäna. ²⁴ Ukxarusti israelitanakax ninampiw Jericó markar phichhantapxäna, kunatix utjkäna ukanakamppacha. Ukampisa Tatitutaki imata qullqimpi, qurimpi, ukhamarak bronceta, hierrot lurat yänakaki apsupxäna. ²⁵ Josué chachax Rahab warmimpiru, wila masinakapampirukiw jakañap qhispiyäna, jupaw kawkïr uñaqirinaktix Josué chachax Jericó markar khitkatayna uka pani chachanakar imantäna uka layku. Ukat Rahab warmin saraqiri wawanakapax jichhürkama israelitanak taypin jakasipki. ²⁶ Ukatsti Josué chachax aka juramento luräna: “Jericó marka wasitat sayt’ayañ munirix Tatitun axsarkay mutuyäwip katuqani. Tayna yuqall wawap apt’asiñ munirix, uta qallta qalanak jaquntpan, sullka yuqapan jakañap apt’añ munirix punkunak uskuntarakpan” sasa. ²⁷ Tatitux Josué chacharux yanapänwa, sutipasti taqi uksa tuqinakan aytasïna.

¹ Israel markax kuntix Diosax siskatayna ukanakxa, janiw phuqkänti, tukjatäñatak satäkäna uka yänak katusisaw jan walir puripxäna. Judá ayllu taypin mä jaqiw utjäna Acán sutini, jupasti Carmí chachan yuqapänwa, Zabdí chachan allchhipa, Zérah jaqin allchhiparaki. Uka jaqisti Jericó markat walja yänak jupatak apasinïna, kawkïr yänaktix Tatitux taqi t’unjapxäta siskatayna ukanakat apaqäna. Ukat Tatitux Israel markataki wali q’apisïna. ² Josué chachax Jericó markatpach Ai chiqar mä chachanak khithäna, uraqi uñaqanipxañapataki, uka markasti Betel chiqat inti jalsu tuqinkänwa Bet-avén jak’ana. Jupanakas sarasax Ai marka uñaqanipxäna, ³ kuttanisasti Josué chacharux sapxänwa: “Ai markax janiw jach’äkiti, uka markar katuntañatakix janiw taqpach ejercitor khithañax wakiskiti, paya, jan ukax kimsa waranqa jaqinakax jiläskaniwa, uka marka uñjir jaqinakasti juk’anikirakiwa” sasa. ⁴ Ukatsti niya kimsa waranqa jaqinakaw Ai markar nuwantañataki makhatapxäna. Ukampisa Ai markankir jaqinakax israelitanakarux jaltayañkamaw atipjäna; ⁵ uka markankir jaqinakasti niya kimsa tunk suxtani israelit jaqinakaruw jiwarayapxäna, mayninakarux markan punkunakapat qala ch’iyañ chiqakamaw arktapxäna, uka aynachan jupanakarux tukjapxäna. Ukhamïpan israelitanakax chuyma mayjt’at uñjasipxäna, ch’amanakapsa jiwt’ayasipxarakïnwa. ⁶ Josué chachampi, Israelan jilïri jaqinakapampisti isinakap ch’iyanuqasipxäna, llakisiñatsa qhillampiw p’iqit willxatasipxäna, ukatsti p’iqinakap uraqkam alt’asaw Tatitun arcap nayraqatan killt’asipxäna. ⁷ Josué chachasti sänwa: —¡Dios Tatay! ¿Kunatakirak aka markaru Jordán jawir makhatayantasti? ¿Amorreo markar katuyasat tukjañ munapxista? ¡Inas Jordán jawir khurkatar qhiparañax walïchisapäna! ⁸ ¡Dios Tatay! ¿Kamsarakïsti, israelitanakax uñisirinakapar uñjasin jaltanxatapatsti? ⁹ Cananeonakasa, uka chiqan jakir jaqinakasa ukanak yatipxaniwa, ukatsti jupanakax mayacht’asisin nanakar chhaqtayañkamaw tukjapxitani. Jumasti, ¿kunarak luräta jach’a sutiman jan p’inqachatäñapatakisti? —sasa. ¹⁰ Tatitusti Josué chacharux sänwa: —Sayt’asim. ¿Kunatsa jumax uraqir alintat ukankaskta? ¹¹ Israelitanakax jucharuw puripxi, nayax jupanakampi lurkta uka arust’äwi p’akintapxi. Kunanakatix tukjatäñapäkan uka yänakat apasinipxi, jan wali lurasipkatap yatkasaw ukanak lunthatasipxi, ukatsti yänakap taypiruw imantapxaraki. ¹² Ukat israelitanakax uñisirinakapan nayraqatapan jan sayt’asipkaniti, jupanakax jaltxapxakiniwa, jichhax israelitanak pachpaw tukjatäñaru purisipki. Jumanakatix kuntix t’unjatäñapaki ukanak jan mäki tukjapkäta ukaxa, nayax janiw mayampsa jumanakampïkxäti. ¹³ Sartasim, ukatsti Israel markar tantacham. Jupanakasti wakichasipxpan, nayan nayraqataxan qharüru uñstapxañapataki. Naya, Israelan Tatitu Diosapaw akham arsta: ‘Jumax Israel marka, kunatix taqi tukjatäñapäkän ukat apaqastaxa, janitix jumax ukanak tukjkäta, jaqunukkarakïta ukaxa, janiw uñisirinakamarux saykatkasmati.’ ¹⁴ Qharürux ayllunakatkam taqini akankapxam, kawkïr ayllurutix nayax chimpuntkä ukaw, wila masinakapat sapa tamaparu uñstayani; kawkïr wila masi tamarutix chimpuntkä ukaw, utapankirinakat sapa maynir uñstayani, ukatsti utankirinakat kawkïrirutix chimpuntkä ukaw sapa mayni chachanakaru uñstayarakini. ¹⁵ Khitin amparapantix uñstkani kunatix tukjatäñapäkän ukaxa, wila masinakapampi, taqpach yänakapampiw ninampi phichhantatäni, Israel markaru p’inqachayatapata, ukhamarak Tatitumpi arust’äwi jan phuqhatap layku. ¹⁶ Qhipürusti, Josué chachax willjtat sartasïna, ukatsti israelit jaqinakarux ayllutkama tamachas Tatitun nayaraqatapan uñstayäna. Tatitusti Judá aylluruw uñstayäna. ¹⁷ Ukatsti Josué chachax Judá ayllunkiriruw sapa mayni wila masi tamanakap uñstayañapatak säna, ukatsti Zérah uka wila masi tamaw uñstayat uñjasïna. Zérah wila masi tamatsti Zabdí utankirinakaw uñstayat uñjasïna. ¹⁸ Kunapachatix Zabdí utapankirinakan chachanakax maynit maynit jak’achasipkän ukkhaxa, Acán sat jaqiruw juchax mistüna, Carmí chachan yuqaparu, Zabdí chachan allchhipa, Zérah chachan allchhiparaki. ¹⁹ Ukatsti Josué chachax Acán jaqirux sänwa: —Wawaxay, Israel markan Tatitu Diosapar jach’añcham, jan k’arisisaraki kuntix lurkta uk arsusim jan kunsa imt’asa —sasa. ²⁰ Acán chachasti sänwa: —Chiqpachansa, nayax Israelan Tatit Diosapa nayraqatan juchachasta. Uksti akham lurta: ²¹ Jericó markat yänak apsunktan uka taypin, Babiloniat apanit mä suma isi uñjta, ukhamarak pä patak qullqimpi, mä quri barrampi, tupupasti chika kilot jilänwa. Uka yänakasti chuymaxar purkirïnwa ukat apaqasta, ukatsti uraqiruw chhujllaxa manqhan allintta, qullqi juk’ampi manqharu uchasa —sasa. ²² Josué chachasti ukspachaw mä qawqha jaqinakar Acán chachan chhujllapar khithäna, uka jaqinakasti kunatix ukan imantatäkän ukanak taqpach jikxatapxäna, qullqisa juk’amp manqhan imantata. ²³ Acán jaqin chhujllapat apsunisax, Josué thiyaruw apanipxäna, ukhamarak israelit jaqinak nayraqataru, jupanakasti uka yänakxa Tatitun nayraqataparuw uskupxäna. ²⁴ Ukatsti Acán jaqirux Acor sat qhirwaruw irpapxäna, jupampi chiksti lunthatasinkatayna uka qullqimpi, suma isimpi, quri barrampi apapxäna, ukhamarak yuqanakapa, phuchhanakapa, vacanakapa, asnonakapa, ovejanakapa, chhujllapa, taqi kunatix jupankkäna ukanakamppach apapxäna. ²⁵ Josué chachasti Acán chacharux sänwa: —¿Kunatarak aka jan walt’añanakar puriyapxistasti? Jichhasti, Tatituy jumarux uka jan walt’añanakar nanakar puriyatamat mutuypan —sasa. Uk sasinsti, israelit jaqinakax taqiniw Acán chacharu, utapankirinakaparu qalamp k’upjasa jiwayapxäna, ukatsti ninampiw phichhantapxarakïna. ²⁶ Ukxarusti Acán chachan amayap patxarux walja qalanak phinxatapxäna, ukasti jichhakamaw ukankaski. Ukat uka chiqax jichhürkam Acor qhirwa sataxa. Ukhamat Tatitun q’apisiñapax Israel markatak tukusïna.

¹ Tatitux Josué chacharux sänwa: “Jan axsaramti janirak mayjt’asimsa. Taqpach ejercitomampi Ai markar nuwantir sarxarum, nayaw Ai markan reyiparu, jaqinakaparus atipt’ayäma. Markapasa, uraqinakapas jumankaniwa, ² jumasti kunjämtix Jericó markarusa, reyiparusa lurkta, ukhamarak Ai markampiru, reyipampiru luräta, ukampis jichha kutix jumanakaw taqi yänakapsa, uywanakapsa jumanakataki apasinipxäta. Jichhasti Ai markar qhipäx tuqit akatjamat tukjañatak wakicham” sasa. ³ Josué chachasti taqpach soldadonakapampiw Ai markar sarañatak wakicht’asïna. Kimsa tunk waranqa nuwasir jaqinak ajllïna, jupanakarusti arumaw khithäna, akham iwxt’asa: ⁴ “Sum ist’apxam: marka qhipäx tuqir sarapxam, ukatsti uka jak’an imantasipxäta, katuntañatakisti jank’akïpxätawa. ⁵ Nayasti chikat jaqinakampiw markar jak’achasinï, ukatsti kunapachatix markankir jaqinakax nanakampi nuwasir mistunipkani ukkhaxa, nanakax nayrïr kutinjam jupanakatakix jaltxapxä. ⁶ Jupanakax nanakar markat jaltir uñjasax arktapxitaniwa, wasitat jaltayapkitaspa ukham amuyasina. ⁷ Ukapachaw jumanakax imantasipkta ukawjat mistunisin marka katuntapxäta, Tatit Diosamaw amparanakamar uka marka katuyapxätam. ⁸ Marka katuntasinsti, ninampiw phichhantapxäta, kunjämtix Tatitux siskän ukhamarjama. Aka arunakax phuqhañatakiwa” sasa. ⁹ Ukatsti Josué chachax sarapxam sasaw ejercitopar khithanuküna, jupanakasti sarasax Betel, Ai markanak taypiruw, inti jalanta tuqir imantasipxäna, ukchañkamasti Josué chachax campamenton uka arumax qhiparäna. ¹⁰ Qhipürusti, Josué chachax willjtat sartasisax jaqinakaparuw tumpthapïna. Ukatsti Israel markan jilïrinakapampi chikaw ejercitop nayraqata sarantäna, Ai markar katuntañataki. ¹¹ Josué chachan soldadonakapax nayräx tuqit markarux jak’achasïna, ukatsti marka nayräxaruw utjnuqtapxarakïna, campamentompiru Ai markampirux mä qhirwaw jaljäna. ¹² Josué chachax niya phisqa waranqa jaqinak imantäna Betel, Ai taypiru, markat inti jalanta tuqiru, ¹³ ukhamat mä tama soldadonakax markat alay tuqin imantasïna, mä tamasti markat inti jalanta tuqin imantasirakïna. Josué chachasti uka arumax chika qhirwakamaw nayrst’äna. ¹⁴ Ai markan reyipasti uk uñjasin, jank’akiw taqpach ejercitopampi mistüna, israelitanakampi Jordán qhirwan nuwasiñataki, mayni israelitanakan marka qhipäxan imantasitäskatap jan yatisa. ¹⁵ Josué chachampi jaqinakapampisti atipjata uñjasipkaspas ukhamaw wasar tuqir sarki uka thakhinjam jaltxapxäna. ¹⁶ Ukatsti Ai markan ejercitopax jupanakar arktañatakiw mistuwayapxäna, Josué chachar arktasasti Ai markat jayarst’apxänwa. ¹⁷ Janiw mä jaqis Ai, Betel markanakan qhiparkänti, taqinipuniw israelitanakar arktañatakix mistupxäna; ukatsti markaparux jan arxatirini apanukuwayapxäna. ¹⁸ Ukatsti Tatitux Josué chachar sänwa: “Ai marka tuqir lanzam aytam, nayaw amparamar katuyäma” sasa. Josué chachasti amparap aytasin marka tuqiruw lanzap uñtayäna. ¹⁹ Ukatsti imantasitäpkän uka tamanakax jank’akiw mistunipxäna, ukatsti markar jalakamakiw mantantapxäna, katuntasinsti ninampirakiw phichhantapxäna. ²⁰ Kunapachatix Ai markankir jaqinakax qhipa tuqir uñtanipkän ukkhasti, markapax nina nakhaskiri jiwq’isti chika alaxpachkam makhataskir uñjapxäna, janirakiw jupanakax kawksarus jaltirjamäpkänti, kawkïr israelitanakatix wasar tuqir jaltapkäna ukanakax kuttanisin jupanakaruw kutxatapxäna. ²¹ Josué chachampi, taqpach israelitanakampisti, nuwantañatak imantasipkatayna uka chachanakan marka katuntatap uñjasa, ukhamarak ninampi phichkatapxatap uñjasinxa, kuttanisin Ai markarux nuwantapxarakïna. ²² Ukatsti, khitinakatix markar katuntapkän ukanakax mistunxapxänwa, Ai markankirinakasti Israelan paypach tamap taypin katuntat uñjasipxäna, uka tamanakax taqiniruw jan maynin katurasin jiwarayäna. ²³ Ai markan reyiparukiw jan jiwayapkänti, juparusti katuntasin Josué chachan ukaruw irpapxäna. ²⁴ Ukxarusti kawkïri jaqinakatix jupanakar qhipat arkanipkatayna ukanakarux taqiniruw espadampkam jiwarayapxäna, israelitanakax Ai markaruw kutintanipxäna kawkïrinakatix markar qhiparapkatayna ukanakar jiwarayañataki. ²⁵ Uka urusti Ai markankirinakax tunka payan waranqaniw jiwarapxäna, chachanaka, warminaka, ²⁶ Josué chachasti Ai markar q’al tukjañ amtäwipampix phuqhänwa. ²⁷ Israelitanakax Ai markan utjir uywanakampi, ukhamarak kunatix utjkän uka yänakampi katuntasipxäna, kunjämtix Tatitux Josué chachar siskatayna ukarjama, ²⁸ ukatsti Josué chachax ninampiw Ai marka phhichhantäna, jan mayampitakiw tukjarakïna, kunjämtix jichhürkam uñjasiski ukhama. ²⁹ Josué chachax Ai markan reyiparux mä quqaruw warkkatayäna, ukasti jayp’ukamaw ukankaskäna, kunapachatix intix jalantkän ukkhaw amayap apaqirix khithäna, ukatsti marka mantañawjaruw amayap jaqtayäna, qalanakampirakiw phinxatayäna. Uka qala phinax jichhürkamaw ukankaski. ³⁰ Ukatsti Josué chachax mä altar Israelan Tatitu Diosapatakix Ebal qullun luräna, ³¹ kunjämatix Tatitun luqtiripa Moisesax israelitanakar siskatayna, ukhamarak kunjämatix Moisesan qillqatapansa qillqatäki ukhamarjama: “Maypach qalanakat mä altar luräta” sasa. Ukatsti israelitanakax uka altar patxaruw nakt’at waxt’äwinaka, sumankthapiñ wilañchanak luqtapxäna. ³² Ukxarusti Josué chachax israelitanakan uñjkataw altaran qalanakapar Moisesan churat kamachinakap qillqt’äna. ³³ Ukatsti taqpach markampi, ukhamarak Israelat saraqir jaqinakasa, yaqha markankirinakasa, chuyman jaqinakasa, jilïr irpirinakasa, taripirinakasa Tatitun arust’äwi arcap thiyaru sayt’asipxäna, kawkïrtix levita sacerdotenakax kallachinakapxar apasipkän uka uñkatasiru. Tatitun aski waxt’äwip katuqañatakisti chikat jaqix Guerizim sat qullu tuqinkänwa, chikatasti Ebal sat qullu tuqin jikxatasipxäna, kunjämatix Tatitun luqtiripa Moisesax qalltatpacha sawaykatayna ukarjama. ³⁴ Ukatsti Josué chachax Tatitun kamachinakapat ullaräna, aski arunaka, ukhamarak ñanqhachäwi arunaka. ³⁵ Josué chachax Israel marka nayraqatan kawkïr arunaktix Moisesax jaytawaykatayna uka arunak taqpach ullart’äna, jupanak taypinsti warminaka, wawanaka, jayat jutir jaqinakaw ukankapxäna.

¹ Hititanakana, amorreonakana, cananeonakana, ferezeonakana, heveonakana, jebuseonakan reyinakapax kunatix luraskatayna ukanak yatipxäna. (Uka reyinakax Jordán jawirat inti jalanta tuqina, qullu tuqinakana, pampa tuqinakana, jach’a Mediterráneo quta irananakana, Líbano chiqanakan jakapxäna.) ² Ukatsti taqi jupanakax mä amtäwiru mantasin jaqthaptapxäna, Josué chachampi, israelitanakampi nuwasiñataki. ³ Ukampisa, Gabaón chiqan jakapkän uka heveo jaqinakax, kunjämtix Josué chachax Jericó, Ai markanakar lurkatayna uk yatipxäna, ⁴ ukat jupanakax Josué chachar sallqjañ amtapxäna. Jupanakasti thantha costalanaka, lip’ichit lurat vino imañ thantha wayaqanak asnonakapxar khumxatasin sarapxäna; ⁵ jupanakax mirq’i isimpi, thantha wiskhunakampiw uchasiwayapxäna, thakhin sarañatakix qurwarit qhulu t’ant’ak apasipxäna. ⁶ Kunapachatix Guilgal campamentor purxapxän ukkhasti, jupanakax Josué chachampiru, israelitanakampirux akham sapxänwa: —Nanakax wali jaya uraqit jutapxta, jichhasti jumanakampi mä suma amtäwiruw mantañ munapxta —sasa. ⁷ Israelitanakasti uka heveo jaqinakarux sänwa: —Inas jumanakax aka jak’anakan jakasipksta; ¿kunjämarak jumanakampi mä suma amtäwiru mantsnasti? —sasa. ⁸ Ukampis jupanakax Josué chacharux sapxänwa: —Nanakax juman luqtirinakamaw tukupxä —sasa. Ukat Josué chachax jupanakar jiskt’äna: —¿Khitïpxarakta jumanakasti? ¿Kawkhatarak jutapxtasti? —sasa. ⁹ Jupanakasti sapxänwa: —Nanakax wali jayat jutapxta, Tatitu Diosaman wali ch’amanïtap yatisa. Egipto markan kuntix jupax lurki taqi ukanak yatipxta, ¹⁰ ukhamarak kuntix Jordán jawir khurkatankir pani amorreo reyinakaru lurki ukanaksa, Sihón sat Hesbón markan reyiparu, Astarot chiqan jakir Og sat Basán markan reyiparu. ¹¹ Ukat nanakan jilïrinakaxasa, marka masinakaxas akham sapxitu: ‘Jumanakax thakhitak manq’añanak apasipxam, ukatsti kawkhankkitix jupanakax ukkhakam sarapxam. Ukatsti sapxarakim: Nanakax jumanakan luqtirimaruw tukupxä, mä suma amtäwiruw jumanakampi mantañ munapxta’ sasa. ¹² Kunapachatix jumanakar thaqhir mistunipkta ukkhaxa, aka t’ant’anakax junt’üskänwa, jichhasti q’ala qhuluntata qurwantatawa. ¹³ Lip’ichi wayaqanakas vino uskunipkta ukkhax machaqäskänwa, jichhasti q’ala ch’iyanuqtatawa; isinakaxasa, wiskhunakaxas wali jayat jutapxatax laykux q’ala thanthäxiwa —sasa. ¹⁴ Israelitanakasti gabaonita jaqinakan manq’añanakap mallt’apxäna, ukampis uk lurañatakix janiw Tatiturux jiskt’asipkänti. ¹⁵ Ukatsti Josué chachax jupanakampi sumankañatakiw mä arust’äwi luräna, jupanakar jan jiwayañatak arsusa; israelitanakan maynïr jilïrinakapasti uka pacha juramento lurapxarakïna. ¹⁶ Kimsa uru qhipatsti, israelitanakax akatjamat yatipxäna gabaonitanakax uta jak’a masipäpxatapa, ukhamarak uka jak’an jakirïpxatapa. ¹⁷ Ukatsti israelit jaqinakax Gabaonitanakar thaqhiriw mistuwayapxäna, kimsürutsti Gabaón, Quefirá, Beerot, Quiriat-jearim sat markanakaparuw puripxäna. ¹⁸ Ukampis israelitanakax purisin janiw jupanakarux jiwaraykänti, jilïrinakapan Israelan Tatit Diosan sutipxaru jan jiwayañataki juramento lurapxatap layku. Ukat markankirinakax jilïrinakapataki kunayman arusipxäna, ¹⁹ ukampis jilïrinakapax sapxänwa: —Nanakax Israelan Tatitu Diosan sutipxaruw juramento lurapxta jupanakar jan jiwarayañataki, ukat jichhax jan kunsa lurapkiristti. ²⁰ Janiw jiwayañasäkiti, juramento luratarutix p’akintañäni ukaxa, Tatitux jiwasatakiw q’apisispa —sasa. ²¹ Ukhamaw israelitanakan jilïrinakapax Gabaón markat jutir jaqinakan jakañanakapat khuyapt’ayasïna, ukatsti jupanakarux taqpach jaqinakatak lawa ch’iyiritaki, uma apiritakiw uchasipxäna, ukhamat juramento luratanakap phuqhapxäna. ²² Josué chachasti gabaonita jaqinakar jawsasin jiskt’äna: —¿Kunatarak nanakar sallqjapxista wali jayat jutapxta sasasti? Chiqpachansa jumanakax aka jak’an jakasipkatätaxa. ²³ Ukat jichhax jumanakax ñanqhachat jakapxäta, wiñayarakiw luqtirit sarnaqapxäta, ukatsti Diosaxan utapatakix lawa ch’iyanipxäta, uma apanipxäta —sasa. ²⁴ Jupanakasti Josué chacharux sapxänwa: —Nanakax jumar axsarasaw uk lurapxta, nanakar jan jiwayañamataki, nanakasti kuntix jumanakan Tatitu Diosamax Moisesar sawaykatayna uk yatipxtwa: “Taqi aka markanak jumanakar katuyapxäma ukatsti ukan jakir jaqinakarux taqpach tukjapxäta” sasa. ²⁵ Jichhasti nanakax juman amparamankapxtwa, nanakampisti kunjämtix munkta ukhamar luram —sasa. ²⁶ Josué chachasti janiw israelitanakan gabaonita jaqinakar jiwayañap munkänti, ²⁷ ukampis uka jaqinakarux Israel markankirinakampitaki, Tatitun altarapampitak lawanak ch’iyañapataki, uma apaniñapatak uskutäpxänwa, kawkharutix Tatitux ajlliskani ukkhana. Gabaonita jaqinakasti jichhürkamaw uka lurañanakanïsipki.

¹ Jerusalenan Adonisédec sat reyipax Josué chachan Ai markaru, reyipampiru katuntasin q’al tukjatapa, ukatsti uka markaru kunjämtix Jericó markaru, reyiparusa nayrax lurkatayna uka kipka luratapa, ukhamarak gabaonita jaqinakan israelitanakampi sumar mantxapxatapa, jupanak taypin jakapxatapsa yatïna ukkhax wal axsarayasïna. Juk’ampisa gabaonita jaqinakan jupanak taypin jakatapaw wal axsarayäna, Gabaón markax wali aytat markänwa, Ai markat sipan juk’ampi jach’araki, maynïr markanakjam reyiniraki, jaqinakapasti nuwasiñatakix jan axsaririnakänwa. ³ Ukat Adonisédec reyix yatiyäwi apayäna Hebrón markan Hoham reyiparu, Jarmut markan Piram reyiparu, Laquis markan Jafía reyiparu, Eglón markan Debir reyiparu akham sasa: ⁴ “Nayan ukar jutapxam, ukatsti gabaonitanakamp nuwasiñ yanapt’apxita, jupanakax Josué chachampi israelitanakampiw mä arust’äwir mantapxatayna” sasa. ⁵ Ukhamasti Jerusalén, Hebrón, Jarmut, Laquis, Eglón uka phisqa markanakan amorreo reyinakapax mayacht’asipxänwa, ukatsti ejercitonakapampiw sarantapxäna, Gabaón markar muyuntas katuntañataki. ⁶ Gabaón markan jakirinakasti Josué chachan Guilgal chiqankki uka campamentonkkipan mä yatiyäwi apayapxäna, akham sasa: “Janikiy janiw sapxistati luqtirinakamar yanapt’añxa. Nanakar yanapt’iri, arxatirix mäkiy jutam, qullunakankir amorreo reyinakaw mayacht’asipxi nanakar katuntañataki” sasa. ⁷ Ukatsti Josué chachax jan axsarir soldadonakapampiw Guilgal chiqat mistuwayäna, ⁸ Tatitusti Josué chacharux sänwa: “Jan jupanakar axsaramti, nayaw amparamar katuyaskäma, janirakiw jupanakat khitis saykatkätamti” sasa. ⁹ Josué chachax Guilgal chiqat mistuwayäna, aruma sarantasax akatjamat amorreonakarux katuntäna. ¹⁰ Tatituw jupanakarux israelitanakan nayraqatapan wal mulljasiyäna, ukhamaw Josué chachax Gabaón chiqan waljanir jiwarayäna. Ukatsti jupanakarux Bet-horón thakhinjam arktäna, amorreonakar jiwarayasa Azecá, Maquedá markanakar puriñkama. ¹¹ Amorreonakax israelitanakat jaltxasin Bet-horón sat aynacha jalaqasipkän ukkhasti, Tatitux chhijchhir uñtat jach’a qalanak jupanakxar puriyäna, ukanakasti israelitanakan espadanakapamp jiwarayañat sipansa, juk’amp walja amorreo jaqinakaruw jiwarayäna. ¹² Kunapachatix Tatitux amorreonakar israelitanakan amparapar katuyxän ukkhaxa, Josué chachax marka nayraqatan Tatiturux parlxayäna, akham sasa: “Jumasti inti, Gabaón marka patar sayt’am; phaxsi, Aialón qhirwa patar sayt’am” sasa. ¹³ Intimpi phaxsimpisti sayt’änwa, Israel markax uñisirinakapat phuqsusipkän ukkhakama. Chiqa jaqin qillqatapan akham siwa: “Intix chika alaxpachan sayt’äna, niya mä urjamaw jan unxtkänti” sasa. ¹⁴ Uka urur uñtatax janipuniw utjkänti, janirakiw jichhas utjkaniti, kunjämtix Tatitux uka urun mä jaqin mayisitaparu jayskäna ukhamxa, Tatituw Israel markar arxatasa nuwasiskäna. ¹⁵ Ukatsti Josué chachampi israelitanakampix Guilgal chiqankki uka campamentoruw kuttanxapxäna, ¹⁶ uka phisqa reyinakax jaltxapxänwa, ukatsti Maquedá chiqan utjir mä puturuw imantasipxäna. ¹⁷ Ukampisa, reyinakan uka putunkaskatap Josué chacharux yatiyapxäna. ¹⁸ Ukat Josué chachax jaqinakar khithäna akham sasa: “Jumanakax uka putun mantañapawjkam qalanak qurumt’ayapxam, ukatsti atintapxam, putu mantañar uñjirinak uskupxam. ¹⁹ Ukchañkamasti, jumanakax jan ukhamak ukan qhiparapxamti, uñisirin qhipapat arktasin katuntapxam, janirak markanakaparux kuttayapxamti, Tatitu Diosamaw jumanakarux amparanakamaru katuyapxtam” sasa. ²⁰ Kunapachatix Josué chachampi israelitanakampix amorreonakar q’alpun atipjas waljanir jiwarayapkän ukkhaxa, amorreonakat jilt’irinakax markanakaparuw imantasipxäna. ²¹ Ukampis Israel markax jan kuna kamacht’ataw Maquedá chiqankir campamentor kuttxäna, kawkhankkäntix Josué chachax ukawjaru. Ukatsti janiw khitis kuna jan walinaksa israelitanakataki parlkxänti. ²² Ukatsti Josué chachax sänwa: “Uka putu mantañ atiqapxam, ukatsti uka phisqa reyinakar irpsunipxam” sasa. ²³ Israelitanakasti ukham lurapxäna, ukatsti Jerusalén, Hebrón, Jarmut, Laquis, Eglón markanakan reyinakaparuw uka putut irpsunipxäna. ²⁴ Kunapachatix Josué chachan nayraqatapar puriyanipkän ukkhaxa, Josué chachax israelankir taqi chachanakaruw jawsäna, ukatsti ejerciton jilïrinakaparux sänwa: “Jak’achasinipxam, ukatsti aka reyinakarux kunkat takxatapxam” sasa. Jupanakasti ukham lurapxäna, ²⁵ ukatsti Josué chachax jupanakarux sänwa: “Jan axsarapxamti, janirak ch’amsa jiwt’ayasipxamti; jan ukasti wali ch’aman sayt’asipxam, Tatitusti jumanakan taqi uñisirinakamarux uka kipka lurarakini” sasa. ²⁶ Uk arsusinsti Josué chachax uka reyinakaruw jiwarayäna, ukatsti sapa mayniruw mä quqar warkkatayäna, ukan jayp’ukam warkut uñjasipxäna. ²⁷ Kunapachatix intix niya jalantañampïxän ukkhasti, Josué chachax jaqinak khithäna, uka quqanakat apaqanipxañapataki, ukatsti kawkha putuntix imantasipkatayna uka pachpa puturuw jaquntayanïna. Uka putu mantañapsti jach’a qalanakampiw atkatayäna, ukanakasti jichhürkamaw ukankaski. ²⁸ Uka pachpa urusti, Josué chachax Maquedá markar katuntasax q’alpun tukjäna; uka markan jakirinakarux espadampkamaw jiwarayäna, janirakiw maynis jakkänti. Maquedá markankir reyiparux kunjämtix Jericó markankiri reyirux lurkatayna uka kipkarak luräna. ²⁹ Uka chiqatsti, Josué chachampi israelitanakampix Libná sat markaruw nuwantir sarapxäna. ³⁰ Tatituw uka markampi, reyipampirux jupanakar katuyäna. Taqinipuniw jiwarat uñjasipxäna, Libná markankir reyiparux kunjämtix Jericó markan reyiparux lurkatayna uka kipkarak luräna. ³¹ Ukatsti Josué chachampi israelitanakampix Libná chiqat Laquis markaruw sarapxäna, uka markar muyuntasasti katuntapxänwa. ³² Pä uru qhipatsti Tatitux Laquis marka jupanakar katuyäna, ukatsti kunjämtix Libná markan lurapkatayna ukhamarak israelitanakax taqi jaqinakaru, ukan utjir uywanakarux espadampkamaw jiwarayapxäna. ³³ Guézer markankir Horam reyix ejercitopampiw Laquis markar arxatirix mistüna, ukampis Josué chachax jupar atipjänwa, taqiniruw jiwarayäna. ³⁴ Ukatsti Josué chachampi israelitanakampix Laquis chiqat Eglón markaruw sarxapxäna, uka markar muyuntasinsti katuntapxänwa. ³⁵ Uka pachpa uruw uka marka katuntapxäna, ukatsti ukan jakirinakarux espadampkamaw taqinir jiwarayapxäna, kunjämtix Laquis markar lurapkatayna ukham q’alpun tukjasa. ³⁶ Eglón chiqatsti Hebrón markaruw sarapxäna, uka markarusti nuwantapxarakïnwa. ³⁷ Kunapachatix katuntxapxän ukkhaxa, q’alpun tukjapxäna, ukatsti reyiru, taqi jaqinakaru, ukan utjir uywanakaru, uka jak’an jakir jaqinakarus espadampkamaw jiwarayapxäna, kunjämtix Eglón markar lurapkatayna ukhama. ³⁸ Uka chiqatsti, Josué chachampi israelitanakampix Debir sat markaruw sarapxäna, uka markarusti nuwantapxarakïnwa, ³⁹ reyiparu, uka jak’an jakir jaqinakar espadampkam jiwarayasa. Debir markankirinakax jan mayniniw jiwarapxäna; Josué chachax taqinirupuniw tukjäna, kunjämtix Hebrón, Libná markanakaru reyinakapampiru lurkatayna ukhama. ⁴⁰ Ukhamaw Josué chachax taqi uka uraqinak katuntasïna. Jupax Négueb qullunkiri, pampankiri, amstankir reyinakaruw atipjäna. Taqpun tukjäna, taqiniruw jiwarayarakïna; janiw ukat jilt’irix kunas utjkänti, janirakiw maynis jakkänti, kunjämtix Israelan Tatit Diosapax jupar siskatayna ukhamaru phuqhasa. ⁴¹ Josué chachax mä kutinak reyinakarux atipjäna, ukatsti uraqinakap Cadés-barnea, Gaza, Gosen chiqata, Gabaón markakamaw katuntasïna, Israelan Tatitu Diosapaw israelitanakat arxatasax nuwasiskäna, uka layku. ⁴³ Ukatsti Josué chachax taqi israelitanakampi Guilgal chiqankki uka campamentor kuttxäna.

¹ Kunapachatix Jabín sat Hasor markankir reyipax taqi ukanak yatkän ukkhaxa, mä jaqinak khithäna Madón markan Jobad reyipampi, Simrón, Acsaf markanakan reyipampi, mä suma amtäwiru mantañataki, ² ukhamarak alay tuqinkir qullunkapki uka reyinakampi; Galilea quta aynach tuqin Jordán qhirwankiri reyinakampi, pampankirinakampi, inti jalanta tuqinkir Dor marka jak’ankirinakampi, ³ inti jalsu, inti jalanta tuqinkir cananeo, amorreo, hitita, ferezeo jaqinakampi, qullunakankir jebuseonakampi, Mispá uraqin Hermón sat qullunkir heveonakampi. ⁴ Taqi uka reyinakasti soldadonakapampi, walja caballonakampi, nuwasiñ carronakapampiw misttanipxäna. Soldadonakax jan jakt’kaya quta ch’allar uñtata walt’atapunïnwa. ⁵ Taqi jupanakaw mä suma amtäwiru mantapxäna, ukatsti israelitanakar katuntañatakix Merom chiqankki uka uma thiyaruw utjnuqtapxäna. ⁶ Ukampis Tatitux Josué chacharux sänwa: “Jan jupanakarux axsaramti, nayaw qharüru aka pacharux jupanak jumanak nayraqatan jiwarat uñjasiyä. Jumasti caballonakapan kayunakap p’akiräta, nuwasiñ carronakapsa ninampirakiw phichkatäta” sasa. ⁷ Ukatsti Josué chachax taqi nuwasir soldadonakapampiw akatjamat Merom sat uma thiyan uñisirinakapar katuntapxäna, ⁸ Tatitusti israelitanakarux atipt’ayänwa, ukhamasti jupanakax Sidón, Misrefot-maim jach’a markanakkamaw arktasax jalxatapxäna, inti jalsu tuqit Mispá pampa chiqakama. Taqinipuniw jiwarapxäna. ⁹ Josué chachax Tatitun arsutaparjamaw phuqhäna, uñisirin caballonakapan kayunakap p’akiräna, nuwasiñ carronakapsa phichhantarakïnwa. ¹⁰ Ukatsti kuttanisax Hasor marka katuntäna, uka markan suma arust’äwir mantañatak lurapxatayna uka layku, reyiparusti jiwayänwa, ¹¹ ukhamarak khitinakatix ukan jakapkän taqi jupanakaru. Taqi kun q’alpun tukjapxäna, marksa phichhantapxarakïnwa. ¹² Uka pachparaki kawkïr markanakatix uka arust’äwiru mantañataki jaysapkatayna uka markanakarux luräna: markanakar katuntasax reyinakaparuw jiwarayäna, ukatsti q’alpun tukjäna, kunjämatix Tatitun luqtiripa Moisesax siskatayna ukhamarjama. ¹³ Ukampisa, israelitanakax qullunakankkän uka markanakarux janiw maysa phichhantapkänti, jan ukasti Hasor markaki phichhantapxäna. ¹⁴ Uka markanakan jakir jaqinakarusti espadampkamaw jiwarayapxäna, janiw maynirus jakayapkänti, ukatsti uka markanakan utjkatayna uka uywanaksa, utjir yänaksa taq katuntasipxäna. ¹⁵ Tatitux Moisesaruw ixwa arunakap churatayna, Moisesasti Josué chacharuw uka ixwa arunak churarakïna, jupasti uka arunakarjamax taqpun phuqhäna. ¹⁶ Josué chachax taqi uksa uraqinak katuntäna: qullu uraqinaka, Négueb sat uraqi, Gosen uraqinaka, Jordán qhirwa pampanaka, Israel markan qullu uraqinakapa, pampa uraqinakapa. ¹⁷ Halac sat qullut Seír tuqir makhatki ukkhata, Baal-gad chiqakama, ukasti Líbano pampanakankiwa Hermón qullu kayuna; Josué chachax uka chiqankir reyinakarux katuntasin taqiniruw jiwarayäna, ¹⁸ jupanakampisti walja maranakaw nuwasïna. ¹⁹ Ukampis Gabaón chiqankir heveo markampikiw israelitanakax mä arust’äwiru mantapxäna. Ukat uksarusti taqi markanakaw munkir jan munkir katuntata uñjasïna, ²⁰ Tatituw uka uñisirinakarux chuymanakap qalarayäna israelitanakar saykatañapataki, ukhamat israelitanakan jan khuyapt’ayasis q’al tukjañapataki, kunjämtix Tatitux Moisesar siskatayna ukhamarjama. ²¹ Khä urunakanxa, Josué chachax Hebrón qulluna, Debir, Anab markan jakapki uka anaquita sat jaqinakan markanakapar katuntasin q’alpun tukjäna, ukhamarak Judá, Israelan qullunakapan jakirinakarusa, ²² ukhamïpansti janiw Israel markanxa Anac sat jach’a tansa jaqit saraqir wawapax maynis qhiparkänti. Jan ukasti kawkïrinakatix Gaza, Gat, Asdod uka markanakan jakapkäna ukanakakiw qhiparapxäna. ²³ Ukhamaw Josué chachax taqi uka uraqinak katuntäna, kunjämtix Tatitux Moisesar siskatayna ukhamarjama. Ukatsti Israelan tunka payan ayllunakaparuw uka uraqinak jupanakan tutipäñapatak lakintäna. Uka qhipatsti samarañaw uka uraqinakan utjxäna.

¹ Israelitanakax Jordán jawirat inti jalsu tuqin atipt’apkän uka reyinakax akanakawa, ukhamarak kawkïr uraqinaktix Arnón jawirat Hermón qullukama, Jordán qhirwat inti jalsu tuqinkir uraqinakamppach katuntapkän ukanakasa akanakawa: ² Hesbón markan jakir amorreo jaqinakan Sihón sat reyipa. Jupan marka apnaqañapax Aroer chiqat Arnón jawir thiyakamänwa, ukatsti chika qhirwat Jaboc sat jawirkama, ukawjat amonitanakan uraqipax qalltäna (Galaad uraqit niya chikatapjamawa), ³ ukatsti Jordán jawirat inti jalsu tuqinkki uka qhirwamppacha, alay tuqirusti Galilea qutata Mar Muerto sat qutakama, ukat aynach tuqirux Pisgá qullu kayukama. ⁴ Basán markankir Og reyipa, refaitanakat jupakiw jilt’xäna, Astarot, Edrei uka markanakan jakäna. ⁵ Jupan marka apnaqañapax Hermón qulluta, Salcá, Basán chiqat qalltasax Guesur, Maacá sat qurpakama, Galaad sata uka chika uraqkamänwa, ukasti Hesbón marka apnaqir Sihón reyinkänwa. ⁶ Moisesampi israelitanakampix uka reyinakaruw atipjäna, ukatsti Moisesax uka uraqinak Rubén, Gad uka ayllunkirinakaruw churäna, ukhamarak Manasés ayllunkirinakat chikat jaqiparu. ⁷ Josué chachasti israelitanakampix aka reyinakaruw Jordán jawirat inti jalanta tuqin atipjäna, Líbano qhirwankir Baal-gad chiqatpacha, Halac sat qullukama, Edom markat aynach tuqina. Josué chachasti uka uraqinakxa Israelan tunka payan ayllunakaparuw lakintäna wiñayatak jupanakankañapataki, ⁸ qullu uraqinaka, pampa uraqinaka, Jordán qhirwanaka, qullu irananaka, wasar uraqinaka, ukhamarak Négueb sat uraqinaka. Uka uraqinakasti hititanakana, amorreonakana, cananeonakana, ferezeonakana, heveonakana jebuseonakan uraqipänwa. ⁹ Israelitanakax aknïr markanakan reyinakaparuw atipt’äna: Jericó marka, Betel jak’ankir Ai marka, ¹⁰ Jerusalén, Hebrón, ¹¹ Jarmut, Laquis, ¹² Eglón, Guézer, ¹³ Debir, Guéder, ¹⁴ Hormá, Arad, ¹⁵ Libná, Adulam, ¹⁶ Maquedá, Betel, ¹⁷ Tapúah, Héfer, ¹⁸ Afec, Sarón, ¹⁹ Madón, Hasor, ²⁰ Simrón-merón, Acsaf, ²¹ Taanac, Meguido, ²² Quedes marka, Carmelo qullunkir Jocneam marka, ²³ quta thiyankir Dor marka, Guilgal chiqankir Goím marka, ²⁴ ukhamarak Tirsá marka. Taqpachax kimsa tunka mayan reyinakänwa.

¹ Kunapachatix Josué chachax sinti chuymanïxän ukkhaw, Tatitux juparux säna: “Jumax chuymanïxtawa, ukampis walja uraqinakaw katuntañatak utjaski. ² Filisteonakana, guesureonakan uraqinakapax ukhampachäskiwa, ³ ukasti Egipto markat inti jalsu tuqinkir Sihor jawirat qalltasa, Ecrón markan qurpapkama amsta tuqiru, ukax cananeonakan uraqipawa; ukansti filisteonakan phisqa jilïrinakapaw utji, jupanakasti Gaza, Asdod, Ascalón, Gat, Ecrón uka markanakan jakapxi. Ukhamarusa, aveo jaqinakan uraqipaw ⁴ aynach tuqin utjaski, ukatsti cananeonakan taqpach uraqinakapa, sidonionakan Megará markanakapata Afec sat chiqakama, amorreonakan qurpapana. ⁵ Ukatsti guiblitas sat jaqinakan uraqinakapaw utjaskaraki, Líbano sata, inti jalsu tuqinkir taqpach uka uraqinaka, Baal-gad chiqat Hermón qullu aynach tuqikama, ukat Hamat markar mantañ chiqakama. ⁶ Naya Diosaw israelitanakan nayräxapat sidonio jaqinakarux jaqunukü, ukhamarak qullunakan jakapki ukanakarusa, Líbano chiqat qalltasa Misrefot-maim chiqakama. Jumasti jichhax israelitanakar uka uraqinak churañar uchasim, kunjämtix nayax sisksma ukhamar phuqhasa. ⁷ Ukhamasti jumax aka uraqinakxa llätunka ayllunakar lakintam, ukhamarak Manasés ayllunkirinakat chikat jaqiparu” sasa. ⁸ Rubén, Gad ayllunakampi, ukhamarak Manasés ayllunkir chikat jaqipampix, Jordán jawirat inti jalsu tuqiruw Moisesat uraqinak katuqapxäna. ⁹ Jupanakarux Aroer chiqat qalltkäna uka uraqinaka, Arnón jawir thiyana, Dibón chiqakamäki uka uraqinakaw wakt’äna, ukatsti qhirwa taypinkir markamppacha, Medebá pampanakamppacha, ¹⁰ Hesbón markan jakkäna, amorreonakan Sihón sat reyipan taqi markanakapamppacha, amonitanakampi qurpäkis ukakama. ¹¹ Jupanakarusti Galaad uraqinaka, guesureo, maacateo jaqinakan uraqinakapax wakt’arakïnwa, Hermón qullunakampi, Basán uraqinakamppacha, Salcá chiqakama, ¹² Basán markankir Og sat reyin uraqinakapamppacha, jupasti Astarot, Edrei markanak apnaqäna, jupasti refaita jaqinakat jilt’irïnwa, Moisesax ukanakaruw atipjasin jaqunuküna. ¹³ Guesur, Maacá sat markankirinakax janiw ukawjat jaqunukutäpkänti, jan ukasti israelitanak taypin jakasipkakïnwa, kunjämtix jichhürkam jakasipki ukhama. ¹⁴ Moisesax janiw Leví ayllunkirinakarux uraqinak churkänti, jupanakatakisti kawkïri waxt’äwinakatix Israelan Tatitu Diosan sutipxaru nakt’ayata luqtatäki ukanakäñapänwa, kunjämtix jupa kipka arsuwaykäna ukarjama. ¹⁵ Moisesax Rubén ayllurux qawqhanïkitix wila masi tamanakapax ukhamarjamaw uraqinak lakiräna, ¹⁶ ukhamïpansti uraqipax Aroer chiqata, Arnón sat jawir thiyana, Hesbón markakama, qhirwa taypinkir markamppacha, Medebá pampanakamppacha. ¹⁷ Ukatsti pampankir taqi markanaka: Dibón, Bamot-baal, Bet-baal-megón, ¹⁸ Jahas, Cademot, Mefáat, ¹⁹ Quiriataim, Sibmá, Séret-sáhar, kawkïritix qhirwa qullunak patankki ukanaka, ²⁰ Bet-peor, Bet-jesimot, Pisgá sat qullu irananaka, ²¹ ukhamarak pampankir markanaka, Hesbón markan Sihón sat amorreonakan reyipan taqpach uraqinakapa. Moisesax Sihón reyiruw atipjatayna, ukhamarak marka apnaqir jilïrinakaparu: Eví, Réquem, Sur, Hur, Reba, jupanakax Madián uraqin jakapxäna. ²² Ukhamarus israelitanakax Beor jaqin Balaam layqa yuqaparuw jiwayapxäna, ukhamarak yaqhanakampiru. ²³ Rubén ayllun uraqipax, wila masi tamanakaparjam lakinuqatax, taqi uka markanaka, jisk’a markanakamppachax, Jordán jawirkamaw purïna. ²⁴ Moisesax Gad ayllunkirinakarux wila masi tamanakaparjamaw uraqinak lakinuqarakïna. ²⁵ Jupanakarusti Jazer marka, Galaad uraqinkir taqi markanakamppacha, amonitanakan chikat uraqipamppachaw wakt’äna, Aroer sat chiqakama, ukax Rabá marka uñkatasinkiwa, ²⁶ ukhamarak Hesbón markatpacha, Ramat-mispé, Betonim markanakkama, ukatsti Mahanaim chiqatpacha, Debir marka qurpakama. ²⁷ Qhirwa tuqinsti Bet-aram, Bet-nimrá, Sucot, Safón uka uraqinakaw wakt’äna, uka uraqinakakiw Hesbón markan Sihón reyin uraqinakapat jilt’xäna. Uraqipax Jordán jawirat inti jalsu tuqit qalltäna, Galilea quta aynach thiyakama. ²⁸ Gad ayllurux uka markanakaw jisk’a markanakapamppacha wakt’äna, qawqhäkitix wila masi tamanakapax ukhamarjama. ²⁹ Moisesax Manasés ayllunkirinakat chikat jaqiparux uraqinak churarakïna, qawqhäkitix wila masi tamanakapax ukarjam lakinuqata. ³⁰ Jupanakarux Basán marka apnaqir Og reyin uraqinakapäkatayna ukanakaw wakt’äna, Basán taqpach uraqi, Mahanaim chiqatpacha, Jaír chachan uka suxta tunka markanakapamppacha, ³¹ Galaad uraqit chikatpacha, Astarot, Edrei markamppacha. Taqi uka uraqinakasti Manasés chachan Maquir yuqapan wawanakapat chikatatakïnwa, qawqhäkitix wila masi tamanakapax ukarjama. ³² Taqi uka uraqinak Moisesax churäna, Moab chiqan jikxataskän ukkha, Jordán jawirat inti jalsu tuqina, Jericó marka uñkatasina. ³³ Ukampis Leví ayllunkirinakarux janiw kuna uraqsa churkänti, jan ukasti jupanakarux sänwa: “Israelan Tatitu Diosapaw jumanakan katuqäwimaxa” sasa.

¹ Eleazar sacerdotempi, Nun chachan Josué yuqapampix, wila masi tamanakan jilïrinakapamp chikaw israelitanakarux cananeo uraqinak lakintapxäna, Jordán jawirat inti jalanta tuqina. ² Uka uraqinakasti suertetkam llätunka chikatani ayllunakarux lakinuqasïna, kunjämatix Tatitux Moisesar siskatayna ukarjama. ³ Moisesax Rubén, Gad ayllunakarux Jordán jawir khurkatan utjir uraqinak niyaw churxatayna, ukhamarak Manasés ayllunkirinakat chikat jaqiparu, ukampis levitanakarux janiw uraq churkänti. ⁴ José chachat saraqir wawanakapax pä ayllur tukutänwa, Manasés, Efraín ayllunaka, ukampis levitanakarux janiw mä jisk’a uraqis wakt’känti, jan ukasti kawkhantix jakapkaspa uka markanaka churäna, ch’uxña pampa uraqinakampi uywanakap awatiñataki. ⁵ Israelitanakax kunjämtix Tatitux Moisesar siskatayna ukhamarjamaw uraq lakinuqasipxäna. ⁶ Judá ayllut saraqir wawanakapax Josué chachampi parliriw Guilgal chiqaru sarapxäna, ukatsti Jefuné jaqin yuqapa, quenezita Caleb chachax Josué chacharuw akham säna: “Jichhasti jumax kuntix Tatitux Moisés luqtiriparu Cadés-barnea chiqan nayampita, jumampit sawayki uk amtasim. ⁷ Nayasti ukapachax pusi tunka maranïyätwa, kunapachatix Moisesax Cadés-barnea chiqat uka uraq uñaqañatak khitkitän ukkhaxa, kuttanisinsti qhana chuymampiw kunanaktix nayax uñjankäyät ukanakat juparux parläyäta. ⁸ Ukampis nayamp chika sarapkän uka jaqinakax, purinisinxa wali axsarañanak Israel markarux yatiyapxäna, chuymanakap mayjt’ayasa, nayasti Tatitu Diosaxaruw iyawsäyäta. ⁹ Ukat Moisesax juramento lurarapitu, akham sasa: ‘Kawkïr uraqirutix kayumax takt’ki ukax jumankapuniniwa, ukhamarak wawanakamana, Tatit Diosaru taqi chuymampi alkatasitam layku’ sasa. ¹⁰ Tatitux Moisesar arskäna ukkhat jichhakamax, niy pusi tunka phisqan maräxiwa, israelitanakax ukürunakan wasaran sarnaqasipkäna, nayarusti arsutaparjamaw jakayaskitu. Jichhasti kimsaqallq tunka phisqan maranïxtwa, ¹¹ ukampis nayax wali ch’amanïsktwa, kunapachatix Moisesax uraqinak uñjir khitkitän uka urunakanjama, ch’amaxasti jalnaqañatakisa, uka urunakanjam nuwasiñatakis utjaskiwa. ¹² Ukat jichhax jumar maysma uka qullu chiqanak nayar churañamataki, kunjämtix Tatitux arsuwaykitu ukhamarjama. Jumasti yattawa Anac sat jach’a tansa jaqit saraqir wawanakapan uka urunakatpach uka chiqan jakapxatapxa, markanakapasa jach’anaka, wali suma uyuchrantat markanakätapa. Ukampis nayax Tatitun yanapapampix uka chiqat jupanakarux jaqunuküwa, kunjämtix Tatitux arsuwayki ukhamarjama” sasa. ¹³ Ukat Josué chachax Caleb chacharux askinak churäna, ukatsti jupampiru wawanakampirux Hebrón uraqi churxäna. ¹⁴ Ukhamaw Hebrón uraqix Caleb chachampiru wawanakapampiru churatäxäna, Caleb chachan Israelan Tatitu Diosaparu taqi chuymamp jaysatap layku. ¹⁵ Hebrón qullun nayra sutipax Quiriat-arbá satänwa, Arbá jaqix, wali uñt’ata Anac sat jach’a tansa jaqin wawapänwa. Uka qhipatsti samarañaw uka uraqinakanxa utjxäna.

¹ Kawkïr uraqinaktix Judá ayllunkirinakaru suertetkam wakt’kän uka uraqinakax, Edom qurpakamaw purïna, aynach tuqirux Sin sat wasarata Temán chiqakama. ² Uka qurpasti Mar Muerto qutäkis uka aynachatpach qalltanïna, ³ ukatsti aynach tuqirux Acrabim sat qhathakamaw saräna, Sin wasaranjam makhatäna, Cadés-barnea chiqa sarakipasa; ukatsti Hezrón markakamaw saraskakïna, Adar sat chiqakamaw makhatäna, ukatxa Carcá tuqi muytanïna, Asmón markar puriñkama. ⁴ Uka chiqatsti saraskakïnwa Egipto qurpasin jisk’a jawirar mistuñataki, ukatsti Mediterráneo jach’a qutar tukuyañkama. Ukaw Judá uraqin aynach tuqit qurpapäna. ⁵ Inti jalsu tuqitsti, Mar Muerto qutaw qurpänxa, Jordán jawirax purki ukakama. Uka chiqat amsta tuqi qurpax qalltäna, ⁶ ukasti Bet-hoglá chiqakamaw makhatäna, Bet-arabá amsta tuqiru sarakipasa, Rubén chachan Bohan sat yuqapan uka qarqakama; ⁷ ukatsti Acor qhirwat makhatanïna Debir chiqakama, Guilgal tuqi muytanisina, Adumim amsta uñkatasina, qhirwa aynach tuqina; ukatsti qurpax En-semes uma jalsu chiqaw saräna, En-roguel chiqakama; ⁸ ukatsti Ben-hinom qhirwanjam makhatäna, ukasti Jerusalén aynach tuqinkiwa; ukatsti qullu patanjam makhataskakïna, ukax Hinom qhirwat inti jalanta tuqinkiwa, uka chiqatsti Refaim qhirwaruw saraqäna; ⁹ qullu patanjam muytanïna Neftóah uma jalsukama, ukatsti Efrón qullunakankir markanak chiqa saraskakïna, Quiriat-jearim chiqa sarakipasa. ¹⁰ Baalá chiqat inti jalanta tuqirusti, qurpax Seír qullu chiqakamaw purïna, Quesalón chiqaw saräna, Jearim qullu amsta tuqipanjama, ukatsti Bet-semes chiqakam saraqäna, Timná chiqa sarakipasa. ¹¹ Uka chiqatsti Ecrón amsta qullunakanjam saraskakïna, Sicrón tuqir muytanisina, Jabneel chiqakama, Baalá qullu sarakipasa, ukat Mar Mediterráneo jach’a qutar puriñkama. ¹² Tukuyarusti, inti jalanta tuqitxa, qurpax Mar Mediterráneo jach’a qutänwa. Judá ayllur wakt’käna uka uraqinakan qurpanakapax ukanakawa, kawkïr uraqinaktix Judá ayllunkir wila masi tamanakapax lakinuqasipkäna uka uraqinaka. ¹³ Josué chachax Jefuné jaqin Caleb yuqaparux Judá ayllun uraqinakapat mä t’aqa churäna. Tatitun arsutaparjamasti, Hebrón marka churäna, Anac sat jach’a tansa jaqin wawanakapan aytat markapa. ¹⁴ Caleb chachax uka chiqat Anac chachan kimsa wawanakaparuw jaqunuküna, Sesai, Ahimán, Talmai jupanakaru. ¹⁵ Uka qhipatsti Caleb chachax Debir markan jaqinakar katuntiriw saräna, nayra pachasti uka markax Quiriat-séfer satänwa. ¹⁶ Caleb chachax sänwa: “Khititix Debir markar atipjas katuntkani ukaruxa, nayax Acsa sat phuchhaxa warmipäñapataki churä” sasa. ¹⁷ Uka marka katuntiri chachasti Otoniel sat sobrinopänwa, Quenaz chachan yuqapa, ukhamasti Caleb chachax Acsa phuchhaparuw warmipäñapatak Otonielar churäna. ¹⁸ Jaqichasiñap urusti, Otoniel chachax Acsa warmiparuw säna: —Awkimar mä uraqiy yapuchasiñataki mayim —sasa. Uka Acsa warmix, asnopat saraqasin awkipan ukaruw saräna. Caleb awkipasti juparux jiskt’änwa: —¿Kunsa jumax munta? —sasa. ¹⁹ Acsa warmisti sänwa: —Nayax may achikt’asiñ munsma. Uraqinak churxistawa, ukampis waña chiqanakankiwa, jichhax umanïki uka uraqinakay churarakita —sasa. Caleb awkipasti, qullunkiri, qhirwankiri uma jalsuni uraqinak churäna. ²⁰ Kawkïr uraqinaktix Judá ayllunkir wila masi tamanakax katuqapkäna ukanakax aka markanakänwa: ²¹ Aynach tuqina, Edom markampi qurpa jak’anxa, Cabseel, Éder, Jagur, ²² Quiná, Dimoná, Adadá, ²³ Cedes, Hasor, Itnán, ²⁴ Zif, Télem, Bealot, ²⁵ Hasor-hadatá, Queriot, Hesrón, ²⁶ Amam, Semá, Moladá, ²⁷ Hasar-gadá, Hesmón, Bet-pélet, ²⁸ Hasar-sual, Beerseba, jisk’a markanakapamppacha, ²⁹ Baalá, Iim, Ésem, ³⁰ Eltolad, Quesil, Hormá, ³¹ Siclag, Madmaná, Sansaná, ³² Lebaot, Silhim, En-rimón uka markanaka. Taqpachax pä tunka llätunkan markanakänwa, jisk’a markanakapamppacha. ³³ Pampa tuqirux aknïr markanakaw wakt’äna: Estaol, Sorá, Asná, ³⁴ Zanóah, En-ganim, Tapúah, Enam, ³⁵ Jarmut, Adulam, Socó, Azecá, ³⁶ Saaraim, Aditaim, Guederá, Gederotaim uka markanaka, taqpachax tunka pusin markanaka, jisk’a markanakapamppacha. ³⁷ Yaqha markanakasti akanakänwa: Senán, Hadasá, Migdal-gad, ³⁸ Dileán, Mispá, Jocteel, ³⁹ Laquis, Boscat, Eglón, ⁴⁰ Cabón, Lahmam, Quitlís, ⁴¹ Guederot, Bet-dagón, Naamá, Maquedá uka markanaka, taqpachasti tunka suxtan markanaka, jisk’a markanakapamppacha. ⁴² Ukhamarak Libná, Éter, Asán, ⁴³ Ifta, Seana, Nesib, ⁴⁴ Queilá, Aczib, Maresá uka markanaka, taqpachax llätunka markanaka, jisk’a markanakapamppacha. ⁴⁵ Ukhamarak Ecrón marka, jach’a markanakapampi, jisk’a markanakapampi kuna, ⁴⁶ ukatsti Asdod marka jak’ankir taqpach markanakampi, jisk’a markanakapampi kuna, Ecrón markata Mediterráneo jach’a qutakama. ⁴⁷ Asdod markampi, Gaza markampix, jach’a markanakapampi jisk’a markanakapampi kuna, uka uraqinakasti Egipton jisk’a jawirapkama, Mediterráneo sat jach’a quta thiyanakkamaw purïna. ⁴⁸ Qullu tuqinakansti Judá ayllurux aknïr markanakaw wakt’äna: Samir, Jatir, Socó, ⁴⁹ Daná, Debir, ⁵⁰ Anab, Estemoa, Anim, ⁵¹ Gosen, Holón Guiló uka markanaka, taqpachax tunka mayan markanakänwa, jisk’a markanakapamppacha. ⁵² Yaqha markanakasti Arab, Dumá, Esán, ⁵³ Janum, Bet-tapúa, Afecá, ⁵⁴ Humtá, Sior, Hebrón uka markanakänwa, taqpachax llätunka markanaka, jisk’a markanakapamppacha. ⁵⁵ Ukhamarak Maón, Carmel, Zif, Jutá, ⁵⁶ Jezreel, Jocdeam, Zanóah, ⁵⁷ Caín, Guibeá, Timná uka markanaka, taqpachax tunka markanaka, jisk’a markanakapamppacha. ⁵⁸ Ukatsti Halhul, Bet-sur, Guedor, ⁵⁹ Maarat, Bet-anot, Eltecón uka markanaka, taqpachax suxta markanaka, jisk’a markanakapamppacha. ⁶⁰ Ukxarusti Quiriat-jearim, Rabá uka markanaka, jisk’a markanakapamppacha. ⁶¹ Wasara tuqinsti, Bet-arabá, Midín, Secacá, ⁶² Nibsán, Jayu Marka, En-gadi uka markanakaw wakt’äna, taqpachax suxta markanaka, jisk’a markanakapamppacha. ⁶³ Ukampis Judá ayllut saraqir wawanakax janiw Jerusalén markan jakapkän uka jebuseo jaqinakarux jaqunukurjamäpkänti, ukat jebuseo jaqinakax Jerusalén markan jichhürkam jakasipki, Judá ayllut saraqir wawanakapamp chika.

¹ Kawkïr uraqinaktix Josean wawanakapar suertetkam wakt’kän ukanakaxa, Jordán jawirat inti jalsu tuqit qalltäna, Jericó uma jalsu ukawjata, uka chiqatsti wasaranjam sarasin Jericó markata Betel markakam purki uka qullunakkama. ² Betel markatsti Atarot chiqa sarakipäna, arquitanakan uraqip tuqi; ³ ukatsti inti jalanta tuqiruw saraskakïna, jafletitanakan uraqip tuqi, aynach tuqinkir Bet-horón qurpakama, uka chiqatsti Guézer chiqakamaw purïna, Mediterráneo jach’a qutaru tukuyasa. ⁴ Ukhamaw José chachan Manasés, Efraín wawanakapax, kuna uraqinaktix jupanakar wakt’käna uka uraqinak katuqapxäna. ⁵ Efraín ayllun uraqinakapan qurpanakapax Atarot chiqat qalltäna, ukatsti inti jalsu tuqir uñtasin amsta tuqinkir Bet-horón chiqakam saräna, ⁶ uka chiqatsti Mediterráneo jach’a qutakama. Amsta tuqinxa Micmetat uraqïnwa, uka chiqat qurpax inti jalsu tuqir saraskakïnwa, Taanat-siló chiqakama, Janóah chiqa sarakipasa. ⁷ Ukatxa Atarot, Naará chiqa saraqäna, Jericó marka chiqa sarakipasa, Jordán jawiraruw tukuyäna. ⁸ Tapúah chiqatxa qurpax inti jalanta tuqiruw saraskakïna, Caná uma jalsur puriñkama, ukatsti Mediterráneo jach’a qutaruw tukuyañkama. Uka uraqinakaw Efraín ayllurux wakt’äna, uksti wila masi tamanakaparakiw jaljasipxäna. ⁹ Ukhamarus Manasés ayllun uraqip taypin mä qawqha markanakampi, jisk’a markanakampiw utjäna, ukanakasti Efraín ayllurux wakt’arakïnwa. ¹⁰ Ukampis Efraín ayllunkirinakax janiw kawkïr cananeo jaqinakatix Guézer uraqin jakapkän uka jaqinakarux uka chiqat jaqunukupkänti, jan ukasti jupanak taypin jakayapxäna, qullqinak churañapatak wayt’apkchïna ukasa. Jichhürkamaw cananeo jaqinakax ukan jakasipki.

¹ Kawkïr uraqinaktix Josean jilïr yuqapa Manasés ayllux katuqkäna uka uraqinakax akham jaljatänwa: Maquir chachan wila masi tamanakaparux, Moisesax niyaw Jordán jawirat inti jalsu tuqinkir Galaad, Basán uraqinak jupanakar churxatayna. Maquir chachax jan axsaras nuwasir jaqïnwa, jupasti Manasés chachan jilïr yuqapänwa, Galaadankirinakan awkiparakïnwa. ² Manasés chachan maynïr wawanakaparusti wila masi tamanakaparjamaw uraqix wakt’äna: Abiézer, Helec, Asriel, Siquem, Héfer, Semidá uka chachanakaru, jupanakax Manasés chachan wawanakapänwa, Josean allchhinakaparakïnwa. ³ Ukampis Maquir chachan Selofhad sat allchhiparux janiw uraqix churatäkataynati, jupan jan yuqall wawanakanïtap layku. Jan ukasti phisqa imill wawapakiw utjäna: Mahlá, Noá, Hoglá, Milcá, Tirsá satäpxänwa. ⁴ Uka imill wawanakasti Eleazar profetan ukaru, Josué chachan ukaru, markan jilïri jaqinakapan ukaruw sarapxäna, jupanakarusti sapxänwa: “Tatitux Moisesaruw sawayäna wila masinakaxaru, ukhamarak nanakar uraq churañapataki” sasa. Josué chachasti jupanakan mayitaparux uraqinak churäna, wila masinakap taypina, kunjämtix Tatitux siskatayna ukhamarjam phuqhasa. ⁵ Ukhamat Manasés ayllux tunka chiqanakan uraqinak katuqäna, ukhamarak Jordán jawirat inti jalsu tuqinkki uka Galaad, Basán uraqinaka, ⁶ Manasés chachan imill wawanakapax, yuqall wawanakjamarakiw uraqinak katuqapxäna. Galaad uraqisti Manasés chachan maynïr wawanakapatakïnwa. ⁷ Manasés ayllun uraqinakapax Aser ayllumpi qurpäki uka chiqata, Micmetat chiqakamänwa, Siquem markat inti jalsu tuqina, uka chiqatsti aynach tuqiruw saraskakïna, Tapúah sat uma jalsukama. ⁸ Tapúah uraqix Manasés aylluru wakt’kchïna ukasa, ukampis qurpa jak’ankki uka Tapúah markax Efraín ayllur churatänwa. ⁹ Uka chiqatsti aynach qurpax inti jalanta tuqiruw saraskakïna Caná uma jalsu chiqanjama, Mediterráneo jach’a qutakama. Manasesan uraqinakapat jilpachax Caná uma jalsut amsta tuqinkänwa, ukampis uka uma jalsut aynach tuqir wakt’käna uka uraqinakan utjir mä qawqha markanakax Efraín ayllunkänwa. ¹⁰ Efraín ayllun uraqipax uma jalsut aynach tuqinkänwa, Manasés ayllux amsta tuqinkarakïnwa, qurpasti amsta tuqirux Mediterráneo jach’a qutampi, Aser ayllun uraqinakapampi, inti jalsu tuqirusti Isacar ayllumpiraki. ¹¹ Uka ayllunakan uraqinakapan taypinxa walja markanaka jisk’a markanakamp kunaw utjarakïna, ukanakasti Manasés ayllunkirïnwa. Uka markanakasti: Bet-seán, Ibleam, Dor, Endor, Taanac, Meguido ukanakänwa. Dor markax quta iranankir markawa. ¹² Ukampis Manasés ayllun wawanakapax janiw uka markanak katuntirjamäpkänti, cananeo jaqinakan jan mistuñ munapxatap layku, ukat uka pachpan jakasipki. ¹³ Uka qhipatsti, kunapachatix israelitanakax wali ch’amani tukxapxän ukkhaxa, cananeo jaqinakarux qullqi churasin phuqhapxañapatakiw wayt’äna, ukampis janiw uka uraqit jaqunukupkänti. ¹⁴ Josean wawanakapax Josué chacharux sapxänwa: —¿Kunatarak nanakarusti mä jisk’a uraqik suertet churapxistasti? Nanakax waljanïpxtwa, Tatitusti nanakarux askinak churapxitu —sasa. ¹⁵ Josué chachasti jupanakarux sänwa: —Niyakixay jumanakax waljanïpxstaxa, Efraín qullunakapas jumanakatakix jisk’akirakïchixa, ukhamax ch’umi uraqir sarapxam, ukatsti ferezeo jaqinakana, refaita jaqinakan uraqinakap pampachjapxam —sasa. ¹⁶ Jupanakasti sapxänwa: —Chiqpachansa uka qullunakax nanakatakix wali pisiwa. Ukampis pampan jakapki uka cananeo jaqinakan carronakapax hierrot luratawa, Bet-seán markana, jisk’a markanakapampin jakir jaqinakanjama, ukhamarak Jezreel qhirwan jakapki ukanakansa —sasa. ¹⁷ Josué chachasti Joseat saraqir wawanakapa Efraín, Manasés ayllunkirinakarux sänwa: —Jumanakax waljanïpxtawa, wali ch’amanïpxaraktawa, janiw jumanakarux mä t’aqa uraqiki wakt’apkätamti, ¹⁸ jan ukasti, uka ch’umintat qullunakax jumanakankarakiniwa, jumanakax uka ch’uminak katuntasipxäta. Cananeo jaqinakarusti jumanakax uka chiqat jaqunukupxäta, qawqha ch’amanïsipkpansa, hierrot lurat carronakanïsipkpansa —sasa.

¹ Israel markax taqiniw Siló chiqan tantachasipxäna, uka chiqan Tatitump Jikisiñ Carpa sayt’ayañataki, ukapachatakix uraqix niyaw katuntatäxäna, ² ukampis israelitanakat paqallqu ayllunakaruw uraqix janïr churatäkänti. ³ Ukat Josué chachax israelitanakarux säna: “¿Kunapachkamarak jumanakasti suyapxäta, nayra awkinakaman Tatitu Diosapax churapktam uka uraq katuntasiñatakisti? ⁴ Jichhax sapa ayllut kimsa chachanak ajllipxam, ukatsti nayaw jupanakar khithä taqi uka uraqinak uñjir sarapxañapataki, ukatsti kunjämas uka uraqinakax uk yatiyapxitani, ukhamat uka uraqinak lakinuqasipxañamataki. ⁵ Uka chachanakasti uka uraqinak paqallquruw jaljapxani, Judá ayllun uraqipax aynach tuqir uñacht’ayatäniwa, Joseat saraqir wawanakaparusti uraqix amsta tuqir uñacht’ayatarakïniwa. ⁶ Uka uraqinak paqallqu chiqar jaljasinsti, kunjämätaynas uk yatiyapxitani, ukatsti nayax Tatit nayraqatan lakinuqapxäma. ⁷ Levitanakarux janiw kuna uraqis wakt’kaniti, jupanakarux Tatit nayraqatan sacerdote luräwinaka phuqhañaw wakt’i. Ukatsipana, Gad, Rubén ayllunkirinaka, ukhamarak Manasés ayllunkirinakan chikat jaqipax, Jordán jawirat inti jalsu tuqiruw uraqinak katuqxapxi, uka uraqinaksti Tatitun luqtiripa Moisesaw jupanakarux churxi” sasa. ⁸ Kawkïr jaqinakatix uka uraqinak uñjanipxañapataki, ukatsti ukxat yatiyapxañapataki ajllitäkän ukanakax, jank’akiw sarxarupxäna, Josué chachasti jupanakarux sänwa: “Sarapxam, taqi uka uraqinak uñjanisin jalanuqanipxam, ukatsti tukt’ayasin mäkiw kuttanipxäta, nayan aka Siló chiqana, suertetkam Tatit nayraqatan wakt’ayañaxataki” sasa. ⁹ Uka jaqinakasti sarasin taqi uka uraqinak uñatatanipxäna, markanakxa paqallq tamaruw jaljapxäna, taqi ukanaksti sum qillqt’anipxäna, ukatsti Siló campamentoruw kuttanxapxäna, Josué chachar yatiyañataki. ¹⁰ Ukatsti Josué chachax, Siló chiqan israelitanakarux Tatit nayraqatan uka uraqinak lakinuqäna, suertetkam wakt’ayasa. ¹¹ Niyaki suerte jaqtatatsti, Benjamín ayllun wila masi tamanakapatakix, uraqinakax Judá, José ayllunakan uraqinakap taypiruw wakt’äna. ¹² Uka uraqin qurpapax amsta tuqit Jordán jawirat qalltäna, ukatsti Jericó marka amsta tuqi makhatäna, ukatsti inti jalanta tuqiruw saraskakïna qullu tuqinjama, Bet-avén sat wasarkama. ¹³ Uka chiqatsti Betelat aynach tuqinkki uka qullukamaw purïna, ukatsti Atarot-adar aynachkamaw saraqäna, Bet-horón aynach tuqin qullunakäki ukkhakama. ¹⁴ Ukxarusti qurpax aynach tuqiru Mediterráneo jach’a quta tuqiruw kuttäna, Bet-horón uñkatasinkki uka qullu aynach iram tuqi, ukat Quiriat-jearim chiqar puriñkama. Ukasti inti jalanta tuqin utjir qurpänwa. ¹⁵ Aynacha tuqinkir qurpasti Quiriat-jearim thiyat qalltanïna, ukatsti inti jalanta tuqiruw saraskakïna Neftóah uma jalsur puriñkama, ¹⁶ ukatsti qullu aynachkamaw saraqäna, Refaim qhirwat amsta tuqiru, kawkintix Ben-hinom qhirwax qalltki ukkhana. Ukatsti uka qhirwanjam saraqaskakïna, Jebús chiqat aynach tuqina, En-roguel sat uma jalsukama. ¹⁷ Ukxarusti amsta tuqiruw kuttäna, En-semes chiqakama, ukawjatsti Guelilot chiqakamaw purïna, ukax Adumim amsta uñkatasinkiwa, uka chiqatsti Rubén chachan Bohan yuqapan qarqapkamaw saraqäna; ¹⁸ ukatsti Jordán qhirwa uñkatasinkki uka qullunak chiqaw sarakipäna, uka chiqatsti, qhirwaruw saraqäna, ¹⁹ Bet-hoglá amsta tuqinjam saräna, ukatsti kawki chiqarutix Jordán jawirax mistki ukawjaruw tukuyäna, Mar Muerto qutat amsta tuqiru. Ukaw aynach tuqit qurpänxa. ²⁰ Jordán jawiraw inti jalsu tuqit qurpänxa. Ukanakaw Benjamín aylluru churatäkän uka uraqinakan qurpanakapaxa. ²¹ Kawkïr markanakatix Benjamín ayllunkir wila masi tamanakapar wakt’käna ukanakax akanakänwa: Jericó, Bet-hoglá, Émec-quesís, ²² Bet-arabá, Semaraim, Betel, ²³ Avim, Pará, Ofrá, ²⁴ Quefar-haamoní, Ofní, Gueba uka markanaka, taqpachax tunka payan markanakänwa, jisk’a markanakapamppacha. ²⁵ Ukhamarusa yaqha markanakaw utjarakïna: Gabaón, Ramá, Beerot, ²⁶ Mispá, Quefirá, Mosá, ²⁷ Réquem, Irpeel, Taralá, ²⁸ Selá, Élef, Guibeá, Quiriat, Jebús marka, qhiparusti Jerusalén sutimpi uñt’ata. Taqpachax tunka pusin markanakänwa, jisk’a markanakapamppacha. Uka uraqinakaw Benjamín ayllunkir wila masi tamanakaparux wakt’äna.

¹ Ukatsti payïri uraqix Simeón ayllunkir wila masi tamanakaruw wakt’äna. Uka uraqix Judá ayllun uraqinakap taypinkänwa, ² jupanakarusti aka markanakaw wakt’äna: Beerseba, Sebá, Moladá, ³ Hasar-sual, Balá, Ésem, ⁴ Eltolad, Betul, Hormá, ⁵ Siclag, Bet-marcabot, Hasar-susá, ⁶ Bet-lebaot, Saruhén, uka markanaka, taqpachax tunka kimsan markanakänwa, jisk’a markanakapamppacha. ⁷ Ukhamarusa, En-rimón, Éter, Asán markanakampiw wakt’arakïna, jisk’a markanakapampi kuna, ⁸ uka uraqisti aynach tuqinkir markanakänwa, jisk’a markanakapamp kuna, Ramá markakama, aynach tuqinkir wasarana. Taqi uka uraqinakaw Simeón ayllunkir wila masi tamanakaparux wakt’äna. ⁹ Simeón ayllunkirinakan uraqinakapasti, Judá ayllun uraqinakap taypinkänwa, uka ayllun uraqinakapan wali jach’ätap layku, ukat uka uraqinakatxa mä t’aqa uraqi Simeón ayllunkir wawanakaparu churatarakïnxa. ¹⁰ Kimsïri uraqix Zabulón ayllunkir wila masi tamanakaparuw wakt’äna. Uraqipan qurpapax Sarid chiqakamänwa, ¹¹ uka chiqatsti qurpax inti jalanta tuqiruw saraskakïna Maralá chiqar puriñkama, Dabéset chiqa sarakipasa, ukhamarak Jocneam chiqat inti jalsu tuqinkki uka jisk’a jawirar puriñkama. ¹² Sarid chiqat inti jalsu tuqirusti, qurpax Quislot-tabor chiqakamaw purïna; ukawjatsti Daberat tuqiruw saräna, ukatsti Jafía chiqakamaw makhatäna. ¹³ Inti jalsu tuqir sarasasti, qurpax Gat-héfer chiqaruw purïna, ukatxa Itá-casín tuqi saräna, ukatsti Nea chiqa muytanisax Rimón chiqakamaw purïna. ¹⁴ Amsta tuqitsti, qurpax Hanatón chiqakamaw muytanïna, ukatsti Jefté-el qhirwaruw mistüna. ¹⁵ Uka uraqinsti tunka payan markanakaw utjatayna, jisk’a markanakapampi kuna, ukanak taypinsti: Catat, Nahalal, Simrón, Idalá, Belén uka markanakänwa. ¹⁶ Uka uraqinakawa Zabulón ayllun wila masi tamanakaparux wakt’äna, taqi markanakapampi, jisk’a markanakamppacha. ¹⁷ Pusïri uraqix Isacar ayllunkir wila masi tamanakaparuw wakt’äna. ¹⁸ Kawkïr markanakatix uka uraqinak taypinkkäna ukanakax akanakänwa: Jezreel, Quesulot, Sunem, ¹⁹ Hafaraim, Sihón, Anaharat, ²⁰ Rabit, Quisión, Ebes, ²¹ Rémet, En-ganim, En-hadá, Bet-pasés uka markanaka. ²² Uka uraqin qurpapasti Tabor, Sahasimá, Bet-semes chiqanakkamaw purïna, Jordán jawiraruw tukuyäna; taqpachax tunka suxtan markanakänwa, jisk’a markanakapamppacha. ²³ Uka uraqinakawa Isacar ayllunkir wila masi tamanakaparux wakt’äna, taqi markanakampi, jisk’a markanakapamppacha. ²⁴ Phisqïri uraqix Aser ayllunkir wila masi tamanakaparuw wakt’äna. ²⁵ Jupanakan uraqinakapax akanakänwa: Helcat, Halí, Beten, Acsaf, ²⁶ Alamélec, Amad, Misal uka markanaka, ukatsti inti jalanta tuqirux Carmelo sat qullukama, Sihor-libnat chiqakamarakiw purïna. ²⁷ Inti jalsu tuqitxa, qurpax Helcat chiqat sartasin amsta tuqirux Bet-dagón chiqakamaw saräna, Zabulón ayllun uraqip chiqa sarasinsti, Jefté-el, qhirwa chiqa saräna, Bet-émec, Neiel chiqakama, ukatsti Cabul, ²⁸ Abdón, Ebrón, Rehob, Hamón, Caná chiqa sarakipäna, Sidón jach’a markar puriñkama. ²⁹ Uka chiqatsti qurpax Ramá tuqiruw muytanïna, ukatsti Tiro sat suma uyuchrantat markakamaw purïna, ukatxa Hosá tuqiruw saraskakïna, Mediterráneo jach’a qutar mistuñkama. Uka markanak taypinsti Mahaleb, Aczib, ³⁰ Umá, Afec, Rehob uka markanaka, taqpachax pä tunka payan markanakänwa, jisk’a markanakapamppacha. ³¹ Aka uraqinakaw Aser ayllunkir wila masi tamanakaparux wakt’äna. ³² Suxtïri uraqix Neftalí ayllunkir wila masi tamanakaparuw wakt’äna. ³³ Uraqipax amsta tuqin Hélef markat qalltäna, Saanamim jak’ankir jach’a quqa chiqa sarakipasa, Adamí-néqueb, Jabneel uka markanak chiqa saräna, Lacum chiqakama, ukatsti Jordán jawirar puriñkama. ³⁴ Aynach tuqi qurpax Jordán jawirat qalltäna; ukatsti inti jalanta tuqit Aznot-tabor markakamaw purïna, ukawjatsti amsta tuqiruw muytäna, Zabulón ayllun qurpapanjam saraskakïna, Hucoc markar puriñkama. Ukatxa saraskakïnwa, inti jalanta tuqirusti, qurpapax Aser ayllun uraqipampiw qurpasïna, inti jalsu tuqirusti Jordán jawirampiraki. ³⁵ Suma uyuchrantat markanakatxa, akanakaw wakt’äna: Sidim, Ser, Hamat, Racat, Quinéret, ³⁶ Adamá, Ramá, Hasor, ³⁷ Quedes, Edrei, En-hasor, ³⁸ Irón, Migdal-el, Horem, Bet-anat, Bet-semes uka markanaka, taqpachax tunka llätunkan markanakänwa, jisk’a markanakamppacha. ³⁹ Uka uraqinakaw Neftalí ayllunkir wila masi tamanakaparux wakt’äna, taqi jach’a markanakampi, jisk’a markanakapamppacha. ⁴⁰ Paqallqüri uraqix Dan ayllunkir wila masi tamanakaparuw wakt’äna. ⁴¹ Aka uraqinsti Sorá, Estaol, Ir-semes, ⁴² Saalbim, Aialón, Jetlá, ⁴³ Elón, Timnat, Ecrón, ⁴⁴ Eltequé, Guibetón, Baalat, ⁴⁵ Jehúd, Bené-berac, Gat-rimón, ⁴⁶ Mejarcón, Racón markanakaw ukankäna, Jope marka uñkatasinkki uka uraqimppacha. ⁴⁷ Ukampis uka uraqinakan jupanakatak pisïtap laykux, Dan ayllunkirinakax Lésem markaruw nuwantiri sarapxäna, uka markan jakir jaqinakar taqiniru jiwarayasinsti uka marka katuntasipxäna, ukhamat uka markan utjantasipxäna, uka markan sutipsa jaqukipapxänwa, Dan sutimpi uchasa, nayra awkipat amtasina. ⁴⁸ Uka uraqinakaw Dan ayllunkir wila masi tamanakaparux wakt’äna, taqi markanakampi, jisk’a markanakapamppacha. ⁴⁹ Israelitanakax sapaqat ayllur uraqinak lakinuqañ tukuyxapxän ukkhasti, Josué chacharuw uraqipa churxapxarakïna, jupanakan uraqinakap taypiru. ⁵⁰ Kunjämtix Tatitux siskatayna ukhamarjamaw, Josué chacharux Timnat-sérah marka churapxäna, Efraín ayllun qullunakap tuqiru, Josué chachaw uka uraqi mayitayna. Josué chachasti uka marka wasitat sayt’ayäna, ukan jakasxarakïna. ⁵¹ Taqi uka uraqinak Eleazar sacerdotempi, Josué chachampi, markan jilïr jaqinakapampix Siló chiqan suertetkam israelitanakan ayllunakaparux churäna, Dios nayraqatana, Tatitump Jikisiñ Carpa mantañana. Ukhamaw uraqinak lakinuqañax tukuyatäxäna.

¹ Tatitux Josué chacharux sänwa: ² “Israelit jaqinakampi parlam, ukatsti imantasiñ markanak chhijllasipxam sarakim, kunjämatix nayax Moisés tuqi iwxawaykäyäta ukarjama. ³ Maynitix masipar jan amtañampi jiwayaspa ukaxa, uka markanakaruw imantasiñatak jaltxaspa, ukhamat jiwatan wila masinakapan jan phuqsusiskañapataki. ⁴ Khititix uka markanakat kawkïrirusa imantasiñ munkani ukaxa, marka mantañar purisax jilïr jaqinakan nayraqatapan arsusiñapa. Ukat jupanakax uka markar mantayapxani, jakañatakisti mä chiqawja churapxarakini. ⁵ Jiwatan jak’a wila masipatix arktanini ukaxa, markan jilïr jaqinakapax janiw imantasiri jaqirux katuyapkaniti, jupan masipar jan amtañampi, janiraki uñisiñat jiwayatap layku. ⁶ Ukampis imantasir jaqix markar qhiparañapax wakisiniwa, taqi markachir nayraqatan taripatäñkama, jan ukax, taripir jilïr sacerdoten jiwañapkama. Uka qhipat imantasir jaqix utaparu kuttawayxani, kawkha markattix jaltanki uka markaparusa” sasa. ⁷ Ukhamasti israelitanakax imantasiñatakix aknïr markanak ajllipxäna: Quedes marka, Galilea uraqina, Neftalí ayllun qullunakapana. Siquem marka, Efraín ayllun qullunakapana. Hebrón marka, Judá ayllun qullunakapana. ⁸ Béser marka, Rubén ayllun qullu pampanakapana, Jericó markat inti jalsu tuqina, Jordán jawira khurkatana. Ramot marka, Gad ayllun uraqipana, Galaad chiqana. Golán marka, Manasés ayllun uraqipana, Basán chiqana. ⁹ Uka markanakaw ajllitäna taqi israelitanakan imantasiñapataki, ukhamarak yaqha markat jutir jaqinakatakisa. Uka markanakansti kawkïr jaqitix masiparux jan amtañampi jiwaykaspa jupanakan imantasiñapatakïnwa, ukhamat jiwirin jak’a wila masipax phuqsusiñ amtampi jan jiwayaskañapataki, markankir jaqinakan janïr taripatäkipana.

¹ Levitanakan wila masinakapan jilïri irpirinakapax Canaán uraqinkir Siló chiqaruw sarapxäna, Eleazar sacerdotempi, Josué chachampi, Israelan ayllunakapankir jilïrinakapampi parlañataki. Ukansti jupanakarux sapxänwa: “Tatitux Moisés tuqiw arsüna, nanakan jakasiñanakaxatak markanak churañapataki, ukhamarak suma ch’iji uraqinaka uywanakaxa awatisiñataki” sasa. ³ Ukat israelitanakax levitanakaru jupanakan markanakapa, ukhamarak uywanak awatisiñ uraqinak churapxäna, kunjämtix Tatitux siskäna ukhamar phuqhasa. ⁴ Nayraqatax Quehat chachat saraqir levitanakaruw wakt’äna. Aarón sacerdotet saraqir quehatita wawanakapatakix tunka kimsan markanakaw, Judá, Simeón, Benjamín ayllun uraqinakap taypina wakt’äna. ⁵ Maynïri quehatita jaqinakarusti tunka markanakaw wakt’äna, ukanakasti Efraín, Dan uraqinakap taypinkänwa, ukhamarak Manasés ayllunkir chikat jaqipan uraqinakapana. ⁶ Ukxarusti, Guersón chachat saraqir wila masi tamanakarux, tunka kimsan markanakaw wakt’äna, ukanakasti: Isacar, Aser, Neftalí uraqinakap taypinkänwa, ukhamarak Manasés ayllunkir maynïr chikat jaqipan uraqipana, kawkïritix Basán chiqankki uka. ⁷ Ukatsti Merarí chachat saraqir levitanakan wawanakapatakix tunka payan markanakaw wakt’äna, ukanakasti Rubén, Gad, Zabulón, ayllun uraqinakap taypinkänwa. ⁸ Ukhamaw israelit jaqinakax suertetkam levitanakarux markanaka, ukhamarak uywa awatiñ uraqinak lakinuqapxäna, kunjämtix Tatitux Moisesar siskatayna ukarjama. ⁹ Kawkïr markanakatix aytatäkani ukanakax Judá, Simeón ayllunakaw churapxäna, ¹⁰ ukanakasti Aarón chachat saraqir Quehat wila masinkir levitanakaruw nayraqatax suertet wakt’äna. ¹¹ Judá uraqin qullunakapanxa Arbá marka churapxäna, Hebrón sutinïkaraki uka marka, Arbá chachax Anac jach’a tansa jaqin awkipänwa, jupanakarusti uywanak awatiñ uraqinakamp churapxarakïna. ¹² Ukampis Hebrón marka thiyanakan utjir uraqinakampi, jisk’a markanakampix janiw levitanakaru churatäkänti, ukanakasti Jefuné chachan Caleb yuqaparu churatäxatap layku. ¹³ Hebrón markax imantasiñ markänwa, jan amtañampi jiwayapki uka jaqinakataki, uka markat yaqhanakampsti, aknïr markanakampi Aarón sacerdoten wawanakaparux churapxäna: Libná, ¹⁴ Jatir, Estemoa, ¹⁵ Holón, Debir, ¹⁶ Ain, Jutá, Bet-semes uka markanaka. Uka llätunka markanakax uywa awatiñ uraqinakanïnwa. ¹⁷ Benjamín ayllunkir uraqinakapansti pusi markanak churapxäna: Gabaón, Gueba, ¹⁸ Anatot, Almón, uywa awatiñ uraqinakapamppacha, ¹⁹ ukhamasti Aarón sacerdoten wawanakapan markanakapax, taqpachax tunka kimsanïnwa, uywa awatiñ uraqinakapamppacha. ²⁰ Quehat chachat saraqir mayni levitanakarux, pusi markanakaw wakt’äna, uka markanakasti Efraín ayllunkir uraqinakap taypinkänwa. ²¹ Uka markanakat maynïrix Siquem markawa, ukasti Efraín qullunakankänwa, imantasiñ markarakïnwa, khititix maynir jiwaykaspa ukataki, maynïr markanakasti: Guézer, ²² Quibsaim, Bet-horón markanakawa, uywa awatiñ uraqinakapamppacha. ²³ Dan ayllunkir uraqinakansti pusi markanakaw wakt’äna: Eltequé, Guibetón, ²⁴ Aialón, Gat-rimón markanaka, uywa awatiñ uraqinakapamppacha; ²⁵ Manasés ayllunkirit chikat jaqipan uraqipatsti pä markanakaw wakt’äna: Taanac, Gat-rimón markanaka, uywa awatiñ uraqinakapamppacha; ²⁶ ukhamasti uka quehatita sat wila masi tamanakan markanakapax, taqpachax tunkänwa, sapa markas uywa awatiñ uraqinakapamppacha. ²⁷ Guersón chachat saraqir levitanakarux pä marka churapxäna, uka markanakasti Manasés ayllunkirin chikat jaqipan uraqinakapankänwa, uywa awatiñ uraqinakapamppacha. Basán chiqanxa, Beeterá, Golán markanak katuqapxäna, ukanakasti imantasiñ markanakänwa. ²⁸ Isacar ayllunkir wila masi tamanakapan uraqinakapatsti, pusi markanak katuqapxäna: Quisión, Daberat, ²⁹ Jarmut, En-ganim uka markanaka, uywa awatiñ uraqinakapamppacha. ³⁰ Aser ayllunkir uraqinakapatsti pusi markanak katuqapxäna: Misael, Abdón, ³¹ Helcat, Rehob markanaka, uywa awatiñ uraqinakapamppacha. ³² Neftalí ayllunkir uraqinakapatsti kimsa markanaka katuqapxäna: Hamot-dor, Cartán markanaka, ukhamarak Galileankir Quedes markampi, uywa awatiñ uraqinakapamppacha; ³³ Guersón ayllunkir wila masi tamanakaru churat markanakax taqpachax, tunka kimsanïnwa, sapaqat markas uywa awatiñ uraqinakapamppacha. ³⁴ Kawkïri wila masi tamanakatix Leví ayllunkirit jilt’apkäna, uka Merarí chachat saraqir wawanakaparusti, Zabulón ayllun uraqinakap taypin pusi markanakaw wakt’äna: Jocneam, Carta, ³⁵ Dimná, Nahalal markanak, sapaqat markas uywa awatiñ uraqinakapamppacha. ³⁶ Rubén ayllunkir uraqinakapatsti, pusi markanakaw wakt’äna: Béser, Jahas, ³⁷ Cademot, Mefáat uka markanaka, uywa awatiñ uraqinakapamppacha. ³⁸ Gad ayllunkir uraqitsti pusi markanakaw wakt’arakïna: Mahanaim, Hesbón, Jazer markanaka, ukhamarak Galaad uraqinkir Ramot markampi, ukasti imantasiñ markänwa, sapaqat markas uywa awatiñ uraqinakapamppacha. ⁴⁰ Ukhamasti Merarí wila masi tamankiri levitanakarux, tunka payan markanakaw taqpachax wakt’äna. ⁴¹ Israelitanakan uraqinakap taypin utjiri levita markanakax, taqpachax pusi tunka kimsaqallqunïnwa, sapaqat markas uywa awatiñ uraqinakapamppacha, ⁴² uka uraqinakasti sapaqat marka muytpachankänwa. ⁴³ Ukhamawa Tatitux Israel markaru taqi uka uraqinak churäna, kunjämtix nayra awkinakapar juramentompi arskatayna ukhamar phuqhasa, jupanakasti uka uraqinakan utjnuqtasipxäna, ukan jakasipxarakïna. ⁴⁴ Tatitux arsutaparuw phuqhäna, ukatsti israelitanakaru taqi uka uraqpachan sumankañ churäna. Uñisirinakapax janiw jupanakarux saykatirjamäkänti, Tatituw uka uñisirinakarux atipjäna. ⁴⁵ Kuntix Tatitux israelitanakar arsuwaykäna uka arunakax taqipuniw phuqhasïna.

¹ Uraqinak lakinuqasinsti, Josué chachax Rubén, Gad, ukhamarak Manasés ayllun chikat jaqiparuw jawsayäna, ² jupanakarusti sänwa: “Jumanakax kuntix Tatitun luqtiripa Moisesax sawayapktam ukarux phuqhapxtawa, nayan arsutanakaxarusa taqi jaysapxaraktaxa. ³ Janiw jumanakax taqi uka urunakana, jichhürkamas jilanakamarux jaytanukupktati, ukatsti Tatitu Diosaman kamachi arunakaparux, taqi iyawsañ chuymampirakiw phuqhapxtaxa. ⁴ Diosax arsutapar phuqhiwa, jilanakamas samarañ jikxatapxaraki, ukhamasti, utanakamar sarxapxam, kawkïr uraqtix Tatitun luqtiripa Moisesax Jordán jawirat inti jalsu tuqir churapktam uka uraqir kuttxapxam. ⁵ Ukampis jan armasipxamti, jumanakax taqi iyawsañ chuymampipuni Tatitun kamachiparusa, arsutanakaparusa phuqhapxam, kunjämtix Diosan luqtiripa Moisesax sapktam ukhamarjama, jumanakax Tatit Diosamarux taqi chuymamp munapxam, jupan chiqa thakhipanjam sarnaqapxam, arunakaparus jaysapxam, taqi munasiñ chuymampi, taqi amuyumpi arkasa jupar luqtapxam” sasa. ⁶ Uka qhipatsti, Josué chachax jupanakarux aski waxt’äwinak churasaw khithanukxäna, ukatsti jupanakax utanakaparuw sarxapxäna. ⁷ Moisesax, Manasés chachan ayllupankir maynïr chikat jaqiparux, Basán chiqankki uka uraqi churxatayna. Maynïr chikat jaqiparusti, Josué chachax israelit jilanakapan uraqip taypiruw uraqinak churäna, Jordán jawira inti jalanta tuqiru, ukat jupax nayrïr tamarux askinak churasin khithanukxäna. ⁸ Jupanakarusti sänwa: “Jichhax jumanakax uraqinakamarux, kuntix uñisirinakamat aparapkta uka walja yänakani, walja uywanakani, qurini, qullqini, bronceni, hierroni, walja isinakaniw kuttxapxtaxa. Ukanaksti jilanakamampiw jaljasipxäta” sasa. ⁹ Ukhamaw Rubén, Gad ayllunkirinaka, ukhamarak Manasés ayllunkir chikat jaqinakapax Siló chiqan maynïr israelitanakat t’aqaqtawayxapxäna, Canaán uraqina, Galaad chiqankki uka uraqinakapar kuttxañataki, kawkhantix uraqinakapax utjäna uka chiqaru, kunjämtix Tatitux Moisés tuqi arskatayna ukhamarjama. ¹⁰ Kunapachatix Rubén, Gad, ukhamarak Manasés ayllunkir chikat jaqinakapax Jordán jawirar puripkän ukkhaxa, Canaán uraqinkkasin, jawir thiyar mä jach’a altar lurapxäna. ¹¹ Maynïr israelitanakarusti yatiyapxänwa Rubén, Gad, Manasés ayllunkir chikat jaqinakapax mä altar Canaán uraqi qurpana, Jordán jawir jak’ana, israelita uraqin lurapxatapa; ¹² uk yatisasti, israelitanakax Siló chiqan tantacht’asipxäna jupanakampi nuwasir sarañataki. ¹³ Nayraqatasti Eleazar sacerdoten Finees yuqaparuw Galaad uraqir sarañapataki khithapxäna, kawkintixa Rubén, Gad, ukhamarak Manasés ayllunkir chikat jaqinakapax ukankapkäna ukaru. ¹⁴ Jupamp chikasti israelitanakan tunka aytat jilïrinakapaw sarapxäna, jupanakat sapa maynix, wila masi tamanakapan jilïripänwa. ¹⁵ Galaad chiqaru purisinsti, jupanakarux sapxänwa: ¹⁶ —Nanakax Tatitun markapan sutipxaruw arsupxta. ¿Kunatarak jumanakasti Israelan Diosapar ch’uxña lurapxtasti? ¿Kunatarak Tatitur apanukupxta, yaqha altar lurasa jupataki sayt’asipxtasti? ¹⁷ ¿Janit Peor chiqan jucha luratanakas layku Tatitun mutuyäwipa katuqatasa amtasipktasti? Uka jucha luratat janïraw jichhürkam q’umachatäktanti. ¹⁸ ¿Kunat juk’ampsa munasipkakta, jichhas jumanakan Tatitut saraqtapxañamatakixa? Jumanakatix jichhüru Tatitutaki sayt’asipxäta ukaxa, qharürux jupax taqpach Israel markatakix q’apisirakiniwa. ¹⁹ Kawkïr uraqinaktix jumanakar wakt’apktam ukatix jan askïkchi ukaxa, Tatitun uraqipar jutapxam, kawkhantix Tatitumpi Jikisiñ utapax jikxataski ukawjaru, nanakan uraqinakax taypin mä chiqa katusipxarakim. Ukampis Tatitun altarap utjkipan, yaqha altar lurasax jan Tatiturux saykatapxamti, janirak nanakatakisa sayt’asipxamti. ²⁰ Zérah chachan Acán sat wawapat amtasipxam, jupax kunatix t’unjañat katuyatäkän ukanak katuntasisaw juchachasïna, jupan juchap laykuw Tatitux Israel markpachatakix q’apisïna. ¡Janirakiw jupa sapakis juchap laykux jiwkänti! —sasa. ²¹ Ukat Rubén, Gad, ukhamarak Manasés ayllunkir chikat jaqinakapax Israel markan jilïrinakapar sapxäna: ²² —Diosanakansa Diosapa Tatituw nanakar yatipxitu, aka altar lurapkta ukax janiw jupar saykatañatakïkiti janirakiw jupat armasiñatakïkisa. Tatituw yati, Israel markax yatirakpan; janitix ukhamäkchi ukax, ¡jichhpach jiwarayapxitpan! ²³ Nanakatix Tatitut jithiqtañatak mä altar lurapxstxa, jan ukax nakt’at waxt’äwinaka, waña juyranakat waxt’äwinaka, sumthapiñatak wilañcha luqtañatakïchi ukaxa, pachpa Tatituy nanakarux luräwinakaxat wayt’apxitpan. ²⁴ Chiqpachansa nanakax aka altar lurapxtwa qhipürun wawanakamax, nanakan wawanakaxaru jan saskañapataki: “¿Kuna lurañamaraki jumanakan utji, Israelan Tatitu Diosapampisti? ²⁵ Tatituw Jordán jawir mä qurpat uskuwayi Rubén, Gad ayllunkapkta ukanakata yaqha jakañataki, janiw jumanakan kuna lurañamas Tatitumpix utjkiti” sasa. Ukhamat wawanakamax juchanïspa wawanakaxan Tatitur jan axsartatapata. ²⁶ Ukat nanakax akan mä altar lurañaru uchasipxta, janiw kun nakt’ayañataki, uywanak Tatitur luqtañatakïkisa, janirakiw yaqha wilañchanak luqtañatakïkisa, ²⁷ jan ukasti, nanakampita, jumanakampita, ukhamarak jiwasat saraqir wawanakat qhanañchirïñapatakiwa, ukhamat jiwasax mayacht’ata Tatitur luqtañasataki, jupa nayraqatan nakt’at waxt’äwinakasampi, jucha luräwinakata, sumankthapiñ wilañchanakasampi uñstañataki. Ukhamat jumanakat saraqir wawanakamax, nanakan wawanakaxar jan sapkaniti: “Janiw jumanakan kuna lurañamas Tatitumpix utjkiti” sasa. ²⁸ Khititix nanakaru, jan ukax, wawanakaxarusa ukham sapxitaspa ukkhaxa, nanakax jupanakarux sapxiristwa: “Uñtapxam, nayra awkinakasaw aka altar Tatitutaki lurapxäna, janiw nakt’at waxt’äwinaka, wilañchanak luqtañatakïkiti, jan ukasti, nanakampita jumanakampita amtasiñataki mä uñacht’äwiwa” sasa. ²⁹ Tatitutak sayt’añ amuyusa, jupat saraqañ amuyusa nanakat jayankpan, janiw Tatitu Diosasan altarapat yaqha altara lurañax wakiskiti; nakt’at waxt’äwinaka, wilañchanak luqtañataki. Tatitu Diosasan altarapax, jupampi Jikisiñ Carpa nayraqatankiwa. ³⁰ Kunapachatix Finees sacerdotempi, uka tunka jilïr jaqinakampix uk qhanañchir ist’apkäna ukkhaxa, “walikiw” sapxänwa. ³¹ Ukat Finees sacerdotex jupanakar säna: —Jichhasti yattanwa, Tatitun jiwasanak taypinkaskatapa; jumanakax janirakiw Tatitutak sayt’asiñ amtapkatätati, ukhamat jichhax Tatitun mutuyäwipat Israel markax qhispita uñjasi —sasa. ³² Ukanak qhipatsti, Finees sacerdotex, jupamp chika saririnakasa, jupanakar jaytasin Galaad chiqat Canaán uraqiruw kuttanxapxäna, kawkhankapkäntix israelitanakax ukkharu. Kunapachatix Canaán chiqankir israelitanakar taqi ukanak yatiyapxän ukkhaxa, ³³ israelit jaqinakax “walikiw” sapxänwa, ukatsti Tatituruw yupaychxapxäna. Ukat uksarusti, jupanakax Rubén, Gad ayllunakar katuntañat janiw juk’ampsa parlkxapxänti, janirakiw uraqinakap tukjañatsa. ³⁴ Rubén, Gad ayllunkirinakan wawanakapax uka altararux: “Amtasïwi” sasaw sutichapxäna, akham sasa: “Aka altarasti jiwasanakarux Diosax mä sapa Diosätapa amtayistani” sasa.

¹ Walja maranakaw sarakipxäna, kunapachatix Diosax Israel markaru uñisirinakapat samarañ churäna ukatxa, Josué chachasti wali chuymanïxarakïnwa, ² ukat jupax taqi Israelitanakaru, chuyman jaqinakaru, jilïrinakaru, taripirinakaru, jilïr irpirinakaruw jawsayäna, jupanakarusti sänwa: “Nayax sinti awkïxtwa, walja maranïxaraktwa. ³ Jumanakax uñjapxtawa, kunjämtix Tatitux uñisirinakamaru lurki ukxa, jupa kipkarakiw jumanakat arxatasa nuwasïna. ⁴ Nayasti sapaqat aylluruw taqi aka uraqinak kunjämarutix wakt’apktam ukhamarjam lakintapxsma. Janiw katuntat uraqinakakti lakintapksma, jan ukasti, kawkïr uraqinakatix jan katuntatäki ukanakamppach lakintapxaraksma, inti jalsu tuqit Jordán jawirat qalltasa, inti jalanta tuqirusti Mediterráneo sat jach’a qutakama. ⁵ Tatituw uka uraqinakan jakirinakarux jaqunukuskani, ukatsti jumanakaw katuntapxäta kunjämtix Tatitux arsuwayki ukhamar phuqhasa. ⁶ “Moisesan kamachipan qillqatäki uka arunakar phuqhañatak chamañcht’asipxam; uka arunakat janirak ch’iqa tuqirusa, kupi tuqirus saranukupxamti. ⁷ Jumanak taypin jakapki uka yaqha markankir jaqinakampix janipun chikachasipxamti, janiraki diosanakaparus yupaychapxamti, jaysapxamsa; sutinakapsa janipun aytasipxamti, jupanak laykus juramento lurapxamti. ⁸ Tatitu Diosamarupun arkapxam, kunjämtix jichhakam arkasipkta ukhama. ⁹ Tatitux ch’aman jach’a markanakaruw jumanak nayraqatat jaqunuku, jichhürkamasti janiw khitis jumanakar saykatapktamti. ¹⁰ Jumanakat maynikiw waranqa jaqinakarux jaltayaspa, Tatitu Diosamax jumanakat arxatasin nuwasitap layku, kunjämtix jupa kipka arsuwayki ukarjama. ¹¹ Jumanak pachpat amuyasipxam, Tatitu Diosamarusti munasipxam. ¹² Nayax jumanakan yatipxañam munta: jumanakatix Tatitut armasipxäta, ukatsti jumanak taypin qhiparki uka jaqinakampi chikachasipxäta, jupanakampis jaqichasipxarakïta ukaxa, Tatitu Diosamax janiw uka markanakarux jumanak nayraqatat jaqunukkaniti, jan ukasti Diosax qänar uñtata, sipitar uñtataw jupanakarux apnaqani, jikhaninakamatakix jawq’añar uñtata, nayranakamatakisti ch’aphir uñtata, jumanakat jan maynis kawkïr uraqtix Tatitux churapktam uka uraqin qhiparapxañamkama. ¹⁴ “Nayax niyaw jiwxä, ukampis nayraqatax muntwa, jumanakan taqi chuymampi, taqi amuyumpi amtasiñanakama, kuna askinaktix Tatitux arsuwayapktam taqi ukanakan taqpacha phuqhasitapa. Janiw mä arsutapas jan phuqhaskiti. ¹⁵ Ukampisa, kunjämtix Tatitux suma arsutanakapar phuqhawayki, ukhamarakiw jupax kunayman jan walt’añanak jumanakxaru apayanini, jumanakat jan maynis aka uraqina, kawkïrtix Tatitux churapktam uka suma uraqin qhiparapxañamkama, ¹⁶ janitix jumanakax kawkïr arust’äwtix Tatitux jumanakampi lurki ukar phuqhapkäta ukapacha. Jumanakatix yaqha diosanakaru yupaychasina jupanakatak alt’asipxäta ukaxa, Tatitusti jumanakatakix q’apisiniwa, ukatsti jank’akiw jupan churat aka suma uraqit chhaqtayapxätam” sasa.

¹ Josué chachax Siquem chiqan Israelan taqi ayllunakaparu tantacht’äna. Jupasti chuyman jaqinakaru, jilïrinakaru, taripirinakaru, jilïr irpirinakaruw jawsäna, ukatsti Tatit nayraqatan ² taqpach Israel markaruw säna: —Israelan Tatitu Diosapax akham siwa: ‘Nayrapachax, jumanakan nayra awkinakama Térah chachax, Abraham, Nacor wawanakapampix Éufrates jawir thiyanakan jakapxäna, jupanakasti yaqha diosanakaruw yupaychapxäna. ³ Nayaw Abrahamarux Éufrates jawir thiyanakat irpsunta, ukatsti Canaán uraqinak chiqa juparux irpanta. Juparusti mä yuqall wawa apayanta, Isaac sutinïnwa, uka yuqall wawat waljaniptayta, ⁴ Isaacarusti pani wawanak churta, Jacob, Esaú sutini. Esaú wawaparusti Seír qullu uraqinak churta, ukampis Jacobumpi wawanakapampix Egipto markaruw sarxapxäna. ⁵ Ukatsti nayax Moisesampiru, Aaronampiruw khitta, egipcionakarusti jan walt’añampiw mutuyta, jumanakar uka uraqit irpsuniñkama. ⁶ Kunapachatix jumanakan nayra awkinakamax Egipto markat mistunipkän ukkhaxa, egipcio jaqinakax nuwasiñ carronakata, caballonakat Mar Rojo qutakam arktanipxäna. ⁷ Jupanakasti nayaruw art’asinipxitu, ukatsti nayaw jupanakampi, egipcio jaqinakampi taypirux ch’amakt’ayta, ukatsti uka quta umampi antutxatasaw jupanakxarux chhaqtayta. Jumanakax kuntix Egipto markan nayax lurkta ukanak sum yatipxtaxa. “ ‘Ukatsti jumanakax walja maranakaw wasaran sarnaqapxtaxa, ⁸ nayarakiw amorreonakan uraqiparux irpanipxsma, Jordán jawirat inti jalsu tuqiru. Jupanakax jumanakampiw nuwasipxäna, ukampis nayaw ch’ama churapxsma jumanakan atipjapxañamataki, ukat jumanakax uraqinakap katuntasipxtaxa. ⁹ Ukatsti Sipor chachan Balac yuqapa, moabitanakan reyipaw jumanakampi nuwasir jutäna. Balac reyix, Beor chachan Balaam yuqaparuw jawsayanïna, jumanakar ñanqhachañapataki. ¹⁰ Ukampis nayax janiw Balaam chachampi jumanakar ñanqhachayapksmati, ukat sipana, jumanakarux jach’añchapxtamwa. Ukhamat nayax jumanakar qhispiyapxsma. ¹¹ Ukatsti jumanakax Jordán jawir makhatasin Jericó markakam purinipxtaxa. Jericó marka jakapkän uka amorreonaka, ferezeonaka, cananeonaka, hititanaka, gergeseonaka, heveonaka, jebuseo jaqinakax, jumanakampiw nuwasipxäna, ukampis nayaw jumanakarux atipt’ayapxsma. ¹² Uka pani amorreo reyinakarux janiw jumanakax espadanakampi, arconakampi atipjapktati, jan ukasti nayaw chuymanakapar jumanak nayraqatan axsarañ uchta, ukat jupanakax jumanakas janïr puripkta ukkhax jaltxapxi. ¹³ Nayaw jumanakarux jan yapuchapkta uka uraqinak churapxsma, janirak sayt’ayapkta uka markanaksa churapxsma. Jichhasti jumanakax ukan jakapxtaxa, ukatsti uvanaka, aceitunanaka manq’apxtaxa, kawkïrinaktix jan yapuchapkta ukanaka’ —sasa. Josué chachasti saskakïnwa: ¹⁴ —Taqi uka luräwinakat Tatitur axsartapxam, ukatsti suma chuymampi, chiqa kankañampirak luqtapxam. Kawkïri yaqha diosanakarutix jumanakan nayra awkinakamax Éufrates jawir thiyanakansa, Egipto markansa yupaychapkän uka diosanak apanukupxam, ukatsti Tatitur luqtapxam. ¹⁵ Ukampis janitix Tatitur yupaychañ munapksta ukaxa, jichhüruy ajllisipxam khitirutix yupaychañ munapkta ukaru: Éufrates jawir thiyanakan nayra awkinakamax yupaychapkäna uka diosanakaruti, jan ukax, aka uraqin jakir amorreo jaqinakan diosanakaparucha. Ukampis nayampi, wila masinakaxampix Tatituruw yupaychapxä —sasa. ¹⁶ Ukatsti markax sänwa: —¡Tatitux jan munkpati, yaqha diosanakar luqtañ layku jiwasan juparu apanukuñasxa! ¹⁷ Tatituw jiwasanakaru, nayra awkinakasarusa Egipto markat irpsunistu, kawkhantix t’aqhisiyata sarnaqkäyätan uka markata. Jupaw jiwasan uñjkata wali jach’a muspharkañanak luri, jupaw thakhinsa jiwasarux imistu arxatarakistu, kunapachatix walja markanak chiqa sarakipankäyätan ukapachaxa. ¹⁸ Juparakiw thakhinjam jutkäyätan ukkhax, jiwasan nayraqatasat uka markanakar jaqunuküna, ukhamarak ukan jakir amorreo jaqinakarusa. Taqi uka luräwinakatsti, nanakax Tatituruw luqtapxarakï, jupakiw nanakan Diosasaxa —sasa. ¹⁹ Ukampis Josué chachax jupanakarux sänwa: —Jumanakax janjaw Tatitur luqtapkasmati, jupax qullana jan kamskaya Diosawa, janiw jumanakan sayt’asitanakamsa, jucha luratanakamsa inak uñjkaniti. ²⁰ Jumanakatix Tatitut armasis yaqha diosanakar luqtapxät ukkhaxa, Tatitux jan walt’añanak apayanipxätam, jumanakar askinak lurkasin t’unjapxarakïtamwa —sasa. ²¹ Israel markasti Josué chacharux sänwa: —Janiw ukax ukhamäkaniti. Nanakax Tatituruw luqtapxä —sasa. ²² Josué chachasti sänwa: —Jumanak pachpaw qhanañchapxtaxa, Tatitur luqtañ ajllisipxatamxa —sasa. Jupanakasti sapxänwa: —Ukhamawa, nanak pachpaw qhanañchapxta —sasa. ²³ Josué chachasti jupanakarux saskakïnwa: —Ukhamasti jumanak taypin utjki uka yaqha diosanak apanukupxam, ukatsti taqi chuymampirak Israelan Tatitu Diosapar arkapxam —sasa. ²⁴ Israel markasti sänwa: —Nanakax Tatitu Diosaxarukiw luqtapxä, kuntix jupax sapkitani uk lurapxarakï —sasa. ²⁵ Uka pachpa uruw Josué chachax, Siquem chiqana, mä suma arust’äwi Israel markampi luräna, ukatsti kamachinakampi, arsutanakampi churäna, ²⁶ ukanaksti Tatitun kamachipa qillqata utjki ukaruw qillqantäna. Ukatsti mä jach’a qala aptasin encina quqa k’uchuruw uchäna, Tatitun qullan chiqawjap jak’ankän ukawjaru, ²⁷ ukatsti Israel markarux sarakïnwa: —Aka qalasti qhanañchirit uchatäniwa, aka qalaw taqi kuntix Tatitux siskistu uk ist’araki. Ukaw jumanakatak irkatirit sayt’ani, Tatitumar jan k’arintapxañamataki —sasa. ²⁸ Ukatsti Josué chachax sapaqat mayniruw uraqinakaparkam khithanukxäna. ²⁹ Ukanak qhipatsti, Nun chachan Josué yuqapax patak tunkani maranïkän ukkhaw jiwxäna. ³⁰ Juparusti Timnat-sérah chiqankir uraqiparuw imt’xapxäna, ukasti Efraín qullunakan jikxatasi, Gaas qullut amsta tuqina. ³¹ Israelitanakax Josué chachan jakañapkama, ukhamarak jiwxäna una qhipatsa, Israelan Tatitu Diosaparupuniw jaysapxäna, kunanaktix Tatitux israelitanak layku lurkatayna ukanak yatir jilïr jaqinakan jakañapkama. ³² Josean ch’akhanakapxa, kawkïrinaktix Israelitanakax Egipto markatpach apanipkatayna ukanaksti, Siquem markankir mä uraqiruw imantxapxäna. Uka uraqxa Jacob chachaw Hamor chachan wawanakapat patak qullqimpi alatayna, Siquem chachan awkipa, ukhamat uka uraqix José chachat saraqir wawanakapar wakt’arakïna. ³³ Kunapachatix Aarón chachan Eleazar yuqapax jiwxän ukkhaxa, juparux Finees wawapan jisk’a qulluparuw imantxapxäna, kawkïrtix Efraín qullunakan churatäkän ukaru.