JONÁS

JONÁS

¹ Mä urux Tatitux Amitai chachan Jonás yuqaparuw säna: ² “Sartam, Nínive jach’a markar saram, ukatsti yatiyanim, ñanqha luratanakapax nayraqataxaruw purini, ukat jupanakar q’al tukjä” sasa. ³ Jonás chachasti Tatitur ist’kpachaxa, nayraqatapat jayar jaltañ amtäna, ukatsti Jope puertor purisin Tarsis tuqir mistuskir mä barco jikxatäna; pasajep alasisinsti, uka barcoruw sarxatawayxäna. ⁴ Ukatsti, lamar qutankapkän ukapachaw Tatitux jach’a ch’aman axsarkay thaya sartayäna, thayasti uka jach’a qutan barcorux t’unjirpachänwa. ⁵ Barco apnaqirinakasti wal axsarayasipxäna, sapa maynirakiw diosapar art’asïna. Ukatsti barcon phisnakïñapatakixa, taqpach q’ipinak qutarkamaw jaquntapxäna. Ukchañkamasti Jonasax barcon q’ipinak uchañ manqhar mantasin, wali sum ikt’asiskäna. ⁶ Barco apnaqir capitanasti Jonasar jak’achasisax sänwa: —¿Kunatarak akan ikisktasti? ¡Sartasim, Diosamar art’asim! Inach khuyapt’ayasisin qhispiyaskistani —sasa. ⁷ Ukchañkamasti, barco apnaqirinakax jupanakkamaw parlakipasipxäna: —Khitis akham jan walir puriñatak juchanïpacha uk jichhaw yatxatañäni —sasa. Juchasti, Jonasaruw mistüna. ⁸ Ukat jupar sapxäna: —Arsum, ¿kunatsa aka t’aqhisiñanakax jiwasxar juti? ¿Kuna lurirïtasa? ¿Kawkitsa jutta? ¿Kawki markankirïtasa? ¿Khitin wila masipätasa? —sasa. ⁹ Jonasasti sarakïnwa: —Nayax hebreo jaqïtwa, qutanaksa, aka uraqsa lurir alaxpachankir Tatit Diosar yupaychirïtwa —sasa. ¹⁰ Jonasax barco apnaqirinakar jupan Tatitur jan ist’as jaltanitap yatiyäna, jupanakasti uk ist’asax walipuniw sustjasipxäna, quta mathapinakasti juk’ampi juk’ampiw sartäna, wasitatsa jiskt’asipkakïnwa: —¿Kunatarak uk lurtasti? ¿Kamachapxämas aka quta mathapinakan t’akurañapatakixa? —sasa. ¹² Jonasasti jupanakarux sänwa: —Qutar jaquntapxita, ukat mathapinakax t’akurxani, nayaw juchanïtxa aka jach’a thayan jumanakxar jutañapataki —sasa. ¹³ Barco apnaqirinakasti taqi ch’amapampiw quta thiya uraqir mistuñatak ñuqt’apxäna, ukampis mathapinakan juk’ampi sartaskakitapatxa janiw misturjamäpkänti. ¹⁴ Ukatsti Tatituruw art’asipxäna: “Tatay, aka jaqin juchap laykux janikiy jiwañanakax munamti, aka jaqitix jan juchanïkasin jiwani ukkhasa, janirakï juchañchapxistati, ukampis jumax Tatay, munañamaruw lurtaxa” sasa. ¹⁵ Uk sasinsti, Jonasarux katuntasin qutaruw jaquntapxi, ukhamat quta mathapinakax t’akurawayxäna. ¹⁶ Ukham uñjasasti, barco apnaqirinakax Tatituruw yupaychapxäna, mä wilañcha luqtapxäna, luräwinak phuqhañatakiw arsupxarakïna. ¹⁷ Ukchañkamasti, Tatitux Jonasar uquntañapatakix mä jach’a chawlla wakichäna. Ukhamat Jonasax kimsa urumpi kimsa arumampi chawlla purak manqhan jikxatasïna.

¹ Jonás chachax, chawlla purak manqhatpach Tatit Diosaparux mayisïna, ² akham sasa: “Tatay, llakisiñaxan jumar art’asinsma, jumasti jaysistawa. Jiwañ manqhatpach jumar art’asinsma, jumasti ist’istawa. ³ Quta manqharuw jaquntista, umasti uksat aksat chhaqtayitu. Jach’a mathapinakas q’al chhaqtayitu. ⁴ Juman nayraqatamat jaqunukut amuyasta, ukatsti sarakiyätwa: ‘Janipuniy Tatitun Qullan Utap uñjkxchïti’ sasa. ⁵ Umanakasti chhaqtayituwa; jach’a qutasti muyuntituwa, chankunakas p’iqixaruw pixturantti. ⁶ Quta manqhan qullunakax qalltki ukkhakamaw jalantta; mik’ayasti wiñayatakis katuntkitaspa ukham amuyasta. Ukampis juma, Tatitu Diosaxaw jiwañat qhispiyista. ⁷ Niya jiwañampïkasin juma Tatitu Diosat amtasta, mayisitaxax Qullan Utamkamaw purini. ⁸ Yaqha diosanakar arkir jaqinakax janiw jumatakjamäkxapxiti; ⁹ ukampis nayax, yuspagarañ arumpiw wilañchanak luqtäma; arsutanakaxsti phuqharakïmawa. ¡Jumakiw qhispiyañatak ch’amanïtaxa!” sasa. ¹⁰ Ukatsti Tatitux chawllaruw mayïna Jonasar waña uraqir waq’sxañapataki.

¹ Tatitux wasitat Jonás chacharux parlxayäna, sarakïnwa: ² “Sartam, ukatsti Nínive jach’a markar saram, kuntix siskäma uka arunak yatiyiri” sasa. ³ Jonás profetasti Tatitun aruparjam lurañatakiw Nínive markar saräna. Uka markasti wali jach’a markänwa; markpach muytañatakisti kimsa uruw wakisïna. Jonás profetasti markar mantasinxa, qhantatit jayp’ukamaw jach’at arnaqasis sarnaqäna, akham sasa: “¡Akat pusi tunka ururux Nínive markax q’ala tukjatäniwa!” sasa. ⁵ Uka markankir jaqinakasti jach’at jisk’akamaw Tatitur iyawsapxäna, ayuno lurañ amtapxarakïna, llakisiñatsa chhankha isinakampiw isthapisipxäna. ⁶ Nínive markan reyipax uka yatiyäwinak ist’käna ukapachasti, qunuñapat sartasin suma isinakap apsusisax chhankha isinakampiw isthapisïna, ukatsti qhillxaruw qunt’asirakïna. ⁷ Ukatsti, reyimpi, jilïrinakapampixa, taqi markpacharuw mä kamachi yatiyapxäna, akham sasa: “Janiw khitis kunsa manq’añapäkiti, uywanakarus janirak manq’añsa, umañsa churapxpati. ⁸ Ukatsipana, llakisiñat taqinis chhankha isinakampi uchasipxam, taqi ch’amampi Tatitur art’asipxam, sapa maynirak jan wali sarnaqäwipa, jan wali luräwinakap jaytanukpan; ⁹ inach Tatitux pampachistani, jach’a phiñasiñapsa apaqtayasini, ukhamat jan jiwarañasataki” sasa. ¹⁰ Ukatsti Tatitux Nínive markankir jaqinakarux jan wali sarnaqäwinakap apanukur uñjäna, ukat jupanakat khuyapt’ayasïna, janirakiw kuna mutuñatix jutañapäkän uksa apayankxänti.

¹ Jonasatakix janiw walïkänti kuntix Tatitux lurkän ukaxa, jupasti walipuniw mayjt’asïna. ² Ukat Tatiturux mayisïna, akham sasa: —Tatay, markaxankaskäyät ukkhax akhamäñapxa yatipuniyätwa. Ukat Tarsis markar jaltañar uchasta, nayax juman khuyapayasiri, llamp’u chuyman Diosätam yattwa, janiw ukspach phiñasktati; jach’a munasiñanïtam laykux mutuyañatak amtkta uksa, amthapisisax janiw ukham lurkxtati. ³ Ukat Tatay, achikt’asinsma, jichhax jakañax apaqxita. Jakaskañat sipansa jiwxañakiw wakisispa —sasa. ⁴ Tatitusti sarakïnwa: —¿Jumatakix walikïskiti chuyma ukham mayjt’ayasitamaxa? —sasa. ⁵ Ukatsti Jonás profetax Nínive markat mistuwayxasinxa, markat inti jalsu tuqiruw purïna, ukatsti, layminakat mä ch’iwirt’asiñ ukawjan lurt’asïna, uka ch’iwir qunt’asisaw suyäna kunarus uka markax tukuni uk uñjañataki. ⁶ Tatit Diosasti Jonasan p’iqipxar ch’iwxatañapatakix mä ali jilsuyäna, ukhamat kusisit jikxatasiñapataki; Jonasasti uka ali utjatapatxa wali kusisitänwa. ⁷ Ukampis qhipür willjtasti, Tatitux uka alir t’urjañapatakix mä laq’u wakichäna, uka alisti pharsuwayxänwa. ⁸ Intix jalsunxäna ukapachasti, Tatitux mä junt’u thaya inti jalsu tuqit thayt’aniñapatak wakichäna, intix wali ch’amampiw Jonasan p’iqipxar junt’untäna, amuyasitapatxa ch’amapas q’ala thayjtatjamänwa, jiwxañak munxäna. Ukat säna: —Jakañat sipansa jiwxañakiw wakisxaspa —sasa. ⁹ Tatitusti juparux jiskt’änwa: —¿Uka alin pharsxatapat phiñasitamax walikïskiti? —sasa. Jonás profetax sarakïnwa: —¡Jïsa, walikïskiwa, phiñasiñatsa niyaw jiwaskta! —sasa. ¹⁰ Tatitusti Jonasarux sarakïnwa: —Janixay jumax uka ricino alirux ayruskstatixa, janixay jilaykarakstasa; mä arumanak alsuwayi, qhipa arumarusti jiwxakirakiwa. Ukampis jumax uka alit khuyapt’ayastawa. ¹¹ Ukatsa juk’ampiw nayan khuyapayasiñaxax Nínive markatakix utjañapa, uka jach’a markan patak pä tunka waranqa, ukatsa jila jaqinakaw utji, wawanakjam jan amuyt’asirinaka, uywanakas waljarakiwa —sasa.