HAGEO

HAGEO

¹ Darío reyin payïr mara markar apnaqatapana, suxtïr phaxsina, nayrïr uru saraqataruw Tatitux Hageo profeta tuqi parläna, Salatiel chachan Zorobabel yuqapampiru, khititix Judá uraqi apnaqirïkäna ukaru, Josadac chachan Josué yuqapampiru, khititix jilïr sacerdotëkän ukampiru. ² Taqi ch’aman Tatitux akham sänwa: “Aka jaqinakax ‘Tatitun utap wasitat sayt’ayañax janïräkiwa’ sasaw sapxi. ⁴ Utaxan laqayar tukuyatäkipansa, ¿jumanakatakisti walikïskiti suma k’achachat utanakan utjasipxañamasti? ⁵ Naya, taqi ch’aman Tatituw sapxsma, ukham sarnaqatanakamat wal amuyt’asipxam. ⁶ Jumanakax wal yapucht’apxtaxa, ukampis juk’ak apthapipxtaxa; manq’apxtawa, ukampis janiw sist’asipktati; umapxtawa, ukampis umat pharjatakïsipktawa; isthapisipxtawa, ukampis janirakiw junt’thapipktati; irnaqatat qullqi katuqapkta ukampix janiw kunsa jikxatapktati. ⁷ Naya, taqi ch’aman Tatituw sapxsma, sarnaqäwinakamat amuyasipxam. ⁸ Qullunakar sarasin lawanak aptanipxam, nayan utax wasitat utachapxam; nayasti ukan k’uchikïyäwa, jach’a kankañax uñacht’ayarakï. ⁹ Jumanakax wal thaqhapxtaxa, ukampis juk’ak jikxatapxtaxa; kuntix utanakaman imasipkta ukanaksti nayax may phust’asakiw ina ch’usar tukuyta. ¿Kunata? Utaxan laqayar tukuyatätapata, jumanakan utanakamatakik llakisipxatamata. Naya, ch’aman Tatituw arsta. ¹⁰ Ukat jumanakatakix jallux jan purxatkiti, uraqis achuykarakiti. ¹¹ Nayaw jallu jan puriykti, pampanakxarusa, qullunakxarusa, trigo yapunakxarusa, uva yapunakxarusa, olivo quqanakxarusa, pampa yapunakxarusa, jaqinakxarusa, uywanakxarusa, ukhamarak taqi luratanakapxarusa” sasa. ¹² Kunapachatix Zorobabelampi, Josué chachampi, ukhamaraki markankir jaqinakampix kuntix Tatitux Hageo profeta tuqi parlkän ukanak ist’asaxa, wal axsarayasipxäna. ¹³ Tatitun yatiyiripa Hageosti, markachirinakar Tatitun arsutap yatiyäna akham sasa: “Tatitux siwa: ‘Nayax jumanakampïsktwa, naya Tatituw arsta’ ” sasa. ¹⁴ Tatitux ukham Judá marka apnaqir Zorobabelampiru, sacerdotenakan Josué jilïripampiru, markachirinakampirux ch’amañcht’äna; ukatsti, suxtïr phaxsina, pä tunka pusin uru saraqataru, Darío reyix Persia marka payïr mara apnaqkän ukkhaw taqi ch’aman Tatitu Diosapan utap wasitat utachañ qalltapxäna.

¹ Paqallqür phaxsina, pä tunka mayan uru saraqatarusti, Tatitux wasitat Hageo profetar parläna, ² ukatsti Zorobabelampiru, Josué chachampiru, taqi jaqinakampir sañapatakiw arsüna: ³ “Khitinakatix nayrïr suma uta uñt’apkän ukanakax sapxpan: ¿Kunjämas jichhax aka machaq utaxa? ¿Janixay kunaparükis nayrïr utat sipanxa? ⁴ ¡Zorobabel, ch’amañcht’asim! ¡Josué, sacerdotenakan jilïripa, jumas ch’amañcht’asirakim! Aka markankir jaqinaka, ch’amañcht’asipxam. Irnaqapxam, nayax jumanakampïsktwa. Naya, taqi ch’aman Tatituw arsta. ⁵ Egipto markat mistunipkta ukapachax jumanakampïñatakiw nayax arsüyäta, ukasti phuqhasiskiwa. Ajayuxaw jumanakampïski, jan axsarapxamti. ⁶ Akat mä juk’arusti nayax alaxpachampi, akapachampi khathatiyä, jach’a qutsa, waña uraqsa khathatiyäwa. ⁷ Taqi markanak khathatiyarakï, ukatsti qamir yänakap apanipxani, nayan utaxasti k’ajkirirakïniwa.” Taqi ch’aman Tatituw arsu: ⁸ “Nayankiw qullqisa, qurisa. ⁹ Aka payïr utasti nayrïr utat sipan k’ajkirïniwa, ukansti suman sarnaqasiñ utjayarakï. Naya, taqi ch’aman Tatituw arsta.” ¹⁰ Darío reyin payïr mara marka apnaqäwipana, llätunkïr phaxsina, pä tunka pusini uru saraqataruw Tatitux Hageo profetar parläna, ¹¹ kamachinak tuqit taqi ch’aman Tatitun sutipar sacerdotenakar jiskt’añapatakiw arsurakïna. Hageo profetasti akham sasaw jupanakar jiskt’äna: ¹² “Sañäni, mä jaqix luqtat aycha isipar llawt’at apaspa, ukat isipan thiyapax t’ant’arusa, manq’arusa, vinorusa, aceiterusa, jan ukax kuna manq’arus purispa ukax: ¿uka laykuti uka manq’ax luqtatäxarakispasti?” Sacerdotenakasti —Janiwa —sapxänwa. ¹³ Hageo profetasti saskakïnwa: “Sañäni, maynitix amaya llamkt’asin q’añuchasispa, ukatsti uka yänakaru llamkt’aspa ukaxa, ¿llamkt’at laykuti uka yänakax q’añu tukurakispasti?” Sacerdotenakasti —Jïsa —sapxarakïnwa. ¹⁴ Ukat Hageo profetax säna: “Tatitux siwa: ‘Aka jaqinakax ukar uñtasitawa. Kunanaktix lurapki, kunanaktix luqtapkitu ukanakas q’añuwa. ¹⁵ Jumanakax akat uksarux wal amuyt’asipxam. Nayan utax janïra utachañ qalltkasa, ¹⁶ ¿kunarak jumanakar kamachapxayätamsti? Kunapachatix jumanakat maynix pä tunka tupu grano aptir sarkän ukkhaxa, tunkak jikxatäna; ukhamaraki, maynix vino lurapkis uka chiqar phisqa tunka wayuchanak vino waytir saräna ukkhasti, pä tunkak jikxatxäna. ¹⁷ Nayaw jumanakan taqi ch’ama tukutanakamxarux qasawimpi, chhijchhimpi q’al tukjtxa, uk uñjkasas jumanakax janiw nayarux jaysapkistati. Naya, taqi ch’aman Tatituw uk arsta. ¹⁸ Jichhüru, llätunkïr phaxsina, pä tunka pusin uru saraqataruw utaxataki nayrïr qala uchantapxtaxa. ¹⁹ Walikiwa, wal amuyasipxam, jichhat uksarux janiw jumanakan pirwanakaman trigox pist’kaniti. Janïraw uva alix achunïkiti, janirakiw higosa, granadosa, olivos achunïkiti; ukampis jichhürut uksarux nayaw jumanakar jilarkir achunak churapxäma.’ ” ²⁰ Ukürpachaw Tatitux wasitat Hageo profetar parläna, ²¹ ukatsti Judá marka apnaqir Zorobabel chachar sañapatakiw arsurakïna: “Nayaw alaxpacha, akapach khathatiyä; ²² akapach apnaqäwinakarus tukjäwa, reyinakan qunuñanakapsa t’unjäwa; nuwasiñatak sarir carronakapsa willthapirakïwa, carronak apirinakarus tukjäwa, caballonakasa, caballonakxat sarir jaqinakas jiwaraniwa; sapaqat mayniw jilapan espadapampi chhuqhuntat jiwarani. ²³ Ukampisa, nayaw Zorobabelarux chhijllasta, ukürusti nayaw munañan kankañax jupar churä. Nayätwa Israel markan Tatitupaxa, arstwa, ukhampun lurä.”