HABACUC

HABACUC

¹ Tatituw mä uñjäwi tuqi Habacuc profetar aka yatiyäwi qhanañchawayi. ² Tatay, ¿kunapachkamarak juman jan ist’kata yanapt’am mayisa arnaqasïmasti? ¿Kunapachkamarak nuwasiñ jan utjañapatak arnaqasïma, qhispiyir jan jutkät ukasti? ³ ¿Kunatarak ukataq llakisiñanaka, t’aqhisiñanaksa uñjayistasti? Nayax t’aqhisiyañanakampi, tukjatäñanakampi muyuntatätwa; taqi chiqansa, ch’axwañanakampi, nuwasiñanakampikiw utjaski. ⁴ Kamachinakax janiw phuqhaskxiti, chiqa uñjäwis takichasitawa, jan wali jaqisti, aski jaqirux arknaqiwa, chiqa uñjañasti maysar uñtayatawa. ⁵ “Kawkïr markanakatix jumanakar muyuntapktam ukanakar uñtapxam; wali sustjasiñamp uñch’ukipxam. Nayax taqi akanak niyaw lurä, maynitix jumanakar taqi akanakat yatiyapxiristam ukkhasa, janiw chiqäpachaw sapkasmati. ⁶ Babiloniankirinakaruw nuwantapxañapatak sartayä, jupanakasti wali qhuru jaqinakäpxiwa, uksarus aksarus sarantañatakix wakicht’atakïsipkiwa, kawkïr uraqinakatix jan jupanakankki ukanak katuntasiñataki. ⁷ Sustjaskaña, axsarkaña jaqinakäpxiwa, jupanakan kamachinakapak ch’amampi phuqhayañ munapxaraki. ⁸ Caballonakapasti leopardo sata laq’unakat sipansa juk’amp jalirinakawa, wasarankir manq’at awtjat qamaqinakat sipansa juk’amp qhurüpxarakiwa. Caballxat jalirinakapasti jach’a tamar tukusaw jalapxi, uñisirinakapar katurpayañatakiw tutukxatapxi, kunjämatix pakax katjañatak thuqxatki ukhama. ⁹ Sarkasasti taq tukjawayapxi; ukham saratapampix wal axsarayapxi, katurat jaqinakaxa quta ch’allanakar uñtat waljanïpxiwa. ¹⁰ Reyinakatsa, jilïr jaqinakatsa phiskasipxiwa, jach’a uyunakapatsa larusipxiwa, ukarusti laq’amp phuqkatasaw uka uyu pata mantasax katuntapxaraki. ¹¹ Mä jach’a tutuk thayjamaw q’al tukjawayapxi, jupanakan ch’amapaw diosapjamaxa.” ¹² Tatay, ¿janit wiñayatak jakkir qullan Diosäktasti? Tatay, jumaw nayan arxatt’irixäta, jumarakiw babiloniankirinakarus ch’am churasin markamar mutuyaraktaxa, ukhamata juman chiqa uñjäwim uñacht’ayañapataki. ¹³ Juman sinti q’umätamatsti, janiw jan wali lurañxa uñjkasmati, janirakiw ñanqha luräwinakarus, walikiw siskasmati; ¿kunjämarak jiwayirinakarus amuk uñch’uktasti? ¿Kunatarak amukïtasti jan wali jaqinakax jupanakat juk’ampi askïpki ukanakar tukjapki ukkhasti? ¹⁴ ¿Kunatsa jumax nanakarux qutankir chawllanakjamak uñjapxista, jan khiti irpirin laq’unakäpkiristsa ukhamsti? ¹⁵ Ukat babiloniankirinakax nanakarux jasak katuntapxitu, kunjämtix chawlla katurix anzuelonakampi, qänanakampi chawllanak katuntapki ukhama. Ukatsti mayar apthapita uñjasax wal kusisi. ¹⁶ Ukatwa chawlla katurix qänanakaparu, anzuelonakaparusa, suma luqtäwinakampi, incienso q’aphinakampi waqaychi, ukanakäpan suma walja manq’anakax utjarapi. ¹⁷ Ukhamasti, ¿babiloniankirinakax qänampjam katurasipkakitaniti? ¿jan jaqit khuyapt’ayasisas jiwarayasipkakpachäniti?

¹ Jichhax wali p’arxtataw uñch’ukï, kunjämatix pirqa patat uñch’ukirix uñch’ukki ukhama, Dios Tatitux kamsitanis nayan arsusitaxarux uk yatiñataki. ² Dios Tatitux sarakituwa: “Kuntix uñacht’aykäma ukxa, mä ñiq’it lurat pallallxar qillqam, ukhamat ullart’añax jasakïni. ³ Aka uñjäwin phuqhasiñapaxa mä juk’a qhiparaniwa; ukampis phuqhasipuniniwa. Amuyatax janisay jank’äkpan, suyaskakim, purisinkaniwa. ⁴ Kunatix qillqañamäki ukax akawa: ‘Ñanqha jaqinakax jach’a jach’aw tukupxi, ukampis aski jaqinakax Tatitur chiq arkatapampiw jakapxani’ sasa.” ⁵ Jach’a jach’a tukur jaqinakax ch’amanïñ munapxi; jan samart’asaw thaqapxi, ch’amanïñax jan walirus puriykchi ukasa, juk’amp munasipkakiwa. Amay imantañatak allsutaxa ukham lakap jist’arapxi, jiwar uñtataw jan sist’asipkiti, ukat markat marka katuntañatak sarapxi. ⁶ Ukampisa taqi katuntata markanakaxa katuntirinakat larusipxaniwa, akham sasaw jayllipxarakini: —¡Ay kunakïkan juma Babiloniatxa, kunatix jan jumankki ukanakampiw qamiriptasktaxa! ¿Kunapachkamas jan jumankki uka qamir yänakampi phuqhantasis sarnaqäta? ⁷ Jan suykäta ukkhaw juman t’aqhisiyirinakamax purintanipxani, axsarañatsa wal khathatiyapxätam, kunanakamatix utjki ukanaksa q’al aparapxarakïtam. ⁸ Markanakax jumar saykatañatakiw mayacht’asipxani, kunjämtix jupanakat aparkta ukhamarak aparapxätam. Jaqinakapar jiwarayatamata, uka markanakan jakirinakar jan walinak luras t’aqhisiyatamatsa phuqhayasipxarakïtamwa. ⁹ ¡Ay kunakïkan juma Babiloniatxa, lunthatat yänakampiw utamar phuqhantayastaxa, ukhamat jan walt’añanakan taqi kunas walikïskañap amuyaraktaxa! ¹⁰ Ukhamat utamxa mä p’inqa tukuytaxa, walja markanakar tukjatamatxa juma kipka tukjatäñaruw purtaxa. ¹¹ Uka uyun qalanakapasa, q’iru lawanakapasa, juma tuqiw arsupxani. ¹² ¡Ay kunakïkan juma Babiloniatxa, markanakamxa jiwayañanakxaru, jan chiqa uñjañanakxaruw sayt’ayaraktaxa! ¹³ Taqi ch’amani Tatitusti, luratanakamxa, jan inakt’atanakamsa inamayaruw tukuyani, taqi luratanakamas ninampi tukjatäniwa. ¹⁴ Dios Tatitun jach’a luräwinakapat yatiñaw taqi akapachar phuqt’arakini, kunjämatix umanakax qutar phuqhantki ukhama. ¹⁵ ¡Ay kunakïkan juma Babiloniatxa, jaqi masinakamaru machjayañataki vinoru jan wali qullanakampi uchas churatamata, ukhamat q’alalakïtap uñjasin jisk’achjañataki! ¹⁶ Jach’añchatäña lantxa, p’inqachjataw uñjasïta, Dios Tatituw mä tilinkit umt’añamatak churätam, ukaw juman q’alalakïtam uñacht’ayätam, jach’a kankañamsa jisk’arurakiw tukuyani. ¹⁷ Kuna jan walinaktix Líbano qulluru lurktaxa ukanakasti jumar saykatiriw kutt’anini, animalanakap jiwaraykta ukas jumanakatakix jach’a sustjasiñäniwa. Taqi akanakasti jaqi jiwarayatanakamata, markpachana, taqi jaqinakapar t’aqhisiyatanakamat jutani. ¹⁸ ¿Kunatakis askix mä diosaxa sum lurt’asin tukuyatäkchi ukaxa? ¿Kunatakis askix jaqin lurt’at mä diosaxa yatichäwinakapas k’arikamakïchi ukaxa? uka yaqha diosanakax janiw parlapkiti; ¿kunjämaraki uka yaqha diosanak lurir jaqisti uka diosanakar atint’asispasti? ¹⁹ ¡Ay kunakïkan juma Babiloniatxa, mä lawat lurat diosar p’arxtam satamaxa, mä amutu qalar sayt’am satamasa! ¿Jupanakasti mä kuna yatiyäwinaksa yatiyapxaspati? Janiwa. Jupanakax janiw jakañanïpkiti, qawqhasay qurimpis qullqimpis jawikipatäsipkpan. ²⁰ Ukampis Dios Tatitux qullan utapankaskiwa: “¡Jupa nayraqatan taqi akapachan jakir jaqinakax amukt’apxpan!”

¹ Akax Habacuc profetan Tatitur mayisitapawa. ² Tatay, kuntix juma tuqit ist’ktxa, ukhamarak taqi luräwinakamatsa, ukasti nayatakix wali muspharkañawa. Kunja jach’a luräwinaktix khä urunakan lurkäyäta ukanakxa, jichhax jakawinakaxan lurakimaya, ukhamat nanakax uka luräwinakam uñt’apxañaxataki. Phiñasiñaman jikxataskasasa, khuyapt’ayasiñam uñacht’ayapxita. ³ Temán uraqit Dios Tatitux juti; Parán qullut qullan Tatitux jutaraki. Jach’a kankañapasti taqi alaxpach phuqhanti, taqi akapachaw kusisiñapan phuqt’araki. ⁴ K’ajkir qhanamp muyuntataw jutaski, amparanakapatsti lliphipkir qhanaw misturaki, taqi ch’amapasti ukamp imantatäskänwa. ⁵ Axsarkañ t’aqhisiñanakaw jupan jutäwip yatiyi, qhipapatsti jach’a usunakaw jutaraki. ⁶ Kunapachatix jupax sayt’ki ukkhax uraqis khathatiwa; uñtäwipampix markanakarus khathatiyiwa; nayrapach jach’a qullunakas allthaptiwa, jisk’a nayra qullunakas ina ch’usaruw tukupxaraki. Ukampis Tatitun thakhinakapax wiñayatakipuniwa. ⁷ Nayax Cusán uraqinkir jaqinakarux t’aqhisiñar puripxatap uñjta, Madián uraqinkir jaqinakarusti axsarañat khathatipxatap uñjarakta. ⁸ Tatay, ¿jawiranakatakix phiñasitätati, jach’a qutanakatakis phiñasitätacha? ¿Ukatti caballonakamar kachxatat jaltaxa, ukatcha atipt’ir carromarus qunt’astaxa? ⁹ Mich’inak antutt’añatakix wakicht’atawa, mich’inakamas wakicht’atarakiwa. Jawir umanakampisti uraqirux sukanakjam jist’artaxa. ¹⁰ Jumar uñjasax jach’a qullunakas khathatipxiwa, Alay qinayanakatsa jallux walipuniw waraqtani, jach’a qutax wararkaspas ukhamawa, mathapinakapas jach’anakaw sartaraki. ¹¹ Mich’inakaman k’ajkir qhanap uñjasaxa, lanzaman llijtatap uñjasasa, intisa, phaxsis janiw mistunkxiti. ¹² Phiñasitaw uraqpachan sarnaqtaxa, markanakarus takichasiraktawa. ¹³ Markamar yanapt’iriw jumax mistunta, juma kipka ajllisktasa uka reyimpiru. Jan wali amtañani jaqinakan jilïripsa t’unjtawa, taqpachaniruw q’alala jan kunani tukjaraktaxa. ¹⁴ Kunapachatix caballxat jalirinakapax mä jach’a thayjama tutukipkäna, pisi ch’amaninakar wali ch’amampi tukjayañataki, jamasan q’al tukjañataki ukapachax jilïriparus kipka mich’inakapampiw jiwarayaraktaxa. ¹⁵ Caballonakamar kachxatatkamaw uka jach’a qutnämsa jaltaxa, jach’a qutan umapsa wal unxtayaraktaxa. ¹⁶ Taqi ukanak ist’asax wal axsarayasta. Laka ispillunakaxas wal khathatiraki, kayunakaxas janiw sayt’asiñatakix ch’amanïkxiti, taqi janchixas janirakiw ch’amanïkxiti. Ukhamäkipansa, jan axsarañampiw suyt’ä, Tatitux jiwasanakar t’aqhisiyirinakar mutuykani ukapachkama. ¹⁷ Janisay higo quqanakax panqarkpan, janisay uva alinakasa, olivonakas achunak churkpan; janisay yapunakax achunak churkpan; oveja tamanakas q’alasay tukusiskpan, janisay uywanakax uyunakan utjkpan, ukampis kusisiñampiw jumarux yupaychäma, jumaw nayan qhispiyirixäta. ¹⁹ Tatitukiw ch’am churitu, kayunakaxarusti tarujan t’ijtañap churitu, alay chiqanakanjamarak irpitu, ukan qhispitäñaxataki.